នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS | កម្ពុជា និងថៃឯកភាពឈប់បាញ់គ្នា និងត្រលប់ទៅអនុវត្តបទឈប់បាញ់តាមរយៈការសម្របសម្រួលរបស់ប្រធានាធិបតីអាមេរិក
តម្លៃសេវាអ៊ីនធឺណិតនឹងទាបជាងមុន បន្ទាប់ពីកម្ពុជាតបណ្តាញប្រព័ន្ធអ៊ីនធឺណិតពីហុងកុង
វេទិកានយោបាយអាស៊ី-អឺរ៉ុប ស្នើឱ្យភាគីជម្លោះគោរពចំពោះកិច្ចព្រមព្រៀងសន្តិភាពនានា និង​ធម្មនុញ្ញ UN
ក្រសួងរៀងចំដែនដី នឹងបង្កើតសួនបន្ថែមក្នុងទីក្រុង ឆ្លើយតបនឹងកំណើនពលរដ្ឋក្នុងទីក្រុង

នយោបាយ​ និង ការអភិវឌ្ឍន៍

នាំយកអំណោយរបស់ឯកឧត្តម ហ៊ុន ម៉ានី ជូនប្រជាការពារទូទាំងខណ្ឌច្បារអំពៅ និងសង្កាត់ចំនួន ៣៥៦នាក់

2021/08/23 03:07:28 pm        453
Facebook Telegram Linkin
ភ្នំពេញ ៖ អំណោយជាគ្រឿងឧបភោគបរិភោគ និងថវិកាមួយចំនួនរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោកជំទាវ ត្រូវបានផ្តល់ប្រជាការពារខណ្ឌ និងសង្កាត់ ចំនួន ៣៥៦នាក់ ទូទាំងខណ្ឌច្បារអំពៅ ដើម្បីសម្រួលដោះស្រាយការលំបាក ខណៈមូលដ្ឋានខណ្ឌច្បារអំពៅ បាននិងកំពុងប្រឈមមុខនឹងការរីករាលដាលជំងឺកូវីដ-១៩ ។ពិធីប្រគល់អំណោយនេះ បានធ្វើឡើងនាព្រឹកថ្ងៃទី២៣ ខែសីហា ឆ្នាំ២០២១ នៅសាលា​ខណ្ឌច្បារអំពៅ ក្រោមវត្តមានលោក ចេង មុនីរ៉ា អភិបាលខណ្ឌ និងប្រជាការពារ មកពីតាមបណ្តាសង្កាត់ និងខណ្ឌ ។តាងនាមឲ្យប្រជាការពារ លោក ចេង មុនីរ៉ា បានថ្លែងអំណរគុណយ៉ាងជ្រាលជ្រៅ ចំពោះឯកឧត្តម ហ៊ុន ម៉ានី និងលោកជំទាវ តាមរយៈឯកឧត្តម​ ឃួង ស្រេង អភិបាលរាជធានីភ្នំពេញ ដែលបាន​ឧបត្ថម្ភ​នូវគ្រឿងឧបភោគបរិភោគ និងថវិកាខាងលើនេះ ជូនដល់បងប្អូនប្រជាការពារខណ្ឌ និងសង្កាត់ទាំង ៣៥៦នាក់ ស្មើ ៣៥៦កញ្ចប់ ដែលក្នុង១កញ្ចប់ មានថវិកាចំនួន២ម៉ឺនរៀល ។ក្នុងនោះ លោក ចេង មុនីរ៉ា សូម​ថ្លែង​ការ​កោតសរសើរ​ចំពោះ​កម្លាំងប្រជាការពារ ដែលបានលះបង់​កម្លាំងកាយចិត្ត លះបង់សេចក្តីសុខរបស់ខ្លួន ចូលរួមក្នុងការងារទប់ស្កាត់ជំងឺកូវីដ-១៩នេះ ដោយមិនគិតពីថ្ងៃឈប់ ឬសម្រាកឡើយ៕អត្ថបទ៖ កុម្ភះ

សម្តេចអគ្គមហាពញាចក្រី ហេង សំរិន ចូលរួមមហាសន្និបាត AIPA លើកទី៤២ តាមប្រព័ន្ធវីដេអូ ដែលសភាប្រទេសព្រុយណេធ្វើជាម្ចាស់ផ្ទះ

2021/08/23 12:43:59 pm        347
Facebook Telegram Linkin
ភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំ​គណៈប្រតិភូ​ជាន់​ខ្ពស់សភា នៃព្រះរាជាណាចក្រកម្ពុជា ចូលរួមមហាសន្និបាតប្រចំាឆ្នាំលើកទី៤២ អន្តរសភាអាស៊ាន ដែលហៅកាត់ថា (AIPA) តាមប្រព័ន្ធវីដេអូ នៅថ្ងៃទី២៣ ខែសីហា ឆ្នាំ២០២១នេះ ដែល​សភា​ប្រទេសព្រុយណេដារូស្សាឡាមធ្វើជាម្ចាស់ផ្ទះ។មហាសន្និបាតអន្តរសភាអាស៊ានឆ្នាំនេះ ប្រារព្ធធ្វើឡើងក្រោមមូលបទ “ជំរុញកិច្ចសហប្រតិបត្តិការ សភាលើបរិយាប័ន្នឌីជីថល ឆ្ពោះទៅសហគមន៍អាស៊ានឆ្នាំ២០២៥” ។ ពិធីបើកមហាសន្និបាត ប្រារព្ធធ្វើឡើងក្រោមអធិបតីភាពថ្នាក់ដឹកនាំស្ថាប័ននីតិប្បញ្ញត្តិ នីតិប្រតិបត្តិ​ប្រទេសព្រុយណេដារូស្សាឡាម និងបានភ្ជាប់ទៅបណ្តាសភាសមាជិកអាយប៉ាយទំាង១០ គណៈប្រតិភូប្រទេស​ដែលជាដៃគូសន្ទនា និងគណៈប្រតិភូប្រទេសសង្កេតការណ៍មួយចំនួនទៀត បានចូលរួមផងដែរ ។ដោយសារការរាតត្បាតជំងឺកូវីដ១៩ ជាសកលពីរឆ្នាំហើយ ដែលស្ថាប័នសភាអាស៊ាននេះ បានរៀបចំមហាសន្និបាតរបស់ខ្លួនតាមប្រព័ន្ធវីដេអូ។ អន្តរសភាអាស៊ានជាអង្គការអន្តរសភា តំណាងស្ថាប័ននីតិប្បញ្ញត្តិ នៃបណ្តាប្រទេសជាសមាជិក សមាគមប្រជាជាតិអាស៊ីអាគ្នេយ៍ (ASEAN) ដែលមាន ប្រទេសព្រុយណេដារូស្សាឡាម កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបុរី ថៃ និងវៀតណាម ជាសមាជិក។ អង្គការសភាមួយនេះ ជាការប្រមូលផ្ដុំសំឡេងប្រជាពលរដ្ឋក្នុងសហគមន៍អាស៊ាន ជា​ដៃគូ​របស់អាស៊ាន ក្នុងការជំរុញឱ្យសម្រេចបាននូវគោលដៅសហគមន៍អាស៊ានតែមួយ។មហាសន្និបាតអន្តរសភាអាស៊ានលើកទី៤២ ដែលប្រទេសព្រុយណេដារូស្សាឡាម ធ្វើជាម្ចាស់​ផ្ទះពេល​នេះ ប្រារព្ធធ្វើចាប់ពីថ្ងៃទី២៣ ដល់ថ្ងៃទី២៥ ខែសីហា ឆ្នាំ២០២១។ មហាសន្និបាតអន្តរសភាអាស៊ាន បានប្រារព្ធ ធ្វើជារៀងរាល់ឆ្នាំ ដោយប្រទេសជាសមាជិក​តាមវេន​នៃលំដាប់អក្ខរក្រម នៃឈ្មោះប្រទេសតាមអក្សរឡាតំាង។ សភានៃព្រះរាជាណាចក្រកម្ពុជា នឹង​ក្លាយ​ជាប្រធានអាយប៉ាលើកទី៤៣ នៅឆ្នាំ២០២២ ខាងមុខនេះ។បន្ទាប់ពីអញ្ជើញចូលរួមពិធីបើកមហាសន្និបាតជាផ្លូវការ សម្តេចអគ្គមហាពញាចក្រី ហេង សំរិន នឹងអញ្ជើញចូលរួមកិច្ចប្រជុំគណៈកម្មាធិការប្រតិបត្តិអាយប៉ា ដើម្បីអនុម័តកម្មវិធី របៀប​វារៈមហាសន្និបាត និងការងារផ្ទៃក្នុងអាយប៉ាផ្សេងៗទៀត និងក្រោយមកទៀត សម្តេចប្រធាន​រដ្ឋសភា នឹងអញ្ជើញថ្លែងសុន្ទរកថាទៅកាន់មហាសន្និបាត ជាមួយប្រធានគណៈប្រតិភូសមាជិកអាយប៉ាទំាង១០ផងដែរ៕

