នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម ស៊ុន ចាន់ថុល៖ ព្រែកជីកហ្វូណនតេជោ គ្រោងបញ្ចប់ការផ្ទៀងផ្ទាត់និយាមកា និងបោះបង្គោលព្រំដីក្នុងពេលដ៏ខ្លីខាងមុខ
សម្តេចតេជោ៖ ថ្ងៃទី១១កក្កដានេះ រដ្ឋសភានឹងកោះប្រជុំ ដើម្បី​ធ្វើ​វិសោធន​កម្ម​ច្បាប់​រដ្ឋ​ធម្មនុញ្ញ​ដក​សញ្ជាតិ ជនជាតិខ្មែរណាដែលឃុបឃិតជាមួយបរទេសបំផ្លាញជាតិសាសន៍ឯង
ប្រសាសន៍សំខាន់ៗសម្ដេចតេជោ ហ៊ុន សែន ក្នុងពិធីសំណេះសំណាលជាមួយសិស្ស និស្សិត លោកគ្រូ អ្នកគ្រូ នៅមជ្ឈមណ្ឌលអប់រំ និង​បណ្តុះ​បណ្តាល ជាស៊ីមកំចាយមារ
សម្ដេចតេជោជំរុញឱ្យសិង្ហបុរីមានជើងហោះហើរកាន់តែច្រើនមកកាន់កម្ពុជាបន្ទាប់ពីដាក់ឱ្យដំណើរ​ការព្រលានយន្តហោះអន្តរជាតិតេជោ

នយោបាយ​ និង ការអភិវឌ្ឍន៍

លោក ស៊ី ស្នើឲ្យលោក ម៉ាក្រុង ជួយប្រទេសចិនជៀសឲ្យផុតពី«សង្គ្រាមត្រជាក់ថ្មី»

2024/05/07 12:11:52 pm        125
Facebook Telegram Linkin
ប្រធានាធិបតីចិនលោក ស៊ី ជីនពីង (Xi Jinping) បានអំពាវនាវឲ្យប្រទេសបារាំងជួយការពារប្រឆាំង «សង្គ្រាមត្រជាក់ថ្មី» ខណៈដែលសហភាពអឺរ៉ុបកាន់តែគាំទ្រសហរដ្ឋអាមេរិកជុំវិញការព្រួយបារម្ភអំពីការនាំចូលថោក និងហានិភ័យសន្តិសុខជាតិ។លោកបានប្រាប់ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron)ថា ប្រទេសទាំងពីរ គួរតែប្រកាន់យកផលប្រយោជន៍ទៅវិញទៅមក ហើយរួមគ្នាប្រឆាំងនឹងការផ្តាច់ចំណងទំនាក់ទំនង និងការរំខាននៃខ្សែសង្វាក់ផ្គត់ផ្គង់ នេះបើយោងតាមការលើកឡើងរបស់ទីភ្នាក់ងារសារព័ត៌មាន Xinhua ដោយដកស្រង់ការអត្ថាធិប្បាយដែលបានធ្វើឡើងក្នុងអំឡុងកិច្ចពិភាក្សារវាងមេដឹកនាំទាំងពីរ។លោក ស៊ី កំពុងស្ថិតនៅក្នុងទីក្រុងប៉ារីស ក្នុងដំណើរបំពេញទស្សនកិច្ចផ្លូវរដ្ឋ មុនពេលធ្វើដំណើរទៅកាន់ប្រទេសស៊ែរប៊ី និងហុងគ្រី ក្នុងការធ្វើដំណើរលើកដំបូងរបស់លោកទៅកាន់ប្លុកនេះ ក្នុងរយៈពេល ៥ឆ្នាំ។ លោក សង្ឃឹមថា នឹងបញ្ចុះបញ្ចូលប្រជាជនអឺរ៉ុបថា ទីក្រុងប៉េកាំងផ្តល់ឱកាសសេដ្ឋកិច្ច ចំពេលមានភាពតានតឹងពាណិជ្ជកម្ម កើនឡើង។ប្រធានគណៈកម្មការអឺរ៉ុប លោកស្រី Ursula von der Leyen ដែលបានចូលរួមជាមួយប្រមុខរដ្ឋទាំងពីរសម្រាប់កិច្ចពិភាក្សា កាលពីថ្ងៃចន្ទ បាននិយាយបន្ទាប់ពីកិច្ចប្រជុំថា សហភាពអឺរ៉ុប ត្រៀមដាក់ពង្រាយឧបករណ៍ទាំងអស់ដែលមាន ដើម្បីការពារសេដ្ឋកិច្ចរបស់ខ្លួន ប្រសិនបើប្រទេសចិន បរាជ័យក្នុងការផ្តល់សិទ្ធិចូលដំណើរការដោយយុត្តិធម៌ ទៅកាន់ទីផ្សាររបស់ខ្លួន។លោកប្រធានាធិបតី ម៉ាក្រុង បានបញ្ជាក់ជាថ្មីថា មិនអាចមានសន្តិសុខនៅអឺរ៉ុបទេ ប្រសិនបើគ្មានសន្តិសុខនៅអ៊ុយក្រែននោះទេ។

អាល្លឺម៉ង់ គាំទ្រសហភាពអឺរ៉ុបក្នុងការប្រើប្រាស់ទ្រព្យសម្បត្តិរបស់រុស្ស៊ីដែលបានបង្កក ដើម្បីផ្តល់មូលនិធិដល់អ៊ុយក្រែន

