នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ផ្តាំទៅសារព័ត៌មានថៃថា «បើ​ឆ្កួត​សូម​ឆ្កួត​តែ​ពួក​ឯង​ចុះ» ខណៈ​សម្ដេច​ជា​មនុស្ស​ទី​ពីរ​​បន្ទាប់ពីព្រះមហាក្សត្រចាំបាច់អីទៅធ្វើជាអគ្គបញ្ជាការកងទ័ព
ឯកឧត្តម ប៉ែន បូណា៖ ដើម្បីបណ្តុះបានមនុស្សពូកែ ទាល់តែគ្រូខ្លាំង
សម្ដេចធិបតី៖ កងកម្លាំងនគរបាលជាតិដើរតួនាទី និងបំពេញភារកិច្ចសំខាន់ធានាសន្តិសុខ សុវត្ថិភាព
សម្ដេចធិបតី ហ៊ុន ម៉ាណែត អញ្ជើញប្រគល់សញ្ញាបត្រដល់ជ័យលាភីបញ្ចប់ការសិក្សានៅបណ្ឌិត្យសភានគរបាលជាតិ

នយោបាយ​ និង ការអភិវឌ្ឍន៍

សម្តេចតេជោ ស្នើឱ្យកូរ៉េទាំងពីរ និងភាគីពាក់ព័ន្ធនានា​សម្រេច​សន្ធិសញ្ញា​សន្តិភាព​នៅឧបទ្វីបកូរ៉េ

2022/02/11 11:43:52 am        160
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានស្នើឱ្យកូរ៉េទាំងពីរ និងភាគីពាក់ព័ន្ធនានា សម្រេចសន្ធិសញ្ញាសន្តិភាពឱ្យបានឆាប់រហ័ស ដើម្បីធានាបាននូវសន្តិភាពអចិន្ត្រៃយ៍នៅឧបទ្វីបកូរ៉េ។សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ពេលថ្លែងបើកកិច្ចប្រជុំកំពូលពិភពលោក ឆ្នាំ២០២២ ស្តីពី «សន្តិភាពនៅ ឧបទ្វីបកូរ៉េ» នៅថ្ងៃទី១១ ខែកុម្ភៈ នេះ នៅទីក្រុងសេអ៊ូល បានស្នើឱ្យកូរ៉េទាំងពីរ និងភាគីពាក់ព័ន្ធនានា សម្រេចសន្ធិសញ្ញាសន្តិភាពឱ្យបានឆាប់រហ័ស ដើម្បីធានាបាននូវសន្តិភាព អចិន្ត្រៃយ៍នៅលើឧបទ្វីបកូរ៉េ។សម្ដេច បានអំពាវនាវដល់ភាគីពាក់ព័ន្ធទាំងអស់ បន្តជំរុញកិច្ចសហប្រតិបត្តិ ការផ្អែកលើទំនុកចិត្ត និងភាពជាដៃគូ ដោយយកប្រជាជនជាស្នូល ដើម្បីកសាងដំណើរឆ្ពោះទៅរកការ បង្រួបបង្រួម​កូរ៉េទាំងពីរ​ដោយសន្តិភាព» ។សម្តេចតេជោ បានបញ្ជាក់ទៀតថា ស្ថិរភាពនៅឧបទ្វីបកូរ៉េ គឺជាបញ្ហាចោទមួយផងដែរ នៅក្នុង បញ្ហាពិភពលោកដ៏តានតឹង និង​ស្មុគស្មាញ ​ដែលត្រូវការដំណោះស្រាយ ​ខណៈដែលពិភពលោក កំពុងតភ្ជាប់គ្នាទៅវិញទៅមក និងពឹងផ្អែកគ្នាទៅវិញទៅមកកាន់តែខ្លាំង ដូច្នេះហើយការធ្វើការ​ជា​មួយគ្នា ដើម្បីសម្របសម្រួលការឆ្លើយតបជាសកលចំពោះបញ្ហាសកល ​ដែលកំពុងតែកើតឡើង គឺជាតម្រូវការចាំបាច់។សម្ដេចតេជោ បានបញ្ជាក់បន្ថែមថា​ កិច្ចប្រជុំកំពូលនេះ ​នឹងដាក់ចេញនូវឯកសារសំខាន់ៗចំនួនពីរ គឺសេចក្តីសម្រេចចិត្តទីក្រុងសេអ៊ូឆ្នាំ២០២២ ​ស្ដីពីដំណើរឆ្ពោះទៅរកសន្តិភាព និង​វិបុលភាព​ប្រកប​ដោយ ចីរភាព និងឧបទ្វីបកូរ៉េ​ និងគំនិត​ផ្តួចផ្តើម​ ស្ដីពីរដ្ឋពីរ​ ឆ្ពោះទៅជាតិតែមួយ ឧបសគ្គតែមួយ ប្រជាជនតែមួយ ​និងវប្បធម៌តែមួយ។ គេកំពុងទន្ទឹងរង់ចាំធាតុចូលរបស់​ប្រតិភូ​ថែមទៀត​លើ​ឯកសារ​ទាំងពីរនេះ៕អត្ថបទ៖ មុត សុទ្ធ

មូលនិធិហ្រ្វេតហូឡូ ស្នើសុំការគាំទ្រ​ពី​ក្រសួងសុខាភិបាល​អនុវត្ត​គម្រោង​អភិវឌ្ឍន៍​វិស័យ​ចក្ខុរោគ​នៅកម្ពុជា

