BTV NEWS

ការធ្វើបច្ចុប្បន្នភាព NFIS ដើម្បីធានាដល់គ្រួសារ និងអាជីវកម្មឱ្យទទួលបានសេវាហិរញ្ញវត្ថុសមស្រប

ការដោះដូរពាណិជ្ជកម្មជាមួយ RCEP មានទឹកប្រាក់សរុបជាង ១១ពាន់លានដុល្លារ កើនជាង ១៨%

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញស្ទើរគ្រប់ប្រភេទមានកំណើនកើនឡើងល្អប្រសើរ

សេដ្ឋកិច្ច និង កសិកម្ម

វិស័យធនាគារកម្ពុជា ទទួលបានកំណើនដ៏រឹងមាំនៅក្នុងឆមាសទី១ ឆ្នាំ២០២២

ភ្នំពេញ៖ វិស័យធនាគារកម្ពុជា ទទួលបានកំណើនដ៏រឹងមាំទាំងប្រាក់កម្ចី និងប្រាក់បញ្ជើ ក្នុងឆមាសទី១ ឆ្នាំ២០២២នេះដែលឆ្លុះបញ្ចាំងយ៉ាងច្បាស់ពីទំនុកចិត្តរបស់សាធារណជនចំពោះប្រព័ន្ធធនាគារនៅក្នុងប្រទេស។យោងតាមរបាយការណ៍ប្រចាំឆមាសទី១ និងទិសដៅការងារឆមាសទី២ឆ្នាំ២០២២ ចេញផ្សាយកាលពីពេលថ្មីៗនេះ ឧស្សាហកម្មធនាគាររបស់កម្ពុជាទទួលបានកំណើនដ៏រឹងមាំទាំងប្រាក់កម្ចី និងប្រាក់បញ្ញើក្នុងឆមាសទី១ ឆ្នាំ២០២២។ របាយការណ៍ បានបង្ហាញថា ប្រាក់កម្ចីបានកើនឡើង ២៣.៤ ភាគរយ ដល់ ៥១.៥ ប៊ីលានដុល្លារអាមេរិក គិតត្រឹមខែមិថុនាឆ្នាំនេះ ខណៈដែលប្រាក់បញ្ញើរបស់អតិថិជនបានកើនឡើង ១៦ ភាគរយ ដល់ ៤២ប៊ីលានដុល្លារអាមេរិក។ប្រាក់កម្ចីនេះ ត្រូវបានផ្តល់ទៅឱ្យវិស័យសំខាន់ៗដូចជា ពាណិជ្ជកម្ម លំនៅឋាន សំណង់ កសិកម្ម សណ្ឋាគារ និងភោជនីយដ្ឋាន និងវិស័យផលិតកម្ម ក្នុងចំណោមប្រាក់កម្ចីផ្សេងទៀត។នេះបើយោងតាមរបាយការណ៍ ដោយបន្ថែមថា ឥណទានមិនដំណើរការ នៅធនាគារ និងគ្រឹះស្ថានមីក្រូហិរញ្ញវត្ថុអាចគ្រប់គ្រងបាន អត្រា ២.៩ ភាគរយ និង ២.៣ រៀងគ្នា។របាយការណ៍ បានបញ្ជាក់ថា ទ្រព្យសកម្មរបស់ប្រព័ន្ធធនាគារនៅប្រទេសកម្ពុជា បានកើនឡើងដល់ ៧៥ .២ ប៊ីលានដុល្លារ គិតត្រឹមខែមិថុនា ឆ្នាំ ២០២២ កើនឡើង ១៧.២ ភាគរយធៀបនឹងរយៈពេលដូចគ្នាកាលពីឆ្នាំមុន។នៅក្នុងរបាយការណ៍ខាងលើនេះ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា មានប្រសាសន៍ថា កំណើនទាំងប្រាក់កម្ចី និងប្រាក់បញ្ញើបានឆ្លុះបញ្ចាំងយ៉ាងច្បាស់ពីទំនុកចិត្តរបស់សាធារណជនចំពោះប្រព័ន្ធធនាគាររបស់ប្រទេស។ឯកឧត្តម បានបន្ថែមថា កំណើនដ៏រឹងមាំនេះ ក៏បង្ហាញឱ្យឃើញផងដែរថា សកម្មភាពសេដ្ឋកិច្ចសង្គមទាំងអស់ត្រូវបានដំណើរការឡើងវិញទាំងស្រុង បន្ទាប់ពីប្រជាជនភាគច្រើននៃចំនួន ១៦ លាននាក់ បានចាក់វ៉ាក់សាំងប្រឆាំងនឹងជំងឺរាតត្បាត COVID-១៩ ។ឯកឧត្តម ជា ចាន់តូ មានប្រសាសន៍ថា ភាពរឹងមាំនៃប្រព័ន្ធធនាគារនេះបានដើរតួនាទីយ៉ាងសំខាន់ក្នុងការស្រូបយកការប៉ះទង្គិចមួយផ្នែកនៃវិបត្តិមកលើសេដ្ឋកិច្ចជាតិ និងរួមចំណែកទ្រទ្រង់សកម្មភាពអាជីវកម្ម ការវិនិយោគ និងការប្រើប្រាស់៕ អត្ថបទ៖ វណ្ណៈ

ចាប់ពីថ្ងៃទី១-១០ខែសីហា សាំងធម្មតាត្រូវលក់ ៤.៧៥០រៀល/លីត្រ (ចុះ៥០រៀល) និងម៉ាស៊ូត ៥.១៥០រៀល/លីត្រ (ចុះ ១៥០រៀល)