2024/05/07 12:03:00 pm        75
Facebook Telegram Linkin
អធិការបតីអាល្លឺម៉ង់ លោក អូឡាហ្វ សូល ( Olaf Scholz) បាននិយាយកាលពីថ្ងៃចន្ទថា ប្រហែល ៩០ភាគរយនៃប្រាក់ចំណូលដែលទទួលបានពីទ្រព្យសម្បត្តិដែលបង្កករបស់រុស្ស៊ី គួរតែត្រូវបានចំណាយលើការទិញសព្វាវុធសម្រាប់អ៊ុយក្រែន ដោយគាំទ្រដល់សំណើមុនរបស់សហភាពអឺរ៉ុប ក្នុងការប្រើប្រាស់ការទូទាត់ការប្រាក់របស់ទ្រព្យសម្បត្តិរបស់រុស្ស៊ី ដើម្បីជំរុញការការពារអ៊ុយក្រែន។លោក សូល បានប្រាប់អ្នកសារព័ត៌មាន បន្ទាប់ពីកិច្ចប្រជុំជាមួយសមាជិកនៃរដ្ឋាភិបាលប្រទេសបាល់ទិកទាំងបីនៅទីក្រុងរីហ្គា ( Riga) ថា៖«វាមានសារៈសំខាន់ដែលយើងក៏យល់ព្រមថា លុយនេះ អាចត្រូវបានប្រើសម្រាប់ការទិញអាវុធមិនត្រឹមតែនៅក្នុងសហភាពអឺរ៉ុបប៉ុណ្ណោះទេ ថែមទាំងសម្រាប់ការទិញ នៅទូទាំងពិភពលោក»។កាលពីខែមីនា ប្រធានគោលនយោបាយការបរទេសរបស់សហភាពអឺរ៉ុបលោក ចូសិប បូរ៉ែល (Josep Borrell) បានស្នើឲ្យយក ៩០ភាគរយនៃប្រាក់ចំណូលពីទ្រព្យសម្បត្តិដែលត្រូវបានបង្កករបស់រុស្ស៊ី នៅអឺរ៉ុប ហើយផ្ទេរពួកវាទៅមូលនិធិគ្រប់គ្រងដោយសហភាពអឺរ៉ុបដែលផ្តល់ហិរញ្ញប្បទានអាវុធសម្រាប់អ៊ុយក្រែន។ប្រហែល ៧០ភាគរយនៃទ្រព្យសម្បត្តិរុស្ស៊ីទាំងអស់ដែលជាប់គាំងនៅប្រទេសលោកខាងលិច ត្រូវបានរក្សាទុកនៅក្នុងឃ្លាំងមូលបត្រកណ្តាល Euroclear ក្នុងប្រទេសបែលហ្ស៊ិក ដែលមានតម្លៃស្មើនឹង ១៩០ ពាន់លានអឺរ៉ូ (២០៤,៦៧ ពាន់លានដុល្លារ)នៃមូលបត្រនិងសាច់ប្រាក់នៅធនាគារកណ្តាលរុស្ស៊ី។លោក សូល បាននិយាយថា ប្រទេសអាល្លឺម៉ង់ និងរដ្ឋបាល់ទិកទាំងបី កំពុងជំរុញឲ្យមានការពង្រីកផលិតកម្មអាវុធឲ្យឆាប់រហ័ស នៅក្នុងទ្វីបអឺរ៉ុប ដោយបន្ថែមថា ការផលិតគ្រាប់រំសេវ និងប្រព័ន្ធការពារដែនអាកាស ត្រូវបានបង្កើនរួចហើយ។នាយករដ្ឋមន្ត្រីលីទុយអានី លោកស្រី Ingrida Simonyte បាននិយាយថា ឧស្សាហកម្មការពារជាតិរបស់អឺរ៉ុប កំពុងជួបបញ្ហាហិរញ្ញវត្ថុ និងភាពមិនច្បាស់លាស់សម្រាប់សមត្ថភាពផលិតរយៈពេលវែង ប៉ុន្តែលោកស្រីមានសុទិដ្ឋិនិយមចំពោះរោងចក្រ Rheinmetall ដែលបានគ្រោងទុកនៅក្នុងប្រទេសលីទុយអានី។

រុស្ស៊ី ព្រមានអង់គ្លេសថា ខ្លួនអាចវាយបកវិញ បន្ទាប់ពីលោក កាមេរុន ធ្វើការអត្ថាធិប្បាយអំពីអ៊ុយក្រែន

2024/05/07 11:07:58 am        156
Facebook Telegram Linkin
រុស្ស៊ីបានព្រមានអង់គ្លេសកាលពីថ្ងៃចន្ទថា ប្រសិនបើអាវុធអង់គ្លេស ត្រូវបានប្រើដោយអ៊ុយក្រែន ដើម្បីវាយប្រហារលើទឹកដីរុស្ស៊ីនោះ ទីក្រុងមូស្គូ អាចវាយបកវិញចំពោះការដំឡើងទីតាំង និងគ្រឿងយុទ្ធោបករណ៍ របស់អង់គ្លេសទាំងនៅក្នុងអ៊ុយក្រែន និងកន្លែងផ្សេងទៀត។ប្រទេសរុស្ស៊ី បាននិយាយថា ឯកអគ្គរដ្ឋទូតអង់គ្លេសលោក នីហ្គែល កាស៊ី (Nigel Casey) ត្រូវបានកោះហៅទៅកាន់ក្រសួងការបរទេសសម្រាប់ការតវ៉ាជាផ្លូវការមួយ បន្ទាប់ពីរដ្ឋមន្ត្រីការបរទេសលោក ដេវីត កាមេរុន (David Cameron) បាននិយាយកាលពីសប្តាហ៍មុនថា អ៊ុយក្រែនមានសិទ្ធិប្រើប្រាស់អាវុធរបស់អង់គ្លេស ដើម្បីវាយប្រហាររុស្ស៊ី។ចក្រភពអង់គ្លេស បានបដិសេធថា លោក កាស៊ី មិនត្រូវបានកោះហៅទេ ដោយនិយាយថា លោកបានជួបមន្ត្រីរុស្ស៊ី«សម្រាប់កិច្ចប្រជុំការទូត» ដែលក្នុងនោះ លោក «បានរំលឹកឡើងវិញនូវការគាំទ្ររបស់ចក្រភពអង់គ្លេសសម្រាប់អ៊ុយក្រែនចំពោះមុខការឈ្លានពានរបស់រុស្ស៊ីដែលមិនបង្កហេតុ»។ក្រសួងការបរទេសរុស្ស៊ី បាននិយាយថា សុន្ទរកថារបស់លោក កាមេរុន បានទទួលស្គាល់ថា ចក្រភពអង់គ្លេសបច្ចុប្បន្ន ជាផ្នែកមួយនៃជម្លោះ ហើយបានផ្ទុយនឹងការធានាពីមុនដែលថា អាវុធរយៈចម្ងាយឆ្ងាយដែលផ្តល់ឲ្យអ៊ុយក្រែន នឹងមិនត្រូវបានប្រើប្រឆាំងនឹងរុស្ស៊ីឡើយ។ក្រសួងការបរទេសរុស្ស៊ី បានបញ្ជាក់ថា លោក កាស៊ី ត្រូវបានព្រមានថា ជាការឆ្លើយតបទៅនឹងការវាយប្រហាររបស់អ៊ុយក្រែនលើទឹកដីរុស្ស៊ីដោយអាវុធរបស់អង់គ្លេស សម្ភារៈ និងបរិក្ខារយោធាអង់គ្លេសណាមួយនៅលើទឹកដីអ៊ុយក្រែន និងនៅបរទេស» អាចត្រូវបានកំណត់គោលដៅ។

