នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ចាត់ទុក អតីតរដ្ឋមន្ត្រីការពារជាតិវៀតណាម ជាមិត្តចាស់របស់កម្ពុជា
ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន
មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើ​ការងារ​ស្ថាបនា​ផ្លូវ នៅ​ទីតាំង​ដីសម្បទានសង្គមកិច្ច ខេត្តឧត្តរមានជ័យ
គណបក្សនយោបាយសម្ព័ន្ធភាព បង្ហាញជំហររបស់ខ្លួនក្នុង​ការចូលរួ​ម​ដោះស្រាយ​បញ្ហារួម​សម្រាប់​ជាតិ

នយោបាយ​ និង ការអភិវឌ្ឍន៍

លោកម៉ាក្រុង ប្រឈមមុខនឹងការខ្វែងគំនិតខាងការទូតដ៏កម្រជុំវិញមជ្ឈិមបូព៌ា

2023/11/16 11:28:52 am        104
Facebook Telegram Linkin
ក្រុមអ្នកការទូតបារាំងមួយក្រុម បានចុះហត្ថលេខាលើអនុស្សរណៈរួមមិនធម្មតាមួយ ដោយបង្ហាញពីអ្វីដែលពួកគេចោទប្រកាន់ថា ជាការលម្អៀងគាំទ្រអ៊ីស្រាអែលពីប្រធានាធិបតី អេម៉ានូអែល ម៉ាក្រុង (Emmanuel Macron) ដោយបន្ថែមសម្ពាធលើលោកប្រធានាធិបតី បន្ទាប់ពីពេលខ្លះ មានសេចក្តីថ្លែងការណ៍ដ៏ចម្រូងចម្រាសអំពីជម្លោះរវាងអ៊ីស្រាអែល និងក្រុមហាម៉ាស។កាសែតប្រចាំថ្ងៃរបស់បារាំង Le Figaro បាននិយាយកាលពីថ្ងៃចន្ទថា ឯកអគ្គរដ្ឋទូតបារាំង១២រូប ដែលត្រូវបានគេទទួលស្គាល់ជាផ្លូវការនៅមជ្ឈិមបូព៌ា និងបណ្តាប្រទេសអាហ្វ្រិកខាងជើង បានចុះហត្ថលេខាលើ ឯកសារសម្ងាត់ដោយហៅវា ថាជា «កាយវិការដែលមិនធ្លាប់មានពីមុនមក ក្នុងប្រវត្តិសាស្ត្រថ្មីៗនៃការទូតបារាំង ក្នុងពិភពអារ៉ាប់»។ខ្លឹមសារពិតប្រាកដនៃឯកសារនេះ មិនត្រូវបានបង្ហាញទេ ទោះបីជាអ្នកការទូត និងប្រភពដែលបាននិយាយទៅកាន់សារព័ត៌មាន AFP បានបញ្ជាក់ពីការពិតរបស់វាក៏ដោយ។លិខិតការទូតដែលត្រូវបានផ្ញើជា «ឯកសារ» ផ្លូវការ ប៉ុន្តែសម្ងាត់ទៅកាន់ក្រសួងការបរទេស ឆ្លុះបញ្ចាំងពីភាពមិនសុខស្រួលរបស់មន្ត្រីមួយចំនួននៅក្រសួងអឺរ៉ុបនិងកិច្ចការបរទេសជុំវិញគោលនយោបាយរបស់ លោកម៉ាក្រុងទៅលើសង្រ្គាមដែលបង្កឡើងដោយការវាយប្រហារថ្ងៃទី៧ ខែតុលា ដែលមិនធ្លាប់មានពីមុនមកដោយក្រុមហាម៉ាសប្រឆាំងនឹងអ៊ីស្រាអែល ដែលត្រូវបានត្រូវបានឆ្លើយតបដោយការទម្លាក់គ្រាប់បែកឥតឈប់ឈររបស់អ៊ីស្រាអែលទៅលើតំបន់ហ្កាហ្សាស្ទ្រីប។

អ៊ីរ៉ង់ប្រាប់ក្រុមហាម៉ាសថា ខ្លួននឹងមិនចូលក្នុងសង្រ្គាមជាមួយអ៊ីស្រាអែលទេ

2023/11/16 11:20:34 am        96
Facebook Telegram Linkin
មេដឹកនាំកំពូលរបស់អ៊ីរ៉ង់ បានប្រាប់ប្រមុខក្រុមហាម៉ាស នៅក្នុងកិច្ចប្រជុំទល់មុខគ្នា នៅទីក្រុងតេអេរ៉ង់ថា ប្រទេសរបស់លោក នឹងមិនចូលទៅក្នុងសង្រ្គាមជាមួយអ៊ីស្រាអែល ហើយបានចោទប្រកាន់ក្រុមភេរវកម្មថា មិនបានផ្តល់ការព្រមានជាមុនណាមួយអំពីការវាយប្រហារថ្ងៃទី៧ ខែតុលា។មន្ត្រីអ៊ីរ៉ង់ និងក្រុមហាម៉ាសបីរូបដែលបានដឹងអំពីការពិភាក្សានោះដែលសុំមិនបញ្ចេញឈ្មោះ បាននិយាយថា លោក អាយ៉ាតូឡា អាលី ខាមីណេ (Ayatollah Ali Khamenei) បានប្រាប់លោក អ៊ីស្មេល ហានីយេ (Ismail Haniyeh)ថា អ៊ីរ៉ង់ដែលជាអ្នកគាំទ្រក្រុមហាម៉ាសយូរមកហើយ នឹងបន្តផ្តល់ជំនួយផ្នែកនយោបាយ និងសីលធម៌ដល់ក្រុមនេះ ប៉ុន្តែនឹងមិនធ្វើអន្តរាគមន៍ដោយផ្ទាល់នោះទេ។ មន្ត្រីក្រុមហាម៉ាសម្នាក់ បានប្រាប់សារព័ត៌មានរ៉យទ័រថា មេដឹកនាំកំពូលរូបនេះ បានជំរុញឲ្យលោកហានីយេ ឈប់និយាយនៅក្នុងក្រុមប៉ាឡេស្ទីន ដោយអំពាវនាវជាសាធារណៈឲ្យអ៊ីរ៉ង់ និងសម្ព័ន្ធមិត្តលីបង់ដ៏មានឥទ្ធិពលរបស់ខ្លួនគឺក្រុមហេសបូឡា ចូលរួមក្នុងការប្រយុទ្ធជាមួយអ៊ីស្រាអែលយ៉ាងពេញទំហឹង។ ប្រភពបីដែលស្និទ្ធនឹងក្រុមលីបង់ បាននិយាយថា ក្រុមហេសបូឡា ក៏មានការភ្ញាក់ផ្អើលផងដែរ ដោយការវាយលុកដ៏បំផ្លិចបំផ្លាញរបស់ក្រុមហាម៉ាស កាលពីខែមុន ដែលបានសម្លាប់ជនជាតិអ៊ីស្រាអែល១.២០០នាក់។ ប្រយុទ្ធជនរបស់ខ្លួន មិនមានការប្រុងប្រយ័ត្នសូម្បីតែនៅក្នុងភូមិក្បែរព្រំដែន ដែលជាខ្សែត្រៀមជួរមុខក្នុងសង្គ្រាមឆ្នាំ២០០៦របស់ខ្លួន ជាមួយអ៊ីស្រាអែល ហើយត្រូវបានទំនាក់ទំនងហៅតាមទូរស័ព្ទភ្លាមៗឲ្យមកកាន់ទីតាំងឈរជើងរបស់ពួកគេវិញ។

