នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុង​មួយ​ថ្ងៃ​សម្ពោធ​ដាក់​ឱ្យដំណើរការជាផ្លូវការ
រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់​លាន​ដុល្លារកើនឡើង ៤,៣%
ក្នុងត្រីមាសទី១ កម្ពុជានាំចេញសំបកកង់ឡាន និងគ្រឿងបន្លាស់ផ្សេងៗមានទឹកប្រាក់ជាង ៥៨០ លានដុល្លារ
ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈ​ម៉ាស៊ូត​បន្ត​ធ្លាក់​ចុះ

សេដ្ឋកិច្ច និង កសិកម្ម

សហព័ន្ធស្រូវអង្ករកម្ពុជា អំពាវនាវឲ្យកសិករបង្កើនការដាំដុះ ជំរុញបរិមាណផលិត ខណៈពិភព​លោកកំពុងខ្វះស្បៀង

2022/06/07 11:41:34 am        1547
Facebook Telegram Linkin
ភ្នំពេញ៖ សហព័ន្ធស្រូវអង្ករកម្ពុជា បានអំពាវនាវដល់បងប្អូនប្រជាកសិករទាំងអស់ ធ្វើស្រែដោយយកចិត្តទុកដាក់ខ្ពស់ និងស្វែងរកជម្រើសយន្តការប្រើប្រាស់ធាតុចូល ដូចជាជី តាមលក្ខណៈធម្មជាតិ ឬសរីរាង្គជាដើម ឬក៏អាចលាយជាមួយជីគីមី និងត្រូវអនុវត្តតាមបច្ចេកទេសរបស់ក្រសួងកសិកម្ម ដើម្បីជំរុញទាំងបរិមាណ គុណភាព និងតម្លៃស្រូវឱ្យមានការកើនឡើងបន្ថែមទៀត ខណៈដែលពិភពលោកកំពុងជួបវិបត្តិជីថ្នាំកសិកម្មឡើងថ្លៃ និងកំពុងខ្វះស្បៀង។លោក​ឧកញ៉ា​ សុង សារ៉ន ប្រធានសហព័ន្ធស្រូវអង្ករកម្ពុជា ​បានកត់សម្គាល់ឃើញថា វិបត្តិសង្រ្គាម​រុស្ស៉ី-អ៊ុយក្រែន ​ដែលបានធ្វើឱ្យពិភពលោកខ្វះស្បៀងអាហារ រួមទាំងជីថ្នាំកសិកម្មឡើងថ្លៃនេះ គឺព្រោះប្រទេសទាំងពីរនេះ ជាប្រទេសដែលផលិតស្រូវសាឡី​សម្រាប់នាំចេញ​ទៅទីផ្សារអឺរ៉ុប​ច្រើនជាងគេ ​និងប្រទេស​នៅអាហ្វ្រិកមួយចំនួនទៀត ដែលបណ្តាលឱ្យតម្លៃស្រូវសាឡីកើនឡើង​ខ្លាំង​រហូតដល់៣០% ​ប៉ុន្តែវាក៏ជាឱកាសល្អសម្រាប់កម្ពុជា ក្នុងការនាំស្រូវអង្ករចេញដែរ ដូច្នេះបងប្អូនត្រូវខិតខំការដាំដុះ។ជាមួយគ្នានេះ លោកឧកញ៉ា សុង សារ៉ន ក៏បានលើទឹកចិត្តផងដែរដល់ការផលិតស្រូវសរីរាង្គ ព្រោះអង្ករ ​ឬស្រូវសរីរាង្គនេះ​ កំពុងមានតម្លៃខ្ពស់ ​និងមានភាពល្បីល្បាញនៅទីផ្សារអឺរ៉ុប។ លោក បញ្ជាក់ថា នៅប្រទេសកម្ពុជា​ មានក្រុមហ៊ុនមួយចំនួន ​បានចាប់ផ្តើម ផលិតស្រូវសរីរាង្គនេះ រយៈពេលជាង ១០ឆ្នាំមកហើយ តែបរិមាណមិនទាន់បានច្រើននៅឡើយទេ។ ដោយឡែកក្រុមហ៊ុន Amru Rice របស់លោកក៏បានចងក្រងបណ្តុំកសិករជាច្រើន ដើម្បីផលិតស្រូវ​សរីរាង្គនេះ ​នៅឯខេត្តព្រះវិហារ ​និងទទួលបានបរិមាណប្រមាណជាង ២ម៉ឺនតោនជាប្រចាំឆ្នាំ ហើយ​ស្រូវសរីរាង្គខេត្តព្រះវិហារនេះ​ ទទួលបានភាពល្បីល្បាញ​ និងគាំទ្រយ៉ាងច្រើននៅទីផ្សារអឺរ៉ុប ពិសេស​ គឺថែមទាំងទទួលបានចំណាត់ថ្នាក់លេខ៥ ​ជាប្រទេសដែលផលិតស្រូវសរីរាង្គច្រើន និងមានគុណភាពល្អទៀតផង។​ ចំពោះតម្លៃស្រូវសរីរាង្គនេះ លោកបញ្ជាក់ថា មានតម្លៃខ្ពស់ជាង​ស្រូវធម្មតា​រហូតដល់ជាង ៣០%។របាយការណ៍របស់សហព័ន្ធស្រូវអង្ករកម្ពុជា បង្ហាញថា ក្នុងរយៈពេល ៥ខែ ដើមឆ្នាំ២០២២ ការនាំ​អង្ករចេញពីកម្ពុជាទៅកាន់ទីផ្សារអន្តរជាតិ ​តាមរយៈក្រុមហ៊ុនចំនួន​ ៥៣ ក្រុមហ៊ុន ទៅប្រទេសចិន រួមទាំង​តំបន់ស្វយ័តហុងកុង ​ម៉ាកាវ បានចំនួនជាង​ ១៤ ម៉ឺនតោន មានកំណើនជាង ២៣% បើធៀប​ទៅនឹងរយៈពេលដូចគ្នាក្នុងឆ្នាំ២០២១។ចំណែកការនាំចេញទៅកាន់ប្រទេសនានានៅក្នុងទ្វីបអ៊ឺរ៉ុប ​បានចំនួនជាង ៨ម៉ឺន ៨ពាន់តោន មាន​កំណើនជិត ៥០%។ រីឯការនាំចេញទៅកាន់ប្រទេសអាស៊ាន ​៤ប្រទេសបានចំនួនជាង ​២ម៉ឺន ៥ពាន់តោន​ កើនឡើងជាង​ ១៧% និងការនាំចេញទៅកាន់គោលដៅផ្សេងៗចំនួន ​២១ប្រទេស បានចំនួន​ជាង ២ម៉ឺនតោន ឬស្មើនឹងជាង ៧%។ដោយឡែកមួយខែឧសភាឆ្នាំ ២០២២ ការនាំចេញអង្ករទៅកាន់ទីផ្សារអន្តរជាតិមានចំនួន ៦២.៥៣៧តោន ​មានកំណើនរហូតដល់ ​៥៤.២៨% ​ធៀបនឹងខែឧសភា​ ២០២១ និង​នាំចេញស្រូវបានចំនួន ៥០.១៦១ តោន៕

