BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

ចិន ជំរុញឲ្យអាមេរិក លុបចោលកិច្ចព្រមព្រៀងលក់អាវុធឲ្យកោះវ៉ាត់ជាបន្ទាន់

ចិន៖ អ្នកនាំពាក្យក្រសួងការបរទេសចិនបាននិយាយកាលពីថ្ងៃព្រហស្បតិ៍ថា ប្រទេសចិនមិនពេញចិត្តយ៉ាងខ្លាំង និងប្រឆាំងដាច់ខាតចំពោះគម្រោងលក់អាវុធរបស់សហរដ្ឋអាមេរិកទៅឲ្យកោះតៃវ៉ាន់ ហើយជំរុញឲ្យសហរដ្ឋអាមេរិកលុបចោលការសម្រេចចិត្តរបស់ខ្លួនជាបន្ទាន់។ យោងតាមរបាយការណ៍ប្រព័ន្ធផ្សព្វផ្សាយ ក្រសួងការបរទេសសហរដ្ឋអាមេរិក បានអនុម័តការលក់ប្រព័ន្ធស្រាវជ្រាវ និងតាមដានសម្រាប់យន្តហោះចម្បាំង F-16 និងឧបករណ៍ផ្សេងៗទៀត ទៅឲ្យកោះតៃវ៉ាន់ក្នុងទំហំទឹកប្រាក់ ៥០០លានដុល្លារអាមេរិក ។អ្នកនាំពាក្យក្រសួងការបរទេសចិន លោក វ៉ាងវិនប៊ីន (Wang Wenbin) បាននិយាយថា ការលក់គ្រឿងសព្វាវុធរបស់សហរដ្ឋអាមេរិកទៅកាន់តំបន់តៃវ៉ាន់របស់ប្រទេសចិន បានបំពានយ៉ាងធ្ងន់ធ្ងរលើគោលការណ៍ចិនតែមួយ និងខ្លឹមសារដែលបានចែងនៃសេចក្តីប្រកាសរួមចំនួនបីរវាងចិន-អាមេរិក ជាពិសេសសេចក្តីថ្លែងការណ៍ថ្ងៃទី១៧ ខែសីហា ឆ្នាំ ១៩៨២ ។ ការលក់នេះក៏បំពានលើច្បាប់អន្តរជាតិ និងបទដ្ឋានជាមូលដ្ឋានដែលគ្រប់គ្រងទំនាក់ទំនងអន្តរជាតិ ផងដែរ ដែលបំផ្លាញអធិបតេយ្យភាព និងផលប្រយោជន៍សន្តិសុខរបស់ប្រទេសចិន និងធ្វើឲ្យប៉ះពាល់ដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់។ លោក Wang បាននិយាយថា៖ កិច្ចព្រមព្រៀងនេះបញ្ជូនសញ្ញាខុសធ្ងន់ធ្ងរដល់កងកម្លាំងបំបែកខ្លួនតៃវ៉ាន់ដែលកំពុងស្វែងរកឯករាជ្យភាព។ លោកបាននិយាយថា តៃវ៉ាន់គឺជាផ្នែកមួយដែលមិនអាចកាត់ផ្តាច់បាននៃទឹកដីរបស់ចិន។ លោកបានចង្អុលបង្ហាញថា បញ្ហាតៃវ៉ាន់ គឺជាកិច្ចការផ្ទៃក្នុងរបស់ចិនសុទ្ធសាធ ដែលមិនមានការជ្រៀតជ្រែកពីបរទេសឡើយ៕

