BTV NEWS

សម្ដេចធិបតី៖ កម្ពុជាជ្រើសរើសយកយន្តការ UNCLOS ដោយសារថៃលុបចោល MOU ២០០១ ជាឯកតោភាគី

សម្ដេចធិបតី៖ កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីគេបានអះអាង

សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ

រាជរដ្ឋាភិបាលបង្ហាញលទ្ធផលការងារឆ្នាំ២០២៥ សម្រាប់ការអនុវត្តផែនការយុទ្ធសាស្ត្រអភិវឌ្ឍន៍ជាតិ

ព័ត៌មានសំខាន់ៗ

ផ្ទះទេវតា១ខ្នង មានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត, សម្ដេចធិបតី និងលោកជំទាវបណ្ឌិត ត្រូវបានលោកជំទាវ ហ៊ុន ម៉ាណា ប្រគល់ជូនលោកតាចាស់ជរា នៅខេត្តកំពង់ធំ

នៅព្រឹកថ្ងៃចន្ទ ទី២២ ខែមិថុនា ឆ្នាំ២០២៦នេះ លោកជំទាវ ហ៊ុន ម៉ាណា អគ្គនាយិកា វិទ្យុ-ទូរទស្សន៍បាយ័ន បានអញ្ជើញប្រគល់អំណោយផ្ទះទេវតា១ខ្នងទៀត ដែលជាផ្ទះទី៣៣៤ ត្រូវបានផ្ដល់ជូនលោកតា ទឹង ឈុន អាយុ៧៨ឆ្នាំ រស់នៅភូមិត្នោតជុំ៤ ឃុំត្នោតជុំ ស្រុកបារាយណ៍ ខេត្តកំពង់ធំ។ លោកតាមានកូនចំនួន ៨នាក់ (ប្រុស២នាក់)។ លោកយាយដែលជាប្រពន្ធលោកតាបានស្លាប់ចោលលោកតាជាយូរឆ្នាំមកហើយ។ កូនប្រុសស្រីរបស់លោកតាមានប្តី ប្រពន្ធ រស់នៅបែកចេញពីលោកតារៀងៗខ្លួន និងសុទ្ធតែមានជីវភាពខ្វះខាតដូចៗគ្នា។ សព្វថ្ងៃនេះ កូនស្រីទី៧ ជាស្រ្តីមេម៉ាយមានកូន២នាក់ រស់នៅជាមួយលោកតា ដោយដើរធ្វើការស៊ីឈ្នួលគេដើម្បីផ្គត់ផ្គង់ជីវភាពប្រចាំថ្ងៃ។ ក្នុងឱកាសនោះ លោកជំទាវ បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលជានិច្ចកាលលោកទាំង៤ តែងគិតគូរពីសុខទុក្ខដល់ប្រជាពលរដ្ឋគ្រប់ទីកន្លែង និងគ្រប់ពេលវេលា។ បន្ថែមលើអំណោយផ្ទះខាងលើ លោកជំទាវ ក៏បានផ្តល់នូវប្រព័ន្ធទឹកស្អាត និងបំពាក់ភ្លើងសូឡានៅមុខផ្ទះ និងក្នុងផ្ទះជូនដល់លោកតាម្ចាស់ផ្ទះទៀតផង។ លោកជំទាវក៏បាននាំយកនូវអំណោយសម្តេចតេជោ និងសម្តេចកិត្តិព្រឹទ្ធបណ្ឌិតបន្ថែមមួយចំនួនទៀតផងដែរ រួមមាន ៖ អង្ករ១០០គីឡូក្រាម, ត្រីខ១កេស, មីចំនួន៥កេស, ទឹកដោះគោខាប់ ១កេស, ពួក១, ប្រេងកូឡូ១ប្រអប់ធំ, ប្រេងខ្យល់១ប្រអប់ធំ ,ចានដែក១, ឆ្នាំងតូច១, ឆ្នាំងធំ១, ខ្ទះឆា១, វែងឆា១, វែងបាយ១, វែងសំឡ១, ស្លាបព្រា និងសម១ឡូ, កំសៀវ១, ចានបាយចំនួន៥, ចានសម្លចំនួន៥, តែ ១ គីឡូក្រាម,ខ្នើយចំនួន២,មុងចំនួន២,ភួយចំនួន២,កន្ទេលចំនួន២,ស្ករសចំនួន៥គីឡូក្រាមទឹកស៊ីអុីវចំនួន៣យួរ,វិទ្យុ FM១គ្រឿង, ថ្មដាក់វិទ្យុចំនួន២ ស្បែកជើងចំនួន២គូរ,ថ្នាំនឹងច្រាសដុសធ្មេញចំនួន៥ឈុត,សាប៊ូដុំចំនួន១២ដុំតូច,ថ្នាំពេទ្យចំនួន៥ប្រអប់តូច,ខោអាវចំនួន២កំប្លេរ និងថវិកាចំនួន ៥០ម៉ឺនរៀល ព្រមទាំងអំណោយរបស់សម្ដេចតេជោ និងសម្ដេចកត្តិព្រឹទ្ធបណ្ឌិត ជាឃីត (កញ្ចប់ៗ) មានជាសម្ភារៈប្រើប្រាស់ សំលៀកបំពាក់ និងថវិកា ចែកជូនលោកយាយ លោកតាដែលបានចូលរួមនាឱកាសនោះ និងចែករទេះរុញសម្រាប់លោកយាយចាស់ជរា ពិការ ចំនួន២នាក់ផងដែរ។ ជាមួយគ្នានោះ លោកជំទាវ ក៏បានចែកកាតាប ដែលមានជាសម្ភារៈសិក្សាជាច្រើនមុខ ជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅដល់ក្មួយៗសិស្សានុសិស្សចំនួន១៧០នាក់៕

សម្ដេចធិបតី បញ្ជាក់ជាថ្មីជំហររបស់កម្ពុជាបន្តដោះស្រាយបញ្ហាព្រំដែនគោក និងសមុទ្រជាមួយថៃ ដោយសន្ដិវិធី និងច្បាប់អន្តរជាតិ និងបដិសេធជជែករឿងបើកច្រកព្រំដែនគោក

