BTV NEWS

សម្ដេចតេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន

ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី

ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

សម្តេចធិបតីផ្ញើសារច្បាស់លាស់ និងយ៉ាងម៉ឺងម៉ាត់ដល់អាជ្ញាធរមូលដ្ឋានឱ្យបង្ក្រាប Online Scams ឱ្យទាល់តែអស់ជាដាច់ខាតប្រកបដោយស្មារតីទទួលខុសត្រូវខ្ពស់បំផុត

នយោបាយ និង ការអភិវឌ្ឍន៍

ពលរដ្ឋនៅតាមបណ្ដាស្រុកនៃខេត្ដសៀមរាប ចាប់ផ្ដើមទទួលបានវ៉ាក់សាំងបង្ការកូវីដ១៩

សៀមរាប ៖ នៅព្រឹកថ្ងៃទី១៥ខែកក្កដា ឆ្នាំ២០២១នេះ ប្រជាពលរដ្ឋជាច្រើនកុះករ បានទៅទទួលវ៉ាក់សាំងបង្ការជំងឺកូវី១៩ ពីរាជរដ្ឋាភិបាល បន្ទាប់ពីអាជ្ញាធរខេត្ដសៀមរាប ផ្ដល់វ៉ាក់សាំងជូនពលរដ្ឋក្នុងក្រុងរយៈពេល១៤ថ្ងៃ។លោក សយ សីហា មេឃុំត្រពាំងធំ ស្រុកប្រាសាទបាគង បានថ្លែងអំណរគុណដល់រាជរដ្ឋាភិបាលដែលបានផ្ដល់វ៉ាក់សាំងបង្ការជំងឺកូវីដ១៩ ដល់ប្រជាពលរដ្ឋរបស់ខ្លួន ខណៈដែលតំបន់របស់លោកគ្រប់គ្រង មានអ្នកឆ្លងជំងឺកូវីដ១៩ ជាច្រើន និងមានម្នាក់ស្លាប់ផងដែរ។លោកបានបន្ដថា ប្រជាពលរដ្ឋនៅឃុំត្រពាំងធំ ដែលមានអាយុឆ្នាំ១៨ឡើងទៅត្រូវបានទទួលវ៉ាក់សាំងបង្ការជំងឺកូវីដ១៩ មានជិត៦ពាន់នាក់ ដែលមានស្មើ នឹង៩ភូមិ។លោក បានបន្ដថា ចាក់វ៉ាក់សាំងបង្ការជំងឺកូវីដ១៩នេះ ធ្វើឡើងចាប់ពីម៉ោង៧ព្រឹក ដល់ម៉ោង១១ថ្ងៃ និងចាប់ពីម៉ោង១រសៀលដល់ម៉ោង៤ល្ងាចចាប់ពីថ្ងៃទី១៥ ខែកក្កដានេះ ដែលមានក្រុមគ្រូពេទ្យជួយផ្ដល់វ៉ាក់ និងជួយសម្របសម្រួលជាង២០នាក់ មកពីតំបន់ប្រតិបត្ដិការសឹករងខេត្ដកំពង់ធំ របស់យោធភូមិភាគទី៤ ។លោក សូរ ប្លាតុង អភិបាលស្រុកប្រាសាទបាគង ខេត្ដសៀមរាប មានប្រសាសន៍ថា ប្រជាពលរដ្ឋដែលមានអាយុត្រូវបានទទួលវ៉ាក់សាំងបង្ការជំងឺកូវីដ១៩ នៅទូទាំងស្រុកនេះ មានចំនួនជាង៥ម៉ឺននាក់ ហើយទីតាំងកន្លែងចាក់វ៉ាក់សាំងមានចំនួន៩ទីតាំង និងក្រុមគ្រូពេទ្យមានជាង១០០នាក់ មកយោភូមិភាគទី៤។លោក បានបន្ដថា ក្រុមការងារចម្រុះបានរៀបចំទីតាំងសម្រាប់ចាក់វ៉ាក់សាំងជូនប្រជាពលរដ្ឋ នៅដែលរស់នៅស្រុកប្រាសាទបាគង រួមមាន នៅទីរួមស្រុកប្រាសាទបាគង មានទីតាំងស្ថិតក្នុងបរិវេណអនុវិទ្យាល័យហ៊ុន សែន រលួស និង៨ទីតាំងទៀត នៅតាមសាលារៀនក្នុងឃុំដែលបានរៀបចំសម្រាប់ឲ្យពលរដ្ឋនៅមូលដ្ឋានដែលនៅជិតផ្ទះរបស់ពួកគាត់។លោក បានអំពាវនាវដល់បងប្អូនប្រជាពលរដ្ឋទាំងអស់ចូលរួមអនុវត្តវិធានការ រក្សាគម្លាតសណ្តាប់ធ្នាប់ នៅទីតាំងចាក់វ៉ាក់សាំង តាមឃុំនីមួយៗ សូមកុំប្រជៀត ដណ្ដើម និងព្យាយាមរុញគ្នា ដើម្បីបានចាក់មុននោះទេ។សូមជម្រាបថា យុទ្ធនាការចាក់វ៉ាក់សំាងបង្ការជំងឺកូវីដ១៩ នៅតាមស្រុកនៃខេត្ដសៀមរាប នេះ ធ្វើឡើងចាប់ពីថ្ងៃទី១៥ ខែកក្កដានេះតទៅ ដោយការចាប់ផ្ដើមដំបូងនេះ មានស្រុកប្រាសាទបាគង ស្រុកសូទ្រនិគម ដោយតាមផែនការ ការចាក់វ៉ាក់សាំងជូនពលរដ្ឋនៅតាមស្រុកទាំងអស់ នៃខេត្ដសៀមរាបមានចំនួនប្រមាណ៣០ម៉ឺននាក់ ដែលមានអាយុចាប់ពី១៨ឆ្នាំឡើងទៅ៕អត្ថបទ ៖ ឈិត សាវី

ប្រមុខការពារជាតិកម្ពុជា បន្តអំពាវនាវឲ្យមានការរួមគ្នាដោយស្អិតរមួតបន្ថែមទៀត ក្នុងការទប់ស្កាត់ និងបង្ការនូវជំងឺកូវីដ១៩

ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិកម្ពុជា បានបន្តអំពាវនាវដល់ភាគីពាក់ព័ន្ធទាំងអស់ ជាពិសេសក្រុមគ្រូពេទ្យយោធា ត្រូវធ្វើការរួមគ្នាឲ្យកាន់តែស្អិតរមួតបន្ថែមទៀត ក្នុងការទប់ស្កាត់ និងបង្ការនូវជំងឺកូវីដ១៩ ខណៈជំងឺដ៏កាចសាហាវមួយនេះ បានកំពុងយាយីយ៉ាងខ្លាំងនៅប្រទេសកម្ពុជា រហូតបានធ្វើឲ្យបងប្អូនប្រជាពលរដ្ឋបាត់បង់ជីវិត រាប់រយនាក់ក្នុងរយៈពេលប៉ុន្មានខែមកនេះ។ថ្លែងតាមរយៈសាអេឡិចត្រូនិច(តេលេក្រាម) កាលពីយប់ថ្ងៃទី១៤ ខែកក្កដា ឆ្នាំ២០២១នេះ សម្តេចពិជ័យសេនាទៀ បាញ់ បានលើកឡើងថា នាពេលបច្ចុប្បន្ននេះ ទាំងពិភពលោកក៏ដូចជាប្រទេសកម្ពុជាយើងទាំងមូលបានកំពុងផ្ទុះឡើងយ៉ាងខ្លាំងនូវជំងឺកូវីដ១៩នេះ ដូច្នេះក្នុងនាមយើងជាក្រុមគ្រូពេទ្យ គប្បីត្រូវបង្កើនសកម្មភាពរួមគ្នាបន្ថែមទៀតជួយដល់បងប្អូនប្រជាពលរដ្ឋខ្មែរ ដោយត្រូវបន្តធ្វើការចាក់វ៉ាក់សាំងជូនពួកគាត់ឲ្យបានឆាប់រហ័សស្របទៅតាមគោលដៅដែលរាជរដ្ឋាភិបាលបានដាក់ជាបន្តបន្ទាប់នោះ។សម្តេចពិជ័យសេនា ទៀ បាញ់បានបញ្ជាក់ថា«យើងត្រូវតែរួមគ្នាធ្វើសង្រ្គាមជាមួយជំងឺកូវីដ១៩នេះទាំងនេះ សុទ្ធជាបញ្ហាដែលយើងបានឃើញទាំងអស់គ្នាហើយ ដូច្នេះយើងត្រូវតែបំពេញដោយភាពស្មោះស្ម័គ្រ ត្រូវយកចិត្តទុកដាក់ និងបង្កើនការទទួលខុសត្រូវខ្ពង់ខ្ពស់បំផុតពីគ្រប់កន្លែងទាំងអស់ឲ្យបានដិតដល់ព្រមៗគ្នា ដើម្បីឲ្យក្លាយទៅជាកម្លាំងមួយនាំវ៉ាក់សាំងរបស់យើងយកទៅបញ្ជ្រាប នូវរាំងកាយមនុស្សឲ្យបានមួយចំនួនណា ស្របទៅតាមគោលការណ៍ដែលរាជរដ្ឋាភិបាលបានដាក់ចេញនោះ»។ជាមួយគ្នានោះដែរ សម្តេចពិជ័យសេនាទៀ បាញ់ ក៏បានក្រើនរំលឹកដល់ក្រុមគ្រូពេទ្យទាំងអស់មិនត្រូវយកកម្រៃពីបងប្អូនប្រជាពលរដ្ឋនោះឡើយពេលដែលធ្វើការចាក់វ៉ាក់សាំងជូនបងប្អូនប្រជាពលរដ្ឋនោះ ខណៈពេលនេះគឺជាពេលដែលយើងត្រូវសាមគ្គីគ្នាជួយស្រោចស្រង់អាយុជីវិតរបស់បងប្អូនពលរដ្ឋខ្មែរ ដែលពួកគាត់កំពុងមានទុក្ខធុរៈយ៉ាងខ្លាំងដោយសារតែបញ្ហាមេរោគកូវីដ១៩នេះ។សូមបញ្ជាក់ថា គិតត្រឹមថ្ងៃទី១៤ ខែកក្កដា ឆ្នាំ២០២១ ដំណើរការចាក់វ៉ាក់សាំងកូវីដ-១៩ របស់ក្រុមគ្រូពេទ្យក្រសួងការពារជាតិ សម្រេចបានចំនួនសរុប ២,១៨៤,៩២៧នាក់ហើយ ខណៈយុទ្ធនាការនេះ បានកំពុងបន្តទៀតនៅតាមបណ្តាខេត្តនានា ស្របទៅតាមគោលដៅរបស់ប្រមុខរាជរដ្ឋាភិបាលនោះ៕អត្ថបទ ៖ បាន ចក់

