នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុង​ការចូលរួ​ម​ដោះស្រាយ​បញ្ហារួម​សម្រាប់​ជាតិ
កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤
ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ
គម្រោងពង្រីក និងលើកកម្រិតផ្លូវជាតិលេខ៧ (ស្គន់-ក្រុងកំពង់ចាម) ជាបួនគន្លង សម្រេចលទ្ធផលការងារបានជិត ៩០%ហើយ គិតត្រឹមខែមីនា ឆ្នាំ២០២៦នេះ

នយោបាយ​ និង ការអភិវឌ្ឍន៍

ប្រធានក្រុមយុវជនសង្គមស៊ីវិល ថ្កោលទោសក្រុមដែលធ្វើវិទ្ធង្សនានយោបាយ ចំពោះលទ្ធផលបោះឆ្នោតនៅកម្ពុជា

2024/05/29 11:26:42 am        192
Facebook Telegram Linkin
ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធលោក ហេង សំណាង ប្រកាស​ថ្កោលទោស​ចំពោះក្រុមប្រឆាំង ពិសេសបណ្ដាញព័ត៌មានបរទេសនៅក្រៅស្រុកមួយចំនួនតូច ដែល​នៅតែបន្តយករឿងបោះឆ្នោតនៅកម្ពុជា ជាពិសេសការបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ ២០២៤នេះ កាលពីថ្ងៃទី២៦ ខែ​ឧសភា​កន្ល​ង​ទៅ​នេះ​។ ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធលោក ហេង សំណាង បាន​លើក​ឡើង​ថា ក្រុមអ្នកធ្វើនយោបាយប្រឆាំង ជាពិសេសទណ្ឌិតដែលកំពុងរត់ភៀសខ្លួន និង​វិទ្យុ​បរទេស​នៅ​ក្រៅស្រុ​ក ពួកគេតែងតែទាញយកព្រឹត្តិការណ៍នានារបស់កម្ពុជា ដូចជាករណី​បោះឆ្នោត​ជាដើម ទៅបង្កើតវិទ្ធង្សនានយោបាយតាមរូបភាពផ្សេង ដើម្បីតែកេញ​ចំណេញ​លើ​ការ​ធ្វើ​នយោបាយ​របស់ពួកគេតែប៉ុណ្ណោះ។លោកបានប្រកាសថ្កោលទោសចំពោះក្រុមប្រឆាំង និងវិទ្យុបរទេស​នៅក្រៅស្រុក​ដែល​ពួក​គេ​នៅ​តែ​បន្ត​ធ្វើ​វិទ្ធង្សនានយោបាយចំពោះលទ្ធផលបោះឆ្នោត ជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤នេះនៅកម្ពុជា។ លោកបន្តថា បច្ចុប្បន្ននេះ សម្ទុះនៃការ​យល់​ដឹងរបស់ប្រជាពលរដ្ឋអំពីការបោះឆ្នោត ឬចេនាអាក្រក់របស់ក្រុមប្រឆាំង គឺពលរដ្ឋ​បាន​យល់​ដឹង​យ៉ាង​ទូលំ​ទូលាយ ដូច្នេះការប៉ុនប៉ងវិទ្ធង្សនានយោបាយរបស់ក្រុមប្រឆាំង ដើម្បីតែបង្កើត​អស្ថិភាព​នយោបាយ និងភាពចលាចលនៅកម្ពុជានោះ គឺមិនទទួលបានជោគជ័យឡើយ។សូមជម្រាបថា បណ្ដាអង្គការសមាគមនៃបណ្តុំអង្គការសង្គមស៊ីវិលបានមើលឃើញថា ដំណើរ​ការ​បោះឆ្នោត​ជ្រើសរើស ក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ កាល​ពី​ថ្ងៃ​ទី២៦ ខែឧសភានេះគឺបានប្រព្រឹត្តទៅស្របតាមរដ្ឋធម្មនុញ្ញ និងច្បាប់នៃ​ព្រះរាជាណាចក្រ​កម្ពុជា​។ ការបោះឆ្នោតនេះបានដំណើរការទៅប្រកបដោយលក្ខណៈសេរីត្រឹមត្រូវ និងយុត្តិធម៌ ក្នុងបរិយាកាសអព្យាក្រឹត សន្តិសុខ របៀបរៀបរយគ្មានអំពើហិង្សា និងការ​គំរាម​កំហែង​ណាមួយ​កើត​ឡើង​ឡើយ។ តាមតួលេខបណ្តោះអាសន្ននៃអ្នកបោះឆ្នោតរបស់ គ.ជ.ប អ្នកបានទៅ​បោះឆ្នោត​សរុបមានចំនួន ១១.៥៩៨ នាក់ ស្មើនឹង ៩៩,៧៩ ភាគរយនៃ​អ្នក​មាន​ឈ្មោះ​ក្នុង​បញ្ជី​បោះឆ្នោត​ចំនួនសរុប ១១.៦២២ នាក់៕ 

រដ្ឋាភិបាលកោះតៃវ៉ាន់ នឹងបដិសេធកំណែទម្រង់សភាដែលពោពេញដោយជម្លោះ

2024/05/29 09:59:21 am        204
Facebook Telegram Linkin
គណៈរដ្ឋមន្ត្រីរបស់កោះតៃវ៉ាន់នឹងច្រានចោល និងបញ្ជូនត្រឡប់ទៅវិញសម្រាប់ការត្រួតពិនិត្យឡើងវិញចំពោះសំណើច្បាប់ ដែលក្រុមប្រឆាំងបានអនុម័តកាលពីថ្ងៃអង្គារ ទី ២៨ ឧសភា ស្តីពីកំណែទម្រង់សភា ដែលបាននាំមនុស្សរាប់ម៉ឺននាក់ចេញតវ៉ាតាមដងផ្លូវនានា និងការចោទប្រកាន់ពីការជ្រៀតជ្រែករបស់ចិន។សមាជិកសភាគណបក្សប្រឆាំង កំពុងព្យាយាមជំរុញដាក់ចេញនូវច្បាប់ដ៏ចម្រូងចម្រាសនេះ ដែលផ្តល់ឲ្យពួកគេនូវអំណាចស៊ើបអង្កេតកាន់តែច្រើនជាងមុន និងទប់ស្កាត់អំណាចរបស់មេដឹកនាំថ្មី លោក ឡៃ ឆឹង-ទ័រ (Lai Ching-te) ប្រកបដោយប្រសិទ្ធភាព។ការតវ៉ាដោយស្ងៀមស្ងាត់ និងពេលខ្លះមានការប្រឈមមុខដាក់គ្នាដោយហិង្សានៅក្នុងសភាជុំវិញការកែទម្រង់នេះ បាននិងកំពុងកើតឡើងប្រឆាំងនឹងស្ថានភាពគួរឲ្យព្រួយបារម្ភកាន់តែខ្លាំងអំពីកិច្ចខិតខំប្រឹងប្រែងរបស់ចិន ដែលចាត់ទុកតៃវ៉ាន់ជាទឹកដីរបស់ខ្លួន ដើម្បីជះឥទ្ធិពលគ្របសង្កត់លើនយោបាយកោះនេះ និងបំបែកបំបាក់មតិសាធារណៈរបស់កោះតៃវ៉ាន់។កំណែទម្រង់របស់សភាផ្តល់អំណាចដល់សមាជិកសភាក្នុងការស្នើសុំឱ្យយោធា ក្រុមហ៊ុនឯកជន ឬបុគ្គលនានាបញ្ចេញព័ត៌មានដែលចាត់ទុកថាពាក់ព័ន្ធដោយសមាជិកសភា ដែលមានអំណាចក្នុងការដាក់ទោសអ្នកដែលមិនសហការ។ វិធានការនេះនឹងពង្រីកសមត្ថភាពរបស់សមាជិកសភា ក្នុងការកោះអញ្ជើញមេដឹកនាំ ក្រុមហ៊ុន និងសូម្បីតែសាធារណជនទូទៅមកសាកសួរ។ ហើយច្បាប់នេះ ក៏នឹងផ្តល់ឲ្យពួកគេនូវលទ្ធភាពចូលប្រើប្រាស់ឯកសារសម្ងាត់ផងដែរ៕