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុចា ក្នុងឱកាសអញ្ជើញចូលរួមកិច្ចប្រជុំកំពូលនៅប្រទេសរុស្ស៊ី បានឆ្លៀតជួបជជែកក្រៅផ្លូវការជាមួយ លោក Anutin Charnvirakul នាយករដ្ឋមន្ត្រីថៃ នៅទីក្រុងកាហ្សាន, សហព័ន្ធរុស្សី ដោយបានបញ្ជាក់ជាថ្មីជំហររបស់កម្ពុជាបន្តដោះស្រាយបញ្ហាព្រំដែនគោក និងសមុទ្រជាមួយថៃ ដោយសន្ដិវិធី និងច្បាប់អន្តរជាតិ ខណៈសម្ដេចបានបដិសេធជជែករឿងបើកច្រកព្រំដែនគោក។សម្ដេចធីបតីថ្លែថា ៖«ខ្ញុំបានឆ្លៀតជជែកគ្នាក្រៅផ្លូវការជាមួយ ឯកឧត្តម Anutin Charnvirakul នាយករដ្ឋមន្ត្រីថៃ នៅទីក្រុងកាហ្សាន, សហព័ន្ធរុស្សី។ ខ្ញុំបានលើកឡើងនូវចំណុចមួយចំនួនពាក់ព័ន្ធនឹងជំហររបស់កម្ពុជាក្នុងការដោះស្រាយបញ្ហាព្រំដែនកម្ពុជា-ថៃ»៖ ១. កម្ពុជាប្រកាន់ជំហរដោះស្រាយបញ្ហាព្រំដែនជាមួយថៃ ដោយសន្តិវិធី និងស្របតាមច្បាប់អន្តរជាតិ។ ២. ពាក់ព័ន្ធនឹងព្រំដែនសមុទ្រ គឺសូមភាគីទាំងពីរបន្តដោះស្រាយ តាមរយៈយន្តការ Compulsory Conciliation ក្រោម UNCLOS ដែលបាននិងកំពុងដំណើរការ។ ៣. ពាក់ព័ន្ធនឹងព្រំដែនគោក កម្ពុជាមកដល់ពេលនេះ នៅតែជ្រើសរើសយកការដោះស្រាយតាមយន្តការទ្វេភាគីដែលមានស្រាប់គឺ JBC និងផ្អែកលើកិច្ចព្រមព្រៀងដែលមានស្រាប់។ ប៉ុនែ្តកម្ពុជាជំរុញឱ្យភាគីថៃរៀបចំតែងតាំងប្រធានJBC ថៃ និងជំរុញឱ្យចាប់ផ្តើមដំណើរការចុះវាស់វែង និងខ័ណ្ឌសីមាព្រំដែនឱ្យបានឆាប់ ស្របតាមស្មារតីនៃសេចក្តីប្រកាសរួមថ្ងៃ ២៧ ធ្នូ ២០២៥ ចំណុចទី៣ ដែលភាគីទាំងពីរបានចុះហត្ថលេខា។ ៤. ពាក់ព័ន្ធនឹងការបើកច្រកព្រំដែនគោក មិនមានការចាំបាច់ក្នុងការជជែកគ្នាក្នុងពេលនេះទេ។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្ញើសារលិខិតអបអរសាទរ ថ្វាយសម្តេចព្រះវររាជមាតាជាតិខ្មែរ ត្រូវបានសហគមន៍ OB-PS ថ្វាយនូវពានសមាជិកភាពកិត្តិយសជើងឯក “Champions Award”

(ភ្នំពេញ)៖ នៅថ្ងៃទី ១៩ ខែមិថុនា ឆ្នាំ២០២៦ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានក្រាបបង្គុំទូលថ្វាយនូវសារលិខិតអបអរសាទរ ថ្វាយចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គត្រូវបានសហគមន៍ Olave Baden-Powell Society (OB-PS) ថ្វាយនូវ ពានសមាជិកភាពកិត្តិយសជើងឯក “Champions Award” នៅក្នុងឱកាសនៃមហាសន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំឆ្នាំលើកទី៤២ របស់សហគមន៍ (OB-PS) ដែលព្រះរាជាណាចក្រកម្ពុជាធ្វើជាម្ចាស់ផ្ទះ ថ្ងៃទី១៤-១៩ ខែមិថុនា ឆ្នាំ២០២៦ នៅខេត្តសៀមរាប។ សារលិខិតអបអរសាទរមានខ្លឹមសារទាំងស្រុងថា៖ «ខ្ញុំម្ចាស់ និងទូលព្រះបង្គំយើងខ្ញុំទាំងអស់គ្នា ជាសមាជិក សមាជិកានៃគណៈកម្មាធិការកណ្តាល ព្រមទាំងមន្ត្រី បុគ្គលិក អ្នកស្ម័គ្រចិត្ត និងយុវជនកាកបាទក្រហមកម្ពុជានៅទូទាំងប្រទេស មានសេចក្តីរំភើបរីករាយឥតឧបមា សូមព្រះបរមរាជានុញ្ញាតសម្តែងនូវអំណរសាទរយ៉ាងក្រៃលែង ចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គត្រូវបានសហគមន៍ Olave Baden-Powell Society (OB-PS) ថ្វាយនូវ ពានសមាជិកភាពកិត្តិយសជើងឯក “Champions Award” នៅក្នុងឱកាសនៃមហាសន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំឆ្នាំលើកទី៤២ របស់សហគមន៍ (OB-PS) ដែលព្រះរាជាណាចក្រកម្ពុជាធ្វើជាម្ចាស់ផ្ទះ ថ្ងៃទី១៤-១៩ ខែមិថុនា ឆ្នាំ២០២៦ នៅខេត្តសៀមរាប។ការទទួលបាននូវ “ពានសមាជិកភាពកិត្តិយសជើងឯក” នាពេលនេះ គឺជាសក្ខីកម្មឆ្លុះបញ្ចាំងពីព្រះរាជសកម្មភាពដ៏ឧត្តុង្គឧត្តម និងព្រះរាជហឫទ័យលះបង់ដ៏ធំធេងរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ជាពិសេស ព្រះរាជសកម្មភាពរបស់ព្រះអង្គបានធ្វើឱ្យព្រះរាជកិត្តិនាមកាន់តែល្បីរន្ទឺសុសសាយ ស្ញប់ស្ញែង ពោរពេញទៅដោយសេចក្តីគោរពស្រឡាញ់ដ៏ជ្រាលជ្រៅពីប្រជារាស្ត្រកម្ពុជា និងធ្វើឱ្យព្រះរាជាណាចក្រកម្ពុជា មានមោទនភាពជាទីបំផុត ទទួលបាននូវមហាកិត្តិយសធំធេងនៅលើឆាកជាតិ និងអន្តរជាតិ។ ក្នុងឱកាសដ៏មហាប្រសើរថ្លៃថ្លានេះ ខ្ញុំម្ចាស់ និងទូលព្រះបង្គំយើងខ្ញុំទាំងអស់គ្នា នៃកាកបាទក្រហមកម្ពុជាសូមព្រះបរមរាជានុញ្ញាតលំឱនកាយលើកហត្ថប្រណម្យបួងសួងដល់គុណព្រះរតនត្រ័យ កែវទាំងបី សូមមេត្តាប្រសិទ្ធពរជ័យ បវរមហាប្រសើរថ្លៃថ្លា ថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អពេញបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លាវាងវៃ និងមានព្រះជន្មាយុយឺនយូរ ជាងរយព្រះវស្សា ដើម្បីគង់ជាមហាម្លប់ដ៏ត្រជាក់ត្រជំសម្រាប់ប្រជារាស្ត្រកម្ពុជា ជាកូន ចៅ ចៅទួតរបស់ព្រះអង្គជ្រកកោន តរៀងទៅ។»ខាងក្រោមនេះជាសារលិខិតអបអរសាទររបស់សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត៖

