BTV NEWS

គណៈបញ្ជាការឯកភាពរាជធានី បើកការចុះបង្ក្រាបទីតាំងឆបោកអនឡាញ និងគ្រឿងញៀននៅខណ្ឌមានជ័យ ឃាត់ជនបរទេស៥៥នាក់

នគរបាលរាជធានីភ្នំពេញបង្ហាញមុខជនសង្ស័យ ១១នាក់ករណីហិង្សាវាយកម្ទេចរថយន្តក្បែរវត្តភ្នំ

ជនដែលឈ្លោះជាមួយជនបរទេស ក្នុងបណ្ដាញសង្គម គឺជាជនអនាថា គ្មានទីលំនៅពិតប្រាកដ

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

សន្តិសុខ និង សង្គម

មន្ទីរបញ្ចកោណ៖ អាមេរិក គ្មានបំណងស្វែងរកការធ្វើសង្រ្គាមជាមួយអ៊ីរ៉ង់ទេ ក្រោយការវាយប្រហារនៅហ្ស៊កដានី

រដ្ឋមន្ត្រីការពារជាតិអាមេរិកលោក ឡយ អូស្ទីន (Lloyd Austin)កាលពីថ្ងៃចន្ទ បានប្តេជ្ញាថា សហរដ្ឋអាមេរិកនឹងចាត់វិធានការចាំបាច់ទាំងអស់ ដើម្បីការពារកងទ័ពរបស់ខ្លួនក្រោយការវាយប្រហារដោយយានដ្រូននៅប្រទេសហ្ស៊កដានីដោយពួកសកម្មប្រយុទ្ធគាំទ្រដោយអ៊ីរ៉ង់ទោះជារដ្ឋបាលប្រធានាធិបតីលោក Joe Biden បានសង្កត់ធ្ងន់ថា ខ្លួនមិនស្វែងរកការធ្វើសង្រ្គាមជាមួយអ៊ីរ៉ង់ក៏ដោយ។ ការវាយប្រហារកាលពីថ្ងៃអាទិត្យបានសម្លាប់ទាហានអាមេរិកបីនាក់ និងបណ្ដាលឲ្យទាហានជាង ៤០នាក់ រងរបួស។ នេះគឺជាការវាយប្រហារដ៏សាហាវលើកដំបូងប្រឆាំងនឹងទាហានអាមេរិក ចាប់តាំងពីសង្គ្រាមអ៊ីស្រាអែល និងក្រុមហាម៉ាស បានផ្ទុះឡើងកាលពីខែតុលាឆ្នាំ២០២៣ និងកត់សម្គាល់ការកើនឡើងដ៏កាន់តែខ្លាំងក្នុងភាពតានតឹងដែលបានគ្របសង្កត់លើតំបន់មជ្ឈិមបូព៌ា។ លោក អូស្ទីន (Austin)បាននិយាយនៅឯមន្ទីរបញ្ចកោណថា លោកសុំបញ្ចេញកំហឹង និងទុក្ខព្រួយរបស់លោកចំពោះការស្លាប់របស់ទាហានដ៏ក្លាហានបីនាក់របស់អាមេរិកនៅហ្ស៊កដានី និងសម្រាប់កងទ័ពផ្សេងទៀតដែលរងរបួស។ លោក Austin បានបន្ថែមនៅពេលចាប់ផ្តើមជំនួបជាមួយអគ្គលេខាធិការអង្គការណាតូ លោក Jens Stoltenberg នៅឯមន្ទីរបញ្ចកោណថា លោកប្រធានាធិបតី និងរូបលោកនឹងមិនអត់ធ្មត់ចំពោះការវាយប្រហារលើកងកម្លាំងសហរដ្ឋអាមេរិកទេ ហើយយើងនឹងចាត់វិធានការចាំបាច់ទាំងអស់ដើម្បីការពារសហរដ្ឋអាមេរិក និងកងទ័ពរបស់យើង។ចំណែករដ្ឋមន្ត្រីការបរទេសអាមេរិក លោក Antony Blinken បាននិយាយថា ដូចដែលលោកប្រធានាធិបតីបាននិយាយកាលពីម្សិលមិញ យើងនឹងឆ្លើយតប ហើយការឆ្លើយតបនោះអាចមានច្រើនកម្រិត ជាដំណាក់កាល និងបន្តគ្រប់ពេលវេលា។ប៉ុន្តែក្រុមមន្ត្រីនៅទូទាំងរដ្ឋបាលលោកBiden បាននិយាយថា ពួកគេមិនចង់ឱ្យស្ថានការណ៍រីកកាន់តែធំទៀតនោះទេ។ មន្ទីរបញ្ចកោណ បានណែនាំថា អ៊ីរ៉ង់ក៏មិនចង់បានសង្រ្គាមដែរ។ អ្នកនាំពាក្យមន្ទីរបញ្ចកោណលោកស្រីសាប្រ៊ីណាស៊ីញ(Sabrina Singh)បានប្រាប់អ្នកសារព័ត៌មានថា យើងពិតជាមិនស្វែងរកសង្រ្គាមទេ ហើយនិយាយដោយត្រង់ទៅ យើងមើលមិនឃើញថាអ៊ីរ៉ង់ចង់ធ្វើសង្រ្គាមជាមួយសហរដ្ឋអាមេរិកទេ ។ លោកស្រីបានបន្ថែមថា មន្ទីរបញ្ចកោណជឿថា អ៊ីរ៉ង់ក៏មិនចង់មានសង្គ្រាមដែរ៕

