BTV NEWS

សម្ដេចធិបតី៖ កម្ពុជាជ្រើសរើសយកយន្តការ UNCLOS ដោយសារថៃលុបចោល MOU ២០០១ ជាឯកតោភាគី

សម្ដេចធិបតី៖ កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីគេបានអះអាង

សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ

រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែនការយុទ្ធសាស្ត្រអភិវឌ្ឍន៍ជាតិ

ព័ត៌មានសំខាន់ៗ

កាកបាទក្រហមកម្ពុជា ទទួលថវិកាពីសមាគមឧកញ៉ាកម្ពុជាចំនួន ១,០០៩,៩៩៩ ដុល្លារ អាមេរិក ក្នុងទិវា ៨ឧសភា ២០២៦

នៅក្នុងឱកាសអបអរសាទរខួបលើកទី ១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីមនុស្សធម៌» កាកបាទក្រហមកម្ពុជា បានរៀបចំពិធីសំណេះសំណាល និងទទួលថវិកាឧបត្ថម្ភពីថ្នាក់ដឹកនាំ សមាជិក សមាជិកា នៃសមាគមឧកញ៉ាកម្ពុជា។ ពិធីដ៏មានអត្ថន័យនេះ ត្រូវបានប្រារព្ធឡើងយ៉ាងឱឡារិកនៅសាល A ជាន់ទី៣ នៃទីស្នាក់ការកណ្តាល ក្រោមអធិបតីភាពដ៏ខ្ពង់ខ្ពស់របស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្រ្តៃយ៍ និងជាតំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ ជាកិច្ចចាប់ផ្តើមនៃកម្មវិធី នាវេលាម៉ោង ៣ រសៀល ថ្ងៃទី១៣ ខែមិថុនា ឆ្នាំ២០២៦ នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្រ្តៃយ៍ កាកបាទក្រហមកម្ពុជា បានអញ្ជើញដល់ទីស្នាក់ការកណ្តាល និងបានមានប្រសាសន៍ស្វាគមន៍យ៉ាងកក់ក្តៅ ចំពោះវត្តមានរបស់ប្រតិភូ នៃ សមាគមឧកញ៉ាកម្ពុជា ដែលបានញ៉ាំងឱ្យបរិយាកាស នៃពិធីទាំងមូលពេញប្រៀបទៅដោយស្នាមញញឹម និងស្មារតី សាមគ្គីភាពមនុស្សធម៌យ៉ាងជ្រាលជ្រៅ។ នៅក្នុងឱកាសនោះផងដែរ លោកអ្នកឧកញ៉ា លាង ឃុន អនុប្រធានក្រុមប្រឹក្សាភិបាលសមាគមឧកញ៉ាកម្ពុជា និងជា «ប្រធានប្រតិភូ» បានឡើងមានប្រសាសន៍ថ្លែងអំណរគុណយ៉ាងជ្រាលជ្រៅចំពោះ កាកបាទក្រហមកម្ពុជា ដែលបានផ្តល់កិត្តិយស និងឱកាសដល់សមាគម បានចូលរួមចំណែកក្នុងសកម្មភាពមនុស្សធម៌ដ៏ឧត្តុង្គឧត្តមជាលើកទី៥ បើគិតតាំងពីឆ្នាំ២០២៣ ដែលមានថវិកាសរុបចំនួន ៦,៤៦០,២២០ដុល្លារ។ ជាមួយគ្នានោះ លោកអ្នកឧកញ៉ាប្រធានប្រតិភូ ក៏បានជម្រាបជូនអង្គពិធីទាំងមូល អំពីសមិទ្ធផលសំខាន់ៗជាច្រើន ដែលសមាគមឧកញ៉ាកម្ពុជា សម្រេចបានក្នុងរយៈពេលកន្លងមក ក្នុងការរួមចំណែកជួយដល់សង្គមជាតិ និងការអភិវឌ្ឍសេដ្ឋកិច្ច។ បន្ទាប់ពីបានស្តាប់នូវរបាយការណ៍សង្ខេបរួចមក លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្រ្តៃយ៍កាកបាទក្រហមកម្ពុជា បានមានប្រសាសន៍សំណេះសំណាលយ៉ាងស្និទ្ធស្នាល ដោយលោកជំទាវបណ្ឌិត បានលើកឡើង និងបង្ហាញពីសមិទ្ធផលសំខាន់ៗជាច្រើន បែបវឌ្ឍនភាព ដែលកាកបាទក្រហមកម្ពុជា សម្រេចបានក្នុងការជួយសង្គ្រោះប្រជាពលរដ្ឋរងគ្រោះ ជនភៀសសឹក និងងាយរងគ្រោះបំផុតនៅទូទាំងប្រទេស ដោយមិនប្រកាន់វណ្ណៈ ពណ៌សម្បុរ ឬនិន្នាការនយោបាយឡើយ។ ទន្ទឹមនឹងនេះ លោកជំទាវបណ្ឌិត អនុប្រធានអចិន្រ្តៃយ៍ ក៏បានពាំនាំនូវព្រះរាជបណ្តាំសាកសួរសុខទុក្ខពីសំណាក់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសនៃកាកបាទក្រហមកម្ពុជា និងសម្តេចកិត្តិព្រឹទ្ធបណ្ឌិត ប្រធាន និងបានថ្លែងអំណរគុណយ៉ាងជ្រាលជ្រៅបំផុត ទៅកាន់ក្រុមថ្នាក់ដឹកនាំ សមាជិក សមាជិកា នៃសមាគមឧកញ៉ាកម្ពុជាទាំងអស់ ដែលជានិច្ចកាលតែងតែបង្ហាញទឹកចិត្តសប្បុរសធម៌ ជួយឧបត្ថម្ភគាំទ្រទាំងកម្លាំងកាយ កម្លាំងចិត្ត និងថវិកា ដល់កាកបាទក្រហមកម្ពុជា។ លោកជំទាវបណ្ឌិត បានគូសបញ្ជាក់ថា ថវិកាដែលបានមកពីការបរិច្ចាគនាពេលនេះ គឺពិតជាមានតម្លៃមហាសាល និងជាប្រភពទុនដ៏សំខាន់ ក្នុងការបន្តសកម្មភាពមនុស្សធម៌ ជួយដល់ជនរងគ្រោះដោយគ្រោះមហន្តរាយផ្សេងៗឱ្យទាន់ពេលវេលា។ បន្ទាប់ពីបញ្ចប់ប្រសាសន៍សំណេះសំណាល ពិធីប្រគល់ និងទទួលថវិកា ក៏ត្រូវបានប្រារព្ធឡើង ក្រោមបរិយាកាសរីករាយ និងស្និទ្ធស្នាលជាទីបំផុត ដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានទទួលថវិកាពីតំណាងសមាគមឧកញ៉ាកម្ពុជា ព្រមទាំងបានប្រគល់ជូនវិញនូវបណ្ណថ្លែងអំណរគុណ ដើម្បីជាការដឹងគុណ និងកោតសរសើរ ចំពោះទឹកចិត្តសប្បុរសធម៌របស់សមាគម។ កម្មវិធីទាំងមូលត្រូវបានបញ្ចប់ទៅដោយជោគជ័យ និងស្និទ្ធស្នាល តាមរយៈការថតរូបអនុស្សាវរីយ៍រួមគ្នា រវាងថ្នាក់ដឹកនាំកាកបាទក្រហមកម្ពុជា និងប្រតិភូនៃសមាគមឧកញ៉ាកម្ពុជា។ ស្មារតីនៃទិវា ៨ ឧសភា ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីមនុស្សធម៌» នាថ្ងៃនេះ គឺពិតជាបានស្តែងឱ្យឃើញយ៉ាងច្បាស់ ពីវប្បធម៌នៃការចែករំលែក និងសាមគ្គីភាពដ៏រឹងមាំរបស់សង្គមជាតិកម្ពុជា៕ អត្ថបទ៖ សំ ងីម

