BTV NEWS

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់លានដុល្លារកើនឡើង ៤,៣%

ក្នុងត្រីមាសទី១ កម្ពុជានាំចេញសំបកកង់ឡាន និងគ្រឿងបន្លាស់ផ្សេងៗមានទឹកប្រាក់ជាង ៥៨០ លានដុល្លារ

ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈម៉ាស៊ូតបន្តធ្លាក់ចុះ

សេដ្ឋកិច្ច និង កសិកម្ម

រដ្ឋមន្រ្តីពាណិជ្ជកម្ម ពង្រឹងប្រសិទ្ធភាពការងារការពារអ្នកប្រើប្រាស់ប្រាស់ និងកិច្ចការប្រកួតប្រជែង

ភ្នំពេញ៖ ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិការពារអ្នកប្រើប្រាស់ «គ.ជ.ក.ប» បានបង្ហាញចំណុចសំខាន់ៗចំនួន៣ ជូនសមាជិក ដើម្បីបង្កើនប្រសិទ្ធភាពការងារបន្ថែមទៀត នៅក្នុងគណៈកម្មាធិការជាតិការពារអ្នកប្រើប្រាស់។នៅក្នុងកិច្ចប្រជុំលើកទី៧ ដើម្បីពិនិត្យ និងអនុម័តលើសេចក្ដីព្រាងឯកសារសំខាន់ៗមួយចំនួន ក្នុងគោលបំណងពង្រឹង និងបង្កើនប្រសិទ្ធភាពការងារ កាលពីរសៀលថ្ងៃទី៩ មិថុនា ឆ្នាំ២០២២កន្លងទៅ ឯកឧត្ដមរដ្ឋមន្ត្រី បានបញ្ជាក់ថា ការងារចាំបាច់ដែលត្រូវយកចិត្តទុកដាក់ខ្ពស់ក្នុងការពិនិត្យពិភាក្សា និងអនុម័តលើសេចក្ដីព្រាងឯកសារសំខាន់ៗចំនួន៣ រួមមាន៖ ១.សេចក្ដីព្រាងគោលការណ៍ណែនាំស្ដីពីការបង្កើតសមាគមអ្នកប្រើប្រាស់ តាមវិស័យ ២.សេចក្ដីព្រាងកម្មវិធីជាតិស្ដីពីកិច្ចការពារអ្នកប្រើប្រាស់ និង៣.សេចក្ដីព្រាងគោលការណ៍ណែនាំស្ដីពីគម្រោងលក់បែបពីរ៉ាមីដ និងការលក់បែបទីផ្សារពហុកម្រិត។ជាមួយគ្នានេះ ឯកឧត្ដម បានជំរុញឱ្យអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) ធ្វើការស្វែងរក និងកំណត់បទល្មើសពាក់ព័ន្ធនឹងការធ្វើទីផ្សារបែបពីរ៉ាមីដ និងការលក់បែបទីផ្សារពហុកម្រិត(MLM)។ឯកឧត្ដមរដ្ឋមន្រ្តី បញ្ជាក់បន្ថែមថា ជាលទ្ធផលកិច្ចប្រជុំបានអនុម័តទាំងស្រុងលើសេចក្តីព្រាងឯកសារទាំង៣ខាងលើ និងបានជំរុញឱ្យអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ដែលជាសេនាធិការ ធ្វើការផ្សព្វផ្សាយឯកសារទាំង៣នេះ ជាសារធារណៈឱ្យបានទូលំទូលាយ តាមរយៈបណ្ដាញសង្គម និងប្រព័ន្ធផ្សព្វផ្សាយនានា៕អត្ថបទ៖ ឈិត បូរ៉ាវី

