BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

ការត្រៀមទប់ទល់នៅនាទីចុងក្រោយក្នុងប្រទេសចិន ខណៈព្យុះកំណាច Doksuri ខិតមកដល់

ចិន៖ ប្រព័ន្ធផ្សព្វផ្សាយរដ្ឋ បានរាយការណ៍នៅថ្ងៃសុក្រនេះថា អាជ្ញាធរនៅប្រទេសចិនភាគអាគ្នេយ៍ បានត្រៀមទប់ទល់នៅនាទីចុងក្រោយ មុនពេលព្យុះទីហ្វុងកំណាច Doksuri បកមកដល់ដីគោក។ប្រព័នផ្សព្វផ្សាយរដ្ឋ CCTV បានថតវីដេអូ ពីភ្លៀងធ្លាក់ខ្លាំងដែលបានវាយបក់ទៅលើតំបន់ឆ្នេរ រួមជាមួយខេត្ត Fujian របស់ប្រទេសចិននៅព្រឹកថ្ងៃសុក្រនេះ មុនពេលព្យុះ Doksuri វាយបក់។ កាលពីថ្ងៃព្រហស្បតិ៍ អាជ្ញាធរក្នុងតំបន់ បានជម្លៀសអ្នកភូមិពីតំបន់ងាយរងគ្រោះ ដែលត្រូវបានជម្លៀសចេញពីលំនៅឋានរបស់ពួកគេ នៅខេត្ត Zhejiang កាលពីល្ងាចថ្ងៃព្រហស្បតិ៍។ ទូរទស្សន៍ CCTV បានរាយការណ៍ថា នៅចុងក្រោយ ព្យុះ Doksuri បានបោកបក់មកដល់ដីគោកនៅក្រុង Jinjiang របស់ខេត្ត Fujan នៅអំឡុងម៉ោង ៩:៥៥នាទីព្រឹក ម៉ោងក្នុងតំបន់នៅថ្ងៃសុក្រនេះ ហើយត្រូវបានគេរំពឹងថា នឹងបន្តបក់ឆ្ពោះទៅទិសដៅភាគពាយព្យក្នុងកម្រិតចុះខ្សោយជាបន្តបន្ទាប់។ ព្យុះទីហ្វុងកំណាចនេះ បានបណ្តាលឲ្យមនុសុ្សរាប់ពាន់នាក់គ្មានអគ្គិសនីប្រើប្រាស់ នៅទូទាំងប្រទេសហ្វីលីពិនភាគខាងជើង និងកោះតៃវ៉ាន់ភាគខាងត្បូង ហើយមនុស្ស៣៦នាក់បានស្លាប់ អំឡុងដំណើរឆ្លងកាត់របស់ព្យុះ Doksuri នៅប្រទេសហ្វីលីពិន ភាគខាងជើង៕

ការលិចទូកនិងព្យុះ Doksuri នាំឲ្យចំនួនអ្នកស្លាប់នៅហ្វីលីពីន កើនឡើងយ៉ាងហោចណាស់៣០នាក់

ហ្វីលីពីន៖ មន្ត្រីឆ្លើយតបគ្រោះមហន្តរាយបាននិយាយថា ការលិចទូកកាលពីថ្ងៃព្រហស្បតិ៍បាននាំឲ្យចំនួនអ្នកស្លាប់ពីរយៈពេល១សប្តាហ៍នៃអាកាសធាតុមានព្យុះនៅទូទាំងកោះLuzon ដ៏ធំកើនឡើងដល់យ៉ាងហោចណាស់ ៣០នាក់។ មនុស្សយ៉ាងហោចណាស់៩នាក់ត្រូវបានរាយការណ៍ថា បានស្លាប់ដោយសារការវាយបក់មកដល់នៃព្យុះ Doksuri ភាគច្រើនដោយសារតែបំណាក់ដី ទឹកជំនន់ និងដើមឈើដែលបាក់រលំ ហើយមនុស្សរាប់ពាន់នាក់បានជម្លៀសខ្លួន។ នគរបាលនិយាយថា មនុស្សយ៉ាងហោចណាស់២១នាក់បានស្លាប់ និង៤០នាក់ផ្សេងទៀតត្រូវបានជួយសង្គ្រោះ បន្ទាប់ពីទូកដឹកអ្នកដំណើរនៅហ្វីលីពីនមួយគ្រឿង បានក្រឡាប់ កាលពីថ្ងៃព្រហស្បតិ៍ នៅពេលដែលត្រូវបានវាយបក់ដោយខ្យល់បក់ខ្លាំង នៅបឹង Laguna ភាគអាគ្នេយ៍ទីក្រុងម៉ានីល។នគរបាល និយាយថា ប្រតិបត្តិការជួយសង្គ្រោះនៅបន្ត ប៉ុន្តែពុំបានផ្តល់តួលេខភ្លាមៗសម្រាប់ចំនួនមនុស្សសរុបនៅលើទូក MBCA Aya នៅពេលដែលវា បានក្រឡាប់នៅខេត្ត Rizal នោះទេ។ ឆ្មាំឆ្នេរនិយាយថា ទូកបានក្រឡាប់នៅពេលអ្នកដំណើរនៅលើទូក ផ្លាស់ប្តូរទៅផ្នែកតែម្ខាងក្នុងពេលភ័យស្លន់ស្លោរ ខណៈទូកត្រូវបានវាយបក់ដោយខ្យល់ខ្លាំង មានចម្ងាយប្រមាណ៤៦ម៉ែត្រពីភូមិ Kalinawan ក្នុងក្រុង Binangonan ។ព្យុះកំណាច Doksuri បានបោកបក់ចេញផុត កាលពីថ្ងៃព្រហស្បតិ៍ បន្ទាប់ពីវាយបក់មកលើប្រទេសហ្វីលីពីន ភាគខាងជើង និងបានជំរុញដោយភ្លៀងមូសុងតាមរដូវកាល ដែលបានឆ្លងកាត់មួយទ្រង់ទ្រាយធំមកលើប្រជុំកោះនេះ។ ការធ្វើដំណើរតាមសមុទ្រ ត្រូវបានផ្អាកនៅតាមកំពង់ផែជាច្រើន អំឡុងការវាយបក់នៃព្យុះ Doksuri ពីថ្ងៃអង្គារដល់ថ្ងៃពុធ ដែលបានធ្វើឲ្យជាប់គាំងអ្នកដំណើររាប់ពនា់នាក់ ព្រមទាំងរថយន្តដឹកទំនិញ៕