ខេត្តបន្ទាយមានជ័យ បើកយុទ្ធនាការចាក់វ៉ាក់សាំងបង្ការជំងឺកូវីដ ១៩ ដល់កុមារ និងយុវវ័យ ចាប់ពីអាយុ ១២ឆ្នាំដល់ក្រោម ១៨ឆ្នាំ នៅមណ្ឌលសុខភាពអូរអំបិល

2021/08/23 11:00:40 am        162
Facebook Telegram Linkin
បន្ទាយមានជ័យ ៖ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានថ្លែងថា «យុទ្ធនាការចាក់វ៉ាក់សាំងការពារជំងឺកូវីដ១៩ នាពេលនេះ គឺបានមកពីគិតគូរ យកចិត្តទុកដាក់ខ្ពស់បំផុត ពីសំណាក់សម្តេចតេជោ ហ៊ុន សែន ទៅដល់ក្មួយៗ ដើម្បី ឲ្យមានសុខភាពមាំមួន ក្នុងការបង្កើនភាពស៊ាំ ឬអង់ទីគ័រការពារ ប្រឆាំងនឹងជំងឺឆ្លងកូវីដ ១៩»។ ថ្លែងក្នុងឱកាសបើកយុទ្ធនាការចាក់វ៉ាក់សាំងបង្ការជំងឺកូវីដ ១៩ ដល់កុមារ និងយុវវ័យ ចាប់ពីអាយុ ១២ឆ្នាំដល់ក្រោម ១៨ឆ្នាំ នៅមណ្ឌលសុខភាពអូរអំបិល នៅថ្ងៃទី២៣ ខែសីហានេះ ឯកឧត្ដម​អភិបាលខេត្ត បានបន្តថា វ៉ាក់សាំងបង្ការនេះ ពិតជាបានចូលរួមចំណែក ជួយកាត់បន្ថយ​ការឆ្លង​រាលដាលនៃជំងឺកូវីដ ១៩​ បានមួយ​ផ្នែកធំ បើទោះបីវាមានការឆ្លងមកបុគ្គល​ដែល​បាន​ចាក់​ហើយក៏ដោយ ក៏អ្នកជំងឺ​មិនអាការៈធ្ងន់ធ្ងរ ដល់អាយុជីវិត នោះឡើយ។ឯកឧត្តមអភិបាលខេត្ត ក៏បានថ្លែងបញ្ជាក់ដែរថា ការចាក់វ៉ាក់សាំងបង្ការ នាពេលនេះដែរ គឺធ្វើឡើង​សម្រាប់កុមារ និងយុវវ័យចាប់ពីអាយុ ១២ឆ្នាំ ដល់ក្រោម ១៨ឆ្នាំ ដែលបានចាប់ផ្តើមចាក់ ចាប់ពីថ្ងៃទី២៣ខែសីហា ឆ្នាំ២០២១ តទៅនេះ។ ការចាក់វ៉ាកសាំងជូនកុមារ និងយុវវ័យ ក្នុងក្របខណ្ឌទូទាំងខេត្ត រៀបចំចាប់ផ្តើមចាក់ពីថ្ងៃនេះតទៅតាមមណ្ឌលសុខភាពទាំង៦៥ ឃុំ/សង្កាត់ ។ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋដែលបាននាំកូន ក្មួយៗ មកទទួលការចាក់​វ៉ាក់​សាំងបង្ការជំងឺ​កូវីដ ១៩ ខាងលើ ត្រូវមកតាមការកំណត់របស់អាជ្ញាធរ ជៀសវាងមកប្រជ្រៀតគ្នា ត្រូវរក្សាគម្លាតសុវត្ថិភាព ការប្រើអាល់កុលជែលលាងដៃ និងម៉ាស់។ទន្ទឹមនោះដែរដែរ ក្រោយទទួលបានវ៉ាក់សាំងបង្ការរួចហើយ សូមប្អូនៗ ក្មួយៗ ត្រូវតែបន្តអនុវត្តនូវ​វិធាន​សុខាភិបាល «៣ការពារ និង៣កុំ» ដើម្បី ចូលរួមចំណែកកាត់ផ្តាច់ខ្សែចម្លង និងជៀសឲ្យផុតពី​ការឆ្លង​រាលដាល នៃជំងឺ​ដ៏ដ៏កាចសាហាវនេះ ខណៈដែលបច្ចុប្បន្ន វីរុសបំប្លែងខ្លួនថ្មី ប្រភេទ ដែលតា (Delta) កំពុងចរាចរណ៍វាយលុកក្នុងប្រទេសកម្ពុជា ក៏ដូចជា បណ្ដាប្រទេសមួយចំនួន នៅក្នុងពិភព​លោក គួរឲ្យព្រួយបារម្ភផងដែរ៕អត្ថបទ ៖ បាន សុខរិទ្ធ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នឹង​អញ្ជើញ​ទៅ​​ទទួល​វ៉ាក់សាំង​ជា​ជំនួយ​របស់​កាកបាទក្រហម​ចិន​ នាល្ងាចថ្ងៃនេះ