កម្ពុជាត្រៀមរួចរាល់ ក្នុងការចូលរួមថ្នាក់រដ្ឋមន្ដ្រីលើកទី១២នៅសប្តាហ៍នេះ

2022/06/06 12:31:56 pm        379
Facebook Telegram Linkin
ភ្នំពេញ៖ ឯកឧត្តមរដ្ឋមន្រ្តីក្រសួងពាណិជ្ជកម្ម បានលើកឡើងថា កម្ពុជាបានត្រៀមរួចជាស្រេច ក្នុងការចូលរួមសន្និសីទថ្នាក់រដ្ឋមន្ដ្រីលើកទី១២ (MC12) ដែលនឹងប្រព្រឹត្តទៅ ពីថ្ងៃទី១២ ដល់១៥ ខែមិថុនា ឆ្នាំ២០២២ខាងមុខនេះ នៅទីក្រុងហ្សឺណែវ ប្រទេសស្វីស។ក្រសួងពាណិជ្ជកម្ម កាលពីសប្តាហ៍កន្លងទៅនេះ បានឲ្យទូរទូស្សន៍ព័ត៌មាន ប៊ីធីវី ដឹងថា នៅក្នុង​ជំនួប​ការងារជាមួយ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម តាមប្រព័ន្ធវីដេអូ ក្នុង​គោលបំណង ជម្រាបជូនសមាជិកនៃអង្គការពាណិជ្ជកម្មពិភពលោក ដែលចូលរួម​អំពីបច្ចុប្បន្នភាព​ពាក់ព័ន្ធនឹងសន្និសីទថ្នាក់រដ្ឋមន្ដ្រីលើកទី១២ នាពេលខាងមុខនេះ ។លោកជំទាវ Ngozi Okonjo-Iweala អគ្គនាយិកាអង្គការពាណិជ្ជកម្មពិភពលោក (WTO) បាន​លើកឡើងអំពីបញ្ហា និងប្រធានបទសំខាន់ៗមួយចំនួននៃសន្និសីទថ្នាក់រដ្ឋមន្ដ្រីលើកទី១២ ដែលមានដូចជា ​សេចក្ដីព្រាងនៃកិច្ចព្រមព្រៀងឧបត្ថម្ភធនជលផល​ ការឆ្លើយតបនៃកិច្ចព្រមព្រៀង TRIPS ទៅនឹងជំងឺរីករាលដាល ការចរចាកសិកម្ម សន្ដិសុខស្បៀង និង កំណែទម្រង់អង្គការ​ពាណិជ្ជកម្ម​ពិភពលោក។ ជាមួយគ្នានេះ លោកជំទាវ ​បានស្នើដល់អង្គប្រជុំឱ្យព្យាយាមរកចំណុចឯកភាពគ្នា​ក្នុង​ចំណោម​ភាគី​ពាក់ព័ន្ធ ​និងសមាជិកអង្គការ ​ដើម្បី​ជំរុញ​និងពន្លឿនការចរចា និងសេចក្ដីសម្រេចសន្និសីទ​ថ្នាក់​រដ្ឋមន្ដ្រីលើកទី១២ ដើម្បីផ្ដល់ផល​ប្រយោជន៍ច្រើនជូនដល់ប្រទេសខ្លួន ក៏ដូចជាសមាជិក​អង្គការ​ទាំងមូល។ជាកិច្ចឆ្លើយតប ឯកឧត្តមរដ្ឋមន្ដ្រី មានប្រសាសន៍ថា កម្ពុជាគាំទ្រយ៉ាងពេញទំហឹង ចំពោះ​ប្រព័ន្ធពាណិជ្ជកម្ម​ពហុភាគី ​និងការចូលរួមដើម្បីពង្រឹងប្រព័ន្ធនេះឱ្យកាន់តែរឹងមំាំ តាមរយៈការធ្វើ​កំណែទម្រង់អង្គការពាណិជ្ជកម្មពិភពលោក យ៉ាងមានប្រសិទ្ធភាព។ ឯកឧត្តម បានបន្ដថា សេចក្ដីព្រាងនៃកិច្ចព្រមព្រៀងស្ដីពី​ឧបត្ថម្ភធនជល គួរ​ផ្តល់​នូវ​ប្រព្រឹត្តកម្ម​ពិសេស​ និងដោយឡែក (Special and Differential Treatment - SDT) ​ដោយមានភាពបត់បែន ជូន​ប្រទេស​អភិវឌ្ឍន៍តិចតួច ​ក្នុងនោះមានប្រទេសកម្ពុជា។ ឯកឧត្ត មបន្ថែមថា កម្ពុជាចង់ឃើញលទ្ធផលសំខាន់ៗក្នុងសន្និសីទនេះ ​ចំនួនដូចជា ការ​លើកលែង​ក្នុងកិច្ចព្រមព្រៀង TRIPS (TRIPS waiver), ​ការឆ្លើយតបរបស់អង្គការពាណិជ្ជកម្មពិភពលោក ទៅ​នឹងជំងឺរីករាលដាល-ល- ដើម្បីបញ្ជាក់ថា អង្គការ និងប្រព័ន្ធពាណិជ្ជកម្មពហុភាគី នៅតែអាច​ដើរតួនាទីយ៉ាងសំខាន់ក្នុងការដោះស្រាយបញ្ហាពាណិជ្ជកម្មពិភពលោក និងអាចបង្កើតនូវ​សមិទ្ធផល​ដល់​វិស័យពាណិជ្ជកម្ម និងសេដ្ឋកិច្ចពិភពលោក។ឆ្លៀតក្នុងឱកាសនោះ ឯកឧត្តមរដ្ឋមន្ដ្រី បានធ្វើការវាយតម្លៃខ្ពស់ចំពោះ ភាគីអង្គការ​ពាណិជ្ជកម្ម​ពិភព​លោក ដែលបាន​សម្របសម្រួល ​សំណើរបស់​ក្រុម​ប្រទេស​អភិវឌ្ឍន៍​តិចតួច (LDCs) ពាក់ព័ន្ធ​នឹងការស្នើសុំការរក្សាការ​អនុគ្រោះពន្ធក្នុងរយៈពេលកំណត់មួយបន្ទាប់ពីការចាកចេញពី​ចំណាត់​ថ្នាក់​ក្រុមប្រទេសអភិវឌ្ឍន៍តិចតួច ​និងកញ្ចប់នៃវិធានការគាំទ្រ ​ក្នុងអនុគណៈកម្មការ ។ជាកិច្ចចុងក្រោយ លោកជំទាវអគ្គនាយិកា​ បានថ្លែងអំណរគុណ​ចំពោះ​ការចូលរួមពីអង្គប្រជុំនា​ថ្ងៃនេះ​ និងមានជំនឿថា ​សន្និសីទថ្នាក់រដ្ឋមន្ដ្រីលើកទី១២ខាងមុខនេះ នឹងមានការចូលរួមយ៉ាង​សកម្ម​ពីបណ្ដាសមាជិក ​ព្រមទាំងទទួលបានលទ្ធផល និងអត្ថប្រយោជន៍យ៉ាងច្រើន​ដល់​សមាជិក​ទាំង​មូល៕ អត្ថបទ៖ ឈិត បូរ៉ាវី

