BTV NEWS

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

សន្តិសុខ និង សង្គម

ប្រេស៊ីលនឹងដាក់ពង្រាយយោធានៅតាមអាកាសយានដ្ឋាន កំពង់ផែ និងព្រំដែនអន្តរជាតិសំខាន់ៗ ក្នុងការបង្ក្រាបឧក្រិដ្ឋកម្ម

ប្រធានាធិបតីប្រេស៊ីល លោក Luiz Inácio Lula da Silva បាននិយាយកាលពីថ្ងៃពុធថា លោកកំពុងបញ្ជូនកងកម្លាំងប្រដាប់អាវុធ ដើម្បីបង្កើនសន្តិសុខ នៅតាមអាកាសយានដ្ឋាន កំពង់ផែ និងព្រំដែនអន្តរជាតិសំខាន់ៗមួយចំនួនរបស់ប្រទេសនេះ ដែលជាផ្នែកនៃកិច្ចខិតខំប្រឹងប្រែងជាថ្មី ដើម្បីបង្ក្រាបឧក្រិដ្ឋកម្មដែលមានការរៀបចំ នៅក្នុងប្រទេសដ៏ធំបំផុតរបស់អាមេរិកឡាទីន។ការសម្រេចចិត្តនេះ កើតឡើងប៉ុន្មានថ្ងៃបន្ទាប់ពីសមាជិកនៃក្រុមឧក្រិដ្ឋជន បានដុតរថយន្តក្រុងរាប់សិបគ្រឿងក្នុងទីក្រុង Rio de Janeiro ដែលជាក់ស្តែងជាការសងសឹកចំពោះនគរបាលដែលបានសម្លាប់ក្មួយប្រុសរបស់មេដឹកនាំរបស់ពួកគេ។លោក Lula បាននិយាយក្នុងសន្និសីទកាសែតក្នុងទីក្រុងប្រេស៊ីលយ៉ា ( Brasilia) បន្ទាប់ពីបានចុះហត្ថលេខាលើក្រឹត្យនេះថា៖ «យើងបានឈានដល់ស្ថានភាពធ្ងន់ធ្ងរហើយ ដូច្នេះយើង បានសម្រេចចិត្តឲ្យរដ្ឋាភិបាលសហព័ន្ធចូលរួមយ៉ាងសកម្មជាមួយនឹងលទ្ធភាពទាំងអស់ក្នុងការជួយរដ្ឋាភិបាលរដ្ឋ និងប្រេស៊ីល ខ្លួនឯង ដើម្បីកម្ចាត់ឧក្រិដ្ឋកម្មដែលមានការរៀបចំនេះ»។ប្រទេសប្រេស៊ីល នឹងប្រមូលផ្តុំសមាជិកចំនួន ៣.៦០០នាក់នៃកងទ័ព កងទ័ពជើងទឹក និងទ័ពអាកាស ដើម្បីបង្កើនការល្បាត និងត្រួតពិនិត្យអាកាសយានដ្ឋានអន្តរជាតិក្នុងទីក្រុង Rio de Janeiro និង Sao Paulo ក៏ដូចជាកំពង់ផែសមុទ្រចំនួនពីរនៅ Rio និងកំពង់ផែ Santos របស់ Sao Paulo ដែលជាកំពង់ផែដ៏មមាញឹកបំផុតនៅអាមេរិកឡាទីន និងជាមជ្ឈមណ្ឌលនាំចេញកូកាអ៊ីន។

ទីភ្នាក់ងារជនភៀសខ្លួនអង្គការសហប្រជាជាតិ ព្រមានប៉ាគីស្ថាន អំពីការនិរទេសដោយបង្ខំពលរដ្ឋអាហ្វហ្គានីស្ថានដែលគ្មានឯកសារ

