BTV NEWS

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញស្ទើរគ្រប់ប្រភេទមានកំណើនកើនឡើងល្អប្រសើរ

ត្រីមាសទី១ឆ្នាំនេះ CDC ចុះបញ្ជីគម្រោងវិនិយោគចំនួន ១៤៦ មានទុនប្រមាណ ២,៥ ប៊ីលានដុល្លារ

រយៈពេល៣ខែឆ្នាំ២០២៦នេះ ទីផ្សារអាមេរិកស្រូបយកទំនិញកម្ពុជា មានទឹកប្រាក់ជាង ៣,៣ ពាន់លានដុល្លារ

សេដ្ឋកិច្ច និង កសិកម្ម

ក្រុមប្រឹក្សាពិគ្រោះយោបល់ធុរកិច្ច នឹងបង្កើតឱកាសវិនិយោគ និងធុរកិច្ចរវាងកម្ពុជា និងអូស្រ្តាលី

ភ្នំពេញ៖ កម្ពុជា និងអូស្រ្តាលី បានសម្រេច បង្កើតក្រុមប្រឹក្សាពិគ្រោះយោបល់ធុរកិច្ច ដើម្បីជួយជំរុញទំនាក់ទំនង សេដ្ឋកិច្ច និងពាណិជ្ជកម្មរវាងប្រទេសទាំងពីរ ជាពិសេសបង្កើតទាក់ទាញវិនិយោគចូលមកកម្ពុជា ស្របពេលដែលកម្ពុជា មានច្បាប់វិនិយោគថ្មី និងគ្រប់គ្រងស្ថានភាពជំងឺកូវីដបានល្អប្រសើរ។អនុប្រធានសភាពាណិជ្ជកម្ម ឧកញ៉ា លឹម ហេង យល់ឃើញថា ការបង្កើតក្រុមប្រឹក្សាពិគ្រោះយោបល់ធុរកិច្ច នឹងបង្កលក្ខណៈ និងឱកាសកាន់តែច្រើន សម្រាប់ពាណិជ្ជករកម្ពុជា និងអូស្ត្រាលី សហការវិនិយោគ។ឧកញ៉ា លឹម ហេង មានប្រសាសន៍ថា៖ “ការបង្កើតក្រុមប្រឹក្សាធុរកិច្ចនេះឡើង ជាឱកាសសម្រាប់វិស័យឯកជនជួបទល់មុខគ្នា និងការផ្សព្វផ្សាយសក្តានុពលសេដ្ឋកិច្ចរបស់ប្រទេសកម្ពុជា ទាក់ទាញវិនិយោគពីអូស្រា្តលីមកកាន់ប្រទេសកម្ពុជា ក៏ដូចជាការនាំចេញផលិតផលផ្សេងៗផលិតនៅកម្ពុជា ទៅកាន់ប្រទេសអូស្រ្តាលីផងដែរ”។អនុប្រធានសភាពាណិជ្ជកម្ម បន្តថា ការបង្កើតនេះ គឺស្របពេលដែលកម្ពុជា កំពុងត្រូវការវិនិយោគបន្ថែម ក្រោយកម្ពុជា បានបើកដំណើរការសេដ្ឋកិច្ចលើគ្រប់វិស័យឡើងវិញ ដោយសារការគ្រប់គ្រងបានរបស់រាជរដ្ឋាភិបាល ជាពិសេសច្បាប់វិនិយោគថ្មី ដែលផ្តល់ការលើកទឹកចិត្តដល់វិនិយោគិន។ដោយមានការស្នើសុំពីធុរជនអូស្រ្តាលី និងទទួលបានលិខិតរបស់ក្រសួងពាណិជ្ជកម្ម ស្តីពីការពិនិត្យលទ្ធភាពបង្កើត ក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី, សភាពាណិជ្ជកម្មកម្ពុជា បានឯកភាពគាំទ្រជាគោលការណ៍ទៅលើការបង្កើត ក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី ក្នុងគោលបំណងជួយជំរុញទំនាក់ទំនងសេដ្ឋកិច្ច ពាណិជ្ជកម្មរបស់ប្រទេសទាំងពីរ។ ក្រុមប្រឹក្សានេះ នឹងជួបប្រជុំគ្នាជាទៀងទាត់ ដើម្បីរៀបចំផែនការយុទ្ធសាស្ត្រ និងអនុវត្តន៍សកម្មភាពជំរុញពាណិជ្ជកម្ម និងវិនិយោគទ្វេភាគី រួមមានដូចជា រៀបចំសិក្ខាសាលាធុរកិច្ច បេសកកម្មពាណិជ្ជកម្ម ទស្សនកិច្ចធុរកិច្ច និងសកម្មភាពផ្សេងៗទៀត។ក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី បំពេញភារកិច្ច ដើម្បីផ្តល់យោបល់អំពីការទាក់ទាញការវិនិយោគដោយផ្ទាល់ពីបរទេស និងពាណិជ្ជកម្ម ដើម្បីពង្រឹងនិងអភិវឌ្ឍន៍ការតភ្ជាប់ឧស្សាហកម្មនិងធុរកិច្ចរវាងកម្ពុជា និងអូស្ត្រាលី។ក្រុមប្រឹក្សាពិគ្រោះយោបល់ធុរកិច្ចនេះ ក៏នឹងបង្កលក្ខណៈងាយស្រួល និងតភ្ជាប់ទំនាក់ទំនងជាមួយក្រុមហ៊ុនអូស្ត្រាលី និងក្រុមហ៊ុនអន្តរជាតិ ដើម្បីជំរុញការវិនិយោគ ពាណិជ្ជកម្ម និងទេសចរណ៍មកកាន់កម្ពុជា ៕អត្ថបទ វណ្ណៈ

