BTV NEWS

សមត្ថកិច្ចបង្ក្រាបទីតាំង Online Scams ចំនួន៩កន្លែងនៅក្រុងបាវិត ឃាត់ខ្លួនជនបរទេសជាង ៣០០នាក់

កម្លាំងជំនាញបន្តឆ្មក់ចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនបរទេស ២៧នាក់

គណៈបញ្ជាការឯកភាពរាជធានីចុះបង្ក្រាបទីតាំងឆបោកតាមប្រពន្ធ័បច្ចេកវិទ្យា នៅខណ្ឌសែនសុខ ឃាត់ជនសង្ស័យ០៨នាក់

បណ្តេញជនបរទេសជិត ៥០០នាក់ ចេញពីកម្ពុជាករណីឆបោកតាមប្រព័ន្ធអនឡាញ

សន្តិសុខ និង សង្គម

មនុស្សជាង ៦៧០ នាក់ត្រូវគេបារម្ភថា ស្លាប់ក្នុងបំណាក់ដីនៅប៉ាពួនូវ៉ែលហ្គីណេ ខណៈការសង្រ្គោះកំពុងបន្ត

ក្រុមសង្គ្រោះបន្ទាន់នៅប្រទេសប៉ាពួនូវ៉ែលហ្គីណេ នៅថ្ងៃច័ន្ទ (២៧ ឧសភា) នេះ បានបន្តកិច្ចខិតខំប្រឹងប្រែងជួយសង្គ្រោះរបស់ពួកគេដើម្បីស្វែងរកអ្នកនៅរស់រានមានជីវិត បន្ទាប់ពីមនុស្សជាង ៦៧០ នាក់ត្រូវគេបារម្ភថាបានស្លាប់ នៅក្នុងបំណាក់ដីដ៏ធំមួយ ដែលបានវាយប្រហារលើភូមិដាច់ស្រយាលមួយនៅក្នុងតំបន់ភាគខាងជើងនៃប្រទេសប៉ាស៊ីហ្វិកមួយនេះ។ទីភ្នាក់ងារអន្តោប្រវេសន៍របស់អង្គការសហប្រជាជាតិ កាលពីថ្ងៃអាទិត្យ បាននិយាយថាមនុស្សប្រហែល ១.២៥០ នាក់ត្រូវបានផ្លាស់ទីលំនៅពីបំណាក់ដីដែលបានកើតឡើងនៅក្នុងខេត្ត អែនហ្កា (Enga) របស់ ប្រទេសប៉ាពួនូវ៉ែលហ្គីណេ កាលពីព្រឹកព្រលឹមថ្ងៃសុក្រ សប្ដាហ៍មុន។ លំនៅឋានជាង ១៥០ ខ្នងត្រូវបានកប់ក្រោមបំណាក់ដី ហើយលំនៅឋានប្រហែល ២៥០ ខ្នងត្រូវបានប្រជាជនបោះបង់ចោល។នាយកប្រចាំប្រទេសនៃអង្គការ ឃែរ (CARE) អន្តរជាតិរបស់ប៉ាពួនូវ៉ែលហ្គីណេ លោកស្រី ចាស្ទីន មែកម៉ាហូន (Justine McMahon) បានប្រាប់ទូរទស្សន៍ ABC នៅថ្ងៃចន្ទ នេះថា ស្ថានភាពដ៏គ្រោះថ្នាក់ និងសណ្ឋានដីមិនស្ថិតស្ថេរ កំពុងរារាំងដល់កិច្ចខិតខំប្រឹងប្រែងជួយសង្គ្រោះ ហើយមនុស្សប្រមាណ ៤.០០០ នាក់បានរស់នៅក្បែរតំបន់រងផលប៉ះពាល់នោះ។ក្រុមសង្គ្រោះបន្ទាន់កំពុងបន្តកិច្ចខិតខំប្រឹងប្រែងសង្រ្គោះ ប៉ុន្តែឧបករណ៍ធុនធ្ងន់ដែលត្រូវការសម្រាប់ការប្រតិបត្តិការមិនទាន់ទៅដល់ភូមិនៅឡើយទេ ដោយសារផ្លូវធំៗនៅតែត្រូវបានកាត់ផ្តាច់ ហើយការចេញចូលតំបន់កើតហេតុបានតែតាមរយៈឧទ្ធម្ភាគចក្រប៉ុណ្ណោះ៕

