នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-ចិន ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ
​​សម្ដេចធិបតី នាយករដ្ឋមន្រ្ដី អញ្ជើញជួបជាមួយរដ្ឋមន្រ្ដីការបរទេស និងរដ្ឋមន្រ្ដីការពារជាតិចិន ក្នុងជំនួបសម្តែងការគួរសម និងពិភាក្សាការងារ
TOP STORY | សម្ដេចតេជោ ហ៊ុន សែន៖ «ព្រះរាជសុខភាព​ព្រះមហាក្សត្រ​បាន​ប្រសើរ​ឡើង​ ព្រះអង្គ​មាន​រាជ​បន្ទូល​ឆ្លងឆ្លើយ​ជាមួយខ្ញុំព្រះករុណាខ្ញុំជាធម្មតា»
កម្ពុជា-កាណាដា ប្ដេជ្ញាបន្តពង្រឹង និងពង្រីកទំនាក់ទំនងឱ្យកាន់តែស៊ីជម្រៅ

ព័ត៌មានសំខាន់ៗ

សម្ដេចតេជោ ហ៊ុន សែន៖សហគ្រាសធុនតូច និងធម្យមដើរតួនាទីសំខាន់ជួយជ្រោមជ្រែងសេដ្ឋកិច្ចជាតិក្នុងនោះបានរួមចំណែក ៦៣% នៃផលិតផលក្នុងស្រុកសរុប

2025/05/20 04:41:16 pm        149
Facebook Telegram Linkin
ភ្នំពេញ ៖សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាមានប្រសាសន៍បញ្ជាក់ថា សហគ្រាសធុនតូច និងធម្យម បានដើរតួនាទីយ៉ាងសំខាន់ក្នុងការពង្រីកក៏ដូចជាជ្រោមជ្រែងដល់សេដ្ឋកិច្ចកម្ពុជា ខណៈកន្លងមកនេះបានចូលរួមចំណែកចំនួន ៦៣% នៃផលិតផលក្នុងស្រុកសរុប។​សម្ដេចតេជោ ហ៊ុន សែន ប្រធានព្រឹទ្ធសភា មានប្រសាសន៍បញ្ជាក់បែបនេះ ក្នុងឱកាសអនុញ្ញាតឱ្យ ប្រតិភូសម្ព័ន្ធសមាគមមូលនិធិសម្តេចតេជោ ដើម្បីអភិវឌ្ឍន៏សហគ្រាសធុនតូច និងមធ្យមនៅកម្ពុជា ដឹកនាំដោយ លោកឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគម ចូលជួបសម្ដែងការគួរសម នៅវិមាន៧មករា រាជធានីភ្នំពេញនៅព្រឹកថ្ងៃទី២០ ខែឧសភា ឆ្នាំ២០២៥នេះ។ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងក្រោយជំនួបនេះថា ជាកិច្ចចាប់ផ្ដើមនៃជំនួបនេះ សម្ដេចតេជោ ហ៊ុន សែន បានសម្ដែងនូវក្ដីរីកាយដែលបានជួបជាមួយ ប្រតិភូសម្ព័ន្ធសមាគមមូលនិធិ សម្តេចតេជោ ដើម្បីអភិវឌ្ឍន៏សហគ្រាសធុនតូច និងមធ្យមនៅកម្ពុជា ដឹកនាំដោយ ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគម ចូលជួបសម្ដែងការគួរសមនៅព្រឹកនេះ។ សម្ដេចតេជោ បានអរគុណដល់សមាគមដែលបានចូលរួមចំណែកអភិវឌ្ឍសង្គម និងសេដ្ឋកិច្ចកម្ពុជាស្របតាមគោលនយោបាយរបស់រាជរដ្ឋាភិបាល តាមរយៈការបង្កើតជាសម្ព័ន្ធមាគម និងមូលនិធិដើម្បីអភិវឌ្ឍន៏សហគ្រាសធុនតូច និងមធ្យមនៅកម្ពុជា។សម្ដេចតេជោបានសង្គត់ធ្ងន់ថា គ្រឹះដ៏រឹងមាំនៃសន្ដិភាព ស្ថិរភាពនយោបាយ និងម៉ាក្រូសេដ្ឋកិច្ចជាលក្ខខណ្ឌចាំបាច់សម្រាប់ការអភិវឌ្ឍន៍លើគ្រប់វិស័យរួមទាំងសហគ្រាសធុនតូច និងមធ្យមនៅកម្ពុជា ស្របពេលដែលរាជរដ្ឋាភិបាលកំពុងតែបន្តភាពជាដៃគូជាមួយវិស័យឯកជនដើម្បីធានាកំណើនសេដ្ឋកិច្ច និងធ្វើឱ្យជីវភាពប្រជាជនកាន់តែល្អប្រើសើរឡើង។ នៅក្នុងឱកាសនោះ លោកឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគម បានសម្ដែងនូវការអរគុណយ៉ាងក្រៃលែងចំពោះសម្ដេចតេជោ ដែលបានអនុញ្ញាតឱ្យរូបលោក និងប្រតិភូទាំងអស់បានចូលជួបសម្ដែងការគួរសមនៅក្នុងឱកាសនេះ។ លោកឧកញ៉ា បានជម្រាបជូនសម្ដេចតេជោថា កន្លងមកសមាគម បានចូលរួមចំណែកយ៉ាងសកម្មជាមួយរាជរដ្ឋាភិបាលក្នុងការចូលរួមរៀបចំពិធីបុណ្យសំខាន់ៗដូចជា បុណ្យសមុទ្រ និងបុណ្យទន្លេដោយមានរៀបចំការតាំងពិព័រណ៍ផលិតផលរបស់សហគ្រាសធុនតូច និងមធ្យមនៅក្នុងឱកាសនោះរួមនឹងសកម្មភាពសំខាន់ៗជាច្រើនទៀតដែលសមាគមបានធ្វើ ក៏ដូចជាការបណ្ដុះបណ្ដាលនៅទាំង២៥រាជធានី-ខេត្ត គឺការបណ្ដុះបណ្ដាលសហគ្រាសខ្នាតតូច និងធម្យម អំពីការគ្រប់គ្រងធនធានមនុស្ស និងការគ្រប់គ្រងអាជីវកម្ម ជាពិសេសគឺការបណ្ដុះបណ្ដាលឱ្យសហគ្រាសធុនតូច និងមធ្យមអាចមានលទ្ធភាពទទួលបាននូវកម្ចីក្នុងការអភិវឌ្ឍបន្ថែមចំពោះសហគ្រាសក៏ដូចជាអាជីវកម្មរបស់ខ្លួន។ ក្នុងឱកាសនោះសម្ដេចតេជោ បានបញ្ជាក់ថា៖«សហគ្រាសធុនតូច និងធម្យមបានដើរតួនាទីយ៉ាងសំខាន់ក្នុងការពង្រីកក៏ដូចជាជ្រោមជ្រែងដល់សេដ្ឋកិច្ចកម្ពុជា។ សម្ដេចបានគូសបញ្ជាក់ថា សហគ្រាសធុនតូច និងមធ្យមនៅកម្ពុជា មានជាង ៩៨ ភាគរយនៃអង្គភាពសេដ្ឋកិច្ចទាំងអស់នៅក្នុងប្រទេសកម្ពុជា ក្នុងនោះមានជាង ៧,៥ សែនសហគ្រាស ដែលបានផ្ដល់ការងារជាង ៧០% នៃកម្លាំងពលកម្មសរុបជាង ២,៩ លាននាក់ ទទួលបានការងារធ្វើតាមរយៈសហគ្រាសធុនតូច និងមធ្យមនៅកម្ពុជា»។ សម្ដេចបានបន្ថែមថា សហគ្រាសធុនតូច និងធម្យមនៅកម្ពុជា បានចូលរួមចំណែកយ៉ាងសកម្ម ជាពិសេចូលរួមចំណែកចំនួន ៦៣% នៃផលិតផលក្នុងស្រុកសរុប ដែលនេះ បានបញ្ជាក់យ៉ាងច្បាស់អំពីតួនាទី ក៏ដូចជាការចូលរួមយ៉ាងសំខាន់នៃសហគ្រាសធុនតូច និងមធ្យមក្នុងការចូលរួមជ្រោមជ្រែងការអភិវឌ្ឍប្រទេសកម្ពុជា។ សម្ដេចតេជោ មានប្រសាសន៍បញ្ជាក់ថា សហគ្រាសធុនតូច និងមធ្យមនៅកម្ពុជា តាំងតែពីសម្ដេចនៅជានាយករដ្ឋមន្រ្ដី រហូតដល់រាជរដ្ឋាភិបាលអាណត្តិទី៧នេះបានយកចិត្តទុកដាក់ក្នុងការអភិវឌ្ឍ និងជ្រោមជ្រែងលើកស្ទួយជាបន្តបន្ទាប់។ សម្ដេចបានជំរុញឱ្យសហគ្រាសធុនតូច និងធម្យមបន្តអនុវត្តតាមគោលនយោបាយរបស់រាជរដ្ឋាភិបាល ជាពិសេសយុទ្ធសាស្រ្ដបញ្ចកោណ ដំណាក់កាលទី១ ដែលរាជរដ្ឋាភិបាលកំពុងធ្វើ ដើម្បីលើកទឹកចិត្ត និងជួយដល់សហគ្រាសធុនតូច និងមធ្យម៕

