BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

ជនស៊ីវិលរាប់សិបនាក់ បានស្លាប់ក្នុងការវាយប្រហារដោយយានដ្រូននៅភាគខាងជើងនីហ្ស៊េរីយ៉ា

ជនស៊ីវិលរាប់សិបនាក់ ត្រូវបានសម្លាប់នៅក្នុងរដ្ឋកាដុណា (Kaduna) ភាគខាងជើងនៃប្រទេសនីហ្ស៊េរីយ៉ា បន្ទាប់ពីការវាយប្រហារដោយយានដ្រូនរបស់យោធា សំដៅទៅលើក្រុមបះបោរ និងក្រុមចោរកាលពីយប់ថ្ងៃអាទិត្យ នេះបើយោងតាមអភិបាលរដ្ឋ មេដឹកនាំសាសនា និងសាក្សីបាននិយាយកាលពីថ្ងៃច័ន្ទ (០៤ ធ្នូ)។យោធារបស់ប្រទេសនីហ្ស៊េរីយ៉ា ដែលត្រូវបានគាំទ្រដោយសហរដ្ឋអាមេរិក អង់គ្លេស និងសម្ព័ន្ធមិត្តមិនមែនលោកខាងលិចផ្សេងទៀតនៅក្នុងសង្រ្គាមដ៏យូរប្រឆាំងនឹងក្រុមបះបោរអ៊ីស្លាមនៅភាគឦសាននោះ ក៏បាននិងកំពុងបញ្ចេញការវាយប្រហារតាមអាកាសយ៉ាងបង្ហូរឈាមអស់រយៈពេលជាច្រើនឆ្នាំនៅក្នុងតំបន់ផ្សេងទៀតនៃប្រទេសនេះ។អភិបាលរដ្ឋកាដុណា លោក អ៊ុបា សានី (Uba Sani) បាននិយាយថា ជនជាតិមូស្លីមដែលចូលរួមក្នុងពិធីបុណ្យ ម៉ូលុត (Maulud) នៅក្នុងភូមិទុដាន ប៊ីរី (Tudun Biri) «ត្រូវបានសម្លាប់ដោយច្រឡំ និងមនុស្សជាច្រើននាក់ទៀតរងរបួស បន្ទាប់ពីការវាយប្រហារដោយយានដ្រូនយោធា សំដៅទៅលើក្រុមភេរវករ និងក្រុមចោរ»។លោក សានី មិនបានផ្តល់ការចង្អុលបង្ហាញអំពីចំនួនអ្នកស្លាប់នោះទេ ប៉ុន្តែមេដឹកនាំសាសនាម្នាក់បាននិយាយថា មានមនុស្សស្លាប់ចំនួន ៥០នាក់ បុន្តែសាក្សីពីរនាក់បាននិយាយថា មនុស្ស៨០នាក់ ត្រូវបានសម្លាប់៕

អង្គការសហប្រជាជាតិនិយាយថា ស្ថានភាពដ៏មហន្តរាយនៅតំបន់ហ្កាហ្សា កាន់តែធ្ងន់ធ្ងរខ្លាំង

