BTV NEWS

ប្រធានាធិបតីសៀរ៉ាឡេអូន លោក Bio នាំមុខក្នុងការបោះឆ្នោតប្រធានាធិបតី

សៀរ៉ាឡេអូន៖ គណៈកម្មាធិការជាតិរៀបចំការបោះឆ្នោតរបស់ប្រទេសសៀរ៉ាឡេអូន បានឲ្យដឹង កាលពីថ្ងៃចន្ទ (ទី២៦ ខែមិថុនា) ថា លោកប្រធានាធិបតី Julius Maada Bio កំពុងនាំមុខលើគូប្រជែង សម្រាប់ការរាប់សន្លឹកឆ្នោតពីការបោះឆ្នោតជ្រើសរើសប្រធានាធិបតីរបស់ប្រទេសអាហ្រ្វិកខាងលិចមួយនេះ។លោក Bio វ័យ ៥៩ឆ្នាំ កំពុងឈរឈ្មោះប្រជែងតំណែងអ្នកដឹកនាំកំពូលរបស់ប្រទេសជាលើកទីពីរ ប្រឆាំងនឹងគូបដិបក្ខចំនួន ១២រូប ដោយក្នុងនោះគូប្រជែងដ៏លេចធ្លោបំផុតរបស់លោក គឺបេក្ខជនក្នុងគណបក្សសភាប្រជាជនទាំងអស់ (APC) លោក Samura Kamara ដែលបានចាញ់លោក Bio ក្នុងការបោះឆ្នោតលើកចុងក្រោយ ក្នុងឆ្នាំ២០១៨។លទ្ធផលសន្លឹកឆ្នោតបណ្ដោះអាសន្ន បានបង្ហាញថា មកទល់ពេលនេះ លោក Bio បានទទួលសំឡេងឆ្នោតជាង ១លានសំឡេង ធៀបនឹងលោក Kamara ដែលមានសំឡេងតិចជាង ៨០០.០០០សំឡេង។ គណៈកម្មការ បាននិយាយនៅរសៀលថ្ងៃចន្ទថា លទ្ធផលដែលបានផ្ទៀងផ្ទាត់ចុងក្រោយ នឹងត្រូវប្រកាសក្នុងរយៈពេល ៤៨ម៉ោងបន្ទាប់។ការបោះឆ្នោតនេះ មានសភាពតានតឹងខ្លាំង ខណៈគណបក្សសភាប្រជាជនទាំងអស់ (APC) បាននិយាយថា តំណាងបោះឆ្នោតរបស់ពួកគេត្រូវបានវាយប្រហារ និងបំភិតបំភ័យ នៅក្នុងស្រុកចំនួន៣ នៅថ្ងៃបោះឆ្នោត។ ចំណែកខាងគណៈកម្មាធិការជាតិរៀបចំការបោះឆ្នោត កាលពីថ្ងៃអាទិត្យ បានគូសបញ្ជាក់ពីករណីជាច្រើន ដែលមន្ត្រីត្រូវបានគេវាយដំ ឬក៏ត្រូវបានបំភិតបំភ័យ។សម្រាប់ប្រជាជនសៀរ៉ាឡេអូន ពួកគេបារម្ភខា្លចថា អាចនឹងមានភាពចលាចលកើតឡើង នៅពេលដែលលទ្ធផលត្រូវបានប្រកាស ជាពិសេសប្រសិនបើគ្មានបេក្ខជនណាម្នាក់ ក្នុងចំណោមបេក្ខជនទាំង ១៣រូប ទទួលបានសំឡេង ៥៥ភាគរយនៃការបោះឆ្នោតនេះ ជាស្ថានភាពដែលនឹងបង្កមានការប្រជែងគ្នាបន្ថែមទៀត រវាងបេក្ខជនឈានមុខគេទាំងពីរ។ ជាមួយគ្នានេះ អ្នកសង្កេតការណ៍អន្តរជាតិ បានសម្តែងកង្វល់អំពីកង្វះតម្លាភាព ក្នុងការរាប់សន្លឹកឆ្នោត។តែយ៉ាងណាក្ដី លោកប្រធានាធិបតី Bio ថ្លែងទៅកាន់ប្រជាជាតិរបស់លោក បន្ទាប់ពីការផ្សព្វផ្សាយលទ្ធផលបណ្តោះអាសន្ននេះ កាលពីល្ងាចថ្ងៃចន្ទ ដោយអំពាវនាវឲ្យប្រជាពលរដ្ឋគ្រប់រូបរក្សាសន្តិភាព។ លោកបាននិយាយនៅក្នុងសុន្ទរកថាតាមទូរទស្សន៍ថា៖ «យើងម្នាក់ៗមានចំណែកក្នុងការរក្សាសន្តិភាព ទាំងក្នុងអំឡុងពេល និងទាំងបន្ទាប់ពីការប្រកាសលទ្ធផលនៃការបោះឆ្នោតទាំងនេះ»៕

