នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS | កម្ពុជា និងថៃឯកភាពឈប់បាញ់គ្នា និងត្រលប់ទៅអនុវត្តបទឈប់បាញ់តាមរយៈការសម្របសម្រួលរបស់ប្រធានាធិបតីអាមេរិក
តម្លៃសេវាអ៊ីនធឺណិតនឹងទាបជាងមុន បន្ទាប់ពីកម្ពុជាតបណ្តាញប្រព័ន្ធអ៊ីនធឺណិតពីហុងកុង
វេទិកានយោបាយអាស៊ី-អឺរ៉ុប ស្នើឱ្យភាគីជម្លោះគោរពចំពោះកិច្ចព្រមព្រៀងសន្តិភាពនានា និង​ធម្មនុញ្ញ UN
ក្រសួងរៀងចំដែនដី នឹងបង្កើតសួនបន្ថែមក្នុងទីក្រុង ឆ្លើយតបនឹងកំណើនពលរដ្ឋក្នុងទីក្រុង

នយោបាយ​ និង ការអភិវឌ្ឍន៍

សហគមន៍ទេសចរណ៍ចំនួន៥ នៅខេត្តគោលដៅ៤ ត្រូវរៀបចំទទួលភ្ញៀវក្នុងបរិបទកូវីដ១៩

2021/08/27 08:39:56 am        336
Facebook Telegram Linkin
ភ្នំពេញ ៖ ក្រសួងទេសចរណ៍ បានសហការជាមួយសហគ្រិនខ្មែរ មានការគាំទ្រថវិកាទាំងស្រុងពីក្រសួងសេដ្ឋកិច្ច និងហិរញ្ញវត្ថុ កំពុងរៀបចំតំបន់សហគមន៍ទេសចរណ៍ចំនួន៥កន្លែង ស្ថិតក្នុងខេត្តគោលដៅចំនួន៤ ដើម្បីឲ្យភ្ញៀវទេសចរណ៍ទៅលេងកម្សាន្ត ក្នុងអំឡុងនៃវិបត្តិជំងឺកូវីដ-១៩។ក្នុងពិធីចុះអនុស្សារណៈយោគយល់គ្នា ស្តីពីគម្រោងជំរុញចលនាទេសចរណ៍ផ្ទៃក្នុង និង​លើក​កម្ពស់​សកម្មភាពទេសចរណ៍ ក្នុងសហគមន៍​ទេសចរណ៍ នៅថ្ងៃទី២៧ ខែសីហា ឆ្នាំ២០២១ ឯកឧត្តម ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានថ្លែងថា ខេត្តគោលដៅ​ទាំង៤ រួមមាន ខេត្តបាត់ដំបង សៀមរាប ពោធិ៍សាត់ និងខេត្តកំពង់ឆ្នាំង ដោយសហគមន៍​ទេសចរណ៍​ទាំងអស់នោះ មានលក្ខណៈពិសេសប្លែកៗពីគ្នា ហើយភាគច្រើនជាអេកូរទេសចណ៍។ឯកឧត្តម បានបន្តថា សម្រាប់ការរៀបចំសហគមន៍ទេសចរណ៍នេះ មានតម្រូវឲ្យពលរដ្ឋ ធ្វើម្ហូប​ជា​លក្ខណៈស្ដង់ដារ រួមទាំងមានការបណ្ដុះបណ្ដាលពួកគាត់ ​ទៅលើសេវាកម្មមួយចំនួនទៀត ក្នុងនោះ​ក៏មានផ្នែកអាយធីផងដែរ (IT) ។សម្រាប់ឯកឧត្តម ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ ​បានលើកឡើងថា កិច្ច​សហប្រតិបត្តិការនេះ គឺជាជំហ៊ានដំបូង តែយ៉ាងណាដៃគូទាំងពីរ នឹងខិតខំជួយពង្រីកកម្រិត​អាជីវកម្ម​របស់ពលរដ្ឋនៅក្នុងតំបន់ទេសចរណ៍ទាំងនោះ ឲ្យកាន់តែមានភាពរីកចម្រើន ។ក្នុងឱកាសអញ្ជើញជាអធិបតី ពិធីចុះអនុស្សារណៈយោគយល់គ្នា តាមរយៈវីដេអូ Zoom ឯកឧត្តម ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា កិច្ចសហការនេះ បើទោះជាផ្នែកតូចមួយ ក្នុងការចាប់ផ្ដើមវិស័យទេសចរណ៍នៅកម្ពុជា ដែលបានប៉ះពាល់ដោយវិបត្តិនៃជំងឺកូវីដ១៩ តែវា​ក៏អាច​ជួយពង្រឹងវិស័យនេះ ឡើងវិញជាបណ្ដើរៗ ។ឯកឧត្តម បន្តថា កម្ពុជាមានសហគមន៍ទេសចរណ៍ច្រើនកន្លែង ហើយនៅពេលសហគមន៍​ជា​គោលទាំង៥ សម្រេចបានជោគជ័យ នឹងបន្តប្រមូលសហគមន៍ផ្សេងៗ ដើម្បីអភិវឌ្ឍន៍ និង​បញ្ចូល​ទៅគម្រោងរួមគ្នានេះបន្ថែមទៀត ។ឯកឧត្តម ក៏បានអំពាវនាវកុំឲ្យមានការកាប់បំផ្លាញព្រៃឈើ និងបរបាញ់សត្វព្រៃ ព្រោះ​សម្បត្តិធម្មជាតិ​ទាំងអស់នេះ គឺជាទីតាំងដ៏ទាក់ទាញសម្រាប់ទេសចរណ៍ទស្សនា ៕អត្ថបទ បាន សុខរិទ្ធិ

កម្ពុជាទិញរថយន្តពន្លត់​អគ្គិភ័យ​ ដែល​បាញ់​បានកម្ពស់​ឡើង​លើ​១០០ម៉ែត្រ​ ជាលើក​ដំបូង​ចំនួន​២គ្រឿង