មន្ត្រីជាន់ខ្ពស់នៅអង្គការសហប្រជាជាតិកំពុងព្រមានអំពីស្ថានភាពដ៏មហន្តរាយកាន់តែធ្ងន់ធ្ងរ នៅក្នុងតំបន់ហ្កាហ្សា ដែលហែកហួរដោយសង្រ្គាម ដោយគ្មានកន្លែងសុវត្ថិភាពត្រូវទៅទេសម្រាប់ជនស៊ីវិល ខណៈសង្រ្គាមរបស់អ៊ីស្រាអែលជាមួយក្រុមហាម៉ាស បានរាលដាលទៅភាគខាងត្បូង ជាទីដែលមនុស្សជាច្រើន ធ្លាប់បានស្វែងរកកន្លែងជ្រកកោន ។ លោក ម៉ាទីន គ្រីនហ្វីត (Martin Griffiths) មន្ត្រីជាន់ខ្ពស់ទទួលបន្ទុកការផ្ដល់ជំនួយគ្រាអាសន្នរបស់អង្គការសហប្រជាជាតិបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា រាល់ពេលដែលយើងគិតថាមិនចង់ឲ្យមានគ្រោះមហន្តរាយកាន់តែអាក្រក់កើតឡើងនៅក្នុងតំបន់ហ្កាហ្សា ស្ថានភាពទាំងនោះបានកើតឡើង ។ លោកនិយាយថា មនុស្សត្រូវបានគេបញ្ជាឲ្យផ្លាស់ទីម្តងទៀត ដោយមានធនធានតិចតួចប៉ុណ្ណោះដើម្បីបន្តរស់ ដោយបង្ខំឲ្យរើសយកជម្រើសមួយដែលមិនអាចទៅរួចបន្ទាប់ពីជម្រើសផ្សេងទៀត។លោកក៏បាននិយាយថា ការមិនយកចិត្តទុកដាក់ទាល់តែសោះចំពោះមនុស្សជាតិជាចម្បងត្រូវតែបញ្ឈប់។អ៊ីស្រាអែលបាននិងកំពុងបង្កើនការទម្លាក់គ្រាប់បែកតាមអាកាសលើតំបន់ហ្កាហ្សាភាគខាងត្បូង តាមប្រមាញ់ក្រុមសកម្មប្រយុទ្ធប៉ាឡេស្ទីន ហាម៉ាស ហើយបាននិយាយកាលពីចុងសប្តាហ៍ថា ខ្លួននឹងពង្រីកប្រតិបត្តិការថ្មើរជើងលើដែនដីនេះទាំងមូល។អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃចន្ទបានអំពាវនាវដល់ កងកម្លាំងការពារអ៊ីស្រាអែល ឱ្យជួយសង្គ្រោះជនស៊ីវិលកុំឲ្យរងទុក្ខបន្ថែមទៀត រួមទាំងបុគ្គលិកសុខាភិបាល អ្នកសារព័ត៌មាន បុគ្គលិកអង្គការសហប្រជាជាតិ និងហេដ្ឋារចនាសម្ព័ន្ធស៊ីវិលត្រូវតែត្រូវបានការពារគ្រប់ពេលវេលា៕

យ៉ាងហោចណាស់មនុស្ស ៩នាក់ស្លាប់ ខណៈព្យុះស៊ីក្លូន Michaung ខិតជិតប្រទេសឥណ្ឌា

ពលរដ្ឋបានជួបការលំបាកនៅតាមដងផ្លូវលិចទឹក និងក្រោមភ្លៀងធ្លាក់ខ្លាំងនៅទីក្រុង Chennai រដ្ឋធានីនៃរដ្ឋ Tamil Nadu របស់ប្រទេសឥណ្ឌា កាលពីថ្ងៃចន្ទ ខណៈពួកគេត្រៀបទប់ទល់នឹងឥទ្ធិពលនៃព្យុះស៊ីក្លូនដែលនឹងវាយបក់ខ្លាំង។រដ្ឋមន្ត្រីគ្រប់គ្រងគ្រោះមហន្តរាយរដ្ឋ និងមន្ត្រីជាន់ខ្ពស់ បាននិយាយថា យ៉ាងហោចណាស់មនុស្ស ៩នាក់បានស្លាប់នៅក្នុងឧបទ្ទវហេតុទាក់ទងនឹងភ្លៀងធ្លាក់នៅក្នុងរដ្ឋ Tamil Nadu ដែលក្នុងនោះមានមនុស្ស២នាក់បានស្លាប់នៅពេលជញ្ជាំងអគារបានបាក់រលំ។សារព័ត៌មាន Reuters បានរាយការណ៍ថា មានការដាច់ចរន្តអគ្គិសនី ចាប់តាំងពីព្រឹកថ្ងៃច័ន្ទមក ខណៈ រដ្ឋនៅប្រទេសឥណ្ឌាភាគខាងត្បូងចំនួនពីរ គឺរដ្ឋ Andhra Pradesh និងរដ្ឋ Tamil Nadu កំពុងត្រៀមទប់ទល់សម្រាប់ព្យុះស៊ីក្លូន Michaung ។ការិយាល័យអាកាសធាតុរបស់ប្រទេស បាននិយាយថា ព្យុះស៊ីក្លូន Michaung ត្រូវបានគេរំពឹងថានឹងបោកបក់ដល់ដីគោកមកលើឆ្នេរសមុទ្ររដ្ឋ Andhra Pradesh នៅព្រឹកថ្ងៃអង្គារនេះ ដោយមានខ្យល់បក់ក្នុងល្បឿន ៩០ ទៅ១០០គីឡូម៉ែត្រក្នុងមួយម៉ោង និងមានសន្ទុះខ្យល់រហូតដល់១១០ គីឡូម៉ែត្រក្នុងមួយម៉ោង។អាជ្ញាធរនៅក្នុងរដ្ឋទាំងពីរ កំពុងប្រកាសអាសន្នកម្រិតខ្ពស់ ដោយបានជម្លៀសប្រជាជនរាប់ពាន់នាក់ដែលរស់នៅតាមតំបន់ឆ្នេរ និងបានចេញការព្រមានដល់អ្នកនេសាទ កុំឱ្យចេញដំណើរទៅសមុទ្រ។

