BTV NEWS

គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុងការចូលរួមដោះស្រាយបញ្ហារួមសម្រាប់ជាតិ

កម្ពុជានឹងមានវត្តមានរោងចក្រដំឡើងរថយន្តអគ្គិសនីថ្មីមួយទៀត នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ ខណៈត្រឹមឆ្នាំ២០២៥ កំណើនរថយន្តអគ្គិសនីចុះបញ្ជីមានចំនួន ៦,១២៩គ្រឿង កើនឡើង ១៧២% បើធៀបឆ្នាំ២០២៤

ទូតចិនអបអរការដាក់ឱ្យពលរដ្ឋឆ្លងកាត់ស្ពានមិត្តភាពកម្ពុជា-ចិន មេគង្គក្រចេះនៅដើមខែក្រោយ ខណៈមិត្តចិនប្រកាសបន្តពង្រីកការសាងសង់ស្ពាន និងផ្លូវនៅកម្ពុជាឥតឈប់ឈរ

គម្រោងពង្រីក និងលើកកម្រិតផ្លូវជាតិលេខ៧ (ស្គន់-ក្រុងកំពង់ចាម) ជាបួនគន្លង សម្រេចលទ្ធផលការងារបានជិត ៩០%ហើយ គិតត្រឹមខែមីនា ឆ្នាំ២០២៦នេះ

នយោបាយ និង ការអភិវឌ្ឍន៍

ព្រឹកនេះ សម្ដេចធិបតីនាយករដ្ឋមន្រ្ដី បានអញ្ជើញជួប ប្រធានក្រុមហ៊ុន វិនិយោគិន និងធុរជនកូរ៉េជាបន្តបន្ទាប់ដើម្បីពិភាក្សាការងារ

ក្នុងឱកាសដំណើរទស្សនកិច្ចផ្លូវការនៅសាធារណៈរដ្ឋកូរ៉េ នៅព្រឹកថ្ងៃទី១៧ ខែឧសភា ឆ្នាំ ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបន្តមានជំនួបជាមួយបណ្ដាប្រធានក្រុមហ៊ុន អ្នកវិនិយោគ និងធុរជន កូរ៉េជាបន្តបន្តបន្ទាប់ ដើម្បីទាក់ម៉ូយ ទាក់ទាញការវិនិយោគបន្ថែមមកកាន់ប្រទេសកម្ពុជា។ ក្នុងឱកាសនោះសម្ដេចធិបតី នាយករដ្ឋមន្រ្ដី បានអញ្ជើញជួបពិភាក្សាការងារជាមួយលោក Woo Jong JEON នាយកប្រតិបត្តិ និងជាប្រធានក្រុមហ៊ុន SK Securities, លោក Ahh Young-Min ជាតារា K-pop ជាអ្នកនិពន្ធ និងជាតំណាងក្រុមហ៊ុន SM Entertainment, លោក JUNG Wonju ប្រធានក្រុមហ៊ុន Daewoo E&C, លោក Choi Yong-Sun ប្រធានក្រុមហ៊ុន Hanshin E&C, លោក Joo-Bong, Park ប្រធានក្រុមហ៊ុន Daejoo KC Group, លោកបណ្ឌិត Lee Joong Keun ស្ថាបនិកនៃក្រុមហ៊ុន Booyoung Group និងឯកឧត្តម Oh Young-hun អភិបាលខេត្តស្វយ័តពិសេសជេជូនៃសាធារណរដ្ឋកូរ៉េ។ ក្នុងឱកាសជំនួបជាមួយលោក Woo Jong JEON នាយកប្រតិបត្តិ និងជាប្រធានក្រុមហ៊ុន SK Securities ក្រុមហ៊ុននេះ បានបង្ហាញបំណងបណ្ដាក់ទុនវិនិយោគលើវិស័យហិរញ្ញវត្ថុនៅកម្ពុជា។ ខណៈក្រុមហ៊ុននេះ គឺជាក្រុមហ៊ុនវិនិយោគវិស័យហិរញ្ញវត្ថុ និងបានបង្កើតឡើងក្នុងឆ្នាំ១៩៥៥។ ចំណែកក្រុមហ៊ុន SM Entertainment គឺជាផលិតកម្មឈានមុខមួយនៅលើពិភពលោក ដែលបានបង្កើតឡើងក្នុងឆ្នាំ១៩៩៥ និងបាននាំK-POPទៅកាន់ពិភពលោកឱ្យបានស្គាល់។ កាលពីឆ្នាំ២០១០ SM Entertainment ក៏បានរៀបចំការប្រគំតន្ត្រីរបស់ក្រុម SHINee នៅពហុកីឡដ្ឋានជាតិអូឡាំពិក និងបានបរិច្ចាគថវិកា ១ ម៉ឺនដុល្លារដល់អង្គការ Cambodian Children’s Fund ផងដែរ។រីឯក្រុមហ៊ុន Daewoo E&C គឺជាក្រុមហ៊ុនឈានមុខគេនៃឧស្សាហកម្មសំណង់នៅសាធារណរដ្ឋកូរ៉េ ដោយមាន អាយុកាលជាង ៥០ឆ្នាំមកហើយ។ ក្រុមហ៊ុននេះបានដើរតួនាទីដ៏សំខាន់ក្នុងការចូលរួមនូវវិវត្តសេដ្ឋកិច្ចយ៉ាងឆាប់រហ័សរបស់សាធារណរដ្ឋកូរ៉េ។ ក្រុមហ៊ុនមានប្រតិបត្តិការអាជីវកម្មសំខាន់ៗដូចជា៖ ការអភិវឌ្ឍលំនៅឋាន រោងចក្រថាមពល និងការផ្តល់ផលប័ត្រជាសកល។ ដោយឡែកក្រុមហ៊ុន Hanshin E&C បានដើរតួនាទីយ៉ាងសំខាន់ក្នុងការអភិវឌ្ឍជាតិ ពិសេសការសាងសង់ហេដ្ឋារចនាសម្ព័ន្ធ រួមមាន៖ ការសាងសង់ ផ្លូវហាយវេ ផ្លូវថ្នល់ ផ្លូវក្រោមដី ផ្លូវដែកល្បឿនលឿន និងប្រព័ន្ធទឹក នៅពាក់កណ្តាលសតវត្សកន្លងមកនេះ។ ក្រុមហ៊ុននេះ ក៏បានចូលរួមក្នុងការអភិវឌ្ឍហេដ្ឋារចនាសម្ព័ន្ធនៅកម្ពុជាផងដែរ មានដូចជា៖ ការកសាងកំណាត់ផ្លូវជាតិលេខ៥, ការលើកកម្ពស់គុណភាពផ្លូវជាតិលេខ២១ និងការលើកកម្ពស់ផ្លូវតំបន់ជនបទ ផងដែរ។ចំណែកក្រុមហ៊ុន Daejoo KC Group ត្រូវបានបង្កើតឡើងក្នុងឆ្នាំ១៩៨៨ ដោយមានប្រតិបត្តិការអាជីវកម្ម លើវិស័យដូចជា ឧស្សាហកម្មដែក ភស្តុភារកម្ម (Logistic) ឧស្សាហកម្មគីមី គ្រឿងបម្លាស់រថយន្ត សំណង់ និងឧស្សាហកម្មថាមពល។ ក្រុមហ៊ុននេះ ក៏មានក្រុមហ៊ុនបុត្រសម្ព័ន្ធ CAMKO Motor Co.Ltd., នៅកម្ពុជាផងដែរដោយបានផ្តល់នូវសេវាកម្មថែទាំ និងផ្លាស់ប្តូរគ្រឿងបន្លាស់រថយន្តម៉ាកHyundai ។រីឯក្រុមហ៊ុន Booyoung នៅកម្ពុជា មានគម្រោងចំនួន ៦ ក្នុងវិស័យអចលនទ្រព្យ ហិរញ្ញវត្ថុ ការអប់រំ និងទេសចរណ៍ (សណ្ឋាគារ និងទីលាន វាយកូនហ្គោល) ហើយគម្រោងដែលគួរឱ្យកត់សម្គាល់មួយចំនួនមានដូចជា បុរី ប៊ូយ៉ុង ថោន និងធនាគារ ប៊ូយ៉ុង ខ្មែរ។ នាពេលកន្លងមកក្រុមហ៊ុននេះក៏បានបរិច្ចាគរថយន្តក្រុងចំនួន ១០០០គ្រឿងដល់រាជរដ្ឋាភិបាល និងបានជួយសាងសង់អគារសិក្សាចំនួន ៣០០ខ្នង រួមជាមួយនឹងការបរិច្ចាគក្តារខៀនចំនួន ៤០០០០ផងដែរ។ក្រៅពីនេះសម្ដេចធិបតីក៏បានជួបជាមួយ ឯកឧត្តម Oh Young-hun អភិបាលខេត្តស្វយ័តពិសេសជេជូ នៃសាធារណរដ្ឋកូរ៉េ ក្នុងជំនួបនេះ សម្ដេចធិបតីបានអញ្ជើញជាអធិបតីក្នុងពិធីចុះអនុស្សរណៈយោគយល់គ្នារវាងរដ្ឋបាលខេត្តសៀមរាបនៃព្រះរាជាណាចក្រកម្ពុជា និងរដ្ឋបាលខេត្តស្វយ័តពិសេសជេជូនៃសាធារណរដ្ឋកូរ៉េ ដើម្បីជំរុញកិច្ចសហប្រតិបត្តិការ និងលើកកម្ពស់ការអភិវឌ្ឍវិស័យផ្សេងៗក្នុងខេត្តទាំងពីរឱ្យកាន់តែមានការរីកចម្រើនផងដែរ៕