មេដឹកនាំកូរ៉េខាងជើង ប្តេជ្ញាថានឹងមិនបោះបង់គម្រោងឈ្លបយកការណ៍អវកាសឡើយ

2024/05/29 09:45:01 am        118
Facebook Telegram Linkin
ប្រព័ន្ធផ្សព្វផ្សាយរដ្ឋបាននិយាយនៅថ្ងៃពុធ (២៩ ឧសភា) នេះថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បាននិយាយថា សមត្ថភាពឈ្លបយកការណ៍អវកាសមានសារៈសំខាន់ណាស់សម្រាប់ការការពារខ្លួនរបស់ជាតិប្រឆាំងនឹងការគំរាមកំហែងរបស់សត្រូវ ហើយប្រទេសនេះនឹងមិនបោះបង់ចោលការតស៊ូដើម្បីកាន់កាប់សមត្ថភាពនេះទេ។ការប៉ុនប៉ងរបស់កូរ៉េខាងជើង ក្នុងការបាញ់បង្ហោះផ្កាយរណបចារកម្មកាលពីថ្ងៃចន្ទ បានបរាជ័យ បន្ទាប់ពីយានជំរុញដំណាក់កាលដំបូងបានផ្ទុះនៅក្នុងការហោះហើរ។ លោក គីម បាននិយាយថា «ការមានផ្កាយរណបឈ្លបយកការណ៍យោធា គឺជាកិច្ចការសំខាន់មួយ ដើម្បីពង្រឹងការការពារជាតិ និងការពារអធិបតេយ្យភាព និងសន្តិសុខជាតិពីការគំរាមកំហែងដែលអាចកើតមាន ដោយសារតែសកម្មភាព និងការបង្កហេតុរបស់យោធាសហរដ្ឋអាមេរិក»។ទោះបីជាមានការបរាជ័យនេះក៏ដោយ ក្រុមអ្នកជំនាញបាននិយាយថា ការបាញ់បង្ហោះផ្កាយរណបចុងក្រោយបង្អស់ដោយកូរ៉េខាងជើង បង្ហាញពីការបោះជំហានថ្មីក្នុងការប្រណាំងប្រជែងអវកាសរបស់ប្រទេសប្រដាប់អាវុធនុយក្លេអ៊ែរមួយនេះ ជាមួយនឹងការប្រើប្រាស់ម៉ាស៊ីនថ្មីដែលបំពាក់ដោយអុកស៊ីសែនរាវ និងប្រេងឥន្ធនៈ។អ្នកជំនាញម្នាក់បាននិយាយថា ការរចនានេះបង្ហាញថា រុស្ស៊ី ប្រហែលជាបានផ្តល់ជំនួយក្នុងការសាងសង់យាននេះ ដោយហៅវាថាជា «ការលោតផ្លោះដ៏ធំមួយ»។ កូរ៉េខាងជើង និងរុស្ស៊ី បានធ្វើឱ្យប្រសើរឡើងយ៉ាងខ្លាំងនូវកិច្ចសហប្រតិបត្តិការយោធា ចាប់តាំងពីកិច្ចប្រជុំកំពូលរបស់ពួកគេកាលពីឆ្នាំមុនមក៕

លោក Putin ព្រមានលោកខាងលិច កុំអនុញាតឲ្យអ៊ុយក្រែនប្រើប្រាស់មីស៊ីលរបស់ខ្លួនវាយប្រហាររុស្ស៊ី

2024/05/29 08:00:42 am        220
Facebook Telegram Linkin
លោកប្រធានាធិបតីរុស្ស៊ី Vladimir Putin បានព្រមានលោកខាងលិចកាលពីថ្ងៃអង្គារសប្ដាហ៍នេះថា សមាជិកណាតូនៅអឺរ៉ុបកំពុងប្រលែងលេងជាមួយភ្លើង ដោយសារតែការស្នើឱ្យអ៊ុយក្រែនប្រើអាវុធរបស់លោកខាងលិច ដើម្បីវាយប្រហារចូលទៅជ្រៅក្នុងប្រទេសរុស្ស៊ី ដែលលោកបាននិយាយថាអាចបង្កឱ្យមានជម្លោះជាសកល។ បន្ទាប់ពីសង្គ្រាមលើដីដ៏សាហាវបំផុតរបស់រុស្ស៊ីនៅអឺរ៉ុបជាង២ឆ្នាំ ចាប់តាំងពីសង្គ្រាមលោកលើកទី២ មក លោក Putin បាននិយាយបង្កើនវោហារសាស្ត្រអំពីហានិភ័យនៃជម្លោះសកលលោកកាន់តែធំ នៅពេលលោកខាងលិចកំពុងដោះស្រាយអ្វីដែលរុស្ស៊ី កំពុងព្យាយាមវាយរុលទៅមុខនៅក្នុងប្រទេសអ៊ុយក្រែន។ អគ្គលេខាធិការសម្ព័ន្ធយោធាណាតូ លោក Jens Stoltenberg បានប្រាប់សារព័ត៌មាន The Economist ថាសមាជិកសម្ព័ន្ធភាពនេះ គួរតែអនុញ្ញាតឱ្យអ៊ុយក្រែនវាយលុកចូលជ្រៅទៅក្នុងប្រទេសរុស្ស៊ីដោយប្រើអាវុធរបស់លោកខាងលិច ដែលជាទស្សនៈគាំទ្រដោយសមាជិកណាតូមួយចំនួន ប៉ុន្តែមិនមានសហរដ្ឋអាមេរិកនោះទេ។ លោក Putin បានប្រាប់អ្នកសារព័ត៌មាននៅរដ្ឋធានី តាស្កិន(Tashkent) ប្រទេសអ៊ូសបេគីស្ថាន ថា ការរុញឥតឈប់ឈរអាចនាំឱ្យមានផលវិបាកធ្ងន់ធ្ងរ ។ប្រសិនបើផលវិបាកធ្ងន់ធ្ងរទាំងនេះកើតឡើងនៅអឺរ៉ុប តើសហរដ្ឋអាមេរិកនឹងធ្វើដូចម្តេច?។លោក Putin បាននិយាយថា ការវាយប្រហាររបស់អ៊ុយក្រែន ទៅលើប្រទេសរុស្ស៊ី ដោយប្រើអាវុធរយៈចម្ងាយឆ្ងាយ នឹងត្រូវការផ្កាយរណប ចារកម្ម និងជំនួយយោធាពីលោកខាងលិច ដូច្នេះលោកខាងលិចនឹងចូលរួមដោយផ្ទាល់។ លោកបាននិយាយថាការបញ្ជូនទាហានបារាំងទៅអ៊ុយក្រែននឹងជាជំហានមួយឆ្ពោះទៅរកជម្លោះពិភពលោក៕