ប្រជាជនប៉ាណាម៉ា មានសង្ឃឹមបន្ទាប់ពី លោក Mulino ទទួលតំណែងប្រធានាធិបតី

2024/05/07 10:20:40 am        83
Facebook Telegram Linkin
ប្រជាជនប៉ាណាម៉ា បានចាប់ផ្តើមដំណាក់កាលនយោបាយថ្មី កាលពីថ្ងៃចន្ទ បន្ទាប់ពីអតីតរដ្ឋមន្ត្រីសន្តិសុខ លោក ចូសេ រ៉ាអ៊ុល មូលីណូ(Jose Raul Mulino) បានដណ្តើមជ័យជម្នះក្នុងការបោះឆ្នោតកាលពីថ្ងៃអាទិត្យ ក្នុងការបោះឆ្នោតប្រធានាធិបតី ដោយមានការគាំទ្រពីអតីតមេដឹកនាំ លោក រីកាដូ ម៉ាទីននេលី(Ricardo Martinelli) ដែលកំពុងជាប់ឃុំនៅក្នុងស្ថានទូតប្រទេសនីការ៉ាហ្គ័រ។លោក Mulino មានអាយុ៦៤ឆ្នាំ គឺជាអ្នកដែលមានការពេញចិត្តសម្រាប់តំណែងប្រធានាធិបតី បន្ទាប់ពីលោកបានចូលជំនួសតំណែង លោក Martinelli តាមរយៈការបោះឆ្នោត នៅពេលដែលអតីតប្រធានាធិបតីរូបនេះ ត្រូវបានហាមឃាត់មិនឱ្យឈរឈ្មោះដោយសារតែការកាត់ទោសពីបទលាងលុយ។នៅក្នុងរដ្ឋធានី ប្រជាជន ដែលសារព័ត៌មានReuters បានសាកសួរ ក្នុងពេលទទួលបានលទ្ធផលបោះឆ្នោត ពួកគេមានទាំងការរំពឹងទុកជាវិជ្ជមាន និងភាពស្ទាក់ស្ទើរ។ លោក Mulino បាននិយាយថា រដ្ឋាភិបាលរបស់លោក នឹងគាំទ្រការវិនិយោគ និងគាំទ្រពាណិជ្ជកម្ម និងបាននិយាយថាប្រទេសអាមេរិកកណ្តាលមួយនេះ នឹងទទួលស្គាល់បំណុលរបស់ខ្លួន ប៉ុន្តែក៏បានប្តេជ្ញាមិនភ្លេចអ្នកក្រនោះទេ។នៅក្នុងយុទ្ធនាការបោះឆ្នោតដ៏ប្លែកមួយ លោក Martinelli បានដើរតួយ៉ាងសំខាន់ក្នុងការជម្រុញការគាំទ្រសម្រាប់ លោក Mulino ពីស្ថានទូតប្រទេសនីការ៉ាហ្គ័រ ជាកន្លែងដែលលោកបានស្វែងរកសិទ្ធិជ្រកកោន។

បារាំង និងប្រធានគណៈកម្មការអឺរ៉ុប ជំរុញលោក Xi ស្ដីពីតុល្យភាពពាណិជ្ជកម្មក្នុងកិច្ចពិភាក្សានៅក្រុងប៉ារីស

2024/05/07 10:12:24 am        105
Facebook Telegram Linkin
លោកប្រធានាធិបតីបារាំង Emmanuel Macron និងប្រធានគណៈកម្មការសហភាពអឺរ៉ុប (EU) លោកស្រី អឺស៊ូឡា វ៉ុន ឌើ យ៉េយិន (Ursula von der Leyen) បានជំរុញប្រទេសចិនធានាឱ្យមានតុល្យភាពពាណិជ្ជកម្មបន្ថែមទៀតនៅពេលចាប់ផ្តើមដំណើរទស្សនកិច្ចរបស់លោកប្រធានាធិបតី Xi Jinping ទៅកាន់ទីក្រុងប៉ារីស អំឡុងលោក Macron ត្រូវក៏បានដាក់សម្ពាធលើលោក Xi លើ វិបត្តិសង្គ្រាមអ៊ុយក្រែន ផងដែរ។ លោក Xi កំពុងមានវត្តមានក្នុងទ្វីបអឺរ៉ុប ជាលើកដំបូងក្នុងរយៈពេល ៥ ឆ្នាំ ខណៈមានភាពតានតឹងផ្នែកធុរកិច្ចកាន់តែខ្លាំង ដែលរួមមានទាំងសហភាពអឺរ៉ុប កំពុងស៊ើបអង្កេតលើឧស្សាហកម្មចិនដូចជាការនាំចេញរថយន្តអគ្គិសនី (EV) ជាដើម ទន្ទឹមនឹងទីក្រុងប៉េកាំង ស៊ើបអង្កេតការនាំចូលផលិតផលមានម៉ាកយីហោផលិតពីបារាំងភាគច្រើន។ លោក Macron បាននិយាយថា អឺរ៉ុប និងចិនត្រូវការដោះស្រាយការលំបាករចនាសម្ព័ន្ធ ជាពិសេសលើពាណិជ្ជកម្ម។មេដឹកនាំបារាំងរូបនេះ លើកឡើងនៅពេលមេដឹកនាំទាំងបីអង្គុយនៅតុមូលក្នុងវិមាន អេលីហ្សេ(Elysee)ថាអនាគតនៃទ្វីបរបស់យើងក៏នឹងពឹងផ្អែកយ៉ាងច្បាស់ផងដែរទៅលើសមត្ថភាពរបស់យើងក្នុងការអភិវឌ្ឍបន្ថែមទៀតនៅក្នុងរបៀបតុល្យភាពទំនាក់ទំនងរបស់យើងជាមួយប្រទេសចិន។ លោកស្រី ឡេ យិន និយាយថា ទំនាក់ទំនង សហភាពអឺរ៉ុប និងប្រទេសចិន ត្រូវបានប៉ះពាល់ដោយការទទួលបានទីផ្សារមិនស្មើភាពគ្នា និងការឧបត្ថម្ភធនបម្រុងរដ្ឋរបស់ចិន។ បន្ទាប់ពីជំនួបនោះ លោកស្រីបានប្រាប់អ្នកសារព័ត៌មានថា សហភាពអឺរ៉ុប មិនអាចស្រូបយកការផលិតទំនិញឧស្សាហកម្មរបស់ចិនច្រើនហួសប្រមាណ ដែលជាន់ពន្លិចទីផ្សាររបស់ខ្លួនបានទេ ដោយបន្ថែមថា អឺរ៉ុបនឹងមិនងាកចេញពីការសម្រេចចិត្តដ៏តឹងតែងដែលចាំបាច់ដើម្បីការពារទីផ្សាររបស់ខ្លួនឡើយ។ចំណែកលោកប្រធានាធិបតីចិន វិញបានលើកឡើងថា ទំនាក់ទំនងរបស់ចិន ជាមួយអឺរ៉ុប គឺចំណុចអាទិភាពសម្រាប់គោលនយោបាយបរទេសរបស់ខ្លួន៕