ឯកឧត្តម ហ៊ុន ម៉ានី អញ្ជើញសម្ពោធជាផ្លូវការក្រុមហ៊ុន អិមអ ត្រេនីង និង យ៉ប សេនធ័រ

ភ្នំពេញ៖ ឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា បានអញ្ជើញសម្ពោធជាផ្លូវការក្រុមហ៊ុន អិមអ ត្រេនីង និង យ៉ប សេនធ័រ ដើម្បីឆ្លើយតបទៅនឹងតម្រូវការជាក់ស្តែងនៃស្ថានភាពទីផ្សារការងារបច្ចុប្បន្ន ដែលស្ថិតក្នុងយុគសម័យឌីជីថល ក៏ដូចជាក្នុងបរិបទនៃបដិវត្តឧស្សាហកម្មជំនាន់ទី៤ (4th Industrial Revolution) ដែលក្រុមហ៊ុនសហគ្រាស និងនិយោជកនានា កំពុងជួបប្រទះនូវបញ្ហាប្រឈមក្នុងការស្វែងរកបុគ្គលិក ដែលមានចំណេះជំនាញសមស្របឲ្យបំពេញការងារនៅតាមស្ថាប័ន សហគ្រាសរបស់ខ្លួន។ក្នុងពិធីសម្ពោធនេះ ធ្វើឡើងនាល្ងាចថ្ងៃទី៨ ខែមិថុនា ឆ្នាំ២០២២ ដោយមានការចូលរួមពីសំណាក់ លោកជំទាវ យឹម ឆៃលីន ប្រធានក្រុមប្រឹក្សាប្រតិបត្តិ នៃក្រុមហ៊ុន MR Training & Jobs Center និងអ្នកឧកញ៉ា សៀ ឬទ្ធី អភិបាលនៃក្រុមហ៊ុន MR Training & Jobs Center ព្រមទាំងប្រធានសមាគមធុរកិច្ចនានា ម្ចាស់សហគ្រាស និងភ្ញៀវកិត្តិសយមកពីបណ្តាស្ថាប័នឯកជននានា សរុបជាង២៣០នាក់។ ជាមួយនឹងពាក្យស្លោក«ផ្សារភ្ជាប់យុវជនទៅនឹងឱកាសការងារនាថ្ងៃអនាគត» បេសកកម្ម និងគោលដៅចម្បងរបស់ក្រុមហ៊ុន អិមអ ត្រេនីង និង យ៉ប សេនធ័រ គឺរួមចំណែកជាមួយរដ្ឋាភិបាល ក្នុងការពង្រឹង និងពង្រីកសក្តានុពលរបស់វិស័យឯកជន ក៏ដូចជាចូលរួមចំណែកក្នុងការកសាងធនធានមនុស្សដែលជាកម្លាំង ចលករដ៏មានសារសំខាន់ក្នុងការរួមចំណែកជំរុញកំណើនសេដ្ឋកិច្ចតាមរយៈកំណើននៃអត្រានិកម្មភាពក្នុង ទីផ្សារការងារផងដែរ។ ទន្ទឹមនេះ ដើម្បីសម្រេចបាននូវចក្ខុវិស័យខាងលើ ក្រុមហ៊ុនបានកំណត់បេសកកម្មស្នូលរបស់ខ្លួនរួមមាន៖ លើកកំពស់ស្តង់ដារនៃសមត្ថភាពដោយផ្តល់នូវកម្មវិធីបណ្តុះបណ្តាលដែលមានគុណភាពខ្ពស់ ដើម្បីបំពេញតម្រូវការអាជីវកម្មដែលកំពុងកើនឡើង និងផ្សារភ្ជាប់យុវជនដែលមានចំណេះជំនាញ សមត្ថភាពវិជ្ជាជីវៈ ទៅនឹងទីផ្សារការងារដ៏សម្បូរបែបនាពេលបច្ចុប្បន្ន។ លោកជំទាវ ងួន សូនី នាយិកាគ្រប់គ្រងក្រុមហ៊ុន អិមអ ត្រេនីង និង យ៉ប សេនធ័រ បានឲ្យដឹងថា ក្រុមហ៊ុន ផ្តោតលើសក្តានុពលយុវជន និងសម្លឹងឃើញថា តំណែង និងការងារ ក្នុងកម្រិតដំបូងមានសារៈសំខាន់ MR Training and Jobs Center បានផ្តោតលើតំណែងកម្រិតបឋម ដែលជាចំណុចចាប់ផ្តើមនៃបុគ្គលគ្រប់គ្នា។ លោកជំទាវ ជឿជាក់ថាមនុស្សម្នាក់ៗ សុទ្ធតែចាប់ផ្តើមការងារពីកម្រិតដំបូង ហើយតំណែងនេះ ជាអ្នកដែលអនុវត្ត និងប្រតិបត្តិ ក៏ដូចជាឈរនៅជួរមុខជាមួយអតិថិនជនរបស់លោក អ្នក។ ដូច្នេះពួកគាត់សំខាន់ ហើយការជ្រើសរើស និងបំប៉ន តាមរយៈការបណ្តុះបណ្តាល ពីតថភាពជាក់ស្តែងអំពីការងារពិតប្រាកដ ដល់ពួកគាត់ គឺរឹតតែសំខាន់ ហើយនេះគឺជាចំណុចដែលក្រុមហ៊ុន ផ្តោតការយកចិត្តទុកដាក់យ៉ាងខ្ពស់បំផុត។ ជាមួយគ្នានោះដែរអ្នកឧកញ៉ា សៀ ឬទ្ធី បានលើកឡើងដែរថា កម្ពុជាយើងមានប្រជាជនវ័យក្មេងចំនួនច្រើនណាស់ ដែលមានឆន្ទៈប្រកបដោយសេចក្តីស្វាហាប់ក្នុងការកសាងជីវភាពរស់នៅ និងចូលរួមចំណែកស្ថាបនាប្រទេសជាតិឱ្យបានកាន់តែប្រសើរឡើង។ ក៏ប៉ុន្តែគឺដោយសារពួកគេអាចខ្វះកត្តាជម្រុញ ដើម្បីអាចក្លាយជាអ្នកខ្លាំងពូកែប្រកបដោយទេពកោសល្យ ផ្សារភ្ជាប់ជាមួយ នឹងការងារដែលរូបគេកំពុងធ្វើ។ ដូច្នេះហើយយើងបានបង្កើត MR Training and Jobs Center នេះឡើងក្នុងបំណងដើម្បីដោះស្រាយបញ្ហាគម្លាតនេះនៅក្នុងទីផ្សារកម្ពុជា ដោយការបណ្តុះបណ្តាលផ្នែកធនធាន ចំណេះដឹងខាងវិជ្ជាជីវៈបន្ថែមដល់ពួកគាត់។ MRTJC ត្រូវបានបង្កើតឡើងជាវេទិកាមួយ សម្រាប់ផ្សារភ្ជាប់យុវជនជាមួយនឹងកាលានុវត្តភាពដែលបានពីនិយោជក ដែលមានបទពិសោធន៍ល្អៗបំផុតរបស់កម្ពុជា។ គោលដៅរបស់យើងសាមញ្ញបំផុត គឺដើម្បីភ្ជាប់មនុស្សវ័យក្មេងដែលមានទេពកោសល្យ ឲ្យសមស្របទៅជាមួយនឹងអាជីវកម្មរបស់យើង។ក្នុងពិធីសម្ពោធនេះដែរ លោកជំទាវ យឹម ឆៃលីន ប្រធានក្រុមប្រឹក្សាប្រតិបត្តិ នៃក្រុមហ៊ុន MR Training & Jobs Center បានថ្លែងថា ក្រុមហ៊ុន អិមអ ត្រេនីង និងយ៉ប សេនធ័រ នឹងដើរតួនាទីក្នុងការផ្សារភ្ជាប់យុវជនដែលមានចំណេះជំនាញ សមត្ថភាពវិជ្ជាជីវៈ ទៅនឹងទីផ្សារការងារដ៏សម្បូរបែបនាពេលបច្ចុប្បន្នតាមរយៈការផ្តល់ការបណ្តុះបណ្តាលតម្រង់ទិស និងការប្រឹក្សាការងារដល់យុវជន ជាពិសេសនិស្សិតដែលទើបតែបញ្ចប់ការសិក្សាពីគ្រឹះស្ថានសិក្សានានា ដើម្បីឲ្យពួកគេទទួលបានចំណេះដឹងជាមូលដ្ឋានក្នុងការឈានទៅប្រកបអាជីពនាពេលអនាគត។ លោកជំទាវ ក៏បានបញ្ជាក់ផងដែរថា តាមរយៈសេវាកម្មរបស់ក្រុមហ៊ុន MR Training & Jobs Center និយោជក ក៏នឹងអាចទទួលបាននូវបុគ្គលិកដែលមានគុណវឌ្ឍិសមស្រប និងមានការត្រៀមខ្លួនរួចរាល់ក្នុងការបំពេញការងារឲ្យចំគោលដៅ ក្នុងក្រុមហ៊ុនសហគ្រាសរបស់ពួកគេផងដែរ។ ក្រុមហ៊ុន អិមអ ត្រេនីង និងយ៉ប សេនធ័រ ប្តេជ្ញានៅជាមួយយុវជន តាំងពីការចាប់ផ្តើមដំបូងនៃការងារ និងគ្រប់ដំណាក់កាលនៃការវិវឌ្ឍរបស់អ្នក។ យើងនឹងសហការជាបន្តបន្ទាប់ជាមួយដៃគូ នានាទាំងក្នុងស្រុក និងក្រៅស្រុក ដែលមានបំណងក្នុងការបណ្តុះ និងពង្រឹងនូវសក្តានុពលរបស់យុវជនកម្ពុជា ឱ្យកាន់តែប្រសើរឡើង ដើម្បីកម្ពុជាកាន់តែឈ្ពោះទៅមុខ៕

