BTV NEWS

រយៈពេល៣ខែឆ្នាំ២០២៦នេះ ទីផ្សារអាមេរិកស្រូបយកទំនិញកម្ពុជា មានទឹកប្រាក់ជាង ៣,៣ ពាន់លានដុល្លារ

ទំហំពាណិជ្ជកម្មអន្តរជាតិកម្ពុជាសម្រេចបានប្រមាណ ១៧ពាន់លានដុល្លារក្នុងត្រីមាសទី១

ADBព្យាករថា សេដ្ឋកិច្ចកម្ពុជានឹងកើនឡើង៤,៥% ក្នុងឆ្នាំ២០២៦ នាំមុខដោយវិស័យកម្មន្តសាល

រាជរដ្ឋាភិបាលប្រឹងប្រែងជំរុញឱ្យសហគ្រាសបង្កើនធាតុចូលក្នុងស្រុក ដើម្បីប្រកួតប្រជែងលើទីផ្សារពិភពលោក

សេដ្ឋកិច្ច និង កសិកម្ម

រយៈពេល៧ខែ ភ្ញៀវទេសចរទស្សនាក្នុងតំបន់អង្គរ សម្រាប់ឆ្នាំ២០២៣ ជាង២លាន៦៤ម៉ឺននាក់

សៀមរាប៖ មន្ដ្រីជំនាញផ្នែទេសចរណ៍ នៃអាជ្ញាធរជាតិអប្សរា បានឱ្យដឹងថា លំហូរភ្ញៀវទេសចរជាតិ និងអន្ដរជាតិ បានទៅទស្សនារមណីយដ្ឋានអង្ករ ក្នុងរយៈពេល៧ខែឆ្នាំ២០២៣នេះ មានចំនួនជាង២លាន ៦៤ម៉ឺន៣ពាន់នាក់ មានការកើនឡើងគួរឱ្យកត់សំគាល់ជាងឆ្នា២០២២ បើប្រៀបធៀប និងរយៈពេលដូចគ្នា។លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ វប្បធម៌អង្គរ និងសារមន្ទីរ បទកដ្ឋានបេតិកភណ្ឌ នៃអាជ្ញាធរជាតិអប្សរា មានប្រសាសន៍នៅថ្ងៃទី០១ខែសីហា ឆ្នាំ២០២៣នេះថា ក្នុងចំណោមភ្ញៀវទសចរជាតិ និងអន្ដរជាតិជាង៦៤ម៉ឺន៣ពាន់នោះ មានលំហូរភ្ញៀវទេសចរខ្មែរ ចំនួន២លាន ២០ម៉ឺន៣ ៦៩៦ នាក់ និងភ្ញៀវទេសចរអន្ដរជាតិទិញសំបុត្រចូលទស្សនាអង្គរ មាន៤៣ម៉ឺន៩ ៣៦៥នាក់ ខណៈដែលឆ្នាំ២០២២កន្លងមក មានភ្ញៀវបរទេសមកទស្សនាតំបន់អង្គរត្រឹមតែ៨ម៉ឺន៣៨៥៤ ប៉ុណ្ណោះ។លោក បានបន្ដថា ក្នុងរយៈពេល៧ខែ ចាប់ពីថ្ងៃទី១ខែមករា ដល់ថ្ងៃទី៣១ ខែកក្កដាឆ្នាំ២០២៣នេះ មានអ្នកទេសចរសរុបចំនួន២លាន ៦៤ម៉ឺន៣ ០៦១ នាក់។លោក បានបន្ដថា ចាប់ពីខែកញ្ញា ឆ្នាំ២០២៣ខាងមុខនេះ ភ្ញៀវទេសចរអាចនឹងកើនឡើង ខណៈដែលរាជរដ្ឋាភិបាល បើឱ្យដំណើរការព្រលានយន្ដហោះអន្ដរជាតិសៀមរាបអង្គរនៅពាក់កណ្ដាលខែតុលាខាងមុខ។ពាក់ព័ន្ធនឹងចំនួនភ្ញៀវ យើងសង្ឃឹមថា នឹងមានការកើនឡើងនៅក្នុងខែ៩ រហូតដល់ចុងខែធ្នូ អត្រាចំនួនភ្ញៀវមានការកើនឡើងនូវភ្ញៀវទេសចរអន្ដរជាតិព្រោះបើយើងប្រៀបធៀបភ្ញៀវទេសចរ៧ខែកាលពីឆ្នាំ២០២២ កន្លងមក មានតែ៨ម៉ឺននាក់ជាង ដល់ឥឡូវនៅឆ្នាំ២០២៣ មានរហូតជិតទៅដល់៤៤ម៉ឺននាក់ មានការកើនឡើងប្រហែលជាង៤រយភាគរយ។យោងតាមសេចក្ដីប្រកាសព័ត៌មានគ្រឹះស្ថានអង្គរ បានបង្ហាញថា នៅក្នុងខែកក្កដា ឆ្នាំ២០២៣ ចំនួនភ្ញៀវចរបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរ មានចំនួន៥ម៉ឺន៣៥៩៦នាក់ បើធៀបរយៈពេលដូចគ្នានឹងឆ្នាំ២០២២ កើនឡើងជាង១២៤ភាគរយ។ ចំណូលថវិកា២លាន៤៣ម៉ឺន៩៩២៧ដុល្លា បើបរៀបធៀបនឹងឆ្នាំ២០២២ កើនឡើងជាង ១៥៤ភាគរយ។ ចំណូលមូលនិធិមន្ទីរពេទ្យគន្ធបុប្ផា សម្រាប់ខែកក្កដា ឆ្នាំ២០២៣ ចំនួន១០ម៉ឺ៧១៩២ដុល្លារ។សេចក្ដីប្រកាសដដែល បានបន្ថែមថា ក្នុងរយៈពេល៧ខែឆ្នាំ២០២៣នេះ ចំណូលពីការលក់សំបុត្រចូលទស្សនាអង្គរ សម្រាប់ភ្ញៀវទេសចរអន្ដរជាតិ មានចំនួន២០លាន ៣១ម៉ឺន ៧៣៤៥ដុល្លារ កើនឡើងជាង៥រយភាគរយក្នុងរយៈពេលដូចគ្នានៃឆ្នាំ២០២២កន្លងមក ខណៈដែលភ្ញៀវទេសចរអន្ដរជាតិទិញសំបុត្រមានចំនួន៤៣ម៉ឺន៩៣៦៥នាក់ កើនឡើងជាងឆ្នាំ២០២២ជាង៤រយភាគរយក្នុងរយៈពេល៧ខែនេះ។សេចក្ដីប្រកាសព័ត៌មាន បានបន្ដថា ចំណូលមូលនិធិមន្ទីរពេទ្យគន្ធបុប្ផា រយៈពេល៧ខែក្នុងឆ្នាំ២០២៣មានចំនួន៨៧ម៉ឺ៨៧៣០ដុល្លារ។ចំណូលពីការលក់បណ្ណនៅប្រាសាទកោះកែរ សម្រាប់ខែកក្កដា មានចំនួន១០៥៩០ដុល្លារ និងរយៈពេល៧ខែមានចំនួនជាង១០ម៉ឺនដុល្លារ។ចំណូលពីការលក់សំបុត្រទូករយៈពេល៧ខែឆ្នាំ២០២៣ មានចំនួន៣២ម៉ឺន៨៦៦៨ដុល្លា៕