សមត្ថកិច្ចបញ្ជូនជនសង្ស័យ១១នាក់ ករណីរំដោះអ្នកទោសទៅតុលាការ

ភ្នំពេញ៖ មន្ទីរប្រឆាំងគ្រឿងញៀននៅព្រឹកថ្ងៃទី២៥សីហានេះ បានបញ្ជូនជនសង្ស័យទាំង១១នាក់ ពាក់ព័ន្ធករណីរដោះអ្នកទោសពាក់ព័ន្ធគ្រឿងញៀននៅខេត្តសៀមរាបទៅកាន់សាលាដំបូងរាជធានីភ្នំពេញ។ មេក្លោងឧក្រិដ្ឋជនជនជាតិចិន ដែលចាប់ខ្លួនបានត្រឡប់មកវិញឈ្មោះ CHEN HSIN HAN មុនពេលប្លន់រំដោះ ត្រូវបានតុលាការខេត្តសៀមរាប ផ្តន្ទាទោសដាក់ពន្ធនាគាររយៈពេលជាង៥០ឆ្នាំ ពីបទ«ជួញដូរគ្រឿងញៀន»។ ក្រុមឧក្រិដ្ឋជនទាំងអស់នេះ មានចម្រុះជាតិសាសន៍ ក្នុងនោះមាន ជនជាតិចិនតៃវ៉ាន់, ខ្មែរអាមេរិក និងតួកគី។ក្រុមឧក្រិដ្ឋជនដែលមានអង្គការចាត់តាំងច្បាស់លាស់នេះ បានរៀបចំផែនការត្រៀមធ្វើសកម្មភាពរយៈពេល ២ខែមកហើយ ពោលរៀបចំផែនការតាំងពីនៅសហរដ្ឋអាមេរិកមកម្ល៉េះ ហើយពួកគេបានធ្វើដំណើរមកដល់ប្រទេសកម្ពុជា ដើម្បីពិនិត្យទីតាំងភូមិសាស្ដ្ររយៈពេលកន្លះខែ។ នៅថ្ងៃកើតហេតុ ទី១៧ ខែសីហា ឆ្នាំ២០២៣ មានឧក្រិដ្ឋជន៤នាក់ ជាអ្នកចូលធ្វើសកម្មភាពរំដោះដោយផ្ទាល់នៅគ្លីនិកធ្មេញ ក្នុងក្រុងសៀមរាប ពេលអនុរក្សពន្ធនាគារបញ្ជូនទៅព្យាបាលជំងឺធ្មេញ ដែលកន្លងទៅធ្លាប់ព្យាបាលនៅក្នុងពន្ធនាគារប៉ុន្ដែមិនធូរស្រាល។ក្រៅពីឧក្រិដ្ឋជន៤នាក់ ដែលធ្វើសកម្មភាពផ្ទាល់ហើយនោះ ពួកគេនៅមានក្រុមជំនួយ២នាក់ទៀត ដើម្បីត្រៀមជួយអន្ដរាគមន៍ ក្នុងករណីមានការប៉ះទង្កិចគ្នាជាមួយកម្លាំងសមត្ថកិច្ច។ សេចក្ដីរាយការណ៍ បានឲ្យដឹងថា នៅថ្ងៃកើតហេតុ មន្ដ្រីពន្ធនាគារចំនួន៤នាក់ បានបញ្ជូនពិរុទ្ធជនជនជាតិចិនខាងលើ ទៅគ្លីនិចធ្មេញ លុះពេលកំពុងអង្គុយចាំពេទ្យធ្វើធ្មេញ ស្រាប់តែមានជនមិនស្គាល់មុខ មានពាក់ស្រោមមុខ ស្រោមដៃ និងប្រដាប់ដោយអាវុធដែលតកាណុង បានភ្ជង់ទៅកាន់មន្ដ្រីពន្ធនាគារ ហើយជនសង្ស័យបានចូលទៅរំដោះអ្នកទោសចេញទៅបាត់។ ពេលធ្វើសកម្មភាពនោះ ក្រុមខ្មាន់កាំភ្លើងបានយកខ្សែរូតចងរឹតដៃមន្ដ្រីពន្ធនាគារ ចំនួន៤នាក់ថែមទៀត។ ក្រោយរំដោះក្រុមខ្មាន់កាំភ្លើង បានឡើងជិះរថយន្ដមួយគ្រឿង ម៉ាក Lexus 330 ពណ៌ផ្សេងបារី ពាក់ផ្លាកលេខភ្នំពេញ2AA-4315 គេចខ្លួនបាត់ស្រមោល។ រំលងបានប៉ុន្មានម៉ោងក្រោយ រថយន្ដដែលជិះធ្វើសកម្មភាពនោះ ត្រូវបានគេប្រទះឃើញយកទៅផ្លុងចោល។ ក្នុងនោះសមត្ថកិច្ចជំនាញប្រទះឃើញ កាំភ្លើងខ្លីចំនួន៥ដើម និងសម្ភារមួយចំនួនទៀត។ ពិរុទ្ធជនដែលជាមេក្លោងត្រូវបានរំដោះទៅនោះ ឈ្មោះ Chen hsin han អាយុ៤៥ឆ្នាំ ជនជាតិចិនតៃវ៉ាន់ ជាប់ទោសពាក់ព័ន្ធករណីគ្រឿងញៀន ដែលចំនួនទោសជាង៥០ឆ្នាំ៕