យោធាហុងឌុយរ៉ាស ចូលគ្រប់គ្រងពន្ធនាគារបន្ទាប់ពីមនុស្សរាប់សិបនាក់ស្លាប់ដោយកុបកម្ម

ហុងឌុយរ៉ាស៖ ក្រុមមន្ត្រីបាននិយាយថា យោធាប្រទេសហុងឌុយរ៉ាស បានចាប់ផ្តើមគ្រប់គ្រងពន្ធនាគារដែលមានហិង្សារបស់ប្រទេសនេះ កាលពីថ្ងៃចន្ទ ទី២៦ ខែមិថុនា បន្ទាប់ពីជម្លោះក្រុមជនអន្ធពាលដែលបានបណ្តាលឱ្យអ្នកទោស៤៦ នាក់ស្លាប់នៅមជ្ឈមណ្ឌលឃុំឃាំងស្ត្រីកាលពីសប្តាហ៍មុន។ប្រធានាធិបតីឆ្វេងនិយមលោកស្រី Xiomara Castro បានប្រកាសកាលពីសប្តាហ៍មុនថា លោកស្រីនឹងប្រគល់ឱ្យនគរបាល គ្រប់គ្រងប្រព័ន្ធពន្ធនាគារ ដែលជាការចាកចេញពីជំហរអតីតកាលនៃសន្តិសុខគ្មានយោធា ខណៈរដ្ឋបាលរបស់លោកស្រីព្យាយាមបញ្ឈប់សកម្មភាពឧក្រិដ្ឋកម្មដែលរៀបចំទុកនៅក្នុងពន្ធនាគារ។វីដេអូផ្លូវការ បានបង្ហាញពីអ្នកទោសបុរសគ្មានអាវរាប់រយនាក់ ដែលភាគច្រើនមានចាក់សាក់ និងកោរសក់ ដែលត្រូវបានដាក់ឣោយនៅលើកម្រាលឥដ្ឋនៃពន្ធនាគារ Tamara មានសន្តិសុខខ្ពស់របស់ប្រទេសហុងឌុយរ៉ាស ដោយលើកដៃដាក់លើក្បាលរបស់ពួកគេ ហើយត្រូវបានការពារដោយទាហានប្រដាប់អាវុធយ៉ាងតឹងរ៉ឹង។ រូបភាពបង្ហាញពីភាពស្រដៀងគ្នាទៅនឹងរូបភាពដែលបានចែករំលែកកាលពីដើមឆ្នាំនេះដោយរដ្ឋាភិបាលប្រទេសអែលសាវ៉ាឌ័រស្តាំនិយមដែលនៅជិតខាង បានបង្កើនសន្តិសុខពន្ធនាគារ និងបានចាក់សោឧក្រិដ្ឋជនដែលត្រូវបានចោទប្រកាន់ជាង ៦២.០០០នាក់ ក្នុងអំឡុងពេលការបង្ក្រាបក្រុមជនអន្ធពាល។ពន្ធនាគារ Tamara ជាកន្លែងដែលអ្នកទោសប្រមាណ ៤.២០០នាក់ ត្រូវបានប្រមូលផ្តុំទៅក្នុងកន្លែងមួយដែលមានសមត្ថភាពផ្ទុកអ្នកទោសបានត្រឹមតែ ២.៥០០នាក់ ជាពន្ធនាគារមួយក្នុងចំណោមពន្ធនាគារចំនួន ២ រួមជាមួយពន្ធនាគារ La Tolva ដែលនគរបាលបានចូលគ្រប់គ្រងកាលពីថ្ងៃចន្ទ។ នៅប្រទេសហុងឌុយរ៉ាស អ្នកទោសប្រហែល ២០.០០០នាក់ រស់នៅជាមួយគ្នានៅក្នុងពន្ធនាគារចំនួន២៦កន្លែង ដែលមានមនុស្សច្រើន ដោយរបាយការណ៍របស់អង្គការសហប្រជាជាតិបាននិយាយថា ពន្ធនាគាររបស់ប្រទេសមាន ៣៤,២% លើសសមត្ថភាព។ នគរបាលកាលពីថ្ងៃចន្ទ បានរឹបអូសកាំភ្លើងខ្លី កាំភ្លើងយន្ត គ្រាប់រំសេវ បង់កាំភ្លើង និងគ្រាប់បែកដៃ ពីតំបន់មួយនៅពន្ធនាគារ Tamara ដែលគ្រប់គ្រងដោយក្រុមជនអន្ធពាល Barrio 18 ។

តើការក្រោកបះបោររបស់ក្រុមហ៊ុនទាហានស៊ីឈ្នួលរុស្ស៊ី វ៉េកណា អាចប៉ះពាល់អ្វីខ្លះដល់អាហ្វ្រិក?

រុស្ស៊ី៖ ខណៈក្រុមអ្នកប្រយុទ្ធមកពីក្រុមហ៊ុនទាហានស៊ីឈ្នួលរុស្ស៊ី វ៉េកណា បានចេញក្បួនដំណើរទៅកាន់ទីក្រុងមូស្គូ ហេតុការណ៍ភ្ញាក់ផ្អើលជាច្រើនត្រូវបានទម្លាយនៅក្នុងប្រទេសម៉ាលី និងសាធារណរដ្ឋអាហ្វ្រិកកណ្ដាល។ក្រុមហ៊ុនទាហានស៊ីឈ្នួលវ៉េកណា បានកំពុងដើរតួនាទីកាន់តែសំខាន់ ក្នុងសមរភូមិដែលនៅតែបន្តជាយូរមកហើយប្រឆាំងនឹងក្រុមបះបោរ នៅក្នុងប្រទេសទាំង២នេះ ។ យោងតាមឯកសារលិចធ្លាយរបស់សហរដ្ឋអាមេរិក ក្រុមទាហានស៊ីឈ្នួលវ៉េកណា បានធ្វើប្រតិបត្តិការនៅក្នុងប្រទេសយ៉ាងហោចណាស់៨នៅតំបន់អាហ្វ្រិក។ នៅសាធារណរដ្ឋអាហ្វ្រិកកណ្ដាល ក្រុមអ្នកប្រយុទ្ធរបស់ខ្លួន បានវាយបង្ក្រាបក្រុមឧទ្ទាមបះបោរមួយចំនួនចាប់តាំងពីឆ្នាំ២០១៨មក។ នៅក្នុងប្រទេសម៉ាលី អង្គការសហប្រជាជាតិនិងប្រទេសមហាអំណាចលោកខាងលិច និយាយថា ក្រុមហ៊ុនទាហានស៊ីឈ្នួលបានប្រព្រឹត្តឧក្រិដ្ឋកម្មសង្រ្គាម ជាមួយកងកម្លាំងម៉ាលី ដែលកំពុងប្រយុទ្ធប្រឆាំងក្រុមសកម្មប្រយុទ្ធជីហាដ។ តែប្រទេសម៉ាលី និងរុស្ស៊ី បានច្រានចោលរាល់ការចោទប្រកាន់ទាំងនោះ។ ក្រុមមេដឹកនាំយោធារបស់ប្រទេសម៉ាលី និយាយថា ពួកគេពុំបានទទួលយកកងកម្លាំងពីក្រុមហ៊ុនទាហានស៊ីឈ្នួលវ៉េកណាទេ តែក្រុមអ្នកបណ្ដុះបណ្ដាលកំពុងជួយដល់ទាហានក្នុងស្រុក ដោយនាំយកគ្រឿងយុទ្ធោបករណ៍ពីប្រទេសរុស្ស៊ី។ ដូច្នេះ តើការក្រោកបះបោររបស់ក្រុមហ៊ុនទាហានស៊ីឈ្នួលវ៉េកណាអាចប៉ះពាល់អ្វីខ្លះដល់តំបន់នេះ? កាលពីចុងសប្ដាហ៍មុន អ្នកនាំពាក្យសម្រាប់រដ្ឋាភិបាលក្នុងទីក្រុង បាម៉ាកូ (Bamako) របស់ប្រទេសម៉ាលី និងទីក្រុង បាងគី (Bangui)របស់សាធារណរដ្ឋអាហ្វ្រិកកណ្ដាល បានច្រានចោលការអត្ថាធិប្បាយ ដែលថា តើភាពចលាចលនេះនឹងអាចប៉ះពាល់យ៉ាងណាខ្លះដល់យុទ្ធសាស្ត្រសន្តិសុខរបស់ពួកគេ។ ប៉ុន្តែជម្លោះផ្ទៃក្នុងភ្លាមៗបែបនេះ បានបង្កឲ្យមានបញ្ហាផ្នែកការទូត ។ ប្រទេសទាំង២ បាននិងកំពុងព្យាយាមស្វែងរកទំនាក់ទំនងកាន់តែជិតស្និទ្ធជាមួយរុស្ស៊ី៕