សម្ដេចធិបតី ហ៊ុន ម៉ាណែត អនុញ្ញាតឱ្យប្រធានស្ថាបនិក សភាពាណិជ្ជកម្មត្រកូលលីន ពិភពលោក និងគណៈប្រតិភូជួបសម្ដែងការគួរសម និងពិភាក្សាការងារ

2024/05/28 04:29:07 pm        189
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នារសៀលថ្ងៃទី២៨ ខែឧសភា ឆ្នាំ ២០២៤នេះ អញ្ជើញជួបជាមួយ លោក Tan Sri Dato Lim Soon Peng ប្រធានស្ថាបនិក សភាពាណិជ្ជកម្មត្រកូលលីន ពិភពលោក និងគណៈប្រតិភូ ក្នុងជំនួបសម្ដែងការគួរសម និងពិភាក្សាការងារនៅវិមានសន្តិភាព ។សភាពាណិជ្ជកម្មត្រកូលលីន ពិភពលោក (WLCC) ត្រូវបានបង្កើតឡើងក្នុងឆ្នាំ 2011 នៅប្រទេសសិង្ហបុរី ក្រោមគំនិតផ្តួចផ្តើមរបស់លោក Tan Sri Dato Lim Soon Peng ជាប្រធានស្ថាបនិក ជាមួយសហស្ថាបនិកកិត្តិយស ០៦រូបផ្សេងទៀតដោយក្នុងនោះក៏មានជនជាតិខ្មែរម្នាក់ដែរ ។WLCC មានការិយាល័យនៅ សិង្ហបុរី ម៉ាឡេស៊ី មីយ៉ាន់ម៉ា កូរ៉េខាងត្បូង ឥណ្ឌូនេស៊ី កម្ពុជា ប៉ាពួញូហ្គីណេ វៀតណាម និងនៅក្នុងតំបន់ជាច្រើននៃប្រទេសចិន រួមមាន ហេណាន ប៉េកាំង ក្វាងទុង ក្វាងស៊ី ហ្វូជៀន ក្វានចូវ, ម៉ាកាវ, ហុងកុង ជាដើម ។WLCC កំពុងមានការអភិវឌ្ឍនៅកម្ពុជា ដែលនឹងក្លាយជាចំណែកមួយ ចូលរួមជាមួយរាជរដ្ឋាភិបាល ក្នុងការកៀរគរធុរជនឱ្យមកវិនិយោគនៅកម្ពុជាកាន់តែច្រើន៕

សម្ដេចតេជោ ហ៊ុន សែន ផ្ដល់ការឧបត្ថម្ភទ្រទ្រង់សមាគមសិល្បករខ្មែរ ១០ម៉ឺនដុល្លារ ក្នុង១ឆ្នាំរយៈពេល៥ឆ្នាំ

