នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

សាលារៀនខ្លះនៅខេត្តបាត់ដំបង អាចនឹងមិនទាន់បើកដំណើរការបាននៅដើមខែក្រោយ

2021/10/27 03:54:14 pm        239
Facebook Telegram Linkin
បាត់ដំបង ៖ សាលារៀនមួយចំនួននៅក្នុងខេត្តបាត់ដំបង អាចនឹងមិនទាន់បើកដំណើរការបាន នៅដើមខែក្រោយ តាមការគ្រោងទុក ដោយសារសាលាខ្លះ នៅជាប់ជាមណ្ឌលព្យាបាលអ្នកជំងឺកូវីដ១៩ និងជាមណ្ឌលចត្តាឡីស័ក ទោះបីជាអ្នកជំងឺដែលកំពុងសម្រាកព្យាបាលនៅតាមសាលារៀន កំពុងត្រូវបានផ្ទេរទៅកាន់មណ្ឌលព្យាបាលថ្មី នៅជាយដែនជាបន្តបន្ទាប់ក៏ដោយ។អ្នកជំងឺកូវីដ១៩នៅទូទាំងខេត្តបាត់ដំបង ជាពិសេសអ្នកកំពុងសម្រាកព្យាបាលនៅតាមសាលារៀន កំពុងត្រូវបានផ្ទេរទៅកាន់មណ្ឌលព្យាបាលថ្មី នៅជាយដែនជាបន្តបន្ទាប់ ដើម្បីយកសាលារៀន​ប្រគល់​ឲ្យសិស្សានុសិស្សសិក្សារៀនសូត្រឡើងវិញ។លោក យី សុងគី ប្រធានមន្ទីរអប់រំ យុវជន និងកីឡា ខេត្តបាត់ដំបង បានបង្ហាញពីការត្រៀម​លក្ខណៈ​រួចរាល់ហើយ សម្រាប់បើកដំណើរការសាលារៀនដំណាក់កាលទី២ ​នៅគ្រប់កម្រិត ចាប់ពីថ្នាក់មត្តេយ្យបឋម ដល់មធ្យមសិក្សា ​តាមការណែនាំរបស់ក្រសួងអប់រំ យុវជន និងកីឡា ។លោក បានបញ្ជាក់ថា សម្រាប់ថ្នាក់មធ្យមសិក្សា គឺបើកដំណើរការគ្រប់ថ្នាក់ ចាប់ពីថ្នាក់ទី៧​ដល់ទី១២ ហើយថ្នាក់បឋមសិក្សា គឺបើកសម្រាប់ថ្នាក់ទី៤ ទី៥ និងទី៦ ។ ចំពោះមត្តេយ្យសិក្សា គឺបើកតែមត្តេយ្យដាច់ដោយឡែក និងមត្តេយ្យសហគមន៍តែប៉ុណ្ណោះ។លោក បានឱ្យដឹងបន្ថែមថា ចំពោះសាលារៀនដែលជាប់ជាមណ្ឌលចត្តាឡីស័ក ឬមណ្ឌលព្យាបាល​អាចនឹងមានការយឺតយ៉ាងតិចតួច ​ក្នុងការបើកដំណើរការនៅដើមខែក្រោយ។រដ្ឋបាលខេត្តបាត់ដំបង កាលពីថ្ងៃទី២០ ខែកញ្ញា កន្លងមកនេះ បានសម្រេចអនុញ្ញាតឲ្យបើក​ឡើង​វិញ​នូវគ្រឹះស្ថានសិក្សាសាធារណៈ ​និងឯកជនដំណាក់កាលទី១ សម្រាប់តែអនុវិទ្យាល័យ ថ្នាក់ទី៩ និងវិទ្យាល័យថ្នាក់ទី១២។ បន្ទាប់ពីបើកដំណើរការបានមួយរយៈពេល ក៏មានសាលារៀន​មួយចំនួន ត្រូវបានបិទវិញជាបន្តបន្ទាប់ ដោយសារកំណើននៃការឆ្លងរីករាលដាល​នៃជំងឺ​កូវីដ១៩ ក្នុង​សហគមន៍។រដ្ឋបាលខេត្តបាត់ដំបង បានណែនាំដល់គ្រឹះស្ថានសិក្សាសាធារណៈ និងឯកជនដែលទទួលបានការ​អនុញ្ញាត​ឲ្យបើកដំណើការត្រូវបន្តអនុវត្តគោលការណ៍ប្រតិបត្តិស្ដង់ដារ (SOP) សម្រាប់ដំណើរការ​សាលារៀន​ឡើងវិញ និងយកចិត្តទុកដាក់អនុវត្តតាមការណែនាំរបស់ក្រសួងសុខាភិបាល ព្រមទាំង​ប្រកាន់ខ្ជាប់ជានិច្ចនូវវិធានការ ៣កុំ ៣ការពារ របស់សម្ដេចតេជោ ហ៊ុន សែន នាយករដ្ឋមន្រ្តី ស្របតាមបរិការណ៍ សកម្មភាពបែបគន្លងថ្មី ក្នុងបរិបទប្រយុទ្ធនឹងជំងឺកូវីដ១៩៕អត្ថបទ៖ នឿត សុភក្ត្រ

