BTV NEWS

សម្តេចតេជោ៖ បក្សប្រជាជនកម្ពុជាមិនជាប់ពាក់ព័ន្ធនឹងសេចក្តីសម្រេចរបស់ គ.ជ.ប. និងក្រុមប្រឹក្សាធម្មនុញ្ញនោះទេ

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា បានប្រកាសយ៉ាងច្បាស់ថា គណបក្សប្រជាជនកម្ពុជាគឺជាគូរប្រកួតមួយ ដែលមិនមានការជាប់ពាក់ព័ន្ធ នឹងសេចក្ដីសម្រេចរបស់គណៈកម្មាធិការជាតិរៀបចំការបោះឆ្នោត (គជប) និងក្រុមប្រឹក្សាធម្មនុញ្ញ ដែលហាមមិនឲ្យ គណបក្សភ្លើងទៀតចូលរួមបោះឆ្នោតសកលអាណត្តិទី៧ ឆ្នាំ២០២៣នោះទេ។ក្នុងឱកាសអញ្ជើញជាអធិបតីភាព ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពានបេតុងខ្សែកាប ឆ្លងកាត់ទន្លេសាប និងស្ពានអាកាសឫស្សីកែវ នាព្រឹកថ្ងៃទី៣១ ខែឧសភាឆ្នាំ២០២៣នេះ សម្តេចតេជោ ហ៊ុន សែន បានលើកឡើងថា មានជននៅក្រៅស្រុកម្នាក់បានបំផុសបំផុលឲ្យមានយុទ្ធនាការប្រឆាំងនឹងគណៈកម្មាធិការជាតិរៀបចំការបោះឆ្នោត ថែមទាំងចោទប្រកាន់ថា គណបក្សប្រជាជនកម្ពុជានៅពីក្រោយខ្នង គ.ជ.ប. និងក្រុមប្រឹក្សាធម្មនុញ្ញដែលបានបដិសេធមិនឲ្យគណបក្សភ្លើងទៀតចូលរួមបោះឆ្នោតជ្រើសរើសតំណាងរាស្រ្តអាណត្តិទី៧ ដែលនឹងប្រព្រឹត្តទៅនាថ្ងៃទី២៣ ខែ កក្កដា ឆ្នាំ២០២៣ខាងមុខនេះផងដែរ។សម្តេចតេជោ ហ៊ុន សែន បានឆ្លើយតប និងបញ្ជាក់យ៉ាងច្បាស់ថា សូមកុំដឹកនាំអ្នកគាំទ្ររបស់ខ្លួនធ្វើបាតុកម្ម ឬការតវ៉ាណាមួយទៅលើការសម្រេចរបស់ គ.ជ.ប និងក្រុមប្រឹក្សាធម្មនុញ្ញ ខណៈ សារជាសំឡេងរបស់សម្ដេច នាពេលកន្លងមក ពាក់ព័ន្ធនឹងការការពារសន្តិសុខ សណ្ដាប់ធ្នាប់ នៅតែមានតម្លៃសម្រាប់ប្រើប្រាស់ប្រសិនអ្នកណាហ៊ានធ្វើគុក នឹងហ៊ានទទួលអ្នកនោះជានិច្ច។សម្តេចតេជោ ហ៊ុន សែន ក៏បានព្រមានជាថ្មីម្តងទៀតផងដែរថា អ្នកណាក៏ដោយឲ្យតែហ៊ានធ្វើចលនា ដែលនាំឲ្យអសន្តិសុខ និងមានចេតនាចង់បំផ្លាញនូវសុខសន្តិភាពដែលកំពុងមានសព្វថ្ងៃនេះនឹងមិនលើកលែងឲ្យនោះទេ សម្តេច បានសង្កត់ធ្ងន់ថា សារសម្តេចកាលពីកន្លងទៅនៅតែមានតម្លៃ ហើយសម្តេចមិនចេញសារជាលើកទីពីរទៀតនោះទេ អ្នកណាក៏ដោយឲ្យតែហ៊ានធ្វើពេលណា នឹងចាប់ពេលនោះតែម្តង៕អត្ថបទ៖ បាន ចក់

ចិន ជំរុញឲ្យសម្ព័ន្ធយោធាណាតូ គោរពអធិបតេយ្យភាពរបស់ប្រទេសស៊ែរប៊ី ក្រោយភាពរំជើបរំជួល