2024/05/28 04:19:30 pm        116
Facebook Telegram Linkin
ភ្នំពេញ៖ នៅព្រឹកថ្ងៃទី២៨ ខែឧសភា ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យប្រតិភូសមាគមសិល្បករខ្មែរ ដឹកនាំ​ដោយអ្នកឧកញ៉ា ម៉ៅ ចំណាន ចូលជួបសម្តែងការគួរសម នៅវិមាន ៧មករា រាជធានីភ្នំពេញ។ជាកិច្ចចាប់ផ្តើម សម្ដេចតេជោ ហ៊ុន សែន បានអបអរសាទរ អ្នកឧកញ៉ា ម៉ៅ ចំណាន ដែលបាន​ជាប់ឆ្នោត​ជាប្រធានសមាគមសិល្បករខ្មែរ ព្រមទាំង ស្វាគមន៍សមាជិកក្រុមប្រឹក្សាភិបាល​នៃសមាគមសិល្បករខ្មែរ ​និងលោកជំទាវបណ្ឌិតសភាចារ្យ ភឿង សកុណា ដែលបាន​ជួយជ្រោមជ្រែង​រៀបចំរចនាសម្ព័ន្ធសមាគម។អ្នកឧកញ៉ា ម៉ៅ ចំណាន បានគោរពថ្លែងអំណរគុណ សម្តេចតេជោ ​ដែលបានចំណាយពេលវេលាដ៏​មានតម្លៃ ទទួលជួប សមាជិកក្រុមប្រឹក្សាភិបាលនៃសមាគមសិល្បករខ្មែរ ដែលជាសារវិជ្ជមានមួយសម្រាប់សមាគម។ អ្នកឧកញ៉ា ម៉ៅ ចំណាន ក៏បានធ្វើរបាយការណ៍ជូនសម្តេចតេជោ អំពីសាវតាសង្ខេបរបស់សមាគម ដោយបានរំលឹកពីការគាំទ្រ និងជំនួយរបស់ សម្តេចតេជោ និង សម្តេចកិត្តិព្រឹទ្ធបណ្ឌិត ដល់សមាគម និង អំពីសកម្មភាពការងារសំខាន់ៗក្រោយការបោះឆ្នោតជ្រើរើសប្រធានសមាគម អាណត្តិទី៦ ដូចជាការរៀបចំក្រុមប្រឹក្សាភិបាល និងគណកម្មការប្រតិបត្តិសមាគម និងការរត្រៀមរៀបចំពិធីជួបជុំមហាគ្រួសារសិល្បករខ្មែរ ក្រោមអធិបតីភាពដ៏ខ្ពង់ខ្ពស់របស់​សម្តេចធិបតី នាយករដ្ឋមន្ត្រី នៅពេលខាងមុខ ព្រមទាំង ការរៀបចំមូលដ្ឋានរដ្ឋបាល កែសម្រួលលក្ខន្តិកៈ បទបញ្ជាផ្ទៃក្នុង និងការរៀបចំផែនការជាទស្សនវិស័យ និង ចក្ខុវិស័យនៃសមាគម ដើម្បីឧត្តមភាពនៃ សិល្បៈខ្មែរ ទាំងនៅលើឆាកជាតិ និង ឆាកអន្តរជាតិ។ អ្នកឧកញ៉ា ម៉ៅ ចំណាន បានគូសបញ្ជាក់ថា កិច្ចការនេះនឹងអនុញ្ញាតឱ្យសមាគមអាចសម្រេច​គោលដៅ​ដែលបានកំណត់ ដូចជា៖ ១ កិច្ចការអភិរក្ស ការពារ អភិវឌ្ឍ និង លើកស្ទួយសិល្បៈ និង វប្បធម៌ជាតិ។ ២ ការពារសិទ្ធិ និងផលប្រយោជន៍របស់សមាជិក ៣ ស្វែងរកសប្បុរសជន ដើម្បីជួយដល់សកម្មភាពសិល្បៈ និង កិច្ចការសង្គម, ៤ ប្រមូលកម្លាំងធនធានសិល្បករ ដើម្បីបម្រើសកម្មភាពសិល្បៈ និងកិច្ចការសង្គម និង ៥ រួមចំណែកលើកកម្ពស់សីលធម៌សង្គម និងក្រមសីលធម៌វិជ្ជាជីវៈរបស់សិល្បករ។ជាកិច្ចឆ្លើយតប សម្តេចតេជោ ប្រធានព្រឹទ្ធសភា បានកោតសរសើរចំពោះការរៀបចំសមាគម ចាប់ពីការបោះឆ្នោតជ្រើសរើសប្រធានថ្មី។ សម្តេច បានគូសបញ្ជាក់ថា ការកកើតឱ្យមានសមាគម គឺជារឿងល្អហើយ ក៏ប៉ុន្តែ ការធានានិរន្តរភាព ជាការលំបាក។ សម្តេច ជឿជាក់ថា នៅក្នុងអាណត្តិថ្មីនេះ សមាគមអាចជៀសផុតពីការលំបាកដែលកើតមានកន្លងមក តាមរយៈ ការរៀបចំរចនាសម្ព័ន្ធគ្រប់គ្រងឡើងវិញ និង ការពង្រឹងសីលធម៌របស់សិល្បករ សិល្បការិនី។ សម្តេចក៏បានរំលឹកអំពីដំណាក់កាលរស់ឡើងវិញនៃសិល្បៈ ចាប់ពីថ្ងៃ៧ មករា ឆ្នាំ១៩៧៩ និង ដំណាក់កាលប្រមូលទុន ធនធានមនុស្ស ដែលបានខិតខំជាបន្តបន្ទាប់ ជាពិសេស ក្រោយ ពេលកម្ពុជាបានសន្តិភាពពេញលេញដោយសារនយោបាយឈ្នះ-ឈ្នះ។ ចាប់ពីឆ្នាំ១៩៩៨មក ប្រទេសយើងវិវត្តដល់ដំណាក់កាលថ្មី គឺ ដំណាក់កាលអភិរក្ស និងអភិវឌ្ឍ។ សម្តេចបានលើកឡើងថា “យើងអភិរក្សរបស់មានស្រាប់ និង ខិតខំឆ្នៃប្រឌិតថ្មី។ សម្តេចបានគូសបញ្ជាក់ថា “ខ្មែរយើងរក្សាអត្តសញ្ញាណរបស់យើងបាន ដោយសារកាលពីសម័យបារាំង ទីអារាម និងព្រះបរមរាជវាំង គឺជាទីដែលរក្សាកេរដំណែល វប្បធម៌មរតកជាតិ ហើយទោះខ្មែរក្រហមបានបំផ្លាញយ៉ាងណាក្តី ក៏យើងបានគាស់យកមកវិញ នូវវប្បធម៌ និង សិល្បៈ ដូចជា ពិធីអាពាហ៍ពិពាហ៍ ...។ ការការពារសិល្បៈ និង វប្បធម៌ គឺជាកាតព្វកិច្ចរបស់យើង។” សម្តេចតេជោបានផ្តល់អនុសាសន៍ឱ្យរកវិធីសាស្ត្រជួយពង្រឹងតួនាទីរបស់សិល្បករសម្រាប់រយៈពេលវែង ដូចជា ជួយដល់ការបណ្តុះបណ្តាលកូនសិល្បករ ហើយ នៅពេលរៀនចប់ ជួយពួកគេក្នុងការរកការងារធ្វើ។ “យើងចង់បណ្តុះបណ្តាល កុំឱ្យសិល្បករខ្វះអ្នកបន្តវេន ឬ អ្នកទ្រទ្រង់ជំនាន់ក្រោយ។ សមាគម គួររៀបចំវគ្គបណ្តុះបណ្តាលខ្លីៗ លើជំនាញនីមួយ រួមទាងប្រធានបទក្រមសីលធម៌វិជ្ជាជីវៈ”។សម្តេចតេជោ បានណែនាំឱ្យ ពិនិត្យលក្ខខណ្ឌឡើងវិញ ដើម្បីរក្សានូវតម្លៃសិល្បករ សិល្បការិនីរបស់យើង។ ក្រសួងវប្បធម៌ និងវិចិត្រសិល្បៈ ត្រូវពិនិត្យកំណត់លក្ខណវិនិច្ឆ័យ ហើយ សមាគមយកទៅអនុវត្ត។ សកម្មភាពសង្គម សេដ្ឋកិច្ច ឆ្លុះបញ្ចាំងតាមសកម្មភាពវប្បធម៌។ ក្រសួងវប្បធម៌ ត្រូវជំរុញឱ្យមានការកសាងក្របខ័ណ្ឌ បែបបទគតិយុត្តសមាគម ឱ្យបានគ្រប់គ្រាន់ ដូចសុភាសិតមួយចែង ថា “បើឈរមិនទាន់រឹង កុំរត់”។ ក្រសួងវប្បធម៌ ត្រូវគិតការកត់ត្រាទុក មូដសំលៀកបំពាក់ខ្មែរ តាមជំនាន់នីមួយៗ។ ការកែឆ្នៃថ្មី ត្រូវអនុញ្ញាតដល់កម្រិតណាមួយ និង ត្រូវចុះបញ្ជីទាំងអស់។ ការចុះបញ្ជី គឺ កុំឱ្យកូនចៅជំនាន់ក្រោយ ច្រឡំ។ នេះហើយជា ការអភិរក្ស ដើម្បី អភិវឌ្ឍ និង ការអភិវឌ្ឍ ដើម្បីអភិរក្ស។ ប្រទេសមួយ រីកលូតលាស់ ទាល់តែមានគ្រប់វិស័យលូតលាស់ រួមទាំង សិល្បៈ។ជាការទ្រទ្រង់ដល់សមាគម សម្តេចតេជោ បានអំពាវនាវដល់បណ្តាញផ្សព្វផ្សាយក្នុងស្រុក ឱ្យមានក្រុមផលិត ផ្សព្វផ្សាយសកម្មភាពរបស់សមាគម រួមទាំង តាមវែបសាយ Youtube TikTok ...។ល។ ជាមួយគ្នានេះដែរសម្តេចតេជោ បានសម្រេចជួយឧបត្ថម្ភទ្រទ្រង់ សមាគមសិល្បករខ្មែរ ចំនួន ១០ ម៉ឺនដុល្លារអាមេរិកក្នុង១ឆ្នាំ ក្នុងរយៈពេល ៥ឆ្នាំ ចាប់ពីឆ្នាំ២០២៤នេះតទៅ៕

