BTV NEWS

គិតពីឆ្នាំ២០២៣មក សមត្ថកិច្ចបង្ក្រាបបទល្មើសគ្រឿងញៀនជាង៣ម៉ឺនករណី និងឃាត់ខ្លួនមនុស្សជិត៩ម៉ឺននាក់ និងរឹបអូសសារធាតុញៀនគ្រប់ប្រភេទជាង ២៦តោន

ស្នងការខេត្តកំពតបន្តតាមដានមន្ត្រីនគរបាល២រូបចំពោះរបាយការណ៍មិនប្រក្រតីអំពីគ្រោះថ្នាក់ចរាចរ

រាជរដ្ឋាភិបាលកម្ពុជា បានចាត់វិធានការក្ដៅ លើទីតាំងកាស៊ីណូ ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (ONLINE SCAMS)

រយៈពេលជាង ៥ខែ កម្ពុជាបណ្តេញជនបរទេសចេញជិត ៣ម៉ឺននាក់ និងជិត ២ពាន់នាក់ទៀតត្រៀមបណ្តេញចេញ ពាក់ព័ន្ធករណី Online Scams និងការប្រព្រឹត្តបទល្មើសផ្សេងៗ

សន្តិសុខ និង សង្គម

ប៉ូឡូញបានចាប់ខ្លួនមនុស្ស១៨នាក់ ដោយចោទប្រកាន់ពីបទរៀបចំផែនការអរិភាព ក្នុងនាមរុស្ស៊ី និងបេឡារុស

រដ្ឋមន្ត្រីក្រសួងមហាផ្ទៃ បាននិយាយកាលពីថ្ងៃចន្ទថា ប្រទេសប៉ូឡូញ បានចាប់ខ្លួនមនុស្សចំនួន ១៨នាក់ក្នុងរយៈពេល ៦ខែចុងក្រោយនេះ ជុំវិញការចោទប្រកាន់ផ្សេងៗគ្នានៃការបន្តសកម្មភាពអរិភាព ឬរៀបចំផែនការបំផ្លិចបំផ្លាញ ក្នុងនាមប្រទេសរុស្ស៊ី និងប្រទេសបេឡារុសដែលនៅជិតខាង ហើយយ៉ាងហោចណាស់មនុស្សម្នាក់ បានជាប់ពាក់ព័ន្ធក្នុងផែនការធ្វើឃាតប្រធានាធិបតីអ៊ុយក្រែន។ រដ្ឋមន្ត្រីក្រសួងមហាផ្ទៃលោក Tomasz Siemoniak បានប្រាប់សន្និសីទសារព័ត៌មានមួយថា ក្នុងចំណោមអ្នកដែលត្រូវបានចាប់ខ្លួនចំនួន ១០នាក់ ចាប់តាំងពីខែធ្នូ គឺជាប់ពាក់ព័ន្ធដោយផ្ទាល់ ក្នុងការរៀបចំផែន ការបំផ្លិចបំផ្លាញជាច្រើន ដូចជាការដុតបំផ្លាញនៅទូទាំងប្រទេសប៉ូឡូញ។ជនជាតិប៉ូឡូញ បេឡារុស និងអ៊ុយក្រែន គឺស្ថិតក្នុងចំណោមអ្នកដែលត្រូវបានចាប់ខ្លួន ក្នុងរយៈពេលប៉ុន្មានខែថ្មីៗនេះ នេះបើយោងតាមសេចក្តីប្រកាសរបស់ទីភ្នាក់ងារសន្តិសុខផ្ទៃក្នុង។រដ្ឋអាជ្ញាប៉ូឡូញ បាននិយាយថា បុរសជនជាតិប៉ូឡូញម្នាក់ ត្រូវបានចាប់ខ្លួនកាលពីខែមេសា ជុំវិញការចោទប្រកាន់ថា បានត្រៀមខ្លួនរួចជាស្រេច ដើម្បីធ្វើចារកម្មសម្រាប់ចារកម្មយោធារបស់ប្រទេសរុស្ស៊ី នៅក្នុងផែនការដែលត្រូវបានចោទប្រកាន់ ដើម្បីធ្វើឃាតប្រធានាធិបតីអ៊ុយក្រែនលោក វ៉្លូឌីមី ហ្ស៊េឡិនស្គី (Volodymyr Zelenskyy )។ បុរសនោះ ត្រូវបានគេចោទប្រកាន់ថា កំពុងស្វែងរកទំនាក់ទំនងជាមួយជនជាតិរុស្ស៊ី ដែលជាប់ពាក់ព័ន្ធក្នុងសង្គ្រាមនៅអ៊ុយក្រែន ហើយត្រូវបានគេរំពឹងថា នឹងបញ្ជូនព័ត៌មានលម្អិតអំពីអាកាសយានដ្ឋានយុទ្ធសាស្ត្រ Rzeszow-Jasionka នៅជិតព្រំដែនប្រទេសប៉ូឡូញជាមួយអ៊ុយក្រែន។

