BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

ការវាយប្រហារទៅលើនាវា នៅសមុទ្រក្រហម បង្កការព្រួយបារម្ភអំពីសុវត្ថិភាពរបស់នាវិក

ក្រុមមន្ត្រីដឹកជញ្ជូន បាននិយាយកាលពីថ្ងៃពុធថា នាវាពាណិជ្ជកម្ម ប្រឈមនឹងគ្រោះថ្នាក់កាន់តែខ្លាំងឡើងនៅសមុទ្រ បន្ទាប់ពីក្រុមប្រដាប់អាវុធ បានវាយប្រហារ និងរឹបអូសនាវា នៅក្នុងដែនទឹកជុំវិញសមុទ្រក្រហម និងឆ្នេរសមុទ្រនៃប្រទេសយេម៉ែន ដោយបន្ថែមគ្រោះថ្នាក់ដល់អ្នកធ្វើដំណើរតាមសមុទ្រ។មន្ទីរបញ្ចកោណ បាននិយាយកាលពីថ្ងៃចន្ទថា ការប៉ុនប៉ងប្លន់នាវាពាណិជ្ជកម្ម នៅឈូងសមុទ្រ Aden កាលពីថ្ងៃអាទិត្យ ហាក់ដូចជាត្រូវបានធ្វើឡើង ដោយចោរសមុទ្រសូម៉ាលីប្រដាប់ដោយអាវុធ និងមិនមែន ក្រុមឧទ្ទាមហ៊ូធីយេម៉ែនទេ ទោះបីជាមានការបាញ់មីស៊ីលពីទឹកដីដែលគ្រប់គ្រងដោយក្រុមហ៊ូធី នៅក្នុងប្រទេសយេម៉ែនក្រោយមកក្តី។ ឧបទ្ទវហេតុនេះ គឺជាការវាយប្រហារចុងក្រោយបង្អស់ នៅក្នុងដែនទឹកមជ្ឈិមបូព៌ា ចាប់តាំងពីសង្រ្គាមដ៏ឃោរឃៅរវាងអ៊ីស្រាអែល និងក្រុមអ៊ីស្លាមប៉ាឡេស្ទីនហាម៉ាស បានផ្ទុះឡើង កាលពីថ្ងៃទី៧ ខែតុលា។ម្ចាស់នាវា បាននិយាយថា នៅថ្ងៃទី១៩ ខែវិច្ឆិកា ក្រុមហ៊ូធី បានរឹបអូសយកក្រុមហ៊ុនដឹកជញ្ជូនរថយន្ត Galaxy Leader ដែលត្រូវបាននាំយកទៅកាន់កំពង់ផែ Hodeidah ប្រទេសយេម៉ែន។នាវាទាំងពីរគ្រឿង មានទំនាក់ទំនងកម្មសិទ្ធិជាមួយមហាសេដ្ឋីជំនួញអ៊ីស្រាអែល នេះបើយោងតាមកំណត់ត្រាដឹកជញ្ជូន។សមាគមដឹកជញ្ជូនអន្តរជាតិ បាននិយាយថា៖«ការវាយប្រហារ ត្រូវតែបញ្ឈប់ជាបន្ទាន់ ហើយអ្នកដើរតាមនាវាសមុទ្រស្លូតត្រង់ទាំងនោះ ត្រូវបានដោះលែង»។

ក្រុមបាតុករនៅឈីលី និងម៉ិកស៊ិក បង្ហាញការគាំទ្រដល់ពលរដ្ឋប៉ាឡេស្ទីន នៅថ្ងៃចុងក្រោយនៃបទឈប់បាញ់៦ថ្ងៃ

ក្រុមបាតុករគាំទ្រប៉ាឡេស្ទីន បានចេញធ្វើបាតុកម្មនៅក្នុងទីក្រុង Mexico City និងបានចុចស៊ីផ្លេររថយន្ត នៅក្នុងទីក្រុង Santiago ដើម្បីបង្ហាញពីសាមគ្គីភាពជាមួយពលរដ្ឋប៉ាឡេស្ទីន នៅក្នុងតំបន់ហ្កាហ្សា កាលពីថ្ងៃពុធ។ នៅក្នុងប្រទេសម៉ិកស៊ិកក្រុមបាតុករ បានកាន់ស្លាកដោយមានសារសរសេរថា «បញ្ចប់ការប្រល័យពូជសាសន៍» និងពាក្យថា «សេរីភាពប៉ាឡេស្ទីន» ក្នុងចំណោមសារផ្សេងៗទៀតនៅលើស្លាក ខណៈពួកគេចេញធ្វើបាតុកម្ម នៅតាមដងផ្លូវដ៏ល្បីល្បាញបំផុតមួយ។ជាមួយគ្នានេះ ពលរដ្ឋប្រទេសឈីលី ក៏បានចេញធ្វើបាតុកម្ម នៅទីក្រុង Santiago ដោយជិះតាមរថយន្តដាក់ទង់ជាតិ និងស្រែកពាក្យទាមទារសន្តិភាពសម្រាប់ពលរដ្ឋតំបន់ហ្កាហ្សា។ការប្រមូលផ្តុំគ្នាកាលពីថ្ងៃពុធ បានកើតឡើង អំឡុងថ្ងៃចុងក្រោយនៃបទឈប់បាញ់រយៈពេល៦ថ្ងៃ រវាងអ៊ីស្រាអែល និងក្រុមឥស្លាមនិយមហាម៉ាសប៉ាឡេស្ទីន។