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញជាអធិបតី “ ប្រកាសដាក់ឱ្យអនុវត្តជាផ្លូវការ ប្រព័ន្ធបញ្ជរតែមួយជាតិ ”

2024/05/07 08:55:04 am        147
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី៧ ឧសភា ២០២៤ បានអញ្ជើញជាអធិបតី “ ប្រកាសដាក់ឱ្យអនុវត្តជាផ្លូវការ ប្រព័ន្ធបញ្ជរតែមួយជាតិ ”។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ នៅមុនវិបត្តិកូវីដសកល កម្ពុជាជាប្រទេសដែល មានកំណើនសេដ្ឋកិច្ចខ្ពស់ជាងគេទាំងក្នុងតំបន់ និងសកលលោក ដោយកំណើនសេដ្ឋកិច្ចកម្ពុជាស្ថិត ក្នុងរង្វង់ ៧ ភាគរយ។ ក្រោយវិបត្តិកូវីដសកលធូរស្រាល កំណើនសេដ្ឋកិច្ចកម្ពុជាបានស្ទុះងើបឡើង វិញយ៉ាងឆាប់រហ័ស។ កំណើនសេដ្ឋកិច្ចកម្ពុជា ភាគច្រើនទ្រទ្រង់ដោយវិស័យពាណិជ្ជកម្ម។-សម្ដេចធិបតី ហ៊ុន ម៉ាណែត មានប្រសាសន៍ថា ការដាក់ឱ្យអនុវត្តជាផ្លូវការនូវ «ប្រព័ន្ធបញ្ជរតែមួយជាតិ» ក្នុងថ្ងៃនេះ គឺជាសមិទ្ធិផលថ្មីមួយទៀតរបស់រាជរដ្ឋាភិបាល ក្នុងកិច្ចប្រឹងប្រែងធ្វើឱ្យប្រសើរឡើងនូវបរិយាកាសធុរកិច្ច ជំរុញការធ្វើពាណិជ្ជកម្ម និងលើកកម្ពស់កំណើនសេដ្ឋកិច្ចនៅកម្ពុជា។-សម្ដេចធិបតី ហ៊ុន ម៉ាណែត មានប្រសាសន៍ថា «ប្រព័ន្ធបញ្ជរតែមួយជាតិ» គឺជាប្រព័ន្ធថ្មីមួយទៀត របស់អគ្គនាយកដ្ឋានគយ និងរដ្ឋាករកម្ពុជា ដែលបំពេញបន្ថែម និងធ្វើការជាមួយប្រព័ន្ធដែលមានស្រាប់ ដូចជា E-customs, ASYCUDA, Pre-Arrival Manifest System ជាដើម។-សម្ដេចធិបតី ហ៊ុន ម៉ាណែត បញ្ជាក់ថា «ប្រព័ន្ធបញ្ជរតែមួយជាតិ» នឹងអនុញ្ញាតឱ្យអ្នកនាំចេញ-នាំចូលទំនិញ អាចដាក់ស្នើសុំ អាជ្ញាបណ្ណ, លិខិតអនុញ្ញាត, វិញ្ញាបនបត្រ, និងឯកសារតម្រូវផ្សេងទៀត ពាក់ព័ន្ធការនាំ ចេញ-នាំចូលទំនិញ ទៅគ្រប់ក្រសួង-ស្ថាប័នមានសមត្ថកិច្ច តែមួយលើករួមគ្នា ដើម្បីទទួលបានការអនុញ្ញាត សម្រាប់យកទៅប្រើប្រាស់ក្នុងការបំពេញបែបបទបញ្ចេញទំនិញពីគយ តាមមធ្យោបាយអេឡិចត្រូនិក។-សម្ដេចធិបតី ហ៊ុន ម៉ាណែត «ប្រព័ន្ធបញ្ជរតែមួយជាតិ» ក៏មានមុខងារដ៏សំខាន់ ក្នុងការតភ្ជាប់ទៅកាន់ប្រព័ន្ធបញ្ជរតែមួយអាស៊ាន ដើម្បីផ្លាស់ប្តូរទិន្នន័យវិញ្ញាបនបត្របញ្ជាក់ដើមកំណើតទំនិញ, ទិន្នន័យឯកសារប្រតិវេទន៍គយ និងទិន្នន័យឯកសារពាណិជ្ជកម្មផ្សេងទៀត តាមទម្រង់អេឡិចត្រូនិក ជាមួយបណ្តាប្រទេសជាសមាជិកអាស៊ានផងដែរ។-សម្ដេចធិបតី ហ៊ុន ម៉ាណែត បញ្ជាក់ថា ការដាក់ឱ្យអនុវត្តប្រព័ន្ធបញ្ជរតែមួយជាតិ នឹងនាំមកនូវផលប្រយោជន៍ជាច្រើន ទាំងសម្រាប់វិស័យសាធារណៈ និងវិស័យឯកជន។-សម្ដេចធិបតី ហ៊ុន ម៉ាណែត បន្តថា សម្រាប់វិស័យសាធារណៈ ប្រព័ន្ធបញ្ជរតែមួយជាតិ មានតួនាទីសំខាន់ក្នុងការសម្របសម្រួល និងការពង្រឹងកិច្ចសហការ រវាងក្រសួង ស្ថាប័នជំនាញពាក់ព័ន្ធ សំដៅបង្កើនប្រសិទ្ធភាព និងស័ក្តិសិទ្ធភាពបន្ថែមទៀត នូវកិច្ចសម្រួលពាណិជ្ជកម្ម។ ជាពិសេសសម្រួលដល់ការបំពេញឱ្យបានឆាប់នូវបែបបបទនាំចេញ-នាំចូលទំនិញ ស្របតាមយុទ្ធសាស្រ្ត និងគោលនយោបាយ របស់រាជរដ្ឋា ភិបាល។-សម្ដេចធិបតី ហ៊ុន ម៉ាណែត មានប្រសាសន៍ថា «ប្រព័ន្ធបញ្ជរតែមួយជាតិ»នេះ ក៏នឹងផ្តល់អត្ថប្រយោជន៍សំខាន់ដល់ក្រសួង-ស្ថាប័នជំនាញពាក់ព័ន្ធឱ្យទទួលបាននូវព័ត៌មាន និងទិន្នន័យត្រឹមត្រូវ និងទាន់ពេល សម្រាប់ធ្វើការវិភាគវាយតម្លៃហានិភ័យ និងសម្រាប់ប្រើប្រាស់តាមតម្រូវការផ្សេងទៀត។-សម្ដេចធិបតី ហ៊ុន ម៉ាណែត បញ្ជាក់ថា តាមរយៈការដាក់ឱ្យអនុវត្ត «ប្រព័ន្ធបញ្ជរតែមួយជាតិ»នេះ សម្រាប់វិស័យឯកជន ក៏នឹងទទួលបានអត្ថប្រយោជន៍ជាច្រើនផងដែរ ដូចជា ចំណេញពេល ព្រមទាំងការកាត់បន្ថយចំណាយ។-សម្ដេចធិបតី ហ៊ុន ម៉ាណែត បន្តថា ជាពិសេស ការកាត់បន្ថយការិយាធិបតេយ្យក្នុងការរត់ការឆ្លងកាត់ពីក្រសួង-ស្ថាប័នមានសមត្ថកិច្ចមួយ ទៅមួយទៀត ពាក់ព័ន្ធនឹងការស្នើសុំអាជ្ញាបណ្ណ, លិខិតអនុញ្ញាត, វិញ្ញាបនបត្រ, និង ឯកសារតម្រូវផ្សេងៗ, សម្រាប់ការនាំចេញ-នាំចូលទំនិញ។-សម្ដេចធិបតី ហ៊ុន ម៉ាណែត បន្ថែមថា លើសពីនេះ តាមរយៈការដាក់ឱ្យអនុវត្ត «ប្រព័ន្ធបញ្ជរតែមួយជាតិ» ប្រតិបត្តិករនៃវិស័យឯកជន ក៏អាចប្រើប្រាស់ឡើងវិញនូវទិន្នន័យក្នុងប្រព័ន្ធ សម្រាប់ជាប្រយោជន៍ក្នុងការគ្រប់គ្រងទិន្នន័យរបស់ខ្លួន ឱ្យបានទាន់ពេល, មានសង្គតិភាព និងមានភាពច្បាស់លាស់ផងដែរ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ប្រព័ន្ធបញ្ជរតែមួយជាតិ ជាប្រព័ន្ធដែលជួយឱ្យ ចំណេញពេល កាត់បន្ថយការចំណាយ ដោយមិនចាំបាច់រត់ការបំពេញបែបបទពីស្ថាប័នមួយទៅស្ថាប័ នមួយទៀត។ ប្រព័ន្ធបញ្ជរតែមួយជាតិ ជាប្រព័ន្ធដែលតម្រូវឱ្យដាក់ការស្នើសុំតែម្ដង ក្នុងពេលតែមួយ នឹងបានទៅដល់ស្ថាប័នមានសមត្ថកិច្ចពាក់ព័ន្ធនឹងការនាំចេញ-នាំចូលចំនួន ២១ ស្ថាប័នតែម្ដង។-សម្ដេចធិបតី ហ៊ុន ម៉ាណែត លើកទឹកចិត្តឱ្យវិស័យឯកជនចូលរួមប្រើប្រាស់ និងផ្ដល់ធាតុចូលបន្ថែមលើការប្រើប្រាស់ «ប្រព័ន្ធបញ្ជរតែមួយជាតិ»នេះ ដើម្បីឱ្យការប្រើប្រាស់រឹតតែមានប្រសិទ្ធភាព តាមរយៈគោលការណ៍ជួយគិត ជួយទទួលខុសត្រូវ។

