BTV NEWS

ជនជាតិឥណ្ឌូនេស៊ី ២១នាក់ ពាក់ព័ន្ធនឹងការលួចឆ្លងដែន ស្នាក់នៅ និងធ្វើការងារខុសច្បាប់ ត្រូវបានបណ្ដេញចេញពីកម្ពុជា

ជនជាតិឥណ្ឌូនេស៊ី ៧២នាក់ ពាក់ព័ន្ធនឹងOnline Scams ត្រូវបានបណ្ដេញចេញពីកម្ពុជា

ក្រសួងសន្តិសុខសាធារណៈចិន ចុះពិនិត្យទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យានៅតំបន់ OP ក្រុងបាវិត

ឧត្តមសេនីយ៍ឯក ជួន ណារិន្ទ ប្រកាសឲ្យអ្នកបើករថយន្ត Range Rover បង្កគ្រោះថ្នាក់ចរាចរណ៍ស្លាប់មនុស្សនៅខណ្ឌជ្រោយចង្វារ ចូលខ្លួនបន្ទាន់ មិនបាច់រកអន្តរាគមន៍ទេ

សន្តិសុខ និង សង្គម

UN បារម្ភថា ការចាត់តាំងជាភេរវកររបស់សហរដ្ឋអាមេរិក លើក្រុមហ៊ូទី អាចប៉ះពាល់ដល់សេដ្ឋកិច្ចយេម៉ែន

អង្គការសហប្រជាជាតិ (UN) បារម្ភថាការសម្រេចរបស់សហរដ្ឋអាមេរិក ក្នុងការចាត់តាំងក្រុមឧទ្ទាម ហ៊ូទី (Houthi) របស់យេម៉ែន ទៅក្នុងបញ្ជីក្រុមភេរវករវិញ អាចប៉ះពាល់ដល់សេដ្ឋកិច្ចរបស់ប្រទេស ដែលហែកហួរដោយសង្រ្គាមមួយនេះ ជាពិសេសការនាំចូលទំនិញសំខាន់ៗជាលក្ខណៈពាណិជ្ជកម្ម នេះបើតាមមន្ត្រីជំនួយជាន់ខ្ពស់មួយរូបរបស់អង្គការសហប្រជាជាតិ បាននិយាយកាលពីថ្ងៃពុធ (១៤ កុម្ភៈ)។ចំណាត់ការរបស់សហរដ្ឋអាមេរិក ដែលបានប្រកាសកាលពីខែមុននេះ ចូលជាធរមាននៅថ្ងៃសុក្រ (១៦ កុម្ភៈ) ស្អែកនេះ ហើយនិងវាយលុកក្រុមសម្ព័ន្ធមិត្តអ៊ីរ៉ង់ ជាមួយនឹងទណ្ឌកម្មដ៏តឹងរ៉ឹង ដែលមានបំណងកាត់ផ្តាច់មូលនិធិ និងសព្វាវុធដែលពួកហ៊ូទី បានប្រើក្នុងការវាយប្រហារកាន់តែខ្លាំងឡើងរបស់ពួកគេលើនាវានៅក្នុងផ្លូវដឹកជញ្ជូនសមុទ្រក្រហមដ៏សំខាន់។នាយកប្រតិបត្តិការជំនួយរបស់អង្គការសហប្រជាជាតិ លោកស្រី អេឌែម វ៉ូស័រនុ (Edem Wosornu) បាននិយាយថា ខណៈពេលដែលសហគមន៍មនុស្សធម៌មានការព្រួយបារម្ភអំពី «ផលប៉ះពាល់ដែលអាចកើតមាន» ទីក្រុងវ៉ាស៊ីនតោនបានចេញការលើកលែងក្នុងគោលបំណងកាត់បន្ថយផលប៉ះពាល់ដល់ជនស៊ីវិលនៅក្នុងប្រទេសយេម៉ែន ដែលអង្គការសហប្រជាជាតិនិយាយថាមនុស្សជាង ១៨ លាននាក់ត្រូវការជំនួយ៕

មេដឹកនាំកូរ៉េខាងជើងលោក គីម ជុងអ៊ុន ត្រួតពិនិត្យការសាកល្បងមីស៊ីលដែលបាញ់ពីដីទៅផ្ទៃទឹក