2022/02/11 11:37:39 am        308
Facebook Telegram Linkin
ភ្នំពេញ៖ ក្នុងជំនួបសម្តែងការគួរសម និងពិភាក្សាការងារជាមួយលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានអនុគណៈកម្មការផ្គត់ផ្គង់ និងហិរញ្ញវត្ថុ នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ លោក Pascal Bijleveld ប្រធាននាយក ប្រតិបត្តិទីមួយរបស់អង្គការ ATscale និងលោក បាក់ តូក្យូ នាយកប្រចាំប្រទេសមូលនិធិហ្រ្វេតហូឡូ នៅថ្ងៃទី១០ ខែកុម្ភៈ ឆ្នាំ២០២២ បានគោរពស្នើសុំការគាំទ្រពីក្រសួងសុខាភិបាល ក្នុងការអនុវត្តគម្រោងលើវិស័យចក្ខុរោគកាន់តែមានប្រសិទ្ធិភាពខ្ពស់។លោក Pascal Bijleveld បានលើកឡើងទៀតថា ​ដើម្បីរួមចំណែកក្នុងការអភិវឌ្ឍលើវិស័យ​ចក្ខុរោគ​នេះ​កាន់តែមានប្រសិទ្ធិភាពខ្ពស់ មូលនិធិហ្វ្រេតហូឡូ ​ មានសកម្មភាពសំខាន់ៗដូចជា៖ ធ្វើអោយ​ប្រសើរ​ឡើងនូវលទ្ធភាពទទួលបានសេវាបកបាយភ្នែក​ និងសេវាកែតម្រូវ កំហុសកំណុំរូបភាព​មាន​គុណភាពខ្ពស់ ពិសេសសម្រាប់ស្ត្រី ប្រជាជនក្រីក្រ និងជនងាយរងគ្រោះ។ ពង្រឹងសមត្ថភាព និងប្រសិទ្ធភាពធនធានមនុស្ស ក្នុងវិស័យសុខភាពភ្នែក និងពង្រីកទីតាំងសេវា​ដល់​តំបន់ដាច់ស្រយាល។ ឆ្ពោះទៅរកប្រព័ន្ធសុខភាពភ្នែកមួយដែលមានគណនេយ្យភាព ប្រសិទ្ធភាព ​និងធនធានប្រកបដោយនិរន្តរភាព និងធ្វើអោយប្រសើរឡើង នូវលទ្ធផល​សុខភាព​ភ្នែកដោយការពង្រឹងគុណភាពនៃសេវាកម្មវះកាត់បកបាយភ្នែកសេវាកែរ តម្រូវ កំហុសកំណុំរូបភាព។ជាការឆ្លើយតប លោកជំទាវ វេជ្ជបណ្ឌិត យក់ សម្បត្តិ បានសម្តែងអំណរគុណចំពោះអង្គការ និង​អង្គការ​មូលនិធិហ្វេតហូឡូ ដែលតែងតែឧបត្ថម្ភគាំទ្រដល់ប្រតិបត្តិការរបស់​កម្មវិធីជាតិសុខភាពភ្នែក និង​បានចូលរួមចំណែកកាត់បន្ថយបញ្ហាភ្នែក ​និងភាពពិការភ្នែករបស់ប្រជាជនកម្ពុជា ដែលជា​ការ​ចូលរួមចំណែកក្នុងការធ្វើឱ្យប្រសើរឡើងសុខុមាលភាព របស់ប្រជាជនកម្ពុជា និងសូមគាំទ្រ​ចំពោះ​គម្រោង និងបានសំណូមពរអង្គការបន្តកិច្ចសហប្រតិបត្តិការជាមួយកម្មវិធីជាតិសុខភាពភ្នែក ដើម្បីអនុវត្តគម្រោងនេះ ឱ្យទទួលបានជោគជ័យតាមការរំពឹងទុក។ឆ្លៀតក្នុងឱកាសនោះ លោក Pascal Bijleveld បានសម្តែងអំណរគុណដល់រាជរដ្ឋាភិបាលកម្ពុជា និង​ក្រសួងសុខាភិបាល ដែលតែងតែផ្ដល់ ​នូវការគាំទ្រនិងកិច្ចសហការដ៏ល្អទើបអង្គការហ្រ្វេតហូឡូ អាច​បំពេញបេសកម្មមនុស្សធម៌ដ៏ថ្លៃថ្លារបស់ខ្លួន ​ដោយជោគជ័យរហូតមកដល់បច្ចុប្បន្ននេះ។ ចាប់ពីខែកក្កដា ឆ្នាំ២០២១ ដល់ខែធ្នូ ឆ្នាំ២០២៤ លោកបានកំណត់គោលដៅបំពេញ​បេសកកម្ម​មនុស្ស​ធម៌​ចំនួន១៦ រាជធានី/ខេត្ត រួមមាន៖ ​រាជធានីភ្នំពេញ ​ខេត្តកណ្តាល​ ព្រៃវែង សៀមរាប កំពង់ចាម កំពង់ស្ពឺ ត្បូងឃ្មុំ កំពង់ធំ កំពត កំពង់ឆ្នាំង ស្វាយរៀង ក្រចេះ ព្រះសីហនុ ឧត្តរមានជ័យ ព្រះវិហារ និងរតនគិរី ដែលមានថវិកាសរុបប្រមាណ ៥,៨៥០,៧២៧ ដុល្លាអាមេរិក៕ អត្ថបទ រដ្ឋា

ពេទ្យយោធារំលឹកកងទ័ព និងគ្រួសារឱ្យរួសរាន់ទៅចាក់វ៉ាក់សាំងដូសជំរុញទប់ទល់អូមីក្រុង

2022/02/10 04:22:53 pm        667
Facebook Telegram Linkin
ភ្នំពេញ៖ ខណៈមេរោគបំប្លែងថ្មី អូមីក្រុង កំពុងរីករាលដាលក្នុងសហគមន៍ ពេទ្យយោធា ក្រើនរំលឹកដល់កងទ័ព និងក្រុមគ្រួសារកងទ័ព រួសរាន់ទៅទទួលការចាក់វ៉ាក់សាំងដូសជំរុញទី៣ និងទី៤ ដើម្បីបង្កើនអង់ទីគ័របន្ថែមទៀត ទប់ទល់នឹងការវាយកលុកពីជំងឺកូវីដ។លោកវេជ្ជបណ្ឌិត សេង ឈុន នាយករងមន្ទីរពេទ្យព្រះកេតុមាលា នៅថ្ងៃទី១០ ខែកុម្ភៈនេះ បានឱ្យ BTVដឹងថា គិតចាប់ពីថ្ងៃទី១៧ ខែមករា រហូតដល់ថ្ងៃទី៩ ខែកុម្ភៈនេះ កងទ័ព និងគ្រួសារកងទ័ព ចំនួនជាង ១ម៉ឺននាក់ បានទទួលការចាក់វ៉ាក់សាំងដូសទី៤ ប្រភេទ Pfizer ​ខណៈបច្ចុប្បន្នមន្ទីរពេទ្យ នៅតែបន្តដំណើការវ៉ាក់សាំងជូនដល់ពួកគេ។លោកវេជ្ជបណ្ឌិត បន្តក្រើនរំលឹកដល់កងទ័ព និងក្រុមគ្រួសារកងទ័ព ឱ្យរួសរាន់ទៅទទួលការចាក់ វ៉ាក់សាំងដូសជំរុញទី៣ និងទី៤ ​ដើម្បីបង្កើនអង់ទីគ័របន្ថែមទៀត ​ទប់ទល់​នឹង​ការវាយកលុក​ពី​ជំងឺកូវីដ ​ជាពិសេសមេរោគបំប្លែងថ្មី អូមីក្រុង។កងទ័ព និងគ្រួសារកងទ័ព មកទទួលការចាក់វ៉ាក់សាំង ​នៅមន្ទីរពេទ្យព្រះកេតតុមាលា ​បាន​និយាយ​ថា ​បន្ទាប់ពីចាក់វ៉ាក់សាំងដូសជំរុញទី៤រួច ​គឺជួយបង្កើនទំនុក​ចិត្តបន្ថែមទៀត ​ក្នុង​ការរស់នៅតាម បែប​គន្លងថ្មីជាមួយជំងឺកូវីដ-១៩។ ​តែបើទោះបីចាក់វ៉ាក់សាំងរួចក្តី ​ក៏នៅតែបន្តអនុវត្តវិធានការ​សុខា​ភិបាល ៣កុំ ៣ការពារ។កន្លងទៅសម្តេចពិជ័យសេនា ទៀ បាញ់ ឧបនាយករដ្ឋមន្រ្តី ​រដ្ឋមន្រ្តីក្រសួងការពារជាតិ​ ធ្លាប់មានប្រសាសន៍ថា ​យុទ្ធនាការចាក់វាក់សាំងជូនកងទ័ព​ គ្រួសារកងទ័ព ​ព្រមទាំងអតីតយុទ្ធជន បាន​បញ្ជាក់ឲ្យឃើញនូវការយកចិត្តទុកដាក់ ​ការខិតខំប្រឹងប្រែងរបស់ប្រមុខរាជរដ្ឋាភិបាល ក៏ដូចជា​ក្រសួងការពារជាតិ ​ចំពោះសុខុមាលភាព ​របស់កងទ័ព​ និងក្រុមគ្រួសារកងទ័ព ដែលជាអ្នក​ទទួល​រាប់រងលើភារកិច្ច ​ការពារ សន្តិសុខ ​សណ្តាប់ធ្នាប់​សង្គម​ជូន​ប្រជាពលរដ្ឋ ​និង​ការពារបូរណភាព​ទឹកដី​ទាំងមូល៕អត្ថបទ៖ ទូច សោភ័ណ

