នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុង​ការចូលរួ​ម​ដោះស្រាយ​បញ្ហារួម​សម្រាប់​ជាតិ
កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤
ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ
គម្រោងពង្រីក និងលើកកម្រិតផ្លូវជាតិលេខ៧ (ស្គន់-ក្រុងកំពង់ចាម) ជាបួនគន្លង សម្រេចលទ្ធផលការងារបានជិត ៩០%ហើយ គិតត្រឹមខែមីនា ឆ្នាំ២០២៦នេះ

នយោបាយ​ និង ការអភិវឌ្ឍន៍

នាយករដ្ឋមន្រ្តី ណែនាំទៅក្រសួងស្ថាប័នពាក់ព័ន្ធរៀបចំការឧបត្ថម្ភ ដល់ស្រ្តីមានផ្ទៃពោះ ដែលកំពុងជាប់ឃុំ

2024/07/04 10:39:22 am        211
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានធ្វើការណែនាំដល់ក្រសួង ស្ថាប័នពាក់ព័ន្ធ គប្បីរៀបចំធ្វើការឧបត្ថម្ភ និងផ្តល់អត្ថប្រយោជន៍ផ្សេងៗទៀត ដល់ស្រ្តីមានផ្ទៃពោះ ដែលនឹងកំពុងជាប់ពន្ធនាគារ ខណៈយើងត្រូវគិតគូរទារកក្នុងផ្ទៃ ដែលមិនជាប់ពាក់ព័ន្ធនឹងម្តាយគេជាពិរុទ្ធជននោះ។ក្នុងឱកាសអញ្ជើញប្រគល់សញ្ញាបត្រជូនដល់គរុសិស្ស និស្សិត និងសម្ពោធដាក់ឲ្យប្រើប្រាស់​អគារ​អន្តេវាសិកដ្ឋានគ្រូ នៅវិទ្យាស្ថានគរុកោសល្យរាជធានីភ្នំពេញ នាព្រឹកថ្ងៃទី៤ ខែកក្កដា ឆ្នាំ២០២៤នេះ សម្តេចធិបតី ហ៊ុន ម៉ាណែត បានលើកឡើងថា ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងការងារ និងបណ្តុះបណ្តាលវិជ្ជាជីវៈ ក្រសួងសេដ្ឋកិច្ច និងហិរញ្ញវត្ថុ រួមទាំងភាគីពាក់ព័ន្ធ​ដទៃទៀត គប្បីជួបប្រជុំពិភាក្សាគ្នា ដើម្បីរៀបចំអត្ថប្រយោជន៍ផ្សេងៗ​ដល់ស្រ្តីជាពិរុទ្ធជន ដែលកំពុងមានផ្ទៃពោះ ដើម្បីឲ្យពួកគាត់​ធ្វើយ៉ាងណា​ទទួល​បាន​ការ​ឧបត្ថម្ភ​តាមរយៈប្រព័ន្ធគំពារ​សង្គម ​ដូចស្ត្រីជាកម្មការិនី និងស្រ្តីដទៃទៀត​ដែលមានផ្ទៃពោះដែរនោះ។សម្តេចធិបតី ​ហ៊ុន ម៉ាណែត បញ្ជាក់បន្ថែមថា​ ការដែលសម្តេច​ឲ្យមានការ​រៀបចំ​ផ្តល់​ការ​ឧបត្ថម្ភ ដល់​ស្រ្តីមានផ្ទៃពោះ ​ដែលកំពុង​ជាប់ឃុំឃាំងនេះ ​គឺធ្វើឡើង​ដើម្បី​ជួយ​ដល់​ទារក​ក្នុង​ផ្ទៃដែល​មិនដឹងរឿង ​និង​ជាប់ពាក់ព័ន្ធ ​នឹងរឿងម្តាយ​របស់ពួកគេ​ដែល​ជាពិរុទ្ធជននោះ។ មួយវិញទៀត​គម្រោង​នេះ គឺធ្វើឡើង​ដើម្បី​ជា​សកម្មភាពមនុស្សធម៌តែប៉ុណ្ណោះ ​៕អត្ថបទបាន ចក់

