BTV NEWS

គិតពីឆ្នាំ២០២៣មក សមត្ថកិច្ចបង្ក្រាបបទល្មើសគ្រឿងញៀនជាង៣ម៉ឺនករណី និងឃាត់ខ្លួនមនុស្សជិត៩ម៉ឺននាក់ និងរឹបអូសសារធាតុញៀនគ្រប់ប្រភេទជាង ២៦តោន

ស្នងការខេត្តកំពតបន្តតាមដានមន្ត្រីនគរបាល២រូបចំពោះរបាយការណ៍មិនប្រក្រតីអំពីគ្រោះថ្នាក់ចរាចរ

រាជរដ្ឋាភិបាលកម្ពុជា បានចាត់វិធានការក្ដៅ លើទីតាំងកាស៊ីណូ ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (ONLINE SCAMS)

រយៈពេលជាង ៥ខែ កម្ពុជាបណ្តេញជនបរទេសចេញជិត ៣ម៉ឺននាក់ និងជិត ២ពាន់នាក់ទៀតត្រៀមបណ្តេញចេញ ពាក់ព័ន្ធករណី Online Scams និងការប្រព្រឹត្តបទល្មើសផ្សេងៗ

សន្តិសុខ និង សង្គម

មនុស្ស ២៩ នាក់ស្លាប់ ដោយសារផឹកស្រាផលិតខុសច្បាប់នៅភាគខាងត្បូងឥណ្ឌា

យ៉ាងហោចណាស់មនុស្ស ២៩ នាក់បានស្លាប់ និងរាប់សិបនាក់ត្រូវបានបញ្ជូនទៅកាន់មន្ទីរពេទ្យនៅក្នុងរដ្ឋ ថាមីល ណាឌូ (Tamil Nadu) ភាគខាងត្បូងប្រទេសឥណ្ឌា នៅថ្ងៃព្រហស្បតិ៍ (២០ មិថុនា) នេះ បន្ទាប់ពីទទួលទានស្រាក្លែងក្លាយ និងផលិតដោយខុសច្បាប់។ជនរងគ្រោះដែលរងផលប៉ះពាល់ ត្រូវបានបញ្ជូនទៅកាន់មន្ទីរពេទ្យរដ្ឋាភិបាលក្បែរនោះនៅក្នុងស្រុក កាឡាក់គូរីឈី (Kallakurichi) និងទឹកដីសហព័ន្ធ ភូឌូឈឺរី (Puducherry) នៅពាក់កណ្តាលអធ្រាត្រ នេះបើតាមមន្រ្តីអាជ្ញាធរម្នាក់បាននិយាយ ក្នុងពេលចុះទៅពិនិត្យអ្នកជំងឺធ្ងន់ធ្ងរដែលកំពុងទទួលការព្យាបាល។ប្រមុខរដ្ឋ ថាមីល ណាឌូ លោក អ៊ិមខេ ស្តាលីន (M.K. Stalin) បានទាមទារឱ្យមានការស៊ើបអង្កេតដោយនាយកដ្ឋានស៊ើបអង្កេតឧក្រិដ្ឋកម្មរបស់ប្រទេស (CID) ហើយធានាថានឹងចាត់វិធានការប្រឆាំងនឹងមន្ត្រីដែលមិនការពារឧប្បត្តិហេតុបែបនេះ។ការស្លាប់ដោយសារគ្រឿងស្រវឹងផលិតដោយខុសច្បាប់ ដែលគេស្គាល់ក្នុងស្រុកថាជាស្រាខ្លាំង ឬស្រាក្នុងស្រុក (Hooch or Country liquor) គឺជារឿងធម្មតានៅក្នុងប្រទេសឥណ្ឌា ដោយមានមនុស្សតិចតួចប៉ុណ្ណោះដែលអាចទិញស្រាម៉ាកយីហោមកផឹកបាន។ ការស្លាប់ចំនួនប្រាំនាក់ត្រូវបានរាយការណ៍នៅក្នុងរដ្ឋ អ៊ូតា ប្រទេស (Uttar Pradesh) របស់ឥណ្ឌា ដែលមានប្រជាជនច្រើន នៅក្នុងករណីស្រដៀងគ្នានេះកាលពីឆ្នាំមុន៕

មនុស្សជិត ៣៥០ នាក់ត្រូវបានសម្លាប់ក្នុងជម្លោះនៅទីក្រុងមួយរបស់ស៊ូដង់ ចាប់តាំងពីខែឧសភា

