BTV NEWS

កម្ពុជាមានឆន្ទៈបង្រ្កាប Online scams និងបង្ហាញទៅអន្តរជាតិដឹងកាន់តែច្បាស់តាមរយៈសន្និសីទអន្តរ ជាតិICCOS

បណ្តេញជនជាតិថៃ ១១នាក់ ចេញពីកម្ពុជាពាក់ព័ន្ធករណីលួចស្នាក់នៅ ធ្វើការងារខុសច្បាប់ និងបទល្មើសផ្សេងៗទៀត

ជនបរទេសជាង ៧ម៉ឺននាក់ពាក់ព័ន្ធ Online Scams និងបទល្មើសផ្សេងៗត្រូវបានបណ្តេញចេញពីកម្ពុជា

អ្នកនាំពាក្យក្រសួងមហាផ្ទៃ ៖ រយៈពេល៣ឆ្នាំអគ្គនាយកដ្ឋានអន្តោប្រវេសន៍បណ្តេញជនបរទេសខុសច្បាប់ចេញពីកម្ពុជាមានជាង ៧ម៉ឺននាក់

សន្តិសុខ និង សង្គម

សម្ព័ន្ធណាតូនឹងចាប់ផ្តើមសមយុទ្ធដ៏ធំបំផុតក្នុងរយៈពេលជាច្រើនទសវត្សរ៍នៅសប្ដាហ៍ក្រោយ ដែលមានកងទ័ពប្រហែល ៩ម៉ឺននាក់

អង្គការសន្ធិសញ្ញាអាត្លង់ទិកខាងជើង ហៅកាត់ថា NATO បានប្រកាសកាលពីថ្ងៃព្រហស្បតិ៍ ទី១៨ ខែមករាថា ខ្លួននឹងចាប់ផ្តើមសមយុទ្ធយោធាដ៏ធំបំផុតមិនធ្លាប់មានក្នុងរយៈពេលជាច្រើនទសវត្សរ៍នៅសប្ដាហ៍ក្រោយ ដោយមានការចូលរួមពីកងទ័ពប្រមាណ ៩០.០០០នាក់ និងជាការសាកល្បងសមត្ថភាពរបស់សម្ព័ន្ធមិត្តក្នុងរយៈពេលជាច្រើនខែដើម្បីចូលរួមក្នុងជម្លោះជាមួយសត្រូវដូចជារុស្ស៊ី។ ឧត្តមសេនីយអាមេរិក គ្រីស្តូហ្វើ ខាវ៉ូលី (Christopher Cavoli) មេបញ្ជាការសម្ព័ន្ធមយោធាកំពូលរបស់អង្គការ NATO នៅអឺរ៉ុបបានប្រាប់អ្នកសារព័ត៌មានថា សមយុទ្ធដែលមានឈ្មោះថា Steadfast Defender 2024 នឹងដំណើរការរហូតដល់ចុងខែឧសភា ហើយមានការចូលរួមពីបណ្តាប្រទេសជាសមាជិកទាំង៣១ របស់សម្ព័ន្ធយោធាណាតូ រួមទាំងបេក្ខភាពសមាជិកស៊ុយអែតផងដែរ ។ ឧត្តមសេនីយ៍អាមេរិករូបនេះ បានប្រាប់ក្រុមអ្នកព័ត៌មាននៅទីក្រុងប្រ៊ុចសែល បន្ទាប់ពីកិច្ចប្រជុំរយៈពេលពីរថ្ងៃរបស់ប្រមុខការពារជាតិថា សម្ព័ន្ធយោធានេះនឹងបង្ហាញសមត្ថភាពរបស់ខ្លួនក្នុងការពង្រឹងកម្លាំងនៅតំបន់អឺរ៉ូ-អាត្លង់ទិក ដោយចលនាឆ្លងកាត់អាត្លង់ទិកនៃកងកម្លាំងមកពីអាមេរិកខាងជើង ។ សមយុទ្ធដែលមានសមាសភាពនៃសមយុទ្ធមានទ្រង់ទ្រាយតូចៗជាបន្តបន្ទាប់នឹងលាតសន្ធឹងពីអាមេរិកខាងជើងទៅផ្នែកខាងកើតរបស់អង្គការណាតូជិតព្រំដែនរុស្ស៊ី។សមយុទ្ធនេះនឹងមានការរួមបញ្ចូលពីនាវាកងទ័ពជើងទឹកចំនួន៥០គ្រឿង យន្តហោះ ៨០ គ្រឿង និងរថយន្តប្រយុទ្ធជាង១.១០០គ្រឿង ។ សមយុទ្ធដែលជាការបង្ហាញសាច់ដុំយោធាដ៏ធំបំផុតចាប់តាំងពីសមយុទ្ធ Reforger ឆ្នាំ១៩៨៨ អំឡុងសង្គ្រាមត្រជាក់ បានកើតឡើង ខណៈសម្ព័ន្ធយោធា NATO ជួសជុលប្រព័ន្ធការពាររបស់ខ្លួននៅចំពោះមុខសង្រ្គាមរបស់រុស្ស៊ីលើអ៊ុយក្រែន។ សម្ព័ន្ធភាពដឹកនាំដោយសហរដ្ឋអាមេរិកបានបញ្ជូនកងទ័ពរាប់ពាន់នាក់ទៅកាន់ផ្នែកខាងកើតរបស់ខ្លួន ហើយបានរៀបចំផែនការដ៏ធំបំផុត ចាប់តាំងពីការដួលរលំសហភាពសូវៀត ដើម្បីការពារខ្លួនពីការវាយប្រហាររបស់រុស្ស៊ី៕