ក្រសួងវប្បធម៌ បន្តស្រាវជ្រាវសម្ភារៈប្រើបា្រស់លក្ខណៈប្រពៃណីខ្មែរ

ភ្នំពេញ ៖ លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និងវិចិត្រសិល្បៈ ប្រាប់BTV ព័ត៌មាន នាព្រឹកថ្ងៃទី១៥ ខែកក្កដា ឆ្នាំ២០២១នេះថា ក្រុមការងារនាយកដ្ឋាន បានចុះសិក្សាស្រាវជ្រាវសម្ភារៈប្រើប្រាស់របស់ប្រជាពលរដ្ឋ ដែលបន្សល់ទុកពីសង្គមដើម រហូតមកដល់បច្ចុប្បន្ន បើទោះបីស្ថិតក្នុងស្ថានភាពដ៏លំបាក ដែលបង្ករឡើងដោយមេរោគកូវីដ-១៩ ក៏ដោយ។លោក ឈឹម សុធី បានឲ្យដឹងទៀតថា គម្រោងសិក្សាស្រាវជ្រាវសម្ភារៈប្រើបា្រស់លក្ខណៈប្រពៃណីខ្មែរធ្វើឡើងកាលពីឆ្នាំ២០២០ ក្នុងខេត្តចំនួន៧ខេត្ត និងបន្តរហូតមកដល់សព្វថ្ងៃនេះ។ ព្រោះថាសម្ភារៈប្រើប្រាស់លក្ខណៈប្រពៃណីខ្មែរ នៅទូទាំងប្រទេសមានច្រើនណាស់ ប៉ុន្តែក្នុងដំណើរការសិក្សាស្រាវជ្រាវនេះសម្រេចបាន៧០-៨០%ហើយ ក្រៅពីនោះនៅតែតំបន់ឆ្ងាយប៉ុណ្ណោះ ដែលក្រុមការងារនាយកដ្ឋានទៅមិនដល់។លោក ឈឹម សុធី បានបន្ថែមថា សម្ភារៈផ្ទះខ្មែរ គឺនាយកដ្ឋានបានស្រាវជ្រាវបានច្រើនហើយ ច្រើនទំព័រមែនទែនគិតទៅប្រហែលជា៣០០ទំព័រ សរុបទាំងរូបថត និងអត្ថបទខ្លះពន្យល់អំពីសម្ភារៈ។ សម្ភារៈនេះ បែងចែកជាច្រើនមុខ មានស្ពាន់ មានប្រាក់ មានឈើ ផ្តៅ លពាក់ វ័រ ឬស្សី គ្រប់សព្វទាំងអស់ឲ្យតែខ្មែរយើងប្រើបា្រស់ និងមានគ្រឿងខ្លះសល់ពីអាណានិគមបារាំង មានម៉ាំងសុង ឆ្នាំងអ៊ុតពីដើមៗ និងរបស់របរនេសាទ មានច្រើនដែរ មានគ្រឿងឆ្បូប គ្រឿងចង្រាប់ ឲ្យតែមានយើងដាក់ចូលទាំងអស់។ ហើយយើងត្រៀមបន្តទៅទៀតឲ្យតែឃើញរបស់ណាប្លែកយើងនឹងថតដាក់បន្តទៀត ព្រោះការឌីហ្សាញមិនទាន់ចប់នោះទេ នឹងក៏មិនទាន់បានបោះពុម្ភទេ យើងនឹងបន្តកែសម្រួល....។ជាចុងក្រោយលោក ឈឹម សុធី បានបញ្ជាក់ទៀតថា សម្ភារៈប្រើប្រាស់លក្ខណៈប្រពៃណីខ្មែរដែល នាយកដ្ឋានកំពុងស្រាវជ្រាវនេះ គឺជាប្រភេទសម្ភារៈសិល្បៈ និងសិល្បៈសិប្បកម្មមិនមែនជាសម្ភារៈប្រើបា្រស់បែបវិទ្យាសាស្រ្តគីមី និងជ័រនោះទេ គឺជាប្រភេទសម្ភារៈប្រើប្រាស់ច្នៃប្រឌិតដោយដៃ ធ្វើឡើងដោយឈើ និងរុក្ខជាតិ។ ក្នុងនាមលោក ជាអ្នកតំណាងឲ្យក្រុមអ្នកស្រាវជ្រាវ ដ៏ដូចជាអ្នកធ្វើការក្នុងវិស័យវប្បធម៌ មានបំណងថា ខ្មែរយើងមានវប្បធម៌ចំណាស់ មានអត្តសញ្ញាណរបស់ខ្លួន មានសម្ភារៈប្រើប្រាស់ទុកសម្គាល់ថា ជាតិសាសន៍មួយជាតិខ្មែរយើង។ ដូច្នេះសម្ភារៈប្រើបា្រស់ទាំងអស់នេះ គ្រាន់តែឃើញថាយើងប្រើប្រាស់ និងដាក់លក់នៅកន្លែងណា គេដឹងថានេះជារបស់ខ្មែរបុរាណ បន្តពីដូនតាមួយជំនាន់ ទៅមួយជំនាន់ ហើយយុវជនជំនាន់ក៏បានចូលរួមបន្តវេនធ្វើកិច្ចការទាំងអស់នេះ។ដូច្នេះសូមឲ្យចេះស្រលាញ់សម្ភារៈប្រើបា្រស់លក្ខណៈប្រពៃណីខ្មែរ សម្បតិ្តបេតិកភណ្ឌ រក្សា និងកុំយកទៅលក់នៅស្រុកក្រៅ រក្សាទុកនៅក្នុងប្រទេសកំណើតរបស់ខ្លួន ឲ្យបានច្រើននូវរបស់របរចាស់ៗ និងបន្តផលិតថែមទៀតនូវរបស់ថ្មី ដើម្បីនាំចេញនូវវត្ថុសិល្បៈថ្មី ប៉ុន្តែយើងថែរក្សាវត្ថុសិល្បៈចាស់ៗ ដែលជាកេរ្តិ៍តំណែលរបស់ដូនតាយើងបានបន្សល់ទុក៕អត្ថបទ រដ្ឋា

សម្តេចក្រឡាហោម ស ខេង ៖ ការកេងប្រវ័ញ្ចផ្លូវភេទ លើកុមារតាមប្រព័ន្ធអនឡាញជាទម្រង់ថ្មីបង្កហានិភ័យដល់កុមារ

ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ បានឲ្យដឹងថា ទោះបីមានការរីកចម្រើនផ្នែកបច្ចេកវិទ្យាព័ត៌មានក៏ដោយក្រុមឧក្រិដ្ឋជននៅតែឆ្លៀតឱកាសទាញយកផលប្រយោជន៍ដោយខុសច្បាប់ ហើយបង្កើតការកេងប្រវ័ញ្ចផ្លូវភេទលើកុមារ តាមប្រព័ន្ធអនឡាញ ដែលជាទម្រង់ថ្មីនេះ កំពុងបង្កហានិភ័យខ្ពស់ដល់កុមារលើពិភពលោក រួមទាំងកម្ពុជាផងដែរ។ក្នុងពិធីប្រកាសដាក់ឱ្យ ប្រើប្រាស់ជាផ្លូវការ «ផែនការសកម្មភាពដើម្បីបង្ការ ទប់ស្កាត់ និងឆ្លើយតប ការកេងប្រវ័ញ្ចផ្លូវភេទលើកុមារ តាមប្រព័ន្ធអនឡាញឆ្នាំ២០២១-២០២៥ នាព្រឹកថ្ងៃទី១៤ ខែកក្កដា ឆ្នាំ២០២១នេះ តាមប្រព័ន្ធវីដេអូ សម្ដេច ស ខេង បានថ្លែងថា កម្ពុជាបានត្រៀមខ្លួនជាស្រេច ក្នុងការចូលរួមក្នុងបដិវត្តឧស្សាហកម្ម៤ចុច០ ដោយផ្តោតជាពិសេស លើវិស័យបច្ចេកវិទ្យា ដែលពិភពលោកកំពុងប្រើប្រាស់ ជាមធ្យោបាយសម្រាប់វិស័យនយោបាយ សេដ្ឋកិច្ច និងសង្គមកិច្ច យ៉ាងមានប្រសិទ្ធភាព។សម្ដេចក្រឡាហោម បានមានប្រសាសន៍ថា «ទោះបីជាយ៉ាងនេះក្តី ការរីកចម្រើន ផ្នែកបច្ចេកវិទ្យាព័ត៌មាន ក៏មានជ្រុងអវិជ្ជមានមួយចំនួន ដែលពាក់ព័ន្ធនឹង ការប្រើប្រាស់ខុសគោលដៅ និងដោយមានការជ្រៀតចូល ពីក្រុមឧក្រិដ្ឋជន ឆ្លៀតឱកាសទាញយកផលប្រយោជន៍ ដោយខុសច្បាប់ និងប្រាសចាកពីគន្លងសីលធម៌ និងការអភិវឌ្ឍ ដោយបង្កើតឱ្យមានការកេងប្រវ័ញ្ច និងឧក្រិដ្ឋកម្មគ្រប់រូបភាព រួមទាំងការកេងប្រវ័ញ្ច ផ្លូវភេទ លើកុមារតាមប្រព័ន្ធអនឡាញ ដែលជាទម្រង់ថ្មី មួយកំពុងរាលដាល និងបង្កហានិភ័យខ្ពស់ដល់កុមារ នៅលើពិភពលោក រួមទាំងកម្ពុជាផងដែរ»។សម្ដេច បានបញ្ជាក់បន្ថែមទៀតថា ដោយមើលឃើញនូវ បញ្ហាប្រឈម និងផលប៉ះពាល់ជាអវិជ្ជមានធ្ងន់ធ្ងរបែបនេះ ទើបរាជរដ្ឋាភិបាលកម្ពុជា បានសម្រេចចូលជារដ្ឋភាគីហត្ថលេខី នៃសេចក្តីថ្លែងការណ៍ សកម្មភាពសកល (WePROTECT) ដែលបានចុះហត្ថលេខា នៅឯកិច្ចប្រជុំកំពូល ជាសកលនៅទីក្រុងអាប៊ុយដាប៊ី កាលពីឆ្នាំ២០១៥ ដែលមានក្រសួងមហាផ្ទៃ ជាតួអង្គសម្របសម្រួល។ ជាងនេះទៅទៀត សម្ដេច ស ខេង លើកឡើងទៀតថា ការរីកចម្រើនផ្នែកបច្ចេកវិទ្យាព័ត៌មាន បានជំរុញដល់ការរីកលូតលាស់ ការងារ នយោបាយ សេដ្ឋកិច្ច និងសង្គមកិច្ច ដែលធ្វើឱ្យកម្ពុជា មានទំនាក់ទំនងជាមួយ បណ្តាប្រទេសក្នុងតំបន់ និងពិភពលោកថែមទៀតផង។ ស្របពេលនឹងវិបត្តិកូវីដ-១៩ កំពុងរាតត្បាតទូទាំងពិភពលោក ការប្រើប្រាស់ ប្រព័ន្ធបច្ចេកវិទ្យាព័ត៌មាន រឹតតែមានសារសំខាន់ ក្នុងការប្រាស្រ័យទាក់ទង និងដោះស្រាយគ្រប់បញ្ហា រួមទាំង ការសិក្សាអប់រំរបស់កុមារ និងយុវជន យុវនារី ទាំងនៅទីក្រុង ទាំងជនបទ ដែលធ្វើឲ្យវិស័យ បច្ចេកវិទ្យាព័ត៌មាននេះ រឹតតែទទួលបាននូវការពេញនិយមសម្រាប់ទំនាក់ទំនង និងអភិវឌ្ឍន៍លើគ្រប់វិស័យ។ជាមួយគ្នានោះដែរសម្ដេច បន្ថែមថា សកលភាវូបនីយកម្ម នៃបច្ចេកវិទ្យា និងព័ត៌មាន គឺជាមធ្យោបាយ ដ៏ស័ក្តិសិទ្ធមួយ ដែលធ្វើឲ្យប្រទេសជាតិទាំងឡាយ និងប្រជាជននៅលើពិភពលោកបានខិតជិតគ្នា និងអាចទំនាក់ទំនង សហការគ្នាយ៉ាងល្អប្រសើរ។សូមបញ្ជាក់ថា ក្នុងពិធីផ្សព្វផ្សាយនេះ មានការអញ្ជើញចូលរួមពីឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារ, ឯកឧត្តម លោកជំទាវ រដ្ឋមន្រ្តី ក្រសួងស្ថាប័នពាក់ព័ន្ធ, ឯកអគ្គរដ្ឋទូត ឯកអគ្គរាជទូតប្រចាំនៅកម្ពុជា, អនុប្រធាន សមាជិក សមាជិកា ក្រុមប្រឹក្សាជាតិកម្ពុជា ដើម្បីកុមារ, ឯកឧត្តម អគ្គស្នងការដ្ឋាននគរបាលជាតិ, អភិបាលនៃគណៈអភិបាលរាជធានីខេត្ត, តំណាងក្រសួងស្ថាប័ននិងអង្គការដៃគូអភិវឌ្ឍន៍ពាក់ព័ន្ធជាច្រើនតៀតផងដែរ៕អត្ថបទ បាន ចក់

កម្ពុជាសម្រេចផ្អាកបណ្តោះអាសន្ន ការធ្វើដំណើរចេញ-ចូលតាមច្រកព្រំដែនជាមួយវៀតណាម ដើម្បីទប់ស្កាត់ការរីករាលដាលនូវជំងឺកូវីដ១៩