ករសិករបារាំងពោពេញដោយកំហឹងបិទផ្លូវឡោមព័ទ្ធទីក្រុងប៉ារីស ប្រឆាំងនឹងការចំណាយខ្ពស់ និងការនាំចូលមានតម្លៃថោក

ត្រាក់ទ័រជាច្រើនគ្រឿងចតចម្រង់ជួរជាខ្សែយ៉ាងវែង បានបិទផ្លូវហាយវេនៅជិតទីក្រុងប៉ារីស និងទូទាំងប្រទេសបារាំងកាលពីថ្ងៃចន្ទ ខណៈក្រុមកសិករបានគំរាមដល់អ្វីដែលត្រូវបានហៅថាជាការឡោមព័ទ្ធ ទីក្រុងប៉ារីស។ ការបិទផ្លូវសរុបចំនួន ២៥ខ្សែ បានកើតឡើងនៅទូទាំងប្រទេស ដោយមានបាតុករប្រមាណ១.៧០០នាក់ ប្រមូលផ្ដុំតាមផ្លូវនានា ស្របពេលពួកគេបន្តការតវ៉ាប្រឆាំងនឹងការចំណាយខ្ពស់សម្រាប់ជីវភាពរស់នៅប្រចាំថ្ងៃ ហើយទំនិញនាំចូលមានតម្លៃថោក និងផលប៉ះពាល់នៃគោលនយោបាយបម្រែបម្រួលអាកាសធាតុ ជាដើម។ លោក ផាកាល់ ឌីប្រេស (Pascal Desprez) ជាកសិករម្នាក់មានវ័យ៦៥ ឆ្នាំ ដែលធ្វើការក្នុងវិស័យកសិកម្មអស់រយៈពេល ៤២ ឆ្នាំបាននិយាយនៅលើផ្លូវ A10 ក្បែរទីក្រុងប៉ារីសថា យើងនៅទីនេះដោយសារតែយើងមិនសប្បាយចិត្តនឹងគោលនយោបាយកសិកម្ម។ ក្រុមកសិករនិយាយថាពួកគេកំពុងត្រូវបានគេច្របាច់កដោយបទប្បញ្ញត្តិ ហើយអះអាងថារបៀបរស់នៅតាមជនបទកំពុងប្រឈមនឹងការដួលរលំ។ ការតវ៉ាដែលកំពុងបន្តនៅទូទាំងប្រទេសដោយក្រុមកសិករបារាំងឥឡូវនេះកំពុងក្លាយជាវិបត្តិធ្ងន់ធ្ងរសម្រាប់លោកនាយករដ្ឋមន្ត្រីថ្មី ហ្កាប្រៀល អាតាល់ (Gabriel Attal)ដែលទើបតែបម្រើការងារមិនទាន់បានមួយខែផងនោះ។ រដ្ឋមន្ត្រីក្រសួងកសិកម្ម លោក ម៉ាក ហ្វេ ណូ (Marc Fesneau) និយាយថា បំណងប្រាថ្នារបស់រដ្ឋាភិបាលគឺចង់ដើរចេញពីវិបត្តិ និងផ្តល់ការឆ្លើយតបជាក់លាក់។ ក្រុមរដ្ឋមន្ត្រីបានប្រកាសរួចហើយពីវិធានការថ្មីមួយចំនួន រួមទាំងសំណងដើម្បីទូទាត់ពន្ធលើពន្ធប្រេងសម្រាប់កសិកម្ម ជាការកាត់បន្ថយស្តង់ដារបរិស្ថាន និងការសម្រួលបទប្បញ្ញត្តិ។ ក្រុមកសិករក៏ចង់បិទផ្សារបន្លែ និងផ្លែឈើលក់ដុំដ៏ធំនៅជាយក្រុងប៉ារីសផងដែរ ប៉ុន្តែរដ្ឋមន្ត្រីមហាផ្ទៃបាននិយាយថា ការធ្វើបែបនេះ នឹងក្លាយជាបន្ទាត់ក្រហមសម្រាប់រដ្ឋាភិបាល ហើយនគរបាលចំនួន ១៥.០០០ នាក់ត្រូវបានដាក់ពង្រាយកាលពីថ្ងៃចន្ទ ដើម្បីតាមដានសកម្មភាពតវ៉ាទាំងឡាយ៕