ប្រព័ន្ធផ្សព្វផ្សាយរដ្ឋរបស់កូរ៉េខាងជើង KCNA បាននិយាយនៅថ្ងៃព្រហស្បតិ៍ (១៥ កុម្ភៈ) នេះថាមេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានត្រួតពិនិត្យការសាកល្បងមីស៊ីលពីដីទៅផ្ទៃទឹកថ្មីមួយកាលពីថ្ងៃពុធ ហើយបានទៅពិនិត្យរោងចក្រផលិតគ្រាប់រំសេវដ៏ធំមួយ ជាទីដែលលោកបានអំពាវនាវឱ្យជំរុញការផលិតអាវុធ។យោធាកូរ៉េខាងត្បូងបាននិយាយថា កូរ៉េខាងជើងបានបាញ់បង្ហោះមីស៊ីលតម្រង់គោលដៅជាច្រើនគ្រាប់ ចេញពីឆ្នេរសមុទ្រភាគខាងកើតរបស់ខ្លួនកាលពីថ្ងៃពុធ ដែលជាការបាញ់បង្ហោះចុងក្រោយបំផុតនៃការធ្វើតេស្តបែបនេះក្នុងរយៈពេលប៉ុន្មានសប្តាហ៍ថ្មីៗនេះ មុនពេលការបោះឆ្នោតសកលខែមេសា នៅក្នុងប្រទេសកូរ៉េខាងត្បូង។ប្រព័ន្ធផ្សព្វផ្សាយ KCNA បាននិយាយថា លោក គីម បានផ្តល់បញ្ជាឱ្យពង្រឹងការត្រៀមលក្ខណៈយោធានៅក្នុងដែនទឹកភាគខាងជើងនៃកោះ យ៉ុនព្យុង (Yeonpyeong) និងនៅភាគខាងលិចនៃឧបទ្វីបកូរ៉េ នៅក្នុងតំបន់នៃខ្សែបន្ទាត់កំណត់ភាគខាងជើង (NLL)។ ប្រព័ន្ធផ្សព្វផ្សាយនេះបានបន្ថែមថា មីស៊ីលថ្មីនេះមានឈ្មោះថា «ផាដាស៊ុរី-៦» (Padasuri-6) ឬ «ឥន្ទ្រីសមុទ្រ-៦» (Sea Eagle-6) បានហោះពីលើសមុទ្រ ហើយបានបាញ់ដល់គោលដៅដែលចង់បាន។ប្រព័ន្ធផ្សព្វផ្សាយនេះបន្តថា លោក គីម ក៏បានត្រួតពិនិត្យរោងចក្រគ្រាប់រំសេវ «ដ៏ធំ» និងបានសិក្សាលម្អិតអំពីទំនើបកម្មនៃការផលិត។ ដំណើរចុះពិនិត្យរបស់លោក គីម ទៅកាន់រោងចក្រផលិតគ្រាប់រំសេវនេះធ្វើឡើងស្របពេលដែលសហរដ្ឋអាមេរិក និងសម្ព័ន្ធមិត្តរបស់ខ្លួនបានចោទកូរ៉េខាងជើង ថាបានធ្វើពាណិជ្ជកម្មអាវុធជាមួយរុស្ស៊ី៕

អ៊ីរ៉ង់មានលទ្ធភាពវាយប្រហារមូលដ្ឋានអ៊ីស្រាអែល ក្រោយមន្ត្រីនុយក្លេអ៊ែរបង្ហាញ សមត្ថភាពបង្កើតគ្រាប់បែក

អ៊ីរ៉ង់ កំពុងខិតកាន់តែកៀកទៅនឹងលទ្ធភាពជម្លោះ ខណៈដែលខ្លួនបានលើកឡើងពីការវាយប្រហារលើមូលដ្ឋានអ៊ីស្រាអែល និងបង្ហាញថា ខ្លួនអាចបង្កើតអាវុធនុយក្លេអ៊ែរបាន ប្រសិនបើមន្ត្រី បានបញ្ជាឲ្យបង្កើតនោះ។លោក បេណាម បេន តាលីប្លូ (Behnam Ben Taleblu) បុគ្គលិកជាន់ខ្ពស់នៅមូលនិធិការពារលទ្ធិប្រជាធិបតេយ្យ បានប្រាប់សារព័ត៌មាន Fox News Digital ថា៖«ការអួតអាងរបស់អ៊ីរ៉ង់អំពីកម្មវិធីនុយក្លេអ៊ែររបស់ពួកគេ កំពុងឈានដល់កម្រិតថ្មី និងមិនធ្លាប់មានពីមុនមក»។លោក តាលីប្លូ បានថ្លែងថា៖៖«អតីតប្រធានថាមពលអាតូមិករបស់អ៊ីរ៉ង់ គឺជាការចង្អុលបង្ហាញយ៉ាងច្បាស់ ថា ទីក្រុងតេអេរ៉ង់ មានបំណែកនៃអាវុធនុយក្លេអ៊ែរទាំងអស់ ប៉ុន្តែត្រូវបានបំបែកចេញពីគ្នា»។ «ការអត្ថាធិប្បាយនេះ គួរតែលើកទង់ក្រហមសម្រាប់អ្នកដែលគិតថា ការផ្លាស់ប្តូរវត្ថុធាតុដែលអាចផលិតបរិមាណូ គឺជារឿងតែមួយគត់ ដែលចាំបាច់ត្រូវតែទប់ស្កាត់ និងទទួលខុសត្រូវជាមួយនឹងការត្រួតពិនិត្យអន្តរជាតិ»។លោកបានសង្កត់ធ្ងន់ថា៖«ជាក់ស្តែង គឺថាទីក្រុងតេអេរ៉ង់ មិនខ្លាចការឆ្លើយតបរបស់រដ្ឋ បាលលោកបៃដិនចំពោះការអះអាងទាំងនេះទេ»។ «តាមរយៈការបង្ហាញពីអំពីសមត្ថភាពនុយក្លេអ៊ែរដែលមានការគ្រប់គ្រងយ៉ាងច្បាស់នោះ មន្ត្រីអ៊ីរ៉ង់ប្រហែលជាកំពុងរៀបចំកន្លែងសម្រាប់ការបាញ់នុយក្លេអ៊ែរ ដោយទទួលបានអត្ថប្រយោជន៍ពីអាវុធនុយក្លេអ៊ែរទប់ស្កាត់ការវាយប្រហារផ្សេងៗ ដោយមិនចំណាយលើផ្នែកនយោបាយ និងយោធាទៅលើការផលិតអាវុធទេ។សារព័ត៌មាន Iran International បានរាយការណ៍ថា លោក អាលី អាកបា សាលេហ៊ី (Ali-Akbar Salehi) អតីតប្រធានទីភ្នាក់ងារនុយក្លេអ៊ែរអ៊ីរ៉ង់ បាននិយាយនៅក្នុងការផ្សាយកាលពីថ្ងៃចន្ទថា ទីក្រុងតេអេរ៉ង់ មានអ្វីគ្រប់យ៉ាងដែលចាំបាច់ ដើម្បីបង្កើតអាវុធបរមាណូ ដោយនិយាយថា៖«យើងបាន[ឆ្លងកាត់] កម្រិតទាំងអស់នៃវិទ្យាសាស្ត្រ និងបច្ចេកវិទ្យានុយក្លេអ៊ែរ»។