ព្យុះស៊ីក្លូនវាយប្រហារបង់ក្លាដែស ខណៈមនុស្សជិត១លាននាក់ជម្លៀសទៅទីជម្រកបណ្ដោះអាសន្ន

ព្យុះស៊ីក្លូនដ៏ខ្លាំងក្លាមួយបានបោកបក់ចូលឆ្នេរសមុទ្រនៅតំបន់ទំនាបនៃប្រទេសបង់ក្លាដែសកាលពីថ្ងៃអាទិត្យ ២៦ ឧសភា ដោយមនុស្សជិតមួយលាននាក់បានជម្លៀសខ្លួនចេញពីដីគោក។ ប្រធានមន្ទីរឧតុនិយមបង់ក្លាដែស លោក អាហ្ស៊ីហ្សើររ៉ាម៉ាន់ (Azizur Rahman) បានប្រាប់សារព័ត៌មាន AFP ថា ព្យុះស៊ីក្លូន មានឈ្មោះថា រីម៉ាល់ (Remal) ដ៏ធ្ងន់ធ្ងរបានចាប់ផ្តើមឆ្លងកាត់ឆ្នេរសមុទ្របង់ក្លាដែស ដោយបន្ថែមថា ព្យុះដ៏មានទ្ធិពលនេះ អាចបន្តវាយលុកតំបន់ឆ្នេរសមុទ្ររហូតដល់យ៉ាងហោចណាស់ព្រឹកព្រលឹមថ្ងៃចន្ទនេះ។ យើងបានកត់ត្រាល្បឿនខ្យល់អតិបរមា ៩០ គីឡូម៉ែត្រក្នុងមួយម៉ោង ប៉ុន្តែល្បឿនខ្យល់អាចនឹងកើនឡើងខ្លាំងជាងនេះ។ក្រុមអ្នកព្យាករណ៍អាកាសធាតុ បានព្យាករណ៍ថា មានខ្យល់បោកបក់ក្នុងល្បឿន ១៣០ គីឡូម៉ែត្រក្នុងមួយម៉ោង ដោយមានភ្លៀងធ្លាក់ខ្លាំង ហើយខ្យល់ក៏កំពុងបក់បោកទៅលើប្រទេសឥណ្ឌាជិតខាងផងដែរ។ក្រុមអាជ្ញាធរបានដំឡើងសញ្ញាគ្រោះថ្នាក់ដល់កម្រិតខ្ពស់បំផុត។ គួររម្លឹកថា ព្យុះស៊ីក្លូន ធ្លាប់បានសម្លាប់មនុស្សរាប់សែននាក់ក្នុងប្រទេសបង់ក្លាដែសក្នុងរយៈពេលប៉ុន្មានទសវត្សរ៍ថ្មីៗនេះ ប៉ុន្តែចំនួននៃព្យុះកំបុតត្បូងដ៏បំផ្លិចបំផ្លាញ ដែលវាយប្រហារឆ្នេរសមុទ្រមានប្រជាជនរស់នៅយ៉ាងច្រើន បានកើនឡើងយ៉ាងខ្លាំងពីមួយឆ្នាំទៅមួយឆ្នាំពិសេស៣ឆ្នាំចុងក្រោយ ដោយសារឥទ្ធិពលនៃបម្រែបម្រួលអាកាសធាតុ៕

អ៊ីស្រាអែលវាយប្រហារទីក្រុង Rafah ក្រោយតុលាការកំពូលរបស់ UN បញ្ជាឲ្យខ្លួនបញ្ឈប់ការវាយលុក

អ៊ីស្រាអែលបានទម្លាក់គ្រាប់បែកលើតំបន់ហ្កាហ្សា ក្នុងនោះរួមទាំងទីក្រុង Rafah នៅថ្ងៃសៅរ៍ (ទី២៥ ខែឧសភា) នេះ ពោលគឺមួយថ្ងៃបន្ទាប់ពីតុលាការកំពូលរបស់អង្គការសហប្រជាជាតិ (UN) បានបញ្ជាឲ្យខ្លួនបញ្ឈប់ប្រតិបត្តិការយោធា នៅក្នុងទីក្រុងភាគខាងត្បូងមួយនេះ ខណៈកិច្ចប្រឹងប្រែង កំពុងដំណើរការនៅទីក្រុងប៉ារីសប្រទេសបារាំង ដើម្បីស្វែងរកបទឈប់បាញ់នៅក្នុងសង្គ្រាម ដែលបង្កឡើងដោយការវាយប្រហាររបស់ក្រុមហាម៉ាស កាលថ្ងៃទី៧ ខែតុលា។ ជាមួយគ្នានេះ តុលាការយុត្តិធម៌អន្តរជាតិ (ICJ) ក៏បានទាមទារផងដែរឲ្យមាន «ការដោះលែងជាបន្ទាន់ និងដោយគ្មានលក្ខខណ្ឌ» ចំពោះចំណាប់ថ្នូរទាំងអស់ ដែលនៅតែត្រូវបានឃុំខ្លួនដោយក្រុមសកម្មប្រយុទ្ធប៉ាឡេស្ទីន ដោយការទាមទារនោះកើតមានឡើងប៉ុន្មានម៉ោងបន្ទាប់ពីយោធាអ៊ីស្រាអែល បានប្រកាសថា កងទ័ពបានយកមកវិញនូវសពចំណាប់ថ្នូរ ៣នាក់ទៀត ពីភាគខាងជើងតំបន់ហ្កាហ្សា។លើសពីនេះទៀត តុលាការដែលមានមូលដ្ឋាននៅទីក្រុងឡាអេ ប្រទេសហូឡង់ ដែលបញ្ជារបស់ខ្លួនមានជាប់កាតព្វកិច្ចស្របច្បាប់ ប៉ុន្តែខ្វះយន្តការអនុវត្តដោយផ្ទាល់នោះ ក៏បានបញ្ជាឲ្យអ៊ីស្រាអែលបន្តបើកច្រកឆ្លងកាត់ Rafah រវាងប្រទេសអេហ្ស៊ីប និងតំបន់ហ្កាហ្សា ដែលខ្លួនបានបិទកាលពីដើមខែឧសភា នៅពេលចាប់ផ្តើមវាយប្រហារលើទីក្រុង។យ៉ាងណាក្ដី អ៊ីស្រាអែលមិនបានផ្តល់ការបង្ហាញថា ខ្លួនកំពុងរៀបចំកែប្រែគោលដៅ នៅទីក្រុង Rafah នោះទេ ដោយទទូចថា តុលាការបានយល់ពីស្ថានការណ៍ខុស។ នៅក្នុងសេចក្តីថ្លែងការណ៍រួមមួយជាមួយអ្នកនាំពាក្យក្រសួងការបរទេសរបស់អ៊ីស្រាអែល ទីប្រឹក្សាសន្តិសុខជាតិ លោក Tzachi Hanegbi បានប្រាប់ឲ្យដឹងថា៖ «អ៊ីស្រាអែលមិនមាន និងនឹងមិនធ្វើប្រតិបត្តិការយោធា នៅក្នុងតំបន់ Rafah ដែលបង្កើតលក្ខខណ្ឌរស់នៅ ដែលអាចបណ្តាលឲ្យមានការបំផ្លិចបំផ្លាញប្រជាជនប៉ាឡេស្ទីនទាំងមូល ឬមួយផ្នែកនោះទេ»។ក្រុមហាម៉ាសដែលបានគ្រប់គ្រងតំបន់ហ្កហ្សាតាំងពីឆ្នាំ២០០៧ មកនោះ បានស្វាគមន៍សេចក្តីសម្រេចរបស់ ICJ លើទីក្រុង Rafah ប៉ុន្តែបានរិះគន់ការសម្រេចរបស់ស្ថាប័ននេះ ក្នុងការមិនបញ្ចូលផ្នែកផ្សេងទៀតនៃតំបន់ហ្កាហ្សាដែលហែកហួរដោយសង្រ្គាម ក្នុងបទបញ្ជានេះ៕