មន្រ្តីម្នាក់បាននិយាយកាលពីថ្ងៃពុធ (១៩ មិថុនា) ថា ជនស៊ីវិលជិត ៣៥០ នាក់ត្រូវបានសម្លាប់នៅក្នុងទីក្រុង អ៊ែល ហ្វាសឺ (El Faser) រដ្ឋធានីនៃរដ្ឋ ណស ដាហ្វឺ (North Darfur) របស់ប្រទេសស៊ូដង់ ចាប់តាំងពីថ្ងៃទី១០ ខែឧសភា ស្របពេលមានការប៉ះទង្គិចគ្នាកាន់តែខ្លាំងរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF)។លោក អ៊ីប្រាហ៊ីម អាបឌូលឡា ខាទឺ (Ibrahim Abdullah Khatir) អគ្គនាយកនៃក្រសួងសុខាភិបាលរដ្ឋរដ្ឋ ណស ដាហ្វឺ បានប្រាប់សារព័ត៌មានស៊ីនហួ ថា «មនុស្សយ៉ាងហោចណាស់ ៣៤៦ នាក់ត្រូវបានសម្លាប់ និង ២.២០០ នាក់ផ្សេងទៀតបានរងរបួសចាប់តាំងពីថ្ងៃទី១០ ខែឧសភា ហើយតួលេខពិតប្រាកដទំនងជាច្រើនជាងនេះទៅទៀត» ព្រោះស្ថិតិ «គ្របដណ្តប់តែអ្នកស្លាប់ និងអ្នករបួសដែលបានចុះឈ្មោះក្នុងមន្ទីរពេទ្យប៉ុណ្ណោះ ខណៈអ្នកស្លាប់មួយចំនួនធំត្រូវបានកប់ដោយមិនបានរាយការណ៍»។ប្រទេសស៊ូដង់ បានជាប់គាំងនៅក្នុងជម្លោះដ៏បង្ហូរឈាមរវាងកងទ័ពស៊ូដង់ SAF និងកងកម្លាំងគាំទ្ររហ័ស RSF ចាប់តាំងពីខែមេសា ឆ្នាំ២០២៣ ដែលបានឆក់យកជីវិតមនុស្ស ១៥.៥៥០ នាក់ និងបានជម្លៀសប្រជាជនជាង ៨,៨ លាននាក់នៅទូទាំងប្រទេស នេះបើយោងតាមការប៉ាន់ស្មានដោយការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌៕

UN៖ ទាហានអ៊ីស្រាអែល ប្រើប្រាស់គ្រាប់បែកធុនធ្ងន់ ដែលបង្កើនការព្រួយបារម្ភខ្លាំង ក្រោមច្បាប់សង្គ្រាម

អង្គការសហប្រជាជាតិ បាននិយាយកាលពីថ្ងៃពុធថា ការប្រើប្រាស់គ្រាប់បែកធុនធ្ងន់ម្តងហើយម្តងទៀតរបស់អ៊ីស្រាអែល នៅតំបន់ហ្កាហ្សាស្ទ្រីប ដែលមានប្រជាជនរស់នៅច្រើន បង្ហាញពីការបំពានច្បាប់សង្រ្គាមដដែលៗ ដោយលើកឡើងពីការវាយប្រហារចំនួន៦លើក បណ្តាលឲ្យមនុស្សយ៉ាងហោចណាស់២១៨ នាក់ស្លាប់។នៅក្នុងរបាយការណ៍ថ្មី ដែលត្រូវបានរិះគន់ភ្លាមៗដោយអ៊ីស្រាអែលថាមានភាពលំអៀងយ៉ាងខ្លាំង។វាជាប់ពាក់ព័ន្ធទៅនឹងការប្រើប្រាស់គ្រាប់បែកទម្ងន់រហូតដល់២.០០០ផោន ទម្លាក់ទៅលើអគារលំនៅឋាន សាលារៀន ជំរំជនភៀសខ្លួន និងទីផ្សារ។ ការិយាល័យសិទ្ធិមនុស្ស ដែលត្រូវបានគេស្គាល់ដោយអក្សរកាត់ OHCHR បាននិយាយថា អង្គការបានផ្ទៀងផ្ទាត់អ្នកស្លាប់ចំនួន២១៨នាក់ នៅក្នុងការវាយប្រហារទាំងនោះ ដែលត្រូវបានអនុវត្តនៅដើមខែនៃសង្គ្រាមនៅថ្ងៃទី៧ ខែតុលា ប៉ុន្តែបាននិយាយថា ខ្លួនមានព័ត៌មានដែលបង្ហាញពីចំនួនអ្នកស្លាប់ អាចខ្ពស់ជាងនេះច្រើន។ប្រធានសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយនៅក្នុងសេចក្តីថ្លែងការណ៍ថា តម្រូវការក្នុងការជ្រើសរើសមធ្យោបាយ និងវិធីសាស្រ្តនៃសង្គ្រាម ដែលបញ្ចៀស ឬកាត់បន្ថយឲ្យតិចបំផុតចំពោះគ្រប់វិសាលភាពនៃផលប៉ះពាល់ទៅលើជនស៊ីវិល ទំនងជាត្រូវបានបំពានជាបន្តបន្ទាប់ នៅក្នុងយុទ្ធនាការទម្លាក់គ្រាប់បែករបស់អ៊ីស្រាអែល។