ក្រុមសង្គ្រោះស្វែងរក អ្នកបាត់ខ្លួនបន្ទាប់ពីយន្តហោះOsprey របស់អាមេរិក ធ្លាក់នៅជិតកោះប្រទេសជប៉ុន

ក្រុមអ្នកសង្គ្រោះ បានស្វែងរកនៅដែនទឹកប្រទេសជប៉ុន នៅថ្ងៃព្រហស្បតិ៍នេះ ខណៈពួកគេ ស្វែងរកបុគ្គលិកកងកម្លាំងទ័ពអាកាស៧នាក់បាត់ខ្លួន ដែលយន្តហោះ Osprey បានធ្លាក់អំឡុងលំហាត់ហ្វឹកហ្វឺន ជាឧបទ្ទវហេតុចុងក្រោយ ទាក់ទងទៅនឹង យន្តហោះយោធា។យោងតាមឆ្មាំល្បាតឆ្នេរប្រទេសជប៉ុន បានឲ្យដឹងថា បុគ្គលិកសន្លប់ម្នាក់ ត្រូវបានរកឃើញនៅក្នុងសមុទ្រកាលពីថ្ងៃពុធ ហើយក្រោយមកត្រូវបានប្រកាសថាស្លាប់បន្ទាប់ពីយន្តហោះបានធ្លាក់នៅជិត កោះ Yakushima។ទីបញ្ជាការប្រតិបត្តិការពិសេសកងកម្លាំងទ័ពអាកាសអាមេរិក និយាយថាបុគ្គលិកយានិក៨នាក់ ជិះនៅលើយន្តហោះCV-22B ខណៈយន្តហោះនេះ ធ្វើបេសកកម្មហ្វឹកហ្វឺនតាមទម្លាប់ នៅក្រៅមូលដ្ឋានទ័ពអាកាស Yokota ក្នុងប្រទេសជប៉ុន។ទីបញ្ជាការបាននិយាយនៅក្នុងសេចក្តីថ្លែងការណ៍ថា មូលហេតុនៃឧបទ្ទវហេតុនេះបច្ចុប្បន្ននៅពុំទាន់ដឹងនៅឡើយ ដោយបុគ្គលិកសង្គ្រោះបន្ទាន់ នៅកន្លែងកើតហេតុ កំពុងធ្វើប្រតិបត្តិការស្វែងរកនិងជួយសង្គ្រោះ។ មន្ត្រីគ្រប់គ្រងភាពអាសន្ន នៅក្នុងតំបន់ Kagoshima ជាកន្លែងដែលយន្តហោះបានធ្លាក់ និយាយថា នគរបាល បានទទួលព័ត៌មានថា យន្តហោះមានអគ្គិភ័យផ្សែងហុយចេញពីម៉ាស៊ីនយន្តហោះនៅផ្នែកខាងឆ្វេង។ អ្នកនាំពាក្យឆ្មាំល្បាតឆ្នេរជប៉ុន បាននិយាយនៅថ្ងៃព្រហស្បតិ៍នេះថា ប្រតិបត្តិការស្វែងរក កំពុងបន្តទាំងពេលយប់ ដែលយន្តហោះ និងនាវាច្រើនគ្រឿងកំពុងត្រូវបានដាក់ពង្រាយ។

ប្រធានាធិបតី៖ អ៊ីស្រាអែល ប្ដេជ្ញាក្នុងការបង្កើននិងធ្វើឲ្យមាននិរន្តរភាពជំនួយចូលទៅក្នុងតំបន់ហ្កាហ្សា