CDC អនុម័តគម្រោងវិនិយោគថ្មីចំនួន៤ មានទុនវិនិយោគសរុប ១៧លានដុល្លារ នៅភ្នំពេញ និងខេត្តកណ្តាល

2022/06/02 02:18:58 pm        728
Facebook Telegram Linkin
ភ្នំពេញ៖ យោងតាមតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា​នៃ​ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគចំនួន ៤ផ្សេងគ្នា ​ដែលមានទំហំទឹកប្រាក់សរុបប្រមាណ ​១៧,១លានដុល្លារ ដើម្បីបង្កើតរោងចក្រកាត់ដេរ​សំលៀកបំពាក់​ និងរោងចក្រផលិតកាបូបគ្រប់ប្រភេទ ​ក្នុងនោះចំនួន ២ទីតាំង នៅក្នុងរាជធានី​ភ្នំពេញ និង២ទីតាំងផ្សេងទៀត នៅខេត្តកណ្តាល។លើកឡើងក្នុងបណ្តាញសង្គមហ្វេសប៊ុក កាលពីរាត្រីថ្ងៃទី៣១ ឧសភា ឆ្នាំ២០២២កន្លងទៅ ក្រុម​ប្រឹក្សាអភិវឌ្ឍន៍កម្ពុជា បានរៀបរាប់ថា ​គម្រោងវិនិយោគទាំង៤នេះ គិត​ទំហំទឹកប្រាក់សរុបចំនួន​ប្រមាណ ១៧,១លានដុល្លារអាម៉េរិក​ និងអាចបង្កើតការងារជូនប្រជាពលរដ្ឋចំនួនជិត ៥ពាន់នាក់។ ក្រុមហ៊ុនទាំង៤ រួមមាន ក្រុមហ៊ុនKING SUCCESS CO., LTD. គម្រោងបង្កើតរោងចក្រកាត់ដេរ និងចាក់​សំលៀកបំពាក់ ដែល​មានទីតាំងវិនិយោគស្ថិតនៅក្រុងតាខ្មៅ​ ខេត្តកណ្តាល មានទុន​វិនិយោគប្រមាណ ៦លានដុល្លារ និងអាចបង្កើតការងារបានចំនួនជិត ​២ពាន់កន្លែង​ និងក្រុមហ៊ុន MATEWE BAG & CASE (CAMBODIA) CO., LTD​ គម្រោងបង្កើតរោងចក្រផលិតកាបូបគ្រប់ប្រភេទ ដែល​មានទីតាំងវិនិយោគស្ថិតនៅខណ្ឌសែនសុខ រាជធានីភ្នំពេញ ​ទុនវិនិយោគប្រមាណ ៤,៤លានដុល្លារ ​និងអាចបង្កើតការងារបានចំនួនជាង​ ១.២០០កន្លែង។ក្រុមហ៊ុន SINOPROUD APPAREL (CAMBODIA) CO., LTD. គម្រោងបង្កើតរោងចក្រកាត់ដេរ​សំលៀកបំពាក់ ​ដែល​មានទីតាំងវិនិយោគស្ថិតនៅ ​ក្រុងតាខ្មៅ ខេត្តកណ្តាល មានទុនវិនិយោគ​ប្រមាណ ៣,៥លានដុល្លារ​ និងអាចបង្កើតការងារបានចំនួនជាង ​១.២០០កន្លែង ​និងក្រុមហ៊ុន JI SHUN YUAN (CAMBODIA) GARMENT CO., LTD. ​គម្រោងបង្កើត​រោងចក្រ​កាត់ដេរ​សំលៀកបំពាក់ ដែល​មានទីតាំងវិនិយោគស្ថិតនៅខណ្ឌមានជ័យ ​រាជធានីភ្នំពេញ មានទុន​វិនិយោគប្រមាណ ៣,២លានដុល្លារ ​និងអាចបង្កើតការងារ​បានចំនួនជាង ៥០០កន្លែង។គិតត្រឹម៤ខែ ឆ្នាំ២០២២ ​រដ្ឋាភិបាលកម្ពុជា ​បានអនុម័តគម្រោងវិនិយោគថ្មីៗ និងគម្រោងពង្រីក​ផលិតកម្ម​សរុបចំនួន ៦០គម្រោង ​ដែលមានទំហំទឹកប្រាក់សរុបប្រមាណ ២ ៦០០លានដុល្លារ​អាម៉េរិក ​និងអាចបង្កើតឱកាសការងារជូនប្រជាពលរដ្ឋចំនួនជាង ​៤ម៉ឺនកន្លែង៕ អត្ថបទ៖ បូរ៉ាវី

