BTV NEWS

សម្តេចតេជោ ហ៊ុន សែន នឹងបំពេញទស្សនកិច្ចមិត្តភាពផ្លូវការនៅប្រទេសចិនរយៈពេលបីថ្ងៃចាប់ពីថ្ងៃទី២៥ដល់២៧ ខែមិថុនាខាងមុខនេះ

កម្ពុជា-អ៊ីស្រាអែល ឯកភាពបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរីកចម្រើន

សម្ដេចធិបតី៖ រាជរដ្ឋាភិបាលសម្រេចបន្តផ្តល់ការលើកទឹកចិត្តផ្នែកពន្ធដារ លើផលិតផលស៊ីម៉ងត៍ក្នុងស្រុក សម្រាប់រយៈពេល ២ឆ្នាំទៀត

ផ្ទះទេវតា១ខ្នង មានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត, សម្ដេចធិបតី និងលោកជំទាវបណ្ឌិត ត្រូវបានលោកជំទាវ ហ៊ុន ម៉ាណា ប្រគល់ជូនលោកតាចាស់ជរា នៅខេត្តកំពង់ធំ

ព័ត៌មានសំខាន់ៗ

សម្តេចប្រធានព្រឹទ្ធសភា អនុញ្ញាតឱ្យឯកអគ្គរដ្ឋទូតសាធារណរដ្ឋអាមេនីចូលជួបសម្តែងការគួរសម

ភ្នំពេញ៖ នាព្រឹកថ្ងៃទី១៩ ខែសីហា ឆ្នាំ២០២២នេះសម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានអនុញ្ញាតឱ្យឯកឧត្តម Vahram Kazhoyan ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអាមេនី ជួបសម្តែងការគួរសម នៅវិមានព្រឹទ្ធសភា។ សម្តេចប្រធានព្រឹទ្ធសភាបានសម្តែងការស្វាគមន៍ និងអបអរសាទរចំពោះឯកឧត្តម Vahram Kazhoyan ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអាមេនីប្រចាំព្រះរាជាណាចក្រកម្ពុជា។សម្តេចប្រធានព្រឹទ្ធសភាមានជំនឿជឿជាក់ថា ក្នុងអាណត្តិបេសកកម្មការទូតរបស់ឯកឧត្តម ឯកឧត្តមនឹងខិតខំលើកកម្ពស់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរីកចម្រើន ដើម្បីជាគុណប្រយោជន៍សម្រាប់ប្រជាជន និងប្រទេសទាំងពីរ ទាំងពេលបច្ចុប្បន្ន និងក្នុងពេលអនាគត។សម្តេចប្រធានព្រឹទ្ធសភាបានបញ្ជាក់ថា ព្រឹទ្ធសភាកម្ពុជាត្រៀមខ្លួនជានិច្ច ដើម្បីធ្វើសហប្រតិបត្តិការដ៏ជិតស្និទ្ធជាមួយឯកឧត្តមឯកអគ្គរដ្ឋទូត និងស្ថានទូតអាមេនី ដើម្បីរួមចំណែកបន្តពង្រឹងពង្រីកចំណងមិត្តភាព និង កិច្ចសហប្រតិបត្តិការសម្រាប់ផលប្រយោជន៍ទៅវិញទៅមករបស់ប្រជាជន និងប្រទេសទាំងពីរ។ក្នុងឱកាសនោះ ឯកឧត្តម Vahram Kazhoyan បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ។ ឯកឧត្តមបានគូសបញ្ជាក់ថា តាមរយៈបេសកកម្មការទូតរបស់ឯកឧត្តម ឯកឧត្តមនឹងខិតខំពង្រីកទំនាក់ទំនង និងកិច្ចសហប្រតិបត្តិការរវាងសភា រដ្ឋាភិបាល និងប្រជាជននៃប្រទេសទាំងពីរ៕

រុស្ស៊ីជំរុញឲ្យមានការត្រួតពិនិត្យជាអន្តរជាតិនៅទីតាំងរោងចក្រថាមពលនុយក្លេអ៊ែរដែលរងការបាញ់ផ្លោង

រុស្ស៊ី៖ អ្នកការទូតជាន់ខ្ពស់រុស្ស៊ីមួយរូបបាននិយាយថា ប្រទេសរុស្ស៊ីកំពុងអំពាវនាវឲ្យដល់ទីភ្នាក់ងារថាមពលអាតូមិកអន្តរជាតិ (IAEA) ឲ្យមានដំណើរចុះត្រួតរោងចក្រថាមពលនុយក្លេអ៊ែរ Zaporizhzhia កាន់តែឆាប់កាន់តែល្អ ដើម្បីបំពេញអាណត្តិរបស់ខ្លួនជាទីភ្នាក់ងារឃ្លាំមើលនុយក្លេអ៊ែររបស់អង្គការសហប្រជាជាតិ។ ក្នុងអំឡុងសន្និសីទស្ដីពីសន្ធិសញ្ញាមិនរីកសាយអាវុធនុយក្លេអ៊ែរកាលពីថ្ងៃពុធ លោក Igor Vishnevetsky អនុរដ្ឋមន្ត្រីការបរទេសទទួលបន្ទុកការគ្រប់គ្រងអាវុធបាននិយាយថា យើងចង់ឲ្យបេសកកម្មរបស់ទីភ្នាក់ងារថាមពលអាតូមិកអន្តរជាតិកើតឡើងឆាប់ៗនេះ។ ប្រទេសរុស្ស៊ីនឹងប្រឹងប្រែងអស់ពីលទ្ធភាពដើម្បីសម្របសម្រួលការងារនេះ។ លោកបានបន្ថែមថា ការចុះត្រួតពិនិត្យនេះត្រូវបានស្នើឡើងមួយរយៈមកហើយ ប៉ុន្តែត្រូវបានបរាជ័យ តែមិនមែនដោយសារតែកំហុសរបស់យើងទេ។អ្នកការទូតរូបនេះបានចង្អុលទៅអ៊ុយក្រែនដោយនិយាយថា ដោយសារតែមានការវាយប្រហារជាទៀងទាត់របស់អ៊ុយក្រែន ទៅលើទីតាំងរោងចក្រថាមពលនុយក្លេអ៊ែរនោះ ទើបមិនមានសុវត្ថិភាពសម្រាប់ក្រុមអធិការកិច្ចក្នុងការចុះត្រួតពិនិត្យរោងចក្រនោះ។ លោក Vishnevetsky បានសង្កត់ធ្ងន់ថា មនុស្សមិនគួរវាយប្រហារទីតាំងនុយក្លេអ៊ែរទេ មិនគួរប្រើកាំភ្លើងធំ ឬអាវុធផ្សេងទៀតដាក់គោលដៅលើរោងចក្រថាមពលនុយក្លេអ៊ែរទេ។ ភាគីអ៊ុយក្រែនដឹងច្បាស់ហើយតែនៅតែធ្វើ ដែលជាទង្វើនៃអំពើភេរវកម្មនុយក្លេអ៊ែរយ៉ាងច្បាស់៕អត្ថបទ៖ សុខមាន