ប្រធានាធិបតីអ៊ីស្រាអែល លោក Issac Herzog បាននិយាយកាលពីថ្ងៃពុធថា រដ្ឋាភិបាលរបស់លោកបានប្តេជ្ញា «បង្កើន និងធ្វើឲ្យមាននិរន្តរភាព» ការផ្គត់ផ្គង់ជំនួយមនុស្សធម៌ទៅដល់តំបន់ហ្កាហ្សា។លោក Herzog បានថ្លែងដូចនេះ ខណៈធ្វើដំណើរទៅកាន់ច្រកឆ្លងកាត់ Nitzana នៅព្រំដែនប្រទេសអ៊ីស្រាអែល-អេហ្ស៊ីប ជាកន្លែងដែលរថយន្តដឹកជំនួយជាច្រើនគ្រឿងត្រូវបានគេនិយាយថា មានដឹកអាហារ ទឹក សម្ភារៈទីជម្រក និងការផ្គត់ផ្គង់វេជ្ជសាស្រ្ត ត្រូវបានដាក់ចត មុនពេលឆ្លងកាត់ចូលទៅក្នុងតំបន់ហ្កាហ្សា។លោកប្រធានាធិបតី បាននិយាយថា រថយន្តដឹកទំនិញ ក្នុងចំនួនដ៏ច្រើន កំពុងធ្វើដំណើរចូលទៅក្នុងហ្កាហ្សា ដោយមានជំនួយមនុស្សធម៌។ កិច្ចព្រមព្រៀងបទឈប់បាញ់ដ៏ផុយស្រួយ រវាងអ៊ីស្រាអែលនិងក្រុមហាម៉ាស កាលពីសប្តាហ៍មុន បានអនុញ្ញាតឱ្យអង្គការសុខភាពពិភពលោក(WHO) និងអង្គការផ្តល់ជំនួយ បង្កើនការដឹកជញ្ចូនការផ្គត់ផ្គង់សំខាន់ៗរបស់ពួកគេ ប៉ុន្តែទាំងនេះនៅឆ្ងាយពីការផ្គត់ផ្គង់ឲ្យបានគ្រប់គ្រាន់ដើម្បីបំពេញតម្រូវការរបស់ប្រជាជន ២,៣ លាននាក់នៅតំបន់ហ្កាហ្សា។

មនុស្សយ៉ាងហោចណាស់ ៤០នាក់ បានស្លាប់ក្នុងការវាយប្រហារនៅភាគខាងជើងប្រទេសបួគីណាហ្វាសូ

ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា ក្រុមសកម្មប្រយុទ្ធរដ្ឋអ៊ីស្លាមជីហាដ បានសម្លាប់ជនស៊ីវិលយ៉ាងតិច ៤០នាក់ ក្នុងអំឡុងពេលការវាយប្រហារនៅភាគខាងជើងប្រទេសបួគីណាហ្វាសូ កាលពីចុងសប្តាហ៍។ ការវាយលុកដែលត្រូវបានរាយការណ៍ចុងក្រោយបំផុតនៅក្នុងតំបន់ដែលសម្បូរទៅដោយសកម្មភាពក្រុមជ្រុលនិយមជីហាដ បានកើតឡើងកាលពីថ្ងៃអាទិត្យ នៅក្នុងទីក្រុង ជីបូ (Djibo) ជាទីដែលជនភៀសខ្លួនជាច្រើនបានស្វែងរកកន្លែងជ្រកកោន។អ្នកនាំពាក្យការិយាល័យសិទ្ធិមនុស្សប្រចាំតំបន់ លោក សែហ្វ ម៉ាហ្កានហ្កូ (Seif Magango) បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារ (២៨ វិច្ឆិកា) ថា អ្នកប្រយុទ្ធមកពីក្រុម ដែលមានទំនាក់ទំនងជាមួយក្រុមអាល់កៃដា បានវាយប្រហារមូលដ្ឋានយោធា លំនៅឋាន និងជំរំជនភៀសខ្លួន។ សេចក្តីថ្លែងការណ៍នោះបាននិយាយថា អ្នកវាយប្រហារបានសម្លាប់ជនស៊ីវិលយ៉ាងតិច ៤០នាក់ របួសជាង ៤២នាក់ បានដុតបំផ្លាញជម្រកបីទីតាំងសម្រាប់ជនភៀសខ្លួន និងហាងចំនួន ២០កន្លែង។បួគីណាហ្វាសូ គឺជាប្រទេសមួយក្នុងចំណោមប្រទេសអាហ្រ្វិកខាងលិចជាច្រើនដែលកំពុងប្រយុទ្ធនឹងការបះបោរ ដែលបានចាក់ឫសគល់នៅក្នុងប្រទេសម៉ាលី កាលពីឆ្នាំ២០១២ ហើយចាប់តាំងពីពេលនោះមកបានរីករាលដាលដល់តំបន់អាហ្វ្រិក សាហែល ភាគខាងត្បូងនៃឆ្នេរខ្សាច់សាហារ៉ា។ ក្រុមដែលមានទំនាក់ទំនងជាមួយក្រុមអាល់កៃដា និងរដ្ឋឥស្លាម បានដណ្តើមយកទឹកដីដ៏ច្រើនសន្ធឹកសន្ធាប់ក្នុងរយៈពេលមួយទសវត្សរ៍កន្លងមកនេះ ដោយបានសម្លាប់មនុស្សរាប់ពាន់នាក់ និងបណ្ដាលឲ្យមនុស្សជាង ៦លាននាក់ ត្រូវជម្លៀសខ្លួននៅក្នុងដំណើរការនៃជម្លោះនេះ៕