អង្គការសុខភាពពិភពលោក៖ មនុស្សជាង២សែននាក់ រស់នៅក្នុងតង់ រយៈពេល៣ខែ បន្ទាប់ពីការរញ្ជួយដីនៅអាហ្វហ្គានីស្ថាន

លោក Luo Dapeng អ្នកតំណាងរបស់អង្គការសុខភាពពិភពលោក(WHO) នៅក្នុងប្រទេសអាហ្វហ្គានីស្ថាន បាននិយាយទៅកាន់ប្រព័ន្ធផ្សព្វផ្សាយ NHK ក្នុងទីក្រុងតូក្យូកាលពីថ្ងៃពុធ អំឡុងដំណើរទស្សនកិច្ចរបស់លោកទៅកាន់ប្រទេសជប៉ុនថា មន្ត្រីអង្គការសុខភាពពិភពលោក និយាយថា លោកគិតថាមនុស្សប្រហែលពី ២០០.០០០នាក់ ទៅ ៣០០.០០០នាក់ នៅតែរស់នៅក្នុងតង់ នៅក្នុងប្រទេសអាហ្វហ្គានីស្ថាន រយៈពេលបីខែបន្ទាប់ពីការរញ្ជួយដីដ៏ខ្លាំង បានវាយប្រហារតំបន់ភាគខាងលិចប្រទេស។ អង្គការសុខភាពពិភពលោក(WHO) និយាយថា ការរញ្ជួយដីកាលពីខែតុលា បានសម្លាប់មនុស្សជាង ១.៤០០នាក់ របួសជាង ២.០០០នាក់ផ្សេងទៀត និងបំផ្លាញលំនៅឋានជាង ១០.០០០ខ្នង។ លោក Luo បាននិយាយថា អាហ្វហ្គានីស្ថានកំពុងស្ថិតនៅពាក់កណ្តាលនៃរដូវរងានៅពេលនេះ ហើយអាកាសធាតុនៅតំបន់ខ្ពង់រាបមានភាពត្រជាក់ខ្លាំង ហើយ ស្ថានភាពនៅតែ«មហន្តរាយខ្លាំង»។លោក Luo បាននិយាយថា ឱសថ និងបរិក្ខារពេទ្យ កំពុងមានការផ្គត់ផ្គង់ខ្វះខាត ហើយលោកបានអំពាវនាវឱ្យមានជំនួយជាបន្ទាន់។ លោកក៏បានពន្យល់ថា មនុស្សជិតកន្លះលាននាក់ បានវិលត្រឡប់ពីប្រទេសប៉ាគីស្ថាន ទៅកាន់ប្រទេសអាហ្វហ្គានីស្ថានវិញ ខណៈរដ្ឋាភិបាលប៉ាគីស្ថាន បានបញ្ជាឱ្យជនអន្តោប្រវេសន៍ ដែលគ្មានលក្ខណៈស្របច្បាប់ ឱ្យចាកចេញពីប្រទេស បើមិនដូច្នេះទេប្រឈមមុខនឹងការនិរទេស។លោកបាននិយាយថា អ្នកទាំងអស់នោះភាគច្រើន ដែលត្រឡប់មកប្រទេសអាហ្វហ្គានីស្ថានវិញ បានរស់នៅក្នុងតង់ ដោយការផ្គត់ផ្គង់ទឹក និងអាហារ មានកម្រិត។ លោកបាននិយាយបន្ថែមថា បញ្ហានេះ បានបង្កើនហានិភ័យដល់ពួកគេពីការកើតជំងឺឆ្លងតាមផ្លូវដង្ហើម។

លោក Putin និងលោក Zelenskyy ប្តេជ្ញាបន្តប្រយុទ្ធ ខណៈខួប២ឆ្នាំនៃការវាយលុកជិតចូលមកដល់