World Bank ព្យាករណ៍កំណើនសេដ្ឋកិច្ចកម្ពុជា រង្វង់ ៤,៥ភាគរយ ក្នុងឆ្នាំ២០២២

ភ្នំពេញ៖ ធនាគារពិភពលោក បានរក្សាកំណើនសេដ្ឋកិច្ចកម្ពុជាក្នុងរង្វង់ ៤,៥ភាគរយ ក្នុងឆ្នាំ២០២២នេះ ជាអាត្រាដូចនឹងកំណើនព្យាករណ៍កាលពីខែមករា ដើមឆ្នាំ ហើយកំណើនសេដ្ឋកិច្ចកម្ពុជា នឹងហក់ឡើងខ្ពស់ ក្នុងរង្វង់ ៥,៨ភាគរយ ក្នុងឆ្នាំ២០២៣ខាងមុខ។យោងតាមរបាយការណ៍ ដែលមានចំណងជើងថា Global Economic Prospects ចេញផ្សាយកាលពីថ្ងៃទី៨ ខែមិថុនា ធនាគារពិភពលោក ព្យាករណ៍ថា សម្រាប់ឆ្នាំនេះ ទស្សនវិស័យសម្រាប់ប្រទេសកម្ពុជា មិនមានការផ្លាស់ប្ដូរពីការព្យាករណ៍ក្នុងខែមករាទេ ខណៈដែលការព្យាករណ៍សម្រាប់ប្រទេសវៀតណាម បានកើនឡើង ០,៣ ភាគរយ។កំណើនសេដ្ឋកិច្ចក្នុងប្រទេសកម្ពុជា ត្រូវបានគេព្យាករណ៍ថា នឹងកើនឡើងពី ៤,៥ ភាគរយនៅឆ្នាំនេះទៅ ៥,៨ ភាគរយនៅឆ្នាំក្រោយ ដែលជាល្បឿននៃការពង្រីកលឿនបំផុតបន្ទាប់ពីប្រទេសវៀតណាម ដែលជាប្រទេសដែលវាត្រូវបានព្យាករណ៍ថា នឹងកើនឡើងពី ៥,៨ ភាគរយទៅ ៦,៥ភាគរយ។ក្នុងចំណោមសេដ្ឋកិច្ចអាស៊ានដែលកំពុងអភិវឌ្ឍន៍ផ្សេងទៀត ប្រទេសហ្វីលីពីន ត្រូវបានគេរំពឹងថានឹងកើនឡើង ៥,៦ ភាគរយនៅឆ្នាំក្រោយ ធ្លាក់ចុះបន្តិចពី ៥,៧ ភាគរយនៅឆ្នាំនេះ។ធនាគារពិពពលោក លើកឡើងក្នុងរបាយការណ៍ថា បន្ថែមពីលើការខូចខាតដែលជំងឺរាតត្បាតកូវីដ-១៩ បានបង្កឡើង សង្គ្រាមឈ្លានពានរបស់ប្រទេសរុស្ស៊ី ទៅលើប្រទេសអ៊ុយក្រែន បានធ្វើឱ្យដំណើរ ថមថយនៃសេដ្ឋកិច្ច សាកលលោកកាន់តែធ្លាក់លឿន រហូតដល់គ្រាមួយដែលអាចក្លាយជាដំណាក់កាលអូសបន្លាយ ក្នុងនោះ កំណើនសេដ្ឋកិច្ចកាន់តែខ្សោយថាមពល ហើយអតិផរណាចេះតែកើនឥតឈប់ឈរ។នៅក្នុងកម្រិតសាកល កំណើនសេដ្ឋកិច្ចត្រូវបានរំពឹងទុកថា នឹងស្រុតចុះពី ៥,៧ភាគរយក្នុងឆ្នាំ២០២១ មកត្រឹម ២,៩ភាគរយ ក្នុងឆ្នាំ២០២២ ដែលទាបជាងច្រើនប្រៀងធៀបទៅនឹង ៤,១ភាគរយ ដែលត្រូវបាន ប្រមើលទុកកាល ពីខែមករាដើមឆ្នាំនេះ។តាមការរំពឹងទុក កម្រិត ២,៩ភាគរយ នេះ នឹងនៅទ្រឹងសំកាំងរហូតដល់ឆ្នាំ២០២៣ និង២០២៤ ដោយសារតែ សង្រ្គាមនៅអ៊ុយក្រែន បង្កការបន្ទុចបង្អាក់ដល់សកម្មភាពសេដ្ឋកិច្ច ការវិនិយោគ និងការធ្វើពាណិជ្ជកម្ម ហើយក្នុង រយៈពេលខ្លីខាងមុខ តម្រូវការរបស់អ្នកប្រើប្រាស់ក៏នឹងធ្លាក់ចុះ រីឯគោលនយោបាយអន្តរាគមផ្នែកហិរញ្ញវត្ថុ និងរូបិយវត្ថុ ក៏នឹងត្រូវដកថយដែរ។ ជាលទ្ធផលនៃការខូចខាតសេដ្ឋកិច្ចដោយសារជំងឺរាតត្បាត និងសង្គ្រាម ចំណូលសម្រាប់មនុស្សម្នាក់នៅក្នុង បណ្តាប្រទេសកំពុងអភិវឌ្ឍន៍ក្នុងឆ្នាំនេះ និងមានកម្រិត៥ភាគរយ ទាបជាងកម្រិតដែលធ្លាប់មានកាល ពីមុនសម័យផ្ទុះជំងឺរាតត្បាតកូវីដ-១៩៕ អត្ថបទ៖ វណ្ណៈ

រោងចក្រសហគ្រាសថ្មីចំនួន២កន្លែង ត្រូវបានបង្កើតក្នុងតំបន់សេដ្ឋកិច្ចពិសេសខេត្តស្វាយរៀង