ភ្នំពេញ ៖ ភ្លាមៗក្រោយពីមានចំណារឯកភាពពីសម្តេចតេជោហ៊ុន សែន នាយករដ្ឋមន្រ្តី ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៣ ខែកក្កដា ឆ្នាំ២០២១នេះ បានសម្រេចផ្អាកជាបណ្តោះអាសន្ន ក្នុងការធ្វើដំណើរចេញចូលតាមច្រកព្រំដែនជាមួយប្រទេសវៀតណាម ដើម្បីទប់ស្កាត់ការរីករាលដាលនូវជំងឺកូវីដ១៩។យោងតាមលិខិតរបស់ក្រសួងការបរទេស និងសហប្រតិបត្តិការអន្តរជាតិ ដែលបានផ្ញើទៅកាន់ស្ថានទូតកម្ពុជា ប្រចាំនៅប្រទេសវៀតណាម បានឲ្យដឹងថា ដើម្បីទប់ស្កាត់ការរីករាលដាលនៃជំងឺកូវីដ១៩ ចម្លងចូលមកប្រទេសកម្ពុជា រាជរដ្ឋាភិបាលកម្ពុជា បានសម្រេចផ្អាកជាបណ្តោះអាសន្នសម្រាប់ការធ្វើដំណើរចេញ-ចូលឆ្លងកាត់ព្រំដែនកម្ពុជា និងវៀតណាម របស់កម្មករជំនាញ អ្នកបច្ចេកទេស បុគ្គលិក ក្រុមហ៊ុននានារបស់វៀតណាម រយៈពេលមួយខែ ដោយអនុវត្តចាប់ពីថ្ងៃទី១៨ ខែកក្កដា ឆ្នាំ២០២១ ខាងមុខនេះ តទៅលើកលែងតែ អ្នកជំងឺដែលត្រូវទៅព្យាបាលនៅវៀតណាម អ្នកការទូត មន្រ្តីរាជការ ដែលមានបេសកកម្ម តាមការអញ្ជើញរបស់អាជ្ញាធរ នៃប្រទេសទាំងពីរ រួមទាំងនិស្សិត សិក្ខាកាម ដែលបានបញ្ចប់វគ្គសិក្សា ឬ ករណីមានការអនុញ្ញាតពិសេសរបស់រាជរដ្ឋាភិបាល។លិខិតបានបញ្ជាក់បន្ថែមទៀតថា ចំពោះបុគ្គលិក និងកម្មករជំនាញរបស់ក្រុមហ៊ុនវៀតណាមដែលបានចូលមកកម្ពុជារួចហើយ ទាំងអ្នកដែលធ្វើចត្តាឡីស័ករួច និងអ្នកដែលកំពុងធ្វើចត្តាឡីស័កមិនត្រូវបានអនុញ្ញាតឲ្យវិលត្រឡប់ទៅប្រទេសវៀតណាមវិញទេ ក្នុងអំឡុងពេលនៃការផ្អាកការចេញ និងចូលជាបណ្តោះអាសន្ននេះ។យោងតាមលិខិត បានស្នើឲ្យស្ថានទូតកម្ពុជា ប្រចាំនៅប្រទេសវៀតណាមធ្វើការសហការជាមួយអាជ្ញាធរវៀតណាម ដើម្បីស្នើឲ្យ អាជ្ញាធរនៃប្រទេសទាំងពីរជួយសម្របសម្រួលកិច្ចដំណើរការនៃការដឹកជញ្ជូននាំចេញ និងនាំចូលទំនិញនានា ដោយអនុវត្តឲ្យបានម៉ឺងម៉ាត់ តាមវិធានការសុខាភិបាលនៃប្រទេសទាំងពីរផងដែរ។វិធានការជាបណ្តោះអាសន្ន នៃការរឹតត្បិតការចូលមកកម្ពុជានេះ ដូចដែលមានចែងក្នុងកំណត់ទូត លេខ៧៣៤ ចុះថ្ងៃទី២៧ ខែមីនាឆ្នាំ២០២០របស់ក្រសួងការបរទេស និងសហប្រតិបត្តិការអន្តរជាតិ និងវិធានការផ្សេងៗ ដែលមានស្រាប់របស់កម្ពុជា នៅជាធរមានផងដែរ៕អត្ថបទ ៖ បាន ចក់

ខេត្តឧត្តរមានជ័យ ត្រៀមពង្រីក២មណ្ឌលចត្តាឡីស័ក ខណះមានពលករខ្មែរ សម្រុកចូលច្រើននៅព្រំដែន

ឧត្តរមានជ័យ ៖ អាជ្ញាធរខេត្តឧត្តរមានជ័យ ត្រៀមពង្រីកទីតាំងធ្វើចត្តាឡីស័ក ចំនួន២មណ្ឌល បន្ថែមលើជំរុំតង់ដែលមានស្រាប់ ក្នុងបរិវេណពហុកីឡដ្ឋានខេត្តបន្ថែមទៀត ខណះប្រជាពលករខ្មែរ បានសម្រុកវិលចូលមកស្រុកកំណើតច្រើន នៅច្រកអន្តរជាតិព្រំដែនអូរស្មាច់។នៅថ្ងៃទី១៤ខែកក្កដា ឆ្នាំ២០២១ ឯកឧត្ដម ប៉ែន កុសល្យ អភិបាលខេត្តឧត្ដរមានជ័យ នាយឧត្ដមសេនីយ៍ ខេង សុមេធ អគ្គស្នងការរង នៃអគ្គស្នងការ អគ្គស្នងការរដ្ឋាននគបាលជាតិ និងឯកឧត្ដម ហ៊ុន ម៉ានិត អគ្គនាយកស្រាវជ្រាវចារកិច្ចក្រសួងការពារជាតិ និងជាប្រធានអនុគណៈកម្មការគ្រប់គ្រងច្រកទ្វារចេញ-ចូលប្រទេស បានចុះត្រួតពិនិត្យទីតាំងសម្រាប់ត្រៀមធ្វើចត្តាឡីស័ក របស់បងប្អូនពលរដ្ឋខ្មែរចេញចូលថៃ ។លោក ឌី រ៉ាដូ អ្នកនាំពាក្យសាលាខេត្តឧត្តរមានជ័យ បានឲ្យដឹងថា មណ្ឌលចត្តាឡីស័កត្រៀមពង្រីកបន្ថែមនេះ គឺអាចដាក់ពលរដ្ឋខ្មែរចាកចេញពីប្រទេសថៃ វិលត្រឡប់មកស្រុកកំណើតតាមច្រកព្រំដែនអូរស្មាច់ បានប្រមាណចំនួន៣០០០នាក់បន្ថែមទៀត។លោក បញ្ជាក់ថា ខេត្តឧត្តរមានជ័យ ច្រកអូរស្មាច់ព្រំដែន ក្នុងអំឡុងដើមខែកក្កដា មកដល់បច្ចុប្បន្ន មានប្រជាពលរដ្ឋចូលនៅចន្លោះពីចំនួន៤០០នាក់ ទៅ៥០០នាក់ ក្នុងមួយថ្ងៃៗ។បច្ចុប្បន្នកំពុងសម្រាកធ្វើចត្តាឡីស័ក និងកំពុងសម្រាកព្យាបាលជំងឺឆ្លងកូវីដ១៩ សរុបជាងចំនួន៣០០០នាក់ផងដែរ៕អត្ថបទ ៖ ឃិន សារិទ្ធ

ឯកឧត្តម ស សុខា ផ្ដល់នូវសម្ភារៈបរិក្ខារការពារឆ្លងជំងឺកូវីដ១៩ ដល់រដ្ឋបាលខេត្តបាត់ដំបង

