នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ៖ ឪពុកម្តាយគ្មានសេចក្តីសុខឬការសប្បាយណាជាងឃើញកូន និងចៅចេះស្រឡាញ់គ្នា និងក្លាយជាពលរដ្ឋល្អក្នុងសង្គមនោះឡើយ
TOP STORY | សម្ដេចតេជោ ហ៊ុន សែន រម្លឹកពីប្រវត្តិនៃការលះបង់របស់សម្ដេចប្ដូរយក ការរស់រានរបស់ប្រជាជន សន្តិភាព និងការអភិវឌ្ឍប្រទេសជាតិ
រាជរដ្ឋាភិបាលសម្រេចប្រសិទ្ធនាមស្ពានខ្ពស់ជាងគេនៅកម្ពុជាថា «ស្ពាន​តេជោសន្តិភាពឫស្សីជ្រុំ»
សម្ដេចតេជោ ហ៊ុន សែន ជំរុញឱ្យប្រទេសបង់ក្លាដេសបង្កើនការវិនិយោគ ជាពិសេសវិស័យកសិកម្មជាមួយកម្ពុជា

នយោបាយ​ និង ការអភិវឌ្ឍន៍

អ្នកវិភាគ និងអ្នកនយោបាយ ចំអកឱ្យទណ្ឌិតក្បត់ជាតិបីជំនាន់ថា មិនទាន់ស្គាល់ខ្នុរច្បាស់ផង បែរជាតាំងខ្លួនជាអ្នកជំនាញខាងកសិកម្ម

2025/01/28 08:43:05 am        124
Facebook Telegram Linkin
អ្នកវិភាគភូមិសាស្រ្តនយោបាយ និងអ្នកនយោបាយនៅកម្ពុជា បានចំអកឱ្យទណ្ឌិតក្បត់​ជាតិ​បី​ជំនាន់ សម រង្ស៊ី អតីតមេដឹកនាំបក្សប្រឆាំងដែលកំពុងនិរទេសខ្លួន​នៅក្រៅប្រទេសដែល​បានតាំងខ្លួនជាអ្នកជំនាញខាងកសិកម្ម ខណៈទណ្ឌិតរូបនេះមិនទាន់ស្គាល់ផ្លែខ្នុរច្បាស់លាស់នៅឡើយ។លោក ថុង ម៉េងដាវីត អ្នកវិភាគភូមិសាស្រ្តនយោបាយ និងសន្ដិសុខបានថ្លែងថា៖«បើតាមការកត់សម្គាល់របស់ខ្ញុំកន្លងមកនេះ លោក សម រង្ស៊ី មិនដែលចុះទៅដល់វាលស្រែ ឬក៏ចុះទៅជួបកសិករបែបសម្លៀកបំពាក់បែបអ្នកស្រែនៅតាមមូលដ្ឋានម្ដងណាទេ ប៉ុន្ដែបើគាត់ចុះទៅ គឺពាក់អាវធំ ក្រវ៉ាត់ករ និងស្បែកជើងប៊ូឡើងខ្មៅរលោង»។ក្នុងន័យនេះ លោកចង់បង្ហាញថា៖«លោក សម រង្ស៊ី មានកំណើតកើតជាពីកូនអភិជន តែគាត់តាំងខ្លួនជាបណ្ឌិតខាងកសិកម្ម ទាំងដែលខ្លួនមិនដែលស្គាល់រសជាតិជីវភាពជាកសិករ និងមិនបានស្គាល់ស្ថានភាពកសិករយ៉ាងណានោះទេ។ ដូច្នេះទោះជាគាត់ជាអ្នកនយោបាយក៏ដោយ តែគាត់មិនបានដឹងស៊ីជម្រៅពីកសិកម្មនោះទេ តែគាត់ដឹង គឺដឹងតាមរយៈកូនចៅគាត់រាយការណ៍ប្រាប់គាត់ប៉ុណ្ណោះ»។អ្នកវិភាគរូបនេះបានបន្ថែមថា ទណ្ឌិត សម រង្ស៊ី ជាអ្នកនយោបាយដែលចេះគ្រប់រឿង និងជាអ្នកជំនាញស្ទើគ្រប់វិស័យ ដើម្បីប្រមូលលេសផ្សេងៗយកមកដាក់បន្ទុកលើរាជរដ្ឋាភិបាល។ ការបញ្ចេញមតិយោបល់របស់គាត់ គឺមានចេតនាបួលបង្កាច់ លាបពណ៌ និងញុះញង់ពលរដ្ឋឱ្យមានការរើសអើងរាជរដ្ឋាភិបាល ក្នុងគោលបំណងចង់ឱ្យមានចលាចលនៅក្នុងសង្គម ដើម្បីគាត់មានឱកាសវិលចូលស្រុកវិញតែប៉ុណ្ណោះ។ចំណែកប្រធានគណបក្សខ្មែរតែមួយ លោក គុជ លី បានថ្លែងថា៖«ខ្ញុំបានឃើញវីឌីអូគាត់ពន្យយល់ពីផ្លែខ្នុរហ្នឹងដែរ និងការពន្យល់លើហ្វេសប៊ុកគាត់។ ក្ដិបខ្នុរ សម រង្ស៊ី ហៅថា កូនខ្នុរ ហើយផ្លែខ្នុរ សម រង្ស៊ី ហៅថា មេខ្នុរ ហើយខ្ញុំមើលហើយក៏ហួសចិត្តដែរ។ ពីបរមបុរាណមក គ្មានទេពាក្យថា«កូនខ្នុរ» មានតែពាក្យថា «ក្តិបខ្នុរ» ឬសម រង្ស៊ី ចង់បង្កើតពាក្យថ្មីសម្រាប់អ្នកគាំទ្ររបស់ខ្លួនប្រើជំនួសពាក្យថា ក្តិបខ្នុរ»។លោកបានចោទជាសំនួរមួយថា បើត្រឹមតែការពន្យល់ពីរឿងខ្នុរធ្វើមិនកើតផង តើឱ្យរៀបចំយុទ្ធសាស្ត្រនយោបាយកសិកម្ម និងដឹកនាំប្រទេសយ៉ាងដូចម្តេច? សម រង្ស៊ី មិនដែលស្គាល់ពីការលំបាករបស់កសិករ ហើយក៏មិនយល់ច្បាស់ពីរបៀបបង្កបង្កើតផលកសិកម្មនោះទេ ហើយក៏មិនសាកសមជាអ្នកដឹកនាំប្រទេសដែរ។លោកបន្តថា ការសរសេររៀបរាប់នៅលើបណ្ដាញសង្គមរបស់លោក សម រង្ស៊ី គឺជាអ្វីដែលរាជរដ្ឋាភិបាលក្រោមការដឹកនាំរបស់សម្ដេចបវរធិបតី ហ៊ុន ម៉ាណែត កំពុងអនុវត្តយ៉ាងយកចិត្តទុកដាក់តាមរយៈក្រសួងកសិកម្ម រុក្ខាប្រមាញ់ និងនេសាទដែលជាសេនាធិការសំខាន់របស់រាជរដ្ឋាភិបាល។ថ្លែងក្នុងពិធីសម្ពោធដាក់ឱ្យប្រើប្រាស់«សមិទ្ធផលនានា ក្នុងភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់» កាលពីថ្ងៃទី ២០ ខែមករាឆ្នាំ២០២៥ សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានមានប្រសាសន៍ថា រាជរដ្ឋាភិបាលមិនបានទុកប្រជាពលរដ្ឋចោល នៅពេលពលរដ្ឋកំពុងមានទុកកង្វល់ក្នុងការធ្វើកសិកម្មនោះទេ។សម្ដេចបានបញ្ជាក់ទៀតថា រាជរដ្ឋាភិបាល មិនត្រឹមតែគិតគូរពីតម្លៃទីផ្សារនៃការធ្វើកសិកម្មតែមួយមុខនោះទេ ប៉ុន្តែថែមទាំងបាននិងកំពុងជំរុញការវិនិយោគឱ្យកាន់តែច្រើន ដើម្បីបង្កើនការងារ និងបង្កើនប្រាក់ចំណូលឱ្យកាន់តែច្រើនបន្តទៀតផងដែរសម្រាប់ប្រជាពលរដ្ឋ។សម្ដេចបវរធិបតី ហ៊ុន ម៉ាណែត ក៏បានប្រកាសថា រាជរដ្ឋាភិបាលបានតម្លើងឥណទានរហូតដល់ ១៥០លានដុល្លារអាមេរិក ដើម្បីប្រមូលទិញស្រូវពីកសិករ ដើម្បីឆ្លើយតបទៅនឹងវិបត្តិស្រូវធ្លាក់ថ្លៃនៅក្នុងប្រទេស និងថា ការទម្លាក់លុយ១៥០លានរបស់រដ្ឋ ក៏ដើម្បីធានាថា ម្ចាស់រោងម៉ាស៊ីនកិនស្រូវមានលទ្ធភាពគ្រប់គ្រាន់ក្នុងការទៅខ្ចីលុយពីធនាគារឯកជន ដើម្បីប្រមូលទិញស្រូវពីកសិករឱ្យមានប្រសិទ្ធភាព៕