អាល្លឺម៉ង់ ជួយលើកកម្ពស់ការតភ្ជាប់បណ្តាញ និងការផ្គត់ផ្គង់អគ្គិសនីជនបទ

2022/06/02 02:09:36 pm        502
Facebook Telegram Linkin
ភ្នំពេញ៖ រដ្ឋាភិបាលអាល្លឺម៉ង់ សន្យាផ្តល់ឥណទានសម្បទានចំនួន ៣០ លានអឺរ៉ូ សម្រាប់គម្រោងប្រសិទ្ធភាពថាមពល នៃគម្រោងផ្គត់ផ្គង់អគ្គិសនីជនបទដំណាក់កាលទី II ដើម្បីបង្កើន និងគាំទ្រឱ្យបានទូលំទូលាយ នូវប្រសិទ្ធិភាពថាមពល និងការផ្គត់ផ្គង់ថាមពលនៅតាមទីជនបទនៅក្នុងប្រទេស។ កិច្ចព្រមព្រៀងហិរញ្ញប្បទានសហប្រតិបត្តិការ នេះត្រូវបានចុះហត្ថលេខាដោយ ឯកឧត្តម ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ​ឧបនាយករដ្ឋមន្រ្តី ​រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងឯកឧត្តម Christian Berger ឯកអគ្គរដ្ឋទូតវិសាមញ្ញ និងពេញសមត្ថភាព​នៃសាធារណរដ្ឋ​សហព័ន្ធអាល្លឺម៉ង់ប្រចាំនៅកម្ពុជា នៅថ្ងៃទី ៣១ខែឧសភា ឆ្នាំ២០២២។ក្រោមកិច្ចព្រៀងក្របខ័ណ្ឌនេះ រដ្ឋាភិបាលសាធារណរដ្ឋសហព័ន្ធអាល្លឺម៉ង់ សន្យាផ្តល់ឥណទាន​សម្បទានមួយថ្មីទៀត ចំនួន ៣០លានអឺរ៉ូ សម្រាប់គម្រោងប្រសិទ្ធភាពថាមពលសម្រាប់ការផ្គត់ផ្គង់​អគ្គិសនី​ជនបទ II ដែលការងារនេះ ក្រសួងសេដ្ឋកិច្ច និងហិរញ្ញវត្ថុ នឹងចុះហត្ថលេខាលើកិច្ច​ព្រម​ព្រៀង​ឥណទានសម្បទាន​ ជាមួយ​ធនាគារ​អភិវឌ្ឍន៍អាល្លឺម៉ង់ ​(KfW) នៅពេលក្រោយ បន្ទាប់​ពី​សិក្សាលម្អិតត្រូវបានធ្វើរួចរាល់។គម្រោងថ្មីនេះ គឺជាការបន្តគាំទ្រផ្ដល់​ឥណទានសម្បទានបន្ថែម ​សម្រាប់គម្រោងប្រសិទ្ធភាព​ថាមពល​សម្រាប់​ការ​ផ្គត់ផ្គង់​អគ្គិសនី​ជនបទ II នេះ ដែលគាំទ្រ​ដល់ការបំពេញបន្ថែមទៅដល់​កិច្ច​ខិតខំ​ប្រឹងប្រែង ​និងការផ្តល់កិច្ចសហប្រតិបត្តិការល្អប្រសើរជាបន្តបន្ទាប់​ របស់រាជរដ្ឋាភិបាលកម្ពុជា ក្នុងការបង្កើន​ និងគាំទ្រ​ឱ្យបានទូលំទូលាយ​នូវប្រសិទ្ធិភាពថាមពល ​និងការផ្គត់ផ្គង់ថាមពល​នៅ​តាមទីជនបទនៅក្នុងប្រទេស។សូមបញ្ជាក់ថា ​ឥណទានសម្បទាន​ ពីរដ្ឋាភិបាលសាធារណរដ្ឋសហព័ន្ធអាល្លឺម៉ង់ តាមរយៈធនាគារ​អភិវឌ្ឍន៍អាល្លឺម៉ង់ (KfW) លើកទី១, កម្ពុជាទទួលបាននៅឆ្នាំ២០១៩ ចំនួន ៣០ លានអឺរ៉ូ សម្រាប់គាំទ្រការអនុវត្តគម្រោងប្រសិទ្ធភាពថាមពល ​សម្រាប់ការផ្គត់ផ្គង់អគ្គិសនីជនបទ និងបន្ទាប់​មកនៅឆ្នាំ ២០២០ ដែលមានចំនួន ៣០ លានអឺរ៉ូ ដូចគ្នា សម្រាប់ហិរញ្ញប្បទាន​ដល់កម្មវិធី​អភិវឌ្ឍន៍ហេដ្ឋារចនា​សម្ព័ន្ធជន​បទសម្រាប់កម្ពុជា ។ក្នុងរយៈពេលប្រមាណ ៣០ ឆ្នាំនេះ ប្រទេសអាល្លឺម៉ង់ ជាដៃគូអភិវឌ្ឍន៍ដ៏សំខាន់មួយ ដែលបាន​សន្យា​ផ្តល់ហិរញ្ញប្បទានឥតសំណងច្រើនជាងគេ បើប្រៀបធៀបនឹងបណ្តាប្រទេស​ជា​សមាជិក​សហភាពអឺរ៉ុបដទៃទៀត។គិតចាប់ពីឆ្នាំ ១៩៩២ ដល់ដំណាច់ឆ្នាំ​ ២០២១ ​រដ្ឋាភិបាលសាធារណសហព័ន្ធអាល្លឺម៉ង់ បាន​ផ្តល់​ហិរញ្ញប្បទានសហប្រតិបត្តិការដល់កម្ពុជា​ សរុបប្រមាណ ៧២០ ​លានដុល្លារអាមេរិក ក្នុងនោះ​ឥណទាន​សម្បទាន ​មានចំនួនប្រមាណ ៧០​ លានដុល្លារអាមេរិក និងហិរញ្ញប្បទានឥត​សំណង​ចំនួនប្រមាណ ៦៥០​ លានដុល្លារអាមេរិក៕ អត្ថបទ៖ សុន រ៉ាឌី

កម្ពុជារៀបចំផែនការអភិវឌ្ឍឧស្សាហកម្ម ជំរុញការប្រកួតប្រជែង និងចូលរួមរុញកំណើនសេដ្ឋកិច្ច

2022/06/02 12:38:40 pm        453
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជា បានរៀបចំគោលនយោបាយ និងផែនការសកម្មភាពអភិវឌ្ឍជាច្រើន ដើម្បីកំណត់ប្រភេទឧស្សាហកម្មនៅកម្ពុជា ស្របទៅតាមឧត្តមភាពប្រកួតប្រជែង, និង​មានសក្តានុពល សម្រាប់ជាកម្លាំងចលករលើកស្ទួយកំណើនសេដ្ឋកិច្ចជាតិ។ឯកឧត្តម ហេង សុខគង់ អ្នកនាំពាក្យ និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី០២ ខែមិថុនា ឆ្នាំ២០២២នេះថា រាជរដ្ឋាភិបាល បានដាក់ចេញទិសដៅ​គោល​នយោបាយ ​នៃការរៀបចំ​ផែនការមេ​ ដើម្បីអភិវឌ្ឍខេត្ដព្រះសីហនុ​ទៅជាតំបន់​សេដ្ឋកិច្ចពិសេស​គំរូ​ពហុបំណង​ ក្នុងនោះសម្រាប់ឧស្សាហកម្ម ​រាជរដ្ឋាភិបាលមានគោលដៅ​កំណត់ប្រភេទ​ឧស្សាហកម្ម​ជាក់លាក់ ស្របទៅតាមឧត្តមភាពប្រកួតប្រជែង, ដែលមាន​សក្តានុពល​ប្រែក្លាយ​ខេត្តព្រះសីហនុ ជា​កម្លាំងចលករលើកស្ទួយកំណើនសេដ្ឋកិច្ចជាតិ។ឯកឧត្តម បន្តថា ក្រសួងឧស្សាហកម្ម បានគិតគូរនឹងរៀបចំផែនការ សម្រាប់អភិវឌ្ឍវិស័យ​ឧស្សាហកម្ម​ជាច្រើន ក្នុងនោះ​ក្រសួងបានស្នើរឲ្យមានការរៀបចំតំបន់ស្រាវជ្រាវ ​និងអភិវឌ្ឍន៍​ (RMD) ព្រោះវិស័យ ​នេះមានសារៈសំខាន់​ណាស់​ក្នុងការ​ជម្រុញ ​និង​លើកកម្ពស់វិស័យវិទ្យាសាស្រ្ត និងបច្ចេកវិទ្យា​ និងកំពុងពិចារណាក្នុងការរៀបចំសារៈមន្ទីរវិទ្យាសាស្រ្ត ​សម្រាប់ស្រាវជ្រាវផ្សេងៗ សម្រាប់អ្នកវិទ្យាសាស្រ្ត សិស្ស ​និស្សិតជាដើម ។ក្រៅពីនេះ,ក្រសួងកំពុងរៀបចំច្បាប់ស្តីពីការផ្ទេរបច្ចេកវិទ្យា ​ដើម្បីកម្ពុជា​មានលទ្ធភាពផ្ទេរបច្ចេកវិទ្យា​ទំនើបៗបណ្តាប្រទេសជឿនលឿន​មួយចំនួន ​ខណបច្ចុប្បន្នរាជរដ្ឋាភិបាល ​បានកំពុងរៀបចំអនុក្រិត្យ ដើម្បីរៀបចំ ​​និងគ្រប់គ្រងតំបន់វិទ្យាសាស្រ្តបច្ចេកវិទ្យា ​និងនវានុវត្តន៍​ ក្នុងគោលដៅជម្រុញ និង​លើកកម្ពស់​ ជាពិសេសការទាក់ទាញវិនិយោគិនជាដើម ។ជុំវិញការអភិវឌ្ឍឧស្សាហកម្ម, ឯកឧត្តម ហេង សុខគង់ ​ថ្លែងឲ្យដឹងថា ​គិតមកដល់បំណាច់ខែ ឧសភា ឆ្នាំ២០២២នេះ ​កម្ពុជាមានរោងចក្រឧស្សាហកម្មធុនធំ ​១ ៧១៩ រោងចក្រ ក្នុងនោះ​មាន​រោងចក្របង្កើតថ្មីមានចំនួន ៦៧ រោងចក្រ​ បានបង្កើតការងារបន្ថែមជិត ​៥​ ម៉ឺនកន្លែង និង​មាន​រោងចក្របានបិទទ្វារចំនួន ២៩ រោងចក្រផងដែរ៕អត្ថបទ៖ សុន រ៉ាឌី