លោក Putin និយាយទម្លាយពីលោក Prigozhin បន្ទាប់ពីការធ្លាក់យន្តហោះ

រុស្ស៊ី៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃព្រហស្បតិ៍ បាននិយាយលើកឡើងលើកដំបូង អំពីការធ្លាក់យន្តហោះ ដែលបានសម្លាប់ប្រធានក្រុមហ៊ុនទាហានស៊ីឈ្នួល លោក Yevgeny Prigozhin កាលពីមួយថ្ងៃមុន។ លោក Prigozhin ជាស្ថាបនិកនៃកងជីវពលក្រុមហ៊ុនឯកជន Wagner ត្រូវបានចុះបញ្ជីជាអ្នកដំណើរនៅលើយន្តហោះឯកជនមួយគ្រឿងដែលបានធ្លាក់នៅភាគខាងជើងទីក្រុងមូស្គូ បណ្តាលឲ្យមនុស្សទាំងអស់នៅលើយន្តហោះស្លាប់។ លោកជាឥស្សរជនដ៏មានឥទ្ធិពល ដែលបានរិះគន់ចំណាត់ការរបស់រុស្ស៊ីចំពោះសង្រ្គាមរបស់ខ្លួននៅអ៊ុយក្រែន ហើយកាលពីពីរខែមុន បានដឹកនាំការប៉ះបោមួយដ៏ភ្ញាក់ផ្អើលរយៈពេលខ្លីប្រឈមជាមួយលោកPutin។ លោក ប្រធានាធិបតី កាលពីថ្ងៃព្រហស្បតិ៍បានសម្តែងការចូលរួមរំលែកទុក្ខដល់គ្រួសាររបស់លោក Prigozhin ។ លោកបាននិយាយថា លោកបានស្គាល់លោក Prigozhin តាំងពីទសវត្សរ៍ឆ្នាំ ១៩៩០ ដោយចាត់ទុកលោកថាជាអ្នកជំនួញមានទេពកោសល្យ ហើយលោកPutin ទន្ទឹងរង់ចាំមើលអ្វីដែលអ្នកស៊ើបអង្កេតដឹងពីបំណែកយន្តហោះនោះ។ មូលហេតុនៃការធ្លាក់យន្តហោះនេះនៅពុំទាន់ដឹងនៅឡើយ។ មន្ត្រីអាមេរិកពីរនាក់ដែលនិយាយក្នុងលក្ខខណ្ឌមិនបញ្ចេញឈ្មោះបានប្រាប់សារព័ត៌មាន Reuters ថា យន្តហោះប្រហែលជាត្រូវបានបាញ់ទម្លាក់ដោយមីស៊ីលបាញ៉ពីដីទៅអាកាស ដែលបានបាញ់នៅខាងក្នុងប្រទេសរុស្ស៊ី។ ប៉ុន្តែក្រោយមក មន្ទីរបញ្ចកោណបានច្រានចោលការកត់សំគាល់នេះ។ យើងពុំមានព័ត៌មានណាមួយដើម្បីបញ្ជាក់នោះទេនៅពេលនេះ ដែលសេចក្តីរាយការណ៍របស់សារព័ត៌មានបញ្ជាក់ថា មានប្រភេទមីស៊ីលបាញ់ពីដីទៅអាកាស បានបាញ់ទម្លាក់យន្តហោះ។ យើងវាយតម្លៃថាព័ត៌មាននោះមិនត្រឹមត្រូវទេ។ ការស្លាប់របស់លោក Prigozhin កើតឡើងបន្ទាប់ពីមេបញ្ជាការទាហានស៊ីឈ្នួលរូបនេះបានដឹកនាំអ្នកប្រយុទ្ធពីកងជីវពលឯកជនក្រុមហ៊ុន Wagner របស់លោកដើម្បីដណ្តើមកាន់កាប់ទីក្រុង Rostov របស់រុស្ស៊ី ហើយបើករថយន្តទៅភាគខាងជើងឆ្ពោះទៅកាន់ទីក្រុងមូស្គូ មុនពេលត្រលប់មកវិញ។ ជាក់ស្តែង លោក Prigozhin បានក្លាយជាអ្នករិះគន់យ៉ាងខ្លាំងចំពោះប្រតិបត្តិការ ដែលពួកគេហៅថាប្រតិបត្តិការសិកពិសេសនៅអ៊ុយក្រែន៕

ក្រុមអ្នកជំនាញ៖ នយោបាយ និងវិទ្យាសាស្ត្រ ប៉ះទង្គិចគ្នាក្នុងភាពចម្រូងចម្រាសលើផែនការបញ្ចេញទឹក ហ្វ៊ូគូស៊ីម៉ារបស់ជប៉ុន