ភ្លើងឆេះព្រៃនៅប្រទេសអាល់ហ្សេរីបណ្តាលឲ្យមនុស្សយ៉ាងហោចណាស់ ២៦នាក់ស្លាប់

អាល់ហ្សេរី៖ យ៉ាងហោចណាស់មនុស្ស ២៦នាក់បានស្លាប់ និងច្រើននាក់ទៀតរងរបួសដោយសារភ្លើងឆេះព្រៃ ដែលបានបំផ្លាញតំបន់ភាគខាងជើងប្រទេសអាល់ហ្សេរី។ លោក Kamel Beldjoud រដ្ឋមន្ត្រីក្រសួងមហាផ្ទៃរបស់ប្រទេសនិយាយថា មនុស្ស ២៤នាក់បានស្លាប់នៅតំបន់ El Tarf ជិតព្រំដែនជាមួយប្រទេសទុយនេស៊ី ព្រមទាំងម្តាយ និងកូនស្រីម្នាក់នៅតំបន់ Setif។ ក្រុមអ្នកពន្លត់អគ្គីភ័យដែលមានជំនួយដោយឧទ្ធម្ភាគចក្រ នៅតែព្យាយាមទប់ស្កាត់ការឆាបឆេះដោយភ្លើងជាច្រើនកន្លែងកាលពីល្ងាចថ្ងៃពុធ។ របាយការណ៍និយាយថា ពលរដ្ឋប្រមាណ ៣៥០នាក់ត្រូវបានជម្លៀសចេញពីតំបន់ក្បែរភ្លើងឆេះព្រៃ។ ទីភ្នាក់ងារការពារជនស៊ីវិលបាននិយាយថា តំបន់ El Tarf ជាតំបន់ដែលរងគ្រោះខ្លាំងជាងគេដែលមានភ្លើងឆេះចំនួន ១៦កន្លែងកំពុងឆេះ។ នៅភាគខាងជើងប្រទេសអាល់ហ្សេរីបានរងផលប៉ះពាល់ដោយភ្លើងឆេះព្រៃជារៀងរាល់ឆ្នាំ ដោយមនុស្ស ៩០នាក់បានស្លាប់កាលពីឆ្នាំមុន ហើយព្រៃឈើជាង ១០០,០០០ហិកតាត្រូវបានឆេះបំផ្លាញ។ កាលពីខែសីហាឆ្នាំមុន រដ្ឋមន្ត្រីក្រសួងមហាផ្ទៃលោក Beldjoud បានដាក់កំហុសការរាលដាលភ្លើងឆេះព្រៃនៅក្នុងតំបន់ Kabyle ប្រទេសអាល់ហ្សេរីថាមានការដុតបំផ្លាញ៕អត្ថបទ៖ ប៊ុនថន

មន្ត្រីជាន់ខ្ពស់របស់ UN បានជំរុញឲ្យមេដឹកនាំយោធាមីយ៉ាន់ម៉ាដោះលែងអ្នកទោស និងបញ្ឈប់ការប្រហារជីវិត