អ៊ីស្រាអែល ស៊ើបអង្កេតលទ្ធភាពនៃការផ្តល់ដំណឹងជាមុនទៅវិញទៅមក ពីការវាយប្រហារថ្ងៃទី៧ តុលា

ក្រុមអាជ្ញាធរអ៊ីស្រាអែល កំពុងស៊ើបអង្កេតការអះអាងរបស់ក្រុមអ្នកស្រាវជ្រាវអាមេរិក ដែលថាវិនិយោគិនមួយចំនួនប្រហែលជាបានដឹងជាមុនអំពីផែនការរបស់ក្រុមហាម៉ាស ដើម្បីវាយប្រហារអ៊ីស្រាអែល នៅថ្ងៃទី៧ ខែតុលា ហើយបានប្រើប្រាស់ព័ត៌មាននោះដើម្បីរកប្រាក់ចំណេញពីមូលប័ត្រអ៊ីស្រាអែល។ការស្រាវជ្រាវដោយសាស្ត្រាចារ្យច្បាប់ លោក រ៉ូប៊ឺត ជែកសុន ជូនៀ (Robert Jackson Jr) មកពីសាកលវិទ្យាល័យញ៉ូវយ៉ក និងសាស្ត្រាចារ្យ ហូស័រ មីតស៍ (Joshua Mitts) នៃសាកលវិទ្យាល័យកូឡំប៊ី បានរកឃើញការលក់ភាគហ៊ុនរយៈពេលខ្លីដែលនាំទៅដល់ការវាយប្រហារ និងដែលបង្កឱ្យមានសង្រ្គាមរយៈពេលជិតពីរខែមកនេះ។ អ្នកនាំពាក្យរបស់និយ័តករមូលប័ត្រមិនបានបញ្ជាក់លម្អិតទេ ហើយនគរបាលអ៊ីស្រាអែល ក៏មិនបានធ្វើអត្ថាធិប្បាយភ្លាមៗជុំវិញបញ្ហានេះដែរ។ក្រុមអ្នកស្រាវជ្រាវទាំងនោះបាននិយាយថា ការលក់ភាគហ៊ុនរយៈពេលខ្លី ដែលក្នុងនោះអ្នកវិនិយោគរំពឹងថាតម្លៃភាគហ៊ុននឹងធ្លាក់ចុះ អនុញ្ញាតឱ្យភាគហ៊ុនទាំងនោះត្រូវបានទិញត្រឡប់មកវិញក្នុងតម្លៃទាបដើម្បីបានប្រាក់ចំណេញមុនថ្ងៃទី៧ ខែតុលា «លើសពីការលក់រយៈពេលខ្លីដែលបានកើតឡើងក្នុងអំឡុងពេលផ្សេងទៀតនៃវិបត្តិ»។ នោះរួមមានការធ្លាក់ចុះសេដ្ឋកិច្ចបន្ទាប់ពីវិបត្តិហិរញ្ញវត្ថុក្នុងឆ្នាំ២០០៨ សង្រ្គាមអ៊ីស្រាអែល-ហ្កាហ្សា ឆ្នាំ២០១៤ និងអំឡុងពេលជំងឺរាតត្បាតកូវីដ១៩ជាដើម៕

សីតុណ្ហភាពនៅស៊ីបេរី ធ្លាក់ចុះដល់ -៥៦អង្សាសេ ខណៈព្រិលកម្រិតបំបែកកំណត់ត្រាធ្លាក់ក្នុងទីក្រុងម៉ូស្គូ