រដ្ឋលក់មូលបត្របំណុលមានទំហំទឹកប្រាក់សរុប១៨៤ប៊ីលានរៀល គិតត្រឹមខែមិថុនាឆ្នាំនេះ

ភ្នំពេញ៖ មូលបត្របំណុលរបស់រដ្ឋ ដែលបោះផ្សាយដោយធនាគារជាតិនៃកម្ពុជា គិតមកដល់ត្រីមាសទី១ ឆ្នាំ២០២៣នេះ បានបោះផ្សាយមូលបត្របំណុល ចំនួន ១១ លើក មានទំហំទឹកប្រាក់សរុបជាង ១៨៤ ប៊ីលានរៀល ឬស្មើនឹងប្រមាណ ៤៤លានដុល្លារ។ធនាគារជាតិនៃកម្ពុជា បានបង្ហាញរបាយការណ៍ប្រចាំឆមាសទី ១ និងទិសដៅឆមាសទី ២ ឆ្នាំ២០២៣ នៅថ្ងៃទី ៣១ ខែ កក្កដា ឆ្នាំ ២០២៣ ការបោះផ្សាយមូលបត្របំណុលរបស់រដ្ឋ ដែលធនាគារជាតិនៃកម្ពុជា ជាភ្នាក់ងារបោះផ្សាយ និងទូទាត់មូលបត្ររដ្ឋ នៅលើទីផ្សារដំបូង ដែលមានគ្រឹះស្ថានធនាគារ និងហិរញ្ញវត្ថុជាអ្នកចូលរួមជាវ បានចាប់ផ្តើមពីខែកញ្ញា ឆ្នាំ ២០២២។ គិតនៅក្នុងឆមាសទី ១ ឆ្នាំ ២០២៣ ការដេញថ្លៃមូលបត្ររដ្ឋ នៅលើផ្លែតហ្វម (NBCP) មាន ៦ ដង មានទំហំប្រាក់ ១១២ ប៊ីលានរៀល។សូមបញ្ជាក់ថា ការបោះផ្សាយមូលបត្ររដ្ឋបន្ទាប់ពីបានផ្អាកមួយរយៈ រាជរដ្ឋាភិបាលបានសម្រេចបោះផ្សាយមូលបត្ររដ្ឋឡើងវិញ ក្នុងគោលបំណងរួមចំណែកអភិវឌ្ឍទីផ្សារហិរញ្ញវត្ថុកម្ពុជា និងកេណ្ឌប្រមូលមូលធនក្នុងស្រុកជាប្រាក់រៀល ដើម្បីប្រើប្រាស់ក្នុងការវិនិយោគរយៈពេលមធ្យមនិងវែង។ ជាក់ស្តែងនៅឆ្នាំ ២០២២ មូលបត្ររដ្ឋត្រូវបានបោះផ្សាយចំនួន ៥ លើក តាមរយៈការដេញថ្លៃនៅលើផ្លែតហ្វម (NBCP) មានទឹកប្រាក់ចំនួនជាង ៧២ ប៊ីលានរៀល ត្រូវប្រមាណជាង ១៧ លានដុល្លារអាមេរិក ទាបជាងការគ្រោងទុក ក្នុងចំនួន ១,២ ទ្រីលានរៀល ឬ៣០០លានដុល្លារអាមេរិក។ ការបោះផ្សាយមូលបត្ររដ្ឋ គឺជាជំហានយ៉ាងសំខាន់ក្នុងការរួមចំណែកអភិវឌ្ឍន៍ទីផ្សារហិរញ្ញវត្ថុក្នុងស្រុកបន្ថែមទៀត ក៏ដូចជាការលើកកម្ពស់ការអនុវត្តនយោបាយរូបិយវត្ថុ ផ្អែកលើយន្តការទីផ្សារ តាមរយៈការបង្កើតឧបករណ៍រូបិយវត្ថុមួយដែលគ្មានហានិភ័យ ការផ្តល់ជាឧបករណ៍សម្រាប់ប្រើជាប្រាតិភោគ (សិទ្ធប្រត្យក្សមួយប្រភេទ ដែលប្រគល់ទៅឲ្យម្ចាស់បំណុល) ដើម្បីទទួលបានហិរញ្ញប្បទាន ជាប្រភពទុនដែលមានស្ថិរភាព ធៀបនឹងប្រភពទុនក្រៅប្រទេស និងជួយជំរុញការប្រើប្រាស់ប្រាក់រៀលនៅកម្ពុជា៕អត្ថបទ៖ សុន រ៉ាឌី