គណៈប្រតិភូជប៉ុន១២០នាក់ ទស្សនកិច្ចអាកាសយានដ្ឋានអន្តរជាតិតេជោ ខណៈការសាងសង់សម្រេចបានជាង ៩៤%

2025/01/27 02:37:57 pm        210
Facebook Telegram Linkin
ភ្នំពេញ៖ ក្រុមគណៈប្រតិភូជប៉ុនសរុបចំនួន១២០នាក់ ដឹកនាំដោយ ឯកឧត្តម អូអ៊ិណូ អាត់ស៊ូហ្ស៉ី (UENO Atsushi) ឯកអគ្គរាជទូតជប៉ុនប្រចាំនៅកម្ពុជា នៅព្រឹកថ្ងៃទី២៧ ខែមករា ឆ្នាំ២០២៥នេះ បានអញ្ជើញទស្សនកិច្ច ដើម្បីពិនិត្យវឌ្ឍនភាពអាកាសយានដ្ឋានអន្តរជាតិតេជោ ក្រុងតាខ្មៅ ខេត្តកណ្តាល ខណៈគ្រោងដាក់ឱ្យដំណើរការនៅខែកក្កដាខាងមុខនេះ។ ឯកឧត្តម ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានមានប្រសាសន៍ប្រាប់ក្រុមអ្នកសារព័ត៌មាន ក្រោយចប់កម្មវិធីនេះ ឲ្យដឹងថា ដំណើរទស្សនកិច្ចដែលដឹកនាំដោយ ឯកឧត្តម ឯកអគ្គរាជទូតនេះ គឺមានការចូលរួមពីអង្គការ ចាយកា (JICA) និងក្រុមហ៊ុនមកពីជប៉ុនចំនួន ៥៨ក្រុមហ៊ុន។ ឯកឧត្តម បានបន្តថា ទន្ទឹមនេះ រដ្ឋាភិបាលជប៉ុន បានសន្យាថា នឹងបន្តធ្វើការជាមួយក្រុមហ៊ុនអាកាសចរណ៍នៅជប៉ុន ដើម្បីលើកទឹកចិត្តឲ្យមានជើងហោះហើរត្រង់ រវាងកម្ពុជា-ជប៉ុន នៅថ្ងៃអនាគតខាងមុខ។ឯកឧត្តម នាយកគ្រប់គ្រង បានបញ្ជាក់ថា ជាលទ្ធផលក្រោយពីបានពិនិត្យដោយផ្ទាល់នៅព្រលានយន្តហោះថ្មីនៅថ្ងៃនេះ ក្រុមហ៊ុនទាំងអស់របស់ជប៉ុន និងគណៈប្រតិភូជប៉ុនផ្សេងទៀត បានបង្ហាញអារម្មណ៍រំភើបសប្បាយចិត្តយ៉ាងខ្លាំង និងមិននឹកស្មានថា ប្រទេសកម្ពុជាអាចសាងសង់ព្រលានយន្តហោះអន្តរជាតិខ្នាត 4F ខណៈបច្ចុប្បន្ន ក្រុមការងារសាងសង់សំខាន់ៗជាច្រើន បានប្រមូលផ្តុំគ្នាដើម្បីធ្វើកិច្ចការទាំងនេះ និងកិច្ចការលម្អិតជាច្រើនផ្សេងៗទៀត។គម្រោងវិនិយោគអាកាសយានដ្ឋានអន្តរជាតិតេជោ មានទុនវិនិយោគប្រមាណ ១ ៥០០លានដុល្លារ ពីការវិនិយោគរួមគ្នា រវាងក្រុមហ៊ុនវិនិយោគទុនអាណិកជនកម្ពុជា អូស៊ីអាយស៊ី (OCIC) និងរដ្ឋាភិបាលកម្ពុជា។ អាកាសយានដ្ឋានអន្តរជាតិតេជោ មាន៣ដំណាក់កាល ដូចជា៖ ទី១. សាងសង់រួចរាល់នៅឆ្នាំ២០២៥ អាចទទួលអ្នកដំណើរបានប្រមាណ ១៣លាននាក់ក្នុងមួយឆ្នាំ, ទី២. នឹងបញ្ចប់នៅឆ្នាំ២០៣០ ដែលអាចទទួលបានអ្នកដំណើរប្រមាណជា ៣០លាននាក់ ក្នុងមួយឆ្នាំ និងដំណាក់កាលទី៣ចុងក្រោយ នឹងបញ្ចប់នៅឆ្នាំ២០៥០ អាចនឹងទទួលបានអ្នកដំណើររហូតដល់ ៥០លាននាក់ ក្នុងមួយឆ្នាំ។យោងតាមការចុះផ្សាយរបស់សារព័ត៌មាន CNN កាលពីដើមខែមករាកន្លងទៅនេះ អាកាសយានដ្ឋានអន្តរជាតិតេជោ ត្រូវបានជាប់ឈ្មោះ ជាសំណង់ស្ថាបត្យកម្មដ៏អស្ចារ្យបំផុតមួយក្នុងចំណោម ១១ស្ថាបត្យកម្ម ដ៏អស្ចារ្យបំផុតនៅលើពិភពលោក ដោយដាក់ទីតាំងព្រលានយន្តហោះតេជោនៅជួរមុខនៃការរចនាប្រកបដោយភាពច្នៃប្រឌិត និងនិរន្តរភាព។ អាកាសយានដ្ឋានអន្តរជាតិតេជោ នឹងមកជំនួយអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ដងលើសព្រលានបច្ចុប្បន្ន៕ អត្ថបទ៖ ឈិត បូរ៉ាវី 

មកដល់ពេលនេះ អាកាសយានដ្ឋានអន្តរជាតិតេជោសម្រេចការសាងសង់បានជាង ៩៤%

2025/01/27 12:09:00 pm        151
Facebook Telegram Linkin
គិតត្រឹមថ្ងៃទី២៧ ខែមករានេះ អាកាសយានដ្ឋានអន្តរជាតិតេជោ ស្ថិតនៅក្រុងតាខ្មៅ ខេត្តកណ្តាល សម្រេចការសាងសង់បានជាង ៩៤% ដោយចំណាយថវិកាប្រមាណជិត ១ ពាន់ ៤០០លានដុល្លារ និងគ្រោងដាក់ឱ្យដំណើរការនៅខែកក្កដា ឆ្នាំ២០២៥ខាងមុខ។នៅព្រឹកថ្ងៃទី២៧ ខែមករា ឆ្នាំ ២០២៥នេះ ឯកឧត្តម អូអ៊ិណូ អាត់ស៊ូហ្ស៊ី ឯកអគ្គរាជទូតជប៉ុនប្រចាំនៅកម្ពុជា បានដឹកនាំអង្គការ ក្រុមហ៊ុនជប៉ុនធំៗ ចំនួន ១១០នាក់ អញ្ជើញទស្សនកិច្ច អាកាសយានដ្ឋានអន្តរជាតិតេជោ ដើម្បីពិនិត្យពីវឌ្ឍនភាពអាកាសយានដ្ឋានអន្តរជាតិនេះ។សូមបញ្ជាក់ថា កាលពីដើមខែមករាកន្លងទៅ យោងតាមការចុះផ្សាយរបស់សារព័ត៌មានបរទេស CNN បានបញ្ជាក់ថា អាកាសយានដ្ឋានអន្តរជាតិតេជោ ត្រូវបានជាប់ឈ្មោះ ជាសំណង់ស្ថាបត្យកម្មដ៏អស្ចារ្យបំផុតមួយក្នុងចំណោមសំណង់ស្ថាបត្យកម្មដ៏អស្ចារ្យបំផុតចំនួន ១១ នៅលើពិភពលោកសម្រាប់ឆ្នាំ២០២៥នេះ ខណៈព្រលានយន្តហោះតេជោបានរចនាប្រកបដោយភាពច្នៃប្រឌិត និងនិរន្តរភាព។ អាកាសយានដ្ឋានអន្តរជាតិតេជោ នឹងមកជំនួយអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរបានរហូតដល់ទៅ ៦ ដងលើសព្រលានបច្ចុប្បន្ន។គម្រោងវិនិយោគអាកាសយានដ្ឋានអន្តរជាតិតេជោ មានទុនវិនិយោគប្រមាណ ១ ៥០០ លានដុល្លារពីការវិនិយោគរួមគ្នារវាងក្រុមហ៊ុនវិនិយោគទុនកម្ពុជា អូស៊ីអាយស៊ី (OCIC) និងរដ្ឋាភិបាលកម្ពុជា៕ អត្ថបទ៖ បូរ៉ាវី