មេដឹកនាំទាំងប្រទេសរុស្ស៊ី និងអ៊ុយក្រែន ពុំបានបង្ហាញសញ្ញាសុខចិត្តចុះចាញ់នោះទេ មុនខួបពីរឆ្នាំនៅខែក្រោយ នៃការចាប់ផ្តើមការឈ្លានពានរបស់រុស្ស៊ី។ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃអង្គារថា វាច្បាស់ណាស់ថា គំនិតផ្តួចផ្តើមនេះ គឺស្ថិតនៅក្នុងដៃរបស់កងកម្លាំងរុស្ស៊ីទាំងស្រុង។ ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅក្នុងសុន្ទរកថា នៅក្នុងវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីស ថា សង្រ្គាមត្រូវតែបញ្ចប់ «ដោយសន្តិភាព និងស្ថិរភាព»។ការវិភាគមួយធ្វើឡើងដោយក្រសួងការពារជាតិចក្រភពអង់គ្លេស កាលពីថ្ងៃពុធបាននិយាយសំដៅទៅលើការប្រកាសរបស់អ៊ុយក្រែន កាលពីថ្ងៃចន្ទថា កងកម្លាំងទ័ពអាកាសរបស់ប្រទេសនេះបានបាញ់ទម្លាក់យន្តហោះរបស់រុស្ស៊ីនៅលើសមុទ្រ Azov ។ក្រសួងបាននិយាយថា ការកំណត់គោលដៅយន្តហោះដោយជោគជ័យដែលអាចធ្វើទៅបាន ដោយអ៊ុយក្រែន គឺ ជារឿងសំខាន់ ហើយវាទំនងជាថា នាពេលនេះ រុស្ស៊ី នឹងត្រូវបង្ខំឱ្យពិចារណាឡើងវិញអំពីការកំណត់តំបន់ប្រតិបត្តិការយន្តហោះរបស់ខ្លួន។ទន្ទឹមនឹងនេះ ការប្រយុទ្ធគ្នាតាមជើងគោក ត្រូវបានគេជឿថាកំពុងជាប់គាំង។ យោធាអ៊ុយក្រែនកំពុងប្រឈមនឹងការខ្វះគ្រាប់រំសេវ ខណៈការគាំទ្រពីប្រទេសលោកខាងលិចត្រូវបានផ្អាក។ទីភ្នាក់ងារសារព័ត៌មាន Reuters បានដកស្រង់សម្តីសមាជិកនៃអង្គភាពអ៊ុយក្រែន នៅជិតទីក្រុង Bakhmut ក្នុងខេត្ត Donetsk ភាគខាងកើត ថា ដើម្បីរុលទៅមុខ ដើម្បីផ្លាស់ទីសមរភូមិមុខ យើងត្រូវការគ្រាប់រំសេវ យើងត្រូវការកម្លាំងមនុស្សបន្ថែមទៀត ហើយយើងត្រូវការអាវុធ។

មនុស្សកាន់តែច្រើន ទំនងជាស្លាប់ដោយសារភាពអត់ឃ្លាន ច្រើនជាងសង្គ្រាមនៅហ្កាហ្សា

ប្រធានមូលនិធិវិនិយោគប៉ាឡេស្ទីនលោក Mohammed Mustafa បាននិយាយកាលពីថ្ងៃពុធ នៅក្នុងវេទិកាសេដ្ឋកិច្ចពិភពលោកថា មនុស្សកាន់តែច្រើននៅក្នុងតំបន់ហ្កាហ្សា ទំនងជាស្លាប់ដោយសារភាពអត់ឃ្លាន និងទុរ្ភិក្ស ច្រើនជាងសង្គ្រាម។លោក Mustafa បាននិយាយថា សហគមន៍អន្តរជាតិ ចាំបាច់ត្រូវមានចំណាត់ការឲ្យបានឆាប់រហ័ស ដើម្បីបញ្ចៀសសេណារីយ៉ូបែបនេះ ហើយលោកបានឃើញដំណោះស្រាយនយោបាយ ដែលមើលឃើញការបង្កើតរដ្ឋប៉ាឡេស្ទីនឯករាជ្យ និងអធិបតេយ្យភាព ជាភាពចាំបាច់ភ្លាមៗ។លោកបាននិយាយថា អ៊ីស្រាអែល ចាំបាច់ត្រូវជួយសម្រេចគោលដៅរបស់រដ្ឋប៉ាឡេស្ទីន ដើម្បីធានាបានស្ថិរភាព និងវិបុលភាពផ្ទាល់របស់ពួកគេ។សង្គ្រាមបានរុញច្រានប្រជាជនភាគច្រើននៅតំបន់ហ្កាហ្សាចំនួន ២,៣លាននាក់ ចេញពីលំនៅឋានរបស់ពួកគេ ដែលមួយចំនួនបានភៀសខ្លួនចេញជាច្រើនដង និងបណ្តាលឱ្យមានវិបត្តិមនុស្សធម៌ ដោយស្បៀងអាហារ ប្រេងឥន្ធនៈ និងការផ្គត់ផ្គង់ផ្នែកវេជ្ជសាស្រ្ត ធ្លាក់ចុះដល់កម្រិតទាប។មន្ត្រីសុខាភិបាលក្នុងតំបន់គ្រប់គ្រងដោយក្រុមហាម៉ាសបាននិយាយថា យុទ្ធនាការរបស់អ៊ីស្រាអែល នៅតំបន់ហ្កាហ្សា ចាប់តាំងពីការវាយលុករបស់ពួកហាម៉ាសកាលពីថ្ងៃទី ៧ ខែតុលា បានប្រែក្លាយទឹកដី ប៉ាឡេស្ទីន ភាគច្រើនទៅជាដីវាលសំរាម បណ្តាលឲ្យមនុស្សជាង ២៤.០០០នាក់ស្លាប់ និងរបួសប្រមាណ ៦១.០០០នាក់។