ស្ត្រីម្នាក់ត្រូវកាត់ទោសឲ្យជាប់ពន្ធនាគារពីបទសម្អាតរូបិយប័ណ្ណគ្រីបតូ នៅអង់គ្លេស តាមរយៈការឆបោក ៦,៤ពាន់លានដុល្លារ នៅចិន

ស្ត្រីម្នាក់ត្រូវបានកាត់ទោសឲ្យជាប់ពន្ធនាគារជិត ៧ឆ្នាំ កាលពីថ្ងៃសុក្រ (ទី២៤ ខែឧសភា) ពីបទសម្អាតលុយកខ្វក់ បន្ទាប់ពីមានការកាត់ក្តី នៅតុលាការទីក្រុងឡុងដ្រ៍ ដោយរូបនាងត្រូវបានចោទប្រកាន់ពីបទបំប្លែងកាក់ប៊ីតខន (រូបិយប័ណ្ណគ្រីបតូ) ទៅជាសាច់ប្រាក់ និងទ្រព្យសម្បត្តិ ដើម្បីជួយបិទបាំងដំណើរការឆបោកទឹកប្រាក់ ៥ពាន់លានផោន (៦,៤ពាន់លានដុល្លារ)។ព្រះរាជអាជ្ញាបានឲ្យដឹងថា លោកស្រី Wen Jian បានជួយលាក់ប្រភពលុយដែលត្រូវបានគេចោទប្រកាន់ថាបានលួចពីអ្នកវិនិយោគចិនជិត ១៣០.០០០នាក់ នៅក្នុងគម្រោងទ្រព្យសម្បត្តិបោកប្រាស់ នៅចន្លោះឆ្នាំ២០១៤ និងឆ្នាំ២០១៧។ អ្នកទោសស្រីរូបនេះមិនត្រូវបានចោទប្រកាន់ថា មានជាប់ពាក់ព័ន្ធនឹងការឆបោកដែលរដ្ឋអាជ្ញាបាននិយាយថា ត្រូវបានរៀបគម្រោងដោយស្ត្រីម្នាក់ទៀត ដែលលោកស្រី Wen ជឿថា ជាអ្នកមានទ្រព្យស្ដុកស្ដម្ភមិនធម្មតាម្នាក់។ជាផ្នែកមួយនៃការស៊ើបអង្កេតរបស់ពួកគេ នគរបាលអង់គ្លេសបានរឹបអូសហឹបមួយដែលមានទុកកាក់ប៊ីតខនជាង ៦១.០០០កាក់ ដែលនេះធ្វើឲ្យវាជាក្លាយជាការរឹបអូសរូបិយប័ណ្ណគ្រីបតូដ៏ធំបំផុតមួយ តាមរយៈការអនុវត្តច្បាប់ទូទាំងពិភពលោក។ អំឡុងសវនាការរបស់លោកស្រី Wen ព្រះរាជអាជ្ញាបាននិយាយថា កាក់ប៊ីតខន ៦១.០០០កាក់នេះ មានតម្លៃប្រហែល ១,៤ពាន់លានផោន នៅពេលដែលនគរបាលទទួលបានសិទ្ធិចូលទៅរឹបអូស ក្នុងឆ្នាំ២០២១។ តែឥឡូវនេះវាមានតម្លៃជាង ៣ពាន់លានផោន។លោកស្រី Wen វ័យ ៤២ឆ្នាំ បានបដិសេធបទចោទ ៣ករណី ពាក់ព័ន្ធនឹងការសម្អាតលុយកខ្វក់ ហើយបាននិយាយថា លោកស្រីមិនមានចំណេះដឹងអំពីបទល្មើសឧក្រិដ្ឋដែលទាក់ទងនឹងកាក់ប៊ីតខននោះទេ។ អ្នកទោសរូបនេះត្រូវបានក្រុមប្រឹក្សាតុលាការរកឃើញថា មានទោស ១ករណី ក្នុងខែមីនា ក្រោយការកាត់ក្ដី នៅតុលាការ Southwark Crown តែគណៈវិនិច្ឆ័យមិនអាចឈានដល់ការចេញសាលក្រមលើបទចោទ ២ករណីផ្សេងទៀតទ។ កាលពីថ្ងៃសុក្រ លោកស្រី Wen ត្រូវបានកាត់ទោសឲ្យជាប់ពន្ធនាគាររយៈពេល ៦ឆ្នាំ និង ៨ខែ ពីបទសម្អាតលុយកខ្វក់ ដែលលោកស្រីត្រូវបានរកឃើញថា មានទោសពិតប្រាកដមែន៕