សម្តេចតេជោ អំពាវនាវអ្នកមានតំណែងក្នុងឃុំ-សង្កាត់ទៅបោះឆ្នោតជ្រើសរើសក្រុមប្រឹក្សារាជធានី-ខេត្តឲ្យបានគ្រប់ៗគ្នា

ក្នុងឱកាសបើកយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌ អាណត្តិទី៤ នាថ្ងៃទី១៧ ខែឧសភា ឆ្នាំ២០២៤នេះ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានអំពាវនាវ ដល់សមាជិក សមាជិកាទាំងអស់ ដែលមានតួនាតីក្នុងក្រុមប្រឹក្សាឃុំ-សង្កាត់ អញ្ជើញទៅបោះឆ្នោតឲ្យបានគ្រប់ៗគ្នា ហើយគប្បីបោះឆ្នោតជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា ខណៈការបោះឆ្នោតជូនគណបក្សប្រជាជនកម្ពុជានេះ គឺធានាជោគវាសនាដ៏រុងរឿងរបស់ប្រទេសជាតិ ប្រជាជន និងខ្លួនឯងផ្ទាល់។តាមរយៈសារលិខិត ក្នុងឱកាសបើកយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌអាណត្តិទី៤ នេះ សម្តេចតេជោ ហ៊ុន សែន បានលើកឡើងនៅថ្ងៃទី២៦ ខែឧសភា ឆ្នាំ២០២៤ខាងមុខនេះ គឺជាថ្ងៃបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌ អាណត្តិទី៤ ដែលជាការបោះឆ្នោតមួយដ៏មានសារៈសំខាន់សម្រាប់ការបន្តជំរុញដំណើរការ អភិវឌ្ឍសង្គមជាតិខ្មែរ ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ខណៈការបោះឆ្នោតនេះជាការបោះឆ្នោតអសកល ប៉ុន្តែ គឺជាការបោះឆ្នោតដែលកើតចេញពីឆន្ទៈរបស់ប្រជាជនកម្ពុជា ពិតប្រាកដ ព្រោះថាសមាជិក សមាជិកានៃក្រុមប្រឹក្សាឃុំ សង្កាត់ក្នុងតំណែង ដែលជាអ្នកបោះឆ្នោតផ្ទាល់ គឺជាតំណាងដ៏ឧត្តុង្គឧត្តមរបស់ប្រជាជនដែលបានប្រសូត្រចេញពីឆន្ទៈរបស់ប្រជាជន។តាមរយៈសារលិខិតនេះ សម្តេចតេជោ ហ៊ុន សែន ប្រធានគណបក្សកាន់អំណាច បានប្រកាស ជាឱឡារិកនូវការចូលរួមក្នុងការបោះឆ្នោតអសកលនេះ ដោយគោរពអនុវត្តយ៉ាងខ្ជាប់ខ្ជួន តាមច្បាប់ បទបញ្ជា នីតិវិធី និងក្រមសីលធម៌នៃការបោះឆ្នោត និងគោរពលទ្ធផលនៃការបោះឆ្នោត ហើយគណបក្ស ប្រជាជនកម្ពុជាចូលរួមជាមួយបណ្តាគណបក្សនយោបាយ មជ្ឈដ្ឋានចម្រើនជឿនលឿននានាក្នុងសង្គម និងអាជ្ញាធរមានសមត្ថកិច្ចគ្រប់លំដាប់ថ្នាក់ ដើម្បីរក្សាបរិយាកាសនយោបាយសម្រាប់ការបោះឆ្នោតឲ្យប្រ ព្រឹត្តទៅប្រកបដោយលក្ខណៈសេរី យុត្តិធម៌ មានសណ្តាប់ធ្នាប់ល្អ និងសុវត្ថិភាពផងដែរ។យ៉ាងណាក៏ដោយសម្តេចតេជោ ហ៊ុន សែន «សូមអំពាវនាវដល់លោក លោកស្រី ជាសមាជិក សមាជិកាក្រុមប្រឹក្សាឃុំ សង្កាត់ ក្នុងតំណែងទាំងអស់នៅទូទាំងប្រទេស សូមអញ្ជើញទៅបោះឆ្នោត និងបោះឆ្នោតគាំទ្រ គណបក្សប្រជាជនកម្ពុជា ដែលមានរូបសញ្ញាទេវតាបាចផ្កា ជាសញ្ញាសម្គាល់នៅលើ សន្លឹកឆ្នោត ឲ្យបានគ្រប់ៗគ្នា ហើយការបោះឆ្នោតជូនគណបក្សប្រជាជនកម្ពុជា គឺធានាជោគវាសនាដ៏រុង រឿងរបស់ប្រទេសជាតិ ប្រជាជន និងខ្លួនឯងផ្ទាល់»។តាមរយៈសារលិខិតដដែលនេះ សម្តេចតេជោ ហ៊ុន សែន ក៏បានលើកឡើងផងដែរថា គណបក្ស ប្រជាជនកម្ពុជា ប្តេជ្ញាអនុវត្តកម្មវិធីនយោបាយរបស់ខ្លួន ដែលបានប្រកាសជូនបងប្អូនជនរួមជាតិរួចហើយ ឲ្យបានសម្រេចជោគជ័យទាំងនៅថ្នាក់ជាតិ ទាំងនៅថ្នាក់ក្រោមជាតិ ដើម្បីធានាដល់ការថែរក្សាសន្តិភាព និងស្ថិរភាព ការការពារឯករាជ្យ អធិបតេយ្យ បូរណភាពទឹកដី និងកសាងព្រះរាជាណាចក្រកម្ពុជា ជារដ្ឋ ប្រជាធិបតេយ្យសេរីពហុបក្ស ដ៏រឹងមាំដែលផ្អែកលើច្បាប់ មានការគោរពសិទ្ធិមនុស្សយ៉ាងខ្ជាប់ខ្ជួន មាន សេដ្ឋកិច្ចរីកចម្រើនលឿន ធ្វើឲ្យប្រជាជនកម្ពុជាគ្រប់ក្រុមគ្រួសារមានជីវភាពកាន់តែល្អប្រសើរឡើង ឥត ឈប់ឈរ និងរស់នៅយ៉ាងសុខដុមរមនាក្នុងសង្គមជាដើម៕ អត្ថបទ៖ បាន ចក់