ការនាំចេញនាំចូលរបស់កម្ពុជា សម្រេចបានជាង ៥២ ពាន់លានដុល្លារ ក្នុងឆ្នាំ២០២២

ភ្នំពេញ៖ ការធ្វើពាណិជ្ជកម្មអន្តរជាតិរបស់កម្ពុជា ក្នុងឆ្នាំ ២០២២ មានទឹកប្រាក់សរុបជាង ៥២ពាន់លានដុល្លារ កើនជាង ៩ភាគរយបើធៀបនឹងឆ្នាំ ២០២១ ខណៈការនាំចេញទំនិញរបស់កម្ពុជាស្ទុះហក់ឡើងជាង១៦ភាគរយ។យោងតាមទិន្នន័យដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ការផ្លាស់ប្ដូរពាណិជ្ជកម្មកម្ពុជាជាមួយនឹងទីផ្សារអន្តរជាតិ ក្នុងឆ្នាំ ២០២២ មានទឹកប្រាក់សរុប ៥២ពាន់លានដុល្លារ កើនឡើង ៩ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលមានទឹកប្រាក់ ៤៨ពាន់លានដុល្លារ។ទិន្នន័យខាងលើឱ្យដឹងទៀតថា ក្នុងឆ្នាំ២០២២ កម្ពុជាបាននាំទំនិញទៅទីផ្សារអន្តរជាតិ ក្នុងចំនួនទឹកប្រាក់សរុប ២២,៤ ពាន់លានដុល្លារ កើនឡើង ១៦,៤ភាគរយពីចំនួន ១៩,៣ ពាន់លានដុល្លារ និងការនាំចូលមានទឹកប្រាក់ ២៩,៩ពាន់លានដុល្លារ មានកំណើន៤,៣ ភាគរយពីចំនួន ២៨,៧ពាន់លានដុល្លារ។បើយោងតាមទិន្នន័យខាងលើ ពាណិជ្ជកម្មអន្តរជាតិរបស់កម្ពុជា ក្នុង ឆ្នាំ២០២២ គឺមានឱនភាពប្រមាណ ៧,៤ពាន់លានដុល្លារ។ទំនិញដែលកម្ពុជានាំចេញទាំងនោះ រួមមាន សំលៀកបំពាក់, ម៉ាស៊ីន និងឧបករណ៍អគ្គិសនី, ផលិតផលស្បែកជើង សម្ភារធ្វើពីស្បែកសត្វ យានក្រៅពីអយស្ម័យយាន, គ្រាប់ធញ្ញជាតិ គ្រឿងសង្ហារឹម កៅស៊ូ, រួមនឹងផលិតផលផ្សេងទៀត ដូចជាផ្លែឈើ បន្លែ គុជខ្យង ប្រដាប់ក្មេងលេង វត្ថុវាយនភណ្ឌកែច្នៃផ្សេងជាដើម។អ្នកជំនាញសេដ្ឋកិច្ច លើកឡើងថា ការកើនឡើងនូវការចេញទំនិញគ្រប់ប្រភេទរបស់កម្ពុជានេះ ដោយសារកម្ពុជា បានអនុវត្តពេញលេញនូវកិច្ចព្រមព្រៀងពាណិជ្ជកម្មសេរី (RCEP) ដែលតាមរយៈទីផ្សារទាំង១៥ ប្រទេសជាសមាជិករបស់ RCEP បានស្រូបយកទំនិញយ៉ាងច្រើនពីកម្ពុជាក្រោមអត្រាពន្ធទាប។ជាមួយគ្នាតាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ដែលបានចូលជាធរមាន ក៏ត្រូវបានអ្នកនាំចេញប្រើប្រាស់អត្ថប្រយោជន៍កិច្ចព្រមព្រៀងនេះ គួរឱ្យកត់សម្គាល់ផងដែរ៕ អត្ថបទ៖ វណ្ណៈ

កម្ពុជា-អូស្រ្តាលី ប្រកាសដាក់ឱ្យប្រើប្រាស់ផ្លូវការគម្រោងអភិវឌ្ឍន៍ថ្នាលឌីជីថលតែមួយ

ភ្នំពេញ៖ ឆ្នាំ២០២៣នេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងឯកឧត្តម ប៉ាប្លូ កំាង (Pablo Kang) ឯកអគ្គរាជទូតអូស្ត្រាលីប្រចាំកម្ពុជា នៅទីស្តីការក្រសួងពាណិជ្ជកម្ម កាលពីរសៀលថ្ងៃទី៩ មករា បានប្រកាសដាក់ឱ្យប្រើប្រាស់នូវឯកសារស្រាវជ្រាវអំពីព័ត៌មានទីផ្សារសំខាន់ៗចំនួន២ និងប្រកាសពីគម្រោងអភិវឌ្ឍន៍ថ្នាលឌីជីថលតែមួយ ដើម្បីជំរុញការធ្វើពាណិជ្ជកម្ម និងវិនិយោគ។ឯកសារស្រាវជ្រាវអំពីព័ត៌មានទីផ្សារសំខាន់ៗចំនួន២ រួមមាន៖ ទី១.កសិផលកម្ពុជាសម្រាប់នាំចេញទៅទីផ្សារសហភាពអឺរ៉ុប និងអាសិប និងទី២. កម្ពុជា និងការបើកទីផ្សារពិភពលោកតាមរយៈកិច្ចព្រមព្រៀងពាណិជ្ជកម្មសេរី ព្រមទាំងបានប្រកាសពីគម្រោងអភិវឌ្ឍន៍ថ្នាលឌីជីថលតែមួយ ក្នុងនោះរួមមាន៖ គេហទំព័រកិច្ចព្រមព្រៀងពាណិជ្ជកម្មសេរី, ប្រព័ន្ធគ្រប់គ្រងស្វ័យបញ្ជាក់ដើមកំណើតទំនិញ និងប្រព័ន្ធផ្ទៀងផ្ទាត់ដើមកំណើតទំនិញជាអន្តរជាតិ ដើម្បីជាជំនួយដល់ធុរជនក្នុងការទាញយកអត្ថប្រយោជន៍ជាអតិបរមា ពីកិច្ចព្រមព្រៀងពាណិជ្ជកម្មសេរីទាំងអស់ដែលកម្ពុជាជាប្រទេសហត្ថលេខី។ ចំពោះសៀវភៅព័ត៌មាន នឹងផ្តល់ព័ត៌មានបច្ចុប្បន្នភាពចុងក្រោយ និងងាយស្រួលយល់ អំពីកិច្ចព្រមព្រៀងពាណិជ្ជកម្មសេរីទ្វេភាគី និងតំបន់ ដែលកម្ពុជា ជាប្រទេសហត្ថលេខី មានជាអាទិ៍៖ កិច្ចព្រមព្រៀងអាសិប, កិច្ចព្រមព្រៀងពាណិជ្ជកម្មសេរី កម្ពុជា-ចិន និងកិច្ចព្រមព្រៀងពាណិជ្ជកម្មសេរី កម្ពុជា-កូរ៉េជាដើម។ សៀវភៅនេះដែរនឹងជួយដល់សហគ្រាសកសិ-ម្ហូបអាហារ ផលិតករ អ្នកនាំចេញ សមាគមធុរកិច្ច និងអ្នកពាក់ព័ន្ធដទៃទៀត ដើម្បីចាប់យកនូវកាលានុវត្តភាពពីការធ្វើពិពិធកម្មទីផ្សារ និងទទួលបានអត្ថប្រយោជន៍នានាក្រោមកិច្ចព្រមព្រៀងពាណិជ្ជកម្មសេរីទាំងនេះ។ដោយឡែក ថ្នាលឌីជីថលតែមួយ គ្រោងអភិវឌ្ឍន៍ឡើងតាមលំអានរបស់គេហទំព័រកិច្ចព្រមព្រៀងពាណិជ្ជកម្មសេរីរបស់អូស្ត្រាលីផ្ទាល់ ហើយក៏នឹងក្លាយជាកន្លែងផ្ទុកព័ត៌មានពាណិជ្ជកម្មដ៏ទូលំទូលាយសម្រាប់អ្នកនាំចេញ និងអ្នកនាំចូល ក្នុងការស្វែងរក និងទាញអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីទាំងអស់របស់កម្ពុជា។តាមឯកឧត្តមរដ្ឋមន្រ្តី ប៉ាន សូរស័ក្តិ បានមានប្រសាសន៍ថា គម្រោងអភិវឌ្ឍន៍ថ្នាលឌីជីថលតែមួយ នឹងជួយកម្ពុជាក្នុងការសម្រេចបានយ៉ាងពេញលេញនូវការសន្យារបស់ខ្លួនក្រោមកិច្ចព្រមព្រៀងពាណិជ្ជកម្មសេរីមួយចំនួនដូចជា កិច្ចព្រមព្រៀងពាណិជ្ជកម្មទំនិញអាស៊ាន, កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ, កិច្ចព្រមព្រៀងពាណិជ្ជកម្មសេរីអាស៊ាន អូស្ត្រាលី នូវែលហ្សេឡង់ និងកិច្ចព្រមព្រៀង អាសិប។ជាមួយគ្នានេះភាគីអូស្រ្តាលី សង្ឃឹមថា មគ្គុទ្ទេសក៍ទាំងនេះ និងថ្នាលឌីជីថលតែមួយដែលនឹងអភិវឌ្ឍន៍ឡើងនាពេលខាងមុខ នឹងធ្វើឱ្យធុរជន និងពាណិជ្ជករទាំងអស់ កាន់តែមានភាពងាយស្រួលក្នុងការទទួលបានព័ត៌មានដែលមានប្រយោជន៍ ដើម្បីបង្កើនការធ្វើពាណិជ្ជកម្ម៕អត្ថបទ៖ ឈិត បូរ៉ាវី

