BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

ប្រមុខ UN ប្រកាសអាសន្នលើការគំរាមកំហែងសន្តិសុខសកលមកពីសង្គ្រាមនៅហ្កាហ្សា

អគ្គលេខាធិការអង្គការសហប្រជាជាតិ លោក Antonio Guterres បានមានចំណាត់ការដ៏កម្រមួយកាលពីថ្ងៃពុធ ដើម្បីព្រមានជាផ្លូវការដល់ក្រុមប្រឹក្សាសន្តិសុខ អំពីការគំរាមកំហែងជាសកលមកពីសង្គ្រាមនៅហ្កាហ្សា ខណៈបណ្តារដ្ឋអារ៉ាប់ ព្យាយាមប្រើឥទ្ធិពលដែលនឹងជំរុញជាថ្មីឱ្យក្រុមប្រឹក្សាអំពាវនាវឱ្យមានបទឈប់បាញ់។ សហរដ្ឋអាមេរិក ជាប្រទេសមួយក្នុងចំណោមប្រទេសអំណាចប្រើប្រាស់សិទ្ធវ៉េតូចំនួន៥ប្រទេស នៅក្រុមប្រឹក្សាដែលមានសមាជិកចំនួន ១៥រូប បានជំទាស់ចំពោះបទឈប់បាញ់រវាងសម្ព័ន្ធមិត្តរបស់ខ្លួនគឺអ៊ីស្រាអែល និងក្រុមហាម៉ាស ដោយសារតែខ្លួនជឿថា ទង្វើបែបនេះនឹងផ្តល់ផលប្រយោជន៍ដល់ក្រុមសកម្មប្រយុទ្ធប៉ាឡេស្ទីន។ ទីក្រុងវ៉ាស៊ីនតោន គាំទ្រការផ្អាកសង្គ្រាមសម្រាប់បុព្វហេតុមនុស្សធម៌ដើម្បីការពារជនស៊ីវិល និងអនុញ្ញាតឱ្យមានការដោះលែងចំណាប់ថ្នូរដែលក្រុមហាម៉ាស់បានចាប់នៅក្នុងការវាយប្រហារលើអ៊ីស្រាអែលកាលពីថ្ងៃទី ៧ ខែតុលា។ ទីក្រុងនេះបានអនុបវាទកាលពីខែមុនក្នុងការអនុញ្ញាតឱ្យក្រុមប្រឹក្សាសន្តិសុខអនុម័តសេចក្តីសម្រេចដែលអំពាវនាវឱ្យមានការផ្អាកប្រយុទ្ធ។ លោក Guterres បាននិយាយទៅកាន់ក្រុមប្រឹក្សានៅក្នុងលិខិតមួយថា សង្រ្គាមនៅតំបន់ហ្កាហ្សា «អាចនឹងបង្កការគំរាមកំហែងដែលមានស្រាប់កាន់តែធ្ងន់ធ្ងរដល់សន្តិភាព និងសន្តិសុខអន្តរជាតិ»។ បេសកជនពិសេសប្រចាំអង្គការសហប្រជាជាតិរបស់ប៉ាឡេស្ទីន លោក Riyad Mansour បាននិយាយកាលពីថ្ងៃពុធថា អ្នកការទូតអារ៉ាប់កំពុង «កែសម្រួល» សេចក្តីព្រាងសេចក្តីសម្រេចរបស់ក្រុមប្រឹក្សាសន្តិសុខ ដើម្បីអំពាវនាវឱ្យមានបទឈប់បាញ់។ សេចក្តីសសម្រេចមួយត្រូវការសំឡេងគាំទ្រយ៉ាងតិច៩ សំឡេង ហើយគ្មានការប្រើប្រាស់សិទ្ធិវ៉េតូដោយសហរដ្ឋអាមេរិក រុស្ស៊ី ចិន បារាំង ឬអង់គ្លេស។ លោក Mansour បាននិយាយថា រដ្ឋមន្ត្រីអារ៉ាប់ មានផែនការធ្វើទស្សនកិច្ចនៅទីក្រុងវ៉ាស៊ីនតោន នៅថ្ងៃព្រហស្បតិ៍ទី៧ ខែធ្នូនេះ ហើយនឹងពិភាក្សាអំពីចំណាត់ការនេះជាមួយមន្ត្រីសហរដ្ឋអាមេរិក។ លោកបានប្រាប់អ្នកសារព័ត៌មានថា «នៅលើរបៀបវារៈ គឺ សង្រ្គាមនេះត្រូវតែបញ្ឈប់។ បទឈប់បាញ់ ត្រូវតែកើតមានឡើង ហើយវាត្រូវតែកើតឡើងភ្លាមៗ។