រដ្ឋមន្ត្រីការបរទេសនិយាយថា ករណីជំងឺគ្រុនផ្តាសាយធំនៅចិន ស្ថិតក្រោមការគ្រប់គ្រងដោយប្រសិទ្ធភាព

រដ្ឋមន្ត្រីការបរទេសចិន លោក Wang Yi បាននិយាយកាលពីថ្ងៃពុធថា ការកើនឡើងជំងឺផ្លូវដង្ហើមនៅក្នុងប្រទេសចិន គឺជាបញ្ហាធម្មតាដែលប្រទេសជាច្រើនប្រឈមមុខ ហើយអាជ្ញាធរចិនបានធ្វើឲ្យជំងឺនេះស្ថិតនៅក្រោមការគ្រប់គ្រងដោយប្រសិទ្ធភាព។អង្គការសុខភាពពិភពលោក (WHO) កាលពីសប្តាហ៍មុន បានស្នើឱ្យប្រទេសចិនផ្តល់ព័ត៌មានលម្អិត អំពីការកើនឡើងជំងឺផ្លូវដង្ហើម និងរាយការណ៍ពីចង្កោមនៃជំងឺរលាកសួតចំពោះកុមារ។ ប៉ុន្តែមន្ត្រី អង្គការសុខភាពពិភពលោក បាននិយាយកាលពីថ្ងៃចន្ទថា ការកើនឡើងជំងឺនៅក្នុងប្រទេសចិន មិនហក់ឡើងខ្ពស់ដូចការរាតត្បាតជំងឺកូវីដ-១៩ ពីពេលមុននោះទេ និងបាននិយាយជាថ្មីថា ពុំបានរកឃើញវីរុសថ្មី ឬវីរុសខុសពីធម្មតាណាមួយ ត្រូវបានរកឃើញនៅក្នុងករណីថ្មីៗនេះឡើយ។ លោក Wang បាននិយាយទៅកាន់អ្នកសារព័ត៌មាននៅអង្គការសហប្រជាជាតិនៅទីក្រុងញូវយ៉ក ជាកន្លែងដែលលោកកំពុងធ្វើជាប្រធានសម័យប្រជុំក្រុមប្រឹក្សាសន្តិសុខអង្គការសហប្រជាជាតិ ស្តីពីជម្លោះអ៊ីស្រាអែល និងក្រុមហាម៉ាសថា ថ្មីៗនេះ យើងបានឃើញចង្កោមករណីគ្រុនផ្តាសាយ ក្នុងចំណោមកុមារនៅក្នុងផ្នែកមួយចំនួនរបស់ប្រទេសចិន។ តាមពិត នោះគឺជាបាតុភូតធម្មតានៅក្នុងប្រទេសជាច្រើន ហើយនៅក្នុងប្រទេសចិន បញ្ហាជំងឺនេះត្រូវបានដាក់ឱ្យស្ថិតក្រោមការគ្រប់គ្រងដោយប្រសិទ្ធភាព។ លោកនិយាយថា អន្តរកម្មរបស់ប្រទេសចិនជាមួយសហគមន៍អន្តរជាតិ នឹងមិនត្រូវបានរងផលប៉ះពាល់ដោយកត្តាណាមួយឡើយ ហើយយើងស្វាគមន៍ការមកទស្សនាកាន់តែច្រើនពីមិត្តភក្តិមកពីជុំវិញពិភពលោក។ ទាំងប្រទេសចិន និងអង្គការសុខភាពពិភពលោក បានប្រឈមមុខនឹងសំណួរអំពីតម្លាភាពនៃការរាយការណ៍ករណីជំងឺ COVID-19 ដំបូងបំផុតដែលបានលេចឡើងនៅក្នុងទីក្រុង Wuhan ភាគកណ្តាលប្រទេសចិនកាលពីចុងឆ្នាំ ២០១៩ ។

