BTV NEWS

កម្លាំងអធិការក្រុងប៉ោយប៉ែតឃាត់ខ្លួនក្មេងទំនើងចំនួន២០នាក់ពាក់ព័ន្ធករណីដើរអុកឡុកបញ្ជូនទៅតុលាការ

កងរាជអាវុធហត្ថខេត្តបាត់ដំបងបង្ក្រាបមេក្លោងជួញដូរគ្រឿងញៀន និងបក្ខពួកជាង ១០នាក់ រួមទាំងរឹបអូសថ្នាំញៀនជាង ២០០គីឡូក្រាម

ឃាត់ខ្លួនជនសង្ស័យម្នាក់ករណីរឹតក.ប្លន់យករថយន្ដនៅខេត្តត្បូងឃ្មុំ

ស្នាក់ការសន្តិសុខកងរាជអាវុធហត្ថច្រកទ្វារព្រំដែនអន្តរជាតិ អូរស្មាច់ បង្ក្រាបក្រុមក្មេងទំនើង ៥នាក់ផឹកស៊ីកាប់គ្នា

សន្តិសុខ និង សង្គម

ជនសង្ស័យសម្លាប់នារីជាសង្សាររបស់ខ្លួន ត្រូវនគរបាលឃាត់ខ្លួនបាន នៅខេត្តសៀមរាប

ភ្នំពេញ៖ កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ ដឹកនាំសហកាជាមួយអធិការនគរបាលខណ្ឌទួលគោក ស្រាវជ្រាវឃាត់ខ្លួនជនដៃដល់ចាប់ខ្លួនបាននៅខេត្តសៀមរាប។ប្រតិបត្តិការនេះ ឃាត់ខ្លួនបានធ្វើឡើងនៅយប់ថ្ងៃទី២៨ ខែមិថុនា ឆ្នាំ២០២៤ កម្លាំងនាយកដ្ឋាននគរបាលព្រហ្មទណ្ឌ បានដឹកនាំសហការស្រាវជ្រាវជាមួយកម្លាំងស្នងការដ្ឋាននគរបាលរាជធានីភ្នំពេញ និងស្នងការដ្ឋាននគរបាលខេត្តសៀមរាប ក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ និងតំណាងអយ្យការអមសាលាដំបូងខេត្តសៀមរាប រហូតឈានដល់ការឃាត់ខ្លួនជនសង្ស័យបាននៅចំណុចមុខវិទ្យាល័យអង្គរ ក្រុងសៀមរាប ខេត្តសៀមរាប។ប្រភពព័ត៌មានបានឲ្យដឹងថា ជនសង្ស័យឈ្មោះ ចាន់ ដាលីន អាយុ២៣ឆ្នាំ ជនជាតិខ្មែរ មុខរបរ បុគ្គលិកភោជនីយ៍ដ្ឋាន មួយកន្លែង ទីលំនៅស្នាក់បន្ទប់ជួលគ្មានលេខជាន់ទី១ ផ្លូវលេខ២៨៧ ភូមិ១១ ក្រុម៤១ សង្កាត់បឹងកក់១ និងទីលំនៅកំណើតនៅសង្កាត់ទួលសង្កែ ខណ្ឌឫស្សីកែវ។ ដោយឡែក សពជនរងគ្រោះឈ្មោះ សួន មករា ភេទស្រី អាយុ២៣ឆ្នាំ ជនជាតិខ្មែ មុខរបរបុគ្គលិកភោជនីយ៍ដ្ឋាន ជាមួយគ្នានឹងជនសង្ស័យ ទីលំនៅស្នាក់នៅបន្ទប់កើតហេតុខាងលើ។ជនសង្ស័យបានសារភាពថា មូលហេតុដែលខ្លួនច្របាច់កសម្លាប់នារីដែលជាសង្សា ព្រោះតែរឿងប្រច័ណ្ឌ។គួរបញ្ជាក់ផងដែរ កាលពីយប់ថ្ងៃទី២៣ ខែមិថុនា ឆ្នាំ២០២៤ មានករណីឃាតកម្មសម្លាប់ ដែលបង្កដោយបុរសម្នាក់ ច្របាច់កសម្លាប់សង្សាខ្លួនឯងនៅចំណុចបន្ទប់ជួលគ្មានលេខជាន់ទី១ ផ្លូវលេខ២៨៧ ភូមិ១១ ក្រុម៤១ សង្កាត់បឹងកក់១ ខណ្ឌទួលគោគ រាជធានីភ្នំពេញ។ក្រោយឃាត់ខ្លួនកម្លាំងនាយកដ្ឋាននគរបាលព្រហ្មទណ្ឌ បានប្រគល់ជនសង្ស័យឲ្យអធិការដ្ឋាននគរបាលខណ្ឌទួលគោក ដើម្បីធ្វើការសួរនាំ និងកសាងសំណុំរឿងតាមនីតិវិធី៕អត្ថបទ៖ កុម្ភះ