អាកាសយានដ្ឋានអន្តរជាតិសៀមរាបអង្គរ នឹងបើកឱ្យដំណើរការនៅខែតុលាឆ្នាំ២០២៣

សៀមរាប៖ ប្រធានគណៈកម្មការតម្រង់ទិសសម្រាប់ការសាងសង់អាកាសយានដ្ឋាន អន្តរជាតិសៀមរាបអង្គរ ឯកឧត្តម តឹករ៉េត សំរេច បានបញ្ជាក់ថា អាកាសយានដ្ឋានអន្តរជាតិសៀមរាប នឹងបើកឱ្យដំណើរការ នៅខែតុលា ឆ្នាំ២០២៣ ខណៈគិតត្រឹមថ្ងៃទី៣១ ខែធ្នូ ឆ្នាំ២០២២នេះ គម្រោងទាំងមូលសម្រេចបាន ៦៣%។ឯកឧត្តម តឹករ៉េត សំរេច បានបញ្ជាក់បែបនេះ តាមរយៈកិច្ចប្រជុំបូកសរុបការងារប្រចាំឆ្នាំ២០២២ និងទិសដៅការងារឆ្នាំ២០២៣ របស់គណៈកម្មការតម្រង់ទិសសម្រាប់ការសាងសង់ អាកាសយានដ្ឋានអន្តរជាតិសៀមរាបអង្គរ នាថ្ងៃទី៩ ខែមករា ឆ្នាំ២០២៣នេះ។ ផ្អែកតាមសមិទ្ធផលជាក់ស្តែង តាមរយៈការត្រួតពិនិត្យការដ្ឋានផ្ទាល់ និងរបាយការណ៍វឌ្ឍនភាពក្រុមហ៊ុន ឯកឧត្តម តឹករ៉េត សំរេច ប្រធានគណៈកម្មការតម្រង់ទិស បានធ្វើការកោតសរសើរ និងវាយតម្លៃខ្ពស់ចំពោះក្រុមមហ៊ុន AIAI ដែលបានយកចិត្តទុកដាក់ខ្ពស់ និងផ្តល់ភាពសំខាន់យ៉ាងខ្លាំងចំពោះគម្រោងនេះ ហើយបានអនុវត្តគម្រោងទទួលបានជោគជ័យយ៉ាងខ្លាំងដូចដែលបានឃើញនៅថ្ងៃនេះ ទោះក្នុងកាលៈទេសៈដែលពិភពលោកបាននិងកំពុងជួបវិបត្តិយ៉ាងខ្លាំងក៏ដោយ។ ឯកឧត្តមប្រធាន ក៏បានថ្លែងអំណរគុណដល់សមាជិកគណៈកម្មការទាំងអស់ និងគ្រប់ភាគីពាក់ព័ន្ធដែលបានជ្រោមជ្រែង សម្របសម្រួល និងគាំទ្រ រហូតយើងសម្រេចបានសមិទ្ធិផលនៅពេលនេះ។ ឯកឧត្ដមថ្លែងថា «តាមរយៈសមិទ្ធិផលឃើញថ្ងៃនេះ យើងអាចវាយតម្លៃបានថា ពេលវេលាលំបាកបំផុតក្នុងការអនុវត្តគម្រោងសាងសង់ឱ្យសម្រេចជោគជ័យនេះ គឺពួកយើងបានឆ្លងផុតហើយ នៅសល់តែការងារតិចតួចប៉ុណ្ណោះ ដែលយើងត្រូវបន្តអនុវត្តឱ្យបានចប់នៅដំណាច់ខែមីនា ឆ្នាំ២០២៣ និងការងារបើកឱ្យដំណើរការ នៅខែតុលា ឆ្នាំ២០២៣»។ តាមរបាយការណ៍បូកសរុបការងាររបស់ក្រុមហ៊ុន AIAI ដែលជាក្រុមហ៊ុនអនុវត្តគម្រោង គិតត្រឹមថ្ងៃទី៣១ ខែធ្នូ ឆ្នាំ២០២២នេះ គម្រោងទាំងមូលសម្រេចបាន ៦៣% ដែលយឺតតិចតួចជាងការគ្រោងទុកកាលពីដើមឆ្នាំគឺ ៧០% ដោយសារតែការរាំងស្ទះនៃការនាំចូលឧបករណ៍បរិក្ខាសំណង់ពីប្រទេសចិនបណ្តាលមកពីបញ្ហាកូវីដ១៩។ ជាមួយគ្នានេះ ក្រុមហ៊ុនបានដាក់ចេញនូវផែនការ២០២៣ និងធ្វើការប្តេជ្ញាចិត្តខ្ពស់ នឹងសម្រេចឱ្យការងារសាងសង់នេះឱ្យបាន ៩០% នៅត្រឹមដំណាច់ខែមីនា ឆ្នាំ២០២៣។ ឯកឧត្ដម បញ្ជាក់ថា កំឡុងពេលបន្តទៀតនេះ គឺជាដំណាក់កាលចាប់ផ្តើមអនុវត្តផែនការប្រតិបត្តិការ ដែលក្រុមហ៊ុនអនុវត្តគម្រោង និងក្រសួងស្ថាប័នពាក់ព័ន្ធ ត្រូវរួមគ្នាសម្រេចឱ្យបានតាមផែនការដែលបានឯកភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តីនៃប្រទេសកម្ពុជារួចហើយ៕អត្ថបត្ថ៖ វ៉ន ដារ៉ា