ទេសរដ្ឋមន្ត្រី គន់ គីម៖ ទំនាក់ទំនងកម្ពុជា-ចិន បន្តពង្រឹងពីមិត្តភាពដែកថែប ដើម្បីជាប្រយោជន៍សម្រាប់ប្រទេសទាំងពីរ

2025/01/27 10:33:45 am        198
Facebook Telegram Linkin
ភ្នំពេញ៖ នៅថ្ងៃទី២៧ ខែមករា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តីទទួលបន្ទុកបេសកកម្មពិសេស បានដឹកនាំគណ:ប្រតិភូ គណៈកម្មាធិការជាតិគ្រប់គ្រងគ្រោះមហន្តរាយ និងសមាគមអតីតយុទ្ធជនកម្ពុជា ដើម្បីជូនពរឆ្នាំថ្មីប្រពៃណីចិនជូនចណពោះ ឯកឧត្តម វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា នៅស្ថានទូតចិន។ក្នុងឱកាសនោះ ឯកឧត្តម ទេសរដ្ឋមន្រ្តី បានវាយតម្លៃខ្ពស់ចំពោះកិច្ចសហប្រតិបត្តិការ និងទំនាក់ទំនងមិត្តភាពជាប្រពៃណី កម្ពុជា-ចិន បានបន្តការពង្រឹងពីមិត្តភាពដែកថែប និងបានរួមចំណែកក្នុងការជំរុញ ការអភិវឌ្ឍសង្គម-សេដ្ឋកិច្ចកម្ពុជាឱ្យកាន់តែមានការរីកចម្រើន។ឯកឧត្តម វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានលើកឡើងថា ប្រទេសកម្ពុជាជាមិត្តល្អ មិត្តភក្តិពិតប្រាកដរបស់ចិន ហើយចិននឹងបន្តជួយកម្ពុជាបន្ថែមទៀតដើម្បីជំរុញឱ្យទំនាក់ទំនងប្រទេសទាំងពីរកាន់តែរឹងមាំមួយកម្រិតថែមទៀតជាពិសេសលើការងារគ្រប់គ្រងគ្រោះមហន្តរាយ និងអតីតយុទ្ធជន។ឯកឧត្តម បន្តថា ក្នុងរយៈពេល៦៦ឆ្នាំកន្លងមកនេះ ប្រទេសកម្ពុជា និងចិនតែងតែជួយឧបត្ថម្ភគាំទ្រគ្នាគ្រប់កាលៈទេសៈ ហើយគោរពស្រលាញ់គ្នាទៅវិញទៅមក រួមសុខរួមទុក្ខជាមួយគ្នា បង្កើតបានជាគម្រូដ៏ល្អមួយនៃទំនាក់ទំនងអន្តរជាតិ។ឯកឧត្តម ទេសរដ្ឋមន្រ្តី ក៏បានថ្លែងអំណរគុណដល់បក្ស រដ្ឋាភិបាល និងកងទ័ពរំដោះប្រជាជនចិន ដែលជានិច្ចកាលតែងយកចិត្តទុកដាក់ជួយកម្ពុជា ក្ន្ងការកាការពារសន្តិភាព និងអភិវឌ្ឍន៍លើគ្រប់វិស័យ ធ្វើឱ្យកម្ពុជាម្ចាស់ការដោយខ្លួនឯង មានភាពរឹងមាំ និងស្មើមុខស្មើមាត់ដូចបណ្ដាប្រទេសលើសកលលោក។ជាទីបញ្ចប់ ឯកឧត្តម ទេសរដ្ឋមន្រ្តី បានជូនពរដល់ឯកឧត្តម វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា និងក្រុមគ្រួសារ ព្រមទាំងសហការី សូមមានសុខភាពល្អ កម្លាំងមាំមួន សុភមង្គល និងជោគជ័យគ្រប់ភារកិច្ចដែលរដ្ឋ និងបក្សប្រគល់ជូន៕

CPP៖ លទ្ធិប្រជាធិបតេយ្យ និងនីតិរដ្ឋនៅកម្ពុជា​ត្រូវបានការពារ​យ៉ាងរឹងមាំ​រួមទាំង​គោរព​សិទ្ធិ​សេរីភាព​គ្រប់យ៉ាងរបស់ពលរដ្ឋ

2025/01/27 10:19:45 am        139
Facebook Telegram Linkin
នៅក្នុងសន្និបាតគណៈកម្មាធិការកណ្តាលលើកទី៤៥ អាណត្តិទី៥របស់ខ្លួន គណបក្ស​ប្រជាជន​កម្ពុជា ដែលជាគណបក្សដ៏ធំជាងគេនៅកម្ពុជានោះ បានវាយតម្លៃថា លទ្ធិប្រជាធិបតេយ្យ និង​នីតិ​រដ្ឋ​នៅ​កម្ពុជា ត្រូវបានការពារយ៉ាងរឹងមាំ និងអភិវឌ្ឍឥតឈប់ឈរ ដែលបាន​ធានា​ដល់​ការ​ពង្រឹង​សន្តិភាព សណ្តាប់ធ្នាប់ សាធារណៈ ការអភិវឌ្ឍសេដ្ឋកិច្ច -សង្គម និងការ​គោរព​នូវ​សិទ្ធិ​សេរី​ភាព​គ្រប់​យ៉ាង​របស់​ប្រជាពលរដ្ឋជា ដើមនោះ។យោងតាមសេចក្តីជូនដំណឹង ស្តីពីលទ្ធផលនៃសន្និបាតគណៈកម្មាធិការកណ្តាលលើកទី៤៥ អាណត្តិ​ទី៥ របស់គណបក្សប្រជាជនកម្ពុជា ដែលបានប្រព្រឹត្តទៅចាប់ពីថ្ងៃទី២៥ដល់ថ្ងៃទី២៦ ខែ​មករា ឆ្នាំ២០២៥នេះ បានលើកឡើងថា អង្គសន្និបាត​បាន​កត់​សម្គាល់​ប្រកប​ដោយ​មោទន​ភាព​ចំពោះ​សភាពការណ៍ទូទៅ ក្នុងឆ្នាំ២០២៤ ដែលធានាដល់ដំណើរការអភិវឌ្ឍសេដ្ឋកិច្ច សង្គម និង​ការ​រស់នៅដ៏សុខសាន្ត របស់ប្រជាជនកម្ពុជានៅក្រោមម្លប់នៃសន្តិភាព។នៅក្នុងអំឡុងពេលនោះ ទោះបីត្រូវជួបការលំបាកជាច្រើនក្តី ក៏រាជរដ្ឋាភិបាលសម្រាប់អាណត្តិទី៧ នីតិកាល​នៃរដ្ឋសភា ដែលជារាជរដ្ឋាភិបាលបន្តវេនរបស់គណបក្សប្រជាជនកម្ពុជា បានបំពេញ​បេសក​កម្ម​ដ៏​ឧត្តុង្គឧត្តមជាប្រវត្តិសាស្រ្តរបស់ខ្លួនដោយជោគជ័យ ក្នុងការដឹកនាំ​អនុវត្ត​កម្ម​វិធី​នយោបាយ និងយុទ្ធសាស្រ្តបញ្ចកោណ-ដំណាក់កាលទី១ ដែលបាន​ឆ្លើយ​តប​ទៅ​នឹង​សេចក្តី​សង្ឃឹម និងការជឿជាក់របស់ប្រជា ជន។ ជាក់ស្តែង«សន្តិភាព សណ្តាប់ធ្នាប់ និង​សុវត្ថិភាព​សង្គម​មាន​ភាព​រឹងមាំ ព្រមជាមួយនឹងការធានា បាននូវស្ថិរភាពម៉ាក្រូសេដ្ឋកិច្ច ស្ថិរភាពហិរញ្ញ​វត្ថុ​សាធារណៈ និងស្ថិរភាពនៃជីវភាពរស់នៅរបស់ប្រជាជន។ ជាមួយគ្នានេះទំនាក់ទំនងមិត្តភាព និង​កិច្ច​សហប្រតិបត្តិការជាមួយបណ្តាប្រទេស និងដៃគូអភិវឌ្ឍន៍នានា កាន់តែមានតម្រូវការ និង​ពង្រីក​ឡើង»។តាមរយៈសេចក្តីជូនដំណឹងរបស់អង្គសន្និបាតបានលើកឡើងទៀតថា«លទ្ធិប្រជាធិបតេយ្យ និង នីតិ​រដ្ឋនៅកម្ពុជាត្រូវបានការពារយ៉ាងរឹមមាំ» ហើយបណ្តាគណបក្សនយោបាយ អង្គការ​សង្គម​ស៊ីវិល ប្រព័ន្ធព័ត៌មាន និងបណ្តា​មជ្ឈ​ដ្ឋាន​ចម្រើន​ជឿន​លឿន​ក្នុង​សង្គម​បាន​ចូល​រួម​យ៉ាង​សកម្ម​នៅ​ក្នុង​ដំណើរការនេះ។ ក្នុងស្មារតីលើកកម្ពស់វប្បធម៌សន្ទនា កិច្ចព្រមព្រៀង ស្តីពីកិច្ច​សហ​ប្រតិបត្តិ​ការ និងសម្ព័ន្ធភាពរវាង បណ្តាគណបក្សនយោបាយ ដែលគណបក្ស​ប្រជាជន​កម្ពុជា​បាន​ធ្វើ​​កា​ររួមជាមួយគណបក្សនយោបាយ ផ្សេងៗចំនួន២៧ទៀត ត្រូវបានអនុវត្តយ៉ាងខ្ជាប់ខ្ជួន។ ជា​មួយ​គ្នានេះគណបក្សប្រជាជនកម្ពុជាបានលើកឡើងទៀតថា សុខដុមនីយកម្មរវាងបណ្តាជន ជាតិ វប្បធម៌ និងជំនឿសាសនានានា ក្នុងសង្គមក៏កាន់តែត្រូវបានពង្រឹងឡើងជាបន្តបន្ទាប់ផងដែរ។ដោយឡែកការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើស រើស​ក្រុម​ប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ បានប្រព្រឹត្ត​ទៅ​ប្រក​ប​ដោយលក្ខណៈសេរី ត្រឹមត្រូវ និងយុត្តិធម៌។ ប្រការទាំងនេះហើយ បានបញ្ជាក់​អំពី​វិសាល​ភាព​ដ៏​ទូលំ​ទូលាយ ​នៃលំហប្រជាធិបតេយ្យ និងភាពចាស់ទុំនយោបាយនៃសង្គមកម្ពុជានោះ៕ អត្ថបទ៖ បាន ចក់