លោក Biden បេជ្ញាបន្តយុទ្ធនាការបោះឆ្នោត ទោះមានសម្ពាធដែលរុញឱ្យលោកលាឈប់ក៏ដោយ

2024/07/04 10:01:30 am        137
Facebook Telegram Linkin
ប្រធានាធិបតីអាមេរិក លោក ចូ បៃដិន (Joe Biden) បានប្តេជ្ញាបន្តប្រជែងតំណែងប្រធានាធិបតីឆ្នាំ២០២៤ ក្នុងអំឡុងពេលការសន្ទនាតាមទូរសព្ទជាមួយបុគ្គលិកយុទ្ធនាការបោះឆ្នោតកាលពីថ្ងៃពុធ (០៣ កក្កដា) ហើយបានទទូចក្នុងកិច្ចប្រជុំជាមួយសមាជិកសភា និងអភិបាលនៃគណបក្សប្រជាធិបតេយ្យថាលោកមានសម្ថភាពប្រជែងតំណែងប្រធានាធិបតីនេះម្ដងទៀត បើទោះបីជាការជជែកដេញដោលដ៏រអាក់រអួលរបស់ខ្លួនកាលពីសប្តាហ៍មុនក៏ដោយ។លោក បៃដិន បានហៅទូរសព្ទទៅកាន់សមាជិកដែលកំពុងមានការព្រួយបារម្ភក្នុងក្រុមយុទ្ធនាការរបស់លោក ហើយបានប្រាប់ពួកគេថា «លោកមិនចាកចេញទៅណាទេ» នេះបើយោងតាមប្រភពពីរដែលដឹងពីបញ្ហានោះ។លោក បៃដិន បាននិយាយនៅក្នុងសារអេឡិចត្រូនិច (អ៊ីមែល) មួយថា «មិនមានអ្នកណាម្នាក់អាចដេញខ្ញុំបានទេ។ ខ្ញុំមិនចាកចេញឡើយ ហើយនឹងបន្តប្រជែងដល់ទីបញ្ចប់» ដោយជំរុញឱ្យអ្នកគាំទ្រឧបត្ថម្ភប្រាក់បន្ថែម ដើម្បីជួយផ្ដួលគូប្រជែងរបស់ខ្លួនគឺលោក ដូណាល់ ត្រាំ (Donald Trump) នៅក្នុងការបោះឆ្នោតប្រធានាធិបតីថ្ងៃទី០៥ ខែវិច្ឆិកា។លោកប្រធានាធិបតីបានជួបតាមអនឡាញ និងដោយផ្ទាល់ជាមួយអភិបាលគណបក្សប្រជាធិបតេយ្យចំនួន ២៤ នាក់ និងអភិបាលក្រុងវ៉ាស៊ីនតោន នៅល្ងាចថ្ងៃពុធ ដើម្បីធានាទំនុកចិត្តឡើងវិញដល់ពួកគេបន្ទាប់ពីការធ្វើមិនបានល្អក្នុងការជជែកដេញដោលថា លោកមានទំនួលខុសត្រូវលើការងារជាអ្នកដឹកនាំសម្រាប់គណបក្ស។នៅក្នុងការជជែកដេញដោលជាមួយលោក ត្រាំ កាលពីថ្ងៃព្រហស្បតិ៍សប្ដាហ៍មុន លោក បៃដិន បាននិយាយភ្លាត់ជាច្រើន បាត់បង់ការគិតម្តងម្កាល ហើយពេលខ្លះនិយាយបញ្រ្ចាសប្រធានបទទៀតផង។ ប្រធានាធិបតីរូបនេះបាននិយាយថាខ្លួនហត់នឿយពេកបន្ទាប់ពីការធ្វើដំណើរក្រៅប្រទេសចំនួនពីរលើក ខណៈសេតវិមានបាននិយាយថាពេលនោះលោកមានជំងឺផ្តាសាយ៕

ប្រសាសន៍សំខាន់ៗរបស់​សម្តេចធិបតី ក្នុងពិធីប្រគល់សញ្ញាបត្រ និងសម្ពោធដាក់ឲ្យប្រើប្រាស់អគារអន្តេវាសិកដ្ឋានគ្រូ

2024/07/04 09:52:28 am        360
Facebook Telegram Linkin
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី០៤ ខែកក្កដា ឆ្នាំ២០២៤ បានអញ្ជើញប្រគល់សញ្ញាបត្រជូនដល់គរុសិស្ស និស្សិត និងសម្ពោធដាក់ឲ្យប្រើប្រាស់អគារអន្តេវាសិកដ្ឋានគ្រូ នៅវិទ្យាស្ថានគរុកោសល្យរាជធានីភ្នំពេញ។ប្រសាសន៍សំខាន់ៗរបស់​សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា អ្វីគ្រប់យ៉ាងរបស់រាជរដ្ឋាភិបាលដែលបានធ្វើ និងកសាងទាំងសាលារៀន និងហេដ្ឋារចនាសម្ព័ន្ធកន្លងមកនេះ គឺដើម្បីបង្កើតឱកាសប៉ុណ្ណោះ សម្រេចគោលដៅទៅថ្ងៃខាងមុខ គឺអាស្រ័យលើតួអង្គខ្លួនឯង។ -សម្តេចធិបតី ហ៊ុន ម៉ាណែត លើកទឹកចិត្តឲ្យលោកគ្រូ អ្នកគ្រូទាំងអស់ត្រូវ មានការត្រៀមឯកសារ និងការស្រាវជ្រាវបន្ថែមទៀត សម្រាប់សិស្ស និស្សិតរបស់ខ្លួន ខណៈសម័យគេដល់អេអាយហើយ យើងទើបតែចាប់ផ្តើមកុំព្យូទ័រនោះ។-សម្តេចធិបតី ហ៊ុន ម៉ាណែត៖ រាជរដ្ឋាភិបាលយកចិត្តទុកដាក់ខ្លាំងណាស់ លើការពង្រឹងសមត្ថភាពលោកគ្រូ អ្នកគ្រូ ពីព្រោះលោកគ្រូ អ្នកគ្រូដែលខ្លាំង និងបណ្ដុះបណ្ដាលបានសិស្សដែលខ្លាំង និងមានគុណភាពខ្ពស់ដូចគ្នាដែរ។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ថ្លែងថា ឆ្អឹងខ្នងរបស់វិស័យអប់រំ គឺជាគ្រូ ដូច្នេះ គ្រូត្រូវតែខ្លាំង និងត្រូវតែពង្រឹងបន្ថែមទៀត ដោយត្រូវតែមានចំណេះចំនាញគ្រប់គ្រាន់ ដែលជាមូលដ្ឋានគ្រឹះក្នុងការធ្វើកំណែទម្រង់សម្រាប់វិស័យអប់រំនោះ។ -សម្តេចធិបតី ហ៊ុន ម៉ាណែត បញ្ជាក់ជាថ្មីម្តងទៀតថា ធនធានមនុស្សគឺជាកត្តាសំខាន់ បំផុតដែលនឹងត្រូវបន្តវិនិយោគ ខណៈថវិកាជាតិដែលរាជរដ្ឋាភិបាលបានចំណាយ គឺលើវិស័យអប់រំនេះ គឺច្រើនជាងក្រសួង ស្ថាប័នណាៗទាំងអស់។-សម្តេចធិបតី ហ៊ុន ម៉ាណែត ណែនាំឱ្យក្រសួងពាក់ព័ន្ធ គិតគូរ និងជួយឧបត្ថម្ភដល់ស្រ្ដីមានផ្ទៃពោះដែលជាពិរុទ្ធជននៅតាមពន្ធនាគារ។