មេដឹកនាំក្រុងហុងកុង ព្រមានពីការគំរាមកំហែងផ្នែកសន្តិសុខ នៅថ្ងៃខួបនៃការបង្រ្កាបនៅទីលានធានអានមិន

មេដឹកនាំទីក្រុងហុងកុង លោក John Lee បានព្រមានថា ការគំរាមកំហែង នឹងធ្វើឱ្យអន្តរាយដល់សន្តិសុខជាតិរបស់ខ្លួន «គឺជារឿងពិត» ខណៈទីក្រុង បានបង្កើនការយាមល្បាត នៅថ្ងៃអង្គារនេះ ដែលជាខួបលើកទី៣៥ នៃការបង្ក្រាបនៅទីលានធានអានមិន ថ្ងៃទី ៤ ខែមិថុនា។លោក Lee បាននិយាយទៅកាន់អ្នកសារព័ត៌មាន នៅថ្ងៃអង្គារនេះថា ការគំរាមកំហែងដល់សន្តិសុខជាតិ គឺជារឿងពិតប្រាកដ ហើយសកម្មភាពបែបនេះ អាចកើតមានឡើងភ្លាមៗ ខណៈមនុស្សផ្សេងគ្នា អាចប្រើប្រាស់លេស ដើម្បីលាក់បាំងពីគោលបំណងរបស់ពួកគេ។ លោក បាននិយាយពីភាពចាំបាច់ក្នុងការ «ប្រុងប្រយ័ត្នគ្រប់ពេលវេលាប្រឆាំងទៅនឹងការប៉ុនប៉ងបង្កបញ្ហាណាមួយ»។នៅក្នុងទីក្រុងហុងកុង ដែលគ្រប់គ្រងដោយប្រទេសចិន មន្ត្រីនគរបាល បានរឹតបន្តឹងសន្តិសុខ នៅជុំវិញឧទ្យាន Victoria Park ជាកន្លែងមានការបួងសួងដុតភ្លើងទៀន នៅថ្ងៃទី ៤ ខែមិថុនា ដែលត្រូវបានធ្វើឡើងជារៀងរាល់ឆ្នាំ មុនពេលច្បាប់សន្តិសុខជាតិថ្មីតឹងរ៉ឹង ចូលជាធរមាន កាលពីប៉ុន្មានឆ្នាំថ្មីៗនេះ។រថក្រោះរបស់ចិន បានបើកចូលទៅក្នុងទីលាន នៅមុនពេលថ្ងៃរះ នៅថ្ងៃទី ៤ ខែមិថុនាឆ្នាំ ១៩៨៩ ដើម្បីបញ្ចប់បាតុកម្មគាំទ្រលទ្ធិប្រជាធិបតេយ្យជាច្រើនសប្តាហ៍ ធ្វើឡើងដោយនិស្សិត និងកម្មករ។

កសិករអេស្ប៉ាញ និងបារាំង ប្រមូលផ្ដុំគ្នាបិទព្រំដែន ប៉ុន្មានថ្ងៃមុនការបោះឆ្នោតសហភាពអឺរ៉ុប