សារព័ត៌មានរដ្ឋ៖ ការបំផ្ទុះគ្រាប់បែក សម្លាប់មនុស្សជាច្រើននាក់ នៅទីសក្ការៈក្បែររដ្ឋធានីរបស់ស៊ីរី

ស៊ីរី ៖ ប្រព័ន្ធផ្សព្វផ្សាយរដ្ឋស៊ីរី បានរាយការណ៍ថា គ្រាប់បែកមួយគ្រាប់ដែលដាក់ក្នុងរថយន្ត បានផ្ទុះនៅខាងក្រៅទីក្រុងសក្ការបូជា Sayeda Zeinab ដែលស្ថិតនៅភាគខាងត្បូងនៃរដ្ឋធានីដាម៉ាស់ (Damascus) ប្រទេសស៊ីរី កាលពីថ្ងៃព្រហស្បតិ៍ (ទី២៧ ខែកក្កដា) ដោយបានសម្លាប់មនុស្សជាច្រើននាក់ និងរងរបួសជាច្រើននាក់ទៀត។អ្នកយកព័ត៌មានរបស់ទូរទស្សន៍រដ្ឋស៊ីរី បានរាយការណ៍ថា ចំនួនអ្នកបាត់បង់ជីវិតបឋម បានបង្ហាញថា អាចនឹងមានមនុស្សស្លាប់ ៦នាក់។ ស្ថានីយទូរទស្សន៍នេះបានចាក់ផ្សាយវីដេអូពីរូបភាពរថយន្តដែលឆេះខ្លោចផ្នែកខាងមុខ។ អ្នកស្រុកម្នាក់ បានប្រាប់ទីភ្នាក់ងារសារព័ត៌មាន Reuters ថា គាត់បានឮសំឡេងផ្ទុះយ៉ាងខ្លាំង នៅម៉ោងប្រហែល ៥:៣០ល្ងាច (ត្រូវនឹងម៉ោង ១៤:៣០ ម៉ោងសកល) បន្ទាប់មកកងកម្លាំងសន្តិសុខបានបិទតំបន់នោះ។នេះជាការវាយប្រហារលើកទី២ លើទីកន្លែងសក្ការៈ ក្នុងសប្តាហ៍នេះ។ នៅមុននេះ មនុស្ស ២នាក់ បានរងរបួស នៅក្នុងការបំផ្ទុះដាច់ដោយឡែកមួយ កាលពីថ្ងៃអង្គារ (ទី២៥ ខែកក្កា)។ នេះគឺជារដូវកាលដ៏ពេញនិយម សម្រាប់ការទៅកាន់ទីកន្លែងសក្ការបូជា ខណៈដែលអ្នកកាន់សាសនាអ៊ីស្លាមស៊ីអ៊ីត (Shi'ite) សម្រុកទៅទីនោះ ដើម្បីប្រារព្ធពិធីបុណ្យកាន់ទុក្ខ Ashura។ភ្លាមៗនេះ នៅមិនទាន់មានការអះអាងពីការទទួលខុសត្រូវ ចំពោះការវាយប្រហារនេះទេ កាលពីថ្ងៃព្រហស្បតិ៍នោះ។ ក្រុមរដ្ឋអ៊ីស្លាមបានអះអាងពីការវាយប្រហារកាលពីលើកមុនមកលើទីតាំងសក្ការបូជានេះ។ គួររំលឹកដែរថា ការវាយប្រហារដោយបំផ្ទុះគ្រាប់បែកបែបនេះ ក្នុងឆ្នាំ២០១៧ បានសម្លាប់មនុស្សយ៉ាងហោចណាស់ ៤០នាក់៕

