នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈកម្មាធិការអន្តរក្រសួងចុះពិនិត្យ និងវាយតម្លៃការស្ថាបនាផ្លូវក្រួសក្រហម១ខ្សែ ក្នុង​ស្រុកបាកាន ខេត្តពោធិ៍សាត់
រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យវឌ្ឍនភាពការងារសាងសង់ស្ពានភ្នំក្រវាញ និង​ផ្លូវកៅ​ស៊ូ​ក្នុង​​ខេត្តពោធិ៍សាត់
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់

នយោបាយ​ និង ការអភិវឌ្ឍន៍

ឯកឧត្តម មៀច សុផាន់ណា អញ្ជើញបូកសរុបលទ្ធផលការងារ CPP អាណត្តិទី៤ នៅឃុំមេសរប្រចាន់

2022/01/08 10:35:49 am        158
Facebook Telegram Linkin
ព្រៃវែង៖ ឯកឧត្តម មៀច សុផាន់ណា អនុប្រធានក្រុមការងារចុះមូលដ្ឋានស្រុកពារាំង ខេត្តព្រៃវែង និងជាប្រធានក្រុមការរងារចុះមូលដ្ឋាន ឃុំមេសរប្រចាន់ នៅថ្ងៃទី៨ ខែមករា ឆ្នាំ២០២២ បាន អញ្ជើញដឹកនាំធ្វើសន្និបាតបូកសរុបលទ្ធផលសកម្មភាពការងារអាណត្តិទី៤ ឆ្នាំ២០១៧-២០២២ និងលើកទិសដៅអនុវត្តបន្តអាណត្តិទី៥ ឆ្នាំ២០២២-២០២៧ របស់គណៈកម្មាធិការគណបក្សឃុំមេសរប្រចាន់ ។ក្នុងសន្និបាទនេះ មានការអញ្ជើញចូលរួមពីសំណាក់ឯកឧត្ដម លោកជំទាវ ភ្ញៀវកិត្តិយស ក្រុមការងារ លោក លោកស្រី ជាសមាជិក សមាជិការគណបក្ស សរុបចំនួន ២៤៦នាក់ ស្រី៨៩ នាក់ ។ក្នុងកម្មវិធីអង្គសន្និបាតនេះ ឯកឧត្ដម វង្ស ពិសេន បានឧបត្ថម្ភថវិកាចំនួន ៥ ០០០ ០០០រៀល និងកាតាបចំនួន៩០, ឯកឧត្ដម មៀច សុផាន់ណា បាន​ឧបត្ថម្ភ​សម្ភារៈ និងថវិកាចំនួន ៥ ៥២០ ០០០រៀល ហើយបានជួបជុំហូបអាហារសាមគ្គីផងដែរ ៕

គណបក្សប្រជាជន​សំណេះសំណាល​ជាមួយ​សមាគមសម្ព័ន្ធសេដ្ឋកិច្ច និង​រ៉ឺម៉ក​សន្តិភាព​នៅសៀមរាប