លោក អេរដូហ្គែន៖ ប្រទេសទួរគី បដិសេធផែនការបង្កើត «តំបន់ទ្រនាប់»សម្រាប់តំបន់ហ្កាហ្សា

ប្រធានាធិបតីតួកគី លោក តាយីប អេរដូហ្គែន ( Tayyip Erdogan) បាននិយាយកាលពីថ្ងៃពុធថា ប្រទេសទួរគី បដិសេធផែនការបង្កើតតំបន់ទ្រនាប់ក្រោយសង្រ្គាម នៅតំបន់ហ្កាហ្សា ព្រោះវានឹងមិនគោរពដល់ប្រជាជនប៉ាឡេស្ទីនទេ។សារព័ត៌មានរ៉យទ័រ បានរាយការណ៍កាលពីសប្តាហ៍មុនថា អ៊ីស្រាអែល បានបញ្ជូនផែនការសម្រាប់តំបន់ទ្រនាប់ ទៅកាន់រដ្ឋអារ៉ាប់មួយចំនួន និងប្រទេសទួរគី។ថ្លែងទៅកាន់អ្នកសារព័ត៌មាននៅលើយន្តហោះពីទីក្រុងដូហា (Doha) លោកអេរដូហ្គែន បានថ្លែងថា អភិបាលកិច្ច និងអនាគតរបស់តំបន់ហ្កាហ្សា បន្ទាប់ពីសង្គ្រាម នឹងត្រូវសម្រេចដោយប៉ាឡេស្ទីនតែម្នាក់ឯងប៉ុណ្ណោះ។ការិយាល័យរបស់លោកអេដូហ្គែន បានដកស្រង់សម្តីគាត់ ដោយនិយាយថា៖«ខ្ញុំចាត់ទុកការជជែកពិភាក្សាគ្នាអំពីផែនការ (តំបន់ទ្រនាប)នេះថា មិនគោរពចំពោះបងប្អូនប៉ាឡេស្ទីនរបស់ខ្ញុំ។ សម្រាប់ពួកយើង នេះមិនមែនជាផែនការ ដែលអាចត្រូវបានជជែកវែកញែក ពិចារណា ឬពិភាក្សានោះទេ។ដោយអំពាវនាវឲ្យអ៊ីស្រាអែលប្រគល់ទឹកដីដែលខ្លួនគ្រប់គ្រង និងបញ្ចប់ការតាំងទីលំនៅ ក្នុងទឹកដីទាំងនោះមកវិញ លោក បាននិយាយថា៖«អ៊ីស្រាអែល ត្រូវតែយកក្រុមភេរវករ ដែលខ្លួនបង្ហាញទៅកាន់ពិភពលោកថាជាអ្នកតាំងលំនៅ ចេញពីផ្ទះសម្បែង និងដីទាំងនោះ ហើយគិតអំពីរបៀបដែលវាអាចសាងសង់អនាគតសន្តិភាពជាមួយប្រជាជនប៉ាឡេស្ទីន»។

U.N.៖ មនុស្ស៦សែននាក់ នៅហ្កាហ្សាស្ថិតក្រោមបញ្ជាឲ្យជម្លៀស ខណៈអ៊ីស្រាអែលបញ្ជាឲ្យពលរដ្ឋក្នុងទីក្រុងខាន យូនីស ចាកចេញ