សម្ដេចតេជោ ហ៊ុន សែន៖ ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ មានសារៈសំខាន់សម្រាប់ការបន្តជំរុញដំណើរការអភិវឌ្ឍសង្គមជាតិ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា មានប្រសាសន៍ថា នៅថ្ងៃទី២៦ ខែឧសភា ឆ្នាំ២០២៤ ខាងមុខនេះ គឺជាថ្ងៃបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ ដែលជាការបោះឆ្នោតមួយដ៏មានសារៈសំខាន់សម្រាប់ការបន្តជំរុញដំណើរការអភិវឌ្ឍសង្គមជាតិយើង ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។សម្ដេចតេជោ ហ៊ុន សែន ថ្លែងបញ្ជាក់បែបនេះ តាមរយៈសារលិខិត ក្នុងឱកាសបើកយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុមប្រឹក្សា ក្រុង ស្រុក ខណ្ឌ អាណត្តិទី៤ ចាប់ពីថ្ងៃទី១៧ ដល់ថ្ងៃទី២៤ ខែឧសភា ឆ្នាំ ២០២៤នេះ។ ក្នុងឱកាសនោះសម្ដេចតេជោ ហ៊ុន សែន គណបក្សប្រជាជនកម្ពុជា បានសម្តែងការគោរព និងដឹងគុណយ៉ាងជ្រាលជ្រៅបំផុតជូនចំពោះបងប្អូនជនរួមជាតិនៅគ្រប់ទិសទី ដែលមានការជឿជាក់យ៉ាងមុតមាំលើការដឹកនាំរបស់គណបក្សប្រជាជនកម្ពុជា និងរូបសម្ដេចផ្ទាល់ នៅគ្រប់កាលៈទេសៈ តាំងពីដំណាក់កាលសង្គ្រោះ ជាតិពីរបបប្រល័យពូជសាសន៍ រហូតមកដល់ដំណាក់កាលសន្តិភាព និងការអភិវឌ្ឍបច្ចុប្បន្ននេះ និងបានបោះឆ្នោតគាំទ្រគណបក្សប្រជាជនកម្ពុជាឱ្យទទួលបានជ័យជម្នះយ៉ាងត្រចះត្រចង់ក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី៧ និងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥។ សម្ដេចមានប្រសាសន៍ថា តាមរយៈការបោះឆ្នោតនេះ បានឆ្លុះបញ្ចាំងទាំងស្រុងនូវឆន្ទៈដ៏ថ្លៃថ្លារបស់ប្រជាជនកម្ពុជានៅទូទាំងប្រទេស ក្នុងការថែរក្សាសន្តិភាព លទ្ធិប្រជាធិបតេយ្យ និងបន្តជំរុញការអភិវឌ្ឍសេដ្ឋកិច្ច សង្គម ដើម្បីលើកស្ទួយជីវភាពរបស់ខ្លួន។ ព្រមជាមួយនេះ សម្ដេចក៏សម្តែងនូវការគោរព និងវាយតម្លៃខ្ពស់ចំពោះសមាជិក សមាជិកានៃ ក្រុមប្រឹក្សាឃុំ សង្កាត់ក្នុងតំណែងនៅទូទាំងប្រទេស ដែលបានយកអស់កម្លាំងកាយ កម្លាំងចិត្ត និងកម្លាំង ប្រាជ្ញា ក្នុងការបំពេញភារកិច្ចបម្រើប្រជាជន។សម្ដេចតេជោបញ្ជាក់ថា៖«នៅថ្ងៃទី២៦ ខែឧសភា ឆ្នាំ២០២៤ ខាងមុខនេះ គឺជាថ្ងៃបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ ដែលជាការបោះឆ្នោតមួយដ៏មានសារៈសំខាន់សម្រាប់ការបន្តជំរុញដំណើរការអភិវឌ្ឍសង្គមជាតិយើង ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ទោះបីការបោះឆ្នោតនេះជាការបោះ ឆ្នោតអសកល ប៉ុន្តែគឺជាការបោះឆ្នោតដែលកើតចេញពីឆន្ទៈរបស់ប្រជាជនកម្ពុជាពិតប្រាកដ ព្រោះថា សមាជិក សមាជិកានៃក្រុមប្រឹក្សាឃុំ សង្កាត់ក្នុងតំណែង ដែលជាអ្នកបោះឆ្នោតផ្ទាល់ គឺជាអ្នកតំណាងដ៏ ឧត្តុង្គឧត្តមរបស់ប្រជាជនដែលបានប្រសូត្រចេញពីឆន្ទៈរបស់ប្រជាជន»។សម្ដេចតេជោមានបញ្ជាក់ថា គណបក្សប្រជាជនកម្ពុជា សូមប្រកាសជាឱឡារិកនូវការចូលរួមក្នុងការបោះឆ្នោតជ្រើសរើស ក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ នេះ ដោយគោរពអនុវត្តយ៉ាងខ្ជាប់ខ្ជួន តាមច្បាប់ បទបញ្ជា នីតិវិធី និងក្រមសីលធម៌នៃការបោះឆ្នោត និងគោរពលទ្ធផលនៃការបោះឆ្នោត។ គណបក្សប្រជាជនកម្ពុជាចូលរួមជាមួយបណ្តាគណបក្សនយោបាយ មជ្ឈដ្ឋានចម្រើនជឿនលឿននានាក្នុង សង្គម និងអាជ្ញាធរមានសមត្ថកិច្ចគ្រប់លំដាប់ថ្នាក់ ដើម្បីរក្សាបរិយាកាសនយោបាយសម្រាប់ការបោះឆ្នោត ឱ្យប្រព្រឹត្តទៅប្រកបដោយលក្ខណៈសេរី យុត្តិធម៌ មានសណ្តាប់ធ្នាប់ល្អ និងសុវត្ថិភាព។សម្ដេចតេជោថ្លែងថា គណបក្សប្រជាជនកម្ពុជា ប្តេជ្ញាអនុវត្តកម្មវិធីនយោបាយរបស់ខ្លួន ដែលបានប្រកាសជូនបង ប្អូនជនរួមជាតិរួចហើយឱ្យបានសម្រេចជោគជ័យទាំងនៅថ្នាក់ជាតិ ទាំងនៅថ្នាក់ក្រោមជាតិ ដើម្បីធានា ដល់ការថែរក្សាសន្តិភាព និងស្ថិរភាព ការការពារឯករាជ្យ អធិបតេយ្យ បូរណភាពទឹកដី និងកសាងព្រះ រាជាណាចក្រកម្ពុជាជារដ្ឋប្រជាធិបតេយ្យសេរី ពហុបក្សដ៏រឹងមាំដែលផ្អែកលើច្បាប់ មានការគោរពសិទ្ធិ មនុស្សយ៉ាងខ្ជាប់ខ្ជួន មានសេដ្ឋកិច្ចរីកចម្រើនលឿន ធ្វើឱ្យប្រជាជនកម្ពុជាគ្រប់ក្រុមគ្រួសារមានជីវភាព កាន់តែល្អប្រសើរឡើង ឥតឈប់ឈរ និងរស់នៅយ៉ាងសុខដុមរមនាក្នុងសង្គម។តាមរយៈសារលិខិតសម្ដេចតេជោ ក៏បានអំពាវនាវដល់លោក លោកស្រី ជាសមាជិក សមាជិកាក្រុមប្រឹក្សាឃុំ សង្កាត់ ក្នុងតំណែងទាំងអស់នៅទូទាំងប្រទេស សូមអញ្ជើញទៅបោះឆ្នោត និងបោះឆ្នោតគាំទ្រ គណបក្ស ប្រជាជនកម្ពុជា ដែលមានរូបសញ្ញា ទេវតាបាចផ្កា ជាសញ្ញាសម្គាល់នៅលើសន្លឹកឆ្នោត ឱ្យបាន គ្រប់ៗគ្នា។ បោះឆ្នោតជូនគណបក្សប្រជាជនកម្ពុជា គឺធានាជោគវាសនាដ៏រុងរឿងរបស់ប្រទេសជាតិ ប្រជាជន និងខ្លួនឯងផ្ទាល់៕

យុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុងស្រុកអាណត្តិទី៤ នៃខេត្តឧត្តរមានជ័យ

នាព្រឹកថ្ងៃទី១៧ ឧសភាឆ្នាំ២០២៤ នៅមន្ទីរគណបក្សប្រជាជនកម្ពុជា ក្រុងសំរោងខេត្តឧត្តរមានជ័យ បានរៀបចំពិធីបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុងស្រុក ឃុំសង្កាត់អាណត្តិទី៤ ដែលប្រព្រឹត្តិទៅក្រោមវត្តមានឯកឧត្តម ប៉ែន កុសល្យ ប្រធានគណប្រជាជនកម្ពុជា ខេត្តឧត្តរមានជ័យ និងមានការចូលរួមពីសមាជិកសមាជិការបក្សមកពីតាមបណ្តាលឃុំសង្កាត់ជាច្រើននាក់ផងដែរ។បន្ទាប់ពីលោក ផុន ចាន់នឹល អភិបាលក្រុងសំរោង បានមានមតិស្វាគមន៍រួចមក ឯកឧត្តម ប៉ែន កុសល្យ ប្រធានគណបក្សប្រជាជនកម្ពុជា ខេត្តឧត្តរមានជ័យ បានមានប្រសាសន៍លើកឡើងនូវខ្លឹមសារទាំងស្រុងរបស់សម្តេចអគ្គមហាសេនាបតីតេជោ ហ៊ុន សែន ប្រធានគណប្រជាជនកម្ពុជា និងបានធ្វើការសំណេះសំណាលសួរសុខទុក្ខដល់សមាជិកសមាជិការទាំងអស់ដែលកន្លងមក បានខិតខំបំពេញការងារយ៉ាងសកម្ម ជូនដល់បងប្អូនប្រជាពលរដ្ឋនៅតាមមូលដ្ឋាន ប្រកបដោយក្រមសិលធម៌ និងការយកចិត្តទុកដាក់ខ្ពស់។ឯកឧត្តមបន្តថា កត្តាទាំងអស់ហើយធ្វើពលរដ្ឋមានការជឿជាក់មកលើការដឹកនាំរបស់គណប្រជាជនកម្ពុជាដែលជាគណបក្សមួយប្រកបដោយភាពចាស់ និងមានការអភិវឌ្ឍប្រទេសមានការរីកចម្រើនបានលើគ្រប់វិស័យផងដែរ។ទន្ទឹមគ្នានោះដែរក្រុមការងារដែលមកពីតាមបណ្តាលមូលដ្ឋានឃុំសង្កាត់នានាក្នុងក្រុងសំរោង ក៏បានធ្វើការដង្ហែរក្បួនបើកយុទ្ធនាការឃោសនាបោះឆ្នោត ដើម្បីជ្រើសរើសក្រុមប្រឹក្សាខេត្ត ក្រុងស្រុក ឃុំសង្កាត់ ទៅតាមមូលដ្ឋានរៀងៗខ្លួនផងដែរ។សូមបញ្ជាក់ថា សម្រាប់ការបោះឆ្នោតជ្រើសរើសក្រុមប្រឹក្សាខេត្ត ក្រុងស្រុក ឃុំសង្កាត់ របស់ខេត្តឧត្តរមានជ័យ មានការិយាល័យចំនួនប្រាំ ក្រុងស្រុក និង២៤ឃុំសង្កាត់ មានសមាជិកចូលរួមបោះឆ្នោតចំនួន១៥២នាក់ផងដែរ៕

សម្តេច ម៉ែន សំអន អំពាវនាវដល់អង្គបោះឆ្នោតទាំងអស់ឱ្យចូលរួម និងគាំទ្របោះឆ្នោតជូនបក្សប្រជាជនកម្ពុជា ដើម្បីទទួលបានក្រុមប្រឹក្សាដែលបន្តការអភិវឌ្ឍន៍ក្នុងមូលដ្ឋាន