ការតវ៉ារបស់កសិករ នៅប្រទេសឥណ្ឌា បំពានលើកងកម្លាំងសន្តិសុខនៅថ្ងៃទី២

កងកម្លាំងសន្តិសុខប្រទេសឥណ្ឌា បានបាញ់ឧស្ម័នបង្ហៀរទឹកភ្នែកទៅលើក្រុមកសិករដែលកំពុងតវ៉ា នៅថ្ងៃទីពីរ ដើម្បីបញ្ឈប់មនុស្សរាប់ម៉ឺននាក់ ពីការដើរក្បួនបាតុកម្មទៅកាន់រដ្ឋធានី ញូវ ដេលី ដើម្បីទាមទារតម្លៃកាន់តែខ្ពស់សម្រាប់ផលិតផលកសិកម្មរបស់ពួកគេ។កងកម្លាំងសន្តិសុខ បានបញ្ឈប់កសិករនៅព្រំដែន សាមប៊ូ (Shambhu) បែងចែក រដ្ឋ ពុនចាប (Punjab) និងរដ្ឋ ហារីយ៉ាណា(Haryana) ជារដ្ឋនៅភាគខាងជើង ដែលកសិករភាគច្រើនរស់នៅទីនោះ មានចម្ងាយជិត ២០០គីឡូម៉ែត្រ ពីគោលដៅរបស់ពួកគេ។អគ្គនាយកនគរបាល រដ្ឋ Haryana លោកស្សាទ្រូ កាពួ (Shatrujeet Kapur) បាននិយាយថា ក្រុមបាតុករ បានគប់ដុំថ្ម និងព្យាយាមទម្លាយរបាំងការពារ ហើយកងកម្លាំងសន្តិសុខ ក៏បានប្រើប្រាស់យានដ្រូន ដើម្បីទម្លាក់ធុងឧស្ម័នបង្ហៀរទឹកភ្នែកទៅលើកសិករ ក្នុងការឆ្លើយតប ខណៈកសិករបានបង្ហោះខ្លែងឡើងទៅលើអាកាសក្នុងក្តីសង្ឃឹមថា នឹងធ្វើឲ្យជាប់គាំងម៉ាស៊ីនយានដ្រូន។ដោយធ្វើដំណើរនៅលើរថយន្តដឹកទំនិញ និងរម៉កអូស ដែលផ្ទុកដោយអាហារ សម្ភារៈសម្រាប់ដេក និងគ្រឿងផ្គត់ផ្គង់ផ្សេងៗទៀត កសិករបានចាប់ផ្តើមដង្ហែក្បួនបាតុកម្ម «តោះយើងទៅទីក្រុងដេលី» បន្ទាប់ពីកិច្ចពិភាក្សាជាមួយរដ្ឋាភិបាល ពុំបានផ្តល់ការប្តេជ្ញាចិត្តលើតម្លៃអប្បបរមាសម្រាប់ ផលដំណាំពួកគេជាបន្តបន្ទាប់។សហជីពរបស់កសិករជាច្រើន បាននិយាយថា ពួកគេនឹងតវ៉ាប្រឆាំងសកម្មភាពរបស់នគរបាលដោយការបិទចរាចរណ៍ផ្លូវរថភ្លើងនៅកន្លែងជាច្រើន ក្នុងរដ្ឋ Punjab រយៈពេល ៤ ម៉ោង នៅថ្ងៃព្រហស្បតិ៍ ទី១៥ ខែកុម្ភៈនេះ។