2022/01/07 12:27:17 pm        507
Facebook Telegram Linkin
សៀមរាប៖ គណៈកម្មាធិការនៃគណបក្សប្រជាជនកម្ពុជាខេត្តសៀមរាប បានសំណេះសំណាលជាមួយសមាគមសម្ព័ន្ធសេដ្ឋកិច្ច និងរ៉ឺម៉កសន្តិភាពប្រចាំខេត្តសៀមរាប ប្រមាណជាង១៧០នាក់។ពិធីនេះ ធ្វើឡើងស្ថិតក្នុងសាលប្រជុំមន្ទីរបក្សខេត្ត នារសៀលថ្ងៃទី០៦ ខែមករា ឆ្នាំ២០២២។ឯកឧត្ដម ទៀ សីហា សមាជិកគណៈកម្មាធិការកណ្តាល សមាជិកយុវជនថ្នាក់កណ្តាល​នៃ​គណបក្ស​ប្រជាជនកម្ពុជា និងជាប្រធានគណបក្សប្រជាជនកម្ពុជាខេត្តសៀមរាប ​មានប្រសាសន៍ថា ថ្នាក់​ដឹកនាំ​គណបក្សខេត្តសៀមរាប ជាស្មារតីសាមគ្គីភាព ជាមួយបងប្អូន បំពេញការងារលើវិស័យ​សេដ្ឋកិច្ច​ក្រៅប្រព័ន្ធលើផ្នែកដឹកជញ្ជូន​ ក្នុងការបម្រើសេវាសាធារណៈ ប្រកប​ដោយ​ស្មារតី​សកម្ម​ព្យាយាម ។ឯកឧត្តម បន្តថា ក្រោយពីជ័យ​ជម្នះលើ​របបសាធារណៈរដ្ឋខ្មែរ នាថ្ងៃ១៧ មេសា ឆ្នាំ១៩៧៥ ប្រជា​ជនកម្ពុជា សង្ឃឹមថា​នឹងបានរស់នៅក្នុងសន្តិភាព ប៉ុន្តែផ្ទុយទៅវិញបនក្បត់ ប៉ុល ពត បាន​ប្លន់​យក​ទាំង​ស្រុង​នូវសមិទ្ធផល​នៃជ័យជម្នះនេះ​ហើយ​បានបង្កើតឡើង​របបកម្ពុជាប្រជាធិបតេយ្យ ដែលបាន​អនុវត្តនូវនយោបាយប្រល័យពូជសាសន៍​ដ៏​យង់ឃ្នង​ធ្វើឱ្យទឹកដីមាតុភូមិយើងទាំងមូល​ប្រែក្លាយ​ជា​វាលពិឃាដ យ៉ាងសាហាវ​ឃោរឃៅ​រក​ទីបំផុតគ្មាន។ ក្នុងរយៈពេលតែ៣ឆ្នាំ ៨ខែ និង២០ថ្ងៃប៉ុណ្ណោះ ដែលពួក ប៉ុល ពត បានបំផ្លាញរចនាសម្ព័ន្ធសង្គម​ជាតិ​ឱ្យរលាយខ្ទេចខ្ទីដល់ឫសគល់​ សិទ្ធិសេរីភាពដែលជាតម្លៃ ជាសារវន្តរបស់មនុស្សត្រូវ​បាន​លុបបំបាត់ទាំងស្រុង ​ប្រជាជនកម្ពុជា៣លាន ៣សែននាក់ត្រូវបានសម្លាប់យ៉ាងអយុត្តិធម៌។ នៅក្នុងកាលៈទេសៈដ៏សែនធ្ងន់ធ្ងរបំផុតនេះ បណ្តាកម្លាំងអ្នកសេ្នហាជាតិដ៏បរិសុទ្ធនៃគណបក្ស​ប្រជាជនកម្ពុជា​ ដែលនៅសេសសល់ពីការកាប់សម្លាប់បានផ្តាច់ខ្លួនចេញពីរបប ប៉ុល ពត ដើម្បី​ធ្វើការ​តស៊ូសង្រ្គោះជាតិពីរបបដ៏​យង់ឃ្នង​នេះ។ក្រោយពីកម្ពុជាបានយក​ជ័យជំនះលើ​របប​អាវខ្មៅ​នាថ្ងៃ៧មករាឆ្នាំ១៩៧៩កន្លងមក កម្ពុជា​ក៏​មានការអភិវឌ្ឍស្ទើរគ្រប់វិស័យ។ឯកឧត្តម ទៀ សីហា ចាត់ទុកថា នេះជាការបង្ហាញនូវការគាំទ្រចំពោះកម្មវិធីនយោបាយ​របស់​គណបក្សប្រជាជនកម្ពុជា ​យ៉ាងពិតប្រាកដ​ ជាកម្លាំងថ្មីមិនអាចខ្វះបាន ដើម្បីបង្រួបបង្រួម​កម្លាំង​មហាសាមគ្គីជាតិទាំងមូល​ រក្សាការពារនូវសុខសន្តិភាព សមតាមពាក្យស្លោក “ មានសន្តិភាព ទើបធានាការអភិវឌ្ឍប្រទេសជាតិ និងលទ្ធិប្រជាធិបតេយ្យ ” និងពាក្យស្លោកមួយឃ្លាទៀតថា “ លើកម្ពស់ស្មារតីស្នេហាជាតិ ពង្រឹងធ្លុងសាមគ្គីភាព ​ការពារឯករាជ្យជាតិ អធិបតេយ្យ និងបូរណភាពទឹកដីកម្ពុជា ” ។សូមជម្រាបថា សមាគមសម្ព័ន្ធសេដ្ឋកិច្ច និងរ៉ឺម៉ក ​សន្តិភាពប្រចាំខេត្តសៀមរាប មានឫសគល់​ចេញ​មកពីអង្គការចាត់តាំងមួយរបស់អតីតគណបក្សសង្គ្រោះជាតិ។ ក្រោយគណបក្សនេះត្រូវបានរំលាយ សមាជិកនៃអង្គការខាងលើ ​បានសុំចុះបញ្ជីជាផ្លូវការនៅក្រសួងមហាផ្ទៃ និងបានប្រកាស​អំពី​ការ​គាំទ្រ​របស់ខ្លួនចំពោះគណបក្សប្រជាជនកម្ពុជាវិញ៕

ប្រធានស្តីទីគណបក្ស​ហ៊្វុនស៊ិនប៉ិច ​ស្នើឲ្យមានការរូបរួមគ្នា​ដើម្បីលើក​កម្ពស់​គណបក្សឡើងវិញ