អ្នកស្រុកហ្កាហ្សានិយាយថា បទឈប់បាញ់បណ្ដោះអាសន្នគឺមិនគ្រប់គ្រាន់នោះទេ

អ្នកស្រុកនៅសង្កាត់អាប៊ុ តាអ៊ីម៉ាហ៍ (Abu Ta'imah) នៅជាយក្រុង ខាន់ យ៉ូនីស (Khan Younis) របស់តំបន់ហ្កហ្សា បាននិយាយថា ទឹកដីប៉ាឡេស្ទីនត្រូវការបទឈប់បាញ់ជាអចិន្ត្រៃយ៍ មិនមែនគ្រាន់តែជាការបន្តបទឈប់បាញ់រវាងអ៊ីស្រាអែល និងក្រុមហាម៉ាសនោះទេ ខណៈពួកគេត្រឡប់ទៅលំនៅឋានវិញ ហើយមើលឃើញផ្ទះរបស់ពួកគេត្រូវបានបំផ្លិចបំផ្លាញដោយគ្រាប់បែក។ប្រជាជនក្នុងតំបន់បានភៀសខ្លួនចេញពីតំបន់នេះនៅគែមខាងកើតនៃទីក្រុង នៅពេលសង្រ្គាមចាប់ផ្តើម ហើយមិនបានត្រឡប់ទៅវិញរហូតដល់បទឈប់បាញ់បណ្ដោះអាសន្ន ដែលឈានចូលថ្ងៃទីប្រាំមួយរបស់ខ្លួនកាលពីថ្ងៃពុធ។ អ្នកស្រុកបាននិយាយថា «ផ្ទះរបស់យើងត្រូវបានបំផ្លាញទាំងស្រុង ហើយអ្វីគ្រប់យ៉ាងត្រូវបានបំផ្លាញខ្ទេចខ្ទី។ យើងមិនត្រូវការបទឈប់បាញ់បណ្ដោះអាសន្ននេះទេ ព្រោះវាមិនគ្រប់គ្រាន់ឡើយ។ យើងត្រូវការបទឈប់បាញ់ពេញលេញមួយ» ដោយប្រដូចអ្វីដែលពួកគេកំពុងមើលឃើញទៅនឹងតំបន់រងគ្រោះដោយរញ្ជួយដី។ដោយឈរនៅលើដំបូលដែលមានទិដ្ឋភាពពោរពេញដោយអគារបាក់បែក និងគំនរបាក់បែកដ៏មហន្តរាយ អ្នកស្រុកហ្កាហ្សាបាននិយាយថា តំបន់នេះជាផ្ទះរបស់ប្រជាជនប្រហែល ៥.០០០នាក់ ឬ៦.០០០នាក់ មុនពេលសង្រ្គាម។ក្រុមសកម្មប្រយុទ្ធហាម៉ាស ដែលជាក្រុមអ៊ីស្លាមនិយម គ្រប់គ្រងតំបន់ហ្កាហ្សា បានបង្កសង្គ្រាមកាលពីថ្ងៃទី៧ ខែតុលា នៅពេលដែលពួកគេបានវាយលុកឆ្លងកាត់ភាគខាងត្បូងប្រទេសអ៊ីស្រាអែល ដោយបានសម្លាប់មនុស្ស ១.២០០នាក់ រួមទាំងទារក និងកុមារ ព្រមទាំងចាប់ចំណាប់ថ្នូរប្រហែល ២៤០នាក់ នេះបើយោងតាមតួលេខសរុបរបស់ប្រទេសអ៊ីស្រាអែល។ យោងតាមមន្ត្រីសុខាភិបាលនៅតំបន់ហ្កាហ្សា បានឲ្យដឹងថា អ៊ីស្រាអែលបានប្តេជ្ញាថានឹងកម្ទេចក្រុមហាម៉ាស ហើយបានបើកការវាយលុកលើតំបន់ហ្កាហ្សា ដែលបានសម្លាប់មនុស្សជាង ១៥.០០០នាក់ក្នុងនោះមានមនុស្ស ៤នាក់ក្នុងចំណោម ១០នាក់ជាកុមារ៕