សម្តេចធិបតី ជំរុញឲ្យអាជ្ញាធរពង្រឹងសន្តិសុខជូនភ្ញៀវទេសចរនៅព្រលានយន្តហោះថ្មីសៀមរាប ឲ្យកាន់តែល្អបន្ថែមទៀត

2023/11/16 11:02:56 am        222
Facebook Telegram Linkin
សៀមរាប៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានជំរុញឲ្យអាជ្ញាធរពាក់ព័ន្ធ​ទាំងអស់​ត្រូវខិតខំ ធ្វើយ៉ាងណាថែរក្សា សន្តិសុខ សណ្តាប់ធ្នាប់ និងសុវត្ថិភាព ជូនដល់ភ្ញៀវទេសចរជាតិ និងអន្តរជាតិឲ្យបានល្អប្រសើរបន្ថែមទៀត ដែលធ្វើដំណើរឆ្លងកាត់នៅតាមព្រលានយន្តហោះអន្តរជាតិសៀមរាបអង្គរ។ក្នុងឱកាសអញ្ជើញជាអធិបតីភាពសម្ពោធដាក់ឱ្យប្រើប្រាស់ជាផ្លូវការនូវ«អាកាសយានដ្ឋាន​អន្តរជាតិ​សៀមរាបអង្គរ» នាថ្ងៃទី១៦ ខែវិច្ឆិកា ឆ្នាំ២០២៣នេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានថ្លែងថា ​ដើម្បីជាការផ្តល់នូវទំនុកចិត្ត និងបង្កើនភ្ញៀវទេសចរអន្តរជាតិមកទស្សនានៅកម្ពុជា ជាពិសេសនៅខេត្តសៀមរាបឲ្យកាន់តែល្អប្រសើរបន្ថែមទៀតនោះ អាជ្ញាធរទាំងអស់ត្រូវតែពង្រឹង​សន្តិសុខ សណ្តាប់ធ្នាប់ ដែលនៅជាប់នឹងព្រលានថ្មី ​ឬនៅទីណាទាំងអស់ជូនដល់ពួកគេជាប្រចាំ។នៅក្នុងឱកាសនោះដែរសម្តេចធិបតី ​នាយករដ្ឋមន្រ្តី ​ក៏បានលើកឡើងផងដែរថា ការ​សាងសង់​អាកាសយានដ្ឋានអន្តរជាតិសៀមរាបអង្គរនាពេលនេះ​ គឺនឹងលើកស្ទួយសេដ្ឋកិច្ចជាតិ និង​ប្រជាពលរដ្ឋ​គ្រប់ទិសទី ជាពិសេសគឺនៅខេត្តសៀមរាបផ្ទាល់តែម្តងឲ្យកាន់តែរីកចម្រើនបន្ថែមទៀត ខណៈព្រលានថ្មីនេះបានតភ្ជាប់ការហោះហើរដោយត្រង់ជាមួយប្រទេសជាច្រើននៅលើពិភពលោក៕អត្ថបទបាន ចក់

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ "អាកាសយានដ្ឋានអន្តរជាតិសៀមរាបអង្គរ

