BTV NEWS

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់លានដុល្លារកើនឡើង ៤,៣%

ក្នុងត្រីមាសទី១ កម្ពុជានាំចេញសំបកកង់ឡាន និងគ្រឿងបន្លាស់ផ្សេងៗមានទឹកប្រាក់ជាង ៥៨០ លានដុល្លារ

ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈម៉ាស៊ូតបន្តធ្លាក់ចុះ

សេដ្ឋកិច្ច និង កសិកម្ម

ក្រុមប្រឹក្សាអភិវឌ្ឍន៍កម្ពុជា ផ្សព្វផ្សាយច្បាប់ស្តីពីវិនិយោគថ្មីទាក់ទាញវិនិយោគជប៉ុន

ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា ផ្សព្វផ្សាយច្បាប់ស្តីពីវិនិយោគថ្មី ទាក់ទាញវិនិយោគជប៉ុនចូលមកវិនិយោគនៅកម្ពុជា។ ឯកអគ្គរដ្ឋទូតជប៉ុនប្រចាំនៅកម្ពុជា បានបង្ហាញនូវជំនឿយ៉ាងមុតមាំថា ច្បាប់ស្តីពីវិនិយោគថ្មីនៃព្រះរាជាណាចក្រកម្ពុជា នឹងក្លាយយុទ្ធសាស្ត្រមួយដ៏មានប្រសិទ្ធភាព និងទាន់ពេលវេលា ក្នុងការស្តារឡើងវិញនូវសេដ្ឋកិច្ច-សង្គម ក្រោយវិបត្តិនៃជំងឺកូវី៥-១៩ ព្រមទាំងធ្វើឱ្យកម្ពុជាក្លាយជាទិសដៅដ៏ទាក់ទាញ និងប្រកួតប្រជែងខ្ពស់មួយ នៅក្នុងតំបន់ សម្រាប់ការវិនិយោគប្រកបដោយគុណភាព និងចីរភាព។ឯកឧត្តម ម៉ាសាហ៊ីរ៉ូ មីខាមី ឯកអគ្គរដ្ឋទូតជប៉ុនប្រចាំកម្ពុជា លើកឡើងនៅក្នុងសិក្ខាសាលា តាមប្រព័ន្ធវីដេអូ ស្តីពីច្បាប់ស្តីពីវិនិយោគថ្មីនៃព្រះរាជាណាចក្រកម្ពុជា ដែលរៀបចំផ្សព្វផ្សាយជូនវិនិយោគិន និងធុរជនជប៉ុន នៅថ្ងៃទី ១១ខែវិច្ឆិកា ឆ្នាំ២០២១ នេះថា ច្បាប់ថ្មីស្តីពីវិនិយោគរបស់ព្រះរាជាណាចក្រកម្ពុជា គឺបានតាក់តែងរៀបចំឡើងអស់រយៈពេលជាច្រើនឆ្នាំ និងបានទទួលយកមតិ ព្រមទាំងសំណូមពរពីតំណាងផ្នែកឯកជន និងសហគមន៍ធុរកិច្ចជប៉ុននៅកម្ពុជាផងដែរ ដើម្បីជាប្រមូលធាតុចូលឱ្យបានគ្រប់ជ្រុងជ្រោយ យកទៅដាក់បញ្ចូលក្នុងច្បាប់ថ្មីស្តីពីវិនិយោគនេះ។ចំណែក ឯកឧត្តម អ៊ុង រចនា ឯកអគ្គរាជទូត នៃព្រះរាជាណាចក្រកម្ពុជាប្រចាំប្រទេសជប៉ុន លើកឡើងថា ច្បាប់ស្តីពីវិនិយោគថ្មីនេះ នឹងដើរតួនាទីជាត្រីវិស័យ និងមូលដ្ឋានច្បាប់ដ៍រឹងមាំសម្រាប់វិនិយោគិន ដើម្បីរួមចំណែកលើកកម្ពស់ការអភិវឌ្ឍសេដ្ឋកិច្ច-សង្គម និងស្របពេលដែលកម្ពុជាកំពុងស្តារសេដ្ឋកិច្ចឡើងវិញ បន្ទាប់ពីការរាតត្បាតនៃជំងឺកូវី៩-១៩។ឯកឧត្តម ឯកអគ្គរាជទូត ក៏បានសម្តែងនូវការគាំទ្រយ៉ាងពេញទំហឹង ក្នុងការផ្សព្វផ្សាយ និងលើកកម្ពស់ការយល់ដឹងពីច្បាប់ស្តីពីវិនិយោគ នៃព្រះរាជាណាចក្រកម្ពុជា ទៅកាន់សហគមន៍ធុរកិច្ច ដែលប្រការនេះជាការបន្សំគ្នា ទៅនឹងការអនុវត្តយុទ្ធសាស្ត្រការទូតសេដ្ឋកិច្ចកម្ពុជា ២០២១-២០២៣។ដោយឡែក ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានវាយតម្លៃខ្ពស់ ចំពោះកិច្ចសហការជាប្រចាំរបស់អង្គការពាណិជ្ជកម្មក្រៅប្រទេសជប៉ុន និងធនាគារមីហ៊្សូហូ ដែលជានិច្ចកាលដើរតួនាទីជាដៃគូដ៏សំខាន់ សម្រាប់ការផ្សព្វផ្សាយពីកាលានុវត្តភាព និងបរិស្ថានវិនិយោគនៅកម្ពុជា ជូនដល់វិនិយោគិនជប៉ុន ជាពិសេសសកម្មភាពវិនិយោគ របស់អ្នកវិនិយោគជប៉ុននៅកម្ពុជា ជាក់ស្តែងការវិនិយោគក្នុងវិស័យកម្មន្តសាលមិនមែនវាយនភណ្ឌ ដែលបាននិងកំពុងដើរតួនាទីយ៉ាងសំខាន់ ក្នុងការចូលរួមចំណែកដល់ការធ្វើពិពិធកម្មមូលដ្ឋានសេដ្ឋកិច្ចកម្ពុជា ។សូមរំលឹកថា គិតត្រឹមដំណាច់ខែតុលា ឆ្នាំ២០២១ ក្រុមប្រឹក្សាអភិវឌ្ឍន៍កម្ពុជា បានទទួលស្វាគមន៍ និងចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់របស់ជប៉ុន បានចំនួន ១៤៦ គម្រោង ក្នុងទុនវិនិយោគសរុបប្រមាណ ២ ៨៥៣ លានដុល្លារអាមេរិក ក្នុងនោះមានគម្រោងវិនិយោគចំនួន ៦៦ បានបោះទីតាំងក្នុងតំបន់សេដ្ឋកិច្ចពិសេស ដែលមានទុនវិនិយោគសរុប ៣៤០ លានដុល្លារ៕អត្ថបទ៖ សុន រ៉ាឌី