ការបះបោរនៅតែធ្វើឲ្យរុស្ស៊ី ភ័យខ្លាច ខណៈលោក Putin និយាយថា លោកព្យាយាមបញ្ចៀសការបង្ហូរឈាម

រុស្ស៊ី៖ លោកប្រធានាធិបតីរុស្ស៊ី Vladimir Putin បាននិយាយថា លោកបានបណ្ដោយឲ្យការងើបបះបោរទៅតាមដំណើរព្រោះលោកព្យាយាមបញ្ចៀសឲ្យបាននូវការបង្ហូរឈាមគ្នា ខណៈប្រធានក្រុមហ៊ុនទាហានស៊ីឈ្នួល វ៉េកណាគ្រុប (Wagner) និយាយថា លោកមិនដែលមានចេតនាផ្ដួលរលំរដ្ឋាភិបាលឡើយ។ សុន្ទរកថាផ្សាយតាមទូរទស្សន៍របស់លោក Putin គឺជាការអត្ថាធិប្បាយជាសាធារណៈលើកដំបូងរបស់លោក ចាប់តាំងពីថ្ងៃសៅរ៍មក ដែលលោកបាននិយាយថាការបះបោរនេះ បានគំរាមកំហែងយ៉ាងខ្លាំងដល់ការរស់នៅរបស់ប្រទេសរុស្ស៊ី ហើយអ្នកប្រព្រឹត្តទាំងនោះនឹងត្រូវបានផ្តន្ទាទោស។ លោក Putin បាននិយាយកាលពីថ្ងៃចន្ទថា ចាប់តាំងពីដំបូង វិធានការផ្សេងៗ ត្រូវបានអនុវត្តន៍ តាមការចង្អុលបង្ហាញផ្ទាល់របស់ខ្ញុំដើម្បីបញ្ចៀសការបង្ហូរឈាមគ្នាដ៏ធ្ងន់ធ្ងរ។ ពេលវេលាជារឿងចាំបាច់ ក្នុងចំណោមបញ្ហាផ្សេងៗ ដើម្បីផ្ដល់ឲ្យទៅអ្នកទាំងឡាយដែលបានប្រព្រឹត្តិខុស ដោយចៃដន្យ ជាការធ្វើឲ្យភ្ញាក់រលឹក ដើម្បីឲ្យដឹងថាទង្វើរបស់ពួកគេត្រូវបានជំទាស់ដាច់ខាត ដោយសង្គម ហើយថាសកម្មភាពបង្កគ្រោះថ្នាក់ ដែលពួកគេបានធ្វើបានផ្ដល់សោកនាដកម្ម និងផលវិបាកដ៏មហន្តរាយដល់ប្រទេសរុស្ស៊ី និងរដ្ឋរបស់យើង។ ប្រធានក្រុមហ៊ុនទាហានស៊ីឈ្នួលរុស្ស៊ី វ៉េកណា លោក Yevgeny Prigozhin បាននិយាយនៅក្នុងសារសំឡេងរយៈពេល១១នាទីដែលត្រូវបានបង្ហោះនៅលើបណ្ដាញសង្គម Telegram របស់លោក និងដែលបានផ្ដល់តម្រុយមួយចំនួនចំពោះទីកន្លែងរបស់លោក ឬ ក្រោមកិច្ចព្រមព្រៀង ដែលលោកបានបញ្ឈប់ក្បួនកងកម្លាំងរបស់លោកទៅកាន់ទីក្រុងមូស្គូ៕

ក្រសួងសាធារណការ បំពាក់ឧបករណ៍បច្ចេកវិទ្យាបញ្ញាសិប្បនិម្មិត និងប្រព័ន្ធកត់ត្រារថយន្តដឹកជញ្ជូននៅកំពង់ផែ

