BTV NEWS

បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់

កម្លាំងគណៈបញ្ជាការឯកភាពរាជធានី បន្តប្រតិបត្តិការឆ្មក់ចុះបង្ក្រាប Online Scams នៅខណ្ឌ៧មករា ឃាត់ជនបរទេស៤០នាក់

ជនជាតិចិន ៣២៩នាក់ ពាក់ព័ន្ធករណីឆបោកតាមប្រព័ន្ធអនឡាញ (Online Scams) ត្រូវបានបណ្ដេញចេញពីព្រះរាជាណាចក្រកម្ពុជា

ករណី Online Scams ៖ តំណាងអយ្យការសម្រេចចោទប្រកាន់លើមន្ត្រីនគរបាលផ្កាយបី១នាក់ ,ផ្កាយពីរ ១នាក់ និងពាក់ព័ន្ធ ៤នាក់ផ្សេងទៀត

សន្តិសុខ និង សង្គម

ចិននឹងរៀបចំពិធីឈាបនកិច្ចសពអតីតនាយករដ្ឋមន្ត្រី លី ឃឺឈាង នៅថ្ងៃព្រហស្បតិ៍សប្ដាហ៍នេះ

ទីភ្នាក់ងារសារព័ត៌មាន ផ្លូវការស៊ីនហួ (Xinhua)បានរាយការណ៍ថា ប្រទេសចិនប្រារព្ធពិធីបុណ្យឈាបនកិច្ចសព អតីតនាយករដ្ឋមន្ត្រី លី ឃឺឈាង(Li Keqiang) នៅថ្ងៃព្រហស្បតិ៍សប្ដាហ៍នេះនៅពេលទង់ជាតិ នឹងត្រូវបង្ហូតពាក់កណ្ដាលដង នៅទូទាំងប្រទេស ជាការកាន់មរណទុក្ខសម្រាប់មេដឹកនាំដ៏ឈ្លាសវៃរូបនេះ ។ លោក Li អតីតសេដ្ឋវិទូ និងមេដឹកនាំគាំទ្រការធ្វើកំណែទម្រង់ ដែលកាន់តំណែង ជានាយករដ្ឋមន្ត្រីរយៈពេល១០ឆ្នាំ មុនពេលលោកចូលនិវត្តិកាលពីខែមីនា បានទទួលមរណភាពដោយសារគាំងបេះដូង កាលពីថ្ងៃសុក្រសប្ដាហ៍មុនក្នុងវ័យ៦៨ឆ្នាំ។ ទីភ្នាក់ងារសារព័ត៌មាន ស៊ីនហួ បានរាយការណ៍ថា សពរបស់លោក ត្រូវបានបញ្ជូនទៅកាន់ទីក្រុងប៉េកាំង ពីទីក្រុងសៀងហៃ តាមជើងយន្តហោះពិសេសនៅថ្ងៃនោះ។ ទីភ្នាក់ងារសារព័ត៌មាន ស៊ីនហួ បាននិយាយនៅថ្ងៃអង្គារនេះដោយសំដៅទៅលើបក្សកុម្មុយនិស្តចិនថា លោកត្រូវបានគេកោតសរសើរថាជាសមាជិកបក្សដ៏ឆ្នើមមួយរូប ជាទាហានកុម្មុយនិស្តដ៏ស្មោះត្រង់មួយរូប ដែលត្រូវបានសាកល្បង និងស្មោះត្រង់ និងជាអ្នកបដិវត្តន៍និយមដ៏ឆ្នើម ជារដ្ឋបុរស និងជាមេដឹកនាំនៃបក្ស និងរដ្ឋ។ នៅថ្ងៃបូជាសព ទង់ជាតិនឹងត្រូវបង្ហូតរពាក់កណ្តាលដងដើម្បីកាន់ទុក្ខជូនលោក Li នៅទីលាន ធានអានមិន (Tiananmen) របស់រដ្ឋធានីប៉េកាំង នៅសាលប្រជាជន ក្រសួងការបរទេស ព្រមទាំងអាសនៈរបស់រដ្ឋាភិបាលក្នុងតំបន់ទូទាំងប្រទេស និងអគារបេសកកម្មការទូត។ យោងតាមការចុះផ្សាយរបស់សារព័ត៌មានស៊ីនហួ កាលពីសប្តាហ៍មុន មរណភាពរបស់លោក Li គឺជាការខាតបង់ដ៏ធំធេងសម្រាប់បក្សកុម្មុយនិស្ត និងប្រទេសជាតិ៕