នគរបាល បានចាប់ផ្តើមរុះរើផ្ទះសង់ពីដីល្បប់ នៅក្នុងជំរំពលរដ្ឋអាហ្វហ្គានីស្ថានមួយកន្លែង នៅជាយក្រុងអ៊ីស្លាម៉ាបាដ កាលពីល្ងាចថ្ងៃពុធ ទី១ ខែ វិច្ឆិកា មុនពេលវេលាផុតកំណត់នៅពេលពាក់កណ្តាលអាធ្រាត សម្រាប់ជនភៀសខ្លួនគ្មានឯកសារ ឲ្យចាកចេញ បើមិនដូច្នេះទេត្រូវប្រឈមមុខការបណ្តេញចេញ។ទីភ្នាក់ងារជនភៀសខ្លួនអង្គការសហប្រជាជាតិ (UNHCR) កំពុងព្រមានថា ការបណ្តេញចេញតាមផែនការរបស់ប្រទេសប៉ាគីស្ថាន នូវជនជាតិបរទេសគ្មានឯកសារជាងមួយលាននាក់ ប្រឈមហានិភ័យ បង្កឲ្យមានមហន្តរាយសិទ្ធមនុស្ស។ កាលពីខែមុន ប្រទេសប៉ាគីស្ថាន បានកំណត់ថ្ងៃទី១ ខែវិច្ឆិកា ចាប់ផ្តើមកាលបរិច្ឆេទ សម្រាប់ការបណ្តេញចេញជនអន្តោប្រវេសន៍គ្មានឯកសារទាំងអស់ រួមមានទាំងពលរដ្ឋអាហ្វហ្គានីស្ថានរាប់ម៉ឺននាក់។ប្រទេសប៉ាគីស្ថាន បានលើកឡើងពីហេតុផលសន្តិសុខ ដោយមិនអើពើចំពោះការអំពាវនាវឲ្យពិចារណាឡើងវិញ ពីសំណាក់អង្គការសហប្រជាជាតិ ក្រុមសិទ្ធមនុស្ស និងស្ថានទូតប្រទេសលោកខាងលិច។ជនភៀសខ្លួននៅជំរំពលរដ្ឋអាហ្វហ្គានីស្ថានដែលត្រូវបានរុះរើ ត្រូវបានគេផ្តល់ពេល២សប្តាហ៍ដើម្បីសម្អាត បានត្អូញត្អែរថា ពួកគេពុំបានផ្តល់ឲ្យពេលវេលាគ្រប់គ្រាន់ឡើយ។ មួយចំនួនក្នុងចំណោមអ្នកទាំងនេះត្រូវបានបញ្ជាឲ្យចាកចេញ បានចំណាយពេលច្រើនទសវត្សរ៍ នៅក្នុងប្រទេសប៉ាគីស្ថាន។ ក្រសួងមហាផ្ទៃ បាននិយាយថាមនុស្ស១៤០.៣២២ នាក់ បានស្ម័គ្រចិត្តចាកចេញរួចហើយជាច្រើនថ្ងៃមកនេះ ដែលរថយន្តជាច្រើនគ្រឿង បានដាក់ឥវ៉ាន់គរខ្ពស់ និងដាក់ប្រជ្រៀតមនុស្ស ដែលបានធ្វើឲ្យស្ទះចរាចរណ៍ផ្លូវធំៗ ចេញក្រៅប្រទេសនេះ។

អ៊ីរ៉ង់ព្រមានអំពី«ផលវិបាកដ៏ធ្ងន់ធ្ងរ» ប្រសិនបើការវាយប្រហារនៅតំបន់ហ្កាហ្សា នៅតែបន្ត

រដ្ឋមន្ត្រីការបរទេសអ៊ីរ៉ង់លោក ហ៊ូសេន អាមីរ៉ាប់ឌូឡាហៀន (Hossein Amirabdollahian) បានព្រមានកាលពីថ្ងៃពុធអំពី «ផលវិបាកដ៏ធ្ងន់ធ្ងរ» ប្រសិនបើការវាយប្រហារនៅតែបន្តលើតំបន់ហ្កាហ្សាស្ទ្រីប ដែលជាការព្រមានចុងក្រោយបង្អស់ពីប្រទេសនេះ ដែលគាំទ្រក្រុមហាម៉ាសនៅតំបន់ហ្កាហ្សា និងកងជីវពល នៅកន្លែងផ្សេងទៀត ក្នុងតំបន់នេះ។លោក បាននិយាយនៅក្នុងទីក្រុងអង់ការ៉ាថា៖«ប្រសិនបើបទឈប់បាញ់ភ្លាមៗ មិនបានកើតឡើងនៅហ្កា ហ្សាស្ទ្រីប ហើយការវាយប្រហារយ៉ាងឆាប់រហ័សដោយសហរដ្ឋអាមេរិក និងរបបអ៊ីស្រាអែលនិយម នៅតែបន្ត នោះផលវិបាក នឹងកាន់តែធ្ងន់ធ្ងរឡើង» ។សហរដ្ឋអាមេរិក និងអ៊ីស្រាអែល បានវាយប្រហារទៅលើក្រុមជីវពលដែលគាំទ្រដោយអ៊ីរ៉ង់ នៅក្នុងតំបន់ធំទូលាយនេឡះ ដើម្បីឆ្លើយតបទៅនឹងអ្វីដែលពួកគេ បាននិយាយថា ជាការវាយប្រហារដែលមិនបង្កហេតុក្នុងរយៈពេលប៉ុន្មានសប្តាហ៍កន្លងមកនេះ ដែលបានជំរុញឲ្យមានការភ័យខ្លាចថា ជម្លោះតំបន់ហ្កាហ្សា អាចបង្កឲ្យក្លាយជាសង្រ្គាមកាន់តែទូលំទូលាយឡើង។ថ្លែងក្នុងសន្និសីទសារព័ត៌មានជាមួយសមភាគីទួរគី លោក អាមីរ៉ាប់ឌូឡាហៀន មិនបានផ្តល់ព័ត៌មានលម្អិតអំពីផែនការរបស់អ៊ីរ៉ង់ទេ។ប្រទេសនេះ និយាយថា ខ្លួនគាំទ្រក្រុមហាម៉ាស ប៉ុន្តែមិនបានដើរតួនាទីណាមួយក្នុងការវាយប្រហាររបស់ក្រុមសកម្មប្រយុទ្ធលើអ៊ីស្រាអែលកាលពីខែមុន។ ទាំងខ្លួន និងទួរគី បានថ្កោលទោសការទម្លាក់គ្រាប់បែកជាបន្តបន្ទាប់របស់អ៊ីស្រាអែល ទៅលើតំបន់ហ្កាហ្សា។