មនុស្ស១៧ នាក់ ត្រូវបានឃុំខ្លួនបន្ទាប់ពីការប៉ុនប៉ងធ្វើរដ្ឋប្រហារ នៅប្រទេសបូលីវី

រដ្ឋមន្ត្រីរដ្ឋាភិបាល លោក អេឌ្យូអាដូ ដែល កាស្ទីឡូ(Eduardo del Castillo) បាននិយាយកាលពីថ្ងៃព្រហស្បតិ៍ថា មនុស្សចំនួន១៧នាក់ ភាគច្រើនជាសមាជិកយោធា ត្រូវបានចាប់ខ្លួននៅក្នុងប្រទេសបូលីវី សម្រាប់ការចូលរួមរបស់ពួកគេនៅក្នុងរដ្ឋប្រហារដែលមិនទទួលបានជោគជ័យ។ កាលពីថ្ងៃពុធ ទាហានរាប់រយនាក់ ដែលបានដឹកនាំដោយ ឧត្តមសេនីយ៍ ហ័ន ចូសេ ហ្សូនីហ្កា(Juan Jose Zuniga) បានដង្ហែរក្បួននៅលើទីលាន Murillo ដែលជាចំណុចកណ្តាលនៃអំណាចនយោបាយរបស់ប្រទេសបូលីវី ហើយបានបង្ខំពួកគេចូលទៅក្នុងវិមានរដ្ឋាភិបាល ក្នុងបំណងបណ្តេញប្រធានាធិបតី លោក លូអ៊ីស អាស(Luis Arce) ចេញពីតំណែង។ការស៊ើបអង្កេត បង្ហាញថា ផែនការនៃរដ្ឋប្រហារ បានចាប់ផ្តើមនៅក្នុងខែឧសភា ហើយវាត្រូវបានរៀបចំដោយក្រុមដែលបានកំណត់យ៉ាងលាស់ចំនួន៣ក្រុម រួមមានទាំងក្រុមរៀបចំផែនការ ដឹកនាំដោយ លោក Zuniga និងមេបញ្ជាការរងកងទ័ពជើងទឹក លោក ហ័ន អានណេស(Juan Arnez) ដែលត្រូវបានចាប់ខ្លួនកាលពីយប់ថ្ងៃពុធ។សមាជិកនៃក្រុមរៀបចំនិងសម្របសម្រួលទីពីរ ត្រូវបានចាប់ខ្លួនកាលពីថ្ងៃព្រហស្បតិ៍ ហើយក្រុមទីបី ត្រូវបាន លោក Del Castillo ចាត់ទុកថាមានអំពើហិង្សាបំផុត ដែលទទួលខុសត្រូវចំពោះការចូលទៅក្នុងទីលាន Murillo មានទាំងរថក្រោះ និងបានដាក់ពង្រាយអាវុធយោធាប្រឆាំងប្រជាជនបូលីវី។នគរបាល កំពុងស្វែងរកទាហានបីនាក់ទៀត ដែលកំពុងរត់គេចខ្លួន។មន្ត្រីនិយាយថា គ្រាប់រំសេវ និងអាវុធធុនធ្ងន់ ត្រូវបានរកឃើញនៅក្នុងលំនៅឋានរបស់ទាហានម្នាក់ ដែលបង្ហាញពីស្ថានភាពជាក់លាក់ និងការរៀបចំយ៉ាងល្អិតល្អន់ នៃការបះបោរនេះ។

មនុស្សម្នាក់ស្លាប់ និងជើងហោះហើរត្រូវលុបចោល ក្រោយបាក់ដំបូលអគារនៅអាកាសយានដ្ឋានរដ្ឋធានីឥណ្ឌា

ក្រុមមន្ត្រីបាននិយាយថា ដំបូលអគារមួយផ្នែកបានដួលរលំនៅក្រោមភ្លៀងធ្លាក់ខ្លាំង និងខ្យល់បក់នៅអាកាសយានដ្ឋានសំខាន់ក្នុងរដ្ឋធានីញូវដែលី (New Delhi) របស់ប្រទេសឥណ្ឌា នៅថ្ងៃសុក្រ (២៨ មិថុនា) នេះ ដោយបានសម្លាប់មនុស្សម្នាក់ និងនាំទៅដល់ការលុបចោលជើងហោះហើរពីស្ថានីយក្នុងស្រុក។ផ្នែកមួយនៃដំបូលនៅស្ថានីយចេញដំណើរទី១ នៃអាកាសយានដ្ឋានដេលី បានបាក់រលំនៅពេលព្រឹក ហើយប្រតិបត្តិការហោះហើរត្រូវបានបិទរហូតដល់ម៉ោង ២ រសៀល (ម៉ោក្នុងស្រុក) នេះបើតាមរដ្ឋមន្ត្រីអាកាសចរណ៍ឥណ្ឌាបានប្រាប់អ្នកយកព័ត៌មាន។ លោករដ្ឋមន្ត្រី ឃីនចារ៉ាពូ រ៉ាមម៉ូហាន ណៃឌូ (Kinjarapu Rammohan Naidu) បាននិយាយថា ស្ថានីយទាំងមូល ដែលជាមួយក្នុងចំណោមអាកាសយានដ្ឋានដ៏មមាញឹកបំផុតរបស់ប្រទេស ត្រូវបានជម្លៀសចេញ ហើយការស៊ើបអង្កេតត្រូវបានធ្វើឡើងក្នុងហេតុការណ៍នេះ។យោងតាមទិន្នន័យពីបណ្ដាញតាមដានជើងហោះហើរ ហ្វ្លាយរ៉ាដា២៤ (Flightradar24) យ៉ាងហោចណាស់ជើងហោះហើរ ១០ ត្រូវបានលុបចោល ហើយ ៤០ ជើងត្រូវបានពន្យារពេល។ នាយកសេវាពន្លត់អគ្គីភ័យក្រុងដេលី បាននិយាយថា មនុស្សប្រាំបីនាក់រងរបួសត្រូវបានបញ្ជូនទៅមន្ទីរពេទ្យ ហើយប្រតិបត្តិការជួយសង្គ្រោះត្រូវបានបញ្ចប់។ សេចក្តីថ្លែងការណ៍ពីអាកាសយានដ្ឋានដែលបង្ហោះនៅលើបណ្ដាញសង្គម X បាននិយាយថា ឧប្បត្តិហេតុនេះបានកើតឡើងនៅម៉ោង ៥ ព្រឹក (ម៉ោងក្នុងស្រុក) ដែលជាធម្មតាគឺជាពេលវេលាដ៏មមាញឹកសម្រាប់ជើងហោះហើរក្នុងស្រុកដែលដឹកមនុស្សទូទាំងប្រទេស៕