TOP STORY | សម្ដេចតេជោ ហ៊ុន សែន៖ «ពេលណាព្រំដែនគោកកម្ពុជា-ថៃនៅតែបន្តបិទ គ្រប់មុខទំនិញទាំងអស់ដែលនាំចូលឆ្លងកាត់ព្រំដែនគោកគឺទំនិញខុសច្បាប់ ជាទំនិញរត់ពន្ធ ជាទំនិញបំផ្លាញជាតិ និងប្រមាថជាតិ

សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានចង្អុលប្រាប់ចំណុចសំខាន់ដែលពាក់ព័ន្ធនឹងទំនិញថៃថា ពេលណាព្រំដែនគោករវាងកម្ពុជា-ថៃនៅតែបន្តបិទ គ្រប់មុខទំនិញទាំងអស់ដែលនាំចូលឆ្លងកាត់ព្រំដែនគោក គឺទំនិញខុសច្បាប់ ជាទំនិញរត់ពន្ធ ជាទំនិញបំផ្លាញជាតិ និងប្រមាថជាតិ។តាមរយៈបណ្ដាញសង្គមនៅព្រឹកថ្ងៃទី១៣ ខែមិថុនា ឆ្នាំ២០២៦នេះ សម្ដេចតេជោ ហ៊ុន សែន ប្រមុខរដ្ឋស្ដីទី បានសរសេរយ៉ាងដូច្នេះថា «អាចមានការបកស្រាយខុស ឬយល់តែធ្វើមិនយល់ ឬជាការបំពាន ឬជាអំពើពុករលួយ ឬជាប្រមាថជាតិសាសន៍ឯងពីសំណាក់មន្ត្រីខិលខូច និងឈ្មួញ ទុច្ចរិតទើបទំនិញថៃថ្មីៗ បាននាំចូលមកប្រើប្រាស់នៅកម្ពុជា។ ដើម្បីបានជាពន្លឺ និងឈប់ល្ងង់តទៅទៀត ខ្ញុំសូមចង្អុលប្រាប់ចំណុចសំខាន់មួយគឺ (ពេលណាព្រំដែនគោករវាងកម្ពុជា-ថៃនៅតែបន្តបិទ) គ្រប់មុខទំនិញទាំងអស់ដែលនាំចូលឆ្លងកាត់ព្រំដែនគោកគឺទំនិញខុសច្បាប់ជាទំនិញរត់ពន្ធ ជាទំនិញបំផ្លាញជាតិ និងប្រមាថជាតិ។ ពេលដែលព្រំដែនគោកត្រូវបានបិទមនុស្សក៏មិនអាចឆ្លងបានទំនិញក៏មិនអាចឆ្លងបាន។»សម្ដេចតេជោ បានគូសបញ្ជាក់ផងដែរថា សម្រាប់មនុស្ស និងទំនិញដែលឆ្លងកាត់តាមផ្លូវទឹក និងផ្លូវអាកាស ពិសេសទំនិញ គឺជាសមត្ថកិច្ចរបស់គយដែលជាអ្នកកំណត់ថា ខុសច្បាប់ ឬត្រូវច្បាប់ព្រោះផ្លូវទឹកតាមកំពង់ផែសមុទ្រ និងផ្លូវអាកាសតាម(ព្រលានយន្តហោះ) ភាគីទាំង២កម្ពុជា-ថៃនៅដំណើការជាធម្មតា។សម្ដេចតេជោបន្តទៀតថា ត្រូវប្រមូលផ្តុំចាត់វិធានការលើទំនិញដែលឆ្លងកាត់ព្រំដែនគោកព្រោះមិនអាចបិទព្រំដែនគោកហើយទំនិញចូលបាននោះឡើយ និងសូមកុំនិយាយថា ទំនិញសល់ក្នុងស្តុកលក់មិនទាន់អស់ព្រោះទំនិញខ្លះផលិតឆ្នាំ២០២៦ ក្រោយព្រំដែនគោកត្រូវបានភាគីថៃបិទ ១ឆ្នាំមុនមកម្លេះហេតុអ្វីមានលើទីផ្សារកម្ពុជា។ ម្យ៉ាងទៀតប្រសិនបើទំនិញនោះវាសល់ពិតមែនក៏ល្មមផុតកំណត់រយៈពេលប្រើប្រាស់ហើយ។ អ្នកប្រើប្រាស់ គឺជាចៅហ្វាយកុំមានប្រាក់ទិញហើយទុកឲ្យគេមើលងាយទាំងសាម៉ីខ្លួន ទាំងជាតិសាសន៍៕

សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ

ក្នុងឱកាសអញ្ជើញចុះពនិត្យវឌ្ឍនភាពរោងចក្រការផលិតអាវក្រោះ និងសម្ភារយោធា ម៉ាក DSS នៅខេត្តបាត់ដំបង នារសៀលថ្ងៃទី១១ ខែមិថុនា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្ដីទី និងជាអគ្គភស្តុភារជាន់ខ្ពស់សម្រាប់កម្លាំងប្រដាប់អាវុធ បានមានប្រសាសន៍ថា អាវក្រោះ និងសម្ភារយោធាម៉ាក DSS សុទ្ធតែមានគុណភាព ហើយអាវការពារនេះនាយករដ្ឋមន្រ្តីបានសាករួចហើយ។ សម្ដេចបានបញ្ជាក់ថា ការផលិតសម្ភារយោធារបស់កម្ពុជានេះ គឺមិនមែនសម្រាប់យកទៅឈ្លានពានអ្នកណានោះទេ តែដើម្បីពង្រឹងខាងវិស័យការពារជាតិ ខណៈចាប់តាំងពីមានរោងចក្រ DSS នេះ ទាំងកងកម្លាំងយោធា និងនគរបាលពុំបាននាំសម្ភារៈ ឬអាវក្រោះមកពីប្រទេសក្រៅទៀតនោះទេ។សម្តេចតេជោ ហ៊ុន សែន បញ្ជាក់បន្តថា ត្រឹមរយៈពេលជាង ៣ខែមកនេះ រាជរដ្ឋាភិបាល បានបញ្ជាទិញឯកសណ្ឋានយោធាពីរោងចក្រ DSS មានតម្លៃប្រមាណ ៧,៥ លានដុល្លាររួចហើយ។ សម្ដេច នឹងបន្តជួយរាជដ្ឋាភិបាល លើការផលិតសម្ភារៈដទៃទៀត ដែលទាក់ទងនឹងវិស័យសន្តិសុខជាតិ ការពារជាតិ។ សម្ដេចបញ្ជាក់យ៉ាងច្បាស់ថា ដូនតាខ្មែរធ្លាប់ធ្វើដល់អង្គរវត្តកាលពីបុរាណ ដូច្នេះការផលិតត្រឹមសម្ភារៈយោធា នឹងមិនលំបាកសម្រាប់កូនខ្មែរជំនាន់នេះឡើយ។សម្តេចតេជោ ហ៊ុន សែន មានប្រសាសន៍ថា រោងចក្រផលិតឯកសណ្ឋានយោធា DSS បង្កើតឡើងដោយកូនខ្មែរ មិនត្រឹមតែបានបំពេញតម្រូវការសម្រាប់យោធា និងកងកម្លាំងរបស់កម្ពុជាប៉ុណ្ណោះទេ ប៉ុន្ដែថែមទាំងអាចលក់ចេញទៅបណ្ដាប្រទេសជាមិត្តមួយចំនួនទៀតផង បន្ទាប់ពីប្រទេសនោះមានការបញ្ជាក់ច្បាស់លាស់ពីរដ្ឋាភិបាលរបស់គេអំពីការ បញ្ជាទិញ។ជុំវិញបញ្ហាជម្លោះព្រំដែន កម្ពុជា-ថៃ សម្តេចតេជោ ហ៊ុន សែន ប្រកាសថាកម្ពុជានៅតែរក្សាជំហរ ប្រកាន់ខ្ជាប់នូវដំណោះស្រាយសន្តិវិធី គឺមិនវ៉ៃគេ ប៉ុន្តែក៏មិនមែនសន្តិវិធីចំពោះនរណាដែលមកវ៉ៃកម្ពុជាដែរ។ សម្តេចបានច្រានចោលការចោទប្រកាន់ថា កម្ពុជាទិញរថក្រោះហើយបញ្ជូនទៅកាន់ព្រំដែន កម្ពុជាប្រកាន់ខ្ជាប់ឥរិយាបទក្នុងការដោះស្រាយបញ្ហាដោយសន្តិវិធី។គួររំលឹកផងដែរថា កាលពីពេលកន្លងទៅក្នុងពិធីបើកអនុសំវច្ឆរមហាសន្និបាតមន្ដ្រីសង្ឃទូទាំងប្រទេស លើកទី៣៣ សម្តេចតេជោ ហ៊ុន សែន ធ្លាប់បានលើកឡើងថា រោងចក្រផលិតអាវក្រោះ និងសម្ភារៈយោធាដែលកម្ពុជាផលិតម៉ាក « DSS » នេះគឺ សម្តេច គឺជាថៅកែរោងចក្រនេះតែម្តង៕

សម្ដេចតេជោ ហ៊ុន សែន អញ្ជើញពិនិត្យមើលរោងចក្រ ផលិតសម្ភារៈយោធា DSS និងសំណេះសំណាលជាមួយកម្មករ កម្មការិនី