ព្រះមហាក្សត្រស្តេច យាងជាព្រះរាជាធិបតីដ៏ខ្ពង់ខ្ពស់បំផុត ពិធីអបអរសាទររំលឹកខួប២០ឆ្នាំ របស់អង្គការមូលនិធិកុមារកម្ពុជា

2024/05/28 04:05:57 pm        136
Facebook Telegram Linkin
ភ្នំពេញ៖ នៅថ្ងៃទី២៨ ខែឧសភា ឆ្នាំ២០២៤ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុតក្នុងពិធីរំលឹកខួប២០ឆ្នាំ របស់អង្គការមូលនិធិកុមារកម្ពុជា (ហៅកាត់ថា ស៊ីស៊ីអេហ្វ)។ព្រះករុណាព្រះមហាក្សត្រ បានមានព្រះរាជបន្ទូល កោតសរសើរដល់ស៊ីស៊ីអេហ្វ​សម្រាប់​កិច្ចខិតខំប្រឹងប្រែងក្នុងការលើកកម្ពស់ជីវភាពរស់នៅរបស់កុមារ និងគ្រួសារក្នុងសហគមន៍ក្រីក្រក្នុងប្រទេសកម្ពុជា។ក្នុងមហាព្រឹត្តិការណ៍នេះ ក៏មានព្រះវត្តមានដ៏ខ្ពង់ខ្ពស់របស់ សម្តេចព្រះអភិសិរីសុគន្ធាមហាសង្ឃ​រាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ សម្តេចរាជបុត្រីព្រះអនុជ នរោត្តម អរុណរស្មី ​ ព្រមទាំង ឯកឧត្តម លោកជំទាវ តំណាងក្រសួងនានា អង្គទូត លោក លោកស្រី អ្នកនាង កញ្ញា ភ្ញៀវកិត្តិយសជាតិនិងអន្តរជាតិ លោកគ្រូ អ្នកគ្រូ សិស្សានុសិស្ស​ និងបងប្អូនប្រជាពលរដ្ឋសហគមន៍ស្ទឹងមានជ័យ បានអញ្ជើញចូលរួម​យ៉ាងច្រើន​កុះករប្រមាណ ៥០០នាក់ ដើម្បីអបអរដំណើរវិថីដ៏អស្ចារ្យ របស់អង្គការមូលនិធិកុមារកម្ពុជា ដែលបានបង្កើតឡើងចាប់តាំងពីឆ្នាំ២០០៤។ ពិធីរំលឹកខួប ២០ឆ្នាំនេះបានប្រារព្ធធ្វើឡើងនៅសាលានីសិនគ្រីបអាខាដេមី​ដែលជា​អគារសិក្សាថ្នាក់អនុវិទ្យាល័យ និងវិទ្យាល័យរបស់ស៊ីស៊ីអេហ្វ។នៅក្នុងឱកាសដ៏មហានក្ខត្តឬក្សថ្លៃថ្លានេះ ​ព្រះករុណាព្រះមហាក្សត្រ បានមានព្រះរាជបន្ទូលថា «ខ្ញុំសូមថ្លែងអំណរគុណ និងកោតសរសើរចំពោះ អង្គការមូលនិធិកុមារកម្ពុជា និងលោកគ្រូ អ្នកគ្រូ មន្ត្រី បុគ្គលិកទាំងអស់ ​ដែលបានចំណាយកម្លាំងកាយចិត្ត ខិតខំជួយអប់រំ ​ថែបំប៉នកុមារា កុមារី ដូចជាកូន​របស់ខ្លួនបង្កើត ​ដែលនាំឱ្យចៅៗទទួលបានភាពកក់ក្តៅក្នុងជីវិត ​ព្រមទាំងទទួលបាន នូវសីលធម៌ ប្រពៃណី​ និងចំណេះវិជ្ជាផ្សេងៗសម្រាប់ជាមធ្យោបាយក្នុងការរស់នៅក្នុងសង្គម»។ព្រះករុណាព្រះមហាក្សត្រ ​បានមានព្រះរាជបន្ទូលបន្តថា៖ «ខ្ញុំសូមអរគុណលោក ស្កុត នីសិន ស្ថាបនិក និងជា នាយកប្រតិបត្តិ អង្គការមូលនិធិកុមារកម្ពុជា ដែលបានជួយដល់កុមារកម្ពុជាកំព្រា ក្រីក្រខ្វះខាតរាប់ពាន់នាក់ ​ជារៀងរាល់ឆ្នាំ​ ឱ្យទទួលបានចំណេះដឹងជាច្រើន ​តាមរយៈការអប់រំ ការថែទាំនិងគាំទ្រដល់សហគមន៍​ ការបណ្តុះបណ្តាល វិជ្ជាជីវៈ »។ព្រះករុណា បានមានព្រះរាជបន្ទូលទៀតថា កូនសិស្សមួយចំនួនដែលរៀនបញ្ចប់ពីសាលានេះ មាន​ការងារធ្វើជា មន្រ្តីរាជការ ឬប្រកបការងារក្នុងវិស័យឯកជន រីឯសិស្សផ្សេងទៀតបានទៅប្រឡង​យកអាហា​រូបករណ៍​ទៅរៀនបន្ត ​នៅបរទេស ដើម្បីយកជំនាញឯកទេសឧត្តមសិក្សាណាមួយ​ធ្វើឱ្យជីវភាព​ក្នុងគ្រួសារបានធូរស្រាលល្អជាងមុន។ ទាំងនេះជាសកម្មភាពដ៏ល្អប្រពៃថ្លៃថ្លា របស់​អង្គការមូលនិធិកុមារកម្ពុជា ​ដែលបានចូលរួមជាមួយរាជរដ្ឋាភិបាលកម្ពុជា ក្នុងការ ជួយកសាង​ធនធានមនុស្ស ដែលជាកត្តាចម្បងបំផុត សម្រាប់ការអភិវឌ្ឍសង្គមជាតិកម្ពុជា។មុនបញ្ចប់ព្រះរាជសុន្ទរកថា ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃ​ ព្រះរាជាណាចក្រកម្ពុជា ​ជាទីគោរពសក្ការ:ដ៏ខ្ពង់ខ្ពស់បំផុត បានមានព្រះរាជ​បន្ទូលថា ទិដ្ឋភាពគួរឱ្យចងចាំនាឱកាសដ៏ ​ថ្លៃថ្លានេះ ​ជាការលើកទឹកចិត្តដល់ចៅៗកុមារា កុមារី​ទាំងឡាយ ​ដែលអាចនាំចៅៗសម្រេចបានជោគជ័យនៅពេល អនាគត ​គឺជាទំពាំងស្នងឬស្សី ជាពលរដ្ឋល្អនៃសង្គមជាតិ ស្របតាមគោលការណ៍អប់រំថ្មី គឺ កូនល្អ សិស្សល្អ និង ពលរដ្ឋល្អ។ឆ្លៀតក្នុងឱកាសដ៏មហានក្ខត្តឬក្សនេះ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឫទ័យប្រោសព្រះរាជទាននូវគ្រឿង​ឥស្សរិយយសដល់ថ្នាក់ដឹកនាំនិងម្ចាស់ជំនួយរបស់អង្គការមូលនិធិកុមារកម្ពុជា ដែលបាន​ចូលរួមក្នុងការសម្រេចបាននូវសមិទ្ធផលធំធេងជាច្រើន​ នាពេលកន្លងមក។ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ស្តេចយាង​ទតសាលានីសិនគ្រីប​អាខាដេមី​ ដែលនៅក្នុងនោះ​មានការដាក់តាំងពិព័រណ៍នានា​ដែលជាស្នាដៃ​របស់សិស្សស៊ីស៊ីអេហ្វ រួមមានពិព័រណ៍​ស្តីអំពី វិទ្យាសាស្រ្ត បច្ចេកវិទ្យា សិល្បៈនិងការច្នៃប្រឌិត គំនូរជីវចល និង កំណាព្យភាសាខ្មែរជាដើម។លោកស្កុតបានគូសបញ្ជាក់ថា៖ «សាលានីសិនគ្រីបអាខាដេមី គឺជា តឹកតាងដ៏អស្ចារ្យមួយបង្ហាញ​ពីភាព​ផ្លាស់ប្ដូរ។ ​ទីកន្លែងមួយនេះ ដើមឡើយគឺជាដីវាលចាក់សម្រាមស្មោកគ្រោក បានប្រែ​មកជាអាគារដ៏ធំសម្បើមមួយដែលក្លាយជាតំណាងនៃក្ដីសង្ឃឹមសម្រាប់សហគមន៍»។ជាចុងក្រោយលោកស្កុត បានមានប្រសាសន៍បន្តទៀតថា៖ «បើសម្លឹងមើលទៅអនាគត ខ្ញុំមាន​សេចក្តីរំភើបចំពោះ ឱកាសល្អៗជាច្រើនដែលនឹងអាចកើតឡើងតាមរយៈការពង្រីក​ការផ្លាស់ប្តូរ​ជាវិជ្ជមាន និងការចែករំលែកចំនេះដឹងរបស់ពួកយើង ដើម្បីបន្តផ្ដល់ជាប្រយោជន៍ដល់ក្មេងៗ និងមនុស្សជាច្រើននាក់​ទៀតដែលត្រូវការជំនួយ»។គួរបញ្ជាក់ផងដែរថា ប្រមាណជាង ៧០% នៃនិស្សិតដែលជាកុមារស៊ីស៊ីអេហ្វដំបូងគេ បាន​ឆ្លងកាត់ថ្នាក់​ឧត្តមសិក្សា ​និងអភិវឌ្ឍន៍​អាជីពជោគជ័យ ហើយភាគច្រើន​កំពុងប្រឹងប្រែងជួយគ្រួសារ​របស់ពួកគេអោយចេញផុតពីភាពក្រីក្រ។ ​មកទល់ពេលនេះ អង្គការបានជួយទំនុកបម្រុងកុមារ​ប្រមាណ ៤.៣០០នាក់ ​អោយទទួលបានការអប់រំ ​និងសេវាជំនួយ ​សហគមន៍នានាប្រកប​ដោយគុណភាព៕