ប្រមុខ UN និយាយថា តំបន់ហ្កាហ្សា កំពុងស្ថិតនៅក្នុងមហន្តរាយមនុស្សធម៌ដ៏ធ្ងន់ធ្ងរ

អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស (Antonio Guterres) កាលពីថ្ងៃពុធ (២៩ វិច្ឆិកា) បានព្រមានថា តំបន់ហ្កាហ្សា ស្រ្ទីប កំពុងស្ថិតក្នុងចំកណ្តាលនៃ «មហន្តរាយមនុស្សធម៌» ដ៏ធ្ងន់ធ្ងរ ខណៈការអំពាវនាវបានកើនឡើងសម្រាប់បទឈប់បាញ់អចិន្រ្តៃយ៍ដើម្បីជំនួសឲ្យបទឈប់បាញ់បណ្តោះអាសន្នរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស។ប្រមុខអង្គការសហប្រជាជាតិរូបនេះបានប្រាប់កិច្ចប្រជុំនៃក្រុមប្រឹក្សាសន្តិសុខអង្គការសហប្រជាជាតិ ដែលដឹកនាំដោយរដ្ឋមន្ត្រីការបរទេសចិន លោក វ៉ាង យី (Wang Yi) ដោយសារប្រទេសចិន ជាប្រធានក្រុមប្រឹក្សាចំនួន ១៥រូបមួយនេះសម្រាប់ខែវិច្ឆិកា ថា «ការចរចាដ៏តានតឹងកំពុងប្រព្រឹត្តទៅដើម្បីពន្យារបទឈប់បាញ់ ដែលយើងស្វាគមន៍យ៉ាងខ្លាំង ប៉ុន្តែយើងត្រូវការបទឈប់បាញ់មនុស្សធម៌ពិតប្រាកដ»។ ការចរចានៅនាទីចុងក្រោយបានបន្តរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស កាលពីថ្ងៃពុធ ដើម្បីបន្តបទឈប់បាញ់នៅតំបន់ហ្កាហ្សា។លោក Guterres បានរាយការណ៍សង្ខេបដល់ក្រុមប្រឹក្សាសន្តិសុខស្តីពីការអនុវត្តសេចក្ដីសម្រេចដែលខ្លួនបានអនុម័តកាលពីដើមខែនេះ ដែលបានអំពាវនាវឱ្យមានការផ្អាកប្រយុទ្ធមនុស្សធម៌ដើម្បីអនុញ្ញាតឱ្យទទួលបានជំនួយ និងការដោះលែងចំណាប់ថ្នូរទាំងអស់ដែលត្រូវចាប់ខ្លួនដោយក្រុមហាម៉ាស។អង្គការសហប្រជាជាតិបានបង្កើនការផ្តល់ជំនួយមនុស្សធម៌ទៅកាន់តំបន់ហ្កាហ្សា ដែលជាតំបន់ឆ្នេរហ៊ុមព័ទ្ធមានប្រជាជនចំនួន ២,៣លាននាក់ ក្នុងអំឡុងពេលបទឈប់បាញ់ ប៉ុន្តែលោក Guterres បាននិយាយថា កម្រិតនៃជំនួយ «នៅតែមិនគ្រប់គ្រាន់ទាំងស្រុងដើម្បីបំពេញតម្រូវការដ៏ធំធេង» របស់ពលរដ្ឋនៅទីនោះទេ៕

ក្រុមអ្នកបើករថយន្តដឹកទំនិញស្លូវ៉ាគី នឹងបិទច្រកព្រំដែនឆ្លងកាត់អ៊ុយក្រែន ដោយចូលរួមការតវ៉ារបស់ប៉ូឡូញ

សមាគមអ្នកបើករថយន្តដឹកទំនិញរបស់ប្រទេសស្លូវ៉ាគី UNAS បាននិយាយថា ក្រុមអ្នកដឹកទំនិញស្លូវ៉ាគីនឹងបិទច្រកព្រំដែនសំខាន់ជាមួយអ៊ុយក្រែន ចាប់ពីថ្ងៃសុក្រតទៅ ដោយចូលរួមការតវ៉ារបស់ប៉ូឡូញ ដើម្បីធ្វើការរឹតបន្តឹងប្រឆាំងនឹងក្រុមអ្នកបើកបរអ៊ុយក្រែន។ក្រុមអ្នកបើករថយន្តដឹកទំនិញប៉ូឡូញ បាននិងកំពុងបិទច្រកឆ្លងកាត់ជាច្រើនជាមួយអ៊ុយក្រែន ចាប់តាំងពីថ្ងៃទី៦ ខែវិច្ឆិកា ដើម្បីទាមទារលក្ខខណ្ឌតឹងរ៉ឹងសម្រាប់មិត្តអ៊ុយក្រែន។ក្រុមអ្នកបើករថយន្តដឹកទំនិញប៉ូឡូញ និងស្លូវ៉ាគី បានត្អូញត្អែរថា ក្រុមអ្នកបើករថយន្តដឹកទំនិញអ៊ុយក្រែនផ្តល់តម្លៃថោកជាងសម្រាប់សេវាកម្មរបស់ពួកគេ ហើយថែមទាំងដឹកជញ្ជូនទំនិញ នៅក្នុងសហភាពអឺរ៉ុប ច្រើនជាងរវាងប្លុកនេះ និងអ៊ុយក្រែន។ក្រុមអ្នកបើកបរស្លូវ៉ាគី បានធ្វើបាតុកម្មជានិមិត្តរូប នៅដើមខែនេះ ប៉ុន្តែនឹងចាប់ផ្តើមការបិទផ្លូវរបស់ពួកគេនៅច្រក Vysne Nemecke/Uzhhorod ចាប់ពីម៉ោង ៣ រសៀល។ (១៤ 00 ម៉ោងសកល) នៅថ្ងៃសុក្រ។