ស្វាយរៀង៖ នៅថ្ងៃទី១៧ ខែឧសភា ឆ្នាំ២០២៤ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តស្វាយរៀង បានអញ្ជើញក្នុងពិធីបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុង និងស្រុក អាណត្តិទី៤ ឆ្នាំ២០២៤ ក្នុងក្រុងស្វាយរៀង ជាមួយការចូលរួមរបស់សមាជិក-សមាជិកា និងអ្នកគាំទ្រចំនួនជាង២ពាន់នាក់។ នាឱកាសនោះ សម្តេចកិត្តិសង្គហបណ្ឌិត ម៉ែន សំអន មានប្រសាសន៍ថា ក្នុងនាម សម្តេចតេជោ ហ៊ុន សែន ប្រធានគណបក្ស សូមស្វាគមន៍យ៉ាងកក់ ក្តៅចំពោះវត្តមានដ៏ថ្លៃថ្លារបស់សមាជិក សមាជិកគណបក្ស សកម្មជន អ្នកគាំទ្រ និងជនរួមជាតិទាំងអស់ ដែលបានអញ្ជើញចូលរួមក្នុងពិធីដ៏មហោឡារិកនាពេលនេះ។ សម្តេចកិត្តិសង្គហបណ្ឌិត ម៉ែន សំអន បានសម្តែងនូវការអំណរគុណយ៉ាងជ្រាលជ្រៅជាទីបំផុត ជូនចំពោះបងប្អូន ជនរួមជាតិ សមាជិក-សមាជិកាគណបក្សគ្រប់លំដាប់ថ្នាក់ ដែលតែង ផ្តល់យុត្តិធម៌ ជំនឿ និងការគាំទ្រចំពោះការដឹកនាំរបស់គណបក្សប្រជាជនកម្ពុជា ធ្វើឱ្យគណបក្សមានលទ្ធភាពគ្រប់គ្រាន់ក្នុងការបំពេញ ភារកិច្ចបម្រើជាតិ និងប្រជាជន ប្រកបដោយជោគជ័យក្នុងរយៈពេល ជាង៤៥ឆ្នាំ កន្លងទៅនេះ។សម្តេចកិត្តិសង្គហបណ្ឌិត ម៉ែន សំអន មានប្រសាសន៍ទៀតថា យុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ នឹងប្រព្រឹត្តទៅមានរយៈពេល៨ថ្ងៃ គឺពីថ្ងៃទី១៧ ខែឧសភា ដល់ថ្ងៃទី២៤ ខែឧសភា ឆ្នាំ២០២៤ នៅក្របខណ្ឌទូទាំងប្រទេស ក៏ដូចជាខេត្តស្វាយរៀងជាការបោះឆ្នោតអសកល និងជាព្រឹត្តការណ៍ដ៏មានសារៈសំខាន់ ក្នុងការបង្ហាញនូវប្រៀបខ្លាំងប្រៀបឈ្នះរបស់គណបក្សប្រជាជនកម្ពុជា ដែលនឹងបើកឱកាសដល់បេក្ខជនក្រុមប្រឹក្សាខេត្ត ក្រុមប្រឹក្សាក្រុង និងក្រុមប្រឹក្សាស្រុក ធ្វើការផ្សព្វផ្សាយអំពីគោលការណ៍ និងកម្មវិធីនយោបាយ របស់គណបក្សប្រជាជនកម្ពុជា សម្រាប់ការបោះឆ្នោតជ្រើសរើស ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក អាណត្តិទី៤ និងបង្ហាញមុខបេក្ខជនឈរឈ្មោះ ព្រមទាំងលើកទឹកចិត្ត ដោយផ្ទាល់ជាមួយក្រុមប្រឹក្សាឃុំ សង្កាត់ ដែលជាអង្គបោះឆ្នោតនៅ តាមក្រុង-ស្រុកនីមួយៗ ដើម្បីរកសំឡេងឆ្នោតគាំទ្រគណបក្សប្រជាជន កម្ពុជា។នាឱកាសនោះដែរ សម្តេចកិត្តិសង្គហបណ្ឌិត ម៉ែន សំអន បញ្ជាក់ថា ក្នុងនាម អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តស្វាយរៀង និងក្នុងនាមគណៈអចិន្ត្រៃយ៍គណបក្សខេត្ត សូមអំពាវនាវដល់សមាជិក-សមាជិកា ក្រុមប្រឹក្សាឃុំ-សង្កាត់គ្រប់រូប ត្រូវមានវត្តមានជាប្រចាំក្នុងឃុំ-សង្កាត់របស់ខ្លួន ចាប់ពីពេលនេះ រហូតដល់ថ្ងៃបញ្ចប់ការបោះឆ្នោតជ្រើស រើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សា ស្រុក ដោយត្រូវយកចិត្តទុកដាក់ថែសុខភាពឱ្យបានល្អ និងជៀសវាងដាច់ខាតការធ្វើដំណើរផ្លូវឆ្ងាយ ហើយក្នុងករណីមានជំងឺឈឺថ្កាត់ ត្រូវរាយការណ៍បន្ទាន់មកគណៈ អចិន្ត្រៃយ៍គណបក្សក្រុង ស្រុក ដើម្បីជួយសម្រួល និងដោះស្រាយទាន់ពេលវេលា។សម្តេចកិត្តិសង្គហបណ្ឌិត ម៉ែន សំអន បានរម្លឹកដល់សមាជិក-សមាជិការក្រមប្រឹក្សាឃុំ-សង្កាត់គណបក្សទាំងអស់ ដែលជាអង្គបោះឆ្នោតពិនិត្យ និងផ្ទៀងផ្ទាត់នូវឯកសារ បោះឆ្នោត ព្រមទាំងយកប័ណ្ណព័ត៌មានអ្នកបោះឆ្នោតរបស់ខ្លួនឱ្យបានត្រឹមត្រូវ និងទុកដាក់ឱ្យល្អសម្រាប់ប្រើប្រាស់នៅថ្ងៃបោះឆ្នោតខាងមុខ។សម្តេចកិត្តិសង្គហបណ្ឌិត ម៉ែន សំអន បានបន្ថែមថា សមាជិកទាំងអស់ត្រូវយកចិត្តទុកដាក់ប្រជុំគណបក្សឃុំ-សង្កាត់ឱ្យបានទៀតទាត់, ត្រូវលើកកម្ពស់សាមគ្គីភាព ឯកភាពផ្ទៃក្នុងឱ្យបានរឹងមាំ និងត្រូវខិតខំបង្ការ ទប់ស្កាត់ការប៉ុនប៉ងណាមួយរបស់ ក្រុមណាដែលមាននិន្នាការប្រឆាំង ក្នុងការមួលបង្កាច់ បំបែកបំបាក់ផ្ទៃក្នុងសមាជិកក្រុមប្រឹក្សាឃុំ-សង្កាត់ ឬលើកឡើងបញ្ហាផ្សេងៗដែលអាចបង្កឱ្យមានការយល់ច្រឡំ ក្នុងគោលបំណងបំបែកបំបាក់សមាជិក្រុម ប្រឹក្សាឃុំ-សង្កាត់។ឆ្លៀតក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន បានអំពាវនាវដល់ក្រុមប្រឹក្សាឃុំ-សង្កាត់ ក្នុងតំណែង សូម អញ្ជើញទៅបោះឆ្នោតគាំទ្រគណបក្សប្រជាជនកម្ពុជា ក្នុង ការបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាក្រុង និងក្រុមប្រឹក្សាស្រុក អាណត្តិទី៤ ឆ្នាំ២០២៤ ដែលនឹងប្រព្រឹត្តទៅនាថ្ងៃទី២៦ ខែឧសភា ឆ្នាំ២០២៤ ខាងមុខនេះ ដើម្បីទទួលបានភាពជាតំណាងរបស់ប្រជាពលរដ្ឋក្នុងការរួមចំណែកតាមដាន និងជំរុញការអភិវឌ្ឍនក្នុងមូលដ្ឋាន។