UN៖ បញ្ជាជម្លៀសរបស់អ៊ីស្រាអែល បំផ្លាញកិច្ចប្រឹងប្រែងកែលម្អលំហូរជំនួយនៅតំបន់ហ្កាហ្សា

2024/07/04 08:48:18 am        85
Facebook Telegram Linkin
មន្ត្រីជំនួយជាន់ខ្ពស់របស់អង្គការសហប្រជាជាតិ បាននិយាយកាលពីថ្ងៃពុធ (០៣ កក្កដា) ថា បញ្ជាជម្លៀសយោធាអ៊ីស្រាអែល ដែលគ្របដណ្តប់មួយភាគបីនៃតំបន់ហ្កាហ្សាស្ទ្រីប «បានបំផ្លាញ» កិច្ចខិតខំប្រឹងប្រែងរបស់អង្គការសហប្រជាជាតិ ក្នុងការកែលម្អការផ្តល់ជំនួយមនុស្សធម៌តាមរយៈច្រកឆ្លងកាត់ កេរឹម ស្ហាលូម (Kerem Shalom)។អ៊ីស្រាអែល បានរិះគន់ប្រតិបត្តិការជំនួយដែលដឹកនាំដោយអង្គការសហប្រជាជាតិ នៅក្នុងតំបន់ហ៊ុមព័ទ្ធមានប្រជាជន ២,៣ លាននាក់នេះថាគ្មានប្រសិទ្ធភាព ប៉ុន្តែអង្គការសហប្រជាជាតិនិយាយថា ការចែកចាយមិនត្រឹមតែត្រូវបានរារាំងដោយសង្រ្គាមរយៈពេលជិតប្រាំបួនខែរវាងអ៊ីស្រាអែល និងពួកសកម្មប្រយុទ្ធប៉ាឡេស្ទីនហាម៉ាស ប៉ុណ្ណោះទេ ថែមទាំងដោយសារភាពគ្មានច្បាប់ទៀតផង។លោក អាន់ឌ្រា ដឺ ដូមីនីកូ (Andrea De Domenico) ប្រធានការិយាល័យសម្របសម្រួលកិច្ចការមនុស្សធម៌ នៃអង្គការសហប្រជាជាតិ នៅក្នុងតំបន់កាន់កាប់ប៉ាឡេស្ទីន បាននិយាយថា ក្នុងរយៈពេលប៉ុន្មានសប្តាហ៍កន្លងមកនេះ មានកិច្ចពិភាក្សាជាច្រើនជាមួយអ៊ីស្រាអែលអំពីរបៀបកែលម្អស្ថានភាព ប៉ុន្តែការបញ្ជាជម្លៀសនេះ ធ្វើឱ្យការខិតខំទាំងអស់នេះត្រូវបានបំផ្លាញ។យោធាអ៊ីស្រាអែលបានប្រកាសក្នុងខែនេះនូវការផ្អាកប្រយុទ្ធជារៀងរាល់ថ្ងៃដើម្បីជួយសម្រួលដល់ការប្រមូលជំនួយពីច្រក កេរឹម ស្ហាលូម ប៉ុន្តែអង្គការសហប្រជាជាតិបាននិយាយថា ភាពគ្មានច្បាប់នៅហ្កាហ្សា មានន័យថាស្ថានភាពនៅតែគ្រោះថ្នាក់ខ្លាំង ហើយនោះជាទំនួលខុសត្រូវរបស់អ៊ីស្រាអែល ក្នុងការស្តារសណ្តាប់ធ្នាប់ និងសុវត្ថិភាពសាធារណៈនៅតំបន់ហែកហួរដោយសង្គ្រាមមួយនេះ៕

គណៈកម្មការអន្តរក្រសួងចុះពិនិត្យវាយតម្លៃបញ្ចប់សុពលភាពលើការងារថែទាំផ្លូវចំនួន៣ខ្សែក្នុងខេត្តពោធិ៍សាត់