2021/08/23 10:19:35 am        281
Facebook Telegram Linkin
ភ្នំពេញ ៖ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នឹងអញ្ជើញ​ទៅ​ទទួលដោយផ្ទាល់នូវវ៉ាក់សាំងកូវីដ១៩ ស៊ីណូហ្វាម ដែលជាជំនួយសមាគម​ជាតិកាកបាទក្រហមចិន ចំនួន១០ម៉ឺនដូស ​ដែលផ្តល់ជូនកាកបាទក្រហមកម្ពុជា នៅរសៀលថ្ងៃទី២៣ ខែសីហា ឆ្នាំ២០២១នេះ នៅព្រលានយន្តហោះអន្តរជាតិភ្នំពេញ។យោងតាមសេចក្តីប្រកាសព័ត៌មានរបស់កាកបាទក្រហមកម្ពុជា បានឲ្យដឹងថា កាកបាទ​ក្រហម​កម្ពុជា ដែលមានហ្លួងម៉ែ នរោត្តម មុនិនាថ សីហនុ ជាព្រះកិត្តិយស នឹងទទួលបាននូវ​វ៉ាក់សាំង​ប្រភេទ SARS-COV-2 (Sinopham)ចំនួន១០ម៉ឺនដូស ដែលជាជំនួយរបស់​សមាគមជាតិ​កាកបាទ​ក្រហមចិន។ ដោយជំនួយនេះ នឹងមកដល់ប្រទេសកម្ពុជា នាថ្ងៃទី២៣ ខែសីហានេះតែម្តង។តាមរយៈសេចក្តីប្រកាសនេះ បានបញ្ជាក់ឲ្យដឹងទៀតថា ពិធីប្រគល់ និងទទួលអំណោយដ៏ថ្លៃថ្លា​នូវ​វ៉ាក់សាំង SARS-CoV2 (Sinopharm) ពីសមាគមជាតិកាកបាទក្រហមចិន ជូនដល់កាកបាទក្រហម​កម្ពុជា ដើម្បីទប់ស្កាត់ការរីករាលដាលជំងឺកូវីដ១៩នេះ នឹងប្រព្រឹត្តទៅ ក្រោមអធិបតីភាពរបស់ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម វ៉ាង វិនទៀង ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំកម្ពុជា នៅអាកាស​យានដ្ឋានអន្ដរជាតិភ្នំពេញ។សេចក្តីប្រកាស បានបញ្ជាក់បន្ថែមទៀតថា វ៉ាក់សាំងកូវីដ១៩ ដែលជាជំនួយរបស់​កាកបាទ​ក្រហមចិន នឹងកាន់តែចូលរួមជាមួយរាជរដ្ឋាភិបាលកម្ពុជា នូវមធ្យោបាយដ៏មានអនុភាពបន្ថែមទៀត ក្នុងការបន្តខិតខំប្រឹងប្រែងប្រយុទ្ធប្រឆាំងនឹងជំងឺកូវីដ១៩ ដែលកំពុងរាតត្បាតសកលនោះ។ យ៉ាងណាក៏ដោយតាមរយៈសេចក្តីប្រកាសព័ត៌មាននេះ សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ក៏បានអំពាវនាវដល់បងប្អូនជនរួមជាតិទាំងអស់បន្តអនុវត្តវិធានការសុខភាពសាធារណៈ និង​បន្ត​អនុវត្ត​ឲ្យបាន​ខ្ជាប់ខ្ជួន​នូវវិធានរបស់ក្រសួងសុខាភិបាល ក៏ដូចជាអនុសាសន៍របស់សម្តេចតេជោ ហ៊ុន សែន នាយករដ្ឋមន្រ្តី «៣កុំ ៣ការពារ» ខណៈការពឹងពាក់តែវ៉ាក់សាំងមួយមុខយើង​នឹងមិន​អាច​បញ្ចប់ការឆ្លងរីករាលដាលនូវមេរោគកូវីដ១៩នេះ បាននោះឡើយ។តាមរយៈសេចក្តីប្រកាសព័ត៌មាននេះដែរ កាកបាទក្រហមកម្ពុជា ក៏បានប្តេជ្ញាបន្តខិតខំចូលរួម និង​សហការជាមួយនឹងរាជរដ្ឋាភិបាល ឲ្យកាន់តែខ្លាំងក្លាមួយកម្រិតទៀត ក្នុងការប្រយុទ្ធប្រឆាំងនឹង​ជំងឺ​កូវីដ១៩ តាមរយៈការចូលរួមចំណែកអប់រំផ្សព្វផ្សាយ ​ដល់បងប្អូនប្រជាពលរដ្ឋតាមសហគមន៍ ឲ្យអនុវត្តវិធានការសុខាភិបាល និងវិធានរដ្ឋបាល ដើម្បីសុខភាពល្អរបស់គ្រួសារមួយ សហគមន៍មួយ​ និងសង្គមជាតិទាំងមូលផងដែរ៕អត្ថបទ ៖ បាន ចក់

មន្ទីរព្យាបាលជំងឺកូវីដ-១៩ កម្រិតធ្ងន់សម្រាប់ថ្នាក់តំបន់ កំពុង​ដំឡើង​ជិត​រួចរាល់ហើយ​នៅសៀមរាប