រដ្ឋបាលរាជធានីភ្នំពេញ ដាក់​កំហិត​ឲ្យ​រៀបចំ​តុ ក្នុងកម្មវិធីនានា ត្រឹម៧នាក់ ខណៈអូមីក្រុងកំពុងហក់ឡើង

2022/02/10 03:16:42 pm        384
Facebook Telegram Linkin
ភ្នំពេញ៖ រដ្ឋបាលរាជធានីភ្នំពេញ បានដាក់កំហិតឲ្យរៀបចំកៅអីអង្គុយមានគម្លាតសុវត្ថិភាព ដោយមិនឲ្យលើសពី៧នាក់ ក្នុងមួយតុ នៅក្នុងពិធីរៀបចំមង្គលការ ភោជនីយដ្ឋាន ពិធីបុណ្យទាន កន្លែងកម្សាន្ត និងការជួបជុំ ប្រមូលផ្តុំផ្សេងៗ ដែលមានមនុស្សច្រើន ខណៈប៉ុន្មានថ្ងៃចុងក្រោយនេះ ករណីអូមីក្រុងកំពុងហក់ឡើងច្រើន។យោងតាមសេចក្តីណែនាំ ស្តីពីការក្រើនរំលឹកដល់ប្រជាពលរដ្ឋ ពីការអនុវត្តវិធានការសុខាភិបាល ដើម្បីទប់ស្កាត់ការចម្លងជំងឺកូវីដ១៩ ពិសេសប្រភេទអូមីក្រុង របស់រដ្ឋបាលរាជធានីភ្នំពេញ នាថ្ងៃទី១០ ខែកុម្ភៈនេះ បានលើកឡើងថា ​ចាប់ពីពេលនេះតទៅចំពោះទីតាំងដែលប្រមូលផ្តុំ​មនុស្ស​ច្រើនដូចជា ក​ន្លែងរៀបចំពិធីមង្គលការ ​ភោជនីយដ្ឋាន ​ពិធីបុណ្យទាន ​កន្លែងកម្សាន្ត ​និងការជួបជុំ ប្រមូលផ្តុំផ្សេងៗ ​ដែលមានមនុស្សច្រើន ​ត្រូវឲ្យរៀបចំកៅអី​ អង្គុយ​មាន​គម្លាត​សុវត្ថិភាព ដោយ​មិនឲ្យលើសពី៧នាក់ ​ក្នុងមួយតុ​ និងត្រូវប្រកាន់ខ្ជាប់​នូវវិធានការ ​សុខាភិបាល ក្នុងការ​ទប់ស្កាត់​ការឆ្លងរីករាលដាលនៃជំងឺកូវីដ-១៩​ ដូចជា​បាញ់អាកុល ឬដែលលាងដៃ​ វាស់កំដៅ រក្សា​គម្លាត​សុវត្ថិភាព ​និងពាក់ម៉ាស ​ហើយ​ការ​ដោះម៉ាស​ ចេញក្នុងអំឡុង​ពេល​ទទួល​ទាន​អាហារ ត្រូវទុក​ដាក់​ឲ្យបានត្រឹមត្រូវ ​និងត្រូវ​ពាក់ម៉ាស​វិញ ​នៅ​ពេលងើប​ចេញពីតុជាដើម។សេចក្តីណែនាំរបស់រដ្ឋបាលរាជធានីភ្នំពេញ​ បានបន្ថែមទៀតថា ក្រៅពីតម្រូវ​ឲ្យ​មាន​ការរក្សា​គម្លាត​ដូចខាងលើនេះ ​ក៏ត្រូវពិនិត្យប័ណ្ណចាក់វ៉ាក់សាំង​ បើ​បុគ្គល​ណាមួយមិន​បាន​ចាក់វ៉ាក់សាំង ឬ​ហួស​រយៈពេល៤ខែហើយ​ មិនបាន​ទៅ​ចាក់វ៉ាក់សាំងដូសទី៣ ឬដូសជំរុញ​ដោយ​គ្មាន​មូលហេតុ​ត្រឹមត្រូវ​បុគ្គល​នោះ ​មិន​អនុញ្ញាត​ឲ្យចូលទីតាំង​ ឬ​កន្លែងប្រារព្ធ​ពិធី​ឡើយ។តាមរយៈសេចក្តីណែនាំនេះដែរ ​រដ្ឋបាលរាជធានីភ្នំពេញ ​ក៏បានក្រើនរំលឹកដល់មន្ត្រី ​បុគ្គលិក ​សិស្ស និស្សិត និ​ង​កៀរគរ​ប្រជាពលរដ្ឋ ​ឲ្យទៅ​ចាក់វ៉ាក់សាំងបង្ការជំងឺកូវីដ-១៩ ​ទាំង​ដូស​មូលដ្ឋាន និងដូសទី៣​ ឬដូសជំរុញ​ឲ្យបានគ្រប់ៗគ្នា ​ដើម្បីបង្កើនភាព​រឹងមាំ​ក្នុង​សហគមន៍ និង​ចៀសវាង​នូវ​មហន្តរាយ​សុខភាព​សាធារណៈ​ ដែលធ្វើឲ្យប៉ះពាល់​ដ​ល់​សេដ្ឋកិច្ច​គ្រួសារ និង​សេដ្ឋកិច្ច​សង្គម​ជា​ដើម៕អត្ថបទ៖ បាន ចក់