ក្រុមមូស្លីមនៅអាមេរិក រិះគន់លោកស្រី Pelosi ដែលថាការតវ៉ាបទឈប់បាញ់ហ្កាហ្សា ទាក់ទងនឹងរុស្ស៊ី

ក្រុមមូស្លីមអាមេរិកមួយក្រុមបានរិះគន់អតីតប្រធានសភាតំណាងរាស្រ្ត លោកស្រី នែនស៊ី ផេឡូស៊ី (Nancy Pelosi) កាលពីថ្ងៃអាទិត្យ (២៨ មករា) បន្ទាប់ពីលោកស្រី បានលើកឡើងដោយមិនផ្តល់ភស្តុតាងថា ក្រុមអ្នកតវ៉ាមួយចំនួនដែលទាមទារបទឈប់បាញ់នៅតំបន់ហ្កាហ្សា អាចជាប់ពាក់ព័ន្ធនឹងប្រទេសរុស្ស៊ី និងបានជំរុញឱ្យការិយាល័យស៊ើបអង្កេតសហព័ន្ធ FBI ធ្វើការស៊ើបអង្កេត។ការអត្ថាធិប្បាយរបស់អតីតប្រធានសភាតំណាងរាស្រ្តរូបនេះត្រូវបានច្រានចោលថាជា «ការលាបពណ៌ដែលមិនមានភស្តុតាង» ដោយក្រុមប្រឹក្សាទំនាក់ទំនងអាមេរិក-អ៊ីស្លាម (CAIR) ដែលបាននិយាយថា ការលើកឡើងបែបនេះគឺជាការបន្ទាបបន្ថោកប្រជាជនប៉ាឡេស្ទីន។លោកស្រី ផេឡូស៊ី បានធ្វើការលើកឡើងនេះនៅក្នុងបទសម្ភាសន៍របស់ទូរទស្សន៍ CNN បន្ទាប់ពីលោកស្រីត្រូវបានគេសាកសួរថា តើការប្រឆាំងទៅនឹងគោលនយោបាយរបស់លោកប្រធានាធិបតី ចូ បៃដិន (Joe Biden) ក្នុងសង្គ្រាមនៅហ្កាហ្សា អាចធ្វើឱ្យប៉ះពាល់ដល់គណបក្សប្រជាធិបតេយ្យនៅក្នុងការបោះឆ្នោតប្រធានាធិបតីនៅខែវិច្ឆិកា ដែរឬទេ។ការអត្ថាធិប្បាយរបស់លោកស្រី ផេឡូស៊ី គឺជាលើកទីមួយហើយដែលសមាជិកសភាអាមេរិកដ៏លេចធ្លោម្នាក់បានចោទប្រកាន់មេដឹកនាំរុស្ស៊ី ថាបានគាំទ្រក្រុមបាតុករអាមេរិក ដែលអំពាវនាវឱ្យមានបទឈប់បាញ់៕