2021/08/23 09:57:48 am        80
Facebook Telegram Linkin
ភ្នំពេញ ៖ រដ្ឋមន្រ្តីក្រសួងសុខាភិបាល មានប្រសាសន៍ថា បើទោះជាកម្ពុជាកំពុងស្ថិតក្រោមនិន្នាការ​ថយចុះ នៃការឆ្លងជំងឺកូវីដ១៩ ក្រោយពីទទួលបាននូវលទ្ធផលចាក់វ៉ាកសាំងនោះ ការរៀបចំឲ្យ​មាន​មន្ទីរព្យាបាលកូវីដ-១៩ថ្មីបបន្ថែមទៀត សម្រាប់ទទួលអ្នកជំងឺ​កម្រិត​ធ្ងន់ថ្នាក់តំបន់នៅខេត្តសៀមរាប ។ជាមួយនឹងវត្តមានបំពេញការងាររបស់ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួង​សុខា​ភិបាល នៅក្រុងសៀមរាប នាព្រឹកថ្ងៃទី២២ ខែសីហា ឆ្នាំ២០២១ បានបង្ហាញឲ្យដឹងថា មន្ទីរព្យាបាល​ជំងឺ​កូវីដ១៩ កម្រិតធ្ងន់ ដែលមានចំណុះគ្រែអ្នកជំងឺ​ចំនួន៤០០គ្រែ ត្រូវបានកំពុងដំណើរការ​ដំឡើង​ជិតរួចរាល់ហើយ។ ឧបករណ៍សម្ភារៈវេជ្ជសាស្រ្តដែលត្រូវបំពាក់តាមគ្រែអ្នកជំងឺ​នោះ ក៏បានដឹកជញ្ជូន​ដល់មន្ទីរព្យាបាលនោះហើយដែរ។ឯកឧត្តមរដ្ឋមន្រ្តីបញ្ជាក់ថា នេះគឺជាយុទ្ធសាស្រ្តត្រៀមបង្ការរបស់ប្រមុខនៃរាជរដ្ឋាភិបាល។ មន្ទីរព្យាបាល​ជំងឺកូវីដ-១៩ កម្រិត​ធ្ងន់មួយនេះ គឺជាមន្ទីរព្យាបាលខ្នាតស្តង់ដារខ្ពស់​សម្រាប់ថ្នាក់​តំបន់ ក្នុងនោះអ្នកជំងឺកូវីដ-១៩ ដែលត្រូវបញ្ជូនមកទទួលការព្យបាលនៅទីនេះ រួមមាន​ខេត្ត​សៀមរាប កំពង់ធំ ព្រះវិហារ ឧត្តរមានជ័យ និងខេត្តបន្ទាយមានជ័យ។ យ៉ាងណាក៏ដោយ ឯកឧត្តមរដ្ឋមន្រ្តី ក៏បានថ្លែងនូវភាពកក់ក្តីជាទីបំផុត ​ចំពោះរដ្ឋបាលខេត្តសៀមរាប ដែលបាន​សហការ​​ជាមួយក្រសួងសុខាភិបាល សម្របសម្រួល​ផ្តល់ទីតាំង សាលមហោស្រព អង្គរ-កូអ៊ិច ស្ថិតនៅ​លើអតីតតំបន់ពិព័រណអង្គរ-ឃ្យុងយូ(ក្រុងសៀមរាប) ដែលជាទីតាំងដ៏ល្អសម្រាប់​ការរៀបចំ​មន្ទីរព្យាបាលមួយនេះ។ប្រភព​​បានលើកឡើងថា មោទនភាពនៃលទ្ធផលចាក់វ៉ាក់សាំងបង្ការជម្ងឺកូវីដ-១៩ មកដល់ពេលនេះ ក្រសួងកត់សម្គាល់ឃើញថា ស្ថានភាពឆ្លងជម្ងឺកូវីដ-១៩នៅកម្ពុជា កំពុងស្ថិតក្នុង​និន្នាការ​នៃការ​ថយចុះ ប៉ុន្តែការរៀបចំមន្ទីរពេទ្យដ៏ធំប្រចាំតំបន់មួយនេះ វាជាការបោះជំហាន​ត្រៀមលក្ខណៈជាមុន ចំពោះស្ថានភាពធ្ងន់ធ្ងរ ដែលអាចកើតមានជាយថាហេតុ។រដ្ឋមន្ត្រីក្រសួងសុខាភិបាល បានអំពាវនាវចំពោះបងប្អូនប្រជាពលរដ្ឋទាំងអស់ទូទាំងប្រទេស សូម​បន្តការប្រុងប្រយ័ត្នខ្ពស់ ដោយត្រូវចេះផ្លាស់ប្តូរទម្លាប់រស់នៅរបស់ខ្លួន រៀនរស់នៅ​ធម្មតា​ជាមួយ​រុសកូវីដ-១៩ តាមបែបគន្លងថ្មី សំដៅបង្ការ គ្រប់គ្រង និងកាត់ផ្តាច់ខ្សែចម្លងវីរុសដ៏កាចសាហាវនេះ ជាពិសេស ពពួកប្រភេទបំប្លែងថ្មី ឬក៏ប្រភេទថ្មីៗផ្សេងទៀត ៕អត្ថបទ ៖ ឡេង 

ក្រុមការងារ​ចល័ត​ចម្រុះ​ត្រួត​ពិនិត្យយានយន្ត​ដឹកជញ្ជូន​លើស​ទម្ងន់ ​នឹង​បន្តអនុវត្ត​តាមច្បាប់យ៉ាង​តឹងរឹង​ ដោយគ្មានការលើកលែងឡើយ

2021/08/21 12:21:14 pm        875
Facebook Telegram Linkin
ភ្នំពេញ ​៖ ប្រតិបត្តិការចល័ត​ កាលពីថ្ងៃទី១៦-១៧ និង២០ ខែសីហា ឆ្នាំ២០២១ ក្រុមការងារចល័ត​ចម្រុះ​សម្រាប់​ឆ្មក់ត្រួតពិនិត្យយានយន្តដឹកជញ្ជូន​លើស​ទម្ងន់ នៃគណៈកម្មាធិការសម្រប​សម្រួល​អចិន្ត្រៃយ៍ នៃគណៈកម្មាធិការដឹកនាំការត្រួត​ពិនិត្យយានយន្តដឹកជញ្ជូន​លើស​ទម្ងន់​កម្រិត​កំណត់​បានឃាត់ ​និងពិន័យយានយន្តដឹកលើសទម្ងន់កម្រិតកំណត់ចំនួន ១៤គ្រឿង ដោយ ៦គ្រឿង ត្រូវបាន​​ពិន័យ និងរើទំនិញចេញ ចំណែកឯ ៨គ្រឿងទៀតត្រូវឃាត់ទុករយៈពេល ១ឆ្នាំ​ដោយ​លើស​ទម្ងន់​កម្រិត​កំណត់ ២០% នៃ​ទម្ងន់​អនុញ្ញាត​​។កាលពីថ្ងៃទី១៦-១៧ ខែសីហា ឆ្នាំ២០២១ លើផ្លូវជាតិលេខ៤៤ ស្រុកសំរោងទង ខេត្តកំពង់ស្ពឺ និងផ្លូវលេខ៧០B ស្រុកខ្សាច់កណ្តាល ខេត្តកណ្តាល ​ក្រុមការងារបានពិន័យយានយន្ដដឹកជញ្ជូន ៩គ្រឿង ដោយក្នុងនោះ ៥គ្រឿង ត្រូវឃាត់ទុករយៈពេល ១ឆ្នាំដោយសារលើសទម្ងន់កម្រិតកំណត់ ២០%នៃទម្ងន់អនុញ្ញាត។ដោយឡែកនៅថ្ងៃទី២០ ខែសីហា ឆ្នាំ២០២១ លើផ្លូវជាតិលេខ១ នៃស្រុកស្វាយជ្រុំ ខេត្តស្វាយរៀង និងស្រុកព្រះស្តេច ខេត្តព្រៃវែង ក្រុមការងារបានពិន័យយានយន្ដដឹកជញ្ជូន ៥គ្រឿង ដោយ​ក្នុងនោះ​យានយន្តចំនួន ៣គ្រឿង ត្រូវឃាត់ទុករយៈពេល ១ឆ្នាំដោយសារលើសទម្ងន់កម្រិតកំណត់ ២០% នៃទម្ងន់អនុញ្ញាត។យោងតាមទិន្នន័យខាងលើយានយន្តចំនួន ៨គ្រឿង ត្រូវឃាត់ទុកចំនួន ១ឆ្នាំដោយអនុលោមតាម​ច្បាប់ស្តីពីផ្លូវថ្នល់ មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពី ការ​ពង្រឹងវិធានការយ៉ាងតឹងរឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញ​ផ្លូវថ្នល់។ជាមួយគ្នានេះក្រសួងសាធារណការ និងដឹកជញ្ជូន សូមក្រើនរំលឹកជូនដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ម្តងហើយ ម្តងទៀតថា៖ ក្រសួងនឹង​បន្តអនុវត្តតាម​ច្បាប់ និងសេចក្ដីជូនដំណឹងខាងលើយ៉ាងតឹងរឹង​បំផុតដោយគ្មាន​ការ​លើកលែងឡើយ៕អត្ថបទ ៖ តារាវុទ្ធី