មនុស្សជាង ៣០០ នាក់ត្រូវបានកប់ក្នុងបំណាក់ដីនៅប៉ាពួ នូវ៉ែលហ្គីនណេ

ប្រព័ន្ធផ្សព្វផ្សាយក្នុងស្រុក បានរាយការណ៍នៅថ្ងៃសៅរ៍នេះថា មនុស្សជាង៣០០នាក់ និងលំនៅឋានជាង ១.១០០ខ្នង ត្រូវបានកប់ដោយបំណាក់ដីដ៏ធំ នៅភាគខាងជើង ប្រទេសប៉ាពួ នូវ៉ែលហ្គីនណេ។មនុស្សរាប់រយនាក់ ត្រូវបានគេបារម្ភថា ស្លាប់នៅក្នុងបំណាក់ដី ដែលបានកើតឡើងនៅភូមិ Kaokalam ក្នុងខេត្ត Enga ចម្ងាយប្រហែល៦០០ គីឡូម៉ែត្រ ភាគពាយព្យរដ្ឋធានី Port Moresby។សារព័ត៌មាន បាននិយាយថា បំណាក់ដីនៅក្នុងប្រទេសតំបន់ប៉ាស៊ីហ្វិកភាគខាងជើងប្រទេសអូស្ត្រាលីបានកប់មនុស្សជាង៣០០នាក់ និងលំនៅឋាន១.១៨២ខ្នង។ ក្រសួងការបរទេស និងពាណិជ្ជកម្មរបស់ប្រទេសអូស្ត្រាលី បាននិយាយនៅថ្ងៃសៅរ៍នេះថា ភូមិចំនួន៦ បានរងផលប៉ះពាល់ ដោយបំណាក់ដីនៅក្នុងតំបន់ Mulitaka ។អ្នកនាំពាក្យក្រសួង បាននិយាយនៅក្នុងសេចក្តីថ្លែងការណ៍ថា គណៈកម្មាធិការជាន់ខ្ពស់របស់ប្រទេសអូស្ត្រាលី នៅទីក្រុង Port Moresby កំពុងទាក់ទងយ៉ាងជិតស្និទ្ធជាមួយអាជ្ញាធរ ប៉ាពួ នូវ៉ែលហ្គីណេ សម្រាប់ការវាយតម្លៃបន្ថែមលើទំហំនៃការខូចខាត និងជនរងគ្រោះ។ សារព័ត៌មាន ABC បានរាយការណ៍នៅថ្ងៃសៅរ៍នេះថា សាកសពចំនួន៤នាក់ ត្រូវបានគេយកចេញពីទីក្រុង បន្ទាប់ពីក្រុមសង្គ្រោះបន្ទាន់បានទៅដល់តំបន់ដែលមានប្រជាជនរស់នៅដាច់ៗពីគ្នា ខណៈចំនួនអ្នកស្លាប់ត្រូវបានគេរំពឹងថា នឹងកើនឡើង។ប្រព័ន្ធផ្សព្វផ្សាយបានរាយការណ៍ថា បំណាក់ដី បានបិទផ្លូវហាយវ៉េ ធ្វើឱ្យឧទ្ធម្ភាគចក្រត្រូវបានប្រើប្រាស់ ជាមធ្យោបាយតែមួយគត់ដើម្បីទៅដល់តំបន់រងគ្រោះ។ នាយករដ្ឋមន្ត្រី លោក James Marape បាននិយាយថា មន្ត្រីគ្រោះមហន្តរាយ កងកម្លាំងការពារជាតិ និងក្រសួងសាធារណៈការនិងផ្លូវហាយវ៉េ កំពុងបង្កើនកិច្ចខិតខំប្រឹងប្រែងសង្គ្រោះ និងស្តារឡើងវិញ។