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញទស្សនកិច្ចមន្ទីរពេទ្យ Soon chun hyang ក្នុងរដ្ឋធានីសេអ៊ូល

រដ្ឋធានីសេអ៊ូល៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅព្រឹកថ្ងៃទី១៧ ខែឧសភានេះ បានបន្តអញ្ជើញទស្សនកិច្ចមន្ទីរពេទ្យ Soon chun hyang ក្នុងរដ្ឋធានីសេអ៊ូល សាធារណរដ្ឋកូរ៉េ។ ដើមឡើយមន្ទីរពេទ្យ Soon chun hyang គឺជាសាកលវិទ្យាល័យ Soonchunhyang មានសក្តានុពលផ្នែកវេជ្ជសាស្ត្រ សាកលវិទ្យាល័យនេះ បានជាប់ចំណាត់ថ្នាក់ទី ៩ ក្នុងចំណោមសាកលវិទ្យាល័យនៅប្រទេសកូរ៉េខាងត្បូង នៅក្នុងប្រភេទជា គ្លីនិកបុរេគ្លីនិក និងសុខភាព ដោយ Times Higher Education World University Rankings ក្នុងឆ្នាំ ២០២៣ ។ SCH បានទទួល ពានរង្វាន់ថ្នាក់ជាតិសម្រាប់ឧត្តមភាពកំណែទម្រង់អប់រំ ពីក្រសួងអប់រំ វិទ្យាសាស្ត្រ និងបច្ចេកវិទ្យាកូរ៉េ ក្នុងឆ្នាំ ២០០៨, ២០០៩, និង ២០១០ ។សាកលវិទ្យាល័យ Soon chun hyang បានធ្វើកិច្ចសហប្រតិបត្តិការលើវិស័យសុខភាពសាធារណៈជាមួយ និងព្រះរាជាណាចក្រកម្ពុជា តាមរយៈការជួយបណ្តុះបណ្តាលគ្រូពេទ្យឯកទេស និងជួយពិនិត្យព្យាបាលជូនដល់អ្នកជំងឺកម្ពុជា៕

សម្តេចតេជោ ហ៊ុន សែន អនុញ្ញាតឱ្យប្រធានក្រុមអន្តរសភាមិត្តភាពបារាំង-កម្ពុជា ចូលជួបសម្តែងការគួរសម និងពិភាក្សាការងារ

នាព្រឹកថ្ងៃសុក្រ ១០កើត ខែពិសាខ ឆ្នាំរោង ឆស័ក ពុទ្ធសករាជ២៥៦៧ ត្រូវនឹងថ្ងៃទី១៧ ខែឧសភា ឆ្នាំ២០២៤ នៅវិមានព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអនុញ្ញាតឱ្យគណៈប្រតិភូបារាំង ដឹកនាំដោយ ឯកឧត្តម Vincent ÉBLÉ សមាជិកព្រឹទ្ធសភាបារាំង និងជាប្រធានក្រុមអន្តរសភាមិត្តភាពបារាំង-កម្ពុជា ចូលជួបសម្តែងការគួរសម និងពិភាក្សាការងារ ក្នុងឱកាសដែលឯកឧត្តមអញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ចាប់ពីថ្ងៃទី១៦-២០ ខែឧសភា ឆ្នាំ២០២៤។

សភាអាមេរិក បោះឆ្នោតបង្ខំឱ្យមានការដឹកជញ្ជូនសព្វាវុធទៅអ៊ីស្រាអែល ដោយប្រឆាំងនឹងលោក Biden

សភាតំណាងរាស្រ្តអាមេរិក ដែលដឹកនាំដោយគណបក្សសាធារណរដ្ឋ បានអនុម័តសេចក្ដីស្នើច្បាប់មួយកាលពីថ្ងៃព្រហស្បតិ៍ (១៦ ឧសភា) ដែលនឹងបង្ខំឱ្យលោកប្រធានាធិបតី ចូ បៃដិន (Joe Biden) បញ្ជូនអាវុធទៅអ៊ីស្រាអែល ដោយស្វះស្វែងរកការស្តីបន្ទោសគណបក្សប្រជាធិបតេយ្យចំពោះការពន្យារពេលដឹកជញ្ជូនគ្រាប់បែក ខណៈលោក បៃដិន ជំរុញឱ្យអ៊ីស្រាអែល ប្រឹងប្រែងបន្ថែមទៀតដើម្បីការពារជនស៊ីវិលក្នុងអំឡុងពេលសង្គ្រាមជាមួយក្រុមហាម៉ាស។សំណើច្បាប់គាំទ្រជំនួយសន្តិសុខអ៊ីស្រាអែល ត្រូវបានអនុម័តក្នុងសំឡេងគាំទ្រ ២២៤ ទល់នឹងការប្រឆាំង ១៨៧ សំឡេងដែលភាគច្រើននៅតាមជួរគណបក្ស។ សមាជិកគណបក្សប្រជាធិបតេយ្យចំនួន ១៦ នាក់បានចូលរួមជាមួយគណបក្សសាធារណរដ្ឋភាគច្រើនក្នុងការបោះឆ្នោតគាំទ្រ ហើយសមាជិកគណបក្សសាធារណរដ្ឋបីនាក់ បានចូលរួមជាមួយគណបក្សប្រជាធិបតេយ្យភាគច្រើនក្នុងការប្រឆាំងនឹងវិធានការនេះ។សំណើច្បាប់នេះមិនត្រូវបានគេរំពឹងថានឹងក្លាយទៅជាច្បាប់ពេញលេញនោះទេ ប៉ុន្តែការអនុម័តនេះបានគូសបញ្ជាក់ពីការខ្វែងគំនិតគ្នាយ៉ាងជ្រៅក្នុងការបោះឆ្នោតរបស់សហរដ្ឋអាមេរិក លើគោលនយោបាយអ៊ីស្រាអែល នៅពេលដែលរដ្ឋាភិបាលរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) ស្វះស្វែងកម្ចាត់ពួកសកម្មប្រយុទ្ធ។ គណបក្សសាធារណរដ្ឋបានចោទលោក បៃដិន ថាមិនអើពើនឹងអ៊ីស្រាអែល បន្ទាប់ពីប្រឈមមុខនឹងការតវ៉ាគាំទ្រប៉ាឡេស្ទីនយ៉ាងរាលដាល។គណបក្សប្រជាធិបតេយ្យក៏បានចោទបកទៅវិញថាកំពុងលេងល្បែងនយោបាយ ដោយនិយាយថាគណបក្សសាធារណរដ្ឋ កំពុងបំភ្លៃជំហររបស់លោក បៃដិន លើអ៊ីស្រាអែល។ អ៊ីស្រាអែល ដែលជាអ្នកទទួលជំនួយផ្នែកយោធាដ៏សំខាន់របស់សហរដ្ឋអាមេរិក អស់រយៈពេលជាច្រើនទសវត្សរ៍មកហើយនោះ នៅតែត្រូវទទួលបានអាវុធរាប់ពាន់លានដុល្លារពីអាមេរិក ទោះបីជាមានការពន្យាពេលនៃការដឹកជញ្ជូនមួយលើកក៏ដោយ៕

