នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-ចិន បើកកិច្ចសន្ទនាលើកទី២ ដើម្បីជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ
រដ្ឋមន្ត្រីក្រសួងសេដ្ឋកិច្ច៖ កូរ៉េជាដៃគូអភិវឌ្ឍន៍ទ្វេភាគីលំដាប់ទី៣ ដែលផ្តល់ហិរញ្ញប្បទានឆ្លើយតបនឹងអាទិភាពកម្ពុជា
ក្រុមហ៊ុនសិង្ហបុរីមួយឈ្វេងយល់ពីការបង្កើត និងគាំទ្រមជ្ឈមណ្ឌល MSME Hub នៅកម្ពុជា​
អគ្គលេខាធិការ CDC៖ កម្ពុជានៅតែត្រូវការវិនិយោគបន្ថែម ជាពិសេសការផ្ទេរចំណេះដឹង និងបច្ចេកវិទ្យា

សេដ្ឋកិច្ច និង កសិកម្ម

សហគ្រិន និងម្ចាស់អាជីវកម្ម កំពុងស្វែងយល់ពី​របាំង​បច្ចេកទេស​នាំចេញ​ផលិតផល​ទៅក្រៅប្រទេស

2026/08/17 01:10:52 pm        371
Facebook Telegram Linkin
ប្រធានសមាគមចំនួនពីរ ជួបជាមួយសហគ្រិន និងម្ចាស់អាជីវកម្ម ពិភាក្សាលើបញ្ហាប្រឈម និងស្វែងរកដំណោះស្រាយអាជីវកម្ម លើខ្សែច្រវាក់ផលិតកម្ម និងការផ្គត់ផ្កង់ផលិតផលិផលលើទីផ្សារ ជាពិសេសការស្វែងយល់ និងការហែករបាំងបច្ចេកទេសជំរុញការ នាំចេញជំរុញផលិតផលកម្ពុជាទៅក្រៅប្រទេសបន្ថែម។ ថ្នាក់ដឹកនាំសមាគម សហគ្រិន និងម្ចាស់អាជីវកម្ម-ផលិតកម្ម នៅចុងសប្តាហ៍កន្លង​មកនេះ បានបើកកិច្ចពិភាក្សា និងពិគ្រោះ យោបល់ ផ្តោតលើការដោះស្រាយបញ្ហាប្រឈមថ្លៃដើមផលិតកម្មដូចជា (ថ្លៃដើមផលិត, ពង្រឹងគុណភាពនិងស្តង់ដារ, ការប្រើប្រាស់ បច្ចេកវិទ្យា និងរបាំងបច្ចេកទេសទីផ្សារ) ក្នុងគោលដៅពង្រឹងខ្សែច្រវាក់ផ្គត់ផ្គង់ ដើម្បីជំរុញការនាំចេញផលិតផលកម្ពុជាទៅកាន់ទីផ្សារ អន្តរជាតិឱ្យបានកាន់តែទូលំទូលាយបន្ថែមទៀត។ ឯកឧត្តម ស្វាយ សុវណ្ណរិទ្ធ ប្រធានសមាគមអភិវឌ្ឍន៍សង្គមខ្មែរ លើកឡើងថា ជុំវិញការផលិតនៅក្នុងដំណាក់កាលចុង ក្រោយនេះឃើញថា ល្បឿននៃការផលិតរបស់សហគ្រាសក្នុងស្រុកមានការកើនឡើងគួរកត់សម្គាល់ បើធៀបនៅពេលផ្ទុះឡើងនៃវិបត្តិ ជំងឺកូវីដ-១៩ និងជម្លោះព្រំដែនរវាងកម្ពុជា-ថៃ, តែទោះបីយ៉ាងណាសហគ្រិនទាំងអស់គឺត្រូវការជំនាញពិត និងជំនាញទន់ ជាក់ស្តែង ក្នុងពេលបច្ចុប្បន្ននេះទុនវិនិយោគនៅមានកម្រិត ដើម្បីពង្រីកអាជីវកម្មបន្ថែម ដែលបញ្ហានេះសមាគមនិងស្វែងរកកិច្ចសហការជាមួយ ក្រសួងស្ថាប័ន និងដៃគូ ដើម្បីធ្វើឱ្យប្រសើរឡើងនៃការទទួលឥណទាន ក្នុងគោលដៅជំរុញការផលិតឱ្យកាន់តែធំ និងមានគុណភាព សម្រាប់ផ្គត់ផ្គង់លើទីផ្សារ។ ឯកឧត្តមបន្ថែមថា ជាក់ស្តែងកិច្ចពិភាក្សារវាងសមាគមអភិវឌ្ឍន៍សង្គមខ្មែរ និងសមាគមអ្នកផលិតចំណីអាហារកម្ពុជា ជាមួយ សហគ្រិន និងម្ចាស់អាជីវកម្ម-ផលិតកម្ម​ គឺដើម្បីឱ្យពួកគាត់បានស្វែងយល់បន្ថែមពីទីផ្សារនាំចេញ ជាពិសេសស្តង់ដារអនាម័យ និង ភូតគាមអនាម័យ ការបង្កើនគុណភាពផលិតផល និងបង្កើតម៉ាកយីហោឱ្យមានភាពជឿជាក់ ក្នុងគោលដៅហែករបាំងបច្ចេកទេស ជំរុញការនាំចេញជំរុញផលិតផលកម្ពុជាទៅក្រៅប្រទេសឱ្យកាន់តែច្រើន។ ចំណែកម្ចាស់អាជីវកម្ម បានបង្ហាញនូវមោទនភាពខណៈដែលពលរដ្ឋកម្ពុជា បាននិងកំពុងងាកមកប្រើប្រាស់ផលិតផលក្នុង ស្រុក ធ្វើឱ្យចលនាការផលិត នៅក្នុងខ្សែច្រវាក់ផលិតកម្មកំពុងបន្តមានកំណើន លើការផលិតសម្រាប់ផ្គត់ផ្គង់ទីផ្សារក្នុងស្រុក និង ឱកាសពង្រីកទីផ្សារក្រៅស្រុកបន្ថែមទៀត ដើម្បីចូលរួមលើកកម្ពស់ផលិតផលជាតិ និងគាំទ្រដល់កសិករដែលជាអ្នកផ្គត់ផ្គង់វត្ថុធាតុ ដើមផងដែរ។ ឯកឧត្តម មៀវ សុខទ្រី ប្រធានសមាគមអ្នកផលិតចំណីអាហារកម្ពុជា លើកឡើងថា នៅប៉ុន្មានឆ្នាំចុងក្រោយនេះផលិតផល ខ្មែរបានហូរចូលលើទីផ្សារគួរកត់សកម្គាល់ ក្នុងនោះក៏មានផលិតផលមួយចំនួនបានកំពុងនំាចេញទៅក្រៅស្រុកផងដែរ ជាក់ស្តែងក្នុង រយៈពេល២ឆ្នាំមកនេះ ផលិតផលខ្មែរបាននាំចេញទៅកាន់ទីផ្សារកូរ៉េជាបន្តបន្ទាប់ ព្រោះសមាគមមានដៃគូរសហការដើម្បីជួយសម្រួល ដល់ការនាំចេញផលិតផលរបស់កម្ពុជាផងដែរ៕ អត្ថបទ៖ សុន រ៉ាឌី 

តំណាងសភាពាណិជ្ជកម្មកម្ពុជា ជំរុញវិស័យឯកជនពង្រឹងសមត្ថភាពលើបច្ចេកវិទ្យា និងចាប់យក​ឧស្សាហកម្ម ៤.០ ឆ្លើយតបសេដ្ឋកិច្ចរបស់កម្ពុជា