ភ្នំពេញ៖ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈតាមស្ថានីយនានាទូទាំងប្រទេស ចាប់ពីថ្ងៃទី១-១០ ខែសីហា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៤.៧៥០រៀល/លីត្រ (ចុះ ៥០រៀល) និងប្រេងម៉ាស៊ូតត្រូវលក់តម្លៃ ៥.១៥០រៀល/លីត្រ (ចុះ ១៥០រៀល)។

ខេត្តព្រះសីហនុ នឹងទទួលបានកំណើនភ្ញៀវទេសចរល្អប្រសើរនៅឆ្នាំក្រោយ

ព្រះសីហនុ៖ ចំនួនភ្ញៀវទេសចរណ៍ជាតិ ជាពិសេសអន្តរជាតិដែលធ្វើដំណើរមកកាន់ខេត្តព្រះសីហនុ តាមជើងហោះហើរដោយត្រង់ បានបន្តសកម្មភាពជាហូរហែរ ហើយចំនួននេះនឹងមានកំណើនកើនឡើងល្អប្រសើរបន្ថែមទៀតនៅឆ្នាំក្រោយ បន្ទាប់ពីកម្ពុជារៀបចំព្រឹត្តិការណ៍ប្រកួតកីឡាស៊ីហ្គេម។លោក ឃាង ភារម្យ អ្នកនាំពាក្យសាលាខេត្តព្រះសីហនុ បានថ្លែងប្រាប់ភ្នាក់ងារអ្នកយកព័ត៌មាន BTV ស្តីពីបរិយាកាស និងបដិសណ្ឋាកិច្ចភ្ញៀវទេសចរណ៍ នៅខេត្តព្រះសីហនុថា បន្ទាប់ពីការបើកប្រទេសមកដល់ពេលនេះ ការធ្វើដំណើររបស់ភ្ញៀវអន្តរជាតិ មកកាន់ខេត្តព្រះសីហនុមានជាបន្តបន្ទាប់ ទាំងអ្នកវិនិយោគ និងភ្ញៀវទេសចរណ៍ ក្នុងនោះចំពោះការវិនិយោគ នៅក្នុងរយៈពេលប៉ុន្មានខែចុងក្រោយនេះ ខេត្តព្រះសីហនុទទួលបានគម្រោងវិនិយោគធំៗជាហូរហែរឡើងវិញ ដែលចំនួននេះបង្ហាញឲ្យឃើញ អំពីស្ថានភាពល្អប្រសើរនៃការទប់ស្កាត់ជំងឺកូវីដ ១៩ និងបរិយាកាសវិនិយោគនៅព្រះរាជាណាចក្រកម្ពុជា។ដោយឡែកភ្ញៀវទេសចរណ៍វិញ,លោក បន្តឲ្យដឹងថា ខេត្តព្រះសីហនុ គឺជាខេត្តមួយដែលមានហេដ្ឋារចនាសម្ព័ន្ធគ្រប់គ្រាន់ និងបានបង្កើតនូវបរិយាកាសទាក់ទាញដល់ចំនួនភ្ញៀវទេសចរណ៍ជាតិ និងអន្តរជាតិ ក្នុងនោះចំពោះភ្ញៀវទេសចរណ៍អន្តរជាតិ បន្ទាប់ពីការបើកជើងហោះហើយមក ចំនួនភ្ញៀវទេសចរណ៍ចូលមកកាន់ខេត្តព្រះសីហនុ បានបន្តសកម្មភាពជាហូរហែរ ចំពោះចំនួនភ្ញៀវទេសចរណ៍ដែលចូលមកទស្សនាកម្សាន្តច្រើនជាងគេមាន វៀតណាម, ចិន, កូរ៉េ និងអាមេរិកជាដើម។សូមបញ្ជាក់ថា ដោយសាររាជរដ្ឋាភិបាលកម្ពុជាបានគ្រប់គ្រងសភាពការណ៍កូវីដ ១៩ ល្អប្រសើរ ក្នុងនោះមានការបង្កើនជើងហោះហើរមកកាន់អាកាសយានដ្ឋានអន្តរជាតិនៅកម្ពុជាមានដូចជា រាជធានីភ្នំពេញ ខេត្តសៀមរាប ខេត្តព្រះសីហនុ ជាក់ស្តែងនៅក្នុងរយៈពេល ៦ខែ ឆ្នាំ ២០២២ នេះ មានភ្ញៀវទេសចរអន្តរជាតិមកកាន់កម្ពុជា មានប្រមាណជាងកន្លះលាននាក់ និងទេសចរផ្ទៃក្នុងប្រមាណ ៥ លាននាក់បន្ថែមទៀត៕ អត្ថបទ៖ សុន រ៉ាឌី

មន្រ្តីជាន់ខ្ពស់ក្រសួងសេដ្ឋកិច្ច ស្នើដល់មន្រ្តីតាមច្រកទ្វារ ពង្រីកការប្រមូលចំណូលឲ្យបានល្អប្រសើរ