ការថតដោយយានដ្រូន បានបង្ហាញពីការបំផ្លាញ បន្ទាប់ពីព្យុះសង្ឃរា Otis នៅម៉ិកស៊ិក ហើយការព្រួយបារម្ភពីស្បៀងអាហារ និងទឹកនៅបន្ត

វីដេអូថតដោយយានដ្រូន នៅតំបន់ Ciudad Renacimiento ទីក្រុង Acapulco កាលពីថ្ងៃចន្ទ បានបង្ហាញពីការបំផ្លាញ ដែលព្យុះសង្ឃរា Otis ធ្វើឲ្យប៉ះពាល់ដល់សហគមន៍។យោងតាមអ្វីដែលអាជ្ញាធរ នៅក្នុងរដ្ឋ Guerrero បាននិយាយកាលពីថ្ងៃចន្ទ ចំនួនអ្នកស្លាប់ និងបាត់ខ្លួន ដោយសារតែព្យុះសង្ឃរា Otis ជាប្រភេទព្យុះទី៥ ដែលបានវាយបក់បោកមកលើទីក្រុង Acapulco ជារមណីយដ្ឋានតំបន់ប៉ាស៊ីហ្វិក របស់ប្រទេសម៉ិកស៊ិក កាលពីសប្តាហ៍មុន បានកើនឡើងជិត១០០នាក់។ ព្យុះ Otis បានវាយបក់មកលើទីក្រុង Acapulco ដោយមានល្បឿនខ្យល់២៦៦គីឡូម៉ែត្រក្នុងមួយម៉ោង ដែលបានធ្វើឲ្យជន់លិចទីក្រុង បំប៉ើងដំបូលផ្ទះ និងសណ្ឋាគារ និងអាជីវកម្មជាច្រើនកន្លែង ជន់លិចយានយន្ត និងកាត់ផ្តាច់ទំនាក់ទំនង ព្រមទាំងផ្លូវថ្នល់ និងផ្លូវអាកាស។ការចូលលួចបានកើតឡើង ខណៈចំនួនប្រជាជននៅទីក្រុងនេះ ជិត៩០០.០០០នាក់ មានភាពអស់សង្ឃឹម សម្រាប់ការផ្គត់ផ្គង់ស្បៀងអាហារ និងទឹក។ យោងតាមការប៉ាន់ស្មាន បានឲ្យដឹងថា ការចំណាយនៃការខាតបង់ពីព្យុះសង្ឃរា អាចឡើងដល់ ១៥ពាន់លានដុល្លារ ហើយ ប្រទេសម៉ិកស៊ិក បានបញ្ជូនសមាជិក និងកងកម្លាំងប្រដាប់អាវុធប្រមាណ ១៧.០០០នាក់ ដើម្បីរក្សាសណ្តាប់ធ្នាប់ និងជួយចែកស្បៀងអាហារ និងគ្រឿងផ្គត់ផ្គង់រាប់តោន នៅក្នុងទីក្រុង Acapulco ។

ទីភ្នាក់ងារ UN ប្រចាំតំបន់ហ្គាហ្សា៖ បទឈប់បាញ់ជាបន្ទាន់ គឺជាបញ្ហាស្លាប់-រស់សម្រាប់ប្រជាជនប៉ាឡេស្ទីនរាប់លាននាក់

ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន បានប្រាប់កិច្ចប្រជុំបន្ទាន់របស់អង្គការសហប្រជាជាតិនៅថ្ងៃចន្ទនេះថា៖«បទឈប់បាញ់មនុស្សបន្ទាន់ បានក្លាយជាបញ្ហាស្លាប់-រស់របស់មនុស្សរាប់លាននាក់» ដោយចោទប្រកាន់អ៊ីស្រាអែលពី «ការដាក់ទណ្ឌកម្មរួម» របស់ប៉ាឡេស្ទីន និងការផ្លាស់ទីលំនៅដោយបង្ខំនៃជនស៊ីវិល។លោក Philippe Lazzarini បានព្រមានថា ការបែកបាក់បន្ថែមទៀតនៃសណ្តាប់ធ្នាប់ស៊ីវិល បន្ទាប់ពីការលួចសម្ភារៈនៅឃ្លាំងរបស់ទីភ្នាក់ងារដោយជនជាតិប៉ាឡេស្ទីន ដែលកំពុងស្វែងរកអាហារ និងជំនួយផ្សេងទៀត នឹងធ្វើឲ្យមានការលំបាកខ្លាំង ប្រសិនបើមិនអាចទៅរួចនោះទេ សម្រាប់ទីភ្នាក់ងារធំបំផុតរបស់អង្គការសហប្រជាជាតិ នៅហ្គាហ្សា ដើម្បីបន្តប្រតិបត្តិការ។ការពន្យល់ដោយសង្ខេបទៅកាន់ក្រុមប្រឹក្សាសន្តិសុខដោយលោក Lazzarini ប្រធានទីភ្នាក់ងារកុមាររបស់អង្គការសហប្រជាជាតិ UNICEF និងមន្ត្រីមនុស្សធម៌ជាន់ខ្ពស់របស់UN បានបង្ហាញពីរូបភាពដ៏អាក្រក់នៃស្ថានភាពមនុស្សធម៌នៅតំបន់ហ្គាហ្សា រយៈពេល២៣ថ្ងៃ បន្ទាប់ពីការវាយប្រហារដ៏គួរឲ្យភ្ញាផ្អើលរបស់ក្រុមហាម៉ាស នៅថ្ងៃទី៧ ខែតុលា នៅអ៊ីស្រាអែល និងវិធានការសងសឹករបស់យោធាដែលកំពុងបន្ត មានគោលបំណង«បំផ្លាញ»ក្រុមសកម្មប្រយុទ្ធដែលគ្រប់គ្រងតំបន់ហ្គាហ្សា។

គណៈកម្មការអង្គការសិទ្ធិមនុស្ស៖ ជម្លោះនៅតំបន់ Amharaនៃប្រទេសអេត្យូពី បានសម្លាប់មនុស្សរាប់សិបនាក់

គណៈកម្មការសិទ្ធិមនុស្សដែលចាត់តាំងដោយរដ្ឋ បាននិយាយកាលពីថ្ងៃចន្ទថា ជនស៊ីវិលរាប់សិបនាក់ ត្រូវបានសម្លាប់ក្នុងខែនេះ ដោយការវាយប្រហារដោយយានដ្រូន និងការរុករកពីផ្ទះមួយទៅផ្ទះមួយនៅក្នុងតំបន់ Amhara នៃប្រទេសអេត្យូពី ជាកន្លែងដែលអាជ្ញាធរ បានជំរុញការបង្កើនសន្តិសុខ ចាប់តាំងពីជម្លោះ បានផ្ទុះឡើង នៅក្នុងខែកក្កដា។ការប្រយុទ្ធគ្នារវាងកងកម្លាំងរដ្ឋ និងកងជីវពលក្នុងស្រុក ដែលចោទប្រកាន់រដ្ឋាភិបាលសហព័ន្ធថាខ្វះការយកចិត្តទុកដាក់ទៅលើតំបន់នេះ ក្លាយជាវិបត្តិសន្តិសុខដ៏ធំបំផុតរបស់ប្រទេសអេត្យូពី ចាប់តាំងពីការបញ្ចប់សង្គ្រាមស៊ីវិលរយៈពេលពីរឆ្នាំ នៅក្នុងតំបន់ទីហ្គ្រេ(Tigray) ដែលនៅជិតខាង កាលពីឆ្នាំមុន។អង្គការសហប្រជាជាតិ បាននិយាយកាលពីចុងខែសីហាថា មនុស្សយ៉ាងតិច ១៨៣នាក់ បានស្លាប់នៅក្នុងខែដំបូងនៃជម្លោះ។ ប៉ុន្តែជាមួយនឹងការតភ្ជាប់អ៊ីធឺណិត ធ្លាក់ចុះ នៅទូទាំងតំបន់ វាពិតជាមានការលំបាកក្នុងការទទួលបានរូបភាពច្បាស់លាស់នៃស្ថានភាពនេះ។នៅក្នុងរបាយការណ៍ថ្មីមួយ គណៈកម្មាធិការសិទ្ធិមនុស្សអេត្យូពី (EHRC) បានចងក្រងឯកសារអំពីឧប្បត្តិហេតុជាច្រើន ដែលជនស៊ីវិល ត្រូវបានសម្លាប់ ក្នុងខែនេះ។