នៅរសៀល ថ្ងៃព្រហស្បតិ៍ ១១រោច ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹង ថ្ងៃទី១១ ខែមិថុនា ឆ្នាំ២០២៦ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា បានអញ្ជើញមកពិនិត្យមើលដំណើរការរោងចក្រផលិតសម្ភារៈយោធា DSS នៅខេត្តបាត់ដំបង និងជួបសំណេះសំណាលជាមួយកម្មករ កម្មការិនី ប្រមាណជាង ២០០នាក់។ រោងចក្ររោងចក្រ DSS ជារោងចក្រខ្មែរ ផលិតដល់កូនខ្មែរ និងកំពុងដំណើរការផលិតសម្ភារៈយោធានៅក្នុងខេត្តបាត់ដំបងនេះ។ នៅក្នុងឱកាសអញ្ជើញពិនិត្យចង្វាក់ផលិតកម្ម នៃរោងចក្រ DSS ផលិតសម្ភារៈយោធានេះ សម្ដេចតេជោ ហ៊ុន សែន បានអញ្ជើញពិនិត្យមើលគ្រប់ដំណើរការនៃការផលិតសម្ភារៈយោធាទាំងអស់ ដែលក្នុងនោះរួមមានទាំងវត្ថុធាតុដើម រហូតដល់ផលិតផលសម្រេច។ រោងចក្រនេះមានផលិតសម្ភារៈយោធាមួយចំនួនដូចជា អាវក្រោះ មួកការពារសុវត្ថិភាព។ ល។ មានប្រសាសន៍សំណេះសំណាលជាមួយបងប្អូនកម្មករ កម្មការិនី នាឱកាសនេះ សម្ដេចតេជោ ហ៊ុន សែន បានមានប្រសាសន៍ថា ការផលិតសម្ភារៈយោធារបស់កម្ពុជានេះ គឺមិនមែនសម្រាប់យកទៅឈ្លានពានអ្នកណានោះទេ ហើយក្នុងរយៈពេលចុងក្រោយនេះ ពោលគឺក្រោយមានរោងចក្រ DSS នេះ ទាំងកងកម្លាំងយោធា និងនគរបាលគឺពុំបាននាំសម្ភារៈ ឬអាវក្រោះមកពីប្រទេសក្រៅទៀតទេ គឺប្រើប្រាស់សម្ភារៈរបស់ខ្មែរផ្ទាល់តែម្ដង។ សម្តេចតេជោក៏បានណែនាំឱ្យមានការលក់សម្ភារៈឯកសណ្ឋានយោធាដែលកម្ពុជាផលិតបាននៅទីនេះ លក់ទៅក្រៅប្រទេសនៅថ្ងៃខាងមុខ ប៉ុន្តែការលក់ទៅក្រៅប្រទេសនេះ ធ្វើបានតែទៅប្រទេសដែលរដ្ឋាភិបាលប្រទេសនោះបានបញ្ជាក់ជាមួយកម្ពុជាតែប៉ុណ្ណោះ។ សម្ដេចក៏បានមានប្រសាសន៍អំពីគុណភាពអាវក្រោះដែលផលិតនៅកម្ពុជានេះ គឺមានស្តង់ដារអន្តរជាតិ ហើយអាវក្រោះនេះ ក៏ត្រូវបាននាយករដ្ឋមន្ត្រីកម្ពុជាសាករួចហើយដែរ។ សម្ដេចបន្តទៀតថា ហើយក្នុងរយៈពេលប្រមាណ៣ខែមកនេះ រាជរដ្ឋាភិបាលកម្ពុជា ក៏បានបញ្ជាទិញឯកសណ្ឋានយោធាពីរោងចក្រ DSS នេះ មានតម្លៃជាទឹកប្រាក់ប្រមាណ ៧,៥ លានដុល្លាររួចហើយ។នៅរសៀលនេះ ថ្លែងសារពិសេសពីខេត្តបាត់ដំបង សម្ដេចតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា បានណែនាំឱ្យមានការស្រាវជ្រាវរកអ្នកពាក់ព័ន្ធនឹងនាំសាច់បង្កករបស់ថៃ ចូលមកប្រទេសកម្ពុជា ដោយក្នុងនោះសូម្បីតែអ្នកបើកឡាន ក៏មិនឱ្យរួចខ្លួនដែរ។ សម្តេចតេជោបានប្រាប់ឱ្យអ្នកលក់សាច់បង្កកពីប្រទេសថៃ សូមឱ្យដកខ្លួនជាបន្ទាន់ កុំឱ្យមានការពាក់ព័ន្ធនឹងរឿងនេះតទៅទៀត។ សម្តេចបន្តទៀតថា ថៅកែដែលនាំឱ្យសាច់បង្កកថៃ ចូលមកកម្ពុជា សម្តេចនឹងជួបផ្ទាល់ សួរចម្លើយឱ្យដឹងថានរណាដែលអនុញ្ញាតឱ្យនាំចូលមកកម្ពុជា ហើយនាំយកមកពីណា ព្រោះខាងថៃថាកម្ពុជាលួចនាំចូលរបស់គេ។ពាក់ព័ន្ធទៅនឹងការផលិតសម្ភារៈយោធា សម្តេចតេជោ ថ្លែងថា សម្តេចនឹងបន្តជួយរដ្ឋាភិបាលកម្ពុជា លើការផលិតសម្ភារៈដទៃទៀត ដែលទាក់ទងនឹងវិស័យសន្តិសុខជាតិ និងវិស័យការពារជាតិ។ សម្តេចបន្តថា ដូនតាខ្មែរធ្លាប់ធ្វើដល់អង្គរវត្តកាលពីបុរាណ ដូច្នេះការផលិតត្រឹមសម្ភារៈយោធា នឹងមិនលំបាកសម្រាប់កូនខ្មែរជំនាន់នេះឡើយ។ សម្តេចបានបញ្ជាក់ថា កម្ពុជាមិនដែលឈ្លានពាន មិនដែលគំរាមកំហែងប្រទេសណានោះទេ។ កម្ពុជាធ្លាប់នាំកងទ័ពចេញពីប្រទេសខ្លួន ប៉ុន្តែជាការចូលរួមរក្សាសន្តិភាពជាមួយ UN។កម្ពុជាតែងតែប្រកាន់ខ្ជាប់នូវ ដំណោះស្រាយដោយសន្តិវិធី គឺមិនវ៉ៃគេ ប៉ុន្តែក៏មិនមែនសន្តិវិធីចំពោះនរណាដែលមកវ៉ៃកម្ពុជានោះដែរ។ កម្ពុជាប្រកាន់ខ្ជាប់ឥរិយាបថក្នុងការដោះស្រាយបញ្ហាដោយសន្តិវិធី។ សម្តេចបានមានប្រសាសន៍បន្តទៀតថា គោលដៅរបស់ប្រទេសកម្ពុជាសម្រាប់ការផលិតសម្ភារៈយោធាត្រូវតែមានកម្រិតផ្គត់ផ្គង់ក្នុងប្រទេសឱ្យគ្រប់គ្រាន់ជាមុនសិន ទើបអនុញ្ញាតឱ្យមានការនាំចេញទៅក្រៅប្រទេស។ ជាចុងក្រោយ សម្ដេចតេជោបានជូនពរដល់បងប្អូនកម្មករ កម្មការិនី ទាំងអស់ដែលបម្រើការងារនៅរោងចក្រផលិតសម្ភារៈយោធា DSS ទាំងអស់ សូមជួបតែសេចក្ដីសុខ សេចក្ដីចម្រើន និងជោគជ័យគ្រប់ភារកិច្ច៕

សម្ដេចតេជោឱ្យបើកការស៊ើបអង្កេតអ្នកពាក់ព័ន្ធនាំសាច់បង្កកពីថៃចូលមកម្ពុជាមិនឱ្យរួចខ្លួនឡើយ

ក្នុងឱកាសអញ្ជើញ ចុះត្រួតពិនិត្យវឌ្ឍនភាពរោងចក្រផលិតឯកសណ្ឋានយោធា ក្នុងខេត្តបាត់ដំបង នារសៀលថ្ងៃទី១១ ខែមិថុនា ឆ្នាំ២០២៦នេះ, សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានបញ្ជាក់ជាថ្មីថា ក្រោយពេលសម្ដេចត្រលប់មកដល់ភ្នំពេញវិញនឹងជួបជាមួយឈ្នួញដែលនាំចាស់បង្កកពីប្រទេសថៃចូលមកកម្ពុជា, សម្ដេចបញ្ជាក់ថា ត្រូវតែស៊ើបង្កេតលើករណីនេះចំពោះអ្នកពាក់ព័ន្ធទាំងអស់ ទាំងឈ្មួញ និងមន្រ្ដីពាក់ព័ន្ធមិនឱ្យរួចខ្លួនឡើយ។ សម្ដេចតេជោ បញ្ជាក់ជាថ្មី ឱ្យរកឱ្យឃើញ និងបើកការស៊ើបអង្កេតឱ្យអស់ ចំពោះអ្នកពាក់ព័ន្ធនឹងការនាំចូលទំនិញ និងសាច់បង្កករបស់ថៃចូលមកកម្ពុជា។ សម្ដេចតេជោបញ្ជាក់ពីបាត់តំបងនៅរសៀលនេះ ឱ្យបញ្ឈប់ និងដកខ្លួនជាបន្ទាន់ចំពោះអ្នកពាក់ព័ន្ធនឹងនាំទំនិញ និងសាច់បង្កកពីប្រទេសថៃនេះ ហើយទៅរករបរផ្សេង ពីព្រោះយើងមិនដឹងថាគុណភាពនៃទំនិញរបស់ថៃនោះមានគុណភាពយ៉ាងម៉េចនោះទេ។ សូមបញ្ជាក់ថា រយៈពេលពីថ្ងៃ នៅថ្ងៃទី១០-១១ ខែមិថុនានេះ សមត្ថកិច្ចបានរកឃើញ ឃ្លាំងស្តុកចំនួនពីរកន្លែងក្នុងខណ្ឌឫស្សីកែវ និងខណ្ឌព្រែកព្នៅ រាជធានីភ្នំពេញ ដែលបាននាំចូលសាច់បង្កកប្រមាណជាង ២០០តោន ដែលឈ្មួញនាំមកពីប្រទេសថៃ។ ចំណែកម្ចាស់ទីតាំងត្រូវបានសមត្ថកិច្ចនាំខ្លួនទៅសាកសួរដើម្បីរកអ្នកពាក់ព័ន្ធផ្សេងទៀត៕