នគរបាលរាជធានី នឹងធ្វើសន្និសិទបង្ហាញមុខក្រុមក្មេងទំនើងដែលបង្ក្រាបបាន នៅរសៀលនេះ

ភ្នំពេញ៖ យោងតាមប្រភពមន្ត្រីនគរបាលរាជធានីភ្នំពេញ នៅម៉ោង១៤ និង០០នាទីរសៀលថ្ងៃទី២៥ ខែឧសភា ឆ្នាំ២០២៤នេះ សមត្ថកិច្ចនឹងធ្វើសន្និសិទព័ត៌មានបង្ហាញមុខក្រុមក្មេងទំនើងជាច្រើននាក់ ដែលធ្វើការបង្ក្រាបបានក្នុងរយះពេល២ថ្ងៃមកនេះ ។សន្និសិទនេះ នឹងធ្វើឡើងនៅការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានី ដោយបង្ហាញមុខក្រុមជនសង្ស័យ រួមជាមួយវត្ថុតាងមានជាដាវ និងកាំបិតជាច្រើន ដែលបានដកហូត បន្ទាប់ពីក្រុមទាំងនេះ បានធ្វើសកម្មភាពអុកឡុក និងដើរកាប់ចាក់យ៉ាងខ្លាំងខ្លាក្នុងរាជធានីភ្នំពេញ ។ ក្នុងរយះពេល២ថ្ងៃមកនេះ កម្លាំងសមត្ថកិច្ចទូទាំងរាជធានីភ្នំពេញ ដោយបានសហការ ជាមួយកម្លាំងនគរបាល នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានបើកប្រតិបត្តិការទ្រង់ទ្រាយធំ ក្នុងការចុះល្បាតក្នុងភូមិសាស្ត្ររាជធានី ដើម្បីបង្ការទប់ស្កាត់ និងបង្ក្រាបលើសកម្មភាពក្រុមក្មេងទំនើង ដែលបានបង្កើតភាពអសន្តិសុខ បង្កជាក្តីព្រួយបារម្ភ និងភ័យខ្លាចដល់ប្រជាពលរដ្ឋស្លូតត្រង់នៅក្នុងសង្គមជាតិ ។ ប្រតិបត្តិការដ៏ក្តៅគគុករបស់កម្លាំងសមត្ថកិច្ចនេះ ធ្វើឡើង បន្ទាប់ពីមានបទបញ្ជាដ៏ម៉ឺងម៉ាត់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដែលបានបញ្ជារដល់កងកម្លាំងគ្រប់លំដាប់ថ្នាក់ ពិសេសអភិបាលរាជធានីខេត្តទាំង២៤ ធ្វើយ៉ាងណាដាច់ខាតត្រូវតែបង្ក្រាបឱ្យមានប្រសិទ្ធិភាពបំផុត លើសកម្មភាពក្រុមក្មេងទំនើង ដែលកំពុងមានការផុសផុលឡើងខ្លាំង បង្កជាភាពអសន្តិសុខដល់ពលរដ្ឋ និងសង្គមជាតិ ក្នុងពេលបច្ចុប្បន្ននេះ ៕ អត្ថបទ ៖ លីហេង

បាតុករគាំទ្រប៉ាឡេស្ទីននិយាយថា «មិនគ្រប់គ្រាន់ទេ» សម្រាប់សេចក្តីសម្រេចរបស់ ICJ លើអ៊ីស្រាអែល