យោងតាមទីភ្នាក់ងារទទួលបន្ទុកជនភៀសខ្លួនប៉ាឡេស្ទីនរបស់អង្គការសហប្រជាជាតិ ដែលបានព្រមានថាប្រតិបត្តិការមនុស្សធម៌របស់ខ្លួនបានធ្លាក់ក្នុងចំណុចគ្រោះថ្នាក់ មនុស្សជាង៦សែននាក់ នៅក្នុងតំបន់ហ្កាហ្សាភាគខាងត្បូង ត្រូវបានបញ្ជាឲ្យចាកចេញ ដើម្បីបញ្ចៀសការវាយប្រហារដោយថ្មើរជើង និងអាកាសរបស់អ៊ីស្រាអែល ។ ឧត្ដមស្នងការទីភ្នាក់ងារផ្ដល់ជំនួយនិងការងាររបស់អង្គការសហប្រជាជាតិ លោកហ្វីលីពឡាហ្សារីនី បាននិយាយកាលពីថ្ងៃអង្គារនៅក្នុងសារបង្ហោះលើបណ្ដាញសង្គម X ថា ជិតពាក់កណ្ដាលនៃអ្នកទាំងឡាយដែលស្ថិតក្រោមបញ្ជាឲ្យជម្លៀស ត្រូវបានបង្ខំឲ្យចាកចេញពីផ្ទះសម្បែងរបស់ពួកគេ។លោកបានសរសេរថា ពេលនេះគ្មានកន្លែងមានសុវត្ថិភាពណាមួយត្រូវជ្រើសរើសជាទីជម្រកទេ រួមទាំងទីតាំងរបស់ឧត្ដមស្នងការទីភ្នាក់ងារផ្ដល់ជំនួយនិងការងាររបស់អង្គការសហប្រជាជាតិផងដែរ ដែលកំពុងផ្ទុកមនុស្សពេញលើសចំណុះទៅហើយ។ ជំនួយមនុស្សធម៌ដែលបានរឹតត្បិត បានប៉ះពាល់យ៉ាងខ្លាំងដល់ប្រតិបត្តិការរបស់យើង ។ ការឡោមព័ទ្ធនេះអាចក្លាយជាប្រភពចម្បងនៃការស្លាប់របស់ប្រជាពលរដ្ឋ។ អង្គការសុខភាពពិភពលោក បាននិយាយថាខ្លួនកំពុងមើលឃើញការកើនឡើងនៃជំងឺឆ្លងដោយសារស្ថានភាពរស់នៅរបស់មនុស្សដែលកំពុងជួបប្រទះ ក្នុងនោះមានករណីជំងឺផ្លូវដង្ហើមធ្ងន់ធ្ងរចំនួន១២.០០០នាក់ និងរាគរូសចន្លោះពី៤០ទៅ៥០ករណី។ កងកម្លាំងការពារអ៊ីស្រាអែល ហៅកាត់ថា IDF បានចេញបញ្ជាថ្មីឲ្យជម្លៀសចេញកាលពីព្រឹកថ្ងៃពុធ ដោយព្រមានថា ខ្លួនកំពុងអនុវត្តប្រតិបត្តិការយោធាយ៉ាងប្រុងប្រយ័ត្ន លើក្រុមហាម៉ាស និងក្រុមសកម្មប្រយុទ្ធផ្សេងទៀត នៅក្នុងតំបន់ខាន យូនីស ភាគខាងត្បូងតំបន់ហ្កាហ្សាស្ទ្រីប និងបានណែនាំជនស៊ីវិលឲ្យចាកចេញបន្ទាន់ពីតំបន់នេះ ឆ្ពោះទៅកាន់ភាគខាងលិច វិញ៕

អ្នកនយោបាយអ៊ុយក្រែន ដែលគាំទ្រវិមានក្រឹមឡាំង ត្រូវបានគេធ្វើឃាត នៅជិតទីក្រុងម៉ូស្គូ

ទីក្រុងគីវ បាននិយាយថា ខ្លួនបានធ្វើឃាតអ្នកនយោបាយអ៊ុយក្រែនដែលគាំទ្រវិមានក្រឹមឡាំង កាលពីថ្ងៃពុធ បន្ទាប់ពីសាកសពរបស់អតីតសមាជិកសភា ដែលបានចាកចេញពីប្រទេស ចូលទៅប្រទេសរុស្ស៊ី ត្រូវបានរកឃើញ នៅខាងក្រៅទីក្រុងម៉ូស្គូ។ប្រភពនៅក្នុងផ្នែកការពារជាតិរបស់អ៊ុយក្រែន បានប្រាប់សារព័ត៌មាន AFPថា សេវាសន្តិសុខ SBU របស់ខ្លួន បានធ្វើឃាត លោក Illia Kyva អតីតសមាជិកសភាអ៊ុយក្រែន ដែលត្រូវបានបណ្តេញចេញពីសភា ហើយបានរត់ចោលស្រុកចូលទៅប្រទេសរុស្ស៊ី រយៈពេលប៉ុន្មានសប្តាហ៍ បន្ទាប់ពីទីក្រុងម៉ូស្គូ បានបើកការវាយលុកយោធារបស់ខ្លួន កាលពីឆ្នាំមុន។ចាប់តាំងពីរុស្ស៊ី បានឈ្លានពានកាលពីខែកុម្ភៈឆ្នាំមុន អ៊ុយក្រែន បានអះអាងថា ខ្លួនជាអ្នកនៅពីក្រោយការធ្វើឃាត និងការវាយប្រហារជាច្រើនលើជនជាតិរុស្ស៊ីគាំទ្រមសង្រ្គាម និងអតីតមន្ត្រីអ៊ុយក្រែន ដែលបានគាំទ្រសង្រ្គាមរបស់ទីក្រុងម៉ូស្គូ។សេវាសង្គ្រោះបន្ទាន់ បានប្រាប់ប្រព័ន្ធផ្សព្វផ្សាយរដ្ឋរុស្ស៊ី RIA Novosti ថា សាកសពរបស់លោក Kyva ត្រូវបានរកឃើញ កាលពីថ្ងៃពុធ នៅក្នុងភូមិ Suponevo ក្បែរទីក្រុងម៉ូស្គូ។ថ្លែងតាមទូរទស្សន៍ជាតិ អ្នកនាំពាក្យចារកម្មយោធារបស់អ៊ុយក្រែន លោក Andriy Yusov បាននិយាយថា៖«យើងអាចបញ្ជាក់បានថា លោកKyva ត្រូវបានធ្វើឃាតរួចហើយ។ ជោគវាសនាបែបនេះ នឹងកើតមានចំពោះជនក្បត់ជាតិអ៊ុយក្រែនដទៃទៀត ក៏ដូចជាក្រុមអ្នកគាំទ្រនយោបាយនៃរបបលោកពូទីនដែរ»។