គ្រឹះស្ថានធនាគារ និងមីក្រូហិរញវត្ថុ ផ្តល់ឥណទានជាង ៥៥ ប៊ីលានដុល្លារ នៅក្នុងឆមាសទី១ឆ្នាំនេះ

ភ្នំពេញ៖ នៅក្នុងឆមាសទី១ ឆ្នាំ២០២៣ វិស័យធនាគារបានផ្តល់ឥណទាន មានទឹកប្រាក់ជិត ៤៦ ប៊ីលានដុល្លារអាមេរិក កើនឡើងជិត ១២ ភាគរយ ខណៈវិស័យមីក្រូហិរញ្ញវត្ថុ បានផ្តល់ឥណទានអតិថិជនមានចំនួនជិត ១០ ប៊ីលានដុល្លារអាមេរិក កើនឡើងជិត ១៥ ភាគរយ។ក្នុងរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ២០២៣ វិស័យធនាគារ, ទ្រព្យសកម្មរបស់គ្រឹះស្ថានធនាគារ កើនឡើងជិត ៩ ភាគរយ ដល់ជាង ២៨៣ ទ្រីលានរៀល ត្រូវប្រមាណជិត ៧០ ប៊ីលានដុល្លារអាមេរិក ។ ចំណែកឥណទានត្រូវបានផ្តល់ទៅកាន់វិស័យសំខាន់ៗក្នុងសេដ្ឋកិច្ចរួមមាន៖ ការជួញដូររាយ ការទិញផ្ទះជាកម្មសិទ្ធិផ្ទាល់ខ្លួន ការជួញដូរអចលនទ្រព្យ ការជួញដូរដុំ សំណង់ កសិកម្ម រុក្ខាប្រមាញ់ និងនេសាទ ការឱ្យខ្ចីជាបុគ្គល កម្មន្តសាល សណ្ឋាគារ និងភោជនីយដ្ឋាន។ប្រាក់បញ្ញើ បានកើនឡើង ៦,៤% មានទំហំទឹកប្រាក់ជិត ១៦០ ទីលានរៀល ត្រូវជាង ៣៩ ប៊ីលានដុល្លារអាមេរិក ក្នុងចំនួនជិត ១៤ លានគណនី។ចំណែកវិស័យមីក្រូហិរញ្ញវត្ថុវិញ, ទ្រព្យសកម្មគ្រឹះស្ថានមីក្រូហិរញ្ញវត្ថុបានកើនឡើងជាង ១៦ ភាគរយ ក្នុងទំហំទឹកប្រាក់ជិត ៤៨ ទី្រលានរៀល ត្រូវប្រមាណជិត ១២ ប៊ីលានដុល្លារអាមេរិក ដែលក្នុងនោះឥណទានអតិថិជន បានកើនឡើងជិត ១៥ ភាគរយ ក្នុងទំហំទឹកប្រាក់ ៤០ ទី្រលានរៀល ត្រូវប្រមាណ ៩,៧ ប៊ីលានដុល្លារអាមេរិក, ដោយមាន ២,២ លានគណនី។ ទាក់ទិនឥណទានទាំងនេះ បានផ្តល់ទៅកាន់វិស័យសំខាន់ៗក្នុងសេដ្ឋកិច្ចរួមមាន៖ អង្គភាពគ្រួសារ ពាណិជ្ជកម្ម និងជំនួញ កសិកម្ម សេវាកម្ម ដឹកជញ្ជូន សំណង់ កម្មន្តសាល និងផ្សេងៗ ។ ទន្ទឹមនេះ វិស័យមីក្រូហិរញ្ញវត្ថុបានទទួលប្រាក់បញ្ញើ ២០ ទី្រលានរៀល ត្រូវប្រមាណ ៤,៩ ប៊ីលានដុល្លារអាមេរិក ស្មើនឹង ២,៧ លានគណនី៕អត្ថបទ៖ សុន រ៉ាឌី