មីយ៉ាន់ម៉ា៖ មន្ត្រីជាន់ខ្ពស់អង្គការសហប្រជាជាតិបាននិយាយថា លោកស្រីបានជំរុញមេដឹកនាំយោធាមីយ៉ាន់ម៉ាឱ្យដោះលែងអ្នកទោសនយោបាយ និងបញ្ឈប់ការប្រហារជីវិត នៅក្នុងដំណើរទស្សនកិច្ចដ៏កម្រធ្វើឡើងក្នុងពេលមានអំពើហិង្សាកើនឡើងនៅក្នុងប្រទេស។ សហភាពមីយ៉ាន់ម៉ាស្ថិតក្នុងភាពវឹកវរ ចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតដឹកនាំដោយលោកស្រី Aung San Suu Kyi កាលពីដើមឆ្នាំមុន ហើយបានចាប់ផ្តើមបង្ក្រាបបង្ហូរឈាមលើការតវ៉ាដោយសន្តិវិធី និងចលនាតស៊ូប្រដាប់អាវុធដែលកើតឡើង។ ប្រព័ន្ធផ្សព្វផ្សាយរដ្ឋបានរាយការណ៍ថា លោកស្រី Noeleen Heyzer បានមកដល់រដ្ឋធានី Naypyidaw ហើយត្រូវបានស្វាគមន៍ដោយមន្ត្រីក្រសួងការបរទេស មុនពេលជួបជាមួយប្រមុខយោធាលោក Min Aung Hlaing នៅថ្ងៃពុធ។ លោកស្រី Heyzer បាននិយាយនៅក្នុងសេចក្តីថ្លែងការណ៍ ដែលចេញផ្សាយដោយអង្គការសហប្រជាជាតិថា ដំណើរទស្សនកិច្ចរបស់លោកស្រី គឺដើម្បីបង្ហាញពីការព្រួយបារម្ភរបស់អង្គការសហប្រជាជាតិ និងស្នើឱ្យមានចំណាត់ការជាក់ស្តែងដែលត្រូវការដើម្បីកាត់បន្ថយជម្លោះ និងការរងទុក្ខរបស់ប្រជាជន។អ្នកនាំពាក្យយោធាមីយ៉ាន់ម៉ាមិនបានឆ្លើយតប នឹងសំណើសុំការអត្ថាធិប្បាយអំពីជំនួបនេះទេ។ ទូរទស្សន៍រដ្ឋមីយ៉ាន់ម៉ា MRTV បានរាយការណ៍កាលពីថ្ងៃពុធថា ជំនួបនេះបានពិភាក្សាអំពីទំនាក់ទំនងរវាងមីយ៉ាន់ម៉ា និងអង្គការសហប្រជាជាតិ។ ការថ្កោលទោសជាសាកលបានធ្លាក់មកលើឧត្តមសេនីយ៍ជាច្រើនរូបរបស់សហភាពមីយ៉ាន់ម៉ា ដែលថ្មីៗនេះភាគច្រើនថ្កោលទោសលើការប្រហារជីវិតសកម្មជនលទ្ធិប្រជាធិបតេយ្យបួននាក់ ដែលពួកគេបាននិយាយថា បានជួយក្នុងសកម្មភាពភេរវកម្ម ដោយសំដៅទៅលើការវាយប្រហារដោយកងជីវពល ដែលប្រយុទ្ធប្រឆាំងការគ្រប់គ្រងរបស់យោធា និងព្យាយាមសងសឹកចំពោះការបង្ក្រាបលើការតវ៉ា។ ដំណើរទស្សនកិច្ចរបស់លោកស្រី Heyzer ធ្វើឡើងមួយថ្ងៃ បន្ទាប់ពីតុលាការបានកាត់ទោសមេដឹកនាំប្រទេស ដែលត្រូវបានបណ្តេញចេញពីតំណែងលោកស្រី Aung San Suu Kyi ឱ្យជាប់ពន្ធនាគាររយៈពេលប្រាំមួយឆ្នាំពីបទចោទប្រកាន់អំពើពុករលួយ៕អត្ថបទ៖ ប៊ុនថន

ចិនហៅសហរដ្ឋអាមេរិកថាជាជើងកាង ក្រោយការអត្ថាធិប្បាយរបស់មន្ត្រីសេតវិមាន

ចិន៖ អ្នកនាំពាក្យក្រសួងការបរទេសចិនបានវាយបកការអត្ថាធិប្បាយពីលោក Kurt Campbell អ្នកសម្របសម្រួលក្រុមប្រឹក្សាសន្តិសុខជាតិប្រចាំតំបន់ឥណ្ឌូ-ប៉ាស៊ីហ្វិកដែលថា ប្រទេសចិនប្រតិកម្មហួសហេតុចំពោះដំណើរទស្សនកិច្ចរបស់លោកស្រី Nancy Pelosi ទៅកាន់កោះតៃវ៉ាន់កាលពីថ្ងៃទី២ ខែសីហាកន្លងទៅនេះ។ អ្នកនាំពាក្យក្រសួងការបរទេសចិនលោក Wang Wenbin បាននិយាយអំឡុងសន្និសីទសារព័ត៌មានមួយកាលពីថ្ងៃពុធថា យោងតាមសំឡេងដែលបានថតទុក វាច្បាស់ណាស់ថា សហរដ្ឋអាមេរិកកំពុងព្យាយាមការពារអ្វីដែលមិនអាចការពារបាន ដោយការអនុវត្តន៍ហេតុផលបែបទំនើង និងធ្វើដូចជាជើងកាង។ ប្រទេសចិនទំនងជាសងសឹកកោះតៃវ៉ាន់ ចំពោះដំណើរទស្សនកិច្ចរបស់លោកស្រី Pelosi តាមរយៈមធ្យោបាយមួយចំនួនរួមទាំងសមយុទ្ធយោធាក្នុងច្រកសមុទ្រតៃវ៉ាន់ និងបម្រាមលើការនាំចូលចូលដ៏សំខាន់ពីកោះស្វ័យគ្រប់គ្រងមួយនេះ។ លោក Campbell បាននិយាយអំឡុងពេលថតសំឡេងតាមទូរស័ព្ទកាលពីសប្ដាហ៍មុនថា ប្រទេសចិនមានប្រតិកម្មជ្រុលហួសហេតុ ហើយសកម្មភាពដែលនៅតែបន្តរបស់ខ្លួននឹងក្លាយជាការបង្ករឿង បង្កអស្ថិរភាព និងជាសកម្មភាពមិនធ្លាប់មានពីមុនមក។លោក Campbell បាននិយាយថា សកម្មភាពថ្មីៗរបស់ចិន ផ្ទុយទាំងស្រុងទៅនឹងគោលបំណងនៃសន្តិភាព និងស្ថិរភាព និងជាផ្នែកមួយនៃយុទ្ធនាការដាក់សម្ពាធកាន់តែខ្លាំងប្រឆាំងនឹងកោះតៃវ៉ាន់។ កាលពីថ្ងៃពុធលោក Wang បានវាយបកថា មិនមែនជាចិនទេគឺសហរដ្ឋអាមេរិកទៅវិញទេ ដែលបានធ្វើឲ្យប៉ះពាល់ដល់សន្តិភាព និងស្ថិរភាពទូទាំងច្រកសមុទ្រ ដោយចោទប្រកាន់ដំណើររបស់លោកស្រី Pelosi ថា បានបំពានអធិបតេយ្យភាពរបស់ចិន។ ជំហររបស់ក្រុងប៉េកាំងគឺថា មានចិនតែមួយប៉ុណ្ណោះ ហើយកោះតៃវ៉ាន់គឺជាផ្នែកមួយរបស់ចិន។ កោះតៃវ៉ាន់បានហៅខ្លួនឯងថាជាសាធារណៈរដ្ឋប្រជាមានិតចិន និងបានក្លាយជាកោះស្វ័យគ្រប់គ្រងចាប់តាំងពីឆ្នាំ១៩៤៩ មក៕ អត្ថបទ៖ សុខមាន