2023/11/16 10:55:02 am        210
Facebook Telegram Linkin
សៀមរាប៖ នៅព្រឹកថ្ងៃទី១៦ ខែវិច្ឆិកា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត​ នាយករដ្ឋមន្ត្រី​ នៃព្រះរាជាណាចក្រកម្ពុជា បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ "អាកាសយានដ្ឋានអន្តរជាតិសៀមរាបអង្គរ (Siem Reap Angkor International Airport)" ។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែ​ល​មានខ្លឹមសារដូចខាងក្រោម៖-សម្ដេចធិបតីនាយករដ្ឋមន្ត្រី៖ អាកាសយានដ្ឋានអន្តរជាតិសៀមរាបអង្គរ ជាសមិទ្ធផលថ្មីមួយទៀត បន្ទាប់ពីផ្លូវល្បឿនលឿនភ្នំពេញ-ព្រះសីហនុ នៃចំណងមិត្តភាពដែកថែបកម្ពុជា-ចិន។-សម្ដេចធិបតី៖ អាកាសយានដ្ឋានអន្តរជាតិសៀមរាបអង្គរ ត្រូវបានសាងសង់នៅមិន ឆ្ងាយប៉ុន្មានពីតំបន់សង្គ្រាមចុងក្រោយ ដែលត្រូវបានបញ្ចប់ដោយនយោបាយឈ្នះ ឈ្នះរបស់សម្ដេចតេជោ ហ៊ុន សែន។-សម្ដេចធិបតីនាយករដ្ឋមន្ត្រី៖ ការសាងសង់អាកាសយានដ្ឋានអន្តរជាតិសៀមរាបអង្គរ ដែលមានចម្ងាយប្រមាណ ៥០ គីឡូម៉ែត្រពីក្រុងសៀមរាប គឺដោយឈរលើចក្ខុវិស័យវែងឆ្ងាយចំនួន ២ របស់សម្ដេចតេជោ ហ៊ុន សែន នោះគឺការអភិរក្ស និងការអភិវឌ្ឍ។-សម្ដេចធិបតីនាយករដ្ឋមន្ត្រី៖ អាកាសយានដ្ឋានអន្តរជាតិសៀមរាបអង្គរ អនុញ្ញាតឱ្យយន្តហោះ ឡើងចុះបាន២ ទិសផ្សេងគ្នា ដែលខុសពីព្រលានយន្តហោះចាស់ ដែលអនុញ្ញាតឱ្យយន្តហោះឡើងចុះបាន តែមួយទិសប៉ុណ្ណោះ ដោយសារមួយទិសទៀត ប៉ះចំលើបុរាណប្រាសាទក្នុងតំបន់អង្គរ។-សម្ដេចធិបតី៖ អាកាសយានដ្ឋានអន្តរជាតិសៀមរាបអង្គរបំពាក់ទៅដោយសម្ភារទំនើបៗ និងអាចពង្រីកបានទៅតាមបច្ចេកទេសជំនាញ។ ព្រលានយន្តហោះចាស់ ប្រើសម្ភារបំពាក់មិន សូវទំនើប។ ព្រលានយន្តហោះចាស់ អាចពង្រីកបានតែមានកំណត់។-សម្ដេចធិបតីនាយករដ្ឋមន្ត្រី៖ ព្រលានយន្តហោះជាច្រើននៅក្នុងពិភពលោក មិនមានតម្លៃត្រឹមតែជា អាកាសយានដ្ឋាន សម្រាប់យន្តហោះចុះចត ឬចេញដំណើរប៉ុណ្ណោះនោះទេ ប៉ុន្តែអាកាសយានដ្ឋាន របស់ប្រទេសទាំងនោះ បានក្លាយជាតំបន់ទេសចរណ៍ និងពាណិជ្ជកម្មថែមទៀត។-សម្ដេចធិបតីនាយករដ្ឋមន្ត្រី បានប្រកាសឱ្យដឹងថា ប្រព័ន្ធ E-Arrival សម្រាប់ការបំពេញបែបបទរបស់ អ្នកដំណើរតាមយន្តហោះ មកដល់កម្ពុជា នឹងដាក់ឱ្យដំណើរការនៅអាកាសយានដ្ឋានអន្តរជាតិសៀមរាបអង្គរមុនគេ ដើម្បីសម្រួលដល់ការបំពេញបែបបទរបស់អ្នកដំណើរទាំងនោះ ឱ្យកាន់តែងាយស្រួល និងមិនស្មុគស្មាញ ដូចការបំពេញដោយប្រើប៊ិកសរសេរ។-សម្ដេចធិបតីនាយករដ្ឋមន្ត្រី៖ សៀមរាប នឹងមានរថភ្លើងស្រាល(Autorail) សម្រាប់ធ្វើដំណើរទៅមក រវាងក្រុងសៀមរាប និងអាកាសយានដ្ឋានអន្តរជាតិសៀមរាបអង្គរ។-សម្ដេចធិបតីនាយករដ្ឋមន្ត្រី៖ តាមរយៈយុទ្ធសាស្ត្រទាក់ទាញទេសចរក្រោមប្រធានបទ«ទស្សនាកម្ពុ ជាឆ្នាំ២០២៤» ទេសចរចិន នឹងមកលេងកម្សាន្តច្រើននៅកម្ពុជានាឆ្នាំ២០២៤ ខាងមុខនេះ។ កត្តានេះ ទាមទារឱ្យកម្ពុជាត្រូវរៀបចំកែសម្រួល និងត្រៀមគ្រប់ផ្នែកដើម្បីទទួលទេសចរទាំងនោះ។-សម្ដេចធិបតីនាយករដ្ឋមន្ត្រី៖ កម្ពុជាគ្រោងពង្រីកឱ្យប្រើបណ្ណព្រំដែន ដើម្បីទេសចរងាយចូលមកទ ស្សនាខេត្តសៀមរាប ដោយមិនចាំបាច់ប្រើលិខិតឆ្លងដែន(PASSPORT)នោះទេ។-សម្តេចធិបតី នាយករដ្ឋមន្រ្តី បានជំរុញឲ្យអាជ្ញាធរខិតខំធ្វើយ៉ាងណាថែរក្សា សន្តិសុខ សណ្តាប់ធ្នាប់ និងសុវត្ថិភាព ជូនដល់ភ្ញៀវទេសចរណ៍ជាតិ និងអន្តរជាតិឲ្យបានល្អប្រសើរបន្ថែមទៀត ដើម្បីជាការផ្តល់ទំនុកចិត្ដដល់ពួកគេបន្ថែម។-សម្ដេចធិបតីនាយករដ្ឋមន្ត្រី៖ ២០២៤ ជាឆ្នាំរស់ឡើងវិញ នៃវិស័យទេសចរណ៍នៅកម្ពុជា។-សម្តេចធិបតី ហ៊ុន ម៉ាណែត បានបញ្ជាក់ជាថ្មីទៀតថា ខណៈពិភពលោកកំពុងមានការគំរាមកំហែងនៃ វិបត្តិថាមពល កម្ពុជាបានរក្សាលំនឹងបានដដែលនៃតម្លៃអគ្គិសនី ថែមទាំងមានការបញ្ចុះតម្លៃដល់រោង ចក្រសហគ្រាសនានា រហូតដល់ទៅ១៥ភាគរយរយផងដែរក្នុងឆ្នាំ២០២៣នេះ។-សម្ដេចធិបតីនាយករដ្ឋមន្ត្រី៖ ក្នុងវេទិកាខ្សែក្រវាត់ និងផ្លូវលើកទី៣ ដែលរៀបចំធ្វើនៅប្រទេសចិន ក្នុងឆ្នាំ២០២៣ ថ្មីៗកន្លងមកនេះ ខ្ញុំ(សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី) បានពិភាក្សា ជាមួយឯកឧត្ដម ស៊ី ជីនពីង ប្រធានាធិបតីចិន ដោយកំណត់យកឆ្នាំ២០២៤ ជាឆ្នាំនៃការផ្លាស់ប្ដូររវាង ប្រជាជន និងប្រជាជន នៃប្រទេសទាំងពីរកម្ពុជា-ចិន។-សម្ដេចធិបតីនាយករដ្ឋមន្ត្រី៖ តាមរយៈកិច្ចពិភាក្សាជាមួយឯកឧត្ដម ស៊ី ជីនពីង ប្រធានាធិបតីចិន ដោ យកំណត់យកឆ្នាំ២០២៤ ជាឆ្នាំនៃការផ្លាស់ប្ដូររវាងប្រជាជន និងប្រជាជន នៃប្រទេសទាំងពីរកម្ពុជា-ចិន ខ្ញុំ(សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី) សូមស្វាគមន៍យ៉ាងកក់ក្ដៅចំពោះទេសចរ ចិន ដែលជាមិត្ត និងជាបងប្អូនដ៏ល្អរបស់កម្ពុជា។