អាមេរិកស្វែងយល់ពីសក្តានុពលវិនិយោគលើវិស័យហេដ្ឋារចនាសម្ព័ន្ធនៅកម្ពុជា

2022/06/02 12:07:27 pm        452
Facebook Telegram Linkin
ភ្នំពេញ៖ មន្រ្តីទូតអាមេរិកប្រចាំនៅកម្ពុជា ទទួលបន្ទុកផ្នែកសេដ្ឋកិច្ច និងពាណិជ្ជកម្ម បានស្វែងយល់​ពីសក្តានុពលវិនិយោគលើវិស័យហេដ្ឋារចនាសម្ព័ននៅកម្ពុជា ស្របពេលដែលកម្ពុជា កំពុង​ជំរុញ​កសាង​ហេដ្ឋារចនាសម្ព័នដឹកជញ្ជូន ​ដើម្បីចូលរួមលើកកម្ពស់ប្រសិទ្ធនៃការដឹកជញ្ជូន និងឡូជីស្ទីក​។លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន នៅថ្ងៃទី០១ ខែមិថុនា ឆ្នាំ២០២២ បានអញ្ជើញជួបពិភាក្សាការងារជាមួយ លោក Moses An មន្ត្រីទទួលបន្ទុកផ្នែកសេដ្ឋកិច្ច និងពាណិជ្ជកម្មស្ថានទូតសហរដ្ឋអាមេរិកប្រចាំកម្ពុជា ដោយមានការចូលរួមពីថ្នាក់ដឹកនាំក្រសួង និង​មន្ត្រីជំនាញពាក់ព័ន្ធក្រោមឱវាទក្រសួង។ជំនួបនេះ មានគោលបំណង​ដើម្បីពិភាក្សាស្វែងយល់​អំពី​កាលានុវត្តភាព​ពាណិជ្ជកម្ម​សម្រាប់​ក្រុមហ៊ុន​អាមេរិកនៅក្នុងគម្រោងអភិវឌ្ឍន៍នានារបស់ក្រសួងសាធារណការ និងដឹកជញ្ជូន នា​ពេល​បច្ចុប្បន្ន ​និង​នាពេលអនាគត ​ក៏ដូចជា​ដើម្បីស្វែងរក​ឱកាស​សម្រាប់ការ​ផ្ដល់​ជំនួយ​បច្ចេកទេស​ដែល​អាចធ្វើទៅបាន​តាមរយៈកម្មវិធីតភ្ជាប់​មេគង្គបូព៌ា-បស្ចឹម តាមរយៈក្រសួងដឹកជញ្ជូនសហរដ្ឋ​អាមេរិក។ក្នុងជំនួបខាងលើនេះ លោកជំទាវរដ្ឋលេខាធិការ បានជម្រាបជូនអំពីគម្រោងសម្រេចបាន គម្រោង​កំពុង​អនុវត្តបន្ត​ និងគម្រោងនាពេល​អនាគត​ដែលរួមមាន៖ ​គម្រោង​អភិវឌ្ឍន៍​ការដឹកជញ្ជូនតាម​ផ្លូវទឹកការដឹកជញ្ជូនផ្លូវគោក ការដឹកជញ្ជូនតាមផ្លូវដែក ​គម្រោងសាងសង់ផ្លូវល្បឿនលឿនភ្នំពេញ-ក្រុង​ព្រះសីហនុ ​ដែលគ្រោង​នឹងបញ្ចប់ការសាងសង់ក្នុងពេលឆាប់ៗនេះ គម្រោង​អភិវឌ្ឍន៍​ការដឹក​ជញ្ជូន​តាមផ្លូវទឹក​តាមទន្លេបាសាក់ និង​ការអភិវឌ្ឍកំពង់ផែ​ដើម្បីចូលរួមកាត់បន្ថយការ​ចំណាយផ្នែក​ភស្តុភារកម្ម។បន្ថែមពីលើនេះ លោកជំទាវ ក៏បានលើក​ឡើង​ផងដែរ​ទាក់ទង​ទៅនឹងគម្រោងអភិវឌ្ឍន៍​ប្រព័ន្ធ​ចម្រោះ​ទឹក​កខ្វក់ ​សុវត្ថិភាព​ចរាចរណ៍ផ្លូវគោកដែលជាបញ្ហាគួរឱ្យព្រួយបារម្ភរបស់កម្ពុជា ផែនការ​មេភស្តុភារកម្មកម្ពុជា​ដែលមានគម្រោងអភិវឌ្ឍន៍ចំនួន៣៣០គម្រោង ការបង្កើតវិទ្យាស្ថានតេ​ជោសែន សាធារណការ និងដឹកជញ្ជូន សម្រាប់ការបណ្ដុះបណ្ដាលវិស្វករជំនាន់ក្រោយក្នុងការ​កសាង​ហេដ្ឋារចនា​សម្ព័ន្ធប្រកបដោយគុណភាព​ ការធ្វើទំនើបកម្ម​យានយន្តដឹកជញ្ជូនទំនិញ បម្រែបម្រួល​អាកាសធាតុ ​និងបញ្ហាឆ្លងកាត់ព្រំដែនជាដើម។លោក Moses An បានសំដែងចំណាប់អារម្មណ៍​លើការអភិវឌ្ឍវិស័យមួយ ចំនួនដើម្បីចូលរួមចំណែក​អភិវឌ្ឍកម្ពុជាឱ្យកាន់តែមានការីកចម្រើន ​ដែលក្នុងនោះរួមមាន៖ ភាពធន់នឹងបម្រែបម្រួលអាកាស​ធាតុ ការធ្វើផែនការផ្អែកលើការអនុវត្ត ​អភិបាលកិច្ច ​បញ្ហាឆ្លងកាត់ព្រំដែន សុវត្ថិភាពផ្លូវថ្នល់ យេនឌ័រ/បរិយាបន្នសង្គម/សមធម៌ ​និងការតភ្ជាប់ពហុមធ្យោបាយ។លោក Moses An បានស្នើឱ្យមានមន្ត្រីទទួលបន្ទុកការងារទំនាក់ទំនង (Focus Point) ​រវាងភាគីទាំងពីរ ដើម្បីសម្របសម្រួល​លើការងារផ្សេងៗ ​ជាពិសេសសម្របសម្រួលកិច្ចប្រជុំតាមប្រព័ន្ធវីដេអូពីចម្ងាយ រវាង​ក្រសួងដឹកជញ្ជូនរបស់សហរដ្ឋអាមេរិក ​និងក្រសួងសាធារណការ ​និងដឹកជញ្ជូន របស់កម្ពុជា​នាពេលខាងមុខ ​ដើម្បីពិភាក្សាលម្អិតលើគម្រោងសហការមួយចំនួន៕ អត្ថបទ៖ វណ្ណៈ

