BTV NEWS

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

សន្តិសុខ និង សង្គម

ជនអន្តោប្រវេសន៍កាន់តែច្រើនប្រថុយជិវិតតាមទូកឈើដ៏គ្រោះថ្នាក់ក្នុងសមុទ្រមេឌីទែរ៉ាណេទៅកាន់អឺរ៉ុប

អេស្ប៉ាញ៖ សេវាសង្គ្រោះបន្ទាន់នៅលើកោះ កាណារី(Canary) របស់អេស្ប៉ាញ បាននិយាយកាលពីថ្ងៃពុធថា ជនអន្តោប្រវេសន៍ជាង៦៥០នាក់ បានទៅដល់កោះ អេល ហៀរ៉ូ (El Hierro) តាមទូកឈើធំៗចំនួន ៥គ្រឿង ក្នុងរយៈពេលពីរថ្ងៃកន្លងមកនេះ។ សេវាសង្គ្រោះបន្ទាន់របស់កោះនេះ បាននិយាយនៅលើបណ្ដាញសង្គម X ថា ទូកមួយក្នុងចំណោម ទូក៤គ្រឿងដែលបានទៅដល់កាលពីថ្ងៃអង្គារ បានដឹកជនអន្តោប្រវេសន៍ ចំនួន២៨០នាក់។ទីភ្នាក់ងារសារព័ត៌មានរដ្ឋ EFE បាននិយាយថា នេះជាចំនួនដ៏ច្រើនបំផុត នៅក្នុងទូកតែមួយ ចាប់តាំងពីក្រុមអ្នកជួញដូរមនុស្សបានចាប់ផ្តើមប្រើប្រាស់ផ្លូវកោះ Canary ជាប្រចាំកាលពីឆ្នាំ១៩៩៤ ។ ទូកបីផ្សេងទៀតដែលដឹកជនអន្តោប្រវេសន៍កជាង២០០នាក់ក៏បានទៅដល់ កោះ អេល ហៀរ៉ូ កាលពីថ្ងៃអង្គារ ផងដែរ ស្របពេលទូកមួយគ្រឿងទៀតដឹកជនអន្តោប្រវេសន៍ ចំនួន ១២៨ នាក់បានទៅដល់កាលពីថ្ងៃពុធ។ មានតែជនអន្តោប្រវេសន៍៥នាក់ប៉ុណ្ណោះដែលត្រូវការការព្យាបាល។ ក្រុមជនអន្តោប្រវេសន៍រាប់រយនាក់ផ្សេងទៀតត្រូវស្ទាក់ចាប់បានអំឡុងព្យាយាមពទៅដល់កោះផ្សេងទៀតនៅក្នុងប្រជុំកោះ ដែលមានទីតាំងនៅឆ្នេរសមុទ្រភាគពាយ័ព្យនៃទ្វីបអាហ្រ្វិក និងកន្លែងផ្សេងទៀតនៅលើដីគោករបស់ប្រទេសអេស្ប៉ាញក្នុងរយៈពេលប៉ុន្មានថ្ងៃថ្មីៗនេះ។ ក្រុមជនអន្តោប្រវេសន៍ដែលបានទៅដល់តាមទូកទៅកាន់ប្រទេសអេស្ប៉ាញ បានចំណាយពេលរហូតដល់ ៧២ ម៉ោងក្នុងការឃុំឃាំងរបស់កងកម្លាំងនគរបាល ដើម្បីកំណត់អត្តសញ្ញាណ បន្ទាប់មកត្រូវបានបញ្ជូនទៅកាន់កន្លែងសម្រាក ឬកន្លែងឃុំឃាំងផ្សេងៗ អាស្រ័យលើករណីរបស់ពួកគេ។ ទោះបីជាអ្នកខ្លះត្រូវបាននិរទេសឲ្យត្រឡប់ទៅកាន់ប្រទេសកំណើតរបស់ខ្លួនវិញក៏ដោយ ភាគច្រើនបានដាក់លិខិតសុំសិទ្ធិជ្រកកោន ហើយត្រូវបានគេនាំទៅកាន់ដីគោកប្រទេសអេស្ប៉ាញ ដើម្បីដាក់ញត្តិរបស់ពួកគេក្នុងការសិក្សា។យោងតាមទិន្នន័យផ្លូវការ នៅក្នុងខែមករាដល់ខែសីហា ជនអន្តោប្រវេសន៍ ចំនួន ២១. ៧៨០នាក់ ទៅដល់ប្រទេសអេស្ប៉ាញ ជិត ១៥ភាគរយ ច្រើនជាងក្នុងរយៈពេលដូចគ្នានៃឆ្នាំ២០២២។ ខែកញ្ញា គឺជាអំឡុងពេលដ៏មមាញឹកបំផុត ក្នុងចំណោមរដូវកាលឆ្លងដែនជាច្រើន ក្នុងការព្យាយាមឆ្លងសមុទ្រទាំងអស់ ដោយសារទឹកមានភាពស្ងប់ស្ងាត់ជាងពេលផ្សេងៗ៕