សហរដ្ឋអាមេរិកប្រកាសថា ភាគីជម្លោះនៅស៊ូដង់ បានប្រព្រឹត្តឧក្រិដ្ឋកម្មសង្គ្រាម

រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) បាននិយាយថា សហរដ្ឋអាមេរិកកាលពីថ្ងៃពុធ (០៦ ធ្នូ) បានកំណត់ជាផ្លូវការថាភាគីសង្រ្គាមនៅក្នុងប្រទេសស៊ូដង់ បានប្រព្រឹត្តបទឧក្រិដ្ឋកម្មសង្រ្គាម ខណៈទីក្រុងវ៉ាស៊ីនតោន បង្កើនសម្ពាធលើកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) ឲ្យបញ្ចប់ការប្រយុទ្ធគ្នាដែលបានបង្កឱ្យមានវិបត្តិមនុស្សធម៌ក្នុងប្រទេស។លោក Blinken បាននិយាយនៅក្នុងសេចក្តីថ្លែងការណ៍មួយថា ទីក្រុងវ៉ាស៊ីនតោន បានកំណត់ថាកងកម្លាំង RSF និងកងជីវពលសម្ព័ន្ធមិត្ត បានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ និងការបោសសម្អាតជនជាតិភាគតិច។ ការប្រយុទ្ធគ្នាដែលបានផ្ទុះឡើងនៅពាក់កណ្តាលខែមេសា បានជម្លៀសមនុស្សជាង ៦,៥លាននាក់នៅក្នុង និងក្រៅប្រទេសស៊ូដង់ ដោយសម្លាប់មនុស្សជាង ១០.០០០នាក់ និងធ្វើឱ្យសេដ្ឋកិច្ចធ្លាក់ចុះ។ កងកម្លាំង RSF ត្រូវបានចោទប្រកាន់ពីបទដឹកនាំការសម្លាប់រង្គាលជនជាតិភាគតិចនៅតំបន់ វេស ដាហ្វឺ (West Darfur) ហើយអ្នកស្រុកនៅរដ្ឋធានីខាទុម (Khartoum) បានចោទប្រកាន់កងកម្លាំងប្រដាប់អាវុធយោធាប៉ារ៉ាមួយនេះពីបទលួច រំលោភ និងចាប់ឃុំឃាំងជនស៊ីវិល។ ទន្ទឹមនឹងនេះ កងទ័ពស៊ូដង់បានអនុវត្តយុទ្ធនាការវាយប្រហារតាមផ្លូវអាកាស និងកាំភ្លើងធំលើសង្កាត់លំនៅដ្ឋាន ដែលកងកម្លាំង RSF បានកាន់កាប់ ដោយក្រុមអ្នកជំនាញនិយាយថាអាចជាការបំពានច្បាប់អន្តរជាតិ៕

នាយករដ្ឋមន្រ្តីអ៊ីស្រាអែល កំពុងប្រយុទ្ធសមរភូមិមុខចំនួនពីរសម្រាប់ការរស់រានក្នុងឆាកនយោបាយ