ការតវ៉ានៅកេនយ៉ា និងរដ្ឋប្រហារបរាជ័យនៅបូលីវី បង្ហាញពីហានិភ័យនៃវិបត្តិសេដ្ឋកិច្ច

ការតវ៉ាដ៏ខ្លាំងក្លានៅប្រទេសកេនយ៉ា ដែលធ្វើឲ្យបរាជ័យក្នុងការដំឡើងពន្ធ និងរដ្ឋប្រហារបរាជ័យ ក្នុងពេលទស្សនវិស័យសេដ្ឋកិច្ច ធ្លាក់ចុះនៅក្នុងប្រទេសបូលីវី ក្នុងសប្តាហ៍នេះ គឺជាការរំឮកអំពីហានិភ័យដែលបង្កឡើងដោយសេដ្ឋកិច្ច ធ្លាក់ចុះ និងការដាក់ទណ្ឌកម្មវិធានការរឹតត្បិតថវិកា។ប្រធានាធិបតី និងជាអតីតរដ្ឋមន្ត្រីសេដ្ឋកិច្ចរបស់ប្រទេសបូលីវី លោក លូអ៊ីស អាស (Luis Arce) បានទប់ស្កាត់ការផ្តួលរំលំរដ្ឋាភិបាលកាលពីថ្ងៃពុធ ប៉ុន្តែការប្រឈមមុខទៅនឹងការខ្វះប្រាក់ដុល្លារអាមេរិក ដែលនៅតែបន្ត និងការកើនឡើងការចំណាយលើកម្ចីឥណទាន ជំរុញឱ្យអត្រានៃភាពជឿជាក់ លើ រដ្ឋាភិបាល ធ្លាក់ចុះ។ប្រធានាធិបតី ប្រទេសកេនយ៉ា លោក William Ruto ដែលបានផ្លាស់ប្តូរការគាំទ្រសម្រាប់វិធានការដំឡើងពន្ធ ពេលនេះត្រូវតែស្វែងរកមធ្យោបាយមួយផ្សេងទៀត ដើម្បីធ្វើឱ្យគំនរបំណុលរបស់ប្រទេសលោកដែលមានចំនួនប្រហែល៨០ពាន់លានដុល្លារ អាចគ្រប់គ្រងបាន។ នៅជុំវិញពិភពលោក ប្រទេសដែលមានប្រាក់ចំណូលទាប បានធ្លាក់ចូលទៅក្នុងវិបត្តិសេដ្ឋកិច្ច ហើយក្នុងករណីខ្លះ វិបត្តិបំណុល បន្ទាប់ពីជំងឺរាតត្បាតកូវីដ-១៩ ឆ្នាំ ២០២០ បានកាត់ផ្តាច់ផ្នែកខ្លះនៃសេដ្ឋកិច្ចពិភពលោក។បច្ចុប្បន្ននេះ វិបត្តិកំពុងកើតឡើងវិញនៅក្នុងប្រទេសកេនយ៉ា ប្រទេសបូលីវី និងប្រទេសដែលមានប្រាក់ចំណូលមធ្យមផ្សេងទៀត ដែលទទួលរងពីការកើនឡើងអតិផរណា និងការកើនឡើងអត្រាការប្រាក់ពិភពលោកយ៉ាងឆាប់រហ័ស ដែលបានកើតឡើងបន្ទាប់ពីជំងឺរាតត្បាត។ ការចំណាយលើកម្ចីឥណទាន បានកើនឡើង ហើយសង្គ្រាមរុស្ស៊ីនៅអ៊ុយក្រែន បានធ្វើឱ្យតម្លៃប្រេងឥន្ធនៈ និងស្បៀងអាហារ កើនឡើងកាន់តែធ្ងន់ធ្ងរ។

អ៊ីស្រាអែល បំផ្លាញផ្នែកដ៏ធំនៃភូមិមួយនៅលីបង់ ស្របពេលមានការភ័យខ្លាចថាសង្គ្រាមកាន់តែធំ