ក្រសួងសាធារណការបាននឹងកំពុងប្រើប្រព័ន្ធបច្ចេកវិទ្យាឌីជីថល គ្រប់គ្រងប្រតិបត្តិការដឹកជញ្ជូនទំនិញចូលកំពង់ផែ ដើម្បីផ្តល់នូវតម្លាភាពក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ ព្រមទាំងកាត់បន្ថយការដឹកជញ្ជូនលើសកម្រិតកំណត់យ៉ាងមានប្រសិទ្ធភាព។បច្ចុប្បន្ននេះ កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង បានត្រៀមខ្លួនរួចរាល់ សម្រាប់បើកប្រតិបត្តិការដឹកជញ្ជូន និងនាំចេញជាផ្លូវការ នាពេលឆាប់ខាងមុខ។ នៅក្នុងកំពង់ផែពហុបំណង និងមណ្ឌលភស្តុភារកម្មនេះ បានរៀបចំបំពាក់នូវឧបករណ៍បច្ចេកវិទ្យាបញ្ញាសិប្បនិម្មិត និងប្រព័ន្ធកត់ត្រារថយន្តដឹកជញ្ជូនដោយស្វ័យប្រវត្តិ Smart Truck Monitoring System ដែលហៅកាត់ថា STM ដែលមានលក្ខណៈងាយស្រួល សម្រាប់គ្របគ្រង តាមដាន និងត្រួតពិនិត្យរបាយការណ៍។ នេះបើតាមឯកឧត្ដម ហ៊ាង សុទ្ធាយុត្តិ អគ្គនាយក នៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ក្រសួងសាធារណការ និងដឹកជញ្ជូន បានថ្លែងប្រាប់ទូរទស្សន៍ព័ត៌មាន BTV កាលពីរសៀលថ្ងៃទី២៦ ខែមិថុនា ឆ្នាំ២០២៣ ខណៈឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូ ចុះពិនិត្យកំពង់ផែពហុបំណង និងមណ្ឌលភស្តុភារកម្មកំពង់ឆ្នាំង។ឯកឧត្ដម ហ៊ាង សុទ្ធាយុត្តិ បានបន្ថែមថា ប្រព័ន្ធនេះត្រូវបានដឹកនាំរៀបចំដោយអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន ដែលអាចកត់ត្រាព័ត៌មានចូលចេញបរិវេណកំពង់ផែពហុបំណង និងមណ្ឌលភស្តុភារកម្មកំពង់ឆ្នាំង។ ប្រព័ន្ធនេះមានសមត្ថភាពកត់ត្រា និងគណនាទម្ងន់ទំនិញ និងចេញវិក្កយបត្រដឹកជញ្ជូន QR Code បានភ្លាមៗ ព្រមទាំងផ្តល់ជូនរបាយការណ៍យ៉ាងសុក្រិត្យ ព្រមទាំងអាចចែករំលែកទិន្នន័យជូនក្រសួងស្ថាប័ន្ធពាក់ព័ន្ធ តាមរយៈប្រព័ន្ធបច្ចេកវិទ្យារបសក្រសួងសាធារណការ និងដឹកជញ្ជូន។ថ្លែងក្នុងឱកាសចុះបំពេញបេសកកម្មការងារ នាឱកាសនេះ ឯកឧត្តមទេសរដ្ឋមន្ត្រី ស៊ុន ចាន់ថុល បានជម្រាបជូនថា ទំនើបកម្មប្រព័ន្ធបច្ចេកវិទ្យាឌីជីថល ក្នុងការគ្រប់គ្រងប្រតិបត្តិការដឹកជញ្ជូនទំនិញចូលកំពង់ផែមួយនេះ បាននិងកំពុងនាំមកនូវប្រសិទ្ធភាពការងារ កាត់បន្ថយការដឹកជញ្ជូនលើសទម្ងន់កម្រិតដោយច្បាប់ ជាពិសេសផ្តល់ឱ្យនូវតម្លាភាព ក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ។ ការរៀបចំឱ្យបង្កើតកំពង់ផែពហុបំណង និងមណ្ឌលភស្តុភារកម្មនេះឡើង គឺក្នុងបំណងជំរុញការដឹកជញ្ជូន និងនាំចេញកសិផលពីខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ទៅកាន់ទីផ្សារជាតិ និងអន្តរជាតិតាមរយៈផ្លូវទឹក ដោយកាត់បន្ថយការចំណាយពេលវេលា និងសោហ៊ុយក្នុងការដឹកជញ្ជូន ជាពិសេសគឺកាត់បន្ថយការដឹកជញ្ជូនធុនធ្ងន់តាមផ្លូវថ្នល់ ដែលជាមូលហេតុនាំឱ្យផ្លូវថ្នល់ងាយរងការខូចខាត។ ម្យ៉ាងវិញទៀតការសាងសង់កំពង់ផែ និងមណ្ឌលភស្តុភារកម្មនេះ ក៏បានផ្ដល់ឱកាសការងារដល់ប្រជាពលរដ្ឋ ដែលរស់នៅក្នុងខេត្តកំពង់ឆ្នាំង និងតំបន់ជុំវិញទៀតផង៕ អត្ថបទ៖ ប្រាក់ វ៉ាន់ដា

ប្រសាសន៍សំខាន់ៗរបស់សម្តេចតេជោ ហ៊ុន សែន ក្នុងឱកាសអញ្ជើញចុះជួបកម្មករ-កម្មការិនីជិត២ម៉ឺននាក់ ជាបន្តទៀតនៅក្រុងច្បារមន