សម្តេចក្រឡាហោម ស ខេង ជំរុញឲ្យនគរបាលរាជធានីភ្នំពេញ បន្ត​ខិតខំ​បំរើ​ប្រជាពលរដ្ឋ​ឲ្យ​បាន​ល្អ​បន្ថែមទៀត

2022/02/10 02:59:31 pm        379
Facebook Telegram Linkin
ភ្នំពេញ៖ សម្តេចក្រឡាហោម ស ខេង បានជំរុញដល់នគរបាល នៃស្នងការដ្ឋាននគរបាលរាជធានីភ្នំពេញទាំងអស់ បន្តខិតខំបំរើដល់បងប្អូនប្រជាពលរដ្ឋឲ្យបានល្អប្រសើបន្ថែមទៀត ជាពិសេសលើសេវាសាធារណៈ ខណៈបច្ចុប្បន្នមានមានការថ្នាំងថ្នាក់ពីបងប្អូនប្រជាពលរដ្ឋនៅឡើយនោះ។នៅក្នុងឱកាសអញ្ជើញសំណេះសំណាល​ជាមួយមន្រ្តីនគរបាល នៃស្នងការដ្ឋាននគរបាល​រាជធានី​ភ្នំពេញ ​និងត្រួតពិនិត្យការកសាងអគារថ្មីស្នងការដ្ឋាន​នគរបាលរាជធានីភ្នំពេញ កម្ពស់៩ជាន់ កាលពីរសៀលថ្ងៃទី៩ ​ខែកុម្ភៈម្សិលមិញនេះ ​សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បានលើកឡើង​ក្នុង​នាម​ជាមន្រ្តីនគរបាល «ត្រូវបន្តខិតខំបំពេញ​ភារកិច្ច​ឱ្យកាន់តែល្អ​ថែម​ទៀតជូនអង្គភាព និងការផ្តល់សេវាសាធារណៈនិង​សេវា​សន្តិសុខ​ជូន​ប្រជាពលរដ្ឋកាន់​តែ​មាន​ប្រសិទ្ធភាពខ្ពស់បន្ថែមទៀត ដោយមិនត្រូវគិតនិន្នាការនោះឡើយ»។ជាមួយគ្នានោះដែរសម្តេចក្រឡាហោម ស ខេង ក៏បាន​ថ្លែង​កោត​សរសើរ​ចំពោះ​នគរបាល​រាជធានីភ្នំពេញ ​ដែលបានបំពេញភារកិច្ចការពារពង្រឹងសន្តិសុខ ​សណ្តាប់ធ្នាប់ នាំមក​សុខ​សុវត្ថិភាព​ស្ថិរភាពសង្គមនាពេលកន្លងមកផងដែរ ​ខណៈដែល​ប្រទេស​កំពុង​ជួប​ការ​លំបាកក្នុងការ​ប្រយុទ្ធ​ប្រឆាំង​ជាមួយនឹងជំងឺកូវីដ១៩។ក្រៅពីជួបសំណេះសំណាលជាមួយមន្រ្តីនគរបាលរាជធានីភ្នំពេញ សម្តេចក្រឡាហោម ស ខេង ក៏បាន​ចុះត្រួតពិនិត្យនូវអគារស្នងការដ្ឋានគរបាលរាជធានីភ្នំពេញថ្មីផងដែរ ខណៈអគារនេះសាងសង់ ​បាន៩០ភាគរយហើយនោះ។សូមបញ្ជាក់ថា អគារធ្វើការថ្មីកម្ពស់៩ជាន់ របស់ស្នងការដ្ឋាននគរបាលរាជធានីភ្នំពេញ មាន​ទំហំ៤០ម៉ែត្រគុណ៥០ម៉ែត្រ កសាង​ឡើង​នៅ​ក្នុងអំឡុងចុងឆ្នាំ២០១៩ ​ដើម្បី​ជំនួស​អគារចាស់​ដែល​មានសភាព​ទ្រុឌទ្រោម​ទៅហើយនោះ។អគារថ្មីស្នងការដ្ឋាននគរបាលរាជធានីភ្នំពេញ ​ចាត់​ទុកជា​សមិទ្ធផល​ប្រវត្តិ​សាស្រ្តថ្មី​មួយ​សម្រាប់​កង​កម្លាំងនគរបាលរាជធានីភ្នំពេញ​ ដើម្បីបំពេញភារកិច្ចលើកកម្ពស់នៃការផ្តល់សេវា​សន្តិសុខ​និង​សេវាសាធារណៈជូនប្រជាពលរដ្ឋ និងភ្ញៀវជាតិ-អន្តរជាតិឱ្យកាន់តែមានប្រសិទ្ធភាព៕ អត្ថបទ៖ បាន ចក់