រាជរដ្ឋាភិបាលប្រមូលចំណូលពន្ធបានជាង ២ ៣១៥ លានដុល្លារអាមេរិក ក្នុងរយៈពេល១០ខែឆ្នាំ២០២១

ភ្នំពេញ ៖ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ សរុបបានប្រមាណជិត ៩ ៣៧៩ ប៊ីលានរៀល ត្រូវជាង ២ ៣១៥ លានដុល្លារអាមេរិក រយៈពេល១០ខែ ឆ្នាំ២០២១ បើធៀបនឹងចំណូលពន្ធ-អាករ ក្នុងរយៈពេលដូចគ្នាឆ្នាំ២០២០ ថយចុះចំនួនជាង ៤៩៩ប៊ីលានរៀល ត្រូវប្រមាណជាង ១២៣ លានដុល្លារអាមេរិក។អគ្គនាយកដ្ឋានពន្ធដារ បានបង្ហាញរបាយការណ៍ បូកសរុបលទ្ធផលប្រមូលចំណូលពន្ធ ប្រចាំខែ តុលា និងសម្រាប់រយៈពេល ១០ខែ ឆ្នាំ២០២១ នៅថ្ងៃទី១១ខែ វិច្ឆិកា ឆ្នាំ២០២១ អគ្គនាយកដ្ឋានពន្ធដារប្រមូលបាន តាមរយៈការអនុវត្តប្រព័ន្ធគ្រប់គ្រងទិន្នន័យចំណូលអនឡាញ បានចំនួនជិត ៨៤៣ ប៊ីលានរៀល ត្រូវប្រមាណជាង ២០៨ លានដុល្លារអាមេរិក ស្មើនឹង ៩,២៨% នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២១ បើប្រៀបធៀបនឹងចំណូលពន្ធ-អាករប្រចាំ ខែតុលា ឆ្នាំ២០២០ ឃើញថា កើនឡើងជាង ៥០ ប៊ីលានរៀល ត្រូវជាង ១២លានដុល្លារអាមេរិក ឬស្មើជាង ៦%។ចំណែកសរុបការប្រមូលចំណូលរយៈពេល១០ខែវិញ អគ្គនាយកដ្ឋានពន្ធដារប្រមូលចំណូលពន្ធ-អាករ តាមប្រព័ន្ធគ្រប់គ្រងទិន្នន័យចំណូលអនឡាញ សរុបបានមានចំនួនជិត ៩ ៣៧៨ ប៊ីលានរៀល បើគិតជាដុល្លារត្រូវប្រមាណជាង ២ ៣១៥ លានដុល្លារអាមេរិក ស្មើជាង ១០៣% នៃផែនការច្បាប់ហិរញ្ញវត្ថុសម្រាប់ការគ្រប់គ្រង ឆ្នាំ២០២១ ក្នុងនោះបើធៀបនឹងចំណូលពន្ធ-អាករ ក្នុងរយៈពេលដូចគ្នាឆ្នាំ២០២០ គឺថយចុះជាង ៤៩៩ ប៊ីលានរៀល ត្រូវជាង ១២៣ លានដុល្លារអាមេរិក ស្មើនឹង -៥,០៥%។ជុំវិញការប្រមូលចំណូលពន្ធនេះ តាមការបញ្ជាក់ពីអគ្គនាយកដ្ឋានពន្ធដារ ថា ការឆ្លងកាត់ស្ថានភាពដ៏លំបាកនៃការរីករាលដាលខ្លាំង នៃជំងឺកូវីដ-១៩ លទ្ធផលនៃការគ្រប់គ្រងប្រមូលចំណូលពន្ធសម្រាប់រយៈពេល ១០ខែ ឆ្នាំ២០២១ ទោះបីជាមិនប្រសើរជាងរយៈពេលដូចគ្នា ឆ្នាំ២០២០ ប៉ុន្តែអាចនៅមានស្ថានភាពល្អប្រសើរ ដោយសម្រេចបានលទ្ធផលលើសការរំពឹងទុក និងផែនការហិរញ្ញវត្ថុសម្រាប់គ្រប់គ្រងឆ្នាំ២០២១។ លទ្ធផលជាទីមោទនៈនេះ គឺមិនអាចកាត់ផ្តាច់ចេញពីការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្រ្តី ជាពិសេសការគ្រប់គ្រងស្ថានការណ៍នៃជំងឺកូវីដ-១៩ បានពេញលេញ និងមានប្រសិទ្ធិភាពខ្ពស់ តាមរយៈចាត់វិធានការជាយុទ្ធសាស្រ្តក្នុងការចាក់វ៉ាក់សាំងជូនប្រជាពលរដ្ឋកម្ពុជា ប្រកបដោយស្មារតីបុរេសកម្ម និងទាន់ពេលវេលា ដែលអាចកសាងភាពធន់របស់សហគមន៍ ទៅនឹងជំងឺរាតត្បាតនេះ ហើយជំរុញឱ្យប្រទេសជាតិអាចបើកដំណើរការសេដ្ឋកិច្ចឡើងវិញនៅក្នុងខែវិច្ឆិកានេះ ដែលនឹងអាចសង្ឃឹមថា ស្ថានភាពសេដ្ឋកិច្ចនឹងអាចងើបឡើងវិញតាមការរំពឹងទុករបស់រាជរដ្ឋាភិបាល៕អត្ថបទ៖ សុន រ៉ាឌី