2022/01/07 04:16:12 am        515
Facebook Telegram Linkin
ភ្នំពេញ៖ នៅក្នុងពិធីចុះសំណេះសំណាលជាមួយសមាជិក-សមាជិកាគណបក្ស នៅខេត្តត្បូងឃ្មុំ និងខេត្តកំពង់ចាម កាលពីម្សិលមិញ ព្រះអង្គម្ចាស់នរោត្តម ចក្រាវុធ ព្រះប្រធានស្តីទីគណបក្សហ៊្វុនស៊ិនប៉ិច បានធ្វើការអំពាវនាវដល់សមាជិក សមាជិកា ព្រឹទ្ធាចារ្យគណបក្សទាំងអស់រួបរួមគ្នាសាមគ្គីគ្នា លើកកម្ពស់គណបក្សឲ្យមានភាពល្អប្រសើឡើងវិញ ដើម្បីឈានឆ្ពោះទៅរកការបោះឆ្នោតជ្រើសក្រុមប្រឹក្សាឃុំ-សង្កាត់ និងសកលនាឆ្នាំ២០២២ និង២០២៣ខាងមុខនេះ។ព្រះអង្គម្ចាស់នរោត្តម ចក្រាវុធ បានមានបន្ទូលថា បើស្រលាញ់ហ៊្វុនស៊ិនប៉ិច និង ចង់ឲ្យ​គណបក្ស​ដែល​ជា​កេរ្តិ៍មរតក​របស់​សម្តេចតា សម្តេចតាទួត ព្រះបរមរតនកោដ្ឋឲ្យមានភាពល្អប្រសើ ឡើងវិញ​គប្បីបញ្ឈប់ការឈ្លោះគ្នា ញុះញង់​ឲ្យមានការរើសអើង​គ្នាទៅវិញទៅមក ខណៈវប្បធម៌បែបនេះ បាន​កើត​ជាយូរណាស់មកហើយចំពោះគណបក្សមួយនេះ ហើយដោយសារតែការ​លាបពណ៌​គ្នានេះ​ហើយបានធ្វើឲ្យគណបក្សកាន់តែធ្លាក់ប្រជាប្រិយនោះ។ព្រះអង្គម្ចាស់ បានមានបន្ទូលថា ​តាំងពីដើមមកព្រះអង្គតែងតែឃើញ និង​ឮចំពោះការមិន​ចុះ​សម្រុង​គ្នា​រវាងថ្នាក់​ដឹកនាំ​គណបក្សជាច្រើនលើកច្រើនសារមកហើយ ​ប៉ុន្តែទោះជាយ៉ាងណា​ក៏ដោយព្រះ អង្គបានរំពឹងថា សមាជិក-សមាជិកាទាំងអស់​ នឹងចាប់ផ្តើមចាប់ដៃគ្នា សាមគ្នាឡើងវិញ​ដើម្បី​ភាព​រីកចំរើន របស់គណបក្ស ​និងឈានទៅការចូលរួមបោះឆ្នោតនាពេលខាងមុខនេះ។នៅក្នុងពិធីសំណេះសំណាលនោះដែរ ព្រះអង្គម្ចាស់នរោត្តម ចក្រាវុធ ក៏មានការតាំងចិត្ត និងមាន​ជំនឿជឿ​ជាក់ក្នុងការ​ ដឹកនាំរបស់ព្រះអង្គចំពោះ គណបក្សហ៊្វុនស៊ិនប៉ិច ឲ្យមានភាពល្អប្រសើ​ឡើងវិញ​ផងដែរ ​ខណៈនាពេលបច្ចុប្បន្នគណបក្សនេះ​ គណបក្សនេះពុំមានសំឡេងនៅក្នុងរដ្ឋសភា ដូច​ពីអតីតកាលក៏ដោយនោះ។ព្រះអង្គម្ចាស់ក៏ណែនាំដល់សហជីវិន សហជីវិនី របស់ព្រះអង្គឲ្យមានការខិតខំធ្វើការបំរើប្រជារាស្រ្ត និងប្រទេសជាតិបន្ថែមទៀត ​ក្នុងការរួមចំណែកជាមួយរាជរដ្ឋាភិបាលក្នុងការអភិវឌ្ឍប្រទេសជាតិ ឲ្យកាន់តែមានការរីកចំរើនបន្ថែមទៀតនោះ៕ អត្ថបទ៖ បានចក់

ឯកឧត្ដម លី ធុជ ចូលរួម​ប្រកាស​បញ្ចូល​សមាជិក​គណបក្សថ្មីចំនួន ២៥៣នាក់ នៅ​សង្កាត់ច្រកម្ទេស ក្រុងបាវិត