រដ្ឋអាហ្វ្រិកខាងលិចចំនួនបី ដែលដឹកនាំដោយរបបយោធាបានចាកចេញពីប្លុកតំបន់ ECOWAS

ប្រទេសនីហ្សេ ម៉ាលី និងបួគីណាហ្វាសូ ដែលជារដ្ឋអាហ្វ្រិកខាងលិចចំនួនបី ដឹកនាំដោយយោធា បាននិយាយកាលពីថ្ងៃអាទិត្យ (២៨ មករា) ថាពួកគេកំពុងចាកចេញជាបន្ទាន់ពីសហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) ដែលជាប្លុកសេដ្ឋកិច្ចក្នុងតំបន់ដែលបានជំរុញឱ្យបណ្ដាប្រទេសទាំងនោះត្រឡប់ទៅការគ្រប់គ្រងលទ្ធិប្រជាធិបតេយ្យវិញ។ការសម្រេចរបស់រដ្ឋទាំងបី ដែលត្រូវបានប្រកាសនៅក្នុងសេចក្តីថ្លែងការណ៍រួមក្នុងពេលដំណាលគ្នានៅលើប៉ុស្តិ៍ទូរទស្សន៍ជាតិរបស់ពួកគេនេះ គឺជាការប៉ះទង្គិចដល់កិច្ចខិតខំប្រឹងប្រែងធ្វើសមាហរណកម្មក្នុងតំបន់របស់ប្លុក បន្ទាប់ពីខ្លួនបានផ្អាកសមាជិកភាពរបស់ប្រទេសទាំងនេះ ក្រោយការធ្វើរដ្ឋប្រហារ។ជំហាននេះអាចធ្វើឲ្យប្លុក ECOWAS កាន់តែចុះខ្សោយបន្ថែមទៀត ខណៈខ្លួនជួបការលំបាកក្នុងការទប់ស្កាត់ការដកថយតាមបែបប្រជាធិបតេយ្យនៅក្នុងតំបន់អាហ្វ្រិកខាងលិច។ ជាការឆ្លើយតបទៅនឹងការដកខ្លួននេះ ប្លុក ECOWAS បាននិយាយថា ខ្លួនមិនទាន់ទទួលបានការជូនដំណឹងជាផ្លូវការណាមួយអំពីការចាកចេញរបស់ប្រទេសទាំងបីនេះទេ ហើយបានបដិសេធការអត្ថាធិប្បាយបន្ថែម។ប្លុកអាហ្រ្វិកខាងលិចមួយនេះធ្លាប់បាននិយាយថា ខ្លួនមិនទទួលស្គាល់រដ្ឋាភិបាលដែលដឹកនាំដោយយោធាឡើយ ដោយប្តេជ្ញាថាការធ្វើរដ្ឋប្រហារនឹងមិនអាចអត់ឱនបានទៀតទេបន្ទាប់ពីការកាន់កាប់យោធានៅក្នុងប្រទេសម៉ាលី បួគីណាហ្វាសូ និងហ្គីណេ និងការប៉ុនប៉ងធ្វើរដ្ឋប្រហារនៅហ្គីណេប៊ីស្សូ៕

ចំហេះព្រៃបំផ្លាញឧទ្យានជាតិរបស់ប្រទេសអាហ្សង់ទីន

ប្រព័ន្ធផ្សព្វផ្សាយក្នុងស្រុក បានរាយការណ៍ថា ចំហេះព្រៃដែលនៅតែពុំអាចគ្រប់គ្រងបាន បានបំផ្លាញ ផ្ទៃដី ៥៧៧ហិកតា នៅឧទ្យានជាតិ ឡូស អាលឺសេស(Los Alerces)។ ទីភ្នាក់ងារព័ត៌មានផ្លូវការ Telam បានរាយការណ៍ដោយដកស្រង់សម្តី លោក ម៉ារីយ៉ូ ខាដេនណាស(Mario Cardenas) ប្រធាននាយកដ្ឋានពន្លត់អគ្គីភ័យ ទំនាក់ទំនង និងសង្គ្រោះបន្ទាន់នៃឧទ្យានជាតិ Los Alerces បាននិយាយថា អគ្គិភ័យបានប៉ះពាល់ដល់តំបន់មួយនៅជិតតំបន់ សេនទីនីឡា( Centinela) ក្នុងឧទ្យានជាតិ Los Alerces នៅខេត្ត ជូប៊ុត (Chubut) ភាគខាងត្បូងប្រទេសអាហ្សង់ទីន។លោក Cardenas និយាយថា ហានិភ័យនៃអគ្គិភ័យគឺស្ថិតនៅក្នុង កម្រិតខ្លាំងក្លា ហើយស្ថានភាពអាកាសធាតុ មិនអំណោយផល សម្រាប់ការពន្លត់អគ្គិភ័យ ដោយសារតែមានខ្យល់ និងសីតុណ្ហភាពខ្ពស់។ឧទ្យានជាតិ Los Alerces ជាជម្រកនៃព្រៃស្រល់ដែលមានអាយុកាលរាប់ពាន់ឆ្នាំមកហើយ ដែលត្រូវបានបង្កើតឡើងក្នុងឆ្នាំ ១៩៣៧ ហើយត្រូវបានប្រកាសជាតំបន់បេតិកភណ្ឌធម្មជាតិពិភពលោក របស់អង្គការយូណេស្កូ ក្នុងឆ្នាំ ២០១៧ ។

ប្រជាជនប៉ាឡេស្ទីន កាន់តែច្រើនបានភៀសខ្លួន ខណៈការប្រយុទ្ធនៅភាគខាងត្បូងហ្កាហ្សា កាន់តែខ្លាំងក្លា