ការកើនឡើងទុនបម្រុងអន្តរជាតិ បានបង្ហាញនៃការឡើងសកម្មភាពសេដ្ឋកិច្ចក្នុងស្រុក

ភ្នំពេញ៖ ក្នុងឆមាសទី១ ឆ្នាំ២០២៣ ទុនបម្រុងអន្តរជាតិមានចំនួនជាង ១៨ ប៊ីលានដុល្លារអាមេរិក បានកើនឡើងប្រមាណ ៣,២% ធៀបនឹងចុងខែ ធ្នូ ឆ្នាំ២០២២ ដែលការកើនឡើងទុនបម្រុងនេះ ជាលទ្ធផលនៃការកើនឡើងចំណូលពីការវិនិយោគក្រៅប្រទេស ថ្លៃមាស និងប្រាក់បញ្ញើរបស់រាជរដ្ឋាភិបាល និងគ្រឹះស្ថានធនាគារ និងហិរញ្ញវត្ថុនៅធនាគារជាតិនៃកម្ពុជា។ធនាគារជាតិនៃកម្ពុជា ក្នុងរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ២០២៣ នៅថ្ងៃទី ៣១ ខែកក្កដា ឆ្នាំ ២០២៣ លើកឡើងថា ការកើនឡើងទុនបម្រុងនេះ ជាលទ្ធផលពីការកើនឡើងចំណូលពីការវិនិយោគក្រៅប្រទេស ថ្លៃមាស និងប្រាក់បញ្ញើរបស់រាជរដ្ឋាភិបាល និងគ្រឹះស្ថានធនាគារ និងហិរញ្ញវត្ថុនៅធនាគារជាតិនៃកម្ពុជា។ កម្រិតខ្ពស់នៃទុនបម្រុងអន្តរជាតិនេះ បង្ហាញពីលទ្ធភាពរក្សាបានស្ថិរភាពអត្រាប្តូរប្រាក់ ទំនុកចិត្តលើរូបិយវត្ថុជាតិ មូលដ្ឋានសម្រាប់ការខ្ចីក្រៅប្រទេស ព្រមទាំងផ្តល់ការការពារគ្រប់គ្រាន់សម្រាប់បំពេញតម្រូវការសន្ទនីយភាពទប់ទល់ នឹងវិបត្តិខាងក្រៅ។ការវិនិយោគទុនបម្រុងអន្តរជាតិ ត្រូវបានអនុវត្តដោយមានភាពបត់បែន ហើយហានិភ័យនៃការវិនិយោគ ត្រូវបានគ្រប់គ្រង និងតាមដានយ៉ាងហ្មត់ចត់ និងគោរពតាមសេចក្ដីណែនាំការវិនិយោគរបស់ធនាគារជាតិនៃកម្ពុជា ដើម្បីធានាបានការគ្រប់គ្រងទុនបម្រុងអន្តរជាតិប្រកបដោយសុវត្ថិភាព សន្ទនីយភាព និងទទួលបានចំណូលសមស្រប។សូមបញ្ជាក់ថា ដើមឆ្នាំ ២០២៣ នេះ ធនាគារជាតិនៃកម្ពុជាបានធ្វើបច្ចុប្បន្នកម្ម សេចក្ដីណែនាំការវិនិយោគ ដោយបានកែសម្រួលសមាសភាគនៃចំណែកទុនបម្រុងវិនិយោគ និងរូបិយប័ណ្ណ ដើម្បីឆ្លើយតបនឹងកំណើននៃតម្រូវការសន្ទនីយភាព និងលទ្ធភាពខ្ពស់ក្នុងការចាប់យកឱកាសពីការប្រែប្រួលនៃអត្រាការប្រាក់នៅលើទីផ្សារ ។ ទន្ទឹមនេះ ធនាគារជាតិនៃកម្ពុជា បានបន្តយកចិត្តទុកដាក់លើការបង្កើនការវិនិយោគលើសញ្ញាបណ្ណបៃតង (Green bonds) និងសញ្ញាបណ្ណ ដែលពាក់ព័ន្ធនឹងបរិស្ថាន សង្គម និងអភិបាលកិច្ច ដែលបោះផ្សាយដោយស្ថាប័នហិរញ្ញវត្ថុអន្តរជាតិធំៗ នៅប្រទេសចិន កូរ៉េខាងត្បូង ជប៉ុន និងនៅតំបន់អឺរ៉ុប៕អត្ថបទ៖ សុន រ៉ាឌី

វិស័យឧស្សាហកម្មរួមចំណែកក្នុងផលិតផលក្នុងស្រុកសរុប រំពឹងកើនឡើង ក្នុងងឆ្នាំ២០២៣

ភ្នំពេញ៖ វិស័យឧស្សាហកម្ម រួមចំណែកក្នុងផលិតផលក្នុងស្រុកសរុប (GDP) រំពឹងកើនឡើង ក្នុងឆ្នាំ២០២៣នេះ ដោយគាំទ្រដោយការហូរចូលនៃគម្រោងវិនិយោគផ្ទាល់ពីបរទេសកាន់តែច្រើន។ឯកឧត្តម ហេង សុគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងថា ច្បាប់វិនិយោគថ្មី កិច្ចព្រមព្រៀង FTA និងកិច្ចព្រមព្រៀង RCEP នឹងជួយកម្ពុជាទាក់ទាញវិនិយោគពីបរទេសកាន់តែច្រើន ដែលនឹងចូលរួមចំណែកជំរុញកំណើនសេដ្ឋកិច្ច ដែលវិស័យឧស្សាហកម្មរួមចំណែក ក្នុង GDP ឆ្នាំ២០២៣នេះ។ឯកឧត្តម ថ្លែងថា៖ “បន្ទាប់ពីងើបឡើងពីវិបត្តិជំងឺកូវីដ១៩ ជាសកល យើងឃើញថា កំណើនវិនិយោគបានកើនឡើងជាបន្តបន្ទាប់ ហើយក្នុងឆ្នាំ២០២៣នេះ យើងគិតថា កំណើននៃវិស័យឧស្សាហកម្មរបស់យើង អាចកើនឡើងរហូតដល់ ៣៩ភាគរយ ចូលរួមចំណែកទៅលើ GDP”។ឯកឧត្តម បញ្ជាក់ថា កំណើននៃលំហូរចូលនៃវិនិយោគគឺដោយសាររាជរដ្ឋាភិបាល បានបង្កើតនូវលិខិតបទដ្ឋានគតិយុទ្ធជាបន្តបន្ទាប់ ដើម្បីជំរុញ និងលើកកម្ពស់ធុរកិច្ចនៅកម្ពុជា ជាពិសេសការទាក់ទាញនូវការវិនិយោគិនឱ្យបានកាន់តែល្អប្រសើរ។សូមបញ្ជាក់ថា ក្នុងរយៈពេលឆមាសទី១ឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មី និងគម្រោងពង្រីកការវិនិយោគ ចំនួន ១១៣គម្រោង មានដើមទុនសរុប ប្រមាណ ១,១ ពាន់លានដុល្លារ។ប្រទេសចិនឈរលើកំពូងតារាងវិនិយោគផ្ទាល់ពីរប្រទេសនៅកម្ពុជាដោយមានគម្រោងវិនិយោគមានតម្លៃទុនសុបជាង៧០០លានដុល្លារ តាមពីក្រោយដោយវិនិយោគមកពីប្រទេសវៀតណាម ថៃ កូរ៉េខាងត្បូងជាដើម៕ អត្ថបទ៖ វណ្ណៈ