របាយការណ៍៖ កង្វក់ខ្យល់ផ្សារភ្ជាប់ទៅនឹងការស្លាប់របស់កុមារជិត ២.០០០ នាក់ក្នុងមួយថ្ងៃទូទាំងពិភពលោក

របាយការណ៍មួយបាននិយាយកាលពីថ្ងៃពុធ (១៩ មិថុនា) ថា កុមារជិត ២.០០០ នាក់បានស្លាប់ជារៀងរាល់ថ្ងៃ ដោយសារបញ្ហាសុខភាពដែលទាក់ទងនឹងកង្វក់ខ្យល់ ឬការបំពុលបរិយាកាស ដែលឥឡូវនេះជាកត្តាហានិភ័យធំបំផុតទីពីរសម្រាប់ការស្លាប់មុនអាយុនៅទូទាំងពិភពលោក។ ការប៉ះពាល់ដោយផ្ទាល់ទៅនឹងកង្វក់ខ្យល់ បានរួមចំណែកដល់ការស្លាប់របស់មនុស្សចំនួន ៨,១ លាននាក់ ដែលជាតួលេខប្រហែល ១២ ភាគរយនៃការស្លាប់ទាំងអស់ក្នុងឆ្នាំ២០២១ នេះបើយោងតាមរបាយការណ៍ពីវិទ្យាស្ថានផលប៉ះពាល់សុខភាព (HEI) ដែលមានមូលដ្ឋាននៅសហរដ្ឋអាមេរិក។នេះមានន័យថា កង្វក់ខ្យល់ ឬការបំពុលបរិយាកាសនេះ បានវ៉ាដាច់ការស្លាប់ដោយប្រើប្រាស់ថ្នាំជក់ និងរបបអាហារមិនល្អ ហើយក្លាយជាកត្តាហានិភ័យនាំមុខគេទីពីរសម្រាប់ការស្លាប់មុនអាយុ នៅពីក្រោយតែជំងឺលើសឈាម។ កុមារតូចៗងាយរងគ្រោះបំផុតក្នុងកង្វក់ខ្យល់ ហើយវិទ្យាស្ថាននេះបានសហការជាមួយមូលនិធិកុមាររបស់អង្គការសហប្រជាជាតិយូនីសេហ្វ (Unicef) សម្រាប់របាយការណ៍ គុណភាពខ្យល់សកល (Global Air) ប្រចាំឆ្នាំរបស់រដ្ឋ។របាយការណ៍បានរកឃើញថា កង្វក់ខ្យល់បានរួមចំណែកដល់ការស្លាប់របស់កុមារជាង ៧០០.០០០ នាក់ដែលមានអាយុក្រោម ៥ ឆ្នាំ ។ ជាង ៥០០.០០០ ករណីនៃការស្លាប់ទាំងនោះត្រូវបានសន្មតថា មកពីការចម្អិនអាហារក្នុងផ្ទះដោយប្រើឥន្ធនៈកខ្វក់ដូចជាធ្យូងថ្ម ឈើ ឬលាមក ដែលភាគច្រើននៅទ្វីបអាហ្វ្រិក និងអាស៊ី។របាយការណ៍ក៏បានរកឃើញថា ការបំពុលប្រព័ន្ធអូហ្សូន ដែលត្រូវបានគេរំពឹងថានឹងកាន់តែអាក្រក់នៅពេលដែលពិភពលោកឡើងកម្ដៅដោយសារបម្រែបម្រួលអាកាសធាតុដែលជំរុញដោយមនុស្ស ត្រូវបានផ្សារភ្ជាប់ទៅនឹងការស្លាប់ជិត ៥០០.០០០ នាក់ក្នុងឆ្នាំ២០២១៕