បារាំង នឹងបញ្ជូនទ័ពទៅអ៊ុយក្រែន ដើម្បីបណ្តុះបណ្តាលទាហាននៅទីនោះ

2024/05/28 02:43:36 pm        141
Facebook Telegram Linkin
មេបញ្ជាការជាន់ខ្ពស់របស់ទីក្រុងគីវ បាននិយាយកាលពីថ្ងៃចន្ទថា ប្រទេសបារាំង នឹងចាប់ផ្តើមបញ្ជូនកងទ័ពឆាប់ៗនេះ ដើម្បីបណ្តុះបណ្តាលកងកម្លាំងអ៊ុយក្រែន នៅក្នុងប្រទេសដែលហែកហួរដោយសង្រ្គាម នេះ។លោកឧត្តមសេនីយ៍ Oleksandr Syrskyi បានអះអាងថា ឯកសារ ត្រូវបានចុះហត្ថលេខា ដើម្បីអនុញ្ញាតឲ្យគ្រូយោធាបារាំង ធ្វើទស្សនកិច្ចនៅមជ្ឈមណ្ឌលហ្វឹកហ្វឺនអ៊ុយក្រែន បន្ទាប់ពីពិភាក្សាជាមួយរដ្ឋមន្ត្រីការពារជាតិបារាំងលោក Sebastien Lecornu។លោកឧត្តមសេនីយ៍ Syrskyi បានសរសេរនៅលើកម្មវិធីផ្ញើសារ Telegram ថា៖«ខ្ញុំស្វាគមន៍គំនិតផ្តួច ផ្តើមរបស់ប្រទេសបារាំងក្នុងការបញ្ជូនគ្រូទៅអ៊ុយក្រែន ដើម្បីបណ្តុះបណ្តាលបុគ្គលិកយោធាអ៊ុយក្រែន»។«ខ្ញុំបានចុះហត្ថលេខារួចហើយនូវឯកសារដែលនឹងអនុញ្ញាតឲ្យគ្រូជនជាតិបារាំងដំបូងគេមកទស្សនកិច្ច ជ្ឈមណ្ឌលបណ្តុះបណ្តាលរបស់យើង ក្នុងពេលឆាប់ៗនេះ ដើម្បីឲ្យដឹងច្បាស់ពីហេដ្ឋារចនាសម្ព័ន្ធ និងបុគ្គលិករបស់ពួកគេ។«ខ្ញុំជឿថា ការប្តេជ្ញាចិត្តរបស់ប្រទេសបារាំង នឹងលើកទឹកចិត្តដៃគូផ្សេងទៀតឲ្យចូលរួមក្នុងគម្រោងដ៏សំខាន់នេះ»។អគ្គមេបញ្ជាការអ៊ុយក្រែន មិនបានផ្តល់ព័ត៌មានលម្អិតអំពីការដាក់ពង្រាយគ្រូបណ្តុះបណ្តាលរបស់បារាំងដំបូងឡើយ។