អេមីរ៉ាតអារ៉ាប់រួមនឹងបន្តពង្រឹង និងពង្រីកកិច្ចសហប្រតិបត្តិការជាមួយកម្ពុជាឱ្យកាន់តែរឹងមាំបន្ថែមទៀត

2025/05/19 02:44:58 pm        149
Facebook Telegram Linkin
នាព្រឹកថ្ងៃទី១៩ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម Obaid Saeed Obaid Bintaresh Aldhaheri ឯកអគ្គរាជទូតនៃប្រទេសអេមីរ៉ាតអារ៉ាប់រួម (UAE) ប្រចាំនៅព្រះរាជាណាចក្រម្ពុជា ដែលមាននិវេសនដ្ឋាននៅទីក្រុងបាងកក ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព ។ ក្នុងឱកាសនៃជំនួប, ឯកអគ្គរាជទូតបានវាយតម្លៃខ្ពស់ចំពោះភាពរីកចម្រើននៃទំនាក់ទំនងទ្វេភាគីUAE-កម្ពុជា។ ឯកឧត្តមបានគោរពជម្រាបជូនសម្តេចបវរធិបតីថា គណៈប្រតិភូនៃសភាពាណិជ្ជកម្ម UAE គ្រោងនឹងបំពេញទស្សនកិច្ចនៅកម្ពុជា ក្នុងគោលបំណងពិភាក្សាអំពីកិច្ចសហការលើការរៀបចំពិព័រណ៍ពាណិជ្ជកម្មនៅកម្ពុជា ដើម្បីជំរុញការវិនិយោគ និងពាណិជ្ជកម្មរវាងប្រទេសទាំងពីរ។ ទន្ទឹមនឹងនេះ, ឯកឧត្តមឯកអគ្គរាជទូតនឹងមានជំនួបពិភាក្សាជាមួយក្រសួង ស្ថាប័នពាក់ព័ន្ធកម្ពុជា ដើម្បីពិភាក្សាអំពីការបន្តជំរុញ និងលើកកម្ពស់ទំនាក់ទំនងប្រទេសទាំងពីរ និងដើម្បីបន្តពិភាក្សាលើការជំរុញការអនុវត្តកិច្ចព្រមព្រៀងដែលប្រទេសទាំងពីរបានឯកភាពគ្នារួចហើយ ដើម្បីដាក់ចេញនូវផែនការអនុវត្តជាក់ស្តែង និង​ពិភាក្សាលេីការជំរុញកិច្ចសហប្រតិបត្តិការលើវិស័យភស្តុភារកម្ម, សន្តិសុខសាយប័រ, និងបញ្ញាសិប្បនិម្មិត។ ឯកឧត្តមឯកអគ្គរាជទូតក៏បានគោរពជម្រាបអំពីការបន្តពង្រឹង និងពង្រីកកិច្ចសហប្រតិបត្តិការលើវិស័យអប់រំបន្ថែមទៀត តាមរយៈការបង្កេីនការផ្តល់អាហារូបករណ៍ដល់និស្សិតកម្ពុជា ដែលផ្តោតលើការសិក្សា​ ជំនាញបច្ចេកវិទ្យា និងបញ្ញាសិប្បនិម្មិត។ជាការឆ្លើយតប, សម្តេចបវរធិបតីបានសម្តែងនូវការពេញចិត្ត និងវាយតម្លៃខ្ពស់ចំពោះវឌ្ឍនភាពនៃទំនាក់ទំនងទ្វេភាគី​ នៃប្រទេសទាំងពីរ​ ជាពិសេសលើវិស័យទេសចរណ៍ តាមរយៈការបង្កើនជើងហោះហើរត្រង់ពី UAE មកកម្ពុជា។ ជាមួយគ្នានេះ សម្តេចបវរធិបតីបានថ្លែងអំណរគុណចំពោះ UAE ដែលបានរួមចំណែកកសាងធនធានមនុស្ស​ ក៏ដូចជាបានគាំទ្រដល់សមាគមមូស្លីមនៅកម្ពុជា។ សម្តេចបវរធិបតីគូសបញ្ជាក់ថា កម្ពុជា​និង​ UAE នៅមានវិស័យសក្តានុពលជាច្រើនដែលអាចពង្រឹង និងពង្រីកកិច្ចសហប្រតិបត្តិការបន្ថែមទៀតបាន។ សម្តេចបរវធិបតីក៏បានបញ្ជាក់ពីទិសដៅនៃការអភិវឌ្ឍឧស្សាហកម្មហាឡាល់នៅកម្ពុជា​ ដើម្បីជំរុញការនាំចេញផលិតផលហាឡាល់ទៅកាន់បណ្តាប្រទេសនៅមជ្ឈិមបូព៌ា និង UAE។ សម្តេចបវរធិបតីលើកទឹកចិត្តឱ្យឯកឧត្តមឯកអគ្គរាជទូត បន្តពិភាក្សាជាមួយក្រសួង ស្ថាប័នពាក់ព័ន្ធកម្ពុជា ដើម្បីជំរុញការអនុវត្តកិច្ចព្រមព្រៀងដែលបានឯកភាពគ្នារួច សំដៅប្រែក្លាយទៅជាផែនការអនុវត្តនជាក់ស្តែង។ សម្តេចបវរធិបតីបានបង្ហាញនូវជំនឿជឿជាក់ថា​តួនាទីរបស់ឯកឧត្តមឯកអគ្គរដ្ឋទូត នឹងក្លាយជាស្ពានតភ្ជាប់ទំនាក់ទំនង​ និងកិច្ច​សហប្រតិបត្តិការ​រវាងប្រទេសទាំងពីរ ឱ្យកាន់តែរីកចម្រើនមួយកម្រិតទៀត៕

រដ្ឋអូស្ត្រាលីខាងត្បូងស្វែងរកឱកាសពង្រឹង និងពង្រីកកិច្ចសហប្រតិបត្តិការជាមួយ​កម្ពុជាបន្ថែមទៀត