សីតុណ្ហភាពនៅតំបន់ខ្លះនៃស៊ីបេរី បានធ្លាក់ចុះដល់ដក ៥៦ អង្សាសេ កាលពីថ្ងៃច័ន្ទ (០៤ ធ្នូ) ខណៈព្យុះទឹកកកបានគ្របដណ្តប់ទីក្រុងមូស្គូ ដោយមានធ្លាក់ព្រិលធ្លាក់ខ្លាំង និងរំខានដល់ការហោះហើរ ក្នុងពេលអាកាសធាតុរដូវរងាបានបក់បោកពាសពេញប្រទេសរុស្ស៊ី។នៅក្នុងសាធារណៈរដ្ឋសាក់ខា ដែលមានទីតាំងនៅភាគឦសាននៃស៊ីបេរី និងជាតំបន់ដែលទីក្រុងយ៉ាគុតស៍ (Yakutsk) ស្ថិតនៅ គឺជាទីក្រុងត្រជាក់បំផុតមួយរបស់ពិភពលោក សីតុណ្ហភាពបានធ្លាក់ចុះក្រោមដក ៥០អង្សារសេ នេះបើយោងតាមស្ថានីយអាកាសធាតុក្នុងតំបន់។ស្ទើរតែទាំងអស់នៃសាធារណៈរដ្ឋសាក់ខា មានទីតាំងនៅតំបន់ស្រទាប់ដីក្រោមកកជានិច្ចនៅតំបន់ប៉ូល។ នៅក្នុងរដ្ឋធានី យ៉ាគុតស៍ នៃតំបន់នេះ ដែលស្ថិតនៅចម្ងាយប្រហែល ៥ពាន់គីឡូម៉ែត្រ ភាគខាងកើតនៃទីក្រុងម៉ូស្គូ សីតុណ្ហភាពមានកម្រិតប្រហែលពី ដក ៤៤អង្សារសេ ដល់ ដក 47អង្សារសេ។ សីតុណ្ហភាពកម្រិត ដក ៥០អង្សារសេ បានក្លាយទៅជារឿងធម្មតាក្នុងប៉ុន្មានឆ្នាំថ្មីៗនេះ ដោយសារបម្រែបម្រួលអាកាសធាតុ ខណៈតំបន់ស្រទាប់ដីក្រោមកកជានិច្ច បង្ហាញសញ្ញានៃការរលាយ។នៅក្នុងរដ្ឋធានីនៃប្រទេសរុស្ស៊ី ការធ្លាក់ព្រិលដ៏ធំបំផុតដែលមិនធ្លាប់មានកាលពីថ្ងៃទី៣ ខែធ្នូ បានធ្វើឱ្យតំបន់មួយចំនួននៃទីក្រុងម៉ូស្គូ គ្របដណ្តប់ដោយព្រិលដែលមានកម្ពស់ជាង ៣៥សង់ទីម៉ែត្រក្នុងរយៈពេលត្រឹមតែមួយថ្ងៃប៉ុណ្ណោះ។ ជើងហោះហើរត្រូវបានពន្យារពេលនៅអាកាសយានដ្ឋានមួយចំនួនរបស់ទីក្រុងម៉ូស្គូ ហើយសីតុណ្ហភាពនៅទីក្រុងនេះ និងតំបន់ជុំវិញរដ្ឋធានី ត្រូវបានគេព្យាករណ៍ថានឹងធ្លាក់ចុះដល់ប្រហែលដក ២០អង្សារសេ នៅចុងសប្តាហ៍នេះ៕

