នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាស្វែងយល់ពីបច្ចេកវិទ្យានវានុវត្តន៍ និងផ្លាស់ប្តូរ​ទស្សនៈ​ជាមួយ​ដៃ​គូ​អន្តរជាតិ​នៅ​ទីក្រុង​សៀមិន
កម្ពុជាដាក់ចេញវិធានការបន្ទាន់ ដើម្បីទប់ការកើនឡើងនៃសម្ពាធអតិផរណា រក្សាស្ថិរភាព​ម៉ាក្រូ​សេដ្ឋកិច្ច​ជាតិ
រាជរដ្ឋាភិបាលនឹងទម្លាក់កញ្ចប់ថវិកា ៥៣ លានដុល្លារ សម្រាប់បន្តអភិវឌ្ឍន៍ជំនាញគាំទ្រ MSMEs
ប្រព័ន្ធធារាសាស្ត្រក្នុងស្រុកបរិបូណ៌ ខេត្តកំពង់ឆ្នាំង អាចស្រោច​ស្រព​ផ្ទៃដីស្រែ​វស្សា​បាន​ជាង ១ម៉ឺន​៧ពាន់ហិកតា

សេដ្ឋកិច្ច និង កសិកម្ម

វិស័យឯកជនស្វែងយល់និតិវិធីសំណើរសុំនាំចូលដោយពន្ធនាំចូលជាបន្ទុករបស់រដ្ឋតាមប្រព័ន្ធអនឡាញបញ្ជរតែមួយជាតិ

2025/05/13 06:33:06 pm        876
Facebook Telegram Linkin
តំណាងក្រុមហ៊ុន រោងចក្រ សហគ្រាសចំនួនប្រមាណ១៦០នាក់ ក្នុងនោះមួយចំនួនបានចូលរួមដោយផ្ទាល់ និងមួយចំនួនផ្សេងទៀតតាមប្រព័ន្ធអនឡាញ ដើម្បីស្វែងយល់អំពីនិតិវិធីនៃសំណើរសុំនាំចូលដោយពន្ធនាំចូលជាបន្ទុករបស់រដ្ឋ តាមប្រព័ន្ធអនឡាញបញ្ជរតែមួយជាតិ ដើម្បីឱ្យការអនុវត្តមានភាពច្បាស់លាស់ និងត្រឹមត្រូវ។ឧកញ៉ា លឹម តុង ប្រធានសមាគមផលិតផលធ្វើដំណើរ និងស្បែកនៅកម្ពុជា នៅក្រោយសិក្ខាសាលាស្តីពី និតិវិធីនៃសំណើរសុំនាំចូលដោយពន្ធនាំចូលជាបន្ទុករបស់រដ្ឋ តាមប្រព័ន្ធអនឡាញបញ្ជរតែមួយជាតិ កាលពីរសៀលថ្ងៃទី១២ ខែឧសភា ឆ្នាំ២០២៥ បានមានប្រសាសន៍ឱ្យដឹងថា សិក្ខាសាលានេះ រៀបចំឡើងដោយសមាគមស្បែកជើងកម្ពុជា និងសមាគមផលិតផលធ្វើដំណើរនិងស្បែកនៅកម្ពុជា ដោយបានសហការជាមួយក្រុមប្រឹក្សាអភិវឌ្ឍន៍កម្ពុជា (CDC) និងអគ្គនាយកដ្ឋានគយ និងរដ្ឋាករកម្ពុជា ក្នុងគោលបំណងដើម្បីបញ្ជ្រៀបការយល់ដឹង ក៏ដូចជាផ្តល់ជូននូវព័ត៌មានថ្មីៗ ខណៈសមាជិកនៃសមាគមមួយចំនួននៅមិនទាន់បានយល់ជ្រាបច្បាស់នៅឡើយ ពាក់ព័ន្ធនីតិវិធីនៃសំណើរសុំនាំចូលដោយពន្ធនាំចូលជាបន្ទុករបស់រដ្ឋតាមប្រព័ន្ធអនឡាញបញ្ជរតែមួយជាតិ និងដើម្បីឱ្យការអនុវត្តមានភាពច្បាស់លាស់ និងខ្ជាប់ខ្ជួនពាក់ព័ន្ធនិងច្បាប់លិខិតបទដ្ឋានគតិយុត្ត ដែលរាជរដ្ឋាភិបាលដាក់ចេញកន្លងមក។ ជាពិសេស ខណៈសហរដ្ឋអាម៉េរិកបានប្រកាសអំពីពន្ធនាំចូលមានភាពមិនទាន់ប្រាកដប្រជា ដែលធ្វើឲ្យវិស័យឯកជនមួយចំនួនមានភាពរំជើបរំជួលខ្លះ។បើតាម ឯកឧត្តម យុន ហេង អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ប្រព័ន្ធបញ្ជរតែមួយជាតិ ត្រូវបានអភិវឌ្ឍឡើងសម្រាប់ផ្ដល់សេវាតាមទម្រង់អេឡិចត្រូនិក ដើម្បីជួយសម្រួលដល់ការបំពេញនីតិវិធីនាំចេញ-នាំចូលទំនិញកាន់តែរហ័ស និងមានតម្លាភាព កាត់បន្ថយការចំណាយ ផ្តល់ភាពស៊ីចង្វាក់គ្នា និងភាពប្រាកដប្រជាដល់កិច្ចដំណើរការពីការចាប់ផ្តើមនីតិវិធីដែលតម្រូវរហូតដល់ការបំពេញបែបបទបញ្ចេញទំនិញពីគយ។ឯកឧត្តម បានបញ្ជាក់បន្ថែមថា ប្រព័ន្ធបញ្ជរតែមួយជាតិនេះ នឹងអនុញ្ញាតឱ្យអ្នកនាំចេញ-នាំចូលទំនិញ អាចដាក់ស្នើសុំអាជ្ញាបណ្ណ លិខិតអនុញ្ញាត វិញ្ញាបនបត្រ និងឯកសារតម្រូវផ្សេងទៀត ពាក់ព័ន្ធនឹងការនាំចេញ-នាំចូលទំនិញ ទៅគ្រប់ក្រសួង-ស្ថាប័នមានសមត្ថកិច្ចតែមួយលើករួមគ្នា ដើម្បីទទួលបាននូវការអនុញ្ញាត សម្រាប់យកទៅប្រើប្រាស់ក្នុងការបំពេញបែបបទបញ្ចេញទំនិញពីគយ តាមមធ្យោបាយអេឡិចត្រូនិក៕ អត្ថបទ ឈិត បូរ៉ាវី 

គណៈកម្មាធិការវិនិយោគពិនិត្យសំណើសុំចុះបញ្ជីថ្មីចំនួន១២គម្រោង មានទុនវិនិយោគ ៣១៨ លានដុល្លារ