CDC ផ្សព្វផ្សាយច្បាប់វិនិយោគថ្មី ទាក់ទាញវិនិយោគ និងលើកទឹកចិត្តដល់វិនិយោគិនក្នុងស្រុក និងប្រទេស

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានផ្សព្វផ្សាយច្បាប់វិនិយោគថ្មី ដែលផ្តល់លើកទឹកចិត្តដល់វិនិយោគិនក្នុងស្រុក និងប្រទេស ជាការលើការលើកកម្ពស់ឱកាសវិនិយោគ ដើម្បីចូលរួមដល់កំណើនសេដ្ឋកិច្ចកម្ពុជា ។លោក សួន សុផល ប្រធាននាយកដ្ឋានទំនាក់ទំនងសាធារណៈ និងជំរុញការវិនិយោគឯកជន នៃក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងវេទិកា ស្តីពីការជំរុញពាណិជ្ជកម្មនិងវិនិយោគកម្ពុជា-ចិន នៅចុងសប្តាហ៍កន្លងមកថា កម្ពុជាបានផ្តល់នូវភាពអំណោយផលគ្រប់បែបយ៉ាង និងបានបង្ករលក្ខណៈងាយស្រួល ចំពោះអ្នកវិនិយោគក្នុងស្រុក និងវិនិយោគិនបរទេសនៅក្នុងស្រុក ។ លោកបន្តថា ច្បាប់វិនិយោគកម្ពុជា គឺជាការលើក ទឹកចិត្ត ចំពោះវិនិយោគិនអនុវត្តនូវទង្វើធុរកិច្ចរបស់ខ្លួនដោយការទទួលខុសត្រូវនេះ ក្នុងនោះប្រសិនក្រុមហ៊ុនចំណាយការទិញវត្ថុ ធាតុដើមក្នុងស្រុក នឹងវិនិយោគិននឹងទទួលបានការលើកទឹកចិត្តដោយមិនជាប់ពន្ធ, ចំពោះការបណ្តុះបណ្តាលជំនាញផ្សេងៗ ដល់កម្មករ-កម្មារិនីនៅក្នុងក្រុមហ៊ុន ក៏ត្រូវបានទទួលការលើកទឹកចិត្តផងដែរ ព្រោះកម្ពុជាចង់ប្រកួតប្រជែងគុណភាព មិនត្រឹមតំបន់ នោះឡើយ គឺកម្ពុជាមានមហិច្ឆតាចង់ប្រកួតប្រជែងលើពិភពលោកទាំងមូល។ លោក សួន សុផល បន្ថែមឲ្យដឹងថា ក្នុងឆ្នាំ ២០២២ កម្ពុជាបានទាក់ទាញគម្រោងវិនិយោគសរុប ៤ ៦៨៥ លានដុល្លារអាមេរិក កើនឡើងប្រមាណជា ៧,៥ ភាគរយ បើធៀបទៅនឹងឆ្នាំ ២០២១ ក្នុងនោះគម្រោងវិនិយោគក្នុងស្រុក មានទុនវិនិយោគប្រមាណជា ២ ៧០៧ លានដុល្លារអាមេរិក ស្មើនឹង ៥៧ ភាគរយ នៃការវិនិយោគសរុប ខណៈការវិនិយោគពីបរទេសបានថយចុះ ហើយនៅក្នុងនោះ ប្រទេសចិនបាននាំមុខ ដោយមានទុនសរុប ១ ៤០៨ លានដុល្លារអាមេរិក ស្មើនឹង ៣០ ភាគរយ៕អត្ថបទ៖ សុន រ៉ាឌី

កម្ពុជាទទួលបានគម្រោងវិនិយោគ មានទុនសរុបជាង ៤,៦ពាន់លានដុល្លារឆ្នាំ២០២២

ភ្នំពេញ៖ កម្ពុជាបានទាក់ទាញការវិនិយោគ មានតម្លៃវិនិយោគសរុប ចំនួន ៤,៦៨ ពាន់លានដុល្លារក្នុងឆ្នាំ២០២២ កើនឡើង ៧,៥ ភាគរយ ធៀបនឹងឆ្នាំមុន។របាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញកាលពីថ្ងៃសុក្រថា វិនិយោគិនបរទេសសំខាន់ៗ មកពីប្រទេសចិន ជប៉ុន ប្រទេសថៃ និងសិង្ហបុរី ដោយវិនិយោគភាគច្រើនផ្តោតលើវិស័យកសិកម្ម និងកសិឧស្សាហកម្ម ផលិតកម្ម ទេសចរណ៍ និងហេដ្ឋារចនាសម្ព័ន្ធជាដើម។របាយការណ៍ បន្ថែមថា គម្រោងវិនិយោគនៅក្រៅតំបន់សេដ្ឋកិច្ចពិសេស មានតម្លៃសរុប ៣,៥ ពាន់លានដុល្លារ កើនឡើង ៤៩ ភាគរយ ធៀបនឹងឆ្នាំ២០២១។ដោយឡែក គម្រោងវិនិយោគ ក្នុងតំបន់សេដ្ឋកិច្ចពិសេសបានធ្លាក់ចុះ ៣៩ ភាគរយមកនៅត្រឹម ១ ២៣៥ លានដុល្លារ។របាយការណ៍របស់ CDC បានបញ្ជាក់ថា គម្រោងវិនិយោគដោយវិនិយោគិនក្នុងស្រុកមានទុនសរុប ២,៧ ពាន់លានដុល្លារ ស្មើនឹង៥៧ ភាគរយនៃទុនវិនិយោគសរុប ខណៈដែលការវិនិយោគបរទេសពីប្រទេសចិន ឈរលើលេខពីរ មានទុនវិនិយោគចំនួន ១,៤ ពាន់លានដុល្លារ ឬ ៣០ភាគរយ។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ការគ្រប់គ្រងប្រកបដោយប្រសិទ្ធភាពនៃស្ថានភាព Covid-១៩ ច្បាប់វិនិយោគថ្មី និងការអនុគ្រោះពាណិជ្ជកម្មក្រោមកិច្ចព្រមព្រៀងពាណិជ្ជកម្មសេរីជាមួយប្រទេសដទៃ បានផ្តល់សន្ទុះដល់កម្ពុជាក្នុងការទាក់ទាញការវិនិយោគថ្មីៗ។ឧកញ៉ា លឹម ហេង បន្ថែមថា វិនិយោគមួយចំនួនបានកំពុងរើរោងចក្រចេញពីប្រទេសដែលកំពុងមានការឆ្លងជំងឺកូវីដ១៩ខ្លាំង ដែលការណ៍នេះ បានផ្តល់ឱកាសដល់កម្ពុជា ដែលជាប្រទេសមានសក្តានុពល ជាពិសេសការគ្រប់គ្រងកូវីដ១៩បានល្អ ទទួលបានគម្រោងវិនិយោគថ្មីៗបន្ថែម៕អត្ថបទ៖ វណ្ណៈ