2022/01/07 06:37:09 am        480
Facebook Telegram Linkin
ស្វាយរៀង៖ ព្រឹកថ្ងៃទី០៧ ខែមករាឆ្នាំ២០២២ នាឱកាសអបអរសាទរខួបលើកទី៤៣ នៃទិវា៧មករា ក្នុងនាម លោកជំទាវកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តស្វាយរៀង ឯកឧត្ដម លី ធុជ សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងបាវិត បានអញ្ជើញប្រកាសបញ្ចូលសមាជិកគណបក្សថ្មីចំនួន២៥៣នាក់ នៅសង្កាត់ច្រកម្ទេសក្រុងបាវិត និងជួបសំណេះសំណាលជាមួយសមាជិកគណបក្សក្រុងគណបក្សសង្កាត់សាខាគណបក្សភូមិទាំង ១៥និងយុវជនដែលមានអ្នកចូលរួមសរុបចំនួន៣២៨នាក់ ។ពិធីប្រកាសនេះ មានការអញ្ជើញចូលរួមពីឯកឧត្ដម ស៊ុយ ជីហ៊ាង ប្រធានក្រុមការងារគណបក្សចុះមូលដ្ឋានសង្កាត់ច្រកម្ទេស , លោក លឹម សៀងហេង ប្រធានគណបក្សក្រុងអនុប្រធាន សមាជិកសមាជិកា ក្រុមការងារគណបក្សចុះមូលដ្ឋានសង្កាត់ច្រកម្ទេស ។ក្នុងឱកាសនោះ ឯកឧត្តម លី ធុជ បានលើកឡើងថា ថ្នាក់ដឹកនាំគណបក្សប្រជាជន សូមស្វាគមន៍យ៉ាងកក់ក្តៅចំពោះសមាជិកថ្មីទាំង២៥៣នាក់ ក៏ដូចជាសមាជិកគណបក្សដទៃដែលស្ម័គ្រចិត្តចូលរួមជីវភាពមហាគ្រួសារ ជាមួយគណបក្សប្រជាជនកម្ពុជា ដែលនេះពិតជាការសម្រេចចិត្តដ៏ត្រឹមត្រូវបំផុត ពីព្រោះ​គណក្សប្រជាជនកម្ពុជាបានរំដោះប្រជាជនរួចផុតពីរបបប្រល័យពូជសាសន៍ប៉ុលពត និង បាន បង្កើតជីវិតថ្មីជូនប្រជាពលរដ្ឋកម្ពុជា ។ឯកឧត្តម បានញ្ជាក់ន្ថែម ទិវា៧មករា មិនត្រឹមតែជាសមិទ្ធផលជាប្រវត្តិសាស្ត្ររបស់គណបក្សប្រជាជនកម្ពុជាតែមួយប៉ុណ្ណោះទេគឺជា សមិទ្ធផលរួមរបស់ប្រជាជនកម្ពុជា យើងទាំងអស់គ្នាក្នុងការផ្តល់នូវផ្ទះសន្តិភាពសិទ្ធិរស់រានមាន ជីវិតនិងការទទួលបាននូវការអភិវឌ្ឍគ្រប់ៗគ្នា ហើយស្មារតី៧មករានៅតែបន្តស្ថិតស្ថេរគង់វង្ស ក្នុងក្រអៅបេះដូងជនរួមជាតិកម្ពុជា ។គណបក្សប្រជាជនកម្ពុជាគឺជាស្នូលយ៉ាងរឹងមាំក្នុងការបង្រួបបង្រួមជាតិ នាំមកនូវសុខ​សន្តិភាព​យ៉ាង​ពេញ​លេញជូនជាតិនិងមាតុភូមិ​ព្រមទាំងធ្វើឱ្យប្រទេសជាតិ​មាន​កិត្យានុភាព​ឡើងវិញ​ទាំង​នៅ​ក្នុងតំបន់និងលើឆាកអន្តរជាតិ។ គោលបំណងរបស់គណបក្សប្រជាជនកម្ពុជាគឺដើម្បីបម្រើផលប្រយោជន៍ប្រជាពលរដ្ឋ ហើយ​បំណង​ប្រាថ្នា​របស់ប្រជាពលរដ្ឋ ដើម្បីទទួលបានជីវិតល្អប្រសើរគឺជាគោលដៅគណបក្សប្រជាជនកម្ពុជា ។ គណបក្សប្រជាជនកម្ពុជាជាគណបក្សនយោបាយចាស់ទុំជាងគេ មានធនធានមនុស្សគ្រប់គ្រាន់ មាន​រចនាសម្ព័ន្ធរឹងមាំគ្រប់លំដាប់ថ្នាក់ ​ជាពិសេសមានសម្តេចតេជោ ហ៊ុន សែន ជាប្រធាន​គណបក្សនិងជានាយករដ្ឋមន្ត្រី ​ដែលមានគតិបណ្ឌិតដ៏ឈ្លាសវៃប្រកបដោយភាពជឿជាក់ បាន​ធ្វើឲ្យប្រទេសជាតិ​មានសន្តិភាពពេញផ្ទៃប្រទេស ​និងបានធ្វើឲ្យប្រទេសកម្ពុជា មានការរីកចម្រើន និង​ការអភិវឌ្ឍលើគ្រប់វិស័យពីទីក្រុងរហូតដល់ទីជនបទ។ឯកឧត្តម លី ធុជ បានចាត់ទុកសមាជិកបក្ស​ដែល​ទើប​ប្រកាស​បញ្ចូល​ជា​សមាជិក​ថ្មី ​ក៏ដូចជា សមាជិក​បក្សប្រជាជនទូទាំង​សង្កាត់​ ទាំងមូល គឺជាកម្លាំង​សាមគ្គីយ៉ាងរឹងមាំ​សម្រាប់​គណបក្ស​ប្រជាជនកម្ពុជា ​ដែលមាន​សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធាន​គណបក្សប្រជាជន​កម្ពុជា ​ដើម្បីបន្តដឹកនាំប្រទេសជាតិឱ្យកាន់តែរីកចម្រើនថែមទៀត ​ក៏ដូចជា ធ្វើឱ្យ​ប្រទេសជាតិ​មានសុខសន្តិភាព ​ស្ថេរភាពសង្គម ​និងការអភិវឌ្ឍលើគ្រប់វិស័យ។ឯកឧត្តម បានណែនាំឲ្យសមាជិកគណបក្សទាំងអស់ត្រូវបន្តខិតខំអនុវត្តឱ្យបានត្រឹមត្រូវ តាម​កម្មវិធី​គោល​នយោបាយនិង​លក្ខន្តិកៈរបស់​គណបក្ស៕