ក្រសួងសុខាភិបាលហ្កាហ្សាបានព្រមានកាលពីថ្ងៃអាទិត្យ (២៨ មករា) ថាអគារវេជ្ជសាស្ត្រជាច្រើនប្រឈមនឹងការដួលរលំនៅទីក្រុង ខាន់ យ៉ូនីស (Khan Younis) ភាគខាងត្បូងហ្កាហ្សា ដែលឥឡូវនេះជាចំណុចផ្តោតសំខាន់នៃការវាយលុករបស់អ៊ីស្រាអែល ខណៈដែលការប្រយុទ្ធគ្នាបានរីករាលដាលពាសពេញតំបន់ហ៊ុមព័ទ្ធប៉ាឡេស្ទីនមួយនេះ ហើយប្រជាជនប៉ាឡេស្ទីនកាន់តែច្រើនបានបន្តផ្លាស់ទីលំនៅ និងរត់ភៀសខ្លួន។អ្នកស្រុកបាននិយាយថា យន្តហោះ និងរថក្រោះរបស់អ៊ីស្រាអែល ក៏បានវាយលុកតំបន់នានាក្នុងទីក្រុងហ្កាហ្សា នៅភាគខាងជើង ជាទីដែលអ៊ីស្រាអែល បាននិងកំពុងដកទ័ពចេញ។ ការវាយប្រយុទ្ធគ្នាអាចត្រូវបានឮនៅក្នុងក្រុង បេត ឡាហ៊ីយ៉ា (Beit Lahiya) និងក្រុង ចាបាលីយ៉ា (Jabalia) ដែលនៅក្បែរនោះ។នៅទីក្រុងភាគខាងលិច ហ្កាហ្សា អ្នកស្រុកបាននិយាយថា ទូកកងទ័ពជើងទឹកអ៊ីស្រាអែល បានបើកការបាញ់ប្រហារទៅលើតំបន់មាត់សមុទ្រ ប៉ុន្តែមិនមានអ្នករងរបួសទេ។ នៅតំបន់ផ្សេងទៀតនៃតំបន់ហ៊ុមព័ទ្ធនេះ អ្នកស្រុកបានរាយការណ៍ថាមានការប្រយុទ្ធគ្នាកាន់តែខ្លាំង ស្របពេលមានការវាយប្រហារតាមអាកាសរបស់អ៊ីស្រាអែលយ៉ាងខ្លាំងក្លា។អ៊ីស្រាអែល បានធ្វើសង្រ្គាមមួយ ដែលខ្លួននិយាយថាមានគោលបំណងកម្ចាត់ក្រុមហាម៉ាស បន្ទាប់ពីការវាយប្រហារឆ្លងកាត់ព្រំដែនមិនធ្លាប់មានរបស់ក្រុមសកម្មប្រយុទ្ធ ដែលក្នុងនោះមនុស្ស ១.២០០នាក់ ត្រូវបានសម្លាប់ និងមនុស្ស ២៥៣នាក់ត្រូវបានចាប់ខ្លួន៕

ក្រុមអ្នកគាំទ្រអ៊ីស្រាអែល បិទច្រកព្រំដែន កេរឹមសាឡុំ (Kerem Shalom) ចូលទៅតំបន់ហ្កាហ្សាដើម្បីបញ្ចប់ជំនួយដល់ក្រុមហាម៉ាស

ក្រុមអ្នកតវ៉ាអ៊ីស្រាអែល រួមទាំងក្រុមសាច់សញ្ញាតិមួយចំនួនរបស់ចំណាប់ថ្នូរ ដែលត្រូវបានឃុំខ្លួន នៅក្នុងតំបន់ហ្កាហ្សា បានចេញតវ៉ានៅខាងក្នុងទឹកដីអ៊ីស្រាអែល នៃច្រកឆ្លងព្រំដែន កេរឹមសាឡុំ (Kerem Shalom) កាលពីថ្ងៃអាទិត្យ ទី២៨ខែមករា ក្នុងបំណងបិទច្រកឆ្លងកាត់មិនឲ្យរថយន្តរដឹកជំនួយចូលទៅក្នុងតំបន់ហ្កាហ្សាស្ទ្រីប។ មនុស្សមួយក្រុមបានទាមទារឲ្យបញ្ឈប់ការដឹកជញ្ជូនជំនួយចូលក្នុងតំបន់ហ្កាហ្កា ដោយនិយាយថា ការធ្វើបែបនេះ នឹងក្លាយជាមធ្យោបាយតែមួយគត់ក្នុងការបញ្ចប់ជំនួយដល់ក្រុមហាម៉ាស ដែលជាក្រុមអ៊ីស្លាមជ្រុលនិយមកំពុងគ្រប់គ្រងតំបន់នេះ រហូតទាល់តែចំណាប់ថ្នូរជាង១៣០នាក់ដែលកំពុងត្រូវបានឃុំខ្លួន ត្រូវបានដោះលែង។ មិនយូរប៉ុន្មាន បន្ទាប់ពីការតវ៉ាបានចាប់ផ្ដើម កងទ័ពអ៊ីស្រាអែល បានបំបែកហ្វូងមនុស្ស និងបានប្រកាសបិទតំបន់នោះជាតំបន់យោធា។ ការបញ្ជូនជំនួយមានចំនួនកំណត់ ត្រូវបានដឹកជញ្ជូនកាត់តាមច្រកព្រំដែនរ៉ាហ្វា(Rafah)ឆ្លងកាត់រវាងប្រទេសអេហ្ស៊ីប និងតំបន់ហ្កាហ្សា ហើយ ចាប់តាំងពីខែធ្នូរ មក ជំនួយបានឆ្លងកាត់ច្រកព្រំដែនកេរឹមសាឡុំ (Kerem Shalom) គ្រប់គ្រងដោយអ៊ីស្រាអែល៕