សម្តេចធិបតី ហ៊ុន ម៉ាណែត អញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ «អាកាសយានដ្ឋានអន្តរជាតិសៀមរាបអង្គរ»

2023/11/16 09:14:44 am        300
Facebook Telegram Linkin
នៅព្រឹកថ្ងៃទី១៦ ខែវិច្ឆិកា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ «អាកាសយានដ្ឋានអន្តរជាតិសៀមរាបអង្គរ» (Siem Reap Angkor International Airport)  ដែលមានទីតាំងស្ថិតនៅក្នុងភូមិសាស្ត្រ ឃុំ​តា​ប៉ែក ស្រុកសូទ្រនិគម និងឃុំគោកធ្លកលើ ស្រុកជីក្រែង នៃខេត្តសៀមរាប មានចម្ងាយ​ជាង ៤០គីឡូម៉ែត្រពីរមណីយដ្ឋានអង្គរ និងជាង៥០ គីឡូម៉ែត្រពីទីប្រជុំ​ជនក្រុង​សៀម​រាប។អាកាសយានដ្ឋានអន្តរជាតិសៀមរាបអង្គរ ត្រូវបានសាងសង់ឡើងក្រោមការវិនិ​យោគ​រួមគ្នារវាងក្រុមហ៊ុនចំនួន៣រួមមាន៖ ១) ក្រុមហ៊ុនវិនិយោគយុនណាន (Yunnan Investment Group) ដែលមានភាគហ៊ុនចំនួន ៧៦,៦%, ២) ក្រុមហ៊ុនសំណង់ និងវិនិយោគយុនណាន (Yunnan Construction and Investment Holding Group) មានភាគហ៊ុនចំនួន ២០% និង ៣) ក្រុមហ៊ុនគ្រប់​គ្រង និងប្រតិបត្តិ​ការ​អាកាសយានដ្ឋានយុនណា (Yunnan Airport Group) ដែលជាប្រតិបត្តិករមាន​ភាគ​ហ៊ុន​ចំនួន ៣,៤%។ អាកាសយានដ្ឋាននេះ បានចាប់ផ្តើមសាងសង់ជាផ្លូវការនៅខែមីនា ឆ្នាំ២០២០ បញ្ចប់​ជាស្ថាពរកាលនៅបំណាច់ខែមីនាឆ្នាំ២០២៣នេះ ដោយប្រើរយៈពេល ៣៦ខែ​ស្មើ​នឹង៣ឆ្នាំ។ អាកាសយានដ្ឋាននេះ ត្រូវកសាងឲ្យទៅជាលំដាប់ថ្នាក់ 4E សម្រាប់យន្តហោះធំៗគ្រប់ប្រភេទ ដែលអាចហោះឡើង និងចុះចតបាន។

រដ្ឋសភា បន្តសម័យប្រជុំ លើកទី១ នីតិកាលទី៧ ដើម្បីពិភាក្សា និងអនុម័តរបៀបវារៈចំនួន៤

2023/11/16 09:06:08 am        234
Facebook Telegram Linkin
នៅព្រឹកថ្ងៃទី១៦ ខែវិច្ឆិកា ឆ្នាំ២០២៣ សម្តេចមហារដ្ឋសភាធិការធិបតី ឃួន សុដារី ប្រធាន​រដ្ឋសភា នៃព្រះរាជាណាចក្រកម្ពុជា បានអញ្ជើញបន្តដឹកនាំសម័យប្រជុំរដ្ឋសភា លើកទី១ នីតិកាលទី៧ ដោយមានវត្តមាន សមាជិក សមាជិការដ្ឋសភា ចូលរួមពេលចាប់ផ្តើមសម័យប្រជុំ ចំនួន ១០០រូប។របៀបវារៈនៃការបន្តសម័យប្រជុំលើកទី១ នីតិកាលទី៧ នាថ្ងៃនេះ មានចំនួន៤ គឺ៖ ១-ការពិភាក្សានិងអនុម័តសេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២២។២-ការពិភាក្សានិងអនុម័ត សេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៤។៣-ការពិភាក្សានិងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងរដ្ឋាភិបាលនៃព្រះរាជាណាចក្រកម្ពុជានិងរដ្ឋាភិបាលនៃអេមីរ៉ាតអារ៉ាប់រួម។៤-ការពិភាក្សានិងអនុម័ត សេចក្តីស្នើវិសោធនកម្មប្រការ ៤ថ្មី ប្រការ ៦ថ្មី(ពីរ) និងប្រការ ២៩ថ្មី បទបញ្ជាផ្ទៃក្នុងនៃរដ្ឋសភា៕

[UPDATE] លោក Joe Biden និងលោក Xi Jinping ជួបពិភាក្សាទល់មុខគ្នាស្របពេលមាន​ជម្លោះ​លើ​បញ្ហាយោធា និងសេដ្ឋកិច្ច