ប្រព័ន្ធធនាគារបានដើរ តួនាទីយ៉ាងសកម្ម ក្នុងការលើកស្ទួយសកម្មភាពសេដ្ឋកិច្ច និងរក្សាស្ថិរភាពហិរញ្ញវត្ថុ

ភ្នំពេញ៖ ធនាគារជាតិនៃកម្ពុជាបាន លើកឡើងថា ស្ថិរភាពនៃប្រព័ន្ធធនាគារបានដើរ តួនាទីយ៉ាងសកម្ម ក្នុងការលើកស្ទួយសកម្មភាពសេដ្ឋកិច្ច និងរក្សាស្ថិរភាពហិរញ្ញវត្ថុ ក្នុងបរិការណ៍ដែលសេដ្ឋកិច្ចកម្ពុជា កំពុងទទួលរងឥទ្ធិពលពីការថមថយ នៃសកម្មភាពសេដ្ឋកិច្ចពិភពលោក។ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ថ្លែងលើកឡើងបែបនេះ នៅក្នុងការបើកសន្និបាត បូកសរុបលទ្ធផលការងារប្រចាំ ឆមាសទី ១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា នៅសណ្ឋាគារសុខា ខេត្តព្រះសីហនុ នាថ្ងៃទី ៣០ ខែ កក្កដា ឆ្នាំ២០២៣ ។ឯកឧត្តម លើកឡើងថា បើទោះបីជាលក្ខខណ្ឌហិរញ្ញវត្ថុសកល កំពុងស្ថិតក្នុងស្ថានភាពរឹតត្បិត ហើយធនាគារនៅសហរដ្ឋអាមេរិកចំនួន ៣ បានដួលរលំកាលពីដើមឆ្នាំ ២០២៣ ដែលបានបង្កការព្រួយ បារម្ភនៅលើទីផ្សារហិរញ្ញវត្ថុអន្តរជាតិ ក៏ប្រព័ន្ធធនាគារកម្ពុជានៅតែរក្សាបានភាពធន់និងរឹងមាំ។ទន្ទឹមនេះ ការរក្សាស្ថិរភាពថ្លៃនយោបាយរូបិយវត្ថុ និងអត្រាប្តូរប្រាក់ ធនាគារជាតិនៃកម្ពុជា ត្រូវបាន អនុវត្តប្រកបដោយភាពបត់បែន និងប្រុងប្រយ័ត្នខ្ពស់។ សន្ទនីយភាពត្រូវបានបញេ្ចញទៅក្នុងទីផ្សារ និងស្រូបយកមកវិញ តាមរយៈឧបករណ៍នយោបាយរូបិយវត្ថុនានា ផ្អែកលើការប្រែប្រួលនៃតម្រូវការជាក់ស្តែង ក្នុងគោលដៅធានាឱ្យគ្រឹះស្ថានធនាគារ និងហិរញ្ញវត្ថុ មានសន្ទនីយភាពគ្រប់គ្រាន់ សម្រាប់ផ្តល់ឥណទានក្នុងអត្រាការប្រាក់មួយសមរម្យ និងបញ្ចៀសសម្ពាធទៅលើអត្រាប្តូរប្រាក់ផងដែរ។ ទន្ទឹមនេះ ក្នុងស្ថានភាពដែលតម្លៃប្រាក់ដុល្លារអាមេរិក នៅលើទីផ្សារអន្តរជាតិមាននិន្នាការកើនឡើង ប្រាក់រៀលត្រូវបានរក្សា ឱ្យមានស្ថិរភាពក្នុងកម្រិតជាមធ្យម ៤.០៩៤ រៀលក្នុង ១ ដុល្លារអាមេរិក ប្រហាក់ប្រហែលនឹងគ្រាដូចគ្នាឆ្នាំមុន សំដៅការពារអំណាចទិញ របស់ប្រាក់រៀល ក៏ដូចជាប្រាក់ចំណូលរបស់ប្រជាពលរដ្ឋងាយរងគ្រោះ ។ ជាមួយគ្នានេះ ការពង្រឹងការប្រើប្រាស់ប្រាក់រៀលឱ្យកាន់តែទូលំទូលាយ នៅតែជាការងារចាំបាច់ ដើម្បីកាត់បន្ថយឥទ្ធិពលពីកត្តាខាងក្រៅ មកលើកម្រិតថ្លៃនៅកម្ពុជា និងពង្រឹងប្រសិទ្ធភាពនយោបាយរូបិយវត្ថុ ក្នុងការគ្រប់ គ្រងស្ថិរភាពថ្លៃ និងជំរុញកំណើនសេដ្ឋកិច្ចឱ្យកាន់តែមានប្រសិទ្ធភាព ។ ការប្រើប្រាស់ប្រាក់រៀលក្នុងសេដ្ឋកិច្ចច្រើន ក៏អាចជួយគរពូនទុនបម្រុងអន្តរជាតិ ឱ្យកាន់តែខ្ពស់ជាងកម្រិតបច្ចុប្បន្នថែមទៀត ដែលនឹងពង្រឹងជំនឿទុកចិត្តរបស់វិនិយោគិន និងសាធារណជន មកលើស្ថិរភាពសេដ្ឋកិច្ច និងហិរញ្ញវត្ថុ កម្ពុជាឱ្យកាន់តែរឹងមាំ៕ អត្ថបទ៖ សុន រ៉ាឌី

ពាណិជ្ជសញ្ញាអក្សរXខ្នាតយក្សដ៏ភ្លឺចិញ្ចាច នាំឲ្យមានភាពមិនសប្បាយចិត្តពីអ្នកនៅទីក្រុង San Francisco