2024/07/03 03:37:22 pm        182
Facebook Telegram Linkin
នៅថ្ងៃទី៣ ខែកក្កដា ឆ្នាំ២០២៤ ឯកឧត្តមបណ្ឌិត ចាន់ ជារ៉ុង រដ្ឋលេខាធិការ​ក្រសួង​អភិវឌ្ឍន៍​ជនបទ បានដឹកនាំគណៈកម្មាធិការអន្តរក្រសួង រួមមានតំណាងក្រសួងសេដ្ឋកិច្ចនិងហិរញ្ញវត្ថុ និង​ក្រសួង​អភិវឌ្ឍន៍ជនបទ ធ្វើការចុះត្រួតពិនិត្យ វាយតម្លៃបញ្ចប់សុពលភាព លើការងារថែទាំខួប ផ្លូវ​ក្រាល​គ្រួស​ក្រហមចំនួន ៣ខ្សែ ប្រវែងសរុប ១២៤០០ម ទទឹងខ្នងលើ៥ម និងសាងសង់​លូមូល​ភ្លោះ​មុខ​កាត់១ម ប្រវែង៨ម ចំនួន១កន្លែង ស្ថិតនៅ ឃុំតាលោ ស្រុកតាលោសែនជ័យ និងក្នុង​សង្កាត់​ចំរើនផល សង្កាត់រលាប ក្រុងពោធិ៍សាត់ ខេត្តពោធិ៍សាត់ ដោយប្រើប្រាស់ថវិកាជំពូក ៦១ ដែល​អនុវត្តដោយមន្ទីរអភិវឌ្ឍន៍ជនបទខេត្តពោធិ៍សាត់ ។ បន្ទាប់​ពី​បាន​ពិនិត្យ​ទៅ​លើ​លក្ខណៈ​បច្ចេក​ទេស និងគុណភាពរួចមក គណៈកម្មការអន្តរក្រសួង បាន​សម្រេចឯកភាពទទួលយក ដោយ​បញ្ចប់រយៈពេលធានាសុពលភាពជាស្ថាពរ ។ ក្នុងឱកាសចុះពិនិត្យ ឯកឧត្តមបណ្ឌិត ចាន់ ជារ៉ុង បានមានប្រសាសន៍លើកឡើងថា ការ​អភិវឌ្ឍ​ហេដ្ឋា​រចនាសម្ព័ន្ធរូបវ័ន្ត និងគមនាគមន៍ នៅជនបទ បច្ចុប្បន្ន​ក្រសួង​មាន​ទិស​ដៅ​លើ​ការងារ​ពង្រីក​ស្ថាប​នាកសាងផ្លូវថ្មីចំនួនតែ៣០ភាគរយប៉ុណ្ណោះ ដោយ៧០ភាគរយទៀត​គឺ​ផ្តោត​លើ​ការងារ​ពង្រឹងគុ​ណភាព ជួសជុលថែទាំផ្លូវដែលបានកសាងកន្លងមកឱ្យប្រើប្រាស់បានយូរ ហើយ​គណៈកម្មការអន្តរក្រសួងចុះមកក្នុងពេលនេះគឺដើម្បីត្រួតពិនិត្យ វាយតម្លៃលើ​ការ​អនុវត្តន៍​ការងារ​ជួស​ជុល​ថែ​ទាំផ្លូវ របស់មន្ទីរអភិវឌ្ឍន៍ជនបទខេត្តពោធិ៍សាត់ តើគោរពតាមបច្ចេកទេស និងមាន​គុណភាព​ឬទេ បើនៅមានចំណុចខ្វះខាត គណៈកម្មការអន្តរ​ក្រសួង​នឹង​តម្រូវ​ឱ្យ​មន្ទីរ​អភិវឌ្ឍន៍​ជន​បទ​ខេត្ត​ធ្វើការកែសម្រួលឡើងវិញ ។ ជាមួយគ្នានោះ ឯកឧត្តមបណ្ឌិត ចាន់ ជារ៉ុង សូមឱ្យ​អាជ្ញាធរ​ភូមិ-ឃុំ ចូលរួមទប់ស្កាត់លើរថយន្តដឹកលើទំងន់ ហើយសូម​ឱ្យ​បងប្អូន​ប្រជាពល​រដ្ឋ​កុំ​ចាក់​ដី​លុប​ផ្លូវ​ទឹក​តាមសងខាងផ្លូវ និងសូមចូលរួមថែរក្សាផ្លូវនេះទាំងអស់គ្នា ដោយរាជរដ្ឋាភិបាល តាមរយៈ​ក្រសួងអភិវឌ្ឍន៍ជនបទគ្រោងនឹងប្រែក្លាយផ្លូវក្រា​ល​ក្រួសក្រហម​ទាំង​៣ខ្សែ​នេះ​ទៅ​ជា​ផ្លូវ​កៅ​ស៊ូរ​នាពេលអនាគត់ ៕អត្ថបទ និង រូបភាព ៖ ភិរុណ ពៅ