2023/11/16 09:00:16 am        197
Facebook Telegram Linkin
លោកប្រធានាធិបតីអាមេរិក Joe Biden បានជួបមេដឹកនាំចិនលោក Xi Jinping ក្នុង​ជំនួប​ទល់​មុខ​គ្នា ជាលើកដំបូង ក្នុង​រយៈពេល​មួយ​ឆ្នាំ​កាល​ពីថ្ងៃពុ​ធ​ សម្រាប់​កិច្ច​ពិភាក្សា​ក្នុង​គោល​បំណង​បន្ធូរ​បន្ថយ​ភាពតានតឹងរវាងមហាអំណាចទាំងពីរលើជម្លោះយោធា ការជួញដូរគ្រឿងញៀន និង​បញ្ញា​សិប្បនិម្មិតឬ(AI) ហើយបាននិយាយថា ប្រទេស​ទាំង​២​បាន​ធ្វើ​ឱ្យ​មាន​ការ​រីក​ចំរើន​ពិត​ប្រាកដ​។ លោក Biden បានស្វាគមន៍មេដឹកនាំចិននៅឯអគារអចលនទ្រព្យ ហ្វីឡូលី(Filoli)ដែលជាផ្ទះ និង​សួនច្បាររបស់រដ្ឋនៅតំបន់ជនបទស្ថិតនៅចម្ងាយប្រហែល ៤៨ គីឡូម៉ែត្រ ភាគខាងត្បូង នៃ​ទីក្រុងសាន់ហ្វ្រាន់ស៊ីស្កូ (San Francisco) ជាទីដែល​មេដឹក​នាំ​ទាំង​២​នឹង​ផ្លាស់​ប្ដូរ​ទីតាំង​នៅ​ពេល​ក្រោយ​ សម្រាប់កិច្ចប្រជុំកំពូលនៃវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកឬ (APEC)។     លោក Biden បាននិយាយថា សហរដ្ឋអាមេរិក និងចិន ត្រូវតែធានាថា ការប្រកួតប្រជែង​រវាង​ប្រទេស​ទាំង​២នឹងមិនក្លាយជាជម្លោះនោះទេ និងគ្រប់គ្រង​ទំនាក់​ទំនង​របស់​ប្រទេស​មហា​អំណាច​សេដ្ឋកិច្ចពិ​ភពលោក​ទាំង២ ប្រកបដោយការទទួលខុសត្រូវ ។ លោកបាននិយាយថា បញ្ហា​នានា ដូចជាបម្រែបម្រួលអាកាសធាតុ ការប្រឆាំងគ្រឿងញៀន និងបញ្ញាសិប្បនិម្មិត ទាមទារ​ឱ្យ​មានការយកចិត្តទុកដាក់រួមគ្នាពីមេដឹកនាំទាំង២។ បន្ទាប់​ពីកិច្ចពិភាក្សាមួយព្រឹក និងមុនពេលធ្វើដំណើរទៅទទួលទានអាហារថ្ងៃត្រង់ជាមួយលោក Xi លោក Biden បាននិយាយនៅលើវេទិកាប្រព័ន្ធផ្សព្វផ្សាយសង្គម X ថា នេះជារឿង​សំខាន់​ដែល​លោក​ទាំង២ យល់គ្នាទៅវិញទៅមក រវាងមេដឹកនាំ និងមេដឹកនាំ។ លោក​បានលើកឡើង ដោយពុំបានបញ្ជាក់លម្អិតថា មានបញ្ហាប្រឈម​ជា​សាកល​ដ៏​សំខាន់​ដែល​ទាមទារ​ភាព​ជាអ្នកដឹកនាំរួមគ្នារបស់យើង។ ហើយថ្ងៃនេះ យើងបានធ្វើ​ឱ្យ​មាន​ការវិវឌ្ឍន៍​ពិត​ប្រាកដ​។សេចក្តីថ្លែងការណ៍របស់សេតវិមានបាននិយាយថា មេដឹកនាំបាន​ពិភាក្សា​ប្រកប​ដោយ​ភាព​ស្មោះ​ត្រង់​ និងស្ថាបនាលើបញ្ហាទ្វេភាគី និងសកលលោក និងផ្លាស់ប្តូរ​ទស្សនៈ​លើ​វិស័យ​នៃ​ការ​ខ្វែង​គំនិត​គ្នា។ លោក Xi បានចង្អុលបង្ហាញថា ទំនាក់ទំនងចិន-អាមេរិក មិនដែលមានភាពរលូនទេក្នុងរយៈពេល ៥០ ឆ្នាំកន្លងមកនេះ និងយូរជាងនេះ ហើយតែងតែប្រឈមបញ្ហាមួយប្រភេទឬមួយផ្សេងទៀត។ ទោះ​បី​ជាយ៉ាងណាក៏ដោយ ទំនាក់ទំនងនេះ បានបន្តដំណើរទៅមុខ ស្របពេល​មាន​ការ​ខ្វែង​គំនិត​គ្នា៕

នាយឧត្តមសេនីយ៍ ទៀ សីហា ចូលរួមកិច្ចប្រជុំរដ្ឋមន្រ្តីការពារជាតិអាស៊ាន លើកទី១៧ នៅប្រទេសឥណ្ឌូនេស៊ី