ការីទេសចរណ៍រៀបចំលក់កញ្ចប់ទេសចរណ៍ ខណៈទេសចរណ៍វ៉ាក់សាំងនឹងត្រូវបើកតាមតំបន់ឆ្នេរ

2021/10/27 01:20:29 pm        730
Facebook Telegram Linkin
ភ្នំពេញ ៖ ខណៈក្រសួងទេសចរណ៍ ប្រកាសផ្សព្វផ្សាយផែនការយុទ្ធសាស្ត្រទទួលទេសចរណ៍វ៉ាក់សាំង និងវិធានការគោលនយោបាយជំរុញចលនាទេសចរណ៍ផ្ទៃក្នុង មកដល់ពេលនេះ មានក្រុមហ៊ុនការីទេសចរណ៍មួយចំនួន បានចាប់ផ្តើមសហការជាមួយដៃគូការីទេសចរណ៍ រៀបចំលក់កញ្ចប់ទេសចរវ៉ាក់សាំងក្នុងតំលៃពិសេស សម្រាប់ភ្ញៀវក្នុងស្រុក និងសម្រាប់ទទួលភ្ញៀវទេសចរអន្តរជាតិ មកទស្សនាកម្ពុជា ចាប់ពីក្រោយខែវិច្ឆិកា ឆ្នាំ២០២១នេះតទៅ។បើតាមលោកស្រី ឆាយ សៀវលីន ប្រធានសមាគមន៍ទីភ្នាក់ងារទេសចរណ៍កម្ពុជា CATA បាន​ថ្លែងប្រាប់ BTV នៅថ្ងៃទី២៧ ខែតុលានេះថា សម្រាប់ការផ្សព្វផ្សាយលក់កញ្ចប់ខ្សែទស្សនកិច្ច​ដើរ​ទេស្សនា​នៅក្នុងប្រទេសកម្ពុជា នៅក្នុង​អំឡុងពេលនេះ ​គឺជាកញ្ចប់ទេសចរណ៍មានតំលៃពិសេស មាន​ការកញ្ចុះតំលៃសមរម្យនោះ ខណៈនៅ​ក្នុង​កញ្ចប់​ទេសចរណ៍នោះ មានបណ្តាសណ្ឋាគារធំៗ​ទំនើបៗនានា បានសហការជាមួយក្រុមហ៊ុនការីទេសចរណ៍ធ្វើការ​បញ្ចុះ​ថ្លៃ​ស្នាក់នៅពី៣០% ទៅ៤០% ​ហើយ​ភ្ញៀវ​ក៏​ទទួលបានការដើរកម្សាន្តនៅតាមគោលដៅទេសចរណ៍​ប្រណិតៗ​ច្រើន​កន្លែង មាន​ការ​អភិវឌ្ឍន៍ដោយរាជរដ្ឋាភិបាលជាមួយ​ នឹងដៃគូវិស័យឯកជននានាទៀត។លោកស្រី ឆាយ សៀវលីន បន្តថា បច្ចុប្បន្នកញ្ចប់ទេសចរណ៍ដែលមានតំលៃពិសេសនោះ គឺមានទេសចរ​ជាតិ​អន្តរជាតិបានទិញ ​និងបន្តកក់ទុកត្រៀមដើរកម្សាន្តនៅថ្ងៃឈប់សំរាកនានា។ដោយឡែកសម្រាប់ភ្ញៀវទេសចរអន្តរ​ជាតិ​ដែល​មានចាក់វ៉ាក់សាំងរួចហើយ គឺយើងកំពុងរៀបចំ​សហការជាមួយដៃគូនៅក្រៅ​ប្រទេស​ផ្សព្វ​ផ្សាយ​បើក​ដំណើរការ​លក់ ខណៈនៅក្នុងដំណាក់កាល​ដំបូង​នៃការបើកទទួលទេសចរវ៉ាក់សាំងសាកល្បងទៅទស្សនាខេត្តព្រះសីហនុ កោះរុង និងខេត្តកោះកុងចាប់ពីថ្ងៃទី៣០ ខែវិច្ឆិកា ឆ្នាំ២០២១តទៅនោះ ក៏​ជា​គោលដៅ​ទេសចរណ៍​ល្អ​ប្រណិត​របស់​កម្ពុជា​ផងដែរ។លោកស្រី ប្រធានសមាគមន៍ CATA ថ្លែងថា សម្រាប់ប្រទេសដែលបណ្តាក្រុមហ៊ុន​ការីទេសចរណ៍​នៅកម្ពុជា សហការ​ផ្សព្វផ្សាយ​លក់កញ្ចប់ទេសចរណ៍ជាមួយដៃគូការីទេសចរណ៍នៅក្រៅប្រទេស ភាគច្រើនជាប្រទេស​ដែល​មាន​ជើង​យន្តហោះ ​ហោះហើរត្រង់មកកាន់កម្ពុជាដោយផ្ទាល់ ក្នុងនោះ​មានដូចជាបណ្តាប្រទេសនៅក្នុងតំបន់អាស៊ាន ប្រទេស​ចិន កូរ៉េ ជប៉ុនជាដើម ។​ដោយឡែកប្រទេស​ដែលមិនមានជើងហោះត្រង់មកកម្ពុជា គឺយើងត្រូវការពេលវេលា​ច្រើន​ ដើម្បី​ធ្វើការផ្សព្វផ្សាយ។បើតាមលោក ឈុន មករា ប្រធាននាយកដ្ឋានគ្រប់គ្រងទីភ្នាក់ទេសចរណ៍ ​ដឹកជញ្ជូន និង​មគ្គុទេស​ក៏ទេសចរណ៍ នៃ​ក្រសួង​ទេសចរណ៍​ បានថ្លែងថា ជាក់ស្តែងបណ្តាក្រុមហ៊ុន​ការីទេសចរណ៍​គឺ​បានរៀបចំកញ្ចប់ទេសចរណ៍ខ្សែ​ទស្សនកិច្ច​តាំងពីយូរមកហើយ ​ហើយកញ្ចប់ខ្សែទស្សនកិច្ចនោះ បណ្តាក្រុមហ៊ុន​នានា​បានធ្វើការអភិវឌ្ឍន៍កែប្រែ​ជា​ប​​ន្តបន្ទាប់ តែមិនទាន់មានការផ្សព្វផ្សាយ​លក់​ទៅក្រៅប្រទេស ដោយសារកាលនោះរាជរដ្ឋាភិបាល​មិនទាន់​មាន​គោលការណ៍​បើក​ទេសចរណ៍​ផ្លូវការ ប៉ុន្តែចាប់ពីថ្ងៃស្អែកនេះតទៅ​ ក្រសួងនឹងធ្វើការផ្សព្វផ្សាយទៅបណ្តាក្រុមហ៊ុន​ការីទេសចរណ៍​ធ្វើការផ្សព្វផ្សាយទៅកាន់ដៃគូ ​និងអតិថិជនរបស់គាត់​ ខណៈរាជរដ្ឋាភិបាលបានធ្វើការ​ប្រកាស​ផ្សព្វផ្សាយ​ផែន​ការយុទ្ធសាស្ត្រទទួលទេស​ចរណ៍វ៉ាក់សាំង ​និងវិធានការ​គោល​នយោបាយ​ជំរុញចលនា​ទេសចរណ៍​ផ្ទៃ​ក្នុង​៕អត្ថបទ ស៊ុម សុខជា

មនី្ទរពេទ្យបង្អែករាជធានី ពន្លឿនការជួសជុលអគារ ដើម្បីត្រៀមទទួលអ្នកជំងឺកូវីដកម្រិតធ្ងន់