ការបាញ់ប្រហារនៅទីក្រុងចំនួន២របស់សហរដ្ឋអាមេរិក បណ្តាលឲ្យមនុស្សស្លាប់ និងរងរបួស

មនុស្សម្នាក់បានស្លាប់ និងជាង ២០នាក់ផ្សេងទៀតរងរបួស បន្ទាប់ពីត្រូវបានបាញ់ប្រហារ កាលពីថ្ងៃពុធ អំឡុងពេលព្យុហយាត្រាប្រារព្ធពិធីជ័យជម្នះកីឡា Super Bowl របស់ក្រុម Kansas City Chiefs។ ស្នងការនគរបាលទីក្រុង Kansas លោកស្រី ស្តាសី ហ្គ្រេវ (Stacey Graves) បានប្រាប់អ្នកសារព័ត៌មានថា នគរបាលនៅតែធ្វើការដើម្បីកំណត់ចំនួនជនរងគ្រោះសរុប ប៉ុន្តែ ចំនួនអ្នករបួសដោយគ្រាប់កាំភ្លើង សរុបបានកើនឡើងដល់២២ នាក់។ ហេតុការណ៍បាញ់ប្រហារនេះ បានកើតឡើងនៅខាងក្រៅស្ថានីយ៍សហជីពទីក្រុង Kansas។ នៅក្នុងសន្និសីទសារព័ត៌មានកាលពីល្ងាចថ្ងៃពុធ មន្ត្រីអនុវត្តច្បាប់ បាននិយាយថា មនុស្សបីនាក់ត្រូវបានឃុំខ្លួនសម្រាប់ការស៊ើបអង្កេតដែលជាប់ពាក់ព័ន្ធទៅនឹងការបាញ់ប្រហារនេះ ហើយមូលហេតុនៃការបាញ់ប្រហារនៅមិនទាន់ត្រូវបានគេកំណត់អត្តសញ្ញាណនៅឡើយ។ ក្រុម Kansas City Chiefs បានទទួលពានរង្វាន់កីឡា Super Bowl កាលពីចុងសប្តាហ៍ ហើយអ្នកគាំទ្រប្រមាណ ១ លាននាក់ បានមកប្រមូលផ្តុំគ្នានៅទីក្រុង Kansas កាលពីថ្ងៃពុធដើម្បីអបអរ។ យោងតាមបណ្ណសារអំពើហឹង្សាដោយអាវុធ បានឲ្យដឹងថា ការបាញ់ប្រហារកាលពីថ្ងៃពុធម្សិលមិញនេះ គឺជាការបាញ់ប្រហារទ្រង់ទ្រាយធំលើកទី ៤៨ នៅសហរដ្ឋអាមេរិក រហូតមកដល់ពេលនេះ ក្នុងឆ្នាំនេះ ។ ទន្ទឹមនឹងនេះ សាលារៀនសាធារណៈទីក្រុងអាត្លង់តា(Atlanta) បាននិយាយនៅក្នុងសេចក្តីថ្លែងការណ៍ ថា សិស្សវិទ្យាល័យ Atlanta ចំនួនបួននាក់ ត្រូវបានបាញ់ប្រហារ កាលពីថ្ងៃពុធ នៅពេលដែលខ្មាន់កាំភ្លើងម្នាក់ បានបាញ់រះចេញពីក្នុងរថយន្តមួយគ្រឿង ចូលទៅកន្លែងចំណតរថយន្តនៅវិទ្យាល័យ បេនចាមីន អ៊ូម៉េ (Benjamin E. Mays) ភ្លាមៗបន្ទាប់ពីសាលាអនុញ្ញាតឲ្យសិស្សចេញ។ សេចក្តីថ្លែងការណ៍បាននិយាយថា ជនរងគ្រោះទាំងអស់ត្រូវបានបញ្ជូនទៅកាន់មន្ទីរពេទ្យ ដោយមានរបួសពុំគំរាមកំហែងដល់អាយុជីវិតនោះទេ ហើយក្រោយមកសកម្មភាពទាំងអស់នៅសាលារៀន ត្រូវបានលុបចោល។ នគរបាល និយាយថា ស្ត្រីម្នាក់ ត្រូវបានឃុំខ្លួន ក្នុងការជាប់ពាក់ព័ន្ធទៅនឹងឧបទ្ទវហេតុនេះ។

ការតវ៉ាអង្គុយបានផ្ទុះឡើងក្នុងទីក្រុងខ្វេតា ប្រទេសប៉ាគីស្ថាន ប្រឆាំងករណីលួចបន្លំសន្លឹកឆ្នោត