2026/08/17 01:00:50 pm        327
Facebook Telegram Linkin
តំណាងសភាពាណិជ្ជកម្មកម្ពុជា ជំរុញឱ្យវិស័យឯកជន ពង្រឹងសមត្ថភាពលើបច្ចេកវិទ្យា និងចាប់យកឧស្សាហកម្ម ៤.០ ប្រើឱ្យបាន ពេញលេញ និងអស់សក្តានុពល ជំរុញពង្រីកខ្លួនក្នុងឧស្សាហកម្មកាត់ដេរ ការបូប និងស្បែកជើង ឆ្លើយតបដល់ការនាំចេញរបស់កម្ពុជា ខណៈដែលវិស័យនេះកំពុងគាំទ្រដល់ការងារ និងកំណើនសេដ្ឋកិច្ច។    ឧកញ៉ាបណ្ឌិត តាន់ មុនីវណ្ណ អនុប្រធានសភាពាណិជ្ជកម្ពុជា លើកឡើងក្នុងកិច្ចពិភាក្សាស្តីពី ជំរុញកាប្រកួតប្រជែងនៃឧស្សា- ហកម្មកម្ពុជា៖ “ជំរុញនវានុវត្តន៍ ការអភិវឌ្ឍប្រកបដោយចីរភាព និងការផលិតឆ្លាតវៃ ដើម្បីពង្រឹងភាពប្រកួតប្រជែងថ្នាក់តំបន់ និង សកល” នៅក្នុងពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ ថា ជុំវិញការអភិវឌ្ឍវិស័យឧស្សាហកម្មនៅកម្ពុជា មានការរីកចម្រើន ខ្លាំង និងបានផ្លាស់ប្តូរពីឧស្សាហកម្មធុនស្រាលបែបកាត់ដេរ និងស្បែកជើង ទៅជាឧស្សាហកម្មយានយន្ត អគ្គិសនី និងអេឡិចត្រូនិក។  ឧកញ៉ាបណ្ឌិត បន្តថា ទោះបីវិស័យឧស្សាហកម្មបានកំពុងផ្លាស់ប្តូរយ៉ាងលឿន ក្នុងនោះក៏មានប្រទេសមួយចំនួនបានដើរហួស ពីឧស្សាហកម្ម ៤.០ ក៏ដោយ តែសម្រាប់កម្ពុជា ការការចាប់វិស័យនេះមិនទាន់អស់សក្តានុពលនៅឡើយ ដែលត្រូវការបន្តពង្រឹង សមត្ថភាពបន្ថែមទៀត នៃការចាប់យកឧស្សាហកម្ម ៤.០ នេះ សម្រាប់ប្រើនៅក្នុងវិស័យឧស្សាហកម្មកាត់ដេរ ការបូប និងស្បែកជើង ខណៈដែលវិស័យទាំងនេះនៅតែដើរតួយ៉ាងសំខាន់ ឆ្លើយតបដល់ការនាំចេញរបស់កម្ពុជា គាំទ្រដល់ការងារ ប្រាក់ចំណូលក្នុងគ្រួសារ និងកំណើននៅក្នុងសេដ្ឋកិច្ចជាតិផងដែរ។ សូមបញ្ជាក់ថា គិតត្រឹមដំណាច់ខែ កក្កដា ឆ្នាំ២០២៦នេះ បើយោងតាមរបាយការណ៍ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជាមានរោងចក្រកំពុងដំណើរការដែលចុះបញ្ជីនៅក្រសួងមានចំនួនសរុប ៣.៣៥៧ រោងចក្រ ដោយមានទុនវិនិយោគ សរុបប្រមាណ ២៨ ប៊ីលានដុល្លារអាមេរិក កើនឡើង ៦,២ ប៊ីលានដុល្លារអាមេរិក ធៀបរយៈពេលដូចគ្នាឆ្នាំមុន និងមានកម្លាំងពលកម្ម ជាង ១,៣ លាននាក់។ ចំណែកការនាំចេញវាយនភណ្ឌវិញ, ក្នុងរយៈពេល ៧ ខែនេះដែរ កម្ពុជាបាននាំចេញសម្លៀកបំពាក់ និងគ្រឿង បន្ទាប់បន្សំធ្វើពីក្រណាត់ និងមិនធ្វើពីក្រណាត់ មានទឹកប្រាក់ជាង ៨ ពាន់លានដុល្លារអាមេរិក កើនជិត ១០%, ការនាំចេញស្បែកជើង ស្រោមជើង និងវត្ថុប្រហាក់ប្រហែល ជាង ១,៣ ពាន់លានដុល្លារ កើនជិត ១០% និងការនាំចេញវាយនភណ្ឌកែច្នៃផ្សេងៗទៀតជាង ២៥៤ លានដុល្លារ កើនជិត ៤៩% បើធៀបរយៈពេលដូចគ្នានិងឆ្នាំ២០២៥៕ អត្ថបទ៖ សុន រ៉ាឌី 

កសិករនៅខេត្តកំពង់ឆ្នាំង កាក់កបជាមួយរបរដាំដុះផ្សិតអំបោះលក់ទៅកាន់ទីផ្សារ​ខណៈកំពុងមានតម្រូវការខ្ពស់

2026/08/17 11:53:30 am        286
Facebook Telegram Linkin
ផ្សិតអំបោះ ជាប្រភេទបន្លែម្យ៉ាងដែលមានរសជាតិឆ្ងាញ់ ហើយគេអាចយកទៅច្នៃធ្វើជាម្ហូបអារហារបានជាច្រើនមុខ និងលក់ដាច់ជាងគេនៅលើទីផ្សារគ្រប់ទីកន្លែង ខណៈកសិករម្នាក់រស់នៅក្នុងឃុំជៀប ស្រុកទឹកផុស ខេត្តកំពង់ឆ្នាំង បានបញ្ជាក់ឱ្យដឹងនៅថ្ងៃទី១៧ ខែសីហា ឆ្នាំ២០២៦នេះថា ការដាំផ្សិតនេះ មានងាយស្រួលដាំហើយអាចទទួលបានផលលក់ដូរជារៀងរាល់ថ្ងៃ។ លោក សយ ចាន់ណា ជាកសិករគំរូនៅឃុំជៀប ស្រុកទឹកផុស ខេត្តកំពង់ឆ្នាំង បានឱ្យដឹងថា គាត់បានទៅរៀនពីបច្ចេកទេសដាំដុះផ្សិតអំបោះនេះពីអ្នកជំនាញក្នុងខេត្តកំពង់ចាម និងរៀននៅខេត្តកំពត។ ក្រោយចេះច្បាស់ជំនាញនេះ ក៏បានមកសាកល្បងបណ្តុះផ្សិតអំបោះនេះឡើងដើម្បីទុកជាបទពិសោធន៍សម្រាប់បង្កើតកសិដ្ឋានផ្ទាល់ខ្លួននៅស្រុកកំណើត ក្នុងគោលបំណងចែកចាយលក់ដូរនៅលើទីផ្សារឱ្យបាន ទូលំទូលាយ ប៉ុន្តែរយៈពេលពីរឆ្នាំដំបូងមិនសូវទទួលបានផលល្អទេ។ កសិកររូបនេះបន្តថា ក្រោយពីបានព្យាយាមសាកល្បងបណ្តុះផ្សិតអំបោះបន្តទៀត រួមនឹងការផ្តល់បទពិសោធន៍បន្ថែមពីមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំងផងនោះ គាត់ទទួលបានជោគជ័យលើការដាំផ្សិតអំបោះនេះលក់ទៅកាន់ទីផ្សាររយៈពេល១០ឆ្នាំមកហើយ។ លោក ចាន់ណា បញ្ជាក់ថា ជារៀងរាល់ថ្ងៃគាត់បានទទួលផលពីផ្សិតអំបោះចាប់ពី១០ទៅ១៥គីឡូក្រាម និងអាចលក់ចេញក្នុង១គីឡូក្រាមតម្លៃពី៦ទៅ៧ពាន់រៀល ហើយជាអ្នកទិញក្នុងភូមិស្រុកគាត់តែងមកទិញគ្មានសល់ជារៀងរាល់ថ្ងៃ ដែលធ្វើឱ្យគាត់អាចរកចំណូលពីការលក់ផ្សិតអំបោះនេះបានចាប់ពី៧ទៅ១០ម៉ឺនរៀលក្នុង១ថ្ងៃ។ លោកបានបន្តថា ដំបូងកុំថាឡើយដាំដុះផ្សិតប្រភេទនេះ អ្នកភូមិរបស់គាត់មិនស្គាល់អ្វីទៅដែលហៅថា ផ្សិតអំបោះផង តែក្រោយពីបានភ្លក្សរសជាតិម្តងហើយ អ្នកភូមិតែងមករកទិញម្តងទៀត ដែលកត្តានេះបានធ្វើឱ្យគាត់បានពង្រីកថ្នាលបណ្តុះបន្ថែមទៀតដើម្បីតំរូវតាមទីផ្សារក្នុងភូមិស្រុកគាត់។ បច្ចុប្បន្នមានកសិករជិតឆ្ងាយ និងមានរហូតដល់ខេត្តដទៃទៀត គេបានបញ្ជាទិញនូវកញ្ចប់ផ្សិតអំបោះយកទៅដាំដុះ ជារៀងរាល់សប្តាហ៍ ដែលគាត់អាចលក់បានចាប់ពី ៥០០ទៅ១០០០កញ្ចប់ ដោយក្នុង១កញ្ចប់តម្លៃ ១៥០០រៀល។ លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំងបានបញ្ជាក់ថា ផ្សិតអំបោះ គឺជាប្រភេទផ្សិតដែលងាយស្រួលបណ្តុះ ការចំណាយថវិកាក៏តិច ប្រើកម្លាំងពលកម្មក៏តិច វត្ថុធាតុដើមដែលយកមកប្រើប្រាស់ជាកាកសំណល់ដែលងាយស្រួលរកមកបណ្តុះ ដែលមាន ដូចជាអាចម៍រណា គ កន្ទក់ ស្រូវ ម្សៅ អង្ករដំណើប ជីអ៊ុយរេ និងកំបោរស ប៉ុន្តែវាទាមទារឱ្យអ្នកដាំដុះត្រូវមានភាពអំណត់ព្យាយាម ជាពិសេសបំផុតផ្តោតលើការអនុវត្តតាមលក្ខណៈបច្ចេកទេស និងអនាម័យឱ្យបានស្អាតជានិច្ច។ លោកបានប្រធានមន្ទីរបានអំពាវនាវដល់ប្រជាកសិករ កុំទុកដីនៅក្នុងភូមិដ្ឋានឱ្យនៅទំនេរ ត្រូវខិតខំព្យាយាមដាំដុះបន្លែបង្កា ចិញ្ចឹមសត្វមាន់ទា ត្រី កង្កែប ខ្យង កំពឹស បង្កង ហើយមន្ទីរកសិកម្មខេត្តរង់ចាំជួយផ្តល់បទពិសោធន៍ បច្ចេកទេសផ្នែកកសិកម្មជានិច្ច៕ អត្ថបទ៖ កាំង ហុង វាស្នា    