មន្ត្រីប៉ាឡេស្ទីន៖ យ៉ាងហោចណាស់ប្រាក់១៥ពាន់លានដុល្លារ ត្រូវការសម្រាប់សាងសង់លំនៅឋាននៅហ្កាហ្សា

ប្រធានមូលនិធិវិនិយោគប៉ាឡេស្ទីន បាននិយាយកាលពីថ្ងៃពុធថា ថវិកាយ៉ាងហោចណាស់១៥ពាន់លានដុល្លារ នឹងត្រូវការដើម្បីសាងសង់លំនៅឋានឡើងវិញនៅក្នុងតហ្កាហ្សា ដោយគូសបញ្ជាក់អំពីទំហំនៃការបំផ្លិចបំផ្លាញ បណ្តាលមកពីការវាយលុករបស់អ៊ីស្រាអែល។ ប្រធានមូលនិធិ លោក Mohammed Mustafa បាននិយាយថា របាយការណ៍អន្តរជាតិ បានបង្ហាញថា លំនៅឋានចំនួន ៣៥០.០០០ខ្នង បានរងការបំផ្លាញទាំងស្រុង ឬដោយផ្នែកនៅក្នុងតំបន់ហ្កាហ្សា។ លោកបាននិយាយថា ការសន្មត់ថាលំនៅឋាន ១៥០.០០០ខ្នង ក្នុងចំណោមលំនៅឋានទាំងនោះ នឹងចាំបាច់ត្រូវសាងសង់ឡើងវិញក្នុងតម្លៃជាមធ្យម ១០០.០០០ដុល្លារក្នុងមួយខ្នង ដែលថវិកា១៥ពាន់លានដុល្លារអាមេរិកគឺសម្រាប់លំនៅឋានខូចខាត។ លោកបាននិយាយនៅក្នុងវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីសថា យើងនៅ មិនទាន់និយាយអំពីហេដ្ឋារចនាសម្ព័ន្ធ យើងមិនទាន់បាននិយាយអំពីមន្ទីរពេទ្យដែលរងការខូចខាត និងបណ្តាញអគ្គិសនីនៅឡើយទេ។ អ៊ីស្រាអែល បានកម្ទេចឲ្យទៅជាផេះផង់នៅក្នុងទឹកដីភាគច្រើន ជាយុទ្ធនាការមួយដែលអាជ្ញាធរសុខាភិបាល តំបន់ហ្កាហ្សាគ្រប់គ្រងដោយក្រុមហាម៉ាស និយាយថាបានសម្លាប់មនុស្ស ២៤.៤៤៨នាក់ ចាប់តាំងពីថ្ងៃទី ៧ ខែតុលា នៅពេលដែលក្រុមប៉ាឡេស្ទីន បានបញ្ឆេះសង្រ្គាមដោយការវាយសម្រុកចូលប្រទេសអ៊ីស្រាអែល ដោយបានសម្លាប់មនុស្ស ១.២០០នាក់ និងបានចាប់មនុស្ស ២៤០ នាក់ធ្វើជាចំណាប់ថ្នូរ។តួលេខ ដែលបានចេញផ្សាយដោយការិយាល័យប្រព័ន្ធផ្សព្វផ្សាយ គ្រប់គ្រងដោយក្រុមហាម៉ាសនៅតំបន់ហ្កាហ្សា បង្ហាញថា លំនៅឋានជាង ៣៦០.០០០ខ្នង បានរងការខូចខាតធ្ងន់ធ្ងរ ឬដោយផ្នែក ហើយជាង ៧០.០០០ខ្នង ត្រូវបានបំផ្លាញទាំងស្រុង។លោក Mustafa បាននិយាយថា មេដឹកនាំប៉ាឡេស្ទីន នឹងបន្តផ្តោតលើជំនួយមនុស្សធម៌ រួមមានអាហារ និងទឹក ប៉ុន្តែនៅទីបំផុតក៏ផ្តោតការយកចិត្តទុកដាក់លើការផ្លាស់ប្តូរទៅការកសាងឡើងវិញផងដែរ។