ក្រុមកសិករអេស្ប៉ាញ និងបារាំង បាននាំគ្នាបិទផ្លូវនៅតាមព្រំដែនឆ្លងកាត់ជួរភ្នំ ភីរ៉េនីស (Pyrenees) កាលពីថ្ងៃចន្ទ (០៣ មិថុនា) មុនការបោះឆ្នោតសភាអឺរ៉ុប ដើម្បីតវ៉ាប្រឆាំងនឹងអ្វីដែលពួកគេនិយាយថាជាការប្រកួតប្រជែងអយុត្តិធម៌ពីខាងក្រៅសហភាពអឺរ៉ុប។កាលពីដើមឆ្នាំនេះ ក្រុមកសិករបាននាំគ្នាតវ៉ាបិទផ្លូវជាច្រើនសប្តាហ៍នៅក្នុងប្រទេសនានាទូទាំងសហភាពអឺរ៉ុប ដោយនិយាយថាពួកគេកំពុងប្រឈមមុខនឹងកំណើនថ្លៃចំណាយ និងពន្ធខ្ពស់ សេវាលុយក្រោមតុ បទប្បញ្ញត្តិបរិស្ថានហួសហេតុ និងការប្រកួតប្រជែងមិនយុត្តិធម៌ពីការនាំចូលអាហារថោក។ជាមួយនឹងការបោះឆ្នោតសហភាពអឺរ៉ុប ដែលនឹងប្រព្រឹត្តទៅនៅថ្ងៃទី៦-៩ ខែមិថុនា ក្រុមកសិករបារាំង និងអេស្ប៉ាញ បានប្រើប្រាស់ត្រាក់ទ័ររាប់សិបគ្រឿងដើម្បីបិទព្រំដែនទាំងពីរនៅលើផ្លូវហាយវេ អេភី-៨ (AP-8) នៅក្នុងសហគមន៍ជនជាតិភាគតិច បាស្គ៍ (Basque) និងផ្លូវហាយវេ អេភី-៧ (AP-7) នៅតំបន់ កាតាឡូនី (Catalonia)។ សប្តាហ៍នៃការតវ៉ារបស់កសិករ បានបង្ខំសហភាពអឺរ៉ុប ក្នុងខែឧសភា ឱ្យបន្តការឧបត្ថម្ភធនរយៈពេលប្រាំមួយខែ ដើម្បីគាំទ្រដល់វិស័យកសិកម្មរបស់ប្លុក ២៧ ប្រទេសមួយនេះ។សហភាពអឺរ៉ុប ក៏បានកាត់បន្ថយផ្នែកខ្លះនៃគោលនយោបាយបរិស្ថាន បៃតង (Green Deal) របស់ខ្លួនផងដែរ ដោយដកចេញនូវគោលដៅកាត់បន្ថយការបំភាយឧស្ម័នកសិកម្មពីផែនទីបង្ហាញផ្លូវអាកាសធាតុឆ្នាំ២០៤០ របស់ខ្លួន។ ការបោះឆ្នោតសភាអឺរ៉ុប នឹងចាប់ផ្តើមនៅថ្ងៃព្រហស្បតិ៍ (០៦ មិថុនា) ប៉ុន្តែប្រទេសភាគច្រើន បានចាប់ផ្ដើមការបោះឆ្នោតមុនពេលតាំងពីថ្ងៃអាទិត្យមក៕

របបសឹកទម្លាក់គ្រាប់បែកលើពិធីមង្គលការនៅមីយ៉ាន់ម៉ា បណ្តាលឱ្យមនុស្ស២៤នាក់ស្លាប់

អ្នកស្រុកបានប្រាប់អ្នកសារព័ត៌មានមួយថា យន្តហោះយោធាយោធាមួយគ្រឿងបានទម្លាក់គ្រាប់បែកទម្ងន់ ៥០០ ផោនលើពិធីមង្គលការមួយ ដោយបានសម្លាប់មនុស្ស ២៤ នាក់ និងប្រហែល ៣០នាក់ទៀតរងរបួសនៅក្នុងតំបន់ សាហ្គេង (Sagaing) របស់សហភាពមីយ៉ាន់ម៉ាកាលពីថ្ងៃចន្ទទី៣មិថុនា។អ្នកភូមិម្នាក់ឈ្មោះ យូ តាយ (U Htay)បាននិយាយថា បន្ទាប់ពីការទម្លាក់គ្រាប់បែកនេះ កងទ័ពរដ្ឋាភិបាលបានបាញ់កាំភ្លើងធំជាច្រើនគ្រាប់ចូលទៅក្នុងភូមិ ម៉ា ត (Ma Taw) ក្នុងសង្កាត់ មីនហ្គីន (Mingin) ដោយបង្ខំឱ្យប្រជាជនជាង ២.០០០នាក់ មកពីភូមិនៅក្បែរៗនោះចំនួន៦ ត្រូវភៀសខ្លួនចេញពីផ្ទះសម្បែងរបស់ពួកគេ។ លោកបានបន្តថា គ្រាប់បែកនោះត្រូវបានទម្លាក់ផ្ទាល់ទៅក្នុងពិធីមង្គលការនៅម៉ោង ៨ និង ១៥ នាទីព្រឹក ថ្ងៃចន្ទ ។ ពេលនោះកូនកំលោះ -កូនក្រមុំ កំពុងធ្វើដំណើរទៅវត្តក្នុងភូមិ ហើយមិនមានរបួសទេ ។លោកបានបន្តថានៅតាមតំបន់ជនបទ កន្លែងចម្អិនអាហារ រោងទទួលទានអាហារ និងកន្លែងផ្ដល់វុត្ថុអានុស្សាវរីយពិធីមង្គលការ គឺនៅក្នុងកន្លែងផ្សេងៗគ្នា។ គ្រាប់បែកបានវាយប្រហារតំបន់ភាគកណ្តាល បណ្តាលឲ្យមនុស្សទាំងអស់នៅទីនោះរងការវាយប្រហារ។ អ្នកស្រុកម្នាក់ទៀត បាននិយាយថា ដោយសារតែអ្នករបួសធ្ងន់ច្រើន ដូច្នេះចំនួនអ្នកស្លាប់អាចកើនឡើងថែមទៀត ។កុមារវ័យ៨ឆ្នាំម្នាក់ស្ថិតក្នុងចំណោមអ្នកស្លាប់ទាំងនោះ៕