ត្បូងឃ្មុំ៖ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ស្នើឲ្យមន្រ្តីសាខាគយ និងរដ្ឋាករខេត្តត្បូងឃ្មុំ ជាពិសេសមន្រ្តីការិយាល័យគយ និងរដ្ឋាករនៅតាមច្រកទ្វារព្រំប្រទល់កម្ពុជា-វៀតណាម បន្តការខិតខំអនុវត្តការងារឲ្យបានល្អ និងពង្រឹងគ្រប់គ្រងការប្រមូលចំណូលឲ្យមានប្រសិទ្ធភាព ដើម្បីកៀរគរចំណូលចូលថវិកាជាតិ ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងពិធីសម្ពោធដាក់ឲ្យប្រើប្រាស់ហេដ្ឋារចនាសម្ព័ន្ធផ្សេងៗ នៃការិយាល័យគយ និងរដ្ឋាករត្នោត នៅខេត្តត្បូងឃ្មុំនៅថ្ងៃទី ២៩ខែកក្កដា ឆ្នាំ២០២២ នេះថា រដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី បានដាក់ចេញនូវគោលការណ៍ជាច្រើន ជាពិសេសការអនុវត្តន៍ការមិនមានបង្កើនអត្រាពន្ធ, ឬបង្កើតពន្ធថ្មី, ការពង្រឹងច្បាប់, និងបទប្បញ្ញត្តិដែលមានស្រាប់ និងពង្រឹងការគ្រប់គ្រងការប្រមូលចំណូលឱ្យអស់សក្តានុពល ការធានាឱ្យបាននូវភាពងាយស្រួល និងភាពត្រឹមត្រូវនៃការបង់ពន្ធ ដោយអនុវត្តន៍តាមយុទ្ធសាស្រ្តកៀរគរចំណូលឲ្យបានម៉ឺងម៉ាត់ ។ឯកឧត្តម ឧបនាយករដ្ឋមន្ត្រី បន្តថា ដើម្បីអនុវត្តន៍ការគៀងគរចំណូលឲ្យមានប្រសិទ្ធភាព អង្គភាពសាខាគយ និងរដ្ឋាករទាំងអស់ ជាពិសេសការិយាល័យគយ និងរដ្ឋាករនៅតាមច្រកទ្វារដោយផ្ទាល់ ត្រូវខិតខំប្រឹងប្រែងអនុវត្តន៍ការងារឲ្យបានល្អ ជាពិសេសការបង្កើនយកចិត្តទុកដាក់ខ្ពស់ ក្នុងការទប់ស្កាត់ ការរត់ពន្ធខុសច្បាប់ ដើម្បីប្រមូលគៀងគររកចំណូលឲ្យបានកាន់តែច្រើន ពោលគឺពង្រឹងការគ្រប់គ្រង ប្រមូលចំណូលឱ្យអស់សក្តានុពល ដើម្បីប្រមូលចំណូលចូលថវិកាជាតិ។ បន្ទាប់ពីការបើកសម្ពោធឲ្យប្រើប្រាស់ការិយាល័យខាងលើ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី បានអញ្ជើញចុះពិនិត្យនៅផែកុងតេន័រ សម្រាប់ការដឹកជញ្ជូន និងសម្រួលទំនិញ នៅតាមព្រំដែនរវាងកម្ពុជា-វៀតណាម៕អត្ថបទ៖ សុន រ៉ាឌី

ក្រសួងសេដ្ឋកិច្ច និងអាជ្ញាធរខេត្ត កំពុងរកដំណោះស្រាយ អគារសាងសង់មិនរួចនៅខេត្តព្រះសីហនុ

ព្រះសីហនុ៖ ក្រសួងសេដ្ឋកិច្ច និងហិរញ្ញវត្ថុ បង្កើតក្រុមការងារ និងមានគណៈកម្មាធិការត្រួតពិនិត្យ វាយតម្លៃ ដើម្បីដោះស្រាយ នឹងកៀរគរស្វែងរកអ្នកវិនិយោគថ្មីអភិវឌ្ឍន៍បន្ត ដើម្បីស្រាយបញ្ហាសំណង់អគារជាច្រើន ដែលសាងសង់មិនទាន់រួចជាច្រើននៅខេត្តព្រះសីហនុ ។ឯកឧត្តម មាស សុខ សេនសាន អ្នកនាំពាក្យ និងជាអគ្គលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងប្រាប់ភ្នាក់ងារអ្នកយកព័ត៌មាន BTV នៅថ្ងៃទី ២៩ ខែកក្កដា ឆ្នាំ ២០២២ នេះថា ក្រសួងសេដ្ឋកិច្ច និងហិរញ្ញវត្ថុ បានកំពុងយកចិត្តទុកដាក់យ៉ាងខ្លាំងជម្រុញអភិវឌ្ឍន៍សំណង់ទាំងនោះឡើងវិញ ដើម្បីលម្អសោភ័ណទីក្រុង ជាពិសេសដើម្បីទាក់ទាញអ្នកវិនិយោគ ឲ្យមកបណ្តាក់ទុនកាន់តែច្រើននៅព្រះរាជាណាចក្រកម្ពុជា ។ បច្ចុប្បន្នក្រសួង កំពុងសស្រាក់សស្រាំ បង្កើតក្រុមការងារ និងមានគណៈកម្មាធិការចុះត្រួតពិនិត្យ និងវាយតម្លៃលើស្ថានភាពសំណង់ទាំងនោះ ដើម្បីដោះស្រាយ នឹងកៀរគរស្វែងរកអ្នកវិនិយោគថ្មីអភិវឌ្ឍន៍បន្ត។លោក ឃាង ភារម្យ អ្នកនាំពាក្យសាលាខេត្តព្រះសីហនុ ថ្លែងឲ្យដឹថា អគារសំណង់សាងសង់មិន ទាន់រួច នៅខេត្តព្រះសីហនុ មានចំនួនជាង ១ ពាន់អគារ ដោយសំណង់ទាំងនោះ គឺបានសាងសង់ រួចក្នុងរង្វង់ប្រមាណពី ៥០ ទៅ ៦០ ភាគរយ។ បើសំណង់អគារនេះត្រូវបានដោះស្រាយ និងសាងសង់ឡើងវិញ វានឹងបានចូលរួមចំណែកយ៉ាងធំនៅក្នុងសេដ្ឋកិច្ច ព្រមទាំងបានផ្តល់ការងារជាច្រើនដល់ប្រជាពលរដ្ឋ និងបានទាក់ទាញអ្នកទេសចរណ៍ ចូលមកទស្សនាកម្សាន្តព្រះរាជាណាចក្រកម្ពុជា ជាពិសេសនៅខេត្តព្រះសីហនុ។សូមបញ្ជាក់ថា ទាក់ទងការអភិវឌ្ឍន៍វិស័យវិស័យសំណង់ នៅខេត្តព្រះសីហនុ គិតចាប់តាំងពីឆ្នាំ ២០១៧ ដល់ខែ វិច្ឆិកា ឆ្នាំ ២០២១ នេះ មានសំណង់សរុប ១ ៦៦១ គម្រោង និងមានទុនវិនិយោគប្រមាណជាង ៨ ៤០០ លានដុល្លារអាមេរិក, ក្នុងនោះសំណង់អគារខ្ពស់ចាប់ពី ៥ ជាន់ រហូតដល់ ៥៣ ជាន់ គឺមានចំនួន ៦២០ គម្រោង ក្នុងនោះចំពោះអគារដែលជាប់គាំងមិនមានការអភិវឌ្ឍ មានចំនួន ជាង១ ១០០ អគារ ៕អត្ថបទ៖ សុន រ៉ាឌី

