BTV NEWS

ជនជាតិចិន ៣២៩នាក់ ពាក់ព័ន្ធករណីឆបោកតាមប្រព័ន្ធអនឡាញ (Online Scams) ត្រូវបានបណ្ដេញចេញពីព្រះរាជាណាចក្រកម្ពុជា

ករណី Online Scams ៖ តំណាងអយ្យការសម្រេចចោទប្រកាន់លើមន្ត្រីនគរបាលផ្កាយបី១នាក់ ,ផ្កាយពីរ ១នាក់ និងពាក់ព័ន្ធ ៤នាក់ផ្សេងទៀត

តំណាងអយ្យការ មិនទាន់បញ្ចប់ការស៊ើបអង្កេត និងស្តាប់ចម្លើយមន្ត្រីជាន់ខ្ពស់នគរបាល២រូប និងជនសង្ស័យពីររូបទៀតនៅឡើយទេពាក់ព័ន្ធករណីសង្ស័យស៊ីសំណូក និងសម្អាតប្រាក់ពីក្រុមឆបោក តាមប្រព័ន្ធបច្ចេកវិទ្យា

ប្រព័ន្ធលូបង្ហូរទឹក ជាផ្នែកសំខាន់ដែលអាជ្ញាធរមូលដ្ឋានត្រូវយកចិត្តទុកដាក់ ដើម្បីបញ្ចៀសការជន់លិចនៅរដូវវស្សា

សន្តិសុខ និង សង្គម

កម្តៅត្រូវបានព្យាករថានឹងសម្លាប់មនុស្សជិត ៥ ដងបន្ថែមទៀតនៅឆ្នាំ ២០៥០

ក្រុមអ្នកជំនាញអន្តរជាតិ បានព្រមាននៅថ្ងៃពុធ ទី១៥ ខែវិច្ឆិកានេះថា មនុស្សជិត៥ដងបន្ថែមទៀតទំនងជានឹងស្លាប់ដោយសារតែកម្តៅក្តៅខ្លាំងនៅក្នុងទសវត្សរ៍ខាងមុខនេះ ហើយប្រសិនបើគ្មានវិធានការលើបម្រែបម្រួលអាកាសធាតុនោះទេ សុខភាពរបស់មនុស្សនឹងមានហានិភ័យយ៉ាងធ្ងន់ធ្ងរ។ យោងតាម The Lancet Countdown ជាស្ថាប័នវាយតម្លៃប្រចាំឆ្នាំដ៏សំខាន់ ធ្វើឡើងដោយក្រុមអ្នកស្រាវជ្រាវ និងស្ថាប័នឈានមុខ បានឲ្យដឹងថា កម្តៅដែលអាចធ្វើឲ្យមនុស្សស្លាប់ ជាបញ្ហាមួយក្នុងចំណោមបញ្ហាជាច្រើន ដែលការប្រើប្រាស់ឥន្ធនៈហ្វូស៊ីលកំពុងកើនឡើងនៅលើពិភពលោក គំរាមកំហែងដល់សុខភាពមនុស្ស ។ អ្នកស្រាវជ្រាវបានព្រមានថា គ្រោះរាំងស្ងួតទូទៅកាន់តែច្រើននឹងធ្វើឱ្យមនុស្សរាប់លាននាក់ប្រឈមហានិភ័យភាពអត់ឃ្លាន សត្វមូសរាលដាលកាន់តែឆ្ងាយជាងពេលណាៗទាំងអស់ចម្លងជំងឺឆ្លង ហើយប្រព័ន្ធសុខាភិបាលនឹងព្យាយាមដើម្បីទប់ទល់ជាមួយបន្ទុកនេះ។ ការវាយតម្លៃនេះ ធ្វើឡើងក្នុងអំឡុងពេល អ្វីដែលគេរំពឹងថាជាឆ្នាំដែលក្តៅបំផុតក្នុងប្រវត្តិសាស្ត្រមនុស្សជាតិ ដែលកាលសប្តាហ៍មុនអ្នកតាមដានអាកាសធាតុរបស់អឺរ៉ុប បានប្រកាសថាកាលពីខែតុលាមុន ជាខែក្តៅបំផុតក្នុងកំណត់ត្រា។វាក៏កើតឡើងមុនកិច្ចពិភាក្សាស្តីពីអាកាសធាតុ COP28 នៅទីក្រុងឌូបៃ នៅខែក្រោយ ដែលនឹងរៀបចំ «ទិវាសុខភាព» ជាលើកដំបូងនៅថ្ងៃទី ៣ ខែធ្នូ ខណៈអ្នកជំនាញព្យាយាមបំភ្លឺអំពីផលប៉ះពាល់នៃការឡើងកម្តៅផែនដីសកល មកលើសុខភាព។ របាយការណ៍របស់ The Lancet Countdown បាននិយាយថា ទោះបីជាមានការអំពាវនាវកើនឡើងសម្រាប់សកម្មភាពជាសាកលក៏ដោយ ការបំភាយកាបូនដែលទាក់ទងនឹងថាមពល បានកើនឡើងដល់កម្រិតខ្ពស់ថ្មីកាលពីឆ្នាំមុន ។

បាតុករប្រមូលផ្តុំគ្នាគាំទ្រអ៊ីស្រាអែល និងប្រឆាំងផ្នត់គំនិតប្រឆាំងជនជាតិជ្វីហ្វ ក្នុងទីក្រុងវ៉ាស៊ីនតោន