ក្លឹបអ្នកកាសែតកម្ពុជាដឹកនាំសារព័ត៌មាន៣០ស្ថាប័ន ចុះផ្សព្វផ្សាយពីសក្តានុពលទេសចរណ៍នៅភ្នំបូកគោ

2024/05/28 02:24:33 pm        145
Facebook Telegram Linkin
ក្លឹបអ្នកកាសែតកម្ពុជាដែលមានលោក ពុយ គា ជាប្រធាន នាថ្ងៃទី២៨ ខែឧសភា ឆ្នាំ ២០២៤ នេះ បានដឹកនាំអ្នកសារព័ត៌មានចំនួន ៣០ ស្ថាប័ន ធ្វើដំណើរមកកាន់ទីក្រុងបូកគោ ក្នុងខេត្តកំពត ដើម្បីផ្សព្វផ្សាយពីសក្តានុពលទេសចរណ៍ដ៏សម្បូរបែបនៅទីនេះ។លោក ពុយ គា ប្រធានក្លឹបអ្នកកាសែតកម្ពុជា បានលើកឡើងថា «កន្លងមកអ្នកទេសចរ​ទាំងក្នុង​ប្រទេស និងអន្តជាតិ កាលណាចង់ធ្វើដំណើរទេសចរណ៍តែងគិតភ្លាមទៅដល់ទឹកដី​នៃ​ខេត្តសៀមរាប នឹកឃើញដល់ប្រាសាទអង្គរវត្ត ឬមួយក៏ទៅនៅតំបន់ឆ្នេរសមុទ្រដូចជា ខេត្តព្រះសីហនុ ខេត្តកំពត និងខេត្តកែបជាដើម។ក្លឹបអ្នកកាសែតកម្ពុជាចង់បង្ហាញថា តំបន់ទេសចរណ៍នៅកម្ពុជា​មានច្រើនណាស់ ហើយនៅ​ចំពោះមុខ​នៃ​បម្រែបម្រួលអាកាសធាតុអាកាសធាតុក្តៅដែលកំពុងជួបប្រទះ កម្ពុជាយើងក៏មាន​ជម្រើស​រកតំបន់ទេសចរណ៍​ដែលមានអាកាសធាតុត្រជាក់រហូតដល់បីតំបន់តំបន់៖ ទីមួយ ភូមិភាគឦសាននៃប្រទេសកម្ពុជា នៅលើទឹកដីខេត្តមណ្ឌលគិរី។ ទីពីរ គីរីរម្យក្នុងខេត្តកំពង់ស្ពឺ។ ទីបី ទីក្រុងបូកគោ ដែលមានរហូតដល់បីរដូវក្នុងមួយថ្ងៃ មានន័យថា ក្តៅ ត្រជាក់ និងធ្លាក់អ័ព។ អ្នកសារព័ត៌មានអាចជួយផ្សព្វផ្សាយដើម្បីផ្ដល់ជម្រើសឱ្យអ្នកទេសចរទាំងក្នុងស្រុកនិងអន្តរជាតិបានដឹង។» ។តាមការគ្រោងទុក ដំណើរទស្សនកិច្ចអ្នកសារព័ត៌មានមកកាន់ ​ក្រុងបូកគោ ខេត្តកំពត នឹងធ្វើឡើង​រយៈពេល ៣ ថ្ងៃ ចាប់ពីថ្ងៃទី ២៨-៣០ ​ខែឧសភា ឆ្នាំ២០២៤។ រយៈពេល ៣ ថ្ងៃនេះ អ្នកសារព័ត៌មាន​ចម្រុះស្ថាប័ន នឹងត្រូវទៅទស្សនកិច្ចនៅ​រមណីយដ្ឋាន​ទេសចរណ៍ធម្មជាតិ​ និងប្រវត្តិសាស្ត្រសំខាន់ ៗ ជាច្រើនកន្លែង ​ព្រមទាំងទីតាំងបង្កើតថ្មីជាច្រើនកន្លែងផ្សេងទៀត​ ក្នុងនោះ​មានដូចជា ទឹកធ្លាក់​ពពកវិល សំណង់បុរាណ ការដ្ឋាននៃសំណង់អភិវឌ្ឍន៍លើភ្នំបូកគោ​ ក៏ដូចជាកសិដ្ឋានបន្លែធម្មជាតិ និងចំការស្ត្រប័ររី ​ជាដើម៕ អត្ថបទ៖ ចេន សុភានាថ

និយ័តករមូលបត្រកម្ពុជា ពង្រីកការផ្សព្វផ្សាយព័ត៌មានផ្សារហ៊ុនដល់សិស្សនិស្សិត ដើម្បីបញ្ចៀសការចាញ់បោកជនខិលខូច