បណ្តឹងមួយមានបំណងបញ្ឈប់ការនាំចេញគ្រឿងបន្លាស់យន្តហោះ F-35 ទៅកាន់អ៊ីស្រាអែល

តុលាការនៅប្រទេសហូឡង់ កំពុងថ្លឹងថ្លែងលើបណ្តឹងដែលមានបំណងបញ្ឈប់ការនាំចេញពីប្រទេសផ្គត់ផ្គង់គ្រឿងបន្លាស់មានម្ចាស់ជាក្រុមហ៊ុនអាមេរិកសម្រាប់យន្តហោះចម្បាំង F-35 ដែលត្រូវកំណត់គោលដៅទៅកាន់ប្រទេសអ៊ីស្រាអែល។ បណ្តឹងត្រូវបានដាក់ដោយក្រុមសិទ្ធិមនុស្សជាច្រើនក្រុម រួមទាំងសាខាក្នុងតំបន់នៃអង្គការសប្បុរសធម៌ Oxfam ។ ពួកគេបាននិយាយថា ការអនុញ្ញាតឱ្យមានការនាំចេញបន្តទៅទៀត អាចធ្វើឲ្យប្រទេសនេះមានភាពស្មុគស្មាញក្នុងឧក្រិដ្ឋកម្មសង្គ្រាមដែលអាចកើតមានពីជម្លោះនៅហ្កាហ្សា។ នេះគឺជាការកោះប្រជុំរបស់តុលាការ នៅក្នុងទីក្រុងឡាអេ កាលពីថ្ងៃចន្ទ។ ប្រទេសហូឡង់ គឺជាទីតាំងសម្រាប់ឃ្លាំងគ្រឿងបន្លាស់យន្តហោះF-35 របស់អាមេរិក ដែលជាធម្មតាត្រូវបានដឹកជញ្ជូនបន្តទៅប្រទេសផ្សេងទៀតរួមទាំងប្រទេសអ៊ីស្រាអែល។លោក Liesbeth Zeggeld គឺជាមេធាវីតំណាងឱ្យក្រុមសិទ្ធិមនុស្ស និយាយថាយើងទាំងអស់គ្នាដឹងពីរបៀបដែលសង្រ្គាមត្រូវបានធ្វើឲ្យកើតឡើង។ វាមកពីលើអាកាស ហើយយន្តហោះ F-35 គឺជាឧបករណ៍យោធាទំនើបបំផុតដែលអ៊ីស្រាអែលមាន។ ដូច្នេះវាមានសារៈសំខាន់ណាស់ ដែលគេនិយាយថា «កើតមានរហូតដល់ចំណុចនេះ ហើយកុំបន្តទៅទៀត» ។មេធាវីរបស់រដ្ឋាភិបាលប្រទេសហូឡង់និយាយថា ការនាំចេញគឺជាផ្នែកនៃកាតព្វកិច្ចដ៏ទូលំទូលាយ និងជាបញ្ហាសន្តិសុខ រួមទាំងសិទ្ធិរបស់អ៊ីស្រាអែលក្នុងការការពារខ្លួន។ អ៊ីស្រាអែល បដិសេធថា មិនបានប្រព្រឹត្តឧក្រិដ្ឋកម្មសង្គ្រាមក្នុងជម្លោះជាមួយក្រុមហាម៉ាសនោះទេ។សេចក្តីសម្រេចរបស់តុលាការ ត្រូវបានគេរំពឹងនឹងចេញក្នុងរយៈពេលពីរសប្តាហ៍ទៀត។

អ៊ីស្រាអែល បើកការវាយលុកថ្មើរជើងនៅភាគខាងត្បូងហ្កាហ្សា ខណៈការវាយប្រហារតាមអាកាសកាន់តែខ្លាំង

ការវាយប្រហារតាមអាកាសយ៉ាងខ្លាំងក្លារបស់អ៊ីស្រាអែល បានវាយលុកលើភាគខាងត្បូងនៃតំបន់ហ្កាហ្សាស្ទ្រីប កាលពីថ្ងៃច័ន្ទ (០៤ ធ្នូ) ដោយបានសម្លាប់ និងបង្ករបួសដល់ប្រជាជនប៉ាឡេស្ទីនរាប់សិបនាក់ រួមទាំងនៅតំបន់ជាច្រើនដែលអ៊ីស្រាអែល បានប្រាប់ប្រជាជនឱ្យស្វែងរកទីជម្រកបណ្ដោះអាសន្ន នេះបើយោងតាមអ្នកស្រុក និងអ្នកសារព័ត៌មាន។ កងទ័ពអ៊ីស្រាអែល និងរថក្រោះក៏បានបង្កើនយុទ្ធនាការថ្មើរជើងរបស់ពួកគេប្រឆាំងនឹងពួកសកម្មប្រយុទ្ធហាម៉ាស នៅភាគខាងត្បូងនៃតំបន់ជុំវិញ បន្ទាប់ពីបានទទួលការគ្រប់គ្រងយ៉ាងទូលំទូលាយពីតំបន់ភាគខាងជើង ដែលរងការបំផ្លិចបំផ្លាញ។នៅអង្គការសហប្រជាជាតិ លោកអគ្គលេខាធិការ អង់តូនីញ៉ូ ហ្គុយតឺរេស (Antonio Guterres) បានអំពាវនាវដល់អ៊ីស្រាអែល ឱ្យជៀសវាងសកម្មភាពជ្រុលហួសហេតុ ដែលនឹងធ្វើឱ្យស្ថានភាពមនុស្សធម៌ដ៏អាក្រក់រួចទៅហើយនៅក្នុងតំបន់ហ្កាហ្សា នេះកាន់តែធ្ងន់ធ្ងរ និងដើម្បីការពារជនស៊ីវិលពីការរងគ្រោះបន្ថែមទៀត។សម្ព័ន្ធមិត្តជិតស្និទ្ធបំផុតរបស់អ៊ីស្រាអែល គឺសហរដ្ឋអាមេរិកបានជំរុញម្តងហើយម្តងទៀតឱ្យការពារជនស៊ីវិល ហើយបាននិយាយថាការវាយលុករបស់អ៊ីស្រាអែលនៅភាគខាងត្បូងមិនគួរបង្កឲ្យមានការស្លាប់ជនស៊ីវិលដ៏ច្រើនលើសលប់ ដូចដែលខ្លួនបានធ្វើនៅភាគខាងជើងនោះទេ។ អាជ្ញាធរសុខាភិបាលហ្កាហ្សា បាននិយាយថា មនុស្សប្រហែល ៩០០នាក់ ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល ចាប់តាំងពីបទឈប់បាញ់បានបញ្ចប់កាលពីថ្ងៃសុក្រមក។កាលពីថ្ងៃច័ន្ទ បណ្ដាមន្ត្រីជាន់ខ្ពស់របស់សហរដ្ឋអាមេរិកបាននិយាយថា គេមិនទាន់អាចធ្វើការវាយតម្លៃច្បាស់លាស់បានទេថា តើអ៊ីស្រាអែល កំពុងធ្វើតាមការណែនាំរបស់សហរដ្ឋអាមេរិក ក្នុងការចាត់វិធានការជាក់ស្តែងដើម្បីធានាការការពារជនស៊ីវិលឬយ៉ាងណានោះឡើយ ទោះបីជាអ្នកនាំពាក្យក្រសួងការបរទេសអាមេរិកមួយរូប បានហៅទិដ្ឋភាពខ្លះនៃការវាយលុកនៅតំបន់ហ្កាហ្សាភាគខាងត្បូង ថាមានការប្រសើរឡើងក៏ដោយ៕