លោកនាយករដ្ឋមន្ត្រី អ៊ីស្រាអែល Netanyahu ប្រឈមសម្ពាធខ្លាំង ចំពោះមហន្តរាយរបស់ក្រុមហាម៉ាស

លោកនាយករដ្ឋមន្ត្រី អ៊ីស្រាអែល បេន ចាមីនណេតានយ៉ាហ៊ូ (Benjamin Netanyahu)បានសាងកេរ្តិ៍ឈ្មោះរបស់លោកក្នុងនាមជាអ្នកការពារសន្តិសុខដោយពឹងផ្អែកលើតួនាទីរបស់លោកនៅក្នុងអង្គភាពកងកម្លាំងសម្រាំង ដែលបានជួយរំដោះចំណាប់ខ្មាំងដ៏ក្លាហានបំផុតមួយចំនួនរបស់អ៊ីស្រាអែល។កេរដំណែលរបស់លោកជាមេដឹកនាំដែលកាន់អំណាចយូរជាងគេបំផុតរបស់ប្រទេសនេះ ឥឡូវនេះនឹងត្រូវបានបង្ហាញពីការបរាជ័យផ្នែកសន្តិសុខដ៏អាក្រក់បំផុតមួយដែលលោកបានដឹង និងដោយជោគវាសនានៃចំណាប់ខ្មាំងជាង ២០០ នាក់ដែលត្រូវបានចាប់ខ្លួនដោយខ្មាន់កាំភ្លើងក្រុមហាម៉ាសប៉ាឡេស្ទីនពីតំបន់ហ្កាហ្សា ដែលអ៊ីស្រាអែលបាននិយាយថាបានសម្លាប់មនុស្សជាង១.៤០០នាក់ នៅថ្ងៃដ៏សាហាវបំផុតក្នុងប្រវត្តិសាស្ត្រ រយៈពេល៧៥ ឆ្នាំ មកនេះ។ ទំហំនៃការសម្លាប់រង្គាល របួស និងរូបភាពនៃអំពើហិង្សាដែលកើតចេញពីសហគមន៍អ៊ីស្រាអែលភាគខាងត្បូងជុំវិញតំបន់ហ្កាហ្សា បានធ្វើឱ្យប្រទេសនេះរង្គោះរង្គើ។ក្នុងអាណត្តិទី៦របស់លោកជានាយករដ្ឋមន្ត្រី លោក Netanyahu វ័យ៧៤ឆ្នាំ ជាប្រធានក្រុមចម្រុះស្តាំនិយមជ្រុលបំផុតមួយរបស់អ៊ីស្រាអែល ហើយបានស្ថិតនៅក្រោមសម្ពាធកាន់តែខ្លាំងឡើង ខណៈភាពតក់ស្លុតដំបូងបានធ្វើឲ្យផ្ទុះកំហឹង ចំពោះការបរាជ័យ ដែលនាំឱ្យមានការវាយប្រហារកើតឡើង។ លោកបានបដិសេធមិនទទួលខុសត្រូវ ដោយគ្រាន់តែនិយាយថា គ្រប់គ្នានឹងត្រូវឆ្លើយសំណួរពិបាកៗ នៅពេលសង្រ្គាមជាមួយក្រុមហាម៉ាសបញ្ចប់ ហើយនៅក្នុងសន្និសីទសារព័ត៌មានដ៏កម្រមួយរបស់លោក លោកបានច្រានចោលសំណួរដែលសួរថាតើរូបលោកនឹងលាលែងពីតំណែងដែរឬទេ។ ការស្ទង់មតិរបស់កាសែត ម៉ារីវ (Maariv) កាលពីថ្ងៃទី ១៨-១៩ ខែតុលា បានបង្ហាញថា អតីតរដ្ឋមន្ត្រីក្រសួងការពារជាតិ លោក បេនី ហ្គានស៍ (Benny Gantz) ប្រធានគណបក្សប្រឆាំងកណ្តាលនិយមនៅក្នុងរដ្ឋាភិបាលរួបរួមដែលបានបង្កើតថ្មី ក្រុមអ្នកឆ្លើយតបបានបង្ហាញការពេញចិត្ត ចំនួន៤៨% ឲ្យលោកលោកធ្វើជានាយករដ្ឋមន្ត្រី បើធៀបនឹង ២៨% សម្រាប់លោក Netanyahu ៕