ជំនាញវិទ្យាសាស្ត្រនយោបាយមកពីសាកលវិទ្យាល័យទីក្រុង តែលអាវីវ (Tel Aviv) ម្នាក់បានប្រាប់សារព័ត៌មានរ៉យទ័រថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) មិនមានយុទ្ធសាស្ត្រអ្វីសម្រាប់សង្គ្រាមនោះទេ ក្រៅពីដើម្បីបន្តកាន់អំណាច។ ដោយប្រឈមមុខនឹងរលកនៃការរិះគន់យ៉ាងខ្លាំងជុំវិញការបរាជ័យរបស់ខ្លួនក្នុងការទប់ស្កាត់ការវាយប្រហាររបស់ពួកហាម៉ាស លើអ៊ីស្រាអែលកាលពីថ្ងៃទី៧ ខែតុលា លោក ណេតាន់យ៉ាហ៊ូ បានគេចវេសពីការរិះគន់យ៉ាងទូលំទូលាយ ខណៈកំពុងធ្វើសង្រ្គាមសមរភូមិមុខចំនួនពីរ គឺសង្រ្គាមមួយប្រឆាំងនឹងក្រុមហាម៉ាស និងសង្រ្គាមមួយទៀតសម្រាប់ការរស់រានមានជីវិតក្នុងឆាកនយោបាយផ្ទាល់ខ្លួនរបស់លោក។អ្នកស្រុកនៅទីក្រុងហ្សេរុយសាឡឹម បាននិយាយកាលពីថ្ងៃអង្គារ (០៥ ធ្នូ) ថាពេលវេលានេះគឺជា «ការបញ្ចប់នៃអាជីពរបស់លោក ណេតាន់យ៉ាហ៊ូ ហើយ» ដោយអ្នកខ្លះបានអំពាវនាវឱ្យលោកលាលែងពីតំណែងជាបន្ទាន់ ហើយអ្នកផ្សេងទៀតចង់ឱ្យអាណត្តិរបស់លោកត្រូវបញ្ចប់បន្ទាប់ពីសង្គ្រាម។លោក ណេតាន់យ៉ាហ៊ូ វ័យ ៧៤ឆ្នាំ បានរក្សានូវមុខមាត់ជាប្រមុខសន្តិសុខ ដែលមានភាពតឹងតែងជាមួយអ៊ីរ៉ង់ និងគាំទ្រដោយកងទ័ព ដែលធានាថាជនជាតិជ្វីហ្វ នឹងមិនរងនូវការសម្លាប់រង្គាលទៀតទេ ប៉ុន្តែពេលនេះ រដ្ឋជ្វីហ្វមួយនេះកំពុងជួបប្រទះការបង្ហូរឈាមបំផុតក្នុងប្រវត្តិសាស្ត្ររយៈពេល ៧៥ឆ្នាំរបស់ខ្លួន ក្រោមការដឹកនាំរបស់លោក។លោក ណេតាន់យ៉ាហ៊ូ កំពុងទទួលបានប្រយោជន៍ពីសង្រ្គាមដែលពន្យារពេលការកាត់ក្តីអំពើពុករលួយរយៈពេល ៣ឆ្នាំកន្លះរបស់ខ្លួន ហើយបានបិទការស៊ើបអង្កេតដែលរំពឹងទុករបស់រដ្ឋ លើថាហេតុអ្វីបានជាអ៊ីស្រាអែល ស្ថិតក្រោមការដឹកនាំរបស់លោក ត្រូវជួបភាពតានតឹងនិងជម្លោះបែបនេះ។ នាយករដ្ឋមន្ត្រី ដែលកាន់អំណាចយូរបំផុតរបស់អ៊ីស្រាអែលរូបនេះបានរួចផុតពីវិបត្តិនយោបាយ និងមានការវិលត្រឡប់មកវិញជាច្រើន ហើយមិនចាំបាច់ប្រឈមមុខនឹងការបោះឆ្នោតសម្រាប់បន្តអាណត្តិរយៈពេលបីឆ្នាំទៀតនោះទេ ប្រសិនបើសម្ព័ន្ធរបស់លោកនៅតែកាន់អំណាច៕

អ្នកស្លាប់ និងរបួសជាច្រើនត្រូវទាញចេញពីគំនរបាក់បែក បន្ទាប់ពីអ៊ីស្រាអែលវាយប្រហារ លើលំនៅឋានក្នុងក្រុងព្រំដែនអេហ្ស៊ីប