កាកបាទក្រហមយកចិត្តទុកដាក់ចំពោះស្ត្រីមានផ្ទៃពោះ និងសុខភាពម្តាយ និងទារក

2021/08/20 08:43:40 am        408
Facebook Telegram Linkin
កំពត ៖ កាកបាទ​ក្រហម ​តែងតែគិតគូរអំពីសុខុមាលភាពស្ត្រីមានផ្ទៃពោះ និងស្ត្រីទើបសម្រាល់កូនរួច ព្រោះអំឡុងពេលនេះ គឺជាពេលពិបាកបំផុតក្នុងជីវិតស្ត្រី ទាមទាការផ្តល់កម្លាំង និងការថែទាំដ៏ត្រឹមត្រូវ។ថ្លែងនៅព្រឹកថ្ងៃ ខែសីហា ឆ្នាំ២០២១នេះ លោកជំទាវ លាង ហៃ ជាវតាយ អនុប្រធាន​អចិន្ត្រៃយ៍​គណៈកម្មាធិការសាខា និងជាក្រុមការងារឥស្សរជនឆ្នើមថ្នាក់ជាតិ សម្រាប់សាខាខេត្តកំពត ក្នុងឱកាស​ចុះសួរសុខទុក្ខ ដល់ស្រ្តីមានផ្ទៃពោះរង់ចាំសម្រាល ស្ត្រីទើបសម្រាលកូនរួច និងស្ត្រីមានផ្ទៃពោះត្រូវធ្វើការវះកាត់បន្ទាន់ ដើម្បីជួយសង្គ្រោះអាយុជីវិតទាំងម្តាយ ទាំងកូន និងស្ត្រីមកពិនិត្យផ្ទៃពោះ នៅមន្ទីរពេទ្យបង្អែកខេត្តកំពត ។ក្នុងឱកាសនោះ លោកជំទាវ លាង ហៃជាវ តាយ បាន​ពាំនាំ​ការ​ផ្តាំផ្ញើ​សួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ដោយក្តី​នឹករលឹក​បំផុត។ លោកជំទាវបន្តថា សម្តេចកិត្តិព្រឹទ្ធបណ្ឌិតតែងតែគិគូរពីទុក្ខលំបាករបស់បងប្អូនប្រជាពលរដ្ឋ ពិសេស​ស្ត្រីមានជំងឺ ស្ត្រីសម្រាលកូន និងស្ត្រីមានផ្ទៃពោះ ព្រមទាំងបានផ្ដាំផ្ញើឲ្យខិតខំថែទាំ​សុខភាព​ខ្លួនឲ្យបានល្អ ​កុំតក់ស្លុត​ក្នុងពេលសម្រាល។ ហើយក្រោយសម្រាល ត្រូវញាំអាហាររូបត្ថម្ភ ដែល​មាន​ជីវជាតិ និងវីតាមីន ពិសេសត្រូវបំបៅកូននឹងទឹកដោះដំបូង ដើម្បីឲ្យទារកឆ្លាតវៃ និងមាន​សុខភាព​រឹងមាំធននឹងជំងឺ។ ចំពោះស្ត្រីផ្ទៃពោះ ត្រូវទៅពិនិត្យផ្ទៃពោះ​តាមការ​កំណត់​របស់​គ្រូពេទ្យ ហើយស្ត្រីមានកូនតូចត្រូវយកកូនទៅចាក់ថ្នាំបង្ការឲ្យបានគ្រប់ចំនួនតាមការណាត់ជួបរបស់គ្រូពេទ្យ។លោកជំទាវ ក៏បានថ្លែងអំណរគុណដល់ក្រុមគ្រូពេទ្យដែលខិតខំប្រឹង​ប្រែងយកចិត្តទុកដាក់​ធ្វើការ​ព្យាបាលជូនដល់អ្នកជំងឺប្រកបដោយក្រមសីលធម៌ វិជ្ជាជីវៈ និងបានអំពាវនាវដល់បងប្អូន​ប្រជា​ពលរដ្ឋទាំអស់ ត្រូវបន្តអនុវត្តវិធានការ ៣ការពារ និង៣កុំឲ្យបានខ្ជាប់ខ្ជួនផងដែរ៕

រដ្ឋបាលខេត្តកំពតនៅតែបារម្ភ និងអំពាវនាវឲ្យពលរដ្ឋបន្តការពារខ្លួនពីជំងឺកូវីដ១៩

2021/08/20 03:00:01 pm        369
Facebook Telegram Linkin
កំពត៖ បច្ចុប្បន្នស្ថានភាពកូវីដ១៩ នៅខេត្តកំពតមានសភាពល្អប្រើសើរមិនមានអ្នកឆ្លងច្រើនទៀតទេ តែទោះបីយ៉ាងណា អភិបាលខេត្តកំពត នៅតែមានការព្រួយបារម្ភ និងអំពាវនាវដល់អាជ្ញាធរ កងកម្លាំង និងជំនាញពាក់ព័ន្ធ ពិសេសប្រជាពលរដ្ឋឲ្យបង្កើនការយកចិត្តទុកដាក់អនុវត្តវិធានសុវត្ថិភាព ដើម្បីការពារខ្លួនពីជំងឺកូវីដ១៩ ។នៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកំពត ប្រចាំខែកក្កដា នៅព្រឹកថ្ងៃទី២០ ខែសីហា នៅសាលប្រជុំសាលាខេត្ត ឯកឧត្តមជាវ តាយ អភិបាលខេត្ត បានលើកលើកថា រយៈពេលកន្លងមក រដ្ឋបាលខេត្តកំពត ដោយផ្ដើមចេញពីគណៈបញ្ជាការឯកភាពរដ្ឋបាលខេត្ត មានផែនការសកម្មភាព ច្បាស់លាស់បង្ការទប់ស្កាត់ជំងឺឆ្លងកូវីត១៩បានល្អ ដោយអនុវត្តតាមវិធានការសុខាភិបាល សេចក្ដីណែនាំរបស់រាជរដ្ឋាភិបាល ក៏ដូចជាចំណាត់ការនានារបស់សម្ដេចតេជោហ៊ុន សែន ហើយរដ្ឋបាលខេត្តក៏បានដាក់ចេញនូវវិធានការជាច្រើន និងបានបង្កើនកម្មភាពយ៉ាង​ផុលផុស ក្នុងយុទ្ធនាការប្រយុទ្ធ និងពង្រឹងវិធានការ បង្ការទប់ស្កាត់កូវីដ១៩ បំប្លែងថ្មី ប្រភេទ ”ដែលតា” ទើបការឆ្លងរីករាលដាលជំងឺកូវីដ១៩នៅភូមិសាស្រ្តខេត្តកំពត មានលក្ខណៈធូរស្បើយល្អប្រសើរ។ ឯកឧត្តម បានបញ្ជាក់ថា រហូតមកថ្ងៃនេះ ទូទាំងខេត្តកំពតមានអ្នកជំងឺកូវីដ១៩ ចំនួន១៣១នាក់​ប៉ុណ្ណោះ​ដែលកំពុងសម្រាកព្យាលនៅតាមមណ្ឌលព្យាបាលនានា។ តែទោះបីយ៉ាងណា ឯកឧត្តមនៅតែព្រួយបារម្ភ និងបានជំរុញដល់អាជ្ញាធរក្រុង ស្រុក កងកម្លាំង​សមត្ថកិច្ច និងជំនាញពាក់ព័ន្ធ សូមបន្តចាត់វិធានការប្រយុទ្ធប្រឆាំងជំងឺកូវី១៩ ឲ្យបាន​សកម្មថែម​ទៀត។ ពិសេសអំពាវនាវដល់ប្រជាពលរដ្ឋទាំងអស់ ត្រូវបន្តអនុវត្តវិធាន ៣កុំ ៣ការពារឲ្យ​បាន​ខ្ជាប់ខ្ជួន ទោះបានចាក់វ៉ាក់សាំងរួចក៏ដោយ ។នៅក្នុងនោះដែរ ឯកឧត្ដមអភិបាលខេត្ត ក៏បានជំរុញឲ្យមានការរៀបចំផែនការសកម្មភាព ច្បាស់​លាស់​បន្តទៀត ក្នុងការចាត់តាំងអនុវត្តការងារ បង្ការទប់ស្កាត់ និងបង្ក្រាបបទល្មើសនានា​ក្នុង​ដែន​សមត្ថកិច្ចរបស់ខ្លួន។ ពង្រឹងពួនជ្រំទំនាក់ទំនងកិច្ចប្រតិបត្តិការរវាងកម្លាំងសមត្ថកិច្ច និងអាជ្ញាធរ​ព្រំដែន ដើម្បីការពារបូរណភាពទឹកដី និងអធិបតេយ្យភាពជាតិឲ្យបានល្អប្រសើរបន្ថែមទៀត ៕អត្ថបទ ៖ សារីម 

