BTV NEWS

ប្រសាសន៍សំខាន់ៗរបស់សម្ដេចធិបតី ហ៊ុន ម៉ាណែត ក្នុងឱកាស សម្ពោធបើកឲ្យប្រើប្រាស់ជាផ្លូវការកំណាត់ផ្លូវជាតិលេខ៧ ប្រវែង ៤៥,៤៨៩ គ.ម ចាប់ពីរង្វង់មូលស្គង់ដល់រង្វង់មូលគល់ស្ពានគីហ្សូណា ក្រុងកំពង់ចាម

សម្តេចតេជោ ហ៊ុន សែន បញ្ជាក់ថា រូបថតមួយសន្លឹក ដែលថតនៅឆ្នាំ១៩៩០ គឺពិតជានៅខេត្តបាត់ដំបងមែន

លោកជំទាវបណ្ឌិត ពេជ ចន្ទមុន្នី ដាស់តឿនគ្រូពេទ្យតម្កល់ស្មារតីរក្សាក្រមសីលធម៌វិជ្ជាជីវៈ មានមេត្តាចំពោះអ្នកជំងឺ

ព្រះករុណាព្រះមហាក្សត្រ និងសម្ដេចព្រះមហាក្សត្រីយាងនិវត្តន៍មកដល់មាតុភូមិវិញដោយសុវត្ថិភាពបន្ទាប់ពីពិនិត្យ និងព្យាបាលព្រះរោគនៅរដ្ឋធានីប៉េកាំង

ព័ត៌មានសំខាន់ៗ

សម្ដេចពិជ័យ៖ អាវុធ និងសម្ភារៈរបស់អាមេរិកប្រមូលបានបណ្ដើរៗហើយ គ្រោងកម្ទេចចោល

កំពង់ឆ្នាំង៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងថា អាវុធគ្រប់ប្រភេទ រួមទាំងសម្ភារៈយោធាផ្សេងៗ របស់សហរដ្ឋអាមេរិក ត្រូវបានប្រមូលជាបណ្ដើរៗ និងបានជាបន្តបន្ទាប់ហើយ គ្រោងនឹងធ្វើការកម្ទេចចោល សម្រាប់របស់ប្រើប្រាស់មិនកើត និងរបស់ដែលប្រើបានត្រូវរក្សាទុកក្នុងឃ្លាំង ឬសារមន្ទីរ ។ក្នុងឱកាសអញ្ជើញជាអធិបតីក្នុងពិធីបញ្ចុះបឋមសិលា បើកការដ្ឋានសាងសង់ទីលានបាញ់គ្រាប់ពិត នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំរីករាយ) ស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង នៅព្រឹកថ្ងៃទី១៧ ខែធ្នូ ឆ្នាំ២០២១ សម្ដេចពិជ័យសេនា មានប្រសាសន៍ថា ការប្រមូលនូវអាវុធ និងសម្ភារៈយោធារបស់អាមេរិក កំពុងដំណើរការ ខណៈអាវុធមួយចំនួនមានសភាពចាស់ មិនអាចប្រើប្រាស់បាន ដោយភាគតិចណាស់ ដែលអាចប្រើបាន ។សម្ដេច បានបន្តថា កន្លងមកក្រសួងការពារជាតិបានទុកដាក់ក្នុងឃ្លាំង ឬនៅក្នុងសារមន្ទីរ ប៉ុន្តែបច្ចុប្បន្នគ្រប់អង្គភាពកំពុងប្រមូល ក្នុងការត្រួតពិនិត្យមើលពីចំនួនឲ្យបានច្បាស់លាស់ ដើម្បីរក្សាទុក ឬដល់កម្រិតមួយបំផ្លាញ់ចោល ឬយ៉ាងណា ព្រោះអាវុធ និងគ្រឿងបំពាក់នេះ កាលណាដល់អាយុកាល ពេលចាស់ពេក ខូចខាតធ្ងន់ធ្ងរពេកទុកនាំអន្តរាយដែរ តែងតែធ្វើការបំផ្លាញជាបន្តបន្ទាប់ ។សម្ដេចពិជ័យសេនា បន្ថែមថា អាមេរិកថាមិនលក់អាវុធមកឲ្យកម្ពុជាទៀត នឹងកាន់តែល្អហើយ ដោយរាជរដ្ឋាភិបាលបច្ចុប្បន្នមិនដែលទិញអាវុធពីអាមេរិកដែរ ដោយអាវុធមាននៅសល់នេះ គឺប្រមូលពីសម័យសង្គ្រាមឆ្នាំ១៩៧០ ដោយជំនន់ លន់ នល់ យកមកប្រើប្រាស់ ដោយមាននៅសេសសល់បាត់ឃ្លាំង និងមួយចំណែកទៀត បានពីប្រភពនៃភាគីប្រយុទ្ធណាមួយ ក៏មិនបានប្រើប្រាស់ដែរ ដោយធ្វើការប្រមូលទុកដាក់បានច្បាស់លាស់ ហើយកំពុងពិចារណាមើលធ្វើយ៉ាងណាទៀតនោះ គឺសម្រេចនៅពេលក្រោយ ។ឆ្លើយតបការដាក់ទណ្ឌកម្មជាឯកតោភាគីរបស់អាមេរិក សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីពេលថ្មីៗនេះ បានបញ្ជាទៅក្រសួងការពារជាតិ ត្រូវប្រមូលនូវអាវុធ ឬសម្ភារៈយោធារបស់អាមេរិក ដែលប្រើប្រាស់លែងកើត ត្រូវកម្ទេចចោល និងរក្សាទុក ៕

អង្គការសុខភាពពិភពលោកនិយាយថា យើងអាចបញ្ចប់ជំងឺរាតត្បាតនៅឆ្នាំ២០២២

WHO៖ អ្នកដឹកនាំបច្ចេកទេសសម្រាប់កម្មវិធីសង្គ្រោះបន្ទាន់ របស់អង្គការសុខភាពពិភពលោកកាលពីថ្ងៃពុធបាននិយាយថា លោកស្រីមានក្តីសង្ឃឹមមិនគួរឱ្យជឿដែលឆ្នាំ២០២២ គឺជាឆ្នាំដែលយើងបញ្ចប់ជំងឺរាតត្បាត COVID-19។ វេជ្ជបណ្ឌិតលោកស្រី Maria Van Kerkhove កំពុងទទួលការសួរសំណួរពីសាធារណជនទូទៅអំពីវីរុស COVID-19 និងវីរុសបម្លែងខ្លួនថ្មី omicron រួមជាមួយនឹងវេជ្ជបណ្ឌិតលោក Mike Ryan នាយកប្រតិបត្តិនៃកម្មវិធីសង្គ្រោះបន្ទាន់របស់អង្គការសុខភាពពិភពលោក។នៅលើបញ្ហាវីរុសបម្លែងខ្លួនថ្មី omicron លោក Kerkhove បាននិយាយថា វីរុសកំពុងរាលដាលឆាប់រហ័ស ហើយវាមានកំណើនច្រើនជាងវីរុសបម្លែងខ្លួន Delta នៅក្នុងប្រទេសមួយចំនួន។ អង្គការសុខភាពពិភពលោកបាននិយាយថា ប្រទេសចំនួន ៧៧ បានរាយការណ៍ករណីវីរុសបម្លែងខ្លួនថ្មី omicron ប៉ុន្តែវីរុសនេះទំនងជាមាននៅក្នុងប្រទេសភាគច្រើនរហូតមកដល់ពេលនេះ គ្រាន់តែមិនទាន់រកឃើញនៅឡើយ។ អង្គការសុខភាពពិភពលោកនិយាយថា ទិន្នន័យនៅតែមាន ហើយមនុស្សជាច្រើននៅតែមិនទាន់ដឹងអំពីវីរុសបម្លែងខ្លួនថ្មីនេះ។យោងតាមការវិភាគកាលពីថ្ងៃអង្គារ នៃទិន្នន័យពីប្រទេសអាហ្វ្រិកខាងត្បូងដែលវីរុសបម្លែងខ្លួន omicron កំពុងតែជំរុញឱ្យមានការកើនឡើងករណីឆ្លងវីរុសបម្លែងខ្លួនថ្មីនេះ វីរុសនេះហាក់ដូចជាងាយឆ្លងពីមនុស្សទៅមនុស្ស និងអាចចៀសបានពីប្រសិទ្ធភាពវ៉ាក់សាំង ប៉ុន្តែមានស្ថានភាពស្រាលជាងវីរុសបម្លែងខ្លួនមុនៗ។ យោងតាមអង្គការសុខភាពពិភពលោក (WHO) បានឱ្យដឹងថា ចំនួនសរុបនៃករណីឆ្លងវីរុស COVID-19 ទូទាំងពិភពលោកបានកើនដល់ ២៧២,៣៥៧,១៦១ករណី និងអ្នកស្លាប់មានចំនួន ៥.៣៤៣,៧៧៥នាក់៕អត្ថបទ៖ ប៊ុនថន