ឡូហ្គោអក្សរ X ដ៏ភ្លឺចិញ្ចាច ជាកន្លែងសម្គាល់ទីក្រុង San Francisco របស់សហរដ្ឋអាមេរិក ដែលលោក Elon Musk និយាយថា លោកមានគម្រោងបន្តរក្សាក្រុមហ៊ុនរបស់លោក ដែលជាកម្មវិធីផ្ញើសារ X ដែលពីមុនត្រូវបានគេស្គាល់ថា បណ្ដាញសង្គម Twitter។ ប៉ុន្តែការដាក់តាំងបង្ហាញនេះ បាននាំឲ្យមន្ត្រីក្រុង និងអ្នកស្រុកខ្លះ មិនសប្បាយចិត្តនោះឡើយ។កាលពីថ្ងៃសុក្រ ក្រុមហ៊ុនបានដំឡើងឡូហ្គោអក្សរ «X» នៅលើដំបូលនៃទីស្នាក់ការកណ្តាល Market Street របស់ខ្លួន រហូតនាំឲ្យមានការខឹងសម្បាពីអ្នកជិតខាង ដែលបានត្អូញត្អែរអំពីភ្លើងដែលរំខាន ហើយនាយកដ្ឋានអធិការកិច្ចអគារ San Francisco បាននិយាយថា ខ្លួនកំពុងស៊ើបអង្កេតលើរចនាសម្ព័ន្ធនេះ។ការផ្លាស់ប្តូរនេះ បានធ្វើឡើងបន្ទាប់ពីការប្រកាសរបស់លោក Musk ដែលជាមហាសេដ្ឋីមានគំនិតប្លែកៗ និងដែលបានទិញក្រុមហ៊ុននេះ កាលពីខែតុលា ក្នុងតម្លៃ ៤៤ពាន់លានដុល្លារ ដោយលោកបានប្រាប់ថា ក្រុមហ៊ុន ដែលទើបនឹងដាក់ឈ្មោះថ្មី នឹងបន្តនៅក្នុងទីក្រុង San Francisco ហើយបានបន្ថែមថា ការរក្សាឡូហ្គោអក្សរ X នៅទីក្រុង San Francisco អាចជាសញ្ញាដ៏ល្អសម្រាប់ទីក្រុង ដែលតស៊ូដើម្បីទទួលបានមកវិញផ្នែកទេសចរណ៍ និងអាជីវកម្ម ដែលបាត់បង់ក្នុងអំឡុងពេលមានជំងឺរាតត្បាត។ប៉ុន្តែមិនមែនអ្នករស់នៅក្រុង San Francisco ទាំងអស់ សុទ្ធតែចង់បានមេត្រីភាពរបស់លោក Musk នោះទេ។ អ្នករស់នៅក្បែរអាគារនោះ កាលពីចុងសប្តាហ៍ បានថតវីដេអូនៃពន្លឺចេញពីអក្សរ X ដ៏ធំ លោតញាប់ និងញ័រៗ ដោយមានអ្នកខ្លះរិះគន់ថា ជាពន្លឺ ដែលបង្កការរំខាន។នាយកដ្ឋានអធិការកិច្ចអគារនៃទីក្រុង San Francisco បានបើកការស៊ើបអង្កេតលើរចនាសម្ព័ន្ធនេះ ដោយនិយាយថា វាអាចបំពានលើច្បាប់អនុញ្ញាត៕

អគ្គនាយកដ្ឋានពន្ធដារ លើកឡើងថា ភ្នាក់ងារសេវាកម្មពន្ធដារ ចូលរួមចំណែកដល់ការប្រមូលពន្ធ

ភ្នំពេញ៖ អគ្គនាយកដ្ឋានពន្ធដារ លើកឡើងថា មានក្រុមហ៊ុន/សហគ្រាស ដែលជាភ្នាក់ងារសេវាកម្មពន្ធដារ មានចំនួនជិត ៤០០ បានកំពុងចូលរួមចំណែក ជួយសម្រួលដល់ការប្រើប្រាស់សេវាពាក់ព័ន្ធនឹងពន្ធដារ លើការបំពេញ បែបបទពន្ធដារ ដាក់លិខិតប្រកាសពន្ធ បង់ប្រាក់ពន្ធប្រចាំខែ និងប្រចាំឆ្នាំជាដើម ដើម្បីចូលរួមលើកកម្ពស់ដល់ប្រសិទ្ធភាពនៃការប្រមូលពន្ធ។អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ចេញសេចក្តីជូនដំណឹង ស្តីពីបញ្ជីក្រុមហ៊ុន ឬសហគ្រាស ដែលទទួល បានអាជ្ញាបណ្ណ ជាភ្នាក់ងារសេវាកម្មពន្ធដារ និងមានសុពលភាព, គិតត្រឹមថ្ងៃទី ១៧ ខែកក្កដា ឆ្នាំ២០២៣ អគ្គនាយកដ្ឋានពន្ធដារ មានភ្នាក់ងារសេវាកម្មពន្ធដារ ចំនួន ៣៨៧ ក្រុមហ៊ុន/សហគ្រាស ដែលភ្នាក់សេវាកម្មទាំងនោះ បានកំពុងជួយសម្រួលដល់ការប្រើប្រាស់សេវា ពាក់ព័ន្ធនឹងពន្ធដារដូចជា៖ ការបំពេញបែបបទពន្ធដារ, ដាក់លិខិតប្រកាសពន្ធ, បង់ប្រាក់ពន្ធប្រចាំខែ, និងប្រចាំឆ្នាំជាដើម។ ការបង្កើតឲ្យ មានជាភ្នាក់ងារនេះ គឺដើម្បីចៀសវាងការប្រើប្រាស់សេវាពាក់ព័ន្ធ នឹងពន្ធដារ ពីបុគ្គលដែលគ្មានអាជ្ញាប័ណ្ណ។ជុំវិញភ្នាក់ងារសេវាកម្មពន្ធដារនេះ ចំពោះបុគ្គលដែលប្រកបវិជ្ជាជីវៈជាភ្នាក់ងារសេវាកម្មពន្ធដារ ដោយគ្មានអាជ្ញាបណ្ណ ត្រូវផ្តន្ទា ទោសដាក់ពន្ធនាគារពី ១ ខែ ទៅ ១ ឆ្នាំ និងពិន័យជាប្រាក់ពី ១០ លានរៀល ដល់ ២០ លានរៀល ក្នុងនោះចំពោះអ្នកជាប់ពន្ធតាមរបប ស្វ័យប្រកាស ដែលទទួលការផ្គត់ផ្គង់សេវាកម្មពន្ធដារ ពីបុគ្គលដែលមិនមែនជាភ្នាក់ងារសេវាកម្មពន្ធដារ ដែលធ្វើសកម្មភាពអាជីវកម្មជា ភ្នាក់ងារសេវាកម្មពន្ធដារ ដោយគ្មានអាជ្ញាបណ្ណ ត្រូវទទួលរងនូវការពិន័យជាប្រាក់ប្រមាណ ៥ លានរៀលផងដែរ ។ភ្នាក់ងារសេវាកម្មពន្ធដា អាចធ្វើការផ្គត់ផ្គង់សេវាទាក់ទិន នឹងពន្ធដារ ដល់អ្នកជាប់ពន្ធតាមរបបស្វ័យប្រកាសផង និងអ្នកជាប់ពន្ធមិនស្ថិតក្នុងរបបស្វ័យប្រកាសផង ក្នុងនោះអ្នកជាប់ពន្ធដែលមិន នៅក្នុងរបបស្វ័យប្រកាស អាចទទួលបានការផ្គត់ផ្គង់សេវាទាក់ទិននឹងពន្ធដារ ដោយបុគ្គលដទៃទៀតក្រៅពីភ្នាក់ងារសេវាកម្មពន្ធដារ៕អត្ថបទ៖ សុន រ៉ាឌី