ជប៉ុន៖ ក្រុមអ្នកជំនាញនៅតែខ្វែងគំនិតគ្នាលើការសម្រេចរបស់ប្រទេសជប៉ុន ក្នុងការគ្រប់គ្រងទឹកសំណល់ពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដាយអ៊ីឈី ដែលបានខូចខាត ដោយការបញ្ចេញសំណល់ទឹកនោះទៅក្នុងមហាសមុទ្រប៉ាស៊ីហ្វិក ខណៈដែលប្រតិបត្តិការបានចាប់ផ្តើមកាលពីថ្ងៃព្រហស្បតិ៍ (២៤ សីហា)។ខណៈពេលដែលអ្នកខ្លះបាននិយាយថា នេះគឺជាការអនុវត្តធម្មតារបស់រោងចក្រនុយក្លេអ៊ែរនៅទូទាំងពិភពលោក ហើយបានចាត់ទុកភាពចម្រូងចម្រាសទៅជាបញ្ហានយោបាយ អ្នកផ្សេងទៀត បាននិយាយថា កត្តាមិនច្បាស់លាស់ជាច្រើននៅតែមាន ហើយថាជម្រើសវិទ្យាសាស្រ្តនោះ មិនត្រូវបានគេពិចារណាឱ្យបានគ្រប់គ្រាន់នោះទេ។ ប្រទេសជប៉ុនបានប្រកាសពីដំណើរឆ្ពោះទៅមុខនៃផែនការរបស់ខ្លួន កាលពីថ្ងៃអង្គារ ដោយជំរុញឱ្យមានប្រតិកម្មតបតពីប្រទេសជិតខាងក្នុងតំបន់របស់ខ្លួន រួមទាំងការហាមឃាត់ការនាំចូលអាហារសមុទ្រពី ប្រទេសចិន ព្រមទាំងទីក្រុងហុងកុង និងម៉ាកាវ ដែលជាទីផ្សារអាហារសមុទ្រធំជាងគេទីពីរបន្ទាប់ពីប្រទេសចិនដីគោកផងដែរ។ការបង្ហូរសំណល់ទឹកសំណល់វិទ្យុសកម្មពីរោងចក្រនុយក្លេអ៊ែរ ហ្វ៊ូគូស៊ីម៉ា របស់ប្រទេសជប៉ុន ធ្វើឡើងស្របពេលមានការរិះគន់ និងបម្រាមនាំចេញអាហារសមុទ្រ បន្ថែមពីលើនោះ ក្រុមបាតុករជប៉ុនរាប់សិបនាក់ សកម្មជនកូរ៉េខាងត្បូង និងប្រជាជនហុងកុង បានប្រមូលផ្តុំគ្នាតវ៉ាចំពោះការបញ្ចេញសំណល់ទឹកវិទ្យុសកម្ម ដែលត្រូវបានធ្វើប្រព្រឹត្តកម្មរួច ចេញពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដែលបានខូចខាត ចូលទៅក្នុងមហាសមុទ្រប៉ាស៊ីហ្វិកមួយនេះផងដែរ៕

មហាអំណាច G7 ថ្កោលទោសការបាញ់បង្ហោះផ្កាយរណបបរាជ័យរបស់កូរ៉េខាងជើង

G7៖ បណ្ដារដ្ឋមន្ត្រីការបរទេសមកពីក្រុមប្រទេសប្រជាធិបតេយ្យស្តុកស្តម្ភទាំង៧ឬG7 បានថ្កោលទោសចំពោះការបរាជ័យរបស់កូរ៉េខាងជើង ក្នុងការបាញ់បង្ហោះផ្កាយរណបចារកម្មកាលពីថ្ងៃព្រហស្បតិ៍ (២៤ សីហា) ដោយលើកហេតុផលថា កូរ៉េខាងជើងបានប្រើប្រាស់បច្ចេកវិទ្យាមីស៊ីលបាលិស្ទិកដែលត្រូវបានហាមឃាត់។ នៅក្នុងសេចក្តីថ្លែងការណ៍រួមមួយ ចក្រភពអង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន សហរដ្ឋអាមេរិក និងសហភាពអឺរ៉ុប បាននិយាយថា ទង្វើរបស់កូរ៉េខាងជើង «បង្កការគំរាមកំហែងយ៉ាងធ្ងន់ធ្ងរដល់សន្តិភាព និងស្ថិរភាពក្នុងតំបន់ និងអន្តរជាតិ»។ការប៉ុនប៉ងលើកទី២ របស់កូរ៉េខាងជើងក្នុងការដាក់ផ្កាយរណបមេឃនៅលើគន្លងគោចរ បានបរាជ័យកាលពីថ្ងៃព្រហស្បតិ៍ គឺរយៈពេលបីខែបន្ទាប់ពីការបាញ់បង្ហោះលើកដំបូងបានធ្លាក់ចូលទៅក្នុងមហាសមុទ្រ។ រដ្ឋផ្តាច់ការដែលប្រដាប់ដោយអាវុធនុយក្លេអ៊ែរមួយនេះ បាននិយាយបន្ទាប់មកថា ខ្លួននឹងព្យាយាមបាញ់បង្ហោះម្តងទៀតនៅក្នុងខែតុលា។ផ្កាយរណបនេះ ត្រូវបានគេបញ្ជូនទៅកាន់គន្លងតារាវិថីក្នុងរ៉ុកែតជាដំណាក់កាលមួយ ដែលប្រើប្រាស់បច្ចេកវិទ្យាដូចគ្នានឹងមីស៊ីលបាលិស្ទិក ដែលទីក្រុងព្យុងយ៉ាងត្រូវបានហាមឃាត់មិនឱ្យអភិវឌ្ឍ ក្រោមការសម្រេចរបស់អង្គការសហប្រជាជាតិ។ អគ្គលេខាធិការអង្គការសហប្រជាជាតិ លោក Antonio Guterres ក្រោយមកបានចេញសេចក្តីថ្លែងការណ៍មួយ តាមរយៈអ្នកនាំពាក្យរបស់លោក ដោយនិយាយថា លោក «ថ្កោលទោសយ៉ាងខ្លាំងក្លាចំពោះការប៉ុនប៉ងបាញ់បង្ហោះផ្កាយរណបយោធាមួយផ្សេងទៀតរបស់កូរ៉េខាងជើង»៕