2025/05/12 10:33:53 pm        405
Facebook Telegram Linkin
គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ពិនិត្យពិភាក្សា លើសំណើសុំចុះបញ្ជីគម្រោងវិនិយោគមានលក្ខណៈ សម្បត្តិគ្រប់គ្រាន់ចំនួន ១២ និងគម្រោងពង្រីកបន្ថែមចំនួន ១ គម្រោង មានទុនវិនិយោគសរុបប្រមាណ ៣១៨ លានដុល្លារអាមេរិក ។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅថ្ងៃទី១២ ខែឧសភា ឆ្នាំ២០២៥នេះ បានដឹកនាំកិច្ចប្រជុំ ច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ១២ គម្រោង និងគម្រោងពង្រីកបន្ថែម ទីតាំងវិនិយោគថ្មីចំនួន ១ គម្រោង (គម្រោងអាជីវកម្មរ៉ែដែក នៅខេត្តកំពត) គម្រោងវិនិយោគទាំងនេះ មានទុនវិនិយោគសរុបប្រមាណ ៣១៨ លានដុល្លារអាម៉េរិក អាចបង្កើតការងារបានប្រមាណ ៧,៣ ពាន់កន្លែង។គម្រោងវិនិយោគសំខាន់ៗរួមមាន៖ វិស័យឧស្សាហកម្មចំនួន ១១ គម្រោង (ផលិតឧបករណ៍ហ្គេម, ផលិតសម្ភារៈពីប្លាស្ទិក និងលោហធាតុ, សម្ភារៈសម្រាប់សម្អាត និងសម្ភារៈប្រើប្រាស់ក្នុងផ្ទះបាយ, ផលិតសម្ភារៈជាង សម្ភារៈផ្ទះបាយនិងគ្រឿងបន្ទាប់បន្សំ (ពីលោហៈ), ផលិតសម្ភារៈប្រើប្រាស់ក្នុងផ្ទះ និងបរិក្ខារអនាម័យគ្រប់ប្រភេទ, ផ្គុំដំទ្បើងសម្ភារៈលម្អក្នុងផ្ទះ គ្រឿងអគ្គិសនី និងគ្រឿង បន្ទាប់បន្សំគ្រប់ប្រភេទ, ផលិត និងដំទ្បើងសម្ភារៈអគ្គិសនីប្រើប្រាស់ក្នុងផ្ទះ និងឧបករណ៍កម្ចាត់សត្វល្អិត (ពីប្លាស្ទិក), ខារ និង ជ្រលក់ពណ៌អំបោះ, ផលិតសម្ភារៈសម្រាប់បន្ទប់ទឹកនិងផ្ទះបាយ (ធ្វើពីប្លាស្ទិក), ផលិតឧបករណ៍ចម្អិនអាហារនិងកម្តៅអគ្គិសនី, ផលិតអំពូលភ្លើងគ្រប់ប្រភេទ, និងផ្គុំដំទ្បើងឧបករណ៍កម្តៅទឹកគ្រប់ប្រភេទ) និងវិស័យហេដ្ឋារចនាសម្ព័ន្ធចំនួន ១ គម្រោង (អភិវឌ្ឍន៍ ស្ថានីយផលិតអគ្គិសនីដើរដោយថាមពលខ្យល់អនុភាព១៥០មេហ្កាវ៉ាត់)។សូមបញ្ជាក់ថា ទាក់ទិនគម្រោងខាងលើនេះ ក្រុមហ៊ុនបានជ្រើសរើសយកទីតាំងវិនិយោគ នៅតំបន់ផ្សេងៗគ្នារួមមាន៖ ខេត្តកណ្តាល ខេត្តកំពង់ស្ពឺ ខេត្តតាកែវ ខេត្តកំពត និងខេត្តមណ្ឌលគិរី៕ អត្ថបទ៖ សុន រ៉ាឌី

រោងចក្រកែច្នៃគ្រាប់ស្វាយចន្ទីមួយបាននឹងកំពុងស្រូបទាញកសិផលក្នុងស្រុកឱ្យកែច្នៃបម្រើទីផ្សារនាំចេញ