បាតុកររាប់ម៉ឺននាក់ បានមកប្រមូលផ្តុំគ្នានៅក្នុងទីក្រុងវ៉ាស៊ីនតោន កាលពីថ្ងៃអង្គារ សម្រាប់បាតុកម្មមួយគាំទ្រអ៊ីស្រាអែល ដើម្បីបង្ហាញសាមគ្គីភាពជាមួយអ៊ីស្រាអែល ក្នុងសង្គ្រាមរបស់ប្រទេសនេះ ជាមួយក្រុមហាម៉ាស និងថ្កោលទោសការកើនឡើងការផ្នត់គំនិតប្រឆាំងជនជាតិជ្វីហ្វ។ផ្លូវជាច្រើនកន្លែងត្រូវបានបិទនៅជុំវិញទីប្រជុំជនភាគច្រើន សន្តិសុខត្រូវបានរឹតបន្តឹង ខណៈមនុស្សជាច្រើន បានប្រមូលផ្តុំគ្នានៅពេលថ្ងៃរះនៅឧទ្យានជាតិ National Mall ដែលមនុស្សជាច្រើនបានកាន់ទង់ជាតិអ៊ីស្រាអែល និងសហរដ្ឋអាមេរិក។ ការតវ៉ា និងបាតុកម្មសាធារណៈជាច្រើន ទាំងគាំទ្រប៉ាឡេស្ទីន និងគាំទ្រអ៊ីស្រាអែល បានរាលដាលនៅជុំវិញពិភពលោក ចាប់តាំងពីខ្មាន់កាំភ្លើងមកពីក្រុមសកម្មប្រយុទ្ធហាម៉ាសប៉ាឡេស្ទីន បានសម្រុកចូលតាមប្រទេសអ៊ីស្រាអែលភាគខាងត្បូងកាលពីថ្ងៃទី៧ ខែតុលា បណ្តាលឲ្យមនុស្ស១.២០០នាក់ស្លាប់ និងប្រមាណ២៤០នាក់ត្រូវបានចាប់ជាចំណាប់ថ្នូរនាំយកទៅកាន់តំបន់ហ្កាហ្សា។ប្រទេសអ៊ីស្រាអែល បានឆ្លើយតបវិញដោយការបិទផ្លូវតឹងរ៉ឹងនៅតំបន់ហ្កាហ្សាគ្រប់គ្រងដោយក្រុមហាម៉ាសនិងបានទម្លាក់គ្រាប់បែកតាមអាកាស ព្រមទាំងវាយប្រហាតាមដីគោក ដែលអាជ្ញាធរប៉ាឡេស្ទីន និយាយថា បានសម្លាប់មនុស្សជាង១១.០០០នាក់ ប្រមាណ៤០ភាគរយក្នុងចំណោមនេះជាកុមារ។

ក្រុមឧទ្ទាម Houthis នៅយ៉េម៉ែន និយាយថា ពួកគេបានបាញ់មីស៊ីលបាលីស្ទីក លើគោលដៅយោធាអ៊ីស្រាអែល

ក្រុមឧទ្ទាម Houthis នៅយ៉េម៉ែន បាននិយាយថាពួកគេ បានបាញ់មីស៊ីលបាលីស្ទីកទៅលើគោលដៅយោធាអ៊ីស្រាអែលជាច្រើនកន្លែង។ អ្នកនាំពាក្យយោធារបស់ក្រុមនេះ លោក Yahya Sarea បាននិយាយនៅក្នុងសេចក្តីថ្លែងការណ៍តាមទូរទស្សន៍ថា ក្រុមHouthis បានបាញ់មីស៊ីលបាលីស្ទីក ទៅលើគោលដៅជាច្រើនកន្លែងរបស់យោធាអ៊ីស្រាអែលនៅក្នុងដែនដីកាន់កាប់ប៉ាឡេស្ទីន រួមមានទាំងគោលដៅលាក់បាំង នៅក្នុងតំបន់ Umm Al-Rashrash ។អ្នកនាំពាក្យបាននិយាយថា ការបាញ់មីស៊ីល បានធ្វើឡើង រយៈ២៤ម៉ោងបន្ទាប់ពីប្រតិបត្តិការយោធាមួយផ្សេងទៀត ដែលត្រូវបានអនុវត្តដោយកងកម្លាំងប្រដាប់អាវុធរបស់យើងដោយប្រើប្រាស់យានដ្រូន ទៅលើគោលដៅតែមួយ។ អ្នកនាំពាក្យនិយាយបន្តថា ក្រុមនេះនឹងមិនស្ទាក់ស្ទើរនោះទេ ដើម្បីដាក់គោលដៅលើនាវាអ៊ីស្រអែលនៅសមុទ្រក្រហម ឬនៅទីតាំងណាមួយដែលអាចបាញ់ដល់ ដោយចាប់ផ្តើមពីពេលដែលសេចក្តីថ្លែងការណ៍ត្រូវបានប្រកាស។ យោធាអ៊ីស្រាអែល បាននិយាយកាលពីថ្ងៃអង្គារថាខ្លួនបានប្រើប្រាស់ប្រព័ន្ធការពារដែនអកាស Arrow ដើម្បីស្ទាក់ចាប់មីស៊ីលនៅជិតសមុទ្រក្រហម បន្ទាប់ពីស៊ីរ៉ែនវាយឆ្មក់តាមអាកាស បានបន្លឺឡើង នៅកំពង់ផែភាគខាងត្បូងទីក្រុង Eilat ។ យោធាបាននិយាយថា មីស៊ីលមិនបានឆ្លងកាត់ចូលក្នុងទឹកដីអ៊ីស្រាអែលនោះទេ និងពុំបាននិយាយថា នណាជាអ្នកបាញ់ឡើយ។ ចលនាក្រុមឧទ្ទាមHouthis សម្ព័ន្ធមិត្តអ៊ីរ៉ង់ នៅយ៉េម៉ែន បានបាញ់មីស៊ីលដដែលៗ និងវាយប្រហារដោយយានដ្រូន លើអ៊ីស្រអែល ចាប់តាំងពីការវាយប្រហាររបស់ហាម៉ាស ទៅលើអ៊ីស្រាអែល កាលពីថ្ងៃទី៧ ខែតុលា ដែលទាំងអស់នេះត្រូវបានបាញ់ទម្លាក់ឬធ្លាក់ភ្លាមៗ។