ជនជាតិប៉ាឡេស្ទីន ៩នាក់ បានស្លាប់ និងជាច្រើននាក់ទៀតបានរងរបួសកាលពីថ្ងៃពុធ (០៦ ធ្នូ) នៅក្នុងការទម្លាក់គ្រាប់បែករបស់អ៊ីស្រាអែល ទៅលើលំនៅឋានមួយខ្នងក្នុងទីក្រុងរ៉ាហ្វាហ្វ ដែលជាទីក្រុងនៅចុងភាគខាងត្បូងរបស់តំបន់ហ្កាហ្សា ក្បែរព្រំដែនជាមួយប្រទេសអេហ្ស៊ីប នេះបើយោងតាមប្រភពវេជ្ជសាស្ត្រប៉ាឡេស្ទីន។ខ្សែវីដេអូរបស់សារព័ត៌មានរ៉យទ័រ បានបង្ហាញសាកសព និងមនុស្សរងរបួសជាច្រើននាក់ ដោយបុរសម្នាក់ត្រូវកាត់ផ្ដាច់ជើងទាំងពីរត្រឹមខាងក្រោមជង្គង់ ត្រូវបានគេដឹកចេញពីកន្លែងកើតហេតុ ខណៈមនុស្សម្នាស្វែងរកអ្នកនៅរស់តាមកម្ទេចថ្មដោយប្រើដៃទទេរបស់ពួកគេ។ អគារនេះត្រូវអគ្គិសភ័យឆាបឆេះបន្ទាប់ពីមានការវាយប្រហារ ហើយផ្នែកម្ខាងនៃសំណង់ត្រូវបានបំផ្លាញទាំងស្រុង។ សាក្សីអ្នកស្រុកម្នាក់បានប្រាប់សារព័ត៌មានរ៉យទ័រ ថាការវាយប្រហារចំនួនបីដងបានវាយប្រហារលំនៅឋានដែលពោរពេញទៅដោយជនភៀសខ្លួនមួយនេះ។អ៊ីស្រាអែល បានបញ្ចេញយុទ្ធនាការយោធារបស់ខ្លួនជាការឆ្លើយតបទៅនឹងការលុកលុយដ៏គួរឱ្យភ្ញាក់ផ្អើលកាលពីថ្ងៃទី៧ ខែតុលា ដោយក្រុមសកម្មប្រយុទ្ធហាម៉ាស ដែលវាយលុកតាមទីក្រុងនានារបស់អ៊ីស្រាអែល ដោយបានសម្លាប់មនុស្ស ១.២០០នាក់ និងចាប់ចំណាប់ថ្នូរចំនួន ២៤០នាក់ នេះបើយោងតាមចំនួនសរុបរបស់ប្រទេសអ៊ីស្រាអែល។ តួលេខពីក្រសួងសុខាភិបាលហ្កាហ្សា បានដាក់តួលេខអ្នកស្លាប់នៅហ្កាហ្សា ចំនួនជាង ១៦.០០០នាក់ ដែលក្នុងនោះមានអ្នកស្លាប់បន្ថែមចំនួន ៤៣នាក់ត្រូវបានរាយការណ៍ដោយមន្ទីរពេទ្យមួយកាលពីថ្ងៃអង្គារ និង ៧៣នាក់ត្រូវបានរាយការណ៍ពីមន្ទីរពេទ្យមួយទៀតកាលពីថ្ងៃពុធ៕

កងកម្លាំងអ៊ីស្រាអែល ប្រយុទ្ធនឹងក្រុមហាម៉ាសនៅភាគខាងត្បូងហ្កាហ្សា បង្ខំឲ្យជនស៊ីវិលជម្លៀសរកកន្លែងសុវត្ថិភាព

កងទ័ពអ៊ីស្រាអែលបានប្រយុទ្ធគ្នាយ៉ាងខ្លាំងក្លាជាមួយក្រុមហាម៉ាស ក្នុងការពង្រីកការវាយលុកទៅកាន់តំបន់ហ្កាហ្សា ភាគខាងត្បូងកាលពីថ្ងៃពុធ (០៦ ធ្នូ) ដោយបង្ខំឱ្យជនស៊ីវិលប៉ាឡេស្ទីនដែលភៀសខ្លួនរាប់ម៉ឺននាក់ ប្រមូលផ្តុំគ្នាចូលទៅក្នុងទីក្រុងមួយនៅជិតព្រំដែនអេហ្ស៊ីប ដើម្បីគេចពីការទម្លាក់គ្រាប់បែករបស់អ៊ីស្រាអែល។ប្រភពវេជ្ជសាស្ត្រប៉ាឡេស្ទីនបាននិយាយថា ទោះបីជាយ៉ាងណាក៏ដោយ មនុស្សជាច្រើនភ័យខ្លាចថាពួកគេនឹងមិនមានសុវត្ថិភាពទេសម្រាប់ការជ្រកកោននៅទីក្រុងព្រំដែនរ៉ាហ្វាហ្វ របស់អេហ្ស៊ីប ហើយយ៉ាងហោចណាស់មនុស្ស ៩នាក់ ត្រូវបានសម្លាប់កាលពីថ្ងៃពុធ នៅក្នុងការបាញ់ផ្លោងរបស់អ៊ីស្រាអែល ទៅលើលំនៅឋានមួយខ្នងនៅក្នុងទីក្រុងព្រំដែននេះ។ប្រជាជនប៉ាឡេស្ទីនរាប់រយពាន់នាក់បានភៀសខ្លួនពីភាគខាងជើងតំបន់ហ្កាហ្សា ទៅកាន់ភាគខាងត្បូង ក្នុងអំឡុងពេលសង្រ្គាមរយៈពេលពីរខែរវាងអ៊ីស្រាអែល និងក្រុមសកម្មប្រយុទ្ធដែលកំពុងកាន់អំណាច អ៊ីស្លាមនិយមប៉ាឡេស្ទីន ដែលអ៊ីស្រាអែលកំពុងព្យាយាមកម្ទេចចោល។ការភៀសខ្លួនចុងក្រោយនេះ ធ្វើឱ្យប្រជាជនប៉ាឡេស្ទីនជាច្រើននាក់ ត្រូវបានផ្លាស់ទីលំនៅទៅកាន់តែជិតព្រំដែនអេហ្ស៊ីប នៅក្នុងតំបន់ដែលត្រូវបានចាត់ទុកថាមានសុវត្ថិភាពដោយយោធាអ៊ីស្រាអែល នៅក្នុងខិត្តប័ណ្ណដែលទម្លាក់ដោយយន្តហោះរបស់ខ្លួន ក៏ដូចជាសារតាមទូរស័ព្ទ និងសារតាមអ៊ីនធឺណិតជាដើមនោះ៕