2021/08/26 01:40:37 pm        530
Facebook Telegram Linkin
ភ្នំពេញ ៖ ខណៈដែលប្រទេសកំពុងមានការអភិវឌ្ឍ ហើយ​អគារ​បានកំពុងរីក​ស្គុះស្គាយ​ជាបន្តបន្ទាប់​ពីមួយឆ្នាំទៅមួយឆ្នាំនោះ ​សម្តេចតេជោ ហ៊ុន សែន នាយករដ្ឋមន្រ្តី បានសម្រេចបញ្ជាទិញរថយន្ត​ពន្លត់​អគ្គិភ័យ​ដែល​មានបច្ចេកវិទ្យាទំនើប ហើយមានសមត្ថភាពបាញ់ទឹកឡើង​លើ​កម្ពស់​រហូត​ដល់១០០ម៉ែត្រ ចំនួន២គ្រឿង​ជាដំណាក់កាលទីមួយ ដើម្បីទុកបម្រុងពន្លត់អគ្គិភ័យ​ដែលកើតឡើង​ដោយយថាហេតុណាមួយ សម្រាប់អគារខ្ពស់ៗ ក្នុងរាជធានីភ្នំពេញ។ថ្លែងប្រាប់ទូរទស្សន៍ BTV នាព្រឹកថ្ងៃទី២៦ ខែសីហា ឆ្នាំ២០២១នេះ បន្ទាប់ពីធ្វើការប្រគល់ថយន្ត ដល់ស្នងការដ្ឋាននគរបាលរាជធានីភ្នំពេញនោះ ឧត្តមសេនីយ៍ឯក នេត វន្ថា ប្រធាននាយកដ្ឋាន​បង្ការ និងពន្លត់អគ្គិភ័យ ក្រសួងមហាផ្ទៃ បានលើកឡើងថា រថយន្តពន្លត់អគ្គិភ័យដែលប្រមុខ​រាជ​រដ្ឋាភិបាលកម្ពុជា សម្រេចបញ្ជាទិញជាលើកដំបូងនេះ គឺបានផលិតនៅប្រទេសលោកខាងលិច ហើយមានតម្លៃរាប់លានដុល្លារអាមេរិកក្នុងមួយគ្រឿង ហើយមានធុងផ្ទុកទឹកបានចំនួនបីពាន់លីត្រ និងហ្វម ​(ទឹកសាប៊ួរ)ចំនួនមួយពាន់លីត្រ មានជណ្ដើរឡើងរហូតដល់កម្ពស់៥៤ម៉ែត្រ និងកម្លាំង​ទឹក​បាញ់បានយ៉ាងលឿនជាងរថយន្តធម្មពន្លត់អគ្គិភ័យធម្មតាមផងដែរ។យ៉ាងណាក៏ដោយ ឯកឧត្តមឧត្តមសេនីយ៍ឯក នេត វន្ថា បានបញ្ជាក់ផងដែរថា ថ្វីត្បិតតែរថយន្ត​ពន្លត់អគ្គិភ័យ​នេះ មានបច្ចេកវិទ្យាទំនើប ហើយអាចបាញ់បានឡើងលើខ្ពស់​រហូត​ដល់១០០ម៉ែត្រ​ក៏ពិតមែន ប៉ុន្តែវាមិនអាចចូលទៅផ្លូវតូចៗ បាននោះឡើយ ពោលគឺផ្លូវចាប់​ពី៧ម៉ែត្រឡើង​ទៅទើប​វា​អាចធ្វើការកើត ហើយប្រកបដោយប្រសិទ្ធភាពថែមទៀតផងដែរ៕អត្ថបទ បាន ចក់

ក្រុមហ៊ុនទូរទស្សន៍ក្នុងស្រុកធំៗចំនួន៣ ចុះកិច្ចព្រមព្រៀងបណ្តាក់ទុនរួមគ្នា បង្កើតថ្នាល​ទូរទស្សន៍​ឌីជីថលជាតិ

2021/08/26 01:12:09 pm        830
Facebook Telegram Linkin
ភ្នំពេញ ៖ នៅថ្ងៃទី២៦ ខែសីហា ឆ្នាំ២០២១នេះ ក្រុមហ៊ុនបណ្តាញផ្សព្វផ្សាយធំៗចំនួន៣ មានក្រុមហ៊ុនទូរទស្សន៍បាយ័នគ្រុប ក្រុមហ៊ុនរ៉ូយ៉ាល់គ្រុប និងក្រុមហ៊ុនទូរទស្សន៍ហង្សមាសគ្រុប បានចុះហត្ថលេខាលើកិច្ចព្រមព្រៀងបណ្តាក់ទុនវិនិយោគរួមគ្នា ដើម្បីបង្កើតថា្នលទូរទស្សន៍ឌីជីថលកម្ពុជាតែមួយ ដោយ «ក្រុមហ៊ុនសម្ព័ន្ធទូរទស្សន៍កម្ពុជា»។ ពិធីចុះហត្ថលេខាលើកិច្ចព្រមព្រៀងបណ្តាក់ទុនវិនិយោគរួមគ្នា បានធ្វើឡើងនៅសណ្ឋាគារកាំបូឌីយ៉ាណា ក្រោមអធិបតីលោកជំទាវ ហ៊ុន ម៉ាណា អគ្គនាយិកា ក្រុមហ៊ុនទូរទស្សន៍បាយ័នគ្រុប អ្នកឧកញ៉ា គិត ម៉េង អគ្គនាយកក្រុមហ៊ុនរ៉ូយ៉ាល់គ្រុប មានទូរទស្សន៍ CBS និង Digital Sky និងលោកឧកញ៉ា អ៊ឹង ឆៃងួន អគ្គនាយកក្រុមហ៊ុនទូរទស្សន៍ហង្សមាសគ្រុប។ក្រុមហ៊ុនសម្ព័ន្ធទូរទស្សន៍កម្ពុជា បង្កើតឡើងក្នុងគោលបំណងបង្កើត ក្រុមហ៊ុនចម្រុះរវាងរដ្ឋ និងឯកជនសម្រាប់គ្រប់គ្រង «ថ្នាលទូរទស្សន៍ឌីជីថលជាតិ» ដើម្បីធ្វើឲ្យព្រះរាជាណាចក្រកម្ពុជា ឈានទៅ​សម្រេចឲ្យ​បានតាមផែនការរបស់អាស៊ាន និយាយជារួម និងនិយាយដោយឡែក​ស្របតាម​យុទ្ធសាស្ត្រ របស់រាជរដ្ឋាភិបាលកម្ពុជា ដែលបានកំណត់យកឆ្នាំ២០២៣ ជា​កាលបរិច្ឆេទ​នៃការដាក់ឲ្យដំណើរការថ្នាល ទូរទស្សន៍ឌីជីថលជាតិ ដោយតម្រូវឲ្យក្រុមហ៊ុនទូរទស្សន៍​អាណាឡូក​ឯកជនទាំងអស់ មកប្រើប្រាស់សេវាថា្នលទូរទស្សន៍ឌីជីថលជាតិ និងបន្តការផ្សាយព្រមគ្នា ជាប្រព័ន្ធ​អាណាឡូក និងប្រព័ន្ធឌីជីថលស្របគ្នាមុន នឹងដល់ដំណាច់ឆ្នាំ២០២៥ ដែលជាកាលបរិច្ឆេទសម្រាប់​បិទការផ្សាយទូរទស្សន៍តាមប្រព័ន្ធអាណាឡូកជាស្ថាពរ។ថ្នាក់ដឹកនាំនៃក្រុមហ៊ុនទាំង៣ បានបង្ហាញនូវក្តីរីករាយក្នុងការសហការគ្នា បង្កើតថ្នាលទូរទស្សន៍​ឌីជីថលនេះ ដែលជាផ្នែកមួយផងដែរ ក្នុងការគាំទ្រការផ្សព្វផ្សាយគោលនយោបាយ​របស់​រាជ​រដ្ឋាភិបាលកម្ពុជា ដែលបច្ចុប្បន្នកម្ពុជាកំពុងមានការអភិវឌ្ឍលើគ្រប់វិស័យទាំងអស់ ក្រោម​ម្លប់​សន្តិភាព និងស្ថិរភាពនយោបាយ ។ ការចូលរយមសហការគ្នានេះ គឺជាការចូលរួមចំណែកជួយអភិវឌ្ឍន៍ប្រទេសកម្ពុជា​ក្នុងវិស័យ​សោត​ទស្សន៍ និងផ្សព្វផ្សាយឲ្យទៅជាប្រព័ន្ធឌីជីថលពេញលេញ និងស្របតាមគោលនយោបាយរបស់រាជ​រដ្ឋាភិបាល ក្នុងការចូលរួមសម្រេចឲ្យបានសេដ្ឋកិច្ច សង្គមឌីជីថលកម្ពុជា ស្របតាមគន្លង ឧស្សាហកម្មបច្ចេកវិទ្យាឌីជីថលជំនាន់ទី៤។សូមជំរាបថា ថ្នាលទូរទស្សន៍ឌីជីថលនេះ នឹងនាំមកនូវទស្សនីយភាព និងស្តង់ដារថ្មីស្រឡាង​មួយទៀត ដែលមានកម្រិតផ្សាយគុណភាពខ្ពស់ ច្បាស់ត្រជាក់ភ្នែក កម្រិត UHD 4K ។ ទូរទស្សន៍ឌីជីថលនេះជាថ្នាលប្រមូលផ្តុំនៃកម្មវិធីសិល្បៈ ​កម្មវិធីកំសាន្ត កម្មវិធីព័ត៌មាន ភាពយន្ត តន្ត្រី និងទស្សនីយភាព ដ៏សម្បូរបែបជាច្រើនទៀតដែល ធានានូវការផ្ដល់ជូនចំណីចក្ខុដ៏រីករាយ​ជូន​ទស្សនិកជនទូទាំងប្រទេស ក្នុងកន្លែងតែមួយ “One-Stop Media Services ។ក្រុមហ៊ុននីមួយៗបានបម្រើទស្សនីយអារម្មណ៍ ព័ត៌មាន អប់រំ ចំណេះដឹង និងសិល្បៈ កម្សាន្ត ក្នុង​វិស័យសោតទស្សន៍ ជូនប្រជាជនកម្ពុជា អស់រយៈពេល២៥ឆ្នាំមកហើយ រហូតមកដល់ពេលនេះ ផ្អែក​លើបទពិសោធន៍ ជំនាញ និងធនធានមនុស្ស ក្រុមហ៊ុនយើងមានជំនឿយ៉ាងមុតមាំថា​នឹង​អភិវឌ្ឍ ឧស្សាហកម្មសោតទស្សន៍ និងផ្សព្វផ្សាយឲ្យទទួលបានជោគជ័យ៕

