BTV NEWS

ប្រសាសន៍សំខាន់ៗសម្ដេចធិបតី ហ៊ុន ម៉ាណែត ក្នុងឱកាសអញ្ជើញចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋជាង ២ម៉ឺនបណ្ណ នៅឃុំចំនួន៣ នៃស្រុកខ្សាច់កណ្ដាល ខេត្តកណ្ដាល

សម្ដេចធិបតី៖ កម្ពុជាជ្រើសរើសយកយន្តការ UNCLOS ដោយសារថៃលុបចោល MOU ២០០១ ជាឯកតោភាគី

សម្ដេចធិបតី៖ កងទ័ពថៃបានចូលកាន់កាប់ទឹកដីកម្ពុជាយ៉ាងជ្រៅលើសសូម្បីផែនទីឯកតោភាគីគេបានអះអាង

សម្ដេចតេជោ ហ៊ុន សែន ឆ្លៀតវាយកូនគោលនៅថ្ងៃចុងសប្ដាហ៍ ក្រោយខកខានជាង ១ឆ្នាំ

ព័ត៌មានសំខាន់ៗ

ជនស៊ីវិលរាប់រយនាក់បានជាប់ក្នុងទីក្រុង Soledar ស្របពេលសមរភូមិប្រយុទ្ធនៅតែក្ដៅគគុក

អ៊ុយក្រែន៖ អ៊ុយក្រែននិយាយថា ជនស៊ីវិលរាប់រយនាក់នៅតែជាប់ក្នុងទីក្រុង Soledar ខណៈការវាយប្រយុទ្ធគ្នាដ៏ខ្លាំងក្លានៅតែបន្ត ដើម្បីដណ្ដើមគ្រប់គ្រងទីក្រុងផលិតអំបិលដែលរងការបំផ្លិចបំផ្លាញយ៉ាងធ្ងន់ធ្ងរ នៅក្នុងប្រទេសអ៊ុយក្រែនភាគខាងកើត។ លោក Pavlo Kyrylenko អភិបាលតំបន់ Donetsk បានប្រាប់ទូរទស្សន៍រដ្ឋអ៊ុយក្រែនថា ជនស៊ីវិលចំនួន ៥៥៩នាក់រួមទាំងកុមារ ១៥នាក់នៅតែជាប់ក្នុងទីក្រុង Soledar នៅឡើយ និងមិនអាចជម្លៀសចេញបានទេ។ អ៊ុយក្រែនបាននិយាយកាលពីថ្ងៃព្រហស្បតិ៍ថា ទាហានរបស់ខ្លួនកំពុងទប់ទល់បាន ខណៈការវាយប្រយុទ្ធគ្នានៅយ៉ាងក្ដៅគគុកនៅតែបន្តក្នុងទីក្រុង Soledar ដោយច្រានចោលការអះអាងដោយក្រុមទាហានស៊ីឈ្នួល Wagner របស់រុស្ស៊ីដែលថា កងកម្លាំងរបស់ខ្លួនបានដណ្ដើមគ្រប់គ្រងទីក្រុងនេះហើយ។មន្ត្រីជាន់ខ្ពស់ការពារជាតិអ៊ុយក្រែនបាននិយាយកាលពីថ្ងៃព្រហស្បតិ៍ថា រុស្ស៊ីកំពុងបញ្ជូនកងទ័ពបន្ថែមទៀតទៅក្នុងប្រទេសអ៊ុយក្រែនភាគខាងកើត ខណៈកងកម្លាំងរបស់ទីក្រុង Moscow ព្យាយាមវាយដណ្ដើមយកទីក្រុងផលិតអំបិលតូចមួយនេះ៕អត្ថបទ៖ សុខមាន

ប្រទេសអាស៊ីជាប់ចំណាត់ថ្នាក់លេខ១ នៃលិខិតឆ្លងដែនដ៏មានឥទ្ធិពលបំផុតរបស់ពិភពលោកក្នុងឆ្នាំ២០២៣