ក្រុមបាតុករគាំទ្រប៉ាឡេស្ទីនមួយក្រុម បានមកប្រមូលផ្តុំគ្នានៅខាងក្រៅតុលាការយុត្តិធម៌អន្តរជាតិ (ICJ) កាលពីថ្ងៃសុក្រ ដោយបានស្តីបន្ទោសចំពោះសេចក្តីសម្រេចរបស់តុលាការដែលឲ្យអ៊ីស្រាអែលត្រឹមតែ បញ្ឈប់ប្រតិបត្តិការយោធាទាំងអស់នៅទីក្រុងRafah។ អ្នកតវ៉ានិយាយថា សវនាការនៅថ្ងៃនេះល្អ ប៉ុន្តែវាមិនទាន់គ្រប់គ្រាន់នៅឡើយទេ។ «សេរីភាពប៉ាឡេស្ទីន ព្រមទាំងដំណោះស្រាយរដ្ឋពីរដោយសេរីភាព នោះទើបគ្រប់គ្រាន់។ វាល្អសម្រាប់ប្រជាជនទាំងសងខាង ទាំងសាសនា និងសម្រាប់តំបន់មជ្ឈិមបូព៌ាផងដែរ។ចៅក្រមតុលាការកំពូលរបស់អង្គការសហប្រជាជាតិ បានបង្គាប់ឱ្យអ៊ីស្រាអែល បញ្ឈប់ការវាយលុកដោយយោធារបស់ខ្លួនលើទីក្រុងRafah ភាគខាងត្បូងតំបន់ហ្កាហ្សា នៅក្នុងសេចក្តីសម្រេចបន្ទាន់មួយលើករណីនាំមកដោយប្រទេសអាហ្រ្វិកខាងត្បូង ដែលចោទប្រកាន់អ៊ីស្រាអែលពីបទប្រល័យពូជសាសន៍។ តុលាការ ក៏បានបង្គាប់ឱ្យអ៊ីស្រាអែលបើកច្រកឆ្លងកាត់ទីក្រុង Rafah រវាងអេហ្ស៊ីប និងតំបន់ហ្កាហ្សា ដើម្បីអនុញ្ញាតឲ្យមានការដឹកជញ្ជូនជំនួយមនុស្សធម៌ចូលទៅក្នុងតំបន់ហ៊ុមព័ទ្ធ។បាតុករ អ្នកស្រី អ៊ីមម៉ាន ខាសាណេ(Eman Khasawneh) បាននិយាយថាតុលាការយុត្តិធម៌អន្តរជាតិ (ICJ) គួរតែបង្គាប់ឱ្យមានបទឈប់បាញ់ ដែលការចេញសេចក្តីសម្រេចរបស់តុលាការនៅពេលនេះ មិនគ្រប់គ្រាន់នៅឡើយទេ។ យើងកោតសរសើរចំពោះការចេញសេចក្តីសម្រេចឲ្យបញ្ឈប់ប្រតិបត្តិការនៅទីក្រុង Rafah ប៉ុន្តែវាមិនទាន់គ្រប់គ្រាន់។អ៊ីស្រាអែល បានច្រានចោល ការចោទប្រកាន់ករណីប្រល័យពូជសាសន៍ ម្តងហើយម្តងទៀតថា ការចោទប្រកាន់នេះ «គ្មានមូលដ្ឋាន» ដោយលើកហេតុផលនៅក្នុងតុលាការថា ប្រតិបត្តិការរបស់ខ្លួននៅតំបន់ហ្កាហ្សា គឺជាការ ការពារខ្លួន និងបានដាក់គោលដៅតែទៅលើក្រុមសកម្មប្រយុទ្ធហាម៉ាស ដែលបានវាយប្រហារលើអ៊ីស្រាអែល កាលពីថ្ងៃទី ៧ ខែតុលា។

ចំនួនអ្នកស្លាប់ជនជាតិប៉ាឡេស្ទីន នៅតំបន់ហ្កាហ្សា កើនឡើងលើសពី ៣៥.៨០០ នាក់

អាជ្ញាធរសុខាភិបាលប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយចេញផ្សាយកាលពីថ្ងៃព្រហស្បតិ៍ (២៣ ឧសភា) ថា ចំនួនអ្នកស្លាប់របស់ប៉ាឡេស្ទីន ពីការវាយប្រហារដែលកំពុងបន្តរបស់អ៊ីស្រាអែល នៅតំបន់ហ្កាហ្សាស្ទ្រីប បានកើនឡើងដល់ជាង ៣៥.៨០០ នាក់ និងរបួសជាង ៨០.០០០ នាក់។ យោងតាមសេចក្តីថ្លែងការណ៍បានឱ្យដឹងថា ក្នុងរយៈពេល ២៤ ម៉ោងកន្លងទៅ ប្រតិបត្តិការយោធាអ៊ីស្រាអែល នៅតំបន់ហ្កាហ្សា បានបណ្តាលឱ្យមនុស្ស ៩១ នាក់ស្លាប់។តាំងពីយប់ថ្ងៃពុធមក យោធាអ៊ីស្រាអែល បានធ្វើការវាយប្រហារតាមអាកាសលើតំបន់ជាច្រើននៅភាគកណ្តាល និងភាគខាងជើងហ្កាហ្សា។ កាលពីថ្ងៃព្រហស្បត្តិ៍ យោធានិយាយថា ខ្លួនមិនទាន់បានបើកការវាយលុកដ៏ធំលើទីក្រុងរ៉ាហ្វា ភាគខាងត្បូងអេហ្ស៊ីប ដែលជាអ្នកជិតខាងរបស់តំបន់ហ្កាហ្សា នៅឡើយទេ ប៉ុន្តែកំពុងពង្រឹងការប្រយុទ្ធរបស់ខ្លួន ហើយនឹងបញ្ជូនទាហានបន្ថែមទៀតទៅកាន់ទីក្រុងនេះ។អ្នកនាំពាក្យកងកម្លាំងការពារអ៊ីស្រាអែល (IDF) លោក ដានីញ៉ែល ហាហ្ការី (Daniel Hagari) បាននិយាយកាលពីថ្ងៃព្រហស្បតិ៍ថា រហូតមកដល់ពេលនេះ កងកម្លាំងអ៊ីស្រាអែល បានសម្លាប់យុទ្ធជនប្រដាប់អាវុធរាប់សិបនាក់នៅក្នុងទីក្រុងរ៉ាហ្វា បានរកឃើញផ្លូវរូងក្រោមដីរាប់សិបកន្លែង និងបានបំផ្លាញទីតាំងយោធា រួមទាំងកន្លែងបាញ់គ្រាប់រ៉ូកែតផងដែរ។អាជ្ញាធរសុខាភិបាលហ្កាហ្សា បាននិយាយកាលពីយប់ថ្ងៃព្រហស្បតិ៍ថា ស្តុកប្រេងឥន្ធនៈសម្រាប់មន្ទីរពេទ្យ អាល់អាកសា ម៉ាទីស (Al-Aqsa Martyrs) កំពុងជិតអស់ ហើយមន្ទីរពេទ្យនឹងឈប់ដំណើរការ ដោយធ្វើឱ្យអ្នករងរបួស ស្ថិតក្នុងស្ថានភាពគំរាមកំហែងដល់អាយុជីវិត៕