រដ្ឋបាលខេត្តមណ្ឌលគិរី ទទួលអំណោយសម្រាប់ប្រើប្រាស់ ក្នុង​ការងារគ្រប់គ្រង​បង្ការ​ទប់ស្កាត់​ជំងឺកូវីដ-១៩

2021/08/20 02:43:54 pm        375
Facebook Telegram Linkin
មណ្ឌលគិរី ៖ ​ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និង​សហប្រតិបត្តិការអន្តរជាតិ នាព្រឹកថ្ងៃទី២០ ខែសីហា ឆ្នាំ២០២១នេះ បានប្រគល់អំណោយ​ជូន​ដល់រដ្ឋបាលខេត្តមណ្ឌលគិរី សម្រាប់ប្រើប្រាស់ក្នុងការងារគ្រប់គ្រងបង្ការទប់ស្កាត់ជំងឺកូវីដ-១៩ ។ឯកឧត្តម ប្រាក់ សុខុន បានវាយតម្លៃខ្ពស់ចំពោះការខិតខំប្រឹងប្រែងរបស់រដ្ឋបាលខេត្ត និងអាជ្ញាធរ​ពាក់ព័ន្ធ​ទាំងអស់ ដែលបានយកចិត្តទុកដាក់ និងមានការទទួលខុសត្រូវខ្ពស់ក្នុងការចូលរួម​ប្រយុទ្ធ​ប្រឆាំង នឹងជំងឺកូវីដ-១៩ ជាពិសេសគឺខេត្ត បានគ្រប់គ្រងអ្នកដែលមានការពាក់ព័ន្ធ​ដោយ​ផ្ទាល់ និងប្រយោល ក្នុងព្រឹត្តិការណ៍ ២០ កុម្ភៈ និងបានបញ្ជូនឲ្យគាត់មកធ្វើចត្តាឡីស័ក និង​ព្យាបាល​បានយ៉ាងល្អប្រសើរ។ឯកឧត្តម ក៏បានលើកទឹកចិត្តដល់អាជ្ញាធរខេត្ត និងមន្រ្តីសុខាភិបាល ត្រូវរួមសហការគ្នាឲ្យកាន់​តែប្រសើរថែមទៀត ដើម្បីទប់ស្កាត់ កុំឲ្យកើតមានការឆ្លងរីករាលដាលនៃជំងឺកូវីដ-១៩បន្តទៀត ដោយត្រូវបន្តផ្សព្វផ្សាយដល់ប្រជាពលរដ្ឋ ឲ្យយកចិត្តទុកដាក់ក្នុងការអនុវត្តតាមការណែនាំ​របស់​រាជរដ្ឋាភិបាល និងក្រសួងសុខាភិបាល ពិសេសត្រូវរួមគ្នាអនុវត្តបានខ្ជាប់ខ្ជួន តាមអនុសាសន៍​ដ៏ខ្ពង់ខ្ពស់​របស់សម្ដេចតេជោ ហ៊ុន សែន នាយករដ្ឋមន្ត្រី ៣កុំ និង៣ការពារ។ឯកឧត្ដម ស្វាយ សំអ៊ាង អភិបាលខេត្តមណ្ឌលគិរី បានថ្លែងអំណរគុណយ៉ាងជ្រាលជ្រៅបំផុត ចំពោះ​ឯកឧត្តម ប្រាក់ សុខុន ឧបនាយករដ្ឋមន្រ្តី ដែលបាននាំយកអំណោយមកប្រគល់​ជូន​នាពេលនេះ។ ឯកឧត្តម អភិបាលខេត្ត បានបញ្ជាក់ថា ក្នុងរយៈពេល៣សប្តាហ៍ ក្នុងខែសីហានេះ រដ្ឋបាលខេត្ត បានរកឃើញអ្នកវិជ្ជមានជំងឺកូវីដ-១៩ ជិត៣០០នាក់ នៅទូទាំងខេត្ត ហើយតួលេខនេះ បើ​ប្រៀបធៀប​នឹងចំនួនអ្នកឆ្លងកូវីដ-១៩ កន្លងមក គឺមានការកើនឡើងគួរឲ្យកត់សម្គាល់ ហើយ​អំណោយ​មនុស្សធម៌ដ៏ថ្លៃថ្លានេះ គឺពិតជាមានសារៈប្រយោជន៍ណាស់ ស្របពេលដែលរដ្ឋបាលខេត្ត ក៏ដូចជាក្រុមគ្រូពេទ្យ កំពុងតែត្រូវការជាចាំបាច់ និងជាបន្ទាន់សម្រាប់ប្រើប្រាស់ ក្នុងការងារគ្រប់គ្រង បង្ការ ទប់ស្កាត់ជំងឺកូវីដ-១៩ ដ៏កាចសាហាវនេះ។ឯកឧត្តម អភិបាលខេត្ត បានឲ្យដឹងថា សម្រាប់ការងារចាក់វ៉ាក់សាំងវគ្គ៣ ដូសទី១ នៅទូទាំងខេត្ត គិតត្រឹមថ្ងៃទី១៩ ខែសីហានេះ មានចំនួន ៣៥.៩៤៣នាក់ និងដូសទី ២ មានចំនួន ៧.៣៩៦នាក់ និងបានចាក់វ៉ាក់សាំងកូវីដ-១៩ ជូនដល់កុមារអាយុចាប់ពី១២ឆ្នាំ រហូតដល់ក្រោមអាយុ ១៨ឆ្នាំ នៅក្រុងសែនមនោរម្យ និងស្រុកអូររាំង សរុបចំនួន ២.៣២៦នាក់។ ដោយឡែកសម្រាប់អ្នកមាន​វិជ្ជមានកូវីដ-១៩ សរុបចំនួន ៧២៨ករណី ជាសះស្បើយ ៣១៧ករណី ស្លាប់ចំនួន ០៣នាក់ និងកំពុងសម្រាកព្យាបាលចំនួន ៤០៨ករណី។សូមបញ្ជាក់ថា អំណោយជាសម្ភារៈដែល ឯកឧត្តម ប្រាក់ សុខុន បានប្រគល់ជូនដល់រដ្ឋបាល​ខេត្តមណ្ឌលគិរី សម្រាប់ប្រើប្រាស់ក្នុងការងារគ្រប់គ្រង បង្ការ ទប់ស្កាត់ជំងឺកូវីដ-១៩ រួមមាន៖ អាវពេទ្យចំនួន ៣០០ឈុត របាំងមុខ ១០០គ្រឿង ម៉ាស់ N95 ៥០០០ម៉ាស់ ម៉ាស់ (Foam) ៥០.០០០ម៉ាស់ ម៉ាស់ធម្មតា ៥០.០០០ម៉ាស់ ស្រោមដៃ ២០ប្រអប់ និងទឹកថ្នាំសម្លាប់មេរោគ ២០ធុងផងដែរ៕