អ្នកស្លាប់ដោយសារឆេះរថយន្តដឹកប្រេងឥន្ធនៈនៅហៃទីកើនឡើងដល់ ៧៥នាក់

ហៃទី៖ អាជ្ញាធរបាននិយាយថា រថយន្តដឹកប្រេងក្រឡាប់ និងផ្ទុះបញ្ចេញអណ្តាតភ្លើងសន្ធោសន្ធៅបានឆាបឆេះលំនៅឋាន និងទីតាំងអាជីវកម្មដែលកំពុងដំណើរការនៅក្បែរនោះ បណ្តាលឲ្យមនុស្សយ៉ាងហោចណាស់ ៧៥នាក់ស្លាប់។ ការផ្ទុះនេះបានកើតឡើងនៅពេលយប់ក្នុងទីក្រុង Cap-Haitien ជាទីក្រុងធំទីពីររបស់ប្រទេសហៃទីតាមបណ្តោយឆ្នេរសមុទ្រភាគខាងជើង។សេចក្តីរាយការណ៍បឋមបានបញ្ជាក់ថា រថយន្តដឹកប្រេងបានព្យាយាមគេចពីម៉ូតូមួយគ្រឿង ពេលនោះរថយន្តបានក្រឡាប់។ បន្ទាប់មកអ្នកមើលឃើញហេតុការណ៍បានប្រញាប់ប្រញាល់ទៅកន្លែងកើតហេតុ ដោយមានធុងទឹកដើម្បីប្រមូលយករបស់របរមានតម្លៃនៅរថយន្តដឹកប្រេង ដែលទំនងជាសម្រាប់លក់បន្តនៅលើទីផ្សារងងឹត ខណៈនោះប្រេងឥន្ធនៈបានហៀរទៅរកគំនរសំរាម ដែលឆេះនៅក្បែរនោះបណ្តាលឲ្យរថយន្តឆាបឆេះ និងផ្ទុះ។ ការរួមចំណែកនៃចំនួនអ្នកស្លាប់ខ្ពស់ដោយឧប្បត្តិហេតុ គឺជាភាពអស់សង្ឃឹមដែលបានបង្ខំឱ្យប្រជាជនហៃទីក្រីក្រប្រជែងគ្នា ប្រមូលប្រេងសាំងដោយសារតែកង្វះខាតធ្ងន់ធ្ងរ ខណៈស្ថានីយ៍ប្រេងឥន្ធនៈបិទធ្វើឱ្យតម្លៃប្រេងឥន្ធនៈនៅលើទីផ្សារងងឹតកើនឡើង និងបង្ខំឱ្យបិទអាជីវកម្ម៕អត្ថបទ៖ ប៊ុនថន

WHO រំពឹងថានឹងមានករណីឆ្លងវីរុស Omicron ធ្ងន់ធ្ងរ ដោយព្រមានទល់នឹងការចាត់ទុកថាជំងឺប្រភេទនេះស្រាល

WHO៖ អង្គការសុខភាពពិភពលោកកាលពីថ្ងៃពុធបានព្រមានទល់នឹងការចាត់ទុកថា វីរុស Covid-19 បម្លែងខ្លួនថ្មី Omicron ថាជាប្រភេទជំងឺស្រាល ដោយព្រមានថាវីរុសនេះនឹងបង្កឱ្យមានជំងឺធ្ងន់ធ្ងរផងដែរ។ លោកស្រី Maria Van Kerkhove ដែលជាប្រធានក្រុមបច្ចេកទេសនៃវីរុស Covid-19 របស់អង្គការសុខភាពពិភពលោក បានប្រាប់សាធារណជនអំឡុងពេលវគ្គសំណួរ-ចម្លើយថា យើងដឹងថា មនុស្សដែលបានឆ្លងវីរុសបម្លែងខ្លួនថ្មី Omicron អាចមានវិសាលគមពេញលេញនៃជំងឺពីការឆ្លងដែលគ្មានរោគសញ្ញា ទៅជាជំងឺស្រាលរហូតដល់មានជំងឺធ្ងន់ធ្ងររហូតដល់ស្លាប់។អង្គការសុខភាពពិភពលោកបានព្រមានកាលពីថ្ងៃអង្គារថា វីរុសបម្លែងខ្លួនថ្មី Omicron កំពុងរីករាលដាលលឿនជាងប្រភេទវីរុសមុនៗ។ លោកស្រី Van Kerkhove បាននិយាយកាលពីថ្ងៃពុធថា ការកើនឡើងនៃការឆ្លងនឹងនាំឱ្យមានការចូលសម្រាកព្យាបាល នៅមន្ទីរពេទ្យបន្ថែមទៀតដែលបន្ទុកប្រព័ន្ធថែទាំសុខភាពមួយចំនួននឹងដួលរលំ។ ចំណែកលោកវេជ្ជបណ្ឌិត Mike Ryan ប្រធានកម្មវិធីគ្រាអាសន្នផ្នែកសុខភាពសាធារណៈ របស់អង្គការសុខភាពពិភពលោកបាននិយាយថា វីរុសបម្លែងខ្លួនថ្មី Omicron កំពុងកើនឡើងទ្វេដងរៀងរាល់ពីរថ្ងៃ ឬតិចជាងនេះនៅក្នុងចក្រភពអង់គ្លេស។ចក្រភពអង់គ្លេសបានកត់ត្រាករណីឆ្លងវីរុស Covid-19 ប្រចាំថ្ងៃខ្ពស់បំផុតចាប់តាំងពីចាប់ផ្ដើមផ្ទុះវីរុសរាតត្បាតសកលនេះ ដោយមានចំនួន ៧៨,៦១០នាក់កាលពីថ្ងៃពុធ។ លោក Ryan បាននិយាយថា ប្រសិនបើមានករណីឆ្លងចំនួន ១០០,០០០នាក់នៅថ្ងៃនេះ វាប្រាកដជាមានចំនួន ២០០,០០០នាក់ក្នុងរយៈពេលពីរថ្ងៃ ប៉ុន្តែបន្ទាប់មកចំនួន ៤០០,០០០នាក់ក្នុងរយៈពេលត្រឹមពីរថ្ងៃ និងហក់ឡើងដល់ ៨០០,០០០នាក់ក្នុងពេល ២ថ្ងៃបន្ទាប់មកទៀត។ ហើយនោះជាអ្វីដែលយើងព្រួយបារម្ភ៕អត្ថបទ៖ សុខមាន