ជប៉ុន៖ ប្រទេសជប៉ុននៅតែឈរនៅលើកំពូលតារាង នៃចំណាត់ថ្នាក់លិខិតឆ្លងដែនដ៏មានឥទ្ធិពលបំផុតរបស់ពិភពលោកនាពេលថ្មីៗនេះ ដោយសិង្ហបុរី និងកូរ៉េខាងត្បូងជាប់ចំណាត់ថ្នាក់លេខ២។ Henley and Partners ដែលជាក្រុមហ៊ុនតាមដានចំណាត់ថ្នាក់នេះ បាននិយាយនៅក្នុងសេចក្តីប្រកាសព័ត៌មានកាលពីថ្ងៃអង្គារថា នៅក្នុងចំណាត់ថ្នាក់សន្ទស្សន៍លិខិតឆ្លងដែនចុងក្រោយរបស់ Henley ប្រទេសជប៉ុនទទួលបានពិន្ទុសម្រាប់ការធ្វើដំណើរដោយគ្មានទិដ្ឋាការចំនួន ១៩៣គោលដៅ ដែលមានន័យថា អ្នកកាន់លិខិតឆ្លងដែនជប៉ុនអាចធ្វើដំណើរទៅកាន់គោលដៅ ១៩៣ ក្នុងចំណោម ២២៧គោលដៅដោយមិនចាំបាច់មានទិដ្ឋាការ។ ចំនួននេះគឺប្រហែល ៨៥% នៃពិភពលោកទាំងមូល។ ក្រុមហ៊ុនបានពន្យល់ថា សន្ទស្សន៍លិខិតឆ្លងដែនរបស់ខ្លួនគឺជាប្រភេទតែមួយគត់របស់ខ្លួន ដោយផ្អែកលើទិន្នន័យផ្តាច់មុខពីអាជ្ញាធរដឹកជញ្ជូនផ្លូវអាកាសអន្តរជាតិ ដែលជាសមាគមពាណិជ្ជកម្មសម្រាប់ក្រុមហ៊ុនអាកាសចរណ៍ជាង ២៩០ ជុំវិញពិភពលោក។ ប្រទេសសិង្ហបុរីដែលបានជាប់ចំណាត់ថ្នាក់លេខ១ ជាមួយប្រទេសជប៉ុនកាលពីឆ្នាំមុនបានធ្លាក់មកនៅលេខ២ វិញនៅឆ្នាំ២០២៣ នេះ។ ទាំងសិង្ហបុរី និងកូរ៉េខាងត្បូងទទួលបានពិន្ទុការធ្វើដំណើរដោយគ្មានទិដ្ឋាការទៅកាន់ ១៩២គោលដៅ ខណៈអាល្លឺម៉ង់ និងអេស្ប៉ាញឈរនៅលេខរៀងទី៣ ដោយមានពិន្ទុសម្រាប់ការធ្វើដំណើរដោយគ្មានទិដ្ឋាការទៅកាន់គោលដៅចំនួន ១៩០។ ឈរនៅលេខរៀងទី៤ គឺហ្វាំងឡង់ អ៊ីតាលី និងលុចហ្សំបួរទទួលបានពិន្ទុ ១៩៨។ អូទ្រីស ដាណឺម៉ាក ហូឡង់ និងស៊ុយអែតទទួលបានពិន្ទុ ១៨៨ ដោយដាក់បណ្ដាប្រទេសនៅអឺរ៉ុបនៅលេខ៥។ បារាំង អៀរឡង់ ព័រទុយហ្គាល់ និងចក្រភពអង់គ្លេសឈរនៅលេខរៀងទី៦ បានស្មើដោយមានពិន្ទុ ១៨៧។ ទន្ទឹមនឹងនេះដែរសហរដ្ឋអាមេរិកឈរនៅលេខ៧ រួមជាមួយនឹងប្រទេសនូវែលសេឡង់ និងបណ្តាប្រទេសនៅអឺរ៉ុបដូចជា បែលហ្ស៊ិក សាធារណរដ្ឋឆែក ន័រវេស និងស្វីស៕អត្ថបទ៖ សុខមាន

បម្រាមលើការផ្ដល់ទិដ្ឋាការរបស់ចិនជុំវិញវិធានការទប់ស្កាត់វីរុស COVID-19 បង្កក្ដីបារម្ភពីសភាពាណិជ្ជកម្មជាន់ខ្ពស់របស់អឺរ៉ុប

ចិន៖ សភាពាណិជ្ជកម្មអឺរ៉ុបនាំមុខគេចំនួន២ បានអំពាវនាវឲ្យប្រទេសចិនកុំដាក់កំហិតលើការធ្វើដំណើរថ្មី បន្ទាប់ពីខ្លួនបានផ្អាកការចេញទិដ្ឋាការសម្រាប់ភ្ញៀវមកពីប្រទេសជប៉ុន និងកូរ៉េខាងត្បូង។ សភាពាណិជ្ជកម្មអឺរ៉ុបក្នុងប្រទេសចិនបាននិយាយថា ពួកគេមានការព្រួយបារម្ភចំពោះការសម្រេចចិត្តរបស់ទីក្រុងប៉េកាំង ក្នុងការផ្អាកដំណើរការផ្ដល់ទិដ្ឋាការសម្រាប់ពលរដ្ឋរបស់ប្រទេសមួយចំនួន និងការព្រមានរបស់ខ្លួនអំពីវិធានការសងសឹក ប្រឆាំងនឹងបណ្ដាប្រទេសដែលបានដាក់កំហិតលើអ្នកដំណើរចិន ចាប់តាំងពីទីក្រុងប៉េកាំងបានលុបចោលវិធានការទប់ស្កាត់ការឆ្លងរាលដាលវីរុស Covid-19។ សភានេះបាននិយាយនៅក្នុងសេចក្តីថ្លែងការណ៍មួយថា មិនត្រឹមតែហានិភ័យ "ការព្យួរទិដ្ឋាការ" នេះនាំឱ្យភាពតានតឹងភូមិសាស្ត្រនយោបាយកើនឡើង និងការធ្លាក់ចុះទំនុកចិត្តអាជីវកម្មប៉ុណ្ណោះទេ វាក៏មានហានិភ័យផងដែរក្នុងការរារាំងប្រទេសចិន ពីការបង្ហាញនូវអ្វីដែលខ្លួនមានផ្តល់ជូនទាំងស្រុង ជាអ្វីដែលមិនអាចទៅរួចក្នុងរយៈពេល ៣ឆ្នាំកន្លងមកនេះ ដោយសារតែការរឹតបន្តឹងការធ្វើដំណើរដ៏តឹងរ៉ឹងរបស់ប្រទេសនេះ។ សហរដ្ឋអាមេរិក កាណាដា ជប៉ុន និងកូរ៉េខាងត្បូងស្ថិតក្នុងចំណោមប្រទេសជាច្រើន ដែលបានដាក់វិធានការរឹតត្បិតលើការមកដល់របស់អ្នកដំណើរពីប្រទេសចិន ដូចជាការតម្រូវឲ្យមានលទ្ធផលតេស្តអវិជ្ជមានវីរុស Covid-19 មុនការចេញដំណើរ ការធ្វើតេស្តពេលទៅដល់ ឬការរឹតត្បិតជើងហោះហើរជាដើម៕ អត្ថបទ៖ សុខមាន