2025/05/12 07:40:26 pm        339
Facebook Telegram Linkin
រោងចក្រកែច្នៃគ្រាប់ស្វាយចន្ទីមួយ នៅខេត្តកំពង់ធំ បានកំពុង​ស្រូប​យក​គ្រាប់​ស្វាយ​ចន្ទី​ស្រស់​ក្នុង​ស្រុកប្រមាណ ៦តោន ក្នុង១ថ្ងៃៗ សម្រាប់ការកែច្នៃ ហើយក្រុមហ៊ុន​មួយ​នេះ​មាន​មហិច្ឆិតា​ពង្រីក​សមត្ថភាព​កែច្នៃប​ន្ថែមទៀត ឱ្យបានជាង ២ ម៉ឺនតោន ក្នុង១ឆ្នាំ សម្រាប់ បម្រើទីផ្សារនាំចេញ។លោក Ryohei Takesawa អ្នកទទួលបន្ទុកគ្រប់គ្រងរោងចក្រកែច្នៃគ្រាប់ស្វាយចន្ទីក្រុមហ៊ុន MIRARTH Agritech ស្ថិតនៅ ឃុំជ័យ ស្រុកកំពង់ស្វាយ ខេត្តកំពង់ធំ នៅក្នុង​ដំណើរ​ទស្សន​កិច្ច​ដែល​ដឹក​នាំដោយ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តី​ទទួល​បន្ទុក​ទីស្តី​ការ​គណៈ​រដ្ឋ​មន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋាន ខេត្តកំពង់ធំ នៅថ្ងៃទី ១០ ខែ ឧសភា ឆ្នាំ ២០២៥ នេះ លោកបាន​ជម្រាប​ជូន​អំពី​ដំណើរ​អំពី​ខ្សែច្រ​វាក់​នៃកា​រ​កែ​ច្នៃ​គ្រប់​ស្វាយ​ចន្ទី និង​បច្ចេកទេសមួយចំនួន, បច្ចុប្បន្នក្រុមហ៊ុនបាន ទទួលទិញ​គ្រាប់​ស្វាយ​ចន្ទី​ស្រស់​ពី​សហគមន៍​មួយ​ចំនួនដូចជា៖ សហគមន៍សាលាវិស័យ សហគមន៍ឃុំក្រយា និងសហគមន៍សន្ទុក ព្រម ទាំងសហគមន៍ទំនើបចំនួន៣ផ្សេងទៀត ក្នុងខេត្តកំពង់ធំនេះផងដែរ។ លោកលើកឡើងឱ្យដឹងថា បច្ចុប្បន្ន​ក្រុម​ហ៊ុន​បាន​កំពុង​ធ្វើ​កា​រកែច្នៃ​គ្រាប់​ស្វាយ​ចន្ទី​ស្រស់​ក្នុង​១​ថ្ងៃ​ៗ​ បានចំនួន៦តោន (សមត្ថភាព ១០តោនគ្រាប់ស្រស់ក្នុង១ថ្ងៃ) សម្រាប់ធ្វើការ​នាំចេញ​ទៅ​ទីផ្សារ​​ប្រទេសជប៉ុន និងសហភាពអ៊ឺរ៉ុប, ចំណែកទៅពេលខាងមុខ  ក្រុមហ៊ុន គ្រោង​នឹង​ពង្រីក​សមត្ថ​ភាព​កែច្នៃគ្រាប់ស្វាយចន្ទីស្រស់ ឱ្យឡើងដល់ជាង ២ ម៉ឺនតោន ក្នុង១ឆ្នាំ។ ក្រៅពីនេះ ក្រុម​ហ៊ុន​ក៏​មានមហិច្ឆិតា លើគម្រោងផលិតប្រេងជីវឥន្ធនៈ ផលិតចេញពីសំបកគ្រាប់ស្វាយចន្ទី ដោយ​នាំយកនូវគ្រឿងសម្ភារៈបរិក្ខា និងបច្ចេកវិទ្យាទំនើបៗ ពីប្រទេសជប៉ុន នៅក្នុង​ដំណើរ​ការ​កែច្នែ​នោះ​ផង​ដែរ។ឯកឧត្តម វង្សី វិស្សុត បានសំដែងនូវក្តីសោមនស្សរីករាយ ដែលក្រុមហ៊ុន MIRARTH Agritech បាន​សម្រេចវិនិយោគលើការកែច្នៃ គ្រាប់ស្វាយចន្ទី ក្នុងខេត្តកំពង់ធំ ដែលជាខេត្ត​មួយ​មាន​ការ​ដាំដុះ​ដំណាំ​ស្វាយចន្ទីច្រើនជាងគេ ជាដំណាំដែលមានសក្តានុពលខ្ពស់ ដែល អាចធ្វើកែច្នៃ​បា​ន​នៅ​គ្រប់​ដំណាក់កាល នៃខ្សែច្រវាក់តម្លៃផលិតកម្មដូចជា៖ ការកែច្នៃសំបក​គ្រាប់​ស្វាយ​ចន្ទី​ធ្វើ​ជា​ជីវ​ឥន្ធនៈ​ គ្រឿងសំអាង ចំណែកដើមស្វាយចន្ទី ក៏អាចផលិតចេញជាថាមពលផ្សេងៗ ដើម្បី​បង្កើន​តម្លៃ​បន្ថែម និងភាគលាភជូនប្រជាជន និងសេដ្ឋកិច្ចជាតិ។ឯកឧត្តមឧបនាយករដ្ឋមន្រ្តីប្រចាំការ បានបង្ហាញនូវការគាំទ្រចំពោះក្រុមហ៊ុន MIRARTH Agritech ដែលមានគម្រោងធ្វើពិពិធ កម្មសកម្មភាពកែច្នៃស្វាយចន្ទី សំដៅផលិតនូវផលិតផលមានតម្លៃបន្ថែមកាន់តែខ្ពស់ និងមានប្រយោជន៍សម្រាប់សង្គម-សេដ្ឋកិច្ចកម្ពុជា ស្របតាមចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការប្រែក្លាយកម្ពុជាជាប្រទេសដែលនាំចេញគ្រាប់ ស្វាយចន្ទីច្រើនជាងគេលើពិភពលោក ឬអធិរាជស្វាយចន្ទី ហើយខេត្តកំពង់ធំអាចជាមជ្ឈមណ្ឌលនៃផលិតកម្ម និងការកែច្នៃគ្រាប់ស្វាយ ចន្ទីផងដែរ។ ឯកឧត្តមក៏បានលើកទឹកចិត្តដល់ក្រុមហ៊ុន ក្នុងការចុះកិច្ចសន្យាទទួលទិញគ្រាប់ស្វាយចន្ទីពីសហគមន៍ និងប្រជាកសិករ និងចូលរួមចំណែកជំរុញសន្ទុះនៃការរីកលូតលាស់ នៃវិស័យដំណាំស្វាយចន្ទីរបស់កម្ពុជា ការបង្កើតការងារ ពិសេសការនាំមកនូវចំណេះដឹង ជំនាញ បទពិសោធ និងបច្ចេកវិទ្យាចាំបាច់ ក្នុងការបង្កើនផលិតកម្មស្វាយចន្ទី ក៏ដូចជាការដាំដុះនៅកម្ពុជាជាដើម៕ អត្ថបទ៖ សុន រ៉ាឌី

ការដោះដូរពាណិជ្ជកម្មអន្តរជាតិរបស់កម្ពុជា មានទំហំទឹកប្រាក់កើនឡើងជាង ១៩,៥ ពាន់លានដុល្លារ