កម្ពុជា-សហភាពសេដ្ឋកិច្ចអឺរ៉ុប-អាស៊ី (EAEU) ពិនិត្យ និង ពិចារណាលើកិច្ចព្រមព្រៀងពាណិជ្ជកម្មសេរី (FTA)

នារសៀលថ្ងៃទី១៨ ខែមិថុនា ឆ្នាំ២០២៦, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្តម Bakytzhan Sagintayev ប្រធានក្រុមប្រឹក្សាភិបាលនៃគណៈកម្មការសេដ្ឋកិច្ចអឺរ៉ុប-អាស៊ី (EEC) ក្នុងឱកាសអញ្ជើញចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-រុស្ស៊ី ខួបអនុស្សាវរីយ៍លើកទី៣៥ នៃទំនាក់ទំនងអាស៊ាន-រុស្ស៊ី នៅទីក្រុងកាហ្សាន សហព័ន្ធរុស្ស៊ី ដែលប្រព្រឹត្តទៅនៅថ្ងៃទី១៧-១៨ ខែមិថុនា ឆ្នាំ២០២៦។ក្នុងឱកាសនៃជំនួប, ឯកឧត្តមប្រធានក្រុមប្រឹក្សាភិបាលមានសេចក្តីសោមនស្សដែលបានជួបពិភាក្សាការងារជាមួយសម្តេចធិបតីនាយករដ្ឋមន្រ្តី និងបានសម្ដែងនូវការពេញចិត្តចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងសហភាពសេដ្ឋកិច្ចអឺរ៉ុប-អាស៊ី (EAEU) និងកម្ពុជា ក្នុងរយៈពេល១០ឆ្នាំកន្លងមកនេះ។ ជាការឆ្លើយតប, សម្ដេចធិបតី បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការរវាងកម្ពុជា និងសហភាព EAEU ជាពិសេសលើវិស័យពាណិជ្ជកម្ម។ ជាមួយគ្នានេះ, សម្ដេចធិបតីបានគូសបញ្ជាក់ថា កម្ពុជាបាននិងកំពុងធ្វើពិពិធកម្មទីផ្សារ និងដៃគូពាណិជ្ជកម្ម ដែលជាឱកាសល្អសម្រាប់ភាគីទាំងពីរពិនិត្យ និងពិចារណាលើកិច្ចព្រមព្រៀងពាណិជ្ជកម្មសេរី (FTA) ជាមួយគ្នា។ សម្ដេចធិបតីបានសង្កត់ធ្ងន់ថា ការធ្វើពាណិជ្ជកម្ម និងការវិនិយោគជាមួយកម្ពុជា មិនមែនសំដៅតែលើទីផ្សារកម្ពុជាដាច់ដោយឡែកនោះទេ ប៉ុន្តែកម្ពុជាគឺជាច្រកទ្វារដ៏សំខាន់ឆ្ពោះទៅកាន់ទីផ្សារតំបន់ និងអន្តរជាតិ តាមរយៈកិច្ចព្រមព្រៀង FTA ទ្វេភាគីនានាដែលកម្ពុជាមានស្រាប់, កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ក៏ដូចជាទីផ្សារអាស៊ានជាដើម។ ក្នុងន័យនេះ, ការសម្រេចបាននូវកិច្ចព្រមព្រៀង FTA ជាមួយកម្ពុជា នឹងក្លាយជាកាលានុវត្តភាពសម្រាប់សហភាព EAEU ក្នុងការពង្រីកទីផ្សាររបស់ខ្លួនទៅកាន់តំបន់ផ្សេងៗទៀតយ៉ាងទូលំទូលាយ។សម្តេចធិបតី និងឯកឧត្តមប្រធានក្រុមប្រឹក្សាភិបាល ក៏បានបន្តពិភាក្សា ដោយផ្តោតការយកចិត្តទុកដាក់លើការបង្កើនទំហំពាណិជ្ជកម្ម តាមរយៈការកំណត់វិស័យសក្តានុពល ដើម្បីជាផលប្រយោជន៍ទៅវិញទៅមក។ ជាមួយគ្នានេះ,សម្តេចធិបតី និងឯកឧត្តមប្រធានក្រុមប្រឹក្សាភិបាល យល់ស្របគ្នាថា កម្ពុជា និងសហភាព EAEU មានសក្តានុពលពាណិជ្ជកម្មជាច្រើនទៀតដែលភាគីទាំងពីរអាចពង្រីកកិច្ចសហប្រតិបត្តិការជាមួយគ្នា។ ក្នុងន័យនេះ, ការឈានទៅសម្រេចចុះហត្ថលេខាលើកិច្ចព្រមព្រៀង FTA នាពេលខាងមុខ នឹងជួយជំរុញកំណើនពាណិជ្ជកម្មរវាងកម្ពុជា និង សហភាព EAEU ឱ្យកាន់តែធំធេង និង ប្រសើរឡើង៕