ឆ្នាំ២០២២ ខេត្ដសៀមរាប ទទួលអ្នកទេសចរជាតិ និងអន្ដរជាតិជាង ២លាននាក់

សៀមរាប៖ របាយការណ៍មន្ទីរទេសចរណ៍ខេត្ដសៀមរាប បានបង្ហាញថា ចាប់ពីខែមករា ដល់ថ្ងៃទី៣១ ខែធ្នូ ឆ្នាំ២០២២ ភ្ញៀវទេសចរជាតិ និងអន្ដរជាតិជាង ២លាន ៦៩ម៉ឺននាក់ បានដើរកម្សាន្តក្នុងខេត្ដសៀមរាប បើធៀបនឹងឆ្នាំ២០២១កើនឡើងជាង៤០០ភាគរយ ។របាយការណ៍បន្តថា ទេសចរអន្ដរជាតិមានចំនួនប្រមាណជាង ២សែន ៨ម៉ឺននាក់ ខណៈដែលអ្នកទេសចរជាតិមានជាង ២លាន ៤០ម៉ឺននាក់ ។របាយការណ៍ដដែលបានបន្ដថា ភ្ញៀវទេសចរអន្ដរជាតិទាំងនោះ មានជនជាតិអាមេរិក បារាំង អង់គ្លេស ចិន ថៃ ឥណ្ឌា អាឡឺម៉ង់ វៀតណាម អូស្ដ្រាលី និងអេស្បាញ។ដោយឡែករបាយការណ៍នៃលំហូរទេសចរចូលទស្សនារមណីយដ្ឋានអង្គរ មានជាង២លាន៦៤ម៉ឺនាក់ និងអ្នកទេសចរទិញសំបុត្រចូលទស្សនាអង្គរមានចំនួន២៨ម៉ឺននាក់ ដែលសរុបក្នុងរយៈពេលមួយឆ្នាំ២០២២កន្លងមកចំនួន ២,៩៣០,៣៨៥នាក់ ៕

រដ្ឋអាជ្ញាពិសេសត្រូវបានតែងតាំងដើម្បីស៊ើបអង្កេតឯកសាររបស់លោក Biden ដែលបានផ្ទៀងផ្ទាត់

អាមេរិក៖ រដ្ឋអាជ្ញាសហរដ្ឋអាមេរិក Merrick Garland បានតែងតាំងរដ្ឋអាជ្ញាពិសេសមួយ ដើម្បីស៊ើបអង្កេតករណីកាន់កាប់ឯកសារដែលត្រូវបានផ្ទៀងផ្ទាត់ហើយរបស់លោក Joe Biden។ លោក Robert Hur អតីតមន្ត្រីជាន់ខ្ពស់ក្រសួងយុត្តិធម៌អំឡុងពេលលោក Trump នៅជាប្រធានាធិបតីនឹងដឹកនាំការស៊ើបអង្កេតនេះ។ ឯកសារដែលត្រូវបានផ្ទៀងផ្ទាត់រួចនោះត្រូវបានរកឃើញថ្មីៗនេះ នៅក្នុងគេហដ្ឋានរបស់លោក Biden និងនៅការិយាល័យមួយដែលលោកបានប្រើប្រាស់ នៅពេលលោកកាន់តំណែងជាអនុប្រធានាធិបតីរបស់អតីតប្រធានាធិបតីអាមេរិក Obama។ សេតវិមាននិយាយថា លោក Biden នឹងសហការពេញទំហឹងក្នុងការស៊ើបអង្កេតនេះ។ ការរកឃើញឯកសារនេះត្រូវបានហៅថា ជាភាពអាម៉ាស់ខាងនយោបាយសម្រាប់លោក Biden ខណៈករណីនេះបានកើតឡើងអំឡុងការស៊ើបអង្កេតដែលនៅតែបន្តនៅឡើយ លើការចោទប្រកាន់ពីបទខ្វះការគ្រប់គ្រងឯកសារដែលបានផ្ទៀងផ្ទាត់ របស់អតីតប្រធានាធិបតី Donald Trump។ លោក Biden បាននិយាយថា ឯកសារទី១ ត្រូវបានរកឃើញកាលពីថ្ងៃទី២ ខែវិច្ឆិកា នៅមជ្ឈមណ្ឌល Penn Biden Center ជាអង្គការមួយដែលលោក Biden បានបង្កើតនៅក្នុងទីក្រុង Washington DC។ ក្រោយមកឯកសារទាំងនោះត្រូវបានប្រគល់ជូនបណ្ណាសារជាតិសហរដ្ឋអាមេរិក (US National Archives)។ លោក Garland បាននិយាយថា ឯកសារទី២ ត្រូវបានរកឃើញនៅថ្ងៃទី២០ ខែវិច្ឆិកានៅគេហដ្ឋានរបស់លោក Biden នៅទីក្រុង Wilmington រដ្ឋ Delaware៕អត្ថបទ៖ សុខមាន