2025/05/12 07:22:46 pm        255
Facebook Telegram Linkin
ការដោះដូរពាណិជ្ជកម្មទៅកាន់ទីផ្សារអន្តរជាតិរបស់កម្ពុជា ក្នុងរយៈពេល ៤ ខែ ឆ្នាំ ២០២៥ មាន​ទំហំ​ទឹកប្រាក់សរុបកើនឡើងជាង ១៩,៥ ពាន់លានដុល្លារអាមេរិក បើធៀបនិងឆ្នំា២០២៤, ក្នុង​នោះការនាំចេញទំនិញរបស់កម្ពុជា មានទឹកប្រាក់ជាង ៩ ពាន់លានដុល្លារ ខណៈការនាំចូល ពី​បរទេស​មានចំនួន ១០ ពាន់លានដុល្លារ។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បាន​បង្ហាញ​ស្ថិតិ​ពាណិជ្ជ​កម្ម នៃការធ្វើពាណិជ្ជកម្មទៅកាន់ ទីផ្សារអន្តរជាតិរបស់កម្ពុជា ក្នុងនោះចាប់តាំងពីដើមឆ្នាំ ២០២៤ ឃើញថា ការដោះដូពាណិជ្ជកម្មជាអន្តរជាតិរបស់កម្ពុជា មានកំណើនកើន ឡើង​ជា​បន្ត​បន្ទាប់ ជាក់ស្តែងនៅរយៈពេល ៤ ខែ ក្នុងឆ្នាំ ២០២៥ នេះ, ការធ្វើ​ពាណិជ្ជ​កម្ម​ទំនិញ​ជាមួយ​ប្រទេស​ដៃគូរសំខាន់ៗចំនួន ២០ និងជាមួយបណ្តាប្រទេសដៃគូផ្សេងៗទៀតរបស់កម្ពុជា គិត​ជា​ទំហំ​ប្រាក់​សរុប មានចំនួនជាង ១៩,៥ ពាន់លានដុល្លារ បានកើនឡើងប្រមាណ ១៧ ភាគរយ បើ​ធៀបរយៈពេលដូចគ្នាឆ្នំា ២០២៤ ។ជុំវិញ​ការ​ធ្វើពាណិជ្ជកម្មអន្តរជាតិនេះ ក្នុងនោះសម្រាប់ការនាំចេញទំនិញរបស់កម្ពុជា នៅ​ក្នុង​រយៈ​ពេល ៤ ខែនេះ មានទំហំទឹកជាង ជាង ៩,១ ពាន់លានដុល្លារ កើនឡើង ១៤ ភាគរយ បើ​ធៀប​រយៈ​ពេល​ដូចគ្នាឆ្នំា ២០២៤ ក្នុងនោះកម្ពុជាបាននាំចេញសម្លៀកបំពាក់ គ្រឿង បន្ទាប់បន្សំធ្វើពីក្រណាត់ មានទំហំទឹកប្រាក់ជិត ២ ពាន់លានដុល្លារ, ធញ្ញជាតិ ៧៤៩ លានដុល្លារ, ម៉ាស៊ីន ឧបករណ៍អគ្គិសនី និងគ្រឿងបង្គុំ ជិត ៤០០ លានដុល្លារ, សម្លៀកបំពាក់ និងគ្រឿងបន្ទាប់បន្សំមិនធ្វើពីក្រណាត់ជាង ១,២ ពាន់លានដុល្លារ, វត្ថុធ្វើពីស្បែក និងបរិក្ខាធ្វើពីរោម ជាង ៦៦៤ លានដុល្លារ, ស្បែកជើង ស្រោមជើងជាង ៦២៣ លានដុល្លារ, កៅស៊ូ និងផលិតផលធ្វើពីកៅស៊ូ ៥៨៦ លានដុល្លារ,គ្រឿងសង្ហារឹម ៣៤៤ លានដុល្លារ, ផ្លែឈើ និងគ្រាប់ ផ្លែឈើ ៧៨៦ លានដុល្លារ និងការនាំចេញទំនិញជាច្រើនមុខផ្សេងៗទៀត។ចំណែកការនាំចូលវិញ, ក្នុងរយៈពេល ៤ ខែនេះដែរ កម្ពុជាបាននាំចូលទំនិញសំខាន់ គិតជាទឹកប្រាក់សរុប មានចំនួនជាង ១០ ពាន់ លានដុល្លារ កើនឡើងជិត ២០ ភាគរយ បើធៀបរយៈពេលដូចគ្នាឆ្នំា ២០២៤ ក្នុងនោះកម្ពុជាបាននាំចូលទំនិញសម្រាប់ផ្គត់ផ្គង់ទីផ្សារ ក្នុងស្រុក រួមមាន៖ ផលិតផលចាក់ដោយម្ជុល មានទឹកប្រាក់ជាង ១ ពាន់លានដុល្លារ, រ៉ែប្រើប្រាស់គ្រឿងចំហេះ ជាង ១,២ ពាន់លានដុល្លារ, ម៉ាស៊ីន និង ឧបរកណ៍អគ្គិសនីជាង ៧១៥ លានដុល្លារ, ម៉ាស៊ីន និងបរិធានមេខនិក ៧៤៣ លានដុល្លារ, យានយន្តផ្សេងៗជាង ៧៤៨ លានដុល្លារ និងការនាំចូលនូវមុខទំនិញជាច្រើនផ្សេងទៀត៕ អត្ថបទ៖ សុន រ៉ាឌី

មន្រ្តីនាំពាក្យ៖ ក្រសួងកំពុងធ្វើការយ៉ាងសកម្មជាមួយមួយភាគីថៃ ដើម្បីដោះស្រាយ​បញ្ហារឹត​បន្តឹងការនាំចេញផ្លែល្ពៅក្រៅផ្លូវការទៅកាន់ប្រទេសថៃ

2025/05/10 04:00:43 pm        499
Facebook Telegram Linkin
ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១០ ខែឧសភានេះ បានបញ្ជាក់ថា ក្រសួងកសិកម្មកំពុងធ្វើការយ៉ាងសកម្មជាមួយរដ្ឋបាលខេត្តបាត់ដំបង និងក្រសួងពាណិជ្ជកម្ម ក្នុងការចរចាជាមួយភាគីថៃ ដើម្បីដោះស្រាយបញ្ហារឹតបន្តឹងការនាំចេញផ្លែល្ពៅក្រៅផ្លូវការទៅកាន់ប្រទេសថៃ នៅតាមច្រកព្រំដែនគោកក្នុងភូមិសាស្ត្រខេត្តបាត់ដំបង។ បញ្ហានេះបានបណ្តាលឱ្យមានការជន់ជោរផ្លែល្ពៅដែលនាំចេញមិនបាននេះនៅលើទីផ្សារក្នុងស្រុក និងត្រូវបានឈ្មួញទាំងនោះយកទៅចែកចាយដោយឥតគិតថ្លៃ ដែលកំពុងមានការចាប់អារម្មណ៍នៅលើបណ្តាញសង្គម។គិតមកដល់ពេលនេះ យើងនៅមិនទាន់ទទួលបានការឆ្លើយតបវិជ្ជមានពីភាគីថៃនៅឡើយទេ។ ក្រសួងនឹងបន្តកិច្ចសហការជាមួយស្ថាប័នពាក់ព័ន្ធទាំងអស់ ដើម្បីជួយដោះស្រាយបញ្ហានេះឱ្យបានឆាប់ និងផ្តល់បច្ចុប្បន្នភាពពីវឌ្ឍនភាពជាបន្តបន្ទាប់៕