គិតត្រឹមខែកក្កដា កម្ពុជាមានរោងចក្រដំណើរការចំនួន ៣.៣៥៧ មានទុនវិនិយោគ ២៨ ប៊ីលានដុល្លារ

2026/08/13 03:13:13 pm        362
Facebook Telegram Linkin
គិតត្រឹមដំណាច់ខែកក្កដា ឆ្នាំ២០២៦នេះ កម្ពុជាមានរោងចក្រកំពុងដំណើរការដែលចុះបញ្ជីនៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានចំនួនសរុប ៣.៣៥៧ រោងចក្រ ដោយមានទុនវិនិយោគសរុបប្រមាណ ២៨ ប៊ីលានដុល្លារ អាមេរិក កើនឡើង ៦,២ ប៊ីលានដុល្លារអាមេរិក ធៀបរយៈពេលដូចគ្នាឆ្នាំមុន។ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងក្នុងពិធីសម្ពោធជាផ្លូវ ការ ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ, ពិព័រណ៍ឧស្សាហកម្មសម្លៀកបំពាក់​ និងវាយនភណ្ឌអន្តរជាតិ, ពិព័រណ៍ឧស្សាហ- កម្មប្លាស្ទិក កៅស៊ូ ការវេចខ្ចប់ និងបោះពុម្ភកម្ពុជាអន្តរជាតិ លើកទី១០ នៅថ្ងៃទី១៣ ខែសីហា ឆ្នាំ២០២៦ នេះថា ការអភិវឌ្ឍ ឧស្សាហកម្មបច្ចុប្បន្នកំពុងឈានចូលដំណាក់កាលថ្មីមួយ ជាមួយកំណើនគួរឱ្យកត់សម្គាល់ ទាំងកំណើនចំនួនរោងក្រ ទុនវិនិយោគ តម្លៃផលិតកម្ម និងចំនួនការងារ ដែលទាំងអស់នេះបង្ហាញអំពីទំនុកចិត្តដល់អ្នកវិនិយោគ ជំនួសស្ថិរភាព សក្តានុពល និងអនាគត នៃឧស្សាហកម្មនៅកម្ពុជា។ ឯកឧត្តមរដ្ឋមន្ត្រី បន្តថា ជុំវិញឧស្សាហកម្មនេះ បើគិតត្រឹមដំណាច់ខែកក្កដា ឆ្នាំ២០២៦នេះ កម្ពុជាមានរោងចក្រកំពុង ដំណើរការ ដែលបានចុះបញ្ជីនៅក្រសួង សរុបមានចំនួន ៣.៣៥៧ រោងចក្រ, កម្លាំងពលកម្មជាង ១,៣ លាននាក់ ក្នុងនោះស្រីមាន ជាង ៩៥ ម៉ឺននាក់ ស្មើនឹង ៧០%។ ទុនវិនិយោគសរុបមានប្រមាណ ២៨ ប៊ីលានដុល្លារអាមេរិក កើនឡើងប្រមាណ ៦,២ ប៊ីលាន ដុល្លារអាមេរិក ស្មើនឹងជាង ២៩% បើធៀបនឹងរយៈពេលដូចគ្នាកាលពីឆ្នាំមុន។ លោក អាកៃ លីន (Akai Lin) នាយកទទួលបន្ទុកកិច្ចការក្រៅប្រទេស លើកឡើងថា ជុំវិញការអភិវឌ្ឍនេះ កម្ពុជាមានការរីក ចម្រើនគួរកត់សម្គាល់ ក្នុងនោះកម្ពុជាក៏កំពុងត្រៀមចាកចេញពីចំណាត់ថ្នាក់ប្រទេសដែលមានការអភិវឌ្ឍតិចតួចនៅឆ្នាំ២០២៩ ខាង មុខ បញ្ហានេះអ្នកផលិតមួយចំនួនកំពុងដោះស្រាយបញ្ហានៅក្នុងផលិតកម្មរបស់ខ្លួន ដើម្បីបង្កើនប្រសិទ្ធភាពពង្រីកជាសកល លើការ ប្រើប្រាស់បច្ចេកវិទ្យា និងនវានុវត្តន៍ និងដំណោះស្រាយរោងចក្រដ៏ឆ្លាតវៃជាដើម។ លោកបន្តថា ការផ្លាស់ប្តូរនេះមិនមែនជាភាពងាយ ស្រួលប៉ុន្មាននោះទេ ប៉ុន្តែនេះជាការបង្កើតនូវឱកាសសម្រាប់ធុរកិច្ចដើម្បីវិនិយោគ ពង្រីកទីផ្សារក្នុងស្រុកនិងអន្តរជាតិ។ លោក បន្តថា គោលបំណងនៃការរៀបចំពិព័រណ៍ឧស្សាហកម្មគ្រឿងយន្តកម្ពុជាអន្តរជាតិនេះ ដើម្បីបំបែកនូវគម្លាតរវាង ទីផ្សារក្នុងស្រុក និងអន្តរជាតិ ក្នុងគោលដៅបង្កើននូវឱកាសថ្មី ដើម្បីផ្តល់ដល់ធុរកិច្ចនៅក្នុងប្រទេសកម្ពុជា គាំទ្រដល់ការរីកចម្រើន ជាសកល។ លោកក៏រំពឹងថា ព្រឹត្តិការណ៍ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ ដែលប្រព្រឹត្តទៅរយៈពេល ៤ថ្ងៃនេះ នឹងជួយ ដល់ម្ចាស់ផលិតកម្ម អាជីវកម្ម និងការស្វែងរកនូវលទ្ធភាពថ្មី អាចតភ្ជាប់រវាងឧស្សាហកម្មក្រៅស្រុកនិងក្នុងស្រុក ដើម្បីការរីកចម្រើន ទាំងអស់គ្នា៕ អត្ថបទ៖ សុន រ៉ាឌី 

ប្រធានគណៈកម្មាធិការសេដ្ឋកិច្ច និងធុរកិច្ចឌីជីថល ជំរុញឱ្យវិស័យឯកជន​ចាប់យក​ឌីជីថល​បម្រើ​ក្នុងអាជីវកម្ម