ពីថ្ងៃទី១-១០ ខែមិថុនា ប្រេងសាំងធម្មតាឡើង៥០រៀល និងប្រេងម៉ាស៊ូត ឡើ១៥០រៀល ធៀបនឹងសន្ទស្សន៍ចាស់

2022/06/01 12:45:16 pm        426
Facebook Telegram Linkin
ភ្នំពេញ៖ ក្រសួងពាណិជ្ជកម្មបានប្រកាសពីតម្លៃលក់រាយប្រេងឥន្ធនៈ តាមស្ថានីយនានាទូទាំងប្រទេស ចាប់ពីថ្ងៃទី០១-១០ ខែមិថុនា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៥.៦៥០រៀល/លីត្រ (ឡើង៥០រៀល) និងប្រេងម៉ាស៊ូតត្រូវលក់តម្លៃ ៥.៥៥០រៀល/លីត្រ (ឡើង១៥០រៀល។

អាកាសយានដ្ឋានអន្តរជាតិសៀមរាប-អង្គរ សម្រេចបានប្រមាណ ២៨ភាគរយ ខណៈមានបញ្ហាប្រឈមតិចតួច

2022/06/01 12:01:49 pm        1037
Facebook Telegram Linkin
សៀមរាប៖ អាកាសយានដ្ឋានអន្តរជាតិសៀមរាបថ្មី ដែលហៅថា អាកាសយានដ្ឋានអន្តរជាតិសៀមរាប-អង្គរ បានតភ្ជាប់ផ្លូវរត់បានមួយចំនួនហើយ ប៉ុន្តែកំពុងជួបបញ្ហាប្រឈមខ្លះៗ ហើយក្រុមហ៊ុនសាងសង់ កំពុងរិះរកមធ្យោបាយដើម្បីពន្លឿនការសាងសង់ឱ្យរួចរាល់តាមពេលកំណត់ដដែល។ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរស៊ីវិល បានឱ្យដឹងថា អាកាសយានដ្ឋានអន្តរជាតិសៀមរាប-អង្គរ គិតត្រឹមបំណាច់ខែមេសាឆ្នាំ២០២២ ក្រុមហ៊ុនសាងសង់អាកាសយានដ្ឋានថ្មីមួយនេះ បានសម្រេចការកសាងបានជាង ២៨%ហើយ។ ឯកឧត្តម បន្តថា បច្ចុប្បន្ននេះ ក្រុមហ៊ុនសាងសង់ កំពុងជួបបញ្ហាប្រឈមខ្លះៗ ចាប់តំាង​ពីវិបត្តិកូវីដមក ដូចជាទំនិញត្រូវបានឡើងថ្លៃ,តម្លៃនៃការដឹកជញ្ជូនក៏ឡើងថ្លៃ ហើយអ្នកវិស្វករ និងអ្នកជំនាញការក៏ពិបាកក្នុងការធ្វើដំណើរទៅមកដែរ ប៉ុន្តែទោះបែបនេះក្តី ក៏ក្រុមហ៊ុនសាងសង់ កំពុងរកធម្យោបាយដើម្បីជម្នះបញ្ហាប្រឈមទំាងនេះដែរ ដោយត្រូវធ្វើបច្ចុប្បន្នភាពការងារឡើងវិញ ពិសេសគឺត្រូវបង្កើនល្បឿន នូវរាល់ចំណុចខ្វះខាត​ ឱ្យបានប្រសើរជាងមុន ដើម្បីឱ្យគម្រោងនេះ​រួចរាល់តាមផែនការណ៍កំណត់ដូចបានគ្រោងទុកថា នឹងរួចរាល់ក្នុងខែ មីនា ឆ្នាំ២០២៣ ហើយ​បន្ទាប់​ពី​សាងសង់រួចរាល់ ​អាកាសយានដ្ឋាននេះ ​នឹងធ្វើតេស្តសាងល្បង មុននឹងប្រតិបត្តិការ​ហោះហើរ​ពេញលេញ ក្នុងខែ១០ ឬខែ១១ ក្នុងឆ្នាំ២០២៣ដែរ។គួរបញ្ជាក់ថា ​អាកាសយានដ្ឋានអន្តរជាតិសៀមរាម.អង្គរ ​បានដំណើរការសាងសង់​នៅ​ថ្ងៃទី១៥ខែមីនាឆ្នាំ២០២០ ​ដែលសាងសង់​ដោយក្រុមហ៊ុនវិនិយោគដែលមានឈ្មោះថា Angkor International Airport Investment ហើយអាកាសយានដ្ឋាននេះ មាន​ផ្ទៃដីជាង ៧០០ហិកតា និង​មានផ្ទៃដីបម្រុងមួយចំនួនទៀត ​ដោយបច្ចុប្បន្នប្រើប្រាស់កម្មករជាង ១០០០នាក់ ក្នុងនោះកម្មករ​ប្រមាណ ៧០% ជាពលករខ្មែរ ​និងបានប្រើប្រាស់គ្រឿងចក្រពី ២០០ទៅ២៥០គ្រឿង និង​គ្រោង​ចំណាយថវិកាប្រមាណ ៨០០លានដុល្លារ ​ហើយនៅពេលកសាងរួចរាល់ដាក់ឱ្យដំណើរការ គឺអាចទទួលបានគ្រប់ប្រភេទយន្តហោះធំៗជុំវិញពិភពលោកចុះចតបានទីនេះ៕អត្ថបទ៖ គង់ រ៉េន