យុទ្ធនាការ “ចែករំលែកកូកា-កូឡា” ត្រឡប់មកវិញហើយ កាន់តែពិសេសនិងទាន់សម័យ

2025/05/07 08:59:09 pm        439
Facebook Telegram Linkin
នៅចាំអារម្មណ៍ពេលឃើញឈ្មោះខ្លួនឯងនៅលើកំប៉ុងកូកា-កូឡាដែរទេ? ឥឡូវនេះ កូកា-កូឡាកំពុងនាំយកអារម្មណ៍ពិសេសនោះត្រលប់មកកម្ពុជាម្តងទៀតហើយ បន្ទាប់ពីឃ្លាតអស់១០ឆ្នាំ។ ក្រុមហ៊ុនខេមបូឌា បេវេរេដ ខមប៉ានី លីមីធីត (កូកា-កូឡា) នាំយកយុទ្ធនាការ «ចែករំលែកកូកា-កូឡា» ដ៏មានប្រជាប្រិយភាពត្រលប់មកវិញ និងនាំមកនូវបទពិសោធន៍ កាន់តែប្លែក ថ្មីៗជាច្រើនទៀត ដើម្បីឱ្យអតិថិជនអ្នកញ៉ាំកាន់តែជិតស្និទ្ធ និងរីករាយជាមួយនឹងមិត្តភក្តិ។ កាលពីឆ្នាំ២០១១ កូកា-កូឡា បានបើកយុទ្ធនាការ "ចែករំលែកកូកា-កូឡា" ដំបូងគេបង្អស់ ដោយប្តូរឡូហ្គោដ៏ល្បីរបស់ខ្លួនទៅជាឈ្មោះបុគ្គល ហើយនោះជាលើកដំបូងក្នុងឧស្សាហកម្មភេសជ្ជៈចំពោះការបង្កើតឱ្យមានភាពផ្ទាល់ខ្លួនបែបនេះ។ ដើម្បីអបអរយុទ្ធនាការនេះ ក្រុមហ៊ុន កូកា-កូឡា នឹងបោះពុម្ពពាក្យទំនាក់ទំនងពេញនិយមចំនួន៩ ដូចជា អ្នកមានគុណ សំណព្វចិត្ត បេះដូងខ្ញុំ មិត្តរួមថ្នាក់ ពួកម៉ាក អ្នកជិតខាង មិត្តសម្លាញ់ Besties និង Babe នៅលើកំប៉ុង និងដបភេសជ្ជៈកូកា-កូឡា។ លោក ប៉ាវឡូ ហ្គាសស្ប៉ា អឌ្រីហ្គេស (Paulo Gaspar Rodrigues) អគ្គនាយកប្រតិបត្តិ នៃក្រុមហ៊ុន កូកា កូឡា បានមានប្រសាសន៍ថា ក្នុងសង្គមឌីជីថលកម្ពុជាដ៏ទាន់សម័យរបស់យុវជនសម័យថ្មី ជេនហ្ស៊ី (Gen Z) ពួកគេតែងចូលចិត្តអ្វីរស់រវើក ដូចជាបង្កើតឱ្យមានអី្វពិសេសៗជាមួយមិត្ត មិនថាពេលសម្រាករៀនសម្រាកការងារ ពេលជុំគ្រួសារ ពេលឆក់ចំណាប់អារម្មណ៍ក្នុងពិធីមង្គលការជាដើម និយាយរួម ត្រូវតែប្លែកពិសេស។ ជាមួយនឹងភេសជ្ជៈត្រជាក់ស្រឹប ឆ្ងាញ់មានជាតិ ហើយមានឈ្មោះខ្លួនឯងទៀតនោះ កូកា-កូឡា កំពុងបង្កើតភាពរីករាយ និងបង្កើតបរិយាកាសជួបជុំឱ្យកាន់តែរីករាយពិតប្រាកដ មិនថាពួកគេនៅទីណា ទោះនៅតាមហាងអាហារពេលយប់ ឬក៏ពេលថ្ងៃ នៅម្តុំៗសាលាក៏ដោយ។ Gen Z តែងចូលចិត្តផុសគ្រប់យ៉ាងពីខ្លួនគេក្នុងបណ្តាញសង្គម ហើយអោយតែថ្មីប្លែក គឺដឹងតែចែករំលែកគ្រប់រឿង ជាពិសេសពេលជុំគ្នាសប្បាយៗ។ ចាប់ពីថ្ងៃទី ១៩ ខែឧសភា ឆ្នាំ ២០២៥ ដល់ថ្ងៃទី៣១ ខែកក្កដា ២០២៥ យុទ្ធនាការ “ចែករំលែកកូកា-កូឡា” នឹងផ្តល់នូវភាពរំជើបរំជួលដ៏អស្ចារ្យទូទាំងប្រទេសកម្ពុជា អមដោយសកម្មភាពកម្សាន្តសប្បាយជាច្រើនបន្តបន្ទាប់៕ អត្ថបទ៖ ឈិត បូរ៉ាវី

រយៈពេល៤ខែឆ្នាំនេះ កម្ពុជាអនុម័តគម្រោងវិនិយោគថ្មីចំនួន ២៣១ គម្រោងមានទុនវិនិយោគ ៣,៤ ពាន់លានដុល្លារ

2025/05/07 05:49:12 pm        201
Facebook Telegram Linkin
ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគ នៅក្នុង ៤ ខែ ដើមឆ្នាំ២០២៥នេះ សរុបមានចំនួន ២៣១ គម្រោង ក្នុងទុនវិនិយោគប្រមាណ ៣,៤ ពាន់លានដុល្លារអាម៉េរិក កើនឡើង ១០៣ គម្រោង បើប្រៀបធៀបរយៈពេលដូចគ្នាក្នុងឆ្នាំ២០២៤។ក្រុមប្រឹក្សាអភិវឌ្ឍន៍កម្ពុជា ចេញសេចក្តីប្រកាសព័ត៌មាន លើការអនុម័តគម្រោងវិនិយោគ ក្នុងខែមេសា ឆ្នាំ២០២៥នេះ បាន ចំនួន ៥៩ គម្រោង មានទុនវិនិយោគសរុបប្រមាណ ៨៦០ លានដុល្លារអាម៉េរិក អាចបង្កើតការងារបានប្រមាណ ៣៩ ពាន់កន្លែង។ នៅក្នុងចំណោមគម្រោងវិនិយោគសរុបនេះ ក្នុងនោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ៣២ គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេស មានចំនួន ២៧ គម្រោង។ ជារួមការអនុម័ត គម្រោងវិនិយោគមានការកើនឡើងចំនួន ៣៧ គម្រោង ស្មើនឹងប្រមាណ ១៦៨% ខណៈទុនវិនិយោគមាន ការកើនឡើងប្រមាណ ជាង ៥៥០ លានដុល្លារអាម៉េរិក ស្មើនឹងប្រមាណ ១៧៨% ធៀបនឹងរយៈពេលដូចគ្នាក្នុងឆ្នាំ២០២៤។ ដោយឡែក នៅក្នុងរយៈពេល៤ខែ ក្នុងឆ្នាំ២០២៥ នេះវិញ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២៣១ គម្រោង ក្នុងទុនវិនិយោគមានប្រមាណ ៣,៤ ពាន់លានដុល្លារអាម៉េរិក បើប្រៀបធៀបនឹងរយៈពេលដូចគ្នាក្នុងឆ្នាំ ២០២៤ ចំនួនគម្រោងបានកើនឡើងប្រមាណ ១០៣ គម្រោង ស្មើនឹងប្រមាណ ៨០% ខណៈទុនវិនិយោគបានកើនឡើងប្រមាណជាង ៨៥៦លានដុល្លារអាម៉េរិក ស្មើនឹងប្រមាណ ៣៤%។សូមបញ្ជាក់ថា ចំពោះគម្រោងវិនិយោគក្រៅតំបន់សេដ្ឋកិច្ចពិសេស ដែលមានភាពលេចធ្លោជាងគេប្រចាំខែមេសារួមមាន៖ គម្រោង បង្កើតផែស្ងួត មានទុនវិនិយោគ ១១ លានដុល្លារ ស្ថិតនៅស្រុកគងពិសី ខេត្តកំពង់ស្ពឺ, គម្រោងបង្កើតរោងចក្រផលិត និងផ្គុំដំឡើង បន្ទះសូឡា មានទុន ៤៤ លានដុល្លារ នៅស្រុកស្ទឹងហាវ ខេត្តព្រះសីហនុ, គម្រោងវិនិយោគបង្កើតរោងចក្រផលិតឧបករណ៍បរិក្ខាពេទ្យ ចំនួន ១៧ លានដុល្លារ នៅស្រុកបាទី ខេត្តតាកែវ និងគម្រោងវិនិយោគបង្កើតរមណីយដ្ឋានទេសចរសេវាកម្មចម្រុះ ចំនួន ២០ លានដុល្លារ ស្ថិតនៅស្រុកសៀមប៉ាង ខេត្តស្ទឹងត្រែង។ ចំណែកគម្រោងវិនិយោគក្នុងតំបន់សេដ្ឋកិច្ចពិសេសមាន៖ គម្រោងវិនិយោគបង្កើតរោងចក្រសំបកកង់រថយន្ត មានទុនវិនិយោគ ២៤២ លានដុល្លារ នៅក្នុងតំបន់សេដ្ឋកិច្ចពិសេស អាយ អេស អាយ (ព្រះសីហនុ), គម្រោងពង្រីកផលិតកម្មសំបកកង់រថយន្ត មានទុន ៩៣ លានដុល្លារ និងគម្រោងបង្កើតរោងចក្រផលិតសម្ភារៈប្រើប្រាស់ក្នុងផ្ទះ ចំនួន ៤០ លានដុល្លារ នៅតំបន់សេដ្ឋកិច្ចពិសេស ឈី លូ ជាន ពុ ចាយ (ស្វាយរៀង), គម្រោងបង្កើតរោងចក្រផលិតសម្ភារៈប្រើប្រាស់ក្នុងផ្ទះធ្វើពីលោហៈ និងប្លាស្ទិក ចំនួន ១៩ លានដុល្លារ នៅកោះកុង ចេជាង (ខេត្តកោះកុង) និងគម្រោងវិនិយោគបង្កើតរោងចក្រ ផ្គុំនិងដំឡើងត្រីចក្រយានយន្តអគ្គិសនី មានទុន ១៥ លានដុល្លារ នៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ៕ អត្ថបទ៖ សុន រ៉ាឌី