សម្តេចតេជោ ហ៊ុន សែន អញ្ជើញដឹកនាំប្រជុំពេញអង្គគណៈរដ្ឋមន្ត្រី

ភ្នំពេញ៖ នៅព្រឹកថ្ងៃទី១៣ ខែមករា ឆ្នាំ២០២៣នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដឹកនាំប្រជុំពេញអង្គគណៈរដ្ឋមន្ត្រី ដើម្បីពិភាក្សា និងឆ្លងរបៀបវារៈសំខាន់ៗមួយចំនួន ៖១- សេចក្តីព្រាងច្បាប់ស្តីពីប្រព័ន្ធហិរញ្ញវត្ថុសាធារណៈ ២- សេចក្តីព្រាងច្បាប់ស្តីពីការគ្រប់គ្រងទឹកស្អាត៣-សេចក្តីព្រាងគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ឆ្នាំ២០២២-២០៣៨៤- សេចក្តីព្រាងគោលនយោបាយជាតិស្តីពីស្វាយចន្ទី ឆ្នាំ២០២២-២០២៧៥-បញ្ហាផ្សេងៗ៕សេចក្តីព្រាងច្បាប់ស្តីពី “ប្រព័ន្ធហិរញ្ញវត្ថុសាធារណៈ (ថ្មី)”ដែលមានខ្លឹមសារសង្ខេបដូចខាងក្រោម៖- សាវបានច្បាប់ស្តីពីប្រព័ន្ធហិរញ្ញវត្ថុសាធារណៈដំបូងរបស់កម្ពុជា ត្រូវបានប្រកាសឱ្យប្រើនៅឆ្នាំ១៩៩៣ ដើម្បីរៀបចំឱ្យមានជាក្របខណ្ឌគតិយុត្តសម្រាប់របបគ្រប់គ្រងប្រព័ន្ធហិរញ្ញវត្ថុ ដែលផ្តោតជាសំខាន់លើប្រព័ន្ធថវិកាផ្អែកលើធាតុចូល ។ នៅឆ្នាំ២០០៤ បានប្រកាសដាក់ឱ្យអនុវត្តជាផ្លូវការនូវ “កម្មវិធីកែទម្រង់ ការគ្រប់គ្រងហិរញ្ញវត្ថុសាធារណ” ដោយមានគោលដៅផ្លាស់ប្តូរប្រព័ន្ធថវិកាផ្អែកលើធាតុចូល និងមជ្ឈការ ឆ្ពោះទៅប្រព័ន្ធថវិកាផ្អែកលើសមិទ្ធកម្ម និងវិមជ្ឈការ ពោលគឺសំដៅប្រែក្លាយជាជំហានៗនូវប្រព័ន្ធគ្រប់គ្រងហិរញ្ញវត្ថុសាធារណៈកម្ពុជា ឱ្យទៅជាប្រព័ន្ធមួយស្របតាមបទដ្ឋាននិងឧត្តមានុវត្តអន្តរជាតិ។- គោលបំណងនៃសេចក្តីព្រាងច្បាប់សេចក្តីព្រាងច្បាប់ស្តីពីប្រព័ន្ធហិរញ្ញវត្ថុសាធារណៈ(ថ្មី) ត្រូវបានរៀបចំក្នុងគោលបំណងដើម្បីកសាងក្របខណ្ឌគតិយុត្តគោល និងចាំបាច់សម្រាប់ការអនុវត្តប្រព័ន្ធថវិកាព័ត៌មានសមិទ្ធកម្ម ឬហៅកាត់ ថា “ថវិកាសមិទ្ធកម្ម” ដែលជាម៉ូដែលសមស្របសម្រាប់កម្ពុជា ស្របតាមយុទ្ធសាស្រ្តនៃការកែទម្រង់ប្រព័ន្ធ ថវិកាឆ្នាំ២០១៨-២០២៥ ដែលជាស្នូលនៃការកែទម្រង់ការគ្រប់គ្រងហិរញ្ញវត្ថុសាធារណៈ។លើសពីនេះ ភាពជឿទុកចិត្តថវិកា គណនេយ្យភាពហិរញ្ញវត្ថុ ការផ្សារភ្ជាប់ថវិកាទៅនឹងគោលនយោបាយ និង គណនេយ្យសមិទ្ធកម្ម ដែលសសរស្តមទាំង៤ នៃការគ្រប់គ្រងហិរញ្ញវត្ថុសាធារណៈ ត្រូវបានគិតគូរបញ្ចល គ្រប់ជ្រុងជ្រាយ សំដៅធានាប្រសិទ្ធភាព និងចីរភាពនៃការគ្រប់គ្រងហិរញ្ញវត្ថុសាធារណៈ ក៏ដូចជាការ ទ្រទ្រង់ស្ថិរភាពម៉ាក្រូសេដ្ឋកិច្ច កំណើនសេដ្ឋកិច្ច និងសមធម៌សង្គម។- ដំណើរការនៃការរៀបចំសេចក្តីព្រាងច្បាប់សេចក្តីព្រាងច្បាប់ស្តីពីប្រព័ន្ធហិរញ្ញវត្ថុសាធារណៈ(ថ្មី) ធ្វើឡើងដោយស្របតាមយុទ្ធសាស្រ្តនៃការ កែទម្រង់ប្រព័ន្ធថវិកាឆ្នាំ២០១៨-២០២៥ ដែលបានកំណត់យកម៉ូដែល “ប្រព័ន្ធថវិកាព័ត៌មានសមិទ្ធកម្ម” ដែលជាប្រព័ន្ធសមស្របសម្រាប់កម្ពុជា បន្ទាប់ពីថ្នាក់ដឹកនាំ និងមន្រ្តីជំនាញជាន់ខ្ពស់នៃក្រសួងសេដ្ឋកិច្ច។