នគរបាល សាន់ហ្វ្រាន់ស៊ីស្កូ ចាប់ខ្លួនបាតុករគាំទ្រប៉ាឡេស្ទីនរាប់សិបនាក់នៅស្ថានកុងស៊ុលអ៊ីស្រាអែល

ក្រុមមន្រ្តីនិយាយថា នគរបាលក្រុងសាន់ហ្វ្រាន់ស៊ីស្កូ (San Francisco) របស់សហរដ្ឋអាមេរិក បានចាប់ខ្លួនបាតុករគាំទ្រប៉ាឡេស្ទីនចំនួន ៧០ នាក់ កាលពីថ្ងៃចន្ទ (០៣ មិថុនា) ពីបទយករបស់ដោយគ្មានការអនុញ្ញាត បន្ទាប់ពីពួកគេបានសម្រុកចូលទៅក្នុងបន្ទប់ទទួលភ្ញៀវនៃអគារស្នាក់នៅស្ថានកុងស៊ុលអ៊ីស្រាអែល ហើយបានបដិសេធមិនព្រមចាកចេញ។នគរបាលបាននិយាយនៅក្នុងសេចក្តីថ្លែងការណ៍មួយថា «មន្រ្តីមានមូលហេតុដើម្បីចាប់ខ្លួនជនសង្ស័យចំនួន ៧០ នាក់ដែលបដិសេធមិនព្រមចេញពីអាគារ»។ ពុំមានការរងរបួសត្រូវបានគេរាយការណ៍ទេ ហើយសាក្សីសារព័ត៌មានរ៉យទ័របានឱ្យដឹងថា នគរបាលបាននាំក្រុមអ្នកតវ៉ាចេញពីអគារម្តងម្នាក់ៗ ហើយបញ្ជូនចូលទៅក្នុងរថយន្តនគរបាល ដោយត្រូវបានចងដៃដោយខ្សែរ៉ូត។សារព័ត៌មាន ក្រូនីខល (Chronicle) បានរាយការណ៍ពីទីតាំងតវ៉ានោះថា ក្រុមបាតុករដែលបញ្ចេញសំឡេងប្រឆាំងនឹងការលុកលុយរបស់អ៊ីស្រាអែលទៅកាន់តំបន់ហ្កាហ្សា ទាំងនោះបាននិយាយថា ពួកគេគ្រោងនឹងបន្តនៅក្នុងអគាររហូតដល់ត្រូវបានបណ្ដេញចេញដោយបង្ខំ។ ក្រុមរៀបចំបាតុកម្ម ដែលមានឈ្មោះថា បណ្ដាញជ្វីហ្វអន្តរជាតិ ប្រឆាំងនឹងជ្វីហ្វជ្រុលនិយម (IJAZN) បាននិយាយនៅលើបណ្ដាញអ៊ីនស្តាក្រាម (Instagram) ថាមានមនុស្ស ១០០ នាក់បានចូលរួមក្នុងការតវ៉ានោះ។ស្ថានកុងស៊ុលអ៊ីស្រាអែល បាននិយាយថា ខ្លួនមានការហួសចិត្ត ប៉ុន្តែមិនភ្ញាក់ផ្អើលទេចំពោះក្រុមបាតុករដែលសម្រុកចូលទៅក្នុងបន្ទប់ទទួលភ្ញៀវនៃអគារស្ថានកុងស៊ុលនោះ។ សេចក្តីថ្លែងការណ៍របស់អ៊ីស្រាអែល បានហៅក្រុមបាតុករទាំងនោះថាជា «អ្នកបះបោរគាំទ្រក្រុមហាម៉ាស»៕

[UPDATE] អ្នកស្លាប់ដោយសាររលកកម្ដៅនៅឥណ្ឌា ឡើងដល់ជាង២០០នាក់ រួមទាំងបុគ្គលិកបោះឆ្នោតរាប់សិបនាក់