ចិននឹងចូលរួមសមយុទ្ធយោធាជាមួយរុស្ស៊ី ខណៈទំនាក់ទំនងជាមួយគូប្រជែងអាមេរិកកាន់តែដុនដាប

ចិន៖ ទីក្រុងប៉េកាំងបាននិយាយថា ខ្លួននឹងបញ្ជូនកងទ័ពទៅកាន់ប្រទេសរុស្ស៊ី ដើម្បីចូលរួមសមយុទ្ធយោធារួមគ្នាដោយមានការចូលរួមពីប្រទេសផ្សេងទៀត រួមទាំងឥណ្ឌា បេឡារុស ម៉ុងហ្គោលី និងតាហ្ស៊ីគីស្ថាន។ កងទ័ពរំដោះប្រជាជនចិនបាននិយាយថា ខ្លួននឹងចូលរួមសមយុទ្ធយោធារួមគ្នាដែលដឹកនាំដោយប្រទេសរុស្ស៊ី ជាការបង្ហាញចុងក្រោយនៃភាពជាដៃគូរវាងគូរប្រជែងទាំង២ ជាមួយសហរដ្ឋអាមេរិក។ ក្រសួងការពារជាតិចិនបាននិយាយកាលពីថ្ងៃទី១៧ ខែសីហាថា ការចូលរួមក្នុងសមយុទ្ធរួមគ្នានេះគឺមិនជាប់ពាក់ព័ន្ធនឹងស្ថានភាពអន្តរជាតិ និងក្នុងតំបន់នាពេលបច្ចុប្បន្ននេះទេ ដែលទំនងជាសំដៅដល់ការវាយលុករបស់រុស្ស៊ីដែលនៅតែបន្តនៅក្នុងប្រទេសអ៊ុយក្រែន។ សេចក្ដីថ្លែងការណ៍បាននិយាយថា សមយុទ្ធនេះគឺជាផ្នែកមួយនៃកិច្ចព្រមព្រៀងសហប្រតិបត្តិការទ្វេភាគីប្រចាំឆ្នាំដែលនៅតែបន្ត។ សមយុទ្ធរួមគ្នាស្រដៀងគ្នាដែលដឹកនាំដោយរុស្ស៊ីមានការចូលរួមពីចិន បានប្រព្រឹត្តទៅក្នុងរយៈពេលប៉ុន្មានឆ្នាំថ្មីៗនេះ។ សេចក្ដីថ្លែងការណ៍ខាងលើនិយាយថា គោលបំណងដើម្បីបង្កើនកិច្ចសហប្រតិបត្តិការជាក់ស្ដែង និងមិត្តភាពកាន់តែស៊ីជម្រៅថែមទៀតជាមួយកងទ័ពដែលចូលរួមពីប្រទេសផ្សេងៗ និងពង្រឹងសមត្ថភាពឆ្លើយតបការគំរាមផ្នែកសន្តិសុខផ្សេងៗ។ចិនគឺជាប្រទេសមួយក្នុងចំណោមប្រទេសមួយចំនួន ដែលពុំបានដាក់ទណ្ឌកម្មលើរុស្ស៊ីជុំវិញការវាយប្រហារចូលអ៊ុយក្រែន។ ប្រមុខការទូតអាមេរិកលោក Antony Blinken ធ្លាប់បានប្រាប់សមភាគីចិនរបស់លោកកាលពីខែមុនថា លោកមិនទទួលយកការអះអាងរបស់ចិនដែលថា ខ្លួនឈរនៅកណ្ដាលក្នុងជម្លោះអ៊ុយក្រែន និងបាននិយាយថា ទីក្រុង Washington ព្រួយបារម្ភពីការរួមដៃគ្នារបស់ចិនជាមួយរុស្ស៊ី៕អត្ថបទ៖ សុខមាន

អ៊ុយក្រែននិយាយថា ការវាយប្រយុទ្ធគ្នាកាន់តែខ្លាំងក្លា ខណៈប្រមុខ UN ទៅដល់ទីក្រុង Lviv

អ៊ុយក្រែន៖ កងកម្លាំងអ៊ុយក្រែនបាននិយាយនៅថ្ងៃព្រហស្បតិ៍នេះថា ពួកគេបានរងការវាយសន្ធាប់ជាថ្មីពីការវាយប្រហាររបស់រុស្ស៊ីនៅក្នុងតំបន់ភាគខាងត្បូង Kherson ចំណែកឯការបាញ់ផ្លោងពីសំណាក់កងកម្លាំងវិមានក្រឹមឡាំងនៅក្នុងទីក្រុង Kharkiv ភាគខាងជើងរបស់អ៊ុយក្រែនបានសម្លាប់មនុស្ស ៧នាក់ ខណៈដែលសមរភូមិប្រយុទ្ធមានរយៈពេលជិត ៦ខែនៅតែពុំទាន់មានមធ្យោបាយបញ្ចប់នៅឡើយ។ ក្រោយពេលទៅដល់អ៊ុយក្រែនកាលពីថ្ងៃពុធ អគ្គលេខាធិការអង្គការសហប្រជាជាតិលោក Antonio Guterres នឹងជួបលោកប្រធានាធិបតីអ៊ុយក្រែន Volodymyr Zelenskiy និងលោកប្រធានាធិបតីទួរគី Tayyip Erdogan នៅថ្ងៃព្រហស្បតិ៍នេះ ក្រោយមកទៀតនៅថ្ងៃព្រហស្បតិ៍ដដែលលោក Guterres នឹងទៅកាន់ទីក្រុង Lviv ភាគខាងលិចរបស់អ៊ុយក្រែន។ មេដឹកនាំទាំង៣ នឹងពិភាក្សាពីដំណោះស្រាយជម្លោះជាមួយរុស្ស៊ី និងដោះស្រាយការគំរាមកំហែងការផ្គត់ផ្គង់ស្បៀងអាហារសកល និងការប្រឈមគ្រោះមហន្តរាយនៅរោងចក្រនុយក្លេអ៊ែរធំបំផុតរបស់អឺរ៉ុប ដែលត្រូវបានកងកម្លាំងរុស្ស៊ីដណ្ដើមគ្រប់គ្រង។សង្គ្រាមនេះបានបណ្ដាលឲ្យមនុស្សរាប់លាននាក់រត់ភៀសខ្លួន មនុស្សរាប់ពាន់នាក់ស្លាប់ និងធ្វើឲ្យជម្លោះភូមិសាស្ត្រនយោបាយកាន់តែធ្ងន់ធ្ងររវាងលោកខាងលិច និងរុស្ស៊ី ដែលវិមានក្រឹមឡាំងនិយាយថា ប្រតិបត្តិការរបស់ខ្លួនគឺដើម្បីធ្វើឲ្យប្រទេសជិតខាងមួយនេះគ្មានកងទ័ព និងការពារសហគមន៍និយាយភាសារុស្ស៊ីនៅក្នុងប្រទេសអ៊ុយក្រែន៕អត្ថបទ៖ សុខមាន