2021/10/27 01:10:12 pm        267
Facebook Telegram Linkin
ភ្នំពេញ ៖ លោកវេជ្ជបណ្ឌិត នេត សុវិរៈ ប្រធានមន្ទីរពេទ្យបង្អែករាជធានីភ្នំពេញ ស្ថិតក្នុងខណ្ឌ៧មករា រាជធានីភ្នំពេញ ប្រាប់ BTV ព័ត៌មាននាព្រឹកថ្ងៃទី២៧ ខែតុលា ឆ្នាំ២០២១នេះថា មនី្ទរពេទ្យបង្អែករាជធានីភ្នំពេញ កំពុងពន្លឿនដំណើរការជួសជុលអគារ ដើម្បីត្រៀមទទួលអ្នកជំងឺកូវីដ-១៩ កម្រិតធ្ងន់ ឲ្យចូលមកសម្រាកព្យាបាលជំងឺ។លោកវេជ្ជបណ្ឌិត នេត សុវិរៈ បានបន្តថា អគារ C នៅក្នុងមនី្ទរពេទ្យបង្អែករាជធានីភ្នំពេញ កំពុង​ដំណើរ​ការ​​ជួសជុលនេះ ​គឺដើម្បីត្រៀមទទួលអ្នកជំងឺកូវីដ-១៩កម្រិតធ្ងន់ ​ដែលមានកំពស់៥ជាន់ មាន​ចំនួន​៨០គ្រែ និងក្រុមការងារគ្រូពេទ្យព្យាបាលជំងឺកូវីដ-១៩ ចំនួនជាង៨០នាក់ផងដែរ ​សម្រាប់​ជួយ​សង្គ្រោះ​អាយុ​ជី​វិតប្រជាពលរដ្ឋឲ្យរួចផុតពីជំងឺដ៏កាចសាហាវនេះ។ទន្ទឹមនឹងនោះអ្នកកើតជំងឺកូវីដ-១៩ កម្រិត​សម្រាល គឺយើងលើកទឹកចិត្តឲ្យ​បងប្អូន​ប្រជាពលរដ្ឋ​ទាំងអស់ សម្រាកព្យាបាលនៅតាមខ្នងផ្ទះ ឬនៅតាម​មណ្ឌលថែទាំព្យាបាលជំងឺកូវីដ-១៩របស់រដ្ឋ ដែលមានស្រាប់។លោកវេជ្ជបណ្ឌិត នេត សុវិរៈ បានបញ្ជាក់ទៀតថា អគារព្យាបាលជំងឺកូវីដ-១៩ កម្រិតធ្ងន់នេះ ជា​ទីតាំង​ចុង​ក្រោយ​សម្រាប់ទទួលអ្នកជំងឺកូវីដ-១៩ ដែលស្ថិតក្នុងសភាពធ្ងន់ធ្ងរ ក្នុងករណីមាន​បញ្ហា​ធ្ងន់ធ្ងរ​ដែលមិន​អាច​ដោះស្រាយបាន យើងនឹងបញ្ជូនបន្តទៅព្យាបាលនៅមនី្ទរពេទ្យមិត្តភាពខ្មែរ-សូវៀត។ ប៉ុន្តែចំពោះ​សកម្មភាពដែលក្រុមការងារគ្រូពេទ្យបានធ្វើកន្លងមក និងក្នុង​កាលៈទេសៈ​បច្ចុប្បន្ននេះ បញ្ហា​កូវីដ-១៩ បើទោះបីធូរស្រាលបន្តិចក្តី ​តែឋិតក្នុងការព្រួយបារម្ភដដែល។ ដូច្នេះបុគ្គលិកទាំងអស់​នៅក្នុង​មនី្ទរ​ពេទ្យបង្អែករាជធានីភ្នំពេញ ​នៅតែតាំងចិត្ត​ ស្មារតីយ៉ាងមុះមុត ខំប្រឹងប្រែង​ធ្វើ​ការ​យ៉ាង​យក​ចិត្ត​ទុក​ដាក់ ​និងអស់ពីសមត្ថភាព ដើម្បីជួយស្រោចស្រង់នូវ​សុខុមាលភាព​របស់​ប្រជាពលរដ្ឋ ​ឲ្យបានល្អប្រសើរ៕អត្ថបទ រដ្ឋា 

អាជ្ញាធរកំពុងខិតខំទប់ស្កាត់បន្ថយកម្លាំងទឹកហូរកាត់ផ្លូវជាតិលេខ២០A

2021/10/27 12:23:34 pm        373
Facebook Telegram Linkin
ភ្នំពេញ ៖ ទឹកជំនន់កំពុងវាយប្រហារនៅតាមបណ្តាយផ្លូវជាតិលេខ២០A នៅថ្ងៃទី២៧ ខែតុលានេះ ខណៈអាជ្ញាធរក្នុងមូលដ្ឋាន និងកម្លាំងកងអង្គរក្ស នៃបញ្ជាការដ្ឋានអង្គរក្ស បានសហការគ្នាខិតខំទប់ស្កាត់កាត់បន្ថយ កម្លាំងទឹក កុំឱ្យហូរខ្លាំងលើដងផ្លូវ។លោក អ៊ុន សុខរុំ ចៅសង្កាត់គងនយ ខណ្ឌដង្កោ រាជធានីភ្នំពេញ នៅនេះ បានប្រាប់BTVឱ្យដឹងថា ស្ថានភាពទឹកជំនន់ នៅតាមបណ្តាយផ្លូវជាតិលេខ២០A បានបន្តហក់ឡើងជាងម្សិលមិញ ហើយដើម្បីជួយសម្រួលដល់អ្នកធ្វើដំណើតាមផ្លូវ អាជ្ញាធរមូលដ្ឋាន និងកម្លាំងកងអង្សរក្ស បានខិតខំទប់កម្លាំងទឹក កុំឱ្យហូរខ្លាំងលើដងផ្លូវ។ ក្រៅពីនេះ លោកចៅសង្កាត់ បានអំពាវនាវដល់ប្រជាពលរដ្ឋ ឱ្យមានការប្រុងប្រយ័ត្នចំពោះស្ថានភាពទឹក ដែលអាចនឹងបន្តហក់ឡើងបន្ថែមទៀត។ពលរដ្ឋរងផលប៉ះពាល់ដោយសារទឹកជំនន់ បានឱ្យដឹងថា មុនពេលទឹកលិចផ្ទះពួកគេ គឺអាជ្ញាធរ បានជូនដំណឹងដល់ពួកគេឱ្យត្រៀមខ្លួនទុកជាមុន ហើយពួកគេ ក៏បានមានការប្រុងប្រយ័ត្ន និងត្រៀមខ្លួនរួចរាល់ផងដែរ។ ពួកគេ កំពុងតែជួបផលលំបាកមួយចំនួន ក្នុងពេលទឹកផ្ទះនេះ។ក្នុងរយៈពេលប៉ុន្មានថ្ងៃចុងក្រោយនេះ ទឹកបានជន់លិចផ្ទះប្រជាពលរដ្ឋក្នុងរាធានីភ្នំពេញ ដោយ សារទឹកហូរធ្លាក់យ៉ាងគំហុកពីខេត្តកំពង់ស្ពឺ ចូលស្ទឹងព្រែកត្នោត រួចបន្តធ្លាក់ចុះមកក្រោម។ យ៉ាងណាក៏ដោយ ដើម្បីដោះស្រាយបញ្ហាជន់លិចនេះ អាជ្ញាធររាជធានីភ្នំពេញ និងស្ថាប័នពាក់ព័ន្ធមួយចំនួនទៀត មានវិធានការជាបន្តបន្ទាប់៕អត្ថបទ៖ ទូច សោភ័ណ 