2026/08/12 03:58:44 pm        348
Facebook Telegram Linkin
ប្រធានគណៈកម្មាធិការសេដ្ឋកិច្ច និងធុរកិច្ចឌីជីថល ជំរុញឱ្យវិស័យ​ឯកជន​ចាប់​យក​បច្ចេក​វិទ្យា​ឌីជីថល​ ដែលមានលក្ខណៈកាន់តែ នវានុវត្តន៍ ដើម្បីលើកកម្ពស់ប្រសិទ្ធភាព សមត្ថភាព និង​គុណ​ភាព​នៃផលិតកម្ម កាត់បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានា នូវភាពប្រកួត​ប្រជែង​ក្នុង​ទីផ្សារ។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញវត្ថុ និងជាប្រធាន គណៈកម្មាធិការសេដ្ឋកិច្ច និងធុរកិច្ចឌីជីថល លើក​ឡើង​នៅ​ក្នុង​ពិធី​ប្រកាស​ដាក់​ឱ្យ​អនុវត្តជាផ្លូវការ និងសិក្ខាសាលាផ្សព្វផ្សាយស្តីពី «យុទ្ធសាស្រ្តជាតិស្តីពី​ការ​អភិវឌ្ឍ​ធុរកិច្ច​ថ្មី​ឆ្នាំ​២០២៦-២០៣០» នៅថ្ងៃទី១១ សីហា នេះថា រាជរដ្ឋាភិបាលជំរុញ និងការ​លើក​កម្ពស់​ ការធ្វើធុរកិច្ចគ្រប់ប្រភេទ ពិសេសធុរកិច្ចថ្មីដែលមានលក្ខណៈនវានុវត្តន៍ និងប្រើប្រាស់​បច្ចេក​វិទ្យាឌីជីថលជា «ស្នូល» សំដៅបង្កើន សមត្ថភាព និងឧត្តមភាពប្រកួតប្រជែងរបស់កម្ពុជា ក្នុងបរិការណ៍ដែលស្ថានភាពតំបន់ និងសកល មានភាពមិនប្រាកដប្រជាកាន់តែ ខ្ពស់ និងស្របពេលដែលតំបន់ និងពិភពលោកទាំងមូលកំពុងផ្តល់អាទិភាពខ្ពស់ លើការលើកកម្ពស់ការប្រើប្រាស់បច្ចេកវិទ្យាឌីជីថល ជាពិសេសវឌ្ឍនភាពចុងក្រោយនៃបញ្ញាសិប្បនិម្មិត AI ។ ឯកឧត្តមឧបនាយករដ្ឋមន្រ្តី បន្តថា បច្ចេកវិទ្យាឌីជីថលបានក្លាយជាផ្នែកមួយដ៏សំខាន់នៃការរស់នៅ ការរៀនសូត្រ ការប្រកប អាជីវកម្ម និងការផ្តល់សេវាសាធារណៈជូនធុរជន ក៏ដូចជាជូនប្រជាជនទូទៅក្នុងយុគសម័យទំនើបនេះ ពោលគឺបច្ចេកវិទ្យាឌីជីថល បានចាក់ស្រេះក្នុងគ្រប់សកម្មភាពសង្គម-សេដ្ឋកិច្ច ហើយបានក្លាយជាកាតាលីករដ៏សំខាន់ និងមិនអាចខ្វះបាន ក្នុងការជំរុញនវានុវត្តន៍ និង កណើន ក៏ដូចជាការពង្រឹងភាពធន់នៃសេដ្ឋកិច្ច ។ សម្រាប់វិស័យឯកជនការចាប់យក និងការប្រើប្រាស់បច្ចេកវិទ្យាឌីជីថល ដែល មានលក្ខណៈកាន់តែនវានុវត្តន៍ គឺជាឧត្តមភាពមួយថ្មី និងជួយលើកកម្ពស់ប្រសិទ្ធភាព សមត្ថភាព និងគុណភាពនៃផលិតកម្ម កាត់ បន្ថយថ្លៃដើម តភ្ជាប់ខ្សែច្រវាក់ផលិតកម្ម និងធានានូវភាពប្រកួតប្រជែងក្នុងទីផ្សារ ។ ទាក់ទិនបច្ចេកវិទ្យាឌីជីថល, បណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងថា ជាទិសដៅរបស់សមាគម គឺ មានផែនការពង្រឹង និងពង្រីកចំណេះដឹងដល់សហគ្រិនលើផ្នែកបច្ចេកវិទ្យាឌីជីថល ដើម្បីទាញយកសក្តានុពលនៃបរិវត្តកម្មឌីជីថល សម្រាប់ជាមូលដ្ឋានគ្រឹះពង្រឹងអាជីវកម្ម និងការធ្វើពាណិជ្ជកម្ម។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន លើកឡើងបន្ថែមថា ជុំវិញបច្ចេកវិទ្យាឌីជីថលនេះដែរ ចំពោះវិស័យសាធារណៈ បាននិងកំពុងដើរតួនាទីជាគន្លឹះដ៏សំខាន់ ក្នុងការជំរុញការកែទម្រង់ដ៏មុតស្រួច និងស៊ីជម្រៅនៅកម្ពុជា ជាពិសេសពាក់ព័ន្ធនឹងការ- ផ្តល់សេវាសាធារណៈសម្រាប់ធុរកិច្ចថ្មី ដើម្បីកាត់បន្ថយភាពស្មុគស្មាញនៃការិយាធិបតេយ្យ បង្កើនប្រសិទ្ធភាពនៃរដ្ឋបាលសាធារណៈ ពង្រឹងអនុលោមភាព និងកែលម្អបរិយាកាសធុរកិច្ចក្នុងប្រទេសឲ្យកាន់តែប្រសើរឡើង សំដៅឆ្លើយតបទៅនឹងតម្រូវការសំណូមពរ និង បំណងប្រាថ្នាដ៏ពិសិដ្ឋរបស់ប្រជាជន និងធុរជន៕ អត្ថបទ៖ សុន រ៉ាឌី 

រាជរដ្ឋាភិបាលទម្លាក់ការព្យាករសេដ្ឋកិច្ចនៅត្រឹម ៤,១% ក្រោមសម្មតិកម្ម និងសូចនាករ​ម៉ាក្រូសេដ្ឋកិច្ច​ឆមាសទី១