មន្រ្តីជាន់ខ្ពស់ CDC លើកទឹកចិត្តដល់ក្រុមហ៊ុនម៉ាឡេស៊ី វិនិយោគលើវិស័យដែលឆ្លើយតប​ទីផ្សារបច្ចុប្បន្ន

2025/05/05 11:08:51 pm        310
Facebook Telegram Linkin
មន្រ្តីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា លើកទឹកចិត្តដល់ក្រុមហ៊ុនមកពីប្រទេសម៉ាឡេស៊ី សិក្សាលទ្ធភាពវិនិយោគលើហេដ្ឋារចនា សម្ព័ន្ធដឹកជញ្ជូន, កសិកម្ម និងកសិ-ឧស្សាហកម្ម, ការកែច្នៃចំណីអាហារ, ឧស្សាហកម្មយានយន្ត, ឧស្សហកម្មគ្រឿងអេឡិកត្រូនិច, វិស័យបច្ចេកវិទ្យាឌីជីថល និងការអភិវឌ្ឍតំបន់សេដ្ឋកិច្ចពិសេស។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅចុងសប្តាហ៍កន្លងមក នេះ បានអនុញ្ញាតឱ្យគណៈប្រតិភូក្រុមហ៊ុន Malakoff Corporation Berhad (MCB) មកពីប្រទេសម៉ាឡេស៊ី ដឹកនាំដោយលោក Tan Sri Che Khalib Mohamad Nor ប្រធានក្រុមហ៊ុន និងក្រុមហ៊ុន GAEA PLC (Global Action for Environment Awareness Public Limited Company) ដឹកនាំដោយលោក Dominique Catry ចូលជួបសម្តែងការគួរសម និងពិភាក្សាការងារ។ ឯកឧត្តមឧបនាយករដ្ឋមន្ត្រី បានគូសបញ្ជាក់អំពីបច្ច័យវិជ្ជមាននានា ជាហេតុនាំឱ្យកម្ពុជាគឺជាទីតាំងដែលគួរពិចារណា ក្នុង ការមកដាក់ទុនវិនិយោគរួមមាន៖ សុខសន្តិភាព និងស្ថិរភាពនយោបាយ, លំនឹងម៉ាក្រូសេដ្ឋកិច្ច, កម្លាំងពលកម្មវ័យក្មេងដែលបើក ទូលាយ ក្នុងការទទួលយកការបណ្តុះបណ្តាលថ្មីៗ ការគាំទ្រពីសំណាក់រាជរដ្ឋាភិបាល ដល់ការរីកលូតលាស់នៃវិស័យឯកជន តាមរយៈ វេទិការាជរដ្ឋាភិបាល-ផ្នែកឯកជន, ច្បាប់ស្តីពីវិនិយោគដែលមានភាពបត់បែន, ហេដ្ឋារចនាសម្ព័ន្ធដឹកជញ្ជូន អន្តរមធ្យោបាយ វិស័យ ភស្តុភារកម្ម និងវិសាលភាពកំពង់ផែ បានកំពុងអភិវឌ្ឍឱ្យកាន់តែមានភាពសម្បូរបែប និងប្រទាក់ក្រឡា ជាមួយនឹងទីតាំងភូមិសាស្រ្ត ដែលមានអំណោយផលខ្ពស់។លោក Tan Sri Che Khalib Mohamad Nor បានសម្តែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែង របស់រាជរដ្ឋាភិបាល ក៏ដូចជា ក.អ.ក. ផ្ទាល់ ក្នុងការសម្របសម្រួល ថែទាំគាំទ្រដល់វិនិយោគិន ចាប់តាំងពីដំណាក់កាលដំបូង រហូត ដល់ការសម្រេចចិត្តដាក់ទុនវិនិយោគ និងអំឡុងពេលប្រតិបត្តិការធុរកិច្ចរបស់ខ្លួន ដែលទាំងអស់នេះជាមូលដ្ឋាន ធ្វើឱ្យអ្នកដែលមាន បំណងដាក់ទុនវិនិយោគនាពេលអនាគត គឺមានទំនុកចិត្តក្នុងការសម្រេចចិត្តផងដែរ។នៅថ្ងៃដ៏ដែលនេះដែរ, ឯកឧត្តម ស៊ុន ចាន់ថុល ក៏បានអញ្ជើញជួបសំណេះសំណាល និងពិភាក្សាការងារជាមួយ ឯកឧត្តម និស៊ិមឹរ៉ា យ៉ាសឹតុស៊ិ (NISHIMURA Yasutoshi) សមាជិករដ្ឋសភា និងជាអតីតរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម ជប៉ុន ក្នុងជំនួបនោះ, ឯកឧត្តមឧបនាយករដ្ឋមន្ត្រី ក៏បានជម្រាបជូនអំពីការយកចិត្តទុកដាក់របស់រាជរដ្ឋាភិបាលកម្ពុជា ចំពោះវិស័យ ឯកជន តាមរយៈការបង្កើតឱ្យមានកិច្ចសន្ទនារវាងរដ្ឋ និងវិស័យឯកជន ដែលបានផ្តល់នូវឱកាសឱ្យវិនិយោគិន បានលើកឡើងពីបញ្ហា ប្រឈម និងទទួលបានដំណោះស្រាយសមស្រប ដែលធ្វើឱ្យពួកគេកាន់តែមានទំនុកចិត្ត ក្នុងការបន្តវិនិយោគ និងផ្សព្វផ្សាយបន្ត ទៅក្នុងសហគមន៍ធុរកិច្ចរបស់ពួកគេ។ ជាមួយគ្នានេះ ឯកឧត្តមសមាជិករដ្ឋសភា ក៏បានជម្រាបអំពីផែនការ នៃការធ្វើទស្សនកិច្ច ទៅកាន់បណ្តាក្រុមហ៊ុនសហគ្រាសធំៗ ដែលវិនិយោគផ្ទាល់ពីប្រទេសជប៉ុន ហើយកំពុងមានប្រតិបត្តិការយ៉ាងជោគជ័យនៅប្រទេស កម្ពុជា៕ អត្ថបទ៖ សុន រ៉ាឌី