ខែកក្កដានេះនឹងក្លាយជាខែមានសីតុណ្ហភាពក្ដៅបំផុតរបស់ពិភពលោក ដោយសារបម្រែបម្រួលអាកាសធាតុ

ក្រុមអ្នកវិទ្យាសាស្ត្រ បាននិយាយថាស្របពេលរលកកម្ដៅឡើងកាន់តែខ្ពស់ ប្រាកដណាស់ថា ខែកក្កដានេះ នឹងក្លាយជាខែមានសីតុណ្ហភាពក្ដៅបំផុតរបស់ពិភពលោក។ ខែក្តៅខ្លាំងមកដល់បច្ចុប្បន្ន ដែលក្រុមអ្នកស្រាវជ្រាវមានទំនុកចិត្តថា កំណត់ត្រាឆ្នាំ ២០១៩ នឹងត្រូវបំបែក ទោះបីជានៅសល់ពេលជាច្រើនថ្ងៃទៀតក៏ដោយ។ ប្រមុខអង្គការសហប្រជាជាតិ លោក Antonio Guterres បាននិយាយថា ភពផែនដីកំពុងឈានចូលដល់ សម័យកាលនៃការឡើងកម្ដៅដ៏ពុះកញ្ជ្រោលជាសកល។ក្រុមអ្នកវិទ្យាសាស្ត្រយល់ស្របថាកម្ដៅបន្ថែមត្រូវបានផ្សារភ្ជាប់ជាចម្បងទៅនឹងការប្រើប្រាស់ឥន្ធនៈហ្វូស៊ីល។លោកប្រធានាធិបតីសហរដ្ឋអាមេរិក Joe Biden បានហៅការប្រែប្រួលអាកាសធាតុថាជា ការគំរាមកំហែងដែលមានស្រាប់ ហើយថាគ្មាននរណាម្នាក់អាចបដិសេធផលប៉ះពាល់នៃការប្រែប្រួលអាកាសធាតុបានទៀតទេ។ ក្រុមអ្នកជំនាញខ្លះជឿថាខែកក្កដាអាចជាខែក្តៅបំផុតក្នុងរយៈពេលជាង ១២០.០០០ ឆ្នាំមុន។ ក្រុមអ្នកស្រាវជ្រាវមិនភ្ញាក់ផ្អើលទេ ដែលថា ខែកក្កដាត្រូវបានកំណត់ថាជាខែបំបែកកំណត់ត្រាបច្ចុប្បន្នសម្រាប់ខែក្តៅបំផុត ខណៈមានការចង្អុលបង្ហាញជាច្រើននៅក្នុងប៉ុន្មានសប្តាហ៍ថ្មីៗនេះដែលថាពិភពលោកកំពុងមើលឃើញកម្រិតកមក្ដៅខ្លាំងជាងនេះ។ យោងតាមសេវាតាមដានបម្រែបម្រួលរអាកាសធាតុកូភើនូគូស( Copernicus) ថ្ងៃក្តៅបំផុតរបស់ពិភពលោកបានកើតឡើងកាលពីថ្ងៃទី ៦ ខែកក្កដា ហើយថ្ងៃក្តៅបំផុតមិនធ្លាប់មានរយៈពេល២៣ថ្ងៃ មានក្នុងកំណត់ត្រាគឺនៅក្នុងខែនេះ ៕