2025/05/19 02:25:01 pm        87
Facebook Telegram Linkin
នាព្រឹកថ្ងៃទី១៩ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ Frances Adamson អភិបាលរដ្ឋ នៃរដ្ឋអូស្ត្រាលីខាងត្បូង (South Australia-SA) ប្រទេសអូស្ត្រាលី ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព ។ ក្នុងឱកាសនៃជំនួប លោកជំទាវអភិបាលរដ្ឋនៃរដ្ឋអូស្ត្រាលីខាងត្បូង បានសម្តែងការចាប់អារម្មណ៍យ៉ាងខ្លាំងចំពោះការអភិវឌ្ឍរីកចម្រើនលើគ្រប់វិស័យរបស់កម្ពុជា ព្រមទាំងបានវាយតម្លៃខ្ពស់ចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការដ៏ល្អរវាងអូស្ត្រាលី និងកម្ពុជា។ លោកជំទាវបានលើកឡើងថា គោលបំណងសំខាន់នៃដំណើរទស្សនកិច្ចរបស់លោកជំទាវ គឺដើម្បីស្វែងរកឱកាសពង្រឹង និងពង្រីកកិច្ចសហប្រតិបត្តិការរវាងរដ្ឋអូស្ត្រាលីខាងត្បូង និងកម្ពុជា។ លោកជំទាវអភិបាលរដ្ឋ បានជម្រាបជូនសម្តេចបវរធិបតីអំពីវិស័យសក្តានុពលនានារបស់រដ្ឋអូស្ត្រាលីខាងត្បូង រួមមាន៖ វិស័យកសិកម្ម, អប់រំ, ទេសចរណ៍, និងថាមពល។ លោកជំទាវបានបន្ថែមថា រដ្ឋអូស្ត្រាលីខាងត្បូងមានសហគមន៍ខ្មែរប្រមាណជិត ៤០០០​ នាក់ កំពុងរស់នៅ, ធ្វើការងារ និងសិក្សា។ ជាងនេះទៀត, លោកជំទាវបានកោតសរសើរចំពោះភាពឧស្សាហ៍ព្យាយាម និងការខិតខំប្រឹងប្រែងរបស់សិស្ស-និស្សិតកម្ពុជា ដែលកំពុងសិក្សានៅតាមគ្រឹះស្ថានសិក្សា និងសាកលវិទ្យាល័យនានាក្នុងរដ្ឋអូស្ត្រាលីខាងត្បូង។ជាការឆ្លើយតប,​ សម្តេចបវរធិបតី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនអូស្ត្រាលី ដែលបានចូលរួមចំណែកក្នុងដំណើរការស្វែងរកសុខសន្តិភាព ក៏ដូចជាការស្តារ និងអភិវឌ្ឍប្រទេសកម្ពុជាឡើងវិញ ដែលនេះជាការរួមចំណែកយ៉ាងសំខាន់ដល់ការអភិវឌ្ឍសង្គម-សេដ្ឋកិច្ចនៅកម្ពុជា នាពេលបច្ចុប្បន្ន។ ទន្ទឹមនឹងនេះ, សម្តេចបវរធិបតីក៏បានសម្តែងការពេញចិត្តចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ។ សម្តេចបានអរគុណ​អូស្ត្រាលី​ និយាយជារួម​ និងរដ្ឋអូស្ត្រាលីខាងត្បូង និយាយដោយឡែក​ ដែលបានរួមចំណែកដល់ការអភិវឌ្ឍធនធានមនុស្សកម្ពុជា ក្នុងរយៈពេលប៉ុន្មានទសវត្សរ៍ចុងក្រោយនេះ។ ជាមួយគ្នានេះ,​​ សម្តេចបវរធិបតី បានគូសបញ្ជាក់ជូនលោកជំទាវអភិបាលរដ្ឋ​ អំពីការយកចិត្តទុកដាក់របស់រាជរដ្ឋាភិបាលកម្ពុជា លើការអភិវឌ្ឍមូលធនមនុស្ស ដោយផ្តោតលើការពង្រឹងសុខុមាលភាព, ការបណ្តុះបណ្តាលជំនាញវិជ្ជាជីវៈ និងការបង្កើតការងារ ជូនប្រជាពលរដ្ឋ។សម្តេចបវរធិបតី និងលោកជំទាវ ក៏បានពិភាក្សា​និងផ្លាស់ប្តូរយោបល់អំពីការពង្រឹង និងពង្រីក​ ព្រមទាំងស្វែងរកនូវ​ឱកាសបន្ថែមទៀត​ ក្នុងកិច្ចសហប្រតិបត្តិការរវាងកម្ពុជា និងរដ្ឋអូស្ត្រាលីខាងត្បូង លើវិស័យសំខាន់ៗ ដូចជា៖ អប់រំ​,ថាមពលស្អាត, ពាណិជ្ជកម្ម, វិនិយោគ, កសិកម្ម, និងបណ្តុះបណ្តាលវិជ្ជាជីវៈ និងការតភ្ជាប់រវាងប្រជាជន និងប្រជាជន តាមរយៈការផ្លាស់ប្តូរវប្បធម៌ និងសិល្បៈ និងការជំរុញភ្ញៀវទេសចរ៕

ស្ពានដែកបេឡេអូរតាឆុង ស្រុកប្រាសាទសំបូរសាងសង់រួចរាល់ ១០០% តាមរយៈ​សំណូមពរ​ប្រជា​សហគមន៍ជាមួយសម្តេចបវរធិបតីកាលពីដើមឆ្នាំនេះ

2025/05/18 03:23:17 pm        725
Facebook Telegram Linkin
កំពង់ធំ៖​ ស្ពានដែកបេឡេអូរតាឆុង ស្រុកប្រាសាទសំបូរ ខេត្តកំពង់ធំ បានសម្រេច​ការ​សាង​សង់​រួច​រាល់​ ១០០ភាគរយ តាមរយៈសំណូមពររបស់ប្រជាសហគមន៍ទំនើបប្រាសាទសំបូររុងរឿង ជា​មួយ​សម្តេចបវរធិបតីនាយករដ្ឋមន្ត្រី កាលពីថ្ងៃទី៣១ ខែមករា ឆ្នាំ២០២៥ កន្លងទៅ។ ស្ពានដែកបេឡេអូរតាឆុង មានប្រវែង ៣៦ម៉ែត្រ ទទឹង ៤,២ម៉ែត្រ និងការ​ស្ថាបនា​ផ្លូវ​ល្បាយ​ក្រួស​តភ្ជាប់​ក្បាលស្ពាន ទាំងសងខាងស្ពានប្រវែង ៥០០ ម៉ែត្រ ត្រូវបាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ផ្តល់ជូន​តាម​សំណូមពរ​របស់​ប្រជា​សហគមន៍​ទំនើប​ប្រាសាទ​សំបូររុងរឿង នាឱកាសចុះជួប​សំណេះ​សំណាល​ដោយ​ផ្ទាល់​នៅ​ចម្ការ​ចន្ទី​របស់​សហគមន៍ កាលពីថ្ងៃទី៣១ ខែមករា ឆ្នាំ២០២៥ កន្លងទៅ ក្នុងគោលដៅ​លើក​កម្ពស់​ការ​ដឹក​ជញ្ជូន​កសិផល និងផ្តល់ភាពងាយស្រួលក្នុងការធ្វើដំណើររបស់ប្រជាពលរដ្ឋ ដោយប្រគល់​ភារកិច្ច​ជូនក្រសួងអភិវឌ្ឍន៍ជនបទ ក្នុងការដឹកនាំសាងសង់ ។ គូស​រំលេចផងដែរថា ស្ពាននេះបានតភ្ជាប់ឃុំចំនួនពីរគឺឃុំតាំងក្រសៅ និងឃុំស្រើង ស្រុក​ប្រាសាទ​សំបូរ ខេត្តកំពង់ធំ។ ដោយអ្នកទទួលផលដោយផ្ទាល់ សរុបចំនួន ១ ៩០៨ នាក់ ស្មើនឹង ៤៧៧​គ្រួសារ​ ក្នុងភូមិទឹកអណ្ដូង ភូមិជាំបឹង ភូមិបេង ភូមិត្នោតជួរ ភូមិបឹងខ្វែក និងភូមិអន្លង់ស្លែង ព្រម​ទាំង​អ្នក​ទទួលផលដោយប្រយោល សរុប ១ ២៩៥នាក់ ស្មើនឹង ៣៦៥គ្រួសារ ក្នុងបណ្តាភូមិក្នុង ឃុំ​គោល ស្រុកប្រាសាទសំបូរ និងឃុំទំរីង ស្រុកសណ្ដាន់ ដែលជាមធ្យម មាន​ប្រជា​ពលរដ្ឋ​ធ្វើ​ដំណើរ​ឆ្លង​កាត់ចន្លោះ ១០០នាក់ ទៅ ២០០នាក់ ក្នុង១ថ្ងៃ៕

សម្ដេចធិបតី ហ៊ុន ម៉ាណែត និងលោកជំទាវបណ្ឌិត នឹងអញ្ជើញ​បំពេញ​ទស្សន​កិច្ច​ផ្លូវ​ការ​នៅ​ប្រទេស​ជប៉ុន​ចាប់ពីថ្ងៃទី២៨ដល់៣១ ខែឧសភាខាងមុខនេះ