អង្គការសុខភាពពិភពលោកចេញការព្រមានពីការឆ្លងរាលដាលជំងឺអុតស្វាដល់ម្ចាស់សត្វចិញ្ចឹម

WHO៖ អង្គការសុខភាពពិភពលោកបានចេញការព្រមាន ដល់មនុស្សដែលបានឆ្លងជំងឺអុតស្វាឲ្យនៅដាច់ឆ្ងាយពីសត្វផ្សេងៗ បន្ទាប់ពីត្រូវបានគេដឹងថាមានករណីឆ្លងដំបូងពីមនុស្សទៅសត្វសុនខ ត្រូវបានកត់ត្រានៅក្នុងទស្សនាវដ្ដីឱសថ Lancet។ ប្រធានបច្ចេកទេសនៃជំងឺអុតស្វារបស់អង្គការសុខភាពពិភពលោក លោកស្រីវេជ្ជបណ្ឌិត Rosamund Lewis បានប្រាប់ក្រុមអ្នកសារព័ត៌មានកាលពីថ្ងៃពុធថា នេះគឺជាករណីឆ្លងដំបូងដែលត្រូវបានរាយការណ៍ពីការឆ្លងពីមនុស្សទៅសត្វ ហើយយើងជឿថា នេះជាឧទាហរណ៍ដំបូងនៃសត្វសុនខដែលត្រូវបានឆ្លង។ អ្នកជំនាញជំងឺរាតត្បាតបានដឹងថា ការចម្លងជំងឺបែបនេះអាចកើតឡើងបាន ដោយក្រុមទីភ្នាក់ងារសុខភាពសាធារណៈមួយចំនួន បានណែនាំរួចទៅហើយឲ្យនៅឆ្ងាយពីសត្វចិញ្ចឹមរបស់ពួកគេ ប៉ុន្តែឧទាហរណ៍ជាក់លាក់មិនត្រូវបានកត់ត្រាទេរហូតដល់សប្ដាហ៍មុន។ របាយការណ៍របស់ទស្សនាវដ្ដី Lancet បានលើកឡើងពីបុរសភេទទី៣ ចំនួន ២នាក់រស់នៅជាមួយគ្នាក្នុងអគារអឹផាតមិនមួយក្នុងទីក្រុងប៉ារីស ជាមួយសុនខពណ៌ប្រផេះពូជមកពីប្រទេសអ៊ីតាលី។ ពួកគេបានរកឃើញដំបៅនៅលើសុនខ ១២ថ្ងៃបន្ទាប់ពីចាប់ផ្ដើមលេចចេញរោគសញ្ញា និងបានបង្ហាញថា ពួកគេរួមដំណេកជាមួយសត្វសុនខរបស់ពួកគេ។ ការវិភាគហ្សែនបានបញ្ជាក់ថា វីរុសដែលបានឆ្លងទៅសត្វសុនខ គឺមានលក្ខខណៈដូចគ្នាទៅនឹងការឆ្លងទៅម្ចាស់របស់វាដែរ។អង្គការសុខភាពពិភពលោកបានរាយការណ៍កាលពីថ្ងៃពុធថា មនុស្សចំនួន ៣៥,០០០នាក់បានឆ្លងជំងឺអុតស្វានៅទូទាំងពិភពលោក ជាវីរុសស្រដៀងទៅនឹងវីរុសអុតមាន់ដែលធម្មតារាតត្បាតឆ្លងនៅទ្វីបអាហ្វ្រិក ចាប់តាំងពីជំងឺនេះបានរាតត្បាតកាលពីខែឧសភា។ កាលពីសប្ដាហ៍មុនគេបានមើលឃើញករណីឆ្លងថ្មីចំនួន ៧,៥០០នាក់កើនឡើង ២០% លើសកាលពីសប្ដាហ៍កន្លងទៅ។ វីរុសនេះត្រូវបានរកឃើញនៅក្នុងប្រទេសចំនួន ៩២ ទោះបីជាករណីឆ្លងភាគច្រើនត្រូវបានកើតមាននៅទ្វីបអឺរ៉ុប និងអាមេរិកក៏ដោយ៕អត្ថបទ៖ សុខមាន

មហោស្រពសិល្បៈក្បាច់របាំបុរាណខ្មែរ ត្រៀមសម្ដែងចុងខែនេះ កំពុងទទួលបានការចាប់អារម្មណ៍ខ្លាំងពីមហាជន