មនុស្សជាង១០.០០០នាក់បានស្លាប់នៅក្នុងជម្លោះអ៊ីស្រាអែល និងក្រុមហាម៉ាស ខណៈសង្រ្គាមនៅតែបន្ត

ចំនួនអ្នកស្លាប់ពីការប៉ះទង្គិចគ្នារវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស បានកើនឡើងដល់ជាង ១០.០០០នាក់ កាលពីថ្ងៃពុធ (១ វិច្ឆិកា) ដោយមិនមានសញ្ញាណាមួយនៃការថយចុះនៅក្នុងការវាយប្រហាររបស់អ៊ីស្រាអែល ប្រឆាំងនឹងតំបន់ហ្កាហ្សា ស្ទ្រីប ដែលគ្រប់គ្រងដោយក្រុមហាម៉ាស ឡើយចាប់តាំងពីសង្រ្គាមបានចាប់ផ្តើមកាលពីខែមុនមក។ ក្រុមអាជ្ញាធរសុខាភិបាលតំបន់ហ្កាហ្សា បាននិយាយនៅថ្ងៃដដែលនោះថា ចំនួនអ្នកស្លាប់នៅក្នុងតំបន់ហ៊ុមព័ទ្ធរបស់ប៉ាឡេស្ទីនមួយនេះ បានកើនឡើងដល់ ៨.៧៩៦នាក់ ខណៈភាគីអ៊ីស្រាអែល បានមើលឃើញមនុស្សជាង ១.៤០០នាក់ ត្រូវបានសម្លាប់។ ទន្ទឹមនឹងនេះដែរ មនុស្សរាប់សិបនាក់មកពីតំបន់ហ្កាហ្សា បានទៅដល់ប្រទេសអេហ្ស៊ីប តាមច្រកព្រំដែនរ៉ាហ្វាហ្វ កាលពីថ្ងៃពុធ នេះបើយោងតាមសារព័ត៌មាន AP ដោយបន្ថែមថា វាហាក់ដូចជាជាលើកដំបូងហើយ ដែលពលេដ្ឋកាន់លិខិតឆ្លងដែនបរទេស ត្រូវបានអនុញ្ញាតឱ្យចាកចេញពីតំបន់ហ្កាហ្សា ចាប់តាំងពីសង្រ្គាមបានចាប់ផ្តើម បន្ទាប់ពីការវាយប្រហារដ៏គួរឱ្យភ្ញាក់ផ្អើលកាលពីថ្ងៃទី៧ ខែតុលា ដោយក្រុមហាម៉ាស លើប្រជាជាតិជ្វីហ្វ មក។ គួររម្លឹកផងដែរថា ក្រុមហាម៉ាស ដែលគ្រប់គ្រងតំបន់ហ្កាហ្សា ស្ទ្រីប បានបើកការវាយប្រហារដ៏គួរឱ្យភ្ញាក់ផ្អើលមួយលើអ៊ីស្រាអែលកាល ពីថ្ងៃទី៧ ខែតុលា។ ជាការឆ្លើយតប យោធាអ៊ីស្រាអែល បានធ្វើការវាយប្រហារតាមអាកាសសំដៅលើទីតាំង និងទីស្នាក់ការកណ្តាលជាច្រើនរបស់ក្រុមហាម៉ាស នៅក្នុងតំបន់ឆ្នេរហ៊ុមព័ទ្ធមួយនេះ ហើយការប្រយុទ្ធគ្នាចុងក្រោយបំផុតនេះ បាននាំឱ្យមានអ្នកស្លាប់ និងរងរបួសយ៉ាងច្រើនសន្ធឹកសន្ធាប់សម្រាប់ភាគីជម្លោះទាំងសងខាង៕