គណបក្សប្រជាជនប្តេជ្ញាគោរពយ៉ាងម៉ឺងម៉ាត់ធម្មនុញ្ញអង្គការសហប្រជាជាតិ និងរដ្ឋធម្មនុញ្ញ​របស់កម្ពុជា

2025/01/27 09:44:55 am        135
Facebook Telegram Linkin
គណបក្សប្រជាជនកម្ពុជា បានអះអាងជាថ្មីម្តងទៀតថា ខ្លួនប្តេជ្ញា​គោរព​ឲ្យ​បាន​យ៉ាង​ម៉ឺង​ម៉ាត់​បំផុត​ចំពោះធម្មនុញ្ញរបស់អង្គការសហប្រជាជាតិ និងរដ្ឋធម្មនុញ្ញរបស់កម្ពុជា ហើយថែម​ទាំង​អនុវត្ត​យ៉ាង​សកម្មផងដែរនូវទិសដៅគោលនយោបាយការបរទេស ដោយ​ប្រកាន់​ខ្ជាប់​នូវ​នយោបាយ​ការបរទេសឯករាជ្យផ្អែកលើច្បាប់អន្តរជាតិ និងផ្អែកលើផលប្រយោជន៍ជាតិជាធំ។យោងតាមសេចក្តីជូនដំណឹង ស្តីពីលទ្ធផលនៃសន្និបាតគណៈកម្មាធិការកណ្តាលលើកទី៤៥ អាណត្តិ​ទី៥ របស់គណបក្សប្រជាជនកម្ពុជា ដែលបានប្រព្រឹត្តទៅចាប់ពីថ្ងៃទី២៥ដល់ថ្ងៃទី២៦ ខែ​មករា ឆ្នាំ២០២៥នេះ បានលើកឡើងថា «អង្គសន្និបាត​ជំរុញ​ការ​អនុវត្ត​យ៉ាង​សកម្ម​នូវ​ទិស​ដៅ​គោល​នយោបាយ ការបរទេសសំខាន់ៗរួមមាន៖ (១)ប្រកាន់ខ្ជាប់នូវនយោបាយការបរទេសឯករាជ្យផ្អែកលើច្បាប់អន្តរជាតិ និងផ្អែកលើផល​ប្រយោជន៍​ជាតិ ជាពិសេសគោរពយ៉ាងម៉ឹងម៉ាត់ធម្មនុញ្ញអង្គការសហប្រហជាជាតិ និងធម្ម នុញ្ញ​របស់ព្រះរាជាណាចក្រកម្ពុជា,(២)មិនអនុញ្ញាតឲ្យមានការជ្រៀតជ្រែកចូលកិច្ចការផ្ទៃក្នុងរបស់កម្ពុជា ជាដាច់ខាត និងមិនដោះដូរអធិបតេយ្យជាតិជាមួយជំនួយ ឬភាពអនុគ្រោះណាឡើយ,(៣) គាំទ្រ​ការ សន្ទនា និងការទូតក្នុងការដោះស្រាយជម្លោះដោយសន្តិវិធី ព្រមទាំង​ប្រកាន់​ខ្ជាប់​គោល​ការណ៍​ទាំង៣ ក្នុង ការចូលរួមក្នុងយុទ្ធសាស្រ្តឥណ្ឌូ-បាស៊ីហ្វិកនានា ពោលគឺទី១-ជាយុទ្ធសាស្រ្ត​ដែល​គាំ​ទ្រដល់សន្តិភាព និងការអភិវឌ្ឍ, ទី២-មិនប្រើប្រាស់យុទ្ធសាស្រ្តនោះ ដើម្បីប្រ​ឆាំង​ប្រទេស​ដទៃ និងទី៣-គាំទ្រមជ្ឈភាពអាស៊ាន និងទស្សន វិស័យឥណ្ឌូ-បាស៊ីហ្វិក, និង(៤)បន្ត​គាំទ្រ​ប្រព័ន្ធពហុភាគីដែលបើកចំហ សេរី បរិយាបន្ន យុត្តិ ធម៌ មានតម្លាភាព និងផ្អែកលើច្បាប់ តាមរយៈ​ការប្រើប្រាស់ឲ្យអស់ពីសក្តានុពលនូវភាពជាសមាជិករបស់ កម្ពុជា នៅក្នុងអាស៊ាន ក៏​ដូច​ជា​ក្នុង​អង្គការតំបន់ និងអន្តរជាតិដទៃ រួមចំណែកយ៉ាងសកម្មក្នុងបុព្វហេតុ សន្តិភាព និងមនុស្ស​ធម៌»​។ តាមរយៈយោងតាមសេចក្តីជូនដំណឹងអង្គសន្និបាតក៏បានក៏បានដាក់ចេញនូវទិសដៅសំខាន់ៗនៅ ក្នុង​ឆ្នាំ២០២៥នេះដែរ ដោយពង្រឹងជាធ្លុងមហាសាមគ្គីជាតិក្រោមដំបូលធម្មនុញ្ញ និងបាវចនា ជាតិ សាសនា ព្រះមហាក្សត្រ ការពារយ៉ាងរឹងមាំនូវឯករាជ្យ អធិបតេយ្យ និង​បូរណ​ភាព​ទឹក​ដី​របស់​កម្ពុជា។ ការ ពារដាច់ខាតនូវសន្តិភាព ស្ថិរភាពនយោបាយ និងសន្តិសុខជាតិ មិនឲ្យកម្លាំង​អមិត្ត​ណា ឬក្រុមជ្រុលនិយម ណាមកបង្កកលិយុគបំផ្លាញការអភិវឌ្ឍ និងសេចក្តីសុខ​របស់​ប្រជាជន​កម្ពុជា​នោះឡើយ។ក្នុងស្មារតីនេះ​គណបក្សប្រជាជនកម្ពុជា បន្តលើកកម្ពស់​ការ​អនុវត្ត​ពាក្យ​ស្លោក​«អរគុណ​សន្តិភាព! អរគុណនយោបាយ ឈ្នះ ឈ្នះ! ដឹងគុណស្ថាបនិក មគ្គុទេសក៍ឯក និងប្រតិបត្តិការ​នយោបាយ​ឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ!»។ បំផុ​ស​ស្មារតី​ប្រជាជន​ទាំងមូលឲ្យយល់ច្បាស់អំពី«គុណតម្លៃនៃសុខសន្តិភាព»ហើយចូលរួមថែរក្សា ​និង​ការ​ពារ​​ឲ្យ​បានដាច់ខាតនូវ«សុខសន្តិភាព» ដែលជាអាយុជីវិតរបស់ជាតិ និង​ជា​គ្រឹះស្ថាន​ដ៏មាន​តម្លៃ​បំផុត​សម្រាប់​ការអភិវឌ្ឍជាតិ និងភាពសុខ សាន្តរបស់ប្រជាជនកម្ពុជា៕ អត្ថបទ៖ បាន ចក់

សម្តេចធិបតី៖ ប្រព័ន្ធធារាសាស្ត្រទំនប់កំពង់គោមានសក្តានុពលស្រោចស្រព​លើផ្ទៃដីបង្កបង្កើនផលប្រមាណ ៣ម៉ឺនហិកតា