ស្វាយរៀង៖ រោងចក្រ សហគ្រាសចំនួន ២កន្លែងផ្សេងទៀត ត្រូវបានបង្កើតឡើង នៅក្នុងតំបន់សេដ្ឋកិច្ចពិសេសនានា ដើម្បីបង្កើនការផលិត ខណៈរោងចក្រ សហគ្រាសជាង ២០០កន្លែង នៅក្នុងខេត្តស្វាយរៀង បច្ចុប្បន្នកំពុងធ្វើសកម្មភាពផលិតយ៉ាងសកម្ម ដើម្បីឆ្លើយតបតម្រូវការទីផ្សារក្នុងនិងក្រៅប្រទេសបានទាន់ពេលវេលា។លោក អ៊ូ សុខឿន ប្រធានមន្ទីរការងារបណ្ដុះបណ្ដាលវិជ្ជាជីវៈខេត្តស្វាយរៀង នៅថ្ងៃទី៧ ខែមិថុនាឆ្នាំ ២០២២ នេះបានប្រាប់ទូរទស្សន៍ BTV បានឱ្យដឹងថា នៅប៉ុន្មានខែចុងក្រោយនេះ ក្រុមអ្នកវិនិយោគទុនបានចូលមករកស៊ីដោយបានបង្កើតរោងចក្រ សហគ្រាសចំនួន ២កន្លែងបន្ថែមទៀតសម្រាប់បើកឲ្យដំណើរការផលិត នូវផលិតផលសម្រាប់នាំចេញ ខណៈដែលរោងចក្រសហគ្រាសដែលមានស្រាប់នៅក្នុងខេត្ត កំពុងធ្វើសកម្មភាពផលិតយ៉ាងសកម្ម ដើម្បីឆ្លើយតបទៅនឹងតម្រូវរបស់ទីផ្សារក្នុង និងក្រៅប្រទេសបានទាន់ពេលវេលា។លោក បានបញ្ជាក់បន្ថែមថា ស្វាយរៀងបន្ទាប់ពីរាជរដ្ឋាភិបាល បានបង្កើតអោយមានតំបន់សេដ្ឋកិច្ចពិសេស នៅឆ្នាំ២០០៥ រហូតមកដល់បច្ចុប្បន្ន ខេត្តមានតំបន់សេដ្ឋកិច្ចពិសេសចំនួន១២កន្លែង ហើយបច្ចប្បន្នបានដំណើការផលិតចំនួន៩តំបន់ សម្រាប់ដំណើការផលិតផលិតផលនាំចេញ ។តាមរបាយការណ៍ដែល BTV ទទួលបាន បញ្ជាក់ឱ្យដឹងថា គិតមកដល់ចុងខែឧសភា ឆ្នាំ២០២២នេះ នៅស្វាយរៀង មានរោងចក្រ សហគ្រាស និងមូលដ្ឋានផលិត ចំនួន ២៥០មូលដ្នាន ក្នុងនោះកម្មករ កម្មការិនី និងជនបរទេស កំពុងបំរើការងារគ្រប់ផ្នែកសរុប ជាង១សែននាក់ ដើម្បីស្រូបយកកម្រៃពលកម្ម បំរើជីវភាព និងចូលរួមធ្វើការ អភិវឌ្ឍន៍សង្គមគ្រួសារ ៕

សន្ទស្សន៍ថ្លៃលំនៅឋាន នឹងចូលរួមអភិវឌ្ឍន៍ និងធ្វើឱ្យប្រសើរឡើងវិស័យអចលនទ្រព្យនៅកម្ពុជា

ភ្នំពេញ៖ ធនាគារជាតិនៃកម្ពុជា បានដាក់ឱ្យប្រើប្រាស់នូវសន្ទស្សន៍ថ្លៃលំនៅដ្ឋាន ដើម្បីតាមដានការវិវត្តនៃវិស័យអចលនទ្រព្យ និងលំនៅដ្ឋានដែលកំពុងរីកចម្រើនខ្លាំង។ អ្នកជំនាញក្នុងវិស័យអចលនទ្រព្យ បានអះអាងថា សន្ទស្សន៍ថ្លៃលំនៅដ្ឋាននេះ នឹងចូលរួមអភិវឌ្ឍន៍ និងធ្វើឱ្យប្រសើរឡើងវិស័យអចលនទ្រព្យនៅកម្ពុជា។លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ប្រាប់ទូរទស្សន៍ព័ត៌មាន ប៊ីធីវី កាលពីល្ងាចថ្ងៃទី៨ មិថុនា ឆ្នាំ២០២២នេះថា ការបង្កើតឲ្យមានសន្ទស្សន៍ថ្លៃលំនៅដ្ឋានបន្ថែមនេះ មិនមានផលរំខានដែរដល់អ្នកប្រកបអាជីវកម្មក្នុងវិស័យនេះ ប៉ុន្តែសន្ទស្សន៍ថ្លៃលំនៅដ្ឋាន នឹងចូលរួមអភិវឌ្ឍន៍វិស័យអចលនទ្រព្យ និងសំណង់នៅកម្ពុជា ប្រសើរឡើង។ទាក់ទងនឹងស្ថានភាពនៃការទិញលក់ និងតម្លៃអចលនទ្រព្យនៅកម្ពុជាបច្ចុប្បន្ននេះ លោក បានឱ្យដឹងថា មិនមានការធ្លាក់ថ្លៃនោះទេ ទោះបីជាកម្ពុជាជួបវិបត្តិប្រឈមការរាតត្បាតនៃជំងឺកូវីដ១៩ រយៈពេលជាង ២ឆ្នាំនេះក៏ដោយ ក៏កម្ពុជានៅតែមានស្ថានភាពរឹងមាំនៅក្នុងទីផ្សារមួយនេះ ។សូមបញ្ជាក់ថា ការដាក់ឱ្យប្រើប្រាស់សន្ទស្សន៍ថ្លៃលំនៅដ្ឋាន គឺជាជំហាន និងសមិទ្ធផលថ្មីមួយទៀតនៃការងារចងក្រងស្ថិតិសេដ្ឋកិច្ច និងហិរញ្ញវត្ថុ សម្រាប់បម្រើដល់ការវិភាគ និងវាយតម្លៃដំណើរការសេដ្ឋកិច្ច ពិសេសវិស័យអចលនទ្រព្យ និងសំណង់។ សន្ទស្សន៍ថ្លៃលំនៅដ្ឋាននេះដែរ នឹងរួមចំណែកដ៏សំខាន់ក្នុងការតាមដាន វាយតម្លៃ និងរៀបចំគោលនយោបាយអភិវឌ្ឍន៍ ក៏ដូចជាវិធានការនានា ដើម្បីកាត់បន្ថយហានិភ័យជាអតិបរមា ក្នុងគោលដៅស្ថិរភាពម៉ាក្រូសេដ្ឋកិច្ច៕ អត្ថបទ៖ បូរ៉ាវី