ចិន៖ អ្នកនាំពាក្យក្រសួងការបរទេសចិន លោក ស្រី ម៉ៅ នីង (Mao Ning) បាននិយាយកាលពីថ្ងៃអង្គារអំឡុងសន្និសីទសារព័ត៌មានប្រចាំថ្ងៃមួយថា ប្រទេសចិន បានជំរុញដល់អង្គការសន្ធិសញ្ញាអាត្លង់ទិកខាងជើង ឬ អង្គការណាតូ (NATO) ឲ្យគោរពអធិបតេយ្យភាពនិងបូរណភាពទឹកដីរបស់ប្រទេសស៊ែរបី និងជួយរក្សាសន្តិភាពក្នុងតំបន់ដោយពិតប្រាកដ។ កងកម្លាំងកូសូវ៉ូ (KFOR)ដែលជាបេសកកម្មរក្សាសន្តិសុខដឹកនាំដោយសម្ព័ន្ធយោធាណាតូ ប្រចាំក្នុងប្រទេសកូសូវ៉ូ និងនគរបាលកូសូវ៉ូ បានប៉ះទង្គិចគ្នា ជាមួយក្រុមអ្នកតវ៉ាស៊ែរប៊ី កាលពីថ្ងៃចន្ទ។ យោងតាមកងកម្លាំងកូសូវ៉ូ ទាហានសម្ព័ន្ធយោធាណាតូ ប្រហែល ២៥នាក់ បានរងរបួស ខណៈដែលលោកប្រធានាធិបតី ស៊ែរប៊ី អាឡិចសាន់ឌ័រ វ៉ូស៊ីក (Aleksandar Vucic) បាននិយាយថា បាតុករស៊ែរប៊ី ៥២នាក់ បានរងរបួសក្នុងការប៉ះទង្គិចគ្នានេះដែរ។ ដោយសារតែភាពតានតឹងកំពុងឡើងកម្ដៅខ្លាំងនៅក្នុងតំបន់ លោកស្រី Mao បាននិយាយថា ប្រទេសចិន កំពុងតាមដានយ៉ាងយកចិត្តទុកដាក់ ក្រោយការរំជើបរំជួលនានា ដោយបន្ថែមថា ប្រទេសចិន គាំទ្រកិច្ចខិតខំប្រឹងប្រែងរបស់ប្រទេសស៊ែរប៊ី ក្នុងការរក្សាអធិបតេយ្យភាព និងបូរណភាពទឹកដី របស់ខ្លួន។ អ្នកនាំពាក្យរូបនេះ បានប្ដេជ្ញាប្រឆាំងទៅនឹងរាល់សកម្មភាពឯកតោភាគី ដោយស្ថាប័នបណ្ដោះអាសន្ននៅក្នុងប្រ៊ីស្ទីណា (Pristina) របស់ប្រទេសកូសូវ៉ូ និងបានអំពាវនាវស្ថាប័នមួយនេះ ឲ្យបំពេញតួនាទីរបស់ខ្លួនក្នុងការបង្កើតសមាគម ឬសហគមន៍នៃទីក្រុងសំខាន់ៗ របស់ស៊ែរប៊ី ៕

ប្រសាសន៍សំខាន់របស់សម្តេចតេជោ ហ៊ុន សែន ក្នុងឱកាសអញ្ជើញសម្ពោធជាផ្លូវការស្ពានឆ្លងទន្លេសាប និងស្ពានអាកាសឫស្សីកែវ