ក្រុមហ៊ុនអាកាសចរណ៍ចិនចំនួន១១ បានដាក់ពាក្យស្នើបើកជើងហោះហើរត្រង់មកកម្ពុជាវិញ

ភ្នំពេញ៖ ក្រុមហ៊ុនអាកាសចរណ៍របស់ប្រទេសចិន ចំនួន១១ក្រុមហ៊ុន បានដាក់សំណើរទៅរដ្ឋលេខាធិការដ្ឋា អាកាសចរណ៍ស៊ីវិលកម្ពុជា ដើម្បីបើកជើងហោះហើរត្រង់មកកម្ពុជាឡើងវិញ។ឯកឧត្តម ជា អូន រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងប្រាប់ BTV នៅថ្ងៃទី២៩ខែកក្កដានេះ ថា ក្រុមហ៊ុនអាកាសចរណ៍ប្រទេសចិនចំនួន១១ ក្រុមហ៊ុន ដែលបានដាក់ពាក្យ ស្នើសុំបើកជើងហោះហើរត្រង់កម្ពុជានោះ នឹងចាប់ផ្តើមដំណើរការ ពីខែតុលា ឆ្នាំ២០២២ នេះតទៅ។ឯកឧត្តម ជា អូន បានធ្វើការសន្និដ្ឋានថា សម្រាប់ការដាក់សំណើរបើកជើងហោះហើរត្រង់ចិនមកកម្ពុជា អាចទំនងមកពីប្រទេសចិន មានការបន្ធូបន្ថយការអនុវត្តគោលនយោបាយសូន្យកូវីដ ឬ Zero Covid នៅក្នុងប្រទេសចិន ។ឯកឧត្តម បញ្ជាក់ថា ក្នុងចំណោមក្រុមហ៊ុនទាំង១១ ដែលដាក់សំណើរបើកជើងហោះហើរមកកម្ពុជានោះ គឺមានក្រុមហ៊ុនដាក់សំណើរហោះមករាជធានីភ្នំពេញ មាន១១ក្រុមហ៊ុន ហោះទៅខេត្តសៀមរាប ៣ក្រុមហ៊ុន និងហោះទៅខេត្តព្រះសីហនុមាន៣ក្រុមហ៊ុន។ឯកឧត្តម ជា អូន បន្តថា នៅក្នុងតារាងកម្មវិធីហោះហើរពីបណ្តាប្រទេសនានាមកកាន់កម្ពុជា ដែលបាននិងកំពុងអនុវត្តរយៈពេលជិត៥ខែមកនេះ គឺមានក្រុមហ៊ុនអាកាសចរណ៍អន្តរជាតិ បានដាក់សំណើរបើកជើងហោះហើរបន្ថែមមានចំនួន៧១ ២៣០ជើង ហើយចំនួននេះ រំពឹងថា កើនឡើង៦៨% បើប្រៀបធៀបជើងហោះហើរឆ្នាំ២០១៩ ដែលមានប្រមាណ ១០ម៉ឺន៤ ៧៧០ជើង។ឯកឧត្តម បន្តថា នៅក្នុងខែមិថុនាចុងក្រោយនេះ មានអ្នកដំណើរអន្តរជាតិចូលមកកម្ពុជាតាមផ្លូវអាកាសជាង ១៩ម៉ឺននាក់ និងមានយន្តហោះចតប្រមាណ ២៦%នៃចំនួនការចុះចតសរុបឆ្នាំ២០១៩ និងមានយន្តហោះ ហោះរំលងប្រទេសកម្ពុជា មានប្រមាណ៧០% ធៀបនឹងឆ្នាំ២០១៩ ដូចគ្នា៕អត្ថបទ ស៊ុម សុខជា