សេតវិមាននិយាយថា ការវាយប្រហារលើនាវានៅសមុទ្រក្រហម ត្រូវបានជំរុញដោយប្រទេសអ៊ីរ៉ង់

សេតវិមានបាននិយាយកាលពីថ្ងៃចន្ទទី ៤ ខែធ្នូ ថា ការវាយប្រហារលើនាវាចំនួន៣គ្រឿង នៅសមុទ្រក្រហម កាលពីចុងសប្តាហ៍ បានបង្កើតជាភាពស្មុគស្មាញសម្រាប់សន្តិភាពនិងស្ថិរភាពអន្តរជាតិ។នៅក្នុងសន្និសីទសារព័ត៌មានទៅកាន់អ្នកសារព័ត៌មាន ទីប្រឹក្សាសន្តិសុខជាតិ លោក Jake Sullivan បាននិយាយថា ទីក្រុងវ៉ាស៊ីនតោន មានគ្រប់ហេតុផលដើម្បីជឿចំពោះការវាយប្រហារទាំងនេះ ខណៈនាវាត្រូវបានវាយប្រហារដោយក្រុមហួធី(Houthis) ក្នុងប្រទេសយេម៉ែន ត្រូវបានផ្តល់លទ្ធភាពយ៉ាងពេញលេញដោយប្រទេសអ៊ីរ៉ង់។ ទីបញ្ជាការកណ្តាលសហរដ្ឋអាមេរិក (CENTCOM) បាននិយាយថា នាវាពិឃាតរបស់អាមេរិក បានបាញ់ទម្លាក់យានដ្រូនជាច្រើនគ្រឿងកាលពីថ្ងៃអាទិត្យ ខណៈកំពុងជួយដល់នាវាពាណិជ្ជកម្មនៅសមុទ្រក្រហម ដែលត្រូវបានកំណត់គោលដៅដោយការវាយប្រហារពីប្រទេសយេម៉ែន។ក្រុមឧទ្ទាមហួធី(Houthi) ដែលគាំទ្រដោយអ៊ីរ៉ង់នៅយេម៉ែន បាននិយាយថា ពួកគេបានកំណត់គោលដៅលើនាវាចំនួន២គ្រឿង បានប្រើប្រាស់យានដ្រូននិងមីស៊ីលជាបន្តបន្ទាប់ទៅលើប្រទេសអ៊ីស្រាអែលក្នុងប៉ុន្មានសប្តាហ៍ថ្មីៗនេះ ហើយរឹបអូសបាននាវាដឹកទំនិញមួយគ្រឿងកាលពីខែមុន ប៉ុន្តែការវាយប្រហារចុងក្រោយនេះ បានបង្ហាញពីការកើនឡើងគួរឱ្យកត់សម្គាល់ក្នុងការគំរាមកំហែងដល់ការដឹកជញ្ជូននៅក្នុងតំបន់។ទីបញ្ជាការកណ្តាលសហរដ្ឋអាមេរិក បាននិយាយនៅ ក្នុងសេចក្តីថ្លែងការណ៍ថា មានការវាយប្រហារចំនួនបួនលើកទៅលើនាវាពាណិជ្ជកម្មចំនួន៣គ្រឿងដាច់ដោយឡែកពីគ្នា ដែលនាវាកំពុងធ្វើប្រតិបត្តិការនៅក្នុងដែនទឹកអន្តរជាតិនៅលើសមុទ្រក្រហមភាគខាងត្បូង។