បាត់ដំបង៖ ឯកឧត្តម ស សុខា រដ្ឋលេខាធិការក្រសួងអប់រំយុវជន និងកីឡា និងលោកជំទាវ បានផ្ដល់នូវសម្ភារៈបរិក្ខារសុខាភិបាល ការពារឆ្លងជំងឺកូវីដ១៩ ដល់រដ្ឋបាលខេត្តបាត់ដំបង ខណៈដែលក្នុងខេត្តមួយនេះ នៅដើមខែកក្កដា ឆ្នាំ២០២១ នៅតែបន្តរកឃើញអ្នកវិជ្ជមានកូវីដ១៩ ក្នុងតួលេខខ្ពស់ប្រចាំថ្ងៃ ។ក្នុងឱកាសនាំយកសម្ភារៈបរិក្ខារៈ នៅថ្ងៃទី១៣ ខែកក្កដា ឆ្នាំ២០២១ ឯកឧត្តម ស សុខា មានប្រសាសន៍ថា សម្ភារៈប្រើប្រាស់សម្រាប់ការពារកូវីដ-១៩ គ្រឿងឧបភោគ សម្រាប់ជួយឧបត្ថម្ភនេះ ដើម្បីជួយសម្រាលដល់ការលំបាកខ្វះខាត ជាមួយរដ្ឋបាលខេត្តបាត់ដំបង ក្នុងការប្រយុទ្ធប្រឆាំងការពារជំងឺកូវីដ១៩ ដែលកំពុងតែឆ្លងរាតត្បាតចូលក្នុងសហគមន៍កាន់តែកើនឡើង ពីមួយថ្ងៃទៅមួយថ្ងៃ និងគួរឲ្យបារម្ភ ។ក្នុងពេលទទួលអំណោយ ឯកឧត្តម ងួន រតនៈ អភិបាលខេត្តបាត់ដំបង បានថ្លែងអំណរគុណចំពោះឯកឧត្តម និងលោកជំទាវ ព្រមទាំងសហការី ដែលបាននាំយកអំណោយទាំងអស់នេះ ដើម្បីជួយគាំទ្រការប្រយុទ្ធប្រឆាំងជំងឺកូវីដ-១៩ នៅក្នុងខេត្ត។ឯកឧត្តមអភិបាលខេត្តបាត់ដំបង សម្រាប់សម្ភារៈបរិក្ខារសុខាភិបាល និងអំណោយគ្រឿងឧបភោគបរិភោគទាំងនេះ និងផ្តល់ទៅកន្លែងមណ្ឌលព្យាបាលអ្នកជំងឺកូវីដ-១៩ បានប្រើប្រាស់ និងចែកដល់ប្រជាពលរដ្ឋ ដែលជួបការលំបាក និងខ្វះខាតខ្លាំងក្នុងជីវភាពប្រចាំថ្ងៃ ជាពិសេសពលរដ្ឋដែលរស់នៅតំបន់បិទខ្ទប់ និងមានការខ្វះខាតខ្លាំង ។គួរបញ្ជាក់ថា បន្ទាប់ពីផ្ដល់នូវបរិក្ខារសុខាភិបាល ដល់រដ្ឋបាលខេត្តបាត់ដំបង ឯកឧត្តម ស សុខា និងក្រុមការងារ ក៏បានអញ្ជើញចុះពិនិត្យទីតាំងកំពុងចាក់វ៉ាក់សាំងស៊ីណូហ្វាម ដល់ពលរដ្ឋ នៅក្នុងខេត្តបាត់ដំបងផងដែរ ៕អត្ថបទ ៖ បាន សុរិទ្ធ

លោកជំទាវកិត្តិសង្គហបណ្ឌិត ម៉ែន សំអន ផ្តល់សម្ភារៈប្រើប្រាស់ និងគ្រឿងឧបភោគ បរិភោគ ជូនដល់រដ្ឋបាលខណ្ឌពោធិ៍សែនជ័យ

ភ្នំពេញ ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញ បានអញ្ជើញប្រគល់សម្ភារៈប្រើប្រាស់ និងគ្រឿងឧបភោគបរិភោគដែលជាអំណោយរបស់ ឯកឧត្តម ហ៊ុន ម៉ានី និងក្រុមហ៊ុន Lixin Group ជូនដល់រដ្ឋបាលខណ្ឌពោធិ៍សែនជ័យ សង្កាត់មួយក្នុងខណ្ឌ និងសមាគមនារីដើម្បីសន្តិភាព និងអភិវឌ្ឍខណ្ឌពោធិ៍សែនជ័យ នៅថ្ងៃទី១៣ ខែកក្កដា ឆ្នាំ២០២១ ។ ក្នុងឱកាសនោះ លោកជំទាវកិត្តិសង្គហបណ្ឌិត ក៏បាននាំមកនូវប្រសាសន៍ផ្តាំផ្ញើការសាកសួរសុខទុក្ខ ពីសម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ផ្ញើជូនមន្ត្រីរាជការ និងប្រជាពលរដ្ឋប្រកបដោយក្តីនឹករលឹក និងការគិតគូរអំពីសុខទុក្ខនៅគ្រប់ទីកន្លែង និងបានថ្លែងនូវការកោតសសើរចំពោះការដឹកនាំ និងការគ្រប់គ្រងនៅក្នុងមូលដ្ឋានពោធិ៍សែនជ័យ ទទួលបានលទ្ធផលគួរជាទីមោទនៈ ។ លោកជំទាវកិត្តិសង្គហបណ្ឌិត ម៉ែន សំអន ក៏បានផ្តាំផ្ញើឲ្យរដ្ឋបាលខណ្ឌ និងអាជ្ញាធរពាក់ព័ន្ធត្រូវចូលរួមអនុវត្តតាមអានុសាសន៍របស់សម្តេចតេជោ ក្នុងចូលរួមក្នុងការទប់ស្កាត់ និងប្រយុទ្ធប្រឆាំងនូវការឆ្លងរីករាលដាលជំងឺកូវីដ១៩ ឲ្យមានប្រសិទ្ធិភាពខ្ពស់ នៅក្នុងស្ថានភាពដ៏លំបាកនាពេលនេះ ដើម្បីចូលរួមកាត់ផ្តាច់នៃការឆ្លង ដែលកើតចេញពីព្រឹត្តិការណ៍ ២០ កុម្ភៈ ឲ្យឆាប់បានវិលទៅរកស្ថានភាពធម្មតាវិញ ។លោកជំទាវ ក៏បានថ្លែងអំណរគុណដល់ថ្នាក់ដឹកនាំរដ្ឋបាលរាជធានីភ្នំពេញ អភិបាលខណ្ឌ និងអាជ្ញាធរពាក់ព័ន្ធគ្រប់លំដាប់ថ្នាក់ ជាពិសេស ក្រុមគ្រូពេទ្យសម្តេចតេជោ (TYDA) ក្រុមគ្រូពេទ្យស្ម័គ្រចិត្តរបស់ សម្តេចពិជ័យសេនា ទៀ បាញ់ និងក្រុមគ្រូពេទ្យស្ម័គ្រចិត្តរបស់ ឯកឧត្តម ហ៊ុន ម៉ានី ដែលបានបំពេញភារកិច្ចយ៉ាង សស្រាក់សស្រាំទាំងថ្ងៃ ទាំងយប់ក្នុងការអនុវត្តតាមបទបញ្ជារបស់រដ្ឋាភិបាល ។អំណោយដែលបានផ្តល់ជូន រដ្ឋបាលខណ្ឌពោធិ៍សែនជ័យ រួមមាន ៖ ១.ទឹកសុទ្ធ ៣០កេស ២.អង្ករ ២តោន ៣.មី ២០កេសតូច ៤.ទឹកត្រី ២០យួរ ៥.ទឹកស៊ីអ៊ីវ ២០យួរ ៦.ត្រីខ ៣កេស ៧.ម៉ាស់ ៣កេសធំ ៨.អាលកុល ២កាន ៩.អាវពេទ្យ (ការពារកូវីដ) ២៥០អាវ និងថវិកាមួយចំនួន។សង្កាត់មួយក្នុងខណ្ឌពោធិ៍សែនជ័យ រួមមាន ៖ ១.ទឹកសុទ្ធ ៥កេស ២.អង្ករ ១០០គីឡូក្រាម ៣.មី ២០កេសធំ ៤.ទឹកត្រី ៥យួរ ៥.ទឹកស៊ីអ៊ីវ ៥យួរ ៦.ត្រីខ ១កេស ៧.ម៉ាស់ ១កេសធំ ៨.អាលកុល ១កាន និងថវិកាមួយចំនួន។សមាគមនារីដើម្បីសន្តិភាព និងអភិវឌ្ឍខណ្ឌពោធិ៍សែនជ័យ រួមមាន ៖ ១. ម៉ាស់ ១កេស ២.ត្រីខ ១កេស ៣.អង្ករ ៥០គីឡូក្រាម ៤.ទឹកត្រី ២យួរ ៥.ទឹកស៊ីអ៊ីវ ២យួរ ៦.អាល់កុល ១កាន និងថវិកាមួយចំនួន ។ ចំណែកអំណោយមួយចំនួនទៀតរបស់សប្បុរសជនក៏ត្រូវបានផ្តល់ជូនរដ្ឋបាលខេត្តស្វាយរៀង ប្រើប្រាស់នៅក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ ផងដែរ ៕