សារធាតុគីមីគ្មានស្លាកសញ្ញាត្រូវបានរកឃើញនៅតំបន់ផ្សារនាគមាស ដែលនាំឱ្យប៉ះពាល់ធ្ងន់ធ្ងរដល់សុខភាពមនុស្ស

ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៅព្រឹកថ្ងៃទី១៥ វិច្ឆិកា ឆ្នាំ ២០២៣នេះ បានឱ្យដឹងថា មន្រ្តីជំនាញ សាខា ក.ប.ប. រាជធានីភ្នំពេញ បានសហការជាមួយនាយកដ្ឋានមន្ទីរពិសោធន៍ បាននាំយករថយន្តមន្ទីរពិសោធន៍ចល័ត ចុះត្រួតពិនិត្យសុវត្ថិភាពម្ហូបអាហារនៅទីតាំងកែច្នៃខ្ញីហាន់ និងចែកចាយចំនួន ៣ទីតាំង ដោយមួយកន្លែងក្នុងភូមិសាស្រ្ត សង្កាត់បឹងសាឡាង និង២ទីតាំងទៀត នៅតំបន់ផ្សារនាគមាស សង្កាត់ផ្សារដើមគរ ខណ្ឌទួលគោក រាជធានីភ្នំពេញ។ក្នុងប្រតិបត្តិការនោះ ក្រុមមន្រ្តីជំនាញបានរកឃើញទីតាំងមួយកន្លែង មានសារធាតុគីមីគ្មានស្លាកសញ្ញាជាម្សៅស ចំនួន៨៥ គីឡូក្រាម និងសាជូរ ចំនួន២៨បាវ ស្មើនឹង ៨៣០គីឡូក្រាម សម្រាប់យកទៅប្រើប្រាស់លាយជាមួយទឹក និងដាក់ខ្ញីហាន់រួចត្រាំជាមួយ មុននឹងចែកចាយ។ តាមការវិភាគបឋមទៅលើគំរូម្សៅស បង្ហាញថា គឺជាសារធាតុគីមីម្យ៉ាងមានឈ្មោះ Sodium Hydrosulfite ដែលជាប្រភេទសារធាតុគីមីមិនត្រូវបានអនុញ្ញាតឱ្យប្រើប្រាស់ជាសារធាតុបន្ថែមក្នុងម្ហូបអាហារទេ។ ការទទួលទានផលិតផលម្ហូបអាហារដែលមានសារធាតុគីមីហាមឃាត់ Sodium Hydrosulfite ទៅក្នុងសារពាង្គកាយមនុស្ស អាចបណ្តាលឱ្យពិបាកដកដង្ហើម សម្ពាធឈាមចុះទាប វិលមុខ ឈឺពោះ ក្អួតចង្អោរ រាគរូស។ សម្រាប់អ្នក Allergic ធ្ងន់ធ្ងរជាមួយសារធាតុខាងលើនេះ ឬអ្នកមានជំងឺហឺត អាចបណ្តាលឱ្យពិបាកដកដង្ហើម និងអាចបាត់បង់ជីវិតបាន។ប្រភពដដែលបន្តថា ដោយមានការយកចិត្តទុកដាក់ជាប្រចាំពីលោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម ក្នុងការលើកកម្ពស់សុខុមាលភាព សុខភាពប្រជាពលរដ្ឋ តាមរយៈការត្រួតពិនិត្យសុវត្ថិភាពម្ហូបអាហារ និងដោយមានការណែនាំពី ឯកឧត្តម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ឱ្យបន្តពង្រឹងយុទ្ធនាការចុះត្រួតពិនិត្យគុណភាព សុវត្ថិភាពទំនិញ ពិសេសម្ហូបអាហារ នៅតាមបណ្តាទីផ្សារនានា ក្នុងក្របខណ្ឌទូទាំងប្រទេស។សូមជម្រាបជូនថា តាមការអះអាងពីម្ចាស់ទីតាំងខាងលើ គឺសារធាតុគីមីទាំងនេះគាត់បានបញ្ជាទិញពីផ្សារច្បារអំពៅ។ ជាវិធានការ មន្ត្រីជំនាញបាន៖ដកហូតនូវសារធាតុគីមីជាម្សៅស Sodium Hydrosulfite ចំនួន ៨៥គីឡូក្រាម យកមករក្សាទុកជាបណ្តោះអាសន្ននៅសាខា ក.ប.ប. រាជធានីភ្នំពេញ , ឃាត់ជាបណ្តោះអាសន្ននៅនឹងកន្លែង (សៀលទុក) នូវខ្ញីហាន់ដែលកំពុងដាក់ត្រាំក្នុងធុងជ័រចំនួន ៣ធុង សរុបប្រមាណ ២៥០គីឡូក្រាម , ឃាត់ជាបណ្តោះអាសន្ននៅនឹងកន្លែង (សៀលទុក) នូវសារធាតុសាច់ជូរចំនួន ៨៣០គីឡូក្រាម ដើម្បីតាមដានអំពីគោលដៅប្រើប្រាស់ និងត្រូវមានច្បាប់អនុញ្ញាតក្នុងករណីប្រើជាសារធាតុបន្ថែមក្នុងម្ហូបអាហារ , យកគំរូទៅវិភាគនៅមន្ទីរពិសោធន៍របស់អគ្គនាយកដ្ឋាន ក.ប.ប. បន្តទៀត។ ករណីរកឃើញមានសារធាតុគីមីហាមឃាត់ធ្វើឱ្យប៉ះពាល់ដល់សុខភាព អគ្គនាយកដ្ឋាន ក.ប.ប. នឹងចាត់វិធានការតាមផ្លូវច្បាប់។ជាមួយគ្នានេះ អគ្គនាយកដ្ឋាន ក.ប.ប. បានអំពាវនាវដល់បុគ្គលធ្វើធុរកិច្ចម្ហូបអាហារ ជាអាទិ៍ អ្នកនាំចូល ផលិតករ សិប្បករ អ្នកកែច្នៃ អ្នកស្តុកទុក អ្នកចែកចាយ អ្នកលក់ដូរម្ហូបអាហារទាំងអស់ សូមមេត្តាកុំប្រើប្រាស់សារធាតុគីមីហាមឃាត់ក្នុងចំណីអាហារ ដែលធ្វើឱ្យប៉ះពាល់ដល់សុខភាពអ្នកទទួលទាន ករណីធ្ងន់ធ្ងរអាចបណ្ដាលឱ្យបាត់បង់ជីវិតភ្លាមៗ ឬបង្ករជាជំងឺរ៉ាំរ៉ៃ ឬជំងឺប្រចាំកាយ រយៈពេលជាយូរអង្វែង។ ទន្ទឹមនឹងនេះ ក៏សូមអំពាវនាវដល់គ្រប់តួអង្គពាក់ព័ន្ធទាំងអស់ មេត្តាចូលរួមទប់ស្កាត់នូវផលិតផលមានសារធាតុគីមីហាមឃាត់ ផលិតផលខូចគុណភាព ផលិតផលពុំមានអនុលោមភាពតាមបទប្បញ្ញត្តិ តាមរយៈការដាក់ពាក្យបណ្តឹង ឬផ្តល់ព័ត៌មានអំពីករណីខាងលើនេះ ទៅកាន់ក្រសួង ស្ថាប័នមានសមត្ថកិច្ចពាក់ព័ន្ធ ពិសេសមកអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម ដែលមានអាសយដ្ឋាន ផ្លូវ១៨ ភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ឬទូរស័ព្ទលេខ (១). 0២៣ ២៣១ ៨៥៦ និង(២). 0៩២ ៨៣០ ៨៥៦ ដើម្បីអគ្គនាយកដ្ឋាន ក.ប.ប. នៃក្រសួងពាណិជ្ជកម្ម មានវិធានការតាមនីតិវិធីច្បាប់ជាធរមាន៕