2026/08/12 03:30:57 pm        300
Facebook Telegram Linkin
រាជរដ្ឋាភិបាលបានទម្លាក់ការព្យាករសេដ្ឋកិច្ចឆ្នាំ២០២៦ មកនៅត្រឹមរង្វង់ ៤,១% ក្រោម​មូលដ្ឋាន​សម្មតិកម្ម និងសូចនាករម៉ាក្រូ សេដ្ឋកិច្ច ក្នុងរយៈពេល៦ខែ ឆ្នាំ២០២៦ និងការគួបផ្សំ​នៃការ​ពិគ្រោះ​យោបល់​ជាមួយក្រសួង-ស្ថាប័ន និងវិស័យឯកជនពាក់ព័ន្ធនានា។ក្រសួងសេដ្ឋកិច្ច និងហិរញ្ញវត្ថុ បង្ហាញរបាយការណ៍ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្ត ច្បាប់ស្តីពីហិរញ្ញវត្ថុសម្រាប់ការគ្រប់គ្រង់ឆ្នាំ២០២៦ ឱ្យដឹងថា តាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ កំណើនសេដ្ឋ កិច្ចកម្ពុជាត្រូវបានព្យាករ នឹងសម្រេចបានក្នុងអត្រា ៥,០%, ដែលការវាយតម្លៃនេះត្រូវបានធ្វើឡើងនៅមុនពេលកម្ពុជាទទួលរងនូវកម្ម វិបាកផ្ទួនៗ ពោលគឺមុនការផ្ទុះឡើងនៃសង្គ្រាមឈ្លានពានពីប្រទេសថៃជាលើកទី២, និងការផ្ទុះឡើងនៃសង្គ្រាមនៅតំបន់មជ្ឈិមបូព៌ា ដែលរំពឹងគាំទ្រដោយ៖ (១)-ការបន្តរក្សាបាននូវចលនការរឹងមាំនៃវិស័យបម្រើដល់ការនាំចេញ ជាពិសេសវិស័យកម្មន្តសាលកាត់ដេរ និងកម្មន្តសាលមិនមែនកាត់ដេរ, (២)- ការបន្តងើបឡើងនៃអនុវិស័យបដិសណ្ឋារកិច្ច និងសេវាកម្មម្ហូបអាហារ, អនុវិស័យលក់ដុំ-រាយ, និងអនុវិស័យសំណង់-អចលនទ្រព្យ ដែលរំពឹងថាបន្តមាននិន្នាការវិជ្ជមាន និង (៣) វិស័យកសិកម្ម នឹងបន្តរក្សាបានស្ថិរភាពនៃ កំណើន។ សេដ្ឋកិច្ចកម្ពុជានៅបន្តជួបប្រឈមនឹងអន្តរកាលនៃពហុវិបត្តិ ក្នុងន័យថា ខណៈដែលការប្រែប្រួលរបបពាណិជ្ជកម្មសកល, ការបង្ក្រាបសកម្មភាពទឆបោកតាមប្រព័ន្ធបច្ចេកវិទ្យា បញ្ហាព្រំដែនកម្ពុជា-ថៃ បញ្ហាសង្គ្រាមនៅតំបន់មជ្ឈិមបូព៌ាបានកំពុងផ្ទុះឡើង។ ផ្អែកលើការវិវត្តនេះ, ការវាយតម្លៃស្ថានភាពសេដ្ឋកិច្ចក្នុងឯកសារក្របខ័ណ្ឌហិរញ្ញវត្ថុសាធារណៈរយៈពេលមធ្យមឆ្នាំ២០២៧- ២០២៩ បានកែសម្រួលការព្យាករកំណើនសេដ្ឋកិច្ចឆ្នាំ២០២៦ ពីអត្រា ៥,០% មកត្រឹមអត្រា ៤,២% ដោយសារ (១)-ផលប៉ះពាល់ ជាអវិជ្ជមាននៃការកើនថ្លៃប្រេងឥន្ធនៈសកល មកលើសកម្មភាពសេដ្ឋកិច្ចមួយចំនួនមាន វិស័យកសិកម្ម, ទេសចរណ៍, និងដឹកជញ្ជូន ខណៈការកើនឡើងសម្ពាធអតិផរណា បានបន្ទច់បង្អាក់ដល់សកម្មភាពចាយ និងប្រើប្រាស់ក្នុងស្រុក, (២)-កម្មវិបាកនៃការបន្តបិទខ្ទប់ ព្រំដែនកម្ពុជា-ថៃ មកលើវិស័យទេសចរណ៍, ការនាំចេញកសិផល និងប្រាក់បង្វែរឯកជន, និង (៣)- ផលប៉ះពាល់ជាអវិជ្ជមានក្នុង រយៈពេលខ្លី នៃការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា មកលើវិស័យសំណង់-អចលនទ្រព្យ និងវិស័យទេសចរណ៍។ គិតត្រឹមពាក់កណ្តាលឆ្នាំ២០២៦នេះ, ខណៈស្ថានភាពសេដ្ឋកិច្ចជារួម មានការវិវត្តទៅក្នុងទិសដៅដូចការរំពឹងទុកពីដើមឆ្នាំ ក្នុងក្របខ័ណ្ឌហិរញ្ញវត្ថុសាធារណៈរយៈពេលមធ្យមក៏ដោយ, ប៉ុន្តែនិន្នាការកំណើនតាមវិស័យ និងអនុវិស័យមួយចំនួនមានការប្រែប្រួល ខ្លាំង ដោយសារការទទួលរងនូវកម្មវិបាកក្នុងទំហំធំជាងការរំពឹងទុក ពិសេសវិស័យទេសចរណ៍ដែលទទួលកម្មវិបាកជាអវិជ្ជមានពេញ ទំហឹង ពីការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា និងសង្គ្រាមក្នុងតំបន់មជ្ឈិមបូព៌ា ក្នុងខណៈដែលវិស័យកសិកម្ម ក៏ទទួល រងនូវផលប៉ះពាល់ជាងការរំពឹងទុក ការកើនឡើងថ្លៃប្រេងឥន្ធនៈ និងធាតុចូលកសិកម្មមួយចំនួនដូចជាជីកសិកម្ម និងប្រេងជាដើម។ ក្រោមមូលដ្ឋានសម្មតិកម្ម និងសូចនាករម៉ាក្រូសេដ្ឋកិច្ច ក្នុងរយៈពេល៦ខែ គួបផ្សំនឹងការពិគ្រោះយោបល់ជាមួយក្រសួង-ស្ថាប័ន និងវិស័យឯកជនពាក់ព័ន្ធ, កំណើនសេដ្ឋកិច្ចកម្ពុជាក្នុងឆ្នាំ២០២៦នេះ ត្រូវបានវាយតម្លៃឡើងវិញថា នឹងសម្រេចបានក្នុងអត្រា ៤,១% ប៉ុណ្ណោះ។ កំណើនជារួម ទាបជាងការរំពឹងទុកបន្តិច ដោយសារការថមថយជាងការគ្រោងទុកនូវកំណើននៃវិស័យកសិកម្ម និង ទេសចរណ៍ និងការថមថយបន្តិចនូវកំណើននៃវិស័យកាត់ដេរ ខណៈដែលវិស័យលក់ដុំ-រាយ, ហិរញ្ញវត្ថុ, និងសំណង់-អចលនទ្រព្យ រក្សាបានកំណើនដូចការគ្រោងទុក។ ដោយឡែកវិស័យបម្រើការនាំចេញ ពិសេសវិស័យកម្មន្តសាលមិនមែនកាត់ដេរ ត្រូវបានវាយតម្លៃ ថា សម្រេចបានកំណើនល្អជាងការរំពឹងទុក ដែលនឹងជួយយឺតយោងកំណើនសេដ្ឋកិច្ចកម្ពុជាក្នុងឆ្នាំ២០២៦ជារួម៕ អត្ថបទ៖ សុន រ៉ាឌី 

សមាគមធនាគារ​នៅកម្ពុជា និងសមាគមមីក្រូហិរញ្ញវត្ថុកម្ពុជា សេចក្តីថ្លែងការណ៍រួមស្តីពី វីដេអូ​ឯកសារ​ពាក់ព័ន្ធ​នឹងករណីអតិថិជនឥណទាន ដែលត្រូវបានផ្សព្វផ្សាយនាពេលថ្មីៗនេះ

2026/08/12 02:14:51 pm        502
Facebook Telegram Linkin
ភ្នំពេញ៖ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុ កម្ពុជា (CMA) ថ្ងៃ​ទី១២ ខែសីហា ឆ្នាំ២០២៦ បានសង្កេតឃើញថា នាពេលថ្មីៗនេះ អង្គការលីកាដូ (LICADHO) និង​បណ្តាញសារព័ត៌មានមួយ ចំនួនបន្តចេញផ្សាយ និងចែករំលែក​វីដេអូ​ឯកសារ​ពាក់​ព័ន្ធ​នឹង​ករណី​អតិថិជន​មួយចំនួនរបស់គ្រឹះស្ថានធនាគារ និងហិរញ្ញវត្ថុ ដែលបានកើតឡើងកន្លងមក។ សមាគមទាំងពីរ គោរពតួនាទីរបស់អង្គការសង្គមស៊ីវិល និងប្រព័ន្ធផ្សព្វផ្សាយ ក្នុងការលើកកម្ពស់ការយល់ ដឹងរបស់សាធារណជន និងការពារផលប្រយោជន៍ស្របច្បាប់របស់ប្រជាពលរដ្ឋ។ ទោះជាយ៉ាងណា វីដេអូឯកសារ ទាំងនោះបានបង្ហាញតែទិដ្ឋភាពមួយផ្នែកនៃអង្គហេតុ ដោយពុំបានឆ្លុះបញ្ចាំងពេញលេញអំពីវិធានការដែលបាន អនុវត្តជាបន្តបន្ទាប់ វឌ្ឍនភាព និងស្ថានភាពបច្ចុប្បន្ននៃករណីនីមួយៗឡើយ។ ការបង្ហាញព័ត៌មានដោយខ្វះ បរិបទពេញលេញបែបនេះ អាចធ្វើឱ្យសាធារណជនមានការភ័ន្តច្រឡំ ឬយល់ខុសពីស្ថានភាពជាក់ស្តែង ព្រមទាំង ប៉ះពាល់ដល់ទំនុកចិត្តរបស់សាធារណជនចំពោះវិស័យធនាគារ និងហិរញ្ញវត្ថុ។ ដូច្នេះ សមាគមទាំងពីរ សូមលើកទឹក ចិត្តឱ្យការផ្សព្វផ្សាយព័ត៌មានពាក់ព័ន្ធនឹងករណីទាំងនេះ ធ្វើឡើងឱ្យបានពេញលេញ ត្រឹមត្រូវ និងមានតុល្យភាព ដោយផ្អែកលើព័ត៌មានដែលបានផ្ទៀងផ្ទាត់ និងរួមបញ្ចូលទាំងបរិបទ ពេលវេលា ការវិវត្ត វិធានការដែលបានអនុវត្តជា បន្តបន្ទាប់ និងស្ថានភាពចុងក្រោយនៃករណីនីមួយៗ។ សមាគមទាំងពីរ បន្តយកចិត្តទុកដាក់តាមដានយ៉ាងហ្មត់ចត់ចំពោះការពិនិត្យ និងដោះស្រាយបណ្ដឹងប្រកបដោយគោលការណ៍យុត្តិធម៌ តម្លាភាព ទាន់ពេលវេលា និងរក្សាការសម្ងាត់ស្របតាមច្បាប់និងបទប្បញ្ញត្តិជាធរមាន។ ផ្នែកតាមព័ត៌មានដែលបានបញ្ជាក់ដោយគ្រឹះស្ថានពាក់ព័ន្ធ ករណីដែលត្រូវបានលើកយកមកបង្ហាញក្នុង វីដេអូទាំងនេះ ត្រូវបានសម្របសម្រួល ពិនិត្យ តាមដាន និងដោះស្រាយតាមនីតិវិធីជាធរមាន ដោយមានការព្រម ព្រៀងរវាងអតិថិជន និងគ្រឹះស្ថានពាក់ព័ន្ធផងដែរ។ កន្លងមក សមាគមទាំងពីរ ធ្លាប់បានអញ្ជើញអង្គការលីកាដូ ព្រម ទាំងអង្គការសង្គមស៊ីវិលផ្សេងៗទៀត មកចូលរួមកិច្ចសន្ទនាជាមួយភាគីពាក់ព័ន្ធ ជាពិសេសក្នុងកិច្ចសន្ទនាកម្រិត ខ្ពស់រវាងពហុភាគីពាក់ព័ន្ធស្តីពី «មីក្រូហិរញ្ញវត្ថុនៅកម្ពុជា» ដើម្បីស្វែងរកដំណោះស្រាយ និងការពារផលប្រយោជន៍ ជូនប្រជាជន ប៉ុន្តែអង្គការលីកាដូពុំបានចូលរួមឡើយ ហើយនៅតែបន្តផ្សព្វផ្សាយវីដេអូឯកសារជាបន្តបន្ទាប់ ក្នុង ចេតនាបម្រើផលប្រយោជន៍អង្គការ និងពុំបានចូលរួមដោះស្រាយបញ្ហាជូនប្រជាពលរដ្ឋដែលពាក់ព័ន្ធ។ គួរបញ្ជាក់ជូនថា ក្នុងកិច្ចសន្ទនាកម្រិតខ្ពស់រវាងពហុភាគីពាក់ព័ន្ធស្តីពី «មីក្រូហិរញ្ញវត្ថុនៅកម្ពុជា» បានដាក់ចេញនូវសកម្មភាព អាទិភាពចំនួន ២២ សម្រាប់ភាគីពាក់ព័ន្ធរួមទាំងស្ថាប័នរាជរដ្ឋាភិបាល វិស័យឯកជន និងអង្គការសង្គមស៊ីវិល ដើម្បីអនុវត្ត ជាពិសេសទៅលើកិច្ចការពារអតិថិជន។ ក្នុងចំណោមសកម្មភាពអាទិភាពនោះ ភាគីពាក់ព័ន្ធបានអនុវត្តបញ្ចប់ចំនួន ១៤សកម្មភាពអាទិភាព និង៨សកម្មភាពអាទិភាពកំពុងអនុវត្តបន្ត។ សមាគមទាំងពីរ បន្តប្តេជ្ញាចិត្តអនុវត្តស្របតាមច្បាប់ និងបទប្បញ្ញត្តិជាធរមាន ព្រមទាំងសហការជាមួយភាគី ពាក់ព័ន្ធ ដើម្បីពង្រឹងការផ្តល់សេវាហិរញ្ញវត្ថុប្រកបដោយការទទួលខុសត្រូវ កិច្ចការពារអតិថិជន ការដោះស្រាយ បណ្ដឹង និងការអប់រំផ្នែកហិរញ្ញវត្ថុ។ សមាគមទាំងពីរ នៅតែបន្តកិច្ចសន្ទនាប្រកបដោយការស្ថាបនា ជាមួយភាគីពាក់ ព័ន្ធទាំងអស់ ដើម្បីសម្រេចបានដំណោះស្រាយជាក់ស្តែង កិច្ចការពារអតិថិជន និងពង្រឹងទំនុកចិត្តសាធារណជន មក លើប្រព័ន្ធធនាគារ៕ អត្ថបទ៖ ធូ វិរៈ 