លោក Putin និងលោក Xi ចេញការព្រមានមួយឃ្លាអំពីសង្គ្រាមនុយក្លេអ៊ែរ

លោកប្រធានាធិបតីរុស្ស៊ី Vladimir Putin និង លោកប្រធានាធិបតីចិន Xi Jinping បានចេញសេចក្តីថ្លែងការណ៍មួយឃ្លាអំពីសង្គ្រាមនុយក្លេអ៊ែរ ដែលជាផ្នែកមួយនៃភាពជាដៃគូយុទ្ធសាស្ត្រ យុគសម័យថ្មីរបស់មេដឹកនាំមហាអំណាច ពិភពលោកទាំង២។ លោកPutinនិងលោក Xi បានប្រកាសផែនការពង្រឹងភាពជាដៃគូរបស់ខ្លួន កាលពីថ្ងៃព្រហស្បតិ៍ទី១៦ឧសភា សប្ដាហ៍នេះ ដោយបានចេញសេចក្តីថ្លែងការណ៍មួយបញ្ជាក់ពីជំហររបស់លោកទាំង២ លើបញ្ហាមួយចំនួនដែលពិភពលោកកំពុងប្រឈម រាប់ចាប់ពីបញ្ហាអំពីសេដ្ឋកិច្ច រហូតដល់សង្គ្រាមរវាងរុស្ស៊ី និងអ៊ុយក្រែន។ ចិន និងរុស្ស៊ី បានពង្រឹងទំនាក់ទំនងជាលំដាប់ ខណៈប្រទេសទាំងពីរតែងមានជម្លោះជាមួយលោកខាងលិច។ ចិន និង រុស្ស៊ី បានបង្ហាញជំហររបស់ខ្លួនលើសង្រ្គាមនុយក្លេអ៊ែរក្នុងសេចក្ដីថ្លែងការណ៍រួម កាលពីថ្ងៃព្រហស្បតិ៍សប្ដាហ៍នេះ ខណៈក្រុមអ្នកវិភាគ និងមន្ត្រីបានបង្កើនក្ដីបារម្ភថាជម្លោះក្នុងតំបន់ទាំងនេះអាចនាំឲ្យផ្ទុះសង្រ្គាមនុយក្លេអ៊ែរជាមួយអាមេរិក ។ លោក Putin បានព្រមានកាលពីខែមីនាថា ឱកាសនៃការផ្ទុះសង្រ្គាមនុយក្លេអ៊ែរអាចមានច្រើន បើលោកខាងលិចបញ្ជូនទាហានទៅអ៊ុយក្រែន ដែលរុស្ស៊ី ចាត់ទុកជាយូរមកហើយថាជាបន្ទាត់ក្រហមរបស់រុស្ស៊ី ដែល សម្ព័ន្ធមិត្តអ៊ុយក្រែនមិនត្រូវឆ្លងដើរឆ្លងជាដាច់ខាត។ សហរដ្ឋអាមេរិកបានមើលឃើញថាទំនាក់ទំនងដែលជាប់គាំងជាយូរមកហើយរបស់ខ្លួន ជាមួយប្រទេសទាំងពីរកាន់តែតានតឹងខ្លាំង ក្នុងរយៈពេលប៉ុន្មានឆ្នាំចុងក្រោយនេះ។ ក្រុងវ៉ាស៊ីនតោន បានក្លាយជាអ្នកគាំទ្រអ៊ុយក្រែនដ៏ម៉ឺងម៉ាត់បំផុត បន្ទាប់ពីលោក Putin បានបញ្ជាឱ្យចូលលុកលុយប្រទេសអឺរ៉ុបខាងកើតមួយនេះ កាលពីថ្ងៃទី២៤ ខែកុម្ភៈឆ្នាំ ២០២២ ដោយផ្តល់ជំនួយរាប់ពាន់លានដុល្លារដើម្បីជួយក្រុងគីវការពារខ្លួន។ ទន្ទឹមនឹងនេះ ទំនាក់ទំនងជាមួយចិន នៅតែតានតឹងក្នុងចំណោមកង្វល់ផ្សេងទៀត ពិសេសគឺ កោះតៃវ៉ាន់។បញ្ហាការទាមទារឯករាជ្យរបស់តៃវ៉ាន់ គឺជាចំណុចដ៏ក្ដៅកគុកមួយរវាងអាមេរិក និងចិន។គោលនយោបាយ "ចិនតែមួយ" របស់ទីក្រុងប៉េកាំង កំណត់ថា កោះតៃវ៉ាន់ ដែលជាកោះមួយនៅជាប់ឆ្នេរសមុទ្ររបស់ចិន គឺជាផ្នែករបស់ចិន។ យ៉ាងណាក៏ដោយ មេដឹកនាំកោះតៃវ៉ាន់ ចាត់ទុកកោះនេះជាប្រទេសរបស់ខ្លួន។ ខណៈអាមេរិក មិនទទួលស្គាល់ជាផ្លូវការនូវឯករាជ្យភាពរបស់កោះនេះ ខ្លួនបានសន្យាការពារកោះស្វ័យគ្រប់គ្រងមួយនេះប្រឆាំងការក្រសោបយក របស់ចិន៕