តុលាការ សម្រេចចោទប្រកាន់ជនជាតិថៃ និងឡាវ ៥នាក់នាំគ្រឿងញៀនជាង ១០០គីឡូឆ្លងដែននៅកម្ពុជា

តុលាការបានសម្រេចចោទប្រកាន់ជនជាតិថៃ និងឡាវ សរុប ៥នាក់ ដែលនាំគ្រឿងញៀនជាង ១០០គីឡូក្រាមឆ្លងដែននៅកម្ពុជា។លោក ប្លង់ សុផល អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានឲ្យដឹងនៅថ្ងៃទី១៥ ខែវិច្ឆិកា ឆ្នាំ២០២៣ថា នៅថ្ងៃទី១២ ខែវិច្ឆិកា ឆ្នាំ២០២៣ តំណាងអយ្យការអមសាលាដំបូងរាជធានីភ្នំពេញ បានទទួល ចាត់ការលើសំណុំរឿងព្រហ្មទណ្ឌមួយ ដែលមានជនសង្ស័យចំនួន ៣នាក់ ទី១-ឈ្មោះ ចេង វឿត ភេទប្រុស ជនជាតិឡាវ ទី២-ឈ្មោះ វ៉ាស៊ីន សែកគឺ ភេទប្រុស ជនជាតិថៃ និងទី៣-ឈ្មោះ ជីនណាវ៉ាត សែលី ភេទប្រុស ជនជាតិថៃ ត្រូវបានសង្ស័យថាបានប្រព្រឹត្តសកម្មភាព រក្សាទុក ដឹកជញ្ជូន និងជួញដូរដោយខុសច្បាប់នូវ សារធាតុញៀន ប្រព្រឹត្តនៅរាជធានីភ្នំពេញ។ អ្នកនាំពាក្យនៃអយ្យការអមសាលាដំបូងរាជធានីភ្នំពេញបានបន្ថែមថា បន្ទាប់ពីឆ្លងកាត់ការស្រាវជ្រាវរបស់សមត្ថកិច្ចនៅថ្ងៃទី០៩ ខែវិច្ឆិកា ឆ្នាំ២០២៣ កម្លាំងជំនាញការិយាល័យនីតិវិធី នៃមន្ទីរប្រឆាំងគ្រឿងញៀន និងកម្លាំងជំនាញនៃស្នងការដ្ឋាននគរបាលរាជធានីភ្នំពេញ ក្រោមការដឹកនាំសម្របសម្រួលពីតំណាងអយ្យការ បានធ្វើការបង្ក្រាបករណីនេះ ព្រមទាំងបានឃាត់ខ្លួនជនសង្ស័យ និងដកហូតវត្ថុតាងគ្រឿងញៀនប្រភេទមេតំហ្វេតាមីនចំនួន ១០១ដុំ មានទម្ងន់ ១០១ គីឡូក្រាម នឹង ៤៤៩,២០ ក្រាម បន្ទាប់មកសមត្ថកិច្ចបានកសាងសំណុំរឿងបញ្ជូនមកកាន់អយ្យការអមសាលាដំបូងរាជធានីភ្នំពេញដើម្បីចាត់ការតាមនីតិវិធី ។លោក ប្លង់ សុផល បន្ថែមទៀតថា ផ្អែកតាមលទ្ធផលនៃការស៊ើបអង្កេតខាងលើ តំណាងអយ្យការអមសាលាដំបូងរាជធានីភ្នំពេញ បានសម្រេចបើកការស៊ើបសួរតាមរយៈដីកាសន្និដ្ឋានបញ្ជូនរឿងឲ្យស៊ើបសួរ ដោយស្នើសុំចៅក្រមស៊ើបសួរដាក់ឲ្យស្ថិតនៅក្រោមការពិនិត្យលើជនសង្ស័យទាំង៣នាក់ខាងលើ ដែលសមត្ថកិច្ចបានឃាត់ខ្លួន និងជនជាតិឡាវចំនួន ២នាក់ទៀតដែលកំពុងគេចខ្លួនមាន ១-ឈ្មោះ លី ម៉េង ភេទប្រុស និង២-ឈ្មោះ VANG TOUYER ភេទប្រុស ជនជាតិឡាវ ដោយសម្រេចចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន ប្រព្រឹត្តនៅរាជធានីភ្នំពេញ កាលពីថ្ងៃទី០៩ ខែវិច្ឆិកា ឆ្នាំ២០២៣ បទល្មើសមានបញ្ញត្តិឲ្យផ្ដន្ទាទោសតាមមាត្រា ៤០ នៃច្បាប់ស្តីពីការត្រួត ពិនិត្យគ្រឿងញៀន៕ អត្ថបទ៖ ប្រាក់ វ៉ាន់ដា