អ៊ុយក្រែននិយាយថា គ្មានកិច្ចព្រមព្រៀងផ្លូវការណាមួយត្រូវបានចុះហត្ថលេខា បន្ទាប់ពីជំនួបជាមួយរុស្ស៊ីនៅទួរគី

អ៊ុយក្រែន៖ ស្នងការសិទ្ធិមនុស្សអ៊ុយក្រែនលោក Dmytro Lubinets បាននិយាយកាលពីថ្ងៃពុធថា គ្មានកិច្ចព្រមព្រៀងផ្លូវការណាមួយត្រូវបានចុះហត្ថលេខាឡើយ បន្ទាប់ពីជំនួបជាមួយសមភាគីរុស្ស៊ីលោកស្រី Tatyana Moskalkova នៅរដ្ឋធានី Ankara ប្រទេសទួរគី។ លោក Lubinets បាននិយាយថា កិច្ចពិភាក្សាបាននាំឱ្យមានកិច្ចព្រមព្រៀងមួយ ស្តីពីការដោះដូរឈ្លើយសឹកសង្គ្រាមចំនួន ៤០នាក់ ជាផ្នែកនៃការរៀបចំដ៏ទូលំទូលាយដែលភាគីទាំង២ បានដោះដូរឈ្លើយសឹកជាទៀងទាត់។ លោក Lubinets និយាយថា ភាគីអ៊ុយក្រែនបានបញ្ចេញមតិក្នុងចំណោមបញ្ហាផ្សេងៗ រួមទាំងការព្រួយបារម្ភរបស់ខ្លួនលើការចោទប្រកាន់របស់រុស្ស៊ី ចំពោះការរំលោភលើអនុសញ្ញាទីក្រុងហ្សឺណែវ ក្នុងការប្រព្រឹត្តលើឈ្លើយសឹកសង្គ្រាមរបស់ភាគីអ៊ុយក្រែន។ ប្រទេសរុស្ស៊ី និងអ៊ុយក្រែនបានធ្វើការដោះដូរឈ្លើយសឹកជាច្រើនមកហើយ។ សារព័ត៌មាន RIA បានរាយការណ៍ថា លោកស្រី Moskalkova បាននិយាយថា បទឈប់បាញ់គឺជាការចាំបាច់ដើម្បីបញ្ឈប់ការរំលោភសិទ្ធិមនុស្ស ហើយលោកស្រីបានស្នើឱ្យទួរគីដែលជាសមាជិកសម្ព័ន្ធយោធា NATO បញ្ឈប់ការផ្គត់ផ្គង់អាវុធទៅឱ្យអ៊ុយក្រែន។ ខណៈលោកស្រី Moskalkova និងលោក Lubinets បានជួបគ្នាក្នុងទីក្រុងអង់ការ៉ា ការប្រយុទ្ធដ៏ខ្លាំងមួយកំពុងផ្ទុះឡើងនៅទីក្រុងតូចមួយគឺទីក្រុង Soledar នៅភាគខាងកើតប្រទេសអ៊ុយក្រែន។ ជំនួបនៅទីក្រុងអង់ការ៉ាប្រទេសទួរគីក្នុងសប្តាហ៍នេះគឺដើម្បីពិភាក្សាអំពីបញ្ហាមនុស្សធម៌ រួមទាំងការបង្កើតច្រករបៀងមនុស្សធម៌។ ភាគីនានានឹងព្យាយាមដាក់ចេញនូវផែនទីបង្ហាញផ្លូវស្តីពីសិទ្ធិកុមារ សិទ្ធិមនុស្ស និងការដោះដូរឈ្លើយសឹក៕អត្ថបទ៖ ប៊ុនថន