សម្តេចតេជោអញ្ជើញដល់សាធារណរដ្ឋកូរ៉េ ហើយប្រកបដោយ​សុវត្ថិភាព

2022/02/10 02:19:40 pm        513
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ណៃព្រះរាជាណាចក្រកម្ពុជា និងគណៈប្រតិភូជាន់ខ្ពស់ព្រះរាជាណាចក្រកម្ពុជា បានអញ្ជើញទៅដល់រដ្ឋធានីសេអ៊ូល សាធារណរដ្ឋកូរ៉េ ជាទីកន្លែងដែលសម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់ ព្រះរាជាណាចក្រកម្ពុជា អញ្ជើញចូលរួមកិច្ចប្រជុំកំពូលសន្តិភាពពិភពលោក ឆ្នាំ២០២២ ពីថ្ងៃទី១១ ដល់ថ្ងៃទី១៣កុម្ភៈ ឆ្នាំ២០២២។ យន្តហោះពិសេសរបស់ព្រះរាជាណាចក្រកម្ពុជា ជើងហោះហើរលេខ០០១ បានធ្វើការចុះចតប្រកប​ដោយ​សុវត្ថិភាព នៅអាកាសយានដ្ឋានអន្តរជាតិ អ៊ីនឆន់ រដ្ឋធានីសេអ៊ូល សាធារណរដ្ឋកូរ៉េ កាលពីវេលាម៉ោង១៤ និង៥២នាទី រសៀល ម៉ោងនៅរដ្ឋធានីសេអ៊ូល ត្រូវនឹងម៉ោង ១២និង៥២នាទី ម៉ោងនៅព្រះរាជាណាចក្រកម្ពុជា ​ក្រោមវត្តមាននៃការស្វាគមន៍យ៉ាងកក់ក្តៅបំផុត​ ពីអគ្គនាយករង នៃក្រសួងការបរទេសកូរ៉េ លោកជំទាវ ជ្រឹង បុទុមរង្សី ឯកអគ្គរាជទូត ​ព្រះរាជាណាចក្រកម្ពុជា ប្រចាំ​សាធារណរដ្ឋកូរ៉េ ព្រមទាំងវត្តមាន​ ឯកឧត្តម លោកជំទាវ ជាឥស្សរជនជាន់ខ្ពស់ ក្រសួងការ​បរ​ទេសកូរ៉េ ​និងឥស្សរជនការទូត ​របស់ព្រះរាជាណាចក្រកម្ពុជាជាច្រើនរូប។តាមកម្មវិធីដែលបានគ្រោងទុក ​សម្តេចតេជោនាយករដ្ឋមន្រ្តី ក្រៅពីការថ្លែងសុន្ទរកថា គន្លឹៈចំនួន៣ ក្នុង​កិច្ចប្រជុំកំពូលសន្តិភាពពិភពលោក ឆ្នាំ២០២២ ​សម្តេចតេជោនាយករដ្ឋមន្រ្តី និងជួបពិភាក្សា​ទ្វេភាគី​ជាមួយ​ ឯកឧត្តម មូន ចេអ៊ីន ប្រធានាធិបតី នៃសាធារណរដ្ឋកូរ៉េ ឯកឧត្តម បាន គីមូន អតីត​អគ្គលេខាធិការអង្គការសហប្រជាជាតិ ​និងជាសហប្រធានកិច្ចប្រជុំកំពូលសន្តិភាព​ពិភពលោក ឆ្នាំ២០២២ ​រួមទាំងការជួបសន្ទនាជាមួយ​ ឯកឧត្តម លី ចេមីយ៉ុង ​បេក្ខភាពប្រធានាធិបតី មក​ពី​គណបក្សប្រជាធិបតេយ្យកូរ៉េ​ ឯកឧត្តម យ៊ូន សឹកយូល ​បេក្ខជនប្រធានាធិបតេយ្យ មកពី​គណបក្ស​អំណាចប្រជាជនកូរ៉េ ​និងជួបដោយឡែកជាមួយ ​លោកជំទាវ បណ្ឌិត ហាក់ ចាហាន់ម៉ូន ស្ថាបនិកមូល​និធិសហព័ន្ធសន្តិភាពសកល។ដោយឡែកនៅសណ្ឋាគារឡូតេវើល ដែលជាទីកន្លែងស្នាក់អាស្រ័យរបស់សម្តេចតេជោ​នាយក​រដ្ឋមន្រ្តី វត្តមាននៃការអញ្ជើញដល់របស់សម្តេចតេជោ ​ត្រូវបានការធ្វើគារវកិច្ចស្វាគមន៍​យ៉ាងកក់ ក្តៅ ពីឯកឧត្តម Yun Young-Ho អគ្គនាយកអង្គការសហព័ន្ធសន្តិភាពសកល​ លោកបណ្ឌិត Thomas G Walsh ប្រធានអអ្គការសហព័ន្ធសន្តិភាពសកល ​ព្រមទាំងវត្តមាន ​អស់លោក លោកស្រី នៃ​អង្គការ​សហព័ន្ធសន្តិភាពសកល​ រួមទាំងនិស្សិតនិងបងប្អូនជនរួមជាតិកម្ពុជា​ ដែលកំពុងបំពេញការសិក្សា និងប្រកប​ការងារនៅសាធារណរដ្ឋកូរ៉េ ជាច្រើនរូប៕

រាជរដ្ឋាភិបាល បន្តលើកលែងពន្ធ ក្នុងវិស័យទេសចរណ៍រងផលប៉ះពាល់ដោយកូវីដ-១៩

2022/02/10 01:40:17 pm        476
Facebook Telegram Linkin
ភ្នំពេញ៖ រាជរដ្ឋាភិបាល បន្តលើកលែងការបង់ពន្ធប្រចាំខែគ្រប់ប្រភេទ សម្រាប់វិស័យសណ្ឋាគារ, ផ្ទះសំណាក់,ភោជនីយដ្ឋាន និងក្រុមហ៊ុន ភ្នាក់ងារទេសចរណ៍, ការបន្តលើកលែងបង់ពន្ធប៉ាតង់ ចំពោះក្រុមហ៊ុនភ្នាក់ងារទេសចរណ៍ និងប្រតិបត្តិករក្នុងវិស័យទេសចរណ៍ដទៃទៀត និងលើកលែងការបង់កម្រៃបន្តអាជ្ញាបណ្ណទេសចរណ៍សម្រាប់ឆមាសទី១ក្នុងឆ្នាំនេះ ។ក្រសួងសេដ្ឋកិច្ច និងហិរញ្ញវត្ថុ និងក្រសួងទេសចរណ៍ ចេញសេចក្តីប្រកាសរួម ស្តីពីការ​អនុវត្តវិធាន​ការគោលនយោបាយគន្លឹះ សម្រាប់វិស័យទេសចរណ៍ឆ្នាំ២០២២ ដោយប្រកាសនេះ និងបន្ត​អនុគ្រោះដល់​វិស័យ​ទេសចរណ៍ដូចជា៖ ​បន្តលើកលែងការបង់ពន្ធ ប្រចាំខែគ្រប់ប្រភេទ​នៃ​សកម្មភាព​អាជីវកម្ម​ក្នុងវិស័យទេសចរណ៍នៅក្នុងរាជធានីភ្នំពេញ,ខេត្តសៀមរាប, ខេត្តព្រះសីហនុ, ខេត្តកែប, ខេត្តកំពត, ក្រុងបាវិត និងក្រុងប៉ោយប៉ែត​ សម្រាប់ឆមាសទី១ ឆ្នាំ២០២២ ។ ករណីមានបំណុលសល់មុនវិបត្តិនៃជំងឺកូវីដ-១៩ ​ចំពោះប្រតិបត្តិករ ក្នុងវិស័យទេសចរណ៍​សម្រាប់​ខេត្តដទៃទៀត ​ត្រូវពន្យារ​ពេលការ​ចុះ​ធ្វើ​សវនកម្ម​នៅក្នុងឆ្នាំ ២០២១ ប៉ុន្តែអាជីវកម្មទាំងនេះ​នៅ​តែ​មានកាតព្វកិច្ច ​ដាក់លិខិត​ប្រកាស​ពន្ធអាករ ​និង​ប្រើប្រាស់​ប្រព័ន្ធអនឡាញ​សម្រាប់គ្រប់គ្រង​អាករ​លើ​តម្លៃបន្ថែម (E-VAT) ​ជារៀងរាល់ខែ​ ក្នុងអំឡុងពេលនៃការលើកលែងនេះ។អន្តរក្រសួង ​បានបន្តលើកលែងការបង់ពន្ធប៉ាតង់ ​ចំពោះក្រុមហ៊ុនភ្នាក់​ងារ​ទេសចរណ៍ ​និង​ប្រតិបត្តិករ​ក្នុង​វិស័យទេសចរណ៍ដទៃទៀត​សម្រាប់​ ឆ្នាំ២០២២។ ​ចំណែកការ បន្តអាជ្ញាបណ្ណ​ទេសចរណ៍​គ្រប់ប្រភេទ​សម្រាប់ឆ្នាំ ២០២២ ​ក៏ត្រូវ​បានលើកលែង​នៃការបង់កម្រៃផងដែរ។ក្រៅពីនេះគឺការបន្តសុពលភាព ​នៃការអនុវត្តសេចក្តីជូនដំណឹង ​ស្តីពីការអនុវត្តគោលនយោ បាយ​លើកទឹកចិត្ត ​នៃការលក់បណ្ណចូលទស្សនារមណីយដ្ឋានអង្គរ ​រហូតដល់ថ្ងៃទី ​៣១ ខែធ្នូ ឆ្នាំ២០២២ ផងដែរ។លោក ធឿន វុឌ្ឍី នាយកប្រតិបត្តិក្រុមហ៊ុនទេសចរណ៍ "មរតកអៅដរ (Morodok Outdoor)" សាទរ​ចំពោះការសម្រេចរបស់រាជរដ្ឋាភិបាល ​ដែលបន្តយកចិត្តទុកដាក់ខ្ពស់ ​ផ្តល់​ការ​អនុគ្រោះពន្ធ និង​ផ្នែកផ្សេងៗទៀត ​នៅក្នុងវិស័យទេសចរណ៍​ ដើម្បីទុកឱកាសឲ្យវិស័យឯកជន ​អភិវឌ្ឍន៍ និង​ស្តារអាជីវកម្មឡើងវិញ​ ដើម្បីបន្តរួមចំណែក ​ដល់ការ​ស្តារសេដ្ឋកិច្ចកម្ពុជា​ឡើងវិញ​ផងដែរ។សូមបញ្ជាក់ថា៖ ទាក់ទងវិស័យទេសចរណ៍ ​បើតាមរបាយការណ៍សង្ខេប ឆ្នាំ២០២២ របស់ក្រសួង​សេដ្ឋកិច្ច ​និងហិរញ្ញវត្ថុ, វិស័យសេវា កម្មត្រូវបានព្យាករថា ​នឹងបន្តកើនឡើងក្នុងអត្រា​ ៤,១% ក្នុងឆ្នាំ ២០២២ ​ដោយសារការងើបឡើងវិញសន្សឹមៗ​ នៃអនុវិស័យសណ្ឋាគារ ​និងភោជនីយដ្ឋាន និង​វិស័យគាំទ្រទេសចរណ៍ផ្សេង៕អត្ថបទ៖ សុន រ៉ាឌី