មនុស្សជាង ២០០នាក់ រួមទាំងបុគ្គលិករៀបចំការបោះឆ្នោតរាប់សិបនាក់ដែលកំពុងបំពេញកាតព្វកិច្ចបោះឆ្នោត បានស្លាប់ក្នុងរយៈពេលប៉ុន្មានថ្ងៃចុងក្រោយនេះនៅក្នុងប្រទេសឥណ្ឌា ខណៈប្រទេសនេះបានបន្តរងគ្រោះពីផលប៉ះពាល់នៃរលកកម្ដៅដ៏ធ្ងន់ធ្ងរ។ មនុស្សស្លាប់ជាង៨០ នាក់ ត្រូវគេរាយការណ៍ក្នុងរយៈពេលត្រឹមតែ ៧២ ម៉ោងចុងក្រោយ ដោយនាំឲ្យចំនួនអ្នកស្លាប់ទាក់ទងនឹងរកលកកម្ដៅខ្លាំង ឡើងដល់ ២១១នាក់ នៅពេលនេះ ។ ក្នុងចំណោមអ្នកស្លាប់ទាំងនោះ យ៉ាងហោចណាស់៣៣នាក់ គឺជាបុគ្គលិកបម្រើការក្នុងកាតព្វកិច្ចបោះឆ្នោតដែលបានស្លាប់កាលពីថ្ងៃសៅរ៍នៅពេល ខណៈប្រទេសឥណ្ឌាកំពុងរៀបចំការបោះឆ្នោតដំណាក់កាលទី ៧ និងចុងក្រោយនៃការបោះឆ្នោតសកលរយៈពេល៦សប្តាហ៍របស់ខ្លួន។ មនុស្សទាំងនេះភាគច្រើនធ្វើការជាសន្តិសុខ បុគ្គលិកអនាម័យ និងបុគ្គលិកបោះឆ្នោតផ្សេងទៀត។ខណៈប្រទេសឥណ្ឌា កំពុងព្យាយាមទប់ទល់នឹងការហក់ឡើងស៊ីតុណ្ហភាពក្ដៅខ្លាំង កាលពីថ្ងៃចន្ទដើមសប្ដាហ៍នេះដែរ ប្រជាពលរដ្ឋនៅតាមតំបន់មួយចំនួននៅក្នុងរដ្ឋធានីដេលី បានឈរតម្រង់ជួរយ៉ាងវែងដើម្បីប្រមូលទឹកពីស៊ីទែន នានា ។ កាតព្វកិច្ចបោះឆ្នោតគឺជាភាពចាំបាច់ត្រូវតែបំពេញនៅក្នុងប្រទេសឥណ្ឌាសម្រាប់បុគ្គលិកផ្នែកសាធារណៈ។ ពួកគេត្រូវបានចាត់តាំងដោយគណៈកម្មការរៀបចំការបោះឆ្នោត មុនពេលការបោះឆ្នោតចាប់ផ្តើម៕

[UPDATE] អ្នកស្លាប់ក្នុងទឹកជំនន់ និងបំណាក់ដីនៅស្រី លង្កា ឡើងដល់១៦នាក់ ខណៈសាលារៀនបន្តបិទទ្វារ

ក្រុមមន្ត្រីបាននិយាយថា ប្រទេសស្រីលង្កា នៅតែបន្តបិទសាលារៀនកាលពីថ្ងៃចន្ទដើមសប្ដាហ៍នេះ ខណៈចំនួនអ្នកស្លាប់ដោយសារទឹកជំនន់ និងបំណាក់ដី បង្កឡើងដោយភ្លៀងធ្លាក់ខ្លាំងនៅក្នុងផ្នែកជាច្រើននៃប្រទេសកោះមួយនេះ បានកើនឡើងដល់ ១៦ នាក់។ក្រសួងអប់រំបានប្រកាសថា ការបើកសាលារៀនឡើងវិញគឺអាស្រ័យលើការវិវត្តន៍នៃស្ថានភាពអាកាសធាតុ។ភ្លៀងធ្លាក់ខ្លាំងបានបង្កការបំផ្លិចបំផ្លាញនៅក្នុងតំបន់ជាច្រើនរបស់ប្រទេសនេះ ចាប់តាំងពីថ្ងៃអាទិត្យចុង សប្ដាហ៍មុនមក ដោយបានជន់លិចផ្ទះសម្បែង ស្រែចំការ និងផ្លូវថ្នល់ ហើយបង្ខំឱ្យអាជ្ញាធរកាត់ផ្តាច់ចរន្តអគ្គិសនីជាការប្រុងប្រយ័ត្ន។យោងតាមមជ្ឈមណ្ឌលគ្រប់គ្រងគ្រោះមហន្តរាយបានឱ្យដឹងថា មនុស្ស ១២ នាក់បានស្លាប់បន្ទាប់ពី ទឹកហូរកួច និងលង់ទឹកនៅជិតរដ្ឋធានីកូឡុំបូ និងតំបន់ដាច់ស្រយាល រ៉ាត់ថាភូរ៉ា (Rathnapura) ស្រុក ម៉ាតារ៉ា (Matara) និងស្រុកហ្គាឡេ (Galle) កាលពីថ្ងៃអាទិត្យ។ បីនាក់ទៀតបានស្លាប់ពេលបំណាក់ដីបាក់សង្កត់លើផ្ទះ ហើយមនុស្សម្នាក់ស្លាប់ពេលដើមឈើបាក់រលំលើ។ មជ្ឈមណ្ឌលដដែលនេះ បាននិយាយថា ដោយឡែកមនុស្ស៥នាក់បានរងរបួសនៅពេលបំណាក់ដីបានវាយប្រហារ និងបំផ្លាញផ្ទះពីរខ្នងនៅតំបន់ រ៉ាត់ណាភូរ៉ា(Ratnapura) ស្ថិតនៅចម្ងាយប្រហែល ៨៦គីឡូម៉ែត្រ ភាគអាគ្នេយ៍ពីរដ្ឋធានីកូឡុំបូ។ មជ្ឈមណ្ឌលខាងលើនេះបាននិយាយនៅក្នុងសេចក្តីថ្លែងការណ៍មួយថា គិតត្រឹមថ្ងៃចន្ទទី៣ មិថុនា មនុស្សជាង ៦.០០០នាក់ ត្រូវបានជម្លៀសទៅកាន់មជ្ឈមណ្ឌលជម្លៀស ហើយលំនៅឋានជាង១២.០០០ ខ្នង ត្រូវបានខូចខាត៕