ចំហេះព្រៃដ៏មហន្តរាយ ក្នុងរដ្ឋ New Mexico បណ្តាលឲ្យរថយន្តឆេះរោល និងបំផ្លាញលំនៅឋាន

ការិយាល័យរបស់អភិបាលរដ្ឋ បាននិយាយកាលពីថ្ងៃពុធថា យ៉ាងហោចណាស់មនុស្សម្នាក់បានស្លាប់ដោយសារចំហេះព្រៃក្នុងរដ្ឋ New Mexico សហរដ្ឋអាមេរិក ដែលនាំឱ្យមានការជម្លៀសមនុស្សរាប់ពាន់នាក់ និងធ្វើឲ្យខូចខាតរចនាសម្ព័ន្ធរាប់រយកន្លែង។ លំនៅឋានប្រហែល ១.៤០០ខ្នង និងសំណង់ផ្សេងទៀតត្រូវបានបំផ្លាញ ខណៈក្រុមមន្ត្រីបាននិយាយថា ភូមិ Ruidoso ប្រជាជន ៧.០០០នាក់ ត្រូវបានជម្លៀសចេញ។អភិបាលរដ្ឋ បានប្រាប់អ្នកសារព័ត៌មានថា យ៉ាងហោចណាស់មានមនុស្សពីរនាក់ បានរងរបួសនៅក្នុងចំហេះព្រៃនេះ ហើយរដ្ឋបានប្រកាសស្ថានភាពគ្រាអាសន្ននៅក្នុងរតំបន់ Lincoln និងតំបន់ម៉េស្កាលឺរ៉ូ អាប៉ាឆេ( Mescalero Apache) ដោយសារតែចំហេះព្រៃចំនួនពីរកន្លែង។ចំហេះព្រៃ South Fork ត្រូវបានគេប៉ាន់ប្រមាណថាមានទំហំ៦១,៨២ គីឡូម៉ែត្រក្រឡា ហើយពុំមានភាគរយនៃការទប់ស្កាត់នោះទេ ខណៈចំហេះព្រៃ Salt Fire បានលេបត្របាក់យ៉ាងហោចណាស់ជាង២.០០០ ហិចតា នេះបើយោងតាមការធ្វើបច្ចុប្បន្នភាពពីការិយាល័យអភិបាលរដ្ឋ។ភ្លៀងធ្លាក់ ត្រូវបានគេរំពឹងថានឹងបន្តនៅក្នុងសប្តាហ៍នេះក្នុងរដ្ឋ New Mexico។អង្គភាពសេវាអាកាសធាតុជាតិ បាននិយាយថា ទីក្រុងនានារបស់សហរដ្ឋអាមេរិក បាននឹងកំពុងឈានដល់សីតុណ្ហភាពហក់ឡើងខ្ពស់ខ្លាំង ក្នុងសប្តាហ៍នេះ ហើយអង្គភាព បាននិយាយថា ក្រុមមន្ត្រីកំពុងព្រមានថា អាចក្លាយជាព្រឹត្តិការណ៍អាកាសធាតុដ៏គ្រោះថ្នាក់។

ក្រុមអ្នកសង្កេតការណ៍៖ កំណែទម្រង់វេជ្ជសាស្ត្រនៅកូរ៉េខាងត្បូងគឺចាំបាច់ ខណៈក្រុមវេជ្ជបណ្ឌិតប្រឆាំង

វិបត្តិថែទាំសុខភាពរបស់ប្រទេសកូរ៉េខាងត្បូងកាន់តែកប់ជ្រៅក្នុងសប្តាហ៍នេះ ស្របពេលវេជ្ជបណ្ឌិតជាន់ខ្ពស់ និងសាស្ត្រាចារ្យផ្នែកវេជ្ជសាស្រ្ត បានចូលរួមកូដកម្មដែលបានអូសបន្លាយ ប្រឆាំងនឹងការបង្កើនចំនួននិស្សិតចូលរៀននៅសាលាពេទ្យ។ ក្រុមអង្កេតការណ៍ បានជំរុញដល់ភាគីទាំងអស់ឲ្យចរចា ដោយនិយាយថា ការដើរចេញពីការងារនៅតែបន្តបែបនេះអាចនឹងបណ្ដាលឲ្យមានការរិះគន់ជាសាធារណៈកាន់តែធ្ងន់ធ្ងរដល់ទាំងរដ្ឋាភិបាល ទាំងក្រុមវេជ្ជបណ្ឌិ ដែលតែនៅតែបន្តកូដកម្ម ហើយថាកំណែទម្រង់វេជ្ជសាស្ត្រជារឿងចាំបាច់ និងត្រូវស្វែងរកចំណុចកណ្ដាលរួមមួយ។ ចាប់តាំងពីខែកុម្ភៈមក ក្រុមគ្រូពេទ្យវ័យក្មេង និងសិក្ខាកាមជាង ១២.០០០នាក់ បានដើរចេញពីមន្ទីរពេទ្យនានា ជុំវិញផែនការកំណែទម្រង់របស់រដ្ឋាភិបាលក្នុងគោលបំណងដោះស្រាយបញ្ហាកង្វះខាតគ្រូពេទ្យនៅក្នុងប្រទេសនេះ។ សមាគមគ្រូពេទ្យកូរ៉េ (KMA) កាលពីថ្ងៃអង្គារថ្ងៃទី១៨ មិថុនា បានដឹកនាំការតវ៉ានៅទីក្រុងសេអ៊ូល ជាមួយក្រុមវេជ្ជបណ្ឌិតរាប់ពាន់នាក់។ ការតវ៉ានេះបានកើតឡើងមួយថ្ងៃ បន្ទាប់ពីសាស្រ្តាចារ្យវេជ្ជសាស្រ្តជាង ៥០០នាក់ នៅមន្ទីរពេទ្យរដ្ឋសាកលវិទ្យាល័យជាតិសេអ៊ូល បានដើរចេញពីការងារ ដោយធ្វើកូដកម្មមិនកំណត់ពេល។និស្សិតពេទ្យមួយចំនួនក៏បានពន្យារពេលចុះឈ្មោះចូលរៀន ឬធ្វើពហិការមិនចូលរៀនដែរ ដោយនិយាយថា ផែនការរបស់រដ្ឋាភិបាល នឹងប៉ះពាល់ដល់អាជីពរបស់ពួកគេជាវេជ្ជបណ្ឌិតនៅពេលពួកគេបញ្ចប់ការសិក្សា៕