លោក Putin និងលោក Xi សន្យាបង្កើតយុគសម័យថ្មី និងថ្កោលទោសសហរដ្ឋអាមេរិក

លោកប្រធានាធិបតី ស៊ី ជីនពីង (Xi Jinping) របស់ប្រទេសចិន និងលោកប្រធានាធិបតី វ៉្លាឌីមៀ ពូទីន (Vladimir Putin) របស់រុស្ស៊ី កាលពីថ្ងៃព្រហស្បតិ៍ (១៦ ឧសភា) បានសន្យាថានឹងបង្កើត «យុគសម័យថ្មី» នៃភាពជាដៃគូរវាងគូប្រជែងដ៏មានឥទ្ធិពលបំផុតទាំងពីររបស់សហរដ្ឋអាមេរិក ដែលប្រទេសទាំងពីរចាត់ទុកជាមេភ្លើងនៃសង្គ្រាមត្រជាក់ដ៏ឈ្លានពានដែលកំពុងសាបព្រួសភាពវឹកវរជុំវិញពិភពលោក។ប្រទេសចិន និងរុស្ស៊ី បានប្រកាសភាពជាដៃគូ «គ្មានដែនកំណត់» នៅក្នុងខែកុម្ភៈ ឆ្នាំ២០២២ នៅពេលដែលលោក ពូទីន ធ្វើទស្សនកិច្ចនៅទីក្រុងប៉េកាំង ប៉ុន្មានថ្ងៃមុនពេលដែលលោកបានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែន ដែលបង្កឱ្យមានសង្រ្គាមទឹកដីដ៏បង្ហូរឈាមបំផុតនៅអឺរ៉ុប ចាប់តាំងពីសង្គ្រាមលោកលើកទីពីរ។លោក ស៊ី វ័យ ៧០ ឆ្នាំ និងលោក ពូទីន វ័យ ៧១ ឆ្នាំបានចុះហត្ថលេខាលើសេចក្តីថ្លែងការណ៍រួមមួយកាលពីថ្ងៃព្រហស្បតិ៍ អំពី «យុគសម័យថ្មី» ដែលប្រកាសប្រឆាំងនឹងសហរដ្ឋអាមេរិក លើបញ្ហាសន្តិសុខ និងទស្សនៈរួមគ្នាលើអ្វីគ្រប់យ៉ាងរាប់ចាប់ពីកោះតៃវ៉ាន់ និងអ៊ុយក្រែន រហូតទៅកាន់កូរ៉េខាងជើង និងកិច្ចសហប្រតិបត្តិការលើបញ្ហាថ្មីនៃបច្ចេកវិទ្យានុយក្លេអ៊ែរសន្តិភាព និងហិរញ្ញវត្ថុ។លោក ស៊ី បានប្រាប់លោក ពូទីន ថា អ្នកទាំងពីរមានឱកាសជំរុញការផ្លាស់ប្តូរដែលពិភពលោកមិនធ្លាប់ឃើញក្នុងរយៈពេលមួយសតវត្សរ៍ ដែលអ្នកវិភាគជាច្រើនមើលឃើញថាជាការប៉ុនប៉ងដើម្បីប្រជែងនឹងសណ្តាប់ធ្នាប់ពិភពលោកដែលដឹកនាំដោយសហរដ្ឋអាមេរិក។ ដំណើរទស្សនកិច្ចរបស់លោក ពូទីន នេះកើតឡើងប៉ុន្មានសប្តាហ៍បន្ទាប់ពីរដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) បានទៅកាន់ប្រទេសចិន ដើម្បីលើកឡើងពីការព្រួយបារម្ភអំពីការគាំទ្ររបស់ចិន សម្រាប់យោធារុស្ស៊ី។ ដំណើរទស្សនកិច្ចនោះហាក់ដូចជាមានផ្លែផ្កាតិចតួចប៉ុណ្ណោះដើម្បីបង្អាក់ទំនាក់ទំនងកាន់តែស៊ីជម្រៅរបស់លោក ស៊ី ជាមួយលោក ពូទីន៕

បណ្ដាញសង្គម

ព័ត៌មានថ្មីៗ

អ៊ីរ៉ង់សន្យាវាយកម្ទេចសហរដ្ឋអាមេរិក និងអ៊ីស្រាអែល ក្រោយការគំរាមកំហែងរបស់លោក Trump

ក្រុមចម្រុះមាន ៤០ប្រទេសដឹកនាំដោយអង់គ្លេស សន្យាចាត់វិធានការលើច្រកសមុទ្រ Hormuz

បេសកជន៖ អ៊ីរ៉ង់មិនមានបំណង «ចាប់ផ្តើមឡើងវិញ» ក្នុងការបង្កើនសារធាតុអ៊ុយរ៉ានីញ៉ូមទេ

នេប៉ាល់រៀបចំសម័យប្រជុំសភាជាលើកដំបូង ក្រោយការបោះឆ្នោត

លោក Macron ៖ វាមិនប្រាកដនិយមនោះទេក្នុងការបើកច្រកសមុទ្រ Hormuz ដោយកម្លាំង

ក្រុមឧទ្ទាមហ៊ូធីសម្របសម្រួលជាមួយអ៊ីរ៉ង់ ប៉ុន្តែនៅតែរក្សាឯករាជ្យភាព បើទោះបីជាមានសង្រ្គាមក៏ដោយ

ប្រទេសចំនួន ៨ ថ្កោលទោសចំពោះទោសប្រហារជីវិតរបស់អ៊ីស្រាអែលលើជនប៉ាឡេស្ទីន

តំបន់ភាគកណ្តាល និងភាគខាងត្បូងអ៊ីតាលី រងការវាយប្រហារដោយព្យុះព្រិល និងអាកាសធាតុអាក្រក់

មនុស្សម្នាក់ស្លាប់ ក្រោយព្យុះវាយប្រហារប្រទេសក្រិកបង្កជាទឹកជំនន់ និងបង្អាក់ការធ្វើដំណើរ

ស្ថានទូសហរដ្ឋអាមេរិក ព្រមានពីលទ្ធភាពនៃការវាយប្រហារជីវពលសម្ព័ន្ធមិត្តអ៊ីរ៉ង់នៅទីក្រុងបាកដាដ ប្រទេសអ៊ីរ៉ាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

យុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុងស្រុកអាណត្តិទី៤ នៃខេត្តឧត្តរមានជ័យ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញទស្សនកិច្ចមន្ទីរពេទ្យ Soon chun hyang ក្នុងរដ្ឋធានីសេអ៊ូល

សភាអាមេរិក បោះឆ្នោតបង្ខំឱ្យមានការដឹកជញ្ជូនសព្វាវុធទៅអ៊ីស្រាអែល ដោយប្រឆាំងនឹងលោក Biden

លោក Putin និងលោក Xi ចេញការព្រមានមួយឃ្លាអំពីសង្គ្រាមនុយក្លេអ៊ែរ

លោក Putin និងលោក Xi សន្យាបង្កើតយុគសម័យថ្មី និងថ្កោលទោសសហរដ្ឋអាមេរិក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

យុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុងស្រុកអាណត្តិទី៤ នៃខេត្តឧត្តរមានជ័យ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញទស្សនកិច្ចមន្ទីរពេទ្យ Soon chun hyang ក្នុងរដ្ឋធានីសេអ៊ូល

សភាអាមេរិក បោះឆ្នោតបង្ខំឱ្យមានការដឹកជញ្ជូនសព្វាវុធទៅអ៊ីស្រាអែល ដោយប្រឆាំងនឹងលោក Biden

លោក Putin និងលោក Xi ចេញការព្រមានមួយឃ្លាអំពីសង្គ្រាមនុយក្លេអ៊ែរ

លោក Putin និងលោក Xi សន្យាបង្កើតយុគសម័យថ្មី និងថ្កោលទោសសហរដ្ឋអាមេរិក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