រូបភាពពីផ្កាយរណប បង្ហាញពីផ្នែកភាគច្រើននៃភូមិ អៃតា អាល់-ស្ហាអាប (Aita al-Shaab) របស់ប្រទេសលីបង់ ស្ថិតនៅក្នុងការបំផ្លិចបំផ្លាញ បន្ទាប់ពីការវាយប្រហារតាមអាកាសជាច្រើនខែរបស់អ៊ីស្រាអែល ដែលជាទំហំដ៏ធំនៃការខូចខាតនៅក្នុងបន្ទាយសំខាន់មួយរបស់ក្រុមហេសបូឡា (Hezbollah) នៅភាគខាងត្បូងលីបង់ ខណៈមានការភ័យខ្លាចថាសង្រ្គាមរីកកាន់តែធំ។រូបភាពពីប្រតិបត្តិករផ្កាយរណបឯកជន ផ្លេណេត លែបស៍ ភីប៊ីស៊ី (Planet Labs PBC) ដែលថតនៅថ្ងៃទី០៥ ខែមិថុនា និងវិភាគដោយសារព័ត៌មានរ៉យទ័រ បង្ហាញទីតាំងដែលត្រូវបានបំផ្លាញយ៉ាងហោចណាស់ ៦៤ កន្លែងនៅភូមិនេះ ដោយទីតាំងជាច្រើនទៀតពោរពេញដោយការបំផ្លិចបំផ្លាញ។អ៊ីស្រាអែលនិយាយថា ការបាញ់ប្រហារពីប្រទេសលីបង់ បានសម្លាប់ទាហាន ១៨នាក់ និងជនស៊ីវិល ១០នាក់ ហើយការវាយប្រហាររបស់អ៊ីស្រាអែល បានសម្លាប់យុទ្ធជនហេសបូឡា ជាង ៣០០នាក់ និងជនស៊ីវិល ៨៧ នាក់ នេះបើយោងតាមតួលេខរបស់សារព័ត៌មានរ៉យទ័រ។ ប្រធានភូមិ អៃតា អាល់-ស្ហាអាប លោក ម៉ូហាម៉េដ ស្រួ (Mohamed Srour) បាននិយាយថា ភាគច្រើននៃអ្នកស្រុក ១៣.៥០០ ដែលរស់នៅភូមិនេះបានភៀសខ្លួននៅក្នុងខែតុលា នៅពេលដែលអ៊ីស្រាអែលចាប់ផ្តើមធ្វើការវាយប្រហារលើអគារ និងព្រៃឈើនៅក្បែរនោះ។ ជម្លោះនាពេលបច្ចុប្បន្ននេះបានចាប់ផ្តើមមួយថ្ងៃប៉ុណ្ណោះបន្ទាប់ពីការវាយប្រហាររបស់ហាម៉ាស កាលពីថ្ងៃទី០៧ ខែតុលា ទៅលើអ៊ីស្រាអែល នៅពេលដែលក្រុមហេសបូឡា បានបើកការបាញ់ប្រហារក្នុងសាមគ្គីភាពជាមួយសម្ព័ន្ធមិត្តប៉ាឡេស្ទីនរបស់ខ្លួន។ ក្រុមនេះបាននិយាយថា ខ្លួននឹងបញ្ឈប់អរិភាពនៅពេលដែលការវាយលុករបស់អ៊ីស្រាអែល លើតំបន់ហ្កាហ្សា ត្រូវបានបញ្ចប់៕

ការតវ៉ានៅកេនយ៉ា នៅតែបន្ត ខណៈអ្នកស្លាប់ឡើងដល់២៣នាក់ បន្ទាប់ពីការដំឡើងពន្ធរបស់ប្រធានាធិបតី