អ្នកជំនាញអចលនទ្រព្យ រំពឹងគម្រោងវិនិយោគបរទេស នឹងកើនឡើងវិញ ក្រោយចូលឆ្នាំចិន ឆ្នាំ២០២២

ភ្នំពេញ ៖ វិស័យអចលនទ្រព្យ រំពឹងថានឹងងើបឡើងវិញ បន្ទាប់ពីកម្ពុជាប្រកាសបើកប្រទេសឡើងវិញ អនុញ្ញាតវិនិយោគិនបរទេស ធុរកិច្ចជន និងភ្ញៀវទេសចរបរទេសចូលមកកម្ពុជា ដោយរដ្ឋាភិបាលសម្រួលវិធានការសុខាភិបាល។ អ្នកជំនាញវិស័យអចលនទ្រព្យ ដាក់ក្តីរំពឹងថា គម្រោងវិនិយោគនានាពីបរទេស នឹងចាប់ងើបឡើងវិញចាប់ពីដើមឆ្នាំក្រោយទៅ។លោកឧកញ៉ាបណ្ឌិត គីម ហ៊ាង ប្រធានក្រុមហ៊ុន KW Cambodia បានដាក់ក្ដីរំពឹងថា អ្នកវិនិយោគបរទេសជាច្រើន នឹងត្រឡប់មកកម្ពុជា នៅក្រោយបុណ្យចូលឆ្នាំចិន នាឆ្នាំ២០២២ បន្ទាប់ពីប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រកាសបើកដំណើរការប្រទេសឡើងវិញលើគ្រប់វិស័យ កាលពីដើមខែវិច្ឆិកន្លងទៅ ។ការលើកឡើងរបស់អ្នកជំនាញអចលនទ្រព្យរូបនេះ បន្ទាប់ពីក្រុមហ៊ុន KW Cambodia បានចុះហត្ថលេខាលើកិច្ចព្រមព្រៀងបើកអនុសាខា KW-KRE ប្រចាំខេត្តកំពង់ចាម នៅព្រឹកថ្ងៃទី១១ ខែវិច្ឆិកា ឆ្នាំ២០២១ ដែលមានការចូលរួមពីលោកស្រី ក្រី ម៉ាយ៉ាន តំណាងអនុសាខា KW-KRE ប្រចាំខេត្តកំពង់ចាម ផងដែរ ។អ្នកជំនាញដដែលបន្ដថា ក្នុងនាមក្រុមហ៊ុនអន្ដរជាតិ ដែលមានក្រុមហ៊ុនដៃគូបរទេសជាច្រើន បានសហការវិនិយោគនៅកម្ពុជា តែក្រោយវត្តមានវិបត្តិកូវីដ បានធ្វើឲ្យវិនិយោគទុនបរទេសជាច្រើនបានចាកចេញទៅវិញ ។ការប្រកាសបើកដំណើរការប្រទេសរបស់សម្ដេចតេជោនាយករដ្ឋមន្ដ្រី គឺជាការបើកភ្លើងខៀវ សម្រាប់វិនិយោគទុនបរទេស ដែលលោករំពឹងថា ក្រោយចូលឆ្នាំចិន ឆ្នាំ២០២២ អ្នកវិនិយោគទាំងនោះ នឹងត្រឡប់មកកម្ពុជាច្រើន ពិសេសវិនិយោគទុនចិនតែម្ដង ។យ៉ាងណាមិញលោកបណ្ឌិត គីម ហ៊ាង បានសង្កត់ធ្ងន់ថា ដើម្បីទាក់ទាញអ្នកវិនិយោគបរទេសមកកម្ពុជាច្រើន ក៏អាស្រ័យលើអ្នកមានធនធានច្រើនក្នុងស្រុក បញ្ចេញលុយវិនិយោគឲ្យបានច្រើនដែរ ដើម្បីធ្វើឲ្យវិស័យអចលនទ្រព្យកម្ពុជាកម្រើខ្លាំងសិនដែរ ទើបអាចទាក់ទាញវិនិយោគទុនបរទេសកាន់តែច្រើនត្រឡប់មកវិញ ក្រោយស្ថានភាពជំងឺកូវីដ-១៩ ធូស្រាល ៕អត្ថបទ ៖ លី ឈុនឡា

ទោះក្នុងបរិបទជំងឺកូវីដ វិនិយោគិនខ្មែរមួយរូបហ៊ានបោះទុនរាប់លានដុល្លា វិនិយោគលើការកសាងលំនៅឋាន

ភ្នំពេញ៖ លោក លី ណាវុឌ្ឍ អគ្គនាយកបុរី លី ណាវុឌ្ឍ ដែលជាអ្នកវិនិយោគិនខ្មែរមួយរូប បានបង្ហាញនូវមោទនៈភាព និងជឿជាក់ថា បច្ចុប្បន្ននេះ ក្រោមការដឹកនាំដ៏ត្រឹមត្រូវរបស់សម្ដេចតេជោ ហ៊ុន សែន នាយករដ្ឋមន្ត្រី បានធ្វើឱ្យប្រទេសជាតិមានសុខសន្តិភាព ស្ថិរភាពនយោបាយ កំណើនសេដ្ឋកិច្ច និងការអភិវឌ្ឍប្រទេសជាតិលើគ្រប់វិស័យ បានធ្វើឱ្យវិនិយោគិនជាតិ និងអន្តជាតិចាប់អារម្មណ៍ពីសក្ដានុពលលើវិស័យអចលនទ្រព្យ កាន់តែខ្លាំង ដោយបានបោះទុនរាប់ពាន់លានដុល្លារសម្រាប់វិនិយោគ និងកសាងលំនៅដ្ឋាន ខុនដូរសំណង់អគារខ្ពស់ៗ ដើម្បីឆ្លើយតបនឹងកំណើនប្រជាជន និងបំពេញតម្រូវការរបស់អតិថិជនក្នុង និងក្រៅប្រទេស ជាពិសេសការបើកដំណើរការប្រទេសឡើងវិញលើគ្រប់វិស័យ បន្ទាប់ពីការរាលដាលជំងឺកូវីដ-១៩ បានថយចុះនៅកម្ពុជា។ជាក់ស្ដែងលោកផ្ទាល់បានបោះទុនរាប់លានដុល្លារ ដើម្បីសាងសង់បុរីនេះឡើង។ ក្នុងពេលប្រារព្ធពិធីសូត្រមន្ត ប្រោះព្រហ្មបើកដំណើរការការិយាល័យកណ្តាល និងសម្ពោធដាក់លក់ជាផ្លូវការនាព្រឹកថ្ងៃទី១១ ខែវិច្ឆិកា ឆ្នាំ ២០២១ ក្រុមហ៊ុនមានការផ្តល់ជូនពិសេស និងបញ្ចុះតម្លៃរហូតដល់ ២៣,០០០$។បើតាមការឱ្យដឹងពីតំណាងក្រុមហ៊ុន មានសាងសង់ផ្ទះពីរប្រភេទ រួមមាន៖ ផ្ទះអាជីវកម្ម និងវីឡាកូនកាត់ សុទ្ធសឹងតែជាសំណង់លំនៅដ្ឋានរឹងមាំ ស្ថិតនៅក្នុងតំបន់ដែលមានសក្ដានុពលសម្រាប់ការរស់នៅជាលក្ខណៈគ្រួសារ ការិយាល័យ និងអាជីវកម្មផ្សេងៗ។ការវិនិយោគអចលនទ្រព្យដោយសាងសង់បុរីថ្មីនេះមានទីតាំងនៅតាមបណ្តោយផ្លូវវេងស្រេង កែងផ្លូវ ២១៧ ភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ៕ អត្ថបទ៖ នីតា