ឧទ្ធម្ភាគចក្រ និងរថក្រោះរបស់អ៊ីស្រាអែល កំពុងធ្វើប្រតិបត្តិការនៅជិតព្រំដែនហ្កាហ្សា

រថយន្ត និងរថក្រោះ របស់អ៊ីស្រាអែល ត្រូវបានគេឃើញនៅជុំវិញតំបន់ហ្កាហ្សា ពីភាគខាងត្បូងប្រទេសអ៊ីស្រាអែល កាលពីថ្ងៃពុធ រួមជាមួយឧទ្ធម្ភាគចក្រ កំពុងបាញ់ផ្លោងចូលទៅក្នុងតំបន់ហ្កាហ្សា ហើយមានផ្សែងហុយឡើងយ៉ាងខ្មួលខ្មាញ់។កងកម្លាំងអ៊ីស្រាអែល បានវាយប្រយុទ្ធតាមវិធីរបស់ពួកគេទៅកាន់ភាគកណ្តាលទីក្រុង Khan Younis រយៈពេលជាងមួយខែមកហើយ ហើយរដ្ឋមន្ត្រីការពារជាតិ លោក Yoav Gallant បាននិយាយថា ប្រតិបត្តិការយោធាដ៏ខ្លាំងក្លានៅភាគខាងត្បូងកំពុងតែខិតចូលជិត ជាច្រើនសប្តាហ៍បន្ទាប់ពីសេចក្តីថ្លែងការណ៍ស្រដៀងគ្នាអំពីតំបន់ហ្កាហ្សាភាគខាងជើង។ទោះជាយ៉ាងណា ការប្រយុទ្ធគ្នា បានផ្ទុះឡើងនៅទីក្រុង Jabalia ដែលមានប្រជាជនរស់នៅច្រើន នៅភាគខាងជើងតំបន់ហ្កាហ្សាកាលពីថ្ងៃពុធ មួយថ្ងៃបន្ទាប់ពីរថក្រោះអ៊ីស្រាអែល បានដកថយពីផ្នែកមួយចំនួននៅភាគខាងជើង ដែលពួកគេបានចាកចេញកាលពីសប្តាហ៍មុន។អ៊ីស្រាអែល បានប្រកាសថាកំពុងកាត់បន្ថយប្រតិបត្តិការរបស់ខ្លួននៅភាគខាងជើងតំបន់ហ្កាហ្សា នៅដើមខែមករានេះ ជាផ្នែកនៃអ្វីដែលខ្លួនបាននិយាយថា នឹងក្លាយជាវិធីសាស្រ្តដាក់គោលដៅបន្ថែមទៀតនៅក្នុងសង្គ្រាមប្រឆាំងក្រុមសកម្មប្រយុទ្ធហាម៉ាស បន្ទាប់ពីប្រតិបត្តិការដែលបានធ្វើឱ្យតំបន់លំនៅឋានទាំងមូលរាបដល់ដី។

អាកាសធាតុត្រជាក់ខ្លាំងនៅសហរដ្ឋអាមេរិក ជំរុញឱ្យមានតម្រូវការថាមពល និងឧស្ម័នខ្ពស់បំផុត

សីតុណ្ហភាពត្រជាក់ខ្លាំងនៅក្នុងតំបន់មួយចំនួនរបស់សហរដ្ឋអាមេរិក បានបង្កឱ្យមានតម្រូវការថាមពលខ្ពស់បំផុតនៅក្នុងផ្នែកខ្លះនៃប្រទេសកាលពីថ្ងៃពុធ (១៧ មករា) បន្ទាប់ពីលំនៅឋាន និងអាជីវកម្មជាច្រើនបានប្រើប្រាស់ឧស្ម័នធម្មជាតិក្នុងបរិមាណដ៏ច្រើនសម្រាប់កម្ដៅ និងផលិតថាមពល។ព្យុះរដូវរងាដ៏ធ្ងន់ធ្ងរបានធ្វើឱ្យព្រិលធ្លាក់ពាសពេញផ្នែកដ៏ធំទូលាយនៃប្រទេសក្នុងសប្តាហ៍នេះ ដោយធ្វើឲ្យបិទរោងចក្រចម្រាញ់ប្រេងនៅឈូងសមុទ្រក្នុងរដ្ឋតិចសាស់ បង្កឱ្យដំណើរការខុសប្រក្រតីដល់រោងចក្រចម្រាញ់ប្រេងដទៃ និងកាត់បន្ថយការផលិតប្រេងរបស់រដ្ឋ ណស ដេខូតា (North Dakota) ចំនួនពាក់កណ្តាល។ទីភ្នាក់ងាររដ្ឋាភិបាលបាននិយាយថា មូលដ្ឋានប្រើប្រាស់ថាមពលដែលគ្រប់គ្រងដោយរដ្ឋាភិបាលសហរដ្ឋអាមេរិក ថេនីសស៊ី វ៉ាឡេយ (Tennessee Valley) បានឃើញកំណត់ត្រានៃតម្រូវការខ្ពស់បំផុតកាលពីព្រឹកថ្ងៃពុធ នៅពេលដែលតម្រូវការបានកើនឡើងដល់ ៣៤.៥២៦មេហ្គាវ៉ាត់ ដោយវាលើសពីកម្រិតខ្ពស់បំផុតដែលបានកំណត់កាលពីខែសីហា ឆ្នាំ២០០៧។ទោះបីជាមានការដាច់អគ្គិសនីខ្លះក៏ដោយ ក៏ប្រព័ន្ធថាមពល និងឧស្ម័នរបស់ប្រទេសនេះបានដំណើរការយ៉ាងទូលំទូលាយ ហើយឧស្ម័នហ្គាសបន្តហូរចេញផ្គត់ផ្គង់ ជៀសវាងផលវិបាកនៃព្យុះដ៏មហន្តរាយដូចកាលពីបីឆ្នាំមុន។ អាកាសធាតុត្រជាក់ខ្លាំងក្នុងខែកុម្ភៈ ឆ្នាំ២០២១ បានធ្វើឱ្យមនុស្សរាប់លាននាក់នៅក្នុងរដ្ឋតិចសាស់ និងរដ្ឋភាគកណ្តាលផ្សេងទៀតរបស់សហរដ្ឋអាមេរិកគ្មានថាមពល ទឹក និងកម្ដៅអស់រយៈពេលជាច្រើនថ្ងៃ ហើយបណ្តាលឱ្យមនុស្សជាង ២០០នាក់បានស្លាប់៕