របាយការណ៍៖ គ្រាប់រ៉ុក្កែតរបស់ក្រុមហាម៉ាស បានធ្លាក់ចំមូលដ្ឋានអ៊ីស្រាអែល ដែលមានផ្ទុកមីស៊ីលនុយក្លេអ៊ែរ

របាយការណ៍របស់ប្រព័ន្ធផ្សព្វផ្សាយ បានឲ្យដឹងថា មូលដ្ឋានយោធាអ៊ីស្រាអែលមួយកន្លែង ដែលអាវុធនុយក្លេអ៊ែរត្រូវបានគេនិយាយថា ត្រូវបានរក្សាទុក ត្រូវបានរងការវាយប្រហារពីមីស៊ីល ដែលបាញ់ដោយក្រុមហាម៉ាស កាលពីថ្ងៃទី៧ ខែតុលា។របាយការណ៍នោះ បាននិយាយថា ខណៈពេលដែលមីស៊ីលដែលមានសមត្ថភាពបញ្ជូននុយក្លេអ៊ែរដោយខ្លួនវា មិនត្រូវបានគេវាយប្រហារទេ ការវាយប្រហារនេះ បានបង្កឲ្យឆាបឆេះ នៅជិតកន្លែងផ្ទុក និងអាវុធ សំខាន់ៗផ្សេងទៀត។រហូតមកទល់ពេលនេះ កងកម្លាំងការពារអ៊ីស្រាអែល (IDF) បានបដិសេធមិនធ្វើអត្ថាធិប្បាយលើការអះអាង ដែលបានធ្វើឡើង នៅក្នុងរបាយការណ៍មួយដោយសារព័ត៌មាន New York Times ។របាយការណ៍ដដែល បាននិយាយថា គ្រាប់រ៉ុក្កែតរបស់ក្រុមហាម៉ាស បានវាយប្រហារនៅខាងក្នុងបរិវេណនៃមូលដ្ឋាន Sdot Micha ដែលស្ថិតនៅចម្ងាយ ២៥ម៉ាយ (៤០ គីឡូម៉ែត្រ) ភាគឦសាននៃតំបន់ហ្កាហ្សា និង ១៥ម៉ាយ (២៤គីឡូម៉ែត្រ)ភាគខាងលិចនៃទីក្រុងហ្ស៊េរុយសាឡិម (Jerusalem)។ ការវាយប្រហារ នោះ ត្រូវបានធ្វើឡើង នៅម៉ោង១០ព្រឹក ហើយបានទំនងជាបានធ្លាក់នៅក្នុងជ្រោះតូចមួយ។ ការផ្ទុះ បានបង្កឲ្យឆេះ នៅក្នុងកន្លែងដាំបន្លែដែលស្វិតក្រៀម។ការអះអាង ដែលផ្អែកលើភ័ស្តុតាងជារូបថត កើតឡើង នៅពេលដែលយោធាអ៊ីស្រាអែល បន្តប្រតិបត្តិការរបស់ខ្លួន នៅទូទាំងតំបន់ហ្កាហ្សា និងជាមួយដៃគូដូចជាសហរដ្ឋអាមេរិក អំពាវនាវឲ្យអ៊ីស្រាអែលកាត់បន្ថយចំនួននៃការស្លាប់ជនស៊ីវិល។