ភ្នំពេញ៖ ការសម្ដែងរបាំក្បាច់បុរាណខ្មែរទ្រង់ទ្រាយធំ កាន់តែខិតមកដល់ ខណៈសិល្បករ-សិល្បការិនី ជិត ២០០នាក់ កំពុងហាត់សមយ៉ាងយកចិត្តទុកដាក់បំផុតទាំងយប់ទាំងថ្ងៃ ដើម្បីធ្វើយ៉ាងណាឱ្យការសម្ដែងដ៏កម្រមួយនេះ ប្រកបដោយភាពអស្ចារ្យសម្រាប់ទស្សនិកជនទាំងជាតិ និងអន្តរជាតិ។ក្រឡេកមកមើលលើបណ្ដាញសង្គមក្នុងប្រទេសកម្ពុជានាពេលនេះ សង្កេតឃើញថា មហាជនកំពុងចាប់អារម្មណ៍ខ្លាំង និងមានការជជែកគ្នាជាច្រើនពីមហោស្រពរបាំក្បាច់បុរាណខ្មែរ រឿង «ព្រះបាទជ័យរវ្ម័នទី៧ ដកស្រង់ត្រង់ឈុត ស្នាព្រះហស្ត និងសមិទ្ធផលនៃមហាវីរក្សត្រទាំង៣អង្គ»។ មហាជន និងអ្នកស្នេហាសិល្បៈវប្បធម៌ជាតិ បានធ្វើការចែករំលែកព្រោងព្រាតអំពាវនាវសូមឱ្យប្រជាជនខ្មែរទិញសំបុត្រចូលទស្សនាព្រឹត្តិការណ៍ដ៏កម្រមួយនេះ ខណៈដែលបច្ចុប្បន្ននេះមានប្រទេសជិតខាងកំពុងបញ្ជៀបវប្បធម៌របស់ពួកគេចូលមកក្នុងប្រទេសកម្ពុជា។ ដូច្នេះហើយមានតែគាំទ្រ សិល្បៈវប្បធម៌ជាតិរបស់ខ្លួនប៉ុណ្ណោះ ទើបអាចជួយលើកតម្កើនវប្បធម៌ជាតិឱ្យថ្កុំថ្កើន មិនអាចមានប្រទេសណាមកបន្លំបានឡើយ។លោក ឈី កុលបុត្រា ដែលជាប្រធានដឹកនាំក្រុមការងារនៃកម្មវិធីមហោស្រពរបាំក្បាច់បុរាណខ្មែរ បានបង្ហាញក្ដីសោមនស្សរីករាយយ៉ាងក្រៃលែង ក្នុងនាមជាអ្នកដឹកនាំរៀបចំកម្មវិធី ក្រោយឃើញសន្ទុះការគាំទ្រយ៉ាងផុលផុសនៅលើបណ្ដាញទំនាក់ទំនងសង្គមនានា។លោកបានមានប្រសាសន៍ថា ពិតជាសប្បាយរីករាយណាស់ ដែលឃើញយុវជន យុវនារី សម័យនេះ បានយល់ច្បាស់ពីអ្វីដែលជាសម្បត្តិវប្បធម៌ និងប្រពៃណីខ្មែរយើង។លោកបានបន្ថែមថា ដោយស្រុកមានសន្តិភាព នាំឱ្យយុវជនមានឱកាសនៅក្នុងការគិតគូរ និងថែរក្សា ការពារ សិល្បៈ វប្បធម៌ខ្មែរ បន្សល់ទុកពីបុព្វបុរសខ្មែរ តាមរយៈការចូលរួមចំណែកជួយលើកស្ទួយទាំងអស់គ្នា ដូចកម្មវិធីមហោស្រពសិល្បៈរបាំក្បាច់បុរាណខ្មែរនេះជាដើម។ដោយសារសន្ទុះនៃការគាំទ្រកាន់តែកើនឡើងខ្លាំង ការលក់សំបុត្រក៏ដាច់អស់ច្រើនដែរ។ ដូច្នេះឆ្លៀតក្នុងឱកាសនេះ លោក កុលបុត្រា ក៏បានអំពាវនាវផងដែរថា៖ «ដោយសារមានការគាំទ្រច្រើន សំបុត្រក៏បានលក់អស់ច្រើនដែរ ហើយកន្លែងអង្គុយទស្សនាមានកំណត់។ ដូច្នេះសូមបងប្អូនប្រញាប់រួសរាន់ឡើង ប្រញាប់ទិញសំបុត្រចូលទស្សនា ដើម្បីកុំឱ្យខកខានផ្ទាំងទស្សនីយភាពដ៏អស្ចារ្យនេះ»។គួរឱ្យដឹងថា ផ្ទាំងទស្សនីយភាពដ៏អស្ចារ្យនេះនឹងបង្ហាញខ្លួននៅសាលន្និសីទចតុម្មុខ នាថ្ងៃទី ២៧ និង ២៨ ខែសីហា ឆ្នាំ ២០២២ ខាងមុខនេះ ក្រោមកិច្ចផ្ដួចផ្ដើមពីសហភាពសហព័ន្ធយុវជនកម្ពុជាខេត្តស្វាយរៀង ជាមួយនឹងសាលារបាំនរោត្ដម បុប្ផាទេវី កំពុងតែបន្តលក់សំបុត្រជារៀងរាល់ថ្ងៃ។សំបុត្រមានលក់តាមរយៈអនឡាញតេឡេក្រាម ០៧៧ ៤៤៤ ៣៣៥ និងមានការលក់ផ្ទាល់នៅសាលសន្និសីទចតុម្មុខ ចាប់ពីថ្ងៃ២២ ដល់ថ្ងៃទី២៨ ខែសីហា ឆ្នាំ២០២២។ *កន្លែងមានកំណត់!តម្លៃសំបុត្រ៖សំបុត្រពិសេស (VIP) ១០០,០០០៛តំបន់ពណ៌បៃតង (Green Zone) ៤០,០០០៛តំបន់ពណ៌ខៀវ (Blue Zone) ២០,០០០៛សម្រាប់ព័ត៌មានលំអិតសូមទំនាក់ទំនងមកលេខ ០៧៧ ៤៤៤ ៣៣៥មិនត្រឹមតែជាការចូលរួមទស្សនា តែជាការគាំទ្រ លើកស្ទួយ និងរក្សាវប្បធម៌ខ្មែរយើងទាំងអស់គ្នា!!!