វិស័យឯកជន រំពឹងថា ក្នុងអាណត្តិថ្មី នៃរដ្ឋសភា វិស័យដឹកជញ្ជូននិងមានភាពមមាញឹកជាងមុន

ភ្នំពេញ៖ វិស័យឯកជន រំពឹងថា នៅក្នុងអាណត្តិថ្មី នៃរដ្ឋសភា កម្ពុជានឹងអាចស្រូបយកសក្តានុពលវិនិយោគ មកបណ្តាក់ទុនកាន់ច្រើនថែមទៀត ដែលជាផ្នែកមួយ នឹងធ្វើវិស័យដឹកជញ្ជូនក្នុងប្រព័ន្ធភស្តុភារកម្មនៅកម្ពុជា កាន់តែមមាញឹក នៅលើសេវាដឹកជញ្ជូន។ឧកញ៉ា ស៊ិន ចន្ធី ប្រធានសមាគមភស្ដុភារកម្មកម្ពុជា លើកឡើងក្នុងកិច្ចសម្ភាសជាមួយភ្នាក់ងារអ្នកយកព័ត៌មាន ស្តីពីវិស័យដឹកជញ្ជូនក្នុងប្រព័ន្ធភស្តុភារកម្មនៅកម្ពុជា នៅក្នុងអាណត្តិថ្មី នៃរដ្ឋសភា នៅថ្ងៃទី២៧ខែកក្កដា ឆ្នាំ២០២៣នេះថា ស្របពេលការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ប្រកបដោយជោគជ័យ និងពោរពេញទៅដោយលទ្ធិប្រធិបតេយ្យ និងស្របតាមសារដ៏ខ្ពង់ខ្ពស់របស់សម្តេចតេជោ ហ៊ុន សែន , ឯកឧត្តមបណ្ឌិត ហ៊ុន ម៉ាណែត នឹងចាប់ផ្ដើមធ្វើជានាយករដ្ឋមន្ត្រី នៅថ្ងៃទី ២២ ខែ សីហា ឆ្នាំ២០២៣ខាងមុខនេះ, លោកឧកញ៉ា បានថ្លែងនូវការអបអរសាទរ និងគំាទ្រពេញទំហឹង ព្រោះយុវជនគឺជាទំពាងស្នងឫស្សី និងពោពេញទៅដោយសមត្ថភាព ដើម្បីដឹកនាំនាវាកម្ពុជាឲ្យកាន់តែរីកចម្រើន។ជុំវិញការគិតគូរដ៏ខ្ពង់ខ្ពស់របស់សម្តេចតេជោ, ឧកញ៉ា រំពឹងថា នៅក្នុងអាណត្តិថ្មី នៃរដ្ឋសភា កម្ពុជាកាន់តែរីកចម្រើន និងសំបូររុងរឿងកាន់តែខ្លាំងក្លាថែមទៀត បន្ទាប់ពីកម្ពុជាបានបង្ហាញពីស្ថិរភាពនយោបាយ តាមរយៈនៃការបោះឆ្នោត និងក្រោយបោះឆ្នោត ដោយបានបង្ហាញដល់ពិភពលោក ជាពិសេសបានកំពុងបង្កើតនូវទំនុកចិត្តដល់វិនិយោគិនបរទេស ឲ្យមកបណ្តាក់ទុនកាន់តែច្រើន។ ឧកញ៉ា ស៊ិន ចន្ធី បន្ថែមថា វិស័យដឹកជញ្ជូន គឺផ្សារភ្ជាប់និងការវិនិយោគ ប្រសិនកម្ពុជាទទួលបានឱកាសវិនិយោគកាន់តែច្រើន និងធ្វើឲ្យការដឹកជញ្ជូនក៏កាន់តែមមាញឹក នៅក្នុងការផ្តល់សេវារបស់ខ្លួន។ជុំវិញវិស័យដឹកជញ្ជូននេះ, ឧកញ៉ា ស៊ិន ចន្ធី ថ្លែងឲ្យដឹងថា បើគិតក្នុងឆមាសទី ១ ឆ្នាំ២០២៣ ចំពោះការធ្វើពាណិជ្ជកម្ម ក៏ដូចការដឹកជញ្ជូន មិនទាន់មានការល្អប្រសើរនៅឡើយទេ ក្នុងនោះចំពោះវិស័យដឹកជញ្ជូន បើធៀបក្នុងរយៈពេលដូចគ្នាឆ្នាំ ២០២២ ឃើញថាមានការកើនឡើង តែបើធៀបមុននិងវិបត្តិជំងឺកូវីដ ១៩ និងសង្រ្គាមរុស្សី-អ៊ុយក្រែន គឺនៅបន្តធ្លាក់ចុះនៅឡើយ, តែទោះបីយ៉ាងណា សមាគមមានក្តីរំពឹងថា វិស័យដឹកជញ្ជូនភស្តុភារកម្មនៅកម្ពុជា នឹងមានការរីកចម្រើនកាន់តែខ្លាំងក្លា នៅក្នុងអាណត្តិទី ៧ នៃរដ្ឋសភាថ្មីនេះ៕អត្ថបទ៖ សុន រ៉ាឌី