លោកជំទាវបណ្ឌិត ពេជ ចន្ទមុន្នី ក្រាបបង្គំអបអរសាទរ សម្តេចព្រះមហាក្សត្រី ព្រះវររាជមាតាជាតិខ្មែរ ដែលទទួលបានការថ្វាយ «ពានសមាជិកភាពជើងឯក» ពី OB-PS

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឬទ្ធិនារីកម្ពុជា៖ «ខ្ញុំម្ចាស់សូមលំឱនកាយក្រាបថ្វាយបង្គំអបអរសាទរ និងថ្លែងអំណរព្រះគុណដោយការគោរពដ៏ខ្ពង់ខ្ពស់បំផុតថ្វាយ «សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល» ចំពោះព្រះបរមរាជានុញ្ញាតដ៏ខ្ពង់ខ្ពស់បំផុតឱ្យខ្ញុំម្ចាស់ជាព្រះរាជតំណាងទទួលជំនួសនូវ “ពានសមាជិកភាពជើងឯក (CHAMPIONS AWARD)” ដែលសហគមន៍ Olave Baden-Powell Society (OB-PS) ថ្វាយ «សម្តេចព្រះមហាក្សត្រី» អំឡុងពេលដែលកម្ពុជាកំពុងទទួលរៀបចំមហាសន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំឆ្នាំរបស់ សហគមន៍ OB-PS លើកទី៤២ នៅលើដែនដីអង្គរដ៏ពិសិដ្ឋ ខេត្តសៀមរាប ។ក្នុងវេលានេះដែរ នាងខ្ញុំក៏សូមអរគុណយ៉ាងជ្រាលជ្រៅចំពោះសេចក្តីទុកចិត្ត និងការផ្តល់កិត្តិយសដ៏ថ្លៃថ្លាដល់រូបនាងខ្ញុំដែលត្រូវបានតែងតាំងជា “ប្រធានថ្នាក់ជាតិនៃសហគមន៍ OB-PS ប្រចាំកម្ពុជា (National President of OB-PS Cambodia)” និងប្រគល់ “ពានសមាជិកភាពកិត្តិយសព្រះអង្គម្ចាស់ក្សត្រី បេណេឌិកតេ (PRINCESS BENEDIKTE AWARD)” ពីសហគមន៍ Olave Baden- Powell Society (OB-PS) ។ជាទីមោទនៈក្រៃលែងទៀតនោះ នាងខ្ញុំសូមប្រគល់ភាពជោគជ័យនេះជូនចំពោះថ្នាក់ដឹកនាំ សមាជិកា សមាជិកគាំទ្រនៃសមាគមកាយឫទ្ធិនារីកម្ពុជា រួមទាំងក្រុមការងារទាំងអស់ ដែលបានលះបង់កម្លាំងកាយចិត្តនាពេលកន្លងមក»៕

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវបានតែងតាំងជា ប្រធានថ្នាក់ជាតិនៃសហគមន៍ OB-PS ប្រចាំកម្ពុជា និងទទួលបាន “ពានសមាជិកភាពកិត្តិយសព្រះអង្គម្ចាស់ក្សត្រី បេណេឌិកតេ” ពីសហគមន៍ The Olave Baden-Powell Society

នេះជាកិត្តិយសដ៏មានអត្ថន័យសម្រាប់កម្ពុជា និងសមាគមកាយឫទ្ធិនារីកម្ពុជា ខណៈដែល លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវបានតែងតាំងជា ប្រធានថ្នាក់ជាតិនៃសហគមន៍ The Olave Baden-Powell Society (OB-PS) ប្រចាំកម្ពុជា និងទទួលបាន “ពានសមាជិកភាពនៃព្រះអង្គម្ចាស់ក្សត្រី បេណេឌិកតេ” ពីសហគមន៍ OB-PS។តាមលិខិតអបអរសាទររបស់ លោកស្រី Kaela Sáenz Oriti ប្រធានសហគមន៍ OB-PS ចុះថ្ងៃទី១១ ខែមិថុនា ឆ្នាំ២០២៦ ការតែងតាំងនេះ ឆ្លុះបញ្ចាំងពីការគោរព និងការទទួលស្គាល់ចំពោះការប្តេជ្ញាចិត្តយូរអង្វែងរបស់លោកជំទាវបណ្ឌិត ក្នុងការអភិវឌ្ឍ និងលើកកម្ពស់យុវជន កុមារី និងយុវតី ព្រមទាំងការគាំទ្រដល់ចលនាកាយឫទ្ធិនារីនៅកម្ពុជា និងលើឆាកអន្តរជាតិ។ទន្ទឹមនឹងនេះ សហគមន៍ OB-PS ក្រោមព្រះរាជឧបត្ថម្ភរបស់ ព្រះអង្គម្ចាស់ក្សត្រី Benedikte នៃព្រះរាជាណាចក្រដាណឺម៉ាក ក៏បានផ្តល់ “ពានសមាជិកភាពកិត្តិយសព្រះអង្គម្ចាស់ក្សត្រី បេណេឌិកតេ” ជូនលោកជំទាវបណ្ឌិត ដើម្បីទទួលស្គាល់ការគាំទ្រផ្នែកហិរញ្ញវត្ថុ និងការចូលរួមរបស់លោកជំទាវបណ្ឌិត ក្នុងការគាំទ្របេសកកម្មរបស់ សមាគមកាយឫទ្ធិនារីពិភពលោក (WAGGGS) សម្រាប់កុមារី និងយុវតី។ការតែងតាំង និងការទទួលបានពានកិត្តិយសអន្តរជាតិនេះ គឺជាសក្ខីភាពនៃការទទួលស្គាល់ចំពោះតួនាទីកម្ពុជា ក្នុងចលនាកាយឫទ្ធិនារីពិភពលោក និងជាការលើកទឹកចិត្តដ៏ធំធេងសម្រាប់កុមារី និងយុវតីកម្ពុជា ក្នុងការបន្តកសាងចំណេះដឹង ទំនុកចិត្ត សមត្ថភាព វិន័យ ស្មារតីស្ម័គ្រចិត្ត និងភាពជាអ្នកដឹកនាំ។សហគមន៍ OB-PS បានបង្ហាញក្តីជឿជាក់ថា ការដឹកនាំ និងការលើកទឹកចិត្តរបស់លោកជំទាវបណ្ឌិត នឹងរួមចំណែកបង្កើតឱកាសថ្មីៗសម្រាប់កិច្ចសហការ មិត្តភាព និងសកម្មភាពប្រកបដោយអត្ថន័យ ដើម្បីគាំទ្រដល់កុមារី និងយុវតី ទាំងនៅកម្ពុជា និងក្នុងចលនាកាយឫទ្ធិនារីអន្តរជាតិ។សូមជម្រាបថា The Olave Baden-Powell Society (OB-PS) គឺជាបណ្តាញអ្នកគាំទ្រសកល ដែលរួមចំណែកគាំទ្របេសកកម្មរបស់ WAGGGS ក្នុងការផ្តល់ឱកាសដល់កុមារី និងយុវតី ឱ្យអភិវឌ្ឍសមត្ថភាព ការទទួលខុសត្រូវ ស្មារតីបម្រើសង្គម និងភាពជាអ្នកដឹកនាំសម្រាប់អនាគត។

សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ ត្រូវបានថ្វាយ “ពានសមាជិកភាពជើងឯក” ពីសហគមន៍ The Olave Baden-Powell Society (OB-PS)

សហគមន៍ The Olave Baden-Powell Society (OB-PS) ដែលជាបណ្តាញសប្បុរសជន និងអ្នកគាំទ្រសកលរបស់ សមាគមកាយឫទ្ធិនារីពិភពលោក (WAGGGS) បានសម្រេចថ្វាយ “ពានសមាជិកភាពជើងឯក” ជូនដល់ សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ ដើម្បីសម្ដែងការទទួលស្គាល់ និងថ្លែងអំណរគុណចំពោះព្រះរាជសកម្មភាពដ៏ឧត្តុង្គឧត្តម និងព្រះរាជហឫទ័យសប្បុរសដ៏ថ្លៃថ្លា ក្នុងការគាំទ្រការអភិវឌ្ឍកុមារី យុវតី និងស្ត្រីវ័យក្មេង តាមរយៈចលនាកាយឫទ្ធិនារីទាំងនៅក្នុងព្រះរាជាណាចក្រកម្ពុជា និងលើឆាកអន្តរជាតិ។ការថ្វាយនូវ “ពានសមាជិកភាពជើងឯក” នាពេលនេះ គឺជាសក្ខីភាពនៃការទទួលស្គាល់ជាសកលចំពោះព្រះរាជបេសកកម្ម និងព្រះរាជហឫទ័យដ៏ឧត្តុង្គឧត្តមរបស់ សម្តេចព្រះវររាជមាតាជាតិខ្មែរ ដែលជានិច្ចកាលទ្រង់តែងតែយកព្រះទ័យទុកដាក់ ជ្រោមជ្រែង និងព្រះរាជទានទ្រព្យសម្បត្តិផ្ទាល់ព្រះកាយ ក្នុងនាមជាព្រះប្រធានកិត្តិយសនៃសមាគមកាយឫទ្ធិនារីកម្ពុជា ដើម្បីគាំទ្រដល់ការអប់រំ ការអភិវឌ្ឍសមត្ថភាព ភាពជាអ្នកដឹកនាំ និងការបង្កើតឱកាសសម្រាប់កុមារី និងយុវតីជំនាន់ក្រោយ។សូមជម្រាបថា The Olave Baden-Powell Society (OB-PS) ត្រូវបានបង្កើតឡើងក្នុងឆ្នាំ ១៩៨៤ ដើម្បីប្រមូលផ្តុំសប្បុរសជន និងអ្នកគាំទ្រមកពីជុំវិញពិភពលោក ក្នុងការផ្តល់ការគាំទ្រផ្នែកហិរញ្ញវត្ថុដល់បេសកកម្មរបស់ WAGGGS ដែលជាចលនាកាយឫទ្ធិនារី និងកាយឫទ្ធិនារីវ័យក្មេងដ៏ធំបំផុតមួយនៅលើពិភពលោក៕

ព្រះអង្គម្ចាស់ក្សត្រី Benedikte នៃព្រះរាជាណាចក្រដាណឺម៉ាក ផ្ញើព្រះរាជសារថ្វាយព្រះពរ សម្តេចព្រះមហាក្សត្រី ព្រះវររាជមាតាជាតិខ្មែរ ក្នុងឱកាសព្រះរាជពិធីចម្រើនព្រះជន្ម

ក្នុងឱកាសព្រះរាជពិធីចម្រើនព្រះជន្មរបស់ សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ ព្រះអង្គម្ចាស់ក្សត្រី Benedikte នៃព្រះរាជាណាចក្រដាណឺម៉ាក និងជាព្រះប្រធានកិត្តិយស នៃសហគមន៍ The Olave Baden-Powell Society (OB-PS) បានផ្ញើព្រះរាជសារថ្វាយព្រះពរ ដោយសម្តែងនូវព្រះរាជហឫទ័យគោរព ស្រឡាញ់ និងជូនពរយ៉ាងកក់ក្តៅបំផុតជូនចំពោះ សម្តេចព្រះវររាជមាតាជាតិខ្មែរ។នៅក្នុងព្រះរាជសារ ព្រះអង្គម្ចាស់ក្សត្រី Benedikte បានថ្វាយព្រះពរឱ្យ សម្តេចព្រះវររាជមាតាជាតិខ្មែរ ទ្រង់ប្រកបដោយព្រះរាជសុខភាពល្អបរិបូរណ៍ ព្រះកាយពលមាំមួន ព្រះរាជសុភមង្គល និងព្រះរាជកិត្តិយសដ៏ឧត្តុង្គឧត្តមជានិច្ចនិរន្តរ៍។ព្រះអង្គម្ចាស់ក្សត្រី Benedikte ក៏បានបង្ហាញនូវការគោរព និងការកោតសរសើរយ៉ាងជ្រាលជ្រៅចំពោះ សម្តេចព្រះវររាជមាតាជាតិខ្មែរ ព្រមទាំងបានគូសបញ្ជាក់អំពីចំណងមិត្តភាព និងសេចក្តីរាប់អានដ៏ល្អប្រសើរ ដែលតែងមានរវាងព្រះអង្គ និងព្រះរាជវង្សានុវង្សកម្ពុជា ក៏ដូចជាចលនាកាយឫទ្ធិនារីនៅកម្ពុជា។ព្រះរាជសារថ្វាយព្រះពរនេះ ត្រូវបានផ្ញើឡើង ខណៈដែលថ្នាក់ដឹកនាំ និងសមាជិកនៃចលនាកាយឫទ្ធិនារីពិភពលោក កំពុងជួបជុំគ្នានៅព្រះរាជាណាចក្រកម្ពុជា ក្នុងឱកាសនៃមហាសន្និបាតកាយឫទ្ធិនារីពិភពលោក លើកទី៣៩ និងកិច្ចប្រជុំប្រចាំឆ្នាំរបស់សហគមន៍ The Olave Baden-Powell Society (OB-PS) លើកទី៤២ ដែលកម្ពុជាមានកិត្តិយសធ្វើជាម្ចាស់ផ្ទះ។

សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ

ភ្នំពេញ៖ចាប់តាំងពីដាក់ឱ្យអនុវត្តនៅឆ្នាំ២០២៤ រហូតដល់ខែមេសា ឆ្នាំ២០២៦នេះ យុវជនមកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេសបានចូលរៀនជំនាញវិជ្ជាជីវៈតាមរយៈគោលនយោបាយបណ្ដុះបណ្ដាលជំនាញវិជ្ជាជីវៈដល់យុវជនមានប្រមាណ ១,៥លាននាក់ ដោយមិនបង់ថ្លៃ និងទទួលបានប្រាក់ឧបត្ថម្ភមានចំនួនសរុបប្រមាណ ២៧,១ម៉ឺននាក់ ក្នុងនោះបណ្តុះបណ្តាលនៅតាមគ្រឹះស្ថានធីវេត ក្រោមឱវាទក្រសួងចំនួនប្រមាណ ២២.៩ ម៉ឺននាក់ និងក្រោមមូលនិធិអភិវឌ្ឍន៍ជំនាញ (SDF) ចំនួនប្រមាណ ៤,២ម៉ឺននាក់។យោងតាមសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអបអរសាទរទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៩ ថ្ងៃទី១៥ ខែមិថុនា ឆ្នាំ២០២៦នេះបានឱ្យដឹងថា រាជរដ្ឋាភិបាល តែងតែចាត់ទុកការអប់រំបណ្តុះបណ្តាលបច្ចេកទេសនិងវិជ្ជាជីវៈ គឺជាអាទិភាពមួយរបស់ រាជរដ្ឋាភិបាល ចាប់តាំងពីក្រោយថ្ងៃរំដោះ ៧ មករា ១៩៧៩មក ទន្ទឹមនឹងការស្តារនិងការអភិវឌ្ឍប្រទេសជាតិ ពីភាពខ្ទេចខ្ទាំដោយសារសង្គ្រាមស៊ីវិល។ តាមរយៈការដាក់ចេញ និងអនុវត្តដោយជោគជ័យនូវនយោបាយឈ្នះ ឈ្នះ របស់ សម្តេចអគ្គមហាសេនាបតីតេជោ ហ៊ុន សែន នៅថ្ងៃទី២៩ ខែធ្នូ ឆ្នាំ១៩៩៨ ជាមួយនឹងការ ដាក់ចេញនូវកម្មវិធីកំណែទម្រង់មុតស្រួចស៊ីជម្រៅនានាជាប់ជាប្រចាំ បានធ្វើឱ្យសេដ្ឋកិច្ចកម្ពុជាមានកំណើន ក្នុងអត្រាខ្ពស់ជាមធ្យមប្រមាណ ៧% ក្នុងមួយឆ្នាំ នៅក្នុងរយៈពេលជាង២ទសវត្សរ៍ចុងក្រោយនេះ។តាមរយៈសារលិខិតរបស់សម្ដេចធិបតី បានបញ្ជាក់ថា ជាក់ស្តែងនៅក្នុងឆ្នាំ២០២៥ កន្លងទៅ រាជរដ្ឋាភិបាលសម្រេចបាននូវការបណ្តុះបណ្តាលជំនាញបច្ចេកទេស និងវិជ្ជាជីវៈ និងហ្វឹកហ្វឺនកូនជាងដល់សិក្ខាកាម សិស្ស និស្សិត និងកម្មករនិយោជិតគ្រប់កម្រិតសរុបប្រមាណ ២០,៧ម៉ឺននាក់។ ដោយឡែកសម្រាប់ការអនុវត្តនូវកម្មវិធីបណ្តុះបណ្តាលជំនាញវិជ្ជាជីវៈនិងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១,៥លាននាក់ បាននិងកំពុងដំណើរការយ៉ាងល្អ ដែលកម្មវិធីសិក្សាផ្តោតសំខាន់លើវិស័យអាទិភាពចំនួន១០ ដែលមានតម្រូវការទីផ្សារការងារខ្ពស់ រួមទាំង “ជំនាញ វិជ្ជាជីវៈដូនតា” ចំនួន១២មុខវិជ្ជាផងដែរ។ សម្ដេចធិបតីបានថ្លែងថា៖«ចាប់តាំងពីដាក់ឱ្យអនុវត្តនៅឆ្នាំ២០២៤ រហូតដល់ខែមេសា ឆ្នាំ២០២៦នេះ សិស្សដែលបានទទួលការបណ្តុះបណ្តាលមានចំនួនសរុបប្រមាណ ២៧,១ម៉ឺននាក់ ក្នុងនោះបណ្តុះបណ្តាល នៅតាមគ្រឹះស្ថានធីវេត ក្រោមឱវាទក្រសួងចំនួនប្រមាណ ២២.