លោក Trump ត្រូវបានដោះលែងក្រោយបង់ប្រាក់ធានាខ្លួន បន្ទាប់ពីប្រគល់ខ្លួនឲ្យក្រុមអាជ្ញាធរ ពន្ធនាគាររដ្ឋចចា ពាក់ព័ន្ធការបង្វែរលទ្ធផលឆ្នោត២០២០

អាមេរិក៖ អតីតប្រធានាធិបតីសហរដ្ឋអាមេរិក លោក Donald Trump បានប្រគល់ខ្លួនឲ្យក្រុមអាជ្ញាធរក្នុងពន្ធនាគារស្រុក ហ្វាល់តុន (Fulton ) ក្នុងរដ្ឋចចា (Georgia) ពាក់ព័ន្ធបទចោទប្រកាន់នានា ដែលចោទប្រកាន់លើរូបលោកពីបទរៀបចំផែនការខុសច្បាប់ក្នុងការបង្វែរលទ្ធផលឆ្នោត របស់លោកដែលបានបរាជ័យកាលពីឆ្នាំ២០២០។ លោក Donald Trump បានក្លាយជាអតីតប្រធានាធិបតីអាមេរិកដំបូងដែលត្រូវបានថតរូបនៅពន្ធនាគារ។ការថតរូបនៅពន្ធនាគារជាផ្លូវការរបស់លោក Donald Trump ត្រូវបានបញ្ចេញកាលពីល្ងាចថ្ងៃព្រហស្បតិ៍ទី២៤សីហា សប្ដាហ៍នេះ បន្ទាប់ពីលោកត្រូវបានសរសេរកំណត់ហេតុនៅពន្ធនាគារអាត្លង់តា ចំពោះបទចោទប្រកាន់ បទព្រហ្មទណ្ឌជាង១០ករណី ជាផ្នែកមួយនៃបទចោទប្រកាន់បទព្រហ្មទណ្ឌជាច្រើនករណី ពីការប៉ុនប៉ងបង្វែរលទ្ធផលឆ្នោតដែលបានបរាជ័យក្នុងរដ្ឋចចា របស់អតីតប្រធានាធិបតីអាមេរិករូបនេះ ។រូបថតក្នុងទឹកមុខស្រពោន មិនញញឹម លោកត្រូវបានថត ដោយមានលេខសម្គាល់អ្នកទោស P01135809 អំឡុងការប្រគល់ខ្លួនរបស់លោក Trump នៅព្រឹកថ្ងៃសុក្រនេះ។ លោក Trump បានស្ថិតក្នុងពន្ធនាគាររយៈពេល២០នាទី មុនពេលត្រឡ់ទៅកាន់ក្លឹបវាយកូនហ្គោលរបស់លោកវិញនៅរដ្ឋ New Jersey បន្ទាប់ពីបង់ប្រាក់ធានាខ្លួនចំនួន២០ម៉ឺនដុល្លារអាមេរិក។ក្រុមពាក់ព័ន្ធរបស់លោកចំនួន១៨នាក់ផ្សេងទៀត ដែលបានជាប់ពាក់ព័ន្ធក្នុងសំណុំរឿងនេះ ត្រូវបានតម្រូវឲ្យប្រគល់ខ្លួនមុនថ្ងៃទី២៥ខែសីហា។លោកTrump កំពុងប្រឈមការចោទប្រកាន់លើរូបលោកពីបទរៀបចំផែនការខុសច្បាប់ក្នុងការបង្វែរលទ្ធផលការបោះឆ្នោតដែលលោកបានបរាជ័យកាលពីឆ្នាំ២០២០ ។ នេះគឺជាការចូលខ្លួនលើកទី៤របស់លោក Trump ចាប់តាំងពីខែមេសាមក នៅពេលដែលលោកបានក្លាយជាអតីតប្រធានាធិបតីដំបូង ក្នុងប្រវត្តិសាស្ត្រអាមេរិក ប្រឈមនឹងការចោទប្រកាន់បទព្រហ្មទណ្ឌបែបនេះ៕

[BREAKING NEWS] លោក Donald Trump បានប្រគល់ខ្លួនឲ្យក្រុមអាជ្ញាធរក្នុងពន្ធនាគារស្រុកហ្វាល់តុន (Fulton)ពាក់ព័ន្ធផែនការខុសច្បាប់ក្នុងការបង្វែរលទ្ធផលឆ្នោត