អ៊ីរ៉ង់បង្ហាញគោលជំហរវិនិយោគកំពង់ផែ និងការបើកជើងហោះហើរត្រង់រវាងប្រទេសទាំងពីរ

2025/05/05 09:37:07 pm        236
Facebook Telegram Linkin
អ៊ីរ៉ង់បង្ហាញពីគោលជំហរ ពង្រឹង និងបង្កើនកិច្ចសហប្រតិបត្តិការជាមួយកម្ពុជាឱ្យកាន់តែប្រសើរ ដើម្បី​ជាប្រយោជន៍សម្រាប់ ប្រជាជាតិទាំងពីរ ពិសេសលើវិស័យហេដ្ឋារចនាសម្ព័ន្ធ វិស័យកំពង់ផែ និង​ការ​ពិនិត្យលទ្ធភាពក្នុងការបើកជើងហោះហើរត្រង់ ពីរដ្ឋ ធានីតេហេរ៉ង់ មកកាន់រាជ​ធានី​ភ្នំពេញ​។ឯកឧត្តម Ali Akbar Nazari ឯកអគ្គរដ្ឋទូតវិសាមញ្ញ និងពេញ​សមត្ថភាព នៃ​សាធារណ​រដ្ឋ​ឥស្លាម​អ៊ីរ៉ង់ ប្រចាំព្រះរាជាណា ចក្រកម្ពុជា ដែលមាននិវេសនដ្ឋាននៅទីក្រុងហាណូយ ប្រទេស​វៀតណាម​ និងសហការីអមដំណើរ នៅចុងសប្តាហ៍កន្លងមកនេះ បានចូលជួបសម្តែងការគួរសម និង​ពិភាក្សាការងារជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុម​ប្រឹក្សា​អភិវឌ្ឍន៍កម្ពុជា ដែលក្នុងឱកាសនោះ, ឯកឧត្តមឯកអគ្គរដ្ឋទូត បានថ្លែង​អំណរ​គុណ​យ៉ាង​ជ្រាល​ជ្រៅ ​ចំពោះបដិសណ្ឋារកិច្ចដ៏កក់ក្តៅ និងរាក់ទាក់ និងបានវាយតម្លៃ​ខ្ពស់​ចំពោះ​ទំនាក់​ទំនង​ការ​ទូត​រវាងកម្ពុជា និងអ៊ឺរ៉ង់ ព្រមទាំងបានធ្វើការកត់សម្គាល់អំពីវឌ្ឍនភាពថ្មីៗ នៃការរីក​ចម្រើន​ទាំង​ផ្នែក​សេដ្ឋកិច្ច និងសង្គមរបស់កម្ពុជា ក្នុងរយៈពេលប៉ុន្មានឆ្នាំចុងក្រោយនេះ។ក្នុងជំនួបនេះ, ឯកឧត្តមឯកអគ្គរដ្ឋទូត បានបញ្ជាក់ពីជំហររបស់សាធារណរដ្ឋអ៊ីស្លាមអ៊ីរ៉ង់ នៅ​ក្នុង​ការ​ពង្រឹង និងបង្កើនកិច្ច សហប្រតិបត្តិការ ឱ្យកាន់តែមានភាពប្រសើរឡើងថែមមួយកម្រិតទៀត ដើម្បី​ជា​ប្រយោជន៍សម្រាប់ប្រជាជាតិទាំងពីរ ពិសេសលើវិស័យ ហេដ្ឋារចនាសម្ព័ន្ធ វិស័យកំពង់ផែ និង​ការពិនិត្យលទ្ធភាពក្នុងការបើកជើងហោះហើរត្រង់ ពីរដ្ឋធានីតេហេរ៉ង់ មកកាន់រាជធានីភ្នំពេញ និង​ការ​ជំរុញធ្វើពាណិជ្ជកម្មទេ្វភាគីរវាងប្រទេសទាំងពីរផងដែរ។ជាការឆ្លើយតប, ឯកឧត្តមឧបនាយករដ្ឋមន្ត្រី បានសម្ដែង​នូវ​ការ​ស្វាគមន៍​ចំពោះ​បេសកកម្ម​ការ​ទូត​របស់​ ឯកឧត្តម Ali Akbar Nazari ក្នុងនាមជាឯកអគ្គរដ្ឋទូតអ៊ឺរ៉ង់ប្រចាំកម្ពុជា ព្រមទាំង​បាន​បង្ហាញ​នូវ​ជំនឿជាក់ថាបេសកកម្មការទូតរបស់ឯកឧត្តម នឹងរួម ចំណែកថែមមួយកម្រិតទៀត ក្នុង​ការ​ពង្រឹង និងពង្រីកទំនាក់ទំនងកិច្ចសហប្រតិបត្តិកា ររវាងប្រទេសទាំងពីរឱ្យកាន់តែមានភាព ល្អ​ប្រសើរ​ឡើង​ ពិសេសគឺការជំរុញឱ្យមានកំណើនវិនិយោគ​ពីអ៊ឺរ៉ង់​មកកម្ពុជានាពេលអនាគត។ តាម​រយៈ​ជំនួប​នេះដែរ ឯកឧត្តម ឧបនាយករដ្ឋមន្ត្រី និងឯកឧត្តមឯកអគ្គរដ្ឋទូត បានធ្វើការ​ចែក​រំលែក​នូវ​បទ​ពិសោធន៍ការងារ កន្លងមកពាក់ព័ន្ធនឹងការទាក់ទាញ ជំរុញវិនិយោគ និងការលើក​កម្ពស់​សេដ្ឋ​កិច្ច​ជាតិ​ផង​ដែរ​៕ អត្ថបទ៖ សុន រ៉ាឌី 