ក្រសួងពាណិជ្ជកម្ម បើកកិច្ចប្រជុំអន្តរក្រសួង ពិភាក្សាលើការចរចាពាណិជ្ជកម្ម

ភ្នំពេញ៖ ក្រសួងពាណិជ្ជកម្ម បានបើកកិច្ចប្រជុំអន្តរក្រសួង តាមប្រព័ន្ធវីដេអូ ពិភាក្សាលើប្រធានបទសំខាន់ៗ ដើម្បីរៀបចំគោលជំហរ សម្រាប់ចូលរួមសន្និសីទនេះ របស់អង្គការពាណិជ្ជកម្មពិភពលោក (WTO) ខណៈដែលកិច្ចប្រជុំសន្និសីទថ្នាក់រដ្ឋមន្ត្រីលើកទី១២ នឹងឈានដល់ចាប់ពីថ្ងៃទី១២ ខែមិថុនាខាងមុខនេះ។ក្នុងកិច្ចប្រជុំនៅក្រសួងពាណិជ្ជកម្មនៅរសៀលថ្ងៃទី៧ ខែមិថុនានេះ ឯកឧត្តម សុខ សុភ័ក្រ្ត ប្រធានអង្គប្រជុំ បានស្វាគមន៍ចំពោះវត្តមានតំណាងក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទ ក្រសួងប្រៃសណីយ៍ និងទូរគមនាគមន៍ ក្រុមប្រឹក្សាអភិវឌ្ឍន៍កម្ពុជា និងក្រុមការងារស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការពាណិជ្ជកម្មពិភពលោក និងក្រុមការងារនៅក្រសួងពាណិជ្ជកម្ម និងបានជម្រាបពីគោលបំណងនៃកិច្ចប្រជុំនេះ។ តាមការរាយការណ៍របស់ឯកឧត្តម ឡុង កែមវិចិត្រ ឯកអគ្គរាជទូត និងក្រុមការងារស្ថានបេសកកម្មអចិន្ត្រៃយ៍កម្ពុជាប្រចាំអង្គការពាណិជ្ជកម្មពិភពលោក ដែលបានចូលរួមប្រជុំចរចាផ្ទាល់នៅទីនោះ បានលើកឡើងពីវឌ្ឍនភាពចុងក្រោយលើប្រធានបទសំខាន់ៗ និងបញ្ហានានាដែលសមាជិកអង្គការកំពុងចរចា និងលទ្ធផលរំពឹងទុក ក្នុងនោះរួមមាន៖ ការឆ្លើយតបរបស់អង្គការពាណិជ្ជកម្មពិភពលោក ចំពោះវិបត្តិជំងឺរាតត្បាត ការលើកលែងពាក់ព័ន្ធនឹងទិដ្ឋភាពនៃកម្មសិទ្ធិបញ្ញាទាក់ទងនឹងពាណិជ្ជកម្ម ការស្តុកទុកស្បៀងអាហារសាធារណៈ កម្មវិធីស្បៀងអាហារពិភពលោក ការចរចាស្តីពីកសិកម្ម និងឧបត្ថម្ភធនជលផល កំណែទម្រង់អង្គការពាណិជ្ជកម្មពិភពលោក ការចរចាពាក់ព័ន្ធនឹងពាណិជ្ជកម្មតាមប្រព័ន្ធអេឡិចត្រូនិក។ក្នុងកិច្ចប្រជុំនេះដែរ ឯកឧត្តមឯកអគ្គរាជទូត បានបញ្ជាក់ថា អង្គការពាណិជ្ជកម្មពិភពលោក កំពុងបន្តប្រជុំចរចាយ៉ាងមមាញឹកមុនកិច្ចប្រជុំថ្នាក់រដ្ឋមន្ត្រីលើកទី១២ ដើម្បីអាចសម្រេចបាននូវលទ្ធផលជាដុំកំភួន ហើយទោះបីជាការចរចាលើប្រធានបទមួយចំនួនអាចនឹងមិនបញ្ចប់បានក្នុងអំឡុងពេលកិច្ចប្រជុំថ្នាក់រដ្ឋមន្ត្រីលើកទី១២ សមាជិកនឹងសម្រេចឱ្យមានសេចក្តីប្រកាសពហុភាគីសម្រាប់កិច្ចប្រជុំថ្នាក់រដ្ឋមន្ត្រីលើកទី១២នេះផងដែរ។ឯកឧត្តម សុខ សុភ័ក្រ្ត បានថ្លែងអំណរគុណដល់តំណាងអន្តរក្រសួង-ស្ថាប័នដែលបានចូលរួមកិច្ចប្រជុំដ៏មានសារៈសំខាន់នេះ និងបានស្នើឱ្យក្រុមការងារស្ថានបេសកកម្ម បន្តរាយការណ៍ជូនបន្ថែមពីវឌ្ឍនភាពក៏ដូចជាលទ្ធផលនៃការប្រជុំចរចាជាបន្តបន្ទាប់ និងពិភាក្សាជាមួយក្នុងក្រុមការងារក្នុងស្រុក លើវឌ្ឍនភាពនៃការចរចានៅអង្គការពាណិជ្ជកម្មពិភពលោក។គួររំលឹកថា កិច្ចប្រជុំសន្និសីទថ្នាក់រដ្ឋមន្ត្រីលើកទី១២ គ្រោងនឹងប្រព្រឹត្តទៅពីថ្ងៃទី១២ ដល់ថ្ងៃទី១៥ ខែមិថុនា ឆ្នាំ២០២២ នៅទីក្រុងហ្សឺណែវ ប្រទេសស្វីស ហើយឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នឹងដឹកនាំគណៈប្រតិភូកម្ពុជាចូលរួមកិច្ចប្រជុំដ៏មានសារៈសំខាន់នេះផងដែរ៕អត្ថបទ៖ បូរ៉ាវី