សម្ដេចតេជោ៖កម្ពុជាមិនមានទម្លាប់ទៅឈ្លានពានប្រទេសណាទេ មានតែនាំទ័ពចេញទៅរក្សាសន្ដិភាព

ក្នុងឱកាសអញ្ជើញ ចុះត្រួតពិនិត្យវឌ្ឍនភាពរោងចក្រផលិតឯកសណ្ឋានយោធា ក្នុងខេត្តបាត់ដំបង នារសៀលថ្ងៃទី១១ ខែមិថុនា ឆ្នាំ២០២៦នេះ, សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា មានប្រសាសន៍បញ្ជាក់ថាកម្ពុជាមិនមានទម្លាប់ទៅឈ្លានពានប្រទេសណាទេ។ កម្ពុជាក៏មិនធ្លាប់នាំកងទ័ពចេញពីព្រំដែនទៅឈ្លានពាននរណាដែរ ប៉ុន្ដែកម្ពុជាធ្លាប់នាំកងទ័ពចេញពីព្រំដែនទៅរក្សាសន្ដិភាពក្រោមឆ័ត្ររបស់អង្គការសហប្រជាជាតិតែប៉ុណ្ណោះ។សម្ដេចតេជោ ហ៊ុន សែន បានលើកឡើងថា ការបង្ហាញរបស់កម្ពុជា ចំពោះការផលិតសម្ភារៈយោធានាពេលនេះ ក៏មិនមែនដើម្បីបង្អួតអំពីកម្លាំងយោធារបស់កម្ពុជាដែរ ប៉ុន្ដែជាការបង្ហាញពីការគិតគូរលើការពង្រឹងវិស័យការពារជាតិរបស់កម្ពុជាតែប៉ុណ្ណោះ។ សម្ដេចបានលើកឡើងដែរ កាលពីពេលថ្មីៗនេះ មានព័ត៌មានថៃបានផ្សាយពីការទិញរថភាសដែករបស់កម្ពុជាចំនួន ៣០គ្រឿងថា ជាការបង្អួតកម្លាំងចង់ធ្វើសង្គ្រាម, ប៉ុន្ដែសម្ដេចតេជោបានពន្យល់វិញថា កម្ពុជាមិនមែនទើបតែមានរថពាសដែកតែចំនួន ៣០គ្រឿងនេះទេ គឺមានច្រើនជាងនេះប៉ុន្ដែមិនមែនទិញមកដើម្បីឈ្លានពានប្រទេសណាទេ គឺទុកសម្រាប់ការពារសន្ដិសសុខជាតិតែប៉ុណ្ណោះ។ សម្ដេចតេជោ បានបញ្ជាក់ថាប្រទេសខ្លះនៅជុំវិញកម្ពុជា មានទាំងលទ្ធភាពផលិតសព្វាវុធ រថភាសដែកដោយខ្លួនឯងថែមទៀត និងឈានរហូតទៅបញ្ជាទិញយន្តហោះចម្បាំង, តែកម្ពុជាត្រឹមផលិតសម្ភាសរៈយោធាដើម្បីការពារជាតិតែប៉ុណ្ណោះ។ សម្ដេចតេជោ បានគូសបញ្ជាក់ជាថ្មីថា រាជរដ្ឋាភិបាលកម្ពុជា ក្នុងនាមជារដ្ឋស្រឡាញ់សន្តិភាព និងគោរពច្បាប់អន្តរជាតិ តែងតែប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែននៃគណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

សម្ដេចតេជោ៖«ហ៊ុន សែន នឹងឈានទៅជួយរដ្ឋាភិបាលលើការផលិតសម្ភារៈវិស័យការពារជាតិ»

សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា មានប្រសាសន៍បញ្ជាក់ថា សម្ដេចនឹងឈានទៅជួយរាជរដ្ឋាភិបាល លើការផលិតសម្ភារៈដែលទាក់ទងទៅនឹងវិស័យការពារជាតិ និងសន្តិសុខជាតិរបស់កម្ពុជា។សម្ដេចតេជោ ហ៊ុន សែន មានប្រសាសន៍ណែនាំបែបនេះក្នុងឱកាសអញ្ជើញ ចុះត្រួតពិនិត្យវឌ្ឍនភាពរោងចក្រផលិតឯកសណ្ឋានយោធា ក្នុងខេត្តបាត់ដំបង នារសៀលថ្ងៃទី១១ ខែមិថុនា ឆ្នាំ២០២៦នេះ។ សម្ដេចតេជោ បានថ្លែងថា រាជរដ្ឋាភិបាលកម្ពុជា ជាពិសេសសម្ដេចផ្ទាល់មិនទុកឱ្យនរណាមកមើលងាយកម្ពុជាបានទេ, មិនទុកឱ្យនរណាប្រមាថកម្ពុជាទេ ហើយកម្ពុជាត្រូវមានសេចក្ដីថ្លៃថ្នូរលើការងារការពារជាតិមាតុភូមិរបស់ខ្លួន។សម្ដេចតេជោបានថ្លែងបញ្ជាក់ថា ដ៏រាបណាសម្ដេចនៅ គឺត្រូវតែពង្រឹងវិស័យការពារជាតិនេះឱ្យរឹងមាំ ហើយកម្ពុជាពង្រឹងវិស័យការពារជាតិនេះ មិនមែនដើម្បីទៅឈ្លានពាននរណាទេ ប៉ុន្ដែគឺពង្រឹងសន្ដិសុខជាតិរបស់ខ្លួនតែប៉ុណ្ណោះ។ ក្នុងឱកាសនោះ សម្ដេចតេជោ បានគូសបញ្ជាក់ថា មធ្យោបាយការពារជាតិកម្ពុជាក៏កំពុងបន្តធ្វើ និងផលិតរឿងជាច្រើនទៀតដែរ ដើម្បីពង្រឹងលើវិស័យការពារជាតិរបស់កម្ពុជា។

សម្តេចតេជោ ហ៊ុន សែន ជួបសំណេះសំណាលជាមួយក្រុមប្រឹក្សា មន្ត្រីនៃមន្ទីរអង្គភាពនានាជុំវិញខេត្តបន្ទាយមានជ័យ