រាជរដ្ឋាភិបាល នឹងបោះផ្សាយលក់មូលបត្ររដ្ឋលើកដំបូង ប្រមាណ ៣០០ លានដុល្លារ នៅឆ្នាំនេះ

2022/06/01 11:26:55 am        617
Facebook Telegram Linkin
ភ្នំពេញ៖ ក្រុមការងារបច្ចេកទេសរៀបចំក្របខណ្ឌគោលនយោបាយ ស្តីពីការអភិវឌ្ឍមូលបត្ររដ្ឋ កំពុងប្រជុំស្ទាបស្ទង់ និងពិនិត្យឡើងវិញ ក្នុងគោលដៅប្រមូលធាតុចូលបន្ថែមឱ្យបានពេញលេញ និងគ្រប់ជ្រុងជ្រោយ សម្រាប់ផែនការបោះផ្សាយ និងជួញដូរមូលបត្ររដ្ឋឆ្នាំ២០២២ ។ឯកឧត្តម ប៉ែន ធីរុង្គ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងក្នុងកិច្ច​ពិគ្រោះ​យោបល់​ ស្តីពីការស្ទាបស្ទង់ទីផ្សារអំពីតម្រូវការមូលបត្ររដ្ឋ នៅថ្ងៃទី ៣១ ខែឧសភា ឆ្នាំ២០២២ នេះថា រាជរដ្ឋាភិបាលបានអនុម័ត​ និងដាក់ឱ្យអនុវត្តក្របខណ្ឌគោលនយោបាយបឋម ស្តីពីការអភិវឌ្ឍមូលបត្ររដ្ឋ កាលពីថ្ងៃទី១ ខែតុលា ឆ្នាំ២០២១។ ក្របខណ្ឌគោលនយោបាយបឋមនេះ បានដាក់ចេញនូវវិធានការគោលនយោបាយ និងផែនការ​សកម្មភាពជាក់លាក់ ដើម្បីអនុវត្តជំហាននៃការបោះផ្សាយមូលបត្ររដ្ឋ ជាពិសេសផែន​ការ​សកម្មភាព​បន្ទាន់ចំពោះមុខ និងរយៈពេលខ្លី សំដៅឈានទៅបោះផ្សាយ​លក់មូលបត្ររដ្ឋ ក្នុងទីផ្សារ​ជាលើកដំបូង​នៅឆ្នាំ២០២២នេះ។ ឯកឧត្តម បន្តថា ក្រៅពីផែនការខាងលើ រាជរដ្ឋាភិបាល បាននិងកំពុងបន្តរៀបចំ ក្របខណ្ឌគោល​នយោបាយរួម ស្តីពីការអភិវឌ្ឍមូលបត្ររដ្ឋ ​សំដៅកសាងឱ្យបាននូវប្រព័ន្ធគ្រប់គ្រងមួយដ៏រឹងមាំ និង​គ្រប់ជ្រុងជ្រោយ សម្រាប់ការបោះផ្សាយ ​និងជួញដូរមូលបត្ររដ្ឋ, តាមរយៈការអនុវត្តយ៉ាងសកម្ម នូវក្របខណ្ឌគោលនយោបាយបឋម។ រាជរដ្ឋាភិបាល បានសម្រេចនូវវឌ្ឍនភាពគួរឱ្យកត់សម្គាល់ ក្នុងនោះមាន៖ ការដាក់ចេញនូវលិខិត​បទដ្ឋាន​គតិយុត្ត​សំខាន់ៗ​ជាច្រើនដូចជា៖ ប្រកាសស្តីពីការបោះផ្សាយលក់មូលបត្ររដ្ឋ, អនុក្រឹត្យ​ស្តីពីការលើកទឹកចិត្តពន្ធដារ ​ក្នុងវិស័យមូលបត្ររដ្ឋ, សារាចរណែនាំស្តីពីការអនុវត្តចំពោះ​មូលបត្រ​រដ្ឋ ដែលកាន់កាប់ដោយគ្រឹះស្ថានធនាគារនិងហិរញ្ញវត្ថុ, និងការកំណត់ទំហំបោះផ្សាយ​លក់​មូល​បត្រ​រដ្ឋក្នុងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ដែលច្បាប់នេះបានអនុញ្ញាតឱ្យ​រាជរដ្ឋាភិបាលបោះផ្សាយ​លក់មូលបត្ររដ្ឋ ​ក្នុងទំហំសរុបប្រមាណ​ ១,២ ទីលានរៀល ត្រូវប្រមាណ ៣០០ លានដុល្លារ។កិច្ចពិគ្រោះយោបល់ របស់ក្រុមការងារបច្ចេកទេសរៀបចំក្របខណ្ឌគោលនយោបាយ ស្តីពីការ​អភិវឌ្ឍមូលបត្ររដ្ឋ គឺជាការស្ទាបស្ទង់ទីផ្សារលើកទី ៣ ដែលត្រូវបានរៀបចំឡើងក្នុងគោលបំណង​ប្រមូលធាតុចូលបន្ថែមទៀត ឱ្យបានកាន់តែពេញលេញ​ និងគ្រប់ជ្រុងជ្រោយ សម្រាប់​ជា​មូលដ្ឋាន​ដ៏សំខាន់ក្នុងការពិនិត្យឡើងវិញ និងកែសម្រួលបន្ថែមលើផែនការបោះផ្សាយ​លក់មូលបត្រ​រដ្ឋឆ្នាំ២០២២ ​ដើម្បីស្នើសុំការពិនិត្យ និងអនុម័តដ៏ខ្ពង់ខ្ពស់ពីឯកឧត្តមអគ្គបណ្ឌិតសភាចារ្យ​ឧបនាយក​រដ្ឋមន្ត្រី រដ្ឋមន្ត្រីក្រសួងរសដ្ឋកិច្ច និងហិរញ្ញវត្ថុ។រាជរដ្ឋាភិបាលគ្រោងនឹងបោះផ្សាយលក់មូលបត្ររដ្ឋជា​លើកដំបូង គឺក្នុងគោលបំណង​ដើម្បី​ធ្វើ​ហិរញ្ញប្បទាន​គាំទ្រគម្រោងវិនិយោគសាធារណៈ ​សំដៅ​លើកស្ទួយកំណើន និង​ផលិតភាព​សេដ្ឋកិច្ចរួមមាន៖ ​គម្រោងស្ដារសេដ្ឋកិច្ចក្នុងការរស់នៅជាមួយកូវីដ-១៩ ​តាមគន្លងប្រក្រតីភាពថ្មី និង​គម្រោងប្រព័ន្ធបច្ចេកវិទ្យា​ និងហេដ្ឋារចនាសម្ព័ន្ធឌីជីថលជាដើម៕អត្ថបទ៖ សុន រ៉ាឌី