បណ្តារោងចក្របន្តបាញ់ថ្នាំសម្លាប់មេរោគជាប្រចាំ និងធ្វើតេស្ត​លើ​កម្មករ​ក្នុង​ករណី​សង្ស័យ​កូវីដ-១៩

2022/02/10 12:55:42 pm        282
Facebook Telegram Linkin
ភ្នំពេញ៖ តាមបណ្ដារោងចក្រនៅតែបន្ដដាក់ចេញវិធានការការពាររៀងៗខ្លួន ធ្វើយ៉ាងណា​ដើម្បី​ទប់ស្កាត់​ការឆ្លងទ្រង់ទ្រាយធំ ​ដែលអាចប៉ះពាល់​ដល់ដំណើរការផលិត រឺផ្អាកដំណើរការជា​បណ្ដោះ​អាសន្ន។ ជាក់ស្ដែងសម្រាប់រោងចក្រមួយកន្លែងនៅក្រុងតាខ្មៅ ខេត្តកណ្ដាល ​បានបន្តបាញ់ថ្នាំ​សម្លាប់​មេរោគ ២ដងក្នុង១សប្ដាហ៍ ​និងធ្វើតេស្តលើ​បុគ្គលិក​ក្នុង​ករណី​មាន​បញ្ហា​សុខភាព ហើយ​រោងចក្រ​ក៏នៅតែបន្ត ​អនុវត្តការពាក់ម៉ាសការពារ ​ការពិនិត្យកម្ដៅ និងវិធានការចាំបាច់ជាច្រើនទៀត ខណៈដែលវីរុសបំប្លែងថ្មី អូមីក្រុងបន្តកើនឡើងគួរឱ្យព្រួយបារម្ភ។ករណីកើនឡើងនៃការឆ្លងវីរុសបំប្លែងថ្មី ​អូមីក្រុង ​កំពុងបន្តកើនឡើងជារៀងរាល់ថ្ងៃនេះ គឺជាការ​ព្រួយ​បារម្ភសម្រាប់រោងចក្រ។​ នេះជាការលើកឡើងរបស់​ អ្នកស្រី គួច ដាវី ជាប្រធាន​គ្រប់គ្រង​ធនធាន​មនុស្សនៃរោងចក្រមួយកន្លែងនៅក្រុងតាខ្មៅ ​ខេត្តកណ្ដាល ។ទន្ទឹមនឹងការព្រួយបារម្ភនេះ ​អ្នកស្រីបញ្ជាក់ថា ​រោងចក្រនៅតែអនុវត្តវិធានការការពារ ដោយ​មិន​ធ្វេសប្រហែសនោះទេ។ ​ក្រៅពីការតម្រូវឱ្យពាក់ម៉ាសការពារ ការពិនិត្យកម្ដៅ រោងចក្រគឺតែងតែ​បាញ់ថ្នាំ​សម្លាប់មេរោគចំនួន ​២ដងក្នុង ១សប្ដាហ៍ ​និងធ្វើតេស្ត​លើកម្មករ​កម្មការិនី ​ដែលមាន​បញ្ហា​សុខភាព​ រួមទាំង​ការចាក់វ៉ាក់សាំងដូស​ជម្រុញ​សម្រាប់កម្មករកម្មការិនី ​និង​វិធាន​ការផ្សេងទៀត ដើម្បី​ការពារកុំឱ្យមានការឆ្លងរីករាលដាលក្នុងរោងចក្រ។ការកើនឡើងនៃ ករណីវិជ្ជមានវីរុសបំប្លែងថ្មីអូមីក្រុងនេះ ​ក៏ជាការព្រួយបារម្ភសម្រាប់កម្មករ កម្មការិនី​។ ពួកគាត់ព្រួយបារម្ភពីការឆ្លង ​និងចម្លងទៅក្រុមគ្រួសារ ​និង​បារម្ភពីការឆ្លងទ្រង់ទ្រាយធំ ដែល​អាច​ឈានដល់ការផ្អាករោងចក្រ ​ប៉ះពាល់ដល់ប្រាក់ចំណូល។ ​ទន្ទឹមនឹងការព្រួយបារម្ភ ពួកគាត់​ក៏​ដឹងច្បាស់​ពីកាតព្វកិច្ចរៀងខ្លួន​ ដោយ​ទទួលការការចាក់វ៉ាក់សាំង និងបន្តការការពារខ្លួន។បច្ចុប្បន្នតាម​ទិន្នន័យ​ប្រចាំថ្ងៃរបស់ក្រសួងសុខាភិបាល ​បង្ហាញថា ​ការឆ្លងកូវីដ-១៩ ជាពិសេសវីរុស​បំប្លែងថ្មី ​អូមីក្រុងគឺមានការឡើង។​ ការកើនឡើងនេះ ក៏បានជំរុញឱ្យប្រមុខរាជរដ្ឋាភិបាល​ចេញ​សារសម្លេង ​ឱ្យមានការបង្កើនការការពារ ​កាត់បន្ថយការជួបជុំ និងត្រូវបន្តការប្រុងប្រយ័ត្ន​ខ្ពស់​ផងដែរ។ជាក់ស្ដែងក្រសួងសុខាភិបាល ​​បានប្រកាសរកឃើញនូវករណីវិជ្ជមានកូវីដ-១៩​ ចំនួន​ ២៦២ករណី សម្រាប់​ថ្ងៃទី ៩ខែកុម្ភៈ ​ក្នុងនោះជាករណី ​អូមីក្រុងទាំងអស់ ហើយករណីឆ្លងក្នុង​សហគមន៍​មាន​រហូតដល់ ​២២៦ករណី​។ ក្រសួង​សុខាភិបាលកាលពីម្សិលមិញ ក៏បានចេញសេចក្ដីជូនព័ត៌មាន​ដោយ​ក្រើន​រម្លឹក​ប្រជាពលរដ្ឋត្រូវ​ទៅចាក់វ៉ាក់សាំងដូសជម្រុញ ​និងដូសទី ៤ផងដែរ៕ អត្ថបទ៖ គឹមហុក