សម្តេចតេជោ ហ៊ុន សែន អញ្ជើញទទួលវ៉ាក់សាំងបង្ការជំងឺកូវីដ១៩ជំនួយអេស្ប៉ាញចំនួន៣០ម៉ឺនដូស(ភ្ជាប់ជាមួយសុន្ទរកថាទាំងស្រុង)

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញទទួលវ៉ាក់សាំងបង្ការជំងឺកូវីដ-១៩ ដែលជាជំនួយរបស់រដ្ឋាភិបាល និងប្រជាជនអេស្ប៉ាញ នៅវិមានសន្តិភាព នាព្រឹកថ្ងៃទី១៨ ខែសីហា ឆ្នាំ២០២២នេះ។វ៉ាក់សាំងបង្ការជំងឺកូវីដ-១៩ ប្រភេទ Pfizer សម្រាប់ចាក់ជូនកូនក្មេងចំនួន ៣០ម៉ឺនដូស ដែលជាជំនួយរបស់រដ្ឋាភិបាល និងប្រជាជនអេស្ប៉ាញនេះ បានដឹកមកដល់ប្រទេសកម្ពុជានៅវេលារំលងអាធ្រាត្រថ្ងៃទី១៦ ឈានចូលថ្ងៃទី១៧ ខែសីហា ឆ្នាំ២០២២។ មកដល់ពេលនេះ កម្ពុជាទទួលបានវ៉ាក់សាំងសរុបប្រមាណ ៧៤លានដូស ហើយកំពុងសល់នៅក្នុងឃ្លាំងជាង ៧.៦លានដូស។វ៉ាក់សាំង គឺជាបង្អែកដ៏សំខាន់ក្នុងការប្រយុទ្ធប្រឆាំងនឹងជំងឺកូវីដ-១៩ ក៏ដូចជាការពារអាយុជីវិតប្រជាពលរដ្ឋពីជំងឺឆ្លងសាកលមួយនេះ។សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និងជាអគ្គមេបញ្ជាការកំពូលក្នុងសង្គ្រាមកូវីដ-១៩ បានផ្តល់តម្លៃខ្ពស់បំផុតលើការងារចាក់វ៉ាក់សាំង ដើម្បីលុបបំបាត់ជំងឺកូវីដ១៩ និងការពារអាយុជីវិតរបស់ប្រជាពលរដ្ឋ។ទន្ទឹមនឹងការអំពាវនាវឱ្យពលរដ្ឋអនុវត្តវិធានសុខាភិបាលក្នុងការការពារជំងឺកូវីដ១៩ហើយនោះ សម្តេចតេជោ ហ៊ុន សែន ក៏បានដាក់ចេញនូវគោលនយោបាយចាក់វ៉ាក់សាំងតាមយុទ្ធសាស្ត្រផ្ការីក។ គោលនយោបាយចាក់ស្រោចវ៉ាក់សាំងនេះ បានធ្វើឱ្យកម្ពុជាឈានទៅទទួលបានជោគជ័យក្នុងការទប់ស្កាត់ការរីករាលដាលជំងឺកូវីដ-១៩។សម្តេចបានបន្តថា ជំងឺកូវីដ-១៩ មិនទាន់ឃ្លាតទៅណាឆ្ងាយពីយើងនោះទេ ។ ក្នុងន័យនេះ, កម្ពុជា ក៏ដូចជាសកលលោកទាំងមូល ត្រូវបន្តយកចិត្តទុកដាក់ និងខិតខំប្រឹងប្រែង ក្នុងការគ្រប់គ្រងជំងឺកូវីដ-១៩ ដោយស្មារតីបុរេសកម្ម និងប្រុងប្រយ័ត្នខ្ពស់ ជាពិសេសការបន្ត និងពន្លឿនការចាក់វ៉ាក់សាំងដូសជំរុញ ជូនដល់ប្រជាជនគ្រប់រូប និងកុមារដែលមានអាយុពី ៣ ឆ្នាំឡើង ដែលនឹងបន្តដើរតួនាទីស្នូលក្នុងការផ្តល់ការការពារដ៏រឹងមាំ និងមានប្រសិទ្ធភាពបំផុត តទល់នឹងការបំប្លែងខ្លួនថ្មីៗ និងមិនឈប់ឈរនៃជំងឺកូវីដ-១៩។ខាងក្រោមនេះជាខ្លឹមសារ សុន្ទរកថាទាំងស្រុងរបស់សម្តេចតេជោ ហ៊ុន សែន៖

បណ្ដាញសង្គម

ព័ត៌មានថ្មីៗ

មនុស្ស ១៤នាក់ ស្លាប់ ពេលអគ្គិភ័យឆាបឆេះអគារមួយខ្នងនៅទីក្រុង Lucknow ប្រទេសឥណ្ឌា

ពលរដ្ឋជម្លៀសខ្លួននៅលីបង់ ព្រួយបារម្ភខ្លាចបទឈប់បាញ់អ៊ីស្រាអែល-ក្រុមហេសបូឡា ពុំចូលជាធរមាន

ពលរដ្ឋហ្កាហ្សាស្វែងរកកន្លែងស្រាកស្រាន្តនៅក្នុងសមុទ្រកខ្វក់ ដើម្បីគេចវេះពីអាកាសធាតុក្តៅ

រលកបាតុកម្មអាល់បានី ឈានចូលដល់សប្តាហ៍ទី ៤ បើទោះបីជាអាកាសធាតុក្តៅក៏ដោយ

សត្វស្លាបផ្លាស់ទីជម្រក ២ក្បាល បញ្ជាក់ថាមានជំងឺគ្រុនផ្តាសាយបក្សី H5N1 នៅអូស្រ្តាលី