ជីវិតទារករាប់សិបនាក់ នៅក្នុងមន្ទីរពេទ្យហ្កាហ្សា រងហានិភ័យ ទោះបីអ៊ីស្រាអែល ផ្តល់ជូនឧបករណ៍សង្រ្គោះក៏ដោយ

ជីវិតរបស់ទារក ៣៦នាក់ នៅមន្ទីរពេទ្យ អាល់ស៊ីហ្វា (Al Shifa) នៃតំបន់ហ្កាហ្សា បានស្ថិតក្នុងហានិភ័យ កាលពីថ្ងៃអង្គារ (១៤ វិច្ឆិកា) នេះបើយោងតាមបុគ្គលិកពេទ្យនៅទីនោះ ដែលបាននិយាយថា មិនមានយន្តការច្បាស់លាស់ដើម្បីជម្លៀសពួកគេ បើទោះបីជាកិច្ចខិតខំប្រឹងប្រែងរបស់អ៊ីស្រាអែល ក្នុងការផ្គត់ផ្គង់ឧបករណ៍កម្ដៅខ្លួនទារកទុកសម្រាប់ការជម្លៀសក៏ដោយ។ទារកចំនួន ៣នាក់ ក្នុងចំណោមទារកកើតមិនគ្រប់ខែ ៣៩នាក់ បានស្លាប់រួចទៅហើយ ចាប់តាំងពីមន្ទីរពេទ្យដ៏ធំបំផុតរបស់តំបន់ហ្កាហ្សា មួយនេះបានអស់ប្រេងឥទ្ធនៈសម្រាប់ប្រតិបត្តិការកាលពីចុងសប្តាហ៍ លើម៉ាស៊ីនភ្លើងដែលរក្សាឧបករណ៍កម្ដៅខ្លួនទារក។យោធាអ៊ីស្រាអែលបាននិយាយកាលពីថ្ងៃអង្គារថា ខ្លួនកំពុងសម្របសម្រួលការផ្ទេរឧបករណ៍សង្រ្គោះទារកទាំងនោះចូលទៅក្នុងតំបន់ហ្កាហ្សា ស្ទ្រីប ក្នុងជំហានមួយដើម្បីអនុញ្ញាតឱ្យមានការជម្លៀសទារក។ យោធានេះមិនបាននិយាយថា តើខ្លួននឹងត្រូវធ្វើជំហានណាខ្លះដើម្បីដំណើរការជម្លៀសចេញ ស្របចំពេលមានការវាយប្រហារផ្លូវអាកាសយ៉ាងខ្លាំងក្លា និងការប្រយុទ្ធគ្នាជាបន្តបន្ទាប់នៅក្បែរមន្ទីរពេទ្យ អាល់ស៊ីហ្វា នោះ។អ្នកនាំពាក្យក្រសួងសុខាភិបាលហ្កាហ្សា ដែលស្ថិតនៅក្រោមការគ្រប់គ្រងរបស់ក្រុមហាម៉ាស បាននិយាយថា មិនមានការជំទាស់នឹងការជម្លៀសទារកនោះទេ ប៉ុន្តែអ៊ីស្រាអេល មិនទាន់មានយន្តការក្នុងការធ្វើរឿងនេះឡើយ។ មន្ទីរពេទ្យជាច្រើននៅតំបន់ហ្កាហ្សា ដូចជាមន្ទីរពេទ្យដ៏ធំ អាល់ស៊ីហ្វា ក៏ត្រូវបានបិទផងដែរ ដោយសារតែខ្វះប្រេងឥន្ធនៈ និងការផ្គត់ផ្គង់ ឬមានអ្នកជំងឺកកកុញពេក និងអ្នកដែលរងរបួសដ៏ច្រើនលើសលប់ពីក្នុងការប្រយុទ្ធគ្នា៕