[BREAKING NEWS] ក្រុមហាម៉ាស ទទួលយកសំណើបទឈប់បាញ់ ខណៈអ៊ីស្រាអែល បន្តជំរុញឲ្យពលរដ្ឋក្រុងរ៉ាហ្វា ជម្លៀសចេញពីរ៉ាហ្វា

2024/05/07 07:52:05 am        203
Facebook Telegram Linkin
ក្រុមហាម៉ាសកាលពីថ្ងៃចន្ទទី ៦ ឧសភា បាននិយាយថា ខ្លួនបានទទួលយកសំណើសម្រាប់បទឈប់បាញ់ក្នុងសង្គ្រាមរយៈពេល៧ខែនៅដែនដីហ្កាហ្សា ខណៈអ៊ីស្រាអែលបានបន្តបញ្ជាឱ្យពលរដ្ឋប៉ាឡេស្ទីននៅទីក្រុង រ៉ាហ្វា ជម្លៀសចេញ មុនពេលការឈ្លានពានដែលខ្លួនបានគំរាមជាយូរមកហើយ។ អ៊ីស្រាអែល និយាយថាខ្លួន ចាប់ផ្តើមប្រតិបត្តិការសឹកលើទីក្រុងរ៉ាហ្វា បន្ទាប់ពីក្រុមហាម៉ាសឯកភាពលើកិច្ចព្រមព្រៀងបទឈប់បាញ់។ សម្ព័ន្ធមិត្តជិតស្និទ្ធរបស់អ៊ីស្រាអែល គឺសហរដ្ឋអាមេរិក បាននិយាយថា ខ្លួនកំពុងពិនិត្យឡើងវិញចំពោះការឆ្លើយតបរបស់ក្រុមហាម៉ាស។ អ្នកនាំពាក្យយោធាអ៊ីស្រាអែលលោក Daniel Hagari បាននិយាយថា យន្តហោះរបស់ខ្លួនបានដាក់គោលដៅជាង៥០កន្លែងលើគោលដៅនានានៅក្នុងតំបន់រ៉ាហ្វា កាលពីថ្ងៃចន្ទ។ចំណែកប្រភពពីប្រទេសអេហ្ស៊ីប វិញនិយាយថាអ៊ីស្រាអែលគ្រាន់តែវាយប្រហារបណ្ដោះអាសន្នប៉ុណ្ណោះ។ ការិយាល័យរបស់លោកនាយករដ្ឋមន្ត្រីអ៊ីស្រាអែល Benjamin Netanyahu បាននិយាយថា សំណើនេះ នៅឆ្ងាយពីការទាមទារសំខាន់ៗរបស់អ៊ីស្រាអែល ប៉ុន្តែរដ្ឋាភិបាលនឹងបញ្ជូនក្រុមអ្នកចរចាសម្រាប់កិច្ចពិភាក្សា ដើម្បីស្រោចស្រង់កិច្ចព្រមព្រៀងដ៏សំខាន់នេះ។ សមាជិកក្រុមហាម៉ាស លោក ខាលីល អាល់ ហាយ៉ា (Khalil al-Hayya) បានប្រាប់ទូរទស្សន៍ Al Jazeera ដែលមានមូលដ្ឋាននៅកាតាថា សំណើដែលក្រុមហាម៉ាស បានយល់ព្រម រួមមានបទឈប់បាញ់បីដំណាក់កាល។ លោកបាននិយាយថា បទឈប់បាញ់នេះ រួមបញ្ចូលទាំងការដកទ័ពអ៊ីស្រាអែលទាំងស្រុងចេញពីតំបន់ហ្កាហ្សា ការវិលត្រឡប់របស់ជនជាតិប៉ាឡេស្ទីនដែលភៀសខ្លួនដោយសង្រ្គាម និងការដោះដូរចំណាប់ខ្មាំង និងអ្នកទោស ក្នុងបំណងឲ្យមានបទឈប់បាញ់ជាអចិន្ត្រៃយ៍៕