កំពង់ស្ពឺ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២៧ ខែមិថុនា ឆ្នាំ២០២៣នេះ បន្តអញ្ជើញចុះជួបសំណេះសំណាលជាមួយកម្មករ និយោជិតសរុប ១៩,០៨៥នាក់ មកពីរោងចក្រ សហគ្រាសចំនួន៩ ដែលកំពុងដំណើរការអាជីវកម្មក្នុងក្រុងច្បារមន និងស្រុកសំរោងទង ខេត្តកំពង់ស្ពឺ។ប្រសាសន៍សំខាន់ៗរបស់សម្តេចតេជោ ហ៊ុន សែន ដែលមានខ្លឹមសារដូចខាងក្រោម៖សម្តេចតេជោ ហ៊ុន សែន បានរីករាយចំពោះកម្រិតចំណេះដឹងរបស់កម្មករ-កម្មការិនី ពាក់ព័ន្ធបច្ចេកវិទ្យាទំនើបទាន់សម័យដូចជា៖ Facebook, Telegram..។ល។ សម្រាប់ទំនាក់ទំនងគ្នា ដែលមានមន្ត្រីខ្លះមិនចេះ ឬដើរទាន់បច្ចេកវិទ្យា ស្មើនឹងក្មួយៗកម្មករ-កម្មការិនីផង។សម្តេចតេជោ ហ៊ុន សែន ប្រកាសពីភាពជោគជ័យ នៃការគ្រប់គ្រងករណីឆ្លងរីករាលដាលជំងឺកូវីដ-១៩ ដែលនាំឱ្យកម្ពុជាអាចបើកឡើងវិញនូវសង្គមសេដ្ឋកិច្ចកម្ពុជាឡើងវិញ រួមទាំងការរៀបចំព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ព្រមទាំងការជួបជុំជាមួយកម្មករ-កម្មការិនីជាបន្តបន្ទាប់ ដោយមិនចាំបាច់ធ្វើតេស្តកូវីដ-១៩។សម្តេចតេជោ ហ៊ុន សែន បានប្រកាសដោយមោទនភាព ពីការរីកចម្រើនរបស់ខេត្តកំពង់ស្ពឺ ដែលធ្លាប់ជាខេត្តក្រីក្រមួយ បានក្លាយទៅជាតំបន់រោងចក្រ សហគ្រាស និងតំបន់ឧស្សាហកម្មធន់ធ្ងន់ សម្រាប់ដំណើរឈានឡើង នៃសេដ្ឋកិច្ចរបស់ខេត្ត និងក្នុងក្របខណ្ឌទូទាំងប្រទេស។សម្តេចតេជោ ហ៊ុន សែន បានប្រកាសថា ខេត្តភាគនិរតី នៃប្រទេស បានក្លាយជាខេត្ត នៃសេដ្ឋកិច្ចពហុបំណង រួមទាំងនាំចេញតាមច្រកសមុទ្រទៅកាន់ទីផ្សារអន្តរជាតិ បានដោយងាយស្រួលរួមមាន៖ ផ្លូវជាតិខ្វាត់ខ្វែង និងកំពង់ផែទឹកជ្រៅ។សម្តេចតេជោ ហ៊ុន សែន ប្រកាសថា គោលដៅរបស់រាជរដ្ឋាភិបាលត្រូវបង្កើតការងារថ្មឺៗ យ៉ាងហោចណាស់ចំនួន ៣០ម៉ឺនកន្លែងក្នុងមួយឆ្នាំ ស្របតាមការរីកចម្រើន និងកំណើនប្រជាជនជារៀងរាល់ថ្ងៃ។សម្តេចតេជោ ហ៊ុន សែន បញ្ជាក់ថា កំពង់ស្ពឺ ជាខេត្តទី២ ដែលមានការអភិវឌ្ឍរោងចក្រ សហគ្រាសច្រើនជាងគេ ដែលផលិតរោងចក្រ ទាំងនោះសម្រាប់នាំចេញទៅទីផ្សារអន្តរជាតិ។សម្តេចតេជោ ហ៊ុន សែន មានប្រសាសន៍ថា ពីមុនដី១ហិចតា ប្រជាកសិករអាចធ្វើស្រែ-ចំការ អាចចិញ្ចឹមមនុស្សបានតែ១គ្រួសារដែលមានសមាជិកប្រមាណ៥នាក់ប៉ុណ្ណោះ ប៉ុន្តែនៅពេលមានការវិនិយោគលើផ្ទៃដី១ហិចតា គឺអាចចិញ្ចឹមប្រជាពលរដ្ឋបានពី៣-៤ពាន់គ្រួសារ តាមរយៈការវិនិយោគលើរោងចក្រសហគ្រាស និងផ្នែកឧស្សាហកម្ម។សម្តេចតេជោ ហ៊ុន សែន បញ្ជាក់ថា នយោបាយត្រូវរបស់រាជរដ្ឋាភិបាល គឺការសម្រេចចិត្តឱ្យមានទីតាំងរោងចក្រនៅខេត្តកំពង់ស្ពឺ ដែលពេលបច្ចុប្បន្ននេះមានរោងចក្រ សហគ្រាសវិស័យកាត់ដេរចំនួន១៩១ មានកម្មករនិយោជិតជាង១៤ម៉ឺននាក់ និងមានប្រាក់ឈ្នួលមធ្យមជាង ៤៥១លានដុល្លារក្នុងមួយឆ្នាំ។សម្តេចតេជោ ហ៊ុន សែន បញ្ជាក់ថា ច្បាស់ណាស់ បើពេលនេះ គ្មានការវិនិយោគលើវិស័យកាត់ដេរ និងឧស្សាហកកម្មនោះទេ គឺបងប្អូនកម្មករ-កម្មការិនី កំពុងធ្វើស្រែចំការ និងរបរចិញ្ចឹមគ្រួសារលក់ដូរតិចតួចនៅផ្ទះឯណោះទេ។សម្តេចតេជោ ហ៊ុន សែន បញ្ជាក់ថា ការដែលសម្តេចចុះសំណេះសំណាលជាមួយបងប្អូនកម្មករ-កម្មការិនីនៅតាមបណ្តារោងចក្រនានាដោយផ្ទាល់នាពេលបន្តបន្ទាប់នេះ គឺគ្មានអ្វីក្រៅពីពិនិត្យវឌ្ឍនភាពនៅតាមរោងចក្រ សួរសុខទុក្ខ និងរកដំណោះស្រាយជូនដល់បងប្អូនកម្មករ -កម្មការិនីឱ្យបានឆាប់រហ័សនោះទេ។សម្តេចតេជោ ហ៊ុន សែន បានប្រកាសពីជនចង្រៃនៅក្រៅស្រុក ដែលតែងធ្វើសកម្មភាពនយោបាយបំផ្លាញឆ្នាំងបាយកម្មករ-កម្មការិនី ដូចជា៖ កុំឱ្យវិនិយោគិនមកបណ្តាក់ទុនរកស៊ីនៅកម្ពុជា ,កុំឱ្យគេទិញផលិតផលពីកម្ពុជា និងឱ្យអន្តរជាតិដាក់ទណ្ឌកម្មលើកម្ពុជាជាដើម។សម្តេចតេជោ ហ៊ុន សែន បញ្ជាក់ថា ការអភិវឌ្ឍនៅខេត្តកំពង់ស្ពឺនិយាយដោយឡែក និងក្របខណ្ឌទូទាំងប្រទេសនិយាយជារួម គឺកើតឡើងដោយសារកត្តាសុខសន្តិភាព។ «យើងត្រូវរួមរក្សាសន្តិភាពនេះឱ្យបាន ដើម្បីធានាការអភិវឌ្ឍរយៈពេលវែង»។ សម្តេចបញ្ជាក់ថា «គ្មាននរណាទៅរកស៊ី នៅប្រទេសដែលកំពុងមានសង្គ្រាមកាប់នោះទេ»។សម្តេចតេជោ ហ៊ុន សែន បន្តអំពាវនាវដល់ម្ចាស់រោចក្រ និងកម្មករនិយោជិត ត្រូវរួមគ្នាធ្វើយ៉ាងណាឱ្យរោងចក្រមួយក្លាយទៅជាសហគមន៍សុខសាន្តមួយ។ ការធ្វើបែបនេះបាន កម្មករនិយោជិត និងម្ចាស់រោងចក្រ ត្រូវធ្វើបែបណា កុំឱ្យមានគ្រឿងញៀន កុំឱ្យមានបងតូច បងធំ កុំឱ្យមានជម្លោះរវាងកម្មករនិយោជិត និងថៅកែរោងចក្រ។សម្តេចតេជោ ហ៊ុន សែន បានប្រកាសថា បណ្ឌិត សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី ទើបត្រលប់ពីសហរដ្ឋអាមេរិក បានធ្វើសន្និសីទសារព័ត៌មានពីនយោបាយ និងភាពពិតជាក់ស្តែងរបស់កម្ពុជា។សម្តេចតេជោ ហ៊ុន សែន បន្តអំពាវនាវដល់កម្មករនិយោជិតទៅចូលរួមបោះឆ្នោតឱ្យបានគ្រប់ៗគ្នានៅថ្ងៃទី២៣ ខែកក្កដា ឆ្នាំ២០២៣ ខណៈរាជរដ្ឋាភិបាលបានអនុញ្ញាតឱ្យកម្មករនិយោជិតឈប់សម្រាករយៈពេល៣ ថ្ងៃ ចាប់ពីថ្ងៃទី ២២-២៤ ខែកក្កដា ឆ្នាំ២០២៣ ដោយមានប្រាក់ឈ្នួល។សម្តេចតេជោ ហ៊ុន សែន បានប្រកាសដល់កម្មករ-កម្មការិនីរោងចក្រទាំងអស់ ត្រូវហ៊ានចេញមុខថ្កោលទោស ពួកជ្រុលនិយម និងពួកចង្រៃទាំងឡាយ ដែលបំណងបំផ្លាញផលប្រយោជន៍កម្មករ-កម្មការិនី និងប្រទេសជាតិ៕