កងទ័ពអ៊ីរ៉ង់ ចាប់ផ្តើមសមយុទ្ធយានដ្រូនទ្រង់ទ្រាយធំនៅទូទាំងប្រទេស

កងទ័ពប្រទេសអ៊ីរ៉ង់ បានចាប់ផ្តើមសមយុទ្ធយានដ្រូនរួមគ្នាទ្រង់ទ្រាយធំនៅទូទាំងប្រទេស កាលពីថ្ងៃអង្គារ ក្នុងបំណងបង្កើនការត្រៀមប្រយុទ្ធនៃយានដ្រូន UAVs នៅក្នុងស្ថានភាពប្រយុទ្ធពិតប្រាកដ។សមយុទ្ធរយៈពេលពីរថ្ងៃ មានយានដ្រូនដែលផលិតក្នុងស្រុកជិត ២០០គ្រឿងរបស់ប្រទេសអ៊ីរ៉ង់ មកពីកងកម្លាំងទ័ពជើងគោក ទ័ពអាកាស កងទ័ពជើងទឹក និងអង្គភាពការពារដែនអាកាស ដើម្បីវាយតម្លៃសមត្ថភាពប្រយុទ្ធរបស់យានដ្រូន និងបង្កើនការត្រៀមប្រយុទ្ធរបស់កងកម្លាំងប្រដាប់អាវុធ ក្នុងការឆ្លើយតបទៅនឹងការគំរាមកំហែងដ៏មានសក្តានុពល។នៅថ្ងៃដំបូងនៃសមយុទ្ធនេះ យានដ្រូនល្បាតនិងឈ្លបយកការណ៍របស់កងទ័ព បានធ្វើប្រតិបត្តិការឈ្លបយកការណ៍នៅលើដី សមុទ្រ និងនៅជិតព្រំដែនអាកាស ខណៈគំរូនៃយានដ្រូនវាយប្រហារផ្សេងៗ បានបំផ្លាញគោលដៅដែលបានកំណត់ដោយជោគជ័យ។អាជ្ញាធរយោធាប្រទេសអ៊ីរ៉ង់ បានបញ្ចេញវីដេអូក្នុងអំឡុងពេលធ្វើសមយុទ្ធដែលបង្ហាញពីការដាក់ពង្រាយយានដ្រូនសម្រាប់ការតាមដាននាវាចម្បាំងសហរដ្ឋអាមេរិកនៅភាគខាងជើងមហាសមុទ្រឥណ្ឌា។ កងទ័ពប្រទេសអ៊ីរ៉ង់ បានបញ្ជាក់ពីសមត្ថភាពរបស់ពួកគេ ក្នុងការឈ្លបយកការណ៍គ្រប់ពេល និងការរកឃើញគោលដៅនាវាអាមេរិក។

មានជនរងគ្រោះជាច្រើន ក្នុងករណីបាញ់ប្រហារនៅសាកលវិទ្យាល័យ មួយរបស់សហរដ្ឋអាមេរិក

នគរបាលទីក្រុងបាល់ទីម័រ របស់សហរដ្ឋអាមេរិក កំពុងធ្វើប្រតិបត្តិការឆ្លើយតបទៅនឹងករណី «អ្នកបាញ់ប្រហារសកម្ម» ដែលពាក់ព័ន្ធនឹង «ជនរងគ្រោះជាច្រើន» ប៉ុន្តែមិនបានចែករំលែកថា តើមានមនុស្សប៉ុន្មាននាក់បានរងរបួសនោះទេ នៅជិតសាកលវិទ្យាល័យម័រហ្គេន ស្តេត (UMS) ក្នុងរដ្ឋម៉ារីឡែន (Maryland) កាលពីយប់ថ្ងៃអង្គារ (៣ តុលា)។នៅពីម៉ោង១០យប់ កាលពីយប់ថ្ងៃអង្គារ នគរបាលក្រុងបាល់ទីម័រ បាននិយាយនៅលើបណ្ដាញសង្គម X ថា ពួកគេបានឆ្លើយតបនឹងស្ថានភាពអ្នកបាញ់ប្រហារយ៉ាងសកម្មនៅអន្តេវាសិកដ្ឋានមួយកន្លែង របស់សាកលវិទ្យាល័យម័រហ្គេន ក្នុងប្លុកទី១៧០០ នៃផ្លូវអាហ្គូនេ ដ្រាយ (Argonne Drive)។ សូមបញ្ជាក់ថា សាកលវិទ្យាល័យ MSU គឺជាសាកលវិទ្យាល័យជនជាតិស្បែកខ្មៅជាប្រវត្តិសាស្ត្រ ដែលមាននិស្សិតជាង៩.០០០នាក់ បានចុះឈ្មោះចូលរៀននៅទីនោះ។នៅក្នុងការជូនដំណឹងនៅលើគេហទំព័ររបស់ខ្លួន សាកលវិទ្យាល័យ MSU បាននិយាយថា «ការស៊ើបអង្កេតសកម្មមួយ កំពុងដំណើរការទាក់ទងនឹងរបាយការណ៍នៃការបាញ់ប្រហារបានកើតឡើងនៅក្នុង ឬជិតបរិវេណសាលា»។ ក្រុមអនុវត្តច្បាប់បានលើកទឹកចិត្តសមាជិកគ្រួសារដែលពាក់ព័ន្ធ ឱ្យនៅឆ្ងាយពីបរិវេណសាលា ដោយនិយាយថាពួកគេអាចជួបជុំគ្នានៅទីតាំងសុវត្ថិភាពក្បែរនោះ ដើម្បីស្វែងយល់បន្ថែមអំពីឧបទ្ទវហេតុនេះ៕