2024/05/28 02:14:38 pm        742
Facebook Telegram Linkin
និយ័តករមូលបត្រកម្ពុជា (ន.ម.ក.) និងក្រុមហ៊ុនមូលបត្រ អេស៊ីលីដា ម.ក បានសហការ​ដើម្បី​រៀបចំ​វគ្គបណ្តុះបណ្តាលវិនិយោគិនជូនដល់យុវជន សិស្សនិស្សិត ក្នុងគោលបំណងផ្សព្វផ្សាយ​ឲ្យបាន​ទូលំទូលាយ​អំពីទីផ្សារមូលបត្រ ​និងដើម្បីបញ្រ្ជាបការយល់ដឹងដល់សាធារណជន សម្រាប់ធ្វើការ​ត្រិះរិះ វិភាគ តាមដានអំពីការវិនិយោគឲ្យបានត្រឹមត្រូវនិងស្របច្បាប់។ឯកឧត្តម កែប សំភី ប្រធាននាយកដ្ឋានត្រួតពិនិត្យទីផ្សារមូលបត្រ​ នៃនិយ័តករមូលបត្រកម្ពុជា ន.ម.ក. នៅ​ក្រោយពិធីបើកវគ្គបណ្តុះបណ្តាលវិនិយោគិនស្តីពី “ការវិនិយោគឆ្លាតវៃ” ជូនដល់និស្សិត​នៃវិទ្យាស្ថានពហុបច្ចេកទេស ព្រះកុសុមៈ នាព្រឹកថ្ងៃទី២៨ ​ខែឧសភានេះ បានមានប្រសាសន៍​ប្រាប់ព័ត៌មាន ប៊ីធីវី ឲ្យដឹងថា ​គិតមកដល់ពេលនេះ ជាលើកទី៦ហើយដែលបានរៀបចំវគ្គ​សិក្ខាសាលានេះ​ឡើង ដើម្បីផ្តល់​នូវការយល់ដឹងតែមួយគត់ដល់សាធារណជនជំនាន់​ក្រោយ​អំពី​ប្រភេទ​ទីផ្សារមូលបត្រ ​ការវិភាគលើការវិនិយោគនៅក្នុងទីផ្សារ ការស្វែង​យល់ពីក្រុមហ៊ុន​បោះផ្សាយ​ក្នុងស្រុក និង​តួ​អង្គពាក់ព័ន្ធ​ដែលមាន​អាជ្ញា​បណ្ណត្រឹមត្រូវពីនិយ័តករមូលបត្រកម្ពុជា។ លោកបានបញ្ជាក់ថា ​វគ្គបណ្តុះបណ្តាលនេះដែរ គឺ​ដើម្បីបញ្រ្ជាបការយល់ដឹងឲ្យកាន់តែច្រើន​បន្ថែមទៀត ​និងដើម្បីបង្ការការឆបោកតាមប្រព័ន្ធបច្ចេកវិទ្យា ​ខណៈនៅតែមានជនទុច្ចរិតមួយចំនួន​ខិតខំ​ទាក់ទាញ​ការវិនិយោគិនក្នុងការវិនិយោគដោយសន្យាថា ផ្តល់ប្រាក់ចំណេញខ្ពស់​ក្នុងរយៈពេលខ្លី ដែលជនទាំងនោះ​មិនមែនជាក្រុមហ៊ុនដែលមានអាជ្ញាបណ្ណត្រឹមត្រូវតាមច្បាប់។លោកស្រី ម៉ៅ ភិរក្ស នាយិកាប្រតិបត្តិការក្រុមហ៊ុនមូលបត្រ អេស៊ីលីដា ម.ក ​បានលើកឡើងថា ដើម្បី​ចៀសវាង​ការចាញ់បោកគេតាមប្រព័ន្ធអនឡាញ វិនិយោគិនថ្មីទាំងអស់ត្រូវបង្កើនការប្រុង​ប្រយ័ត្នឲ្យបានខ្ពស់ ក្នុងការបើកគណនីជួញដូរភាគហ៊ុន ឬឧបករណ៍ជួញដូរហិរញ្ញវត្ថុផ្សេងៗ ជាមួយអ្នកផ្សព្វផ្សាយតាមប្រព័ន្ធអនឡាញ ដែលងាយជាប់អន្ទាក់ឆបោកពីសំណាក់ជន​ខិលខូច​មួយចំនួន​ក្នុងវិស័យមូលបត្រនេះ។គិតមកដល់បច្ចុប្បន្ននេះ ផ្សារមូលបត្រកម្ពុជា មានក្រុមហ៊ុនចុះបញ្ជីសរុបចំនួន២២ ដែលក្នុងនោះ​រួមមាន​ក្រុមហ៊ុនចុះបញ្ជីមូលបត្រកម្មសិទ្ធិនៅទីផ្សារគោលចំនួន៩​ ទីផ្សារកំណើនចំនួន២ និង​ក្រុមហ៊ុន​ចុះបញ្ជីមូលបត្របំណុលចំនួន១១។​ ក្រុមហ៊ុនទាំង២២នេះ បានប្រមូលទុនពីការ​បោះផ្សាយមូលបត្រសរុបប្រមាណ ៣៧៩លានដុល្លារអាម៉េរិក។ ដោយឡែក គិតត្រឹមត្រីមាសទី១ ឆ្នាំ២០២៤ ​លេខ​អត្តសញ្ញាណ​វិនិយោគិន​សរុប​មានចំនួនជិត ៥ម៉ឺននាក់ និងមានការបើក​គណនីជួញដូរ​ចំនួនជាង ៥ម៉ឺន គណនី៕អត្ថបទ៖ ឈិត បូរ៉ាវី 

បណ្ដាញសង្គម

ព័ត៌មានថ្មីៗ

ភាគហ៊ុនធ្លាក់ចុះ ប្រាក់ដុល្លារនិងប្រេងឡើងថ្លៃ បន្ទាប់ពីសុន្ទរកថារបស់លោក Trump ស្តីពីសង្គ្រាមអ៊ីរ៉ង់
04/02/2026 10:04 AM
Facebook Telegram Linkin
អភិបាលខេត្តកណ្ដាល ណែនាំ​ប្រជាពលរដ្ឋ​ឱ្យ​ប្រុងប្រយ័ត្ន​អំពី​បញ្ហា​បោក​ប្រាស់​តាម​ប្រព័ន្ធ​បច្ចេក​វិទ្យា​ Online Scam និងពិនិត្យឯកសារ​ឱ្យបានច្បាស់មុនជួលផ្ទះឱ្យជនបរទេស​ស្នាក់នៅ
04/02/2026 10:04 AM
Facebook Telegram Linkin
សហគមន៍ និងសមាគមអង្គកាអ៊ិស្លាមនានានៅកម្ពុជា ប្ដេជ្ញាចូលរួមអភិវឌ្ឍន៍សង្គមជាតិឲ្យកាន់តែរីកចម្រើន
04/02/2026 10:04 AM
Facebook Telegram Linkin
កម្ពុជា-អាល្លឺម៉ង់ ពិភាក្សាពង្រីកកិច្ចសហប្រតិបត្តិការលើការបណ្តុះបណ្តាលជំនាញវិជ្ជាជីវៈ និងការបញ្ជូនកម្មសិក្សាការី
04/02/2026 10:04 AM
Facebook Telegram Linkin
ប្រធានធនាគារ AIIB ប្តេជ្ញាចូលរួមវិនិយោគលើវិស័យថាមពល ដើម្បីឆ្លើយតបតម្រូវការប្រេងឥន្ធនៈនៅកម្ពុជា
04/02/2026 10:04 AM
Facebook Telegram Linkin
FFC នឹងជំរុញការងារចម្បង៣ ដើម្បីបង្កើនការអភិវឌ្ឍបាល់ទាត់ និងជម្រើស​ជាតិ​កម្ពុជា​ខ្លាំង​គ្រប់​កម្រិត
04/02/2026 10:04 AM
Facebook Telegram Linkin
សមត្ថកិច្ចបញ្ជូនកូនស្នងការរងបន្ទាយមានជ័យ ករណីបើកបរបុកមនុស្សស្លាប់៦នាក់ទៅតុលាការ
04/02/2026 09:04 AM
Facebook Telegram Linkin
អវកាសយានិកណាសា ចាប់ផ្ដើមបេសកកម្មនាំមនុស្សទៅឋានព្រះចន្ទ ជាលើកដំបូងក្នុងពេលកន្លះសតវត្សរ៍
04/02/2026 09:04 AM
Facebook Telegram Linkin
ប្រមុខណាតូ នឹងទៅទីក្រុងវ៉ាស៊ីនតោននៅសប្តាហ៍ក្រោយ ខណៈលោក Trump គំរាមដកខ្លួនពីសម្ព័ន្ធយោធា
04/02/2026 09:04 AM
Facebook Telegram Linkin
អ៊ុយក្រែន-អាមេរិកពិភាក្សាបទឈប់បាញ់នៅថ្ងៃបុណ្យ Easter ដែលស្នើទៅរុស្ស៊ី ខណៈក្រុងមូស្គូចង់បានសន្តិភាពយូរអង្វែង
04/02/2026 09:04 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.