កម្ពុជា-ថៃប្ដេជ្ញារួមគ្នាទប់ស្កាត់ និងឈានទៅលុបបំបាត់វីរុសកូវីដបំប្លែងថ្មីប្រភេទDelta

2021/08/26 04:59:42 am        474
Facebook Telegram Linkin
បាត់ដំបង ៖ យោធាភូមិភាគទី៥របស់កម្ពុជា និងកងទ័ពភូមិភាគទី១របស់ថៃ បានធ្វើការប្ដេជ្ញារួមគ្នាទប់ស្កាត់ និងឈានទៅលុបបំបាត់វីរុសកូវីដ១៩បំប្លែងខ្លួនថ្មីប្រទេសឌែលតា (Delta) ដែលកំពុងរាតត្បាតក្នុងប្រទេសទាំងពីរ និងពង្រឹងកិច្ចសហប្រតិបត្តិការលើវិស័យសំខាន់ៗ មួយចំនួនទៀត។ក្នុងកិច្ចប្រជុំអភិវឌ្ឍន៍សម្ព័ន្ធមេត្រីភាព និងពិភាក្សាការងាររាជការរវាងយោធភូមិភាគទី៥ និងរដ្ឋបាលខេត្តបាត់ដំបង ជាមួយកងទ័ពភូមិភាគទី១ នៃព្រះរាជាណាចក្រថៃ នៅព្រឹកថ្ងៃទី២៦ ខែ សីហា ឆ្នាំ ២០២១នេះ ភាគីទាំងពីរកម្ពុជា-ថៃ មានជំនឿយ៉ាងមុតមាំថា យើងនឹងបង្កើននូវកិច្ច​សហប្រតិបត្តិការទ្វេភាគីរវាងយោធភូមិភាគទី៥ និងកងទ័ពភូមិភាគ១ ក៏ដូចជាអាជ្ញាធរមូលដ្ឋាន និងសមត្ថកិច្ចនៃប្រទេសយើងទាំងពីរក្នុងការអភិវឌ្ឍតំបន់ព្រំដែនលើគ្រប់វិស័យ និងក្លាយ​ជា​ប្រយោជន៍​នៃប្រទេសយើងទាំងពីរ ព្រមទាំងប្រជាពលរដ្ឋដែលរស់នៅតាមព្រំដែន​ប្រកប​ដោយ​ភាពសុខសាន្ត និងប្រកបមុខរបរនៅតាមខ្សែបន្ទាត់ព្រំដែនកាន់តែប្រសើរឡើងថែមទៀត។ពាក់ព័ន្ធការទប់ស្កាត់ ការការពារពលករបរទេស និងការរៀបចំការងារសម្រាប់ពលករ ភាគីទាំងពីរ​បានឯកភាពគ្នាទប់ស្កាត់ និងការពារការលបលួចឆ្លងកាត់ព្រំដែន និងការឆ្លងដែឲ្យបានម៉ឺងមាត់​ដោយ​អនុវត្តន៍ទៅតាមច្បាប់នៃប្រទេសទាំងពីរ។ចំពោះជនជាតិកម្ពុជាដែលត្រូវចូលទៅធ្វើការនៅក្នុងប្រទេសថៃ ត្រូវចូលទៅដោយត្រឹមត្រូវតាម​ច្បាប់ ហើយក្នុងករណីមានការបិទព្រំដែនដោយប្រការណាមួយ ភាគីទាំងពីរត្រូវសហការ ជូន​ដំណឹង​គ្នា​ទៅវិញទៅមកឲ្យបានម៉ឺងមាត់ និងទាន់ពេលវេលា។ជាមួយគ្នានោះ ភាគីទាំងពីរបានឯកភាពគ្នា ក្នុងការចាត់វិធានការឲ្យបានម៉ឺងមាត់ ចំពោះអ្នក​លបលួច​ល្មើសក្នុងការធ្វើដំណើរចេញចូលក្នុងប្រទេសនីមួយៗ ដោយចាត់វិធានការចំពោះមេខ្យល់​នៅខាងប្រទេសថៃ ដែលរង់ចាំទទួលពលករកម្ពុជាឆ្លងដែនខុសច្បាប់។ទាក់ទិនបញ្ហាពលករបរទេសភាគីទាំងពីរបានឯកភាពគ្នា សហការបង្កើតបណ្ដាញព័ត៌មាន​ដោយ​ការទំនាក់ទំនងតាមការឆ្លើយតបតាមប្រព័ន្ធឡាញ និងបង្កើតចំពោះការជួលពលករបរទេស​ឲ្យ​បានត្រឹមត្រូវស្របតាមច្បាប់ការងារ និងអនុវត្តតាមវិធានការការពាររបស់ក្រសួង​សុខាភិបាល​ក្នុង​ស្ថានភាពនៃការរីករាលដាលនៃជំងឺកូវីដ១៩។ចំពោះការបន្ត​សុពលភាព​លិខិតឆ្លងដែនរបស់ពលករកម្ពុជា ក្នុងករណីលិខិតឆ្លងដែន ឬឯកសារប្រើ​ជំនួស​លិខិតឆ្លងដែនដែលអស់សុពលភាព ត្រូវជំរុញឲ្យពលករកម្ពុជា​ដំណើរការឲ្យបានត្រឹមត្រូវ​តាមការកំណត់ត្រឹមថ្ងៃទី២៧ ខែ កក្កដា ឆ្នាំ ២០២២។ចំពោះបញ្ហា​គ្រឿងញៀន​ភាគីទាំងពីរសហការគ្នាជំរុញ​ទិន្នន័យ​លើវិស័យព័ត៌មាន ចំពោះអ្នក​ប្រព្រឹត្តល្មើស និងវិធីលបលួច ​នាំយកគ្រឿងញៀនឆ្លងដែនដោយខុសច្បាប់ ដោយបង្កើតបណ្ដាញ​ទិន្នន័យ​ព័ត៌មាន ដើម្បីទំនាក់ទំនងតាមប្រព័ន្ធឡាញ។ពាក់ព័ន្ធបញ្ហាល្បែងភ្នាល់តាមប្រព័ន្ធអនឡាញភាគីទាំងពីររួមគ្នាសហការជំរុញផ្សព្វផ្សាយ និងការបង្កើតបណ្ដាញទិន្នន័យព័ត៌មានរបស់ជនល្មើសក្នុងការបើកវេបសាយល្បែងភ្នាល់គ្នាតាមប្រព័ន្ធអនឡាញ ដោយខុសច្បាប់ដោយទំនាក់ទំនងឆ្លើយតបគ្នាតាមប្រព័ន្ធឡាញ។ គួរបញ្ជាក់ថា បន្ទាប់ពីរាជរដ្ឋាភិបាលកម្ពុជាសម្រេចបើកដំណើរច្រកព្រំដែនឡើងវិញ ជាមួយភាគីថៃ ជាង១០ថ្ងៃកន្លងមកនេះ មានពលករខ្មែរចំនួន១ ២៩២នាក់ បានចេញពីប្រទេសថៃចូលមកកម្ពុជា​តាមច្រកផ្សេងៗក្នុងខេត្តបាត់ដំបង ក្នុងនោះបានរកឃើញវិជ្ជមានជំងឺកូវីដ១៩ ចំនួន១១២នាក់ ខណៈចំនួនអ្នកជាសះស្បើយនៅក្នុងខេត្តបានកើនឡើងច្រើន។រហូតមកដល់ពេលនេះ ខេត្តបាត់ដំបង បានរកឃើញអ្នកឆ្លងជំងឺកូវីដ១៩ សរុបចំនួន ៥ ៤១៨នាក់ ព្យាបាលជាសះស្បើយចំនួន ៤ ៥២៦នាក់ កំពុងសម្រាកព្យាបាលចំនួន ៨២០នាក់ និងស្លាប់ចំនួន ៧២នាក់ ៕