លោក Trump៖លោកBiden ទុកឲ្យពិភពលោកប្រឈមមាត់ជ្រោះនៃសង្រ្គាមលោកលើកទី៣ ក្រោយទាហានអាមេរិក៣នាក់ស្លាប់

លោក Donald Trump បាននិយាយថា លោក Joe Biden បានទុកឲ្យពិភពលោកប្រឈមមាត់ជ្រោះនៃសង្គ្រាមលោកលើកទី ៣ បន្ទាប់ពីការវាយប្រហារដោយយានដ្រូនលើមូលដ្ឋានទ័ពនៅប្រទេសហ្ស៊កដានី បានសម្លាប់ទាហានអាមេរិកបីនាក់។ អតីតប្រធានាធិបតីរូបនេះបាននិយាយទាំងកំហឹងលើអ្នកស្នងតំណែងរបស់លោក បន្ទាប់ពីឧបទ្ទវហេតុកាលពីថ្ងៃអាទិត្យ ដែលសេតវិមានបានស្តីបន្ទោសលើក្រុមសកម្មប្រយុទ្ធ គាំទ្រដោយអ៊ីរ៉ង់ ដែលប្រតិបត្តិការនៅមជ្ឈិមបូព៌ា។ លោក Trump បាននិយាយនៅក្នុងសេចក្តីថ្លែងការណ៍មួយថា ការវាយប្រហារដ៏សាហាវនេះទៅលើសហរដ្ឋអាមេរិកគឺជាផលវិបាកដ៏គួរឱ្យរន្ធត់មួយ និងជាសោកនាដកម្មមួយផ្សេងទៀតនៃភាពទន់ខ្សោយ និងការចុះចាញ់របស់ លោកJoe Biden ។លោកបានបន្ថែមថា កាលពីបីឆ្នាំមុន អ៊ីរ៉ង់ខ្សោយ បែកបាក់ និងស្ថិតក្រោមការគ្រប់គ្រងទាំងស្រុង ដោយសារតែគោលនយោបាយសម្ពាធអតិបរមារបស់លោក របបអ៊ីរ៉ង់អាចចំណាយប្រាក់ដើម្បីផ្តល់មូលនិធិដល់ភ្នាក់ងារភេរវករតំណាងរបស់ពួកគេ។ បេក្ខជនឈានមុខរបស់គណបក្សសាធារណរដ្ឋរូបនេះ បានចោទប្រកាន់លោក Biden ថាបានផ្តល់ប្រាក់រាប់ពាន់លានដុល្លារឲ្យទៅអ៊ីរ៉ង់ ដែលលោកបាននិយាយថាត្រូវបានប្រើប្រាស់ដោយទីក្រុងតេអេរ៉ង់ដើម្បី ពង្រីកការបង្ហូរឈាមនិងការសម្លាប់រង្គាលនៅទូទាំងមជ្ឈឹមបូព៌ា។លោកបាននិយាយថា ការវាយប្រហារបែបនេះនឹងមិនកើតឡើងឡើយ ប្រសិនបើលោកជាប្រធានាធិបតី សូម្បីតែការវាយប្រហាររបស់ពួកហាម៉ាសដែលគាំទ្រដោយអ៊ីរ៉ង់ទៅលើអ៊ីស្រាអែល ក៏នឹងមិនកើតឡើង ហើយសង្គ្រាមនៅអ៊ុយក្រែន ក៏នឹងមិនកើតឡើងដែរ ម្ល៉េះឥឡូវនេះយើងនឹងមានសន្តិភាពពេញពិភពលោកមិនខាន៕