កម្ពុជា ទទួលបានគម្រោងវិនិយោគពីសិង្ហបុរី មានទុនសរុប ១.៥ប៊ីលានដុល្លារ

ភ្នំពេញ៖ កម្ពុជាទទួលបានគម្រោងវិនិយោគពីប្រទេសសិង្ហបុរី មានទុនវិនិយោគសរុប ១.៥ ប៊ីលានដុល្លារ គិតត្រឹមខែមិថុនាឆ្នាំ២០២២នេះ ដែលគម្រោងទាំងនោះ ផ្តោតលើវិស័យ វិស័យទេសចរណ៍ កម្មន្តសាល ហេដ្ឋារចនាសម្ព័ន្ធនិងវិស័យផ្សេងៗមួយចំនួនទៀត។គិតត្រឹមខែមិថុនា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័ត គម្រោងវិនិយោគរបស់សិង្ហបុរី ចំនួន ១២៧គម្រោង មានទុនវិនិយោគសរុប ១.៥ ប៊ីលានដុល្លារ នៅក្នុងវិស័យទេសចរណ៍ កម្មន្តសាលហេដ្ឋារចនាសម្ព័ន្ធ និងវិស័យផ្សេងៗមួយចំនួនទៀត។ទិន្ន័យនេះត្រូវបានលើកឡើងនៅក្នុងសេចក្តីប្រកាសព័ត៌មានរបស់ CDC តាមរយៈជំនួបតាមប្រព័ន្ធវីឌីអូ រវាងក្រុមប្រឹក្សអភិវឌ្ឍន៍កម្ពុជា និងសហព័ន្ធធុរកិច្ចសិង្ហបុរី កាលពីថ្ងៃទី ២៦កក្កដា ជុំវិញប្រធានបទ «ស្វែងយល់ពីកម្ពុជា ការយល់ដឹងពីកាលានុវត្តភាពធុរកិច្ចនៅកម្ពុជា» ។ ឯកឧត្តម សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានបង្ហាញពីបរិយាកាសវិនិយោគនៅកម្ពុជា ច្បាប់វិនិយោគថ្មី ដែលផ្តល់ការលើកទឹកចិត្តដល់វិនិយោគិន និងមានភាពអំណោយផល សម្រាប់វិនិយោគិនសិង្ហបុរី ចាប់យកឱកាសក្នុងវិស័យកសិ-ចំណីអាហារ សេវាកម្ម និងកម្មន្តសា។ឯកឧត្តម បញ្ជាក់បន្ថែមថា “វិនិយោគិនសិង្ហបុរីមានតួនាទីសំខាន់ចំពោះកម្ពុជា ជាពិសេសការរួមចំណែកស្តារឡើងវិញ និងអភិវឌ្ឍន៍សេដ្ឋកិច្ចកម្ពុជាឱ្យបានឆាប់រហ័ស”។ សិង្ហបុរី ស្ថិតនៅក្នុងចំណោមវិនិយោគិនបរទេសធំជាងគេទាំង៥ របស់កម្ពុជា ដែលភាគច្រើនវិនិយោគទៅលើវិស័យ អចលទ្រព្យថាមពល ពាណិជ្ជកម្ម ម្ហូបអាហារ ការអប់រំ និងហិរញ្ញវត្ថុ។ឮសូមជម្រាបថា ទំហំពាណិជ្ជកម្មរវាងកម្ពុជា និងសិង្ហបុរី មានទំហំទឹកប្រាក់ជាង ២ពាន់លានដុល្លារ ក្នុងឆមាសទី១ ឆ្នាំ២០២២។ ទំហំនេះ មានការធ្លាក់ចុះខ្លាំងក្នុងអត្រា ៣៨,២ភាគរយ បើធៀបនិងរយៈពេលដូចគ្នាកាលឆ្នាំ២០២១ ដែលមានចំនួនជាង ៣,៣៦ពាន់លានដុល្លារ។ នេះបើយោងតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា៕ អត្ថបទ៖ វណ្ណៈ