អង្គការសុខភាពពិភពលោកនិយាយថា វីរុស Omicron មាននៅក្នុងប្រទេសភាគច្រើន

WHO៖ ប្រធានអង្គការសុខភាពពិភពលោក កាលពីថ្ងៃអង្គារបានជំរុញឱ្យប្រជាជនមិនត្រូវបោះបង់ក្តីបារម្ភ អំពីវីរុសបម្លែងខ្លួនថ្មី Omicron ដែលអាចចម្លងខ្ពស់ ខណៈវាបង្ហាញរោគសញ្ញាស្រាលនោះទេ ហើយបានរំលឹកឡើងវិញនូវការសូមអង្វររបស់លោក សម្រាប់ការបែងចែកវ៉ាក់សាំងជាសកលដោយយុត្តិធម៌។ លោកវេជ្ជបណ្ឌិត Tedros Ghebreyesus បាននិយាយក្នុងអំឡុងពេលថ្លែងសុន្ទរកថាតាមទូរទស្សន៍ពីទីក្រុងហ្សឺណែវប្រទេសស្វីសថា វីរុសបម្លែងខ្លួនថ្មី Omicron ទំនងជាមាននៅក្នុងប្រទេសភាគច្រើន ទោះបីជាវាមិនទាន់ត្រូវបានរកឃើញក៏ដោយ។លោក Tedros បាននិយាយថា ទោះបីជាវីរុសបម្លែងខ្លួនថ្មីនេះមិនបានបង្កឱ្យមានជំងឺធ្ងន់ធ្ងរក៏ដោយ ករណីមួយចំនួនអាចគ្របដណ្ដប់លើប្រព័ន្ធសុខាភិបាលដែលមិនបានត្រៀមទុកជាមុន។ ប្រធានទីភ្នាក់ងារអង្គការសហប្រជាជាតិបានអំពាវនាវ ដល់កម្មវិធីចាក់វ៉ាក់សាំងដូសជំរុញដែលកំពុងត្រូវបានដាក់ឱ្យប្រើប្រាស់ សម្រាប់ប្រជាជនពេញវ័យនៅក្នុងប្រទេសមួយចំនួន ដោយលោកបាននិយាយថា អង្គការសុខភាពពិភពលោកមានការព្រួយបារម្ភថា កម្មវិធីបែបនេះនឹងមានការរក្សាទុកវ៉ាក់សាំងដែលយើងបានឃើញនៅឆ្នាំនេះ និងធ្វើឱ្យមានវិសមភាពកាន់តែធ្ងន់ធ្ងរឡើង។ លោកបានស្នើថា ការផ្តល់វ៉ាក់សាំងដូសជំរុញដល់ក្រុមដែលមានហានិភ័យទាបពីជំងឺធ្ងន់ធ្ងរ ឬការស្លាប់គឺបង្កគ្រោះថ្នាក់ដល់អាយុជីវិតអ្នកដែលមានហានិភ័យខ្ពស់ ដែលកំពុងរង់ចាំវ៉ាក់សាំងដំបូង ឬលើកទីពីរ។លោកបានបញ្ជាក់ច្បាស់ថា អង្គការសុខភាពពិភលោក (WHO) មិនប្រឆាំងទៅនឹងការចាក់វ៉ាក់សាំងដូសជំរុញនោះទេ យើងប្រឆាំងទៅនឹងវិសមភាព ហើយកង្វល់ចម្បងរបស់យើងគឺការសង្គ្រោះជីវិតនៅគ្រប់ទីកន្លែង។ យោងតាមអង្គការសុខភាពពិភពលោកបានឲ្យដឹងថា វីរុសបម្លែងខ្លួនថ្មី Omicron រហូតមកដល់ពេលនេះត្រូវបានរកឃើញ ៧៧ប្រទេសនៅលើពិភពលោក៕អត្ថបទ៖ ប៊ុនថន

ក្រុមហ៊ុន Pfizer និយាយថា ឱសថគ្រាប់ COVID-19 មានប្រសិទ្ធភាពប្រឆាំងវីរុស Omicron

អាមេរិក៖ ក្រុមហ៊ុន Pfizer បាននិយាយកាលពីថ្ងៃអង្គារថា ឱសថគ្រាប់ដែលបានពិសោធន៍របស់ក្រុមហ៊ុនក្នុងការព្យាបាលវីរុស COVID-19 ហាក់ដូចជាមានប្រសិទ្ធភាពប្រឆាំងទៅនឹងវីរុសបម្លែងខ្លួនថ្មី Omicron។ ក្រុមហ៊ុននិយាយថា លទ្ធផលពេញលេញនៃការសិក្សាលើមនុស្ស ២,២៥០នាក់របស់ខ្លួន បានបញ្ជាក់ពីលទ្ធផលដំបូងដ៏ជោគជ័យនៃឱសថគ្រាប់ប្រឆាំងនឹងវីរុស។ឱសថនេះកាត់បន្ថយការចូលសម្រាកនៅមន្ទីរពេទ្យ រួមទាំងការស្លាប់ប្រមាណ 89% ក្នុងចំណោមមនុស្សពេញវ័យដែលមានហានិភ័យខ្ពស់ នៅពេលដែលបានលេបភ្លាមៗបន្ទាប់ពីមានរោគសញ្ញាដំបូងនៃវីរុស COVID-19។ ក្រុមហ៊ុនប្រកាសការធ្វើតេស្តនៅមន្ទីរពិសោធន៍ដាច់ដោយឡែកបង្ហាញថា ឱសថរក្សាបាននូវប្រសិទ្ធភាពប្រឆាំងវីរុសបម្លែងខ្លួនថ្មី Omicron ដូចដែលអ្នកជំនាញជាច្រើនបានព្យាករណ៍។ បច្ចុប្បន្នភាពត្រូវបានធ្វើឡើងនៅពេលដែលករណីឆ្លងវីរុស COVID-19 ករណីស្លាប់ និងការសម្រាកព្យាបាលនៅមន្ទីរពេទ្យកំពុងកើនឡើងម្តងទៀត ហើយសហរដ្ឋអាមេរិកមានអ្នកស្លាប់ដោយសារជំងឺឆ្លងនេះជាង 800,000នាក់។ ការកើនឡើងថ្មីត្រូវបានជំរុញដោយវីរុសបម្លែងខ្លួនថ្មី Delta ដែលកំពុងឡើងខ្ពស់ដោយសារតែអាកាសធាតុកាន់តែត្រជាក់ និងការជួបជុំគ្នានៅបរិវេណខាងក្នុងដែលបិទជិតកាន់តែច្រើន ទោះបីមន្ត្រីសុខាភិបាលកំពុងទប់ស្កាត់ផលប៉ះពាល់ដោយវីរុសបម្លែងខ្លួនថ្មី Omicron ប្រែប្រួលខ្លាំងកំពុងតែលេចចេញមកក៏ដោយ។រដ្ឋបាលចំណីអាហារ និងឱសថត្រូវបានគេរំពឹងថានឹងមានវិធានការក្នុងពេលឆាប់ៗនេះ ជុំវិញការផ្តល់ការអនុញ្ញាតឱ្យឱសថគ្រាប់របស់ក្រុម Pfizer និងឱសថគ្រាប់ដែលប្រជែងពីក្រុមហ៊ុន Merck ខណៈបានដាក់ជូននិយតករសម្រេច។ ប្រសិនបើត្រូវបានអនុញ្ញាត ឱសថគ្រាប់នឹងក្លាយជាឱសថព្យាបាលជំងឺ COVID-19 ដំបូងបង្អស់ដែលជនជាតិអាមេរិកអាចរកបាននៅតាមឱសថស្ថាន និងលេបនៅផ្ទះ។ ទិន្នន័យរបស់ក្រុមហ៊ុន Pfizer អាចជួយធានាដល់និយតករអំពីអត្ថប្រយោជន៍ឱសថរបស់ក្រុមហ៊ុន បន្ទាប់ពីក្រុមហ៊ុន Merck បានបង្ហាញអត្ថប្រយោជន៍តិចជាងការរំពឹងទុក សម្រាប់ឱសថរបស់ខ្លួនក្នុងការធ្វើតេស្តចុងក្រោយ។ កាលពីចុងខែមុន ក្រុមហ៊ុន Merck បាននិយាយថា ឱសថគ្រាប់របស់ក្រុមហ៊ុនកាត់បន្ថយការចូលព្យាបាលនៅមន្ទីរពេទ្យ និងស្លាប់បានចំនួន 30% ចំពោះមនុស្សពេញវ័យដែលមានហានិភ័យខ្ពស់៕អត្ថបទ៖ ប៊ុនថន