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា នៅព្រឹកថ្ងៃទី១១ ខែមិថុនា ឆ្នាំ២០២៦នេះ អញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តបន្ទាយមានជ័យ ចំនួន ១០៣៥នាក់ នៅសាលប្រជុំក្នុងសាលាខេត្តបន្ទាយមានជ័យ។ មានប្រសាសន៍សំណេះសំណាលនាឱកាសនោះ សម្តេចតេជោ ហ៊ុន សែន កោតសរសើរ និងទទួលស្គាល់ចំពោះការដឹកនាំរបស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យ កិច្ចខិតខំប្រឹងប្រែងរបស់ក្រុមការងារចុះមកជួយនៅខេត្តបន្ទាយមានជ័យ និងកិច្ចខិតខំប្រឹងប្រែងរបស់ក្រុមការងារចំពោះកិច្ចដឹកនាំដោយឯកឧត្តម គន់ គីម និងកសាងដោយឯកឧត្តម ខេង សាមេធ និងការចូលរួមដោយក្រសួងឧស្សហកម្ម សិប្បកម្ម និងនវានុវត្តន៍លើការតភ្ជាប់បណ្តាញទឹក ក្រសួងរ៉ែ និងថាមពល លើការតភ្ជាប់អគ្គិសនី និងក្រសួងគ្រប់ផ្នែកពាក់ព័ន្ធ ដែលបានជួយដល់ប្រជាពលរដ្ឋភៀសសឹក និងការរៀបចំលំនៅដ្ឋានបណ្តោះអាសន្ន។ សម្តេចតេជោ ហ៊ុន សែន បានណែនាំដល់អាជ្ញាធរនិងមន្ត្រីខេត្តបន្ទាយមានជ័យ ត្រូវយកចិត្តទុកដាក់អោយបានដិតដល់ចំពោះគ្រួសារយុទ្ធជនពលី យុទ្ធជនពលី និងយុទ្ធជននៅសមរភូមិ មើលការខុសត្រូវលើបញ្ហានេះ ខណៈអ្នកនៅខាងមុខយកទ្រូងការពារគ្រាប់ដើម្បីក្តីសុខរបស់យើង ដូច្ចេះយើងត្រូវយកចិត្តទុកដាក់លើគ្រួសាររបស់ពួកគាត់។ សម្តេចតេជោ ណែនាំដល់មន្ត្រីទាំងអស់ ខិតខំរក្សាស្ថេរភាពនយោបាយ សន្តិសុខសណ្តាប់ធ្នាប់សង្គម ពិសេសត្រូវយកចិត្តទុកដាក់ខ្ពស់លើការបង្ក្រាបស្កេមអនឡាញ ខណៈបច្ចុប្បន្នមានការបែកសំបុកធំ ត្រូវប្រយ័ត្នការបំបែកទៅជាក្រុមតូចៗតាមដានអោយដិតដល់ និងបញ្ហាក្មេងទំនើង បន្តអនុវត្តគោលនយោបាយភូមិឃុំមានសុវត្ថិភាព។ សម្តេចតេជោអំពាវនាវអោយខិតខំសន្សំសំចៃ លើការប្រើប្រាស់ផ្សេងៗ ហើយទាក់ទងការរួមចំណែកក្នុងក្របខណ្ឌម៉ាក្រូសេដ្ឋកិច្ចគឺការប្រមូលចំណូលចូលរដ្ឋ សម្តេចតេជោណែនាំដល់ខេត្តនៅតាមព្រំដែន ខិតខំក្នុងការប្រមូលពន្ធ ក្នុងនោះមានចំណូលថ្នាក់ជាតិ និងចំណូលថ្នាក់ក្រោមជាតិ រួមទាំងចំណូលមិនមែនសារពើពន្ធ។ សម្តេចតេជោ ជំរុញបន្ថែមឲ្យអនុវត្តវិធានការការពារធនធានធម្មជាតិនៅក្នុងមូលដ្ឋាន ខណៈខេត្តបន្ទាយមានជ័យមានធនធានធម្មជាតិនិងបេតិកភណ្ឌដែរ ដូច្ចេះត្រូវចូលរួមក្នុងការការពារ។ សម្តេចតេជោ ណែនាំអោយយកចិត្តទុកដាក់ចំពោះអតីតយុទ្ធជននិងនិវត្តជនក្នុងមូលដ្ឋាន សួរសុខទុក្ខដល់ពួកគាត់ ក្នុងនោះរួមទាំងគ្រួសារអតីតយុទ្ធពលពលី ក៏ត្រូវយកចិត្តទុកដាក់លើប្រពន្ធកូនរបស់ពួកគាត់។ សម្រាប់ខេត្តបន្ទាយមានជ័យ ទោះទីនេះមិនមានរោងចក្រសហគ្រាសច្រើន ប៉ុន្តែត្រូវយកចិត្តទុកដាក់លើការគ្រប់គ្រង រួមទាំងអ្នកប្រកបរបរសេដ្ឋកិច្ចក្រៅប្រព័ន្ធ។ សម្តេចតេជោប្រមុខរដ្ឋស្តីទី នៅតែបន្តជំរុញអោយមន្ត្រីទាំងអស់ ខិតខំបំពេញការងារដោយស្មោះត្រង់ កាត់បន្ថយ និងលុបបំបាត់នូវអំពើខុសឆ្គង ដែលនាំអោយមានការថ្នាំងថ្នាក់ពីប្រជាជន។ សម្តេចតេជោបន្តថា អ្វីដែលប្រជាជនត្រូវការ គឺការផ្តល់សេវាសាធារណៈជូនប្រជាពលរដ្ឋ។ បើតាមរបាយការណ៍របស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានឲ្យដឹងថា ខេត្តបន្ទាយមានជ័យ មាន៩ក្រុង-ស្រុក ៦៧ឃុំ-សង្កាត់ ៦៦៧ភូមិ និងប្រជាពលរដ្ឋចំនួន ២០៨.៧៨៥ គ្រួសារ ស្មើនឹងមនុស្សរាយ៨៧៩.៥៨៥នាក់ (ស្រី៤៣១.៦៣០នាក់)។ ខេត្ត មានព្រំប្រទល់ខាងជើងទល់នឹងខេត្តឧត្តរមានជ័យ ខាងកើតទល់នឹងខេត្តសៀមរាប ខាងត្បូង ទល់នឹងខេត្តបាត់ដំបង ខាងលិចជាប់នឹងប្រទេសថៃ ប្រវែងសរុប១៥៣គ.ម មានក្រុងស្រុកចំនួន៥៖ ក្រុងប៉ោយប៉ែត ស្រុកម៉ាឡៃ ស្រុកអូរជ្រៅ ស្រុកស្វាយចេក និងស្រុកថ្មពួក។ មានច្រកទ្វារព្រំដែនចំនួន៤គឺ៖ ច្រកទ្វារព្រំដែនអន្តរជាតិ ប៉ោយប៉ែត ច្រកទ្វាព្រំដែនអន្តរជាតិស្ទឹងបត់ ដែលមុនពេលសង្គ្រាមច្រកទាំងពីរនេះ សម្រាប់ភ្ញៀវទេសចរណ៍ជាតិ- អន្តរជាតិចេញ-ចូល និងការដោះដូរទំនិញ និងច្រកទ្វារព្រំដែនតំបន់ចំនួន២គឺ ច្រកទ្វារព្រំដែនតំបន់ម៉ាឡៃ ស្ថិតក្នុង ស្រុកម៉ាឡៃ និងច្រកទ្វារព្រំដែនតំបន់បឹងត្រកួន ស្ថិតក្នុងស្រុកថ្មពួក ជាច្រកដែលប្រជាពលរដ្ឋនៅតាមតំបន់ព្រំដែន ចេញ-ចូលដោះដូរទំនិញ និងកសិផលផ្សេងៗ។ល។ បច្ចុប្បន្នច្រកទ្វារទាំងបួននេះត្រូវបានបិទទាំងស្រុង ប៉ុន្តែ រាល់ កសិផល និងផលិតផលផ្សេងៗ ត្រូវបានដឹកទៅកាន់ប្រទេសវៀតណាម និងប្រទេសជាមិត្តផ្សេងៗទៀតជំនួសវិញ។ សូមបញ្ជាក់ថា ដំណើរអញ្ជើញចុះមូលដ្ឋានរបស់សម្តេចតេជោ ហ៊ុន សែន ក្នុងខេត្តបន្ទាយមានជ័យនេះជាជំនួបលើកទី១៤ហើយ និងសរុបមកដល់ពេលនេះមាន សមាជិកក្រុមប្រឹក្សា ខេត្ត ក្រុង ស្រុក ខណ្ឌ ឃុំ សង្កាត់ និងមន្ត្រីនៃមន្ទីរអង្គភាពនានានៅជុំវិញខេត្តចំនួន១៦ហើយ ដែលបានជួបសំណេះសំណាលជាមួយសម្តេចប្រមុខរដ្ឋស្តីទី ខណៈខេត្តជាប់គ្នាខ្លះ ត្រូវរួមបញ្ចូលគ្នា៕