2025/05/18 10:36:11 am        480
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង​លោក​ជំទាវ​បណ្ឌិត​ស្ត្រី​ទី១ នឹងអញ្ជើញបំពេញទស្សនកិច្ចផ្លូវការការងារនៅប្រទេសជប៉ុន តបតាម​ការ​អញ្ជើញ​របស់​ឯកឧត្ដម អ៊ិស៊ីបា ស៊ីហ្កឺរ៉ូ (Ishiba Shigeru) នាយករដ្ឋមន្ត្រីជប៉ុន និងចូលរួម​កម្ម​វិធី​សន្និសីទ​អន្តរជាតិលើកទី៣០ ស្តីពី « អនាគតរបស់អាស៊ី» ដែលរៀបចំដោយក្រុមហ៊ុន Nikkei Inc. ចាប់ពីថ្ងៃទី២៨ ដល់៣១ ខែឧសភា ឆ្នាំ ២០២៥ ខាងមុខនេះ។ ក្នុងដំណើរ​ចេញ​ទៅ​បំពេញ​ទស្សន​កិច្ចផ្លូវការនេះ សម្តេចធិបតី និងលោកជំទាវបណ្ឌិត ក៏នឹងជួបសំណេះ​សំណាល​ជាមួយ​បង​ប្អូន​សហគមន៍ខ្មែររស់នៅក្នុប្រទេសជប៉ុនផងដែរ។ ក្នុងឱកាសដំណើរទស្សនកិច្ចនេះដែរ បងប្អូនប្រជាពលរដ្ឋខ្មែរ រស់នៅខេត្តហ្វូកូអូកា និង​កម្ម​សិក្សា​ការី​ខ្មែរ​ស្នាក់នៅ និងធ្វើការនៅខេត្តណាហ្កាណុ ប្រទេសជប៉ុន បានបង្ហាញក្ដីរីករាយ និង​រង់​ចាំ​គាំទ្រ និងស្វាគមន៍ដំណើរទស្សនកិច្ចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដី និង​លោកជំទាវបណ្ឌិត ដែលនឹងដឹកនាំប្រតិភូកម្ពុជា ជួបពិភាក្សាការងារជាមួយ ឯកឧត្ដម​នាយករដ្ឋ​មន្ត្រី នៃប្រទេសជប៉ុន និងថ្លែងសុន្ទរកថាក្នុងសន្និសីទអន្តរជាតិលើកទី៣០ ស្ដីពី «អនាគត​របស់អាស៊ី” នៅទីក្រុងតូក្យូ នាចុងខែឧសភា ខាងមុខនេះ។ក្រៅពីនេះនិស្សិតខ្មែរដែលកំពុងសិក្សានៅប្រទេសជប៉ុន ក៏បានបង្ហាញក្ដីរីករាយ គាំទ្រ និង​ស្វាគមន៍​ដំណើរទស្សនកិច្ចរបស់សម្តេចធិបតី នាយករដ្ឋមន្ត្រី និងលោកជំទាវដែល​នឹង​ដឹកនាំ​ប្រតិភូ​កម្ពុជា ជួបពិភាក្សាការងារជាមួយ ឯកឧត្ដម នាយករដ្ឋមន្ត្រី ជប៉ុន និងថ្លែង​សុន្ទរកថា​ក្នុង​សន្និសីទ​អន្តរជាតិលើកទី៣០ ស្ដីពី “អនាគតរបស់អាស៊ី” នៅទីក្រុងតូក្យូ នាចុងខែឧសភា ខាង​មុខនេះផងដែរ។សូមបញ្ជាក់ថា រាជរដ្ឋាភិបាលកម្ពុជា តាំងពីការដឹកនាំដោយសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដី រហូតដល់ការដឹកនាំដោយសម្ដេចមហាបវរធិបតី ហ៊ុន ម៉ាណែត ជា​នាយក​រដ្ឋមន្រ្ដីបច្ចុប្បន្ន បានសម្ដែងនូវការអរគុណ និងវាយតម្លៃ​ខ្ពស់​ចំពោះ​តួនាទី​ដ៏​មាន​សារៈ​សំខាន់​​របស់​ជប៉ុនដែលបានចូលរួមចំណែកក្នុងដំណើរការស្វែងរកសុខសន្ដិភាពនៅកម្ពុជា, ការ​ស្ដារ និងកសាងប្រទេសឡើងវិញ ព្រមទាំងការរួមចំណែកដល់ការអភិវឌ្ឍសង្គម-សេដ្ឋកិច្ច​កម្ពុជា​ឱ្យ​​រីក​ចម្រើន។ សម្ដេចធិបតីក៏បានសម្ដែងនូវការពេញចិត្តចំពោះទំនាក់ទំនង និង​កិច្ច​សហ​ប្រតិបត្តិការ​ដ៏ល្អ និងរីកចម្រើនលើគ្រប់វិស័យរវាងកម្ពុជា-ជប៉ុន ពិសេសភាព​រីក​ចម្រើន​នៅ​ក្នុង​កិច្ច​សហ​ប្រតិបត្តិការលើវិស័យសន្ដិសុខ៕

រដ្ឋមន្ត្រីក្រសួងសន្តិសុខសាធារណៈវៀតណាម ប្ដេជ្ញាពង្រឹង និងពង្រីកកិច្ចសហប្រតិបត្តិការជាមួយក្រសួងមហាផ្ទៃកម្ពុជាឱ្យកាន់តែល្អប្រសើរថែមទៀត

2025/05/16 05:40:35 pm        100
Facebook Telegram Linkin
នារសៀល​ ថ្ងៃទី១៦​ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម លឿង តាមខ្វាង រដ្ឋមន្ត្រីក្រសួងសន្ដិសុខសាធារណៈវៀតណាម ចូលជួបសម្តែងការគួរសម និងពិភាក្សាការងារ នៅវិមានសន្តិភាព។  ក្នុងឱកាសនៃជំនួប, ឯកឧត្តមនាយឧត្តមសេនីយ៍ លឿង តាមខ្វាង បានគោរពថ្លែងអំណរគុណយ៉ាងជ្រាលជ្រៅចំពោះសម្ដេចបវរធិបតី ដែលបានអនុញ្ញាតឱ្យរូបឯកឧត្តម និងគណៈប្រតិភូ ចូលជួបសម្ដែងការគួរសម។ ឯកឧត្តមរដ្ឋមន្ត្រីបានសម្ដែងនូវការអបអរសាទរចំពោះការអភិវឌ្ឍរីកចម្រើនលើគ្រប់វិស័យរបស់កម្ពុជា និងបានបង្ហាញដោយសុទិដ្ឋិនិយមថា ក្រោមការដឹកនាំដ៏ឈ្លាសវៃរបស់សម្ដេចបវរធិបតី និងក្រោមម្លប់ដ៏ត្រជាក់នៃអង្គព្រះមហាក្សត្រ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី កម្ពុជានឹងសម្រេចបាននូវសមិទ្ធផលថ្មីៗបន្ថែមទៀតជូនជាតិ និងប្រជាជនកម្ពុជា។ ជាមួយគ្នានេះ, ឯកឧត្តមបានសម្ដែងនូវក្ដីសោមនស្សចំពោះភាពរីកចម្រើននៃចំណងមិត្តភាព,​ ទំនាក់ទំនង​ និងកិច្ចសហប្រតិបត្តិការរវាងវៀតណាម និង កម្ពុជា, ជាពិសេសកិច្ចសហប្រតិបត្តិការរវាងក្រសួងសន្តិសុខសាធារណៈវៀតណាម និងក្រសួងមហាផ្ទៃកម្ពុជា ដែលជាសសរស្តម​ភ នៃកិច្ចសហប្រតិបត្តិការរវាងប្រទេសទាំងពីរ ក្នុងការរួមគ្នាទប់ស្កាត់ និងបង្ក្រាបបទល្មើសនានា ដូចជាការជួញដូរមនុស្ស, បទល្មើសតាមប្រព័ន្ធបច្ចេកវិទ្យា និងបទល្មើសគ្រឿងញៀនជាដើម។ បន្ថែមលើនេះ, ឯកឧត្តមរដ្ឋមន្ត្រីបានគូសបញ្ជាក់ពីការប្ដេជ្ញាចិត្តថា៖ ក្រសួងសន្តិសុខសាធារណៈវៀតណាម នឹងបន្តពង្រឹង និង ពង្រីកកិច្ចសហប្រតិបត្តិការជាមួយក្រសួងមហាផ្ទៃកម្ពុជា​ ឱ្យកាន់តែល្អប្រសើរថែមទៀត ដើម្បីរួមចំណែកដល់ការថែរក្សាសន្តិសុខ, ស្ថិរភាព និង ដើម្បីជាប្រយោជន៍សម្រាប់ប្រជាជន និងប្រទេស ទាំងពីរ។ជាការឆ្លើយតប, សម្ដេចបវរធិបតី បានស្វាគមន៍ ​និងអរគុណឯកឧត្តមរដ្ឋមន្ត្រី និងគណៈប្រតិភូ ដែលបានអញ្ជើញចូលរួមក្នុងពិធីអបអរសាទរខួបអនុស្សាវរីយ៍លើកទី ៨០ ថ្ងៃកំណើតកងកម្លាំងនគរបាលជាតិកម្ពុជា ១៦ ឧសភា ១៩៤៥ - ១៦ ឧសភា ២០២៥។ សម្ដេចបវរធិបតីបានសម្ដែងនូវការពេញចិត្តចំពោះទំនាក់ទំនង និងកិច្ចសហប្រតិបត្តិការដ៏ល្អប្រសើររវាងក្រសួងសន្តិសុខសាធារណៈវៀតណាម​ និង​ក្រសួង​មហា​ផ្ទៃ​កម្ពុជា​ ដែលត្រូវបានពង្រឹង និង​ ពង្រីក ជាប់ជាប្រចាំ ។ សម្ដេចបវរធិបតីបានថ្លែងអំណរគុណដល់ក្រសួងសន្តិសុខសាធារណៈវៀតណាម ដែលបានចូលរួមចំណែកដល់ការកសាង​ធនធាន​មនុស្សកម្ពុជា​ តាមរយៈ​ការ​បណ្តុះបណ្តាល​ និង​ពង្រឹង​សមត្ថភាពដល់​សិក្ខាកាមកម្ពុជា ជាបន្តបន្ទាប់។ ជាមួយគ្នានេះ, សម្ដេចបវរធិបតីបានជំរុញលើកទឹកចិត្តដល់ក្រសួងទាំងពីរបន្តប្រពៃណីនៃកិច្ចសហប្រតិបត្តិការឱ្យកាន់តែជិតស្និទ្ធថែមទៀត ជាពិសេស​ កិច្ចសហការលើការងារបណ្ដុះបណ្ដាល, ការថែរក្សាសន្តិសុខ, ស្ថិរភាព និងការទប់ស្កាត់ ក៏ដូចជាការបង្ក្រាបបទល្មើសនានា ដើម្បីរួមចំណែកលើកកម្ពស់បន្ថែមទៀត ដល់ទំនាក់ទំនង​ និងកិច្ចសហប្រតិបត្តិការរវាងប្រទេសទាំងពីរ។