កូរ៉េខាងត្បូង៖ រុស្ស៊ី ជួយកូរ៉េខាងជើង ក្នុងការបាញ់បង្ហោះផ្កាយរណបចារកម្ម

ទីភ្នាក់ងារស៊ើបការណ៍ចារកម្មសម្ងាត់ របស់ប្រទេសកូរ៉េខាងត្បូង បាននិយាយនៅក្នុងសន្និសីទសារព័ត៌មានមួយកាលពីថ្ងៃពុធ (១ វិច្ឆិកា) ថា ប្រទេសកូរ៉េខាងជើង កំពុងស្ថិតក្នុងដំណាក់កាលចុងក្រោយនៃការរៀបចំសម្រាប់ការបាញ់បង្ហោះផ្កាយរណបចារកម្មរបស់ខ្លួន ហើយឱកាសនៃការប៉ុនប៉ងលើកទីបី មួយនេះ អាចទទួលបានជោគជ័យខ្ពស់ ដោយមានការជួយពីប្រទេសរុស្ស៊ី។សមាជិកនៃគណៈកម្មាការសភារបស់កូរ៉េខាងត្បូង លោក យ៉ូ សាងប៊ុម (Yoo Sang-bum) បាននិយាយដោយដកស្រង់របាយការណ៍របស់ទីភ្នាក់ងារចារកម្មជាតិ (NIS) ថា កូរ៉េខាងជើង ហាក់ដូចជាបានទទួលជំនួយបច្ចេកទេសពីរុស្ស៊ី ហើយទំនងជាកំពុងពិនិត្យមើលម៉ាស៊ីន និងយន្តការបាញ់បង្ហោះរបស់យាននេះ ប៉ុន្តែរបាយការណ៍នោះមិនបានផ្តល់ព័ត៌មានលម្អិតបន្ថែមទៀតទេ ដោយសារតែហេតុផលសន្តិសុខ។កូរ៉េខាងជើង ធ្លាប់បានសន្យាថា ខ្លួននឹងធ្វើការបាញ់បង្ហោះផ្កាយរណបចារកម្មលើកទីបី នៅក្នុងខែតុលា ប៉ុន្តែរហូតមកដល់ពេលនេះ មិនទាន់មានការបង្ហាញណាមួយថា ខ្លួនហៀបនឹងបន្តដំណើរការបាញ់បង្ហោះនោះទេ។ មេដឹកនាំកូរ៉េខាងជើង លោក គីម ជុងអ៊ុន បានជួបប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីខែកញ្ញា នៅតំបន់ចុងបូព៌ារបស់រុស្ស៊ី ជាទីដែលលោកបានទៅទស្សកិច្ចស្ថានីយបាញ់បង្ហោះយានអវកាសទំនើបរបស់រុស្ស៊ី ដោយជំរុញឱ្យមានការរំពឹងទុកថា ទីក្រុងមូស្គូ នឹងជួយដល់កម្មវិធីអវកាសរបស់កូរ៉េខាងជើង ជាថ្នូរនឹងការផ្គត់ផ្គង់អាវុធធម្មតាពីប្រទេសផ្ដាច់ខ្លួនមួយនេះដល់រុស្ស៊ី ផងដែរ៕

ជនអន្តោប្រវេសន៍រាប់ពាន់នាក់ប្រមូលផ្តុំគ្នានៅប្រទេសម៉ិកស៊ិកភាគខាងត្បូង ព្យាយាមទៅដល់ព្រំដែនសហរដ្ឋអាមេរិក

ជនអន្តោប្រវេសន៍រាប់ពាន់នាក់ នៅប្រទេសម៉ិកស៊ិកភាគខាងត្បូង កាលពីថ្ងៃពុធបានស្នើសុំធ្វើដំណើរឆ្លងកាត់ប្រទេសប្រទេសនេះ ដើម្បីបានទៅដល់ព្រំដែនភាគខាងជើងជាមួយសហរដ្ឋអាមេរិក។ភាគច្រើនក្នុងចំណោមជនអន្តោប្រវេសន៍ទាំងនេះ កំពុងធ្វើដំណើរជាមួយក្រុមគ្រួសាររបស់ពួកគេ។ ពួកគេបានមកប្រមូលផ្តុំគ្នានៅទីក្រុង Huixtla ក្នុងរដ្ឋ Chiapas ដើម្បីសម្រាកមុនការធ្វើដំណើរទៅកាន់ភាគខាងជើង។ពួកគេបានប្រាប់សារព័ត៌មានរ៉យទ័រ អំពីភាពក្រីក្រ និងភាពអសន្តិសុខ នៅក្នុងប្រទេសកំណើតរបស់ពួកគេ ដែលបានធ្វើឲ្យេពួកគេសម្រេចចិត្តធ្វើអន្តោប្រវេសន៍។ជនអន្តោប្រវេសន៍ជនជាតិហុងឌុយរ៉ាស់ លោក Eliseo Portillo បាននិយាយថាការធ្វើអន្តោប្រវេសន៍ គឺជាដំណោះស្រាយតែមួយគត់ដែលលោកមាន បន្ទាប់ពីបានបាត់បង់អ្វីគ្រប់យ៉ាង អំឡុងព្យុះសង្ឃរា Eta និង Iota កាលពីឆ្នាំ២០២០។នៅឆ្នាំនេះ បានមើលឃើញពីចំនួនខ្ពស់បំផុតនៃជនអន្តោប្រវេសន៍ឆ្លងកាត់តំបន់ Darien Gap តភ្ជាប់ប្រទេសប៉ាណាម៉ានិងប្រទេសកូឡំប៊ី។