តំបន់ជាច្រើនទូទាំងប្រទេសចិនមានសភាពអ៊ូអរខ្លាំង និងត្រៀមខ្លួនប្រារព្ធពិធីបុណ្យចូលឆ្នាំថ្មីដែលជិតចូលមកដល់

ចិន៖ ដោយសល់ពេលមិនដល់ ២សប្ដាហ៍ទៀតទេមុនពិធីបុណ្យចូលឆ្នាំចិនមកដល់ ប្រជាពលរដ្ឋនៅតាមតំបន់ផ្សេងៗជាច្រើននៃប្រទេសចិនកំពុងត្រៀមខ្លួន ក្នុងឱកាសពិធីបុណ្យប្រចាំឆ្នាំដ៏ធំបំផុតសម្រាប់ការជួបជុំក្រុមគ្រួសារ ដោយការទិញផ្កាដ៏ស្រស់ស្អាតផ្សេងៗ និងរៀបចំការប្រារព្ធពិធីតាមប្រពៃណីវប្បធម៌របស់ចិន។ អាជីវករលក់ផ្កាតាមផ្សារនៅទូទាំងប្រទេសនេះកំពុងត្រៀមពង្រីកអាជីវកម្ម ខណៈប្រទេសចិនត្រៀមប្រារព្ធពិធីបុណ្យឆ្នាំថ្មីតាមចន្ទគតិ ដោយក្រុមអាជីវករកំពុងមមាញឹកនឹងការរៀបចំបំពេញតម្រូវការមនុស្ស អំឡុងពិធីបុណ្យនាពេលខាងមុខនេះ។ នៅទីក្រុងណាននីងនៃតំបន់ស្វយ័តក្វាងស៊ី ជ័ងស៊ូ ភាគខាងត្បូងរបស់ចិន ផ្សារលក់ផ្កាបានដាក់លក់ព្រោងព្រាតតាំងពីប៉ុន្មានថ្ងៃមុន ហើយហាងលក់ទំនិញសម្រាប់ពិធីបុណ្យសែនចូលឆ្នាំចិនបានបើកគ្រប់ទីកន្លែង។ នៅឆ្នាំនេះដើមក្រូចដែលត្រូវគេជឿថានឹងនាំលាភសំណាងចូលផ្ទះ បានក្លាយការពេញនិយមកាន់តែច្រើនក្នុងចំណោមពលរដ្ឋចិន ដែលបួងសួងសុំសំណាងល្អកើតមានក្នុងឱកាសឆ្នាំថ្មី បន្ទាប់ពីបានឆ្លងកាត់ការឆ្លងរាលដាលយ៉ាងខ្លាំងនៃវីរុស COVID-19។ នៅក្នុងតំបន់លូដាយអិនភាគនិរតីនៃខេត្តកេចូវ សកម្មភាពវប្បធម៌ផ្សេងៗជាច្រើនទៅតាមតំបន់របស់ពួកគេ ត្រូវបានរៀបចំឡើងដើម្បីស្វាគមន៍ឆ្នាំថ្មីដែលនឹងចូលមកដល់នៅថ្ងៃទី២២ ខែមករានេះ។ សកម្មភាពសិល្បៈប្រពៃណីជាច្រើន ដូចជាការឡកម៉ុងសាយ និងការប្រណាំងទូកនាគ ក៏ដូចជាសកម្មភាពវប្បធម៌ពិសេសៗប្រចាំតំបន់ជាច្រើន កំពុងទាក់ទាញពលរដ្ឋក្នុងស្រុក និងភ្ញៀវទេសចរយ៉ាងច្រើន។ ចំណែកនៅក្នុងទីក្រុងតៃអានក្នុងស្រុកតុងភីង នៃខេត្តសានទុងភាគខាងកើតប្រទេសចិន អ្នកចូលមើលកម្សាន្តជាច្រើនបានសម្រុកចូលទស្សនាការតាំងអំពូលភ្លើង និងការបាញ់កាំជ្រួចភ្ញីដ៏ស្រស់ស្អាត៕ អត្ថបទ៖ សុខមាន

លោក Putin ប្រាប់រដ្ឋាភិបាលថា ស្ថានភាពនៅតំបន់អ៊ុយក្រែនដែលបានភ្ជាប់ឧបសម្ព័ន្ធមានការលំបាក