នៅអង្គការសហប្រជាជាតិ រដ្ឋមន្ត្រីការបរទេសចិន អំពាវនាវឱ្យមានបទឈប់បាញ់គ្រប់ជ្រុងជ្រោយនៅ ហ្កាហ្សា

រដ្ឋមន្ត្រីការបរទេសចិន បានទាមទារ «បទឈប់បាញ់គ្រប់ជ្រុងជ្រោយ និងយូរអង្វែង» នៅតំបន់ហ្កាហ្សា កាលពីថ្ងៃពុធ និងមានក្តីសង្ឃឹមថា ការផ្អាកប្រយុទ្ធសម្រាប់បុព្វហេតុមនុស្សធម៌បច្ចុប្បន្ន នឹងពុំមែនជា ការផ្អាក មុនពេលការវាយលុកថ្មីនោះទេ។ លោក Wang Yi បាននិយាយទៅកាន់កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីស្ថានភាពនៅមជ្ឈិមបូព៌ាថា «យើងគួរតែធ្វើការដើម្បីឲ្យមានបទឈប់បាញ់គ្រប់ជ្រុងជ្រោយនិងយូរអង្វែងជាមួយនឹងភាពបន្ទាន់ខ្លាំងបំផុត ដែលគ្មានតំបន់សុវត្ថិភាពនៅក្រោមការបាញ់កាំភ្លើង ហើយបើមានការប្រយុទ្ធគ្នា នោះនឹងនាំមកនូវការស្លាប់ និងការបំផ្លាញកាន់តែច្រើន។ លោក Wang បាននិយាយថា ជម្លោះប៉ាឡេស្ទីន-អ៊ីស្រាអែល បាននាំឱ្យមានការបាត់បង់អាយុជីវិតមនុស្សស្លូតត្រង់យ៉ាងច្រើន ជាមហន្តរាយមនុស្សធម៌មិនធ្លាប់មានពីមុនមក ហើយផលប៉ះពាល់ហៀរចេញ នៅតែលេចឡើង។ លោកនិយាយថា ប្រទេសចិនសង្ឃឹមយ៉ាងមុតមាំថា ថ្ងៃនៃការផ្អាកប្រយុទ្ធកន្លងផុតទៅនេះ នឹងពុំជាការផ្អាក នៅមុនពេលការវាយលុកថ្មីនោះទេ ប៉ុន្តែជាការចាប់ផ្តើមនៃកិច្ចខិតខំប្រឹងប្រែងផ្នែកការទូតបន្ថែមទៀតសម្រាប់បទឈប់បាញ់គ្រប់ជ្រុងជ្រោយនិងយូរអង្វែង។ សកម្មភាពណាមួយ ដែលបំពានច្បាប់អន្តរជាតិ និងជាពិសេសច្បាប់មនុស្សធម៌អន្តរជាតិ គួរតែត្រូវបានថ្កោលទោស។ ប្រទេសចិនបញ្ជាក់ជាថ្មីនូវការប្រឆាំងចំពោះការដាក់ទណ្ឌកម្មរួមទៅលើប្រជាជននៅតំបន់ហ្កាហ្សា និងការប្រឆាំងរបស់យើងចំពោះការផ្ទេរដោយបង្ខំ ដែលផ្តោតលើជនស៊ីវិលប៉ាឡេស្ទីន។ លោក Wang បានបញ្ជាក់លើតម្រូវការដើម្បីធ្វើឱ្យដំណើរការឡើងវិញនូវទស្សនវិស័យនយោបាយចំពោះដំណោះស្រាយរដ្ឋពីរ ដោយមានការប្តេជ្ញាចិត្តកាន់តែខ្លាំង។ លោកនិយាយថា ប្រទេសចិន គាំទ្រការរៀបចំឲ្យសន្និសិទសន្តិភាពអន្តរជាតិប្រកបដោយប្រសិទ្ធភាព និងទ្រង់ទ្រាយធំ ហើយគាំទ្រប៉ាឡេស្ទីនក្នុងការក្លាយជាសមាជិកពេញសិទ្ធិរបស់អង្គការសហប្រជាជាតិ។ នៅក្នុងសន្និសីទសារព័ត៌មាន បន្ទាប់ពីសុន្ទរកថាទៅកាន់ក្រុមប្រឹក្សា លោក Wang Yi បាននិយាយថា មិនគួរមានការកំណត់ពេលវេលាសម្រាប់បទឈប់បាញ់នោះទេ ហើយបានទាមទារឱ្យមានការដោះលែងចំណាប់ថ្នូរទាំងអស់ និងដកចេញការបិទផ្លូវនៅតំបន់ហ្កាហ្សា។