ក្រុមអ្នកតវ៉ាបានប្រមូលផ្តុំគ្នានៅទីក្រុង ខ្វេតា (Quetta) ដែលជារដ្ឋធានីរបស់ខេត្តបាលូជីស្ថាន (Balochistan) ដោយអង្គុយកាលពីថ្ងៃពុធ ថ្ងៃទី១៤ ខែកុម្ភៈ ជាការបន្ថែមទៅលើបាតុកម្មនានា នៅសប្តាហ៍នេះ ប្រឆាំងនឹងលទ្ធផលបោះឆ្នោត។ក្រុមកម្មករ និងអ្នកគាំទ្រគណបក្សនយោបាយផ្សេងៗ បានបិទផ្លូវហាយវ៉េសំខាន់ៗទាំងអស់ដែលតភ្ជាប់ខេត្តបាលូជីស្ថានជាមួយខេត្តផ្សេងទៀត ដើម្បីតវ៉ាជុំវិញអ្វីដែលពួកគេនិយាយថា ជាការលួចបន្លំសន្លឹកឆ្នោត។សមាជិកមួយចំនួននៃគណបក្សជាតិនិយម ដូចជាគណបក្ស បាលូច(Baloch)គណបក្សផាសទុន( Pashtun) និង គណបក្ស ហាហ្សារ៉ា (Hazara)របស់ខេត្តនេះ បានតវ៉ានៅមុខការិយាល័យរៀបចំការបោះឆ្នោតស្រុក។កាលពីថ្ងៃអង្គារទី១៣ កុម្ភៈ ហាងលក់ទំនិញ និងសេវាដឹកជញ្ជូនសាធារណៈនានាក្នុងក្រុងខ្វេតា ត្រូវបានបិទ ខណៈគណបក្សនយោបាយក្នុងស្រុកអំពាវនាវឲ្យបិទទីក្រុង។ប្រទេសប៉ាគីស្ថានបានបោះឆ្នោតថ្នាក់ជាតិ និងថ្នាក់ខេត្តកាលពីថ្ងៃទី ៨ខែកុម្ភៈ ប៉ុន្តែការបោះឆ្នោតត្រូវបានរំខានដោយការចោទប្រកាន់ថាមានករណីលួចបន្លំក្នុងបំណងកម្ចាត់បេក្ខជនឯករាជ្យដែលគាំទ្រដោយអតីតនាយករដ្ឋមន្ត្រី លោក Imran Khan ដែលកំពុងជាប់ពន្ធនាគារ។រដ្ឋាភិបាលចាំផ្ទះ និងគណៈកម្មាធិការរៀបចំការបោះឆ្នោតប៉ាគីស្ថានបានច្រានចោលការចោទប្រកាន់នេះ ហើយបាននិយាយថា ប្រទេសនេះមានច្បាប់ និងប្រព័ន្ធដើម្បីស៊ើបអង្កេតបន្ដឹងជាក់លាក់៕

លោកអាបាស អំពាវនាវឲ្យក្រុមហាម៉ាសយល់ព្រមភ្លាមៗ នូវកិច្ចព្រមព្រៀងចំណាប់ថ្នូរជាមួយអ៊ីស្រាអែល

ប្រធានអាជ្ញាធរប៉ាឡេស្ទីនលោក ម៉ាខ្មូដ អាបាស (Mahmoud Abbas) បានអំពាវនាវឲ្យក្រុមហាម៉ាស យល់ព្រមទៅលើកិច្ចព្រមព្រៀងចំណាប់ថ្នូរជាមួយរដ្ឋាភិបាលអ៊ីស្រាអែលយ៉ាងឆាប់រហ័ស ដើម្បីការពារប្រជាជនប៉ាឡេស្ទីន និងទប់ស្កាត់ការវាយប្រហាររបស់អ៊ីស្រាអែលលើទីក្រុងរ៉ាហ្វា (Rafah) នេះបើយោងតាមទីភ្នាក់ងារសារព័ត៌មានប៉ាឡេស្ទីនWafa។លោកអាបាស ប្រធានអាជ្ញាធរប៉ាឡេស្ទីនដែលគ្រប់គ្រងតំបន់ប៉ាឡេស្ទីននៃតំបន់វេសបែង (West Bank) បាននិយាយថា ការវាយប្រហារលើទីក្រុងរ៉ាហ្វា នឹងនាំឲ្យជនរងគ្រោះរាប់ពាន់នាក់រងទុក្ខវេទនា និងការផ្លាស់ទីលំនៅ។ការអត្ថាធិប្បាយរបស់លោក បានកើតឡើង ខណៈដែលរដ្ឋាភិបាលអ៊ីស្រាអែលរៀបចំការវាយលុកនៅក្នុងទីក្រុងរ៉ាហ្វា។ គោលបំណងរបស់អ៊ីស្រាអែល គឺដើម្បីលុបបំបាត់អង្គភាពប្រយុទ្ធចុងក្រោយរបស់ក្រុមហាម៉ាស ដែលជាក្រុមសកម្មប្រយុទ្ធអ៊ីស្លាមប៉ាឡេស្ទីន។ទោះបីជាយ៉ាងណាក៏ដោយ ការវាយលុកណាមួយនៅក្នុងទីក្រុងរ៉ាហ្វា ដែលមានទីតាំងនៅភាគខាងត្បូងនៃ តំបន់ហ្កាហ្សាស្ទ្រីប នៅតាមព្រំដែនអេហ្ស៊ីប ត្រូវបានគេចាត់ទុកថា ជាបញ្ហាដ៏ខ្លាំងក្លា ដោយសារមនុស្សជាច្រើនប្រមូលផ្តុំនៅទីនោះ ដោយផ្តល់ជម្រកដលមនុស្សប្រហែល ៣០០.០០០ នាក់ នៅមុនសង្រ្គាម ហើយឥឡូវនេះ ១,៣ លាននាក់បានប្រមូលផ្តុំគ្នាទៅកាន់ទីក្រុងនេះ តាមការណែនាំរបស់យោធាអ៊ីស្រា អែល ដើម្បីគេចចេញពីការវាយប្រហារនៅតំបន់សេសសល់នៃតំបន់ហ្កាហ្សាស្ទ្រីប។មេដឹកនាំរួមទាំងអគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស (Antonio Guterres) រដ្ឋាភិបាលសហរដ្ឋអាមេរិក និងរដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock សុទ្ធតែបានជំរុញអ៊ីស្រាអែលប្រឆាំងនឹងសកម្មភាពយោធា នៅក្នុងទីក្រុងនេះ។