អាជ្ញាធរមីន និងមជ្ឈមណ្ឌល ARMAC ចុះហត្ថលេខាអនុវត្តគម្រោង «លើកកម្ពស់កម្មវិធី​សង្រ្គោះ​ជន​ពិការ​ដោយសារមីន នៅតាមប្រទេសរដ្ឋសមាជិកអាស៊ា»

2021/08/19 07:57:24 am        639
Facebook Telegram Linkin
ភ្នំពេញ ៖ ថ្ងៃទី១៩ ខែសីហា ឆ្នាំ២០២១ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និង ឯកឧត្តម Pengiran Kasmirhan Pengiran Tahir, ឯកអគ្គរាជទូតវិសាមញ្ញ និងពេញសមត្ថភាពនៃប្រទេសប្រុយណេ ប្រចាំព្រះរាជាណាចក្រកម្ពុជា និងជាប្រធានគណ:កម្មការអចិន្រ្តៃយ៍ ARMAC (Chairman of the Steering Committee of ARMAC) បានអញ្ជើញចូលរួមជាអធិបតីក្នុងពិធីចុះហត្ថលេខាលើកិច្ចព្រមព្រៀងរវាងអាជ្ញាធរមីន និងមជ្ឈមណ្ឌលតំបន់អាស៊ានសម្រាប់សកម្មភាពមីន ដើម្បីអនុវត្តគម្រោងលើកកម្ពស់កម្មវិធីសង្គ្រោះជនពិការដោយសារមីននៅតាមបណ្តារដ្ឋសមាជិកអាស៊ាន ដែលផ្តល់មូលនិធិគាំទ្រដោយ មូលនិធិសហប្រតិបត្តិការអាស៊ាន-កូរ៉េ (ASEAN-KOREA Cooperation Fund) ។ពិធីហត្ថលេខាទ្វេភាគីនេះ តំណាងដោយ លោក ព្រំ សុភមង្គល អគ្គលេខាធិការអាជ្ញាធរមីន និង លោក ព្រហ្ម សួនប្រសិទ្ធ នាយកប្រតិបត្តិនៃមជ្ឈមណ្ឌល ARMAC ។ក្នុងនាមជាប្រធានគណៈកម្មាធិការដឹកនាំនៃ ARMAC លោក Pengiran Kasmirhan Pengiran Tahir បានមានប្រសាសន៍ថា គម្រោងនេះ ត្រូវបានផ្តួចផ្តើមដោយ ARMAC និងមានការគាំទ្រពីបណ្តា​ប្រទេស​សមាជិកអាស៊ាន ផ្តោតសំខាន់លើការជួយសង្រ្គោះជនរង​គ្រោះដោយសារសំណល់​ជាតិ​ផ្ទុះពីសង្គ្រាម ដោយមានការគាំទ្រពីរដ្ឋាភិបាលនៃសាធារណរដ្ឋកូរ៉េ តាមរយៈមូលនិធិ​សហប្រតិបត្តិការ​អាស៊ាន-កូរ៉េ(AKCF)។ លោកឯកអគ្គរាជទូត បានបន្តទៀតថា គម្រោងនេះ នឹងផ្តល់អត្ថប្រយោជន៍យ៉ាងច្រើន​ដល់​ប្រទេសសមាជិកអាស៊ាន ដែលរងផលប៉ះពាល់ដោយមីន និងសំណល់ជាតិផ្ទុះពីសង្គ្រាម ដែលកំពុងប្រឈម នឹងបញ្ហាដ៏ធំ ក្នុងការដោះស្រាយជំនួយជនរងគ្រោះនៅក្នុងប្រទេសរបស់ខ្លួន ក៏ដូច​ជាការបង្កើននូវតួនាទី និងការទទួលខុសត្រូវរបស់អង្គភាពសកម្មភាពមីន​ពាក់ព័ន្ធ​​នៅក្នុង​ប្រទេសសមាជិកអាស៊ាន។ជាមួយគ្នានេះដែរ ក្នុងនាមរាជរដ្ឋាភិបាលកម្ពុជា ឯកឧត្តម ទេសរដ្ឋមន្រ្តី បានថ្លែងអំណរគុណយ៉ាង​ជ្រាលជ្រៅ​ជូនចំពោះរដ្ឋាភិបាល និងប្រជាជននៃសាធារណរដ្ឋកូរ៉េ តាមរយៈមូលនិធិ​សហប្រតិបត្តិការ​អាស៊ាន-កូរ៉េ ដែលបានរួមចំណែកសម្រាប់សកម្មភាពមីននៅកម្ពុជា និងតំបន់​អាស៊ាន ដែលការគាំទ្រនេះ បានគូសបញ្ជាក់ពីការប្តេជ្ញាចិត្តមិនផ្លាស់ប្តូររបស់សាធារណរដ្ឋកូរ៉េ ក្នុងការពង្រឹងកិច្ចសហប្រតិបត្តិការជាមួយអាស៊ាន ក្នុងនាមជាដៃគូសន្ទនាអាស៊ាន។ឯកឧត្តម បន្តទៀតថា ក្រៅពីជំនួយកិច្ចសហប្រតិបត្តិការក្នុងក្របខណ្ឌអាស៊ាន សាធារណរដ្ឋកូរ៉េ ក៏បានផ្តល់ជំនួយគាំទ្រកិច្ចសហប្រតិបត្តិការទ្វេភាគីដល់កម្ពុជានូវថវិកាប្រមាណ ១០ លានដុល្លារអាមេរិក តាមរយៈគម្រោងបោសសម្អាតមីន ដើម្បីលទ្ធផលដំណាក់កាលទី៤ សម្រាប់ការងារបោសសម្អាតមីន និងការសង្រ្គោះជនពិការដោយសារមីននៅកម្ពុជា រហូតដល់ឆ្នាំ២០២៥ ផងដែរ។ឯកឧត្តម ទេសរដ្ឋមន្រ្តី លី ធុជ បានលើកឡើងថា នេះគឺជាការចុះហត្ថលេខាលើកទី២ រវាង​អាជ្ញាធរមីន និង ARMAC ដែលលើកទី១ មានតាំងពីឆ្នាំ២០១៨ ចុះហត្ថលេខាលើ​អនុស្សរណៈយោគយល់​គ្នាសម្រាប់កិច្ចសហប្រតិបត្តិការទូទៅ។ ឯកឧត្តម បានបញ្ជាក់បន្ថែមថា វឌ្ឍនភាពនេះ មិនត្រឹមតែជាព្រឹត្តិការណ៍សំខាន់សម្រាប់កិច្ច​សហប្រតិបត្តិការរវាងអាជ្ញាធរមីន និង ARMAC ប៉ុណ្ណោះទេ ប៉ុន្តែក៏ជាព្រឹត្តិការណ៍​សំខាន់​មួយទៀត​សម្រាប់កិច្ចខិតខំប្រឹងប្រែងរបស់ ARMAC ក្នុងការដោះស្រាយបញ្ហាមីន និងសំណល់ជាតិផ្ទុះ​ពី​សង្គ្រាម​នៅក្នុងតំបន់អាស៊ាន តាំងពីចាប់ផ្តើមប្រតិបត្តិការរបស់ខ្លួនក្នុងឆ្នាំ២០១៧មក ហើយដែល​មជ្ឈមណ្ឌលនេះ ត្រូវបានបង្កើតឡើងក្រោមគំនិតផ្តួចផ្តើមរបស់​សម្តេចតេជោ នាយករដ្ឋមន្រ្តី ​នាកិច្ចប្រជុំកំពូលអាស៊ានលើកទី២១ ក្នុងឆ្នាំ២០១២ នៅរាជធានីភ្នំពេញ។ក្រៅពីជំនួយរបស់សាធារណរដ្ឋកូរ៉េ ក្នុងនាមរាជរដ្ឋាភិបាលកម្ពុជា ឯកឧត្តម ទេសរដ្ឋមន្រ្តី ក៏បានថ្លែងអំណរគុណចំពោះម្ចាស់ជំនួយ និងប្រទេសជាមិត្តដ៏ឆ្នើមដទៃទៀតរបស់កម្ពុជារួមមាន សហរដ្ឋអាមេរិក អូស្រ្តាលី អង់គ្លេស ជប៉ុន ន័រវែស អាល្លឺម៉ង់ ស្វីស ចិន កាណាដា នូវែលហ្សឺឡង់ អៀរឡង់ UNDP និង UNICEF ព្រមទាំងមូលនិធិ អង្គការសង្គមស៊ីវិល និងសប្បុរសជនផងដែរ។ឯកឧត្តម ទេសរដ្ឋមន្រ្តី ក៏បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការ​ដឹកនាំ​របស់សម្តេចតេជោ ហ៊ុន សែន នាយករដ្ឋមន្រ្តី ក្នុងការស្វែងរកសុខ សន្តិភាព និងស្ថិរភាពនយោបាយជូនជាតិមាតុភូមិ ដែលកើតឡើងចេញពីកម្លាំងញើសឈាមរបស់ថ្នាក់​ដឹកនាំ​រាជរដ្ឋាភិបាលកម្ពុជា ជាពិសេសក្រោមគោលនយោបាយ ឈ្នះ ឈ្នះ របស់ សម្តេចតេជោ នាយករដ្ឋមន្រ្តី បាននាំមកនូវវិបុលភាពសង្គម និងការអភិវឌ្ឍសេដ្ឋកិច្ចដល់ប្រទេសកម្ពុជា៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