លោកប្រធានាធិបតីកេនយ៉ា វីលៀម រូតូ (William Ruto) បានប្រកាសដកការដំឡើងពន្ធដែលបានស្នើឡើង។ប៉ុន្តែទោះយ៉ាងនោះក៏ដោយ ក៏ពុំបានរារាំងបាតុករមួយចំនួននៅតាមដងផ្លូវកាលពីថ្ងៃព្រហស្បតិ៍ ២៧ មិថុនាសប្ដាហ៍នេះដែរ។ នគរបាល កេនយ៉ាបានបាញ់ឧស្ម័នបង្ហូរទឹកភ្នែកទៅលើបាតុកររាប់សិបនាក់ និងបានបិទផ្លូវទៅកាន់ វិមានប្រធានាធិបតី ខណៈបាតុកម្មនៅតែបន្តនៅក្នុងទីក្រុងជាច្រើន។ចំនួនអ្នកចូលរួមបានធ្លាក់ចុះច្រើន មិនដូចការប្រមូលផ្តុំដ៏ធំកាលពីសប្តាហ៍មុន ដែលត្រូវបានបង្កឡើងដោយសំណើច្បាប់ហិរញ្ញវត្ថុដ៏ចម្រូងចម្រាសមួយ។ប៉ុន្តែប្រជាពលរដ្ឋមួយចំនួននិយាយថាពួកគេនៅតែបន្តការតវ៉ា។ ពួកគេបាននិយាយថា យើងគ្រាន់តែមកទីនេះ ដើម្បីឲ្យរដ្ឋាភិបាលលឺសំឡេងរបស់យើង ក៏ដូចជាជនជាតិកេនយ៉ាទាំងអស់ យើងគឺតែមួយ។ ដូច្នេះកងកម្លាំងនគរបាល គួរតែបញ្ឈប់ការសម្លាប់ពួកយើងទៅ។យោងតាមសមាគមវេជ្ជសាស្ត្រកេនយ៉ា បានឱ្យដឹងថា មនុស្សយ៉ាងហោចណាស់ ២៣ នាក់ត្រូវបានសម្លាប់នៅក្នុងការប៉ះទង្គិចគ្នាកាលពីថ្ងៃអង្គារ ២៥ មិថុនា ហើយ៣០ នាក់កំពុងត្រូវបានព្យាបាលរបួសដោយគ្រាប់កាំភ្លើង។នៅក្នុងស្ថានភាពដ៏ច្របូកច្របល់ សភាត្រូវបានក្រុមបាតុករវាយសម្រុកចូលមួយរយៈខ្លី ហើយបានដុតបំពួកភ្លើង។កាលពីថ្ងៃពុធ ២៦ មិថុនា លោករូតូ បានការពារការជំរុញរបស់លោកលើការដំឡើងពន្ធលើទំនិញដូចជា នំប៉័ង ប្រេងឆា និងខោទឹកនោមកូនក្មេង ដោយនិយាយថា វិធានការគឺសមហេតុផលដោយសារតម្រូវការកាត់បន្ថយបន្ទុកបំណុលខ្ពស់របស់ប្រទេសកេនយ៉ា៕

UN ព្រមានពីការស្លាប់ដោយប្រើថ្នាំលើសកម្រិត បន្ទាប់ពីការផលិតអាភៀនអាហ្វហ្គានីស្ថាន ធ្លាក់ចុះ

របាយការណ៍របស់អង្គការសហប្រជាជាតិ បាននិយាយកាលពីថ្ងៃពុធ (២៦ មិថុនា) ថា បទបញ្ជាបង្រ្គាបផលិតកម្មអាភៀនដោយពួកតាលីបង់ នៅអាហ្វហ្គានីស្ថាន ដែលជាអ្នកផ្គត់ផ្គង់ដ៏លេចធ្លោរបស់ពិភពលោក អាចជំរុញឱ្យមានការស្លាប់ដោយសារការប្រើប្រាស់ថ្នាំហួសកម្រិត ខណៈអ្នកប្រើប្រាស់គ្រឿងញៀនហេរ៉ូអ៊ីន ប្តូរទៅប្រើអាភៀនសំយោគផ្សេង ដែលបង្កឱ្យមានការស្លាប់ជាច្រើនរួចទៅហើយនៅក្នុងទ្វីបអឺរ៉ុប។ ការដាំដុះអាភៀន ដែលផលិតសារធាតុហេរ៉ូអ៊ីនបានធ្លាក់ចុះ ៩៥ ភាគរយនៅអាហ្វហ្គានីស្ថាន កាលពីឆ្នាំមុន បន្ទាប់ពីក្រុមតាលីបង់ បានហាមឃាត់ការផលិតគ្រឿងញៀនក្នុងឆ្នាំ ២០២២។ ការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) បាននិយាយនៅក្នុងរបាយការណ៍ប្រចាំឆ្នាំរបស់ខ្លួនកាលពីថ្ងៃពុធ លើផលប៉ះពាល់នៃការថយចុះការផ្គត់ផ្គង់អាភៀនថា «តម្រូវការសម្រាប់សេវាព្យាបាលអាភៀនអាចនឹងកើនឡើង ប៉ុន្តែប្រសិនបើសេវាកម្មទាំងនោះមិនគ្រប់គ្រាន់ អ្នកប្រើប្រាស់ហេរ៉ូអ៊ីនអាចប្តូរទៅប្រើថ្នាំអាភៀនផ្សេងទៀត»។របាយការណ៍បន្ថែមថា «ការផ្លាស់ប្តូរបែបនេះអាចបង្កហានិភ័យយ៉ាងធ្ងន់ធ្ងរដល់សុខភាព និងនាំឱ្យមានកំណើននៃការប្រើប្រាស់លើសកម្រិត ជាពិសេសប្រសិនបើថ្នាំអាភៀនជំនួសនោះរួមមានសារធាតុដែលមានឥទ្ធិពលខ្លាំងដូចជា ហ្វង់តានីល (fentanyl) ឬ នីតាហ្សែនស៍ (nitazenes) ដែលបានចែកចាយរួចហើយនៅក្នុងបណ្តាប្រទេសអឺរ៉ុបមួយចំនួនក្នុងប៉ុន្មានឆ្នាំថ្មីៗនេះ»។ប្រធានផ្នែកស្រាវជ្រាវរបស់ការិយាល័យ UNODC លោកស្រី អេនជែលឡា មី (Angela Me) បានប្រាប់អ្នកយកព័ត៌មានថា ការស្លាប់ជាច្រើនដោយប្រើសារធាតុ នីតាហ្សែនស៍ លើសកម្រិត ដែលជាប្រភេទអាភៀនសំយោគខ្លាំងជាង ហ្វង់តានីល ត្រូវបានរាយការណ៍នៅក្នុងប្រទេសអៀរឡង់ ចក្រភពអង់គ្លេស អេស្តូនី និងឡាតវី៕