បាតុករកាន់កាប់ព្រៃឈើ ដើម្បីបញ្ឈប់សកម្មភាពពង្រីកអណ្តូងរ៉ែធ្យូងថ្មរបស់ទួរគី

ទួរគី៖ ក្រុមអ្នកធ្វើយុទ្ធនាការបរិស្ថាននៅភាគនិរតីនៃប្រទេសទួរគី បានតវ៉ានៅក្នុងព្រៃអស់រយៈពេល៤ថ្ងៃជាប់ៗគ្នាកាលពីថ្ងៃព្រហស្បតិ៍ (ទី២៧ កក្កដា) ប្រឆាំងនឹងការកាប់ដើមឈើ ដើម្បីបើកផ្លូវសម្រាប់ការពង្រីកអណ្តូងរ៉ែធ្យូងថ្ម ដោយមេធាវីម្នាក់និយាយថា មនុស្ស ១៤នាក់ ត្រូវបានចាប់ឃុំខ្លួនក្នុងសប្តាហ៍នេះ នៅក្នុងការប៉ះទង្គិចជាមួយនគរបាល។ .រថពាសដែកជាច្រើនគ្រឿង និងកម្លាំងសន្តិសុខ ត្រូវបានដាក់ពង្រាយ ដើម្បីរារាំងក្រុមបាតុករមិនឲ្យចូលទៅក្នុងព្រៃក្នុងខេត្ត មូឡា ( Mugla) ហើយសកម្មជន បាននិយាយថា នគរបាលបានបាញ់ឧស្ម័នបង្ហូរទឹកភ្នែក និងកាណុងបាញ់ទឹកឥតឈប់ ដើម្បីបំបែកពួកគេ ចាប់តាំងពីថ្ងៃចន្ទមក។ក្នុងឆ្នាំ ២០២០ ក្រសួងរុក្ខប្រមាញ់ បានផ្តល់ការអនុញ្ញាតឲ្យក្រុមហ៊ុនទួរគី YK Energy ពង្រីកអណ្តូងរ៉ែដល់ ៧៨០ ហិកតានៃព្រៃឈើនៅក្នុងតំបន់អាបេឡែន (Akbelen) ។ តុលាការមិនទាន់សម្រេចលើបណ្តឹងដែលប្តឹងរបស់អ្នកស្រុកដែលជំទាស់នឹងការអនុញ្ញាតទាំងនេះ។អ្នកស្រុកបានស្វែងរកដីការក្សាការពារ និងបានចាប់ផ្តើមការប្រុងប្រយ័ត្ននៅក្នុងព្រៃនៅឆ្នាំ ២០២១។ ទោះជាយ៉ាងណាក៏ដោយ តុលាការ បានដកការផ្អាកប្រតិបត្តិការ នៅឆ្នាំ២០២២ ហើយមន្ត្រីមកពីក្រុមហ៊ុនមួយក្នុងចំណោមក្រុមហ៊ុនដែលពាក់ព័ន្ធ បាននិយាយថា មិនមានឧបសគ្គផ្លូវច្បាប់ចំពោះសកម្មភាពរបស់ពួកគេទេ។

ចំហេះព្រៃបំផ្លាញឃ្លាំងរំសេវ នៅជិតទីក្រុង Volos របស់ប្រទេសក្រិក

ក្រិក៖ នាយករដ្ឋមន្ត្រី លោក Kyriakos Mitsotakis កាលពីថ្ងៃព្រហស្បតិ៍ (ទី២៧ ខែកក្កដា) បាននិយាយថា ប្រទេសក្រិក ចាំបាច់ត្រូវចាត់វិធានការបន្ថែមទៀត ដើម្បីប្រយុទ្ធប្រឆាំងនឹងផលប៉ះពាល់ពីការប្រែប្រួលអាកាសធាតុ ខណៈដែលចំហេះព្រៃនៅភាគកណ្តាលនៃប្រទេស បានឆាបឆេះ ដោយបង្ខំឲ្យមានការជម្លៀសកាន់តែច្រើន និងការផ្ទុះនៅឃ្លាំងរំសេវ។ទូរទស្សន៍រដ្ឋក្រិក ERT បានរាយការណ៍ថា សំឡេងផ្ទុះយ៉ាងខ្លាំង ត្រូវបានឮចេញពីឃ្លាំងគ្រាប់រំសេវ នៅក្នុងទីក្រុងឆ្នេរសមុទ្រ Nea Aghialos។ រូបភាពពីវីដេអូ បានបង្ហាញឲ្យឃើញពីសំណុំផ្សែង ដែលហុយទ្រលោមឡើងទៅលើមេឃ ខណៈដែលឧទ្ធម្ភាគចក្រជាច្រើនគ្រឿង បានប្រឹងប្រែងទម្លាក់ទឹកពីលើដើម្បីពន្លត់ភ្លើង ហើយអ្នកស្រុក បានជម្លៀសចេញពីតំបន់នោះ។ដោយលើកឡើងពីប្រភពមិនបញ្ចេញឈ្មោះ ទូរទស្សន៍ ERT បានឲ្យដឹងថា ឃ្លាំងគ្រាប់រំសេវជារបស់កងទ័ពអាកាសក្រិក ហើយភ្លាមៗ មិនទាន់មានសេចក្តីរាយការណ៍អំពីការមានរបួសនោះទេ។ គ្រោះអគ្គិភ័យនៅទូទាំងប្រទេស ដែលរីករាលដាលកាន់តែឆាប់រហ័ស និងកាន់តែមានឥទ្ធិពលខ្លាំង ដោយសារកម្លាំងខ្យល់បក់ខ្លាំង និងសីតុណ្ហភាពឡើងខ្ពស់លើសពី ៤០អង្សាសេ បានសម្លាប់មនុស្ស ២នាក់បន្ថែមទៀត នៅកណ្តាលប្រទេសក្រិក កាលពីថ្ងៃពុធ (ទី២៦ ខែកក្កដា) ដោយធ្វើឲ្យចំនួនអ្នកស្លាប់ដោយសារភ្លើងឆេះនេះ កើនឡើងដល់ ៥នាក់ហើយ។ចាប់តាំងពីថ្ងៃពុធមក ក្រុមមន្ត្រីបានបញ្ជាឲ្យជម្លៀសសហគមន៍ជាច្រើននៅក្នុងតំបន់ដែលរងគ្រោះខ្លាំង Magnesia ដែលជាតំបន់ឆ្នេរភាគខាងជើងនៃទីក្រុងអាតែន។ មនុស្សកាន់តែច្រើនត្រូវបានជម្លៀសចេញដោយបង្ខំ កាលពីថ្ងៃព្រហស្បតិ៍ ដោយខ្លះតាមរយៈទូកល្បឿនលឿនឯកជន ហើយធ្វើដំណើរទៅកាន់ទីក្រុងកំពង់ផែ Volos ដែលនៅជិតនោះ ខណៈដែលអណ្តាតភ្លើងបានឆាបឆេះឡើងវិញ៕