2023/11/16 08:51:19 am        186
Facebook Telegram Linkin
នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា នាថ្ងៃទី១៥ ខែវិច្ឆិកា ឆ្នាំ២០២៣នេះ បានអញ្ជើញដឹកនាំ គណៈប្រតិភូចូលរួម​កិច្ចប្រជុំ​រដ្ឋមន្រ្តី​ការពារ​ជាតិ​អាស៊ាន លើកទី១៧ (17th ADMM) ដែលប្រទេសឥណ្ឌូនេស៊ីធ្វើជាម្ចាស់ផ្ទះ ខណៈ​កិច្ច​ប្រជុំ​នេះ​បាន​ប្រព្រឹត្ត​ទៅក្រោមមូលបទ«សន្តិភាព វិបុលភាព និងសន្តិសុខ»។ថ្លែងនៅក្នុងកិច្ចប្រជុំនោះ លោក ប្រាបូវូ ស៊ូប៊ីនតូ រដ្ឋមន្រ្តីការពារជាតិឥណ្ឌូនេស៊ី បានលើ​ក​ឡើង​ថា សន្តិភាព ស្ថេរភាព និង សន្តិសុខ គឺជាមូលដ្ឋានគ្រឹះដ៏សំខាន់ ក្នុងការបង្កើននូវសេដ្ឋកិច្ចហើយ ប្រ​សិន​បើសន្តិសុខមិនរឹងមាំទេគឺមិនអាចធ្វើបានឡើយក្នុង​ការ​ទាក់ទាញ​វិនិយោគទុន និង​ការ​សម្រេច​បាន​នូវស្ថេរភាពនៅក្នុងសង្គមរបស់អាស៊ាន និងប្រជាជនអាស៊ាន។ ដូចនេះកិច្វប្រជុំរដ្ឋមន្ត្រីការពារជាតិអាស៊ាន គឺសំដៅដោះស្រាយ​បញ្ហា​សន្តិសុខ​ទំាង​អស់​នោះ​ឯង​។លោក ប្រាបូវូ ស៊ូប៊ីនតូ បានបន្ថែមទៀតថា កិច្ចប្រជុំរដ្ឋមន្ត្រីការពារជាតិ អាស៊ានលើកទី ១៧ ឆ្នាំ​២០២៣ បន្តស្វែងរកនូវការបង្កើន និងពង្រឹង និមាបនកម្ម សន្តិសុខ ក៏ដូចជា​ការ​ជំរុញ​ឲ្យ​មាន​បរិយាប័ន​នៅលើពិភពលោក ហើយលោករដ្ឋមន្រ្តីក៏បាន​អំពាវ​នាវ​ដល់​កិច្ច​ប្រជុំ​រដ្ឋមន្ត្រី​ការពារ​ជាតិ​អាស៊ាន លើកទី១៧ ធ្វើការពិក្សាគ្នា ដើម្បីស្វែងរកនូវយន្តការផ្សេងៗ ក្នុងការដោះស្រាយ​បញ្ហា​ផ្សេង​ៗ ដូចជាបញ្ហានៅក្នុងតំបន់ជាដើមនោះ។ថ្លែងនៅក្នុងកិច្ចប្រជុំរដ្ឋមន្ត្រីការពារជាតិអាស៊ានលើកទី១៧នាយឧត្តមសេនីយ៍ ទៀ សីហា លើក​ឡើង​ផងដែរថា ជាមួយនឹងការរួមចំណែកប្រកបដោយថាមវន្ត របស់រដ្ឋមន្ត្រីពីអតីត និងបច្ចុប្បន្ន ក៏​ដូច​ជារដ្ឋមន្ត្រីដែលមានវត្តមាននៅថ្ងៃនេះ កិច្ចប្រជុំរដ្ឋមន្ត្រីការពារជាតិអាស៊ាន បានជំរុញ​បុព្វហេតុ នៃ​សន្តិភាព ស្ថិរភាព និងវិបុលភាពក្នុងតំបន់ ដោយផ្អែកលើគោលការណ៍នៃមជ្ឈភាព និង​ឯកភាពអាស៊ាន ព្រមទាំងការគោរពគ្នាទៅវិញទៅមក និងផលប្រយោជន៍រួម។ ដោយ​នេះ​គឺ​ជាកា​រ​រួមចំណែកដ៏ធំក្រៃលែងក្នុងការកសាងកិច្ចប្រជុំរដ្ឋមន្ត្រីការពារជាតិអាស៊ានដ៏រឹងមាំ និងធន់៕ អត្ថបទ៖ បាន ចក់

សម្តេចធិបតី៖ ការអភិវឌ្ឍកោះនរាមិនត្រឹមតែបានផលប្រយោជន៍ ដល់ក្រុមហ៊ុនទេ វានឹងចែកផលលាភជាច្រើនដល់ពលរដ្ឋទូទៅដែរ

2023/11/15 04:33:05 pm        242
Facebook Telegram Linkin
ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា ការអភិវឌ្ឍតំបន់កោះនរា មិនត្រឹមតែបានផ្ដល់ប្រយោជន៍ដល់ក្រុមហ៊ុនឯកជនប៉ុណ្ណោះទេ តែក៏បានផ្ដល់ប្រយោជន៍ និងចែកផលលាភជាច្រើនដល់ដៃប្រជាពលរដ្ឋទូទៅ តាមរយៈបង្កើតសកម្មភាពសេដ្ឋកិច្ច, ពាណិជ្ជកម្ម និងផលិតភាពការងារ ខណៈការអភិវឌ្ឍតំបន់នេះក៏ឆ្ពោះទៅរកភាពរីកចម្រើនទៅទិសខាងកើនកាន់តែខ្លាំងបន្ថែមទៀតផងដែរ។ថ្លែងនៅក្នុងឱកាសអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការស្ពាននាគភ្លោះកោះនរា និងស្ពានបេតុងខ្សែកាបតភ្ជាប់តំបន់អភិវឌ្ឍន៍​កោះនរា ទៅតំបន់អភិវឌ្ឍន៍​កោះពេជ្រ នារសៀលថ្ងៃទី១៥ ខែវិច្ឆិកា ឆ្នាំ២០២៣នេះ​ សម្តេចធិបតី ហ៊ុន ម៉ាណែត នាយករដ្ឋមន្រ្តី បានបញ្ជាក់បន្ថែមទៀតថា ​ហេដ្ឋារចនាសម្ព័ន្ធ​ ជាសរសៃឈាមតភ្ជាប់ដ៏សំខាន់របស់ជាតិ ដែល​រាជរដ្ឋាភិបាលកម្ពុជា ​តែងតែយកចិត្តទុកដាក់ជាអាទិភាពក្នុងការអភិវឌ្ឍប្រទេសជាតិ ជាក់ស្តែងដូចការអភិវឌ្ឍនូវកោះនរាភ្ជាប់ជាមួយតំបន់អភិវឌ្ឍន៍​កោះពេជ្រ យ៉ាងដូច្នេះដែរ ខណៈតំបន់នេះ នឹងធ្វើឲ្យសរសៃសេដ្ឋកិច្ចរបស់កម្ពុជា​កាន់តែបន្តរីកធំឡើងៗជាបន្តបន្ទាប់ បន្ថែមទៀត។សម្តេចធិបតី ​នាយករដ្ឋមន្រ្តី ក៏បានបង្ហើបឲ្យដឹងផងដែរថា​ នៅតំបន់អភិវឌ្ឍន៍​កោះនរានាពេល​ខាងមុខនេះ ​ក៏មានគម្រោងនឹងធ្វើអគារខ្ពស់ជាងគេមួយនៅក្នុងតំបន់ផងដែរ ដោយ​អគារនេះ​នឹងមានកម្ពស់ ៥៥៥ ម៉ែត្រ។មួយវិញទៀតតំបន់កោះនរានេះ នឹងធ្វើឲ្យប្រជាពលរដ្ឋខ្មែររាប់ពាន់រាប់ម៉ឺននាក់​មាន​ការងារ​ធ្វើជាប្រចាំ ដើម្បីលើកកម្ពស់ជីវភាពរបស់ពួកគាត់ឲ្យកាន់តែប្រសើរឡើង​បន្ថែមទៀតផងដែរ៕ អត្ថបទ៖ បាន ចក់