ទីក្រុងជាច្រើនក្នុងប្រទេសអូស្ត្រាលី កំពុងទប់ទល់នឹងចំហេះព្រៃ ខណៈរងការគំរាមកំហែងពីទឹកជំនន់

រយៈពេលប៉ុន្មានម៉ោង បន្ទាប់ពីទីក្រុងជាច្រើនក្នុងប្រទេសអូស្រ្តាលីត្រូវបានគំរាមកំហែងដោយចំហេះព្រៃ ទីក្រុងទាំងនោះក៏កំពុងរៀបចំទប់ទល់សម្រាប់ទឹកជំនន់ក្នុងពេលជាមួយគ្នានេះផងដែរ។ ចំហេះព្រៃបាននឹងកំពុងឆេះនៅក្នុងតំបន់ Gippsland នៃរដ្ឋវីកតូរៀ និងតំបន់ឆ្នេរភាគខាងត្បូងរបស់រដ្ឋ New South Wales ក្នុងសប្តាហ៍នេះ ហើយតំបន់ទាំងពីរនោះក៏ធ្លាប់រងការប៉ះពាល់យ៉ាងខ្លាំងដោយចំហេះព្រៃរដូវក្ដៅ របស់ប្រទេសអូស្ត្រាលីកាលពី ៤ឆ្នាំមុនផងដែរ។ភ្លៀងកំពុងធ្លាក់ដល់តំបន់ចំហេះព្រៃ ដោយបានផ្តល់ការសង្គ្រោះពីអណ្ដាតភ្លើងខ្លះ ប៉ុន្តែវាក៏បានបង្កការព្រមានអំពីទឹកជំនន់ផងដែរ។ ប្រទេសនេះបានរងការវាយប្រហារពីគ្រោះមហន្តរាយមួយ ទៅគ្រោះមហន្តរាយមួយទៀត ក្នុងរយៈពេលប៉ុន្មានឆ្នាំចុងក្រោយនេះ ដោយសារឥទ្ធិពលនៃបម្រែបម្រួលអាកាសធាតុ។ ចំហេះព្រៃរាប់សិបកន្លែង បាននឹងកំពុងឆេះនៅទូទាំងប្រទេសអូស្ត្រាលី ខណៈដែលចំហេះទាំងនោះឈានចូលទៅក្នុងអ្វីដែលក្រុមអាជ្ញាធររំពឹងថា ជារដូវកាលចំហេះដ៏គ្រោះថ្នាក់បំផុតក្នុងរយៈពេលជាច្រើនឆ្នាំមកនេះ។ក៏ប៉ុន្តែអាកាសធាតុត្រជាក់ដ៏ធំមួយនាពេលខាងមុខ កំពុងនាំមកនូវភ្លៀងធ្លាក់ខ្លាំងដល់ភាគអាគ្នេយ៍នៃប្រទេសអូស្ត្រាលីនៅថ្ងៃពុធនេះ ដោយជំរុញឱ្យមានការព្រមានពីក្រុមអាជ្ញាធរឱ្យត្រៀមលក្ខណៈសម្រាប់ទឹកជំនន់ដ៏គំហុកដែលអាចកើតមាន។ ទីប្រជុំជនជាច្រើនក្នុងតំបន់ Gippsland ដែលរងការគំរាមកំហែងដោយចំហេះ ក៏កំពុងប្រឈមនឹងហានិភ័យនៃការវាយប្រហារដោយទឹកជំនន់ផងដែរ៕