ការសាងសង់ប្រលានយន្តហោះអន្តរជាតិភ្នំពេញ សម្រេចបាន ៥០ភាគរយ និងបណ្ដាខេត្តស្ទើរ ១០០ភាគរយ

ភ្នំពេញ៖ ឯកឧត្ដម ជា អូន រដ្ឋលេខាធិការប្រចាំការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានបញ្ជាក់ថា ទោះបីក្នុងស្ថានភាពវិបត្តិកូវីដ១៩ កំពុងរីករាលដាលនៅទូទាំងសកលលោកចាប់តាំងពីឆ្នាំ២០២០ រហូតមក។ ប៉ុន្ដែការសាងសង់ប្រលានយន្តហោះអន្តរជាតិភ្នំពេញ ខេត្តសៀមរាប កោះកុង និងខេត្តព្រះសីហនុក៏បន្តធ្វើតាមផែនការ។ ឯកឧត្ដម ជា អូន បានថ្លែងប្រាប់ ទូរទស្សន៍ BTV ក្នុងកិច្ចសម្ភាសន៍កាលពីថ្ងៃទី៤ ខែមករា ឆ្នាំ២០២៣នេះ ថា បច្ចុប្បន្នរាជរដ្ឋាភិបាលកម្ពុជា ដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កំពុងបន្តពង្រីកសក្ដានុពលលើវិស័យអាកាសចរស៊ីវិលកម្ពុជា បង្កើតចំនួនទេសចរ និងការដឹកជញ្ជូនបន្ថែមទៀតតាមរយៈជើងហោះហើមកកាន់ប្រទេសកម្ពុជា។ ឯកឧត្ដម បញ្ជាក់ថា៖«ក្នុងបរិបទកូវីដ១៩ ដែលបានប៉ះពាល់នៅទូទាំងពីភពលោក គឺយើងបានឃើញភាពឈ្លាសវៃរបស់ សម្ដេចតេជោ បានចាក់ស្រោចវ៉ាក់សាំងដល់ប្រជាពលរដ្ឋនៅទូទាំងប្រទេស ដូច្នេះកម្មករដែលធ្វើការនៅការដ្ឋានសាងសង់ប្រលានយន្តហោះ ក៏ដូចជាហេដ្ឋារចនាសម្ព័ន្ធដទៃទៀត មិនឈប់ឈរឡើយ»។ឯកឧត្ដម បានឱ្យដឹងថា បច្ចុប្បន្នការសាងសង់ប្រលានយន្តហោះអន្រជាតិភ្នំពេញដែលមួយផ្នែកខ្លះស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងដីខ្លះស្ថិតនៅក្នុងស្រុកបាទី ខេត្តតាកែវ បច្ចុប្បន្នសាងសង់បានប្រមាណ ៥០ភាគរយ ហើយគ្រោងបញ្ចប់ការសាងសង់ជំហានដំបូងនៅឆ្នាំ២០២៤។ចំណែកប្រលានយន្តហោះថ្មីនៅក្នុងខេត្តសៀមរាប ក៏មានវឌ្ឍនភាពច្រើនដែរ ហើយឯកឧត្ដម ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិលកម្ពុជា តែងតែដឹកនាំក្រុមការងារចុះទៅពិនិត្យដែរ ដើម្បីជួយលើកទឹកចិត្ត និងផ្ដល់យោបល់។ ដូច្នេះយើងសង្ឃឹមថា នៅអំឡុងខែ មីនា ឬខែមេសា ខាងមុខនេះ ការសាងសង់នឹងបញ្ចប់ជិត ៩០ ភាគរយ ហើយនាអំឡុងខែ តុលាឆ្នាំនេះ យើងនឹងបើកសាកល្បងធ្វើការហោះហើរ។ រីឯប្រលាណយន្តហោះអន្តរជាតិខេត្តព្រះសីហនុ ដែលបានធ្វើការពង្រីកនោះ នាអំឡុងពេលកូវីដ១៩ រយៈពេលជាង ២ ឆ្នាំកន្លងមកនេះ គឺបានធ្វើការពង្រីកការស្ថាបនាបាន ១០០ ភាគរយហើយ។ ដោយឡែក ប្រលានយន្តហោះអន្តរជាតិខេត្តកោះកុង ដែលមានទីតាំងស្ថិនៅស្រុកគិរីសាគរ ការសាងសង់ ក៏សម្រេចបាន ៩០ ភាគរយដែរ៕ អត្ថបទ៖ វ៉ន ដារ៉ា

សភាពាណិជ្ជកម្មកម្ពុជា នឹងបង្កើតក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី

ភ្នំពេញ៖ សភាពាណិជ្ជកម្មកម្ពុជា នឹងបង្កើតក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី ដើម្បីជួយជំរុញទំនាក់ទំនងសេដ្ឋកិច្ច ពាណិជ្ជកម្មរបស់ប្រទេសទាំងពីរ។ក្នុងសេចក្តីប្រកាសព័ត៌មានចេញផ្សាយនៅថ្ងៃទី៥ ខែមករា សភាពាណិជ្ជកម្មកម្ពុជា លើកឡើងថា ដោយមានការស្នើសុំពីធុរជនអូស្រ្តាលី និងទទួលបានលិខិតរបស់ក្រសួងពាណិជ្ជកម្ម ស្តីពីការពិនិត្យលទ្ធភាពបង្កើត ក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី, សភាពាណិជ្ជកម្មកម្ពុជា បានឯកភាពគាំទ្រជាគោលការណ៍ទៅលើការបង្កើត ក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី ក្នុងគោលបំណងជួយជំរុញទំនាក់ទំនងសេដ្ឋកិច្ច ពាណិជ្ជកម្មរបស់ប្រទេសទាំងពីរ ។ក្រុមប្រឹក្សានេះ នឹងជួបប្រជុំគ្នាជាទៀងទាត់ ដើម្បីរៀបចំផែនការយុទ្ធសាស្ត្រ និងអនុវត្តន៍សកម្មភាពជំរុញពាណិជ្ជកម្ម និងវិនិយោគទ្វេភាគី រួមមានដូចជា រៀបចំសិក្ខាសាលាធុរកិច្ច បេសកកម្មពាណិជ្ជកម្ម ទស្សនកិច្ចធុរកិច្ច និងសកម្មភាពផ្សេងៗទៀត។ក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី បំពេញភារកិច្ច ដើម្បីផ្តល់យោបល់អំពីការទាក់ទាញការវិនិយោគដោយផ្ទាល់ពីបរទេស និងពាណិជ្ជកម្ម ដើម្បីពង្រឹងនិងអភិវឌ្ឍន៍ការតភ្ជាប់ឧស្សាហកម្មនិងធុរកិច្ចរវាងកម្ពុជា និងអូស្ត្រាលី ។ក្រុមប្រឹក្សាពិគ្រោះយោបល់ធុរកិច្ចនេះ ក៏នឹងបង្កលក្ខណៈងាយស្រួល និងតភ្ជាប់ទំនាក់ទំនងជាមួយក្រុមហ៊ុនអូស្ត្រាលី និងក្រុមហ៊ុនអន្តរជាតិ ដើម្បីជំរុញការវិនិយោគ ពាណិជ្ជកម្ម និងទេសចរណ៍មកកាន់កម្ពុជា។ការដោះពាណិជ្ជកម្មរវាងប្រទេសកម្ពុជា និងអូស្រ្តាលី សម្រេចបានទឹកប្រាក់ ជិត៥០០លានដុល្លារ ក្នុងរយៈពេល១១ខែឆ្នាំ២០២២ មានកំណើន៧០ភាគរយ ធៀបនឹងរយៈពេលដូចគ្នាកាលពីឆ្នាំមុន។ កម្ពុជា មានចេញទៅអូស្រ្តាលី មានទឹកប្រាក់ ៣៤៦លានដុល្លារ កើនឡើង ៩៧ភាគរយ៕ អត្ថបទ វណ្ណៈ

កម្ពុជានាំចេញកសិផលមានបរិមាណសរុប ជាង៨លានតោន ក្នុងរយៈពេល១១ខែឆ្នាំ២០២២

ភ្នំពេញ៖ កម្ពុជាបាននាំចេញកសិផល និងផលិតផលកែច្នៃចេញពីកសិកម្ម ប្រមាណ ៨,២ លានតោន ក្នុងរយៈពេល១១ខែឆ្នាំ២០២២ ទៅកាន់ទីផ្សារអន្តរជាតិ មានដូចជាទីផ្សារប្រទេសចិន អឺរ៉ុប និងអាស៊ី។របាយការណ៍ពីក្រសួងកសិកម្ម រុក្ខាប្រមាញ់ និងនេសាទ ចេញផ្សាយកាលពីថ្ងៃទី៥ ខែមករា បានបង្ហាញថា ការនាំចេញកសិកផលទៅកាន់ប្រទេសចិន មានបរិមាណសរុប ៦៨៩ ៧០២តោន និងទីផ្សារអឺរ៉ុប ១៨៦ ៨៩៧ តោន និងទីផ្សារអាស៊ី ៤,២លានតោន។កសិផលសំខាន់ នាំចេញទៅទីផ្សារប្រទេសចិន មានដូចជា គ្រាប់ស្វាយចន្ទីឆៅ ម្រេច ថ្នាំជក់ គ្រាប់ស្វាយចន្ទីកែច្នៃ គ្រាប់ពោត កាកសំណល់ដំឡូងមី ដំណាប់ស្វាយ ចំណិតដំឡូងមី ផ្លែស្វាយស្រស់ ម្សៅដំឡូងមី អង្ករ និងផ្លែចេកស្រស់។ចំណែកទីផ្សារអឺរ៉ុប កម្ពុជា នាំចេញកសិផលដូចជា គ្រាប់ស្វាយចន្ទីកែច្នៃ ថ្នាំជក់ បន្លែចំរុះ ដំណាប់ស្វាយ ម្រេច ម្សៅដំឡូងមី អង្ករ ជាដើម។ក្រសួងកសិកម្ម រុក្ខាប្រមាញ់ និងនេសាទ មានមហិច្ឆិតាខ្ពស់ ពង្រឹងឧត្តមភាពសម្រាប់ការប្រកួតប្រជែង និងមានយុទ្ធសាស្ត្រជំរុញការនាំចេញផលិតផលដែលមានគុណភាពខ្ពស់ និងលក់បានតម្លៃខ្ពស់ ដើម្បីឆ្លើយតបទៅនឹងតម្រូវការជាក់ស្តែងនៃទីផ្សារ។ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លើកឡើងនៅក្នុងសន្និសីទសារព័ត៌មាន ស្តីពីទស្សនទានក្នុងវិស័យកសិកម្មនៅកម្ពុជា នៅថ្ងៃទី ៥ ខែ មករា ឆ្នាំ ២០២៣ នេះ ចំពោះទីផ្សារនាំចេញ ក្រសួងក៏មានទស្សនទានជាយុទ្ធសាស្ត្រ គឺជំរុញការនាំចេញផលិតផលដែលមានគុណភាពខ្ពស់ និងលក់បានតម្លៃខ្ពស់ ឬហៅថា ផលិតផលគន្លឹះ ឬផលិតផលប្រណិត។ កម្ពុជាមិនអាច មិនត្រូវប្រកួតប្រជែងជាមួយប្រទេសជិតខាង ដោយផ្អែកលើបរិមាណ និងតម្លៃទាបនោះទេ ដោយសារកត្តាថ្លៃដើមខ្ពស់ ទាំងក្នុងការផលិត និងដឹកជញ្ជូន។ ឯកឧត្តម បញ្ជាក់ថា ដើម្បីសម្រេចគោលដៅនេះ ក្រសួងកសិកម្ម ត្រូវទទួលបន្ទុករៀបចំប្រព័ន្ធផលិតកម្មកសិកម្មមួយដែលមានប្រសិទ្ធភាពខ្ពស់ និងឆ្លើយតបទៅនឹងតម្រូវការជាក់ស្តែងនៃទីផ្សារ ទាំងបរិមាណ និងគុណភាព, នោះគឺជាប្រព័ន្ធផលិតកម្មដែលមានការចូលរួមសហការ និងអនុវត្តរួមគ្នាពីគ្រប់តួអង្គទាំងអស់ ដោយមានយន្តការគ្រប់គ្រង និងសម្របសម្រួលច្បាស់លាស់ ហើយតាមរយៈនេះ រដ្ឋនឹងដើរតួនាទីច្រើនជាងមុន ដើម្បីផ្ដល់ការគាំទ្រ និងសម្របសម្រួល សំដៅអនុវត្តផែនការផលិតកម្មម៉ត់ចត់ ដែលឆ្លើយតបទៅនឹងទីផ្សារ ៕ អត្ថបទ វណ្ណៈ