ពលរដ្ឋគាំទ្រការបើកសកម្មភាពសង្គមវិញ និងការរៀនរស់ជាមួយកូវីដ១៩

2021/10/27 12:06:48 pm        504
Facebook Telegram Linkin
ភ្នំពេញ ៖ ​ប្រជាពលរដ្ឋ នៅក្នុងរាជធានីភ្នំពេញ បានសម្ដែងនូវការគាំទ្រចំពោះរាជរដ្ឋាភិបាល ដែលសម្រេចបើកសកម្មភាពសង្គមវិញដោយសន្សឹមៗ និងប្រុងប្រយ័ត្ន រួមទាំងឲ្យពលរដ្ឋរៀនរស់ជាមួយកូវីដ១៩ ដោយពួកគេចូលរួមខិតខំទប់ស្កាត់ការឆ្លងរាលដាល នៃជំងឺកូវីដ១៩នេះ ។ប្រជាពលរដ្ឋ បានលើកឡើងថា នៅកម្ពុជា ពិតជាជោគជ័យខ្លាំងណាស់ក្នុងការទទួល​បាន​នូវ​វ៉ាក់សាំង​កូវីដ១៩ បន្ទាប់ពីរាជរដ្ឋាភិបាល បានខិតខំស្វែងរក ​ទាំងការបញ្ជាទិញ និងជំនួយពីប្រទេស​ផ្សេងៗ ដើម្បីចាក់ជូនពលរដ្ឋបានគ្រប់គ្នា ដែលរហូតដល់ពេលនេះ គឺដូសទី៣ ឬដូសជំរុញ ។ពួកគេបានបន្តថា មួយវិញទៀត ក្រោយបានចាក់វ៉ាក់សាំងជូនពលរដ្ឋស្ទើរគ្រប់ផែនការហើយនោះ រាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន ជានាយកមន្ត្រី ក៏បានបើកប្រទេស​វិញ រួមទាំងឲ្យប្រជាពលរដ្ឋរៀនរស់ជាមួយកូវីដ១៩ ដោយការធ្វើបែបនេះ នឹងធ្វើឲ្យសេដ្ឋកិច្ចកម្ពុជា នឹងមានដំ ណើរការល្អឡើងវិញ ។ប្រជាពលរដ្ឋ បានបញ្ជាក់ថា បើទោះបីជាបានចាក់វ៉ាក់សាំងគ្រប់ចំនួនដូសក៏ដោយ ក៏ពួកគេនៅ​តែ​បន្តអនុវត្តនូវវិធានការ៣កុំ ៣ការពារ ឲ្យបានខ្ជាប់ខ្ជួន ដើម្បីឈានទៅដល់កម្ពុជា កាត់បន្ថយ​កាន់​តែ​ទាបបំផុត នៃការចម្លងជំងឺកូវីដ១៩ ។កាលពីថ្ងៃទី២៦ ខែតុលា នេះ ក្រសួងសុខាភិបាល បានចេញនូវសេចក្តីជូនដំណឹង នៃ​លក្ខខណ្ឌ​ចត្តាឡីស័ករយៈពេល១៤ថ្ងៃ ចំពោះអ្នកជំងឺកូវីដ១៩ ដែលបានបញ្ចប់ការព្យាបាល ​នៅតាមមន្ទីរពេទ្យ ឬមណ្ឌលព្យាបាលជំងឺកូវីដ១៩ ​និងអ្នកជំងឺ ​សម្រាកថែទាំ ​និងព្យាបាលនៅតាមផ្ទះ ដែលបាន​ដាក់​ឲ្យប្រើប្រាស់នាពេលកន្លងមក ត្រូវទុកជានិរាករណ៍ ។ តែអ្នកជំងឺកូវីដ១៩ ដែលត្រូវបានអនុញ្ញាត​ឲ្យបញ្ចប់ការព្យាបាល ​ទោះបីត្រូវបានលើកលែងកាតព្វកិច្ចចត្តាឡីស័ក ត្រូវបន្តអនុវត្តវិធានការ​​សុខា​ភិបាលជាធរមាន ដោយចូលរួមអនុវត្តឲ្យបាននូវវិធានការ ៣កុំ ៣ការពារ ឲ្យបានខ្ជាប់ខ្ជួន ៕អត្ថបទ៖ បាន សុខរិទ្ធិ

សម្តេចតេជោ អំពាវនាវដល់អាមេរិក-អាស៊ានបន្តពង្រឹងទំនាក់ទំនងកិច្ចសហប្រតិបត្តិការ

2021/10/27 12:01:58 pm        240
Facebook Telegram Linkin
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវឱ្យអាមេរិក និងអាស៊ាន បន្តពង្រឹងនិងពង្រីកទំនាក់ទំនងភាពជាដៃគូ និងកិច្ចសហប្រតិបត្តិការលើគ្រប់វិស័យ ដោយឈរលើមូលដ្ឋានគោរពអធិបតេយ្យភាព និងជួយគ្នាទៅវិញទៅមក ដើម្បីឈានទៅកសាងអនាគតរួមដ៏ភ្លឺស្វាង និងប្រកបដោយវិបុលភាព។សម្តេចតេជោ ហ៊ុន សែន ក្នុងកិច្ចប្រជុំកំពូលអាស៊ាន-អាមេរិក លើកទី៩ នៅយប់ថ្ងៃទី២៦ ខែតុលា នេះ តាមប្រព័ន្ធវីដេអូ ដែលកិច្ចប្រជុំនេះ មានការអញ្ជើញចូលរួមពីលោក ចូ បៃដិន ប្រធានាធិបតីអាមេរិកផងនោះ បានស្នើអាមេរិក និងអាស៊ាន យកចិត្តទុកដាក់ពង្រឹង និង​ពង្រីក​កិច្ចសហប្រតិបត្តិការលើវិស័យសំខាន់មួយចំនួន ដូចជា វិស័យសុខាភិបាល ឌីជីថល ដឹកជញ្ជូន ថាមពល បរិស្ថាន និងកាប្រែប្រួលអាកាសធាតុ ការពង្រឹង និងលើកកម្ពស់តួនាទីស្ត្រី។សម្តេចតេជោ បានលើកទៀតថា វិបត្តិសកល នៃជំងឺកូវីដ១៩ បានរំលឹកឡើងវិញនូវភាពចាំបាច់ នៃការរួបរួមសាមគ្គីគ្នា កិច្ចសហការ និងការជួយគ្នាទៅវិញទៅមក ​ដោយមិនប្រកាន់ជាតិសាសន៍ ជំនឿសាសនា និងនិន្នាការនយោបាយ។ ក្នុងស្មារតីនេះ សម្តេចតេជោ បានគូសបញ្ជាក់ថា កម្ពុជាវាយតម្លៃខ្ពស់ចំពោះគំនិតផ្ដួចផ្តើមរៀបចំ «សេចក្តីព្រាងគោលដៅ» ក្នុងកិច្ចប្រជុំកំពូលសកល ស្តីពីជំងឺកូវីដ-១៩ នាពេលថ្មីៗនេះ ជាពិសេស​ចំពោះការកំណត់យកគោលដៅ ចាក់វ៉ាក់សាំង ឱ្យបានយ៉ាងតិច៧០ភាគរយ នៃប្រជាជន​សកល​លោក។សម្តេចតេជោ ក៏បានស្នើឱ្យសហរដ្ឋអាមេរិក បន្តផ្តល់ការគាំទ្រចំពោះកិច្ចខិតខំប្រឹងប្រែង​របស់​អាស៊ាន​ក្នុងការស្តារ និងជំរុញកំណើនសង្គម-សេដ្ឋកិច្ច ជាពិសេសតាមរយៈក្របខណ្ឌស្តារឡើងវិញ​គ្រប់ជ្រុងជ្រោយរបស់អាស៊ាន។ក្នុងកិច្ចប្រជុំនេះ លោក ចូ បៃដិន ប្រធានាធិបតីអាមេរិក បានប្រកាសថា នឹងបន្តធ្វើជាស្នូល​របស់​អាស៊ាន ក្នុងកិច្ចសហការក្នុងតំបន់ ​ជាពិសេសក្នុងក្របខ័ណ្ឌឥណ្ឌូប៉ាស៊ីហ្វិក។ អាមេរិក នឹង​ជំរុញ​កិច្ចសហប្រតិបត្តិការជាមួយអាស៊ាន លើវិស័យផ្សេងៗទៀត ​ជាពិសេសលើវិស័យឌីជីថល ដូចជា សន្តិសុខ មិនប្រពៃណី ជាពិសេសធ្វើយ៉ាងណាឲ្យតំបន់នេះរក្សាបាននូវសន្តិភាព ស្ថិរភាព និងសន្តិសុខ។លោកប្រធានាធិបតីអាមេរិក បានលើកឡើងថា អ្វីដែលអាមេរិកមានជាមួយអាស៊ាន គឺជាទំនាក់​ទំនង​មួយរឹងមាំ និងបានប្ដេជ្ញាចិត្តខ្ពស់បន្តការគាំទ្រដល់អាស៊ាន ​ដោយលោកបានចាត់ទុកថា អាស៊ាន គឺបានដើរតួនាទីជាស្នូលនៅក្នុងតំបន់​ មិនត្រឹមតែសេដ្ឋកិច្ចទីផ្សារ ជាពិសេសក្នុង​ការ​ជំរុញកិច្ចសហប្រតិបត្តិការរវាងអាស៊ាន និងសហរដ្ឋអាមេរិក នៅក្នុងតំបន់តែម្តង៕អត្ថបទ៖ មុត សុទ្ធ