ធនាគារ SME ផ្តលឥណទានសរុបជាង ៧លានដុល្លារ ដល់អាជីវកម្មទេសចរណ៍

ភ្នំពេញ៖ រយៈពេល ២៧ថ្ងៃកន្លងមកនេះ មានអាជីវកម្មទេសចរណ៍ចំនួន ៥៦អាជីវកម្ម ត្រូវបានធនាគារSME អនុម័តផ្តល់ឥណទាន មានទំហំថវិកាជាង ៧លាន៦សែនដុល្លាអាមេរិក ខណៈមានអាជីវកម្មទេសចរណ៍ជាច្រើនទៀត មិនអាចស្នើសុំកម្ចីនេះបាន ដោយសារលក្ខណះរបាយការណ៍ហិរញ្ញវត្ថុរបស់អាជីវកម្ម ។លោកស្រី ឆាយ សៀវលីន ប្រធានសមាគមទីភ្នាក់ទេសចរណ៍កម្ពុជា CATA បានថ្លែងប្រាប់BTV នៅថ្ងៃទី២៨ ខែកក្កដានេះថា នៅពេលនេះមានអាជីវកម្មទេសចរណ៍តិចតួចណាស់បានទៅទទួលបា្រក់កម្ចីនេះ ដោយយសារឥណទានសហហិរញ្ញប្បទានស្តារអាជីវកម្មក្នុងវិស័យទេសចរណ៍ គឺហាក់មានលក្ខខ័ណ្ឌតឹងរ៉ឹង ជាពិសេសការទាមទាររបាយការណ៍ហិរញ្ញវត្ថុពីអាជីវកម្មទេសចរណ៍ ដែលជាកត្តាបង្កការរាំងស្ទះ ដល់អាជីវកម្មទេសចរណ៍ ។ លោកបណ្ឌិត លឹម អូន ប្រធានធនាគារសហគ្រាសធុនតូច និងមធ្យមកម្ពុជា បានថ្លែងថា នៅពេលនេះ រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បាននិងកំពុងពិចារណា លើការបន្ធូបន្ថយលក្ខខណ្ឌ ផ្តល់ប្រាក់កម្ចីពីគម្រោងសហហិរញ្ញប្បទានរាជរដ្ឋាភិបាលដើម្បីអាជីវកម្មក្នុងវិស័យទេសចរណ៍ ដូចជាបង្កើនទុនឲ្យខ្ចីលើសពី៤០លានដុល្លាអាមេរិច ពង្រីកការពន្យាពេលបង់ការប្រាក់រហូតដល់២ឆ្នាំ និងពង្រីករយៈពេលបង់ប្រាក់សងត្រឡប់វិញពីចំនួន៧ឆ្នាំរហូតដល់១០ឆ្នាំដើម្បីជួយសម្រាលឲ្យការបង់ប្រាក់សងត្រឡប់មានចំនួនតិចតួចជាដើម។លោក បណ្ឌិត លឹម អូន បន្តថា យ៉ាងណាក៏ដោយនៅក្នុងអំឡុងពេលនេះ រាជរដ្ឋាភិបាលក៏បានបន្ធូរបន្ថយលក្ខខណ្ឌនិងលើកទឹកចិត្ត និងបន្ថយពិន្ទុសម្រាប់អាជីវកម្មទេសចរណ៍ដែលដុនដាបខ្លាំង ហើយតាមរយៈបន្ធូរបន្ថយលក្ខខណ្ឌនេះបានធ្វើឲ្យអាជីវកម្មទេសចរណ៍ចំនួន៥៦អាជីវកម្មគឺបានទទួលកម្ចីឥណទាននៅតាមបណ្តាធនាគារដៃគូចំនួន៧ធនាគារ ក្នុងចំណោមធនាគារជាដៃគូចំនួន១៩ធនាគារ និងមានអាជីវកម្មនានាបាននិងកំពុងរៀបចំសំណើរសុំទទួលកម្ចីនេះ។ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ ថ្លែងថា នៅពេលបច្ចុប្បន្នក្រសួងបានបង្កើតក្រុមការងារផ្សព្វផ្សាយនិងជួយស្តារអាជីវកម្មទេសចរណ៍ឲ្យងើបឡើងវិញតាមរយៈជួយសម្របសម្រួល និងធ្វើយ៉ាងណាឲ្យអាជីវកម្មអាចទទួលបានប្រាក់កម្ចីស្តារអាជីវកម្មទាំងអស់គ្នា និងមានលទ្ធភាពសងត្រឡប់ផងដែរ៕ អត្ថបទ ស៊ុម សុខជា

ករណីប្រេងឆៅរបស់កម្ពុជាចំនួនជិត ៣០ ម៉ឺនប៉ារ៉ែល នឹងដោះស្រាយបញ្ចប់ក្នុងពេលឆាប់ៗ

ភ្នំពេញ៖ ករណីប្រេងឆៅរបស់កម្ពុជា ចំនួនជិត ៣០ ម៉ឺនប៉ារ៉ែល ដែលនាវាឈ្មោះ MT Strovolos បានដឹកចេញពីកម្ពុជា នាពេលកន្លងមក ភាគីពាក់ព័ន្ធ បានចូលតុពិភាក្សាចរចារគ្នាដើម្បីសម្របសម្រួលលើផលប្រយោជន៍ដែលភាគីនីមួយៗទទួលបាន ដោយសង្ឃឹមថា គ្រោងបញ្ចប់ក្នុងពេលឆាប់ៗ។ឯកឧត្តម ជៀប សួរ អ្នកនាំពាក្យ និងជាអគ្គនាយកនៃអគ្គនាយកដ្ឋានប្រេងកាត បានលើកឡើងក្នុងកិច្ចសម្ភាសន៍ជាមួយអ្នកយកព័ត៌មាន លើករណីការលួចប្រេងឆៅរបស់កម្ពុជា នៅថ្ងៃទី២៧ ខែ កក្កដា ឆ្នាំ២០២២ នេះថា ជុំវិញបញ្ហាប្រេងឆៅចំនួនជិត ៣០ម៉ឺនបារ៉ែល ដែលនាវាឈ្មោះ MT Strovolos បានលួចដឹកចេញេពីកម្ពុជា កាលពីខែមិថុនា ឆ្នាំ២០២១ កន្លងមកនេះ បច្ចុប្បន្នមានសញ្ញាល្អជាបណ្តើរៗហើយ ដែលកម្ពុជារំពឹងថា ករណីប្រេងឆៅនេះនឹងដោះស្រាយចេញក្នុងពេលឆាប់ៗ។ទាក់ទងបញ្ហាប្រេងកាតប្លុក A នេះ , ឯកឧត្តម ជៀប សួរ បានបញ្ជាក់ឲ្យដឹងថា ចំពោះការអភិវឌ្ឍន៍របស់ក្រុមហ៊ុន KrisEnergy នៅប្លុកអេ នាពេលកន្លងមកនេះ ក្រសួងបានបញ្ចប់កិច្ចព្រមព្រៀងជាមួយក្រុមហ៊ុននេះរួចហើយ, បច្ចុប្បន្នចំពោះការវិនិយោគនៅប្លុកអេនេះ ក្រសួងបានកំពុងពិភាក្សាការងារជាមួយក្រុមហ៊ុនថ្មីមួយទៀត មកពីប្រទេសកាណាដា , ដោយក្រុមហ៊ុនថ្មីនេះបានកំពុងធ្វើការសិក្សានូវទិន្នន័យថ្មីៗឡើងវិញ មុននឹងសម្រេចចិត្តវិនិយោគនៅប្លុកAនេះជាបន្ត ដើម្បីចៀសវាងនូវកំហុសខុសឆ្លងដែលកើតមានឡើង។ មកដល់ពេលនេះ ការសិក្សារបស់ក្រុមហ៊ុនថ្មីមួយនេះ ជិតដល់ពេលវេលាមកពិភាក្សាគ្នាជាមួយក្រសួងហើយ ដោយការងារនេះក្រសួងនឹងបង្ហាញលទ្ធផលនៅពេលខាងមុខ៕អត្ថបទ៖ សុន រ៉ាឌី