អ៊ុយក្រែន៖ កងទ័ពរុស្ស៊ីដាក់សម្ពាធខ្លាំងលើទាហានអ៊ុយក្រែន នៅជិតទីក្រុងបាកមូដ(Bakhmut)

យោធាអ៊ុយក្រែន បានបញ្ចេញវីដេអូ មួយកាលពីថ្ងៃចន្ទទី៣០ខែតុលា បង្ហាញពី កងទ័ពទទួលបានការហ្វឹកហាត់ រងការសម្ពាធខ្លាំងពីការវាយប្រហារដោយកាំភ្លើងធំ និងយានដ្រូន នៅជិតទីក្រុងបាកមូដ(Bakhmut)ប្រទេសអ៊ុយក្រែន ។ បញ្ជាការយោធាអ៊ុយក្រែនបាននិយាយកាលពីថ្ងៃចន្ទថា ប្រទេសរុស្ស៊ីបានប្រមូលផ្តុំកងកម្លាំងរបស់ខ្លួនយ៉ាងច្រើននៅជុំវិញទីក្រុងបាកមូដ( Bakhmut) ដែលរងការបំផ្លិចបំផ្លាញនៅភាគខាងកើត ហើយបានប្តូរកងទ័ពរបស់ខ្លួនពីជំហរការពារទៅជា សកម្មភាពសកម្ម។ រុស្ស៊ី បានដណ្ដើមយកទីក្រុងបាកមូដ ជាសមរភូមិប្រយុទ្ធដ៏បង្ហូរឈាម នៃសង្រ្គាមរយៈពេល២០ ខែមកនេះ កាលពីខែឧសភា ។ ប្រទេសអ៊ុយក្រែន បានបង្កើនការវាយបក ចាប់តាំងពីខែមិថុនា ដើម្បីដណ្ដើមយកមកវិញនូវដែនដីដែល រុស្ស៊ីដណ្ដើមគ្រប់គ្រង ក្នុងភាគខាងត្បូង និងខាងកើត រួមទាំងទីក្រុងនេះ។ សារព័ត៌មាន Reuters មិនអាចផ្អៀងផ្ទាត់ដោយឯករាជ្យពីទីតាំង ឬ កាលបរិច្ឆេទនៃវីដេអូនេះបានទេ ៕

រុស្ស៊ីបាញ់ទម្លាក់យានដ្រូនអ៊ុយក្រែន ខណៈអ៊ុយក្រែនវាយប្រហារប៉ុស្តិ៍ទីបញ្ជាការរបស់រុស្ស៊ី

យោងតាមការធ្វើបច្ចុប្បន្នភាពចុងក្រោយកាលពីថ្ងៃអាទិត្យ បានឲ្យដឹងថា រុស្ស៊ី និងអ៊ុយក្រែន បានបង្កើនប្រតិបត្តិការយោធារបស់ពួកគេកាលពីថ្ងៃអាទិត្យ ដោយការវាយលុកលើគោលដៅយោធាទៅវិញទៅមក រួមទាំងយានដ្រូន ប៉ុស្តិ៍ទីបញ្ជាការ និងប្រព័ន្ធសង្គ្រាមអេឡិចត្រូនិក។ កាលពីថ្ងៃអាទិត្យ ក្រសួងការពារជាតិរុស្ស៊ី បានចេញរបាយការណ៍មួយ និយាយថា កងទ័ពរុស្ស៊ី បានវាយរុញច្រានការវាយប្រហារជាច្រើនរបស់ទាហានអ៊ុយក្រែន ក្នុងគោលដៅនៅទីក្រុង Kherson, Kupiansk, និងទីក្រុង Lyman ដោយបានវាយប្រហារទីតាំងរបស់យោធានិងយុទ្ធោបករណ៍របស់អ៊ុយក្រែន និងបានបំផ្លាញប៉ុស្តិ៍ទីបញ្ជាការយានដ្រូន មជ្ឈមណ្ឌលស៊ើបអង្កេត ប្រព័ន្ធសង្គ្រាមអេឡិចត្រូនិក និងគោលដៅផ្សេងៗទៀតរបស់ប្រទេសនេះ។ នៅថ្ងៃតែមួយនោះដែរ នាយសេនាធិការនៃកងកម្លាំងប្រដាប់អាវុធអ៊ុយក្រែន ក៏បានចេញផ្សាយ ការធ្វើបច្ចុប្បន្នភាពរបស់ខ្លួន ដោយបង្ហាញថាក្នុងរយៈពេល២៤ម៉ោងកន្លងទៅនេះកងទ័ពអ៊ុយក្រែន បានបន្តប្រយុទ្ធជាមួយកងទ័ពរុស្ស៊ី នៅក្នុងតំបន់ Melitopol, Bahmut, Marinka និងគោលដៅផ្សេងៗទៀត។ កងទ័ពអ៊ុយក្រែន បានបើកការវាយប្រហារតាមអាកាសជាច្រើនលើកលើទីតាំងយុទ្ធោបករណ៍ និងយោធារុស្ស៊ី ដោយប្រើប្រាស់មីស៊ីលដើម្បីវាយលុកលើប៉ុស្តិ៍ទីបញ្ជាការ និងគោលដៅនានា និងបានស្ទាក់ចាប់យានដ្រូនរបស់រុស្ស៊ីជាច្រើនគ្រឿង។