តម្លៃម្រេចនៅកម្ពុជា រំពឹងថានឹងកើនឡើងនៅឆ្នាំក្រោយ

ភ្នំពេញ ៖ តម្លៃម្រេចនាំចេញរបស់កម្ពុជា ត្រូវបានរំពឹងថា នឹងកើនដល់ ២០ ០០០ រៀលក្នុង១គីឡូក្រាម នៅឆ្នាំ២០២២ខាងមុខ ។ ការកើនឡើងតម្លៃនេះ គឺដោយសារផលិតម្រេចនៅលើពិភពលោក ជាតម្រូវការ បន្ទាប់ពីប្រទេសនានានៅជុំវិញពិភពលោក បានបើកប្រទេសដំណើរការសេដ្ឋកិច្ចឡើងវិញ។លោក ម៉ាក នី ប្រធានសហព័ន្ធម្រេច និងគ្រឿងទេសកម្ពុជា បានប្រាប់នៅថ្ងៃទី១២ ខែវិច្ឆិកាថា មូលហេតុដែលនឹងជំរុញឱ្យតម្លៃម្រេចនាំចេញទៅទីផ្សារអន្តរជាតិកើនឡើងនៅពេលខាងមុខ គឺដោយសារប្រជាកសិករមួយចំនួនបានបោះបង់ចោលការដាំម្រេចកាលពីអំឡុងពេលដែលតម្លៃម្រេចធ្លាក់ចុះ។ ការបោះបង់ការដាំដុះបានធ្វើឱ្យស្តុកម្រេចធ្លាក់ចុះជាបន្តបន្ទាប់ ជាហេតុធ្វើឱ្យក្រុមឈ្មួញជួបការពិបាកនៅក្នុងការប្រមូលទិញម្រេចយកទៅផ្គត់ផ្គង់ទីផ្សារនាំចេញ។បើតាមប្រធានសហព័ន្ធម្រេច និងគ្រឿងទេសកម្ពុជា ម្រេចនាំចេញទៅទីផ្សារអន្តរជាតិកាលពីឆ្នាំ ២០១៩ មានតម្លៃជាមធ្យមពី ៦ ០០០ ទៅ ៩ ០០០ រៀល ក្នុង១គីឡូក្រាម និងក្នុងឆ្នាំ២០២០ តម្លៃកើនពី ៩ ០០០ ទៅ ១២ ០០០រៀល ក្នុង១គីឡូក្រាម។ដោយឡែកនៅឆ្នាំ២០២១ ម្រេចមានតម្លៃចន្លោះពី ១២ ០០០ ដល់ ១៧០០០ រៀល និងរំពឹងថា នៅឆ្នាំ ២០២២ ខាងមុខ តម្លៃម្រេចនឹងកើនដល់ ២០ ០០០ រៀល ក្នុង ១ គីឡូក្រាម។លោកពន្យល់ថា ការធ្លាក់ថ្លៃម្រេចកាលពីឆ្នាំ២០១៩ និង២០២០ គឺដោយសារការផលិតម្រេចលើសតម្រូវការ និងស្ថិតក្នុងវិបត្តិកូវីដ១៩ ដែលធ្វើឱ្យតម្រូវម្រេចធ្លាក់ចុះនៅប្រទេសនាំចេញ។ក្នុងមួយឆ្នាំៗ កម្ពុជា នាំចេញម្រេចទៅទីផ្សារក្រៅប្រទេសក្នុងរង្វង់ជិត ២០ ០០០ តោនដែលភាគច្រើនគឺនាំចេញទៅប្រទេសវៀតណាម ចន្លោះពី ៧០-៨០ ភាគរយ។ ក្រៅពីនេះ កម្ពុជា នាំចេញម្រេចទៅទីផ្សារអឺរ៉ុប ដែលភាគច្រើនជាផលិតផលម្រេចសំគាល់ភូមិសាស្រ្តខេត្តកំពត ហើយការប្រើប្រាស់ក្នុងស្រុកមានប្រមាណ ១ ០០០ តោនក្នុង១ឆ្នាំ។ទោះជាយ៉ាងណា សហព័ន្ធម្រេច និងគ្រឿងទេសកម្ពុជា សង្ឃឹមថា ការនាំចេញម្រេចពីកម្ពុជា នឹងពង្រីកទៅទីផ្សារផ្សេងទៀត ដើម្បីជៀសវាងពឹងផ្អែកតែលើទីផ្សារប្រទេសវៀតណាម ដើម្បីនាំចេញ៕អត្ថបទ៖ វណ្ណៈ