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពានបេតុងខ្សែកាប ឆ្លងកាត់ ទន្លេសាប និងស្ពានអាកាសឫស្សីកែវ នៅព្រឹកថ្ងៃទី៣១ ខែឧសភា ឆ្នាំ២០២៣នេះ។ប្រសាសន៍សំខាន់របស់សម្តេចតេជោ ហ៊ុន សែន ដែលមានខ្លឹមសារដូចខាងក្រោម៖សម្តេចតេជោ ហ៊ុន សែន បានរំលឹកគ្រាអតីតកាល នៃតំបន់ជ្រោយចង្វារ និងឫស្សីកែវ ដែលជាកន្លែងជ្រកពួន លាក់ខ្លួន របស់ខ្មែរក្រហម ដែលតែងលបលួចចូលវាយប្រហារកន្លែងស្តុកសាំង និងចូលមកកាន់រាជធានីភ្នំពេញ។សម្តេចតេជោ បានប្រកាសកោតសរសើរកិច្ចខិតសំប្រឹងប្រែង និងវិធីសាស្ត្រយកស្លឹកត្នោតខ្ចប់ស្ករត្នោត ឬយករាជធានីភ្នំពេញចិញ្ចឹមរាជធានីភ្នំពេញ ដែលធ្វើឱ្យរាជធានីភ្នំពេញមានការរីកចម្រើនពីមួយថ្ងៃទៅមួយថ្ងៃជាលំដាប់។សម្ដេចតេជោ ហ៊ុន សែន រាជធានីភ្នំពេញកំពុងដើរលើផ្លូវដ៏ត្រឹមត្រូវមួយលើការអភិវឌ្ឍក្រោមគោលនយោបាយ និងយុទ្ធសាស្រ្ដ «ស្លឹកត្នោតខ្ចប់ស្ករត្នោត» ដោយយកធនធានផ្ទាល់នៅទីនេះដើម្បីអភិវឌ្ឍន៍ឡើងវិញ និងកសាងហេដ្ឋារចនាសម្ព័ន្ធលើគ្រប់វិស័យ។សម្តេចតេជោ ហ៊ុន សែន បានប្រកាសពីគម្រោង និងដំណើរការស្ថាបនាផ្លូវល្បឿនលឿនភ្នំពេញ-បាវិត ដែលជាផ្នែកមួយ នៃការតភ្ជាប់ និងលំហូរ នៃការធ្វើដំណើរបានឆាប់រហ័ស។សម្ដេចតេជោ ហ៊ុន សែន សូមការអធ្យាស្រ័យដល់អ្នករត់ទូកដ និងសាឡង់ទាំងឡាយដែលរាជរដ្ឋាភិបាលបានសាងសង់ស្ពានជាច្រើនធ្វើឱ្យផ្ដាច់មុខរបរដចម្លងនៅរាជធានីភ្នំពេញ ខណៈគម្រោងសាងសង់ស្ពានមួយចំនួនទៀតដូចជា ស្ពានតភ្ជាប់ពីរាជធានីភ្នំពេញទៅអរិយ្យក្សត្រ និងស្ពានតភ្ជាប់នៅតំបន់ច្បារអំពៅជាដើម។សម្តេចតេជោ ហ៊ុន សែន បានប្រកាសពីការទម្លុះទម្លាយដើម្បីឱ្យមានការសាងសង់អគារ ដែលកម្ពស់ខ្ពស់កប់ពពកនាពេលបច្ចុប្បន្ននេះ ដែលពីមុនមិនអនុញ្ញាតឱ្យមានការសាងសង់សំណង់អគារខ្ពស់ជាង វិមានឯករាជ្យ ឬ ព្រះសត្យមុនីចិតីយឡើយ។សម្ដេចតេជោ មានគម្រោងចំណាយពេលមួយថ្ងៃពេញ ដើម្បីដើរកម្សាន្តតាមអគារខ្ពស់ៗនៅរាជធានីភ្នំពេញ ខណៈមានអគារជាច្រើនបានសាងសង់ឡើងយ៉ាងគំហុកដែលសម្ដេចមិនទាន់បានអញ្ជើញពិនិត្យមើលផ្ទាល់នៅឡើយ។សម្តេចតេជោ ហ៊ុន សែន បានប្រកាសថា ស៊ីហ្គេម គឺជាកាតព្វកិច្ចរបស់រដ្ឋជាសមាជិកអាស៊ាន ដែលត្រូវផ្លាស់ប្តូរវេនគ្នាសម្រាប់រៀបចំព្រឹត្តិការណ៍កីឡានេះ។សម្ដេចតេជោ ផ្ដាំផ្ញើអ្នកបន្តវេន កុំភ្លេចប្រើប្រាស់ ឬវិភាជថវិកា ទៅលើហេដ្ឋារចនាសម្ព័ន្ធពន្លឿនសេដ្ឋកិច្ច ក្នុងពេលដឹកនាំប្រទេស ឬស្ថាប័ន ឬហៅថា «បែងចែកថវិកានៅកំណើនសេដ្ឋកិច្ចប្រកបដោយសមធម៌» ដោយគួរតែរៀបចំមិនត្រូវប្រើប្រាស់ថវិកាខ្ចះខ្ជាយឡើយ។សម្តេចតេជោ ហ៊ុន សែន បានអំពាវនាវដល់បងប្អូនប្រជាពលរដ្ឋខ្មែរទាំងអស់ សូមគាំទ្រ និងលើកទឹកចិត្តបន្ថែមទៀតដល់កីឡាករ-កីឡាការិនី ដែលជាកីឡាជនពិការ ខណៈព្រឹត្តិការណ៍អាស៊ានប៉ារ៉ាហ្គេម នៅសល់តែបីថ្ងៃទៀតប៉ុណ្ណោះ។សម្ដេចតេជោ បានណែនាំដល់រដ្ឋមន្រ្ដីក្រសួងទេសចរណ៍ និងក្រុមការងាររៀបចំព្រឹត្តិការកីឡាអាស៊ានប៉ារ៉ាហ្គេម ត្រូវរៀបចំទស្សនីយភាពពិធីបើកព្រឹត្តិការណ៍នេះឱ្យបានល្អ និងបាញ់កាំជ្រួចឱ្យបានច្រើន ខណៈរដ្ឋមន្រ្ដីក្រសួងទេសចរណ៍បញ្ជាក់ថា ការបាញ់កាំជ្រួចក្នុងពេលបើកព្រឹត្តិការណ៍អាស៊ានប៉ារ៉ាហ្គេម គឺមានចំនួនច្រើនជាងព្រឹត្តិការណ៍បើកស៊ីហ្គេមទៅទៀត។សម្តេចតេជោ ហ៊ុន សែន បានប្រកាសថា ព្រឹត្តិការណ៍បើក និងបិទ កីឡាអាស៊ានប៉ារ៉ាហ្គេម(កីឡាជនពិការ) នឹងមានទស្សនីយភាពដូចព្រឹត្តិការណ៍កីឡាស៊ីហ្គេមលើកទី៣២ដែរ។សម្តេចតេជោ ហ៊ុន សែន បានព្រមានជាថ្មីម្តងទៀតថា នរណាក៏ដោយឲ្យតែហ៊ានធ្វើចលនា ដែលនាំឲ្យអសន្តិសុខសាធារណៈ និងមានចេតនាចង់បំផ្លាញសុខសន្តិភាពនឹងមិនលើកលែងឲ្យនោះទេ ៕

សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ជាផ្លូវការស្ពានឆ្លងទន្លេសាប និងស្ពានអាកាសឫស្សីកែវ

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពានបេតុងខ្សែកាប ឆ្លងកាត់ ទន្លេសាប និងស្ពានអាកាសឫស្សីកែវ នៅព្រឹកថ្ងៃទី៣១ ខែឧសភា ឆ្នាំ២០២៣នេះ។គួររម្លឹកផងដែរថា សម្ដេចតេជោ ហ៊ុន សែន បានអញ្ជើញជាអធិបតីបើកការដ្ឋានសាងសង់ស្ពានបេតុងខ្សែកាប ឆ្លងទន្លេសាបនេះ កាលពីថ្ងៃទី២៣ ខែតុលា ឆ្នាំ២០១៧។ស្ពានបេតុងខ្សែកាបឆ្លងទន្លេសាបនេះមានប្រវែង ៩២២ម៉ែត្រ ទទឹង ២០,៥ម៉ែត្រ ចិញ្ចើមស្ពានសម្រាប់ថ្មើរជើងមានទទឹង ១,២៥ម៉ែត្រសង ខាង, កម្ពស់សសរស្ពាន សម្រាប់ព្យួរខ្សែកាប ធៀបនឹងកម្រាលស្ពាន ៣៤ ម៉ែត្រ។ សសរសម្រាប់ព្យួរ ខ្សែកាបមានចំនួន៤, គន្លងខ្សែយានយន្តទទឹង ៣,៧៥ម៉ែត្រ, គន្លងធ្វើចរាចរណ៍ ២ ខ្សែទៅ និង ២ខ្សែមក, កម្ពស់នាវាចរក្រោមស្ពានអតិបរមានៅរដូវវស្សា ១០,៥ ម៉ែត្រ, កម្ពស់នាវាចរ ក្រោមស្ពានអប្បរមានៅរដូវប្រាំង ២០,៥ម៉ែត្រ មានបំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរណ៍។ ស្ពាននេះ សាងសង់ដោយក្រុមហ៊ុន OCIC ដោយប្រើរយៈពេល ២៨ ខែ។ ក្រោយការស្ថាបនារួចស្ពានបេតុងខ្សែកាបនេះបានបង្កើតលំហូរចរាចរណ៍ថ្មី តភ្ជាប់ពីផ្លូវជាតិលេខ៥ នៃខណ្ឌឫស្សីកែវ និងផ្លូវជាតិលេខ៦ នៃខ ណ្ឌជ្រោយចង្វា។ដោយឡែកសម្រាប់ ស្ពានអាកាសឫស្សីកែវ បានបើកការដ្ឋានស្ថាបនាកាលពីថ្ងៃទី៣១ ខែមករា ឆ្នាំ២០២២ ក្រោមអធិបតីភាពសម្ដេចតេជោ នាយករដ្ឋមន្ត្រី។ស្ពាននេះមានបណ្ដោយ ៤៨៣ម៉ែត្រ ទទឹង១៥,៨ ម៉ែត្រ កំពស់ ៥ម៉ែត្រ ស្ថិតនៅលើបណ្ដោយផ្លូវជាតិលេខ៥ នៅចន្លោះស្ពានបេតុងឆ្លងកាត់ទន្លេ សាបថ្មីនេះ ដោយប្រើប្រាស់រយៈពេលសាងសង់ចំនួន១៥ ខែ៕

ជប៉ុនផ្តល់ថវិកា ៦៣៧,៨៣៨ដុល្លារអាមេរិក សម្រាប់ការលុបបំបាត់អំពើហិង្សា លើកុមារនៅតាមសាលារៀន

ភ្នំពេញ៖ រដ្ឋាភិបាលជប៉ុន នឹងផ្តល់ថវិកាសរុបចំនួន ៦៣៧,៨៣៨ ដុល្លារអាមេរិក ដល់អង្គភាពទទួលជំនួយមួយ ក្រោមគ្រោងការណ៍ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន។ កិច្ចសន្យាផ្តល់ជំនួយត្រូវបានចុះហត្ថលេខានៅថ្ងៃនេះ ដោយឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និង អ្នកតំណាងស្ថាប័នទទួលជំនួយ សម្រាប់អនុវត្តគម្រោងខាងក្រោម៖គម្រោងលុបបំបាត់អំពើហិង្សាលើកុមារនៅតាមសាលារៀនក្នុងខេត្តកំពង់ចាម ប្រទេសកម្ពុជា (ឆ្នាំទី ២) (ថវិកាចំនួន ៦៣៧,៨៣៨ ដុល្លារអាមេរិក) ស្ថាប័នទទួលជំនួយ៖ អង្គការ Save the Children Japan (SCJ) ។នៅក្នុងគម្រោងនេះ អង្គការ Save the Children Japan នឹងអនុវត្តសកម្មភាពលើកកម្ពស់ការយល់ដឹងដល់កុមារ ឪពុកម្តាយ និងបុគ្គលិកអប់រំ បង្កើតប្រព័ន្ធការពារកុមារនៅតាមសាលារៀន (SBCPM) និងតស៊ូមតិ ដើម្បីកិច្ចការពារកុមារនៅតាមសាលារៀន ក្នុងគោលបំណងលុបបំបាត់អំពើហិង្សាលើកុមារនៅតាមសាលារៀន។តាមរយៈគម្រោងនេះ សិស្សប្រមាណ ១២,០០០នាក់ និងគ្រូបង្រៀនចំនួន ៤៤០នាក់ នៃសាលារៀនគោលដៅ នឹងអាចទទួលបានអត្ថប្រយោជន៍ពីបរិស្ថានគ្មានអំពើហិង្សាដែលមានសុវត្ថិភាព និងមានលក្ខណៈបរិយាបន្នជាងមុន ដែលនឹងនាំឱ្យមានភាពប្រសើរឡើងនូវការលូតលាស់ប្រកបដោយសុខភាពល្អ និងសុខុមាលភាពរបស់កុមារ។ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្តើមនៅប្រទេសកម្ពុជាតាំងពីឆ្នាំ២០០២ ដើម្បីគាំទ្រដល់សកម្មភាពរបស់អង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែង ដើម្បីជួយដល់ការអភិវឌ្ឍ និងស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។ ចាប់តាំងពីឆ្នាំ២០០២ មក រដ្ឋាភិបាលជប៉ុនបានផ្តល់ថវិកាជាង ៥០លាន ដុល្លារអាមេរិក ដល់គម្រោងចំនួន ១៥២ ដែលផ្ដោតសំខាន់ទៅលើវិស័យអប់រំនៅកម្រិតបឋមសិក្សា វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា។