ប្រសាសន៍សំខាន់ៗសម្ដេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

ភ្នំពេញ៖ នៅព្រឹកថ្ងៃទី១៥ ខែធ្នូ ឆ្នាំ២០២១នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធជាផ្លូវការសណ្ឋាគារ ហៃយ៉ាត់ រីជិនស៊ី ភ្នំពេញ (HYATT Regency Phnom Penh) ដែលជាការវិនិយោគរបស់ក្រុមហ៊ុន ជីប ម៉ុង ក្នុងថវិកាវិនិយោគសរុប ១៨០លានដុល្លារអាមេរិក។ដើម្បីទទួលបានព័ត៌មានថ្មី លឿន សូមចុច Join Channel Telegram BTV Newsខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន នាយករដ្ឋមន្ត្រី ថ្ងៃទី១៥ធ្នូ ២០២១៖- ការបើកសម្ពោធឲ្យប្រើប្រាស់ជាផ្លូវការនូវ សណ្ឋាគារហៃយ៉ាត់ រីជិនស៊ី ភ្នំពេញ គឺជាសមិទ្ធផលមួយទៀតសម្រាប់សង្គមខ្មែរទាំងមូល ខណៈសណ្ឋាគារនេះ នឹងផ្តល់ផលប្រយោជន៍ជាច្រើនដល់ប្រជាជនកម្ពុជា។- សម្តេចតេជោ មានមោទនភាពចំពោះក្រុមហ៊ុន ជីប ម៉ុង និងក្រុមហ៊ុនដទៃទៀត ដែលបានចូលរួមចំណែកក្នុងការវិនិយោគ ដើម្បីការរីកចំរើននិងអភិវឌ្ឍនៅកម្ពុជា។- សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា សន្តិភាពគឺជាកត្តាធំបំផុត ដែលមិនអាចឲ្យអ្នកណាបំផ្លិចបំផ្លាញ នូវសន្តិភាពដែលកម្ពុជារកបានដោយលំបាកនោះឡើយ ហើយសន្តិភាពនេះបានធ្វើឲ្យប្រទេសកម្ពុជាទាំងមូលមានការអភិវឌ្ឍគ្រប់បែបយ៉ាងរហូតដល់សព្វថ្ងៃនេះ ជាក់ស្តែងរាជធានីភ្នំពេញនេះតែម្តង។- សម្តេចតេជោ ហ៊ុន សែន បញ្ជាក់ថា វត្តមានអ៊ុនតាក់នៅកម្ពុជា មិនទាន់អាចពន្លត់ភ្លើងសង្គ្រាមនៅកម្ពុជាបាននោះទេ។ ក្រោយអ៊ុនតាក់ដកចេញ កម្ពុជាត្រូវដោះស្រាយបញ្ហាជាច្រើន ក្នុងនោះក៏រាប់បញ្ចូលរឿងសង្គ្រាមមិនទាន់ចប់ផងដែរ។ សង្គ្រាមនៅកម្ពុជា បានបញ្ចប់នៅឆ្នាំ១៩៩៨ ដែលជាស្មារតីរួមរវាងខ្មែរនិងខ្មែរ។- សម្តេចតេជោបានបញ្ជាក់យ៉ាងច្បាស់ថា សន្តិភាពគឺត្រូវតែពង្រឹង មិនត្រូវឲ្យប្រទេសប្រតិកិរិយាណា មកបំផ្លាញបាននោះឡើយ ហើយអ្នកណាថាអ្វីក៏ថាទៅចុះ ការធ្វើនេះគឺដើម្បីភាពសុខសាន្តរបស់ប្រជាពលខ្មែរតែមួយគត់។- សម្តេចតេជោ បានថ្លែងបញ្ជាក់ថា ដើម្បីរក្សាបាននូវសិទ្ធិរស់រានមានជីវិត គឺត្រូវធ្វើយ៉ាងណាកុំអោយមានសង្រ្គាមកើតឡើង ព្រោះសិទ្ធិនេះគឺជាសេចក្តីត្រូវការរបស់មនុស្សជាតិនៅលើពិភពលោក។- សម្តេចតេជោបញ្ជាក់ថា ភាពសាំក្នុងសហគមន៍កម្ពុជា អត្រាគ្របដណ្តប់ក្បែរ៨៩ភាគរយ ខណៈកម្ពុជាបានចាក់ស្រោចវ៉ាក់សាំងលើពលរដ្ឋតាមយុទ្ធសាស្ត្រផ្ការីក។- សម្តេចតេជោ ពេញចិត្តលើភាពក្លាហានរបស់កុមារនិងយុវវ័យលើការចាក់វ៉ាក់សាំងបានច្រើននិងមានរបៀបរៀបរយ ដែលគួរអោយសរសើរ។- សម្តេចតេជោ បញ្ជាក់ជាថ្មីថា វ៉ាក់សាំងតែមួយមុខមិនទាន់គ្រប់គ្រាន់នោះទេ វិធានការ៣កុំ ៣ការពារនៅតែជាការចាំបាច់ និងយើងត្រូវរៀនរស់ជាមួយកូវីដ១៩។- សម្តេចតេជោ ហ៊ុន សែន នាយករដ្ឋមន្រ្តី បានថ្លែងថា ករណីដំបូងនៃមេរោគកូវីដ១៩ បំប្លែងថ្មីប្រភេទអូមីក្រុង លើស្រ្តីខ្មែរម្នាក់ដែលកំពុងមានផ្ទៃពោះ ធ្វើដំណើរពីប្រទេសហ្គាណាមកកម្ពុជាដើម្បីសម្រាលកូន ប៉ុន្តែទោះជាយ៉ាងណាសុខភាពរបស់ស្រ្តីរូបនេះគឺមានអាការៈធម្មតា គ្រាន់តែមានការព្រួយបារម្ភបន្តិចបន្តួចចំពោះសុខភាពកូនក្នុងផ្ទៃរបស់គាត់តែប៉ុណ្ណោះ។- សម្តេចតេជោ ហ៊ុន សែន ប្រកាសថា កំណើនសេដ្ឋកិច្ចកម្ពុជាបានបន្តងើបឡើងជាដំណាក់កាលៗ ក្រោយវិបត្តិធ្ងន់ធ្ងរនៃជំងឺកូវីដ-១៩។ សម្តេចបញ្ជាក់ថា វិស័យកសិកម្ម និងឧស្សាហកម្មនៅកម្ពុជាមិនមានការធ្លាក់ចុះនោះទេ។- សម្តេចតេជោ នៅតែរក្សាការព្យាករណ៍កំណើនសេដ្ឋកិច្ចកម្ពុជានៅ ឆ្នាំ២០២១នេះ នឹងមានកំណើនជិត៣ភាគរយ។- សម្តេចតេជោបានថ្លែងថា បើគិតតាំងពីថ្ងៃភ្ជុំបិណ្ឌរហូតមកដល់ពេលនេះ មានភ្ញៀវប្រមាណ២លាននាក់ដែលបានដើរកម្សាន្តនៅទូទាំងប្រទេសកម្ពុជា។- សម្តេចតេជោបានថ្លែងបញ្ជាក់ថា ចំណូលជាតិកើនឡើង ទោះបីជាមិនទាន់ងើបស្មើមុនកូវីដក៏ដោយ ពេលនេះយើងទទួលបាន៥០០ ទៅ៧០០ លានដុល្លារក្នុងមួយខែ ពេលកូវីដផ្ទុះខ្លាំងគឺធ្លាក់ចុះក្រោម៤០០លានដុល្លារ។- សម្តេចតេជោបានថ្លែងថា សណ្ឋាគារហៃយ៉ាត់ រីជិនស៊ី អាចនឹងទទួលថ្នាក់ដឹកនាំប្រមុខរដ្ឋ ប្រមុខរដ្ឋាភិបាល ក្នុងក្របខណ្ឌអាស៊ាន និង ដៃគូអាស៊ាន នៅពេលកម្ពុជាធ្វើជាប្រធានអាស៊ាននៅឆ្នាំ២០២២ ខាងមុខនេះ។- សម្តេចតេជោ បានអំពាវនាវអោយម្ចាស់រថយន្តដែលជ្រកក្រោមផ្លាករដ្ឋ រថយន្តចង្កូតស្តាំ មិនទាន់បានបង់ពន្ធ ត្រូវរួសរាន់មកបង់ពន្ធ ដែលនឹងទទួលបានការបញ្ចុះតម្លៃ១០ភាគរយ ប៉ុន្តែបើបង់ក្រោយថ្ងៃទី៣១ ខែធ្នូ ឆ្នាំ២០២១ គឺមិនបានទទួលការបញ្ចុះតម្លៃនោះទេ។- សម្តេចតេជោ ហ៊ុន សែន ប្រកាសថា សម្តេចនឹងសរសេរពីជីវិតនាយករដ្ឋមន្ត្រី ឲ្យសាធារណជន និងក្មេងជំនាន់ក្រោយបានដឹង ខណៈដែលជីវិតអ្នកចំការ វាសនាអ្នកស្រែ សម្តេចបានរៀបចំរួចរាល់ហើយ មានទាំងចម្រៀងថែមទៀត។- សម្តេចតេជោ ហ៊ុន សែន ប្រកាសថា ធ្វើម៉េចក៏ដោយត្រូវរក្សាឲ្យបានកំណើនសេដ្ឋកិច្ច ដើម្បីវឌ្ឍនភាពកម្ពុជា។ សម្តេចតេជោ ហ៊ុន សែនបញ្ជាក់ថា គ្រាប់បែកធ្វើឲ្យប៉ះពាល់តែមនុស្សនៅក្បែរៗនោះប៉ុណ្ណោះ តែគ្រាប់បែកសេដ្ឋកិច្ច នឹងធ្វើឲ្យប៉ះពាល់ដល់មនុស្សទូទាំងប្រទេស រាប់ទាំងក្មេងៗផងដែរ។- សម្តេចតេជោ ហ៊ុន សែន ប្រកាសថា សម្តេចនឹងដឹកនាំគណៈប្រតិភូទស្សនកិច្ចផ្លូវការនៅមីយ៉ាន់ម៉ា ដោយគ្មានការប្រែប្រួលឡើយនៅអំឡុងខែមករា ឆ្នាំ២០២២។ សម្តេចបញ្ជាក់ថា យើងមិនអាចបង្កើតទម្លាប់អាក្រក់របស់អាស៊ាននោះទេ ពេលដែលមិនពេញចិត្តសមាជិកណា មិនហៅគេចូលប្រជុំ។- សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា គោលជំហរបស់កម្ពុជាគឺនៅដដែល ទាក់ទងនឹងសមុទ្រចិនខាងត្បូង ដោយក្នុងនោះទី១ សម្តេចអំពាវនាវឲ្យភាគីពាក់ព័ន្ធទាំងអស់អនុវត្តឲ្យបាននូវកិច្ចព្រមព្រៀងនូវDOC, ទី២ ប្រទេសដែលពាក់ព័ន្ធត្រូវរកដំណោះស្រាយគ្នាដោយសន្តិវិធី និងទី៣ត្រូវខិតខំប្រឹងប្រែងសម្រេចឲ្យបាន នូវក្រមប្រតិបត្តិសមុទ្រចិនខាងត្បូងCOC ជាដើមនោះ។-សម្តេចតេជោ សម្រេចតែងតាំងឯកឧត្តមឧបនាយករដ្ឋមន្ត្រី ប្រាក់សុខុន រដ្ឋមន្ត្រីក្រសួងការបរទេស និងសហប្រតិបត្តិការធ្វើជាបេសកជន របស់ប្រធានអាស៊ាន។- សម្តេចតេជោ ហ៊ុន សែន បានបញ្ជាក់ថា ការដែលកម្ពុជាមិនអាចចេញនូវសេចក្តីថ្លែការណ៍បានកាលពីឆ្នាំ២០១២ក្នុងអំឡុងពេលដែលកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ាន។ ទាក់ទងនឹងសមុទ្រចិនខាងត្បូង គឺដោយសារតែប្រទេសខ្លះបានបង្ខិតបង្ខំឲ្យកម្ពុជាទទួលស្គាល់កោះនេះជាប្រទេសនេះ កោះនោះជារបស់ប្រទេសនោះជាដើម ហើយបែជាចោទប្រកាន់កម្ពុជាថាបានកាន់ជើងចិនទៅវិញ។

សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសព្រះរាជទានព្រះរាជសារប្រទានពរជ័យ ព្រមទាំងព្រះរាជទ្រព្យ ២ម៉ឺនដុល្លារ ជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើត

សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ នៃព្រះរាជាណាចក្រកម្ពុជា បានសព្វព្រះរាជហឫទ័យប្រោសព្រះរាជទាន ព្រះរាជសារប្រទានពរជ័យ ព្រមទាំងព្រះរាជទ្រព្យចំនួន ២ម៉ឺនដុល្លារអាមេរិក និងបាច់ផ្កាស្រស់ល្អ១កន្ត្រកជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសថ្ងៃខួបកំណើតរបស់ សម្តេចកិត្តិព្រឹទ្ធបណ្ឌិត នៅថ្ងៃទី ១៥ ខែធ្នូ ឆ្នាំ២០២១នេះ។ដោយនៅក្នុងព្រះរាជសាររបស់ សម្តេចព្រះមហាក្សត្រី ព្រះវររាជមាតាជាតិខ្មែរ មានខ្លឹមសារថា៖ « នៅក្នុងឱកាសដ៏នក្ខត្តឫក្សនៃខួបចម្រើនជន្មាយុរបស់ សម្តេចកិត្តិព្រឹទ្ធបណ្ឌិត នៅថ្ងៃទី១៥ ខែធ្នូ ឆ្នាំ២០២១ នេះ ខ្ញុំមានហឫទ័យរីករាយ សូមចូលរួមអបអរសាទរ និងសូមសម្តែងនូវការកោតសរសើរដ៏កក់ក្តៅជាទីបំផុត ជូន សម្តេចកិត្តិព្រឹទ្ធបណ្ឌិត ដែលបានបរិច្ចាគកម្លាំងកាយ-ចិត្ត និងធនធានចូលរួមក្នុងសកម្មភាពមនុស្សធម៌ កសាងជាតិ មាតុភូមិ និងប្រជារាស្ត្រកម្ពុជា។ កាយវិការដ៏ឧត្តុង្គឧត្តម ប្រកបដោយស្មារតីស្នេហាជាតិ មាតុភូមិ និងប្រជារាស្ត្រនេះ កិត្តិនាមរបស់ សម្តេចកិត្តិព្រឹទ្ធបណ្ឌិត បានល្បីរន្ទឺទទួលបានការកោតសរសើរ និងអំណរសាទរ ទាំងនៅលើឆាកជាតិ និងអន្តរជាតិ ។នៅក្នុងឱកាសដ៏ថ្លៃថ្លានេះ ខ្ញុំសូមប្រសិទ្ធពរជ័យមហាបវរសួស្តី សិរីមង្គលគ្រប់ប្រការ ជូន សម្តេចកិត្តិព្រឹទ្ធបណ្ឌិត សូមទទួលបានមហាជោគជ័យថ្មីៗទៀត ក្នុងការបម្រើជាតិ មាតុភូមិ និងប្រជារាស្ត្រកម្ពុជា និងសូមបានប្រកបតែនឹងព្រះពុទ្ធពរ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។» ។