សម្តេចតេជោ ហ៊ុន សែន អញ្ជើញចុះជួបកម្មករ-កម្មការិនីជិត២ម៉ឺននាក់ ជាបន្តទៀត នៅក្រុងច្បារមន ខេត្តកំពង់ស្ពឺ

កំពង់ស្ពឺ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២៧ ខែមិថុនា ឆ្នាំ២០២៣នេះ បន្តអញ្ជើញចុះជួបសំណេះសំណាលជាមួយកម្មករ និយោជិតសរុប ១៩,០៨៥នាក់ មកពីរោងចក្រ សហគ្រាសចំនួន៩ ដែលកំពុងដំណើរការអាជីវកម្មក្នុងក្រុងច្បារមន និងស្រុកសំរោងទង ខេត្តកំពង់ស្ពឺ។ ឯកឧត្តម អ៊ិត សំហេង រដ្ឋមន្ត្រីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា សម្តេចតេជោនាយករដ្ឋមន្ត្រី ធ្លាប់បានចុះជួបសំណេះសំណាលជាមួយកម្មករ និយោជិតនៅក្រុងច្បារមននេះចំនួនពីរលើករួចមកហើយកាលពីឆ្នាំ២០១៨។ រោងចក្រ សហគ្រាសទាំង៩ ដែលអនុញ្ញាតឱ្យកម្មករ កម្មការិនីជួបសំណេះសំណាលនឹងសម្តេចតេជោ រួមមាន៖ រោងចក្រកាត់ដេរចំនួន៣, ផលិតផលធ្វើដំណើរ និងកាបូបចំនួន៦។ ផលិតផលរបស់រោងចក្រទាំងនេះ គឺនាំចេញទៅទីផ្សារអន្តរជាតិ ដូចជាសហគមន៍អឺរ៉ុប សហរដ្ឋអាមេរិក ចិន និងអូស្ត្រាលី។ល។ឆ្នាំ២០២៣នេះ ខេត្តកំពង់ស្ពឺ មានរោងចក្រ សហគ្រាសចំនួន៣៨៥ មានកម្មករ និយោជិតជាង ១៥ម៉ឺន ៥ពាន់នាក់ ដែលមានប្រាក់ឈ្នួលមធ្យមសរុបជាង ៤៨១លានដុល្លារក្នុងមួយឆ្នាំ។ ក្នុងនោះរោងចក្រ សហគ្រាសវិស័យកាត់ដេរចំនួន១៩១ មានកម្មករនិយោជិតសរុបជាង ១៤ម៉ឺន ៥ពាន់នាក់ ដែលមានប្រាក់ឈ្នួលមធ្យមសរុបជាង ៤៥១លានដុល្លារក្នុងមួយឆ្នាំ។ ខេត្តកំពង់ស្ពឺ ជាខេត្តទី២ ដែលមានការអភិវឌ្ឍរោងចក្រ សហគ្រាសច្រើនជាងគេ៕

សម្ដេចតេជោ៖ បើCPPជាប់ឆ្នោត នឹងរៀបចំប្រជុំសភា ដើម្បីបង្កើតរាជរដ្ឋាភិបាលថ្មីនៅចុងខែសីហា