ក្រុមបាតុករប្រទេសហ្គាណា តវ៉ាទាមទារឱ្យទេសាភិបាលធនាគារកណ្តាលលាលែងពីតំណែង

មនុស្សរាប់ពាន់នាក់បានដើរដង្ហែតាមផ្លូវនៃរដ្ឋធានី អាក្រា (Accra) របស់ប្រទេសហ្គាណា កាលពីថ្ងៃអង្គារ (៣ តុលា) ដោយទាមទារឱ្យដកទេសាភិបាលធនាគារកណ្តាលចេញពីតំណែង សម្រាប់អ្វីដែលពួកគេនិយាយថា ជាការគ្រប់គ្រងមិនត្រឹមត្រូវនៃសេដ្ឋកិច្ចក្នុងអំឡុងពេលវិបត្តិបំណុលដ៏អាក្រក់បំផុតរបស់ប្រទេសក្នុងមួយជំនាន់។បាតុកម្មនេះ គឺបង្ហាញពីការខកចិត្តចុងក្រោយបំផុត ប្រឆាំងនឹងការកើនឡើងនៃថ្លៃចំណាយសម្រាប់ការរស់នៅប្រចាំថ្ងៃ ភាពអត់ការងារធ្វើ និងការលំបាកក្នុងប្រទេស ដែលមានសេដ្ឋកិច្ចធំជាងគេមួយ នៅអាហ្វ្រិកខាងលិចនេះ។ ការតវ៉ារយៈពេលច្រើនថ្ងៃស្រដៀងគ្នានេះ បានធ្វើឡើងទូទាំងរដ្ឋធានីកាលពីខែមុន។ហ្វូងមនុស្សបានដើរដង្ហែទៅកាន់ការិយាល័យកណ្តាលរបស់ធនាគារកណ្តាល ក្រោមការឃ្លាំមើលរបស់នគរបាលកុបកម្ម ដោយបានអំពាវនាវឱ្យទេសាភិបាលធនាគារកណ្ដាល លោក Ernest Addison និងអនុទេសាភិបាលទាំងពីររបស់លោក លាលែងពីតំណែង។ មនុស្សជាច្រើនស្លៀកពាក់ពណ៌ក្រហម និងខ្មៅក្នុងការតវ៉ានោះ ដែលជាធម្មតាជាសម្លៀកបំពាក់ក្នុងពិធីបុណ្យសព។ធនាគារកណ្តាលរបស់ប្រទេសហ្គាណាក្នុងខែកក្កដា បានប្រកាសពីការខាតបង់ចំនួន ៦០,៨ពាន់លានរូបិយប័ណ្ណសេឌីរបស់ហ្គាណា ពោលគឺស្មើនឹង៥,៣ពាន់លានដុល្លារអាមេរិក សម្រាប់ឆ្នាំ២០២២ ដែលភាគច្រើនដោយសារតែការរៀបចំរចនាសម្ព័ន្ធបំណុល។ ប្រទេសហ្គាណា ដែលផលិតមាស ប្រេង និងកាកាវ បានចុះកិច្ចព្រមព្រៀងជាមួយមូលនិធិរូបិយវត្ថុអន្តរជាតិ សម្រាប់កម្មវិធីកម្ចីរយៈពេលបីឆ្នាំចំនួន៣ពាន់លានដុល្លារ ដើម្បីជួយសម្រួលស្ថានការណ៍សេដ្ឋកិច្ច ហើយការរៀបចំរចនាសម្ព័ន្ធបំណុល គឺជាលក្ខខណ្ឌមួយក្នុងការទទួលបានមូលនិធិទាំងនោះផងដែរ៕

គ្រោះរាំងស្ងួតធ្ងន់ធ្ងរនៅតំបន់អាម៉ាហ្សូន បង្កជាវិបត្តិស្បៀងអាហារ និងទឹកនៅភាគខាងលិចប្រទេសប្រេស៊ីល