ប្រជាជនប៉ាឡេស្ទីន ៦០នាក់ បានស្លាប់ក្នុងការវាយប្រហាររបស់អ៊ីស្រាអែលនៅហ្កាហ្សា ក្នុងរយៈពេល ២៤ម៉ោង

ក្រសួងសុខាភិបាលប៉ាឡេស្ទីន បាននិយាយថា យ៉ាងហោចណាស់ប្រជាជនប៉ាឡេស្ទីន ៦០នាក់ ត្រូវបានសម្លាប់ ក្នុងរយៈពេល ២៤ម៉ោងចុងក្រោយនេះ នៅក្នុងការវាយប្រហារតាមអាកាសរបស់អ៊ីស្រាអែល និងការបាញ់ផ្លោង ទៅលើតំបន់ហ្កាហ្សាស្ទ្រីប។យោងតាមក្រសួងសុខាភិបាល ក្នុងរយៈពេល ២៤ម៉ោងកន្លងមកនេះ សាកសពជនជាតិប៉ាឡេស្ទីន ៦០ នាក់ ដែលត្រូវបានសម្លាប់ នៅក្នុងការវាយឆ្មក់តាមអាកាស ឬការបាញ់ផ្លោងដោយកងទ័ពអ៊ីស្រាអែល នៅក្នុងតំបន់ផ្សេងៗនៃទឹកដីនេះ ត្រូវបានបញ្ជូនទៅកន្លែងបញ្ចុះសព នៅតំបន់ហ្កាហ្សាស្ទ្រីប»។ ទីភ្នាក់ងារនេះ បានបន្ថែមថា យ៉ាងហោចណាស់ជនជាតិអារ៉ាប់ចំនួន ១៤០នាក់ បានរងរបួស។យោងតាមទីភ្នាក់ងារនេះ ចាប់តាំងពីការចាប់ផ្តើមប្រតិបត្តិការយោធារបស់អ៊ីស្រាអែលមក ប្រជាជនប៉ាឡេស្ទីនចំនួន ៣៧,៧១៨ នាក់ ត្រូវបានសម្លាប់ និង ៨៦,៣៧៧ នាក់ បានរងរបួស។ភាពតានតឹង បានផ្ទុះឡើងម្តងទៀតនៅមជ្ឈិមបូព៌ា នៅថ្ងៃទី ៧ ខែតុលា ឆ្នាំ ២០២៣ នៅពេលដែលក្រុម សកម្មប្រយុទ្ធមកពីក្រុមបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សា បានចាប់ ផ្តើមការលុកលុយដ៏គួរឲ្យភ្ញាក់ផ្អើលមួយ ចូលទៅក្នុងទឹកដីអ៊ីស្រាអែល ពីតំបន់ហ្កាហ្សាស្ទ្រីប។ ក្រុមហាម៉ាសបានពណ៌នាអំពីការវាយប្រហាររបស់ខ្លួនថា ជាការឆ្លើយតបទៅនឹងសកម្មភាពឈ្លានពានរបស់អាជ្ញាធរអ៊ីស្រាអែលប្រឆាំងនឹងវិហារឥស្លាម Al-Aqsa នៅលើប្រាសាទភ្នំ (Temple Mount) ក្នុងទីក្រុងចាស់របស់រដ្ឋធានីហ្ស៊េរុយសាឡឹម។

ឧត្តមសេនីយ៍ឯក ចេវ ហាក់៖ «ការត្រួតពិនិត្យជាតិស្រវឹងពេលយប់អាចជួយកាត់បន្ថយគ្រោះថ្នាក់ចរាចរណ៍ជាង៥០ភាគរយ»