អ្នកជំនាញ៖ កិច្ចចរចាព្រមព្រៀងពាណិជ្ជកម្មកម្ពុជា-អាមេរិក នឹងសម្រេចផលវិជ្ជាមាន​ក្នុងពេលឆាប់ៗ

2025/05/16 02:07:05 pm        319
Facebook Telegram Linkin
អ្នកជំនាញសេដ្ឋកិច្ច មើលឃើញថា ការចរចាកិច្ចព្រមព្រៀងពាណិជ្ជកម្មរវាងកម្ពុជា-អាមេរិក, កម្ពុជានឹងទទួលបានផលវិជ្ជាមាន នាពេលខាងមុខជាមិនខាន ខណៈកម្ពុជាបានបន្ធូបន្ថយពន្ធនាំចូល, ប្រទេសទាំងពីរមានកិច្ចសហប្រតិបត្តិការជាយូរលង់, អាមេរិកក៏ជា ប្រទេសធ្លាប់ផ្តល់ជំនួយដល់កម្ពុជា និងអាមេរិកខ្លួនក៏មានតម្រូវការនាំចូលដើម្បីផ្គត់ផ្គង់ និងដើម្បីកំណើនសេដ្ឋកិច្ចផងដែរ។លោកបណ្ឌិត ហុង វណ្ណៈ ជំនាញសេដ្ឋកិច្ច វិទ្យាស្ថានទំនាក់ទំនងអន្តរជាតិរាជបណ្ឌិតសភា ថ្លែងលើកឡើងក្នុងកិច្ចសម្ភាសន៍ ជាមួយ BTV ស្តីពីការចរចាកិច្ចព្រមព្រៀងពាណិជ្ជកម្មរវាងកម្ពុជា-អាមេរិក នេះថា សេដ្ឋកិច្ចកម្ពុជាយើង មួយចំណែកធំគឺពឹងផ្អែកទៅ លើការនាំចេញ ក្នុងនោះសហរដ្ឋអាមេរិកគឺជាទីផ្សារដ៏ធំមួយនៃការស្រូបយកទំនិញកម្ពុជា គឺតាំងពីប្រទេសយើងទទួលបាន GFP រហូត ត្រូវបានបញ្ចប់នៅឆ្នាំ២០២០។ បន្ទាប់ពីបញ្ចប់ GFP ការធ្វើពាណិជ្ជកម្មទ្វេភាគីរវាងកម្ពុជានិងអាមេរិក គឺរកស៊ីស្នើមុខស្មើមាត់គ្នា និងត្រូវកំណត់ពន្ធលើការពាណិជ្ជកម្មទ្វេភាគីទៅវិញទៅមក, ហើយអ្វីដែលកត់សម្គាល់ បន្ទាប់ពីបញ្ចប់ GFP ការធ្វើពាណិជ្ជកម្មរវាង ប្រទេសទាំងពីរបានឈរលើកំណើនកើនឡើងជាបន្តបន្ទាប់ រហូតមកដល់សព្វថ្ងៃ។លោកបណ្ឌិត បន្តថា ចំណែកតាមរយៈនៃការចរចាកិច្ចព្រមព្រៀងពាណិជ្ជកម្មរវាងកម្ពុជា-អាមេរិក ដែលប្រតិភូកម្ពុជា ចេញ ទៅចរចានៅសហរដ្ឋអាមេរិកដោយផ្ទាល់ជុំទី១ និងឯកភាពនៅជុំបន្តទៀតនោះ លោករំពឹងថា កម្ពុជានឹងទទួលបានផលវិជ្ជាមាន ដោយបានកើតឡើងពីកត្តាជាច្រើនដូចជា៖ កម្ពុជានិងអាមេរិកមានកិច្ចសហប្រតិបត្តិការជាយូរលង់មកហើយ, អាមេរិកក៏ជាប្រទេស ធ្លាប់ផ្តល់ជំនួយដល់កម្ពុជានាពេលកន្លងមក, កម្ពុជាបានបន្ធូបន្ថយពន្ធនាំចូលរបស់សហរដ្ឋអាមេរិក ជាពិសេសអាមេរិកក៏ជាប្រទេស ដែលមានតម្រូវការក្នុងការនាំចូល សម្រាប់ផ្គត់ផ្គង់ក្នុងស្រុក និងដើម្បីកំណើនសេដ្ឋកិច្ចផងដែរ តាមរយៈការធ្វើពាណិជ្ជកម្មជាមួយ បណ្តាប្រទេសផ្សេងៗ ក៏ដូចកម្ពុជា។ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល លើកឡើងថា តាមរយៈនៃការចរចាកិច្ចព្រមព្រៀងពាណិជ្ជកម្មរបស់ក្រុមការងារចំពោះកិច្ចកម្ពុជា, ជាមួយសមាជិកព្រឹទ្ធសភាសហរដ្ឋអាមេរិកនៃជុំទី១នេះ គឺបានប្រព្រឹត្តទៅក្នុងបរិយាកាសល្អ ស្មោះត្រង់ ស៊ីជម្រៅ និងយោគយល់គ្នា។ ភាគីទាំងពីរក៏បានឯកភាពគ្នា នៅជុំទី២ ក្នុងដើមខែ មិថុនា ឆ្នាំ២០២៥ នៅទីក្រុងវ៉ាស៊ឹងតោនដ៏ដែល ដើម្បីឈានទៅរកកិច្ចព្រមព្រៀងនៅពេលខាងមុខ។ជុំវិញកិច្ចចរចាព្រមព្រៀងពាណិជ្ជកម្មរវាងកម្ពុជា-អាមេរិក, បើយោងតាមសេចក្តីប្រកាសព័ត៌មាន របស់អង្គភាពអ្នកនាំពាក្យរាជរដ្ឋាភិ-បាលកម្ពុជា, ក្រុមការងារចំពោះកិច្ចរបស់កម្ពុជា ដែលដឹកនាំដោយ ឯកឧត្តម ស៊ុន ចាន់ថុលឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានចូលរួមកិច្ចប្រជុំចរចាជុំទី១ លើកិច្ចព្រម ព្រៀងពាណិជ្ជកម្មបដិការ រវាងកម្ពុជានិងសហរដ្ឋអាមេរិក, ដែលភាគីសហរដ្ឋអាមេរិក ដឹកនាំដោយលោកជំទាវ Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិក ទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។កិច្ចប្រជុំចរចាជុំទី១នេះ ភាគីទាំងពីរបានផ្លាស់ប្តូរយោបល់ដោយត្រង់ទៅត្រង់មក ក្នុងបរិយាកាសយោគយល់គ្នា លើការពង្រឹងបន្ថែម នូវទំនាក់ទំនងពាណិជ្ជកម្ម និងវិនិយោគទ្វេភាគី និងបានពិភាក្សាស៊ីជម្រៅ លើអត្ថបទសេចក្តីព្រាងកិច្ចព្រមព្រៀងពាណិជ្ជកម្មបដិការ។ ភាគីទាំងពីរបានឯកភាពគ្នា រៀបចំកិច្ចប្រជុំចរចាជុំទី២ នៅសប្ដាហ៍ទី១ ខែមិថុនា ឆ្នាំ២០២៥ នៅរដ្ឋធានីវ៉ាស៊ីនតោន។ រាជរដ្ឋាភិបាល ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នឹងបន្តធ្វើកិច្ចការងារនេះដោយយកចិត្តទុកដាក់បំផុត៕ អត្ថបទ៖ សុន រ៉ាឌី 

សម្ដេចតេជោ ហ៊ុន សែន ជំរុញឱ្យវិនិយោគិនជប៉ុន វិនិយោគលើវិស័យ​កសិឧស្សាហកម្ម​នៅ​កម្ពុជា​ដែល​កំពុ​ងមានការ​ខ្វះខាត