គ្រោះរាំងស្ងួតដ៏គ្រោះថ្នាក់ ដែលកំពុងវាយលុកពាសពេញតំបន់ព្រៃជប់ភ្លៀងអាម៉ាហ្សូនក្នុងប្រទេសប្រេស៊ីល បានបណ្តាលឱ្យមានការរំខានយ៉ាងធ្ងន់ធ្ងរនៅក្នុងប្រភពទ្រទ្រង់ជីវិតសំខាន់ៗដូចជាស្បៀងអាហារ និងទឹកផឹក ដែលកាន់តែអាក្រក់ទៅៗ ដោយកម្រិតទឹកទាបនៅក្នុងទន្លេ ដែលបម្រើជាផ្លូវដឹកជញ្ជូនដ៏សំខាន់នៅក្នុងរដ្ឋ អាម៉ាហ្សូណាស។រដ្ឋអាម៉ាហ្សូណាស ដ៏ធំបំផុតក្នុងប្រទេសប្រេស៊ីលមួយនេះ គ្របដណ្តប់ផ្នែកដ៏ច្រើននៃព្រៃជប់ភ្លៀង និងមានប្រជាជនរស់នៅប្រហែល ៤លាននាក់ ដែលភាគច្រើនជាជនជាតិដើមភាគតិច។ ដោយសារគ្រោះរាំងស្ងួតអូសបន្លាយរយៈពេលយូរ រដ្ឋបានប្រកាសភាពអាសន្នផ្នែកបរិស្ថាន និងអនុវត្តក្រុមការងារដើម្បីជួយអ្នករងផលប៉ះពាល់ ដោយសារកង្វះខាតស្បៀងអាហារ និងទឹក បន្តកើតមានជាបញ្ហាប្រឈមដ៏សំខាន់។គ្រោះរាំងស្ងួតនេះ ត្រូវបានផ្សារភ្ជាប់ទៅនឹងបញ្ហាអាកាសធាតុអ៊ែល នីញ៉ូ ដែលនាំឱ្យមានការកាត់បន្ថយនៃការបង្កើតពពក និងភ្លៀងធ្លាក់តិចជាបន្តបន្ទាប់។ យោងតាមអ្នកជំនាញបានឱ្យដឹងថា នៅដើមឆ្នាំនេះ ភ្លៀងធ្លាក់ដ៏ខ្លាំងបានវាយប្រហារប្រទេសប្រេស៊ីល អមដោយភាពស្ងួតហួតហែងនាពេលបច្ចុប្បន្ន ដែលឆ្លុះបញ្ចាំងពីគំរូអាកាសធាតុដ៏អាក្រក់ ទាក់ទងនឹងការឡើងកម្ដៅផែនដីផងដែរ៕

នាយកខណ្ឌរដ្ឋបាលជលផលខេត្តកណ្ដាល ព្រមានចាត់វិធានការក្តៅចំពោះជនប្រព្រឹត្តបទល្មើសនេសាទខុសច្បាប់

កណ្ដាល៖ លោក ហេង សុភារិទ្ធ នាយខណ្ឌរដ្ឋបាលជលផលខេត្តកណ្តាល បានព្រមានចាត់វិធានការក្តៅ ដោយគ្មានការលើកលែងចំពោះជនប្រព្រឹត្តបទល្មើសនេសាទដោយខុសច្បាប់ ហើយបានអំពាវនាវដល់បងប្អូនប្រជានេសាទទាំងអស់ ដែលមានឧបករណ៍ខុសច្បាប់ សូមប្រញាប់ប្រគល់ជូនដល់សមត្ថកិច្ចជាបន្ទាន់ផងដែរ។ថ្លែងប្រាប់ទូរទស្សន៍BTVក្រោយបញ្ចប់កម្មវិធីផ្សព្វផ្សាយច្បាប់ ស្តីពីជលផល និងយុទ្ធនាការនៃ ការបង្ក្រាបបទល្មើសនេសាទ នាព្រឹកថ្ងៃទី៤ ខែតុលា ឆ្នាំ២០២៣នេះ លោក ហេង សុភារិទ្ធ បានលើកឡើងថា ចាប់ពីពេលនេះតទៅ ខណ្ឌរដ្ឋបាលជលផលខេត្តកណ្តាល នឹងធ្វើយុទ្ធនាការចុះបង្រ្កាបបទល្មើសនេសាទជាប្រចាំគ្រប់ទីកន្លែងទាំងអស់ដែលស្ថិតនៅក្នុងខេត្តកណ្តាល ហើយប្រសិនបើរកឃើញជនណាដែលប្រព្រឹត្តខុស នឹងច្បាប់ស្តីពីជលផលនេះ នឹងចាត់វិធានការទៅតាមច្បាប់ជាធរមានផងដែរ ខណៈអាជ្ញាធរមានការអំពាវនាវហើយនៅតែបន្តប្រព្រឹត្តនោះ។ជាមួយគ្នានោះដែរ លោក ហេង សុភារិទ្ធ ក៏បានរំលឹក និងអំពាវនាវដល់បងប្អូនប្រជានេសាទទាំងអស់ ដែលមានឧបករណ៍ឆក់ ឬឧបករណ៍ផ្សេងៗទៀត ដែលល្មើសនឹងច្បាប់របស់ជលផល គប្បីប្រគល់ជូនដល់អាជ្ញាធរយកទៅកម្ទេចចោលផងដែរ ដើម្បីធ្វើយ៉ាងណាលុបបំបាត់ការនេសាទខុសច្បាប់ជាពិសេសការឆក់នេះឲ្យអស់ ដើម្បីបង្កើនផលត្រីឡើងវិញ ខណៈបច្ចុប្បនផលត្រីកំពុងតែធ្លាក់ចុះដោយសារតែការឆក់ និងរាយស្បៃមុងជាដើមនោះ។សូមបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះខណ្ឌរដ្ឋបាលជលផលខេត្តកណ្តាល ដឹកនាំដោយលោក ហេង សុភារិទ្ធី បានចុះបង្រ្កាបបទល្មើសនេសាទខុសច្បាប់ជាបន្តបន្ទាប់នៅ ស្រុកពញាឮ ខេត្តកណ្តាល។ ក្រោយធ្វើការចុះបង្រ្កាប ដោយកំលាំងចំរុះបានរុះរើសារយកបទល្មើសនេសាទ ជាច្រើនដូចជា លូស្បៃមុង, របាំងស្បៃមុង, បង្គាល និងឧបករណ៍ខុសច្បាប់មួយចំនួនទៀត ដើម្បីយកទៅដុតបំផ្លាញចោលនៅនឹងកន្លែងកើតហេតុផងដែរ៕អត្ថបទបាន ចក់