អភិបាលខេត្តព្រះសីហនុ ប្ដេជ្ញាថែរក្សាសន្តិសុខ សុវត្ថិភាពឲ្យបានល្អ គ្មានបទល្មើសព្រហ្មទណ្ឌ

2021/10/26 08:50:23 am        488
Facebook Telegram Linkin
​ព្រះសីហនុ ៖ ​អភិបាលខេត្តព្រះសីហនុ បានប្ដេជ្ញាថែរក្សាសន្តិសុខ សុវត្ថិភាពជូនប្រជាពលរដ្ឋឱ្យបានល្អ គ្មានបទ ល្មើសព្រហ្មទណ្ឌទៅពេលអនាគត។ឯកឧត្តម គួច ចំរើន អភិបាលខេត្តព្រះសីហនុ កាលពីម្សិលមិញ បានដឹកនាំកិច្ចប្រជុំត្រួតពិនិត្យការអនុវត្តការងារប្រចាំខែ និងកិច្ចប្រជុំគណៈបញ្ជាការឯកភាពរដ្ឋបាលខេត្ត ដែលក្នុងកិច្ចប្រជុំនេះ ឯកឧត្ដម បានសរសើរចំពោះការខិតខំប្រឹងប្រែងបំពេញការងាររបស់មន្ទីរអង្គភាពទាំងអស់ក្នុងខេត្ត ទន្ទឹមនឹងនោះក៏មានបញ្ហាប្រឈម ដែលត្រូវរួមគ្នាដោះស្រាយ ដើម្បីឆ្លើយតបទៅនឹងតម្រូវការជាក់ស្តែង។ ទីកន្លែង ដែលប្រព្រឹត្តបទល្មើស ក្នុងដែនសមត្ថកិច្ចខេត្ត ឯកឧត្តម នឹងដឹកនាំបញ្ជាបើកប្រតិបត្តិការដោយផ្ទាល់ ជាពិសេសបទល្មើសព្រហ្មទណ្ឌ ដោយមិនអនុញ្ញាត្តឱ្យជនល្មើសប្រព្រឹត្តបទល្មើសនៅលើទឹកដី នៃខេត្តព្រះសីហនុនោះឡើយ ដើម្បីគ្រប់គ្រងសន្តិសុខ សុវត្ថិភាពសាធារណៈជូនប្រជាពលរដ្ឋ អ្នកវិនិយោគ និងភ្ញៀវទេសចរ។ឯកឧត្ដម បានជំរុញឱ្យអាជ្ញាធរពាក់ព័ន្ធទាំងអស់ បង្កើនកិច្ចសហការជាមួយមន្ទីរ អង្គភាពពាក់ព័ន្ធ ព្រោះទាំងអស់គ្នា មានបទពិសោធន៍ល្អៗជាច្រើន ដែលបានបំពេញការងារជាមួយគ្នា ជាពិសេសនៅក្នុងប្រតិបត្តិការប្រយុទ្ធប្រឆាំងនឹងជំងឺកូវីដ-១៩ នៅក្នុងខេត្ត នាពេលកន្លងមក ទទួលបានលទ្ធផលល្អ។ឯកឧត្តម បានបន្តថា កិច្ចការ ដែលទាំងអស់គ្នា ត្រូវយកចិត្តទុកដាក់ពេលនេះ គឺការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ ដោយនៅតាមភូមិ ឃុំ សង្កាត់កំពុងបន្តចុះឈ្មោះបោះឆ្នោត និងពិនិត្យបញ្ជីឈ្មោះបោះឆ្នោត ។ល។ ដូច្នេះ អភិបាលក្រុង ស្រុក ប្រធានមន្ទីរអង្គភាពពាក់ព័ន្ធ ត្រូវតាមដានកាងារជាប់ជាប្រចាំ ដើម្បី​រក្សាសន្តិសុខ ផ្សារភ្ជាប់នឹងការបោះឆ្នោតក្រុមប្រឹក្សាឃុំ សង្កាត់ និងឈានទៅការបោះឆ្នោត​ជ្រើសរើស​តំណាងរាស្ត្រនៅឆ្នាំបន្ទាប់។ នេះជាការបញ្ជាក់ឲ្យដឹងពីលោក ឃាង ភារម្យ អ្នកនាំពាក្យសាលាខេត្តព្រះសីហនុ៕អត្ថបទ៖ គង់ ប៊ុនថា

រោងម៉ាស៊ីនស្រូវរួមចំណែកយ៉ាងសំខាន់ក្នុងការរក្សាគុណភាព និងសុវត្ថិភាពវិស័យស្រូវអង្ករ