អ៊ីស្រាអែល រងសម្ពាធកាន់តែខ្លាំង កុំឲ្យវាយប្រហារលើជំរំជនភៀសខ្លួនប៉ាឡេស្ទីន ចុងក្រោយនៅហ្កាហ្សា

អ៊ីស្រាអែលបានប្រឈមនឹងសម្ពាធអន្តរជាតិកាន់តែខ្លាំងឡើងកាលពីថ្ងៃពុធ ទី១៤ ខែកុម្ភៈ ដើម្បីបញ្ឈប់ការវាយលុកដែលបានគ្រោងទុកលើជម្រកចុងក្រោយសម្រាប់ជនភៀសខ្លួនប៉ាឡេស្ទីននៅភាគខាងត្បូងនៃតំបន់ហ្កាហ្សា បន្ទាប់ពីកិច្ចចរចាបទឈប់បាញ់នៅទីក្រុងគែរ(Cairo)បានបញ្ចប់ដោយពុំទទួលបានផ្លែផ្កាគាប់ប្រសើរ។ ក្រុមមន្ត្រីបាននិយាយថា កិច្ចពិភាក្សាកាលពីថ្ងៃអង្គារមានលក្ខណៈស្ថាបនា ហើយនឹងបន្ត ប៉ុន្តែកង្វះបរបគំហើញភ្លាមៗបានបង្កឱ្យមានការភ័យខ្លាចក្នុងចំណោមមនុស្សរាប់សែននាក់បានប្រមូលផ្តុំគ្នាចូលទៅក្នុងទីក្រុងរ៉ាហ្វា(Rafah)ថា អ៊ីស្រាអែល នឹងវាយលុកទីក្រុងនៅព្រំដែនជាមួយអេហ្ស៊ីបក្នុងពេលឆាប់ៗនេះ។ភាពតានតឹងក៏បានកើនឡើងតាមបណ្តោយព្រំដែនភាគខាងជើងរបស់អ៊ីស្រាអែលជាមួយប្រទេសលីបង់កាលពីថ្ងៃពុធផងដែរ។ អ៊ីស្រាអែលបាននិយាយថា ស្ត្រីម្នាក់បានស្លាប់នៅក្នុងការវាយប្រហារដោយគ្រាប់រ៉ូកែតពីប្រទេសលីបង់ ហើយមនុស្ស ៤ នាក់ត្រូវបានគេរាយការណ៍ថាបានស្លាប់នៅក្នុងការវាយប្រហាររបស់អ៊ីស្រាអែលទៅលើភាគខាងត្បូងប្រទេសលីបង់។លោក រីឆាត ភីភើកន (Richard Peeperkorn)អ្នកតំណាងអង្គការសុខភាពពិភពលោកប្រចាំតំបន់ ហ្កាហ្សានិង West Bank បាននិយាយថា ការវាយប្រហារលើក្រុងរ៉ាហ្វា នឹងក្លាយជា មហន្តរាយហួសពីការស្រមៃ។ការិយាល័យប្រធានាធិបតីបារាំងបាននិយាយថា លោកប្រធានាធិបតីEmmanuel Macron បានលើកឡើងពីការព្រួយបារម្ភស្រដៀងគ្នានេះនៅក្នុងការសន្ទនាតាមទូរស័ព្ទកាលពីថ្ងៃពុធជាមួយលោក Netanyahu ដោយនិយាយថារត់ភៀសខ្លួនចេញពីទីលំនៅដោយបង្ខំបន្ថែមទៀតអាចនាំឲ្យមានស្ថានភាពយ៉ាប់យ៉ឺនកាន់តែខ្លាំងក្នុងតំបន់ផងដែរ។ រដ្ឋមន្ត្រីការបរទេសអាល្លឺម៉ង់លោកស្រីអាណាឡេណាប៊ែរបុក(Annalena Baerbock)បាននិយាយថា ប្រជាជននៅក្រុងរ៉ាហ្វា ដែលគ្មានកន្លែងត្រូវទៅ មិនអាចរលាយបាត់ទៅតាមខ្យល់អាកាសឡើយ។ លោកស្រីបាននិយាយមុនពេលពិភាក្សាជាមួយលោក Netanyahu ថា ពួកគេត្រូវការកន្លែងសុវត្ថិភាព និងច្រករបៀងសុវត្ថិភាព ដើម្បីចៀសវាងការជាប់ខ្លួននៅក្នុងភ្លើងសង្រ្គាមថែមទៀត៕

អ៊ីស្រាអែល ប្តេជ្ញាប្រឆាំងក្រុមហាម៉ាសនៅក្រុងរ៉ាហ្វា ស្របពេលការអំពាវនាវជាសកលឱ្យមានការអត់ធ្មត់