៩ម៉ឺននាក់ និងក្រោមមូលនិធិអភិវឌ្ឍន៍ជំនាញ (SDF) ចំនួនប្រមាណ ៤,២ម៉ឺននាក់»។បន្ថែមពីនេះទៀត រាជរដ្ឋាភិបាលបានគិតគូរយ៉ាងយកចិត្តទុកដាក់ក្នុងការផ្តល់ការបណ្តុះបណ្តាល សញ្ញាបត្របច្ចេកទេសនិងវិជ្ជាជីវៈ កម្រិត១ ដល់បងប្អូនអតីតពលករត្រឡប់មកពីប្រទេសថៃ រយៈពេល ៤ខែ សម្រាប់អ្នកមានអាយុចាប់ពី១៥ឆ្នាំ ដល់៣៥ឆ្នាំ ចំនួន ២,៥ម៉ឺននាក់, វគ្គបណ្តុះបណ្តាលតាមលិខិតបញ្ជាក់រយៈពេលខ្លី នៅតាមសហគមន៍សរុបចំនួន ២,៥ម៉ឺននាក់ ដល់អតីតពលករដែលមានអាយុចាប់ពី៣៥ឆ្នាំឡើង រយៈពេល ១សប្តាហ៍ ដល់១ខែ ដើម្បីឱ្យបងប្អូនអតីតពលករអាចមានជំនាញមួយពិតប្រាកដ និងអាចប្រកបរបរចិញ្ចឹម ជីវិតដោយខ្លួនឯង, វគ្គបណ្តុះបណ្តាលជំនាញមុនពេលចូលធ្វើការក្នុងវិស័យកាត់ដេរ និងការផ្តល់ការទទួលស្គាល់ ជំនាញពីមុនី (RPL.) ដល់អតីតពលករគោលដៅចំនួន ១ម៉ឺននាក់ ដែលបានដាក់ឱ្យអនុវត្តចាប់ពីថ្ងៃទី២៤ ខែមេសា ឆ្នាំ២០២៦ ក្នុងវិស័យសំណង់ លើ៨មុខជំនាញ ដោយរាជរដ្ឋាភិបាលជាអ្នកបង់ថ្លៃធ្វើតេស្តជំនួស, ព្រមទាំងបាន និងកំពុងពង្រីកថ្នាក់រៀនចល័ត (បណ្តុះបណ្តាលតាមរថយន្ត) ដើម្បីទៅបណ្តុះបណ្តាលផ្ទាល់នៅតាមសហគមន៍ ឱ្យកាន់តែមានប្រសិទ្ធភាពបន្ថែមទៀត។តាមរយៈកម្មវិធីនេះ យុវជនបងប្អូនកម្មករនិយោជិត និងបងប្អូនអតីតពលករវិលត្រឡប់មកពីប្រទេសថៃ នឹងមានជំនាញមួយពិតប្រាកដអាចយកទៅបង្កើតមុខរបរផ្ទាល់ខ្លួន ឬចូលបម្រើការងារនៅតាមសហគ្រាស ក្រុមហ៊ុន រោងចក្រនានា ដែលធ្វើឱ្យពួកគាត់មានជីវភាពល្អប្រសើរឡើង រក្សាបាននូវស្ថិរភាពការងារ កំណើន ផលិតភាព ប្រាក់ចំណូលសមរម្យ និងលក្ខខណ្ឌការងារល្អ ជាពិសេសបងប្អូនអាចមានឱកាសទទួលបានការគាំពារ និងអត្ថប្រយោជន៍របបសន្តិសុខសង្គម។ បើតាមសារលិខិតសម្ដេចធិបតី រាជរដ្ឋាភិបាលបាននិងកំពុងជំរុញលើកទឹកចិត្តដល់សិស្សានុសិស្ស យុវជន ដើម្បីមកចុះឈ្មោះចូលរៀន និងជំរុញមាតាបិតា អាណាព្យាបាល ដើម្បីអនុញ្ញាតឱ្យកូនចៅរបស់ខ្លួនមកចុះឈ្មោះ និងទទួលការបណ្តុះបណ្តាលជំនាញបច្ចេកទេសនិងវិជ្ជាជីវៈឱ្យបានកាន់តែច្រើនឡើង ព្រោះជាការវិនិយោគ រយៈពេលខ្លី ឆាប់ទទួលបានផល មានជំនាញមួយច្បាស់លាស់ មានឱកាសផ្សារភ្ជាប់ទ្រឹស្តីនិងបទពិសោធដែល មាននៅរោងជាងនិងមជ្ឈមណ្ឌលស្រាវជ្រាវ ទៅនឹងការអនុវត្តជាក់ស្តែងនៅតាមសហគ្រាស ក្រុមហ៊ុន រោងចក្រ ដែលជំនាញទាំងនេះឆ្លើយតបនឹងតម្រូវការទីផ្សារការងារ ងាយស្រួលទទួលបានការងារធ្វើ ឬប្រកបមុខរបរ ដោយខ្លួនឯង ទទួលបានប្រាក់ចំណូលសមរម្យ រក្សាបាននូវស្ថិរភាពចំណូល និងជួយរំដោះខ្លួននិងក្រុមគ្រួសារ ចេញពីភាពក្រីក្រនិងភាពងាយរងហានិភ័យ៕