2021/10/26 12:58:24 pm        172
Facebook Telegram Linkin
កំពង់ធំ ៖ រោងម៉ាស៊ីនស្រូវបំពាក់ដោយបច្ចេកទេសទំនើប រួមចំណែកយ៉ាងសំខាន់ ក្នុងការរក្សាគុណភាព និងសុវត្ថិភាពស្រូវអង្ក ដែលជាវិស័យស្នូលជួយទ្រទ្រង់ខឿនសេដ្ឋកិច្ចរបស់កម្ពុជា ក៏ដូចជាជួយទ្រង់ជីវភាពរបស់កសិករ តាមរយៈការបង្កើតជាទីផ្សារមួយពិតប្រាកដទាំងទីផ្សារជាតិ និងអន្តរជាតិ។ឯកឧត្តម ងួន រតនៈ អភិបាលខេត្តកំពង់ធំ បានអញ្ជើញចុះត្រួតពិនិត្យ ឡសម្ងួត និងឃ្លាំងស្តុកស្រូវ រោងម៉ាស៊ីនកិនស្រូវ ចំនួនពីរកន្លែង នៅស្រុកស្ទោង និងស្រុកកំពង់ស្វាយ ខេត្តកំពង់ធំ។ ឯកឧត្តម បានលើកឡើងថា រាជរដ្ឋាភិបាល នៅតែបន្តគាំទ្រសហគ្រាសវិស័យកសិកម្ម ជាពិសេស​វិស័យ​ស្រូវអង្ករ ដែលជា វិស័យស្នូលមួយ ជួយដល់ការទ្រទ្រង់ខឿនសេដ្ឋកិច្ចរបស់កម្ពុជា ក៏ដូចជាជួយទ្រង់ជីវភាព របស់កសិករ​ តាមរយៈការបង្កើតជាទីផ្សារមួយពិតប្រាកដ។ឯកឧត្ដម បានបញ្ជាក់ថា រោងម៉ាស៊ីនស្រូវ ដែលបំពាក់ដោយឡសម្ងួត ប្រព័ន្ធបច្ចេកទេសទំនើប ដើរតួរយ៉ាងសំខាន់ តាមនយោបាយស្រូវអង្កររបស់រាជរដ្ឋាភិបាល ដើម្បីបានគុណភាព សុវត្ថិភាព និង បរិមាណស្តុកនាំចេញទៅកាន់ទីផ្សារជាតិ និងអន្តរជាតិ។ ក្នុងនោះរោងម៉ាស៊ីនកិនស្រូវ ១៦៨៨ ដែលមាន ទីតាំងស្ថិតនៅស្រុកស្ទោង មានសមត្ថភាព​សម្ងួត​ស្រូវ​សើមបានចាប់ពី៣០០តោន ទៅ៨០០តោន ក្នុង មួយថ្ងៃ ដែលបំពាក់ដោយឧបករណ៍ និងម៉ាស៊ីនបែបទំនើប។ ចំណែកឯរោងម៉ាស៊ីនកិនស្រូវ លឹម ហេង លាភ ដែលមានទីតាំងនៅស្រុកកំពង់ស្វាយ មាន​សមត្ថភាព​សម្ងួតស្រូវសើមបានចាប់ពី៣០០តោន ទៅ ៥០០តោន ក្នុងមួយថ្ងៃ បំពាក់ដោយ​ឧបករណ៍ និងម៉ាស៊ីនបែបទំនើបដូចគ្នា ​ដែលគាំទ្រដោយកម្មវិធី ជំរុញផលិតកម្មស្រូវ និងការនាំ​អង្ករចេញ (Rice-SDP) ក្រោមកម្ចីសម្បទានពីធនាគារអភិវឌ្ឍន៍អាស៊ី (ADB) ។ឯកឧត្តម បានបន្តថា គម្រោង Rice-SDP គឺធ្វើឱ្យប្រសើរឡើងនូវគោលនយោបាយសន្តិសុខ ស្បៀង និងការនាំចេញអង្ករក្នុងបរិបទ នៃការរីករាលដាលនៃជំងឺឆ្លងកូវីដ-១៩ ​ដោយអនុវត្តគោលនយោ បាយ របស់រាជរដ្ឋាភិបាលក្នុងស្មារតីទទួលខុសត្រូវខ្ពស់ ​ដើម្បីបង្កើនសមត្ថភាពផលិត ធានា​ឲ្យបានទាំង បរិមាណ គុណភាព និងសុវត្ថិភាពឱ្យស្របតាមស្តង់ដារតម្រូវការ​ របស់ទីផ្សារអន្តរជាតិ ដែលបានកំណត់។ គម្រោង Rice-SDP មានការជួយសាងសង់ឡសម្ងួត និងឃ្លាំងស្តុកស្រូវ អង្ករ ការស្តារប្រព័ន្ធ​ធារាសាស្ត្រ ផ្តល់បច្ចេកទេសពូជ និងបន្សាំដំណាំស្រូវទៅនឹងការប្រែប្រួលអាកាសធាតុ ជាពិសេស​ងាយស្រួលក្នុងការ ផលិត និងរក្សាទុលផលិតផលឱ្យមានគុណភាពល្អសម្រាប់នាំចេញ មាន​ទីផ្សារ​លក់ត្រឹមត្រូវ។ ជាពិសេស រួមចំណែករក្សាស្ថិរភាពតម្លៃស្រូវដល់ប្រជាកសិករ និងជំរុញការនាំចេញអង្ករ ស្របតាម​គោលនយោបាយ របស់រាជរដ្ឋាភិបាល។ គម្រោង Rice-SDP អនុវត្តលើខេត្តគោលដៅចំនួនបី គឺ​ខេត្តកំពង់ធំ បាត់ដំបង និងព្រៃវែង៕អត្ថបទ៖ លី សាងស៊ីន