ពលរដ្ឋជាច្រើនភូមិរស់នៅទីប្រជុំជនក្នុងឃុំស្រុកអន្លង់វែង ប្រឈមគ្មានទឹកស្អាតប្រើប្រាស់

2024/05/06 02:54:11 pm        166
Facebook Telegram Linkin
ឧត្ដរមានជ័យ៖ ប្រជាពលរដ្ឋចំនួន១៥ភូមិ នៃទីប្រជុំជន ក្នុងឃុំអន្លង់វែង ស្រុកអន្លង់វែង ខេត្តឧត្តរមានជ័យ បច្ចុប្បន្នកំពុងប្រឈមគ្មានប្រព័ន្ធទឹកស្អាតប្រើប្រាស់នៅឡើយ ខណៈមានស្ថានីយផ្គត់ផ្គង់ទឹកស្អាតបង្កើតក្បែរភូមិទាំងនោះយូរឆ្នាំមកហើយ ប៉ុន្តែនៅមិនមានឱកាសបានប្រើប្រាស់នោះឡើយ។លោក ជា ខ្លឹង វ័យ៥៦ ប្រជាពលរដ្ឋរស់នៅភូមិថ្នល់បំបែក និងភូមិអូរជីក ក៏ដូចជា​ពលរដ្ឋភូមិដទៃទៀត​ ក្នុងឃុំអន្លង់វែង បានលើកឡើងថា ពួកគាត់ប្រើប្រាស់ទឹកប្រចាំថ្ងៃ គឺទឹកអណ្តូង ស្រះ និងទឹកទិញពីអ្នកដឹកលក់តាម​រឺម៉កម៉ូតូ រថយន្ត យក​មកលក់គ្មាន​ទីតាំង​ប្រភពច្បាស់លាស់​ ក្នុងតម្លៃចាប់ពី៦០០០រៀលទៅ១២០០០រៀល ក្នុងមួយធុង។ហើយការប្រើប្រាស់ប្រភពទឹកទាំងអស់នេះ ថ្វីត្បិតមិនមានបញ្ហាប្រឈមទៅនឹងសុខភាព នាបច្ចុប្បន្ន តែមានការព្រួយបារម្ភពីសុខភាពនៅពេលថ្ងៃខាងមុខផងដែរ។អ្នកស្រី ផាវ វិន អាយុ៥០ ជាមេភូមិអូរជីក ឃុំអន្លង់វែង បានឱ្យដឹងថា មិនថា ទីប្រជុំជនក្នុងភូមិគាត់នោះទេ នៅភូមិទីប្រជុំជនដទៃទៀតក៏គ្មានទឹកស្អាតប្រើប្រាស់ដែរ។រីឯសម្រាប់ភូមិអ្នកស្រី ប្រជាពលរដ្ឋកន្លងមក បានស្នើសុំតាមរយៈអាជ្ញាធរភូមិ ឃុំ ស្រុក ដល់ក្រុមហ៊ុនផ្គត់ផ្គង់ទឹកស្អាតឱ្យមានការតភ្ជាប់បណ្តាញទឹកប្រើប្រាស់ដែរ ប៉ុន្តែក្រុមហ៊ុនផ្តល់​ចម្លើយត្រឡប់វិញ បានត្រឹមពាក្យថា ជិតហើយៗរហូតបច្ចុប្បន្ននេះ នៅតែពុំមានទឹកស្អាត​បានប្រើប្រាស់នោះទេ។យ៉ាងណាម៉ិញលោក វង្ស ភ័ក្រ មេឃុំអន្លង់វែង បានឧ្យដឹងថា ​នៅក្នុងឃុំអន្លង់វែង មានខ្នងផ្ទះ​ប្រជាពលរដ្ឋចំនួន ៧០០០ខ្នងផ្ទះជាង ស្មើនិងចំនួន១៦ភូមិ ក្នុងចំណោមភូមិទាំងនោះ មាន​ប្រជាពលរដ្ឋតែមួយភូមិអូរចិញ្ចៀនមួយតែប៉ុណ្ណោះ ដែលមានប្រព័ន្ធទឹកស្អាតបានប្រើប្រាស់ ពោលគឺភូមិក្រៅពីនោះដទៃទៀតមិនមានទឹកស្អាតប្រើប្រាស់នោះទេ។ពាក់ព័ន្ធបញ្ហាប្រឈមខាងលើ ក្រុមហ៊ុន​ទទួលបាន​សិទ្ធិ​ផ្គត់ផ្គង់​ទឹកស្អាត​នៅទីប្រជុំជន ឃុំស្រុកអន្លង់វែង អ្នកព័ត៌មាន យើង មិនអាចសុំការបំភ្លឺបាននោះទេ ដោយពុំមានលេខសម្រាប់​ទំនាក់ទំនង។បញ្ហានេះ ពលរដ្ឋ បានបង្ហើបថា ម្ចាស់ក្រុមហ៊ុនផ្គត់ផ្គង់ទឹកស្អាតស្រុកអន្លង់វែង គឺជារបស់លោក​ឧកញ៉ា​ លឹម ហេង ​ដែលជាថៅកែកាស៊ីណូច្រកជាំសាងាំរីសត ។គួរបញ្ជាក់ថា បច្ចុប្បន្ន​រាជរដ្ឋាភិបាល ​នីតិកាលទី៧​ នៃរដ្ឋសភា ​នៅតែបន្តផ្តល់ការយកចិត្តទុកដាក់​គិតគូរ​ខ្ពស់​ និងផ្តល់អាទិភាពខ្ពស់បំផុត​ នូវការថែរក្សាសុខសន្តិភាព​ ស្ថិរភាពសង្គម ​សេដ្ឋកិច្ច និង​ការអភិវឌ្ឍជាតិ​ ព្រមទាំងការកែទម្រង់សំខាន់ៗ​ ក្នុងគោលដៅ​បម្រើ​ឧត្តម​ប្រយោជន៍ជាតិ ដោយ​ឆ្លើយតប​ទាន់ពេលវេលា​ទៅ​នឹងសំណូមពរ​ ព្រមទាំងសេចក្តីត្រូវការ​របស់​ប្រជាពលរដ្ឋ​ផងដែរ៕ 