សារព័ត៌មាន WSJ៖ ចិន យល់ព្រមចរចាលើការគ្រប់គ្រងអាវុធនុយក្លេអ៊ែរជាមួយអាមេរិក

សារព័ត៌មាន Wall Street Journal (WSJ) បានរាយការណ៍កាលពីថ្ងៃពុធ (១ វិច្ឆិកា) ថា ប្រទេសចិន និងសហរដ្ឋអាមេរិក នឹងពិភាក្សាអំពីការគ្រប់គ្រងអាវុធនុយក្លេអ៊ែរនៅសប្តាហ៍ក្រោយនេះ ដែលជាកិច្ចពិភាក្សាលើកដំបូងចាប់តាំងពីរដ្ឋបាលរបស់លោកអតីតប្រធានាធិបតីអាមេរិក អូបាម៉ា មក។ ក្រសួងការបរទេសចិន បាននិយាយកាលពីថ្ងៃចន្ទ បន្ទាប់ពីដំណើរទស្សនកិច្ចរបស់រដ្ឋមន្ត្រីការបរទេស លោក វ៉ាង យី (Wang Yi) ទៅកាន់ទីក្រុងវ៉ាស៊ីនតោន ថា ប្រទេសទាំងពីរនឹងរៀបចំ «ការពិគ្រោះយោបល់ស្តីពីការគ្រប់គ្រងអាវុធ និងការមិនរីកសាយភាយនៃអាវុធនុយក្លេអ៊ែរ» នៅប៉ុន្មានថ្ងៃខាងមុខនេះ ក៏ដូចជាការពិភាក្សាដាច់ដោយឡែកពីគ្នាអំពីកិច្ចការដែនសមុទ្រ និងបញ្ហាផ្សេងៗទៀតផងដែរ។របាយការណ៍របស់សារព័ត៌មាន WSJ បាននិយាយថា កិច្ចពិភាក្សាអាវុធទាំងនោះ នឹងត្រូវធ្វើឡើងនៅថ្ងៃច័ន្ទសប្ដាហ៍ក្រោយ ដឹកនាំដោយលោក ម៉ាឡូរី ស្ទូវើត (Mallory Stewart) មន្ត្រីជាន់ខ្ពស់ក្រសួងការបរទេសអាមេរិក និងលោក ស៊ុន ស៊ាវប៉ូ (Sun Xiaobo) ប្រធាននាយកដ្ឋានគ្រប់គ្រងអាវុធនៅក្រសួងការបរទេសចិន។មន្ទីរបញ្ចកោណបាននិយាយកាលពីខែតុលាថា ប្រទេសចិន មានក្បាលគ្រាប់នុយក្លេអ៊ែរប្រតិបត្តិការច្រើនជាង ៥០០គ្រាប់ នៅក្នុងឃ្លាំងអាវុធរបស់ខ្លួន ហើយប្រហែលជានឹងមានក្បាលគ្រាប់ច្រើនជាង ១.០០០គ្រាប់ នៅឆ្នាំ២០៣០ ប៉ុន្តែទីក្រុងប៉េកាំង បានប្រកែកជាយូរមកហើយថា សហរដ្ឋអាមេរិកមានឃ្លាំងអាវុធធំជាងនេះរួចទៅហើយ។កិច្ចចរចាអាវុធរវាងប្រទេសទាំងពីរនេះ នឹងកើតឡើងមុនពេលលទ្ធភាពនៃកិច្ចប្រជុំរវាងប្រធានាធិបតីអាមេរិក លោក ចូ បៃដិន (Joe Biden) និងប្រធានាធិបតីចិន លោក ស៊ី ជីនពីង (Xi Jinping) នៅទីក្រុងសានហ្វ្រាន់ស៊ីស្កូ ក្នុងខែវិច្ឆិកា ខាងមុខនេះ ទោះបីជាមន្ត្រីរដ្ឋបាលជាន់ខ្ពស់ម្នាក់របស់លោក បៃដិន បាននិយាយកាលពីថ្ងៃអង្គារថា ព័ត៌មានលម្អិតសំខាន់ៗមិនទាន់ត្រូវបានគូសបញ្ជាក់នៅឡើយក៏ដោយ៕

អ្នកជម្លៀសខ្លួនដំបូងចាកចេញពីតំបន់ហ្កាហ្សា ខណៈអ៊ីស្រាអែលវាយប្រហារលើជំរំជនភៀសខ្លួនជាថ្មីទៀត