នាយករដ្ឋមន្ត្រីតង់ហ្សានីនិយាយថា អ្នកស្លាប់ដោយសារទឹកជំនន់កើនឡើងដល់៦៣នាក់

នាយករដ្ឋមន្ត្រី បាននិយាយកាលពីថ្ងៃចន្ទថា ចំនួនអ្នកស្លាប់ដោយសារទឹកជំនន់នៅភាគខាងជើងប្រទេសតង់ហ្សានី បន្ទាប់ពីមានភ្លៀងធ្លាក់ខ្លាំងកាលពីចុងសប្តាហ៍ បានកើនឡើងដល់ ៦៣ នាក់ ដោយបន្ថែមលើចំនួនអ្នកស្លាប់រាប់រយនាក់ផ្សេងទៀត ដែលបណ្តាលមកពីអាកាសធាតុមិនអំណោយផលខ្លាំងនៅអាហ្វ្រិកខាងកើត ចាប់តាំងពីភ្លៀងធ្លាក់តាមរដូវបានចាប់ផ្តើមកាលពីខែតុលា។ នាយករដ្ឋមន្ត្រីលោក Kassim Majaliwa បាននិយាយថា ចំនួនអ្នករងរបួសមានរហូតដល់ ១១៦ នាក់ ក្នុងអំឡុងពេលពិធីបុណ្យសពរបស់អ្នកស្លាប់នៅក្នុងស្រុក Hanang ភាគខាងជើងប្រទេសតង់ហ្សានី។ ប្រធានាធិបតី លោកស្រី Samia Suluhu Hassan បានកាត់បន្ថយរយៈពេលធ្វើដំណើររបស់លោកស្រីទៅកាន់កិច្ចប្រជុំកំពូលស្តីពីអាកាសធាតុ COP28 នៅប្រទេសអារ៉ាប់រួម ដើម្បីពិនិត្យការឆ្លើយតបចំពោះឧបទ្ទវហេតុនេះ។ទឹកជំនន់ជន់លិចខ្លាំង បង្កឡើងដោយបាតុភូតអាកាសធាតុអែលនីញ៉ូ(El Nino) និងបាតុភូតអាកាសធាតុDipole នៅមហាសមុទ្រឥណ្ឌា បានបង្ខំមនុស្សរាប់សែននាក់ជម្លៀសខ្លួនចេញពីលំនៅឋានរបស់ពួកគេនៅក្នុងប្រទេសកេនយ៉ា សូម៉ាលី អេត្យូពី និងតង់ហ្សានី ចាប់តាំងពីភ្លៀងបានចាប់ផ្តើមធ្លាក់។ ទឹកជំនន់កើតឡើង បន្ទាប់ពីគ្រោះរាំងស្ងួតដ៏អាក្រក់បំផុត ដែលបានវាយប្រហារតំបន់នេះក្នុងរយៈពេល ៤០ ឆ្នាំមកនេះ។

បណ្ដាញសង្គម

ព័ត៌មានថ្មីៗ

គណៈប្រតិភូសភាកម្ពុជា ជួបពិភាក្សាទ្វេភាគីជាមួយប្រធានរដ្ឋសភាតួកគីយ៉េ និងថ្លែងសុន្ទរកថាក្នុងមហាសន្និបាត IPU លើកទី១៥២

មេដឹកនាំកំពូលអ៊ីរ៉ង់៖ កងទ័ពជើងទឹកត្រៀមខ្លួនរួចរាល់ក្នុងការបង្កបរាជ័យដ៏ជូរចត់ថ្មីដល់អាមេរិក និងអ៊ីស្រាអែល

ក្រសួងស្ថាប័ន មន្រ្ដីរាជការ និងពលរដ្ឋ ថ្វាយព្រះពរព្រះករុណាព្រះមហាក្សត្រឆាប់បានជាសះស្បើយពីព្រះរោគ

សម្ដេចតេជោ និងសម្ដេចធិបតី ថ្វាយព្រះពរព្រះករុណាព្រះមហាក្សត្រឆាប់បានជាសះស្បើយពីព្រះរោគ

ពលរដ្ឋ និងភ្ញៀវទេសចរ ចូលទស្សនា ព្រលានយន្តហោះពោធិ៍ចិន មានចំនួនច្រើនលើសការរំពឹងទុក

រដ្ឋមន្រ្តីការបរទេសរុស្ស៊ី ៖ ពេលវេលាដល់ហើយសម្រាប់ការសន្ទនាជាមួយអាមេរិកពីទំនាក់ទំនងសេដ្ឋកិច្ចអនាគត

អ៊ីរ៉ង់និយាយថា គ្មានការកំណត់កាលបរិច្ឆេតនោះទេសម្រាប់ជុំបន្ទាប់នៃកិច្ចចរចាជាមួយអាមេរិក

លោក Trumpព្រមានប្រឆាំងការគំរាមកំហែង ពេលដែលអ៊ីរ៉ង់រឹតបន្តឹងការគ្រប់គ្រងច្រកសមុទ្រ Hormuz

មនុស្ស ៦នាក់ស្លាប់នៅទីក្រុងគីវ ប្រទេសអ៊ុយក្រែន ពេលខ្មាន់កាំភ្លើងបើកការបាញ់ប្រហារ និងចាប់ចំណាប់ខ្មាំង

ប្រមុខ UNថ្កោលទោសយ៉ាងខ្លាំងក្លាការវាយប្រហារលើក្រុមថែរក្សាសន្តិភាពនៅលីបង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877