មណ្ឌលសុខភាពទួលគោក ចាក់វ៉ាក់សាំងការពារជំងឺកូវីដ-១៩ដូសទី២ ជូនកុមារ និងយុវវ័យ ទាំង១០សង្កាត់

2021/08/25 01:14:31 pm        415
Facebook Telegram Linkin
ភ្នំពេញ ៖ មណ្ឌលសុខភាពទួលគោក បន្តដំណើរការចាក់វ៉ាក់សាំងការពារជំងឺកូវីដ-១៩ ប្រភេទស៊ីណូវ៉ាក់ ដូសទី២ ជូនកុមារ និងយុវវ័យ អាយុចាប់ពី១២ឆ្នាំ រហូតដល់អាយុក្រោម១៧ឆ្នាំ បានចាប់ផ្តើមយុទ្ធនាការ កាលពីថ្ងៃទី២២ រហូតដល់ថ្ងៃទី២៤ ខែសីហា ឆ្នាំ២០២១ ចាក់វ៉ាក់សាំងបានចំនួនជាង៣០០០នាក់។បើតាមលោក ប៉ាវ សំអាត អ្នកសម្របសម្រួលទូទៅយុទ្ធនាការចាក់វ៉ាក់សាំងបង្ការជំងឺកូវីដ-១៩ មណ្ឌលសុខភាពទួលគោក ស្ថិតក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ ប្រាប់BTV ព័ត៌មាននាព្រឹកថ្ងៃទី២៥ ខែសីហា ឆ្នាំ២០២១នេះថា យុទ្ធនាការចាក់វ៉ាក់សាំងជូនកុមារ និងយុវវ័យ និងតួលេខដែលកុមារ និងយុវវ័យ បានមកចាក់វ៉ាក់សាំងក្នុងមណ្ឌលសុខភាពទួលគោក មាន១០សង្កាត់ ដូសទី១ មានចំនួនសរុប១៦៣៣០នាក់ ក្នុងនោះស្រី៩២៤៣នាក់ ប្រុស៧០៨៧នាក់។ ទន្ទឹមនឹងនោះមណ្ឌលសុខភាពទួលគោក បានចាក់វ៉ាក់សាំងដូសទី២ អស់រយៈពេល៤ថ្ងៃមកហើយ។ជាមួយគ្នានោះដែរ កុមារ និងយុវវ័យ អាយុចាប់ពី១២ឆ្នាំ រហូតដល់អាយុក្រោម១៧ឆ្នាំ បានមក​ទទួលការ​ចាក់វ៉ាក់សាំងបង្ការជំងឺកូវីដ-១៩ ពីក្រុមការងារគ្រូពេទ្យមណ្ឌលសុខភាពទួលគោក បានលើកឡើងស្រដៀងគ្នាថា ពួកគាត់ពិតជាសប្បាយរីករាយខ្លាំងជាទីបំផុត នៅពេល​ទទួល​ការចាក់វ៉ាក់សាំងការពារជំងឺកូវីដ-១៩រួច ជាពិសេសសូមគោរពថ្លែងអំណរអរគុណយ៉ាង​ជ្រាល​ជ្រៅជាទីបំផុតដល់រាជរដ្ឋាភិបាល ក៏ដូចជាក្រសួងសុខាភិបាល ជាពិសេស​សម្តេចតេជោ ហ៊ុន សែន នាយករដ្ឋមន្រី្តបានខិតខំរក ក៏ដូចជាបញ្ជាទិញវ៉ាក់សាំងកូវីដ-១៩ យកមកចាក់វ៉ាក់សាំង​ជូនកុមារ និងយុវវ័យ ប្រជាពលរដ្ឋរបស់ខ្លួន ដើម្បីការពារទប់ស្កាត់ការចម្លងមេរោគកូវីដ-១៩។ ជាចុងក្រោយលោក ប៉ាវ សំអាត ក៏បានសូមអំពាវនាវដល់មាតា បិតា អាណាព្យាបាល បញ្ជូនកូនៗ ដែលគ្រប់អាយុចាក់វ៉ាក់សាំងអញ្ជើញមកចាក់វ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា ជា​ពិសេស​ត្រូវចូលរួមអនុវត្តន៍វិធានការ ៣កុំ ៣ការពារ តាមការណែនាំដ៏ខ្ពង់ខ្ពស់របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត វិធានការក្រសួងសុខាភិបាល ដែលបានកំណត់៕អត្ថបទ រដ្ឋា