សម្តេចតេជោ នាយករដ្ឋមន្ដ្រីកម្ពុជា អញ្ជើញទៅដល់សាធារណរដ្ឋសហភាពមីយ៉ាន់ម៉ា ប្រកបដោយសុវត្ថិភាព

2022/01/07 05:11:26 am        250
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានអញ្ជើញទៅដល់រដ្ឋធានីណៃពិដោរ នៃសាធារណរដ្ឋសហភាពមីយ៉ាន់ម៉ា ប្រកបដោយសុវត្តិភាព កាលពីវេលាម៉ោង ៩និង២៥នាទីព្រឹកម៉ោងនៅរដ្ឋធានីណៃពិដោរ ត្រូវនឹងម៉ោង៩និង៥៥នាទី ម៉ោងនៅព្រះរាជាណាចក្រកម្ពុជា នៅថ្ងៃទី៧មករា សម្រាប់ដំណើរបំពេញទស្សនកិច្ចការងាររយៈពេល២ថ្ងៃ ។វត្តមាននៃការអញ្ជើញដល់អាកាសយានដ្ឋានអន្តរជាតិណៃពិដោរ សម្តេចតេជោ និង​គណៈប្រតិភូជាន់ខ្ពស់ ត្រូវបានការធ្វើ​គារវកិច្ច​ស្វាគមន៍​យ៉ាង​ស្និទ្ធស្នាល​រ៉ាក់ទាក់បំផុតពីឯកឧត្តម Wunna Maung Lwin រដ្ឋមន្រ្តីការបរទេសមីយ៉ាន់ម៉ា ឯកឧត្តមអភិបាលរដ្ឋធានីណៃពិដោរ ឯកឧត្តម ឈូក ប៊ុណ្ណា ឯកអគ្គរាជទូត​វិសាមញ្ញ​និងពេញសមត្ថភាព​ព្រះរាជាណាចក្រកម្ពុជា ប្រចាំ​សាធារណរដ្ឋសហភាពមីយ៉ាន់ម៉ា ព្រមទាំងវត្តមាន ឯកឧត្តម លោកជំទាវ ជា​ឥស្សរជនជាន់​ខ្ពស់រដ្ឋបាលរដ្ឋ នៃសាធារណរដ្ឋសហភាពមីយ៉ាន់ម៉ា និងឥស្សរជនការទូត​របស់​ព្រះរាជាណា​ចក្រ​កម្ពុជាជាច្រើនរូប។នៅអាកាសយានដ្ឋានណៃពិដោរនោះ សម្តេចតេជោ ប្រមុខរាជរដ្ឋាភិបាលកម្ពុជា បានអញ្ជើញជា​អធិបតីដ៏ខ្ពង់ខ្ពស់ ក្នុងពិធីប្រគល-ទទួលអំណោយមនុស្សធម៌ សម្ភារៈបរិក្ខារវេជ្ជសាស្រ្ត ចំនួន៩មុខ ដែលជាអំណោយមនុស្សធម៌ដ៏ថ្លៃថ្លាបំផុតរបស់រាជរដ្ឋាភិបាល ​និងប្រជាជន នៃព្រះរាជា​ណា​ចក្រ​កម្ពុជា ជូនចំពោះរដ្ឋបាលរដ្ឋ និងប្រជាជន នៃសាធារណរដ្ឋសហភាពមីយ៉ាន់ម៉ា។អំណោយមនុស្សធម៌ទាំង៩មុខនោះរួមមាន៖ ១-ម៉ាស ចំនួន ៣លាន ២-ម៉ាស N95 ចំនួន ២០០ពាន់ ៣-វ៉ែនតាការពារ ចំនួន ១០០ពាន់ ៤-សំលៀកបំពាក់​សុវត្ថិភាព ចំនួន ៣០ពាន់ ៥-របាំងការពារមុខ ចំនួន ៣០ពាន់ ៦-ស្បែកជើងកវែង ចំនួន ៣ពាន់ ៧-ម៉ាស៊ីនជំនួយដល់ការដកដង្ហើម ចំនួន ៥០គ្រឿង ៨-ម៉ាស៊ីនតាមដានសញ្ញាជីវិត ចំនួន ៥០គ្រឿង និង៩-ម៉ាស៊ីនផលិតអ៊ុកស៊ីសែន​ស្វ័យប្រវត្តិ ចំនួន ៥០គ្រឿង។ ពិធីប្រគល-ទទួលអំណោយមនុស្សធម៌ សម្ភារៈបរិក្ខារវេជ្ជសាស្រ្ត ចំនួន៩មុខ ដែលជាអំណោយ​មនុស្ស​ធម៌​ដ៏ថ្លៃថ្លាបំផុត របស់រាជរដ្ឋាភិបាល ​និងប្រជាជន ​នៃព្រះរាជាណាចក្រកម្ពុជា ជូន​ចំពោះរដ្ឋបាលរដ្ឋ និងប្រជាជននៃសាធារណរដ្ឋសហភាពមីយ៉ាន់ម៉ា ត្រូវបាន​ប្រារព្ធ​ធ្វើឡើងរវាង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាមួយ​និងឯកឧត្តម Wunna Maung Lwin រដ្ឋមន្រ្តីការបរទេសមីយ៉ាន់ម៉ា។ គួរបញ្ជាក់ដែរថា៖ រាជរដ្ឋាភិបាលកម្ពុជា ​បានផ្តល់ជំនួយមនុស្សធម៌ ក្នុងការប្រយុទ្ធប្រឆាំង​នឹង​ជំងឺកូវីដ-១៩ ជូនចំពោះរដ្ឋាភិបាល និងប្រជាជននៃសាធារណរដ្ឋសហភាពមីយ៉ាន់ម៉ាចំនួន ២លើក​រួចមក​ហើយ ។តាមកម្មវិធីដែលបានគ្រោងទុក សំរាប់ដំណើរបំពេញទស្សនកិច្ចការងារនេះសម្តេចតេជោ នឹងអញ្ជើញជំនួបពិភាក្សាចង្អៀត និងបើកកិច្ចប្រជុំកំពូលទ្វេភាគី ជាមួយឯកឧត្តម មីន អ៊ុងឡាំង (Min Aung Hlaing) ប្រធានក្រុមប្រឹក្សារដ្ឋបាលរដ្ឋ ​នៃសាធារណរដ្ឋសហភាពមីយ៉ាន់ម៉ា នា​វេលារសៀលថ្ងៃទី៧មករា ​នៅឯទីស្តីការក្រុមប្រឹក្សារដ្ឋបាលរដ្ឋ ក្នុងរដ្ឋធានីណៃពិដោរ នៃសាធារណរដ្ឋសហភាពមីយ៉ាន់ម៉ា។ ចំពោះព័ត៌មានពិស្តារ នៃជំនួបកំពូលរវាងសម្តេចតេជោនាយករដ្ឋមន្រ្តី ជាមួយឯកឧត្តម មីន អ៊ុងឡាំង (Min Aung Hlaing) ប្រធានក្រុមប្រឹក្សារដ្ឋបាលរដ្ឋ នៃសាធារណរដ្ឋសហភាព​មីយ៉ាន់ម៉ានោះ ទូរទស្សន៍BTVនឹងជំរាបជូន នៅក្រោយបញ្ចប់ជំនួបកំពូលជាបន្តបន្ទាប់ទៀត៕