នគរបាលប៉ាគីស្ថានបំបែកការជួបជុំ គណបក្សមុនការបោះឆ្នោតរបស់អតីតនាយករដ្ឋមន្ត្រី អ៊ីមរ៉ានខាន់

នគរបាលបានបំបែកការប្រមូលផ្តុំគ្នានៅទីក្រុងការ៉ាជី (Karachi) ដោយមានការចូលរួមពីក្រុមអ្នកគាំទ្ររាប់រយនាក់របស់អតីតនាយករដ្ឋមន្ត្រីប៉ាគីស្ថានលោកអ៊ីមរ៉ាន ខាន់ (Imran Khan) របស់គណបក្ស តេរីគ អ៊ី អ៊ីនសាហ្វ ប៉ាគីស្ថាន (Pakistan Tehreek-e-Insaf)ហៅកាត់ថា (PTI) កាលពីថ្ងៃអាទិត្យ ទី២៨ ខែមករា ដែលកំពុងតវ៉ាប្រឆាំងនឹងការប៉ុនប៉ងរារាំងពួកគេចេញពីការបោះឆ្នោតនាពេលខាងមុខ។ កងកម្លាំងនគរបាលបានបំបែកហ្វូងមនុស្សដែលស្រែកគាំទ្រលោក Khan និងចាប់ខ្លួនក្រុមអ្នកគាំទ្រគណបក្សមួយចំនួន។ពួកគេបានវាយក្រុមសកម្មជនដោយដំបង និងបាញ់ឧស្ម័នបង្ហូរទឹកភ្នែក ខណៈអ្នកគាំទ្រ គណបក្សPTI បានគប់ដុំថ្មទៅលើនគរបាល។លោក Khan វ័យ៧១ ឆ្នាំឥឡូវនេះ កំពុងជាប់ពន្ធនាគារបន្ទាប់ពីបានបរាជ័យជាមួយក្រុមឧត្តមសេនីយ៍ ហើយគណបក្សរបស់លោកប្រឈមនឹងអ្វីដែលក្រុមអ្នកវិភាគចាត់ទុកថាជាការបង្រ្កាបដែលគាំទ្រដោយយោធា។គូប្រជែងដ៏សំខាន់របស់លោក និងជាអតីតនាយករដ្ឋមន្ត្រីបីសម័យកាល លោក ណាវ៉ាស ហ្សារីហ្វ (Nawaz Sharif) ត្រូវបានប្រកាសគ្រប់សំណុំរឿងរបស់តុលាការទាំងអស់ និងបម្រាមមិនឲ្យចូលប្រឡូកក្នុងឆាកនយោបាយ និងការប្រកួតប្រជែងការបោះឆ្នោតអស់មួយជីវិត។ ក្រុមអ្នកវិភាគជឿថា យោធាដ៏មានឥទ្ធិពលបានផ្ដល់ការគាំទ្ររបស់ខ្លួននៅពីក្រោយលោក Sharif សម្រាប់ការបោះឆ្នោតក្រោយភាពជាប់គាំងជាមួយលោក Khan ដែលធ្វើឱ្យអតីតនាយករដ្ឋមន្ត្រីរូបនេះមានប្រៀបនៅក្នុងប្រទេសនេះជាទីដែលក្រុមឧត្តមសេនីយយោធាបញ្ច្រាបឥទ្ធិពលរបស់ខ្លួននៅក្នុងការបង្កើតរដ្ឋាភិបាល។ យោធាបដិសេធការចោទប្រកាន់នេះ ហើយនិយាយថា នេះនៅតែជារឿងនយោបាយ។ការិយាល័យនាយករដ្ឋមន្ត្រីបាននិយាយកាលពីថ្ងៃអង្គារទី ២៣ខែមករាថា ប្រទេសប៉ាគីស្ថាននឹងរៀបចំការបោះឆ្នោតនៅថ្ងៃទី៨ ខែកុម្ភៈ ហើយកងទ័ពនឹងត្រូវដាក់ពង្រាយដើម្បីធានាសន្តិភាពនៅថ្ងៃបោះឆ្នោត៕

មនុស្សរាប់ពាន់នាក់តវ៉ាប្រឆាំងរដ្ឋាភិបាលអាល្លឺម៉ង់ ក្នុងទីក្រុងមូនីជ ជុំវិញការដំឡើងពន្ធ និងការចំណាយលើសង្រ្គាមអ៊ុយក្រែន