ច្បាប់ស្តង់ដារ នឹងជំរុញការប្រកួតប្រជែង និងបើកនូវរបាំងបច្ចេកទេសសម្រាប់រោងចក្រសហគ្រាស

2022/06/01 11:17:21 am        653
Facebook Telegram Linkin
ភ្នំពេញ៖ ប្រធានសមាគមក្នុងវិស័យម្ហូបអាហារ បានលើកឡើងថា ច្បាប់ស្តីពីស្តង់ដារកម្ពុជា និងការចុះអនុវត្តច្បាប់របស់មន្រ្តីនគបាលយុត្តិធម៌ នៅតាមបណ្តារោងចក្រ សហគ្រាស នឹងលើកកម្ពស់ឧត្តមភាពផលិតផល និងការប្រកួតប្រជែង, មានស្តង់ដារ មានការប្រកួតប្រជែង មានស្តង់ដារ គឺជាការបើកនូវរបាំងបច្ចេកទេស។លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា ថ្លែងនៅថ្ងៃទី១ ខែ មិថុនា ឆ្នាំ២០២២ នេះថា ច្បាប់ស្តីពីស្តង់ដារកម្ពុជា និងការចុះអនុវត្តច្បាប់របស់មន្រ្តីនគបាលយុត្តិធម៌ នៅតាមបណ្តារោងចក្រ សហគ្រាស ព្រមទាំងជម្រុញលើកទឹកចិត្តដល់ម្ចាស់អាជីកម្មទាំងអស់ ជាពិសេសសហគ្រាសវេចខ្ចប់ចំណីអាហារ គួររៀបចំនីតិវិធី ដើម្បីស្នើរសុំយកស្តង់ដារ។ លោក បានស្នើរសុំដល់ស្ថានប័នជំនាញ សូមផ្សព្វផ្សាយការងារស្តង់ដារឲ្យបានទូលាយ ដល់​សាធារណៈជន ម្ចាស់អាជីវកម្ម អាជីវករ និងសិប្បករមួយចំនួន ដើម្បីឲ្យពួកគាត់យល់​ដឹងកាន់​តែច្បាស់ អំពីអត្ថប្រយោជន៍នៃការអនុវត្តស្តង់ដារ ​និងផលិតផលដែលមានស្តង់ដារ សម្រាប់​អ្នកប្រើប្រាស់។ពាក់ព័ន្ធស្តង់ដារនេះ, ឯកឧត្តម ចាន់ សុផា អគ្គនាយកវិទ្យាស្ថានស្តង់ដារកម្ពុជា ថ្លែងថា ក្រុមប្រឹក្សា​ស្តង់ដារ​ជាតិកម្ពុជា បានអនុម័តស្តង់ដារជិត ១ ពាន់ស្តង់ដាររួចហើយ ហើយបាននិងកំពុង​ជម្រុញ​បង្កើត និងអនុម័តយកស្តង់ដារថ្មីៗឲ្យបានច្រើនទៀត ​ជាពិសេសស្តង់ដារសម្រាប់វិស័យឧស្សាហកម្ម និងកសិកម្ម និងម្ហូបអាហារជាដើម ដើម្បីជាមូលដ្ឋានគ្រឹះ ជម្រុញលើកកម្ពស់លើដំណើរការផលិត ប្រកប​ដោយគុណភាព ​និងមានស្តង់ដារ ​និងជម្រុញការប្រកួតប្រជែងផលិតផលទាំងក្នុង និង​ក្រៅស្រុក។សូមបញ្ជាក់ថា ស្តង់ដារព្រះរាជាណាចក្រកម្ពុជា ដែលអនុម័តដោយក្រុមប្រឹក្សាស្តង់ដារជាតិកម្ពុជា ដែល​កំពុងមានតម្រូវការ​ សម្រាប់ការអ្នកប្រើប្រាស់រួមមាន៖ ​ស្តង់ដារ ISO:9000 ផលិតផល​ស្តង់ដារ​ម្ហូបអាហារ ​ផលិតផលស្តង់ដារយានយន្ត ​និងស្តង់ដារ​សម្រាប់វិស័យសំណង់ជាដើម៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

លោក Netanyahu ថាលោកទទួលការព្យាបាលជំងឺមហារីកក្រពេញប្រូស្តាតដោយជោគជ័យ
04/24/2026 09:04 PM
Facebook Telegram Linkin
លោក Zelenskiy ធ្វើដំណើរទៅដល់អារ៉ាប៊ីសាអ៊ូឌីត ដើម្បីស្វែងរកកិច្ចសហប្រតិបត្តិការសន្តិសុខ
04/24/2026 08:04 PM
Facebook Telegram Linkin
មនុស្ស ២នាក់ស្លាប់ អំឡុងការវាយប្រហារតាមអាកាស ខណៈយោធោអ៊ីស្រាអែលចេញការព្រមានជម្លៀស នៅភាគខាងត្បូងលីបង់
04/24/2026 08:04 PM
Facebook Telegram Linkin
សមាជិកសភាហេសបូឡា៖ បទឈប់បាញ់ «គ្មានន័យ» ទេ ដោយសារតែការវាយប្រហាររបស់អ៊ីស្រាអែល
04/24/2026 08:04 PM
Facebook Telegram Linkin
កងកម្លាំងរក្សាសន្តិភាពឥណ្ឌូនេស៊ីរបស់ UN ស្លាប់ដោយសាររបួស អំឡុងការផ្ទុះ នៅលីបង់
04/24/2026 07:04 PM
Facebook Telegram Linkin
ទីក្រុងប៉េកាំងច្រានចោលការចោទប្រកាន់របស់លោក Trumpថា នាវាអ៊ីរ៉ង់ស្ទាក់ចាប់បានមានអំណោយពីចិន
04/24/2026 07:04 PM
Facebook Telegram Linkin
អាល្លឺម៉ង់ និងអ៊ីតាលី សង្កត់ធ្ងន់លើការរួបរួម ក្នុងចំណោមសមាជិករបស់អង្គការណាតូ
04/24/2026 07:04 PM
Facebook Telegram Linkin
លោក Putinនិយាយថា រុស្ស៊ីនឹងការពារផលប្រយោជន៍របស់ខ្លួននៅតំបន់អាក់ទិក
04/24/2026 07:04 PM
Facebook Telegram Linkin
ក្តីបារម្ភ និងភាពមិនច្បាស់លាស់កើតមាននៅអ៊ីរ៉ាក់ ខណៈអាមេរិកបញ្ឈប់ការដឹកជញ្ជូនប្រាក់ដុល្លារ
04/24/2026 07:04 PM
Facebook Telegram Linkin
គណៈកម្មការស៊ើបអង្កេតតង់ហ្សានី៖ មនុស្សជាង ៥០០នាក់ ត្រូវបានសម្លាប់ក្នុងអំពើហិង្សាបោះឆ្នោតឆ្នាំមុន
04/24/2026 07:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.