អតីតប្រធានាធិបតីប៉េរូ លោក ហ្វ៊ូជីមូរី ត្រូវបានដោះលែងបន្ទាប់ពីជាប់ពន្ធនាគាររយៈពេល១៦ឆ្នាំ

អតីតប្រធានាធិបតី ប៉េរូ លោក អាល់ប៊ើតូ ហ្វ៊ូជីមូរី(Alberto Fujimori)ដែលត្រូវបានជាប់ពន្ធនាគារ២៥ឆ្នាំ ពីបំពានសិទ្ធិមនុស្សអំឡុងកាន់អំាណាចរយៈពេល១០ឆ្នាំរបស់លោកកាលពីក្នុងទសវត្សរ៍ឆ្នាំ១៩៩០ ត្រូវបានដោះលែងកាលពីល្ងាចថ្ងៃពុធទី៦ធ្នូសប្ដាហ៍នេះ បន្ទាប់ពីតុលាការបានលើកលែងទោសក្នុងករណីជម្លោះកាលពីឆ្នាំ២០១៧ ។ តុលាការកំពូលរបស់ប្រទេសនេះ កាលពីថ្ងៃអង្គារទី៥ធ្នូសប្ដាហ៍នេះដែរ បានទទួលយកសំណើនៃការអំពាវនាវឲ្យលើកលែងទោសសម្រាប់លោក ហ្វ៊ូជីមូរី វ័យ៨៥ឆ្នាំ ក្នុងហេតុផលមនុស្សធម៌ ទោះរងការរិះគន់ពីតុលាការអន្តរអាមេរិក(Inter-American Court) នៃសិទ្ធិមនុស្ស និងក្រុមគ្រួសាររបស់ជនរងគ្រោះក៏ដោយ។ គេបានឃើញរូបលោកចាកចេញពីពន្ធនាគារជាយក្រុងលីម៉ា និងឡើងរថយន្តភ្លាមៗ ក្រោយវិទ្យាស្ថានផ្ដន្ទាទោសជាតិគ្រប់គ្រងដោយរដ្ឋរបស់ប៉េរូ បានបញ្ជឲ្យដោះលែងលោកជាបន្ទាន់។លោកត្រូវបានផ្ដន្ទាទោសឲ្យជាប់ពន្ធនាគារ១៦ឆ្នាំ បន្ទាប់ពីត្រូវបាននិរទេសមកពីប្រទេសឈីលីកាលពីឆ្នាំ២០០៧៕