និស្សិតនិងពលរដ្ឋខ្មែរនៅកូរ៉េ សម្តែងការស្វាគមន៍ចំពោះដំណើរទស្សនកិច្ចសម្តេចតេជោ

2022/02/10 12:24:50 pm        327
Facebook Telegram Linkin
ភ្នំពេញ៖ និស្សិតពលករ និងពលរដ្ឋខ្មែរ ដែលកំពុងសិក្សាធ្វើការ និងរស់នៅប្រទេសកូរ៉េខាងត្បូង បានសម្តែងការស្វាគមន៍ចំពោះដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាទៅកាន់ទីនោះ ដើម្បីធ្វើជាសហប្រធានកិច្ចប្រជុំកំពូលសន្តិភាព​ពិភពលោក​ឆ្នាំ២០២២ និងទទួល ​ពានរង្វាន់សន្តិភាពពិភពលោក ស៊ុន ហាក់ ឆ្នាំ២០២២ ។តាមរយៈឃ្លីបវីដេអូជាច្រើនដាច់ដោយឡែកពីគ្នា នៅព្រឹកថ្ងៃទី១០ ខែកុម្ភៈនេះ ក្រុមនិស្សិតពលករ និងពលរដ្ឋខ្មែរ ដែលបានកំពុងនៅប្រទេសកូរ៉េ ​បានលើកឡើងថា ពួកគេពិតជាសប្បាយចិត្ត​យ៉ាងខ្លាំង​ បន្ទាប់ពីទទួលដំណឹងថា ​សម្តេចតេជោ ហ៊ុន សែន​ ទៅកាន់ប្រទេសកូរ៉េ ហើយក្នុងនាម​ពលរដ្ឋខ្មែរ ពួកគេ ប្រកាសគាំទ្រ ​និងចូលរួមរីករាយចំពោះសម្តេចតេជោ ត្រូវបានជ្រើសរើសជាជ័យ​លាភីសន្តិភាព​ពិភពលោក ​ពានរង្វាន់ស៊ុនហាក់២០២២នេះ។សម្តេចតេជោ ហ៊ុន សែន ​បានដឹកនាំគណៈប្រតិភូជាន់ខ្ពស់អញ្ជើញទៅប្រទេសកូរ៉េខាងត្បូង​ នៅ ព្រឹកថ្ងៃទី១០ ​ខែកុម្ភៈនេះ ដើម្បីធ្វើសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២ ក្រោមមូលបទ «ឆ្ពោះទៅកាន់សន្តិភាព ​នៅឧបទ្វីបកូរ៉េ»ពីថ្ងៃទី ១០-១៣ ខែកុម្ភៈនេះ ។ សម្ដេចតេជោក៏នឹងអញ្ជើញ ​ចូលរួមដោយផ្ទាល់ក្នុងការទទួលពានរង្វាន់សន្តិភាពពិភពលោក ស៊ុនហាក់ឆ្នាំ២០២២។សេចក្តីជូនដំណឹងរបស់ក្រសួងការបរទេសកម្ពុជា បានឲ្យដឹងថា​ កិច្ចប្រជុំកំពូល​ ពិភពលោកឆ្នាំនេះ នឹងមានការចូលរួមពីបណ្តាវាគ្មិនសំខាន់ៗ ​និងអ្នកចូលរួមមកពី១៥៧ប្រទេស ដើម្បីស្វែងរក​ក្តី​សង្ឃឹមក្នុង ​ការបង្រួបបង្រួមឧបទ្វីបកូរ៉េ ​ប្រកបដោយសន្តិវិធី៕អត្ថបទ៖ បាន ចក់

សម្តេចតេជោ បានអញ្ជើញទៅកូរ៉េខាងត្បូង ដើម្បីធ្វើជាសហប្រធានកិច្ចប្រជុំសន្តិភាពពិភពលោក