មនុស្ស ៤ នាក់ស្លាប់ដោយសារទឹកជំនន់នៅអាល្លឺម៉ង់ ស្របពេលការព្រមានពីបម្រែបម្រួលអាកាសធាតុ

ក្រុមអ្នកជួយសង្គ្រោះកាលពីថ្ងៃចន្ទ (០៣ មិថុនា) បានបន្តប្រតិបត្តិការជម្លៀសប្រជាជនចេញពីទឹកជំនន់នៅភាគខាងត្បូងប្រទេសអាល្លឺម៉ង់ ដែលបានឆក់យកជីវិតមនុស្ស ៤ នាក់ ខណៈដែលលោកអធិការបតី អូឡា សូស (Olaf Scholz) បានហៅគ្រោះហន្តរាយនោះថាថាជា «ការព្រមាន» ពីបញ្ហាបម្រែបម្រួលអាកាសធាតុកាន់តែអាក្រក់ទៅៗ។មនុស្សរាប់ពាន់នាក់នៅក្នុងតំបន់ បាវ៉ារៀ (Bavaria) និងតំបន់ បាដិន-វើធិមប៊ែក (Baden-Wuerttemberg) ត្រូវចាកចេញពីលំនៅឋានរបស់ពួកគេចាប់តាំងពីភ្លៀងធ្លាក់ខ្លាំងកាលពីថ្ងៃសុក្រ សប្ដាហ៍មុនបានបង្កឱ្យមានទឹកជំនន់យ៉ាងធ្ងន់ធ្ងរ។ ការជម្លៀសបន្ថែមត្រូវបានគេដាក់ចេញពេញមួយយប់ដល់ថ្ងៃចន្ទ ខណៈដែលបរិមាណទឹកជំនន់ដ៏ច្រើនបណ្តាលឱ្យការការពារទឹកជំនន់បរាជ័យ ហើយអ្នកស្រុកនៅជុំវិញតំបន់ ម៉ានឈីង-ភីឈែល (Manching-Pichl) ដែលរងផលប៉ះពាល់ខ្លាំងបំផុតដោយទឹកជំនន់ ត្រូវបានគេប្រាប់ឱ្យជ្រកកោននៅជាន់ខាងលើនៃលំនៅឋានរបស់ពួកគេ។ នគរបាលក្នុងតំបន់បាននិយាយថា អ្នកស្ម័គ្រចិត្តម្នាក់នៅតែបន្តបាត់ខ្លួន បន្ទាប់ពីទូករបស់គេ ក្រឡាប់កាលពីយប់ថ្ងៃអាទិត្យ ខណៈប្រតិបត្តិការស្វែងរកត្រូវបញ្ឈប់ដោយសារតែកម្ពស់ទឹកខ្ពស់ និងចរន្តទឹកខ្លាំង។ ទឹកជំនន់ដែលរីករាលដាល និងភ្លៀងធ្លាក់ជាបន្តបន្ទាប់បានជះឥទ្ធិពលដល់ការដឹកជញ្ជូនក្នុងតំបន់ ជាមួយនឹងការលុបចោល និងពន្យារពេលរថភ្លើងយ៉ាងទូលំទូលាយ។ ទោះបីជាមានការសន្យារបស់លោក សូស ក្នុងការប្រយុទ្ធប្រឆាំងនឹងបម្រែបម្រួលអាកាសធាតុក៏ដោយ ក្រុមអ្នកជំនាញបាននិយាយដោយឡែកពីគ្នាកាលពីថ្ងៃចន្ទថា ការព្យាករការបំភាយឧស្ម័នរបស់រដ្ឋាភិបាលរហូតដល់ឆ្នាំ២០៣០ គឺមិនប្រាកដប្រជានោះទេ ដែលជាហេតុមួយផ្នែកបង្កឱ្យមានគ្រោះធម្មជាតិទាំងនេះ៕