បណ្ដាញសង្គម

ព័ត៌មានថ្មីៗ

ភ្លៀងធ្លាក់ខ្លាំង និងទឹកជំនន់ នៅទីក្រុងបាងកក ជំរុញឱ្យជម្លៀសប្រជាជន ខណៈមានអ្នកស្លាប់ ២នាក់

ប្រមុខការទូតកម្ពុជាប្រាប់មហាសន្និបាត UN អំពីកិច្ចខិតខំប្រឹងប្រែងរបស់កម្ពុជាក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាដែលជាអាទិភាពដ៏សំខាន់បំផុត

ប្រមុខការទូតកម្ពុជាប្រាប់មហាសន្និបាត UN ថា កម្ពុជាជ្រើសយកយន្តការផ្សះផ្សាដោយបង្ខំក្រោមអនុសញ្ញា UNCLOS ដើម្បីការពារអធិបតេយ្យ និងសិទ្ធិលើដែនសមុទ្រស្របតាមច្បាប់អន្តរជាតិ

ប្រមុខការទូតកម្ពុជាប្រាប់មហាសន្និបាត UN ថា ជម្លោះកម្ពុជា-ថៃធ្វើឱ្យប៉ះពាល់យ៉ាងធ្ងន់ធ្ងរដល់ជំនឿទុកចិត្តរវាងប្រទេសទាំងពីរ ខណៈសម្រាប់កម្ពុជាការស្តារទំនុកចិត្តឡើងវិញត្រូវតែផ្អែកលើការប្តេជ្ញាចិត្តជាក់ស្តែង

រដ្ឋមន្ត្រីការបរទេសកម្ពុជា-នីហ្សេ ចុះហត្ថលេខាលើកិច្ចព្រមព្រៀងស្តីពីការបង្កើតទំនាក់ទំនងការទូតរវាងប្រទេសទាំងពីរ

ក្រោយមានបទបញ្ជារបស់សម្តេចធិបតី នាយករដ្ឋមន្រ្តី កងពលតូចដឹកជញ្ជូនលេខ៩៩ បានត្រៀមកម្លាំង និងសម្ភារៈរួចជាស្រេច២៤ម៉ោងលើ២៤ម៉ោង ដើម្បីចុះអន្តរាគមន៍ពលរដ្ឋរងគ្រោះដោយទឹកជំនន់

ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ចុះពិនិត្យស្ថានភាព និងផ្តល់ជំនួយដល់ពលរដ្ឋរងគ្រោះទឹកជំនន់ នៅក្រុងប៉ោយប៉ែត

ជំនន់ស្ទឹងសង្កែបណ្ដាលឱ្យប៉ះពាល់ផ្ទះពលរដ្ឋនៅស្រុកឯកភ្នំជាង ៣ពាន់ខ្នង និងដំណាំជាង ៣ពាន់ហិកតា

ឯកឧត្តម ប្រាក់ សុខុន ជួបពិភាក្សាទ្វេភាគីជាមួយរដ្ឋមន្ត្រីការបរទេសអ៊ីរ៉ង់ ក្នុងឱកាសអញ្ជើញចូលរួមកិច្ចពិភាក្សាទូទៅនៃមហាសន្និបាត UN

ប្រមុខការទូតកម្ពុជា និងអគ្គលេខាធិការ UN ជួបពិភាក្សាទ្វេភាគី ផ្លាស់ប្តូរទស្សនៈគ្នាលើបច្ចុប្បន្នភាពនៅតាមបណ្តោយព្រំដែនកម្ពុជា-ថៃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877