រថយន្តរាប់រយគ្រឿងរងការជន់លិចក្រោយទឹកទន្លេហូរប្រៀនច្រាំងនៅទីក្រុង Noida ជិតរដ្ឋធានីញូវដែល្លី ប្រទេសឥណ្ឌា

ឥណ្ឌា៖ រថយន្តជាង ៣៥០គ្រឿង រងការជន់លិចនៅទីក្រុងពាណិជ្ជកម្ម Noidaស្ថិតនៅជាប់នឹងតំបន់ភាគអាគ្នេយ៍រដ្ឋធានីញូវដែល្លី ប្រទេសឥណ្ឌា ក្រោយទឹកទន្លេ Hindonហូរប្រៀបច្រាំងកាលពីថ្ងៃពុធ ។ រូបភាពវីដេអូឃ្លីបរបស់ទូរទស្សន៍ ឃើញប្រជាពលរដ្ឋរស់នៅជិតច្រាំងទន្លេ បានផ្លាស់ទីទៅកាន់ទីទួលសុវត្ថិភាព ហើយសាលារៀនក្បែរនោះ បានបិទទ្វារ ។ ប្រជាពលរដ្ឋ ជួបការលំបាកខ្លាំងក្នុងការធ្វើដំណើរឆ្លងកាត់ផ្លូវជន់លិច ដែលនាំឲ្យមានការកកស្ទះចរាចរណ៍យ៉ាងខ្លាំង ពេលដែលភ្លៀងខ្លាំង នៅតែបន្តស្រោចស្រព នៅក្នុងរដ្ឋធានីប្រទេសឥណ្ឌាមួយនេះ ។ លោក Dilip Gautamគឺជាពលរដ្ឋក្នុងស្រុកមួយរូបរស់នៅក្នុងទីក្រុង Noidaនិយាយថា រដ្ឋាភិបាលគួរតែស្វែងរកដំណោះស្រាយចំពោះបញ្ហាជន់លិចនេះ ។ មានសាលារៀននៅក្បែរនោះ ហើយផ្លូវធំទូលាយ ដូច្នេះហើយពួកគេគួរតែស្វែងដំណោះស្រាយលើបញ្ហាមួយនេះ ។ លោកបន្តថា រថយន្តក្រុងដឹកសិស្សសាលា បានខូចតាមផ្លូវ សិស្សសាលាកំពុងប្រឈមបញ្ហានៅទីនោះ ហើយវាគឺជាស្ថានភាពដ៏លំបាកមួយ ពេលដែលទឹកចូលក្នុងម៉ាស៊ីនរថយន្ត ។ រដ្ឋាភិបាលគួរតែគិតគូរពីបញ្ហាមួយនេះ ដែលត្រូវបានប្រឈមដោយពលរដ្ឋសាមញ្ញ ។ សូមបញ្ជាក់ថា ប្រទេសឥណ្ឌាដែលមានប្រជាពលរដ្ឋជាង ១,៣ពាន់លាននាក់នោះ អាស្រ័យនឹងភ្លៀងធ្លាក់ដើម្បី ទ្រទ្រង់ជីវពលរដ្ឋរស់នៅប្រចាំថ្ងៃរបស់ប្រជាកសិករ ហើយភាគច្រើននៃពួកគេពឹងផ្អែកទាំងស្រុងលើការធ្វើកសិកម្ម ប៉ុន្តែភ្លៀងធ្លាក់ខ្លាំងច្រើនហួសហេតុពេក ក៏អាចបណ្តាលឲ្យកើតមានទឹកជំនន់ បំណាក់ដី និងជំងឺអាសន្នរោគផងដែរ ៕