2022/02/10 12:03:01 pm        219
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី១០ ខែកុម្ភៈនេះ បានដឹកនាំគណៈប្រតិភូជាន់ខ្ពស់អញ្ជើញទៅបំពេញទស្សនកិច្ចនៅសាធារណរដ្ឋកូរ៉េ និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២ ក្រោមមូលបទ «ឆ្ពោះទៅកាន់សន្តិភាព នៅឧបទ្វីប កូរ៉េ» ពីថ្ងៃទី ១០-១៣ ខែកុម្ភៈនេះ នៅទីក្រុងសេអ៊ូល។ឯកឧត្តម ស៊្រី ថាមរ៉ុង្គ រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ថា វត្តមានដ៏ខ្ពង់ខ្ពស់ទៅកាន់ ប្រទេសកូរ៉េខាងត្បូងនេះ​ សម្តេចនឹងអញ្ជើញធ្វើជាសហប្រធានកិច្ចប្រជុំកំពូលសន្តិភាពពិភពលោក ឆ្នាំ២០២២ ​ជាមួយលោកជំទាវបណ្ឌិត ហាក់ ចាហាន់មូន សហស្ថាបនិកនៃសហព័ន្ធសន្តិភាព សកល (UPF) ​និងឯកឧត្តម បាន គីមូន ​អតីតអគ្គលេខាធិការអង្គការសហប្រជាជាតិ និងអញ្ជើញ​ចូលរួម​ដោយ ផ្ទាល់ក្នុងការទទួលពានរង្វាន់សន្តិភាពពិភពលោក ​ស៊ុនហាក់ ឆ្នាំ២០២២ ដែល​កិត្តិយសនេះ មិនមែនសម្រាប់តែសម្តេចម្នាក់ឯងទេ គឺរួមទាំងប្រជាជន គ្រួសារ សមាជិករាជ​រដ្ឋាភិបាល ​ក្រុមចលនាព្រះមហាក្សត្រ អតីតព្រះមហាក្សត្រ កងកម្លាំងប្រដាប់អាវុធ ជា​ពិសេស​ប្រជាពលរដ្ឋទាំងមូល ​ដែលបានគាំទ្រនូវ នយោបាយឈ្នះ ឈ្នះ របស់សម្តេច។កិច្ចប្រជុំកំពូល ពិភពលោកឆ្នាំ២០២២នេះ នឹងមានការចូលរួមពីបណ្តាវាគ្មិនសំខាន់ៗ និងអ្នកចូល រួមមកពី១៥៧ប្រទេស ​ដើម្បីស្វែងរកក្តីសង្ឃឹមក្នុងការបង្រួបបង្រួមឧបទ្វីបកូរ៉េប្រកបដោយសន្តិវិធី។អំឡុងពេលស្នាក់នៅទីក្រុងសេអ៊ូល ​សម្តេចតេជោនាយករដ្ឋមន្ត្រី ​នឹងមានជំនួបជាមួយឯកឧត្តម មូន ចេអ៊ីន ប្រធានាធិបតីកូរ៉េខាងត្បូង ​ដើម្បីពិភាក្សាអំពីទំនាក់ទំនង ​និងកិច្ចសហប្រតិបត្តិការទ្វេភាគី រួម មាន​កិច្ចសហប្រតិបត្តិការលើវិស័យនយោបាយ សេដ្ឋកិច្ច ​និងសង្គម វប្បធម៌ និងធ្វើការផ្លាស់ប្តូរ​ទស្សនៈលើ ​បញ្ហាតំបន់ និងអន្តរជាតិ ដែលជាកង្វល់ និងចំណាប់អារម្មណ៍រួមគ្នា។ សម្តេចតេជោ ក៏នឹងទទួលជំនួប សម្តែងការគួរសមពីសំណាក់ឯកឧត្តម បាន គីមូន អតីតអគ្គ​លេខាធិការ​នៃអង្គការសហប្រជាជាតិផងដែរ។សម្តេចតេជោ រំពឹងថា នឹងមានជំនួបជាមួយប្រមុខរដ្ឋ/រដ្ឋាភិបាល នៃប្រទេសមួយចំនួន ក៏ដូចជា ទទួល​សវនាការពីសំណាក់ឥស្សរជននយោបាយ និងធុរជនផ្សេងទៀតផងដែរ៕ អត្ថបទ៖ មុត សុទ្ធ 

បណ្ដាញសង្គម

ព័ត៌មានថ្មីៗ

ឯកឧត្តមសាស្រ្តាចារ្យ ឈាង រ៉ា ចុះសំណេះសំណាលសួរសុខទុក្ខ និងចែកអំណោយជូនដល់បងប្អូនប្រជាពលរដ្ឋ ដែលជម្លៀសមកស្នាក់នៅបណ្តោះអាសន្ន នៅមណ្ឌលសុវត្ថិភាព វត្តពោធិ៍៥០០០ដើម
06/28/2025 09:06 PM
Facebook Telegram Linkin
ពលរដ្ឋ២០១គ្រួសារ នៅស្រុកពញាឮ សប្បាយចិត្ត បានចូលសមាគមអ្នកផលិតចម្លាក់ប្រាក់ស្ពាន់ ស្រួលរកទីផ្សារជាងមុន
06/28/2025 06:06 PM
Facebook Telegram Linkin
ពលករខ្មែរដែលត្រឡប់មកពីប្រទេសថៃ សម្តែងការអរគុណដល់រាជរដ្ឋាភិបាល ដែលបានផ្ដល់ឱកាសការងារដល់ពួកគាត់
06/28/2025 06:06 PM
Facebook Telegram Linkin
អ្នកនាំពាក្យ៖ សម្ដេចតេជោតែងលើកឡើងថា បើមិនចេះយុទ្ធសាស្រ្ត កុំធ្វើនយោបាយ ឬធ្វើជាអ្នកដឹកនាំ
06/28/2025 06:06 PM
Facebook Telegram Linkin
គណៈកម្មាការUN និយាយថា ប្រទេសស៊ីរី ត្រូវតែបញ្ចប់អំពើហិង្សាលើជនជាតិភាគតិច Alawites និងការពារកន្លែងគោរពបូជា
06/28/2025 05:06 PM
Facebook Telegram Linkin
ក្រុមហ៊ួទីនៅយេម៉ែន អះអាងថា ខ្លួនបានវាយប្រហារដោយមីស៊ីលលើអ៊ីស្រាអែល ប៉ុន្តែត្រូវស្ទាក់ចាប់បាន
06/28/2025 05:06 PM
Facebook Telegram Linkin
មន្ត្រី៖ ទាហាន ១៣នាក់ បានស្លាប់ ក្នុងការវាយប្រហារអត្តឃាត នៅភាគពាយ័ព្យប៉ាគីស្ថាន
06/28/2025 05:06 PM
Facebook Telegram Linkin
ក្រុមអង្គការជំនួយអន្តរជាតិ កំពុងខិតខំសម្របសម្រួលការផ្គត់ផ្គង់ជំនួយបន្ថែមទៀត ដល់ប្រជាជននៅតំបន់ហ្កាហ្សា
06/28/2025 05:06 PM
Facebook Telegram Linkin
ប្រធានរក្សាសន្តិភាពUN«ព្រួយបារម្ភខ្លាំងណាស់» អំពីអនាគតនៃកិច្ចព្រមព្រៀងបទឈប់បាញ់លីបង់និងអ៊ីស្រាអែល
06/28/2025 05:06 PM
Facebook Telegram Linkin
ឯកឧត្តម ឌិត ទីណា អញ្ជើញចុះពិនិត្យស្ថានភាពផលិតកម្មដំណាំបន្លែ និងស្តាប់នូវសំណូមពរម្ចាស់កសិដ្ឋាន នៅខេត្តបន្ទាយមានជ័យ
06/28/2025 05:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.