អ៊ុយក្រែន បានបិទថាមពលភាគច្រើន បន្ទាប់ពីការវាយប្រហាររបស់រុស្សី កំណត់គោលដៅលើហេដ្ឋារចនាសម្ព័ន្ធ

អ៊ុយក្រែន បានបិទថាមពលភាគច្រើនជាបន្ទាន់ នៅក្នុងប្រទេសកាលពីថ្ងៃអាទិត្យ មួយថ្ងៃបន្ទាប់ពីប្រទេសរុស្ស៊ី បានធ្វើការវាយប្រហារទ្រង់ទ្រាយធំលើហេដ្ឋារចនាសម្ព័ន្ធថាមពល ហើយបានអះអាងថា ខ្លួនទទួលបានផលចំណេញ នៅក្នុងខេត្តដូណិតស្ក៍(Donetsk)ភាគខាងកើត។ការបិទនេះ បានធ្វើឡើងនៅក្នុងតំបន់ទាំងអស់ លើកលែងតែតំបន់ចំនួនបីរបស់អ៊ុយក្រែន បន្ទាប់ពីការវាយប្រហារដោយយានដ្រូន និងមីស៊ីលកាលពីថ្ងៃសៅរ៍ លើគោលដៅថាមពល ដែលបានបណ្តាលឲ្យមនុស្សយ៉ាងហោចណាស់ ១៩នាក់ រងរបួស។ប្រតិបត្តិករបណ្តាញអគ្គិសនី Ukrenergo គ្រប់គ្រងដោយរដ្ឋរបស់អ៊ុយក្រែន បាននិយាយថា ការបិទបានប៉ះពាល់ដល់ទាំងអ្នកប្រើប្រាស់ឧស្សាហកម្ម និងគ្រួសារ។ការវាយប្រហាររបស់រុស្ស៊ីលើបណ្តាញអគ្គិសនីរបស់ប្រទេសអ៊ុយក្រែនក្នុងប៉ុន្មានសប្តាហ៍ថ្មីៗនេះ បានបង្ខំឲ្យរដ្ឋាភិបាលផ្តាច់ចរន្តអគ្គិសនីទូទាំងប្រទេស។ បើគ្មានប្រព័ន្ធការពារដែនអាកាសគ្រប់គ្រាន់ ដើម្បីទប់ទល់នឹងការវាយលុក និងអនុញ្ញាតឲ្យជួសជុលទេ ភាពខ្វះខាតនៅតែអាចកាន់តែអាក្រក់ឡើងៗ ដោយសារតម្រូវការកើនឡើង នៅចុងរដូវក្តៅ និងរដូវរងាខ្លាំងនោះ។ក្នុងចំណោមការវាយប្រហារថ្មីៗដ៏សំខាន់បំផុត គឺការវាយប្រហារកាលពីខែមេសា ដែលបានបំផ្លាញរោងចក្រថាមពលកម្តៅដ៏ធំបំផុតរបស់ទីក្រុងគីវ និងការវាយប្រហារដ៏ធំកាលពីថ្ងៃទី៨ ខែឧសភា ដែលផ្តោតលើការផលិតថាមពល និងឧបករណ៍បញ្ជូនថាមពល នៅក្នុងតំបន់ជាច្រើន។បន្ទាប់ពីការវាយប្រហារកាលពីថ្ងៃសៅរ៍ កងកម្លាំងអាកាសរបស់អ៊ុយក្រែន បាននិយាយកាលពីថ្ងៃអាទិត្យថា ការការពារដែនអាកាស បានបាញ់ទម្លាក់យានដ្រូនចំនួន២៥គ្រឿង ដែលបានបាញ់នៅពេលយប់។