គិតត្រឹមខែឧសភាឆ្នាំនេះ CGCC បានធានាឥណទានមានទំហំជាង ៥៧៥លានដុល្លារ គាំទ្រ​ដល់​អាជីវកម្ម និងពាណិជ្ជកម្ម

2026/08/06 02:35:43 pm        222
Facebook Telegram Linkin
សាជីវកម្មធានាឥណទានកម្ពុជា (CGCC) គិតត្រឹមខែឧសភា ឆ្នាំ២០២៦នេះ បានធានា​ឥណទាន​​មាន​ទំហំទឹកប្រាក់សរុបជាង ៥៧៥ លានដុល្លារអាមេរិក នៃកម្ចី​របស់​សហគ្រាស​ក្នុង​ស្រុក ពីគ្រឹះស្ថានធនាគារនិងហិរញ្ញវត្ថុ ដើម្បីគាំទ្រដល់ការធ្វើអាជីវកម្ម និង ពាណិជ្ជកម្ម។  លោក ណូ លីដា អគ្គនាយកសាជីវកម្មធានាឥណទានកម្ពុជា (CGCC) លើកឡើងក្នុងកិច្ចពិភាក្សា ស្តីពីអត្ថប្រយោជន៍ និង ឱកាសនៃការទទួលបានការគាំទ្រហិរញប្បទានសម្រាប់ធុរកិច្ច នៅក្នុងវេទិកាថ្នាក់ជាតិស្ដីពីហិរញ្ញប្បទានសម្រាប់ធុរកិច្ចឆ្នាំ២០២៦ថា CGCC គឺជាស្ថាប័នគាំទ្រលើការធានាឥណទានរបស់រាជរដ្ឋាភិបាល ពោលគឺ ការធានាលើប្រាក់កម្ចីដែលធនាគារផ្តល់ឱ្យម្ចាស់ អាជីវកម្ម ដោយ CGCC ធានាទៅលើហានីភ័យឥណទាន ក្នុងនោះប្រសិនបើ CGCC ធានាលើកម្ចីណាមួយ ហើយកម្ចីនោះត្រូវខូច ខាត (អ្នកខ្ចីអត់មានលទ្ធភាពសងត្រឡប់មកធនាគារ) ធនាគារដែលជាដៃគូអាចមកទារសំណងពី CGCC ដោយផ្ទាល់។ លោក បន្តថា តាមរយៈនៃការធានាឥណទារបស់ CGCC នេះ គឹបានបង្កើតទំនុកចិត្តដល់ធនាគារ ក្នុងការផ្តល់ឥណទានទៅ ម្ចាស់អាជីវកម្ម ដែលតាមរយៈនេះ គឺការចូលរួមបង្កើនលទ្ធភាពនៃការផ្តល់ឥណទាន ដោយបញ្ចេញឥណទានច្រើនជាងមុន និងម្ខាង ទៀតគឺគាំទ្រដល់ម្ចាស់អាជីវកម្មក្នុងការទទួលបានឥណទានសម្រាប់ពង្រីកអាជីវកម្ម ជាក់ស្តែងតាមរយៈនៃការទទួលបានឥណទាន នេះ បានកាត់បន្ថយនូវលក្ខខណ្ឌតម្រូវជាច្រើន ធ្វើឱ្យម្ចាស់អាជីវកម្មទទួលបានឥណទានងាយជាងមុនផងដែរ។ លោក ណូ លីដា បន្តឱ្យដឹងថា ជុំវិញការធានាឥណទាននេះ CGCC មានផែនការធានាឥណទានក្នុងមួយឆ្នាំឱ្យបានជាង ២០០ លានដុល្លារអាមេរិក ជាក់ស្តែងគិតត្រឹមរយៈពេល ៧ ខែ ឆ្នាំ២០២៦នេះ សាជីវកម្មធានាឥណទានកម្ពុជា បានអនុវត្តជិត ៥០ ភាគរយរួចចហើយ ក្នុងនោះបើគិតសរុបទំហំឥណទានដែលសាជីវកម្មធានាឥណទានកម្ពុជាបានធានា ត្រឹមខែឧសភា ឆ្នាំ២០២៦ នេះ, មានចំនួនប្រមាណជាង ៥៧៥ លានដុល្លារអាមេរិក ដែលថវិកាទាំងនេះត្រូវបានចាក់បញ្ជូលទៅក្នុងទុនបង្វឹលរបស់ម្ចាស់ អាជីវកម្មជិត ១ ម៉ឺនក្រុមហ៊ុន/សហគ្រាស។ តាមរយៈនៃវេទិកានេះដែរ, លោក ណូ លីដា ក៏បានអំពាវនាវដល់ម្ចាស់អាជីវកម្មរួមមាន សហគ្រាសមីក្រូ តូច មធ្យម និងធំ ដែលគិតថាសហគ្រាសរបស់ខ្លួនមានសក្តានុពល និងមិនទាន់ទទួលបានព័ត៌មានលើការធានាឥណទាន សូមទាក់ទងទៅកាន់ សាជីវកម្មធានាឥណទានកម្ពុជា (CGCC) ដើម្បីទទួលបានការពិគ្រោះយោបល់ និងណែនាំធនាគាដែលជាដៃគូ ក្នុងការទទួលបាន ឥណទានសម្រាប់ការស្តារអាជីវកម្ម ក៏ដូចជាពង្រឹងអាជីវកម្មឱ្យរីកចម្រើន ព្រោះ CGCC ធានានូវគ្រប់ប្រភេទឥណទានទាំងអស់ ដូចជា ឥណទានសម្រាប់ទុនបង្វឹង និងឥណទានសម្រាប់ការវិនិយោគរយៈពេលខ្លី និងវែងជាដើម៕ អត្ថបទ៖ សុន រ៉ាឌី​