ក្រសួងពាណិជ្ជកម្មបើកកិច្ចប្រជុំលើកដំបូង ដើម្បីបង្ហាញសមាសភាពគណៈកម្មាធិការ ប្រកួតប្រជែងកម្ពុជា

ភ្នំពេញ៖ នៅទីស្តីការក្រសួងពាណិជ្ជកម្ម គណៈកម្មាធិការប្រកួតប្រជែងកម្ពុជា (គ.ប.ក) បានបើកកិច្ចប្រជុំលើកទី១របស់ខ្លួន ដើម្បីឱ្យសមាជិកទាំងអស់ បានជួបប្រជុំគ្នាជាលើកដំបូង និងបង្ហាញខ្លួន បន្ទាប់ពីរាជរដ្ឋាភិបាលបានចេញសេចក្តីសម្រេចកាលពីកន្លងទៅនេះ ស្តីពីការតែងតាំងសមាសភាពគណៈកម្មាធិការប្រកួតប្រជែងកម្ពុជា ព្រមទាំងដើម្បីពិនិត្យ និងពិភាក្សាលើបទបញ្ជាផ្ទៃក្នុងមួយចំនួន។នៅក្រោយចប់កិច្ចប្រជុំ កាលពីរសៀលថ្ងៃ២៦ កក្កដា ឆ្នាំ២០២២នេះ ប្រភពពីក្រសួងពាណិជ្ជកម្ម បានឲ្យដឹងថា កិច្ចប្រជុំនេះ ត្រូវបានរៀបចំឡើង ក្រោមការអញ្ជើញជាអធិបតីរបស់ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា ព្រមទាំងមានការអញ្ជើញចូលរួមពីថ្នាក់ដឹកនាំ និងសមាជិក សមាជិកាជាច្រើនរូប។ក្នុងឱកាសនោះ ឯកឧត្តមរដ្ឋមន្រ្តី បានមានប្រសាសន៍ថា ច្បាប់ស្ដីពីការប្រកួតប្រជែងកម្ពុជា ត្រូវបានព្រះករុណាព្រះបាទសម្តេចព្រះនរោត្តម សីហមុនី ព្រះមហាក្សត្រនៃកម្ពុជា ឡាយព្រះហស្តលេខាប្រកាសដាក់ឱ្យប្រើ កាលពីខែតុលា ឆ្នាំ២០២១ និងបានធ្វើឱ្យបណ្ដារដ្ឋសមាជិកអាស៊ានទាំង១០ មានច្បាប់ស្ដីពីការប្រកួតប្រជែងទាំងអស់គ្នា ដូចបានកំណត់ក្នុងផែនការមេសហគមន៍សេដ្ឋកិច្ចអាស៊ាន២០២៥ ហើយការអនុម័តច្បាប់នេះធ្វើឱ្យកម្ពុជាបានបំពេញកាតព្វកិច្ចមួយរបស់កម្ពុជាសម្រាប់អាស៊ាន និងអង្គការពាណិជ្ជកម្មពិភពលោកផងដែរ។ ឯកឧត្តម បានឲ្យដឹងទៀតថា យោងតាមមាត្រា៤ នៃច្បាប់ស្ដីពីការប្រកួតប្រជែង តម្រូវឱ្យបង្កើតគណៈកម្មាធិការប្រកួតប្រជែងកម្ពុជាដែលជាអ្នកទទួលបន្ទុកដឹកនាំ និងត្រួតពិនិត្យការអនុវត្តច្បាប់ស្ដីពីការប្រកួតប្រជែង ហើយតាមការតម្រូវនេះ ប្រមុខរាជរដ្ឋាភិបាលសម្រេចចុះហត្ថលេខានៅខែកុម្ភៈកន្លងទៅ និងបានចេញសេចក្តីសម្រេចនៅខែកក្កដា នេះ ស្តីពីការតែងតាំងសមាសភាពនៃគណៈកម្មាធិការនេះ ដែលមានសមាសភាពសរុបចំនួន ១៥រូប ដែល ១០រូបជាតំណាងមកពីក្រសួង ស្ថាប័នពាក់ព័ន្ធ និង ៥រូប ជាបុគ្គលឯករាជ្យ ក្នុងនោះជាអតីតចៅក្រម ១រូប, អ្នកសេដ្ឋកិច្ច ២រូប និងអ្នកច្បាប់ ២រូប ដែលឆ្លងកាត់តាមការជ្រើសរើស ហើយមានអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ជាសេនាធិការ ដើម្បីអនុញ្ញាតឱ្យគណៈកម្មាធិការប្រកួតប្រជែងកម្ពុជា ទទួលបាននូវសិទ្ធិពេលលេញក្នុងការអនុវត្តនូវតួនាទីនិងភារកិច្ចរបស់ខ្លួន។ឯកឧត្តមរដ្ឋមន្រ្តី បានបញ្ជាក់ថា សម្រាប់ការអនុវត្តច្បាប់ស្ដីពីការប្រកួតប្រជែង អគ្គនាយកដ្ឋាន ក.ប.ប. ដែលជាសេនាធិការ និងដើរតួនាទីជាអ្នកស៊ើបអង្កេត ខណៈដែលគណៈកម្មាធិការប្រកួតប្រជែងកម្ពុជា ជាអ្នកធ្វើសេចក្ដីសម្រេចក្នុងការកំណត់ថា បុគ្គលណាមួយបំពានច្បាប់ ដោយផ្អែកលើភស្ដុតាងដែលផ្ដល់ដោយមន្ត្រីនៃអគ្គនាយកដ្ឋាន ក.ប.ប.។ ដូចនេះ សមាសភាពខាងលើ តម្រូវឱ្យមានការចូលរួមពីបុគ្គលឯករាជ្យអតីតចៅក្រម អ្នកសេដ្ឋកិច្ច និងអ្នកច្បាប់ ដែលមានជំនាញច្បាស់លាស់ចូលរួមធ្វើសេចក្ដីសម្រេចក្នុងការកំណត់បទល្មើសក្រោមច្បាប់ស្ដីពីការប្រកួតប្រជែង ប្រកបដោយភាពត្រឹមត្រូវនិងពេញលេញ។ ឯកឧត្តម សង្កត់ធ្ងន់ថា ការអនុវត្តច្បាប់ស្តីពីការប្រកួតប្រជែងប្រកបដោយប្រសិទ្ធភាព នឹងបង្កើតនូវទីលានប្រកួតប្រជែងប្រកបដោយស្មើភាពក្នុងការធ្វើធុរកិច្ចនៅកម្ពុជា ដើម្បីប្រកួតប្រជែងគ្នាតាមរយៈមធ្យោបាយផ្សេងៗ រួមមាន នវានុវត្តន៍ គុណភាពខ្ពស់ និងតម្លៃទាបនៃផលិតផលនិងសេវា ដែលផ្តល់អត្ថប្រយោជន៍សម្រាប់អ្នកប្រើប្រាស់និងធើ្វឱ្យមានកំណើនសេដ្ឋកិច្ចជាតិទៀតផង៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