លោក Bidenពិភាក្សាជាមួយលោក Erdogan អំពីយន្តហោះចម្បាំង F-16 និងបញ្ហាប្រទសស៊ុយអែត

អាមេរិក៖ លោកប្រធានាធិបតី សហរដ្ឋអាមេរិក Joe Biden ដែលបានពិភាក្សាតាមទូរស័ព្ទជាមួយលោកប្រធានាធិបតីទួរគី Tayyip Erdogan បាននិយាយថា លោក Erdogan កាលពីថ្ងៃចន្ទ បានបង្ហាញបំណងរបស់លោកក្នុងការទិញយកយន្តហោះចម្បាំង F-16 ពី សហរដ្ឋអាមេរិក ដោយបន្ថែមថា ក្រោយមកលោកបានប្រាប់សមភាគីទួរគីថា ទីក្រុងវាស៊ីនតោន ចង់ឃើញ ទីក្រុងអង់ការ៉ា ទម្លាក់ចោលការប្រឆាំងរបស់ខ្លួនចំពោះការចូលជាសមាជិកណាតូរបស់ប្រទេសស៊ុយអែត។ ការពិភាក្សាតាមទូរស័ព្ទនេះ បានធ្វើឡើងនៅពេលលោក Biden បានអបអរសាទរ លោក Erdogan ដែលបានឈ្នះការបោះឆ្នោតប្រធានាធិបតីកាលពីថ្ងៃអាទិត្យកន្លងទៅ។ លោក Biden បានប្រាប់ក្រុមអ្នកសារព័ត៌មានមុនពេលចាកចេញពីសេតវិមានទៅកាន់រដ្ឋ Delaware ថា លោកបានជជែកជាមួយលោក Erdogan ។ លោកបានអបអរសាទរលោក Erdogan។ លោកនៅតែចង់ធ្វើការងារឲ្យបានចប់រួចរាល់ទាក់ទងនឹងយន្តហោះចម្បាំង F-16 ។ លោកបានប្រាប់លោក Erdogan ថា យើងចង់បានកិច្ចព្រមព្រៀងមួយជាមួយប្រទេសស៊ុយអែត ។ ហើយយើងនឹងមានទំនាក់ទំនងល្អឡើងវិញជាមួយប្រទេសមួយផ្សេងទៀត ។ លោកបានបន្ថែមថា យើងនឹងជជែកគ្នាពីរឿងនេះនៅសប្ដាហ៍ក្រោយ។ សេចក្ដីថ្លែងការណ៍ពីប្រធានាធិបតីទួរគី ស្ដីពីការសុន្ទាតាមទូរស័ព្ទនេះ មានរយៈពេលខ្លី និងមិនច្បាស់លាស់។ សេចក្ដីថ្លែងការណ៍នេះ និយាយថា មេដឹកនាំទាំង២បានព្រមព្រៀងបង្កើនកិច្ចសហប្រតិបត្តិការណ៍កាន់តែស៊ីជម្រៅ លើគ្រប់វិស័យនៃទំនាក់ទំនងទ្វេភាគីរវាងប្រទេសទាំង២ ជាបញ្ហាដែលមេដឹកនាំទាំង២បាននិយាយថា បានកើនឡើងកាន់តែខ្លាំងក្នុងការប្រឈមដាក់គ្នាទាំងក្នុងតំបន់និងសកលលោក៕

កូរ៉េខាងជើងប្រកាសបាញ់បង្ហោះផ្កាយរណបឈ្លបយកការណ៍យោធានៅក្នុងខែមិថុនា

កូរ៉េខាងជើង៖ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃអង្គារនេះថា សាធារណៈរដ្ឋប្រជាមានិតប្រជាធិបតេយ្យកូរ៉េ(កូរ៉េខាងជើង) នឹងបាញ់បង្ហោះផ្កាយរណបឈ្លបយកការណ៍យោធានៅខែមិថុនា សម្រាប់ការពិនិត្យបង្ហាញផ្ទាល់ពីសកម្មភាពយោធារបស់សហរដ្ឋអាមេរិក។ នៅក្នុងសេចក្តីថ្លែងការណ៍ ដែលបានដឹងដោយសារព័ត៌មាន KCNA បានឲ្យដឹងថា លោក Ri Pyong Chol អនុប្រធានគណៈកម្មាធិការយោធាមជ្ឈឹម របស់គណបក្សពលករកំពុងកាន់អំណាច បានប្រកាសពីសមយុទ្ធយោធាយោធារួមគ្នា ធ្វើឡើងដោយសហរដ្ឋអាមេរិកនិងប្រទេសកូរ៉េខាងត្បូង ជាការបង្ហាញយ៉ាងបើកចំហនៃមហិច្ឆិតាឈ្លានពានដោយខ្វះការពិចារណា។ កងកម្លាំងសហរដ្ឋអាមេរិក និងកូរ៉េខាងត្បូងកំពុងអនុវត្តសមយុទ្ធបណ្តុះបណ្តាលផ្សេងៗ កាលពីពេលថ្មីៗនេះ រួមមាននូវអ្វីដែលពួកគេនិយាយថាគឺជាសមយុទ្ធបាញ់គ្រាប់ពិតរួមគ្នាធំបំផុតកាលពីសប្តាហ៍មុន បន្ទាប់ពីសមយុទ្ធជាច្រើនបានកាត់បន្ថយ ក្នុងពេលការរឹតត្បិតជំងឺ Covid-19 និងក្តីសង្ឃឹមសម្រាប់កិច្ចប្រឹងប្រែងផ្នែកការទូតជាមួយប្រទេសកូរ៉េខាងជើង។ លោក Ri និយាយថា សមយុទ្ធនានាតម្រូវឲ្យទីក្រុងព្យុងយ៉ាង ត្រូវមានសមត្ថភាពប្រមូលព័ត៌មានអំពីសកម្មភាពយោធារបស់សត្រូវក្នុងពេលពិតប្រាកដ។ លោក Ri បាននិយាយក្នុងសេចក្តីថ្លែងការណ៍ថា យើងនឹងពិចារណាគ្រប់ជ្រុងជ្រោយពីការគំរាមទាំងពេលបច្ចុប្បន្ន និងអនាគត នឹងដាក់ចូលការអនុវត្តន៍ហ្មត់ចត់ នូវសកម្មភាពទាំងឡាយសម្រាប់ការពង្រឹង ការទប់ទល់សង្គ្រាមជាក់ស្តែង និងរួមទាំងអស់។ ទីក្រុងព្យុយ៉ាងនិយាយថា ខ្លួនបានបញ្ចប់ការផលិតផ្កាយរណបឈ្លបយកការណ៍យោធាលើកដំបូងរបស់ខ្លួន ហើយមេដឹកនាំ លោក Kim Jong Un បានអនុម័តការរៀបចំចុងក្រោយសម្រាប់ការបាញ់បង្ហោះ។ សេចក្តីថ្លែងការពុំបានបញ្ជាក់ច្បាស់ពីការបរិច្ឆេទបាញ់បង្ហោះពិតប្រាកដនោះទេ ប៉ុន្តែប្រទេសនេះ បានផ្តល់ដំណឹងដល់ប្រទេសជប៉ុនពីការបាញ់បង្ហោះតាមផែនការ នៅចន្លោះថ្ងៃទី៣១ ខែឧសភា និងថ្ងៃទី១១ ខែមិថុនា ដោយកំពុងជំរុញឲ្យទីក្រុងតូក្យូ ដាក់ការការពារមីស៊ីលបាលីស្ទីករបស់ខ្លួនក្នុងការប្រុងប្រយ័ត្ន។ ប្រទេសជប៉ុន និយាយថា ខ្លួននឹងបាញ់ទម្លាក់មីស៊ីលណាមួយដែលគំរាមដល់ទឹកដីរបស់ខ្លួន៕