ក្រសួងពាណិជ្ជកម្ម ធ្វើកំណែទម្រង់ការងារដើម្បីរួមចំណែកអភិវឌ្ឍន៍គោលនយោបាយរដ្ឋាភិបាលឌីជីថល

ភ្នំពេញ ៖ រដ្ឋមន្ត្រីក្រសួងពាណិជ្ជកម្ម បានលើកឡើងថា ដើម្បីចូលរួមអភិវឌ្ឍន៍គោលនយោបាយរដ្ឋាភិបាលឌីជីថល ២០២១-២០៣៥ ក្រសួងនឹងចាត់តាំងឱ្យមានជនបង្គោលលើវិស័យជំរុញបច្ចេកវិទ្យា ព្រមទាំងកំពុងរៀបចំមជ្ឈមណ្ឌលផ្ទុកទិន្នន័យថ្មី និងធ្វើកំណែទម្រង់នាយកដ្ឋានទទួលបន្ទុក ដើម្បីឆ្លើយតបទៅនឹងសេចក្តីត្រូវការចាំបាច់នៃការផ្លាស់ប្តូរឌីជីថលទាក់ទងនឹងពាណិជ្ជកម្ម។នៅក្នុងកិច្ចប្រជុំពិនិត្យសេចក្ដីព្រាងគោលនយោបាយរដ្ឋាភិបាលឌីជីថល២០២១-២០៣៥ ក្រោមវត្តមានរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីព្រឹកថ្ងៃទី១០ វិច្ឆិកា ឆ្នាំ២០២១នេះ តាមប្រព័ន្ធវីដេអូ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា សេចក្ដីព្រាងគោលនយោបាយខាងលើ មានលក្ខណៈគ្រប់ជ្រុងជ្រោយ និងបានគ្រប់ដណ្តប់លើចំណុចសំខាន់ៗ ដែលមាននៅក្នុងឯកសារក្របខ័ណ្ឌផែនការ ផែនទីចង្អុលផ្លូវ និងកិច្ចព្រមព្រៀងរបស់អាស៊ានទាក់ទងនឹងការផ្លាស់ប្តូរឌីជីថលនៅក្នុងក្របខ័ណ្ឌអាស៊ាន និងពិភពលោករួចហើយ។ ឯកឧត្តម បានបន្តថា ជាក់ស្ដែងនៅក្នុងកិច្ចប្រជុំកំពូលអាស៊ានលើកទី៣៨ និង៣៩ ដែលបានប្រារព្ធកាលចុងខែតុលា កន្លងទៅនេះ ថ្នាក់ដឹកនាំកំពូលរបស់អាស៊ានក៏បានផ្តល់គោលការណ៍ឱ្យរៀបចំកិច្ចព្រមព្រៀងក្របខណ្ឌរបស់អាស៊ាន ស្តីពីសេដ្ឋកិច្ចឌីជីថលសម្រាប់ឆ្នាំ២០២៥ និងបានជំរុញឱ្យរដ្ឋសមាជិកទាំងអស់ខិតខំរៀបចំ និងអនុវត្តកិច្ចព្រមព្រៀង និងផែនទីចង្អុលផ្លូវនានារបស់អាស៊ាន។ ទាក់ទងនឹងសេចក្តីព្រាងគោលនយោបាយរដ្ឋាភិបាលឌីជីថល ២០២១-២០៣៥នេះដែរ ឯកឧត្តមរដ្ឋមន្រ្តី បានសង្កត់ធ្ងន់លើការកសាងច្បាប់ជាអាទិភាពក្នុងក្របខណ្ឌគតិយុត្ត រួមមាន៖ ច្បាប់ស្តីពីបច្ចេកវិទ្យាគមនាគមន៍ និងព័ត៌មានវិទ្យា, ច្បាប់ស្តីពីសន្តិសុខ និងឧក្រឹដ្ឋកម្មព័ត៌មាន, ច្បាប់ស្តីពីការគ្រប់គ្រងប្រព័ន្ធកំព្យូទ័រ និងច្បាប់ស្តីពីការគ្រប់គ្រងទិន្នន័យ ដែលច្បាប់ទាំងអស់នេះ កំពុងតែត្រូវការជាចាំចាច់សម្រាប់ប្រតិបត្តិការក្នុងសង្គម និងសេដ្ឋកិច្ចឌីជីថលផង និងសម្រាប់ជាមូលដ្ឋានក្នុងការចចារការពារផលប្រយោជន៍របស់កម្ពុជាក្នុងកម្រិតតំបន់ និងពិភពលោកផង៕អត្ថបទ ៖ ឈិត បូរ៉ាវី

កម្ពុជានាំទំនិញទៅកាន់ប្រទេសជប៉ុនមានទឹកប្រាក់ ១,៣ប៊ីលានដុល្លារ ក្នុងរយៈពេលបីត្រីមាស