ការវាយប្រហារយានដ្រូនរុស្ស៊ីសម្លាប់មនុស្ស ៣នាក់ នៅទីក្រុង Dnipro របស់អ៊ុយក្រែន

មេបញ្ជាការកងទ័ពប៉ាគីស្ថានលោក Munir ជួបពិភាក្សាការងារជាមួយប្រធានាធិបតីអ៊ីរ៉ង់លោក Pezeshkian

មនុស្ស ១១នាក់ស្លាប់ ក្នុងគ្រោះថ្នាក់រថយន្តបុកគ្នានៅភាគខាងជើងប្រទេសឥណ្ឌា

កង្វះខាតប្រេងបណ្តាលឲ្យអ្នកបើកបររង់ចាំអស់រយៈពេលរាប់ម៉ោង ដើម្បីចាក់ប្រេងនៅបូលីវី

ពលរដ្ឋអ៊ីរ៉ង់រស់នៅទីក្រុងតេអេរ៉ង់មិនទុកចិត្តការបន្តបទឈប់បាញ់របស់អាមេរិក

ព្រះសង្ឃចាប់ផ្តើមនិមន្ត ដើម្បីសន្តិភាពរយៈពេល ១សប្តាហ៍នៅប្រទេសស្រីលង្កា

ប៉ាគីស្ថានរឹតបន្តឹងសន្តិសុខនៅទីក្រុងអ៊ីស្លាម៉ាបាដ ខណៈភាពពុំច្បាស់ចំពោះកិច្ចប្រជុំសន្តិភាពអាមេរិក-អ៊ីរ៉ង់

ការវាយប្រហាររបស់អ៊ីស្រាអែលសម្លាប់មនុស្ស ៥នាក់ នៅតំបន់ហ្កាហ្សា

សង្រ្គាមអ៊ីរ៉ង់ជំរុញឲ្យមានតម្រូវការកើនឡើងសម្រាប់ថាមពលពន្លឺព្រះអាទិត្យនៅអឺរ៉ុប

កងទ័ពជើងទឹកអាល្លឺម៉ង់ត្រៀមខ្លួនសម្រាប់លទ្ធភាពនៃបេសកកម្មបោសសម្អាតមីននៅច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877