ជនសង្ស័យបាញ់ប្រហារនៅផ្សារទំនើបថៃ បានកែកាំភ្លើងតម្រូវតាមការបាញ់លេងនៅទីលំហ

មន្ត្រីនគរបាលជាន់ខ្ពស់ម្នាក់ បាននិយាយនៅថ្ងៃពុធ ទី៤ ខែតុលានេះថា ក្មេងជំទង់ម្នាក់ដែលសង្ស័យថាបានសម្លាប់ជនបរទេសពីរនាក់ និងធ្វើឲ្យរងរបួសមនុស្សប្រាំនាក់ផ្សេងទៀត ក្នុងការបាញ់ប្រហារនៅផ្សារទំនើបប្រទេសថៃ បានកែកាំភ្លើងខ្លីតម្រូវតាមការបាញ់លេងនៅទីលំហ។ ភាពវឹកវរ បានផ្ទុះឡើងនៅផ្សារទំនើប ស្យាម ប៉ារ៉ាហ្គន (Siam Paragon) ក្នុងទីក្រុងបាងកក ជិតដល់ម៉ោងមមាញឹកកាលពីថ្ងៃអង្គារ ដោយមនុស្សរាប់រយនាក់បានរត់ភៀសខ្លួន ខណៈការបាញ់កាំភ្លើងបានផ្ទុះឡើង។ អ្នកស្លាប់គឺជាស្ត្រីពីរនាក់ មកពីប្រទេសចិន និងសហភាពមីយ៉ាន់ម៉ា។ ជនសង្ស័យជាខ្មាន់កាំភ្លើងអាយុ ១៤ឆ្នាំ ត្រូវបានចាប់ខ្លួនកាលពីល្ងាចថ្ងៃអង្គារ។ ឧត្តមសេនីយឯក Samran Nuanma បាននិយាយថា ខ្មាន់កាំភ្លើងបានកែកាំភ្លើងដែលតម្រូវតាមការបាញ់លេងនៅទីលំហ ដើម្បីអាចប្រើប្រាស់គ្រាប់រំសេវបាន។ នគរបាលនិយាយថា ជនសង្ស័យបានទទួលការព្យាបាលផ្លូវចិត្ត ហើយមិនបានលេបថ្នាំនោះទេ។ លោក Torsak Sukvimol ស្នងការនគរបាលជាតិបាននិយាយនៅក្នុងបទសម្ភាសន៍តាមទូរទស្សន៍នៅថ្ងៃពុធនេះថា ជាធម្មតាយើងមិនឱ្យជនសង្ស័យនៅរស់នោះទេ។ ករណីនេះគឺជាករណីសិក្សាដ៏សំខាន់មួយសម្រាប់យើង។ យើងត្រូវការព័ត៌មានពីយុវជន។ឧបទ្ទវហេតុនៅផ្សារទំនើបដ៏ល្បីល្បាញបំផុតរបស់ប្រទេសថៃ អាចជាការប៉ះទង្គិចដល់កិច្ចខិតខំប្រឹងប្រែងរបស់ប្រទេសនេះ ក្នុងការទ្រទ្រង់សេដ្ឋកិច្ចដែលកំពុងធ្លាក់ចុះ ដោយការជំរុញវិស័យទេសចរណ៍ដ៏សំខាន់របស់ខ្លួន។