ការគំរាមកំហែងនៃបម្រែបម្រួលអាកាសធាតុ បានផ្អាកធម្មយាត្រាបុណ្យហាជី ខណៈមនុស្ស៥៦២នាក់ស្លាប់ដោយសារកម្តៅ

ប្រជាជនមូស្លីមជិត២លាននាក់ នឹងឈានដល់ការបញ្ចប់ការធ្វើធម្មយាត្រាក្នុងពិធីបុណ្យហាជី នៅសប្តាហ៍នេះ ប៉ុន្តែកម្តៅខ្លាំង បានបណ្តាលឲ្យមនុស្សរាប់រយនាក់ស្លាប់ ជាអ្នកដែលបានចាប់ផ្តើមការធ្វើដំណើរធម្មយាត្រាកាលពីថ្ងៃសុក្រសប្តាហ៍មុន ទៅកាន់វិហារ Grand Mosque ក្នុងទីក្រុង Mecca ប្រទេសអារ៉ាប៊ីសាអូឌីត។ យោងតាមការចុះផ្សាយរបស់ទីភ្នាក់ងារព័ត៌មាន Reuters ដែលផ្អែកលើសេចក្តីថ្លែងការណ៍ក្រសួងការបរទេស និងប្រភពព័ត៌មាន បានឲ្យដឹងថា មនុស្សយ៉ាងហោចណាស់ ៥៦២នាក់ បានស្លាប់ក្នុងអំឡុងពេលបុណ្យហាជីនេះ។ប្រភពផ្នែកវេជ្ជសាស្រ្ត និងសន្តិសុខ បានប្រាប់សារព័ត៌មានរ៉យទ័រថា ប្រទេសអេហ្ស៊ីបតែមួយ បានចុះបញ្ជីអ្នកស្លាប់ចំនួន៣០៧នាក់ និង១១៨នាក់ផ្សេងទៀតកំពុងបាត់ខ្លួន ខណៈសីតុណ្ហភាពបានកើនឡើងលើសពី៥១ អង្សាសេ។ សាក្សីបាននិយាយថា សាកសពជាច្រើន បានដាក់នៅលើចញ្ចើមផ្លូវជិតទីក្រុងMina ខាងក្រៅទីក្រុងធំ Mecca គ្របដណ្តប់ដោយក្រណាត់ពណ៌ស រង់ចាំរហូតដល់រថយន្តពេទ្យមកដល់។ពេលវេលានៃពិធីបុណ្យហាជី ត្រូវបានកំណត់ដោយឆ្នាំតាមច័ន្ទគតិ ដែលឃើញមានការធ្វើធម្មយាត្រា ជារៀងរាល់ឆ្នាំ។ ការស្លាប់ទាក់ទងទៅនឹងកម្តៅក្នុងពេលពិធីបុណ្យហាជី ពុំមែនជារឿងថ្មីនោះទេ ហើយត្រូវបានកត់ត្រាថាត្រលប់ទៅរកទសវត្សរ៍ឆ្នាំ១៤០០ វិញ។យោងតាមមន្ត្រីអារ៉ាប៊ីសាអូឌីត បានឱ្យដឹងថា កង្វះនៃភាពស៊ាំទៅនឹងសីតុណ្ហភាពខ្ពស់ ការធ្វើលំហាត់ប្រាណខ្លាំង នៅទីចំហ និងចំនួនប្រជាជនមានវ័យចំណាស់ ធ្វើឱ្យអ្នកធ្វើធម្មយាត្រាងាយរងគ្រោះ។យោងតាមមន្ត្រីប្រទេសអារ៉ាប៊ីសាអូឌីត បាននិយាយថា កាលពីឆ្នាំមុន មនុស្សជាង២.០០០នាក់ បានទទួលរងជំងឺដោយសារកម្តៅខ្លាំង។ អ្នកវិទ្យាសាស្ត្របាននិយាយថា ស្ថានភាពនឹងកាន់តែអាក្រក់ ខណៈពិភពលោកឡើងកម្តៅ។