វិស័យឯកជន៖ ការវិនិយោគលើកម្លាំងពលកម្មជំនាញ កាន់តែទាក់ទាញវិនិយោគិន​ឱ្យមក​បណ្តាក់ទុន​នៅកម្ពុជា

2026/08/05 03:05:01 pm        315
Facebook Telegram Linkin
ភ្នំពេញ៖ ក្រុមហ៊ុនឯកជនក្នុងវិស័យយានយន្តនៅកម្ពុជា បានលើកឡើងថា ជាការកត់សម្គាល់ទៅលើការវិនិយោគកម្លាំងពលកម្មជំនាញរបស់រាជរដ្ឋាភិបាល ជាពិសេសតាមរយៈកម្មវិធីបណ្តុះបណ្តាលបច្ចេកទេស និងវិជ្ជាជីវៈ (TVET) គឺជាកត្តាស្នូលក្នុងការកសាងទំនុកចិត្ត និងទាក់ទាញវិនិយោគិនបរទេសមកបណ្តាក់ទុនលើឧស្សាហកម្មបច្ចេកវិទ្យា និងទំនើបកម្មនៅកម្ពុជា។ ក្នុងបទសម្ភាសន៍ជាមួយ លោក សាយ រតនៈ ប្រធាននាយកដ្ឋានបណ្តុះបណ្តាលធនធានមនុស្ស តំណាងក្រុមហ៊ុន អ អឹម អេ (ខេមបូឌា) នាព្រឹកថ្ងៃទី៥ ខែសីហានេះ លោកបានឱ្យព័ត៍មាន ប៊ីធីវី ដឹងថា រហូតមកដល់បច្ចុប្បន្ននេះ ពិតជាមានមោទនភាពដែលក្រុមហ៊ុនបានពាំនាំនូវការវិនិយោគមួយដ៏ធំ ជាពិសេសការបើករោងចក្រដំឡើងនិងផលិតរថយន្តនៅកម្ពុជា។ លោកបានបន្តថា សម្រាប់ក្រុមហ៊ុនក៏រីករាយសហការជាមួយរាជរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការក្នុងការបណ្តុះបណ្តាលធនធានមនុស្សដើម្បីឆ្លើយតបតម្រូវការលើវិស័យយានយន្តនេះ។ លោកបានឱ្យដឹងទៀតថា ជាមហិច្ឆតារបស់ក្រុមហ៊ុន ក៏ដូចជាមហិច្ឆតារបស់រាជរដ្ឋាភិបាល គឺចង់ឱ្យ កម្ពុជាក្លាយជាប្រទេសផលិតរថយន្ត ពោលមិនមែនផលិតតែក្នុងស្រុកទេ គឺអាចនាំចេញទៅក្រៅថែមទៀត ហើយក្រុមហ៊ុនក៏គ្រោងនឹងផលិតគ្រឿងបន្លាស់មួយចំនួនទៀត ដូច្នេះតម្រូវការកម្លាំងពលកម្មជំនាញក៏កាន់តែមានខ្ពស់ដែរដើម្បីឆ្លើយតបទៅនឹងត​ម្រូវការផលិត និងបំពេញចំណុចខ្វះខាតនៅក្នុងវិស័យឧស្សាហកម្មនានា ជាពិសេសវិស័យយានយន្តនេះតែម្តង។ លោកបន្តថា ក្នុងរយៈពេល ៥ឆ្នាំចុងក្រោយនេះ បាន​មើលឃើញថា ក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាវិស័យបណ្តុះបណ្តាលជំនាញបច្ចេកទេស និងវិជ្ជាជីវៈ (ធីវ៉េត) ទាំងមូល គឺបានចូលរួមយ៉ាងសកម្មជាមួយឧស្សាហកម្ម​យានយន្តនៅកម្ពុជាតែម្តង។ អញ្ចឹងសង្ឃឹមថា ប្រទេសកម្ពុជាមិនមែនត្រឹមតែផលិតតែរថយន្តទេ គឺអាចផលិតជាគ្រឿងបន្លាស់ផ្សេងៗទៀត ដែលបង្កើតឱកាសការងារជាច្រើនដល់ប្រជាពលរដ្ឋក្នុងស្រុកុ។ លោក សាយ រតនៈ បានបញ្ជាក់ថា ទាក់ទិនកម្លាំងពលកម្មជំនាញនេះដែរ បើសិនជាកម្ពុជាមានធនធានច្រើន ទី១.អាចជំរុញឱ្យកម្ពុជា ជាកន្លែងទាក់ទាញវិនិយោគធំៗ ទី២.ប្រជាពលរដ្ឋដែលមានជំនាញច្បាស់លាស់មួយក្នុងជីវិត គឺអាចងាយស្រួលរកប្រាក់ចំណូលបានខ្ពស់ចិញ្ចឹមជីវិតបានយ៉ាងល្អ។ ដោយឡែក វិស័យឯកជនក៏សប្បាយចិត្ត ដោយសារមានធនធានល្អៗវិនិយោគលើធនធានមនុស្ស។ និយាយជារួម ភាគីដែលទទួលផលចំណេញចុងក្រោយគេ គឺប្រទេសកម្ពុជាទំាងមូលតែម្តង ដែលធ្វើឱ្យសេដ្ឋកិច្ចជាតិឈានទៅរកភាពរីកចម្រើន។ នេះតាមការបញ្ជាក់បន្ថែមរបស់លោក រតនៈ។ ជាមួយនេះ លោកបានអំពាវនាវដល់យុវជន ឱ្យងាកចាប់យកជំនាញមួយច្បាស់លាស់ ពិសេសចូលរៀនជំនាញវិស័យបច្ចេកទេស និងវិជ្ជាជីវៈ ដែលរៀនរយៈពេលខ្លី ងាយស្រួលស្វែងរកការងារ និងមានចំណូលបានច្រើន។ និងបានអំពាវនាវបន្ថែមទៀតទៅដល់អាណាព្យបាលទាំងអស់ ជំរុញកូនចៅចាប់យកជំនាញបច្ចេកទេស និងវិជ្ជាជីវៈ។ លោកបានបញ្ជាក់ដដែលទៀតថា មានតែវិស័យបច្ចេកទេស និងវិជ្ជាជីវៈ ដែលជាច្រកដ៏សំខាន់ក្នុងការជំរុញឱ្យការរៀនត្រឹមរយៈពេលខ្លី តែអាចរកចំណូលបានលឿន និងច្រើនទៅតាមសមត្ថភាពជាក់ស្តែង ខណៈរាជរដ្ឋាភិបាលក៏បានខិតខំប្រឹងប្រែងណាស់ និងគ្រប់សកម្មភាពដើម្បីទាក់ទាញអ្នកវិនិយោគិនពីបរទេស និងស្វែងរកទីផ្សារពាណិជ្ជកម្មអន្តរជាតិមកបណ្តាក់ទុនរកស៊ីនៅកម្ពុជា ក្នុងគោលបំណងជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋ។ យោងតាមក្រសួងការងារ និងបណ្តុះបណ្តាលវិជ្ជាជីវៈ គិតក្នុងរយៈពេលឆមាសទី១ ឆ្នាំ២០២៦នេះរោងចក្រ សហគ្រាសនៅកម្ពុជា បានកើនឡើងចំនួនជាង ៨០០រោងចក្រ សហគ្រាស និងបានបង្កើតឱកាសការងារជាង ៩ម៉ឺនកន្លែង ជូនដល់ប្រជាពលរដ្ឋ ដែលភាគច្រើននៅក្នុងវិស័យឧស្សាហកម្ម ក្នុងនោះរោងចក្រក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប៕

ប្រធាន IDI៖ កម្ពុជានឹងបន្តស្រូបយកការវិនិយោគបន្ថែម ខណៈក្រុមហ៊ុនជាច្រើន​កំពុង​ចាប់​អារម្មណ៍​ការធ្វើធុរកិច្ចនៅកម្ពុជា