មកដល់ពេលនេះ ការស្ថាបនាផ្លូវ៣៨ខ្សែក្នុងក្រុងសៀមរាប សម្រេចបានជាង៨០ភាគរយហើយ

2021/10/26 12:52:21 pm        416
Facebook Telegram Linkin
សៀមរាប ៖ ឯកឧត្ដមទេសរដ្ឋមន្ត្រី ស៊ុន ចាន់ថុល បាន​ដឹក​នាំ​ក្រុម​ការងារ​បច្ចេកទេស​ចុះពិនិត្យ​វឌ្ឍនភាព​គម្រោង​ស្ថាបនា​ហេដ្ឋារចនាសម្ព័ន្ធផ្លូវ៣៨ខ្សែ នៅក្រុងសៀមរាប កាលពីរសៀលថ្ងៃទី២៥ ​ខែ​តុលា ​ឆ្នាំ២០២១នេះ ​ដើម្បី​ពិនិត្យមើលគុណភាពផ្លូវ ការងារអ៊ុតកៅស៊ូ (AC)និងប្រព័ន្ធលូ ស្របតាម​លក្ខណៈបច្ចេកទេស ដែលនឹង​ធ្វើឱ្យឃើញយ៉ាងច្បាស់នូវមុខមាត់ថ្មីនៃក្រុងមួយនេះ​ ខណៈដែលផ្លូវនេះ បានសាងសង់សម្រេចបានជាង៨០ភាគរយហើយ។ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និងដឹកជញ្ជូន មានប្រសាសន៍ថា វឌ្ឍនភាពគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែនៅក្រុងសៀមរាប ខេត្ត សៀម​រាបនេះ ក្នុង រយៈពេលជាង ១១ខែកន្លងមកនេះ សម្រេចបាន៨៣,៨៧%នៃទំហំការងារសរុប (២% លឿនជាងផែនការ)។ គម្រោងនេះ គ្រោងបញ្ចប់ការស្ថាបនា នៅចុង ខែធ្នូ ឆ្នាំ២០២១ ខាងមុខនេះ។ គម្រោងសាង​សង់ផ្លូវចំនួន​៣៨ខ្សែក្នុង​ទីរួម​ខេត្ត​សៀម​រាប​ ខេត្តសៀមរាបនេះ មានគោលដៅប្រែក្លាយក្រុង សៀមរាប ខេត្តសៀមរាបឱ្យក្លាយជាទីក្រុងដ៏​ទំនើបពោរពេញ​ដោយ​សោភ័ណ​ភាព បរិស្ថានល្អសម្រាប់ការ រស់នៅ ឱ្យ​សក្ដិសម​ជាទីក្រុងទេសចរណ៍ ​វប្បធម៌ និង​ប្រវត្តិសាស្ត្រ អាចទាក់ទាញ​ភ្ញៀវ​ទេសចរណ៍បាន​កាន់​តែច្រើនសំដៅលើកស្ទួយសេដ្ឋកិច្ច​ជាតិ​ឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ ​តភ្ជាប់ពីទីប្រជុំជន​ក្រុង​សៀម​រាប​ទៅកាន់តំបន់ដាច់ស្រយាលផងដែរ។ជាមួយគ្នានោះ ក៏មានការតភ្ជាប់ប្រព័ន្ធលូចាស់-ថ្មី ដើម្បី សម្រួលកុំឱ្យលិចទឹក និងអាច​ឱ្យ​បង​ប្អូន​ប្រជាពលរដ្ឋ អាចអាស្រ័យប្រើប្រាស់បាន។ ការចុះពិនិត្យនេះក៏ក្នុងគោលបំណង ដើម្បី ពិនិត្យ​មើលវឌ្ឍនភាពការងាររួម និងផ្តល់គោលការដោះស្រាយនូវបញ្ហាប្រឈមនានា ជំរុញឱ្យអង្គភាព​សាងសង់ អនុវត្តតាមលក្ខណៈបច្ចេកទេស សៀវភៅ​បន្ទុក​ឱ្យ​បាន​ត្រឹម​ត្រូវ និងស្តង់ដារ ដែលអាច​ទទួលយកបាន ពោលគឺធ្វើផ្លូវឱ្យមានគុណភាពរឹងមាំ ​អាចប្រើប្រាស់ជាប់បានយូរអង្វែង និង​បញ្ចប់​តាមផែនការគ្រោងទុក។ឯកឧត្ដម បានបន្ដថា ការងារសាងសង់នូវហេដ្ឋារចនាសម្ព័ន្ធនេះ បានប្រឈមនឹង ​ការរាំស្ទះ​ដោយ​សាវិបត្តិជម្ងឺកូវីដ១៩ ធ្វើ​អោយ​កម្មករ ក៏ដូចអ្នកអនុវត្តមានលំបាកក្នុងការងារប្រតិបត្តិការ ទន្ទឹម​នឹងនេះ ពេលវេលា សម្រាប់​ការ​សាង​សង់​មាន​រយៈ​ពេល​ខ្លី​ក្រុម​ការ​ត្រូវពុះពារធ្វើការងារ ទាំងក្នុង​រដូវវស្សាភ្លៀងធ្លាក់ មាន​ការលំបាក់ក្នុងការងារសាងសង។ តែទោះ​ជាយ៉ាង​នេះ​ក្តី ​ដោយមា​ន​ការ​តាំង​ចិត្ត​ខ្ពស់​ពីក្រុមការងារជំនាញ​ និងការជំរុញយកចិត្តទុកដាក់ខ្ពស់ ពីថ្នាក់ដឹកនាំ ផ្លូវទាំង ៣៨ខ្សែ កំពុង​ត្រូវ​បាន​បន្តកា​រស្ថាបនា​ សម្រេច​បាន​លឿនជាង ផែនការ កំណត់បន្តិច និងសង្ឃឹមថា​ក្រុង​សៀមរាប នឹងត្រូវបានប្តូរមុខមាត់ថ្មី ​នៅ​ក្នុង​ចុង​ឆ្នាំ​នេះ ជាមួយ ហេដ្ឋា​រចនា​សម្ព័ន្ធ​ដឹកជញ្ជូន ល្អប្រណិតសក្តិសមជាទីក្រុងទេសចរាចណ៍វប្បធម៌របស់កម្ពុជា។ ឯកឧត្តម ស៊ុន ចាន់​ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណៈការនិងដឹកជញ្ជូន បានមានប្រសាសន៍ថា ខណៈពេល​ដែល​ក្រសួង​មានសម្ភារៈ ត្រួត​ពិនិត្យ​បច្ចេកទេស​បច្ចេក វិទ្យាទំនើបមួយចំនួនហើយនោះ ក្រសួងក៏បានបញ្ជាទិញ សម្ភារៈត្រួតពិនិត្យ មួយ​ចំនួន​ទៀត យក​មកប្រើប្រាស់ដើម្បីធានាថា ផ្លូវទាំង ៣៨ខ្សែត្រូវបានសាងសង់ស្របតាម លក្ខណៈបច្ចេកទេស ជាប់គង់វង្ស​យូរ​អង្វែង​។គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ខេត្តសៀមរាបចំនួន៣៨ ខ្សែ នេះ មាន​ប្រវែងសរុប ១០៦,៤២៤ គីឡូម៉ែត្រ ប្រើប្រាស់ថវិកាជាតិសរុបប្រមាណជាង ​១៤៩.២១៦.៥៩៥ ដុល្លារអាមេរិក ដោយក្នុងនោះចំនួន៩លានដុល្លារ​អាមេរិក​ចំណាយ​លើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ឋិតក្រៅគម្រោងសាងសង់ខ្សែផ្លូវទាំង៣៨នេះ ចំណាយ ពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១៕អត្ថបទ ៖ ឈិត​ សាវី