តួសម្ដែង Matthew Perry ក្នុងកម្មវិធីទូរទស្សន៍ «Friends» របស់សហរដ្ឋអាមេរិក បានស្លាប់ដោយសារលង់ទឹកនៅវ័យ ៥៤ឆ្នាំ

តារាសម្ដែងដ៏មានប្រជាប្រិយភាពម្នាក់ លោក Matthew Perry ដែលជាតារាសំណព្វចិត្តរបស់កម្មវិធីទូរទស្សន៍ដ៏ល្បីបំផុតក្នុងទសវត្សរ៍ឆ្នាំ១៩៩០ របស់សហរដ្ឋអាមេរិក គឺកម្មវិធី «Friends» ដែលបានសម្ដែងជាតួអង្គកំប្លុកកំប្លែងឈ្មោះ Chandler Bing បានទទួលមរណភាពកាលពីថ្ងៃសៅរ៍ (២៨ តុលា) បន្ទាប់ពីបានលង់ទឹកក្នុងអាងទឹកក្តៅ នៅវ័យ ៥៤ឆ្នាំ។សារព័ត៌មាន LA Times និងសារព័ត៌មាន TMZ ដែលដកស្រង់ប្រភពពីសមត្ថកិច្ចបានរាយការណ៍ថា តារាសំដែងជនជាតិកាណាដា សញ្ជាតិអាមេរិក រូបនេះ ត្រូវគេប្រទះឃើញថាបានស្លាប់ នៅក្នុងអាងហែលទឹកមួយនៅក្នុងផ្ទះរបស់ខ្លួន ក្នុងទីក្រុង Los Angeles សហរដ្ឋអាមេរិក។ ទូរទស្សន៍ NBC ដែលចាក់ផ្សាយកម្មវិធី «Friends» នេះអស់រយៈពេល ១០ឆ្នាំមកហើយនោះ បានបញ្ជាក់ពីមរណភាពរបស់លោក Perry នៅក្នុងសេចក្តីថ្លែងការណ៍មួយនៅលើវេទិកាប្រព័ន្ធផ្សព្វផ្សាយសង្គម X ។ដំណឹងនេះបាននាំមកនូវការសោកស្ដាយពីសំណាក់តារាល្បីៗ និងបុគ្គលល្បីៗផ្សេងទៀត។ នាយករដ្ឋមន្ត្រីកាណាដា លោក Justin Trudeau ដែលជាអតីតមិត្តរួមសាលារបស់លោក Perry នៅទីក្រុង Ottawa បានពណ៌នាការស្លាប់របស់លោកថា «ជារឿងគួរឱ្យតក់ស្លុត និងសោកសៅបំផុត»។លោក Perry ទទួលបានភាពល្បីល្បាញតសម្រាប់តួនាទីដ៏យូរអង្វែងរបស់ខ្លួនជាតួអង្គឈ្មោះ Chandler ក្នុងកម្មវិធី «Friends» ដែលទទួលបានជោគជ័យជាអន្តរជាតិ និងបានដំណើរការចំនួន ១០រដូវកាល ពីឆ្នាំ ១៩៩៤ ដល់ឆ្នាំ២០០៤។ កម្មវិធីនេះ គឺជាកម្មវិធីទូរទស្សន៍អាមេរិក ដែលមានអ្នកមើលច្រើនជាងគេបំផុតក្នុងគ្រានោះ ដោយតារាសម្តែងម្នាក់ៗទទួលបានប្រាក់ចំណូល ១លានដុល្លារក្នុងមួយភាគ នៅកម្រិតខ្ពស់នៃប្រជាប្រិយភាពរបស់កម្មវិធីនោះ៕