រដ្ឋមន្ត្រីការបរទេសអ៊ីរ៉ង់៖ ការវាយប្រហារលើអ៊ីស្រាអែល នឹងបញ្ចប់ ប្រសិនបើសង្គ្រាមហ្កាហ្សា ត្រូវបញ្ឈប់

រដ្ឋមន្ត្រីការបរទេសអ៊ីរ៉ង់ បាននិយាយកាលពីថ្ងៃពុធ (១៧ មករា) ថាការវាយប្រហារប្រឆាំងនឹងអ៊ីស្រាអែល និងផលប្រយោជន៍របស់រដ្ឋជី្វហ្វនេះដោយចលនា «អ័ក្សនៃការតស៊ូ» នឹងបញ្ឈប់ ប្រសិនបើសង្គ្រាមហ្កាហ្សាបានបញ្ចប់ ដោយព្រមានថាជម្លោះនេះអាចបង្កើនភាពតានតឹងនៅទូទាំងមជ្ឈឹមបូព៌ា។សាធារណរដ្ឋអ៊ីស្លាមមួយនេះ គាំទ្រក្រុមអ៊ីស្លាមប៉ាឡេស្ទីនហាម៉ាស ក្នុងសង្រ្គាមរបស់ខ្លួនជាមួយអ៊ីស្រាអែល ដែលបានបំផ្លិចបំផ្លាញតំបន់ហ្កាហ្សាក្នុងការវាយលុកតាមអាកាស និងជើងគោក ហើយទីក្រុងតេអេរ៉ង់បានចោទប្រកាន់សហរដ្ឋអាមេរិក ថាបានគាំទ្រនូវអ្វីដែលខ្លួនហៅថាឧក្រិដ្ឋកម្មអ៊ីស្រាអែលនៅតំបន់ហ្កាហ្សា។លោក អាមីរ៉ាបឌូលឡាហអៀន (Amirabdollahian) បាននិយាយនៅឯវេទិកាសេដ្ឋកិច្ចពិភពលោកនៅទីក្រុងដេវ៉ូស ថា «ការបញ្ចប់អំពើប្រល័យពូជសាសន៍នៅក្នុងតំបន់ហ្កាហ្សា នឹងនាំទៅដល់ការបញ្ចប់សកម្មភាពយោធា និងវិបត្តិនៅក្នុងតំបន់។ សន្តិសុខនៃសមុទ្រក្រហមត្រូវបានចងភ្ជាប់ទៅនឹងការវិវឌ្ឍន៍នៅហ្កាហ្សា ហើយមនុស្សគ្រប់គ្នានឹងរងទុក្ខ ប្រសិនបើឧក្រិដ្ឋកម្មរបស់អ៊ីស្រាអែលនៅហ្កាហ្សាមិនបញ្ឈប់ ហើយសមរភូមិនៃចលនាតស៊ូទាំងអស់នឹងនៅតែសកម្ម»។កងជីវពលហ៊ួទីគាំទ្រដោយអ៊ីរ៉ង់ ដែលបានកំណត់គោលដៅលើការដឹកជញ្ជូនសមុទ្រក្រហម នៅក្នុងអ្វីដែលខ្លួនហៅថា សាមគ្គីភាពជាមួយប៉ាឡេស្ទីនប្រឆាំងនឹងអ៊ីស្រាអែល បានគំរាមកំហែងធ្វើ «ការឆ្លើយតបដ៏ខ្លាំងក្លា និងមានប្រសិទ្ធភាព» ចំពោះការវាយប្រហាររបស់សហរដ្ឋអាមេរិក និងអង់គ្លេសលើគោលដៅរបស់ខ្លួននៅយ៉េមែន៕