សម្ដេចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»

ភ្នំពេញ៖សម្ដេចអគ្គហាសេនាបតីតេជោ ហ៊ុន សែន នៅព្រឹកថ្ងៃទី១៤ ខែមិថុនា ឆ្នាំ២០២៦នេះ បានផ្ញើសារជូនជនរួមជាតិ ភ្ជាប់ជាមួយនឹងចម្រៀងចំនួន៧បទដែលសម្ដេចបាននិពន្ធដោយផ្ទាល់ដៃ ជាមួយនឹងការរម្លឹកការចងចាំដ៏ឈឺចាប់ ខណៈសម្ដេចត្រូវយកជីវិតទៅធ្វើដើមទុនដើម្បីរំដោះជាតិពីរបបប្រល័យពូជសាសន៍ ប៉ុលពល។សម្ដេចតេជោបានសរសេរថា នៅសល់តែប៉ុន្មានថ្ងៃទៀតទេនឹងដល់ខួប៤៩ ឆ្នាំនៃការចាប់ផ្តើមយកជីវិតធ្វើដើមទុនដើម្បីរំដោះជាតិពីរបបប្រល័យពូជសាសន៍របស់ ប៉ុល ពត (២០មិថុនា ១៩៧៧-២០មិថុនា២០២៦)។សម្ដេចតេជោបានថ្លែងថា៖«ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»។ដើម្បីរំលឹកដល់រឿងដ៏កម្សត់នោះខ្ញុំសូមចាក់ផ្សាយចម្រៀងចំនួន ៧បទដែលសម្ដេចបាននិពន្ធដោយផ្ទាល់មាន៖១.ថ្ងៃស្អែកបែកគ្នា២.សំបុត្រផ្តាំលា៣.ចាកចោលទ្រនំចាស់៤.ភ្លៀងធំនឹកប្តីយប់ ២០មិថុនា៥.អក្ខរាប្រហារដួងចិត្ត៦.ទឹកភ្នែកបែកគ្នា៧.ទឹកភ្នែកស្រក់ចូលចានបាយសម្ដេចតេជោបានបញ្ជាក់ថា ចម្រៀងទាំង ៧បទនេះគ្របដណ្តប់នូវព្រឹត្តិការណ៍ដែលបានកើតឡើងនូវរឿងឈឺចាប់ដែលមិនអាចបំភ្លេចបាននាពេលនោះ។ ចម្រៀងទាំង៧បទនេះយកតាមលំនាំប្រពៃណី និងច្រៀងដោយលោក ឌៀប សិដ្ឋសុធា និង អ្នកនាង ចំរើន ចរិយា។សូមបញ្ជាក់ថា ថ្ងៃទី២០ ខែមិថុនា គឺជា «ទិវានៃការចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត» ដែលជាព្រឹត្តិការណ៍ប្រវត្តិសាស្ត្រដ៏សំខាន់បំផុតមួយរបស់ប្រទេសកម្ពុជា និងគណបក្សប្រជាជនកម្ពុជា។ព្រឹត្តិការណ៍ដើម (២០ មិថុនា ១៩៧៧)៖ គឺថ្ងៃដែលសមមិត្ត ហ៊ុន សែន (ក្នុងវ័យ ២៥ ឆ្នាំ នាពេលនោះ) រួមជាមួយយុទ្ធមិត្ត ៤ រូបទៀត រួមមាន លោក នុច ថន, លោក ញឹក ហួន, លោក សាន សាញ់ (ស៊ូ គីមស្រ៊ាង) និងលោក វ៉ា ប៉ោអ៊ាន បានសម្រេចចិត្តយកជីវិតធ្វើជាដើមទុន ជ្រែកស្បៃរាត្រីចាកចេញពីបន្ទាយយោធានៅតំបន់កោះថ្ម ឆ្លងដែនទៅកាន់ប្រទេសវៀតណាម ដើម្បីស្វែងរកការគាំទ្រ និងជំនួយមករំដោះប្រទេសជាតិ និងប្រជាជនកម្ពុជាចេញពីរបបវាលពិឃាត ប៉ុល ពត។ ថ្នាក់ដឹកនាំគណបក្សប្រជាជនកម្ពុជាបានគូសបញ្ជាក់ថា បើគ្មានការចាប់ផ្ដើមចេញដំណើរតស៊ូនាថ្ងៃទី ២០ មិថុនា ១៩៧៧ នេះទេ គឺពិតជាមិនអាចឈានទៅដល់ការបង្កើតកងកម្លាំងប្រដាប់អាវុធសាមគ្គីសង្គ្រោះជាតិ (១២ ឧសភា ១៩៧៨) ការបង្កើតរណសិរ្សសាមគ្គីសង្គ្រោះជាតិកម្ពុជា (២ ធ្នូ ១៩៧៨) និងការទទួលបានជ័យជម្នះជាប្រវត្តិសាស្ត្រ ៧ មករា ១៩៧៩ ឡើយ។ សម្រាប់គណបក្សប្រជាជនកម្ពុជា ថ្ងៃនេះតំណាងឱ្យការលះបង់ដ៏ធំធេង និងជាចំណុចចាប់ផ្តើមដំបូងបង្អស់នៃរបត់ប្រវត្តិសាស្ត្រក្នុងការស្វែងរកពន្លឺសន្តិភាព ការរស់រានមានជីវិតឡើងវិញ និងការអភិវឌ្ឍមាតុភូមិរហូតមកដល់បច្ចុប្បន្ន៕

បណ្ដាញសង្គម

ព័ត៌មានថ្មីៗ

លោក Trump ប្រាប់ពីកិច្ចចរចា «ល្អ» ជាមួយអ៊ីរ៉ង់ និងបញ្ជាក់ជាថ្មីពីការគំរាមវាយប្រហារគោលដៅនានា

ក្រុមគ្រួសារអ្នកដំណើរនៃជើងហោះហើរ MH370 ចង់បានការពិត ខណៈតុលាការចិនបើកសវនាការបណ្តឹងឧទ្ធរណ៍

ជប៉ុនស្នើឱ្យអ៊ីរ៉ង់អនុវត្ត «ភាពបត់បែនជាអតិបរិមា» ដើម្បីបន្ថយភាពតានតឹងនៅមជ្ឈិមបូព៌ាឱ្យបានឆាប់

រដ្ឋមន្ត្រីការពារជាតិអ៊ីស្រាអែល៖ យន្តហោះចម្បាំងអាមេរិកហោះចេញពីអ៊ីស្រាអែលទៅវាយប្រហារអ៊ីរ៉ង់

អ៊ូហ្គង់ដាប្រកាសគ្មានជំងឺអេបូឡា បន្ទាប់ពីអ្នកជំងឺចុងក្រោយចេញពីមន្ទីរពេទ្យ

ក្រុមអ្នកសង្កេតការណ៍អាស៊ានប្រចាំប្រទេសកម្ពុជា និង ប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ហ្វីលីពីនប្រចាំកម្ពុជា ធ្វើបទបង្ហាញ «ស្តីពីវឌ្ឍនភាពនៃការងារខណ្ឌសីមា និងបោះបង្គោលព្រំដែនរវាងកម្ពុជានិងថៃ»

កូរ៉េខាងត្បូងចេញការជូនដំណឹងបន្ទាន់ អំពីការសង្ស័យលេចធ្លាយផូស្វ័រ នៅមូលដ្ឋានទ័ពអាកាសអាមេរិក

វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់

រញ្ជួយដីកម្រិត ៥,៧រ៉ិចទ័រ ធ្វើឱ្យញ័រខេត្ត Qinghai របស់ប្រទេសចិន

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

កម្ពុជា-សហភាពសេដ្ឋកិច្ចអឺរ៉ុប-អាស៊ី​ (EAEU) ពិនិត្យ​ និង​ ពិចារណា​លើកិច្ច​ព្រមព្រៀង​ពាណិជ្ជកម្មសេរី (FTA)

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កម្ពុជា-សហភាពសេដ្ឋកិច្ចអឺរ៉ុប-អាស៊ី (EAEU) ពិនិត្យ និង ពិចារណាលើកិច្ចព្រមព្រៀងពាណិជ្ជកម្មសេរី (FTA)