ការប្រយុទ្ធគ្នានៅក្រុងរ៉ាហ្វា តំបន់ហ្កាហ្សាកាន់តែខ្លាំង ខណៈភាពតានតឹងកើនឡើងនៅព្រំដែនអ៊ីស្រាអែល-លីបង់

ការវាយប្រហារតាមអាកាសរបស់អ៊ីស្រាអែល និងការប៉ះទង្គិចគ្នារវាងកងទ័ព និងក្រុមសកម្មប្រយុទ្ធប៉ាឡេស្ទីន បានធ្វើឱ្យកក្រើកតំបន់ហ្កាហ្សា កាលពីថ្ងៃពុធ ១៩ មិថុនា បន្ទាប់ពីកងទ័ពអ៊ីស្រាអែលបានព្រមានថា ខ្លួនបានត្រៀមការវាយលុកប្រឆាំងចលនាហេសបូឡា លីបង់ នៅតាមសមរភូមិមុខ ភាគខាងជើងរបស់ប្រទេស។ សាក្សី និងទីភ្នាក់ងារការពារជនស៊ីវិលនៅតំបន់ហ្កាហ្សាស្ទ្រីប គ្រប់គ្រងដោយក្រុមហាម៉ាស បានរាយការណ៍ពីការទម្លាក់គ្រាប់បែករបស់អ៊ីស្រាអែលនៅភាគខាងលិចទីក្រុងរ៉ាហ្វា ជាទីដែលក្រុមគ្រូពេទ្យបាននិយាយថា ការវាយប្រហារដោយយានដ្រូន និងការបាញ់ផ្លោង បានសម្លាប់មនុស្សយ៉ាងហោចណាស់៧នាក់។ យោធាអ៊ីស្រាអែលបានប្រកាសផ្អាកការប្រយុទ្ធប្រចាំថ្ងៃដើម្បីមនុស្សធម៌ក្នុងការប្រយុទ្ធគ្នានៅលើផ្លូវសំខាន់មួយនៅភាគខាងកើត ក្រុង រ៉ាហ្វា (Rafah) ប៉ុន្តែអ្នកនាំពាក្យអង្គការសហប្រជាជាតិបាននិយាយប៉ុន្មានថ្ងៃក្រោយមកថា វិធានការប៉ុណ្ណឹងមិនអាចគ្រប់គ្រាន់សម្រាប់ប្រជាជនដែលត្រូវការជំនួយបន្ថែមទៀតនោះទេ។ រយៈពេលជាង៨ខែនៃសង្រ្គាមបង្កឡើងដោយការវាយប្រហារមិនធ្លាប់មានពីសំណាក់ក្រុមសកម្មប្រយុទ្ធហាម៉ាស កាលពីថ្ងៃទី ៧ ខែតុលា លើអ៊ីស្រាអែល បានរុញឲ្យស្ថានភាពមនុស្សធម៌ធ្ងន់ធ្ងរនៅក្នុងទឹកដីប៉ាឡេស្ទីន និងការព្រមានម្តងហើយម្តងទៀតអំពីគ្រោះទុរ្ភិក្សពីអង្គការសហប្រជាជាតិ ៕

កងរាជអាវុធហត្ថខេត្តបន្ទាយមានជ័យ បញ្ជូនជនសង្ស័យ២នាក់ ទៅសាលាដំបូងខេត្តអនុវត្តតាមនីតិវិធី ជាមួយថ្នាំញៀនជិត១គីឡូក្រាម