មនុស្សម្នាក់បានស្លាប់ និងជាច្រើននាក់ទៀតរងរបួស ក្នុងការបំផ្ទុះនៅរដ្ឋភាគខាងត្បូងប្រទេសឥណ្ឌា

មនុស្សយ៉ាងហោចណាស់ម្នាក់ បានស្លាប់ និងជាច្រើននាក់ទៀត បានរងរបួសនៅក្នុងការផ្ទុះជាបន្តបន្ទាប់ នៅមជ្ឈមណ្ឌលសន្និបាតមួយកន្លែង ក្នុងរដ្ឋ កេរ៉ាឡា (Kerala) ភាគខាងត្បូងប្រទេសឥណ្ឌា នៅថ្ងៃអាទិត្យ (២៩ តុលា) នេះ ជាទីដែលក្រុមគ្រិស្តបរិស័ទ កំពុងជួបជុំគ្នាធ្វើការអធិស្ឋាន។ឧបទ្ទវហេតុនេះ បានកើតឡើងក្នុងអំឡុងពេលមហាសន្និបាតសាក្សីព្រះយេហូវ៉ា នៅឯមជ្ឈមណ្ឌលក្នុងទីក្រុង កាឡាម៉ាសឺរី (Kalamassery) ចម្ងាយប្រហែល ១០គីឡូម៉ែត្រ នៅភាគឦសាននៃទីក្រុង កូឈី (Kochi)។ លោក P. Rajeev រដ្ឋមន្ត្រីឧស្សាហកម្មនៃរដ្ឋ Kerala បានប្រាប់ក្រុមអ្នកយកព័ត៌មានថា លោកមិនអាចកំណត់បានភ្លាមៗនោះទេ អំពីមូលហេតុនៃការផ្ទុះនេះ។សារព័ត៌មានក្នុងស្រុក ឈ្មោះ Mathrubhumi បាននិយាយថា យ៉ាងហោចណាស់មានការផ្ទុះចំនួនបីករណី បានកើតឡើងនៅខាងក្នុងសាលសន្និបាតនោះ ដោយមនុស្សជាង ២៣នាក់បានរងរបួស ហើយអ្នករបួសទាំងនោះ ក៏ត្រូវបានបញ្ជូនទៅមន្ទីរពេទ្យភ្លាមៗផងដែរ៕

អ៊ីស្រាអែលធ្វើប្រតិបត្តិការជើងគោកប្រឆាំងនឹងក្រុមហាម៉ាស ក្នុងដំណាក់កាលទីពីរ នៃសង្រ្គាមនៅតំបន់ហ្កាហ្សា