រាជរដ្ឋាភិបាលចាត់ទុកការចាក់វ៉ាក់សាំងដូសទី៣ ជាគន្លឹះដ៏សំខាន់ការពារជីវិតពលរដ្ឋ និង​អាច​ទប់ទល់​កូវីដ១៩បំប្លែងថ្មី Deltaបាន

2021/08/25 12:24:27 pm        520
Facebook Telegram Linkin
ភ្នំពេញ ៖ រាជរដ្ឋាភិបាលកម្ពុជា បានចាត់ទុកការចាក់វ៉ាក់សាំងដូសទី៣ គឺជាគន្លឹះដ៏សំខាន់ សម្រាប់ការពារអាយុជីវិតរបស់ប្រជាពលរដ្ឋ និងអាចទប់ទល់ជាមួយមេរោគកូវីដ១៩ បំប្លែងថ្មី Deltaបានផងដែរ ខណៈការចាក់ដូសទី៣ ឬដូសជំរុញនេះ នឹងចាក់ជូនដល់បងប្អូនប្រជាពលរដ្ឋទូទៅ ចាប់ពីអាយុ ១២ឆ្នាំឡើងទៅ ចាប់ពីខែសីហា ឆ្នាំ២០២១នេះ រហូតដល់ពាក់កណ្តាលឆ្នាំ២០២២។នេះបើតាមសេចក្តីប្រកាសស្តីពីគោលនយោបាយចាក់វ៉ាក់សាំងកូវីដ១៩ ដូចជំរុញ ដែលបានចេញ​នៅ​ព្រឹកថ្ងៃទី២៥ ខែសីហានេះ។សេចក្តីប្រកាស បានលើកឡើងថា រាជរដ្ឋាភិបាលបានចាត់ទុក​គោល​នយោបាយ​ចាក់វ៉ាក់សាំង​កូវីដ១៩ គឺជាយុទ្ធសាស្រ្តគន្លឹះដ៏សំខាន់មួយ ​និងជាខ្សែក្រវ៉ាត់ការពារទី១ សំខាន់ជាងគេ ដើម្បី​ការពារ​អាយុជីវិតប្រជាជន ក៏ដូចជាដើម្បីបង្កើតឲ្យបាននូវ​ភាពសុំា​ក្នុងសហគមន៍​ទប់ទល់​នឹង​មេរោគកូវីដ១៩ សំដៅឈានឆ្ពោះទៅបើកដំណើរការប្រទេសជាតិពេញលេញឡើងវិញគ្រប់វិស័យ និងការរស់នៅជាមួយមេរោគនេះ តាមបែបគន្លងថ្មីជាដើមនោះ។សេចក្តីប្រកាសរបស់រាជរដ្ឋាភិបាល បានបញ្ជាក់ថា «ផ្អែកតាមការសិក្សាស្រាវជ្រាវបែប​វិទ្យា​សាស្រ្ត​ខាងលើ និងក្នុងគោលបំណងបង្កើតឲ្យបានឆាប់រហ័សនូវ «ភាពសុំាសហគមន៍​រឹងមាំពិត​ប្រាកដ​មួយ» ដែលជា​មូលដ្ឋាន​ដ៏សំខាន់សម្រាប់​ការពារអាយុជីវិតប្រជាជនពីមេរោគកូវីដ១៩ ពិសេស​ប្រភេទDelta ឬប្រភេទបំប្លែងខ្លួនថ្មីផ្សេងទៀត ក៏ដូចជាដើម្បីត្រៀម​លក្ខណៈឈាន​ឆ្ពោះទៅកាន់​ផែនការ​នៃការបើកដំណើរការប្រទេសពេញលេញឡើងវិញ​លើគ្រប់វិស័យ និងការរស់នៅជាមួយ​នឹងវត្តមានជំងឺកូវីដ១៩ តាមគន្លងប្រក្រតីភាពថ្មី។រាជរដ្ឋាភិបាលសម្រេចប្រកាសដាក់ចេញនូវ«គោលនយោបាយចាក់វ៉ាក់សាំងកូវីដ១៩ ដូសជំរុញ» ដល់ប្រជាជន​ទូទៅ​ចាប់ពីអាយុ១២ឡើងទៅ ចាប់ពីខែសីហា ឆ្នាំ២០២១នេះ ដល់អំឡុងពាក់​កណ្តាល​ឆ្នាំ២០២២ អាស្រ័យលើលទ្ធភាពនៃការស្វែងរក​ និងទទួលបានវ៉ាក់សាំងកូវីដ១៩នេះ»។សូមបញ្ជាក់ថា រាជរដ្ឋាភិបាលសម្រេចយកវ៉ាក់សាំង AstraZeneca) ដើម្បីចាក់ជាដូសជំរុញ​ដល់​មន្រ្តីសុខាភិបាល និងមន្រ្តីបម្រើការជួរមុខក្នុងការប្រយុទ្ធ​នឹងជំងឺកូវីដ១៩​ នៅតាមតំបន់​ដែល​មាន​ហានិភ័យខ្ពស់​ នៃការឆ្លងរាលដាលនៃមេរោគកូវីដ១៩ ប្រភេទដែលតាកាល​ពី​ដើមខែសីហា កន្លងទៅថ្មីៗនេះ ខណៈការចាក់នូវដូសទី៣នេះ វាបានបង្កើនបាននូវប្រព័ន្ធការពាររាង​កាយកាន់​តែរឹងមាំ ក្នុងការទប់ទល់នឹងមេរោគកូវីដ១៩ ប្រភេទដែលតា និងបំប្លែងថ្មីផ្សេងៗទៀត​បាន​យ៉ាង​ល្អផងដែរ៕អត្ថបទ បាន ចក់

អភិបាលខេត្តកណ្តាល​ សន្យា​សងដីជូនពលរដ្ឋវិញ​ប្រសិនបើក្រុមហ៊ុនសង់​ព្រលានយន្តហោះថ្មី​ ដោះស្រាយ​មិន​ស្របតាម​គោល​ការណ៍រដ្ឋ