ទំហំពាណិជ្ជកម្មកម្ពុជា-ថៃ រំពឹងងើបឡើងល្អប្រសើរ ខណៈប្រទេសទាំងពីរបើកច្រកព្រំដែន

ភ្នំពេញ៖ ប្រធានសមាគមពាណិជ្ជកម្មថៃនៅកម្ពុជា រំពឹងថា ទំហំពាណិជ្ជកម្មទ្វេភាគីកម្ពុជា-ថៃ ក្នុងឆ្នាំ ២០២២ អាចងើបល្អប្រសើរឡើងវិញដូចមុនវិបត្តិនៃជំងឺកូវីដ ១៩ ខណៈកម្ពុជាបានបើកប្រទេសគ្មានការរឹតត្បិត និងប្រទេសថៃបើកច្រកព្រំដែនឡើងវិញផងដែរ។លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃនៅកម្ពុជា លើកឡើង ក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌ នៅថ្ងៃទី៨ ខែ មិថុនា ឆ្នាំ ២០២២ នេះថា មុនវិបត្តិជំងឺកូវីដ ១៩ ការធ្វើពាណិជ្ជកម្មទ្វេរភាគីកម្ពុជាថៃ ពីមួយឆ្នាំទៅមួយឆ្នាំ បានបន្តហក់ឡើងគួរជាទីកត់សម្គាល់ ក្នុងនោះប្រទេសទាំងពីរក៏បានកំណត់គោលដៅនៃការផ្លាស់ប្តូរទំនិញ គឺត្រឹមឆ្នាំ ២០២៣ នឹងជម្រុញទំហំពាណិជ្ជកម្មរវាងប្រទេសទាំងពីរឲ្យដល់ ១៥ ពាន់លានដុល្លារអាមេរិក។ជុំវិញការធ្វើពាណិជ្ជកម្មនេះ, លោកស្រី ជីរ៉ាណាន់ មានសុទិដ្ឋិនិយមយ៉ាងខ្លាំង លើការធ្វើពាណិជ្ជកម្មរវាងប្រទេសទាំងពីរ ស្របពេលកម្ពុជាបានបើកប្រទេសឡើងវិញ ដោយគ្មានការរឹតត្បិត ជាពិសេសកម្ពុជាបានកំពុងចាកចេញពីវិបត្តិកូវីដ ១៩ ។ជាក់ស្តែងក្នុងរយៈពេល ៤ខែ ដើមឆ្នាំនេះ ការនាំចូលទំនិញពីប្រទេសថៃ មានទំហំទឹកប្រាក់ប្រមាណជាង ២ ៤០០ លានដុល្លារ និងការនាំចេញពីកម្ពុជា មានទំហំទឹកប្រាក់ជាង ៤៥៨ លានដុល្លារអាមេរិក បានកើនឡើងប្រមាណជាង ១០% បើប្រៀបធៀបរយៈពេលដូចគ្នាឆ្នាំ ២០២១។ ទាក់ទងការធ្វើពាណិជ្ជកម្មកម្ពុជា-ថៃ នេះដែរ ឯកឧត្តម ប៉ែន សុវិជាតិ អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម ថ្លែងថា បច្ចុប្បន្ន ចំពោះលំហូរទំនិញនៅតាមច្រកព្រំដែន ជាពិសេសការផ្លាស់ប្តូរទំនិញរវាងកម្ពុជា-ថៃ បានដំណើរការទៅដោយរលូន បន្ទាប់ពីប្រទេសថៃបើកព្រំដែនឡើងវិញ ដែលនឹងធ្វើឲ្យទំហំពាណិជ្ជកម្មកម្ពុជា-ថៃ នឹងកើនឡើងកាន់តែល្អប្រសើរថែមទៀត។សូមបញ្ជាក់ថា៖ បន្ទាប់ពីវិបត្តិនៃជម្ងឺកូវីដ ១៩បានផ្ទុះឡើង ការធ្វើពាណិជ្ជកម្មកម្ពុជា-ថៃ នៅក្នុងឆ្នាំ ២០២១ ការនាំចូលទំនិញពីប្រទេសថៃ មានទំហំទឹកប្រាក់ប្រមាណជាង ៧ ពាន់លានដុល្លារ និងការនាំចេញពីកម្ពុជាមានតម្លៃជាង ៩០០ ពាន់លានដុល្លារ៕ អត្ថបទ៖ សុន រ៉ាឌី