ក្រសួងបរិស្ថានប្រគល់រថយន្ត១គ្រឿង និងម៉ូតូរឺម៉កដឹកសំរាមចំនួន២គ្រឿង ជូនរដ្ឋបាលខេត្តព្រះវិហារ ប្រើប្រាស់ដើម្បីថែរក្សាភាពស្អាតនៅតាមមណ្ឌលភៀសសឹកស្នាក់នៅ
12/18/2025 08:12 AM
Facebook Telegram Linkin
កម្ពុជាស្វាគមន៍ការប្រគល់មកវិញវត្ថុបុរាណខ្មែរ ចំនួន១៣រូបពីសារមន្ទីរសិល្បៈអាស៊ី សាន់ហ្វ្រាន់ស៊ីស្កូ សហរដ្ឋអាមេរិក
12/18/2025 08:12 AM
Facebook Telegram Linkin
ក្រសួងការងារ និងវិទ្យាស្ថាន ITE សិង្ហបុរី គ្រោងចុះ MoU ជំរុញអភិវឌ្ឍន៍ ការអប់រំបណ្ដុះបណ្ដាលបច្ចេកទេស និងវិជ្ជាជីវៈ
12/17/2025 09:12 PM
Facebook Telegram Linkin
លោក Putin៖ រុស្ស៊ីនឹងសម្រេចបានគោលដៅសង្គ្រាម ដោយបន្តពង្រីក «តំបន់ទ្រនាប់»
12/17/2025 08:12 PM
Facebook Telegram Linkin
កម្ពុជា ថ្លែងអំណរគុណសហភាពអឺរ៉ុប ក្នុងវិស័យអភិវឌ្ឍន៍កម្ពុជា និងជំនួយសប្បុរសធម៌ជនភៀសសឹក
12/17/2025 08:12 PM
Facebook Telegram Linkin
បេសកជនបង់ក្លាដែស នៅឥណ្ឌា ត្រូវបានកោះអញ្ជើញ ពាក់ព័ន្ធបញ្ហាសន្តិសុខ នៅទីក្រុង Dhaka
12/17/2025 08:12 PM
Facebook Telegram Linkin
រដ្ឋសភា ថ្កោលទោស ចំពោះការឈ្លានពានរបស់ថៃ ដោយប្រើប្រាស់សព្វាវុធធុនធ្ងន់គ្រប់ប្រភេទ
12/17/2025 07:12 PM
Facebook Telegram Linkin
អ្នកគាំទ្រប្រធានាធិបតីទុយនីស៊ី ប្រមូលផ្តុំគ្នា ស្របពេលមានការបែកបាក់នយោបាយកាន់តែជ្រៅ
12/17/2025 07:12 PM
Facebook Telegram Linkin
អភិបាលតំបន់៖ ការវាយប្រហាររបស់រុស្សីលើតំបន់ Zaporizhzhia របស់អ៊ុយក្រែន បណ្តាលឲ្យមានអ្នករបួស ២៦នាក់
12/17/2025 07:12 PM
Facebook Telegram Linkin
អាមេរិកបន្តប្រើប្រាស់មូលដ្ឋានកងទ័ពជើងទឹក Guantanamo សម្រាប់ឃុំខ្លួនជនអន្តោប្រវេសន៍ខុសច្បាប់
12/17/2025 07:12 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.