[BREAKING NEWS] អតីតប្រធានាធិបតីសហរដ្ឋអាមេរិក លោក Donald Trump បានប្រគល់ខ្លួនឲ្យក្រុមអាជ្ញាធរក្នុងពន្ធនាគារស្រុក ហ្វាល់តុន (Fulton ) ក្នុងរដ្ឋចចា (Georgia) ពាក់ព័ន្ធបទចោទប្រកាន់នានា ដែលចោទប្រកាន់លើរូបលោកពីបទរៀបចំផែនការខុសច្បាប់ក្នុងការបង្វែរលទ្ធផលឆ្នោត របស់លោកដែលបានបរាជ័យកាលពីឆ្នាំ២០២០។ ការបង់ប្រាក់ធានាខ្លួនរបស់លោក Trump ត្រូវបានកំណត់ចំនួន ២០០.០០០ដុល្លារអាមេរិក ដែលលោកនឹងត្រូវបង់ជាថ្មីទៀត ដើម្បីបាននៅក្រៅឃុំបណ្ដោះអាសន្ន។ ក្រុមពាក់ព័ន្ធរបស់លោកចំនួន១៨នាក់ផ្សេងទៀត ដែលបានជាប់ពាក់ព័ន្ធក្នុងសំណុំរឿងនេះ ត្រូវបានតម្រូវឲ្យប្រគល់ខ្លួនមុនថ្ងៃទី២៥ខែសីហា។នេះគឺជាការចូលខ្លួនលើកទី៤របស់លោក Trump ចាប់តាំងពីខែមេសាមក នៅពេលដែលលោកបានក្លាយជាអតីតប្រធានាធិបតីដំបូង ក្នុងប្រវត្តិសាស្ត្រអាមេរិក ប្រឈមនឹងការចោទប្រកាន់បទព្រហ្មទណ្ឌបែបនេះ៕

មានការផ្ទុះប្រតិកម្មចំពោះការញ្ចេញសំណល់ទឹក ហ្វ៊ូគូស៊ីម៉ា របស់ប្រទេសជប៉ុន

ជប៉ុន៖ មានការផ្ទុះប្រតិកម្មជាច្រើនចំពោះការបញ្ចេញទឹកវិទ្យុសកម្ម ដែលត្រូវបានធ្វើប្រព្រឹត្តកម្មរួចរបស់ប្រទេសជប៉ុន ពីរោងចក្រនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ដែលបានរងការខូចខាត នៅថ្ងៃព្រហស្បតិ៍ (២៤សីហា) នេះ។ក្រសួងការបរទេសរបស់ប្រទេសចិន បាននិយាយថា «ការបញ្ចេញសំណល់ទឹកកខ្វក់ ហ្វ៊ូគូស៊ីម៉ា នេះ គឺជាបញ្ហាសុវត្ថិភាពនុយក្លេអ៊ែរដ៏សំខាន់ដែលមានផលប៉ះពាល់ឆ្លងព្រំដែន ហើយមិនមែនជារឿងឯកជនសម្រាប់ប្រទេសជប៉ុនតែឯងនោះទេ។ រដ្ឋបាលគយរបស់ប្រទេសចិន បានប្រកាសនៅថ្ងៃព្រហស្បតិ៍ (២៤សីហា) នេះក្នុងការផ្អាកការនាំចូលផលិតផលជលផលទាំងអស់ របស់ប្រទេសជប៉ុនចាប់ពីថ្ងៃនេះតទៅ ហើយទីក្រុងហុងកុង និងម៉ាកាវក៏បានធ្វើដូចគ្នានេះដែរ។លោក HAN DUCK-SOO នាយករដ្ឋមន្ត្រីកូរ៉េខាងត្បូង បាននិយាយថា «ថ្ងៃនេះ រដ្ឋាភិបាលរបស់យើងរំពឹង និងជំរុញឱ្យរដ្ឋាភិបាលជប៉ុន បញ្ចេញព័ត៌មានប្រកបដោយតម្លាភាព និងការទទួលខុសត្រូវក្នុងអំឡុងពេលដំណើរការបញ្ចេញទឺក ដែលនឹងបន្តសម្រាប់រយៈពេល៣០ឆ្នាំខាងមុខនេះ»។លោក MARK BROWN នាយករដ្ឋមន្រ្តីនៃប្រជុំកោះ Cook និងជាប្រធានប្រជុំកោះប្លុក PACIFIC បាននិយាយថា «ខ្ញុំជឿថាការបង្ហូរទឹកនេះ គឺត្រូវតាមស្តង់ដារសុវត្ថិភាពអន្តរជាតិ ហើយលោកបន្ថែមថា បណ្ដាតំបន់នានាប្រហែលជាមិនយល់ស្របលើបញ្ហាស្មុគស្មាញនេះនោះទេ»។ទន្ទឹមនឹងនោះ ក្រុមបាតុករជប៉ុនរាប់សិបនាក់ សកម្មជនកូរ៉េខាងត្បូង និងប្រជាជនហុងកុង បានប្រមូលផ្តុំគ្នាតវ៉ាចំពោះការបញ្ចេញសំណល់ទឹកវិទ្យុសកម្ម ដែលត្រូវបានធ្វើប្រព្រឹត្តកម្មរួច ចេញពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដែលបានខូចខាត ចូលទៅក្នុងមហាសមុទ្រប៉ាស៊ីហ្វិកមួយនេះផងដែរ៕