កម្ពុជាកំពុងរៀបចំយុទ្ធសាស្រ្តកាត់បន្ថយថ្លៃឡូជីស្ទីក ដើម្បីមានភាពប្រកួតប្រជែង

ភ្នំពេញ៖ រាជរដ្ឋាភិបាលកំពុងរៀបចំយុទ្ធសាស្រ្តកាត់បន្ថយថ្លៃឡូជីស្ទីក តាមរយៈការដាក់ចេញជាវិធានការកែទម្រង់ជារចនាសម្ព័ន្ធ ជាប្រព័ន្ធ និងជាកញ្ចប់ ដើម្បីអភិវឌ្ឍន៍ប្រព័ន្ធដឹកជញ្ជូន និងឡូជីស្ទីកឱ្យកាន់តែមានប្រសិទ្ធភាព ប្រទាក់ក្រឡាគ្នា ថ្លៃថោក និង ចំណាយពេលតិច ដើម្បីជម្រុញឱ្យសេដ្ឋកិច្ចកម្ពុជាកាន់តែភាពប្រកួតប្រជែង ។ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងក្នុងជំនួបពិភាក្សាការងារជាមួយ លោកស្រី Cordula Rastogi សេដ្ឋវិទូជាន់ខ្ពស់របស់ WB មកពីទីស្នាក់ការកណ្តាលទីក្រុង វ៉ាស៊ីងតោន អំពីយុទ្ធសាស្រ្តកាត់បន្ថយថ្លៃឡូជីស្ទីកនៅកម្ពុជា ក្នុងបរិបទដែលខ្សែច្រវ៉ាក់ផ្គត់ផ្គង់សកលត្រូវរាំងស្ទះដោយសារ វិបត្តិនៃជំងឺកូវីដ-១៩ នៅថ្ងៃទី ៦ ខែ មិថុនា ឆ្នាំ២០២២។ក្នុងជំនួបខាលើនេះ ឯកឧត្តម មានប្រសាសន៍ថា វិស័យឡូជីស្ទីក គឺជាវិស័យអាទិភាព និងជាគន្លឹះសម្រាប់ជំរុញ ការធ្វើពាណិជ្ជកម្ម និងវិនិយោគ ក៏ដូចជាការអភិវឌ្ឍជាទូទៅសម្រាប់កម្ពុជា។ សេដ្ឋកិច្ចកម្ពុជា ពិតជាមិនអាចរីកចម្រើនលូតលាស់ជឿនលឿនទៅមុខបានវែងឆ្ងាយឡើយ ប្រសិនបើកម្ពុជាពុំមានប្រព័ន្ធឡូជីស្ទីក ដែលប្រកបដោយប្រសិទ្ធភាព សក្កិសិទ្ធិភាព និងរស់រវើក។ ស្របពេលនេះដែរ សេដ្ឋកិច្ចពិភពលោកកំពុងទទួលរងផលប៉ះពាល់ ដោយសារខ្សែច្រវ៉ាក់ផ្គត់ផ្គង់ និងប្រព័ន្ធ ឡូជីស្ទីក ត្រូវបានរាំងស្ទះដោយសារជំងឺកូវីដ-១៩ ហើយមួយផ្នែកទៀតបណ្តាលមកពីការផ្លាស់ប្តូរប្រព័ន្ធពាណិជ្ជកម្ម។ឯកឧត្តម បន្តថា ចំណាយឡូជីស្ទីកកម្ពុជានៅខ្ពស់ គឺជាបញ្ហាជារចនាសម្ព័ន្ធដ៏រ៉ាំរ៉ៃមួយ,បញ្ហានេះ រាជរដ្ឋាភិបាលបាន គិតគូរ និងចាប់ផ្តើមដោះស្រាយបញ្ហានេះ តាំងពីមុនពេលនៃវិបត្តិជំងឺកូវីដ-១៩។ បច្ចុប្បន្ន រាជរដ្ឋាភិបាលកំពុងបន្តធ្វើការនេះ ដើម្បីកាត់បន្ថយថ្លៃឡូជីស្ទីកនៅកម្ពុជា តាមរយៈការដាក់ចេញជាវិធានការកែទម្រង់ជារចនាសម្ព័ន្ធជាប្រព័ន្ធ និងជា កញ្ចប់ដូចមានកំណត់នៅក្នុងក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣។ ជុំវិញស្ថានភាពនេះ, កម្ពុជាត្រូវតែចេះចាប់យកឱកាស តាមរយៈការកែទម្រង់រចនាសម្ព័ន្ធ ដើម្បីកាត់បន្ថយថ្លៃឡូជីស្ទីក និងអភិវឌ្ឍប្រព័ន្ធដឹកជញ្ជូន និងឡូជីស្ទីកឱ្យកាន់តែរស់រវើក និងមានប្រសិទ្ធភាព ដើម្បីត្រងយកការវិនិយោគ ដែលនឹងប្តូរទីតាំង ចេញពីប្រទេសចិន សម្រាប់ជំរុញការធ្វើពិពិធម្មមូលដ្ឋានសេដ្ឋកិច្ច នៅក្នុងរយៈពេលខ្លី និងមធ្យម និងរយៈពេលវែង។ក្នុងជំនួបនេះ ក្រសួងសេដ្ឋកិច្ច និងហិរញ្ញវត្ថុ និងធនាគារពិភពលោក ឯកគ្នាបន្តធ្វើសិក្សាស៊ីជំរៅលើចំណុចមួយចំនួនទៀត ដើម្បីធ្វើឱ្យឯកសារយុទ្ធសាស្រ្តដ៏សំខាន់នេះ ក្លាយជារបៀបវារៈនៃការកែទម្រង់ ដ៏មុតស្រួចរបស់រាជរដ្ឋាភិបាល ដើម្បីជំរុញការទាក់ទាញការវិនិយោគ និងធុរកិច្ចពីខាងក្រៅ៕អត្ថបទ៖ សុន រ៉ាឌី

រាជធានីភ្នំពេញបន្តវឌ្ឍនភាពលើវិស័យសំណង់អគារ និងហេដ្ឋារចនាសម្ព័ន្ធឥតឈប់ ទោះរងផលប៉ះពាល់ដោយវិបត្តិកូវីដ-១៩ក្តី

ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ បានឱ្យដឹងនៅថ្ងៃទី០៧ ខែមិថុនា ឆ្នាំ២០២២ថា គិតត្រឹមដើមឆ្នាំ២០២២នេះ នៅរាជធានីភ្នំពេញមានសំណង់បុរី និងបណ្ដុំផ្ទះល្វែងចំនួន ៣១០ កន្លែង និងអគារខ្ពស់ៗ ចំនួន ១.៦០៣ អគារ ក្នុងនោះ អគារកម្ពស់ចាប់ពី ២០ជាន់ឡើងទៅមានចំនួន ២២៥ អគារ ។ឯកឧត្តម ឃួង ស្រេង បានបញ្ជាក់ថា នៅឆ្នាំ២០២១ កន្លងទៅ ទោះបីមានផលប៉ះពាល់ពីវិបត្តិជាសកលបង្កឡើងដោយជំងឺកូវីដ-១៩ក៏ដោយ រាជធានីភ្នំពេញ នៅតែបន្តទទួលបានគម្រោងសាងសង់ថ្មីៗពីវិស័យឯកជនរហូតដល់ទៅចំនួន ១.០៥០ គម្រោង លើផ្ទៃក្រឡាសំណង់សរុបជាង ៤,៦៣ លានម៉ែត្រក្រឡា ដែលមានទំហំទុនវិនិយោគប៉ាន់ស្មានជាង ២,២៦ ពាន់លានដុល្លាអាមេរិកបន្ថែមទៀត ធ្វើឱ្យរាជធានីភ្នំពេញកាន់តែមានភាពស្រស់បំព្រង មិនចាញ់បណ្តាទីក្រុងនៃប្រទេសក្បែរខាង និងក្នុង តំបន់អាស៊ានឡើយ៕

ឆ្នាំនេះ វិស័យដឹកជញ្ជូននៅកម្ពុជា រំពឹងមានកំណើនខ្ពស់ឡើងវិញ ទោះបីតម្លៃប្រេងឡើងខ្ពស់បន្តិចក្តី