ព្រះមហាក្សត្រ ប្រោសព្រះរាជទានព្រះរាជសារប្រទានពរជ័យជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើត

នាព្រឹកថ្ងៃទី១៤ ខែធ្នូ ២០២១ នេះ ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅអមក្រសួងព្រះបរមរាជវាំងបាននាំយកនូវ ព្រះរាជសារ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលព្រះអង្គបានសព្វព្រះរាជហឫទ័យប្រោសព្រះរាជទាន ព្រះរាជសារប្រទានពរជ័យ និងបាច់ផ្កាស្រស់ល្អ១កន្ត្រក ជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសថ្ងៃខួបកំណើតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី ១៥ ខែធ្នូ ឆ្នាំ២០២១នេះ។នៅក្នុងព្រះរាជសារ របស់ព្រះករុណា ព្រះមហាក្សត្រ មានខ្លឹមសារថា៖ «ក្នុងឱកាសដ៏នក្ខត្តឫក្ស នៃខួបចម្រើនជន្មាយុ សម្តេចកិត្តិព្រឹទ្ធបណ្ឌិត នៅថ្ងៃទី១៥ ខែធ្នូ ឆ្នាំ២០២១ នេះ ខ្ញុំមានហឫទ័យរីករាយ យ៉ាងក្រៃលែង សូមអបអរសាទរជូនពរ និងកោតសរសើរ ដ៏កក់ក្តៅជាទីបំផុត ជូន សម្តេចកិត្តិព្រឹទ្ធបណ្ឌិត ដែលជាមគ្គទេសក៍ដ៏ល្អឆ្នើមមួយរូប បានដឹកនាំសកម្មភាពកាកបាទក្រហមកម្ពុជាទទួលបានជោគជ័យល្អប្រសើរ។ ជានិច្ចកាលសម្តេចកិត្តិព្រឹទ្ធបណ្ឌិត តែងតែបំពេញការងារមនុស្សធម៌ប្រកបដោយស្មារតីទទួលខុសត្រូវខ្ពស់ បានខិតខំអស់ពីកម្លាំងកាយ-ចិត្ត បំពេញភារកិច្ចជូនប្រជាជាតិ និងប្រជារាស្ត្រកម្ពុជា ដែលទទួលរងគ្រោះដោយគ្រោះមហន្តរាយផ្សេងៗ នៅទូទាំងព្រះរាជាណាចក្រកម្ពុជា។ ខ្ញុំសូមជូនពរបវរមហាប្រសើរ ជូន សម្តេចកិត្តិព្រឹទ្ធបណ្ឌិត សូមទទួលបានជោគជ័យថ្មីៗ បន្ថែមទៀត ក្នុងបេសកកម្មដ៏ឧត្តុង្គឧត្តមបម្រើប្រជាជាតិ មាតុភូមិ និងប្រជារាស្ត្រកម្ពុជា និងសូមបានប្រកបតែនឹងព្រះពុទ្ធពរ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។»

សម្តេចតេជោ ហ៊ុន សែន អញ្ជើញចូលរួមក្នុងពិធីក្រុងពាលីបួងសួង និងសំណេះសំណាលជាមួយក្រុមការងារថតខ្សែភាគយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី

ភ្នំពេញ ៖ ខ្សែភាគយន្តភាគខ្នាតធំ រឿងកូនប្រុសក្រោមពន្លឺព្រះចន្ទពេញបូណ៌មី ត្រូវបានប្រារព្វពិធីក្រុងពាលី ចំរើនព្រះបរិត្តតាមទំនៀមទម្លាប់ប្រពៃណីព្រះពុទ្ធសាសនា នៅព្រឹកថ្ងៃចន្ទ ខែមគិសិរ ឆ្នាំឆ្លូវ ត្រីស័ក ពុទ្ធសករាជ២៥៦៥ ត្រូវនឹងថ្ងៃទី១៣ ខែធ្នូ ឆ្នាំ២០២១ ដើម្បីសុំសេចក្តីសុខសេចក្តីចម្រើនដល់អ្នកចូលរួមទាំងអស់ និងជាកិច្ចចាប់ផ្តើមដំណើរការផលិតខ្សែភាពយន្តខ្នាតធំនេះជាផ្លូវការ។សូមបញ្ជាក់ថា ក្រោយទទួលបានការអនុញ្ញាតដ៏ខ្ពងខ្ពស់ពីសម្តេចតេជោ ហ៊ុន សែន នាយករដ្ឋមន្រ្តី គណះកម្មការបានជ្រើសរើសអ្នកនិពន្ធចំនួន៥រូប ដើម្បីរៀបចំកែសំរួលខ្លឹមសារអត្ថបទនិពន្ធ ល្ខោនវិទ្យុ ទៅជាអត្ថបទនិពន្ធភាពយន្តសរុបមាន ៤៤ភាគ ស្មើនិង៦៥៣ឆាក។ បន្ទាប់ពីបញ្ចប់ការងារនេះ គណះកម្មការបានបង្កើតក្រុមការងារពិនិត្យ កែលម្អ ដោយបន្សីនឹងសាច់រឿងឲ្យស្របទៅនឹងបរិបទសម័យកាល។ ដើម្បីក្តាប់បានពីកត្តាប្រវត្តិសាស្រ្ត និងភូមិសាស្រ្ត តួអង្គសំខាន់ៗ ពាក់ព័ន្ធ ក្រុមការងារបានប្រឹក្សាយោបល់នៅក្នុងគណះកម្មការ ដើម្បីជាការបំពេញនូវកង្វះខាត និងប្រសិទ្ធភាពក្នុងការអនុវត្តផលិត។ ក្រុមការងារគ្រប់គ្រងការផលិត បានចុះសិក្សាពិនិត្យជ្រើសរើសទីតាំងសម្រាប់ថតចំនួន ១០២ទីតាំង ដែលស្ថិតនៅក្នុងខេត្តកំពង់ធំ កំពង់ចាម ត្បូងឃ្មុំ កំពង់ស្ពឺ និងរាជធានីភ្នំពេញ ដើម្បីរៀបចំតុបតែងបន្ថែមជាទីតាំងថត ឲ្យស្របនឹង បរិយាកាស ស្ថានភាពភូមិសាស្រ្ត និងជីវភាពរស់នៅនាសម័យកាលនោះ។ លើសពីនេះ យោងតាមអនុសាសន៍ដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី គណះកម្មការបានរៀបចំ សាងសង់បន្ទាយកោះថ្ម បន្ទាយទ័ពលន់នល់នៅទន្លេបិទ និងភូមិប្រជាជន នៅមជ្ឈមណ្ឌលហ្វឹកហ្វឺន បញ្ជាការដ្ឋានអង្គរក្ស (ភ្នំស្រង់) ដែលសំណង់ទាំងនោះ មិនត្រឹមតែសម្រាប់ថតប៉ុណ្ណោះទេ តែជាសំណង់ដែលមានលក្ខណៈរឹងមាំ ដើម្បីទុកជាទីតាំងប្រវត្តិសាស្រ្ត ក្នុងការសិក្សា ស្រាវជ្រាវរបស់សិក្ខាកាម បញ្ជាការដ្ឋានអង្គរក្ស និងកងយោធពលខេមរភូមិន្ទ នៅពេលអនាគត។ពិធីក្រុងពាលីតាមទំនៀមទម្លាប់បានប្រព្រឹត្តិទៅតាមគន្លងព្រះពុទ្ធសាសនាដោយមានការបូងសួងសុំសេចក្តីសុខ សេចក្តីចំរើន ពីម្ចាស់ទឹកម្ចាស់ដីនៅគ្រប់ទីកន្លែងបំពេញការងារ ក៏ដូចជាសិល្បករជាតួសម្តែងទាំងអស់ចាប់ផ្តើមដំណើរការថតចាប់ពីពេលនេះតទៅទទួលបានជោគជ័យដោយមានការអញ្ជើញជាអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ បើតាមរបាយការណ៍របស់ ឯកឧត្តមហ៊ឹម សុទិត្យា រដ្ឋលេខាធិការក្រសួងព័ត៌មាន និងជាប្រធានគណះកម្មការផលិតភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី បានឲ្យដឹងថា ក្រុមការងារបានជ្រើសរើសតួសំដែងសំខាន់ៗចំនួន ១០៣នាក់ តួប្រជាជនយ៉ាងតិច៥០០នាក់ ព្រមទាំងកងកម្លាំង៥០០នាក់ផ្សេងទៀត ដើម្បីចូលរួមសំដែងក្នុងឈុតឆាកធំៗ ។ ចំពោះឧបករណ៍បច្ចេកទេសថត មានការគាំទ្រពីលោកជំទាវ ហ៊ុន ម៉ាណា អគ្គនាយិកា អគ្គនាយកដ្ឋានវិទ្យុ និងទូរទស្សន៍បាយ័ន។តាមផែនការការងារផលិតរបស់គណះកម្មការ ការផលិតភាពយន្តភាគ ទាំង៤៤ភាគនេះ ប្រើពេលរយៈពេល១២ខែកន្លះយ៉ាងតិច ហើយការកាត់តដំឡើងរូបភាព និងត្រូវបញ្ចប់មុនពាក់កណ្តាលឆ្នាំ២០២៣ខាងមុខ។(ប្រសាសន៍សម្តេច)សំណេះសំណាលជាមួយ ផលិតករ សិល្បះករ សិល្បះការិនីជាតួសម្តែង និងក្រុមការងារបច្ចេកទេសទាំងអស់ សម្តេចតេជោ ហ៊ុន សែន បានវាយតម្លៃខ្ពស់ចំពោះក្រុមការងារគ្រប់ផ្នែកទាំងអស់ ដែលបានខិតខំសំរិទ្ធសំរាំងចងក្រងកែលម្អខ្លឹមសារសាច់រឿង ដែលផ្តើមចេញពីល្ខោននិយាយមកកាន់ការផលិតភាពយន្តរឿងភាគ ការខិតខំរកតួសម្តែង ការសិក្សាស្រាវជ្រាវរកនូវសម្ភារៈយុទ្ធោបរណ៍ ទីតាំងភូមិសាស្រ្តប្រវត្តសាស្រ្ត ដើម្បីឈានទៅថតភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី នាពេលដ៏ខ្លីខាងមុខ ។ សម្តេចតេជោ បានរម្លឹកថា កន្លងមកមានថ្នាក់ដឹកនាំក្រុមហ៊ុនផលិតកុន ហូលីវូដ បានមកស្នើសុំសម្តេចដើម្បផលិតភាពយន្តភាគ រឿងកូនប្រុសក្រោមពន្លឺព្រះចន្ទពេញបូណ៌មី នេះម្តងរួចមកហើយ ប៉ុន្តែសម្តេចមិនអនុញ្ញាតឲ្យផលិតនោះទេ ដោយសាតែមិនអាចយល់បានស៊ីជម្រៅដល់ដំណើរសាច់រឿងពិត និងប្រវត្តិសាស្រ្តរបស់ប្រទេស ពិសេសទាក់ទិនទៅនឹងខ្សែជីវិតដ៏ជ្រាលជ្រៅ និងភាពជាក់ស្តែងរបស់លោកទាំងពីរតែម្តង។ ទោះយ៉ាងណាសម្តេចតេជោ ស្នើដល់អ្នកដឹកនាំរឿង និងក្រុមការងារបច្ចេកទេសទាំងអស់ ត្រូវបន្តសិក្សាស្រាវជ្រាវឲ្យបានល្អិតល្អន់ថែមទៀត ព្រោះសាច់រឿងទាំងមូលវាផ្តោត ទៅលើប្រវត្តិសាស្រ្តពិតៗរបស់ប្រទេស ពោលគឺឲ្យសមស្របនឹងអ្វីដែលកើតឡើងពិតក្នុងសម័យកាលនោះ បើទោះបីជាខ្លឹមសារទាំងស្រុងនៃផលិតភាពយន្តនេះ សម្តេចតេជោ វាយតម្លៃថា អាចគ្របដណ្តប់បាននូវដំណើររឿង និងខ្លឹមសារពិតជាក់ស្តែងបានត្រឹមតែប្រមាណ ៦០ភាគរយ ក៏ដោយ។សូមបញ្ជាក់ថា រឿងកូនប្រុសក្រោមពន្លឺព្រះចន្ទពេញបូណ៌មី ដែលចាត់ទុកថា ជាខ្សែភាពយន្តរឿងភាគខ្នាតធំដំបូងបំផុតក្នុងប្រវត្តិសាស្រ្តរបស់ប្រទេសកម្ពុជា ដែលឆ្លុះបញ្ចាំងពីតថភាពជាក់ស្តែងក្នុងសម័យកាលមួយដែលប្រទេសកម្ពុជាកំពុងរងវិនាសកម្មដោយសារសង្រ្គាម កាប់សម្លាប់ និងក៏បានបង្ហាញឲ្យឃើញពីខ្សែជីវិតពិតនៃដំណើរតស៊ូរបស់សម្តេចតេជោ ហ៊ុន សែន ក្នុងដំណើរសង្រ្គោះជាតិមាតុភូមិ និងរឿងរ៉ាវជីវិតគូរនៃសម្តេចទាំងទ្វេរផងដែរ ក្នុងគ្រាប្រទេសកម្ពុជាជួបគ្រោះកលយុគ ។ចំពោះការចំណាយក្នុងការផលិតភាពយន្តដែលត្រូវបាននិពន្ធ និងដឹកនាំ ផលិតឡើងដោយស្នាដៃកូនខ្មែរទាំងអស់នេះផងដែរ ក៏បានចូលរួមឧបត្តម្ភគាំទ្រដោយស្ម័គ្រចិត្តពីសប្បុរសជនមួយចំនួន ដែលកំពុងបំពេញការងារ រកស៊ីក្នុងស្រុក ដើម្បីបង្ហាញពីការគោរព ស្រលាញ់ និងដឹងគុណចំពោះតម្លៃនៃសុខសន្តិភាពរបស់ប្រទេសដែលមេដឹកនាំកម្ពុជារូបនេះបានរកមកបានដោយលំបាក និងត្រូវបានការពារយ៉ាងរឹងមាំ នៅក្នុងពេលបច្ចុប្បន្ន ជាមួយនឹងការជឿងជាក់ទៅអនាគតនូវការបន្តរីកចំរើនរបស់ប្រទេសមួយនេះ។ហើយស្នាដៃថ្មីដែលផលិតឡើងជាខ្សែវីដេអូនេះផងដែរ គឺជាការឆ្លើយតបតាមសំណូមពរដ៏ច្រើនលើសលុបពីអ្នក និយមតាមដានស្តាប់ការចាក់ផ្សាយតាមវិទ្យុនាពេលកន្លងមកនូវភាគនិទានដែលបានផលិតជាល្ខោននិយាយរឿង «កូនប្រុសក្រោមពន្លឺព្រះចន្ទពេញបូណ៍មី» ។