រុស្ស៊ី៖ ប្រធានាធិបតីរុស្ស៊ីលោក Vladimir Putin បាននិយាយកាលពីថ្ងៃពុធថា ស្ថានភាពនៅក្នុងតំបន់របស់ប្រទេសអ៊ុយក្រែន ដែលរុស្ស៊ីនិយាយថា ខ្លួនបានដាក់បញ្ចូលជាឧបសម្ព័ន្ធនៅតែជាកន្លែងមានការលំបាក។ ទោះជាយ៉ាងណាលោក Putin បានថ្លែងនៅក្នុងកិច្ចប្រជុំតាមបណ្តាញទូរទស្សន៍ជាមួយមន្ត្រីរដ្ឋាភិបាលថា ប្រទេសរុស្ស៊ីមានធនធានទាំងអស់ដែលខ្លួនត្រូវការ ដើម្បីធ្វើឲ្យប្រសើរជីវភាពរស់នៅនៅក្នុងតំបន់របស់អ៊ុយក្រែនទាំង៤ ដែលទីក្រុងមូស្គូបានអះអាងជាឯកតោភាគីថា បានដាក់បញ្ចូលជាឧបសម្ព័ន្ធកាលពីខែកញ្ញា ឆ្នាំ២០២២។ ជាមួយគ្នានេះ ក្រសួងការពារជាតិរុស្ស៊ីបាននិយាយកាលពីថ្ងៃពុធថា អង្គភាពទ័ពអាកាសរុស្ស៊ីបានឡោមព័ទ្ធទីក្រុង Soledar របស់អ៊ុយក្រែនពីខាងជើង និងភាគខាងត្បូង។ នៅក្នុងសន្និសីទសារព័ត៌មានប្រចាំថ្ងៃ ក្រសួងការពារជាតិបាននិយាយថា អង្គភាពវាយប្រហាររបស់រុស្ស៊ីកំពុងប្រយុទ្ធដើម្បីដណ្តើមយកទីក្រុង Soledar ជាទីក្រុងផលិតអំបិលតូចមួយនៅក្នុងតំបន់ Donetsk ភាគខាងកើតប្រទេសអ៊ុយក្រែន ដែលជាចំណុចផ្តោតនៃការប្រយុទ្ធគ្នាយ៉ាងខ្លាំងអស់រយៈពេលជាច្រើនខែមកហើយ៕អត្ថបទ៖ ប៊ុនថន

លោក Zelenskyy និយាយចំអកការអះអាងរបស់រុស្ស៊ីលើទីក្រុង Soledar ដោយនិយាយថា ការប្រយុទ្ធនៅតែបន្ត

អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy បាននិយាយចំអកចំពោះការអះអាងរបស់រុស្ស៊ីថា បានចូលគ្រប់គ្រងផ្នែកខ្លះនៃទីក្រុង Soledar ភាគខាងកើតដោយនិយាយថា ការប្រយុទ្ធគ្នានៅតែបន្ត។ ក្រុមទាហានស៊ីឈ្នួលរុស្ស៊ីរបស់ក្រុមហ៊ុន Wagner កាលពីថ្ងៃអង្គារបានអះអាងថា ខ្លួនដណ្តើមបានការគ្រប់គ្រងទាំងស្រុងលើទីក្រុង Soledar ប៉ុន្តែការប្រយុទ្ធនៅតែបន្តនៅទីក្រុងនេះ។ ទីក្រុង Soledar គឺជាទីក្រុងផលិតអំបិលមួយនៅជិតទីក្រុង Bakhmut ដែលជាការផ្តោតសំខាន់នៃការវាយលុករបស់រុស្ស៊ីក្នុងគោលបំណងដណ្តើមយកតំបន់ Donbas ទាំងមូលនៅភាគខាងកើតប្រទេសអ៊ុយក្រែន។ លោក Zelenskiy បាននិយាយនៅតាមវីដេអូមួយថា ពេលនេះរដ្ឋភេរវករ និងអ្នកឃោសនារបស់ខ្លួនកំពុងព្យាយាមនិយាយបំផ្លើសថា ផ្នែកខ្លះនៃទីក្រុង Soledar របស់យើងគឺជាផ្នែកមួយចំនួនរបស់រុស្ស៊ី ប៉ុន្តែការប្រយុទ្ធគ្នានៅតែបន្ត។ នៅក្នុងសេចក្តីថ្លែងការណ៍ដាច់ដោយឡែកមួយនៅលើបណ្តាញសង្គម Facebook ផ្នែកសេនាធិការរបស់កងកម្លាំងប្រដាប់អាវុធអ៊ុយក្រែនបាននិយាយថា រុស្សីកំពុងទទួលរងការបាត់បង់ច្រើន ខណៈពួកគេព្យាយាមដណ្តើមយកទីក្រុង Soledar និងកាត់ផ្តាច់ផ្លូវផ្គត់ផ្គង់សម្រាប់អង្គភាពដែលគាំទ្រក្រុងគីវ។ ទន្ទឹមនឹងនេះទាហានអ៊ុយក្រែនបានបាញ់កាំភ្លើងធំ PzH 2000 ដែលផលិតដោយអាល្លឺម៉ង់នៅទីតាំងរបស់រុស្ស៊ីជាច្រើនកាលពីថ្ងៃពុធនៅជិតទីក្រុង Soledar។ ទោះបីជាមានកំហុសបច្ចេកទេសមួយចំនួនក៏ដោយ ក្រុមទាហានបានពេញចិត្តនឹងកាំភ្លើងធំ PzH 2000។ នៅពេលដែលកាំភ្លើងស្វ័យប្រវត្តិដំណើរការអត្រាបាញ់គឺមិនគួរឱ្យជឿ។ វាបាញ់បានយ៉ាងលឿន វាបាញ់បានចំគោលដៅ។ ប្រសិនបើអ្នកធ្វើអ្វីគ្រប់យ៉ាងបានត្រឹមត្រូវ នោះវានឹងបាញ់បានចំគោលដៅមិនគួរឱ្យជឿ។ មេបញ្ជាការរុស្ស៊ីបានដាក់គោលដៅលើទីក្រុង Soledar ជាទីតាំងមួយដើម្បីវាយប្រហារទីក្រុង Bakhmut នៅក្បែរនោះដែលបានផ្អាកអស់រយៈពេលជាច្រើនខែ៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