2021/08/25 11:58:47 am        581
Facebook Telegram Linkin
កណ្ដាល ៖ អភិបាលនៃគណៈអភិបាលខេត្តកណ្តាល ឯកឧត្តមគង់ សោភ័ណ្ឌ បានធានាសងដីជូនបងប្អូនប្រជាពលរដ្ឋ ដែលមានដីនៅព្រលានយន្តហោះថ្មីឡើងវិញ ប្រសិនបើបងប្អូនមិនទទួលបានលុយគ្រប់ចំនួនពីការសន្យារបស់ក្រុមហ៊ុន CAIC ដែលជាក្រុមហ៊ុន បានសិទ្ធិសាងសង់ព្រលានយន្តហោះថ្មី ស្ថិតនៅស្រុកកណ្តាលស្ទឹង ខេត្តកណ្តាលនេះ។នៅក្នុងឱកាសអញ្ជើញចុះសំណេះសំណាល និងផ្តល់​វិញ្ញាបនបត្រ​សម្គាល់ម្ចាស់អចលនវត្ថុ ជូនដល់​ប្រជាពលរដ្ឋស្ម័គ្រចិត្តដូរដីចំនួនជាង៣០ប័ណ្ណ ក្នុងគម្រោងស្ថាបនា​អាកាស​យានដ្ឋាន​អន្តរជាតិ​ភ្នំពេញថ្មី នាព្រឹកថ្ងៃទី២៥ ខែសីហានេះ។ ឯកឧត្តម បានលើកឡើងថា បើបងប្អូនប្រជាពលរដ្ឋ​យល់​ព្រមដូដីលក់ដីជូនក្រុមហ៊ុននោះ បងប្អូនប្រជាពលរដ្ឋនឹងទទួលបានដីពិតប្រាកដ និងប្រាក់ស្រប​ទៅតាមគោលការណ៍កំណត់របស់ក្រុមហ៊ុន ក៏ដូចជារាជរដ្ឋាភិបាល ហើយប្រសិន បើក្នុងករណី​មិនទទួលបានដូចការអះអាងរបស់ឯកឧត្តមទេ ឯកឧត្តមធានាចេញសងជូនបងប្អូនវិញ។ឯកឧត្តមអភិបាលខេត្ត បានលើកឡើងទៀតថា នាពេលបច្ចុប្បន្ននេះ គឺមានបងប្អូនប្រជាពលរដ្ឋ ដែល​មានក្បាលដីនៅក្នុងព្រលានយន្តហោះថ្មីចំនួនតិចទួចទៀតតែប៉ុណ្ណោះ ដែលមិនទាន់យល់ព្រម និងចូលរួមដោះស្រាយជាមួយក្រុមហ៊ុន និងអាជ្ញាធរ ខណៈមានបងប្អូនជាច្រើនបានយល់​ព្រម​សហការ និងលក់ជូនក្រុមហ៊ុន ដើម្បីពន្លឿនក្នុងការសាងសង់ព្រលានយន្ត​ហោះថ្មី​ខ្នាត​អន្តរជាតិនេះ។ឯកឧត្តម បានបញ្ជាក់ថា «រដ្ឋបាលខេត្តនឹងបន្តសម្របសម្រួលជាមួយ​បងប្អូនប្រជាពលរដ្ឋ​ចំនួន ១១គ្រួសារ ដែលក្បាលដីក្នុងផ្លូវយន្តហោះ ដើម្បីឲ្យក្រុមហ៊ុនអាចដំណើរការ​សាងសង់​តាម​ពេលកំណត់។ តែក្រុមហ៊ុន CAICត្រូវត្រៀមទីតាំងដីសម្រាប់ដោះដូរ ហើយមន្ទីររៀបចំដែនដី នគរូបនីយកម្មសំណង់ និងសូរិយោដីខេត្ត និងរដ្ឋបាលស្រុកកណ្តាលស្ទឹង ត្រូវជួយសម្របសម្រួល និងពន្លឿននីតិវិធីក្នុងការចេញប័ណ្ណកម្មសិទ្ធជូនប្រជាពលរដ្ឋ ឲ្យឆាប់តាមដែលអាចធ្វើទៅបាន»។ជាមួយគ្នានោះដែរ ឯកឧត្តម អភិបាលនៃគណៈអភិបាលខេត្ត​បានអំពាវនាវដល់បងប្អូន​ឲ្យ​មាន​ការយោគយល់ និងសូមទៅចូលរួមដោះស្រាយជាមួយក្រុមហ៊ុន និងអាជ្ញាធរតាមគោលការណ៍​របស់រាជរដ្ឋាភិបាល តាមរូបភាពនៃការដោះដូរដី​ និងលក់ជូនក្រុមហ៊ុន ដើម្បីជំរុញដោះស្រាយ​បញ្ចប់​បញ្ហាដី ​យកដីសាងសង់ព្រលានយន្តហោះ ​ស្របទៅតាមផែនការដែលបានគ្រោងទុកនោះ។សូមបញ្ជាក់ថា ការបង្កើតគម្រោងសាងសង់អាកាសយានដ្ឋានអន្តរជាតិភ្នំពេញថ្មីនេះ គឺជា​គោល​ការណ៍​សម្រេចរបស់រាជរដ្ឋាភិបាលលើផ្ទៃដី ២៦០០ហិកតា ក្នុងនោះស្ថិតក្នុងខេត្តកណ្តាលទំហំ ២៤២៦ហិកតា និងខេត្តតាកែវ ១៧៤ហិកតា។ ក្នុងគម្រោងព្រលានយន្តហោះថ្មីនេះ មានបង្កើតផ្លូវយន្តហោះរត់ចំនួន៣ខ្សែ ក្នុងនោះផ្លូវរត់ទី១៩ Runway) គ្រោងនឹងបញ្ចប់ការស្ថាបនាឲ្យបានមុនត្រីមាសទី១ឆ្នាំ២០២៣ ដោយផ្លូវរត់នេះមាន​ទទឹង១រយម៉ែត្រ បណ្តោយ៤ពាន់មែត្រ ប្រើប្រាស់ផ្ទៃដីចំនួន៤០ហិកតានោះ៕អត្ថបទ បាន ចក់

នាយឧត្តមសេនីយ៍ ហ៊ីង ប៊ុនហៀង ប្រគល់អំណោយជាសម្ភារៈប្រើប្រាស់ដល់រដ្ឋបាលក្រុង-ស្រុក ចំនួន១៣ នៃរដ្ឋបាលខេត្តបាត់ដំបង