ប្រទេសចិនជំរុញឱ្យអ៊ីស្រាអែលបំពេញកាតព្វកិច្ចមនុស្សធម៌ នៅក្នុងតំបន់ហ្កាហ្សា

2024/07/03 01:51:09 pm        65
Facebook Telegram Linkin
ប្រទេសចិន កាលពីថ្ងៃអង្គារ បានអំពាវនាវឱ្យប្រទេសអ៊ីស្រាអែល បំពេញកាតព្វកិច្ចរបស់ខ្លួន នៅក្រោមច្បាប់មនុស្សធម៌អន្តរជាតិ និងគោរពតាមការអំពាវនាវរបស់សហគមន៍អន្តរជាតិ ដើម្បីធានាបានការចូលមកដោយសុវត្ថិភាពនិងឆាប់រហ័សនៃការផ្គត់ផ្គង់ជំនួយមនុស្សធម៌ ទៅក្នុងតំបន់ហ្កាហ្សា។ នៅក្នុងសុន្ទរកថា ក្នុងសន្និសីទក្រុមប្រឹក្សាសន្តិសុខអង្គការសហប្រជាជាតិ ស្តីពីស្ថានភាពនៅតំបន់មជ្ឈិមបូព៌ា រួមទាំងសំណួរអំពីដែនដីប៉ាឡេស្ទីន អ្នកតំណាងអចិន្ត្រៃយ៍របស់ប្រទេសចិន ប្រចាំនៅអង្គការសហប្រជាជាតិ លោក Fu Cong បាននិយាយលើកឡើងពីវិបត្តិមនុស្សធម៌ធ្ងន់ធ្ងរនៅតំបន់ហ្កាហ្សា ដែលកាន់តែធ្លាក់ចុះខ្លាំងដោយសារកង្វះការផ្គត់ផ្គង់សំខាន់ៗ និងស្ថានភាពសុខភាពធ្ងន់ធ្ងរ។លោក បាននិយាយថា មនុស្សរាប់លាននាក់កំពុងទប់ទល់ជាមួយភាពអត់ឃ្លាន ជំងឺ ការឈឺចាប់ និងភាពអស់សង្ឃឹម ដោយពណ៌នាអំពីស្ថានភាពនេះថា ជាមហន្តរាយមនុស្សធម៌បង្កើតឡើងដោយមនុស្ស និងជាការបំពានយ៉ាងធ្ងន់ធ្ងរលើច្បាប់អន្តរជាតិ។ លោក Fu បានបង្ហាញថា តំបន់ហ្កាហ្សា បានស្ថិតនៅក្រោមការបិទផ្លូវ អស់រយៈពេល៩ខែមកហើយ ដោយមនុស្សជាង២លាននាក់ រស់នៅក្នុង «គុកឥតជញ្ជាំង» គ្មានលទ្ធភាពទទួលបានទឹក អគ្គិសនី អាហារ ឱសថ និងប្រេងឥន្ធនៈ គ្រប់គ្រាន់។លោកក៏បានរិះគន់ ការបិទច្រកឆ្លងកាត់ទីក្រុង Rafah ដោយសារតែប្រតិបត្តិការយោធារបស់អ៊ីស្រាអែល ដែលបានធ្វើឱ្យរថយន្តដឹកជំនួយរាប់ពាន់គ្រឿងផ្ទុកទៅដោយជំនួយផ្គត់ផ្គង់មនុស្សធម៌ ត្រូវរង់ចាំក្នុងជួរដ៏វែង។ លោក Fu និយាយថា ចំណុចឆ្លងកាត់ដែលមានស្រាប់ គឺនៅឆ្ងាយមិនអាចបំពេញតម្រូវការជំនួយមនុស្សធម៌បានទេ ដោយបានបញ្ជាក់ថា ផ្លូវដឹកជញ្ជូនតាមផ្លូវគោក គឺជាមធ្យោបាយសំខាន់ក្នុងការពង្រីកដំណើរការទទួលបានជំនួយមនុស្សធម៌។លោក Fu បានថ្កោលទោសការវាយប្រហារដដែលៗលើអគាររបស់ទីភ្នាក់ងារជំនួយមនុស្សធម៌ និងបាននិយាយថា បុគ្គលិកមនុស្សធម៌ជាង២០០នាក់ បានស្លាប់នៅក្នុងជម្លោះ ដោយចាត់ទុករឿងនេះថា មិនធ្លាប់មានពីមុនមក នៅក្នុងប្រវត្តិសាស្ត្រ និងគួរឱ្យភ្ញាក់ផ្អើល។ដោយបានបញ្ជាក់ឡើងវិញ លោកនិយាយថា «ភាពអត់ឃ្លាន មិនអាចប្រើប្រាស់ធ្វើជាអាវុធបានទេ ហើយបញ្ហាមនុស្សធម៌ ក៏មិនអាចយកមកធ្វើនយោបាយបានដែរ»។

ហ្វីលីពីន និងចិន យល់ព្រមកាត់បន្ថយភាពតានតឹងនៅក្នុងជម្លោះសមុទ្រចិនខាងត្បូង

2024/07/03 01:46:45 pm        100
Facebook Telegram Linkin
ក្រុងម៉ានីល បាននិយាយថា ប្រទេសហ្វីលីពីន និងចិន បានព្រមព្រៀងគ្នាកាលពីថ្ងៃអង្គារ (០២ កក្កដា) ដើម្បី «បន្ថយភាពតានតឹង» ជុំវិញបញ្ហាសមុទ្រចិនខាងត្បូង បន្ទាប់ពីមានការប៉ះទង្គិចគ្នាដោយហិង្សានៅក្នុងដែនទឹកជម្លោះកាលពីខែមុន។ ទីក្រុងម៉ានីល និងទីក្រុងប៉េកាំង មានប្រវត្តិជម្លោះដែនសមុទ្រដ៏យូរលង់ក្នុងជម្លោះផ្លូវទឹកដ៏ក្តៅគគុក ប៉ុន្តែឧប្បត្តិហេតុកាលពីខែមុនគឺធ្ងន់ធ្ងរបំផុតនៅក្នុងការប្រឈមមុខដាក់គ្នាដែលកើនឡើងជាច្រើន។ក្រសួងការបរទេសហ្វីលីពីន បាននិយាយនៅក្នុងសេចក្តីថ្លែងការណ៍មួយបន្ទាប់ពីកិច្ចពិភាក្សាថា អនុរដ្ឋមន្រ្តីក្រសួងការបរទេសហ្វីលីពីន លោកស្រី ថេរ៉េសា ឡាហ្សារ៉ូ (Theresa Lazaro) និងអនុរដ្ឋមន្ត្រីការបរទេសចិន លោក ឈិន សាវតុង (Chen Xiaodong) បាន «ពិភាក្សាដោយស្មោះត្រង់ និងស្ថាបនា» កាលពីថ្ងៃអង្គារ ហើយបានអះអាងពីការប្តេជ្ញាចិត្តក្នុងការបន្ថយភាពតានតឹងដោយមិនលម្អៀងចំពោះទស្សនៈរៀងៗខ្លួន។គួររំលឹកថា បុគ្គលិកឆ្មាំល្បាតឆ្នេរចិន បានកាន់កាំបិត ដំបង និងពូថៅ ដោយទៅហ៊ុមព័ទ្ធ និងឡើងលើទូកកងទ័ពជើងទឹកហ្វីលីពីនចំនួន ៣ គ្រឿងកាលពីថ្ងៃទី១៧ ខែមិថុនា ក្នុងអំឡុងពេលបេសកកម្មផ្គត់ផ្គង់ឡើងវិញទៅកាន់ថ្មប៉ប្រះទឹក សេខិន ថូម៉ាស ស្ហូល (Second Thomas Shoal)។ ទាហានហ្វីលីពីនម្នាក់បានដាច់ម្រាមដៃនៅក្នុងការប៉ះទង្គិចគ្នានោះ ដោយទីក្រុងម៉ានីល ក៏បានចោទឆ្មាំល្បាតឆ្នេរចិនថាបានលួចកាំភ្លើង និងធ្វើឱ្យខូចខាតទូកចំនួនបីគ្រឿង ព្រមទាំងឧបករណ៍នាវាចរណ៍ និងទំនាក់ទំនងផងដែរ។ទីក្រុងប៉េកាំង បានច្រានចោលការលើកឡើងទាំងនោះ ដោយទទូចថាឆ្មាំល្បាតឆ្នេររបស់ខ្លួនមានអាកប្បកិរិយា «ប្រកបដោយវិជ្ជាជីវៈ និងអត់ធ្មត់» ហើយបានស្តីបន្ទោសទីក្រុងម៉ានីល ចំពោះការប៉ះទង្គិចគ្នានេះ៕