ព្យុះកំណាច Doksuri បណ្តាលឲ្យមនុស្ស៦នាក់ស្លាប់ខណៈហ្វីលីពីនទប់ស្កាត់ទឹកជំនន់ និងបំណាក់ដី

ហ្វីលីពីន៖ អាជ្ញាធរនៅក្នុងប្រទេសនេះ បាននិយាយថា ព្យុះដ៏មានឥទ្ធិពល បាននាំមកនូវទឹកជំនន់ និងបំណាក់ដី ដែលកំពុងរាលដាលមកកាន់ប្រទេសហ្វីលីពីនកាលពីថ្ងៃពុធបណ្តាលឲ្យមនុស្សយ៉ាងហោច៦នាក់ស្លាប់។ យោងតាមក្រុមប្រឹក្សាគ្រប់គ្រងនិងកាត់បន្ថយហានីភ័យគ្រោះមហបន្តរាយជាតិ បានឲ្យដឹងថា ព្យុះកំណាច Doksuri ដែលគេស្គាល់ថា Egay នៅក្នុងប្រទេសហ្វីលីពីន បានបណ្តាលឲ្យមានទឹកជំនន់នៅទូទាំងតំបន់ចំនួន៥ និងមានបំណាក់ដីបង្កឡើងដោយទឹកភ្លៀងជាង១០កន្លែងផ្សេងទៀត។ ទីភ្នាក់ងារនិយាយថា ជនរងគ្រោះម្នាក់ បានស្លាប់នៅតំបន់ Calabarzon ភាគកណ្តាល និង៤នាក់ទៀត នៅក្នុងតំបន់ Cordillera ជាតំបន់ភ្នំ ហើយមនុស្ស២នាក់ផ្សេងទៀតបានរងរបួសនៅកន្លែងៀផ្សេងទៀតក្នុងប្រទេសនេះ។ ការិយាល័យអាកាសធាតុប្រទេសហ្វីលីពិន Pagasa និយាយថា ព្យុះនេះបានបង្កឲ្យមានបំណាក់ដី នៅជិតកោះ Fuga ភាគខាងជើងដាច់ស្រយាល។ យោងតាមមជ្ឈមណ្ឌលព្រមានព្យុះកំណាចរួម បានឲ្យដឹងថា ទោះបីជាព្យុះនេះ បានចុះខ្សោយពីព្យុះកំណាចដ៏មានឥទ្ធិពល ព្យុះ Doksuri បានមកដល់ជាមួយខ្យល់បក់មានល្បឿនប្រមាណ២២០គីឡូម៉ែត្រក្នុងមួយម៉ោង ដែលស្មើនឹងព្យុះកំណាចអាត្លងទិកប្រភេទទី៤។ ការិយាល័យអាកាសធាតុប្រទេសហ្វីលីពិន Pagasa បានព្រមានថា ស្ថានភាពដែលកំពុងគំរាមកំហែងដល់ជីវិត និងកញ្ជ្រោលឡើងខ្លាំង ត្រូវបានគេរំពឹងមាននៅក្នុងតំបន់មួយចំនួននៃកោះ Luzon ជាកោះមានមនុស្សរស់នៅច្រើនបំផុត និងធំបំផុតរបស់ប្រទេសហ្វីលីពីន ខណៈភ្លៀងធ្លាក់ខ្លាំងបានវាយបក់មកលើប្រទេសនេះ។ អភិបាលខេត្ត Cagayan បានផ្អាកសាលារៀន និងបានបិទការិយាល័យ និងបាននិយាយថា មនុស្សជាង១២.០០០ ត្រូវបានជម្លៀសខ្លួនពីទីក្រុងតំបន់ភ្នំនិងឆ្នេរសមុទ្រ កាលពីល្ងាចថ្ងៃអង្គារ។ ទន្ទឹមនឹងនេះដែរ នៅកោះតៃវ៉ាន់ រលកខ្ពស់ៗ និងភ្លៀងធ្លាក់ខ្លាំង បានវាយប្រហារនៅភាគខាងកើតកោះតៃវ៉ាន់ នៅថ្អៃព្រហស្បតិ៍នេះ ជាកន្លែងដែលអាជីវកម្ម និងសាលារៀនជាច្រើនកន្លែងត្រូវបានបិទ ហើយការព្រមានពីបំណាក់ដីត្រូវបានចេញ។