រុស្ស៊ីវាយប្រហារលើបន្ទាយយោធាក្នុងប្រទេសអ៊ុយក្រែន ក្នុងរលកថ្មីនៃការវាយប្រហារ

រុស្ស៊ី៖ រុស្ស៊ី បាននិយាយកាលពីថ្ងៃចន្ទថា យោធារបស់ខ្លួន បានវាយប្រហារលើមូលដ្ឋានទ័ពអាកាសមួយចំនួនរបស់អ៊ុយក្រែន ក្នុងការវាយប្រហារតាមអាកាសទាំងកណ្ដាលយប់ ហើយកងកម្លាំង អ៊ុយក្រែន បានបាញ់ផ្លោងលើទីតាំងឧស្សាហកម្មមួយចំនួននៅក្នុងប្រទេសរុស្ស៊ី ខណៈភាគីទាំង២បានព្យាយាមដណ្ដើមគ្រប់គ្រង មុនអ្វីដែលទីក្រុង Kyiv សង្ឃឹមថា នឹងមានការវាយបកវិញ។ នៅក្នុងការទទួលស្គាល់ដ៏កម្រនៃការបំផ្លិចបំផ្លាញគោលដៅយោធា អ៊ុយក្រែន និយាយថា ខ្លួនកំពុងជួសជុល ផ្លូវរត់ មួយនិង យន្តហោះ៥គ្រឿង ដែល ត្រូវបាននផ្អាកសេវាកម្មនៅក្នុងតំបន់ Khmelnitskiy ភាគខាងលិចប្រទេសអ៊ុយក្រែន ទោះបីជាខ្លួនពុំបានបញ្ចេញឈ្មោះទីតាំងណាមួយក៏ដោយ។ វាជាអាកាសយានដ្ឋានយន្តហោះដ៏ធំមួយ នៅក្នុងតំបន់នេះ មុនពេលមានសង្រ្គាម។ ការិយាល័យអភិបាលតំបន់ Khmelnitskiy បាននិយាយថា នៅពេលនេះ ការងារនៅតែកំពុងបន្តដើម្បីពន្លត់ភ្លើងនៅក្នុងទីតាំងស្តុកប្រេង ប្រេងរំអិល និងគ្រាប់រំសេវ ។ ដោយសំអាងប្រភពពីក្រសួងការពារជាតិ ទីភ្នាក់ងារសារព័ត៌មានរដ្ឋរុស្ស៊ី RIA បាននិយាយថា អាកាសយានដ្ឋានច្រើនជាង១ ត្រូវបានរងការវាយប្រហារ ប៉ុន្តែពុំមានការបញ្ជាក់ពីអ៊ុយក្រែន អំពីការខូចខាតដល់មូលដ្ឋានទ័ពអាកាសផ្សេងទៀតនោះទេ។ គួររម្លឹកថា រដ្ឋធានីរបស់អ៊ុយក្រែន រងការវាយប្រហារចំនួន១៦ លើកនៅខែនេះ នៅពេលព្រឹក បន្ទាប់ពីការទម្លាក់គ្រាប់បែកពេលយប់លើកទី២ ។ ប៉ុន្តែក្រុមមន្ត្រីបាននិយាយថា ភាគច្រើននៃយានដ្រូន និងមីស៊ីលដែលបានបាញ់នៅពេលយប់ ត្រូវបានបាញ់កម្ទេចចោល និងពុំមានគោលដៅណាមួយត្រូវបានរងការបំផ្លាញនៅពេលព្រឹកនោះទេ៕