ក្រុមបាតុកររាប់ពាន់នាក់បានចេញតវ៉ានៅក្នុងទីក្រុងមូនីជ(Munich) កាលពីថ្ងៃអាទិត្យ ថ្ងៃទី ២៨ ខែមករា ដែលជាផ្នែកមួយនៃការតវ៉ាដែលរៀបចំដោយឯករាជ្យប្រឆាំងនឹងរដ្ឋាភិបាលអាល្លឺម៉ង់ និងគោលនយោបាយសារពើពន្ធរបស់ប្រទេសនេះ។ដោយត្រូវបានរៀបចំឡើងដោយអ្នកជំនួញគ្រឿងចក្រស្ទូចក្នុងស្រុក លោក ម៉ាគូស ហ៊ូប៊រ (Markus Huber) ការតវ៉ានេះបានដំណើរការក្រោមបាវចនា រួមគ្នាដើម្បីប្រទេសរបស់យើង។ក្រុមអ្នកតវ៉ាបានអំពាវនាវឱ្យមានជំនួយពីរដ្ឋាភិបាលបន្ថែមទៀតសម្រាប់អាជីវកម្មខ្នាតតូច និងមធ្យម ការបន្ធូរបន្ថយពន្ធបន្ថែមទៀត និងជំនួយសម្រាប់កសិករអាល្លឺម៉ង់។ មនុស្សជាច្រើននៅក្នុងការតវ៉ាក៏ប្រឆាំងនឹងប្រាក់ដែលត្រូវបានចំណាយលើសង្រ្គាមក្នុងប្រទេសអ៊ុយក្រែនផងដែរ។ក្រុមអ្នករៀបចំបានរំពឹងថានឹងមានអ្នកចូលរួមជិត៣ម៉ឺននាក់ ហើយតួលេខបង្ហាញថា ចំនួនអ្នកចូលរួមមានជិតចន្លោះពី១ម៉ឺន ទៅ២ម៉ឺននាក់។ ការតវ៉ាកាលពីថ្ងៃអាទិត្យបាននបន្តពីរយៈពេលប៉ុន្មានសប្តាហ៍នៃការតវ៉ារបស់កសិករ និងអ្នកបើបររថយន្តដឹកទំនិញដែលអំពាវនាវឱ្យមានការបន្ធូរបន្ថយពន្ធ ៕

បណ្ដាញសង្គម

ព័ត៌មានថ្មីៗ

ជនភៀសខ្លួនរ៉ូហ៊ីងយ៉ា ប្រឈមសេចក្តីស្លាប់ក្នុងសមុទ្រ ដើម្បីស្វែងរកជីវិតល្អប្រសើរ

ជនអន្តោប្រវេសន៍ចង់បានភាពស្របច្បាប់ចំណាយពេលពេញមួយយប់នៅក្រៅសាលាក្រុងអេស្ប៉ាញ

EU រំពឹងថានឹងមានការសម្រេចចិត្តវិជ្ជមានលើប្រាក់កម្ចី ៩០ពាន់លានអឺរ៉ូដល់អ៊ុយក្រែននៅថ្ងៃពុធស្អែកនេះ

ខ្មាន់កាំភ្លើងសម្លាប់ស្រ្តីជនជាតិកាណាដាម្នាក់ និងមនុស្សជាច្រើននាក់ទៀតរងរបួសនៅពីរ៉ាមីត Teotihuacan

នាយអគ្គលេនាធិការកងទ័ពរុស្ស៊ី៖ កងកម្លាំងទីក្រុងមូស្គូ ដណ្តើមបានទឹកដី ១.៧០០គ.មក្រឡារបស់អ៊ុយក្រែនក្នុងឆ្នាំនេះ

ប្រភព៖ នាវាអ៊ីរ៉ង់ដែលរឹបអូសបានទំនងជាដឹកទំនិញប្រើបានទាំងយោធា និងស៊ីវិល

ឈីលី និងសហរដ្ឋអាមេរិក ចុះហត្ថលេខាលើកិច្ចព្រមព្រៀងរ៉ែ និងសន្តិសុខ

ក្រុមអ្នកវិទ្យាសាស្រ្តរចនាកម្មវិធីលើកដំបូងរបស់អាហ្វ្រិកខាងត្បូង ដើម្បីព្រមានពលរដ្ឋពីកម្រិតកង្វក់បរិយាកាស

ប្រេសិតក្រុមប្រឹក្សាសន្តិភាពមានសុទិដ្ឋិនិយមចំពោះការអនុវត្តផែនការតំបន់ហ្កាហ្សា

អាមេរិកមានជំនឿចិត្តថា កិច្ចប្រជុំសន្តិភាពជាមួយអ៊ីរ៉ង់នឹងបន្ត ខណៈឱសានវាទបទឈប់បាញ់ជិតមកដល់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877