នាវាពិឃាតអាមេរិក USS Mason បានបាញ់ទម្លាក់យានដ្រូនមួយគ្រឿងទៀត នៅសមុទ្រក្រហម

នាវាពិឃាតរបស់កងទ័ពជើងទឹក Mason បានបាញ់ទម្លាក់យានដ្រូនមួយគ្រឿងទៀត កាលពីថ្ងៃពុធ ដែលក្រុមមន្ត្រីសន្មតថា ជារបស់ក្រុមឧទ្ទាមហ៊ូធីមានសម្ព័ន្ធភាពជាមួយអ៊ីរ៉ង់ នៅប្រទេសយេម៉ែន ដែលជាការវាយប្រហារចុងក្រោយរបស់នាវាចម្បាំងរដ្ឋអាមេរិកដែលស្ទាក់ចាប់យានដ្រូន និងមីស៊ីល នៅមជ្ឈិមបូព៌ាក្នុងប៉ុន្មានសប្តាហ៍ថ្មីៗនេះ។មន្ត្រីយោធាម្នាក់ដែលសុំមិនបញ្ចេញឈ្មោះ ដើម្បីពិភាក្សាអំពីប្រតិបត្តិការនេះ បាននិយាយនៅក្នុងបទសម្ភាសន៍មួយនៅក្នុងអ៊ីមែលទៅសារព័ត៌មាន Navy Timesថា៖«យើងអាចបញ្ជាក់បានថា នាវាពិឃាត USS Mason បានបាញ់ទម្លាក់យានដ្រូនដែលមានប្រភពមកពីតំបន់គ្រប់គ្រងរបស់ក្រុមហ៊ូធីនៃប្រទេសយេម៉ែន នៅម៉ោង ១០:២០ ព្រឹក (ម៉ោងនៅយេម៉ែន) ថ្ងៃទី ៦ ខែធ្នូ នៅសមុទ្រក្រហមភាគខាងត្បូង»។ ពុំមានការខូចខាតដល់ឧបករណ៍ ឬរបួសដល់បុគ្គលិករបស់សហរដ្ឋអាមេរិកទេ។ដូចករណីថ្មីៗផ្សេងទៀតនៃក្រុមនាវារបស់កងទ័ពជើងទឹកបាញ់ទម្លាក់យានដ្រូន មន្ត្រីនោះ បាននិយាយថា យានដ្រូននោះ ត្រូវបានគេបាញ់បង្ហោះសំដៅទៅនាវា Mason ប៉ុន្តែគោលដៅរបស់វា មិនច្បាស់លាស់។ ព័ត៌មានលម្អិតបន្ថែម មិនត្រូវបានផ្តល់ឲ្យ កាលពីថ្ងៃពុធទេ។ឧបទ្ទវហេតុនេះ កើតឡើងប៉ុន្មានថ្ងៃ បន្ទាប់ពីនាវាពិឃាតរបស់កងទ័ពជើងទឹក Carney បានបាញ់ទម្លាក់យានដ្រូនជាច្រើនគ្រឿង កាលពីថ្ងៃអាទិត្យ ខណៈដែលនាវាជំនួញជាច្រើនគ្រឿង បានរងការវាយប្រហារដោយមីស៊ីលរបស់ក្រុមហ៊ូធី ក្នុងប្រទេសយេម៉ែន ដែលបានបាញ់ចេញពីតំបន់គ្រប់គ្រងដោយក្រុមឧទ្ទាមហ៊ូធីនៃប្រទេសយេម៉ែន ក៏ដូចជាបន្តការវាយប្រហារលើកងកម្លាំងជើងគោករបស់សហរដ្ឋអាមេរិក នៅក្នុងប្រទេសអ៊ីរ៉ាក់ និងស៊ីរី បន្ទាប់ពីការផ្ទុះឡើងនៃសង្គ្រាមអ៊ីស្រាអែល-ហាម៉ាស។

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅជប៉ុន៖ យុវជនមានតួនាទីសំខាន់ក្នុងការរួមចំណែកពង្រឹងទំនាក់ទំនងរវាងកម្ពុជា-ជប៉ុន ឱ្យកាន់តែរឹងមាំថែមទៀត

សិស្សានុសិស្ស លោកគ្រូអ្នកគ្រូ រួមទាំងអាណាព្យាបាល នៅក្រុងស្ទឹងត្រែង ចំនួន ៣ ៥៩៩នាក់ ទទួលបានសេវាព្យាបាលពីក្រុមគ្រូពេទ្យ TYDA

ក្រសួងការងារបន្តផ្សព្វផ្សាយឱកាសការងារជាច្រើនម៉ឺនកន្លែងក្នុងស្រុក ដល់យុវជន និងអតីតពលករ នៅខេត្តប៉ៃលិន-បាត់ដំបង

ក្រុមការងារចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្ដាល ប្តេជ្ញាបន្តសកម្មភាពបម្រើពលរដ្ឋដោយបេះដូងនិងស្មោះត្រង់

ប្រធានក្រុមការងារជួសជុល និងសាងសង់ឡើងវិញអគារសិក្សាអំណោយសម្ដេចតេជោ ចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត

ប្រមុខ UN ទទួលបន្ទុកជនភៀសខ្លួន ព្រមានពីស្ថានភាព «កាន់តែធ្ងន់ធ្ងរឡើង» នៅតំបន់ Sahara ខាងលិច

មនុស្សរាប់លាននាក់នៅភាគឦសានរបស់សហរដ្ឋអាមេរិក ត្រៀមប្រឈមនឹងព្យុះដ៏ខ្លាំងក្លា

កុមារនៅភាគខាងត្បូងលីបង់ ត្រឡប់ទៅសាលារៀនដែលត្រូវបានបំផ្លាញដោយការវាយប្រហាររបស់អ៊ីស្រាអែល

UN បន្ថែមក្រុមហ៊ុន ៦១ទៀតក្នុងបញ្ជីពាក់ព័ន្ធនឹងការតាំងទីលំនៅអ៊ីស្រាអែលធ្វើឲ្យចំនួនសរុបកើនដល់ ២១៤

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877