ផ្សារលក់រាយល្បីឈ្មោះរបស់អាមេរិក Walmart គ្រោងពង្រីកអាជីវកម្មនៅកម្ពុជា

ភ្នំពេញ៖ Walmart ក្រុមហ៊ុនផ្សារលក់រាយល្បីឈ្មោះនៅសហរដ្ឋអាមេរិក កំពុងស្វែងរកឱកាសវិនិយោគ ដើម្បីពង្រីកអាជីវកម្មរបស់ខ្លួន នៅក្នុងប្រទេសកម្ពុជា។ ដំណាងក្រុមហ៊ុន Walmart លោកស្រី Anbinh Phan បានលើកឡើងនៅគម្រោងរបស់ក្រុមហ៊ុន ក្នុងកិច្ចប្រជុំតាមអនឡាញ ជាមួយ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម កាលពីថ្ងៃទី៥ ខែមករា ឆ្នាំ២០២៣។លោកស្រី បានជម្រាបផងដែរថា ក្រុមហ៊ុន Walmart មានបំណងពង្រីកអាជីវកម្មរបស់ខ្លួន និងធ្វើកិច្ចសហប្រតិបត្តិការពង្រឹងភាពជាដៃគូ ក្នុងសកម្មភាពធុរកិច្ច វិនិយោគ ក្នុងប្រទេសកម្ពុជា ដើម្បីបង្កើតការងារជូនប្រជាជនកម្ពុជា ជាពិសេសស្រ្តី ជំរុញកំណើនសេដ្ឋកិច្ច និងកាត់បន្ថយភាពក្រីក្រ។ក្រុមហ៊ុន Walmart នៅតែជាដៃគូពាណិជ្ជកម្មដ៏ល្អ ជាមួយអ្នកផលិតនៅកម្ពុជា លើវិស័យសំលៀកបំពាក់ វាយនភណ្ឌ និងកសិកម្ម។លោកស្រី Anbinh Phan ក៏បានកោតសរសើរ និងវាយតម្លៃខ្ពស់ចំពោះសមត្ថភាពក្នុងការគ្រប់គ្រងស្ថានភាពនៃជំងឺកូវីដ-១៩ ដ៏មានប្រសិទ្ធភាពរបស់រាជរដ្ឋាភិបាលកម្ពុជា និងបានអបអរសាទរជូនក្រសួងពាណិជ្ជកម្ម ក្នុងការសម្រេចបាននូវកិច្ចព្រមព្រៀងពាណិជ្ជកម្មសេរីថ្មីៗ ដូចជា RCEP កម្ពុជា-ចិន កម្ពុជា-កូរ៉េ ជាដើម។ឯកឧត្តមរដ្ឋមន្រ្តី បានស្វាគមន៍ ចំពោះ តំណាងក្រុមហ៊ុន Walmart និងសហការី ដែលបានស្នើសុំការសហការពីក្រសួងពាណិជ្ជកម្មនៅក្នុងការពង្រីកធុរកិច្ចរបស់ខ្លួននៅក្នុងប្រទេសកម្ពុជា និងបានវាយតម្លៃខ្ពស់នូវការបញ្ជាទិញរបស់ក្រុមហ៊ុន Walmart នូវផលិតផលសំលៀកបំពាក់ និងសម្ភារៈធ្វើដំណើរពីកម្ពុជា។លើសពីនេះ ឯកឧត្តមរដ្ឋមន្រ្តី បានសម្តែងនូវសេចក្តីរីករាយ និងគាំទ្រពេញទំហឹង ចំពោះគោលបំណងរបស់ក្រុមហ៊ុន Walmart ក្នុងការទិញទំនិញពីកម្ពុជាបន្ថែមទៀត ដូចជាផលិតផលគ្រឿងសង្ហារឹម អេឡិចត្រូនិក និងជាពិសេសផលិតផលកសិកម្មសំខាន់ៗពីកម្ពុជា ដែលបំពេញបានតាមស្តង់ដារអន្តរជាតិ។ ការជំរុញទិញផលិតផលបន្ថែមពីកម្ពុជាគឺសំដៅរួមចំណែកក្នុងការបង្កើតការងារ កាត់បន្ថយភាពក្រីក្រ និងអភិវឌ្ឍន៍សេដ្ឋកិច្ចកម្ពុជា។ឯកឧត្តម លើកឡើងថា ក្រសួងពាណិជ្ជកម្ម នឹងបន្តកិច្ចសហការជាមួយក្រុមហ៊ុន Walmart វិស័យឯកជន និងក្រសួង-ស្ថាប័ន ពាក់ព័ន្ធនានា ដើម្បីជំរុញការនាំចេញផលិតផលកសិកម្មពីកម្ពុជា ទៅកាន់ទីផ្សារសហរដ្ឋអាម៉េរិក ឱ្យកាន់តែរីកចម្រើនបន្ថែមទៀត៕ អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

លោក Putin បញ្ជាក់ថា រុស្ស៊ីដឹងថាជម្លោះអ៊ុយក្រែននឹងបញ្ចប់តាមរបៀបណា

ប្រេងឡើងថ្លៃ ភាគហ៊ុនសកល និងតម្លៃប្រាក់ដុល្លារមិនឋិតថេរ ខណៈអាមេរិកបន្ថែមពេលបទឈប់បាញ់ជាមួយអ៊ីរ៉ង់

ក្រុមជប៉ុន Machida Zelvia យកឈ្នះក្រុមអារ៉ាប់រួម Shabab Al-Ahli ឡើងវគ្គផ្តាច់ព្រ័ត្រ AFC Champions League Elite