កម្ពុជា-ឡាវ ឯកភាពលើកិច្ចសហប្រតិបត្តិការអាទិភាពមួយចំនួនពាក់ព័ន្ធវិស័យកសិកម្ម

2025/05/05 09:05:28 pm        223
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់ចូលរួមកិច្ចប្រជុំទ្វេភាគីជាមួយក្រសួងកសិកម្ម និងរុក្ខាកម្ម នៃសាធារណរដ្ឋប្រជាធិបតេយ្យប្រជាមានិតឡាវ កាលពីកន្លងទៅនេះនៅប្រទេសឡាវ។យោងតាមក្រសួងកសិកម្ម រុក្ខាប្រមាញ់ និងនេសាទ ចេញផ្សាយនៅល្ងាចថ្ងៃទី៤ ឧសភា ឆ្នាំ២០២៥នេះ បានឲ្យដឹងថានៅក្នុងកិច្ចប្រជុំនេះ ឯកឧត្តមរដ្ឋមន្ត្រីទាំងពីរបានពិនិត្យលើវឌ្ឍនភាពនៃកិច្ចសហប្រតិបត្តិការទ្វេភាគីក្រោមក្របខណ្ឌនៃអនុស្សរណៈនៃការយោគយល់គ្នា(MOU) ដែលបានចុះហត្ថលេខារួមគ្នាកាលពីថ្ងៃទី៤ ខែធ្នូ ឆ្នាំ២០២៤។ ជាលទ្ធផល ភាគីទាំងពីរបានឯកភាពគ្នាលើកិច្ចសហប្រតិបត្តិការអាទិភាពចំនួន៣ សំខាន់ៗគឺ៖ ១. កិច្ចសហប្រតិបត្តិការលើធាតុចូលកសិកម្ម៖ ដោយផ្តល់អាទិភាពលើការផ្គត់ផ្គង់ធាតុផ្សំនៃផលិតកម្មជីកសិកម្ម ជាពិសេសប្រភេទជីប៉ូតាស។ ២. ការជំរុញកសិពាណិជ្ជកម្មទ្វេភាគី៖ ការបង្កើនការនាំចេញផលិតផលកសិកម្មកម្ពុជា ជាពិសេសផលិតផលស្វាយ ដោយប្រើប្រាស់ប្រព័ន្ធដឹកជញ្ជូនតាមផ្លូវដែកនិងរថភ្លើងល្បឿនលឿនឆ្លងកាត់ប្រទេសឡាវ ទៅកាន់ទីផ្សារចិន ឬប្រទេសទី៣ ដែលនឹងជួយបង្កើនទីផ្សារថ្មីសម្រាប់ផលិតផលកសិកម្មកម្ពុជា។ ៣. កិច្ចសហប្រតិបត្តិការលើឆាកអន្តរជាតិ៖ ការបន្តពង្រឹងកិច្ចសហប្រតិបត្តិការនិងការគាំទ្រគ្នាទៅវិញទៅមកលើឆាកអន្តរជាតិនានា ដើម្បីលើកកម្ពស់ផលប្រយោជន៍រួមនៃប្រទេសទាំងពីរក្នុងវិស័យកសិកម្ម។សូមបញ្ជាក់ថា កាលពីថ្ងៃទី៣០ ខែមេសា ដល់ថ្ងៃទី៣ ខែឧសភា ឆ្នាំ២០២៥ ឯកឧត្តមរដ្ឋមន្រ្តី ឌិត ទីណា បានដឹកនាំគណៈប្រតិភូជាន់ខ្ពស់ទៅបំពេញទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ។ ដំណើរទស្សនកិច្ចនេះ មានគោលបំណងពង្រឹងកិច្ចសហប្រតិបត្តិការលើវិស័យកសិកម្មរវាងប្រទេសទាំងពីរ និងពិនិត្យលទ្ធភាពភ្ជាប់ការផ្គត់ផ្គង់ធាតុចូលសម្រាប់ផលិតកម្មជីកសិកម្មពីឡាវមកកម្ពុជា៕អត្ថបទ៖ ឈិត បូរ៉ាវី 

បណ្ដាញសង្គម

ព័ត៌មានថ្មីៗ

Oliver Lines បង្កការភ្ញាក់ផ្អើល ទម្លាក់កីឡាករស្នូកឃ័រលេខ ១ ពិភពលោក Zhao Xintong ពី English Open ជុំដំបូង
09/08/2026 02:09 PM
Facebook Telegram Linkin
ពលរដ្ឋ និងយុវជន៖ វត្តមានសម្ដេចធិបតីបន្តចុះដល់មូលដ្ឋានជាស្ពានតភ្ជាប់ទំនុកចិត្តរវាងរដ្ឋ និងរាស្រ្ដ
09/08/2026 02:09 PM
Facebook Telegram Linkin
UEFA Champions League ត្រឡប់មកវិញ៖ ក្រុមធំៗត្រៀមប្រជែងពានរដូវកាលថ្មី
09/08/2026 02:09 PM
Facebook Telegram Linkin
កម្ពុជាស្វែងយល់ពីបច្ចេកវិទ្យានវានុវត្តន៍ និងផ្លាស់ប្តូរ​ទស្សនៈ​ជាមួយ​ដៃ​គូ​អន្តរជាតិ​នៅ​ទីក្រុង​សៀមិន
09/08/2026 01:09 PM
Facebook Telegram Linkin
កាណាដាត្រៀមសម្រាប់សង្គ្រាមពាណិជ្ជកម្មរយៈពេលវែង ខណៈពន្ធ​តប​ត​វិញ​ លើ​អាមេរិក ចូលជាធរមាន
09/08/2026 01:09 PM
Facebook Telegram Linkin
សមត្ថកិច្ចជលផលកំពង់ចាម បង្ក្រាបបទល្មើសជលផល ២ករណី ដកហូតវត្ថុតាងមួយចំនួន
09/08/2026 01:09 PM
Facebook Telegram Linkin
ក្រសួងអប់រំរៀបចំសិក្ខាសាលាស្តីពីវិន័យ និងក្រមសីលធម៌ ពង្រឹងការយល់​ដឹង​របស់​​អត្ត​ពលិក​មុន​ចូលរួម​ការប្រកួតកីឡាអាស៊ីនៅជប៉ុន
09/08/2026 12:09 PM
Facebook Telegram Linkin
ទូតកម្ពុជាប្រចាំនៅសាធារណរដ្ឋកូរ៉េ ជួបជាមួយអាជ្ញាធរកូរ៉េ និង​ស្នើជួយ​គាំទ្រ​ការ​ធ្វើ​ទំនើប​កម្ម​វិស័យ​កសិកម្ម​មានសក្ដានុពលនៅកម្ពុជា
09/08/2026 12:09 PM
Facebook Telegram Linkin
អ្នកគ្រប់គ្រងកម្មវិធីជាន់ខ្ពស់របស់ SDC​ ថា «ជំនាញ TVET មិនអាចខ្វះបាននៅក្នុងការរស់នៅប្រចាំថ្ងៃ»
09/08/2026 12:09 PM
Facebook Telegram Linkin
សម្ដេចធិបតី អំពាវនាវដល់ក្រសួង-ស្ថាប័ន និង​ភាគី​ពាក់​ព័ន្ធ​យក​ចិត្ត​ទុក​ដាក់​ខ្ពស់​បន្ត​ទៀត​លើ​ការងារ​អក្ខរកម្ម
09/08/2026 12:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.