អ្នកនេសាទហ្វីលីពីន៣នាក់ស្លាប់ បន្ទាប់ពីការបុកទម្លាយដោយទូកមិនស្គាល់អត្តសញ្ញាណ នៅសមុទ្រចិនខាងត្បូង

ឆ្មាំល្បាតឆ្នេរប្រទេសហ្វីលីពីន និយាយនៅថ្ងៃពុធនេះថា អ្នកនេសាទហ្វីលីពិន៣នាក់ បានស្លាប់ បន្ទាប់ពីទូករបស់ពួកគេ ត្រូវបានបុកទម្លាយដោយទូកពាណិជ្ជកម្មបរទេសមិនស្គាល់អត្តសញ្ញាណ ខណៈកំពុងឆ្លងកាត់សមុទ្រចិនខាងត្បូង។ សេចក្តីថ្លែងការណ៍និយាយថា ឧបទ្ទវហេតុនេះ បានកើតឡើង កាលពីថ្ងៃចន្ទ ខណៈទូកកំពុងឆ្លងកាត់ដែនទឹក មានចម្ងាយ១៥៧គីឡូម៉ែត្រភាគពាយព្យ តំបន់កោះប៉ះប្រះទឹក ស្កាប្រូ (Scarborough Shoal) ដែលមានជម្លោះ។ សមាជិកនាវិក១១នាក់ ត្រូវបានជួយសង្គ្រោះបន្ទាប់ពីទូកបានលិច។ប្រធានាធិបតីលោក Ferdinand Marcos Jr បាននិយាយថា ប្រទេសហ្វីលីពីន កំពុងស៊ើបអង្កេតពីឧបទ្ទវហេតុនេះ ដើម្បីស្វែងយល់ពីអ្វីដែលបណ្តាលឲ្យមានអ្នកស្លាប់។ លោកបាននិយាយនៅលើបណ្តាញផ្សព្វផ្សាយសង្គមថា យើងធានាដល់ជនរងគ្រោះ ក្រុមគ្រួសាររបស់ពួកគេ និងមនុស្សគ្រប់គ្នាថា យើងនឹងប្រើប្រាស់គ្រប់កិច្ចប្រឹងប្រែងដើម្បីឲ្យអ្នកទាំងនោះមកទទួលខុសត្រូវ ដែលបានធ្វើឲ្យមានឧបទ្ទវហេតុលើដែនសមុទ្រដ៏គួឲ្យសោកស្តាយនេះ។ភាពតានតឹងជុំវិញដែនទឹកទាំងនេះ បានផ្ទុះឡើងកាលពីពេលថ្មីៗនេះ បន្ទាប់ពីប្រទេសហ្វីលីពីន និយាយថាខ្លួនបានដកចេញរបាំងពោងបាល់ប្រវែង៣០០ម៉ែត្រ ដែលបង្កើតឡើងដោយឆ្មាំឆ្នេររបស់ប្រទេសចិន នៅជិតតំបន់កោះប៉ះប្រះទឹកស្កាប្រូ ជាចំណុចនេសាទចម្បាង និងជាផ្នែកសំខាន់នៅដែនសមុទ្រដែលមានការប្រឈមបំផុតនៅអាស៊ី។