2021/08/24 11:33:34 am        273
Facebook Telegram Linkin
បាត់ដំបង ៖ នៅព្រឹកថ្ងៃទី ២៤ ខែសីហា ឆ្នាំ២០២១ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជានាយករងខុទ្ទកាល័យសម្ដេចតេជោ ហ៊ុន សែន បាននាំយកអំណោយរបស់សម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ផ្តល់ជូនរដ្ឋបាលក្រុង-ស្រុកចំនួន១៣ នៅបរិវេណទីស្នាក់ការ​បណ្តោះអាសន្ន ក្រុមការងារទទួលទិញផ្លែមៀនប៉ៃលិន(ផ្លែតាង៉ែន)ពីកសិករ នៅទីលានបាល់ទាត់វាលបែកចាន ស្ថិតក្នុងក្រុងបាត់ដំបង ។ អំណោយដ៏ថ្លៃថ្លានេះ រួមមាន ក្នុងមួយក្រុង ស្រុក ទទួលបាន កុំព្យូទ័រយួរដៃ(Laptop) ចំនួន ៦គ្រឿង ម៉ាស៊ីនបោះពុម្ព (Printer) ចំនួន៦គ្រឿង វិទ្យុទាក់ទងចំនួន ១៥គ្រឿង និងម៉ាស៊ីនភ្លើងចំនួន ១គ្រឿង ។

អ្នកជំនាញបុរាណវិទ្យា ធ្វើការងារទល់ទ្រ ជួយសង្គ្រោះប្រាសាទតាដុងនៅជើងភ្នំគូលែន

2021/08/23 04:59:34 pm        523
Facebook Telegram Linkin
សៀមរាប ៖ ក្រុមអ្នកបច្ចេកទេសនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណ​វិទ្យា​បង្ការ របស់អាជ្ញាធរជាតិអប្សរា បានចាត់វិធានការទល់ទ្រពង្រឹង ដើម្បី ជួយសង្រ្គោះ​ប្រាសាទ​តាដុងឱ្យជៀសផុតពីហានិភ័យ ជាដំណាក់កាលទី១ ។ ការទល់ទ្រនេះ ធ្វើឡើងចាប់​ពីថ្ងៃទី ២៤ខែកក្កដា រហូតដល់ថ្ងៃទី៣១ ខែកក្កដា ឆ្នាំ២០២១។លោក ពុទ្ធ សុទ្ធ មន្ត្រីបច្ចេកទេស នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណ​វិទ្យាបង្ការនៃអាជ្ញាធរជាតិអប្សរា មានឱ្យដឹងតាមទូរស័ព្ទ​នៅរសៀលថ្ងៃទី ២៣ខែសីហា ឆ្នាំ២០២១នេះថា ដោយមើលឃើញ ហានិភ័យរបស់ប្រាសាទតាដុង ក្រុមអ្នកបច្ចេកទេស នៃអាជ្ញាធរ ជាតិអប្សរាបានចាប់ផ្ដើមរៀបចំទល់ទ្រសង្រ្គោះបន្ទាន់ នៅតាមផ្នែកជញ្ជាំងខាងកើត ខណៈដែល​ឥដ្ឋប្រាសាទ​ដែលបម្រុងជ្រុះធ្លាក់ និងសម្អាតបរិវេណជុំវិញប្រាសាទ។ជាមួយគ្នានោះ ក្រុមអ្នកបច្ចេកទេសក៏បានធ្វើការសិក្សានិងលើក គម្រោងជួសជុលដើម្បី​លើក​តម្លៃប្រាសាទតាដុង សម្រាប់ផែនការឆ្នាំខាងមុខផងដែរ។លោកបានបន្ដថា ការទល់ទ្រនេះបានធ្វើរយៈពេល៧ថ្ងៃ ដោយចាប់ពីថ្ងៃទី២៤ ដល់ថ្ងៃទី៣១ ខែកក្កដា ២០២១ កន្លងមក លោកបញ្ជាក់ថា ការងារនេះធ្វើឡើងក្នុងគោលបំណង​អភិរក្ស និង​អភិវឌ្ឍន៍ប្រាង្គប្រាសាទបុរាណមួយនេះ បានគង់វង្សយូរអង្វែងទុកអោយកូនចៅជំនាន់​ក្រោយ​បានស្គាល់ និងទស្សនាផងដែរ។សូមបញ្ជាក់ថា ប្រាសាទតាដុង កសាងឡើងអំពីឥដ្ឋ បែរមុខទៅកើត ក្នុងរចនាបទគូលែន នាអំឡុង សតវត្សទី៩នៃគ.ស ស្ថិតនៅភាគ ខាងកើតនៃ ​ជម្រាលជើងភ្នំគូលែន មានទីតាំងនៅក្នុងភូមិជប់​លើ​ឃុំស្វាយលើ ស្រុកស្វាយលើ។ បច្ចុប្បន្ន ឥដ្ឋនៃខឿនមួយផ្នែករបស់ប្រាសាទឥដ្ឋនេះ បានពុកផុយជ្រុះធ្លាក់ ដោយសារតែមានដើម​ឈើដុះលើជញ្ជាំង និងដំបូលប្រាសាទ។ចំណែករួតទី១ផ្នែកខាងកើតក៏ជ្រុះធ្លាក់ដោយ សារដើមឈើរលំលើបណ្ដាលឱ្យមានស្នាមប្រេះហែកជញ្ជាំងទាំងបីជ្រុង ៕អត្ថបទ ៖ ​ឈិត សាវី 

ឯកអគ្គរដ្ឋទូតចិន ៖ ដ៏រាបណាកូវីដ១៩នៅកម្ពុជា​មិនទាន់​បាត់ ការផ្តល់ជំនួយវ៉ាក់សាំង​របស់ចិន​ក៏​មិនទាន់បញ្ចប់ដែរ