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានកំណត់យកចុងខែសីហា ឆ្នាំ២០២៣ ដើម្បី រៀបចំប្រជុំសភា និងប្រកាសបង្កើតរាជរដ្ឋាភិបាល អាណត្តិទី៧ បន្ទាប់ពីការប្រកាសរបស់គណៈកម្មាធិការជាតិរៀបចំការបោះឆ្នោត (គ.ជ.ប) ហើយក្នុងករណីគណបក្សប្រជាជនកម្ពុជាទទួលបានជ័យជម្នះ ។ក្នុងពិធីសម្ពោធដាក់ឱ្យប្រើប្រាស់ជាផ្លូវការ “អគារសាលាយុត្ដិធម្ម” របស់ក្រសួងយុត្តិធម៌ នៅថ្ងៃទី២៦ ខែមិថុនា ឆ្នាំ២០២៣ សម្ដេចតេជោ នាយករដ្ឋមន្ត្រី មានប្រសាសន៍ថា នាពេលខាងមុខ ក្នុងករណីនៃការបោះឆ្នោតជ្រើសរើសតំណាងរាស្ត្រ នីតិកាលទី៧ មិនមានការបោះឆ្នោតឡើងវិញនៅកន្លែងណាមួយដំណើរការដោះស្រាយដោយ គ.ជ.ប និងរហូតដល់ដំណាក់កាលនៃការដោះស្រាយរបស់ក្រុមប្រឹក្សាធម្មនុញ្ញ ហើយបកត្រឡប់មកវិញ ប្រកាសលទ្ធផលផ្លូវការ និងបេក្ខជនជាប់ឆ្នោតប្រើរយៈពេលខ្លី ប៉ុន្តែក៏ត្រូវទុកពេលវេលាមួយចំនួន ។សម្ដេចតេជោ បានបន្តថា តាមការគ្រោងទុកសភានឹងត្រូវប្រជុំលើកដំបូង នៅថ្ងៃទី២៨ ខែសីហា ក្រោមព្រះរាជាធិបតីភាពដ៏ខ្ពង់ខ្ពស់បំផុត នៃព្រះមហាក្សត្រ ហើយបន្ទាប់មកសភានឹងចូលស្បថនៅថ្ងៃបន្ទាប់នឹងប្រកាសបង្កើតរាជរដ្ឋាភិបាល នេះបើក្នុងករណីដែលគណបក្សប្រជាជនកម្ពុជាជាប់ឆ្នោត ។គួរបញ្ជាក់ថា ការបោះឆ្នោតជ្រើសរើសតំណាងរាស្ត្រ អាណត្តិទី៧ នឹងធ្វើឡើងនៅថ្ងៃទី២៣ ខែ កក្កដា ឆ្នាំ២០២៣ ដោយមានគណបក្សនយោបាយចំនួន១៨ ចូលរួមប្រកួតប្រជែង ខណៈគណបក្សប្រជាជនកម្ពុជា ឈរនៅលេខរៀងទី១៨ ៕ អត្ថបទ បាន សុខរិទ្ធិ

សម្ដេចតេជោ ជំរុញមន្ត្រីឱ្យបង្កើនប្រសិទ្ធភាពការងារនៅពេលមានកន្លែងធ្វើការល្អហើយ

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅតែរម្លឹកទៅកាន់មន្ត្រីគ្រប់ស្ថាប័ន ឱ្យខិតខំប្រឹងប្រែងបង្កើនប្រសិទ្ធភាពការងារឱ្យកាន់តែល្អ នៅពេលទទួលបានកន្លែងធ្វើការល្អហើយ ប៉ុន្តែប្រសិទ្ធភាព ការងារ មិនមែននៅត្រង់ថា ទាល់តែមានកន្លែងធ្វើការល្អនោះទេ ។សម្ដេចតេជោ ហ៊ុន សែន ក្នុងឱកាសអញ្ជើញជាអធិបតីដ៏ខ្ពង់ខ្ពស់សម្ពោធដាក់ឲ្យប្រើប្រាស់ជាផ្លូវ ការ "អគារសាលាយុត្ដិធម្ម" របស់ក្រសួងយុត្តិធម៌ នៅក្នុងខ័ណ្ឌជ្រោយចង្វារ នៅព្រឹកថ្ងៃទី២៦ ខែមិថុនានេះ បានថ្លែងថា ការជួយជ្រោមជ្រែងរៀបចំឱ្យមានកន្លែងធ្វើការថ្មីនេះជាការល្អហើយ ប៉ុន្តែការធានាឱ្យ មានប្រសិទ្ធភាពការងារជាការចាំបាច់។សម្ដេចតេជោ បានរំលឹកថា ពីអតីតកាល សម្តេចធ្លាប់បានជួយជ្រោមជ្រែងរកដំណោះស្រាយដល់ ស្ថាប័នតុលាការ ដែលមិនមែនជាការលូកដៃចូលកិច្ចការតុលាការក្នុងរឿងកាត់ក្តីទេ តែបានជួយរកដំ ណោះស្រាយទៅលើការរៀបចំទីកន្លែងធ្វើការឱ្យបានងាយស្រួលប៉ុណ្ណោះ។ សម្តេច បានដកសិទ្ធិខ្លួនឯងចេញ ពីការតែងតាំងចៅក្រមតុលាការ និងអយ្យការសាលាដំបូង ដោយសម្តេច បានយល់ឃើញថា ជាការមិនត្រឹមត្រូវ ព្រោះអំណាចតុលាការ គឺដាច់ដោយឡែក ដែលមិនអាចត្រូវតែងតាំងដោយនាយករដ្ឋមន្ត្រីឡើយ ៕អត្ថបទ៖ មុត សុទ្ធ

សម្ដេចតេជោ ដាស់តឿនមន្ត្រីក្រសួងស្ថាប័នរដ្ឋនានា ត្រូវចេះសន្សំសំចៃភ្លើងកុំប្រើប្រាស់ខ្ជីខ្ជា