រុស្ស៊ី និងអ៊ុយក្រែន បន្តការវាយលុកគ្នាទៅវិញទៅមក

អ៊ុយក្រែន៖រុស្ស៊ីបានរាយការណ៍កាលពីថ្ងៃពុធថា កងកម្លាំងរបស់ខ្លួនបានវាយប្រហារលើគោលដៅនានារបស់អ៊ុយក្រែន រួមទាំងប៉ុស្តិ៍បញ្ជាការ ខណៈអ៊ុយក្រែនបានអះអាងថា ខ្លួនបានបាញ់ទម្លាក់យានដ្រូនរបស់រុស្ស៊ីរាប់សិបគ្រឿង។ក្រសួងការពារជាតិរុស្ស៊ីបាននិយាយក្នុងរបាយការណ៍ស្តីពីដំណើរវិវឌ្ឍន៍ប្រចាំថ្ងៃនៃ «ប្រតិបត្តិការយោធាពិសេស» របស់ខ្លួនថា កងកម្លាំងរុស្ស៊ីបានវាយទប់ការរវាយប្រហាររបស់អ៊ុយក្រែននៅទីក្រុង Kupyansk តំបន់ Krasny Liman ទីក្រុង Donetsk និងទិសដៅផ្សេងទៀត ដោយវាយលុកគោលដៅរបស់សត្រូវរួមមានរថក្រោះ ប៉ុស្តិ៍បញ្ជាការ ស្ថានីយ៍រ៉ាដាសម្រាប់ការវាយបកក្នុងសមរភូមិ ព្រមទាំងកន្លែងសម្រាប់ស្វែងរក និងតាមដានគោលដៅអាកាសផងដែរ។ ក្រសួងបានបន្ថែមថា ប្រព័ន្ធការពារដែនអាកាសរបស់រុស្ស៊ី ក៏បានស្ទាក់ចាប់រ៉ុកែតគ្រាប់ច្រើន ប្រភេទ HIMARS និងបានបំផ្លាញយានដ្រូនរបស់អ៊ុយក្រែនចំនួន១៨គ្រឿងផងដែរ។ ជាមួយគ្នានេះដែរ កាលពីថ្ងៃពុធ អគ្គសេនាធិការនៃកងកម្លាំងប្រដាប់អាវុធអ៊ុយក្រែនបាននិយាយនៅក្នុងសារបង្ហោះតាមបណ្ដាញសង្គមហ្វេសប៊ុកថា ការប្រយុទ្ធយ៉ាងខ្លាំងក្លាប្រឆាំងនឹងយោធារុស្ស៊ី បានបន្តក្នុងទិសដៅរួមទាំងទីក្រុង Melitopol ផងដែរ។ក្រសួងបានបន្តថា ក្នុងរយៈពេល២៤ម៉ោងកន្លងមកនេះ កងកម្លាំងរបស់អ៊ុយក្រែនបានធ្វើការវាយប្រហារតាមផ្លូវអាកាសទៅលើក្រុមបុគ្គលិកយោធា សព្វាវុធ និងគ្រឿងយុទ្ធោបករណ៍។ ពួកគេក៏បានវាយប្រហារលើប៉ុស្តិ៍បញ្ជាការរបស់កងទ័ពរុស្ស៊ី និងប្រព័ន្ធមីស៊ីលប្រឆាំងយន្តហោះ ព្រមទាំងបានបំផ្លាញយានដ្រូនសត្រូវចំនួន ១២ គ្រឿងផងដែរ៕

គូប្រជែងបក្សសាធារណរដ្ឋចោទដាក់គ្នា ក្នុងការជជែកដេញដោយឆ្នាំ២០២៤ លើកដំបូង ដោយគ្មានវត្តមានលោក ដូណាល់ ត្រាំ