អាកាសធាតុរដូវរងាដ៏ធ្ងន់ធ្ងររំខានដល់ការធ្វើដំណើរទូទាំងទ្វីបអឺរ៉ុប

ភ្លៀងធ្លាក់ដ៏ត្រជាក់នៅភាគកណ្តាល និងភាគខាងត្បូងប្រទេសអាឡឺម៉ង់ បានបញ្ឈប់ជើងហោះហើររាប់រយជើង និងរំខានដល់ការធ្វើដំណើរតាមរថភ្លើងកាលពីថ្ងៃពុធ (១៧ មករា) ខណៈដែលព្រិលធ្លាក់ខ្លាំងនៅក្នុងរដ្ឋធានីរបស់ប្រទេសន័រវេស នាំឱ្យមានការបិទអាកាសយានដ្ឋានសំខាន់របស់ខ្លួនជាបណ្តោះអាសន្ន។អ្នកនាំពាក្យម្នាក់បាននិយាយថា អាកាសយានដ្ឋាន ហ្វ្រែងហ្វឺដ (Frankfurt) ដ៏ធំរបស់ប្រទេសអាឡឺម៉ង់ បានលុបចោលជើងហោះហើរទាំងអស់នៅពេលរសៀល ដោយសារយន្តហោះមិនអាចហោះចេញបានព្រោះទឹកកកបានគ្របដណ្ដប់ពីលើ ប៉ុន្តែក្រោយមកបានដំណើរការឡើងវិញជាមួយនឹងសមត្ថភាពមានកំណត់ ដោយបន្ថែមថាស្ថានភាពនៅតែមិនប្រាកដប្រជា។អាកាសយានដ្ឋាន អូស្លូ (Oslo) ក៏បានបើកដំណើរការឡើងវិញដែរ ប៉ុន្តែបាននិយាយថា ខ្លួនប្រឈមនឹងការពន្យារពេលដ៏ធំ ដែលបានធ្វើឱ្យអ្នកដំណើរជាច្រើននាក់ជាប់គាំង។ ជើងហោះហើរប្រហែល ៦៨០ជើងក្នុងចំណោម ១.០៤៧ជើងនៃការមកដល់ និងការចាកចេញរបស់អាកាសយានដ្ឋាន ហ្វ្រែងហ្វឺដ ដែលបានគ្រោងទុក ត្រូវបានលុបចោលនៅថ្ងៃនោះ។ នៅអាកាសយានដ្ឋាន ម៉ូនីច (Munich) ជើងហោះហើរចំនួន ២៥៤ជើង ត្រូវបានលុបចោល ហើយអាកាសយានដ្ឋានតូចមួយនៅភាគខាងត្បូងនៃទីក្រុង សាអាប្រ៊ូកខិន (Saarbruecken) បានបញ្ឈប់ប្រតិបត្តិការទាំងស្រុង៕