អ្នកជំងឺ២៤នាក់ រួមមានកុមារ១២នាក់ស្លាប់ រយៈពេលតែ១ថ្ងៃ នៅមន្ទីរពេទ្យប្រទេសឥណ្ឌា

កុមារ១២នាក់ បានស្លាប់ក្នុងរយៈពេលតែមួយថ្ងៃ នៅមន្ទីរពេទ្យនៅក្នុងរដ្ឋ Maharashtra ប្រទេសឥណ្ឌា កាលពីថ្ងៃអាទិត្យ បង្កឲ្យមានព្យុះនយោបាយរយៈពេលច្រើនថ្ងៃក្រោយមក។ យោងតាមមន្ត្រីមន្ទីរពេទ្យ និងប្រព័ន្ធផ្សព្វផ្សាយក្នុងតំបន់បានឲ្យដឹងថា អ្នកស្លាប់មានចំនួន២៤នាក់ នៅមន្ទីរពេទ្យរដ្ឋាភិបាល Shankarrao Chavan ក្នុងស្រុក Nanded ។ អ្នកនយោបាយគណបក្សប្រឆាំង បានចោទប្រកាន់រដ្ឋាភិបាលតំបន់ និងអាជ្ញាធរមន្ទីរពេទ្យ ពីការមិនយកចិត្តទុកដាក់កាលពីថ្ងៃអង្គារ។ កូនរបស់លោក Ramesh Chokovasadavarti បានស្លាប់នៅមន្ទីរពេទ្យ។ លោកនិយាយថា យើងត្រូវបានគេប្រាប់ថាកូនរបស់យើង មានដំបៅរលួយហើយត្រូវការវះកាត់ដើម្បីកុំឲ្យឆ្លង។ ពួកគេបានសុំការព្រមព្រៀងពីយើង ហើយយើងភ័យខ្លាចនិងបានចុះហត្ថលេខាលើពាក្យសុំការយល់ព្រម ហើយក្រោយមកសាកសពអ្នកស្លាប់ជាកូនរបស់លោក បានយកចេញមក។ប្រធាននៅមន្ទីរពេទ្យ ពុំបានឆ្លើយតបជាមួយសារព័ត៌មានរ៉យទ័រសម្រាប់ការសុំអត្ថាធិប្បាយនោះទេលើការចោទប្រកាន់នេះ ឬការចោទប្រកាន់ប្រឆាំងពីការធ្វើប្រហែស។ ប៉ុន្តែនិយាយទៅកាន់ ទីភ្នាក់ងារសារព័ត៌មាន ANI កាលពីព្រឹកថ្ងៃអង្គារ លោកបាននិយាយថា អ្នកជំងឺពេញវ័យម្នាក់ បានស្លាប់ដោយសារមានជំងឺច្រើន រួមទាំងជំងឺទឹកនោមផ្អែម ជំងឺថ្លើម និងតម្រងនោម។រដ្ឋាភិបាលរដ្ឋ គ្រប់គ្រងដោយគណបក្សរបស់នាយករដ្ឋមន្ត្រីលោក Narendra Modi និងសម្ព័ន្ធមិត្ត បានចាប់ផ្តើមការស៊ើបអង្កេតលើករណីអ្នកស្លាប់។ភាពចលាចល បានបញ្ជាក់ពីភាពច្របូកច្របល់កាន់តែខ្លាំង នៅមន្ទីរពេទ្យរដ្ឋាភិបាល ក្នុងប្រទេសដែលមានប្រជាជនច្រើនបំផុតលើពិភពលោក។ ប្រព័ន្ធថែទាំសុខភាពសាធារណៈរបស់ប្រទេសឥណ្ឌាគ្មានការបំពាក់សម្ភារៈ និងត្រូវបានញាំញីដោយកង្វះបុគ្គលិកនិងសម្ភារៈ។

បណ្ដាញសង្គម

ព័ត៌មានថ្មីៗ

ក្រសួងបរិស្ថាន និងក្រសួងមហាផ្ទៃ ជំរុញភាពស្អាតនៅតាមពន្ធនាគារនៅទូទាំងប្រទេស

នាយករដ្ឋមន្រ្តីកាតាថ្កោលទោសអំពើឃោឃៅរបស់អ៊ីស្រាអែលនៅតំបន់ហ្កាហ្សា

គ្រូពេទ្យ៖ ការវាយប្រហាររបស់អ៊ីស្រាអែល នៅតំបន់ហ្កាហ្សា សម្លាប់មនុស្សយ៉ាងតិច ៥នាក់

តំណាងអចិន្ត្រៃយ៍កម្ពុជា ប្រចាំ UN ស្នើអ្នករាយការណ៍ពិសេសស្តីពីស្ថានភាពសិទ្ធិមនុស្សបន្តយកចិត្តទុកដាក់ចំពោះប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ

ជើងហោះហើរទៅកាន់អ៊ីស្រាអែល បង្វែរទិសដៅហោះហើរទៅកាន់អារ៉ាប៊ីសាអ៊ូឌីត ក្រោយការប្រកាសអាសន្ន

នាយករដ្ឋមន្ត្រីអ៊ីរ៉ាក់សាទរយុគសម័យ «អធិបតេយ្យភាព» ថ្មី ក្រោយកម្លាំងចម្រុះដឹកនាំដោយអាមេរិកចាកចេញ

KCNA៖ កូរ៉េខាងជើង និងវៀតណាមកំពុងស្វែងរកការពង្រីកកិច្ចសហប្រតិបត្តិការយោធា

ប្រធានាធិបតីអ៊ីរ៉ង់បង្ហាញឆន្ទៈពង្រឹងទំនាក់ទំនងជាមួយអ៊ូសបេគីស្ថាន និងអាស៊ែរបៃហ្សង់

រុស្ស៊ីចេញការព្រមាននុយក្លេអ៊ែរទៅកាន់អង្គការណាតូ ខណៈភាពតានតឹងកើនឡើង នៅតំបន់បាល់ទិក

ការបោកបក់ដល់ដីគោកជាលើកទី ២របស់ព្យុះសង្ឃរា Polo បង្កការជន់លិចនៅតំបន់ភាគខាងជើងម៉ិកស៊ិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877