ប្រភព៖អ៊ីស្រាអែល អនុម័តប្រេងឥន្ធនៈមួយចំនួនសម្រាប់រថយន្តដឹកទំនិញរបស់ UN នៅហ្កាហ្សា

ប្រភពមនុស្សធម៌ បាននិយាយកាលពីថ្ងៃអង្គារថា អ៊ីស្រាអែល បានយល់ព្រមផ្តល់ប្រេងម៉ាស៊ូតចំនួន ២៤.000 លីត្រ (៦.៣៤០ហ្គាឡុន) ដើម្បីប្រើប្រាស់ដោយរថយន្តដឹកទំនិញសម្រាប់ប្រតិបត្តិការរបស់អង្គការសហប្រជាជាតិ នៅក្នុងតំបន់ហ្កាហ្សាស្ទ្រីប។ទីភ្នាក់ងារផ្តល់ជំនួយនៅក្នុងដែនដីនេះ បាននិយាយថា កង្វះខាតប្រេងឥន្ធនៈរ៉ាំរ៉ៃ បានរារាំងកិច្ចខិតខំប្រឹងប្រែង ដើម្បីផ្តល់អាហារ ទឹក និងថ្នាំដល់ប្រជាជនប៉ាឡេស្ទីន នៅតំបន់ហ្កាហ្សា ក្រោមការឡោមព័ទ្ធ ខណៈដែលអ៊ីស្រាអែល ធ្វើសង្រ្គាមប្រឆាំងនឹងក្រុមសកម្មប្រយុទ្ធហាម៉ាស។ប្រភពដដែល បានបន្តថា ប្រេងឥន្ធនៈ គឺសម្រាប់តែរថយន្តដឹកទំនិញរបស់UN ប៉ុណ្ណោះ ហើយមិនមែនសម្រាប់មន្ទីរពេទ្យទេ។យោធាអ៊ីស្រាអែល ពុំបានធ្វើការអធិប្បាយភ្លាមៗទេ ហើយក៏មិនមានការអត្ថាធិប្បាយភ្លាមៗពីក្រុមហាម៉ាសដែរ។វាមិនទាន់ដឹងច្បាស់ថា តើឥន្ធនៈនឹងត្រូវបញ្ជូនដោយរបៀបណានោះទេ?ដោយដកស្រង់ប្រភពពីសហរដ្ឋអាមេរិក និងអ៊ីស្រាអែល សារព័ត៌មាន Axios បានរាយការណ៍ថា អ៊ីស្រាអែល គ្រោងនឹងអនុញ្ញាតឲ្យរថយន្តដឹកទំនិញដែលប្រើប្រាស់ដោយទីភ្នាក់ងារជនភៀសខ្លួនប៉ាឡេស្ទីន (UNRWA) នៅតំបន់ហ្កាហ្សា ដើម្បីចាក់ប្រេង នៅថ្ងៃពុធនេះ នៅឯច្រកព្រំដែនRafahជាមួយប្រទេសអេហ្ស៊ីប។

អ៊ីស្រាអែល ជំរុញឲ្យក្រុមហាម៉ាសប្រគល់ខ្លួន ក្នុងពេលវាយឆ្មក់មន្ទីរពេទ្យអាល់ ស៊ីហ្វា របស់ហ្កាហ្សា

យោធាអ៊ីស្រាអែល និយាយថា ខ្លួនបានកំពុងបើកការវាយឆ្មក់នៅថ្ងៃពុធទី១៥វិច្ឆិកា នេះ លើក្រុមសកម្មប្រយុទ្ធ ហាម៉ាសប៉ាឡេស្ទីន ក្នុងមន្ទីរពេទ្យ អាល់ស៊ីហ្វា (Al Shifa) ដែលជាមន្ទីរពេទ្យធំបំផុតរបស់តំបន់ហ្កាហ្សាស្ទ្រីប និងបានជំរុញឲ្យក្រុមសកម្មប្រយុទ្ធហាម៉ាសប្រគល់ខ្លួន ។ តិចជាងមួយម៉ោងមុននេះ ប្រហែលម៉ោង ១ ព្រឹកម៉ោងក្នុងស្រុក អ្នកនាំពាក្យក្រសួងសុខាភិបាល ហ្កាហ្សា បាននិយាយថា អ៊ីស្រាអែលបានប្រាប់មន្ត្រីនៅក្នុងតំបន់ឡោមព័ទ្ធមួយនេះ ថា ខ្លួននឹងវាយឆ្មក់អគារមន្ទីរពេទ្យ ស៊ីហ្វា នៅប៉ុន្មាននាទីខាងមុខនេះ ។ ជោគវាសនារបស់មន្ទីរពេទ្យ Al Shifa បានក្លាយជាការផ្ដោតអារម្មណ៍នៃការប្រកាសអាសន្នជាអន្តរជាតិ ដោយសារតែស្ថានភាពកាន់តែអាក្រក់ទៅ នៅក្នុងមន្ទីរពេទ្យ ក្នុងប៉ុន្មានថ្ងៃថ្មីៗនេះ ដោយបានអំពាវនាវជាសកលឲ្យមានបទឈប់បាញ់មនុស្សធម៌បន្ទាប់ពីការវាយលុករបស់អ៊ីស្រាអែលរយៈពេល៥សប្តាហ៍លើតំបន់ហ្កាហ្សា។ នៅក្នុងសេចក្តីថ្លែងការណ៍មួយ កងកម្លាំងការពារអ៊ីស្រាអែល (IDF) បាននិយាយថា ផ្អែកលើព័ត៌មានចារកម្ម និងភាពចាំបាច់ក្នុងការធ្វើប្រតិបត្តិការ កងកម្លាំង IDF កំពុងអនុវត្តប្រតិបត្តិការច្បាស់លាស់ និងកំណត់គោលដៅប្រឆាំងក្រុមហាម៉ាស នៅក្នុងតំបន់ជាក់លាក់មួយនៅក្នុងមន្ទីរពេទ្យ ស៊ីហ្វា ។ក្រុមហាម៉ាស បាននិយាយនៅថ្ងៃពុធថា សេចក្តីប្រកាសរបស់សហរដ្ឋអាមេរិកបានបើកភ្លើងខៀវ យ៉ាងមានប្រសិទ្ធភាពសម្រាប់អ៊ីស្រាអែលក្នុងការវាយឆ្មក់ចូលមន្ទីរពេទ្យនេះ។ ក្រុមនេះបាននិយាយថា ខ្លួនបានចាត់ទុកអ៊ីស្រាអែល និងប្រធានាធិបតីអាមេរិក Joe Biden ថាជាអ្នកទទួលខុសត្រូវទាំងស្រុងចំពោះប្រតិបត្តិការនេះ៕