សម្តេចតេជោ ច្រានចោលការផ្សាយព័ត៌មានមិនពិតរបស់ថៃ និងបញ្ជាក់ជាថ្មីថាជម្រើសកម្ពុជាដោះស្រាយបញ្ហាព្រំដែនដោយសន្តិវិធី មិនមែនប្រើកម្លាំងទេ

សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា ច្រានចោលចំពោះការផ្សាយព័ត៌មានមិនពិតរបស់សារព័ត៌មានថៃដែលបានដកស្រង់ប្រសាសន៍សម្ដេចខុសពីការពិតពាក់ព័ន្ធនឹងការប្រើស់ប្រាស់យន្តការដោះស្រាយបញ្ហាព្រំដែនជាមួយថៃ ដែលពួកគេបានផ្សាយមិនពិតថា កម្ពុជាប្រើប្រាស់ទាំងមធ្យោបាយយោធា និងសន្ដិវិធីលើការដោះស្រាយ ប៉ុន្ដែជាប្រសាសន៍ពិតប្រាកដរបស់សម្ដេចតេជោ និងជំហររបស់កម្ពុជា គឺជ្រើសរើសយកតែដំណោះស្រាយសន្តិវិធីស្របតាមយន្តការច្បាប់អន្តរជាតិប៉ុណ្ណោះ។ តាមរយៈ សារពិសេសពីខេត្តសៀមរាប ក្នុងឱកាសជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានា ជុំវិញខេត្តសៀមរាប-ឧត្តមានជ័យ នាព្រឹកថ្ងៃទី១០ ខែមិថុនា ឆ្នាំ២០២៦នេះ សម្ដេចតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា បានផ្ញើសារទៅអ្នកសារព័ត៌មានថៃ និងចោទសួរថា ហេតុអ្វីបានជាសារព័ត៌មានថៃ ផ្សព្វផ្សាយនូវអ្វីដែលជាការមិនពិត? ខណៈដែលការមិនពិតនេះ គឺមានប្រសាសន៍របស់សម្ដេចទាំងខ្លឹមសារនៅក្នុងវីដេអូទាំងស្រុងទៅទៀត ដែលព័ត៌មានក្លែងក្លាយនោះបានបង្កើតឱ្យមានការភ័ន្តច្រឡំទៅដល់លោកនាយករដ្ឋមន្រ្ដីថៃ អនុទីន ឆានវីរៈកុល តាំងតែពីនៅឯកិច្ចប្រជុំនៅប្រទេសវៀតណាមឯណោះ។ សម្ដេចតេជោ បានផ្ដាំផ្ញើទៅអ្នកកាសែតថៃទាំងឡាយត្រូវមើលឱ្យច្បាស់ ពីព្រោះការផ្សាយព័ត៌មានមិនពិតរបស់ពួកគេ បានបង្កើតនូវការភ័ន្តច្រឡំដ៏ធំមួយដែលមិនគួរឱ្យកើតមានតាមរយៈអ្នកសារព័ត៌មានទេ។ សម្ដេចតេជោ បានបញ្ជាក់ថា នៅថ្ងៃទី៩ ខែមិថុនា ម្សិលមិញ សម្ដេចបានលើកឡើងពិតប្រាកដអំពីបញ្ហារវាងម្ខាងដំណោះស្រាយយោធា និងម្ខាងទៀតដំណោះស្រាយសន្ដិវិធី។ ពេលនោះសម្ដេចបានសួរទៅប្រជាពលរដ្ឋថា តើចង់ដោះស្រាយដោយដំណោះស្រាយយោធាទេ? ព្រោះជម្រើសរបស់យើងវាមានតែពីរទេ មួយយើងត្រូវដណ្ដើមដីរបស់យើងមកវិញដោយប្រើកម្លាំងយោធា ឬមួយយើងត្រូវដណ្ដើមមកវិញតាមមធ្យោបាយសន្ដិវិធី? សម្ដេចតេជោបញ្ជាក់ថា ពេលនោះប្រជាពលរដ្ឋរបស់កម្ពុជាបានលើកដៃគ្រប់ៗគ្នា គឺមិនចង់បានយោធាទេ។ សម្ដេចតេជោបានថ្លែងថា «អីចឹងទេ ខ្ញុំសូមអំពាវនាវឱ្យក្បាលម៉ាស៊ីនថា កែតម្រូវទៅលើព័ត៌មានដែលខ្លួនចុះផ្សាយ យកពាក្យពេជន៍ខ្ញុំទៅនិយាយឱ្យច្បាស់ ហើយខ្ញុំសង្ឃឹមថា អ្នកនយោបាយថៃមិនល្ងង់ដល់ថ្នាក់ជឿនូវព័ត៌មានភូតកុហក់ ដែលអ្នកសារព័ត៌មានថៃបង្កើតឡើងទេ។ អ្នកសារព័ត៌មានប្រទេសថៃ ក៏មានអ្នកចេះខ្មែរដែរ អីចឹងឱ្យគេបកប្រែទៅ តើមានសម្ដីណាមួយដែលខ្ញុំនិយាយថា ប្រើទាំងមធ្យោបាយសន្ដិវិធី និងប្រើទាំងកម្លាំងប្រដាប់អាវុធ ខ្ញុំអត់និយាយមួយម៉ាត់ទេ។ ផ្ទុយទៅវិញ ខ្ញុំប្រឆាំងជាមួយនឹងការប្រើប្រាស់កម្លាំង ដើម្បីវាយកាន់កាប់ត្រឡប់មកវិញ ហើយខ្ញុំទុកឱ្យបក្សប្រឆាំងនៅកម្ពុជា ដាក់ចេញនូវគោលនយោបាយ ប្រកួតប្រជែងគោលនយោបាយអំពីបញ្ហា ដំណោះស្រាយព្រំដែនរវាងកម្ពុជា និងថៃ»។ ក្នុងឱកាសនោះ សម្ដេចតេជោ បានបញ្ជាក់ថា អីឡូវនេះ ទាំងភាគីកម្ពុជា និងភាគីថៃ វិលវល់ជាមួយនឹងព័ត៌មានក្លែងក្លាយ ជួនកាលកម្ពុជាក៏ទទួលព័ត៌មានខុសអំពីគេបញ្ចេញព័ត៌មានក្លែងក្លាយ ជួនកាលខាងថៃយល់ខុស អំពីការដែលគេបញ្ចេញព័ត៌មានក្លែងក្លាយ ដូច្នេះព័ត៌មាននេះគួរតែត្រូវស្វែងរកនូវព័ត៌មានពិតមួយដើម្បីបង្កើតនូវទំនុកចិត្ត ហើយចៀសវាងការភ័ន្តច្រឡំ ខណៈការភ័ន្តច្រឡំគឺគ្រោះថ្នាក់ណាស់៕