ប្រសាសន៍សំខាន់ៗរបស់​សម្តេចធិបតី ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ "ស្ពានខ្សែកាបតភ្ជាប់កោះនរា-កោះពេជ្រ"

2023/11/15 04:09:02 pm        375
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅរសៀលថ្ងៃទី១៥ ខែវិច្ឆិកា ឆ្នាំ២០២៣ បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ "ស្ពានខ្សែកាបតភ្ជាប់រវាងតំបន់អភិវឌ្ឍន៍កោះនរា និងតំបន់អភិវឌ្ឍន៍កោះពេជ្រ" ។*ប្រសាសន៍សំខាន់ៗរបស់​សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖- សម្ដេចធិបតីនាយករដ្ឋមន្ត្រី៖ ការអភិវឌ្ឍកោះនរា មានលក្ខណៈពិសេសមួយចំនួន គឺស្រោចស្រង់នូវអ្វីដែលបាន បាត់ទៅហើយ ឱ្យមានរូបរាងឡើងវិញ ព្រោះកាលពីអំឡុងសម័យបារាំងទីនេះជាកោះមានទំហំធំ និង ក្រោយមកបានបាក់បាត់រូបរាង ដោយសារចរន្តទឹកហូរបុកជារៀងរាល់ឆ្នាំ។- សម្តេចធិបតី ហ៊ុន ម៉ាណែត បានបញ្ជាក់ថា នៅតំបន់អភិវឌ្ឍន៍កោះនរានេះ ក្រៅពីសមិទ្ធផលស្ពានថ្មី ក៏មានគម្រោងធ្វើអគារដ៏ខ្ពស់ជាងគេមួយមានកម្ពស់ ៥៥៥ ម៉ែត្រ នាពេលខាងមុខផងដែរ។- សម្ដេចធិបតីនាយករដ្ឋមន្ត្រី៖ ពលរដ្ឋនៅតាមបណ្ដោយផ្លូវជាតិលេខ១ ជាពិសេសក្នុងទឹកដីខេត្តក ណ្ដាលនឹងមើលឃើញពីការរីកចម្រើនកាន់តែខ្លាំង តាមរយៈការតភ្ជាប់ផ្លូវ ថ្នល់ ស្ពាន និងប្រព័ន្ធហេដ្ឋា រចនាសម្ព័ន្ធនានាជាមួយរាជធានីភ្នំពេញ។- សម្តេចធិបតី ហ៊ុន ម៉ាណែត បញ្ជាក់ថាគោលដៅសម្រាប់ការអភិវឌ្ឍរបស់រាជរដ្ឋាភិបាលគឺយករាជធានីភ្នំពេញធ្វើជាចំណុចកណ្ដាល ហើយបន្តពង្រីកការអភិវឌ្ឍទៅទិសផ្សេងៗទៀត ជាពិសេសការពង្រីការអភិវឌ្ឍទៅកាន់ទិសខាងកើតនៃកម្ពុជា។- សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា ការអភិវឌ្ឍតំបន់កោះនរា មិនត្រឹមតែផ្ដល់ប្រយោជន៍ដល់ក្រុមហ៊ុនឯកជនប៉ុណ្ណោះទេ តែក៏បានផ្ដល់ប្រយោជន៍ និងចែកផលលាភជាច្រើនដល់ដៃប្រជាពលរដ្ឋទួទៅតាមរយៈបង្កើតសកម្មភាពសេដ្ឋកិច្ច, ពាណិជ្ជកម្ម និងផលិតភាពការងារ ខណៈការអភិវឌ្ឍតំបន់នេះក៏ឆ្ពោះទៅរកភាពរីកចម្រើនទៅទិសខាងកើនកាន់តែខ្លាំងបន្ថែមទៀតផងដែរ។- សម្ដេចធិបតីនាយករដ្ឋមន្ត្រី៖ កង្វល់របស់ប្រជាពលរដ្ឋនៅក្នុងជីវភាពប្រចាំថ្ងៃ ជាពិសេសពាក់ព័ន្ធនឹង ពន្ធដារ ត្រូវបានរាជរដ្ឋាភិបាលអាណត្តិទី៧ បានគិតគូរតាំងពីដើមអាណត្តិមកម្ល៉េះ។- សម្តេចធិបតី ហ៊ុន ម៉ាណែត បានសម្តែងការសោកស្តាយចំពោះស្ពានវែងដែលបានតភ្ជាប់ពីប្រទេសរុស្ស៊ី ជាមួយប្រទេសអ៊ុយក្រែន ដែលបានហិនហោចទៅវិញដោយសារសង្រ្គាម ហើយសម្តេចបានលើកឡើងទៀតថា ប្រសិនជាស្ពាននេះមានវត្តមានលើទឹកដីកម្ពុជាវិញមិនដឹងជាសប្បាយយ៉ាងណានោះទេ។- សម្តេចធិបតី ហ៊ុន ម៉ាណែត បានថ្លែងថា បច្ចុប្បន្ន រាជរដ្ឋាភិបាល កំពុងធ្វើការជាមួយភាគីពាក់ព័ន្ធដើម្បីដោះស្រាយបញ្ហាអចលនទ្រព្យនៅក្នុងប្រទេសកម្ពុជា។- សម្ដេចធិបតីនាយករដ្ឋមន្ត្រី បញ្ជាក់ជាថ្មីថា ជនបរទេស មិនអាចក្លាយជាម្ចាស់កម្មសិទ្ធិដីធ្លីនៅកម្ពុជា បានជាដាច់ខាត។- គណៈកម្មាធិការជាតិរៀបចំការបោះឆ្នោត គ.ជ.ប ចេញសេចក្តីជូនដំណឹងស្តីពី ការបិទផ្សាយបញ្ជីបោះឆ្នោត និងបញ្ជីឈ្មោះអ្នកបោះឆ្នោត ដែលនឹងត្រូវ លុបចេញពីបញ្ជីបោះឆ្នោត។- សម្ដេចធិបតីនាយករដ្ឋមន្ត្រី ស្នើឱ្យពន្លឿនការចែកបណ្ណកម្មសិទ្ធិដីធ្លី និងចុះបញ្ជីដីធ្លីជូនពលរដ្ឋឱ្យ បានលឿន។- សម្ដេចធិបតីនាយករដ្ឋមន្ត្រី ស្នើឱ្យរៀបចំគន្លងផ្លូវសម្រាប់រថយន្តក្រុងដឹកអ្នកដំណើរនៅទីក្រុងកោះនរា ឱ្យបានមុនគេ។- សម្ដេចធិបតីនាយករដ្ឋមន្ត្រី ស្នើឱ្យរៀបចំទុកជាមុនដោយកំណត់តំបន់សម្រាប់រស់នៅ និងតំបន់ធ្វើអា ជីវកម្ម ឱ្យស្ថិតនៅដាច់ដោយឡែកពីគ្នា ដើម្បី​បញ្ចៀស​ការរំខានដល់ការរស់នៅរបស់ប្រជាពលរដ្ឋ។- សម្ដេចធិបតីនាយករដ្ឋមន្ត្រី ស្នើឱ្យបង្កើនការគ្រប់គ្រងលើសន្តិសុខសណ្ដាប់ធ្នាប់ បញ្ហាគ្រឿងញៀន បងធំ បងតូច នៅតាមភូមិ ឃុំ សង្កាត់ ឱ្យកាន់តែប្រសើរថែមទៀត។- សម្តេចធិបតី ជំរុញឲ្យអាជ្ញាធរចាត់វិធានការឲ្យដូចជាភ្លៀងរលឹម ក្នុងការបង្រ្កាបដល់មន្រ្តីប្រដាប់អាវុធណា ដែលបាញ់បោះសេរី និងប្រើប្រាស់គ្រឿងញៀន ខណៈសម្តេចបានឲ្យដឹងថា នាពេលនេះមន្រ្តីប្រដាប់អាវុធចំនួនបួនរូប​ដែលបានបាញ់រាប់រយគ្រាប់នៅគិរីរម្យត្រូវបានដកចេញពីក្របខណ្ឌ។- សម្ដេចធិបតីនាយករដ្ឋមន្ត្រី៖ បញ្ហាសន្តិសុខនៅប្រទេសក្នុងតំបន់អឺរ៉ុបមួយចំនួនដែលសម្ដេចធិបតី ធ្លាប់បានទៅដល់ បើធៀបនឹងកម្ពុជា ឃើញថា កម្ពុជាប្រសើរជាងបណ្ដាប្រទេសទាំងនោះ។- សម្ដេចធិបតីនាយករដ្ឋមន្ត្រី៖ អ្នកពាក់ព័ន្ធចំនួន ៤ នាក់នឹងត្រូវបណ្ដេញចេញពីក្រប​ខណ្ឌមន្ត្រីសាធារណៈ ក្រោយរកឃើញថា បានបាញ់បោះសេរីនៅគិរីរម្យ។