[UPDATE] រញ្ជួយដីនៅប្រទេសជប៉ុនធ្វើឱ្យសហគមន៍នានាខ្វះខាតទឹក ខណៈអ្នកស្លាប់ឡើងដល់ជិត៣០នាក់

ផលិតផលសក្តានុពលចំនួន៥ បានគាំទ្រដល់កំណើនខ្ពស់នៃនាំចេញរបស់កម្ពុជា ក្នុងឆមាសទី១ឆ្នាំនេះ

អត្តពលិកជាង ៦,៥០០នាក់ ត្រៀមចូលរួមព្រឹត្តិការណ៍ម៉ារ៉ាតុងអន្ដរជាតិចក្រភពអង្គរ លើកទី១១ នាចុងសប្ដាហ៍

លោក Trump ដាក់ការទាមទារថ្មីឲ្យធ្វើសេចក្ដីស្នើច្បាប់សម្រាប់ដាក់ទណ្ឌកម្មរុស្ស៊ី និងអ៊ីរ៉ង់

សង្គ្រាមស៊ូដង់ដែលត្រូវបានបំភ្លេចចោលធ្វើឱ្យមនុស្សរាប់លាននាក់អត់ឃ្លាន ខណៈពិភពលោក ចាប់អារម្មណ៍តែសង្គ្រាមអ៊ីរ៉ង់ និងអ៊ុយក្រែន

ក្រុមហ៊ុនអេឡិចត្រូនិចមានសក្តានុពលមួយ គ្រោងពង្រីកការវិនិយោគបន្ថែមនៅកម្ពុជា

ប្រធានាធិបតីអ៊ុយក្រែន មានបំណងចាប់ផ្តើមផលិតមីស៊ីលស្ទាក់ចាប់ដែលមានអាជ្ញាប័ណ្ណ

លីគកំពូលកម្ពុជានឹងត្រូវចាប់ឆ្នោត និងប្រកាសបើករដូវកាលថ្មី ឆ្នាំ២០២៦/២៧ នាថ្ងៃស្អែក

អ៊ីរ៉ង់ បន្តវាយបកប្រឆាំងសហរដ្ឋអាមេរិក ខណៈការវាយប្រហារក្នុងតំបន់កាន់តែឡើងកម្តៅ

អ៊ីរ៉ង់និយាយថា ការតតាំងនឹងនៅបន្ត ដរាបណាការគំរាមកំហែងរបស់អាមេរិកនៅតែមាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ជន​ស៊ីវិល​រាប់​រយ​នាក់​បាន​ជាប់​ក្នុង​ទីក្រុង Soledar ស្រប​ពេល​សមរភូមិ​ប្រយុទ្ធ​នៅតែ​ក្ដៅគគុក​

ឆ្នាំ២០២២ ខេត្ដសៀមរាប ទទួលអ្នកទេសចរជាតិ និងអន្ដរជាតិជាង ២លាននាក់

រដ្ឋអាជ្ញា​ពិសេស​ត្រូវបានតែងតាំង​ដើម្បី​ស៊ើបអង្កេត​ឯកសារ​របស់លោក Biden ដែល​បាន​ផ្ទៀងផ្ទាត់​

សម្តេចតេជោ ហ៊ុន សែន​ អញ្ជើញដឹកនាំប្រជុំពេញអង្គគណៈរដ្ឋមន្ត្រី

លោក Putin ប្រាប់​រដ្ឋាភិបាល​ថា ស្ថានភាព​នៅ​តំបន់​អ៊ុយ​ក្រែ​ន​ដែល​បាន​ភ្ជាប់​ឧបសម្ព័ន្ធ​មានការ​លំបាក​

លោក Zelenskyy និយាយ​ចំអក​ការអះអាង​របស់​រុស្ស៊ី​លើ​ទីក្រុង Soledar ដោយ​និយាយ​ថា ​ការប្រយុទ្ធ​នៅតែ​បន្ត​