ការត្រួតពិនិត្យជាតិស្រវឹងចំពោះអ្នកបើកបរយានយន្ត អាចជួយកាត់បន្ថយគ្រោះថ្នាក់ចរាចរណ៍ជាង៥០ភាគរយ នៅពេលយប់ ហើយកម្លាំងសមត្ថកិច្ចចម្រុះនឹងបន្តការត្រួតពិនិត្យជាតិស្រវឹងដូចភ្លៀងរលឹមចំពោះអ្នកបើកបរនាពេលយប់ ទូទាំងប្រទេស ជាពិសេសគឺនៅក្នុងរាជធានីភ្នំពេញដែលមានចរាចរណ៍មមាញឹក។ នេះបើតាមលោកឧត្តមសេនីយ៍ឯក ចេវ ហាក់ អគ្គស្នងការរង នៃអគ្គស្នងការដ្ឋាននគរបាលជាតិ ។ថ្លែងក្នុងសន្និសីទសារព័ត៌មានលើកទីពីរ ដែលរៀបចំដោយក្រុមអ្នកនាំពាក្យក្រសួងមហាផ្ទៃ នារសៀលថ្ងៃទី២៥ ខែមិថុនា ឆ្នាំ២០២៤ លើប្រធានបទការអនុវត្តច្បាប់ស្ដីពីចរាចរណ៍ផ្លូវគោក លោកឧត្តមសេនីយ៍ឯក ចេវ ហាក់ បានបង្ហាញសុទ្ធិដ្ឋិនិយមចំពោះវិធានការតឹងបន្តឹងការអនុវត្តច្បាប់ស្តីពីចរាចរណ៍ផ្លូវគោកគ្រប់រាជធានី ខេត្ត ជាពិសេសគឺ នាពេលយប់ ដើម្បីជួយថែរក្សាសណ្តាប់ធ្នាប់ សុវត្ថិភាពសង្គម កាត់បន្ថយការរបួស និងការបាត់បង់អាយុជីវិតរបស់ប្រជាពលរដ្ឋ។លោកឧត្តមសេនីយ៍ឯក អគ្គស្នងការរង ទទួលផែនចរាចរណ៍និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឆ្លើយនឹងសំណួររបស់អ្នកសារព័ត៌មានថា ករណីគ្រោះថ្នាក់ចរាចរណ៍ទូទាំងប្រទេសភាគច្រើន បានកើតឡើងនៅពេលយប់ ពោលគឺ៥៥ភាគរយ ដោយសារកត្តាបើកបរបញ្ជាយានយន្តក្នុងល្បឿនលឿន និងមានផ្ទុកជាតិស្រវឹងក្នុងខ្លួនអ្នកបើកបរបញ្ជាយានយន្តតែម្តង។ ផ្អែកកត្តានេះហើយដើម្បីការពារអាយុជីវិតអ្នកបើកបរ និងប៉ះពាល់សណ្តាប់ធ្នាប់សាធារណៈ ឧត្តមសេនីយ៍ឯកអគ្គស្នងរង បានមានប្រសាសន៍បញ្ជាក់ថា កម្លាំងសមត្ថកិច្ចនឹងមិនដកថយក្នុងការត្រួតពិនិត្យជាតិស្រវឹងនៅទូទាំងប្រទេសឡើយ ជាពិសេសនៅក្នុងរាជធានី តាមភូមិសាស្រ្តទាំង១៤ខណ្ឌ ដោយសមត្ថកិច្ចបានដាក់កម្លាំងចម្រុះផ្លាស់ប្តូវេនគ្នា ដើម្បីអនុវត្តការត្រួតពិនិត្យចន្លោះពីម៉ោង ១០យប់រហូតដល់ម៉ោង៤ភ្លឺ។ ក្រៅពីជួយកាត់បន្ថយករណីគ្រោះថ្នាក់ចរាចរណ៍ហើយ លោកឧត្តមសេនីយ៍ឯកបានបន្ថែមថា ការត្រួតពិនិត្យពេលយប់នេះក៏ជួយកាត់បន្ថយបទល្មើសព្រហ្មទណ្ឌនៅរាជធានីភ្នំពេញ ពេលយប់ផងដែរ។លោកឧត្តមសេនីយ៍ឯក អគ្គស្នងការរង ទទួលផែនចរាចរណ៍និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបញ្ជាក់ថា៖«ការត្រួតពិនិត្យគ្រឿងស្រវឹងពេលយប់នេះ បានជួយកាត់បន្ថយករណីគ្រោះថ្នាក់ចរាចរណ៍ដែលបណ្តាលឱ្យមនុស្សបាត់បង់ជីវិតជាង៥០ភាគរយ ដោយសារអ្នកបើកបរលឿន និងមានជាតិស្រវឹង ដូច្នេះយើងបន្តរឹងបន្តឹងការអនុវត្តបន្ថែមទៀតនៅទូទាំងប្រទេស ជាពិសេសនៅរាជធានីភ្នំពេញ»។យោងតាមរបាយការណ៍ ក្នុងរយៈពេល៥ខែ ដើមឆ្នាំ២០២៤ មានគ្រោះថ្នាក់ចរាចរណ៍ទូទាំងប្រទេសកើតឡើងសរុបចំនួន១ ២៩៦ករណី ក្នុងនោះ៥៥ភាគរយកើតឡើងនៅពេលយប់។ បើតាមលោកឧត្តមសេនីយ៍ឯក ចេវ ហាក់ ចំនួនអ្នកស្លាប់បានកើនឡើង៧ភាគរយ ធៀបនឹងឆ្នាំ២០២៣ ខណៈមូលហេតុនៃគ្រោះថ្នាក់ មាន៤០ភាគរយ កើតឡើងដោយសារបើកហួសល្បឿន មិនគោរពសិទ្ធិអាទិភាពមាន២៤ភាគរយ មិនប្រកាន់ស្ដាំ៩ភាគរយ និងមិនប្រយ័ត្ន៨ភាគរយ។គួរបញ្ជាក់ថា បញ្ហាចរាចរណ៍ស្ថិតក្នុងចំណោមអាទិភាព៦ចំណុច ដែលឯកឧត្តមអភិសន្តិបណ្ឌិត ប្ដេជ្ញាបង្កើនការយកចិត្តទុកដាក់អនុវត្ត៕

តាមរយៈ App NoDrug កម្លាំងសមត្ថកិច្ចឃាត់ជនសង្ស័យ២នាក់ ដកហូតគ្រឿងញៀនមួយចំនួន នៅសង្កាត់អូរជ្រៅ ក្រុងប៉ោយប៉ែត