បណ្ដាញសង្គម

ព័ត៌មានថ្មីៗ

Nottingham Forest តែងតាំង Oliver Glasner ជាគ្រូបង្វឹកថ្មី ក្លាយជាគ្រូទី៥ ក្នុងរយៈពេលមិនដល់មួយឆ្នាំរបស់ក្លិប

មន្ដ្រីជាន់ខ្ពស់ក្រសួងទេសចរណ៍ ប្ដេជ្ញាជំរុញសកម្មភាពកីឡាទេសចរណ៍ ដើម្បីផ្សព្វផ្សាយពីតំបន់បេតិកភណ្ឌ

ត្រឹមឆមាសទី១ឆ្នាំនេះ ក្រុមហ៊ុនធ្វើអាជីវកម្មរ៉ែមាសនៅកម្ពុជា ផលិតមាសបានចំនួន ២០តោន

ការប្រឡងសញ្ញាបត្រមធ្យមសិក្សាបឋមភូមិរៀបចំឡើងរយៈពេលពីរថ្ងៃមាន ១១មុខវិជ្ជា បានបិទបញ្ចប់នៅថ្ងៃនេះ

មន្រ្តីជំនាញក្រសួងបរិស្ថាន ចាត់វិធានការឱ្យឈប់មានការចាក់សំរាម នៅទីលានទុកដាក់សំរាម១កន្លែងនៅក្នុងស្រុកស្ទឹងហាវ ខេត្តព្រះសីហនុ បន្ទាប់ពីមានសំណល់រាវ ហូរចេញចូលតំបន់អូរធម្មជាតិ

ឯកឧត្តម ទេសរដ្ឋមន្រ្តី គន់ គីម ដឹកនាំកិច្ចប្រជុំស្តីពីសកម្មភាពការងារគ្រប់គ្រងគ្រោះមហន្តរាយប្រចាំឆមាសទី១ និងទិសដៅបន្តអនុវត្តឆមាសទី២ ឆ្នាំ២០២៦

ផ្លូវជាតិលេខ៧ នឹងចូលរួមផ្តល់ផលចំណេញសេដ្ឋកិច្ចជាង ១៥% នៃកំណើនសេដ្ឋកិច្ចជាតិ

បាល់ ១១ ម៉ែត្រលែងជា «ល្បែងសំណាង» ខណៈក្រុមធំៗផ្តោតលើវិទ្យាសាស្ត្រ និងចិត្តសាស្ត្រនៅ World Cup 2026

រាជរដ្ឋាភិបាលកំពុងគិតគូរពង្រឹងប្រព័ន្ធផ្លូវដែកនិងអភិវឌ្ឍផ្លូវទឹកបន្ថែមដើម្បីពង្រីកវិស័យដឹកជញ្ជូនកម្ពុជា

សម្ដេចធិបតី៖ រាជរដ្ឋាភិបាលតែងតែចាត់ទុក “ផ្លូវ” ជា សរសៃឈាមនៃសេដ្ឋកិច្ច

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

សម្ដេចពិជ័យ៖ អាវុធ និងសម្ភារៈរបស់អាមេរិកប្រមូលបានបណ្ដើរៗហើយ គ្រោងកម្ទេចចោល

អង្គការសុខភាពពិភពលោកនិយាយថា យើងអាចបញ្ចប់ជំងឺរាតត្បាតនៅឆ្នាំ២០២២

អ្នកស្លាប់ដោយសារឆេះរថយន្តដឹកប្រេងឥន្ធនៈនៅហៃទីកើនឡើងដល់ ៧៥នាក់

WHO រំពឹងថានឹងមានករណីឆ្លងវីរុស Omicron ធ្ងន់ធ្ងរ ដោយព្រមានទល់នឹងការចាត់ទុកថាជំងឺប្រភេទនេះស្រាល

អង្គការសុខភាពពិភពលោកនិយាយថា វីរុស Omicron មាននៅក្នុងប្រទេសភាគច្រើន

ក្រុមហ៊ុន Pfizer និយាយថា ឱសថគ្រាប់ COVID-19 មានប្រសិទ្ធភាពប្រឆាំងវីរុស Omicron

ប្រសាសន៍សំខាន់ៗសម្ដេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

សម្ដេចពិជ័យ៖ អាវុធ និងសម្ភារៈរបស់អាមេរិកប្រមូលបានបណ្ដើរៗហើយ គ្រោងកម្ទេចចោល

អង្គការ​សុខភាព​ពិភពលោក​និយាយ​ថា យើង​អាច​បញ្ចប់​ជំងឺ​រាតត្បាត​នៅ​ឆ្នាំ២០២២

អ្នក​ស្លាប់​ដោយសារ​ឆេះ​រថយន្ត​ដឹក​ប្រេង​ឥន្ធនៈ​នៅ​ហៃទី​កើន​ឡើង​ដល់ ៧៥​នាក់

WHO រំពឹង​ថា​នឹង​មាន​ករណី​ឆ្លង​វីរុស Omicron ធ្ងន់ធ្ងរ ដោយ​ព្រមាន​ទល់នឹង​ការ​ចាត់ទុកថា​ជំងឺ​ប្រភេទ​នេះ​ស្រាល

អង្គការ​សុខភាព​ពិភពលោក​និយាយ​ថា វីរុស Omicron មាននៅ​ក្នុង​ប្រទេស​ភាគ​ច្រើន

ក្រុមហ៊ុន Pfizer​ និយាយ​ថា ឱសថ​គ្រាប់ COVID-19 មាន​ប្រសិទ្ធភាព​ប្រឆាំង​វីរុស Omicron

ប្រសាសន៍សំខាន់ៗសម្ដេចតេជោ​ ហ៊ុន​ សែន​ ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អង្គការសុខភាពពិភពលោកនិយាយថា យើងអាចបញ្ចប់ជំងឺរាតត្បាតនៅឆ្នាំ២០២២

អ្នកស្លាប់ដោយសារឆេះរថយន្តដឹកប្រេងឥន្ធនៈនៅហៃទីកើនឡើងដល់ ៧៥នាក់

WHO រំពឹងថានឹងមានករណីឆ្លងវីរុស Omicron ធ្ងន់ធ្ងរ ដោយព្រមានទល់នឹងការចាត់ទុកថាជំងឺប្រភេទនេះស្រាល

អង្គការសុខភាពពិភពលោកនិយាយថា វីរុស Omicron មាននៅក្នុងប្រទេសភាគច្រើន

ក្រុមហ៊ុន Pfizer និយាយថា ឱសថគ្រាប់ COVID-19 មានប្រសិទ្ធភាពប្រឆាំងវីរុស Omicron

ប្រសាសន៍សំខាន់ៗសម្ដេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការ សណ្ឋាគារ ហៃយ៉ាត់ រីជិនស៊ី ភ្នំពេញ