ភ្នំពេញ ៖ ទំហំពាណិជ្ជកម្មរវាងប្រទេសកម្ពុជា និងប្រទេសជប៉ុនបន្តកើនឡើង ក្នុងឆ្នាំ២០២១នេះ បើទោះស្ថិតក្នុងវិបត្តិកូវីដ១៩។ របាយការណ៍ផ្លូវការបង្ហាញថា ទំហំពាណិជ្ជកម្មប្រទេសទាំងពីរ សម្រេចបាន ១,៧ប៊ីលានដុល្លារ ក្នុងរយៈពេល៩ខែ ឆ្នាំ២០២១ កើនឡើង ៤,៤ភាគរយ ធៀបនឹងរយៈពេលដូចគ្នាកាលពីឆ្នាំមុន។យោងតាមរបាយការណ៍របស់ អង្គការពាណិជ្ជកម្មក្រៅប្រទេសជប៉ុន (JETRO) ការនាំទំនិញរបស់ប្រទេសកម្ពុជា ទៅកាន់ប្រទេសជប៉ុន មានទឹកប្រាក់សរុប ១,៣ប៊ីលានដុល្លារ ក្នុងរយៈពេល ៩ខែ ឆ្នាំ២០២១នេះ កើនឡើង ៨,៧ភាគរយ ធៀបនឹងរយៈពេលដូចគ្នាកាលពីឆ្នាំមុន។ដោយឡែកកម្ពុជា បាននាំទំនិញចូលពីប្រទេសអាស៊ីខាងកើតមួយនេះ មានទឹកប្រាក់សរុប ៤៣៨លានដុល្លារ កើនឡើង ២៩ភាគរយ ធៀបនឹងរយៈពេល៩ខែឆ្នាំមុន។តួលេខពាណិជ្ជកម្មនេះ បានធ្វើឱ្យជញ្ជីងពាណិជ្ជកម្មរបស់ប្រទេសកម្ពុជា មានអតិរេកពាណិជ្ជកម្មជាមួយប្រទេសជប៉ុន ប្រមាណ ៨៧៨ លានដុល្លារ។យោងតាមក្រសួងពាណិជ្ជកម្ម ការនាំចេញសំខាន់ៗរបស់ប្រទេសកម្ពុជាទៅកាន់ប្រទេសជប៉ុនរួមមាន សំលៀកបំពាក់ កាបូបសម្រាប់ធ្វើដំណើរ ស្បែកជើង គ្រឿងសង្ហារឹម គ្រឿងសំអាង ក្រដាស សម្ភារៈការិយាល័យ និងទំនិញធ្វើពីស្បែក។ការនាំចេញពីប្រទេសជប៉ុនមកកម្ពុជារួមមានគ្រឿងម៉ាស៊ីន រថយន្ត គ្រឿងអេឡិចត្រូនិច គ្រឿងសង្ហារឹម ក្រណាត់ និងផលិតផលប្លាស្ទិក។កាលពីឆ្នាំ ២០២០ កន្លងទៅ ពាណិជ្ជកម្មទ្វេភាគីរវាងកម្ពុជានិងជប៉ុនមានទំហំទឹកប្រាក់ចំនួន ២,០៩៩ ពាន់លានដុល្លារ ពោលគឺថយចុះចំនួន ៨ ភាគរយ បើប្រៀបធៀបទៅនឹងឆ្នាំ ២០១៩ កន្លងទៅ ដែលក្នុងនោះការនាំចេញសរុបរបស់កម្ពុជាទៅជប៉ុនមានទំហំទឹកប្រាក់ចំនួន ១,៦១៥ ពាន់លានដុល្លារ ធ្លាក់ចុះ ៦,៧ ភាគរយ៕អត្ថបទ៖ វណ្ណៈ

ក្រុមហ៊ុនឯកជនជាង៩ពាន់ក្រុមហ៊ុន បានចុះបញ្ជីអាជីវកម្មតាមប្រព័ន្ធថ្នាលតែមួយ

ភ្នំពេញ ៖ ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរបស់រាជរដ្ឋាភិបាល ទទួលបានការចុះបញ្ជីជាផ្លូវការនៃក្រុមហ៊ុនឯកជន បានចំនួនជាង ៩ពាន់សំណើរ និងកំពុងពិនិត្យលើក្រុមហ៊ុនអាជីវកម្មចំនួនជាង ៩០០សំណើរផ្សេងទៀត ស្ថិតក្នុងការពិនិត្យសម្រាប់ចុះបញ្ជីជាផ្លូវការ។យោងតាមរបាយការណ៍មជ្ឈមណ្ឌលបណ្តុះធុរកិច្ចថ្មី តេជោ ក្នុងរយៈពេលជាង ១ឆ្នាំកន្លងមកនេះ រាជរដ្ឋាភិបាលអនុវត្តការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ក្នុងនោះបាន អនុម័តការចុះបញ្ជីប្រកបដោយជោគជ័យ មានចំនួនប្រមាណ ៩ ២២៩ សំណើរ និងកំពុងត្រួតពិនិត្យ មានចំនួន ៩៨៦សំណើរ។ចំណែកចំនួននាមករណ៍ដែលបានបម្រុងទុក មានក្រុមហ៊ុន អាជីវកម្មប្រមាណជាង ៧ ពាន់សំណើរ និងកំពុងពិនិត្យបន្ថែមជិត ៣០០ សំណើរផ្សេងទៀត ពោលគឺការចុះបញ្ជីតាមថ្នាលអាជីវកម្មតាមថ្នាលបច្ចេកវិទ្យាព័ត៌មានតែមួយ បើគិតជាមធ្យមបានអនុម័ត ជាផ្លូវការប្រមាណ ៨ សំណើរ ក្នុងមួយថ្ងៃៗ ។ពាក់ព័ន្ធក្រសួង-ស្ថាប័នដែលបានអនុវត្តចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ខាងលើរួមមាន ៖ ក្រសួងពាណិជ្ជកម្ម, អគ្គនាយកដ្ឋានពន្ធដារ, ក្រុមប្រឹក្សាអភិវឌ្ឍន៍កម្ពុជា, ក្រសួងមហាផ្ទៃ, ក្រសួងសេដ្ឋកិច្ច និងហិរញ្ញវត្ថុ និងក្រសួងការងារ និងបណ្ដុះបណ្ដាលវិជ្ជាជីវៈ។ចំពោះភាគរយអាជីវកម្មដែលបានចុះបញ្ជីតាមវិស័យរួមមាន ៖ អាហរ័ណនីហរ័ណ ទិញលក់ជួសជុលយានយន្ត និងទោចក្រយានយន្តគ្រប់ប្រភេទមានជាង ៣៨%, សកម្មភាពអចលនវត្ថុជាង ១០%, កម្មន្តសាលជាង ៨%, សកម្មភាពសេវាកម្ម ស្នាក់នៅ និងអាហារជាង ៨%, សកម្មភាពវិជ្ជាជីវៈវិទ្យាសាស្រ្ត និងបច្ចេកទេសជាង ៧%, និងវិស័យផ្សេងៗទៀតជាង ២៧% ផងដែរ ។ ដោយឡែកទំហំវិនិយោគតាមវិស័យ ក្នុងនោះសម្រាប់ការសាងសង់មានជាង ២៧%, សកម្មភាពអចលនវត្ថុជាង ១៥%, អាហរ័ណ នីហរ័ណទិញ លក់ជួសជុលយានយន្ត និងទោចក្រយានយន្តគ្រប់ប្រភេទជាង ១៥%, កម្មន្តសាលជិត ១៤%, សកម្មភាពហិរញ្ញវត្ថុ និងធានារ៉ាប់រង ជិត ៩%, និងវិស័យផ្សេងទៀតជាង១៩%។ក្រៅពីការអនុវត្តចុះបញ្ជីស្ថាប័នខាងលើ, រាជរដ្ឋាភិបាលបានបន្តអនុវត្តចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដំណាក់កាលទី២ ទៅតាមប្រភេទនៃសកម្មភាពអាជីវកម្ម ដោយមានការចូលរួមពីក្រសួង-ស្ថាប័នចំនួន៤ បន្ថែមទៀតរួមមាន ៖ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, ក្រសួងទេសចរណ៍, ក្រសួងប្រៃសណីយ៍ និងទូរគមនាគមន៍ និងនិយ័តករអាជីវកម្មអចលនវត្ថុ និងបញ្ចាំនៃអាជ្ញាធរសេវាហិរញ្ញវត្ថុមិនមែនធនាគារ គឺអនុវត្តការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននេះ ចាប់អនុវត្តពីថ្ងៃទី១ កញ្ញា ឆ្នាំ២០២១ កន្លងមក។សូមបញ្ជាក់ថា ក្នុងរយៈវគ្គទីមួយ ការអនុវត្តចុះបញ្ជីតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរបស់រាជរដ្ឋាភិបាល ទទួលបានចំនួនពាក្យស្នើសុំសរុបជិត ៧ ០០០ សំណើ, ក្នុងនោះបានអនុម័តមានជាង ៦ ០០០ សំណើរ, បើគិតជាទំហំទុនវិនយោគមានចំនួនជាង ២ ៦០០ លានដុល្លារអាមេរិក៕អត្ថបទ ៖ សុន រ៉ាឌី