បន្ទាប់ពីទទួលបានសេចក្ដីរាយការណ៍ពីប្រជាពលរដ្ឋតាមរយ: App Nodrug របស់អាជ្ញាធរជាតិប្រយុទ្ធប្រឆាំងគ្រឿងញៀន នាថ្ងៃទី២៥ ខែមិថុនា ឆ្នាំ២០២៤ កម្លាំងអធិការដ្ឋាននគរបាលក្រុងប៉ោយបែត បានធ្វើការស្រាវជ្រាវ និងឈានដល់ការបង្ក្រាបករណីជាក់ស្តែង ពាក់ព័ន្ធបទល្មើសរក្សាទុក និងប្រើប្រាស់ដោយខុសច្បាប់នូវសារធាតុញៀន ស្ថិតនៅចំណុចភូមិអូរជ្រៅ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ជាលទ្ធផលក្នុងប្រតិបត្តិការនេះ កម្លាំងនគរបាលជំនាញ បានឃាត់ខ្លួនជនសង្ស័យចំនួន២នាក់ និងដកហូតបានវត្ថុតាងមួយចំនួន រួមមាន៖១៖ សារធាតុញៀនចំនួន១កញ្ចប់តូច២៖ ថ្នាំគ្រាប់ (WY) ពណ៌ក្រហម ចំនួន១០៦គ្រាប់ និងពណ៍បៃតងចំនួន៤គ្រាប់៣៖ ម្សៅម្មត់សង្ស័យជាសាធាតុញៀនចំនួន២៤៖ ទូរស័ព្ទដៃចំនួន២គ្រឿង និងលិខិតឆ្លងដែន១ក្បាល៥៖ ដែកកេះ និងឧបករណ៍ប្រើប្រាស់ចំនួន១៦៖ ដបសម្រាប់ប្រើប្រាស់ និងទុយោចំនួន២៧៖ ថង់សម្រាប់ច្រកគ្រឿងញៀន និងកាបូបដាក់ថ្នាំញៀនចំនួន១។បច្ចុប្បន្នជនសង្ស័យទាំង២នាក់ ត្រូវបានបញ្ជូនទៅកាន់អធិការដ្ឋាននគរបាលក្រុងប៉ោយប៉ែត ដើម្បីសាកសួរបន្ត និងកសាងសំណុំរឿងចាត់ការតាមនីតិវិធីច្បាប់៕

បណ្ដាញសង្គម

ព័ត៌មានថ្មីៗ

ស៊ុយអែត សម្លឹងដល់ការបញ្ជូនអ្នកទោសទៅក្រៅប្រទេស ខណៈពន្ធនាគារពេញដោយសាររលកឧក្រិដ្ឋកម្មរបស់ក្រុមអន្ធពាល

[UPDATE] ចំនួនអ្នកស្លាប់កើនដល់ជិត ៤០នាក់ ក្នុងឧបទ្ទវហេតុប្រជ្រៀតជាន់គ្នា អំឡុងពេលប្រារព្ធពិធីសាសនារបស់ឥណ្ឌា

UNRWA នៅលីបង់៖ មិនរងប៉ះពាល់ដោយសារការផ្អាកជំនួយរបស់អាមេរិក ឬច្បាប់អ៊ីស្រាអែលថ្មី

រដ្ឋមន្ត្រីការពារជាតិអូស្ត្រាលី៖ សមភាគីអាមេរិក លោក Hegseth បានប្តេជ្ញាចិត្ត ចំពោះឥណ្ឌូ-ប៉ាស៊ីហ្វិក

សម្ដេចធិបតី នាយករដ្ឋមន្រ្ដីឆ្លៀតចុះពិនិត្យមើលស្ថានភាពបូមទឹកសង្គ្រោះស្រូវប្រាំងពលរដ្ឋជិត១ម៉ឺនហិកតានៅស្រុកស្អាង និងស្រុកព្រៃកប្បាស

ក្រុមហ៊ុន Boeing រាយការណ៍ពីកំហាតដុល នៅត្រីមាសទី៤ និងការធ្លាក់ចុះចំណូល

រដ្ឋមន្ត្រី៖ រុស្ស៊ីនឹងនាំចេញគ្រាប់ធញ្ញជាតិប្រមាណ ៥៧លានតោន ក្នុងរដូវប្រមូលផលនេះ

ប្លុកអាហ្រ្វិកខាងលិច ប្រកាសពីការចាកចេញជាផ្លូវការនៃរដ្ឋដឹកនាំដោយរបបយោធាចំនួន៣

ប្រេស៊ីលនឹងបង្កើតមជ្ឈមណ្ឌលទទួលអ្នកនិរទេស បន្ទាប់ពីមានជម្លោះជើងហោះហើរមកពីអាមេរិក

លោកជំទាវ ងិន សូនាថ អញ្ជើញចុះត្រួតពិនិត្យស្ថានភាពប្រមូលផលស្រូវប្រាំង និងពិនិត្យស្រូវដែលកំពុងប្រឈមនឹងការខ្វះខាតទឹករបស់ប្រជាពលរដ្ឋ ក្នុងភូមិសាស្រ្តខេត្តសៀមរាប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877