2025/01/25 02:46:45 pm        178
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានឲ្យដឹងថា គម្រោងសាងសង់ប្រព័ន្ធធារាសាស្ត្រទំនប់កំពង់គោ ដែលគ្របដណ្ដប់ក្នុងក្រុង-ស្រុកចំនួន៥ នៃខេត្តកំពង់ធំ ដែលរួមមាន ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់នោះ មានសក្តានុពលស្រោចស្រពលើផ្ទៃដីបង្កបង្កើនផលប្រមាណបីម៉ឺនហិកតា ខណៈគម្រោងនេះកំពុងសាងសង់បានប្រមាណ១០ភាគរយហើយ នោះ។ តាមរយៈឆាណែលតេលេក្រាមនារសៀលថ្ងៃទី២៥ ខែមករា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីបានបានលើកឡើងថា គម្រោងសាងសង់ប្រព័ន្ធធារាសាស្ត្រទំនប់កំពង់គោ នៅផ្នែកខាងក្រោមតាមបណ្តោយស្ទឹងសែន ស្ថិតនៅក្នុងភូមិកំពង់គោលើ ឃុំកំពង់គោ ស្រុកកំពង់ស្វាយ ខេត្តកំពង់ធំ បច្ចុប្បន្នសាងសង់បានប្រមាណ ១០% ហើយ ដោយក្នុងនោះរួមមាន ចាក់បាតធ្វើគ្រឹះ និងចងដែកមុខកប៉ាល់របស់តួសំណង់បានប្រវែងចំនួន ១៥០ម៉ែត្រ និងកំពុងទប់ទឹកស្ទឹងបន្តធ្វើគ្រឹះទៅម្ខាងទៀតផ្នែកខាងឆ្វេងរបស់ស្ទឹងសែនក្នុងប្រវែង ១៥០ ម៉ែត្រទៀតដែលក្នុងរង្វង់រយៈពេល១ខែទៀតនឹងធ្វើគ្រឹះរបស់តួសំណង់ទាំងមូល។  សម្តេចធិបតី នាយករដ្ឋមន្រ្តីបានបញ្ជាក់ថា«គម្រោងសាងសង់ប្រព័ន្ធធារាសាស្ត្រទំនប់កំពង់គោនេះ គ្របដណ្ដប់ក្នុងក្រុង-ស្រុកចំនួន៥ នៃខេត្តកំពង់ធំ ដែលរួមមាន ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់ និងមានសក្តានុពលស្រោចស្រពលើផ្ទៃដីបង្កបង្កើនផល ប្រមាណ ៣០០ ០០០ ហិកតា រួមមានដំណាំស្រូវ និងដំណាំរួមផ្សំគ្រប់ប្រភេទ ព្រមទាំងបម្រើដល់ការប្រើប្រាស់ក្នុងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ»។សូមបញ្ជាក់ថាការងារសំខាន់ៗ នៃគម្រោងសាងសង់ប្រព័ន្ធធារាសាស្ត្រទំនប់កំពង់គោ រួមមាន សំណង់កាត់ស្ទឹងសែនប្រវែង២៨០ម៉ែត្រ សំណង់សិល្បការ្យតូចធំចំនួន ១២០កន្លែង ស្តារស្ទឹងស្លាប់ ២៥គីឡូម៉ែត្រ សាងសង់ទំនប់សណ្តស្ទឹងសែន ៣០គីឡូម៉ែត្រ និងរៀបថ្មជើងទេរច្រាំងស្ទឹង ៥គីឡូម៉ែត្រ៕ អត្ថបទ៖ បាន ចក់

សម្ដេចតេជោ ហ៊ុន សែន អញ្ជើញជាអធិបតីក្នុងពិធីបើកសន្និបាតគណៈកម្មាធិការកណ្ដាលលើកទី៤៥ អាណត្តិទី៥

2025/01/25 11:18:13 am        133
Facebook Telegram Linkin
នៅព្រឹកថ្ងៃសៅរ៍ ទី២៥ ខែមករា ឆ្នាំ២០២៥នេះ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធី បើកសន្និបាតគណៈកម្មាធិការកណ្ដាលលើកទី៤៥ អាណត្តិទីV ដែលប្រារព្ធធ្វើឡើងនៅវិមាន៧មករា ស្នាក់ការកណ្ដាលគណបក្សប្រជាជនកម្ពុជា។ សន្និបាតនេះបានធ្វើឡើងនៅវិមាន៧មករា រយៈពេល២ថ្ងៃ ក្រោមអធិបតីភាព សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា អមដោយអនុប្រធានទាំង៥រូប និងមានសមាជិកគណៈកម្មាធិការកណ្តាលចូលរួម ១១៩១រូប។សន្និបាតនេះ ក៏មានការចូលរួមពីសមាជិក សមាជិការដ្ឋសភា ព្រឹទ្ធសភា មន្ត្រីជាន់ខ្ពស់នៅក្នុងរាជរដ្ឋាភិបាល រាជធានី ខេត្ត និង ក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ ថ្នាក់ដឹកនាំក្រុមការងារចុះមូលដ្ឋានរាជធានី ខេត្ត ថ្នាក់ដឹកនាំអង្គការមហាជនរបស់គណបក្ស ដែលធ្វើឲ្យសមាសភាពដែលបានអញ្ជើញចូលរួមសរុប មានចំនួនសរុប ៣៥៥៥រូបផងដែរ។សន្និបាតគណៈកម្មាធិការកណ្តាលគណបក្សប្រជាជន នឹងធ្វើការពិភាក្សា និងអនុម័តលើការងារសំខាន់ៗគឺ៖១៖ ពិនិត្យឆ្លងសេចក្តីព្រាង «របាយការណ៍ស្តីពីសភាពការណ៍ទូទៅ និងការងារគណបក្សឆ្នាំ ២០២៤ និងទិសដៅភារកិច្ចការងារឆ្នាំ ២០២៥»។២៖ បោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍នៃគណៈកម្មាធិការកណ្តាល មួយចំនួន។ យោងតាមរបាយការណ៍បើកសន្និបាតបានឱ្យដឹងថា ការសម្រេចបើកសន្និបាតគណៈកម្មាធិការកណ្តាលលើកទី ៤៥ នៅពេលនេះ ស្របពេលមួយដែលសភាពការណ៍សកលលោកបាន និងកំពុងវិវត្តប្រែប្រួលមិនប្រាកដប្រជា ម្យ៉ាង គ្រាដែលរាជរដ្ឋាភិបាលនីតិកាលទី៧នៃរដ្ឋសភា ដែលដឹកនាំដោយសម្តេចមហាបរធិបតី ហ៊ុន ម៉ាណែត បាននិងកំពុងខិតខំប្រឹងប្រែងធ្វើឲ្យសម្រេចជាបន្តបន្ទាប់នូវគោលដៅជាយុទ្ធសាស្ត្ររបស់គណបក្ស តាមរយៈការអនុវត្ត “កម្មវិធីនយោបាយរបស់គណបក្សសម្រាប់ការកសាង និងការពារមាតុភូមិពីឆ្នាំ ២០២៣ ដល់ឆ្នាំ ២០២៨” ដែលអនុម័តដោយមហាសន្និបាតវិសាមញ្ញតំណាងទូទាំងប្រទេសរបស់គណបក្សកាលពីថ្ងៃទី ២៨-២៩ ខែមករា ឆ្នាំ ២០២៣ ។ ឈរលើមូលដ្ឋាននេះ រាជរដ្ឋាភិបាលបានកំណត់ដាក់ចេញ និងអនុវត្តដោយរស់រវើកនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី ១ ដោយសម្រេចបានស្នាដៃលេចធ្លោជាទីមោទនៈដូចជា ការពារបានរឹងមាំសន្តិភាព ស្ថិរភាពនយោបាយ ខឿន ឯករាជ្យ អធិបតេយ្យ និងបូរណភាពដែនដី, រក្សាបានល្អប្រសើរ សន្តិសុខ សណ្តាប់ធ្នាប់ សុវត្ថិភាព សង្គម, រក្សាបានស្ថិរភាពជីវភាពប្រជាជន និងសេដ្ឋកិច្ចជាតិមានកំណើនក្នុងរង្វង់ ៦% បានបើកការដ្ឋានសាងសង់ព្រែកជីកហ្វូណនតេជោជាប្រវត្តិសាស្ត្រ បានដោះស្រាយបញ្ហាតំបន់ត្រីកោណ CLV- DTA ដើម្បីពង្រឹងការឯកភាពផ្ទៃក្នុង និងបន្តពង្រឹងកិច្ចសហប្រតិបត្តិការប្រទេសទាំងបី កម្ពុជា-វៀតណាម -ឡាវ។ បានបង្កើតមូលនិធិកសាងហេដ្ឋារចនាសម្ព័ន្ធតាមបណ្តោយព្រំដែន និងបានធ្វើឲ្យបរាជ័យរាល់ ឧបាយកលអាក្រក់របស់ក្រុមជ្រុលនិយមជាដើម។ លើសពីនេះទាំងស្ថាប័ននីតិប្រតិបត្តិ និងស្ថាប័ននីតិប្បញ្ញត្តិ បានរួមគ្នាពង្រឹងពង្រីកបានល្អនូវការងារទំនាក់ទំនងបរទេស ការងារការទូត និងដៃគូអភិវឌ្ឍន៍ ហើយក៏បានធ្វើជាម្ចាស់ផ្ទះ និងជាប្រធានដឹកនាំកិច្ចប្រជុំធំៗជាអន្តរជាតិចំនួន ៤ នៅរាជធានីភ្នំពេញ និងខេត្តសៀមរាប ប្រកបដោយជោគជ័យយ៉ាងត្រចះត្រចង់ ។ អង្គសន្និបាតនៅថ្ងៃនេះក៍ សម្តែងនូវការអបអរសាទរប្រកប ដោយមនោសញ្ចេតនារំភើបរីករាយឥតឧបមាចំពោះសម្តេច តេជោ ហ៊ុន សែន ដែលបានទទួលពានរង្វាន់ មេដាយសន្តិភាពដើម្បីមនុស្សជាតិ និងភពផែនដី ពីសម័យប្រជុំពេញអង្គនៃសភាអន្តរជាតិដើម្បីភាពអត់ឱន និងសន្តិភាពលើកទី១១ និងចំពោះសម្តេចមហាបវរធិបតី ហ៊ុន ម៉ាណែត ដែលបានទទួលពានរង្វាន់ ភាពជាអ្នកដឹកនាំឆ្នើមលើពិភពលោក” ពីមហាសន្និបាតសន្និសីទអន្តរជាតិនៃបណ្តាគណបក្សន បាយនៅអាស៊ី លើកទី១២ ( ICAPP12th) នាពេលថ្មីៗកន្លងមកនេះជាមួយគ្នានេះ អង្គសន្និបាតក៍បានធ្វើការកត់សំគាល់ផងដែរអំពីជោគជ័យជាច្រើនទៀតដែលកម្ពុជាសម្រេចបានក្រោមកិច្ចសហការជួយជ្រោមជ្រែងពីជនរួមជាតិនៅគ្រប់ទិសទី ទាំងក្នុងនិងក្រៅប្រទេស ដែលបានចូលរួមគ្រប់មធ្យោបាយក្នុងការជួយកសាងការពារប្រទេសឲ្យមានការរីកចម្រើនជាលំដាប់៕

គណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា បើកសន្និបាតលើកទី៤៥ អាណត្តិទី៥

2025/01/25 09:40:55 am        159
Facebook Telegram Linkin
គណៈអចិន្ត្រៃយ៍នៃគណៈកម្មាធិការកណ្ដាល គណបក្សប្រជាជនកម្ពុជា នៅព្រឹកថ្ងៃទី២៥ ខែ​មករា ឆ្នាំ២០២៥នេះ បានបើកសន្និបាតគណៈកម្មាធិការកណ្ដាលលើកទី៤៥ អាណត្តិទី៥ ក្រោម​អធិបតី​ភាព​ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ​ប្រធានគណបក្សប្រជាជនកម្ពុជា, សម្ដេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា, សម្ដេចអនុប្រធានគណបក្ស សម្ដេច​អគ្គមហាពញាចក្រីហេង សំរិន ប្រធានកិត្តិយស និងមានការ​អញ្ជើញ​ចូល​រួម​ពី​ឯកឧត្តម​លោក​ជំទាវ លោក លោកស្រី ជា​សមាជិក​សមាជិកា​រដ្ឋសភា​ព្រឹទ្ធសភា​មន្ត្រី​ជាន់​ខ្ពស់​ក្នុង​រាជ​រដ្ឋាភិបាល​ ក្រសួងស្ថាប័ន រាជធានី ខេត្តក្រុងស្រុក ថ្នាក់ដឹកនាំចុះ​មូលដ្ឋាន ​ថ្នាក់​ដឹកនាំ​អង្គ​ការ​មហា​ជន​បក្ស គណៈចិន្ត្រៃយ៍​នៃ​គណៈកម្មាធិការកណ្ដាល​សមាជិក​សមាជិកា​គណបក្ស​ប្រជាជន​កម្ពុជា​ជា​ច្រើន​រូប។ក្នុងឱកាសនោះសម្ដេចអគ្គមហាពញាចក្រី ហេង សំរិន បាន​ថ្លែង​បើក​សន្និ​បាត​ដោយ​បាន​គូស​បញ្ជាក់​ថា ​រាជរដ្ឋាភិបាលបន្តវេនរបស់កម្ពុជាមានអាយុបាន ១៧ខែមកហើយ។ ពិនិត្យ​ជា​រួម​ទោះ​បី​សភាពការណ៍​សកល​លោក​បាន​នឹង​កំពុង​វិវត្តន៍​ប្រែ​ប្រួល​ដោយ​មិន​ប្រាកដ​ប្រជា​យ៉ាង​ណា​ក៏​ដោយ​ក៏​រាជរដ្ឋាភិបាល នីតិការទី៧ នៃរដ្ឋសភាដែលដឹកនាំដោយសម្ដេចមហាបវរធិបតី ហ៊ុន ម៉ាណែត បានខិត​ខំប្រឹង​ប្រែង​ធ្វើ​ឲ្យ​សម្រេច​សមិទ្ធ​ផល​ជា​បន្ត​បន្ទា​ប់​នៅ​គោល​ដៅ​ជា​យុទ្ធ​សាស្ត្រ​របស់​គណបក្ស តាមរយៈការអនុវត្តកម្មវិធីនយោបាយរបស់គណបក្សសម្រាប់ការកសាង និង​ការ​ពារ​មាតុ​ភូមិ​ពីឆ្នាំ២០២៣ ដល់ឆ្នាំ ២០២៨ ដែលអនុម័តដោយ​មហាសន្និបាត​វិសាមញ្ញ​តំណាង​ទូទាំង​ប្រទេស​របស់គណបក្សកាលពីថ្ងៃទី២៨-២៩ ខែមករា ២០២៣។សម្ដេចបានថ្លែងថា លើមូលដ្ឋាននេះ រាជរដ្ឋាភិបាលបានកំណត់ដាក់ចេញ និងអនុវត្ត​ដោយ​រស់​រវើក​នូវ​កម្ម​វិធី​នយោបាយ និងយុទ្ធសាស្ត្របញ្ចកោណដំណាក់កាលទី១ របស់​ខ្លួន​ហើយ​ដែល​នៅ​ឆ្នាំ​ដំបូង​ឆ្នាំ២០២៤ រាជរដ្ឋាភិបាលសម្រេចបានស្នាដៃលេចធ្លោជាទីមោទនៈដូចជា ការពារ​បាន​រឹង​មាំ​សន្តិភាព​ស្ថិរ​ភាពនយោបាយខឿនឯករាជ្យអធិបតេយ្យ និងបូរណភាពដែនដី រក្សា​បាន​ល្អ​ប្រសើរ​សន្តិសុខ​សណ្ដាប់ធ្នាប់សុវត្ថិភាពសង្គម រក្សាបានស្ថិរភាពជីវភាពប្រជាជន និង​សេដ្ឋកិច្ច​ជាតិ​មាន​កំណើន​ក្នុងរង្វង់ ៦% បានបើកការដ្ឋានសាងសង់ព្រែកជីកហ្វូណនតេជោជាប្រវត្តិសាស្ត្រ បាន​ដោះស្រា​យ​បញ្ហាតំបន់ត្រីកោណ CLV-DTA ដើម្បីពង្រឹងការឯកភាពផ្ទៃក្នុង និងបន្ត​ពង្រឹង​កិច្ច​សហ​ប្រតិបត្តិការប្រទេសទាំងបីកម្ពុជា វៀតណាម ឡាវ បានបង្កើត​មូល​និធិ​កសាង​ហេដ្ឋា​រចនា​សម្ព័ន្ធ​តាម​ដល់ព្រំដែន និងបានធ្វើឲ្យបរាជ័យ​រាល់​ឧបាយកល​អាក្រក់​របស់​ក្រុម​ជ្រុល​និយម​ជា​ដើម​។លើសពីនេះទាំងស្ថាប័ននីតិប្រតិបត្តិ និងស្ថាប័ននីតិប្បញ្ញត្តិ បានរួមគ្នាពង្រឹងពង្រីក​បាន​ល្អ​នៅ​ការងារ​ទំនាក់​ទំនង​បរទេសការងារការទូត និងដៃគូអភិវឌ្ឍន៍ហើយក៏បានធ្វើជាម្ចាស់ផ្ទះ និង​ជា​ប្រធាន​ដឹក​នាំ​កិច្ចប្រជុំធំៗជាអន្តរជាតិចំនួន ៤ នៅរាជធានីភ្នំពេញ និងខេត្តសៀមរាប​ប្រកប​ដោយ​ជោគ​ជ័យ​យ៉ាង​ត្រចះត្រចង់។អង្គសន្និបាតក៏បានសម្ដែងនូវការអបអរសាទរប្រកបដោយមនោសញ្ចេតនា រំភើបរីករាយឥត​ឧបមា​ចំពោះ​សម្ដេចអគ្គមហាសេនាបតីតេជោ ហ៊ុន សែន ដែលបានទទួលពាន​រង្វាន់​មេដាយ​សន្តិភាព​ដើម្បី​មនុស្សជាតិ និងភពផែនដី ពីសម័យប្រជុំពេញ​អង្គ​នៃ​សភា​អន្តរជាតិ​ដើម្បី​ភាព​អត់​ឱន​ និង​សន្តិភាពលើកទី១១ និងចំពោះសម្ដេចមហាបវរធិបតី ហ៊ុន ម៉ាណែត ដែលបាន​ទទួល​ពាន​រង្វាន់​ភាព​ជាអ្នកដឹកនាំ​ឆ្នើម​ពិភព​លោក​ពី​មហា​សន្និបាត​សន្និសីទ​អន្តរជាតិ​នៃ​បណ្ដា​ល​គណបក្ស​នយោបាយនៅអាស៊ីលើកទី១២ ។ជាមួយគ្នានេះអង្គសន្និបាតក៏បានអបអរសាទរប្រកបដោយមោទនភាពជាតិខ្ពស់បំផុត ដែល​នៅ​ក្នុង​សម័យ​ប្រជុំពេញអង្គលើកទី៥៤ នៃមហាសន្និបាត​អង្គការ​សហ​ប្រជាជាតិ​នៅ​ទី​ក្រុង​ញូវ​យ៉ក​ថ្ងៃ​ទី១៩ ធ្នូ ២០២៤ ព្រះរាជាណាចក្រកម្ពុជា បានជាប់ឆ្នោតជា​សមាជិក​នៃ​គណៈកម្មាធិការ​ចាត់​តាំង​នៃ​គណៈកម្មការកសាងសន្តិភាពអង្គការសហប្រជាជាតិសម្រាប់អាណត្តិ២០២៥-២០២៦ និង​បាន​អនុម័តសេចក្ដីសម្រេច ( A/79/L.49 ) សម្រាប់ការ​ចាក​ចេញ​របស់​ប្រទេស​កម្ពុជា​ពី​ក្រុម​ប្រទេស​អភិវឌ្ឍន៍​តិចតួច (LDC) ជាផ្លូវការនៅថ្ងៃទី១៩ ខែធ្នូឆ្នាំ២០២៩ នាពេលខាងមុខ។តថ​ភាពខាងលើនេះត្រូវបានបញ្ជាក់ថែមទៀតដោយការប្រារព្ធខួបលើកទី២៦ នៃទិវា​សន្តិភាព​នៅ​កម្ពុជា​ថ្ងៃ​ទី ២៩ ធ្នូ ព្រឹត្តិការណ៍សាទរកម្ពុជា ពេលឆ្លងឆ្នាំសកល ២០២៤-២០២៥ និង​ខួប​លើកទី៤៦ នៃទិវាជ័យជម្នះ៧ មករា។អង្គសន្និបាត​ក៏បានថ្លែងអំណរគុណយ៉ាងជ្រាវជ្រៅចំពោះជនរួមជាតិនៅគ្រប់ទិសទីទាំងក្នុង និង​ក្រៅ​ប្រទេស​ដែល​បាន​ចូលរួម​គ្រប់​មធ្យោបាយ​ក្នុង​ការ​ជួយកសាង​ការពារ​ប្រទេស​ឲ្យ​មាន​ការ​រីក​ចម្រើន ជាលំដាប់។ ព្រមជាមួយនេះអង្គសន្និបាតក៏កោតសរសើរ និងវាយតម្លៃខ្ពស់​ចំពោះ​ថ្នាក់​ដឹ​កនាំ​គណៈកម្មាធិការគណបក្សក្រុមការងារគណបក្សចុះមូលដ្ឋាន និងអង្គការមហាជន​គណបក្ស​គ្រប់​ថ្នាក់​គ្រប់​ផ្នែក​មន្ត្រី និងសមាជិកសមាជិកាគណបក្សទាំងអស់ដែលបានខិតខំប្រឹងប្រែង ធ្វើឲ្យ​សម្រេច​នូវ​រាល់ភារកិច្ចដែលគណបក្សរដ្ឋ និងប្រជាជនប្រគល់ជូន និងថ្លែងអំណរ​គុណ​ដ​ល់​ស្មោះ​ស្ម័គ្រ​បំផុត​ចំពោះ​មិត្ត​ភក្តិ​បរទេស​ជិត​ឆ្ងាយ​ដៃ​គូ​អភិវឌ្ឍន៍​ព្រម​ទាំង​អង្គ​ការ​ជាតិ​អន្តរ​ជាតិ​នានា​ដែល​បាន​រួម​ចំណែក​យ៉ាងធំធេង ចំពោះបុព្វហេតុជាតិនិងប្រជាជនកម្ពុជា។សម្ដេចអគ្គមហាពញាចក្រី ហេង សំរិន បានលើកឡើងថា ការប្រារព្ធពិធី​សន្និបាត​លើ​កនេះ​នឹង​រួម​គ្នា​ពិនិត្យ​នៅរា​ល់ចំណុចជាគុណសម្បត្តិ គុណវិបត្តិ ចំណុចវិជ្ជមាន អវិជ្ជមាន ខ្លាំង ខ្សោយ បញ្ហា​ប្រឈម ចាស់ថ្មី ។ល។ ដើម្បី​លើកមូលដ្ឋាន​នេះ​ស្រង់​បាន​មេរៀន​បទ​ពិសោធន៍​សម្រាប់​ជា​ទិសដៅ​នៃ​ការ​អនុវត្តបន្តទៅទៀត ។អង្គសន្និបាតក៏បានធ្វើការពិភាក្សា និងអនុម័តលើការងារសំខាន់ៗ រួមមាន៖ ១. ពិនិត្យឆ្លង​សេចក្ដី​ព្រាង​របាយការណ៍​ស្ដីពីសភាពការណ៍ទូទៅ និងការងារគណបក្សឆ្នាំ២០២៤ និងទិសដៅភារ​កិច្ច​ការងារ​ឆ្នាំ​២០២៥។ ២. បោះឆ្នោតជ្រើសតាំង​បំពេញ​បន្ថែម​សមាជិក​គណៈ​អចិន្ត្រៃយ៍ នៃ​គណៈកម្មាធិការ​កណ្ដាល​មួយចំនួន៕

អ្នកវិភាគ និងអ្នកឃ្លាំមើល ចង់ឃើញច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តនៅក្នុងសម័យខ្មែរក្រហម ចេញជារូបរាងឱ្យបានឆាប់បំផុត