លោក ណេតាន់យ៉ាហ៊ូ៖ អ៊ីស្រាអែល នឹងបន្តប្រយុទ្ធនៅតំបន់ហ្កាហ្សា រហូតដល់ទទួលបានជ័យជម្នះ

2024/05/06 02:24:36 pm        172
Facebook Telegram Linkin
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បាននិយាយថា ប្រទេសនេះ នឹងបន្តសង្រ្គាមនៅតំបន់ហ្កាហ្សាស្ទ្រី រហូតដល់គោលដៅទាំងអស់ ត្រូវបានសម្រេច ហើយបានស្តីបន្ទោសក្រុមសកម្មប្រយុទ្ធប៉ាឡេស្ទីនហាម៉ាសចំពោះការជាប់គាំងការចរចាជុំវិញបទឈប់បាញ់បណ្តោះអាសន្ន។លោក ណេតាន់យ៉ាហ៊ូ បាននិយាយក្នុងសារជាវីដេអូ កាលពីថ្ងៃអាទិត្យថា៖«ការលើកឡើងចំពោះការទាមទាររបស់ក្រុមហាម៉ាស នឹងជាការបរាជ័យដ៏អាក្រក់សម្រាប់រដ្ឋអ៊ីស្រាអែល។ «វានឹងជាជ័យជម្នះដ៏ អស្ចារ្យសម្រាប់ក្រុមហាម៉ាស អ៊ីរ៉ង់ និងអ័ក្សនៃអំពើអាក្រក់ទាំងមូល។ វានឹងបង្ហាញពីភាពទន់ខ្សោយដ៏គួរឲ្យ ភ័យខ្លាចចំពោះមិត្តរបស់យើង និងសត្រូវរបស់យើង»។លោកបានព្រមានថា ប្រសិនបើអ៊ីស្រាអែលបង្ហាញភាពទន់ខ្សោយតាមវិធីនេះ វានឹងនាំឲ្យសង្រ្គាមបន្ទាប់កាន់តែខិតជិតឡើង» ហើយវានឹងរុញច្រានឲ្យផុតកិច្ចព្រមព្រៀងសន្តិភាពបន្ទាប់» ពីព្រោះសម្ព័ន្ធភាព មិនត្រូវបានធ្វើឡើងដោយអ្នកទន់ខ្សោយនោះទេ ហើយសម្ព័ន្ធភាព ត្រូវបានធ្វើឡើងជាមួយអ្នកខ្លាំង និងជ័យជម្នះ»។កិច្ចពិភាក្សាដែលត្រូវបានសម្របសម្រួល បានប្រព្រឹត្តទៅនៅទីក្រុងគែរ ដោយមានការចូលរួមពីតំណាងមកពីក្រុមហាម៉ាស ជាមួយនឹងក្តីសង្ឃឹមថា នឹងធានាបាននូវការដោះលែងចំណាប់ថ្នូរ ដែលនៅសេសសល់នៅតំបន់ហ្កាហ្សាជាថ្នូរនឹងអ្នកទោសប៉ាឡេស្ទីនដែលកំពុងជាប់ឃុំនៅក្នុងពន្ធនាគាររបស់អ៊ីស្រាអែល ហើយក៏មានការពិភាក្សាអំពីលទ្ធភាពបទឈប់បាញ់ផងដែរ។លោក ណេតាន់យ៉ាហ៊ូ បាននិយាយថា អ៊ីស្រាអែល បានបង្ហាញពីភាពបត់បែន ក្នុងអំឡុងពេលការចរចានៅទីក្រុងគែរ ខណៈដែលក្រុមហាម៉ាស កំពុងប្រកាន់ខ្ជាប់នូវ«ជំហរជ្រុលនិយមរបស់ខ្លួន ជាដំបូង និងសំខាន់បំផុត គឺការដកកងកម្លាំងរបស់យើងចេញពីតំបន់ហ្កាហ្សាស្ទ្រីប ការបញ្ចប់សង្រ្គាម និងទុកឲ្យក្រុមហាម៉ាស នៅដដែល»។

កូរ៉េខាងជើងគាំទ្រមេដឹកនាំលោក គីម ជាមួយនឹងពាក្យសច្ចាប្រណិធានស្មោះត្រង់ ក្នុងថ្ងៃខួបកំណើត