លោក Biden និងលោក Netanyahu រំពឹងថា នឹងជួបគ្នានៅអាមេរិក អំឡុងដំណើរទស្សនកិច្ចខែកក្កដា

2024/07/03 01:31:34 pm        75
Facebook Telegram Linkin
មន្ត្រីសេតវិមានម្នាក់បាននិយាយកាលពីថ្ងៃអង្គារ (០២ កក្កដា) ថា ប្រធានាធិបតីអាមេរិក លោក ចូ បៃដិន (Joe Biden) និងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ត្រូវបានគេរំពឹងថានឹងជួបគ្នានៅទីក្រុងវ៉ាស៊ីនតោន នៅចុងខែកក្កដានេះ នៅពេលដែលមេដឹកនាំអ៊ីស្រាអែល ធ្វើទស្សនកិច្ចដើម្បីថ្លែងសុន្ទរកថាទៅកាន់សភាសហរដ្ឋអាមេរិក អំពីសង្រ្គាមនៅក្នុងតំបន់ហ្កាហ្សា។លោក ណេតាន់យ៉ាហ៊ូ នឹងថ្លែងសុន្ទរកថានៅសភាអាមេរិកនៅថ្ងៃទី២៤ ខែកក្កដា ក្នុងអំឡុងពេលបំពេញទស្សនកិច្ចនៅក្រុងវ៉ាស៊ីនតោន ទៅកាន់សម័យប្រជុំរួមនៃសភាតំណាងរាស្ត្រ និងព្រឹទ្ធសភា។ ការរំពឹងទុកនៃកិច្ចប្រជុំរវាងលោក បៃដិន និងលោក ណេតាន់យ៉ាហ៊ូ ត្រូវបានរាយការណ៍ជាលើកដំបូងដោយសារព័ត៌មាន CNN ដែលបានបន្ថែមថាព័ត៌មានលម្អិតនៃកិច្ចប្រជុំដែលរំពឹងទុកនៅសេតវិមាននោះ មិនទាន់បញ្ចប់នៅឡើយទេ។សហរដ្ឋអាមេរិក បានរក្សាការគាំទ្រដ៏រឹងមាំរបស់ខ្លួនសម្រាប់អ៊ីស្រាអែលទាំងផ្នែកការទូត និងក្នុងការផ្តល់សព្វាវុធ ស្របពេលមានសង្រ្គាមនៅហ្កាហ្សា ប៉ុន្តែមានពេលខ្លះលោក បៃដិន បានសម្តែងការព្រួយបារម្ភអំពីការប្រព្រឹត្តយោធារបស់អ៊ីស្រាអែល ក្នុងសង្រ្គាមដ៏បង្ហូរឈាមនោះ។គណបក្សសាធារណរដ្ឋបានរិះគន់លោក បៃដិន ដែលជាសមាជិកគណបក្សប្រជាធិបតេយ្យចំពោះកង្វល់ទាំងនោះ ហើយបានជំរុញឱ្យមានការគាំទ្របន្ថែមទៀតសម្រាប់អ៊ីស្រាអែល។ មានការរិះគន់អន្តរជាតិកាន់តែខ្លាំងលើការប្រព្រឹត្តរបស់អ៊ីស្រាអែល និងការគាំទ្ររបស់សហរដ្ឋអាមេរិក ចំពោះសម្ព័ន្ធមិត្តរបស់ខ្លួន ក្នុងសង្គ្រាមដែលបានសម្លាប់មនុស្សរាប់ម៉ឺននាក់មកទល់ពេលនេះ និងបង្កើតវិបត្តិមនុស្សធម៌ដ៏ធ្ងន់ធ្ងរ៕