អ្នកស្រុកកំពង់សៀម ចាប់ផ្តើមនាំគ្នាដាំដំណាំប៉ិកួៈបណ្តើរៗហើយ

កំពង់ចាម ៖ ប្រជាកសិករដែលរស់នៅតំបន់ទំនាប នៅក្នុងស្រុកកំពង់សៀម ខេត្តកំពង់ចាម ជាច្រើនគ្រួសារបានបង្កបង្កើនផលដំណាំប៉ិកួៈហើយ ខណៈរដូវរំហើយបានមកដល់ និងទឹកបានស្រកទៅវិញអស់ ។ប្រជាកសិករដែលរស់នៅតាមជួរមាត់ទន្លេ មានឃុំកៀនជ្រៃ ឃុំរអាង ឃុំរំចេក ឃុំហាន់ជ័យ នៃស្រុកកំពង់សៀម ខេត្តកំពង់ចាម បាននាំគ្នាបង្កបង្កើនផលដំណាំប៉ិកួៈ ព្រោះផ្ទៃដីស្រែចំការនៅតំបន់នេះ មានជីវជាតិល្អដីប្រភេទល្បាយខ្សាច់ និងងាយស្រួលថែទាំដំណាំផងដែរ។កសិករដែលកំពុងដាំប៉ិកួៈ បានប្រាប់ឲ្យដឹងថា ឆ្នាំនេះទឹកជំនន់បានជន់លិចផ្ទៃដីស្រែចំការមួយចំនួន ដោយសារផ្ទៃចម្ការខ្លះទាប ក្រោយពីទឹកស្រកទៅវិញអស់ ពលរដ្ឋនៅតំបន់នេះ បានភ្ជួររាស់ដីបង្កបង្កើនផលដំណាំកសិកម្មដូចជា ប៉ិកួៈ សណ្តែកដី ត្រសក់ និងពោតជាដើម ខណៈដីមានជីវជាតិល្អ អំណោយផលការលូតលាស់បានល្អ និងធន់ជម្ងឺទៀតផង។ កសិករបានរំពឹងទុកថា ឆ្នាំនេះបើទោះបីមានវិបត្តិកូវីដ-១៩ យ៉ាងណាក៏ដោយ តែសុំឲ្យតែតម្លៃបានខ្ពស់ និងទទួលទិន្នផលបានច្រើន។ក្នុងរយៈពេលបីខែទៀត ដំណាំប៉ិកួៈរបស់អ្នកកំពង់សៀម នឹងទទួលផលហើយ បន្ទាប់ពីប្រមូលផលប៉ិកួៈកសិករនៅតំបន់នេះ ចាប់ផ្តើមនាំគ្នាំដាំដំណាំ រួមផ្សំ មានពោត សណ្តែកដី ត្រសក់ស្រូវ និងម្ទេស ...ជាដើម ៕