កងកម្លាំងអ៊ីស្រាអែល បានធ្វើប្រតិបត្តិការជើងគោកប្រឆាំងនឹងក្រុមហាម៉ាស នៅតំបន់ហ្កាហ្សា នៅថ្ងៃអាទិត្យ (២៩ តុលា) នេះ នៅក្នុងអ្វីដែលនាយករដ្ឋមន្ត្រីអ៊ីស្រាអែល លោក Benjamin Netanyahu បានហៅថា ជាដំណាក់កាលទីពីរនៃសង្រ្គាម ដែលមានរយៈពេលបីសប្តាហ៍ ក្នុងគោលបំណងកម្ទេចក្រុមសកម្មប្រយុទ្ធប៉ាឡេស្ទីន មួយនេះឲ្យបាត់ពីផែនដី។អ្នកស្រុកដែលត្រូវបានឡោមព័ទ្ធនៅតំបន់ហ្កាហ្សា ប្រឈមមុខនឹងការកាត់ផ្ដាច់ទំនាក់ទំនង និងការដាច់អ៊ីនធឺណិតទាំងស្រុង ខណៈយន្តហោះចម្បាំងរបស់អ៊ីស្រាអែល បានបន្តទម្លាក់គ្រាប់បែក ហើយកងទ័ព និងរថពាសដែករបស់ខ្លួន បានសម្រុកចូលទៅក្នុងតំបន់ ដែលគ្រប់គ្រងដោយក្រុមហាម៉ាស មួយនេះ ខណៈប្រមុខយោធាអ៊ីស្រាអែល ផ្តល់សញ្ញាថា ពួកគេកំពុងត្រៀមលក្ខណៈសម្រាប់ការវាយលុកថ្មើរជើងបន្ថែមទៀត។ដោយថ្លែងនៅក្នុងសន្និសីទសារព័ត៌មាននៅទីក្រុង Tel Aviv កាលពីថ្ងៃសៅរ៍ លោកនាយករដ្ឋមន្រ្តី Netanyahu បានព្រមានពលរដ្ឋអ៊ីស្រាអែល ឱ្យរំពឹងថា នឹងមានយុទ្ធនាការ «ដ៏វែង និងរឹងមាំ» ប៉ុន្តែបានបញ្ឈប់ការហៅការវាយប្រហារនាពេលបច្ចុប្បន្ននេះ ថាជាការឈ្លានពាន។ ក្រុមមន្ត្រីអាមេរិកបាននិយាយថា ក្រុមជំនួយការរបស់ប្រធានាធិបតីអាមេរិក លោក ចូ បៃដិន មួយចំនួនបានណែនាំសមភាគីអ៊ីស្រាអែល ឱ្យបញ្ឈប់ការវាយលុកភ្លាមៗនេះ។បណ្តាប្រទេសលោកខាងលិច ជាទូទៅបានគាំទ្រនូវអ្វីដែលពួកគេនិយាយថា ជាសិទ្ធិរបស់អ៊ីស្រាអែលក្នុងការការពារខ្លួន ប៉ុន្តែក៏មានការតវ៉ាជាអន្តរជាតិកាន់តែខ្លាំងឡើង ជុំវិញចំនួនអ្នកស្លាប់ដ៏លើសលប់ពីការទម្លាក់គ្រាប់បែក និងការអំពាវនាវកាន់តែខ្លាំងឡើងសម្រាប់ «ការផ្អាកសង្រ្គាមសម្រាប់មនុស្សធម៌» ដើម្បីអនុញ្ញាតឱ្យជំនួយទៅដល់ជនស៊ីវិលនៅតំបន់ហ្កាហ្សា និងបន្ធូរបន្ថយវិបត្តិមនុស្សធម៌នៅក្នុងតំបន់នោះផងដែរ៕

អ្នកស្រុកនៅរដ្ឋ Maine របស់សហរដ្ឋអាមេរិក ប្រមូលផ្តុំគ្នាកាន់ទុក្ខដល់ជនរងគ្រោះក្នុងហេតុការណ៍សម្លាប់រង្គាល