កងទ័ពជាតិស៊ូដង់ និងកងកម្លាំងគូប្រជែង បានព្រមព្រៀងបន្ថែមពលបទឈប់បាញ់រយៈពេល៥ថ្ងៃ

ស៊ូដង់៖ កងទ័ពជាតិប្រទេសស៊ូដង់និងកងកម្លាំងគាំទ្ររហ័ស(RSF) កាលពីថ្ងៃចន្ទបានព្រមព្រៀងចំពោះការបន្ថែមពេល៥ថ្ងៃនៃកិច្ចព្រមព្រៀងបទឈប់បាញ់ ដែលពួកគេបានចុះហត្ថលេខាកាលពីថ្ងៃទី២០ ខែឧសភា បន្ទាប់ពីការចរចា នៅក្នុងទីក្រុង Jeddah ប្រទេសអារ៉ាប៊ីសាអូឌីត។ ភាគីទាំងពីរបានបញ្ជាក់ពីការប្តេជ្ញាចិត្តដើម្បីអនុញ្ញាតឲ្យមានការឆ្លងកាត់ដោយសុវត្ថិភាពចំពោះជនស៊ីវិលទាំងអស់ចេញពីតំបន់ជម្លោះ និងការពារការផ្គត់ផ្គង់ដល់ជនស៊ីវិល។កិច្ចព្រមព្រៀងស្តីពីបទឈប់បាញ់រយៈពេលខ្លី និងការរៀបចំជំនួយមនុស្សធម៌ ត្រូវបានធ្វើឡើងតាមរយៈការចរចា ដែលបានចាប់ផ្តើមកាលពីថ្ងៃទី៦ ខែឧសភា ក្រោមគំនិតផ្តួចផ្តើមរបស់សហរដ្ឋអាមេរិក និងប្រទេសអារ៉ាប៊ីសាអ៊ូឌីតក្នុងគោលបំណងបញ្ចប់ជម្លោះក្នុងប្រទេសស៊ូដង់ និងការសម្របសម្រួលដំណើរការចូលនៃជំនួយមនុស្សធម៌។ បទឈប់បាញ់រយៈពេល៧ថ្ងៃ ដែលបានចូលជាធរមានកាលពីថ្ងៃទី២២ ខែឧសភា បានផុតកំណត់នៅម៉ោង៩:៤៥នាទីយប់ក្នុងក្នុងតំបន់កាលពីថ្ងៃចន្ទ។ ប៉ុន្តែការប៉ះទង្គិចគ្នាដែលកើតមានយូៗម្តង នៅតែត្រូវបានរាយការណ៍កាលពីសប្តាហ៍មុន ដែលភាគីទាំងពីរបានដាក់កំហុសគ្នាទៅវិញទៅមកពីការបំពានបទឈប់បាញ់បណ្តោះអាសន្ននេះ។កាលពីថ្ងៃចន្ទ ប្រទេសអារ៉ាប៊ីសាអ៊ូឌីត និងសហរដ្ឋអាមេរិក បានចេញសេចក្តីថ្លែងការណ៍រួមដោយជំរុញឲ្យភាគីជម្លោះទាំងពីរប្រកាន់ខ្ជាប់ចំពោះកាតព្វកិច្ចរបស់ពួកគេក្រោមកិច្ចព្រមព្រៀងបទឈប់បាញ់។ យោងតាមរបាយការណ៍ ដែលចេញផ្សាយដោយអង្គការក្រុមវេជ្ជបណ្ឌិតស៊ូដង់កាលពិថ្ងៃអាទិត្យបានឲ្យដឹងថា ចំនួនជនស៊ីវិលស្លាប់ចាប់តាំងពីការចាប់ផ្តើមនៃការប៉ះទង្គិចគ្នា បានកើនឡើងដល់៨៦៦នាក់ និង៣.៧២១នាក់ផ្សេងទៀតរងរបួស។ យោងតាមអង្គការទេសន្តប្រវេសន៍អន្តរជាតិ (IOM) បានឲ្យដឹងថានៅពេលដូចគ្នានេះដែរមនុស្សច្រើនជាង១.៣៦លាននាក់ត្រូវបានបង្ខំឲ្យភៀសខ្លួនចេញពីលំនៅឋានរបស់ពួកគេរួមទាំងជិត៣២០.០០០នាក់ បានគេចខ្លួនចូលទៅកាន់ប្រទេសជិតខាង៕

អ៊ុយហ្គង់ដា អនុម័តច្បាប់ប្រឆាំងអ្នកស្រឡាញ់ភេទដូចគ្នា ឬ LGBTQ យ៉ាងតឹងរ៉ឹង រួមមានទាំងទោសប្រហារជីវិតផងដែរ

អ៊ុយហ្គង់ដា៖ ទំនាក់ទំនងភេទដូចគ្នា ឬ LGBTQ គឺជាអំពើខុសច្បាប់រួចទៅហើយនៅក្នុងប្រទេសអ៊ុយហ្គង់ដា ពោលគឺដូចនៅក្នុងប្រទេសអាហ្វ្រិកជាង ៣០ផ្សេងទៀតដែរ ប៉ុន្តែច្បាប់ថ្មីពាក់ព័ន្ធនឹងបញ្ហានេះនៅតែធ្វើបន្ត ដោយជាក់ស្ដែង នាពេលនេះប្រធានាធិបតីរបស់ប្រទេសអ៊ុយហ្គង់ដា លោក Yoweri Museveni បានចុះហត្ថលេខាលើច្បាប់ប្រឆាំងក្រុមនេះ ដែលជាការដាក់ទោសទណ្ឌយ៉ាងតឹងតែងបំផុតរបស់ពិភពលោក ដោយក្នុងនោះរួមមានទាំងការកាត់ទោសប្រហារជីវិតផងដែរ សម្រាប់ «ការរួមមេត្រីភាពភេទដូចគ្នាដោយទង្វើព្រៃផ្សៃ»។ ច្បាប់ ដែលនាំឲ្យមានការថ្កោលទោសពីលោកខាងលិច នឹងទំនងប្រឈមនឹងទណ្ឌកម្មពីម្ចាស់ជំនួយដែរនោះ ចែងពីការដាក់ទោសយ៉ាងធ្ងន់ធ្ងរដល់ «ជនដែលធ្វើខុសម្ដងហើយម្ដងទៀត» ប្រឆាំងនឹងច្បាប់នេះ និងការចម្លងជំងឺដែលព្យាបាលមិនជាសះស្បើយ ដូចជាមេរោគអេដស៍/ជំងឺអេដស៍ (HIV/AIDS) តាមរយៈការរួមភេទជាមួយភេទដូចគ្នា។ ច្បាប់នេះ ក៏សម្រេចកាត់ទោសដាក់ពន្ធនាគារ ២០ឆ្នាំផងដែរ ពាក់ព័ន្ធនឹងបទល្មើសជួយ«ផ្សព្វផ្សាយ»ឲ្យមានការស្រឡាញ់ភេទដូចគ្នា។ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានហៅចំណាត់ការនេះថា «ជាការរំលោភសិទ្ធិមនុស្សដ៏គួរអាណោចអធ័ម ហើយបាននិយាយថា ទីក្រុងវ៉ាស៊ីនតោននឹងធ្វើការវាយតម្លៃពីផលប៉ះពាល់របស់ច្បាប់នេះ នៅគ្រប់ទិដ្ឋភាពនៃការពាក់ព័ន្ធទាំងអស់របស់សហរដ្ឋអាមេរិកជាមួយប្រទេសអ៊ុយហ្គង់ដា» ដោយលោកបានថ្លែងថា៖ «យើងកំពុងពិចារណាលើជំហានបន្ថែម រួមទាំងការអនុវត្តទណ្ឌកម្ម និងការរឹតត្បិត ចំពោះការចូលមកកាន់សហរដ្ឋអាមេរិកប្រឆាំងនឹងនរណាម្នាក់ ដែលពាក់ព័ន្ធនឹងការរំលោភសិទ្ធិមនុស្សធ្ងន់ធ្ងរ»។ច្បាប់នេះ បាននាំឲ្យមានការរិះគន់តវ៉ាពីមជ្ឈដ្ឋានក្នុងស្រុកយ៉ាងច្រើន ដោយអ្នកដាក់ញត្តិម្នាក់ក្នុងចំណោមអ្នកតវ៉ាផ្សេងទៀត លោក Busingye Kabumba បានប្រាប់សារព័ត៌មាន Reuters ថា អង្គការក្នុងស្រុកមួយ គឺអង្គការវេទិកាលើកកម្ពស់ការយល់ដឹងអំពីសិទ្ធិមនុស្ស និងបុគ្គល ១០នាក់ផ្សេងទៀត បានដាក់ពាក្យបណ្តឹងប្រឆាំងនឹងច្បាប់នេះ នៅតុលាការធម្មនុញ្ញ៕