ការវាយបករបស់អ៊ុយក្រែនទៅលើរុស្ស៊ី កំពុងដំណើរការទៅមុខ ខណៈអាមេរិក ប្ដេជ្ញាគាំទ្រ

អាមេរិក៖ អ្នកនាំពាក្យសន្តិសុខជាតិរបស់សេតវិមាន លោក John Kirby បានប្រាប់ក្រុមអ្នកសារព័ត៌មានកាលពីថ្ងៃពុធទី២៦ កក្កដាថា ការវាយបករបស់អ៊ុយក្រែន ទៅលើកងកម្លាំងរបស់រុស្ស៊ី ពុំបានជាប់គាំងនោះទេ ទោះបីជាពុំមានវឌ្ឍនភាពពេញលេញតាមការចង់បានក៏ដោយ ។ លោក Kirby បានអត្ថាធិប្បាយបែបនេះ នៅពេលត្រូវបានសួរពីស្ថានភាពនៃការវាយបករបស់អ៊ុយក្រែននៅក្នុងសន្និសីទសារព័ត៌មានមួយ។ លោក Kirby បាននិយាយថា លោកប្រធានាធិបតី Zelenskyy ខ្លួនឯង បាននិយាយថា ដំណើរការវាយបកមិនមានល្បឿនលឿនដូចការចង់បានរបស់លោកទេ ហើយក៏មិនអាចរុលទៅមុខ រាល់ថ្ងៃតាមការចង់បានដែរ ។ សហរដ្ឋអាមេរិក នឹងមិនពាក់ព័ន្ធក្នុងរឿងនោះទេ។ អ្នកនាំពាក្យរូបនេះ លើកឡើងថាក្រុងវ៉ាស៊ីនតោន នឹងធ្វើឲ្យប្រាកដថា កងកម្លាំងអ៊ុយក្រែន មានគ្រឿងយុទ្ធោបករណ៍គ្រប់ប្រភេទ និងលទ្ធភាពដែលពួកគេត្រូវការចាំបាច់ក្នុងការវាយរុលទៅមុខ។ សហរដ្ឋអាមេរិក បានផ្ដល់ជំនួយផ្នែកយោធាជាង៤៣ពាន់លានដុល្លារអាមេរិកដល់អ៊ុយក្រែន ចាប់តាំងពីការវាយលុករបស់រុស្ស៊ីកាលពីថ្ងៃទី២៤ខែកុម្ភៈឆ្នាំ២០២២។ ក្រសួងការពារជាតិអាមេរិក បានប្រកាស ផ្ដល់ប្រាក់ចំនួន៤០០លានដុល្លារអាមេរិកបន្ថែមទៀតជាជំនួយបន្ថែមផ្នែកសន្តិសុខសម្រាប់ប្រទេសអ៊ុយក្រែន កាលពីដើមសប្ដាហ៍នេះ រួមទាំងមីស៊ីលការពារដែនអាកាស យានប្រយុទ្ធ និងយានដ្រូនខ្នាតតូច ជាច្រើនគ្រឿង៕

សវនាការរបស់លោក Hunter Biden បានបញ្ចប់ក្រោយចៅក្រម ពុំទាន់ត្រៀមទទួលយកកិច្ចព្រមព្រៀងផ្ដល់ចម្លើយពីភាពមានទោស