នាយករដ្ឋមន្រ្តីហុងគ្រី ស្នើបទឈប់បាញ់ដល់អ៊ុយក្រែន ដើម្បីពន្លឿនកិច្ចចរចាសន្តិភាព

2024/07/03 01:08:55 pm        115
Facebook Telegram Linkin
នាយករដ្ឋមន្ត្រីហុងគ្រី លោក វីកទ័រ អ័របាន (Viktor Orban) បានជំរុញឱ្យប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy) កាលពីថ្ងៃអង្គារ (០២ កក្កដា) ឱ្យពិចារណាលើបទឈប់បាញ់ ដើម្បីពន្លឿនការបញ្ចប់សង្គ្រាមជាមួយរុស្ស៊ី ប៉ុន្តែទីក្រុងគីវ បាននិយាយថា ខ្លួនមើលឃើញវិធីសាស្រ្តផ្ទាល់ខ្លួនជាផ្លូវទៅកាន់សន្តិភាព។លោក អ័របាន ដែលជាអ្នករិះគន់ឥតសំចៃមាត់ចំពោះជំនួយយោធារបស់លោកខាងលិចដល់អ៊ុយក្រែន និងមានទំនាក់ទំនងដ៏កក់ក្តៅបំផុតជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានជួបពិភាក្សាជាមួយលោក ហ៊្សេឡិនស្គី ក្នុងអំឡុងពេលដំណើរទស្សនកិច្ចលើកដំបូងរបស់ខ្លួនទៅកាន់ទីក្រុងគីវ ក្នុងរយៈពេលជាងមួយទសវត្សរ៍។ នៅក្នុងសេចក្តីថ្លែងការណ៍រួមទៅកាន់អ្នកសារព័ត៌មានបន្ទាប់ពីកិច្ចពិភាក្សានោះ លោក អ័របាន បាននិយាយថា លោកបានស្នើឱ្យលោក ហ៊្សេឡិនស្គី គិតពិចារណាអំពីបទឈប់បាញ់មួយ មុនពេលកិច្ចប្រជុំកំពូលអន្តរជាតិបន្ទាប់ ដែលទីក្រុងគីវសង្ឃឹមថានឹងប្រព្រឹត្តទៅនៅចុងឆ្នាំនេះ។ លោក ហ៊្សេឡិនស្គី ដែលបានថ្លែងមុនលោក អ័របាន មិនបានឆ្លើយតបនឹងការលើកឡើងនោះទេ។ ប៉ុន្តែទីប្រឹក្សាគោលនយោបាយការបរទេសរបស់លោក គឺលោក អ៊ីហ្គោ ហ៊្សូវខ្វា (Igor Zhovkva) ក្រោយមកបាននិយាយនៅក្នុងសុន្ទរកថាតាមទូរទស្សន៍ថា នោះមិនមែនជាសំណើលើកដំបូងឡើយ ហើយថាលោក ហ៊្សេឡិនស្គី បានឆ្លើយតបទៅកាន់លោក អ័របាន ជាមួយនឹងជំហរដែលគេដឹងលឺជាសាធារណៈរបស់លោករួចមកហើយ។បន្ទាប់ពីធ្វើជាម្ចាស់ផ្ទះនៃមេដឹកនាំពិភពលោករាប់រយនាក់នៅឯកិច្ចប្រជុំកំពូលសន្តិភាពនៅស្វីស កាលពីខែមុន ទីក្រុងគីវ បាននិយាយថា ខ្លួនសង្ឃឹមថានឹងរៀបចំកិច្ចប្រជុំកំពូលអន្តរជាតិលើកទីពីរនៅចុងឆ្នាំនេះ ដែលអាចអញ្ជើញតំណាងរុស្ស៊ី ឱ្យចូលរួម៕

អតីតសមាជិកបក្សប្រឆាំង៖ ការដឹកនាំបែបប្រជាភិថុតរបស់ទណ្ឌិតក្បត់ជាតិបីជំនាន់ធ្វើឱ្យសមាជិកបន្តចាកចេញ