អ្នកស្រុកនៃសហគមន៍ ដែលរងផលប៉ះពាល់ដោយការបាញ់ប្រហារសម្លាប់រង្គាលដ៏ធំមួយ ដែលបានបណ្ដាលឲ្យមនុស្ស ១៨នាក់ ស្លាប់ក្នុងសប្តាហ៍នេះនៅរដ្ឋ Maine របស់សហរដ្ឋអាមេរិក បានប្រមូលផ្តុំគ្នាដើម្បីចូលរួមរំលែកទុក្ខដល់ជនរងគ្រោះ នៅក្នុងពីធីកាន់ទុក្ខមួយកាលពីយប់ថ្ងៃសៅរ៍ (២៨ តុលា)។ការប្រមូលផ្ដុំគ្នានេះ បានកើតឡើងនៅមាត់ទន្លេក្នុងសហគមន៍ Lisbon ភាគខាងត្បូងនៃទីក្រុង Lewiston ជាទីដែលអតីតទាហានបម្រុងនៃកងទ័ពអាមេរិក លោក Robert Card វ័យ ៤០ឆ្នាំ បានបាញ់បើកការបាញ់ប្រហារក្នុងទីលានវាយកូនបាល់ និងបារមួយកន្លែង កាលពីថ្ងៃពុធ (២៥ តុលា)។ នគរបាលបាននិយាយថា ឧក្រិដ្ឋជន Card រូបនេះ ត្រូវគេប្រទះឃើញថាបានស្លាប់ កាលពីល្ងាចថ្ងៃសុក្រ (២៧ តុលា) ដោយការបាញ់សម្លាប់ខ្លួនឯង។ប្រជាជនជាច្រើនមកពីទីក្រុងជុំវិញបានកាន់ទៀន និងបួងសួងដល់អ្នកស្លាប់ និងអ្នករបួស។ អ្នកចូលរួមជាច្រើនបាននិយាយថា សាច់ញាតិ និងមិត្តភក្តិរបស់ពួកគេត្រូវបានសម្លាប់នៅក្នុងការបាញ់ប្រហារនោះ ហើយពួកគេប្រើប្រាស់ការប្រមូលផ្ដុំនេះ ដើម្បីពន្យល់ពីគ្រោះថ្នាក់នៃការបាញ់ប្រហារដល់កូនៗរបស់ពួកគេ។ការបាញ់ប្រហារ និងការតាមចាប់ខ្លួនឧក្រិដ្ឋជនដ៏អូសបន្លាយនេះ បានធ្វើឱ្យមានការភ្ញាក់ផ្អើលដល់សហគមន៍ នៃទីក្រុង Lewiston មួយនេះ ដែលជាអតីតមជ្ឈមណ្ឌលវាយនភណ្ឌ និងជាតំបន់មានប្រជាជនច្រើនជាងគេទីពីរក្នុងរដ្ឋ Maine ដែលស្ថិតនៅលើច្រាំងទន្លេ Androscoggin របស់សហរដ្ឋអាមេរិក៕

បណ្ដាញសង្គម

ព័ត៌មានថ្មីៗ

ស្ថានទូតឥណ្ឌូនេស៊ី រំពឹងថា ពិធីបុណ្យផ្សាររាត្រី នឹងទាក់ទាញភ្ញៀវទេសចរកាន់តែច្រើន ឱ្យចូលរួមទស្សនាផ្លូវថ្មើរជើងចតុមុខ

សកម្មជនមកពីគណបក្សប្រឆាំងចំនួន៧០នាក់ ស្រុកស្អាង ខេត្តកណ្តាល ចូលរួមជីវភាពនយោបាយជាមួយគណបក្សប្រជាជនកម្ពុជា

ការងារជោគជ័យអាស្រ័យមន្រ្តីមាន «សុខភាពល្អ»

ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន

ឯកឧត្តម ហ៊ុន ម៉ានី៖“សុខទុក្ខមន្ត្រី គឺជាស្នូលនៃការអនុវត្តការងារកែទម្រង់រដ្ឋបាលសាធារណៈ ស្របតាមចក្ខុវិស័យរបស់ សម្តេចមហាបវរធិបតីនាយករដ្ឋមន្ត្រី”

ការនាំចេញប្រេងឆៅ និងផលិតផលប្រេងរបស់សហរដ្ឋអាមេរិកបានឈានដល់កម្រិតខ្ពស់បំផុតមិនធ្លាប់មាន

អ៊ីរ៉ង់និយាយថាខ្លួន បានត្រៀមរួចរាល់ហើយដើម្បីទប់ទល់នឹងការគំរាមកំហែងគ្រប់បែបយ៉ាង

មនុស្ស១៤ នាក់បានស្លាប់ក្នុងការបំផ្ទុះគ្រាប់បែកនៅភាគនិរតីរបស់ប្រទេសកូឡុំប៊ី

អតីតសកម្មជនបក្សប្រឆាំងជាច្រើននាក់ទៀត នៅស្រុកត្រាំកក់ សម្រេចចូលរួមជីវភាពនយោបាយ ជាមួយគណប្រជាជនកម្ពុជា

អាជ្ញាធរខេត្តប៉ៃលិន បន្តចុះត្រួតពិនិត្យជនបរទេសដែលលួចចូលមករស់នៅខុសច្បាប់ ក្នុងខេត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877