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃពុធ (១៤ កុម្ភៈ) ថាអ៊ីស្រាអែល នឹងបន្តការវាយលុកប្រឆាំងនឹងក្រុមហាម៉ាស នៅក្រុងរ៉ាហ្វា (Rafah) ដែលជាជម្រកចុងក្រោយសម្រាប់ជនភៀសខ្លួនប៉ាឡេស្ទីននៅភាគខាងត្បូងហ្កាហ្សា បន្ទាប់ពីអនុញ្ញាតឱ្យជនស៊ីវិលចាកចេញពីតំបន់នោះ។មេដឹកនាំអ៊ីស្រាអែល ដែលកំពុងស្ថិតក្រោមសម្ពាធអន្តរជាតិកាន់តែខ្លាំងឡើងក្នុងការផ្អាកការវាយប្រហារដែលបានគ្រោងទុក និងការអំពាវនាវជាសកលឱ្យមានការអត់ធ្មត់រូបនេះ មិនបានចង្អុលបង្ហាញថាតើនៅពេលណាដែលការវាយលុកអាចនឹងកើតឡើង ឬកន្លែងណា ដែលមនុស្សរាប់សែននាក់កំពុងស្នាក់នៅក្នុងក្រុងរ៉ាហ្វា អាចទៅបាននោះទេ។ការអត្ថាធិប្បាយរបស់លោក ណេតាន់យ៉ាហ៊ូ នេះបានកើតឡើងមួយថ្ងៃបន្ទាប់ពីកិច្ចពិភាក្សានៅទីក្រុងគែរ ស្តីពីលទ្ធភាពបទឈប់បាញ់ និងការប្រគល់ចំណាប់ថ្នូរដែលកាន់កាប់ដោយក្រុមហាម៉ាស បានបញ្ចប់ដោយមិនមានការសន្និដ្ឋានសរុប ដែលនោះបង្កឱ្យមានការភ័យខ្លាចក្នុងចំណោមប្រជាជនភៀសខ្លួនប៉ាឡេស្ទីនថា អ៊ីស្រាអែលនឹងវាយលុកក្រុងរ៉ាហ្វា ដែលនៅជាប់នឹងអេហ្ស៊ីប ក្នុងពេលឆាប់ៗ។យោធាអ៊ីស្រាអែលនិយាយថា ខ្លួនចង់បណ្តេញពួកសកម្មប្រយុទ្ធអ៊ីស្លាមចេញពីកន្លែងលាក់ខ្លួនក្នុងទីក្រុងរ៉ាហ្វា និងដោះលែងចំណាប់ថ្នូរដែលត្រូវបានឃុំខ្លួននៅទីនោះបន្ទាប់ពីការវាយលុករបស់ពួកហាម៉ាស លើអ៊ីស្រាអែលកាលពីថ្ងៃទី០៧ ខែតុលា ប៉ុន្តែមិនបានផ្តល់ព័ត៌មានលម្អិតអំពីផែនការដែលបានស្នើឡើងដើម្បីជម្លៀសជនស៊ីវិលនោះទេ៕

នគរបាលបញ្ចូនខ្លួនជនប្រឌិតរឿង និងក្លែងជាតួអង្គ ម៉ូលីកា ទៅតុលាការ នៅរសៀលនេះ

ភ្នំពេញ ៖ បុរសជនដែលបាននិពន្ធរឿង និងដើរតួជាតួអង្គស្រី ក្នុងរឿងក្លែងជាអ្នកលេងបណ្តាញសង្គមឈ្មោះ ម៉ូលីកា សរសេរ និងបង្ហោះធ្វើឱ្យប៉ះពាល់ កិត្តិយស និងសេចក្ដីថ្លៃថ្នូររបស់មន្ត្រីនគរបាល ត្រូវបានសមត្ថកិច្ចធ្វើការបញ្ចូនខ្លួនទៅកាន់សាលាដំបូងរាជធានីភ្នំពេញ នារសៀលថ្ងៃទី១៤ ខែកុម្ភះ ឆ្នាំ២០២៤នេះ ដើម្បីបន្តនីតិវិធីច្បាប់ ។ ជនសង្ស័យមានឈ្មោះ យឹម សុផាន់ណា ភេទប្រុស អាយុជាង៣០ឆ្នាំ ។ ជនសង្ស័យកំពុងស្ថិតក្រោមការបន្តនីតិវិធីរបស់តុលាការ ដោយពុំទាន់សម្រេចយ៉ាងណានៅឡើយនោះទេ ។ លោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានប្រាប់ឱ្យដឹងថា ៖ ជនសង្ស័យរូបនេះ ជាម្នាក់ក្នុងចំណោមបក្សពួកដែលកំពុងរត់គេច ដែលបានចូលរួមក្នុងការរៀបចំផែនការណ៍បង្កើតព្រឹត្តិការណ៍ ពិសេសបង្កើតគ្រុបតេឡេេក្រាមក្លែងក្លាយប្តឹងនគរបាលចរាចរណ៍ផ្លូវគោក ប្រចាំការនៅស្តុបក្តាន់២ ដែលយកតួអង្គ អាខោនឈ្មោះ គង់ ម៉ូលីកា ជាគណនេយ្យអាខោនក្លែងក្លាយ ដើម្បីផ្សព្វផ្សាយព័ត៌មានចោទប្រកាន់មួលបង្កាច់បង្ខូចសេចក្តីថ្លៃថ្នូររបស់នគរបាលជាតិ ។ អ្នកនាំពាក្យនគរបាល បានបន្តថា ៖ សមត្ថកិច្ចមិនទាន់អាចកំណត់បាន១០០ភាគរយថា ក្រុមជនសង្ស័យធ្វើឡើងក្នុងគោលដៅអ្វីឱ្យពិតប្រាកដនៅឡើយទេ ប៉ុន្តែ អាចមានការពាក់ព័ន្ធនឹងការធ្លាប់មានទំនាស់អ្វីមួយជាមួយនឹងកម្លាំងនគរបាលចរាចរណ៍ដែលប្រចាំការនៅស្តុបក្តាន់២នោះ ។ គួររំលឹកថា កាលពីវេលាយប់ថ្ងៃទី១៣ ខែកុម្ភះ ឆ្នាំ២០២៤ម្សិលមិញ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក៏បានបង្ហោះនៅលើបណ្តាញទំនាក់ទំនងសង្គមផ្ទាល់ខ្លួនរបស់លោក ដោយបានបង្ហាញមុខ ជនដែលប្រឌិតរឿងខាងលើ ដោយសរសេរភ្ជាប់ខ្លឹមសារ អំពីជនដែលនោះថា ជាអ្នកនិពន្ឋរឿងធ្វើម៉ូលីកា ធ្វើឱ្យល្បី និងក៌ជាតួស្រីម៉ូលីកា ហើយ ក៌ជាជនស៊ីវិល ផងដែរ ។ រឿងរ៉ាវនេះ មុនពេលដែលសមត្ថកិច្ចរកការពិតឃើញ គឺបានផ្ទុះការរិះគន់យ៉ាងខ្លាំងខ្លា ពីសំណាក់មហាជនអ្នកប្រើប្រាស់បណ្តាញសង្គម បន្ទាប់ពីបែកធ្លាយព័ត៌មានទារប្រាក់ក្នុងពេលអនុវត្តច្បាប់ និងសារឆាតផ្តោះផ្តោះស្នេហា ពីសំណាក់នគរបាលចរាចរណ៍ នៅស្តុបក្តាន់២ ជាមួយគណនេយ្យក្លែងក្លាយ ដោយភ្ជាប់នារីរូបស្រស់ម្នាក់ និងប្រើឈ្មោះ មូលីកា ខាងលើ ៕ អត្ថបទ ៖ លីហេង