តំណាងរាស្ត្រអ៊ីស្រាអែលជំរុញឲ្យមេដឹកនាំពិភពលោកទទួលយកជនភៀសខ្លួនហ្កាហ្សា ខណៈមានសង្រ្គាម

តំណាងរាស្ត្រជាន់ខ្ពស់ចំនួន២រូបរបស់អ៊ីស្រាអែល បានជំរុញដល់មេដឹកនាំពិភពលោកឲ្យទទួលយកជនភៀសខ្លួនប៉ាឡេស្ទីន ស្របពេលសង្រ្គាមអ៊ីស្រាអែល-ហ្កាហ្សា នៅក្នុងលិខិតមួយដែលបានចេញផ្សាយកាលពីថ្ងៃអង្គារនៅក្នុងសារពេ័ត៌មាន The Wall Street Journal។ សមាជិកគណបក្សលីគូដ (Likud ) លោក ដានី ដាណុន(Danny Danon) និងសមាជិក បក្ស យ៉េសអាទីដ (Yesh Atid) លោករាំបេនបារ៉ាក់ (Ram Ben-Barak)បាននិយាយថា មេដឹកនាំមានការចាំបាច់ខាងសីលធម៌ ដើម្បីជួយប្រជាជន ហ្កាហ្សា ដោយអនុញ្ញាតឱ្យជនភៀសខ្លួន ចំនួនមានកំណត់ ដែលចង់ផ្លាស់ប្តូរទីលំនៅពីតំបន់ហែកហួរដោយសង្រ្គាមចូលទៅក្នុងប្រទេសរបស់ពួកគេ។ អង្គការសហប្រជាជាតិបានប៉ាន់ប្រមាណថា យុទ្ធនាការទម្លាក់គ្រាប់បែករបស់អ៊ីស្រាអែល និងការលុកលុយថ្មើរជើងនៅតំបន់ហ្កាហ្សាបានធ្វើឱ្យមនុស្សជាង ១.៥ លាននាក់ផ្លាស់ទីលំនៅ។ អង្គការសហប្រជាជាតិ បាននិយាយថាផ្ទះសម្បែងប្រហែលមួយភាគបួនលានក៏ត្រូវបានខូចខាត ឬបំផ្លាញផងដែរ។យោធាអ៊ីស្រាអែលបានជំរុញឱ្យ ពលរដ្ឋហ្កាហ្សា ផ្លាស់ទីពីភាគខាងជើងនៃដែនដី ទំហំ១៤០ ម៉ាយក្រឡាទៅភាគខាងត្បូង ដើម្បីជៀសវាងការជាប់ខ្លួននៅក្នុងជម្លោះអស់រយៈពេលជាច្រើនសប្តាហ៍ ទោះបីជាការវាយប្រហារនៅតែបន្តកើតមានពាសពេញតំបន់ក៏ដោយ។ តំណាងរាស្ត្រទាំងពីរបានលើកឡើងថា ការទទួលយកជនភៀសខ្លួន ហ្កាហ្សានឹងមិនខុសពីកិច្ចខិតខំប្រឹងប្រែងរបស់អឺរ៉ុបក្នុងការទទួលយកជនភៀសខ្លួនពីសង្គ្រាមស៊ីវិលស៊ីរី និងលីប៊ីក្នុងទសវត្សរ៍ចុងក្រោយនេះ និងការខិតខំប្រឹងប្រែងស្រដៀងគ្នាទាក់ទងនឹងសង្គ្រាមយូហ្គោស្លាវីកាលពីទសវត្សរ៍ឆ្នាំ ១៩៩០នោះឡើយ។ លោកទាំង២បានសរសេរថា បណ្តាប្រទេសជុំវិញពិភពលោកគួរតែផ្តល់ជម្រកសម្រាប់ក្រុមពលរដ្ឋហ្កាហ្សា ដែលស្វែងរកការផ្លាស់ទីលំនៅ ។ប្រទេសនានាអាចសម្រេចបានដោយបង្កើតកម្មវិធីផ្លាស់ប្តូរទីលំនៅដែលមានរចនាសម្ព័ន្ធល្អ និងសម្របសម្រួលជាអន្តរជាតិ៕