បណ្តាសាលារៀនគ្រប់កម្រិត បានត្រៀមរួចរាល់ ដើម្បីបើកដំណើរការវិញនៅសប្តាហ៍ក្រោយនេះ

2021/10/26 12:23:12 pm        413
Facebook Telegram Linkin
កណ្ដាល​​ ៖ បន្ទាប់ពីបានទទួលបានដំណឹងពីក្រសួងអប់រំយុវជន និងកីឡាស្តីពីសាលារៀនរដ្ឋ និងឯកជនទាំងអស់ត្រូវ​បើក​ដំណើរ​ការវិញនៅថ្ងៃទី១ ខែវិច្ឆិកា សប្តាហ៍ក្រោយនេះ មកដល់ពេលនេះ បណ្តាសាលារៀន និងអាណាព្យាបាលសិស្ស ក៏បានរៀបចំ និងត្រៀមបញ្ជូនកូនទៅរួចរាល់អស់ហើយ ដើម្បីអោយកុមារកូនតូចៗ ធ្វើការចូលរៀនវិញ ប្រកបដោយសុវត្ថិភាព។បើតាមអាណាព្យាបាលមានកូនតូចៗបានថ្លែងប្រាប់BTV នៅថ្ងៃទី២៦ ខែតុលានេះ បានថ្លែង​អបអរ​សាទរ ចំពោះ​ការ​សម្រេច​ចិត្តរបស់រាជរដ្ឋាភិបាល ​ចំពោះការបើកសាលារៀនឡើងវិញ បន្ទាប់​ពី​កុមារតូចមានអាយុចាប់ពី៦ឆ្នាំរហូតដល់​យុវវ័យ​អាយុក្រោម១៨ឆ្នាំបានចាក់វ៉ាក់សាំង​ការពារ​កូវីដ១៩ទាំង​ដូសទី១ និងដូសទី២បានហើយរួចរាល់។អាណាព្យាបាល និងកូនតូចៗ បានថ្លែងថា សម្រាប់ការចូលរៀនវិញនេះ ​ពួកគេក៏មានការព្រួយ​បារម្ភ​ខ្លះដែរ​អំពី​ការ​រាត​ត្បាតនៃមេរោគកូវីដ១៩ ​តែទោះយ៉ាងណា ​សម្រាប់ការចូលរៀនវិញនេះ បណ្តា​អាណាព្យាបាល និងកូនតូចបាន​រៀបចំ​ខ្លួន​រួចរាល់អស់ហើយ ​ដោយគេបានទិញសំភារៈសិក្សា ដែល​មាន​ភ្ជាប់ជាមួយនូវ ម៉ាស់ ទឹ​កអាកុលជែល និងការ​ណែនាំ​បន្ថែម​ឲ្យ​កូនតូចរក្សា​គន្លាត​នៅ​ពេលចូលរៀនជាដើម។បើតាមនាយកសាលានៅសាលាបឋមសិក្សា ហ៊ុន សែន ព្រែកឬស្សី និងសាលាបឋមសិក្សាកំពង់​សំណាញ់ ក្រុង​តាខ្មៅ​ខេត្តកណ្តាល ​បានថ្លែងថា បន្ទាប់ពីសាលាបានទទួលការណែនាំស្តីពីការបើក​សាលារៀនឡើងវិញ​ពីរដ្ឋមន្ត្រី​ក្រសួង​អប់រំ​យុវជន និងកីឡា គណៈដឹកនាំសាលារៀនបាន​សហការ​ជាមួយអាជ្ញាធរមូលដ្ឋាន និងបណ្តាអាណាព្យាបាលកូនតូច ត្រូវចូលរួមសហការជាមួយសាលា​ដោយធ្វើយ៉ាងណារៀបចំម៉ាស់អាកុលជែល ​និងរៀបចំអាហារពេលព្រឹកអោយកូនតូច​ ខណៈ​សាលាមិន​អនុញ្ញាត​មានការលក់ចំណីអាហារក្នុងបរិវេណសាលា ហើយការបង្រៀន និងរៀន​ដោយបណ្តុំនោះ ត្រូវធ្វើ​ការ​ប្តូរវេណ ដើម្បីកាត់បន្ថយចំនួនសិស្សអង្គុយរៀននៅក្នុងបន្ទប់​មក​នៅត្រឹមពី ១៥ទៅ២០នាក់ជាដើម។ឯកឧត្តម រស់ សុវាចា អ្នកនាំពាក្យក្រសួងអប់រំយុវជន និងកីឡា ថ្លែងថា ចាប់ពីថ្ងៃទី១ ខែ វិច្ឆិកា ឆ្នាំ២០២១តទៅ ក្រសួង​អប់រំ នឹងពង្រីកការបើកគ្រឹះស្ថានសិក្សាសម្រាប់ការបង្រៀន និងការរៀន​តាមបណ្តុំសម្រាប់គ្រឹះស្ថានសិក្សាចំណេះ​ទូទៅ​គ្រប់កម្រិត ​និងគ្រឹះស្ថានឧត្តមសិក្សារដ្ឋនិងឯកជន និងគ្រឹះស្ថានបណ្តុះបណ្តាលគ្រូ។ឯកឧត្តម បន្តថា សម្រាប់ការពង្រីកវិសាលភាពបើកសាលារៀននេះ ​គឺត្រូវអាស្រ័យលើ​ស្ថានភាព​ជំងឺកូវីដ១៩​ចំនួន​២គឺ​ ភូមិសាស្ត្រដែលគ្រប់គ្រងជំងឺកូវីដ១៩បាន និងភូមិសាស្ត្រ​ហានិភ័យ​មធ្យម​និងខ្ពស់៕អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

ពិធីចុះអនុស្សរណៈនៃការយោគយល់គ្នារវាងសាកលវិទ្យាល័យចេនឡា និងសាកលវិទ្យាល័យ Dongshin University នៃសាធារណៈរដ្ឋកូរ៉េ
08/14/2025 08:08 PM
Facebook Telegram Linkin
UN៖ ឧក្រិដ្ឋកម្មសង្រ្គាមទំនងជាបានប្រព្រឹត្តដោយភាគីទាំង ២នៅក្នុងអំពើហិង្សាតំបន់ឆ្នេរប្រទេសស៊ីរី
08/14/2025 08:08 PM
Facebook Telegram Linkin
កង្វះអាំងស៊ុយលីនធ្វើឲ្យអ្នកជំងឺទឹកនោមផ្អែមកុងហ្គោឈឺចាប់នៅតំបន់ភាគខាងកើតដែលញាំញីដោយភ្លើងសង្រ្គាម
08/14/2025 08:08 PM
Facebook Telegram Linkin
រុស្ស៊ី និងអ៊ុយក្រែន ដោះដូរអ្នកទោសម្ខាងៗចំនួន ៨៤នាក់ដូចគ្នា
08/14/2025 08:08 PM
Facebook Telegram Linkin
ក្រុមគ្រូពេទ្យគ្មានព្រំដែន៖ ជំងឺអាសន្នរោគបានសម្លាប់មនុស្ស ៤០នាក់នៅតំបន់ Darfur ប្រទេសស៊ូដង់ ក្នុងរយៈពេល ១សប្តាហ៍
08/14/2025 08:08 PM
Facebook Telegram Linkin
នគរបាលអេស្ប៉ាញ ចាប់ខ្លួនមនុស្ស ៤នាក់ ពាក់ព័ន្ធនឹងចំហេះព្រៃថ្មី
08/14/2025 08:08 PM
Facebook Telegram Linkin
​ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានីចូលរួមបរិច្ចាគឈាម ដើម្បីសង្គ្រោះជីវិត
08/14/2025 08:08 PM
Facebook Telegram Linkin
ប្រភព៖ ទួរគីជួយស៊ីរីនូវប្រព័ន្ធអាវុធ និងគ្រឿងយុទ្ធោបករណ៍ ក្រោមកិច្ចព្រមព្រៀងថ្មី
08/14/2025 08:08 PM
Facebook Telegram Linkin
សម្តេចតេជោជួបពិភាក្សាជាមួយអគ្គលេខាធិការមជ្ឈឹមបក្សកុម្មុយនីស្តវៀតណាមតាមរយៈវិដេអូពីចម្ងាយ
08/14/2025 08:08 PM
Facebook Telegram Linkin
មេដឹកនាំបារាំង បញ្ជាក់ថា លោក Trump បើកចំហចំពោះការធានាសន្តិសុខ សម្រាប់អ៊ុយក្រែន
08/14/2025 08:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.