អាមេរិក៖ បេក្ខជនប្រធានាធិបតីមកពីគណបក្សសាធារណរដ្ឋចំនួន៨រូប បានចោទដាក់នូវបញ្ហាជាច្រើនចាប់ពីបញ្ហាសេដ្ឋកិច្ច រហូតដល់បញ្ហាអាកាសធាតុ និងបញ្ហានៅប្រទេសអ៊ុយក្រែនកាលពីថ្ងៃពុធ (២៣ សីហា) ក្នុងការប្រកួតប្រជែងសម្រាប់តំណែងបេក្ខជនប្រធានាធិបតី ដោយមិនមានវត្តមានរបស់លោក ដូណាល់ ត្រាំ ក្នុងការជជែកដេញដោលលើកដំបូងនៃឆ្នាំ២០២៤។ជជែកដេញដោលបឋមដំបូងនៃយុទ្ធនាការបោះឆ្នោតឆ្នាំ២០២៤ បានបិទបញ្ចប់នៅទីក្រុង Milwaukee សហរដ្ឋអាមេរិក។ បេក្ខជនប្រធានាធិបតីទាំងប្រាំបីរូប កំពុងព្យាយាមបកស្រាយគុណសម្បត្តិរបស់ពួកគេ ថាហេតុអ្វីបានជាពួកគេជាជម្រើស ដែលអាចទទួលបានជោគជ័យបំផុតទល់នឹងបេក្ខជនជួរមុខលោក ដូណាល់ ត្រាំ។ ការជជែកដេញដោលគ្នានេះ បានធ្វើឡើងនៅចំពោះមុខហ្វូងមនុស្សប្រហែល៤.០០០នាក់នៅវេទិកា Fiserv ក្នុងទីក្រុង Milwaukee។ដោយគ្មានវត្តមានលោក ត្រាំ គូប្រជែងរបស់លោក បានវិះគន់គ្នាទៅវិញទៅមក ហើយក៏បានវាយប្រហារលោកប្រធានាធិបតី ចូ បៃដិន ផងដែរ ដើម្បីព្យាយាមលេចចេញជាជម្រើសបេក្ខជនដែលអាចទទួលបានជោគជ័យបំផុត នៅរយៈពេលប្រាំខែមុនពេលការប្រកួតជ្រើសរើសបេក្ខជនប្រធានាធិបតីនៅរដ្ឋ Iowa និង រយៈពេលជាង១៤ខែមុនការបោះឆ្នោត។គួររម្លឹកផងដែរថា អតីតប្រធានាធិបតីសហរដ្ឋអាមេរិក លោក ដូណាល់ ត្រាំ ត្រូវបានចោទប្រកាន់ក្នុងសំណុំរឿងព្រហ្មទណ្ឌចំនួន៤ករណីដាច់ដោយឡែកពីគ្នា ហើយការជជែកដេញដោលនៅយប់នេះ បានកើតឡើងនៅមុនថ្ងៃនៃការចូលខ្លួនដែលរំពឹងទុករបស់លោកនៅក្នុងសំណុំរឿងព្យាយាមបង្វែរលទ្ធផលការបោះឆ្នោតរដ្ឋ Georgia ឆ្នាំ២០២០៕

បណ្ដាញសង្គម

ព័ត៌មានថ្មីៗ

តំណាងរាស្រ្តខេត្តបន្ទាយមានជ័យ៖ ទោះបីមានការឈ្លានពានពីប្រទេសជិតខាង តែពលរដ្ឋកម្ពុជា នៅតែមានឱកាសធ្វើបុណ្យទានប្រកបដោយសទ្ធាជ្រះថ្លា

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញកាន់បិណ្ឌទី៨ និងនាំយកទេយ្យវត្ថុប្រគេនវត្តចំនួន១៣វត្ត និងចែកអំណោយដល់យាយជីតាជី នៅខេត្តពោធិ៍សាត់

មន្រ្តីជាន់ខ្ពស់ធនាគារជាតិ៖ វិស័យធនាគារបានបន្តរក្សាលំនឹង និងមានសុខភាពល្អជាធម្មតា

លោកជំទាវ ចម និម្មល អញ្ជើញសំណេះសំណាល សួរសុខទុក្ខ និងនាំយកអំណោយជូននាយទាហាន នាយទាហានរង និងពលទាហាន នៃបញ្ជាការដ្ឋានកាំភ្លើងធំ កងទ័ពជើងគោក ក្នុងឱកាសពិធីបុណ្យភ្ជុំបិណ្ឌ

ប្រតិបត្តិការបង្ក្រាប Online Scam នៅប៉ោយប៉ែត ឃាត់ខ្លួនមនុស្សជិត៦០០នាក់

ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និងកោះធំ អញ្ជើញជួបសំណេះសំណាល និងសួរសុខទុក្ខគ្រួសារវីរៈកងទ័ព និងគ្រួសារក្រីក្រក្នុងស្រុកស្អាង និងកោះធំ សរុប ១៨០០គ្រួសារ

ការនាំចេញអង្ករកម្ពុជាទៅកាន់ប្រទេសហ្វីលីពីន មានសន្ទុះខ្លាំង ខណៈការដឹកជញ្ជូនអង្ករចំនួន ២០.០០០តោនបានចាប់ផ្តើមចេញដំណើរហើយ

រដ្ឋមន្ត្រីសុខាភិបាល៖ ការតម្កល់សុខុមាលភាពរបស់ប្រជាពលរដ្ឋ គឺជាអាទិភាពចម្បងជានិច្ចរបស់រាជរដ្ឋាភិបាល

អតីតសមាជិកគណបក្សប្រឆាំង ចំនួន៣៩នាក់ សម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា

នេប៉ាល់ប្រារព្ធពិធីរំឭកវិញ្ញាណក្ខន្ធជនរងគ្រោះ និងទាមទារភាពយុត្តិធម៌អាកាសធាតុ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877