អាមេរិក៖ កិច្ចព្រមព្រៀងផ្ដល់ចម្លើយពីភាពមានទោសរវាង កូនប្រុសលោកប្រធានាធិបតីអាមេរិក Joe Biden គឺលោក Hunter Biden និងក្រសួងយុត្តិធម៌ ពុំសម្រេចបានឡើយ បន្ទាប់ពីការបើកសវនាការតុលាការកាលពីពុធ។ លោក Hunter Biden បានបរាជ័យ ក្នុងការបង់ប្រាក់ ចន្លោះពី ១,១លានដុល្លារ ទៅ១,៥លានដុល្លារអាមេរិក ឲ្យទៅក្រសួងពន្ធដារសហព័ន្ធមុនពេលកាលបរិច្ឆេទ ខាងផ្លូវច្បាប់ផុតកំណត់ និងត្រូវបានតម្រូវឲ្យផ្ដល់ចម្លើយពីភាពមានទោសចំពោះបទចោទប្រកាន់ការគេចវេះមិនបង់ពន្ធចំនួន២ករណី ដោយក្រុមរដ្ឋអាជ្ញាព្រមព្រៀងផ្ដល់ការផ្ដន្ទាទោស។ ប៉ុន្តែមុនពេលការសារភាពដំបូង អាចត្រូវបានទទួល កិច្ចព្រមព្រៀងនេះ បានចាប់ផ្តើមស៊ើបអង្កេត ហើយកិច្ចព្រមព្រៀងដែលត្រូវបានកែប្រែឡើងវិញ បានសម្រេចក្នុងអំឡុងពេលសវនាការ ដែលមិនត្រូវបានទទួលយកដោយចៅក្រមទេ។ចៅក្រមប្រចាំសង្កាត់លោកស្រី ម៉ាយ៉េឡិន ណូរ៉េកា (Maryellen Noreika) បាននិយាយថា លោកស្រី មិនអាចទទួលយកកិច្ចព្រមព្រៀងនៅថ្ងៃនេះបានទេ។លោកស្រី ណូរ៉េកា បាននិយាយថាលោកស្រីមានការព្រួយបារម្ភ អំពីគូភាគីដែលហាក់ដូចជាភ្ជាប់កិច្ចព្រមព្រៀងស្នើសុំបង់ពន្ធដើម្បីដោះស្រាយការចោទប្រកាន់ពីបទឧក្រិដ្ឋពីបទកាន់កាប់អាវុធខុសច្បាប់។ ក្នុងអំឡុងពេលដំណើរការ ក្រុមអាជ្ញាបានបញ្ជាក់ថា ការស៊ើបអង្កេតលើលោក Hunter Biden កំពុងបន្ត។បន្ទាប់ពីការចរចារួច កូនប្រុសរបស់ប្រធានាធិបតីបានយល់ព្រមផ្ដល់ចម្លើយពីភាពមានទោសចំពោះការចោទប្រកាន់ការគេចវេះមិនបង់ពន្ធចំនួនពីរករណី ក្នុងកិច្ចព្រមព្រៀងដែលមានតែការប្រព្រឹត្តទាក់ទងនឹងបទល្មើសពន្ធដារ ការប្រើប្រាស់គ្រឿងញៀន និងការកាន់កាប់អាវុធគ្មានការអនុញ្ញាត។ ភាគីទាំងពីរបានព្រមព្រៀងគ្នាថា កិច្ចព្រមព្រៀងនេះពុំបានការពាររូបលោកពីការចោទប្រកាន់ដែលអាចកើតមាននាពេលអនាគតនោះទេ។ ប៉ុន្តែចៅក្រមមិនពេញចិត្តចំពោះកិច្ចព្រមព្រៀងនេះឡើយ៕

បណ្ដាញសង្គម

ព័ត៌មានថ្មីៗ

កម្ពុជា-អាស៊ែបៃហ្សង់ ប្ដេជ្ញាបន្តពូនជ្រំ និងជំរុញទំនាក់ទំនង និងកិច្ចសហប្រតិបត្តិការទ្វេភាគី ឱ្យកាន់តែរឹងមាំ និងរីកចម្រើន

ប៉ូឡូញពង្រាយនគរបាលជាង ២០.០០០នាក់ នៅសាលារៀន ក្រោយការវាយប្រហារដោយកាំបិតជាបន្តបន្ទាប់

សិស្សវិទ្យាល័យ នៅបារាំង គ្រោងធ្វើបាតុកម្មថ្មី ដោយសង្ឃឹមរក្សាសន្ទុះចលនាទាមទារ

ភ្នាក់ងាររាជរដ្ឋាភិបាលកម្ពុជាអញ្ជើញដល់ប្រទេសហូឡង់ ដើម្បីចូលរួមកិច្ចប្រជុំលើកទី២ នៃយន្តការUNCLOS

តម្លៃប្រេងធ្លាក់ចុះ ខណៈរំពឹងថា ការផ្អាកការវាយប្រហារលើថាមពល រវាងរុស្ស៊ី និងអ៊ុយក្រែន នឹងជំរុញការផ្គត់ផ្គង់

ការស្ទង់មតិ៖ បេក្ខជនស្ដាំនិយមជ្រុល និងឆ្វេងនិយមជ្រុល ឆ្ពោះទៅជុំទី២ ខណៈនយោបាយបារាំងបែកបាក់កាន់តែខ្លាំង

ចិនដាក់ទណ្ឌកម្មលើរដ្ឋមន្ត្រីប៉ារ៉ាហ្គាយ និងបេលីស ជុំវិញការមានទំនាក់ទំនងជាមួយកោះតៃវ៉ាន់

អ៊ីស្រាអែលសម្លាប់ជនជាតិប៉ាឡេស្ទីន ២នាក់ ខណៈធ្វើឱ្យ ៣នាក់រងរបួស ជាការរំលោភបទឈប់បាញ់ថ្មី នៅហ្កាហ្សា

ក្រុមប្រឆាំង និងអ្នកសារព័ត៌មាន ចោទប្រកាន់នគរបាលប្រើអំពើហិង្សា អំឡុងពេលមានការតវ៉ា នៅឥណ្ឌា

ទួរគី ប៉ាគីស្ថាន អេហ្ស៊ីប និងអារ៉ាប៊ីសាអ៊ូឌីត ថ្កោលទោសការវាយប្រហាររបស់ក្រុមហ៊ូទី លើអាកាសយានដ្ឋាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877