មនុស្ស១១នាក់ ស្លាប់ ក្នុងការផ្ទុះរោងចក្រផលិតស្ករស នៅប្រទេសតង់ហ្សានី

មន្ត្រីតំបន់ និយាយថា ជនបរទេសបីនាក់មកពីប្រទេសប្រេស៊ីល កេនយ៉ា និងប្រទេសឥណ្ឌា ព្រមទាំងអ្នកបច្ចេកទេសនៅប្រទេសតង់ហ្សានីចំនួន៨នាក់ បានស្លាប់ ហើយពីរនាក់ផ្សេងទៀត បានរងរបួសធ្ងន់ កាលពីថ្ងៃព្រហស្បតិ៍ ក្នុងការផ្ទុះនៅរោងចក្រផលិតស្ករសមួយកន្លែងក្នុងតំបន់ Morogoro ភាគខាងកើត ប្រទេសតង់ហ្សានី។ លោក Shaban Marujugo មេបញ្ជាការក្រុមពន្លត់អគ្គិភ័យក្នុងតំបន់ Morogoro បាននិយាយថា ការផ្ទុះបានកើតឡើងនៅរោងចក្រផលិតស្ករស អ៊ឹមទីបវ៉ា(Mtibwa)។លោក ជូម៉ា រ៉ាម៉ាដហាន ប៉ាឡាំបា (Juma Ramadhan Palamba) បុគ្គលិកផ្នែកអគ្គិសនីនៅរោងចក្រ បាននិយាយថា ការផ្ទុះនេះបានកើតឡើងបន្ទាប់ពីបន្ទប់ត្រួតពិនិត្យ ជាកន្លែងដែលបុគ្គលិកអគ្គិសនី កំពុងធ្វើតេស្ត ប្រព័ន្ធកម្តៅដែលជួសជុលថ្មី សម្រាប់ការផលិតស្ករស។ ការផ្ទុះកើតឡើង បន្ទាប់ពីបំពង់បញ្ចេញចំហាយចូលទៅក្នុងឡចំហាយ បានផ្ទុះ។ លោក និយាយថា ប្រព័ន្ធដែលបានជួសជុលថ្មី គ្រោងនឹងចាប់ផ្តើមប្រតិបត្តិការនៅថ្ងៃសុក្រនេះ។ លោកនិយាយថា លោកបានរត់គេចខ្លួនចេញដោយគ្មានរបួសនោះទេ ដោយសារតែបានចាកចេញពីបន្ទប់ត្រួតពិនិត្យ ដើម្បីទៅទទួលទូរស័ព្ទនៅពេលមានការផ្ទុះ។ស្នងការប្រចាំតំបន់ Morogoro លោក Adam Malima កាលពីថ្ងៃព្រហស្បតិ៍ បានបញ្ជាឱ្យបិទរោងចក្រផលិតស្ករសនេះ រយៈពេលបីថ្ងៃបន្ទាប់ពីការផ្ទុះ ដែលលោកបាននិយាយថា នឹងត្រួសត្រាយផ្លូវសម្រាប់កងកម្លាំងពន្លត់អគ្គិភ័យនិងជួយសង្គ្រោះរបស់ប្រទេសតង់ហ្សានី ដើម្បីស៊ើបអង្កេតពីមូលហេតុនៃឧបទ្ទវហេតុ។ បន្ទាប់ពីការផ្ទុះ រដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោក Ashatu Kijaji និងរដ្ឋមន្ត្រីក្រសួងកសិកម្ម លោក Hussein Bashe បានទៅពិនិត្យមើលរោងចក្រ និងបានសន្យា ពីការគាំទ្ររបស់រដ្ឋាភិបាល ក្នុងការជួសជុលការខូចខាត បណ្តាលមកពីការផ្ទុះ។

មនុស្ស១២នាក់ស្លាប់ នៅក្នុងការបាញ់ផ្លោងរបស់អ៊ីស្រាអែលលើមន្ទីរពេទ្យ Deir Al-Balah តំបន់ ហ្កាហ្សា