លីគនារី នឹងបើកការប្រកួតរដូវកាលថ្មី ចុងសប្ដាហ៍នេះ ជាមួយរូបមន្ដថ្មី

និន្នាការប្រើប្រាស់យានយន្តអគ្គិសនីនៅកម្ពុជាកើនខ្ពស់ជាលំដាប់ ខណៈគិតត្រឹមខែមីនានេះ បានចុះបញ្ជីសរុបកើនដល់ជាង ១ម៉ឺន៦ពាន់គ្រឿង

កូរ៉េខាងជើង ត្រូវបានគេនិយាយថាកំពុងសាងសង់ផ្លូវយោធានៅជិតព្រំដែនជាមួយកូរ៉េខាងត្បូង

មេដឹកនាំកោះតៃវ៉ាន់ លុបចោលទស្សនកិច្ចទៅកាន់ទ្វីបអាហ្វ្រិក ដោយសារតែសម្ពាធរបស់ប្រទេសចិន

ក្រុមប្រឆាំងមីយ៉ាន់ម៉ាស្វែងរកប្រព័ន្ធប្រជាធិបតេយ្យសហព័ន្ធគ្មានឥទ្ធិពលពីយោធា ខណៈរបបសឹកទុកពេល១០០ថ្ងៃសម្រាប់ការចរចាសន្តិភាព

អឺរ៉ុប សម្លឹងមើលជម្រើសនានា ខណៈជម្លោះនៅអ៊ីរ៉ង់គំរាមដល់កង្វះប្រេងឥន្ធនៈយន្តហោះ

ក្រុមល្បាតសហគមន៍តំបន់ការពារធម្មជាតិភូមិពូត្រំប្រទះឃើញ ដំរីប្រមាណ ៥០ក្បាល ចុះផឹកទឹកស្ថិតក្នុងដែនជម្រកសត្វព្រៃកែវសីមា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

ក្រុមប្រឹក្សាពិគ្រោះយោបល់ធុរកិច្ច នឹងបង្កើតឱកាសវិនិយោគ និងធុរកិច្ចរវាងកម្ពុជា និងអូស្រ្តាលី

ការនាំចេញនាំចូលរបស់កម្ពុជា សម្រេចបានជាង ៥២ ពាន់លានដុល្លារ ក្នុងឆ្នាំ២០២២

កម្ពុជា-អូស្រ្តាលី ប្រកាសដាក់ឱ្យប្រើប្រាស់ផ្លូវការគម្រោងអភិវឌ្ឍន៍ថ្នាលឌីជីថលតែមួយ

អាកាសយានដ្ឋានអន្តរជាតិសៀមរាបអង្គរ នឹងបើកឱ្យដំណើរការនៅខែតុលាឆ្នាំ២០២៣

CDC ផ្សព្វផ្សាយច្បាប់វិនិយោគថ្មី ទាក់ទាញវិនិយោគ និងលើកទឹកចិត្តដល់វិនិយោគិនក្នុងស្រុក និងប្រទេស

កម្ពុជាទទួលបានគម្រោងវិនិយោគ មានទុនសរុបជាង ៤,៦ពាន់លានដុល្លារឆ្នាំ២០២២

ការសាងសង់ប្រលានយន្តហោះអន្តរជាតិភ្នំពេញ សម្រេចបាន ៥០ភាគរយ និងបណ្ដាខេត្តស្ទើរ ១០០ភាគរយ

សភាពាណិជ្ជកម្មកម្ពុជា នឹងបង្កើតក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី

កម្ពុជានាំចេញកសិផលមានបរិមាណសរុប ជាង៨លានតោន ក្នុងរយៈពេល១១ខែឆ្នាំ២០២២

ផ្សារលក់រាយល្បីឈ្មោះរបស់អាមេរិក Walmart គ្រោងពង្រីកអាជីវកម្មនៅកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

ក្រុមប្រឹក្សាពិគ្រោះយោបល់ធុរកិច្ច នឹងបង្កើតឱកាសវិនិយោគ​ និងធុរកិច្ច​រវាងកម្ពុជា និងអូស្រ្តាលី

ការ​នាំចេញ​នាំចូល​របស់​កម្ពុជា សម្រេច​បាន​ជាង ៥២ ពាន់​លាន​ដុល្លារ ក្នុងឆ្នាំ២០២២

កម្ពុជា-អូស្រ្តាលី ប្រកាសដាក់ឱ្យប្រើប្រាស់ផ្លូវការគម្រោងអភិវឌ្ឍន៍ថ្នាលឌីជីថលតែមួយ

អាកាសយានដ្ឋានអន្តរជាតិសៀមរាបអង្គរ នឹងបើកឱ្យដំណើរការនៅខែតុលាឆ្នាំ២០២៣

CDC​ ផ្សព្វផ្សាយច្បាប់វិនិយោគថ្មី ទាក់ទាញវិនិយោគ និងលើកទឹកចិត្តដល់វិនិយោគិនក្នុងស្រុក និងប្រទេស

កម្ពុជាទទួលបានគម្រោងវិនិយោគ ​មានទុនសរុបជាង ៤,៦ពាន់លានដុល្លារឆ្នាំ២០២២

ការសាងសង់ប្រលានយន្តហោះអន្តរជាតិភ្នំពេញ សម្រេចបាន ៥០ភាគរយ និងបណ្ដាខេត្តស្ទើរ ១០០ភាគរយ

សភាពាណិជ្ជកម្មកម្ពុជា នឹងបង្កើតក្រុមប្រឹក្សាពិគ្រោះយោបល់ធុរកិច្ចកម្ពុជា-អូស្ត្រាលី

កម្ពុជានាំចេញកសិផលមានបរិមាណសរុប ជាង៨លានតោន ក្នុងរយៈពេល១១ខែឆ្នាំ២០២២

ផ្សារលក់រាយល្បីឈ្មោះរបស់អាមេរិក Walmart គ្រោងពង្រីកអាជីវកម្មនៅកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ក្រុមប្រឹក្សាពិគ្រោះយោបល់ធុរកិច្ច នឹងបង្កើតឱកាសវិនិយោគ និងធុរកិច្ចរវាងកម្ពុជា និងអូស្រ្តាលី

ការនាំចេញនាំចូលរបស់កម្ពុជា សម្រេចបានជាង ៥២ ពាន់លានដុល្លារ ក្នុងឆ្នាំ២០២២

CDC ផ្សព្វផ្សាយច្បាប់វិនិយោគថ្មី ទាក់ទាញវិនិយោគ និងលើកទឹកចិត្តដល់វិនិយោគិនក្នុងស្រុក និងប្រទេស

កម្ពុជាទទួលបានគម្រោងវិនិយោគ មានទុនសរុបជាង ៤,៦ពាន់លានដុល្លារឆ្នាំ២០២២