សហរដ្ឋអាមេរិក នឹងបន្តផ្តល់ជំនួយស្បៀងអាហារទូទាំងប្រទេសអេត្យូពី នៅខែក្រោយ

សេចក្តីថ្លែងការណ៍របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) ដែលឃើញដោយ Reuters កាលពីថ្ងៃអង្គារថា ទីក្រុងវ៉ាស៊ីនតោន នឹងបន្តផ្តល់ជំនួយស្បៀងអាហារដល់ប្រជាជននៅ ទូទាំងប្រទេសអេត្យូពី នៅខែក្រោយ បន្ទាប់ពីជំនួយត្រូវបានផ្អាកកាលពីដើមឆ្នាំនេះ បន្ទាប់ពីការអនុវត្តកំណែទម្រង់ដ៏ទូលំទូលាយ។ វិបត្តិស្បៀងអាហាររបស់ប្រទេសអេត្យូពី បានកាន់តែខ្លាំងឡើងក្នុងប៉ុន្មានឆ្នាំថ្មីៗនេះ ដោយសារសង្គ្រាម នៅក្នុងតំបន់ទីហ្រ្គេ(Tigray) និងគ្រោះរាំងស្ងួតដ៏អាក្រក់បំផុតរបស់ទ្វីបអាហ្រ្វិក ក្នុងរយៈពេលជាច្រើនទសវត្សរ៍។សេចក្តីថ្លែងការណ៍ បាននិយាយថា៖«USAID កំពុងប្តេជ្ញាចិត្តចំពោះរយៈពេលសាកល្បងមួយឆ្នាំនៃការបន្តឡើងវិញទូទាំងប្រទេស ក្នុងអំឡុងពេលដែលយើងនឹងតាមដាន និងវាយតម្លៃជាបន្តបន្ទាប់អំពីប្រសិទ្ធភាពនៃកំណែទម្រង់ដែលដាក់ចេញដោយ USAID ដៃគូអនុវត្ត និងរដ្ឋាភិបាលនៃប្រទេសអេត្យូពី»។កាលពីខែមិថុនា USAID បាននិយាយថា ខ្លួនកំពុងផ្អាកជំនួយស្បៀងអាហារដល់ប្រទេសអេត្យូពី ដោយសារតែជំនួយរបស់ខ្លួន ត្រូវបានគេលួច ហើយកាលពីខែមុន បានបន្តជំនួយស្បៀងអាហារដល់ ជនភៀសខ្លួននៅក្នុងប្រទេសនេះ។ការសម្រេចចិត្តនេះ បានប៉ះពាល់ដល់កន្លែងជនភៀសខ្លួនរាប់សិបកន្លែង ប៉ុន្តែគ្មាននរណាម្នាក់នៅក្នុងទីតំបន់ទីហ្គ្រេដែលជាកន្លែងសង្គ្រាមរយៈពេលពីរឆ្នាំរវាងរដ្ឋាភិបាលសហព័ន្ធ និងកងកម្លាំងដែលដឹកនាំដោយគណបក្សនយោបាយលេចធ្លោក្នុងតំបន់ បានបញ្ចប់ក្នុងបទឈប់បាញ់កាលពីខែវិច្ឆិកាឆ្នាំមុន។ ជម្លោះនេះ បានបណ្តាលឲ្យមនុស្សរាប់ម៉ឺននាក់ ស្លាប់ និងបង្កើតលក្ខខណ្ឌដូចជាការស្រេកឃ្លានសម្រាប់មនុស្សរាប់សែននាក់។

បណ្ដាញសង្គម

ព័ត៌មានថ្មីៗ

ករណីការទន្រ្ទានកាន់កាប់ដីខុសច្បាប់ ក្នុងឧទ្យានជាតិជួរភ្នំក្រវាញ ភូមិសាស្រ្តខេត្តកោះកុង នឹងត្រូវអនុវត្តវិធានការច្បាប់

កម្ពុជាសម្រេចបានតាមការគ្រោងទុកក្នុងការលុបបំបាត់នូវជងឺគ្រុនចាញ់ដោយចាប់ពីត្រីមាសទី៤ឆ្នាំ២០២៥មករហូតដល់សព្វថ្ងៃកម្ពុជាអត់មានអ្នកឆ្លង និងស្លាប់ដោយសារជំងឺគ្រុនចាញ់ទៀតទេ

លោក Netanyahu ថាលោកទទួលការព្យាបាលជំងឺមហារីកក្រពេញប្រូស្តាតដោយជោគជ័យ

លោក Zelenskiy ធ្វើដំណើរទៅដល់អារ៉ាប៊ីសាអ៊ូឌីត ដើម្បីស្វែងរកកិច្ចសហប្រតិបត្តិការសន្តិសុខ

មនុស្ស ២នាក់ស្លាប់ អំឡុងការវាយប្រហារតាមអាកាស ខណៈយោធោអ៊ីស្រាអែលចេញការព្រមានជម្លៀស នៅភាគខាងត្បូងលីបង់

សមាជិកសភាហេសបូឡា៖ បទឈប់បាញ់ «គ្មានន័យ» ទេ ដោយសារតែការវាយប្រហាររបស់អ៊ីស្រាអែល

កងកម្លាំងរក្សាសន្តិភាពឥណ្ឌូនេស៊ីរបស់ UN ស្លាប់ដោយសាររបួស អំឡុងការផ្ទុះ នៅលីបង់

ទីក្រុងប៉េកាំងច្រានចោលការចោទប្រកាន់របស់លោក Trumpថា នាវាអ៊ីរ៉ង់ស្ទាក់ចាប់បានមានអំណោយពីចិន

អាល្លឺម៉ង់ និងអ៊ីតាលី សង្កត់ធ្ងន់លើការរួបរួម ក្នុងចំណោមសមាជិករបស់អង្គការណាតូ

លោក Putinនិយាយថា រុស្ស៊ីនឹងការពារផលប្រយោជន៍របស់ខ្លួននៅតំបន់អាក់ទិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877