ក្រុមអ្នកស្រុកនិងជនបរទេសដែលរងរបួសបានរត់គេចពីតំបន់ហ្កាហ្សាទៅកាន់ប្រទេសអេហ្ស៊ីបកាលពីថ្ងៃពុធ ទី ១ ខែវិច្ឆិកា ជាការជម្លៀសដំបូងពីទឹកដីប៉ាឡេស្ទីនរងការហែកហួរដោយសង្រ្គាមដែលត្រូវបានវាយលុកដោយយន្តហោះចម្បាំងអ៊ីស្រាអែល សងសឹកចំពោះការវាយប្រហាររបស់ក្រុមហាម៉ាសមិនធ្លាប់មាន ចូលទីក្រុងជាច្រើនរបស់អ៊ីស្រាអែល ។ អ្នកជម្លៀសត្រូវបានដឹកតាមរថយន្តសង្គ្រោះតាមច្រកព្រំដែនរ៉ាហ្វា(Rafah)។នៅក្រោមកិច្ចព្រមព្រៀងដែលសម្រេចបានរវាងអេហ្ស៊ីប អ៊ីស្រាអែល និងក្រុមហាម៉ាស ជនបរទេសមួយចំនួន និងអ្នកដែលរងរបួសធ្ងន់ធ្ងរនឹងត្រូវបានអនុញ្ញាតឱ្យចាកចេញពីទឹកដីដែលត្រូវបានឡោមព័ទ្ធមួយនេះ។ អ្នកយកព័ត៌មាន AFP នៅឯព្រំដែនភាគខាងត្បូងតំបន់ហ្កាហ្សា បានឃើញរថយន្តគិលានសង្គ្រោះបន្ទាន់កំពុងបញ្ជូនអ្នករបួសទៅកាន់មន្ទីរពេទ្យចល័តរបស់អេហ្ស៊ីប រួមទាំងក្មេងប្រុសម្នាក់ដែលមានរុំបង់ក្នុងស្ថានភាពរបួសធ្ងន់នៅជុំវិញពោះរបស់គេ។ គ្រួសារទាំងអស់ ដែលព្យាយាមគ្រប់គ្រងទ្រព្យសម្បត្តិរបស់ខ្លួន បានប្រញាប់ប្រញាល់ឆ្លងកាត់ព្រំដែន មានការយាមកាមដ៏រឹងមាំឆ្ពោះទៅកាន់ប្រទេសអេហ្ស៊ីប ដែលគេរំពឹងថានឹងទទួលយកអ្នកកាន់លិខិតឆ្លងដែនបរទេសយ៉ាងហោចណាស់៤០០នាក់ និង៩០ នាក់ដែលរងរបួសធ្ងន់ធ្ងរបំផុតនិងមានជំងឺ។ ជំរំចាបាលីយ៉ា (Jabalia បានរងការវាយប្រហារលើកទីពីរក្នុងរយៈពេលជាច្រើនថ្ងៃកាលពីថ្ងៃពុធ ដោយរូបភាពីទូរទស្សន៍ AFPTV បង្ហាញពីការខូចខាតដ៏ធ្ងន់ធ្ងរ និងអ្នកជួយសង្គ្រោះ អ្នកកប់ក្រោមកម្ទេចថ្ម ប្រឡាក់ដោយឈាម។យោងតាមក្រសួងសុខាភិបាលគ្រប់គ្រងដោយក្រុមហាម៉ាស មនុស្សរាប់សិបនាក់បានស្លាប់និងរងរបួស ដែលបានកើតឡើងមួយថ្ងៃបន្ទាប់ពីការវាយប្រហារដោយយន្តហោះចម្បាំងរបស់អ៊ីស្រាអែលចំលើជំរំជនភៀសខ្លួននេះ ឆក់យកជីវិតមនុស្សយ៉ាងហោចណាស់ ៤៧ នាក់ ៕