2024/07/03 12:28:41 pm        199
Facebook Telegram Linkin
ភ្នំពេញ ÷ អតីតសមាជិកជាន់ខ្ពស់របស់គណបក្សប្រឆាំងប្រចាំទ្វីបអឺរ៉ុប អះអាងថា ការដឹកនាំបែបប្រជាភិថុតរបស់មេបក្សប្រឆាំង ជាទណ្ឌិតក្បត់ជាតិបីជំនាន់នៅក្រៅស្រុក នឹងធ្វើឱ្យចរន្តនៃសមាជិករបស់ខ្លួនបន្តចាកចេញទៅចូលរួមជីវភាពនយោបាយជាមួយគណបក្សប្រជាជនកម្ពុជា។ថ្លែងប្រាប់ BTV ក្នុងកិច្ចសម្ភាសន៍ នៅថ្ងៃទី២ ខែកក្កដា ឆ្នាំ២០២៤ ម្សិលមិញនេះ លោក ខៃ រដ្ឋា អនុប្រធានចលនាយុវជនប្រចាំទ្វីបអាមេរិកខាងជើងរបស់អតីតគណបក្សសង្គ្រោះជាតិ និងក្រោយមកជាអគ្គលេខាធិការគណបក្សភ្លើងទៀនប្រចាំទ្វីបអាមេរិកខាងជើង បានបញ្ជាក់ថា ការសម្រេចចិត្តផ្តាច់ខ្លួនពីគណបក្សប្រឆាំងមកចូលរួមជីវភាពនយោបាយជាមួយគណបក្សប្រជាជនកម្ពុជាដោយសារមេដឹកនាំ ទណ្ឌិតក្បត់ជាតិ៣ជំនាន់មានចរិកបំពេញតែមហិច្ឆតាផលប្រយោជន៍របស់ខ្លួន ហើយចំណុចសំខាន់នៃការដឹកនាំជិតរយៈពេល៣០ឆ្នាំមានរបៀបប្រជាភិថុតតែប៉ុណ្ណោះ ដែលនេះជាកត្តាធ្វើឱ្យចរន្តនៃសមាជិកផ្សេងទៀតបន្តចាកចេញកាន់តែច្រើន។ ជាមួយគ្នា អតីតសមាជិកគណបក្សប្រឆាំងរូបនេះ អះអាងថា កត្តាធំបំផុតដែលនាំឱ្យរូបលោកសម្រេចចិត្តផ្តាច់ខ្លួនចេញពីគណបក្សប្រឆាំង គឺការប្រមាថ និងមិនឱ្យតម្លៃលើការពិត ជាក់ស្តែងដូចករណីសញ្ញាបត្រយោធារបស់សម្តេចមហាបវរធិបតី ហ៊ុន ម៉ាណែត ដែលនេះឆ្លុះបញ្ចាំងថាទណ្ឌិត សម រង្ស៉ី មិនផ្តល់តម្លៃដល់យុវជន និងបញ្ញវន្តដ៏ទៃទៀតនោះទេ។ សូមជម្រាបថា គិតមកទល់ពេលនេះ ថ្នាក់ដឹកនាំ សមាជិក និងសកម្មជនរបស់គណបក្សប្រឆាំងទាំងក្នុង និងក្រៅប្រទេសមិនតិចទេ បានបន្តនាំគ្នាចាកចេញពីគណបក្សប្រឆាំង ដោយសារមេដឹកនាំជាទណ្ឌិតក្បត់ជាតិ និងបានភូតកុហកជាបន្តបន្ទាប់ ដែលធ្វើឱ្យថ្នាក់ដឹកនាំ សមាជិក និងសកម្មជនរបស់ខ្លួនអស់ជំនឿចិត្ត និងងាកមករួមរស់ជាមួយគណបក្សប្រជាជនកម្ពុជា ដែលមានឆន្ទះ និងស្មោះស្ម័គ្របម្រើជាតិ និងប្រជាជនពិតប្រាកដ៕អត្ថបទ សេក ឧត្តម ថត ឡាយ សុភ័ណ រូបភាព បក្សប្រឆាំង ២ ៧ ២៤

បណ្ដាញសង្គម

ព័ត៌មានថ្មីៗ

ជនជាតិភាគតិចប្រេស៊ីល ប្រឆាំងនឹងគម្រោងផ្លូវរថភ្លើងនៅតំបន់ព្រៃជប់ភ្លៀងអាម៉ាហ្សូន
04/09/2026 07:04 PM
Facebook Telegram Linkin
ក្រសួងការបរទេស៖ រុស្ស៊ីត្រៀមខ្លួនរួចជាស្រេច ដើម្បីបន្តកិច្ចចរចាអំពីអ៊ុយក្រែន ក្នុងពេលឆាប់ៗនេះ
04/09/2026 07:04 PM
Facebook Telegram Linkin
រដ្ឋមន្ត្រីការបរទេសអារ៉ាប៊ីសាអ៊ូឌីត និងអ៊ីរ៉ង់ បានធ្វើការសន្ទនាគ្នាតាមទូរស័ព្ទលើកដំបូង ចាប់តាំងពីការចាប់ផ្តើមសង្គ្រាម
04/09/2026 07:04 PM
Facebook Telegram Linkin
នាវាតិចតួចប៉ុណ្ណោះ ឆ្លងកាត់ច្រកសមុទ្រ Hormuz បើទោះបីជាមានបទឈប់បាញ់សង្រ្គាមអ៊ីរ៉ង់
04/09/2026 07:04 PM
Facebook Telegram Linkin
ប្រជាជនអ៊ីរ៉ង់រាប់ពាន់នាក់ ជួបជុំគ្នា ដើម្បីរំលឹកដល់អតីតមេដឹកនាំកំពូល លោក Khamenei
04/09/2026 07:04 PM
Facebook Telegram Linkin
អ្នកវិភាគ៖ កូរ៉េខាងជើងគួររៀនសូត្រពីសង្រ្គាមអ៊ីរ៉ង់
04/09/2026 07:04 PM
Facebook Telegram Linkin
ប្រភព៖ អាមេរិក និងអ៊ីរ៉ង់ នឹងធ្វើកិច្ចចរចា «ដោយផ្ទាល់» នៅក្រុងអ៊ីស្លាម៉ាបាដ ស្តីពីបទឈប់បាញ់អចិន្ត្រៃយ៍
04/09/2026 07:04 PM
Facebook Telegram Linkin
ចក្រភពអង់គ្លេសជំរុញឲ្យមានការពង្រីកបទឈប់បាញ់ទៅកាន់ប្រទេសលីបង់
04/09/2026 07:04 PM
Facebook Telegram Linkin
ពលរដ្ឋអាហ្សង់ទីន តវ៉ាទាមទារឲ្យការពារផ្ទាំងទឹកកក ខណៈសភាពិចារណាច្បាប់ថ្មី
04/09/2026 07:04 PM
Facebook Telegram Linkin
មេដឹកនាំប្រឆាំងកោះតៃវ៉ាន់និយាយនៅចិនថា សត្វស្លាប មិនមែនមីស៊ីលនោះទេ គួរហោះហើរលើមេឃ
04/09/2026 06:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.