ចំនួនអ្នកស្លាប់នៅតំបន់ហ្កាហ្សា ពីការវាយប្រហាររបស់អ៊ីស្រាអែល កើនឡើងដល់ ២៤.៤៤៨នាក់

ក្រសួងសុខាភិបាលប៉ាឡេស្ទីន ស្ថិតក្នុងតំបន់រងការឡោមព័ទ្ធដោយអ៊ីស្រាអែល បាននិយាយកាលពីថ្ងៃពុធថា ចំនួនអ្នកស្លាប់របស់ពលរដ្ឋប៉ាឡេស្ទីន ពីការវាយប្រហាររបស់អ៊ីស្រាអែល លើតំបន់ហ្កាហ្សាស្ទ្រីប ចាប់តាំងពីខែតុលាមក បានកើនឡើងដល់ ២៤.៤៤៨នាក់ ។ ក្រសួងនៅក្នុងសេចក្តីថ្លែងការណ៍មួយបាននិយាយថា មនុស្ស៦១.៥០៤នាក់ នាក់ផ្សេងទៀតបានរងរបួសផងដែរ ដោយបន្ថែមថា កងកម្លាំងអ៊ីស្រាអែលបានប្រព្រឹត្តការសម្លាប់រង្គាល ១៦លើក នៅទូទាំងដែនដីឆ្នេរសមុទ្រមួយនេះ ក្នុងរយៈពេល២៤ ម៉ោងចុងក្រោយ ដែលបណ្តាលឱ្យមនុស្ស១៦៣ នាក់បានស្លាប់ និង ៣៥០ នាក់ផ្សេងទៀតបានរងរបួស។ ក្រសួងនេះ បាននិយាយថា មនុស្សជាច្រើននៅតែជាប់នៅក្រោមគំនរបាក់បែក និងនៅតាមដងផ្លូវ ហើយអ្នកជួយសង្គ្រោះមិនអាចទៅដល់ពួកគេបានទេ។ អ៊ីស្រាអែលបានវាយលុកតំបន់ហ្កាហ្សាស្ទ្រីប ចាប់តាំងពីការវាយប្រហារឆ្លងព្រំដែនកាលពីថ្ងៃទី ៧ ខែតុលា ដោយក្រុមហាម៉ាសប៉ាឡេស្ទីន ក្នុងនោះជនជាតិអ៊ីស្រាអែលជិត១.២០០នាក់ នាក់ត្រូវបានគេជឿថាត្រូវបានសម្លាប់។ យោងតាមអង្គការសហប្រជាជាតិ ប្រហែល ៨៥% នៃពលរដ្ឋហ្កាហ្សា ត្រូវបានភៀសខ្លួនដោយការវាយសម្រុកឥតឈប់ឈររបស់អ៊ីស្រាអែល ខណៈពួកគេទាំងអស់កំពុងរស់នៅដោយគ្មានសុវត្ថិភាពនិងអាហារហូបចុកគ្រប់គ្រាន់។ មនុស្សរាប់រយពាន់នាក់កំពុងរស់នៅដោយគ្មានទីជំរក ហើយតិចជាងពាក់កណ្តាលនៃរថយន្តជំនួយកំពុងចូលទៅក្នុងដែនដីជាងមុនពេលចាប់ផ្តើមជម្លោះ។ ប្រមុខអង្គការសហប្រជាជាតិលោក Antonio Guterres កាលពីថ្ងៃអង្គារបានក្រើនរម្លឹកជាថ្មីនូវការអំពាវនាវរបស់លោកឲ្យមានបទឈប់បាញ់មនុស្សធម៌ដើម្បីធានាបានជំនួយគ្រប់គ្រាន់ចូលទៅកាន់កន្លែងដែលពលរដ្ឋត្រូវការ និងជួយសម្រួលដល់ការដោះលែងចំណាប់ខ្មាំង៕

បណ្ដាញសង្គម

ព័ត៌មានថ្មីៗ

ស្នងការសហភាពអឺរ៉ុប៖សេដ្ឋកិច្ចតំបន់ចាយប្រាក់អឺរ៉ូបង្ហាញពីភាពធន់ ប៉ុន្តែកំណើននឹងថយចុះនៅឆ្នាំក្រោយ

លោក ពូទីន លើកឡើងថា មេដឹកនាំអឺរ៉ុបមួយចំនួនកំពុង «ត្រៀមខ្លួនធ្វើសង្គ្រាម» ជាមួយរុស្ស៊ី

នាយករដ្ឋមន្ត្រីនេប៉ាល់ ប្តេជ្ញាផ្តល់អាទិភាពដល់ប្រព័ន្ធជូនដំណឹងជាមុនអំពីគ្រោះមហន្តរាយ

ពិព័រណ៍ “សួស្តី ឥណ្ឌូនេស៊ី ឆ្នាំ២០២៦” ជំរុញការផ្សព្វផ្សាយផលិតផលនិងពង្រឹងពាណិជ្ជកម្មទ្វេភាគីឥណ្ឌូនេសីនិងកម្ពុជា

ការកើនឡើងនៃការប្រយុទ្ធគ្នានៅយេម៉ែន បានបង្ខំឱ្យមនុស្សរាប់ម៉ឺននាក់ភៀសខ្លួនចេញពីលំនៅឋាន

UN ៖ជម្លោះដែលកំពុងកើនឡើងនៅកុងហ្គោ ភាគខាងកើត បានបង្ខំឱ្យជនស៊ីវិលជាង ៧០.០០០ នាក់ភៀសខ្លួន

ឯកឧត្តម ហ៊ុន ម៉ានី អញ្ជើញចូលរួមសម្ពោធទីស្នាក់ការគណបក្សឃុំស្វាយរំពារ ខេត្តកំពង់ស្ពឺ

ឧត្តមសេនីយ៍ឯក យឹម លាង បញ្ជាក់ពីផែនការការពារសន្តិសុខនៃសន្និសីទអន្ដរជាតិ ស្ដីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា

[UPDATE] ឥណ្ឌូនេស៊ីស្រង់សាកសពបីនាក់បន្ថែមទៀត ខណៈ១២៦នាក់នៅតែបាត់ខ្លួនក្នុងករណីលិចនាវាចម្លងដឹកអ្នកដំណើរ

សម្ដេចតេជោ បង្ហាញចំណាប់អារម្មណ៍ទៅលើអត្ថបទរបស់អ្នកវិភាគថៃ ក្រោមចំណងជើងថា «ស្កប់ចិត្ត តែនៅមិនឈ្នះ!»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877