បន្ទាយមានជ័យ ៖ កងរាជអាវុធហត្ថខេត្តបន្ទាយមានជ័យ បញ្ជូនជនសង្ស័យ២នាក់ ទៅសាលាដំបូងខេត្តអនុវត្តតាមនីតិវិធី នៅរសៀលថ្ងៃទី១៩ ខែមិថុនា ឆ្នាំ២០២៤ ពាក់ព័ន្ធករណីជួញដូរ និងរក្សាទុកដោយខុសច្បាប់នូវសារធាតុញៀនជិត១គីឡូក្រាម បង្ក្រាបនៅក្នុងភូមិសាស្រ្តក្រុងប៉ោយប៉ែត។ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានប្រាប់ឱ្យដឹងថា កាលពីវេលាម៉ោង១៧និង០០នាទីថ្ងៃទី១៧ ខែមិថុនា ឆ្នាំ២០២៤កម្លាំងមូលដ្ឋានកងរាជអាវុធហត្ថក្រុង បានទទួលព័ត៌មានពីសន្តិសុខរាយការណ៍មកថា មានករណី ជួញដូរ និងរក្សាទុកដោយខុសច្បាប់នូវសារធាតុញៀន នៅចំណុចផ្ទះល្វែងមួយកន្លែងស្ថិតក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត។ បន្ទាប់ពីទទួលបានព័ត៌មាននេះភ្លាម កម្លាំងចុះទៅដល់ចំណុចផ្ទះល្វែងខាងលើរបស់ជនសង្ស័យម្នាក់១-ឈ្មោះ ឌុច គឹមហួត ហៅ ហួត ភេទប្រុស អាយុ៥៨ឆ្នាំ ជនជាតិខ្មែរមុខរបរលក់ដូរ រស់នៅចំណុចខាងលេី។ ដោយមានការអនុញ្ញាតពីឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្ត កម្លាំងបានធ្វើការឆែកឆេរលំនៅឋានរបស់ជនសង្ស័យ រកឃេីញវត្ថុតាង គ្រឿងញៀនប្រភេទម្ស៉ៅក្រាមពណ៌សថ្លា (ICE) ចំនួន ២១៩ថង់កិប (ធំ០៣ថង់) ទម្ងន់៩៧១,៩០ក្រាម, ជញ្ជីងសម្រាប់ថ្លឹងគ្រឿងញៀន ចំនួន០២គ្រឿង, ថង់សម្រាប់វេចខ្ចប់គ្រឿងញៀនមួយចំនួន។ ក្នុងពេលចុះប្រតិបត្តិការខាងលេី ដោយមានការសង្ស័យផ្ទះល្វែងមួយកន្លែងក្បែរគ្នាត្រូវជាប្អូនថ្លៃស្រីរបស់ជនសង្ស័យឈ្មោះ ជួន ដា ភេទស្រី អាយុ ៤០ឆ្នាំ កម្លាំងបានសុំគោលការពីឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្ត បានធ្វេីការឆែកឆេរឃើញវត្ថុតាងរួមមាន ៖ គ្រឿងញៀនប្រភេទម្ស៉ៅក្រាមពណ៌សថ្លា (ICE) ចំនួន ១៥កូនថង់កិប ទម្ងន់ ៩,៤០ក្រាម, ជញ្ជីងសម្រាប់ថ្លឹងគ្រឿងញៀន ចំនួន ០២គ្រឿង, ថង់សម្រាប់វេចខ្ចប់គ្រឿងញៀនមួយចំនួន។ បន្ទាប់មកនាំមកកាន់មូលដ្ឋានកងរាជអាវុធហត្ថក្រុង និងបញ្ជូនបន្តមកកាន់បញ្ជាការដ្ឋានកងរាជអាវុធហត្ថខេតត្ត ដេីម្បីចាត់ការតាមនីតិវិធី។ បច្ចុប្បន្នជនសង្ស័យ រួមនឹងវត្ថុតាង ត្រូវបានកម្លាំងការិយាល័យប្រឆាំងគ្រឿងញៀន បញ្ជូនទៅសាលាដំបូងខេត្ត ហើយ អនុវត្តតាមនីតិវិធី ៕ អត្ថបទ៖ រឿង ចន្ទ្រា

ការប្រយុទ្ធគ្នា នៅតំបន់ហ្កាហ្សា អាចបន្ត បន្ទាប់ពីប្រតិបត្តិការនៅទីក្រុង Rafah បញ្ចប់