2024/05/06 01:53:39 pm        86
Facebook Telegram Linkin
វិទ្យាស្ថានស្រាវជ្រាវរបស់ប្រទេសកូរ៉េខាងត្បូង បានឲ្យដឹងថា ជាលើកដំបូង គិតចាប់តាំងពីមេដឹកនាំ លោក Kim Jong Un (គីម ជុងអ៊ុន) ឡើងកាន់អំណាចក្នុងឆ្នាំ២០១១ ប្រជាជនកូរ៉េខាងជើងត្រូវបានស្នើឲ្យស្បថសច្ចាប្រណិធាន នៅថ្ងៃខួបកំណើតរបស់លោក ចំពេលដែលប្រទេសនេះកំពុងចាត់វិធានការផ្សេងៗទៀត ដើម្បីពង្រឹងការគ្រប់គ្រងរបស់មេដឹកនាំរូបនេះ។ពាក្យសច្ចាប្រណិធានស្មោះត្រង់ ដែលសារព័ត៌មាន Reuters មិនអាចផ្ទៀងផ្ទាត់ដោយឯករាជ្យបាននោះ ត្រូវបានគ្រប់គ្រងត្រួតពិនិត្យ ពោលគឺជាអ្វីដែលគេជឿថា ថ្ងៃខួបកំណើតគម្រប់ ៤០ឆ្នាំរបស់លោក គីម នៅថ្ងៃទី៨ ខែមករា។ នេះបើយោងតាមវិទ្យាស្ថាន South & North Development Institute (SAND) ជាស្ថាប័នដែលមានមូលដ្ឋាន នៅទីក្រុងសេអ៊ូល ដែលបានចេញផ្សាយរូបភាពនៃពាក្យសម្បថនេះ នៅក្នុងប័ណ្ណដែលមានការតុបតែងលម្អយ៉ាងស្រស់ស្អាតកាលពីថ្ងៃសុក្រសប្ដាហ៍កន្លងមក។គួរបញ្ជាក់ថា កូរ៉េខាងជើង មិនធ្លាប់បានបញ្ជាក់ជាផ្លូវការនូវថ្ងៃខែឆ្នាំកំណើតរបស់លោក គីម នោះឡើយ ហើយជាប្រពៃណី ពិធីសច្ចាប្រណិធានបែបនេះ ត្រូវបានធ្វើឡើងចំថ្ងៃខួបកំណើតរបស់ឪពុក និងជីតារបស់លោក ដែលជាមេដឹកនាំពីមុនរបស់ប្រទេសប្រដាប់អាវុធនុយក្លេអ៊ែរមួយនេះ។វិទ្យាស្ថាន SAND បានលើកឡើងនៅក្នុងការវិភាគមួយថា៖ «ការជ្រើសរើសរបស់លោក គីម ជុង អ៊ុន ដើម្បីធ្វើពិធីសច្ចាប្រណិធានក្នុងថ្ងៃខួបកំណើតគម្រប់ ៤០ឆ្នាំរបស់លោក ខណៈដែលលោកចាប់ផ្តើមឆ្នាំទី១៣ នៃការកាន់អំណាចរបស់លោកនោះ បង្ហាញពីសញ្ញាផ្លាស់ប្តូរឆ្ពោះទៅរកការអះអាងផ្នែកនយោបាយ ដោយចាកចេញពីវិធីសាស្រ្តរបស់អ្នកកាន់តំណែងមុនៗ»។ប្រធានវិទ្យាស្ថាន SAND លោក Choi Kyong-hui បានប្រាប់សារព័ត៌មាន Reuters ថា កូរ៉េខាងជើងអាចកំណត់ថ្ងៃខួបកំណើតរបស់លោក គីម ជាផ្លូវការឆាប់ៗនៅឆ្នាំក្រោយ។ សូមបញ្ជាក់ថា សន្តតិវង្សរបស់លោក គីម បានគ្រប់គ្រងប្រទេសនេះ ចាប់តាំងពីការបង្កើតឡើងក្រោយសង្គ្រាមលោកលើកទី២ ដោយពង្រឹងការក្ដោបក្ដាប់អំណាច ដោយការសាងការគោរពបូជាថ្នាក់ដឹកនាំ នៅជុំវិញពួកគេ៕

បណ្ដាញសង្គម

ព័ត៌មានថ្មីៗ

កម្ពុជាចែករំលែកបទពិសោធន៍ ប្រព័ន្ធទូទាត់សងប្រាក់ឌីជីថល និងប្រព័ន្ធបាគងដល់អន្តរជាតិ
07/04/2025 02:07 PM
Facebook Telegram Linkin
មនី្ទរពេទ្យព្រះអង្គឌួង និងសាកលវិទ្យាល័យ ស្ត្រី ប៊ូសាន បើកវគ្គបណ្តុះបណ្តាលជូនដល់គិលានុបដ្ឋាក និងឆ្មប
07/04/2025 01:07 PM
Facebook Telegram Linkin
ឯកឧត្តមសាស្ត្រាចារ្យ ហ៊ុន ចំរើន អញ្ជើញបើក ទិវាវេជ្ជសាស្ត្រ-សល្យសាស្ត្រ និងវិទ្យាសាស្ត្រថែទាំ លើកទី២៧
07/04/2025 01:07 PM
Facebook Telegram Linkin
ភាគខាងកើតប្រទេសចិន ស្ថិតក្រោមរលកកម្ដៅ ខណៈផ្នែកផ្សេងទៀតកំពុងរងគ្រោះដោយជំនន់ទឹកភ្លៀង
07/04/2025 01:07 PM
Facebook Telegram Linkin
លោក Trump រំពឹងថា ក្រុមហាម៉ាសនឹងសម្រេចចិត្តក្នុងពេល ២៤ម៉ោង លើសំណើសន្តិភាព "ចុងក្រោយ"
07/04/2025 01:07 PM
Facebook Telegram Linkin
កម្ពុជាគ្រោងរៀបចំធ្វើជាម្ចាស់ផ្ទះកិច្ចពិភាក្សាពហុភាគីក្នុងតំបន់ ពាក់ព័ន្ធនឹងការជួញដូរមនុស្ស និងឆបោកតាមអនឡញ
07/04/2025 01:07 PM
Facebook Telegram Linkin
ឯកឧត្ដម ឃួង ស្រេង ណែនាំគ្រប់ខណ្ឌឱ្យបង្ក្រាបគ្រឿងញៀន លុបបំបាត់ការជក់បារីអេឡិចត្រូនិច ឬស៊ីហ្សា និងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា
07/04/2025 01:07 PM
Facebook Telegram Linkin
មេបញ្ជាការកងពលតូចលេខ៩៩ រំលឹកដល់កងទ័ពនៃកងពលទាំងអស់ ត្រូវពង្រឹងគោលជំហរជាតិនិយម ត្រូវហានលះបង់ក្នុងការការពារជាតិ
07/04/2025 12:07 PM
Facebook Telegram Linkin
រដ្ឋាភិបាលថៃស្ថិតក្រោមសម្ពាធកាន់តែខ្លាំងខណៈបក្សប្រឆាំងអំពាវនាវឲ្យរំលាយសភា និងបោះឆ្នោតមុនដំណាច់ឆ្នាំនេះ
07/04/2025 12:07 PM
Facebook Telegram Linkin
លោក Phumtham បញ្ជាក់ពីសិទ្ធិអំណាចក្នុងការរំលាយសភាថៃ ប៉ុន្តែពុំទាន់មានការពិភាក្សាជាក់ស្ដែងទេ
07/04/2025 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.