ភ្នំពេញ៖ អ្នកជំនាញក្នុងវិស័យដឹកជញ្ជូន រំពឹងថា វិស័យដឹកជញ្ជូននៅកម្ពុជា នឹងមានកំណើនខ្ពស់ឡើងវិញ ទោះបីជាបច្ចុប្បន្ននេះ ពិភពលោកក៏ដូចជាកម្ពុជា កំពុងវិបត្តិប្រេងឡើងថ្លៃ និងការដឹកជញ្ជូនឡើងខ្ពស់បន្តិចក៏ដោយ។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែសង្វាក់ផ្គត់ផ្គង់នៅកម្ពុជា បានប្រាប់ឲ្យដឹងថា នៅក្នុងឆ្នាំ២០២២នេះ ក្រោយពីរាជរដ្ឋាភិបាលសម្រេចបើកដំណើរការសង្គម-សេដ្ឋកិច្ចទាំងស្រុងឡើងវិញ កាលពីខែវិច្ឆិកា ឆ្នាំ២០២១មក សកម្មភាពនៃការដឹកជញ្ជូនទំនិញចេញ-ចូលមានការកើនឡើងខ្ពស់ ដែលការកើនឡើងនៃការដឹកជញ្ជូននេះ ដោយសារការផលិតនៅក្នុងប្រទេស មិនមានការរាំងស្ទះពីការរាតត្បាតដោយជំងឺកូវីដ-១៩ទេ ហើយប្រទេសដទៃក៏មិនបានបញ្ហាចោទដែរ។ចំពោះបញ្ហាប្រេងឡើងថ្លៃ លោកប្រធានសមាគម បញ្ជាក់ថា អំឡុងពេលប្រេងឡើងថ្លៃនេះ ការដឹកជញ្ជូនចេញចូលនៅកម្ពុជា នៅតែមានដំណើរការប្រក្រតីជាធម្មតា។ ដូច្នេះលោករំពឹងថា ទំហំនៃការដឹកជញ្ជូននាំចេញ-នាំចូលរបស់កម្ពុជា សម្រាប់ឆ្នាំ២០២២នេះ នឹងមានការកើនឡើងខ្លាំង ទោះបីតម្លៃដឹកជញ្ជូនមានការឡើងថ្លៃបន្តិចបន្តួចតាមប្រេងក្តី។ដោយឡែកទាក់ទងនឹងវិបត្តិខ្វះទូរកុងតឺន័រ រួមទាំងការដឹកជញ្ជូនតាមយន្តហោះ ដែលមានឡើងថ្លៃខ្ពស់ អំឡុងពេលដែលបណ្តាប្រទេសបិទខ្ទប់ប្រទេសរៀងៗខ្លួន ដើម្បីប្រយុទ្ធប្រឆាំងជំងឺកូវីដ១៩ កន្លងទៅនោះ លែងជាបញ្ហា ដោយតម្លៃទូរកុងតឺន័រ ក៏ដូចជាការដឹកជញ្ជូនតាមផ្លូវអាកាស មានតម្លៃធម្មតា។គួរបញ្ជាក់ដែរថា ថ្មីៗនេះ ក្រុមអ្នកជំនាញសេដ្ឋកិច្ច បានកត់សម្គាល់ឃើញថា នារយៈពេលប៉ុន្មានខែចុងក្រោយនេះ សកម្មភាពសេដ្ឋកិច្ចកម្ពុជា ហាក់កាន់តែបង្ហាញនូវភាពវិជ្ជមានជាថ្មី បន្ទាប់ពីវិស័យនេះបានរងគ្រោះដោយសារវិបត្តិកូវីដ១៩ អស់រយៈពេលជាង២ឆ្នាំកន្លងមក ពិសេសតាមរយៈលំហូរនៃអ្នកដំណើរ និងក្រុមវិនិយោគិនបរទេសដែលចូលមកកម្ពុជា។ទន្ទឹមនេះ ក្រុមអ្នកជំនាញ ក៏បានអះអាងដែរថា ដ្បិតការងើបឡើងវិញនៃសេដ្ឋកិច្ចកម្ពុជាបច្ចុប្បន្នហាក់នៅមានកម្រិតនៅឡើយ តែសកម្មភាពអ្នកដំណើរ និងវិនិយោគិនបរទេស ដែលបានចូលមកកម្ពុជា បានបង្ហាញពីភាពវិជ្ជមាននៃវិស័យសេដ្ឋកិច្ចរបស់កម្ពុជាយ៉ាងខ្លាំង៕

បណ្ដាញសង្គម

ព័ត៌មានថ្មីៗ

លោក Netanyahu ថាលោកទទួលការព្យាបាលជំងឺមហារីកក្រពេញប្រូស្តាតដោយជោគជ័យ

លោក Zelenskiy ធ្វើដំណើរទៅដល់អារ៉ាប៊ីសាអ៊ូឌីត ដើម្បីស្វែងរកកិច្ចសហប្រតិបត្តិការសន្តិសុខ

មនុស្ស ២នាក់ស្លាប់ អំឡុងការវាយប្រហារតាមអាកាស ខណៈយោធោអ៊ីស្រាអែលចេញការព្រមានជម្លៀស នៅភាគខាងត្បូងលីបង់

សមាជិកសភាហេសបូឡា៖ បទឈប់បាញ់ «គ្មានន័យ» ទេ ដោយសារតែការវាយប្រហាររបស់អ៊ីស្រាអែល

កងកម្លាំងរក្សាសន្តិភាពឥណ្ឌូនេស៊ីរបស់ UN ស្លាប់ដោយសាររបួស អំឡុងការផ្ទុះ នៅលីបង់

ទីក្រុងប៉េកាំងច្រានចោលការចោទប្រកាន់របស់លោក Trumpថា នាវាអ៊ីរ៉ង់ស្ទាក់ចាប់បានមានអំណោយពីចិន

អាល្លឺម៉ង់ និងអ៊ីតាលី សង្កត់ធ្ងន់លើការរួបរួម ក្នុងចំណោមសមាជិករបស់អង្គការណាតូ

លោក Putinនិយាយថា រុស្ស៊ីនឹងការពារផលប្រយោជន៍របស់ខ្លួននៅតំបន់អាក់ទិក

ក្តីបារម្ភ និងភាពមិនច្បាស់លាស់កើតមាននៅអ៊ីរ៉ាក់ ខណៈអាមេរិកបញ្ឈប់ការដឹកជញ្ជូនប្រាក់ដុល្លារ

គណៈកម្មការស៊ើបអង្កេតតង់ហ្សានី៖ មនុស្សជាង ៥០០នាក់ ត្រូវបានសម្លាប់ក្នុងអំពើហិង្សាបោះឆ្នោតឆ្នាំមុន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877