សម្តេចតេជោ ហ៊ុន សែន៖ យើងសម្រេចយកវិធីចរចា ដើម្បីចៀសវាងការចោទប្រកាន់ថាយើងបំពានកិច្ចព្រមព្រៀងឈប់បាញ់

ភ្នំពេញ៖ “ទឹកដីដែលទាហានថៃកំពុងឈ្លានពាន និងកាន់កាប់ដោយខុសច្បាប់ គឺត្រូវតែទាមទារយកមកវិញ ប៉ុន្តែការទាមទារនោះគឺមានតែផ្លូវពីរប៉ុណ្ណោះ គឺទី១ ការប្រើប្រាស់កម្លាំង និងទី២ ការចរចាដោយសន្តិវិធី! ហើយយើងជ្រើសយក ការចរចាដោយសន្តិវិធី”។សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានថ្លែងដូច្នេះក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋភៀសសឹកនៅមណ្ឌលបណ្តោះអាសន្ន ឃុំស្លក្រាម ស្រុកស្វាយចេក ខេត្តបន្ទាយមានជ័យ ជាង ៣ ០០០គ្រួសារ កាលពីព្រឹកថ្ងៃទី០៩ ខែមិថុនា ឆ្នាំ២០២៦។សម្តេចតេជោ ហ៊ុន សែន បានពន្យល់បន្ថែមថា៖ “ការជ្រើសយកវិធីចរចា ពុំមែនមានន័យថា យើងគ្មានសមត្ថភាពវាយដណ្តើម យកដីមកវិញនោះទេ ប៉ុន្តែបើយើងវាយមុនដើម្បីដណ្តើមយកមកវិញនោះ គេនឹងចោទកម្ពុជាយើងបានបំពានកិច្ចព្រមព្រៀងបទឈប់បាញ់។ ដូច្នេះកម្ពុជាត្រូវតែអត់ធ្មត់ ដើម្បីចរចាដោយសន្តិវិធី”។បន្ថែមពីលើនេះ សម្តេចតេជោ ក៏បានបញ្ជាក់ថា៖ “ប្រសិនបើយើងជ្រើសយកផ្លូវយោធាវាយយកទឹកដីខ្មែរ ដែលថៃបានឈ្លានពានយកទៅកាន់កាប់នោះ វានឹងរុញច្រានការប្រយុទ្ធឱ្យទៅកាន់តែវែងឆ្ងាយ។ វាយយកមកបានហើយ ក៏មិនអាចឈរជើងបានដែរ គឺវានឹងត្រូវវាយទៅវាយមក ដូចនៅហ្គាហ្សា និងអ៊ីស្រាអែល និងប្រទេសខ្លះទៀត ដែលនឹងក្លាយជាជម្លោះតពូជ តជំនាន់ ជាក់ជាមិនខាន”។

បណ្ដាញសង្គម

ព័ត៌មានថ្មីៗ

លោក Trump ប្រាប់ពីកិច្ចចរចា «ល្អ» ជាមួយអ៊ីរ៉ង់ និងបញ្ជាក់ជាថ្មីពីការគំរាមវាយប្រហារគោលដៅនានា

ក្រុមគ្រួសារអ្នកដំណើរនៃជើងហោះហើរ MH370 ចង់បានការពិត ខណៈតុលាការចិនបើកសវនាការបណ្តឹងឧទ្ធរណ៍

ជប៉ុនស្នើឱ្យអ៊ីរ៉ង់អនុវត្ត «ភាពបត់បែនជាអតិបរិមា» ដើម្បីបន្ថយភាពតានតឹងនៅមជ្ឈិមបូព៌ាឱ្យបានឆាប់

រដ្ឋមន្ត្រីការពារជាតិអ៊ីស្រាអែល៖ យន្តហោះចម្បាំងអាមេរិកហោះចេញពីអ៊ីស្រាអែលទៅវាយប្រហារអ៊ីរ៉ង់

អ៊ូហ្គង់ដាប្រកាសគ្មានជំងឺអេបូឡា បន្ទាប់ពីអ្នកជំងឺចុងក្រោយចេញពីមន្ទីរពេទ្យ

ក្រុមអ្នកសង្កេតការណ៍អាស៊ានប្រចាំប្រទេសកម្ពុជា និង ប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ហ្វីលីពីនប្រចាំកម្ពុជា ធ្វើបទបង្ហាញ «ស្តីពីវឌ្ឍនភាពនៃការងារខណ្ឌសីមា និងបោះបង្គោលព្រំដែនរវាងកម្ពុជានិងថៃ»

កូរ៉េខាងត្បូងចេញការជូនដំណឹងបន្ទាន់ អំពីការសង្ស័យលេចធ្លាយផូស្វ័រ នៅមូលដ្ឋានទ័ពអាកាសអាមេរិក

វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់

រញ្ជួយដីកម្រិត ៥,៧រ៉ិចទ័រ ធ្វើឱ្យញ័រខេត្ត Qinghai របស់ប្រទេសចិន

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877