2025/05/14 11:13:16 am        205
Facebook Telegram Linkin
នៅព្រឹកថ្ងៃទី១៤ ខែឧសភា ឆ្នាំ២០២៥នេះ សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធ​សភា​នៃព្រះរាជាណាចក្រកម្ពុជា បានអនុញ្ញាតឲ្យលោក អាគីរ៉ា ដូដាតេ (Akira DODATE) នាយក​ប្រតិបត្តិសាជីវកម្មទេសចរជប៉ុន ចូលជួបសម្តែងការគួរសម នៅវិមានព្រឹទ្ធសភា រាជ​ធានី​ភ្នំពេញ​។ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភាកម្ពុជា បានឲ្យដឹងនៅក្រោយជំនួបថា សម្ដេចតេជោ បានបង្ហាញនូវក្ដីរីករាយ និងស្វាគមន៍ចំពោះលោក អាគីរ៉ា ដូដាតេ (Akira DODATE) នាយកប្រតិបត្តិសាជីវកម្មទេសចរជប៉ុន និងគណៈប្រតិភូ ដែលបាន​អញ្ជើញ​មក​ទស្សន​កិច្ចនៅកម្ពុជានាពេលនេះ។ សម្ដេចក៏អរគុណដែរចំពោះប្រតិភូជប៉ុន ដែល​បាន​ចាប់​អារម្មណ៍​ចំពោះ​ការវិនិយោគ និងធ្វើកិច្ចសហប្រតិបត្តិការជាមួយកម្ពុជានៅក្នុងវិស័យកសិកម្ម។សម្ដេចរំ​ពឹងថា តាមរយៈ​ដំណើរ​ទស្សន​កិច្ច​មក​កាន់​ប្រទេស​កម្ពុជា​នាពេល​នេះ​នឹង​ជា​ផ្នែក​មួយ​ដ៏​សំខាន់​ ក្នុងការបង្កើនកិច្ចសហប្រតិបត្តិការ និងស្វែងរកឱកាសវិនិយោគ ក្នុង​ប្រទេស​កម្ពុជា​ដើម្បី​ទាញ​យក​នូវផលប្រយោជន៍ តាមរយៈការវិនិយោគ​ក្នុង​វិស័យ​កសិកម្ម​នៅ​ក្នុង​ប្រទេស​កម្ពុជា​ឱ្យ​អស់​ពី​សក្ដា​នុពល។នៅក្នុងឱកាសនោះ លោក អាគីរ៉ា ដូដាតេ នាយកប្រតិបត្តិសាជីវកម្មទេសចរជប៉ុន បាន​សម្ដែង​នូវ​ការ​អរគុណចំពោះសម្ដេចតេជោ ដែលបានអនុញ្ញាតឱ្យរូបលោក និង​ប្រតិភូ​ជួប​សម្ដែង​ការ​គួរ​សម​ក្នុង​ពេល​នេះ ហើយលោកបានចាប់អារម្មណ៍ទៅលើវិស័យកសិកម្មនៅក្នុងប្រទេសកម្ពុជា។ ទន្ទឹម​នឹង​នោះ​លោកបា​ន​រំលេច​អំពី​សក្ដា​នុពល​កសិកម្ម​នៅ​ក្នុង​ប្រទេស​ជប៉ុន​ដែល​កម្ពុជា​អាច​ធ្វើ​កិច្ច​សហ​ប្រតិបត្តិការ និងអាចរៀនសូត្របាន។ លោកបានលើកឡើងថា ជប៉ុនបាន​ធ្វើ​កសិកម្ម​តាម​បែប​ឆ្លាត​វៃ ពោលគឺការធ្វើកសិកម្មពឹងផ្អែកទៅលើបច្ចេកវិទ្យា។ ចំណុចនេះ លោកសង្ឃឹមថា តាម​រយៈក្រុមហ៊ុនលោកនឹងអាចជួយសម្របសម្រួល ក្នុង​ការ​បណ្ដុះ​ធន​ធាន​មនុស្ស​កម្ពុជា​បន្ថែម​ទៀតពី​វិស័យ​កសិកម្មឆ្លាតវៃរបស់ជប៉ុនមកដល់កម្ពុជា។លោកសង្ឃឹមថា តាមរយៈកិច្ចសហប្រតិបត្តិការនាពេលខាងមុខ នឹងអាចមានដំណើរ​ទស្សន​កិច្ច​ពី​មន្រ្ដី​កម្ពុជា ទៅកាន់​ប្រទេស​ជប៉ុន​ដើម្បី​ស្វែង​យល់​អំពី​ទិដ្ឋភាព​នៃ​វិស័យ​កសិកម្ម​នៅ​ក្នុង​ប្រទេស​ជប៉ុន​ហើយ​យកមកអនុវត្តនៅក្នុងប្រទេសកម្ពុជា។ ក្នុងឱកាសនោះ លោក អាគីរ៉ា ដូដាតេ បា​ន​ស្នើ​សុំ​ការចង្អុលបង្ហាញពីសម្ដេចតេជោ អំពីឱកាសក្នុងការវិនិយោគនៅប្រទេសកម្ពុជាផងដែរ។ជា​ការឆ្លើយតប សម្ដេចតជោ បានរំលេចឡើងថា កម្ពុជា ចាប់ពីឆ្នាំ ១៩៧៩ រហូត​មក​ដល់​បច្ចុប្បន្ន​ ដោយសម្ដេចបានលើកឡើងថា កម្ពុជាកាល​ពី​អតីត​កាល​វិស័យ​កសិកម្ម​មាន​ភាព​អន់​ថយ​ ហើយពីមុនកម្ពុជាខ្វះស្បៀងផលិតត្រឹមសម្រាប់ផ្គត់ផ្គង់ក្នុងស្រុកតែប៉ុណ្ណោះ ប៉ុន្ដែ​ក្រោយ​ពី​មាន​ការ​ធ្វើកំណែទម្រង់ជាបន្តបន្ទាប់តាំងពីសម្ដេចនៅជានាយករដ្ឋមន្រ្ដី កម្ពុជា​បាន​ប្រែខ្លួ​ន​ពី​ប្រទេស​ដែល​ខ្វះស្បៀង ផលិតស្បៀងសម្រាប់តែផ្គត់ផ្គង់ក្នុងប្រទេស ក្លាយជា​ប្រទេស​ដែល​មាន​ស្បៀង​បបូរ និងអាចនាំចេញទៅក្រៅប្រទេសថែមទៀត។ទន្ទឹមនឹងនេះ សម្ដេចតជោបានលើកឡើងថានូវចំណុចខ្វះខាតដែលកម្ពុជាត្រូវតែបំពេញ និង​អភិវឌ្ឍ​បន្ថែម គឺការកែច្នៃ ដោយបច្ចុប្បន្នដោយសារតែកំណើននៃការផលិតនៅក្នុងប្រទេសកម្ពុជា មាន​ការកើន​ឡើង​ច្រើន​កម្ពុជា​បាន​នាំ​ចេញ​ផលិត​ផល​កសិកម្ម​ដែល​ជា​វត្ថុ​ធាតុ​ដើម​ទៅ​លក់​នៅ​ក្រៅ​ប្រ​ទេសដែលធ្វើឱ្យកម្ពុជាខាតបង់នូវផលប្រយោជន៍។សម្ដេច​តេជោរំលេចថា បើក្រុមហ៊ុន​ជប៉ុន​ចាប់​អារម្មណ៍​នៅ​ក្នុង​ការ​វិនិយោ​គ​បន្ថែម​កសិ​ឧស្សា​ហកម្ម​ ពោលគឺការកែច្នៃវត្ថុធាតុដើមនៅក្នុងប្រទេសកម្ពុជាសម្រាប់នាំចេញនោះ គឺជា​ចំណុច​ខ្លាំង​មួយដែ​ល​អាចអនុញ្ញាតឱ្យកម្ពុជាពង្រីកខ្លួននៅក្នុងការនាំចេញផលិតផល និង​ទាញ​យក​ផល​ចំណេញ​បាន​ច្រើន ដើម្បីជួយដល់សេដ្ឋកិច្ចជាតិ។ សម្ដេចលើកឧទាហរណ៍ដូចជាដំណាំស្រូវ និង​ស្វាយចន្ទី ដែលជាដំណាំសក្ដានុពលរបស់កម្ពុជា ប៉ុន្ដែ​កម្ពុជា​បាន​នាំ​វត្ថុ​ធាតុ​ដើម​ចេញ​ទៅ​លក់​នៅ​ក្រៅ​ប្រទេស ដោយកង្វះខាតនូវការ​វិនិយោគ​លើ​ការ​កែច្នៃនៅក្នុង​ប្រទេស​ដើម្បី​នាំ​ចេញ​ដោយ​ខ្លួន​ឯង​។ ដូច្នេះ​សម្ដេច​ចង់​ឱ្យ​អ្នក​វិនិយោគ​ជប៉ុនចា​ប់​អារម្មណ៍​លើ​វិស័យ​កសិ​ឧស្សា​ហកម្ម​នៅ​កម្ពុជា​ឱ្យ​មាន​ការ​កើនឡើង។ សម្ដេចតេជោសង្ឃឹមថា សម្រាប់ការងារបច្ចេកទេសបន្ថែម ភាគីជប៉ុន និង​រាជ​រដ្ឋាភិបាល​ជាពិសេសខាងក្រសួងកសិកម្ម រុក្ខាប្រមាញ់ និងនេសាទ ដែលជាស្ថាប័ន​ជំនាញ​នៅ​ក្នុង​វិស័យ​នេះ​ដើម្បី​ធ្វើកិច្ចសហការជាមួយគ្នា។ ក្នុងឱកាសនោះ លោក អាគីរ៉ា ដូដាតេ នាយកប្រតិបត្តិសាជីវកម្មទេសចរជប៉ុន បានបង្ហាញ​នូវ​ការ​ចាប់​អារម្មណ៍ ពីការលើកឡើងរបស់សម្ដេចតេជោ ចំពោះការវិ​និយោគ​លើ​វិស័យ​កសិកម្ម​នៅ​ក្នុង​ប្រទេស​កម្ពុជា។ លោកលើកឡើងថា តាមរយៈដំណើរមកកាន់ប្រទេសកម្ពុជា ភាគីក្រុម​ហ៊ុ​ន​របស់​លោក​នឹង​សិក្សាបន្ថែម ហើយជជែក​ជាមួយ​រាជ​រដ្ឋាភិបាល​ថា​តើ​ក្រុម​ហ៊ុន​របស់​លោក​អាច​នឹង​វិនិយោគ​ទៅ​លើវិស័យអ្វីផលិតកម្មអ្វីសំខាន់សម្រាប់វិស័យកសិកម្មនេះ។ លោកក៏បាន​សន្យា​ជួយ​ជំរុញ​វិនិយោគិនជប៉ុនឱ្យមកបណ្ដាក់ទុនវិនិយោគនៅក្នុងប្រទេសកម្ពុជាបន្ថែមទៀត ជា​ពិសេស​នៅក្នុង​វិស័យកសិកម្មនេះឱ្យបានច្រើន៕