2021/08/23 04:16:28 pm        563
Facebook Telegram Linkin
ភ្នំពេញ ៖ ឯកអគ្គរដ្ឋទូតចិនប្រចាំនៅកម្ពុជា លោក វ៉ាង វិនធាន បានអះអាងថា ការផ្តល់ជំនួយវ៉ាក់សាំងប្រឆាំងកូវីដ១៩ ពីសាធារណរដ្ឋប្រជាមានិតចិន មកឲ្យប្រទេសកម្ពុជា នឹងមិនត្រូវបានបញ្ចប់ឡើយ ដ៏រាបណាមេរោគកូវីដ១៩នៅប្រទេសកម្ពុជា​នៅតែបន្តកើតមាននៅឡើយ។ការអះអាងរបស់ឯកអគ្គរដ្ឋទូតចិនប្រចាំនៅកម្ពុជាបែបនេះ គឺបានធ្វើឡើងនៅក្នុងពិធី ផ្តល់ និង​ទទួល​នូវវ៉ាក់សាំងប្រភេទស៊ីណូហ្វាមចំនួន៥០ម៉ឺនដូសបន្ថែមទៀត ជូនដល់រាជរដ្ឋាភិបាលកម្ពុជា នារសៀលថ្ងៃទី២៣ ខែសីហានេះ នៅព្រលានយន្តហោះអន្តរជាតិភ្នំពេញ។លោកឯកអគ្គរដ្ឋទូត បានលើកឡើងថា វ៉ាក់សាំងរបស់ចិន បានរួមចំណែកដ៏សំខាន់ជួយឱ្យកម្ពុជា​សម្រេច​នូវផែនការចាក់វ៉ាក់សាំងជូនប្រជាពលរដ្ឋរបស់ខ្លួន។ដោយគម្រោងទាំងក្មេងទាំងចាស់រហូតដល់១២លាននាក់ ហើយវត្តមានវ៉ាក់សាំងបង្ការជំងឺកូវីដ១៩ របស់ចិននៅកម្ពុជានេះដែរ ក៏វាបានបង្ហាញច្បាស់ពីស្មារតីនៃមិត្តភាពដែកថែបរវាងចិន និងកម្ពុជា ដែលជាស្មារតីជួយជ្រោមជ្រែងគ្នារាល់ការលំបាកតាំងពីដើមរហូតដល់បច្ចុប្បន្ន ក៏ដូចជាអនាគតទៅទៀត។ជាមួយគ្នានោះដែរ លោក វ៉ាង វិនធាន ក៏បានបញ្ជាក់ប្រាប់ដល់ប្រជាជនកម្ពុជាផងដែរថា រដ្ឋា​ភិបាល​ចិន គ្មានហេតុផលណាមួយដែលកុហកកម្ពុជា ក្នុងការសន្យាផ្តល់ជំនួយអ្វីៗ​​​នោះទេ ជាពិសេសគឺ ជំនួយវ៉ាក់សាំងការពារមេរោគកូវីដ១៩ នេះតែម្តង ដោយចិនសន្យាហើយ គឺចិននឹង​ធ្វើជានិច្ច និងគ្រប់សម្តី ដែលបានសន្យាយ៉ាងដូច្នេះដែរ។ថ្លែងនៅក្នុងពិធីផ្តល់ និងទទួលនូវវ៉ាក់សំាងជាជំនួយរបស់ចិននេះដែរ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិកម្ពុជា បានលើកឡើងថា ជំនួយវ៉ាក់សាំងរបស់ ប្រជាជន និងរដ្ឋាភិបាលចិនបានផ្តល់ឲ្យកម្ពុជា ជារឿយៗនេះគឺសបញ្ជាក់ឲ្យឃើញថា ជាមិត្តដ៏ល្អ និងបានជួយគ្នាក្នុងគ្រាក្រ ខណៈដែលប្រទេសកម្ពុជាកំពុងត្រូវការខ្លាំងនូវ​វ៉ាក់សាំង​ការពារ​មេរោគកូវីដ១៩​ចាក់ជូន ដល់បងប្អូនប្រជាពលរដ្ឋរបស់ខ្លួន។ក្នុងនោះដែរ សម្តេចពិជ័យសេនា ទៀ បាញ់ ក៏បានថ្លែងអំណរអគុណចំពោះទឹកចិត្ត​សប្បុរសធម៌​របស់​ប្រជាជន និងរដ្ឋាភិបាលចិន ដែលបានផ្តល់ជំនួយជាច្រើនដល់ប្រទេសកម្ពុជា ជាពិសេសគឺជំ នួយ​វ៉ាក់សាំងការពារមេរោគកូវីដ១៩នេះតែម្តង ដោយប្រទេសចិន​បានផ្តល់ឲ្យកម្ពុជា​បាន​ទាន់​ពេលវេលា ដោយរហូតមកដល់ពេលនេះ គឺមានជាង២១លានដូសហើយទាំងជំនួយមនុស្សធម៌ និង​ការបញ្ជាទិញពីកម្ពុជានោះ។សូមបញ្ជាក់ថា ហូតមកដល់បច្ចុប្បន្ននេះប្រទេសកម្ពុជា បានទទួលបានវ៉ាក់សាំងបង្ការជំងឺកូវីដ១៩ សរុបប្រមាណជា ២៤លានដូសហើយ ដោយក្នុងនោះវ៉ាក់សាំងមកពីប្រទេសចិនមានចំនួន ២១.៧លានដូស ​ខណៈជាង៣លានដូសទៀតជាជំនួយប្រទេសជាមិត្ត ដូចជាជប៉ុន អង់គ្លេស និងអាមេរិក​ជាដើមនោះ៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

អភិបាលខេត្តពោធិ៍សាត់ ចុះជួបគ្រួសារវីរកងទ័ពជួរមុខ និងពិនិត្យវឌ្ឍនភាព វាយតម្លៃគម្រោងមូលនិធិឃុំ ក្នុងស្រុកក្រគរ
12/16/2025 09:12 PM
Facebook Telegram Linkin
ក្តីស្រមៃពឹងផ្អែកស្រូវសាលីរបស់ប្រជាកសិករអ៊ីរ៉ាក់ត្រូវបានបំផ្លាញដោយសារវិបត្តិទឹក
12/16/2025 08:12 PM
Facebook Telegram Linkin
ពលរដ្ឋលីបង់ស្វាគមន៍រដូវកាលបុណ្យណូអែលជាមួយក្តីសង្ឃឹមថា ព្រះជាម្ចាស់នឹងជួយទប់ស្កាត់សង្រ្គាម
12/16/2025 08:12 PM
Facebook Telegram Linkin
តើយានដ្រូនបានផ្លាស់ប្តូរសង្រ្គាមបែបណាខ្លះនៅក្នុងឆ្នាំ ២០២៥?
12/16/2025 08:12 PM
Facebook Telegram Linkin
ផ្សែងអ័ព្ទយ៉ាងក្រាស់នៅប៉ាគីស្ថាន បង្ខំឲ្យបិទផ្លូវហាយវ៉េសំខាន់ៗជាច្រើនខ្សែនៅខេត្ត Punjab
12/16/2025 08:12 PM
Facebook Telegram Linkin
ចិនបញ្ជាក់ឡើងវិញពីតម្រូវការឲ្យនាយករដ្ឋមន្រ្តីជប៉ុនកែសម្រួលសេចក្តីអត្ថាធិប្បាយលើបញ្ហាកោះតៃវ៉ាន់
12/16/2025 08:12 PM
Facebook Telegram Linkin
ក្រុមហ៊ុនធានារ៉ាប់រង Swiss Re ៖ គ្រោះមហន្តរាយធម្មជាតិធ្វើឲ្យប៉ះពាល់សេដ្ឋកិច្ចសកល ២២០ពាន់លានដុល្លារ ក្នុងឆ្នាំ ២០២៥
12/16/2025 08:12 PM
Facebook Telegram Linkin
មន្ត្រីក្រសួងកសិកម្ម ដឹកនាំក្រុមការងារ​ ពិនិត្យការបំពាក់ឧបករណ៍ប្រព័ន្ធតាមដាននាវា នៅខេត្តព្រះសីហនុ
12/16/2025 08:12 PM
Facebook Telegram Linkin
រដ្ឋបាលរាជធានី នឹងបញ្ចៀសចរាចរណ៍យានយន្តគ្រប់ប្រភេទ នៅតីរវិថីព្រះស៊ីសុវត្ថិ ជាបណ្ដោះអាសន្ន
12/16/2025 08:12 PM
Facebook Telegram Linkin
សមាជិកកម្លាំងសន្តិសុខ ៣នាក់ នៅអ៊ីរ៉ង់ ត្រូវបានសម្លាប់ អំឡុងការប្រយុទ្ធគ្នា
12/16/2025 08:12 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.