2025/01/24 05:40:53 pm        303
Facebook Telegram Linkin
អ្នកវិភាគភូមិសាស្រ្តនយោបាយ និងអ្នកឃ្លាំមើលការអភិវឌ្ឍន៍សង្គម បានបង្ហាញសុទិដ្ឋិនិយមចំពោះ«ច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ» ដោយពួកគេចង់ឃើញច្បាប់នេះចេញជារូបរាងឱ្យបានឆាប់បំផុត ដើម្បីផ្តន្ទាទោសបុគ្គលមិនទទួលស្គាល់ និងទប់ស្កាត់កុំឱ្យឧក្រិដ្ឋកម្មនៃរបបនេះត្រឡប់មកវិញ។ការលើកឡើងនេះនៅថ្ងៃទី ២៤ខែមករាឆ្នាំ២០២៥ បន្ទាប់ពីសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានដឹកកិច្ចប្រជុំពេញអង្គគណៈរដ្ឋមន្ត្រី ដើម្បីពិភាក្សាលើសេចក្តីព្រាងច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ, សេចក្តីព្រាងច្បាប់ស្តីពីការចាត់ចែងជាបណ្តោះអាសន្ននូវវត្ថុចាប់យក និងរបាយការណ៍វឌ្ឍនភាពនៃការរៀបចំអនុវត្តកម្មវិធីផ្តល់ដី ការពារព្រៃដើម្បីរួមគ្នាអភិវឌ្ឍដោយចីរភាព។លោក ថុង ម៉េងដាវីត អ្នកវិភាគភូមិសាស្រ្តនយោបាយ និងសន្ដិសុខបានថ្លែងថា៖«ខ្ញុំគាំទ្រចំពោះច្បាប់នេះ ហើយក៏ចង់ឃើញចេញជារូបរាងឱ្យបានឆាប់ដែរ ព្រោះការមិនទទួលស្គាល់ ការបដិសេធ ឬការជំទាស់នឹងអត្ថិភាពនៃឧក្រិដ្ឋកម្ម គឺមិនមែនជាការអនុវត្ដនូវសិទ្ធិសេរីភាពក្នុងការបញ្ចេញមតិនោះទេ»។លោកបន្ថែមថា៖«ការមិនទទួលស្គាល់ឧក្រឹដ្ឋកម្មក្នុងរបបខ្មែរក្រហម គឺជាទង្វើប្រមាថយ៉ាងធ្ងន់ធ្ងរដល់វិញ្ញាណក្ខន្ធអ្នកដែលបានពលី និងដែលបានបាត់បង់ជីវិតនៅក្នុងសម័យដ៏ខ្មៅងងឹត និងធ្វើឱ្យមានការឈឺចាប់ដល់គ្រួសារជនរងគ្រោះដែលនៅរស់រានមានជីវិតរហូតដល់សព្វថ្ងៃនេះ»។អ្នកវិភាគរូបនេះយល់ឃើញថា ពលរដ្ឋកម្ពុជា ទើបទទួលបានយុត្តិធម៌ចំពោះការទទួលរងឧក្រិដ្ឋកម្មដែលរបបកម្ពុជាប្រជាធិបតេយ្យបានប្រព្រឹត្តមកលើខ្លួន ក្រោយពីបិទបញ្ចប់នូវអង្គជំនុំជម្រះវិសាមញ្ញក្នុងតុលាការកម្ពុជា ដែលត្រូវបានបង្កើតឡើងនៅឆ្នាំ២០០១ ដើម្បីកាត់សេចក្តីឧក្រិដ្ឋកម្មដែលបានប្រព្រឹត្តក្នុងរយៈកាលនៃកម្ពុជាប្រជាធិបតេយ្យ។ចំណែកលោក សំ សឿន អ្នកឃ្លាំមើលការអភិវឌ្ឍន៍សង្គម និងនយោបាយបានថ្លែងថា៖«ខ្ញុំក៏ចង់ឱ្យច្បាប់នេះដែរ ខ្ញុំគាំទ្រ ហេតុអីបានជាខ្ញុំគាំទ្រ ព្រោះការមិនទទួលស្គាល់ការកាប់សម្លាប់ពលរដ្ឋស្លូតត្រង់ក្នុងរបបខ្មែរក្រហម គឺជាការប្រមាថជនរងគ្រោះដែលបានស្លាប់ក្នុងរបបខ្មែរក្រហម ហើយមិនអាចផ្ដល់យុត្តិធម៌សម្រាប់សាច់ញ្ញាតិដែលនៅរស់សព្វថ្ងៃនេះដែរ»។លោកបន្តថា ពលរដ្ឋកម្ពុជាមិនចង់ឃើញសង្រ្គាម ឬការវិលត្រឡប់នូវរបបខ្មែរក្រហមនោះទេ ខណៈដែលសន្តិភាព និងការផ្សះផ្សា គឺជាបញ្ហាចម្បងរបស់ពិភពលោក។ លើសពីនេះ ប្រទេសមួយចំនួនកំពុងតែឆាបឆេះសង្រ្គាមយ៉ាងសន្ធោរសន្ធៅនៅតាមតំបន់មួយចំនួន ដោយពាក់ព័ន្ធនឹងតួអង្គប្រកបដោយសក្តានុពលជាច្រើន ដែលគម្រាមកំហែងដល់អរិយធម៌មនុស្សជាតិ។ សម្រាប់កម្ពុជាទើបតែមានសន្តិភាពពេញលេញរយៈពេល ២៦ឆ្នាំនេះ ប៉ុន្ដែលោកបានកត់សម្គាល់ថា នៅតែមានពួកជ្រុលនិយមមួយចំនួនតូចព្យាយាមសាបព្រោះឥតឈប់ឈរនូវនយោបាយសតិអារម្មណ៍ជ្រុលនិយមមកលើសង្គមជាតិកម្ពុជា សំដៅអុជអាល ញុះញង់ បំផុសប្រជាជន កងកម្លាំងប្រដាប់អាវុធ មន្ត្រីរាជការឱ្យធ្វើការប្រឆាំងនឹងរាជរដ្ឋាភិបាលស្របច្បាប់ ដែលនោះគឺជាការគម្រាមកំហែងដល់សន្តិភាព។កម្ពុជាបានអនុម័តច្បាប់នេះម្ដងរួចហើយកាលពីថ្ងៃទី២៥ ខែមិថុនា ឆ្នាំ២០១៣ ហើយបានធ្វើបច្ចុប្បន្នភាពកាលពីថ្ងៃទី២៥ ខែធ្នូ ២០២៤ ខណៈឆ្នាំនេះមាន ៧មាត្រា ហើយដាក់ឱ្យប្រើប្រាស់ជំនួសច្បាប់ចាស់ដែលរដ្ឋសភាអនុម័តកាលពីឆ្នាំ២០១៣។បើតាមទីស្ដីការគណៈរដ្ឋមន្ត្រីបញ្ជាក់ថា ការបង្កើតច្បាប់ខាងលើនេះ គឺផ្អែកទៅលើទិដ្ឋភាពរួមផ្នែកប្រវត្ដិសាស្ដ្រ និងឧក្រិដ្ឋកម្មក្នុងសម័យខ្មែរក្រហមរួមមាន ឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងការរំលោភបំពានធ្ងន់ធ្ងរលើអនុសញ្ញាទីក្រុងហ្សឺណេវឆ្នាំ១៩៤៩ ដែលជាការរំលោភយ៉ាងធ្ងន់ធ្ងរទៅលើច្បាប់ព្រហ្មទណ្ឌកម្ពុជា ការរំលោភទៅលើច្បាប់មនុស្សធម៌អន្ដរជាតិ ព្រមទាំងការរំលោភលើអនុសញ្ញាអន្ដរជាតិដែលកម្ពុជាទទួលស្គាល់៕

បណ្ដាញសង្គម

ព័ត៌មានថ្មីៗ

របរលក់ដូរបន្លែ ផ្លែឈើ តាមទីផ្សារនៅភ្នំពេញរក្សាបានការផ្គត់ផ្គង់គ្រប់គ្រាន់ និងតម្លៃថេរ
06/25/2025 11:06 AM
Facebook Telegram Linkin
មនុស្សរាប់សិបនាក់ស្លាប់ក្នុងការវាយប្រហារពីរុស្ស៊ីលើអ៊ុយក្រែន ខណៈលោកZelenskyy កំពុងស្វះស្វែងរកជំនួយនៅជំនួបណាតូ
06/25/2025 11:06 AM
Facebook Telegram Linkin
ផ្សារទំនើបនានាបន្តដាក់លក់ផលិតផលកសិផល បន្លែ ផ្លែឈើខ្មែរ ជំរុញការ​លក់ផលិតផល​ក្នុង​ស្រុក
06/25/2025 11:06 AM
Facebook Telegram Linkin
ក្រុមការងារក្រសួងកសិកម្ម ចុះពិនិត្យការបង្កបង្កើនផលដំណាំស្រូវវស្សា បន្លែ និងការចិញ្ចឹមសត្វនៅភូមិចំនួនពីរក្នុងខេត្តកំពង់ឆ្នាំង
06/25/2025 11:06 AM
Facebook Telegram Linkin
កម្ពុជា-អូស្រ្តាលី ប្រកាសផ្លូវការនូវផែនការភាពជាដៃគូសម្រាប់ការអភិវឌ្ឍ ដើម្បីជំរុញកំណើនសេដ្ឋកិច្ច
06/25/2025 11:06 AM
Facebook Telegram Linkin
ចាប់ពីថ្ងៃទី១៧ដល់២៤ ខែមិថុនា មន្ត្រីកសិកម្មឃុំខេត្តព្រះវិហារ ជួយសម្របសម្រួលលក់ល្ពៅជូនកសិករបានចំនួន ៣៤៣ តោន
06/25/2025 11:06 AM
Facebook Telegram Linkin
ច្រកព្រំដែនអន្តរជាតិដូង-បានឡែម បើកឱ្យសិស្សឆ្លងកាត់ និងពលករខ្មែរចាកចេញពីថៃ
06/25/2025 11:06 AM
Facebook Telegram Linkin
ក្រុមហ៊ុនអាមេរិកដ៏ធំមួយ បង្ហាញការតាំងចិត្តខ្ពស់ក្នុងការស្វែងរកដៃគូផ្គត់ផ្គង់វត្ថុធាតុដើមក្នុងស្រុក
06/25/2025 10:06 AM
Facebook Telegram Linkin
លោក Trump ច្រានចោលរបាយការណ៍ចារកម្មដែលថា អាមេរិកបរាជ័យក្នុងការបំផ្លាញទីតាំងនុយក្លេអ៊ែរអ៊ីរ៉ង់
06/25/2025 10:06 AM
Facebook Telegram Linkin
អ៊ីរ៉ង់ ប្រឈមមុខនឹងអ៊ីស្រាអែល និងអាមេរិកតែម្នាក់ឯង ទោះមានមិត្តជុំវិញខ្លួនក៏ដោយ
06/25/2025 10:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.