វេជ្ជបណ្ឌិតប្រចាំនៅមន្ទីរពេទ្យ បាននិយាយថា ប្រជាជនប៉ាឡេស្ទីន១២នាក់បានស្លាប់ នៅពេលដែលកងកម្លាំងអ៊ីស្រាអែល បានបាញ់ផ្លោងធ្លាក់ទៅលើឃ្លាំងមួយកន្លែងរបស់ក្រសួងសុខុមាលភាព នៅភាគខាងកើតទីក្រុង ឌែ អាល់ បាឡា(Deir Al-Balah) តំបន់ហ្កាហ្សាស្ទ្រីបភាគកណ្តាល កាលពីថ្ងៃព្រហស្បតិ៍។សាកសពនិងអ្នករងរបួស ត្រូវបានគេដឹកយកទៅមន្ទីរពេទ្យ អាល់ អាកសា ម៉ាទី(Al-Aqsa Martyrs) ក្នុងទីក្រុង Deir Al-Balah។លោកវេជ្ជបណ្ឌិត ខាលី អាល់ដេហ្គ្រាន(Khalil al Degran) បាននិយាយថា មនុស្ស១២នាក់ បានស្លាប់ក្នុងអំឡុងពេលការបាញ់ផ្លោងសម្លាប់រង្គាល ភាគច្រើនជាស្ត្រីនៅទីក្រុង Deir Al-Balah។ទាំងនេះត្រូវបានកំណត់គោលដៅដោយការបាញ់ផ្លោងពីរថក្រោះ។ សាកសពភាគច្រើន ត្រូវបានឆេះខ្លោច ហើយអ្នករងរបួសជាង៣០នាក់ បានទៅដល់មន្ទីរពេទ្យ។លោកបាននិយាយបន្ថែមថា មន្ទីរពេទ្យនេះ ជាមន្ទីរពេទ្យដែលនៅសល់តែមួយគត់នៅភាគកណ្តាលតំបន់ហ្កាហ្សា អាចឈប់ដំណើរការដោយសារតែខ្វះប្រេងសម្រាប់ម៉ាស៊ីនភ្លើង។ប្រជាជន និយាយថា រថក្រោះអ៊ីស្រាអែល បានរុលចូលទៅមុខទៅភាគអាគ្នេយ៍ទីក្រុង Rafah ឆ្ពោះទៅកាន់សង្កាត់ Yibna ភាគខាងលិចទីក្រុង ហើយបន្តប្រតិបត្តិការនៅតំបន់ជាយក្រុងភាគខាងកើតចំនួនបីតំបន់។ការវាយលុករបស់អ៊ីស្រាអែល ក្នុងពេលដំណាលគ្នានៅតំបន់ជាយភាគខាងជើង និងជាយខាងត្បូង តំបន់ហ្កាហ្សាក្នុងខែនេះ បានបណ្តាលឱ្យប្រជាជនប៉ាឡេស្ទីនរាប់សែននាក់ជម្លៀសខ្លួនជាថ្មីទៀត ជាអ្នកដែលបានភៀសខ្លួនចេញពីលំនៅឋានរបស់ពួកគេម្តងរួចមកហើយ ហើយការវាយលុកនេះ បានកាត់ផ្តាច់ផ្លូវចូលសំខាន់ៗសម្រាប់ការដឹកជញ្ចូនជំនួយ ដែលបង្កើនហានិភ័យនៃគ្រោះទុរ្ភិក្ស។

បណ្ដាញសង្គម

ព័ត៌មានថ្មីៗ

អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់

មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង

មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់

ការផ្អាកសង្គ្រាម នៅអ៊ីរ៉ង់ មានន័យថា ការកាត់ក្ដីពុករលួយរបស់លោក Netanyahu នឹងបន្តឡើងវិញនៅថ្ងៃអាទិត្យ

របាយការណ៍៖ លោក Trump ចេញ «ឱសានវាទ» ដល់សម្ព័ន្ធមិត្តអឺរ៉ុប ជុំវិញការធានាសុវត្ថិភាពច្រកសមុទ្រ Hormuz

ស្ថាប័នឃ្លាំមើលការដឹកជញ្ជូនសកល៖ ការយកថ្លៃរបស់អ៊ីរ៉ង់ នៅច្រកសមុទ្រ Hormuz និងបង្កើតគំរូគ្រោះថ្នាក់

ឯកអគ្គរដ្ឋទូតអ៊ីស្រាអែលប្រចាំនៅឥណ្ឌានិយាយថា ប៉ាគីស្ថានមិនមែនជាតួអង្គគួរឲ្យទុកចិត្តនោះទេ

អេក្វាទ័រកោះហៅឲ្យមកវិញឯកអគ្គរដ្ឋទូតរបស់ខ្លួនប្រចាំនៅកូឡុំប៊ី នៅក្នុងជម្លោះការទូតចុងក្រោយ

ចក្រភពអង់គ្លេសបានដាក់ពង្រាយយោធា ដើម្បីរារាំងនាវាមុជទឹករុស្ស៊ីកុំឲ្យចូលដែនទឹករបស់ខ្លួន

អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877