រដូវកាលទឹកជំនន់របស់ចិន ចាប់ផ្តើមខ្លាំងក្លា និងលឿនជាងធម្មតា នៅតំបន់ភាគខាងត្បូង

យោងតាមក្រសួងធនធានទឹក (MWR) បានឱ្យដឹងថា ប្រទេសចិន បានឈានចូលដល់រដូវកាលទឹកជំនន់ទូទៅរបស់ខ្លួនកាលពីថ្ងៃសៅរ៍ ដោយទឹកជំនន់នៅក្នុងតំបន់ភាគខាងត្បូង បានកើនឡើងខ្លាំងរួចទៅហើយ ខណៈដែលអ្នកជំនាញម្នាក់បានប្រាប់សារព័ត៌មាន គ្លូបប៊ល ថែមស៍ (Global Times) កាលពីថ្ងៃអាទិត្យ (០២ មិថុនា) ថា រដូវទឹកជំនន់ឆ្នាំនេះនៅតំបន់ភាគខាងត្បូង ប្រទេសចិន បានចាប់ផ្តើមលឿនជាងធម្មតា។រដូវទឹកជំនន់ទូទៅឆ្នាំនេះ ដែលរំពឹងថានឹងដំណើរការចាប់ពីខែមិថុនា ដល់ខែសីហា នឹងមានទាំងទឹកជំនន់ និងគ្រោះរាំងស្ងួត ដោយគ្រោះធម្មជាតិបែបនេះកាលពីមុនបណ្តាលឱ្យខូចខាតជាច្រើន។ ព្រឹត្ដិការណ៍អាកាសធាតុធ្ងន់ធ្ងរក៏ត្រូវបានគេរំពឹងថានឹងកាន់តែញឹកញាប់ រីករាលដាល និងខ្លាំងជាងមុន ជាមួយនឹងផលប៉ះពាល់កាន់តែខ្លាំង នេះបើយោងតាមការចេញផ្សាយព័ត៌មានរបស់ក្រសួងធនធានទឹក។ ទីភ្នាក់ងារព័ត៌មានស៊ីនហួរ បានរាយការណ៍ថា នាយកដ្ឋានពាក់ព័ន្ធកំពុងតាមដានយ៉ាងដិតដល់នូវជំនន់ទឹកភ្លៀង បម្រែបម្រួលកម្រិតទឹក ធ្វើការពិគ្រោះ និងវិនិច្ឆ័យ ព្រមទាំងចូលរួមយ៉ាងសកម្មក្នុងការទប់ស្កាត់ និងឆ្លើយតបទៅនឹងភ្លៀងធ្លាក់ខ្លាំង និងទឹកជំនន់។អាជ្ញាធរគ្រប់គ្រងទឹកជំនន់ក្នុងទីក្រុងប៉េកាំង ក៏បានក្រើនរំលឹកសាធារណជនកាលពីថ្ងៃអាទិត្យ ឱ្យយកចិត្តទុកដាក់លើការព្យាករ និងការព្រមានដែលពាក់ព័ន្ធ ហើយសិក្សាអំពីនីតិវិធីផ្តល់ជម្រកសង្គ្រោះបន្ទាន់សម្រាប់រដូវទឹកជំនន់៕

បណ្ដាញសង្គម

ព័ត៌មានថ្មីៗ

ព្រះខ័នរាជ បើកទ្វារផ្ទះទទួលកងយោធពលខេមរភូមិន្ទ ខណៈថាយហ្គឺរ ប៉ះក្រោន និង កំពង់ដេវ៉ា ជួបវិសាខា ជាគូជក់ចិត្ត

កម្ពុជានាំចេញទំនិញក្នុងវិស័យកម្មន្តសាលមិនមែនកាត់ដេរ មានទំហំទឹកប្រាក់ជាង ៣ ៦០០ លានដុល្លារ

មន្ទីរពេទ្យ និងផ្ទះសម្បែងនៅហ្កាហ្សាជួបការលំបាកខ្លាំងក្នុងការរក្សាដំណើរការម៉ាស៊ីនភ្លើងព្រោះកង្វះប្រេង

រុស្ស៊ី គំរាមធ្វើសង្គ្រាមនុយក្លេអ៊ែរ ប្រសិនបើជម្លោះនេះ មិនត្រូវបានដោះស្រាយតាមលក្ខខណ្ឌរបស់ខ្លួន

ខណ្ឌដូនពេញត្រូវបានប្រកាសទទួលស្គាល់ផ្លូវការជាទីក្រុងទេសចរណ៍គ្មានផ្សែងបារី

កម្ពុជា និងអ៊ីរ៉ង់ បានប្តេជ្ញាចិត្តរួមគ្នាក្នុងការជំរុញ និងពង្រឹងកិច្ចសហប្រតិបតិ្តការលើវិស័យសំខាន់ៗចំនួនបី

នាវាហ្វឹកហ្វឺនរបស់រុស្ស៊ី Perekop ចូលសំចតនៅកម្ពុជា ដើម្បីពង្រឹងកិច្ចសហប្រតិបត្តិការទ្វេភាគី

អាមេរិក ដាក់ទណ្ឌកម្មថ្មីលើបណ្តាញនានាដែលផ្តល់ជំនួយដល់ក្រុមតំណាងរបស់អ៊ីរ៉ង់នៅមជ្ឈិមបូព៌ា

កុមារច្រើននាក់ស្លាប់ក្នុងឧបទ្ទវហេតុអគ្គិភ័យឆេះសាលារៀននៅទីក្រុង Bukavu គ្រប់គ្រងដោយក្រុមឧទ្ទាម

ក្រុមហ៊ូទីគ្រប់គ្រងកំពង់ផែ Mocha តាមឆ្នេរសមុទ្រយេម៉ែន ដោយគំរាមកំហែងការនាំចេញប្រេងរបស់អារ៉ាប៊ីសាអ៊ូឌីតនៅសមុទ្រក្រហម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877