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានរំលឹកដាស់តឿនមន្ត្រីទៅតាមក្រសួងស្ថាប័ន រដ្ឋទាំងអស់ ត្រូវខិតខំសន្សំសំចៃភ្លើងអគ្គិសនី មិនត្រូវប្រើប្រាស់ខ្ជីខ្ជា ខណៈវិស័យថាមពលនៅលើពិភព លោក កំពុងមានការឡើងថ្លៃ ។ក្នុងពិធីសម្ពោធដាក់ឱ្យប្រើប្រាស់ជាផ្លូវការ “អគារសាលាយុត្ដិធម្ម” របស់ក្រសួងយុត្តិធម៌ នៅព្រឹក ថ្ងៃទី២៦ ខែមិថុនា នេះ សម្ដេចតេជោ ហ៊ុន សែន បានមានប្រសាសន៍ថា តាមក្រសួងស្ថាប័ននានា កំពុងមានការអភិវឌ្ឍច្រើននូវអគារសម្រាប់ធ្វើការងារ បូករួមជាមួយនឹងការបំពាក់នូវសម្ភារៈល្អៗនៅតាមបន្ទប់។សម្ដេចតេជោ បានបញ្ជាក់ថា ទន្ទឹមនឹងមានកន្លែងធ្វើការកាន់តែល្អ ការចំណាយក៏កាន់តែច្រើនផង ដែរ ដូច្នេះសម្ដេច បានរំលឹកមន្ត្រីត្រូវមានការសន្សំសំចៃ ជាពិសេសចំពោះភ្លើងអគ្គិសនី ។គួរបញ្ជាក់ថា វិបត្តិនានា កំពុងកើតឡើងនៅលើពិភពលោក ដោយសារបញ្ហាសង្គ្រាមរវាងរុស្ស៊ី និង អ៊ុយក្រែន ដូចជាវិបត្តិវិស័យថាមពល បញ្ហាខ្វះប្រេង និងឧស្ម័នប្រើប្រាស់ផងដែរ ។ ប៉ុន្តែយ៉ាងណាក៏ដោយ សម្រាប់កម្ពុជា សម្ដេចតេជោ ហ៊ុន សែន បានបញ្ជាក់ថា មិនមានការឡើងថ្លៃភ្លើងអគ្គិសនីឡើយ ព្រោះបើ ភ្លើងឡើងថ្លៃ នឹងធ្វើឲ្យវិស័យជាច្រើននៅកម្ពុជាជួបការលំបាក ជាពិសេសប្រជាពលរដ្ឋ ៕អត្ថបទ៖ បាន សុខរិទ្ធិ

នយោបាយ និង ការអភិវឌ្ឍន៍

ប្រធានាធិបតីសៀរ៉ាឡេអូន លោក Bio នាំមុខក្នុងការបោះឆ្នោតប្រធានាធិបតី

យោធាហុងឌុយរ៉ាស ចូលគ្រប់គ្រងពន្ធនាគារបន្ទាប់ពីមនុស្សរាប់សិបនាក់ស្លាប់ដោយកុបកម្ម

តើការក្រោកបះបោររបស់ក្រុមហ៊ុនទាហានស៊ីឈ្នួលរុស្ស៊ី វ៉េកណា អាចប៉ះពាល់អ្វីខ្លះដល់អាហ្វ្រិក?

ការបះបោរនៅតែធ្វើឲ្យរុស្ស៊ី ភ័យខ្លាច ខណៈលោក Putin និយាយថា លោកព្យាយាមបញ្ចៀសការបង្ហូរឈាម

ក្រសួងសាធារណការ បំពាក់ឧបករណ៍បច្ចេកវិទ្យាបញ្ញាសិប្បនិម្មិត និងប្រព័ន្ធកត់ត្រារថយន្តដឹកជញ្ជូននៅកំពង់ផែ

សម្តេចតេជោ ហ៊ុន សែន អញ្ជើញចុះជួបកម្មករ-កម្មការិនីជិត២ម៉ឺននាក់ ជាបន្តទៀត នៅក្រុងច្បារមន ខេត្តកំពង់ស្ពឺ

សម្ដេចតេជោ៖ បើCPPជាប់ឆ្នោត នឹងរៀបចំប្រជុំសភា ដើម្បីបង្កើតរាជរដ្ឋាភិបាលថ្មីនៅចុងខែសីហា

សម្ដេចតេជោ ជំរុញមន្ត្រីឱ្យបង្កើនប្រសិទ្ធភាពការងារនៅពេលមានកន្លែងធ្វើការល្អហើយ

សម្ដេចតេជោ ដាស់តឿនមន្ត្រីក្រសួងស្ថាប័នរដ្ឋនានា ត្រូវចេះសន្សំសំចៃភ្លើងកុំប្រើប្រាស់ខ្ជីខ្ជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ប្រធានាធិបតីសៀរ៉ាឡេអូន លោក Bio នាំមុខក្នុងការបោះឆ្នោតប្រធានាធិបតី

យោធាហុងឌុយរ៉ាស ចូលគ្រប់គ្រងពន្ធនាគារបន្ទាប់ពីមនុស្សរាប់សិបនាក់ស្លាប់ដោយកុបកម្ម

តើការក្រោកបះបោររបស់ក្រុមហ៊ុនទាហានស៊ីឈ្នួលរុស្ស៊ី វ៉េកណា អាចប៉ះពាល់អ្វីខ្លះដល់អាហ្វ្រិក?

ការបះបោរនៅតែធ្វើឲ្យរុស្ស៊ី ភ័យខ្លាច ខណៈលោក Putin និយាយថា លោកព្យាយាមបញ្ចៀសការបង្ហូរឈាម

សម្តេចតេជោ ហ៊ុន សែន អញ្ជើញចុះជួបកម្មករ-កម្មការិនីជិត២ម៉ឺននាក់ ជាបន្តទៀត នៅក្រុងច្បារមន ខេត្តកំពង់ស្ពឺ

សម្ដេចតេជោ៖ បើCPPជាប់ឆ្នោត នឹងរៀបចំប្រជុំសភា ដើម្បីបង្កើតរាជរដ្ឋាភិបាលថ្មីនៅចុងខែសីហា

សម្ដេចតេជោ ជំរុញមន្ត្រីឱ្យបង្កើនប្រសិទ្ធភាពការងារនៅពេលមានកន្លែងធ្វើការល្អហើយ

សម្ដេចតេជោ ដាស់តឿនមន្ត្រីក្រសួងស្ថាប័នរដ្ឋនានា ត្រូវចេះសន្សំសំចៃភ្លើងកុំប្រើប្រាស់ខ្ជីខ្ជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