ឯកឧត្តម ជា ធីរិទ្ធ៖ អាណត្តិរបស់សម្ដេចតេជោ កំពុងជំរុញការងារការទូតសភា និង​ការងារ​សមាជិក​ព្រឹទ្ធសភាជាមួយ​អង្គបោះឆ្នោតនៅមូលដ្ឋាន

2025/05/14 11:01:32 am        195
Facebook Telegram Linkin
ភ្នំពេញ៖ ឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភាកម្ពុជា បានបញ្ជាក់ប្រាប់ BTV ថា ក្នុង​អាណត្តិ​របស់​សម្ដេច​អគ្គមហាសេនាបតីតេជោ ហ៊ុន សែន ជាប្រធានព្រឹទ្ធសភា នៃព្រះរាជាណា​ច​ក្រ​កម្ពុជា​ សម្ដេចកំពុងជំរុញលើកិច្ចការងារចំនួនពីរសំខាន់ គឺទី១ ការងារការទូតសភា និងទី២ ជំរុញ​ការ​ងារ​រវាងសមាជិកព្រឹទ្ធសភាជាមួយអង្គបោះឆ្នោត ដែលជាសមាជិកក្រុមប្រឹក្សាឃុំ សង្កាត់​នៅ​មូល​ដ្ឋាន​ដោយ​ផ្ទាល់។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភាកម្ពុជា បានបញ្ជាក់ថា នៅ​ក្នុង​អាណត្តិ​របស់​សម្ដេច​តេជោ ​ហ៊ុន សែន ជាប្រធានព្រឹទ្ធសភានេះ ចំណុចទី១ សម្ដេចតេជោ បានដាក់​ចេញ​នូវ​ទិស​ដៅ​យុទ្ធ​សាស្រ្ដ​ជំរុញ​សភាកាទូត។ នៅក្នុងសភាកាទូតនេះទាំងរដ្ឋសភា និងព្រឹទ្ធសភា ប៉ុន្ដែ​ក្នុង​ក្រប​ខណ្ឌ​សម្ដេច​តេជោ សម្ដេចបានជំរុញទៅលើការទូតព្រឹទ្ធសភា ដោយ​ធ្វើ​យ៉ាង​ណា​ឱ្យ​ស្ថាប័ន​ព្រឹទ្ធ​សភា ​ជាពិសេសសម្ដេចតេជោផ្ទាល់ និងចូលរួម​ចំណែក​ភ្ជាប់​ទំនាក់​ទំនង​ការ​ទូត​បន្ថែម​ស្រប​ទៅ​នឹង​គោល​នយោបាយរាជរដ្ឋាភិបាលដែលមានស្រាប់។ឯកឧត្តម ជា ធីរិទ្ធ បានបន្តថា សម្ដេចតេជោ បានជំរុញលើការងារការទូតសភានេះខ្លាំងណាស់ ខណៈ​បច្ចុប្បន្នក្នុងឱកាសសម្ដេចតេជោជួបជាមួយភ្ញៀវបរទេស ដែលបានមកស្នើសុំជួបពិភាក្សា និង​ស្នើ​សុំយោបល់ជាដើម សម្ដេចតែងតែយកឱកាសនេះសម្រាប់ជំរុញនូវសភាការទូតបន្ថែម។ឯកឧត្តម​បានបញ្ជាក់បន្ថែមថា ហើយនៅក្នុងអាណត្តិរបស់សម្ដេចតេជោនៅដើមខែមិថុនា ខាង​មុខ​នេះ នឹងមានសមាជព្រឹទ្ធសភា និងរដ្ឋសភា​ដែល​ជា​គំនិត​ផ្គួច​ផ្ដើម​របស់​សម្ដេច​តេជោដើ​ម្បី​ឱ្យ​រដ្ឋសភា និងព្រឹទ្ធសភា ធ្វើយ៉ាងណាបង្ហាញអំពីតួនាទីរបស់ស្ថាប័ន នីតិប្បញ្ញត្តិ ក្នុង​ការ​ផ្ដល់​យោបល់ និងចូលរួមចំណែកអភិវឌ្ឍប្រទេសជាតិជាមួយរាជរដ្ឋាភិបាល។ចំណែក​ចំណុចទី២ សម្ដេចតេជោ បានជំរុញការងាររវាងសមាជិកព្រឹទ្ធសភាជាមួយអង្គបោះឆ្នោត ដែល​ជា​សមាជិកក្រុមប្រឹក្សាឃុំសង្កាត់ ឱ្យមានគណនេយ្យភាពរវាងស្ថាប័ននីតិប្បញ្ញត្តិ ព្រឹទ្ធសភា ជា​មួយ​អង្គបោះឆ្នោត មានន័យថា សមាជិក​ព្រឹទ្ធសភា​ត្រូវ​ទៅ​ធ្វើ​ការ​នៅ​មូល​ដ្ឋាន​ជា​សមាជិក​ក្រុម​ប្រឹក្សា​ឃុំ សង្កាត់ ដែលបានបោះឆ្នោតឱ្យព្រឹទ្ធសភា ត្រូវចុះទៅមូលដ្ឋានមើលទុក្ខធុរៈរបស់ពួកគាត់ តើ​ពួក​គាត់​ជួបបញ្ហាអ្វីខ្លះ ពួកគាត់បានឮបញ្ហាពីប្រជាពលរដ្ឋមកយ៉ាងណា ហើយស្វែង​រក​ដំ​ណោះ​ស្រាយ​។សូមជម្រាបថា សម្តេចតេជោ ហ៊ុន សែន ត្រូវបានជាប់ឆ្នោតជាប្រធានព្រឹទ្ធសភា នីតិកាលទី៥ ដោយ​លទ្ធផល ៦២សម្លេង លើ ៦២សម្លេង សម្តេចអគ្គមហាសេនាបតីតេជោ ហ៊ុន សែន ដែល​ត្រូវ​បាន​ព្រឹទ្ធសភា នីតិកាលទី៥ បោះឆ្នោតជ្រើសរើស សម្ដេចតេជោ ជា « ប្រធានព្រឹទ្ធសភា » នៃ​ព្រះ​រា​ជា​ណាចក្រកម្ពុជា ក្នុងនីតិកាលទី៥ ដោយលទ្ធផល ៦២សម្លេង លើ ៦២សម្លេង នាថ្ងៃទី៣ ខែ​មេសា ឆ្នាំ២០២៤នេះ៕

នាយកប្រចាំតំបន់អាស៊ីនៃក្រុមហ៊ុន The Report Company វាយតម្លៃខ្ពស់ ចំពោះការបន្តថែរក្សាបាននូវសន្តិភាព និងស្ថិរភាពយ៉ាងរឹងមាំនៅកម្ពុជា