បណ្ដាញសង្គម

ព័ត៌មានថ្មីៗ

សម្ដេចកិត្តិសង្គហបណ្ឌិត ម៉ែន សំអន វាយតម្លៃខ្ពស់ចំពោះACUក្នុងការស៊ើបអង្កេត និងបំបែកសំណុំរឿងធំៗ
04/30/2026 08:04 PM
Facebook Telegram Linkin
EU៖ ការដាក់ពង្រាយកងទ័ព នៅអឺរ៉ុប គឺ «ដើម្បីផលប្រយោជន៍របស់សហរដ្ឋអាមេរិក»
04/30/2026 08:04 PM
Facebook Telegram Linkin
លោក Trump ៖ សហរដ្ឋអាមេរិកនឹងបញ្ចេញឯកសារមនុស្សពិភពផ្កាយក្នុងពេលដ៏ខ្លីខាងមុខនេះ
04/30/2026 08:04 PM
Facebook Telegram Linkin
ជនជាតិជ្វីហ្វអង់គ្លេស ទាមទារកិច្ចប្រឹងប្រែងបន្ថែមទៀតពីរដ្ឋាភិបាល ក្រោយការវាយប្រហារដោយកាំបិត
04/30/2026 08:04 PM
Facebook Telegram Linkin
កណ្តុររាតត្បាតជំរំតង់នៅតំបន់ហ្គាហ្សា ខាំក្មេងៗ និងធ្វើឲ្យរីករាលដាលជំងឺ
04/30/2026 08:04 PM
Facebook Telegram Linkin
អធិការបតីអាល្លឺម៉ង់ អំពាវនាវឲ្យមាន «ភាពជាដៃគូឆ្លងមហាសមុទ្រអាត្លង់ទិកអាចទុកចិត្តបាន»
04/30/2026 08:04 PM
Facebook Telegram Linkin
អាស៊ានប្ដេជ្ញាបញ្ចៀសការហាមឃាត់ការនាំចេញ និងចែករំលែកប្រេងឥន្ធនៈ ខណៈតម្លៃប្រេងហក់ឡើង
04/30/2026 07:04 PM
Facebook Telegram Linkin
ប្រធានថាមពលអាមេរិក៖ អារ៉ាប៊ីសាអ៊ូឌីត និងអារ៉ាប់រួមនឹងបង្កើនការផលិតប្រេង ក្រោយជម្លោះអ៊ីរ៉ង់
04/30/2026 07:04 PM
Facebook Telegram Linkin
ចិនគំរាមសងសឹក EU ប្រសិនបើប្លុកហាមឃាត់ឧបករណ៍របស់ក្រុមហ៊ុន Huawei
04/30/2026 07:04 PM
Facebook Telegram Linkin
ក្រុមសិទ្ធិមនុស្ស៖ មនុស្សយ៉ាងតិច ៣៥៨នាក់ ត្រូវបានប្រហារជីវិត ក្រោមការដឹកនាំរបស់លោក គីម ជុងអ៊ុន
04/30/2026 07:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.