ប្រព័ន្ធផ្សព្វផ្សាយអ៊ីស្រាអែលមួយចំនួន បានរាយការណ៍ថា កងកម្លាំងរបស់អ៊ីស្រាអែល អាចនឹងនៅតែស្ថិតនៅក្នុងតំបន់ហ្កាហ្សាស្ទ្រីប បន្ទាប់ពីបញ្ចប់ប្រតិបត្តិការរបស់ពួកគេនៅទីក្រុងរ៉ាហ្វា(Rafah)។សេចក្តីរាយការណ៍ បានធ្វើឡើងខណៈយោធាអ៊ីស្រាអែល និយាយថាប្រតិបត្តិការនៅទីក្រុងរ៉ាហ្វា នឹងត្រូវបញ្ចប់ក្នុងរយៈពេលពីរទៅបីសប្តាហ៍ទៀត។ កងកម្លាំងការពារជាតិអ៊ីស្រាអែល បាននិយាយថា ខ្លួនបានរុះរើស្ទើរតែទាំងស្រុងនូវអង្គភាពកងវរសេនាតូចរបស់ក្រុមហាម៉ាសចំនួនពីរកន្លែងក្នុងចំណោមអង្គភាពកងវរសេនាតូចចំនួនបួនកន្លែង នៅទីក្រុង Rafah ភាគខាងត្បូងតំបន់ហ្កាហ្សា។កងកម្លាំងការពារជាតិអ៊ីស្រាអែល(IDF) បានប្រកាសកាលពីថ្ងៃអង្គារថា កងទ័ពរបស់ខ្លួន បានសម្លាប់អ្នកប្រយុទ្ធរបស់ក្រុមហាម៉ាសរាប់សិបនាក់នៅទីក្រុង Rafah ក្នុងរយៈពេលប៉ុន្មានថ្ងៃថ្មីៗនេះ។ប្រព័ន្ធផ្សព្វផ្សាយមួយចំនួនបានរាយការណ៍កាលពីថ្ងៃអង្គារថា សមាជិកនៃក្រុមអ្នកចរចារបស់អ៊ីស្រាអែល បាននិយាយថា យោធានឹងនៅតែស្ថិតក្នុងតំបន់ហ្កាហ្សា បន្ទាប់ពីការវាយលុកនៅទីក្រុងរ៉ាហ្វា ហើយអ៊ីស្រាអែល នឹងបន្តធ្វើយុទ្ធនាការដ៏ខ្លាំងក្លា និងមានប្រសិទ្ធភាព។ សេចក្តីរាយការណ៍និយាយថា ការប្រយុទ្ធគ្នានៅតំបន់ហ្កាហ្សាអាចនៅបន្ត លុះត្រាតែចំណាប់ខ្មាំងទាំងអស់ដែលចាប់ឃុំខ្លួនដោយក្រុមហាម៉ាស ត្រូវបានដោះលែង។មានការព្រួយបារម្ភជាច្រើនថា ជម្លោះអាចអូសបន្លាយពេលតទៅទៀត ដោយសារគម្លាតដ៏ធំទូលាយរវាងអ៊ីស្រាអែល និងក្រុមហាម៉ាស នៅក្នុងការចរចាសម្រាប់បទឈប់បាញ់ និងការដោះលែងចំណាប់ខ្មាំង។ ក្រុមហាម៉ាស កំពុងអំពាវនាវឱ្យមានកិច្ចព្រមព្រៀង ដែលធានាឱ្យមានបទឈប់បាញ់ពេញលេញ ខណៈអ៊ីស្រាអែល កំពុងបញ្ជាក់ច្បាស់ថា ខ្លួនមានគោលបំណងកម្ទេចក្រុមហាម៉ាស។

បណ្ដាញសង្គម

ព័ត៌មានថ្មីៗ

ទេសាភិបាលធនាគារជាតិនៃកម្ពុជា ចូលរួមអបអរសាទរចំពោះសមិទ្ធផលថ្មីៗ ក្នុងស្រុកប្រាសាទសំបូរ ខេត្តកំពង់ធំ

កម្ពុជានឹងជំរុញរបៀបវារៈពាណិជ្ជកម្មឌីជីថល ក្នុងវេទិកាពាណិជ្ជកម្មឌីជីថលលើកទី៣ និងពិព័រណ៍អនឡាញ

ពលរដ្ឋនៅស្រុកជីក្រែង ថ្លែងនូវការដឹងគុណដល់រាជរដ្ឋាភិបាល ចំពោះសមិទ្ធផលថ្មីកើត ក្នុងមូលដ្ឋានពួកគាត់

ទីក្រុងសេអ៊ូល៖ កូនស្រីរបស់មេដឹកនាំកូរ៉េខាងជើង លោក គីម ត្រូវបានគេជឿថា មានប្អូនបង្កើត

ប៉ាគីស្ថាន៖ គ្មានការឆ្លើយតបយោធា ត្រូវបានពិភាក្សាឡើយ ពាក់ព័ន្ធការវាយប្រហាររបស់ក្រុមហ៊ូទី លើអារ៉ាប៊ីសាអ៊ូឌីត

លោក Patrushev៖ អឺរ៉ុបមិនចាប់អារម្មណ៍លើសន្តិភាពនៅអ៊ុយក្រែនទាល់តែសោះ

អ្នកការទូតរុស្ស៊ី៖ អ៊ុយក្រែនកំពុងកំណត់គោលដៅដោយចេតនាលើបុគ្គលិករោងចក្រថាមពលនុយក្លេអ៊ែរ Zaporozhye

ការប្រយុទ្ធនៅយេម៉ែន កាន់តែខ្លាំងឡើង ខណៈកងកម្លាំងរដ្ឋាភិបាលបន្តវាយប្រហារតាមសមរភូមិជាច្រើន

ភាពវឹកវរ កើតមានចំពោះអ្នកដំណើររបស់ក្រុមហ៊ុនអាកាសចរណ៍ British Airways ក្រោយប្រព័ន្ធជួបបញ្ហា

សំណើសុំសិទ្ធិជ្រកកោននៅសហភាពអឺរ៉ុបធ្លាក់ចុះដល់កម្រិតទាបបំផុតក្នុងរយៈពេល ៥ឆ្នាំ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877