ផ្សារមូលបត្រកម្ពុជា គ្រោងបង្កើតផលិតផលថ្មីៗបន្ថែមទៀត ដើម្បីទាក់ទាញវិនិយោគិន

ភ្នំពេញ៖ ក្នុងទិសដៅអភិវឌ្ឍន៍ទីផ្សារ និងលើកស្ទួយវិស័យមូលបត្រកម្ពុជា ផ្សារមូលបត្រកម្ពុជាគ្រោងបង្កើតផលិតផលហិរញ្ញវត្ថុថ្មីៗបន្ថែមទៀត ដើម្បីទាក់ទាញសាធារណជនឲ្យងាកមកចាប់អារម្មណ៍ធ្វើការវិនិយោគកាន់តែកើនឡើងថែមទៀត ជាពិសេសដើម្បីជំរុញឲ្យមានការបោះផ្សាយមូលបត្របំណុល តាមរយៈការលក់សញ្ញាបណ្ណបៃតង សញ្ញាបណ្ណសង្គម និងសញ្ញាបណ្ណនិរន្តរភាព។ឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃផ្សារមូលបត្រកម្ពុជា (CSX) បានមានប្រសាសន៍ថា នៅក្នុងប្រទេសដែលផ្សារមូលបត្រដែលមានការរីកចម្រើន ផ្សារមូលបត្រនឹងដើរតួនាទីសំខាន់ណាស់ក្នុងការផ្តល់ជាហិរញ្ញប្បដល់តួអង្គនានានៅក្នុងសេដ្ឋកិច្ច។ ឯកឧត្តម បានបន្តថា ប្រសិនបើវិនិយោគិន ចាប់ផ្ដើមចាប់អារម្មណ៍ និងចង់បានសេដ្ឋកិច្ចបៃតង ក្រុមហ៊ុនបោះផ្សាយត្រូវចាប់ផ្ដើមអនុវត្តតាម ដោយប្រកាន់យកនូវគោលនយោបាយនានា ដែលគាំទ្រដល់សេដ្ឋកិច្ចបៃតង។ ឯកឧត្តម បន្ថែមថា វិនិយោគិនបច្ចុប្បន្ន ព្រមទទួលយកអត្រាការប្រាក់ទាបជាងមុនបន្តិច ប្រសិនបើមូលបត្រដែលគេកំពុងពិចារណាវិនិយោគ ជាមូលបត្រដែលបោះផ្សាយដោយក្រុមហ៊ុនដែលប្រកាន់យកគោលការណ៍ ESG ច្បាស់លាស់។ បន្ថែមពីនេះទៀត ផ្សារមូលបត្រកម្ពុជា ក៏បានបង្កើតនូវកម្មវិធីថ្មីមួយទៀតមានឈ្មោះថា CSX Fun Run ដែលជាការផ្គួចផ្តើមឡើងក្នុងគោលបំណងលើកសេដ្ឋកិច្ចសង្គម និងបរិស្ថាន (ESGs) ផងដែរ បន្ទាប់ពីកម្មវិធី My First Stock។គិតមកដល់បច្ចុប្បន្ននេះ ផ្សារមូលបត្រកម្ពុជាមានក្រុមហ៊ុនចំនួន២០ បានចុះបញ្ជីលក់មូលបត្រ ក្នុងនោះក្រុមហ៊ុនចំនួន១១ បានចុះបញ្ជីលក់មូលបត្រកម្មសិទ្ធិ និងក្រុមហ៊ុនចំនួន៩ បានចុះបញ្ជីលក់មូលបត្របំណុល និងបានប្រមូលទុនពីសាធារណជនតាមរយៈផ្សារហ៊ុនសរុបចំនួនប្រមាណ ៣៣០លានដុល្លារអាមេរិក។ ដោយឡែក ចំនួនវិនិយោគិន គណនីជួញដូរមានការកើនឡើងប្រមាណជាង ៤៤,០០០គណនី៕

បណ្ដាញសង្គម

ព័ត៌មានថ្មីៗ

អង្គភាពប្រឆាំងអំពើពុករលួយបានបញ្ជូនសំណុំរឿង៤ករណីនៃឃុំព្រែកខ្សាច់ទៅសាលាដំបូងរាជធានីភ្នំពេញ

ក្រសួងការងារ និងសេវាកម្មវាយតម្លៃសកល AQA នៃចក្រភពអង់គ្លេស ចុះ MoU ពង្រឹងភាពជាដៃគូអភិវឌ្ឍជំនាញ និងការពង្រឹងគុណភាព TVET ដើម្បីលើកកម្ពស់ជំនាញកម្លាំងពលកម្មស្របតាមតម្រូវការឧស្សាហកម្ម និងបច្ចេកវិទ្យា

នេប៉ាល់ផ្អាកប្រតិបត្តិការស្វែងរក បន្ទាប់ពីមនុស្ស ១៦នាក់ បានប៉ើងទៅតាមបំណាក់ទឹកកក

ម្ចាស់សហគ្រាសផលិតសំបកវេចខ្ចប់ និងអ្នកវេចខ្ចប់ផលិតផល បានកំពុងរួមគ្នាបង្កើត និងគាំទ្រផលិតផលជាតិ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញចូលរួមពិធីចម្រើនព្រះបរិត្ត និងដាក់បិណ្ឌវេនទី៤ នៅវត្តឧណ្ណាលោម

កងកម្លាំងអាមេរិកចាកចេញពីអ៊ីរ៉ាក់ ក្រោយរយៈពេល ២ទសវត្សរ៍ ដោយបើកផ្លូវឱ្យអ៊ីរ៉ង់បង្កើនឥទ្ធិពល

ទ្រព្យសកម្មក្នុងវិស័យ អ.ស.ហ. កើនដល់ជាង ៩ ប៊ីលានដុល្លារ និងបានបង្កើតការងារ ១៦ ពាន់កន្លែង

អ៊ីរ៉ង់គំរាមវាយប្រហារហេដ្ឋារចនាសម្ព័ន្ធ ក្នុងតំបន់ ប្រសិនបើសន្តិសុខរបស់ខ្លួន មិនត្រូវបានធានា

សារព័ត៌មានរដ្ឋ៖ ការវាយប្រហារលើបំពង់បង្ហូរឧស្ម័ននៅភាគខាងកើតស៊ីរី បានធ្វើឲ្យការផ្គត់ផ្គង់ឧស្ម័នត្រូវផ្អាក

បេសកជនរុស្ស៊ី៖ អាល្លឺម៉ង់ និងសហភាពអឹរ៉ុប មិនមានតួនាទីក្នុងកិច្ចចរចាអំពីអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877