រដ្ឋមន្ត្រីកសិកម្មលើកទឹកចិត្តក្រុមហ៊ុនវៀតណាម អភិវឌ្ឍន៍បច្ចេកទេស និងការកែច្នៃជ័រកៅស៊ូ ដើម្បីឆ្លើយតបតម្រូវការទីផ្សារ

ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបសម្តែងការគួរសម និងពិភាក្សាការងារជាមួយលោកអគ្គនាយកសម្ព័ន្ធឧស្សាហកម្មកៅស៊ូវៀតណាម ដើម្បីជជែកគ្នា លើការអភិវឌ្ឍលើវិស័យកៅស៊ូ។ក្រោយចប់ជំនួបការងារនេះ ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៧ កក្កដា ឆ្នាំ២០២៣នេះ បានឲ្យដឹងថា ក្នុងកិច្ចជំនួបនេះ ឯកឧត្តមរដ្ឋមន្ត្រី បានថ្លែងនូវការអបអរសាទរចំពោះក្រុមហ៊ុនទាំង១៧ ដែលមានលទ្ធផលល្អនៃវិនិយោគវិស័យកៅស៊ូនៅក្នុងប្រទេសកម្ពុជា។ ជាមួយគ្នានេះដែរ ឯកឧត្តម បានណែនាំក្រុមហ៊ុនឱ្យយកចិត្តទុកដាក់គិតគូរពីការអភិវឌ្ឍបច្ចេកទេសកៅស៊ូ និងការកែច្នៃជ័រកៅស៊ូ ដើម្បីទទួលបាននូវតម្លៃបន្ថែម និងកាន់តែមានប្រសិទ្ធភាព និងនិរន្តរភាពសេដ្ឋកិច្ច។ លើសពីនេះទៀត ក្រុមហ៊ុនត្រូវពិនិត្យលទ្ធភាព និងពិចារណាលើការកំណត់យុទ្ធសាស្ត្រ ជាពិសេសគម្រោងជំនួបពិភាក្សាជាមួយរដ្ឋមន្ត្រីនៃក្រសួងកសិកម្មវៀតណាម នាពេលខាងមុខ ដើម្បីពិនិត្យលទ្ធភាពនៃកិច្ចសហប្រតិបត្តិការ ការកំណត់លើការផលិតទំនិញ ដើម្បីផ្គត់ផ្គង់ទីផ្សារ និងទទួលបានចំណេញជាមួយគ្នារវាងប្រទេសទាំងពីរ៕

បណ្ដាញសង្គម

ព័ត៌មានថ្មីៗ

ព្យុះខ្សាច់បានវាយប្រហារតំបន់ស៊ីនជាំងរបស់ប្រទេសចិន

ប្រធានាធិបតីបារាំង ស្វាគមន៍ការបើកច្រកសមុទ្រ Hormuz ឡើងវិញនៅក្នុងកិច្ចប្រជុំពហុភាគី

អូស្ត្រាលី និងជប៉ុនចុះហត្ថលេខាលើកិច្ចសន្យាដើម្បីចាប់ផ្តើមកិច្ចព្រមព្រៀងនាវាចម្បាំងតម្លៃ៧ពាន់លានដុល្លារ

អ៊ុយក្រែនត្រៀមខ្លួនរួចជាស្រេចសម្រាប់កិច្ចប្រជុំថ្នាក់ដឹកនាំជាមួយរុស្ស៊ីក្រោមការសម្របសម្រួល

តម្លៃប្រេងឆៅធ្លាក់ចុះជាង ១០ ភាគរយ ខណៈច្រកសមុទ្រហ័រមូសបើកដំណើរការឡើងវិញ

ពលរដ្ឋលីបង់ភៀសខ្លួនពីសង្គ្រាមសម្រុកវិលត្រឡប់ទៅភាគខាងត្បូងវិញនៅថ្ងៃទីពីរនៃបទឈប់បាញ់ជាមួយអ៊ីស្រាអែល

អ្នកស្រុក Manipur របស់ឥណ្ឌាប្រមូលផ្ដុំដោយកាន់គប់ភ្លើង ជុំវិញការផ្ទុះដ៏សាហាវដែលបានសម្លាប់កុមារពីរនាក់

ពិធីអបអរសាទរបុណ្យចូលឆ្នាំថ្មីប្រពៃណីខ្មែរ រៀបចំដោយសមាគមនិស្សិតខ្មែរនៅប្រទេសជប៉ុន

អាមេរិកបន្តលើកលែងទណ្ឌកម្មប្រេងរុស្ស៊ី ក្រោយមានសម្ពាធពីប្រទេសដែលកំពុងដោះស្រាយវិបត្តិតម្លៃប្រេងក្នុងពេលមានសង្គ្រាមអ៊ីរ៉ង់

អ៊ីរ៉ង់គំរាមបិទច្រកសមុទ្រហ័រមូស (Hormuz) ប្រសិនបើអាមេរិកនៅតែបន្តបិទកំពង់ផែរបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877