សប្បុរសជនផ្ដល់គ្រឿងសម្ភារៈបរិក្ខារសុខាភិបាលជូនអាជ្ញាធរក្រុងសំរោង សំរាប់ប្រើប្រាស់ក្នុងយុទ្ធនាការចាក់វ៉ាក់សាំងជូនដល់ពលរដ្ឋ

ឧត្តរមានជ័យ ៖ គ្រឿងសម្ភារៈបរិក្ខារអនាម័យសុខាភិបាល ត្រូវបានផ្តល់ជូនអាជ្ញាធរក្រុងសំរោង ខណៈប្រជាពលរដ្ឋជាច្រើននាក់កំពុងសំរុកមកទទួលយកការចាក់វ៉ាក់សាំងការពារជំងឺឆ្លងកូវីដ-១៩ នៅតំបន់រដ្ឋាបាលក្រុងសំរោង ខេត្តឧត្តរមានជ័យ នាព្រឹកថ្ងៃទី១៣ កក្កដា ឆ្នាំ២០២១នេះ ។ក្នុងនោះលោក អ៊ុន សុភ័ក្រ អភិបាលក្រុងសំរោង បានសំដែងនូវការអរគុណយ៉ាងជ្រាលជ្រៅ ចំពោះលោក ជា កុយ ដែលជាម្ចាស់ក្រុមហ៊ុនអចលនទ្រព្យដីឡូតិ៍អូរព្រាល ដែលបានផ្តល់នូវសម្ភារៈអនាម័យសុខាភិបាលជាច្រើនមុខ ដើម្បីរួមចំណែកជួយដល់អាជ្ញាធរក្រុងក្នុងយុទ្ធនាការចាក់វ៉ាក់សាំងជូនដល់ប្រជាពលរដ្ឋនៅក្រុងសំរោង ដើម្បីបង្ការទប់ស្កាត់ការឆ្លងជំងឺកូវីដ-១៩។លោក បានបន្តទៀតថា ទាំងអស់នេះ គឺជាទឹកចិត្តមួយដ៏មានតម្លៃចំពោះក្រុមហ៊ុនឯកជនក្នុងស្រុក ក្នុងការរួមចំណែកជួយដល់រាជរដ្ឋាភិបាលកម្ពុជា ក្នុងអំឡុងពេលជួបវិបត្តិជំងឺកូវីដ-១៩នេះ។លោកអភិបាលក្រុង បញ្ជាក់ថា សម្ភារៈទាំងនេះគឺអាចជួយសម្រួលដល់ការផ្គត់ផ្គង់ដល់ក្រុមការងារគ្រូពេទ្យស្ម័គ្រចិត្តរបស់ឯកឧត្តម ហ៊ុន ម៉ានី នឹងប្រជាពលរដ្ឋដែលមកទទួលសេវាចាក់វ៉ាក់សាំងមាន ទឹកអាកុល មានម៉ាស នឹងមានម៉ាស៊ីនវ៉ាស់កំដៅ សំរាប់ប្រើប្រាស់ផងដែរ៕អត្ថបទ ៖ ឃិនសារិទ្ធ

សម្ដេចតេជោ ហ៊ុន សែន ប្រកាសថា កសិករវ័យ៧០ឆ្នាំម្នាក់នៅខេត្តឧត្តរមានជ័យជាបុគ្គលទី៥លានទទួលបានវ៉ាក់សាំង

ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា បុរសវ័យ ៧០ឆ្នាំម្នាក់នៅខេត្តឧត្តរមានជ័យ គឺជាបុគ្គលទី៥លាន ដែលទទួលបានវ៉ាក់សាំងបង្ការជំងឺកូវីដ-១៩។សម្ដេចតេជោ ហ៊ុន សែន បានប្រកាសឱ្យដឹងបែបនេះនៅលើទំព័រហ្វេសប៊ុកផ្លូវការរបស់សម្ដេចនៅថ្ងៃនេះ។សម្ដេចតេជោបញ្ជាក់ថា បុរសទី៥លានដែលទទួលបានវ៉ាក់សាំងនោះ គឺលោក ណុប មាន ជាកសិកររស់នៅភូមិសែនសំ ឃុំអូរស្វាយ ស្ថិតក្នុងស្រុកត្រពាំងប្រាសាទ ដែលទទួលបានវ៉ាក់សាំងនៅព្រឹកថ្ងៃនេះ។ប្រមុខរាជរដ្ឋាភិបាលឱ្យដឹងផងដែរថា កសិករវ័យ៧០ឆ្នាំរូបនេះ នឹងទទួលបានថវិកា ១០លានរៀល ដែលជាការឧបត្ថម្ភរបស់សម្ដេចតេជោ ហ៊ុន សែន។គិតមកត្រឹមថ្ងៃនេះ កម្ពុជាបានផ្ដល់វ៉ាក់សាំងបង្ការជំងឺកូវីដ-១៩ជូនប្រជាពលរដ្ឋទូទាំងប្រទេសបានចំនួនជាង ៥លាននាក់ហើយ ដែលស្មើនឹង ៥០ភាគរយនៃចំនួនប្រជាជន ១០លាននាក់ ដែលរាជរដ្ឋាភិបាលកំណត់គោលដៅសម្រាប់ចាក់វ៉ាក់សាំង៕

បណ្ដាញសង្គម

ព័ត៌មានថ្មីៗ

អ៊ីស្រាអែលបង្កើនការវាយប្រហារលើតំបន់ភាគខាងត្បូងលីបង់ បណ្តាលឲ្យមនុស្សយ៉ាងហោច ១៦នាក់ស្លាប់

រុស្ស៊ីចុះហត្ថលេខាលើកិច្ចព្រមព្រៀងតម្លៃ ១៦,៥ពាន់លានដុល្លារ ដើម្បីសាងសង់រោងចក្រថាមពលនុយក្លេអ៊ែរដំបូងនៅកាហ្សាក់ស្ថាន

រុស្ស៊ី៖ អឺរ៉ុបគួរបង្ហាញភ័ស្តុតាងពីអំណះអំណាងថាទីក្រុងមូស្គូរំខានសញ្ញា GPS

មន្ត្រីរុស្ស៊ី៖ គំនិតផ្តួចផ្តើមសន្តិភាពអ៊ុយក្រែន ជាមួយសហរដ្ឋអាមេរិក កំពុង «ជាប់គាំង»

ក្រុមហ៊ុន Temu របស់ចិនរងការផាកពិន័យ ២៣២លានដុល្លារ សម្រាប់ការបំពានច្បាប់លក់របស់ EU

ទីភ្នាក់ងារអាកាសធាតុអេស្ប៉ាញ ព្យាករសីតុណ្ហភាពខ្ពស់ខ្លាំងអំឡុងរដូវក្តៅ និងហានិភ័យភ្លើងឆេះព្រៃ

កូរ៉េខាងត្បូងធ្វើសមយុទ្ធបាញ់គ្រាប់ពិត ដើម្បីបញ្ជាក់ការជំរុញការការពារពឹងផ្អែកលើខ្លួនឯង

លោក Zelenskiy ៖ អ៊ុយក្រែនរៀបចំជំហានដឹរឹងមាំសម្រាប់យន្តហោះចម្បាំង Gripen

នាយករដ្ឋមន្រ្តីជប៉ុនលោកស្រី Takaichi ជួបពិភាក្សាការងារជាមួយប្រធានាធិបតីហ្វីលីពីននៅទីក្រុងតូក្យូ

កម្មករធ្វើផ្លូវនៅភាគនិរតីប្រទេសបារាំង ពិបាកស៊ូទ្រាំនឹងអាកាសធាតុក្តៅខ្លាំងអំឡុងខែឧសភា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ពលរដ្ឋនៅតាមបណ្ដាស្រុកនៃខេត្ដសៀមរាប ចាប់ផ្ដើមទទួលបានវ៉ាក់សាំងបង្ការកូវីដ១៩

ក្រសួងវប្បធម៌ បន្តស្រាវជ្រាវសម្ភារៈប្រើបា្រស់លក្ខណៈប្រពៃណីខ្មែរ

សម្តេចក្រឡាហោម ស ខេង ៖ ការកេងប្រវ័ញ្ចផ្លូវភេទ លើកុមារតាមប្រព័ន្ធអនឡាញជាទម្រង់ថ្មីបង្កហានិភ័យដល់កុមារ

ខេត្តឧត្តរមានជ័យ ត្រៀមពង្រីក២មណ្ឌលចត្តាឡីស័ក ខណះមានពលករខ្មែរ សម្រុកចូលច្រើននៅព្រំដែន

ឯកឧត្តម ស សុខា ផ្ដល់នូវសម្ភារៈបរិក្ខារការពារឆ្លងជំងឺកូវីដ១៩ ដល់រដ្ឋបាលខេត្តបាត់ដំបង

សម្ដេចតេជោ ហ៊ុន សែន ប្រកាសថា កសិករវ័យ៧០ឆ្នាំម្នាក់នៅខេត្តឧត្តរមានជ័យជាបុគ្គលទី៥លានទទួលបានវ៉ាក់សាំង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ពលរដ្ឋនៅតាមបណ្ដាស្រុកនៃខេត្ដសៀមរាប ចាប់ផ្ដើមទទួលបានវ៉ាក់សាំងបង្ការកូវីដ១៩

ក្រសួងវប្បធម៌ បន្តស្រាវជ្រាវសម្ភារៈប្រើបា្រស់លក្ខណៈប្រពៃណីខ្មែរ

ខេត្តឧត្តរមានជ័យ ត្រៀមពង្រីក២មណ្ឌលចត្តាឡីស័ក ខណះមាន​ពលករខ្មែរ សម្រុក​ចូល​​ច្រើន​នៅព្រំដែន

ឯកឧត្តម ស សុខា ផ្ដល់នូវសម្ភារៈបរិក្ខារការពារឆ្លងជំងឺកូវីដ១៩ ដល់រដ្ឋបាលខេត្តបាត់ដំបង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ខេត្តឧត្តរមានជ័យ ត្រៀមពង្រីក២មណ្ឌលចត្តាឡីស័ក ខណះមានពលករខ្មែរ សម្រុកចូលច្រើននៅព្រំដែន