2026/08/05 11:00:48 am        359
Facebook Telegram Linkin
ប្រធានក្រុមប្រឹក្សាភិបាលសមាគម (IDI) រំពឹងថាកម្ពុជា​នឹង​បន្ត​ស្រូប​យក​វិនិយោគិន​បរទេស​មក​បណ្តាក់​ទុន​បន្ថែមទៀត ជាពិសេស លើឧស្សាហកម្មធុនកណ្តាល និងធុនធ្ងន់ និងត្រូវការ​កម្លាំង​ពលកម្ម​ច្រើន ខណៈក្រុមហ៊ុនមេមួយដែលមានបុត្រសម្ព័ន្ធជាង ១ ៨០០ សហគ្រាស បានកំពុង​សម្លឹង​មើល​ឱកាសវិនិយោគនៅកម្ពុជា។ ឧកញ៉ាបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគមវិនិយោគ នវានុវត្តន៍ និង​អភិវឌ្ឍន៍​ (IDI) លើកឡើងក្នុង កិច្ចសម្ភាសន៍ជាមួយ BTV ស្តីអំពីបរិយាកាសវិនិយោគ និងការ​ធ្វើ​ធុរកិច្ច​ផ្សេង​ៗនៅកម្ពុជាថា ជុំវិញបរិយាកាសវិនិយោគ, រាជរដ្ឋាភិបាល កម្ពុជាបានដា​ក់​ចេញ​នូវ​ច្បាប់​ស្តីពី​វិនិយោគថ្មី និងអនុក្រឹត្យពាក់ព័ន្ធដែលសម្របសម្រួលដោយ ក្រុមប្រឹក្សាអភិវឌ្ឍន៍កម្ពុជា (CDC) តាមរយៈយន្តការលើកទឹកចិត្តផ្នែកសារពើពន្ធ ការលើកលែងពន្ធលើប្រាក់ចំណូល និង​ការ​លើក​លែងពន្ធនាំចូលលើធាតុចូលផលិតកម្ម រួមជាមួយការប្រើប្រាស់យន្តការច្រកចេញ-ចូល​តែ​មួយ ដើម្បីទាក់ទាញ និងជំរុញវឌ្ឍនភាពធុរកិច្ចជាដើម។ ឧកញ៉ាបណ្ឌិត បន្តថា តាមរយៈឱកាសវិនិយោគនេះដែរ សមាគម IDI ក្នុងនាមជាវិស័យឯកជន បានកំពុងយកចិត្តទុកដាក់ រួមចំណែកជាមួយរាជរដ្ឋាភិបាល ដោយបានសហការជាមួយក្រុមហ៊ុន ញូវតាចេន ដែលក្រុមហ៊ុនមួយនោះមានបុត្រសម្ព័ន្ធជាង ១ ៨០០ សហគ្រាស ទាំងនៅក្នុងប្រទេសចិន និងក្រៅប្រទេសផងដែរ។ តាមរយៈនេះ ក្រុមហ៊ុន ញូវតាចេន គឺជាស្ពានផ្សារភ្ជាប់ទៅដល់ សហគ្រាសទាំងនោះយ៉ាងសំខាន់ ក្នុងការអូសទាញមកវវិនិយោគនៅកម្ពុជា។ ឧកញ៉ាបណ្ឌិត បន្តឱ្យដឹងថា ក្រុមហ៊ុន ញូវតាចេន បាន ចុះមកសិក្សានៅកម្ពុជា ពីឱកាសវវិនិយោគច្រើនលើករួចមកហើយ នឹងបានឱ្យតម្លៃខ្ពស់អំពីសក្តានុពលវវិនិយោគនៅកម្ពុជាផងដែរ ហើយតាមរយៈនេះ ឧកញ៉ាបណ្ឌិត រំពឹងថា កម្ពុជានឹងស្រូបយកឱកាសវិនិយោគបន្ថែមទៀត ជាពិសេសលើឧស្សាហកម្មកណ្តាលធុន ធ្ងន់ និងធុនធ្ងន់ផ្សេងៗទៀត ដើម្បីឱ្យកម្ពុជាឈានទៅប្រកួតប្រជែងខ្សែច្រវាក់ផលិតកម្មសកល។  ទាក់ទិនកាវិនិយោគ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លើកឡើងក្នុងវេទិកាថ្នាក់ជាតិស្ដីពីហិរញ្ញប្បទានសម្រាប់ធុរកិច្ចឆ្នាំ២០២៦ ថា រាជរដ្ឋាភិបាលបានដាក់ចេញ និងកំពុងជំរុញអនុវត្តនូវ កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ចក្នុងបរិការណ៍សកល ដែល មានមិនប្រាកដប្រជាខ្ពស់ ដើម្បីគាំពារកំណើនសេដ្ឋកិច្ច ជាពិសេសក្នុងវិស័យដែលរំពឹងទុកនឹងមានកំណើនយឺត លើកកម្ពស់ភាពប្រ កួតប្រជែងបង្កើនពិពិធកម្ម និងការសម្របខ្លួនទៅនិងការប្រែប្រួលនៃរបរពាណិជ្ជកម្មអន្តរជាតិ។ ជុំវិញការវិនិយោគនេះ, នៅក្នុងឆមាសទី១​ ឆ្នាំ២០២៦ បើតាមរបាយការណ៍ក្រុមប្រឹក្សាអភិវឌ្ឍន៍កម្ពុជា អនុម័តគម្រោងវិនិយោគបាន ចំនួន ២៧៦ គម្រោង មានទំហំទុនវិនិយោគប្រមាណ ៤,៤ ពាន់លានដុល្លារអាមេរិក បើធៀបរយៈពេលដូចគ្នានិងឆ្នាំ២០២៥ មាន ការថមថយ គឺដោយបញ្ហាប្រឈមទាំងខាងក្នុងនិងខាងក្រៅ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ឯកឧត្តម ប៉ែន បូណា៖ ពួកយើងត្រូវដើរតួជាមគ្គុទេសក៍(Guide) ដ៏ពូកែដើម្បីបង្ហាញសមិទ្ធផលរបស់រាជរដ្ឋាភិបាលឱ្យដិតក្នុងអារម្មណ៍ប្រជាពលរដ្ឋជានិច្ច
09/03/2026 05:09 PM
Facebook Telegram Linkin
គយឃាត់ខ្លួនបុរសម៉ាឡេស៊ីម្នាក់រកឃើញហេរ៉ូអ៊ីន ៨១ កញ្ចប់ ពេលត្រៀមចាកចេញពីកម្ពុជាទៅកោះតៃវ៉ាន់
09/03/2026 04:09 PM
Facebook Telegram Linkin
ក្រសួងសុខាភិបាល បើកសិក្ខាសាលាស្តីពី លទ្ធផលវាយតម្លៃប្រព័ន្ធរាយការណ៍ការចម្លងរោគ ក្នុងមូលដ្ឋានព្យាបាល និងថែទាំសុខភាព
09/03/2026 04:09 PM
Facebook Telegram Linkin
រដ្ឋមន្ត្រីមកពីបណ្តាក្រុមប្រទេសអភិវឌ្ឍន៍តិចតួច (LDC) បានឯកភាពលើជំហររួមគ្នា ដើម្បីចូលរួមសន្និសិទសហប្រជាតិស្តីពីការប្រែប្រួលអាកាសធាតុ CoP31
09/03/2026 04:09 PM
Facebook Telegram Linkin
អនុប្រធានទី១ CDC បង្ហាញពីការប្តេជ្ញារបស់កម្ពុជា លើការបោសសម្អាត Online Scams ដល់ធុរកិច្ចចិន
09/03/2026 04:09 PM
Facebook Telegram Linkin
មន្ត្រីប៉ូឡូញ៖ NATO គ្មានផែនការដាក់ពង្រាយអាវុធនុយក្លេអ៊ែរទៅប្រទេសបន្ថែមទៀត
09/03/2026 04:09 PM
Facebook Telegram Linkin
សាលារៀន និងផ្លូវនាវា ត្រូវបានផ្អាក ខណៈព្យុះទីហ្វុង Saudel បោកបក់លើប្រទេសចិនភាគខាងកើត
09/03/2026 04:09 PM
Facebook Telegram Linkin
WSJ៖ កិច្ចព្រមព្រៀងអាមេរិក-អារ៉ាប៊ីសាអ៊ូឌីត អនុញ្ញាតឲ្យចម្រាញ់សារធាតុអ៊ុយរ៉ានីញ៉ូមបានដល់ ២០%
09/03/2026 04:09 PM
Facebook Telegram Linkin
របាយការណ៍៖ ការ​កែ​​សម្រួល​ក្នុង​បក្ស​កាន់អំណាច​ ​ជួយ​ពង្រឹង​​ការ​គ្រប់គ្រង​របស់មេដឹកនាំ​កូរ៉េខាង​ជើង​
09/03/2026 04:09 PM
Facebook Telegram Linkin
ចិនបញ្ជាក់​ថា ខ្លួនបាន​អនុវត្ត​ការសិក្សា​ស្ទង់ដែនទឹក នៅភាគខាងកើតកោះតៃវ៉ាន់ កាលពីខែសីហា
09/03/2026 04:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.