ក្រុមភ្នាក់ងារពន្លត់អគ្គិភ័យបន្តពន្លត់អណ្តាតភ្លើងឆាបឆេះឃ្លាំងស្តុកទំនិញមួយកន្លែងនៅទីក្រុង Houston សហរដ្ឋអាមេរិក

កូរ៉េខាងត្បូងព្រមទទួលយកឈ្លើយសឹកកូរ៉េខាងជើងទាំងអស់នៅអ៊ុយក្រែន បើសិនជាពួកគេប្រាថ្នា

លោក Putin ៖ កងកម្លាំងរុស្ស៊ីជិតដណ្តើមបានទីក្រុង Kostiantynivka ស្ថិតក្នុងតំបន់ Donetskរបស់អ៊ុយក្រែន

តំបន់គ្រីមៀបិទភ្លើងបំភ្លឺតាមផ្លូវ ផ្អាកសេវាដឹកជញ្ជូនសាធារណៈ ខណៈជួបកង្វះខាតប្រេងឥន្ធនៈ

រលកកម្តៅខែមិថុនាបានបំណែកកំណត់ត្រាកាលពីថ្ងៃចន្ទនៅទីក្រុង Nante របស់បារាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

សម្តេចប្រធានព្រឹទ្ធសភា អនុញ្ញាតឱ្យឯកអគ្គរដ្ឋទូតសាធារណរដ្ឋអាមេនីចូលជួបសម្តែងការគួរសម

រុស្ស៊ីជំរុញឲ្យមានការត្រួតពិនិត្យជាអន្តរជាតិនៅទីតាំងរោងចក្រថាមពលនុយក្លេអ៊ែរដែលរងការបាញ់ផ្លោង

ភ្លើងឆេះព្រៃនៅប្រទេសអាល់ហ្សេរីបណ្តាលឲ្យមនុស្សយ៉ាងហោចណាស់ ២៦នាក់ស្លាប់

មន្ត្រីជាន់ខ្ពស់របស់ UN បានជំរុញឲ្យមេដឹកនាំយោធាមីយ៉ាន់ម៉ាដោះលែងអ្នកទោស និងបញ្ឈប់ការប្រហារជីវិត

ចិនហៅសហរដ្ឋអាមេរិកថាជាជើងកាង ក្រោយការអត្ថាធិប្បាយរបស់មន្ត្រីសេតវិមាន

ចិននឹងចូលរួមសមយុទ្ធយោធាជាមួយរុស្ស៊ី ខណៈទំនាក់ទំនងជាមួយគូប្រជែងអាមេរិកកាន់តែដុនដាប

អ៊ុយក្រែននិយាយថា ការវាយប្រយុទ្ធគ្នាកាន់តែខ្លាំងក្លា ខណៈប្រមុខ UN ទៅដល់ទីក្រុង Lviv

អង្គការសុខភាពពិភពលោកចេញការព្រមានពីការឆ្លងរាលដាលជំងឺអុតស្វាដល់ម្ចាស់សត្វចិញ្ចឹម

មហោស្រពសិល្បៈក្បាច់របាំបុរាណខ្មែរ ត្រៀមសម្ដែងចុងខែនេះ កំពុងទទួលបានការចាប់អារម្មណ៍ខ្លាំងពីមហាជន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

សម្តេចប្រធានព្រឹទ្ធសភា អនុញ្ញាតឱ្យឯកអគ្គរដ្ឋទូតសាធារណរដ្ឋអាមេនីចូលជួបសម្តែងការគួរសម

ភ្លើង​ឆេះ​ព្រៃ​នៅ​ប្រទេស​អាល់​ហ្សេ​រី​បណ្តាល​ឲ្យ​មនុស្ស​យ៉ាងហោចណាស់​ ២៦​នាក់​ស្លាប់​

ចិន​ហៅ​សហរដ្ឋអាមេរិក​ថា​ជា​ជើងកាង ក្រោយ​ការ​អត្ថាធិប្បាយ​របស់​មន្ត្រី​សេត​វិមាន​

ចិន​នឹងចូលរួម​សមយុទ្ធ​យោធា​ជាមួយ​រុស្ស៊ី ខណៈ​ទំនាក់ទំនង​ជាមួយ​គូប្រជែង​អាមេរិក​កាន់តែ​ដុនដាប​

អ៊ុយ​ក្រែ​ន​និយាយ​ថា ការ​វាយ​ប្រយុទ្ធ​គ្នា​កាន់តែ​ខ្លាំងក្លា ខណៈ​ប្រមុខ UN ទៅដល់​ទីក្រុង Lviv

អង្គការ​សុខភាព​ពិភពលោក​ចេញ​ការព្រមាន​ពី​ការឆ្លង​រាលដាល​ជំងឺ​អុត​ស្វា​ដល់​ម្ចាស់​សត្វ​ចិញ្ចឹម

មហោស្រពសិល្បៈក្បាច់របាំបុរាណខ្មែរ ត្រៀមសម្ដែងចុងខែនេះ កំពុងទទួលបានការចាប់អារម្មណ៍ខ្លាំងពីមហាជន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ភ្លើងឆេះព្រៃនៅប្រទេសអាល់ហ្សេរីបណ្តាលឲ្យមនុស្សយ៉ាងហោចណាស់ ២៦នាក់ស្លាប់

ចិនហៅសហរដ្ឋអាមេរិកថាជាជើងកាង ក្រោយការអត្ថាធិប្បាយរបស់មន្ត្រីសេតវិមាន

ចិននឹងចូលរួមសមយុទ្ធយោធាជាមួយរុស្ស៊ី ខណៈទំនាក់ទំនងជាមួយគូប្រជែងអាមេរិកកាន់តែដុនដាប

អ៊ុយក្រែននិយាយថា ការវាយប្រយុទ្ធគ្នាកាន់តែខ្លាំងក្លា ខណៈប្រមុខ UN ទៅដល់ទីក្រុង Lviv

អង្គការសុខភាពពិភពលោកចេញការព្រមានពីការឆ្លងរាលដាលជំងឺអុតស្វាដល់ម្ចាស់សត្វចិញ្ចឹម