បណ្ដាញសង្គម

ព័ត៌មានថ្មីៗ

ក្រសួង ស្ថាប័ននានា ដាក់កម្រងផ្កាគោរពវិញ្ញាណក្ខន្ធវីរជននៅវិមានឯករាជ្យ និងព្រះបរមរូបសម្ដេចព្រះនរោត្តម សីហនុ ក្នុងឱកាសខួបលើកទី៧៣ នៃទិវាបុណ្យឯករាជ្យជាតិ ៩វិច្ឆិកា

ប្រព័ន្ធផ្សព្វផ្សាយអ៊ីរ៉ង់រាយការណ៍ថា មានសំឡេងផ្ទុះត្រូវគេឮក្នុងតំបន់មួយចំនួននៅភាគខាងត្បូងប្រទេសអ៊ីរ៉ង់

គុណភាពខ្យល់នៅរដ្ឋធានីឥណ្ឌាយ៉ាប់យ៉ឺនខ្លាំង ខណៈពិធីបុណ្យឌីវ៉ាលីបង្កក្តីបារម្ភកាន់តែខ្លាំងពីការបំពុលបរិស្ថាន

ប្រធានក្រុមការងារចុះមូលដ្ឋានខណ្ឌព្រែកព្នៅ ណែនាំអាជ្ញាធរសង្កាត់ឱ្យពង្រឹងការអនុវត្តគោលនយោបាយភូមិ-សង្កាត់មានសុវត្ថិភាព ថែរក្សាផ្លូវ លូ និងបន្តផ្តល់សេវាជូនពលរដ្ឋឱ្យកាន់តែល្អប្រសើរបន្ថែមទៀត

អ៊ីរ៉ង់អះអាងថា កងកម្លាំងរបស់ខ្លួនមានភាព «រឹងមាំជាង» មុនពេលចាប់ផ្តើមសង្គ្រាម

ពលរដ្ឋវ័យចំណាស់ បង្ហាញមោទនភាពចំពោះសន្ទុះ នៃការអភិវឌ្ឍផលិតផលក្នុងស្រុកកាន់តែល្អ

ក្រុម AOT ចុះសង្កេតការណ៍ និងសួរសុខទុក្ខដល់ជនភៀសសឹក ស្ថិតនៅភូមិរង់ចាំ ខណៈពួកគាត់មិនទាន់អាចវិលត្រឡប់ទៅកាន់លំនៅដ្ឋានវិញដោយសារថៃឈ្លានពាន

រុស្ស៊ីវាយប្រហាររោងចក្រថាមពលនៅជុំវិញទីក្រុងគីវ បំផ្លាញស្ពានសំខាន់ៗ និងបណ្ដាលឲ្យមនុស្ស២នាក់ស្លាប់

យុវជនប្ដេជ្ញាខិតខំសិក្សាលើបច្ចេកវិទ្យា ដើម្បីការពារជាតិ និងអភិវឌ្ឍន៍ជាតិឆ្ពោះទៅឆ្នាំ២០៥០

ពលរដ្ឋ និងយុវជនខេត្តមណ្ឌលគិរី រីករាយចំពោះវេទិកាការងារនាំយកឱកាសការងារមកដល់មូលដ្ឋាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877