នយោបាយ និង ការអភិវឌ្ឍន៍

សម្តេចតេជោ៖ បក្សប្រជាជនកម្ពុជាមិនជាប់ពាក់ព័ន្ធនឹងសេចក្តីសម្រេចរបស់ គ.ជ.ប. និងក្រុមប្រឹក្សាធម្មនុញ្ញនោះទេ

ចិន ជំរុញឲ្យសម្ព័ន្ធយោធាណាតូ គោរពអធិបតេយ្យភាពរបស់ប្រទេសស៊ែរប៊ី ក្រោយភាពរំជើបរំជួល

សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ជាផ្លូវការស្ពានឆ្លងទន្លេសាប និងស្ពានអាកាសឫស្សីកែវ

ជប៉ុនផ្តល់ថវិកា ៦៣៧,៨៣៨ដុល្លារអាមេរិក សម្រាប់ការលុបបំបាត់អំពើហិង្សា លើកុមារនៅតាមសាលារៀន

លោក Bidenពិភាក្សាជាមួយលោក Erdogan អំពីយន្តហោះចម្បាំង F-16 និងបញ្ហាប្រទសស៊ុយអែត

កូរ៉េខាងជើងប្រកាសបាញ់បង្ហោះផ្កាយរណបឈ្លបយកការណ៍យោធានៅក្នុងខែមិថុនា

រុស្ស៊ីវាយប្រហារលើបន្ទាយយោធាក្នុងប្រទេសអ៊ុយក្រែន ក្នុងរលកថ្មីនៃការវាយប្រហារ

កងទ័ពជាតិស៊ូដង់ និងកងកម្លាំងគូប្រជែង បានព្រមព្រៀងបន្ថែមពលបទឈប់បាញ់រយៈពេល៥ថ្ងៃ

អ៊ុយហ្គង់ដា អនុម័តច្បាប់ប្រឆាំងអ្នកស្រឡាញ់ភេទដូចគ្នា ឬ LGBTQ យ៉ាងតឹងរ៉ឹង រួមមានទាំងទោសប្រហារជីវិតផងដែរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ចិន ជំរុញឲ្យសម្ព័ន្ធយោធាណាតូ គោរពអធិបតេយ្យភាពរបស់ប្រទេសស៊ែរប៊ី ក្រោយភាពរំជើបរំជួល

សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ជាផ្លូវការស្ពានឆ្លងទន្លេសាប និងស្ពានអាកាសឫស្សីកែវ

ជប៉ុនផ្តល់ថវិកា ៦៣៧,៨៣៨ដុល្លារអាមេរិក សម្រាប់ការលុបបំបាត់អំពើហិង្សា លើកុមារនៅតាមសាលារៀន

លោក Bidenពិភាក្សាជាមួយលោក Erdogan អំពីយន្តហោះចម្បាំង F-16 និងបញ្ហាប្រទសស៊ុយអែត

កូរ៉េខាងជើងប្រកាសបាញ់បង្ហោះផ្កាយរណបឈ្លបយកការណ៍យោធានៅក្នុងខែមិថុនា

រុស្ស៊ីវាយប្រហារលើបន្ទាយយោធាក្នុងប្រទេសអ៊ុយក្រែន ក្នុងរលកថ្មីនៃការវាយប្រហារ

កងទ័ពជាតិស៊ូដង់ និងកងកម្លាំងគូប្រជែង បានព្រមព្រៀងបន្ថែមពលបទឈប់បាញ់រយៈពេល៥ថ្ងៃ

អ៊ុយហ្គង់ដា អនុម័តច្បាប់ប្រឆាំងអ្នកស្រឡាញ់ភេទដូចគ្នា ឬ LGBTQ យ៉ាងតឹងរ៉ឹង រួមមានទាំងទោសប្រហារជីវិតផងដែរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