ក្រុមហ៊ុនក្នុងស្រុក រំពឹងទំនិញនាំចេញទៅអូស្រ្តាលី នឹងមានកំណើននាពេលខាងមុខ

ភ្នំពេញ ៖ អ្នកជំនាញក្នុងវិស័យនាំចេញនៅកម្ពុជា មានសុទិដ្ឋិនិយមថា ការនាំចេញទំនិញពីទៅកាន់ប្រទេសអូស្រ្តាលី ជាពិសេសស្រូវអង្ករ នឹងមានកំណើនឡើងវិញ ក្រោយវិបត្តិនៃការរាតត្បាតជំងឺកូវីដ១៩ មានសភាពធូរស្រាល និងបញ្ចប់នាពេលអនាគត។ ជាពិសេស ការពង្រីកទំនាក់ទំនងរវាងប្រទេសទាំងពីរ។លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា នាថ្ងៃទី៨វិច្ឆិកា ម្សិលមិញនេះ មានប្រសាសន៍ប្រាប់ទូរទស្សន៍ព័ត៌មានប៊ីធីវីថា ក្នុងដំណើរទស្សនកិច្ចរបស់លោកជំទាវ ម៉ារីស ផេន រដ្ឋមន្រ្តីក្រសួងការបរទេស និងរដ្ឋមន្រ្តីក្រសួងកិច្ចការនារីរបស់អូស្រ្តាលី លោកយល់ថា ទំនាក់ទំនងពាណិជ្ជម្ម និងការវិនិយោគជាមួយអូស្រ្តាលី នឹងមានផលវិជ្ជមានល្អប្រសើរ ជំរុញឲ្យមានការអភិវឌ្ឍលើវិស័យកសិកម្ម និងការនាំចេញកាន់តែទៅមុខថែមទៀត ហើយនេះជាអ្វីដែលយើងសិក្សាស្រាវជ្រាវអំពីតម្រូវការអូស្រ្តាលីបន្ថែម ដែលមានសក្តានុពលសម្រាប់កសិផល មិនថាតែអង្ករទេ។ពាក់ព័ន្ធការនាំអង្ករចេញទៅទីផ្សារអន្តរជាតិ ក៏ដូចជាប្រទេសអូស្រ្តាលីបច្ចុប្បន្ន លោកឧកញ៉ាបានអះអាងថា ក្រៅពីជួបបញ្ហានូវវិបត្តិកូវីដ១៩ ក្នុងវិស័យដឹកជញ្ជូនក៏នៅតែមានបញ្ហាប្រឈមដែរ ដោយសារប្រទេសមួយៗ មាននីតិវិធីប្រព័ន្ធនៃការអនុវត្តភូមភាគអនាម័យ, ប្រព័ន្ធនៃការគ្រប់គ្រងសុវត្ថិភាពចំណីអាហារខុសៗគ្នា។ ចំពោះទីផ្សារអូស្រ្តាលី កម្ពុជាទើបនាំចូលបានប្រមាណជាង១ឆ្នាំទេ ។គិតក្នុងរយៈពេល១០ខែ ឆ្នាំ២០២១នេះ កម្ពុជាធ្វើការនាំចេញស្រូវអង្ករទៅទីផ្សារអន្តរជាតិ មានចំនួនជាង ៤៦ម៉ឺនតោន ក្នុងនោះទៅកាន់ទីផ្សារប្រទេសអូស្រ្តាលីចំនួនជាង ៨ ២០០តោន។ ដោយឡែក ក្នុងរយៈពេល១ឆ្នាំពេញ នៃ២០២០ ការនាំចេញស្រូវអង្ករទៅអូស្រ្តាលីមានបរិមាណសរុបជាង ២ម៉ឺន ៧ពាន់តោន កើនឡើងជាង ៤ពាន់តោន បើធៀបនឹងឆ្នាំ២០១៩ មានចំនួនសរុបជាង ២ម៉ឺន ៣ពាន់តោន។សូមបញ្ជាក់ថា ដំណើរទស្សនកិច្ចរបស់ លោកជំទាវរដ្ឋមន្រ្តីក្រសួងការបរទេស និងរដ្ឋមន្រ្តីក្រសួងកិច្ចការនារីរបស់អូស្រ្តាលី មានចំនួន២ថ្ងៃ ចាប់ពីថ្ងៃទី៧ និងទី៨ ខែវិច្ឆិកា ឆ្នាំ២០២១នេះ ក្នុងគោលបំណងពង្រឹងកិច្ចសហប្រតិបត្តិការទ្វេភាគី និងពហុភាគីជាមួយកម្ពុជា ឲ្យកាន់តែល្អប្រសើបន្ថែមទៀត ដើម្បីគុណប្រយោជន៍របស់ប្រជាជន និងប្រទេសទំាងពីរ។ ក្នុងអំឡុងស្នាក់នៅកម្ពុជា ២ថ្ងៃនេះ លោកជំទាវបានទទួលជួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្រ្តី ជួបជាមួយប្រមុខការទូតកម្ពុជា និងជំនួបទ្វេភាគីជាមួយលោកជំទាវ អ៊ឹង គន្ថាផាវី រដ្ឋមន្រ្កីក្រសួងកិច្ចការនារីផងដែរ៕អត្ថបទ៖ បូរ៉ាវី

បណ្ដាញសង្គម

ព័ត៌មានថ្មីៗ

ស្ថានទូតឥណ្ឌូនេស៊ី រំពឹងថា ពិធីបុណ្យផ្សាររាត្រី នឹងទាក់ទាញភ្ញៀវទេសចរកាន់តែច្រើន ឱ្យចូលរួមទស្សនាផ្លូវថ្មើរជើងចតុមុខ

សកម្មជនមកពីគណបក្សប្រឆាំងចំនួន៧០នាក់ ស្រុកស្អាង ខេត្តកណ្តាល ចូលរួមជីវភាពនយោបាយជាមួយគណបក្សប្រជាជនកម្ពុជា

ការងារជោគជ័យអាស្រ័យមន្រ្តីមាន «សុខភាពល្អ»

ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន

ឯកឧត្តម ហ៊ុន ម៉ានី៖“សុខទុក្ខមន្ត្រី គឺជាស្នូលនៃការអនុវត្តការងារកែទម្រង់រដ្ឋបាលសាធារណៈ ស្របតាមចក្ខុវិស័យរបស់ សម្តេចមហាបវរធិបតីនាយករដ្ឋមន្ត្រី”

ការនាំចេញប្រេងឆៅ និងផលិតផលប្រេងរបស់សហរដ្ឋអាមេរិកបានឈានដល់កម្រិតខ្ពស់បំផុតមិនធ្លាប់មាន

អ៊ីរ៉ង់និយាយថាខ្លួន បានត្រៀមរួចរាល់ហើយដើម្បីទប់ទល់នឹងការគំរាមកំហែងគ្រប់បែបយ៉ាង

មនុស្ស១៤ នាក់បានស្លាប់ក្នុងការបំផ្ទុះគ្រាប់បែកនៅភាគនិរតីរបស់ប្រទេសកូឡុំប៊ី

អតីតសកម្មជនបក្សប្រឆាំងជាច្រើននាក់ទៀត នៅស្រុកត្រាំកក់ សម្រេចចូលរួមជីវភាពនយោបាយ ជាមួយគណប្រជាជនកម្ពុជា

អាជ្ញាធរខេត្តប៉ៃលិន បន្តចុះត្រួតពិនិត្យជនបរទេសដែលលួចចូលមករស់នៅខុសច្បាប់ ក្នុងខេត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877