សម្តេចតេជោ៖ កម្ពុជាក្លាយជាប្រទេសគ្មាន​សេដ្ឋកិច្ច​បង្ហូរឈាមគ្នា​មក​ជា​ប្រទេស​ប្រជាធិបតេយ្យ​និង​អភិវឌ្ឍន៍

2022/01/07 09:48:03 am        1111
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី បានថ្លែងថា ប្រទេសកម្ពុជាដែលពីមុនជាវាលពិឃាដ នៃរបបប្រល័យពូជសាសន៍ជាប្រទេសក្រីក្រ និងជាប្រទេសអន់ថយបំផុតផ្នែកសេដ្ឋកិច្ច តែនាពេលនេះ បានក្លាយទៅជាប្រទេសប្រកាន់ខ្ជាប់នូវគោលការណ៍ប្រជាធិបតេយ្យ នីតិរដ្ឋ ឯករាជ្យ បូរណភាពទឹកដី មានសុខសន្តិភាព និងការអភិវឌ្ឍជាបន្តបន្ទាប់។ក្នុងសារលិខិតក្នុងឱកាសរំឮកខួបទី៤៣ឆ្នាំ នៃទិវាជ័យជម្នះ៧មករា (៧មករា ១៩៧៩-៧មករា២០២២) សម្តេចតេជោ ហ៊ុន សែន បានលើកឡើងថា ទិវាជ័យជម្នះជាប្រវត្តិសាស្រ្តរបស់​ប្រជាជនកម្ពុជា ​លើរបបប្រឡ័យពូជសាសន៍ ប៉ុល ពត ដែលបានសង្រ្គោះជាតិឲ្យរស់រានមាន​ជីវិត​ឡើងវិញ​ទាន់ពេលវេលា ​បញ្ចប់​សម័យកាលដ៏ខ្មៅងងិតបំផុត ហើយបើកឡើងវិញ​នូវ​សករាជ​ថ្មី​របស់កម្ពុជា​ គឺឯករាជ្យ សេរីភាព ប្រជាធិបតេយ្យ ​និងវឌ្ឍនភាពសង្គមជាដើម។ក្នុងសារលិខិតនេះសម្តេចតេជោ ​នាយករដ្ឋមន្រ្តី បានលើកឡើងទៀតថា ក្នុងរយៈពេល ៤៣ឆ្នាំមកនេះ​ ផ្តើមពីជ័យជម្នះ៧មករា កម្ពុជាបានធ្វើដំណើរលើផ្លូវមួយប្រកបដោយភាពបត់បែន និងគ្រោះថ្នាក់ជាទីបំផុត ​តែជាផ្លូវដ៏ត្រឹមត្រូវដែលបានធានាដល់ការស្ថិតស្ថេរគង់វង្ស និង​រីកចម្រើន​នៃមាតុភូមិកម្ពុជា។ ​ដោយក្តាប់ជាប់មេរៀនពិសោធន៍នៅក្នុងប្រវត្តិសាស្រ្តរបស់ខ្លួន ប្រជាជាតិយើង​បានជ្រើសរើស​យករបបនយោបាយ ​និងសង្គមរបស់ខ្លួនប្រកបដោយភាពឯករាជ្យ ដែលស្របទៅ​នឹង​លក្ខណៈ​ប្រវត្តិសាស្រ្ត ​ស្ថានភាពសង្គមសេដ្ឋកិច្ច វប្បធម៌កម្ពុជា ព្រមទាំងការវិវត្ត​នៃ​សភាពការណ៍​ក្នុងប្រទេស ​និងក្រៅប្រទេស​ ដោយ​មិនរាថយចំពោះឧបសគ្គ ​និងការសាកល្បងគ្រប់បែបយ៉ាង និង​«មិន​ឱន​ក្បាល​ចំពោះការ​គៀប​សង្កត់​គំរាមកំហែង​នានា»។ លើមូលដ្ឋាននេះ ​បាន​ធ្វើ​ឲ្យ​មាតុភូមិ​យើង​អាច​ងើប​ឈរឡើងវិញ ​និងឈានទៅមុខជាជំហានៗ ឆ្លងផុត​ដំណាក់​កាលដែលលំបាកបំផុត ​មកកាន់ដំណាក់កាលពង្រឹងពង្រីកខ្លួន និងសម្រេច​បាន​ការ​ផ្លាស់ប្តូរ​ដ៏ធំធេងជាប្រវត្តិសាស្រ្តប្រកបដោយមោទនភាពជាដើមនោះ។សម្តេចតេជោ នាយករដ្ឋមន្រ្តីបានសង្កត់ធ្ងន់ថា​«កម្ពុជាដែលពីមុនជាវាលពិឃាដ​នៃរបប​ប្រល័យ​ពូជសាសន៍, ជាសមរភូមិ​នៃសង្រ្គាម​ដ៏រ៉ាំរ៉ៃ, ជាកន្លែងដណ្តើមប្រជែង​រវាង​មនោគមវិជ្ជា​នយោបាយ​នានា, ជាប្រទេសក្រីក្រ ​និងអន់ថយ​បំផុតផ្នែកសេដ្ឋកិច្ច ឥឡូវនេះ​បាន​ក្លាយ​ជាព្រះរាជាណាចក្រ​ដែល​ប្រកាន់ខ្ជាប់នូវ ​គោលការណ៍ប្រជាធិបតេយ្យ និងនីរិរដ្ឋ, ជាប្រទេសមានសន្តិភាព ឯកភាពជាតិ និងឯកភាពទឹកដីទាំងស្រុង​ មានសេដ្ឋកិច្ចកំពុង​លូតលាស់ ដោយបានចេញផុតពី​ប្រទេស​មាន​ចំណូលទាប ​ក្លាយជាប្រទេសមានចំណូលមធ្យមកម្រិតទាប ហើយជីវភាពប្រជាជន​មាន​ភាព​កាន់​តែប្រសើរឡើង។ កម្ពុជា​បាន​ក្រោក​ឈរ​ស្មើរមុខ​ស្មើរមាត់​ជាមួយបណ្តាប្រទេស បានចូលរួម​ដោយ​ស្មើរភាព ​និងស្មើរសិទ្ធិក្នុងរាល់កិច្ចការអន្តរជាតិជាដើម»។ទាំងអស់នេះ គឺជាសមិទ្ធផល​ជា​ប្រវត្តិសាស្រ្ត​ដ៏ធំធេងថ្លៃថ្លាបំផុត​របស់ប្រជាជនកម្ពុជាគ្រប់រូបនៃ ​គ្រប់ជនជាតិ គ្រប់ជំនឿសាសនា និងគ្រប់និន្នាការនយោបាយទាំងអស់ផងដែរ។យ៉ាងណាក៏ដោយនៅក្នុងសារលិខិតនេះសម្តេចតេជោ ហ៊ុន សែន នាយករដ្ឋមន្រ្តីក៏បានបួងសួង សូមឲ្យដួងវិញ្ញាណក្ខ័ន្ធរបស់ជនរួមជាតិខ្មែររាប់លាននាក់ ដែលត្រូវបានសម្លាប់យ៉ាងអយុត្តិធម៌ និងអាណោចអាធម្មបំផុតក្នុងរបបប៉ុល ពត បានទៅកាន់សុគតិភពជារៀងដរាបផងដែរ។ មួយវិញទៀតសម្តេច តេជោ នាយករដ្ឋមន្រ្តីក៏បានអំពាវនាវដល់បងប្អូនជនរួមជាតិទាំងអស់ បន្ត​រូបរួម​សាមគ្គីគ្នាជាធ្លុងមួយក្រោម ដំបូលរដ្ឋធម្មនុញ្ញ និងម្លប់ដ៏ត្រជាក់​នៃ​អង្គព្រះមហាក្សត្រ​ជា​ទីគោរពសក្ការៈដ៏ខ្ពង់ខ្ពស់បំផុត ដើម្បីសម្រេចបានសមិទ្ធផលថ្មីៗទៀតក្នុងការកសាង និង​ការពារមាតុភូមិ​ជាទីសេ្នហានៃយើង ​ឆ្ពោះទៅរកអនាគតដ៏រុងរឿងដែលពុំមានការកើត​ឡើង​ជាថ្មីទៀត ​នូវអំពើប្រល័យពូជសាសន៍ ​សង្រ្គាម​ និងការបែកបាក់ផ្ទៃក្នុងជាតិដូចពេលមុនៗនោះ៕អត្ថបទ៖ បាន ចក់