2025/05/13 06:25:59 pm        116
Facebook Telegram Linkin
ភ្នំពេញ ៖ នារសៀលថ្ងៃទី១៣ ខែឧសភា ឆ្នាំ២០២៥ នៅវិមានសន្តិភាព, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ លោក Lucius Daniels នាយកប្រចាំតំបន់អាស៊ីនៃក្រុមហ៊ុន The Report Company ចូលសម្តែងការគួរសម។ ក្នុងឱកាសនៃជំនួបនេះ, លោក Lucius Daniels បានថ្លែងអំណរគុណយ៉ាងជ្រាលជ្រៅចំពោះ សម្តេចបវរធិបតី ដែលបានចំណាយពេលវេលាដ៏មានតម្លៃអនុញ្ញាតឱ្យរូបលោកចូលជួបសម្ដែងការគួរសម។ លោកបានវាយតម្លៃខ្ពស់ចំពោះកម្ពុជាដែលបានបន្តថែរក្សានូវសន្តិភាព និងស្ថិរភាពយ៉ាងរឹងមាំ ក្រោមការដឹកនាំប្រកបដោយភាពឈ្លាសវៃរបស់សម្ដេចបវរធិបតី ដែលជាមូលដ្ឋានគ្រឹះសម្រាប់ជំរុញការអភិវឌ្ឍសង្គម-សេដ្ឋកិច្ច, ទាក់ទាញវិនិយោគ និងទេសចរ មកទស្សនាកម្ពុជា។ ទន្ទឹមនឹងនេះ, លោក Lucius Daniels បានគោរពជម្រាបជូនសម្តេចបវរធិបតី អំពីគម្រោងផលិតរបាយការណ៍ផ្សព្វផ្សាយដែលផ្តោតជាសំខាន់លើទស្សនទាន និងសមិទ្ធផលធំៗ របស់រាជរដ្ឋាភិបាលកម្ពុជា រួមមាន៖ យុទ្ធសាស្ត្របញ្ចកោណ-ដំណាក់កាលទី១, ការជំរុញកំណើនសេដ្ឋកិច្ច, ការលើកកម្ពស់វិស័យទេសចរណ៍ក្នុង «រដូវកាលបៃតង» និង ការប្រែក្លាយខេត្តព្រះសីហនុទៅជាមជ្ឈមណ្ឌលសេដ្ឋកិច្ចពហុបំណង និងប្រែក្លាយកំពង់ផែស្វយ័តក្រុងព្រះសីហនុ ជាមជ្ឈមណ្ឌលភស្តុភារកម្មតំបន់ ជាដេីម។ ជាការឆ្លើយតប, សម្តេចបវរធិបតី បានសម្តែងការស្វាគមន៍ និងក្តីរីករាយដែលបានជួបលោក Lucius Daniels សាជាថ្មី។ សម្តេចបវរធិបតីបានវាយតម្លៃខ្ពស់ចំពោះក្រុមហ៊ុន The Report Company ដែលបានរួមចំណែកផ្សព្វផ្សាយអំពីកម្ពុជា ជាពិសេស ការចេញផ្សាយកិច្ចសម្ភាសន៍របស់សម្ដេចបវរធិបតី នៅក្នុងទស្សនាវដ្តី Newsweek នាពេលកន្លងមក។ សម្តេចបវរធិបតីក៏បានកត់សម្គាល់អំពីគម្រោងរបស់ក្រុមហ៊ុន ក្នុងការធ្វើកិច្ចសម្ភាសន៍ជាមួយថ្នាក់ដឹកនាំក្រសួង-ស្ថាប័ននានា របស់រាជរដ្ឋាភិបាលកម្ពុជា សម្រាប់របាយការណ៍ថ្មី។ សម្តេចបវរធិបតី ក៏បានចែករំលែកផងដែរថា រាជរដ្ឋាភិបាលកម្ពុជាបានដាក់ចេញនូវគោលនយោបាយ និងវិធានការចាំបាច់នានា ដើម្បីបង្កើតបរិយាកាសវិនិយោគប្រកបដោយភាពទាក់ទាញ, បត់បែន, ប្រកួតប្រជែង និងប្រាកដនិយម។ ក្នុងន័យនេះ, សម្តេចបានគូសរំលេចពីការវិនិយោគ និងអភិវឌ្ឍហេដ្ឋារចនាសម្ព័ន្ធរូបវន្តសំខាន់ៗ ដើម្បីគាំទ្រដល់វិស័យដឹកជញ្ជូន និងភស្តុភារកម្ម ដែលរួមមាន៖ ផ្លូវល្បឿនលឿនភ្នំពេញ-ព្រះសីហនុ, កំពង់ផែទឹកជ្រៅក្រុងព្រះសីហនុ, គម្រោងព្រែកជីកហ្វូណនតេជោ, និងអាកាសយានដ្ឋានអន្តរជាតិតេជោ ជាដើម។ សម្តេចបវរធិបតី ក៏បានគូសបញ្ជាក់អំពីការផ្តល់ការលេីកទឹកចិត្តនានា ចំពោះការវិនិយោគលើខ្សែច្រវាក់ផ្គត់ផ្គង់នៅកម្ពជា ដែលនឹងជួយបង្កើនសមត្ថភាពប្រកួតប្រជែងរបស់កម្ពុជា ព្រមទាំងជួយបម្រើដល់ការផ្គត់ផ្គង់ទាំងទីផ្សារក្នុងស្រុក និងការនាំចេញ។បន្ថែមលើនេះ, សម្តេចបវរធិបតី ក៏បានលើកឡើងពីគោលដៅរបស់រាជរដ្ឋាភិបាល ក្នុងការប្រែក្លាយ និងតភ្ជាប់បណ្តាខេត្តជាប់ឆ្នេរសមុទ្ររបស់កម្ពុជា ទៅជាតំបន់សេដ្ឋកិច្ចពហុបំណង ដែលគ្របដណ្តប់ដោយវិស័យឧស្សាហកម្មទំនើប, កម្មន្តសាល, សេវាកម្ម, ទេសចរណ៍ និងភស្តុភារកម្ម ដើម្បីរួមចំណែកដល់ការធ្វើពិពិធកម្ម និងជំរុញកំណើនសេដ្ឋកិច្ចជាតិ៕

បណ្ដាញសង្គម

ព័ត៌មានថ្មីៗ

កម្ពុជា-ចិន ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ
04/22/2026 09:04 PM
Facebook Telegram Linkin
ចៅក្រម ICC បដិសេធសំណើសុំដោះលែងអតីតប្រធានាធិបតីហ្វីលីពីន លោក Duterte
04/22/2026 08:04 PM
Facebook Telegram Linkin
អ៊ីរ៉ង់និយាយថា ការទូតពឹងផ្អែកលើផលប្រយោជន៍ជាតិ ពុំមែនការសម្រេចចិត្តលើការចរចាទេ
04/22/2026 08:04 PM
Facebook Telegram Linkin
អ្នកការទូត បញ្ជាក់ថា អ៊ីរ៉ង់ «នឹងមិនចរចាក្រោមការគំរាមកំហែង» នោះឡើយ
04/22/2026 08:04 PM
Facebook Telegram Linkin
ប្រទេសលីបង់ និងរុស្ស៊ី ចុះហត្ថលេខាលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងពិសេស
04/22/2026 08:04 PM
Facebook Telegram Linkin
លីបង់នឹងស្នើសុំការបន្តបទឈប់បាញ់រយៈពេលមួយខែ ក្នុងជំនួបជាមួយអ៊ីស្រាអែល
04/22/2026 08:04 PM
Facebook Telegram Linkin
អាល្លឺម៉ង់ប្ដេជ្ញាកសាងកងទ័ពខ្លាំងបំផុតរបស់អឺរ៉ុប នៅឆ្នាំ២០៣៩ ដើម្បីរារាំងរុស្ស៊ី
04/22/2026 07:04 PM
Facebook Telegram Linkin
EU អនុម័តប្រាក់កម្ចី ៩០ពាន់លានអឺរ៉ូដល់អ៊ុយក្រែន និងទណ្ឌកម្មថ្មី លើរុស្ស៊ី ក្រោយហុងគ្រីបោះបង់សិទ្ធិវេតូ
04/22/2026 07:04 PM
Facebook Telegram Linkin
ឯកអគ្គរដ្ឋទូតឡាវប្តេជ្ញាចិត្តបន្តពង្រឹង និងពង្រីកទំនាក់ទំនងដ៏ល្អប្រសើររវាងប្រទេសកម្ពុជា និងឡាវ លើគ្រប់វិស័យ
04/22/2026 07:04 PM
Facebook Telegram Linkin
រដ្ឋមន្ត្រីការបរទេសអ៊ីស្រាអែលអំពាវនាវឲ្យលីបង់ធ្វើការជាមួយអ៊ីស្រាអែល ប្រឆាំងនឹងក្រុមហេសបូឡា
04/22/2026 07:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.