សាលា WestPointចេញមកបកស្រាយហើយថា សាលាខ្លួនគ្មានសញ្ញាបត្រកិត្តិយស​ដូចការ​ចោទ​ប្រកាន់​នោះទេ

2022/01/07 08:10:05 am        2033
Facebook Telegram Linkin
ភ្នំពេញ៖ ទីបំផុតមន្ត្រីជំនាញផ្នែកកិច្ចការសាធារណផ្នែកទំនាក់ទំនងប្រព័ន្ធផ្សព្វផ្សាយ នៃបណ្ឌិតសភាយោធា West Point លោក Francis J DeMaron Jr. បានបញ្ជាក់ថា តម្លៃសញ្ញាបត្រនៅបណ្ឌិតសភាយោធាអាមេរិក West Point គ្មានការបែងចែក ឬភាពខុសគ្នារវាងសិស្សក្នុងស្រុក និងសិស្សមកពីបរទេសនោះទេ ហើយលោកសង្ឃឹមថា ការបញ្ជាក់លើកនេះនឹងបញ្ចប់ភាពចម្រូងចម្រាស់នៃតម្លៃសញ្ញាបត្រសាលារបស់លោកផងដែរ។យោងតាមការចុះរបស់សារព័ត៌មាន EAC News នាព្រឹកថ្ងៃទី៧ ខែមករានេះ បានឲ្យដឹងថា ក្នុង​សារអេឡិចត្រូនិកអ៊ីម៉ែលរបស់លោក Francis J DeMaron Jr. បានបញ្ជាក់ថា៖ «អ្នកគ្រប់គ្នាដែល​បាន​បញ្ចប់ការសិក្សាពីបណ្ឌិតសភាយោធាសហរដ្ឋអាមេរិកនឹងទទួលបានបរិញ្ញាបត្រផ្នែកវិទ្យាសាស្ត្រគឺគ្មានភាពខុសគ្នា ឬការតម្រូវផ្សេងសម្រាប់បេក្ខជនអន្តរជាតិនោះទេ។ ខ្ញុំសង្ឃឹមថា នេះអាចជួយបញ្ជាក់ពីភាពចម្រូងចម្រាសបាន» ។ការបញ្ជាក់របស់បណ្ឌិតសភាយោធាអាមេរិក នៅពេលនេះអាចចាត់ទុកជាការបញ្ចប់នូវការ​លើក​ឡើង​ដោយ​គ្មានអំណះអំណាងរបស់លោក សម រង្ស៊ី កាលពីកន្លងទៅដែលបានវាយ​ប្រហារមកលើ​តម្លៃសញ្ញាបត្ររបស់លោក ហ៊ុន ម៉ាណែត ថាជាសញ្ញាបត្រកម្រិត២ ឬសញ្ញាបត្រយោគយល់។ប្រភព បានបន្តថា លោក ហ៊ុន ម៉ាណែត អាយុ៤៤ឆ្នាំ គឺជាកូនប្រុសច្បងរបស់នាយករដ្ឋមន្ត្រីកម្ពុជា សម្ដេចតេជោ ហ៊ុន សែន។ លោកជាជនជាតិខ្មែរដំបូងគេដែលបញ្ចប់ការសិក្សានៅបណ្ឌិតយោធា West Point របស់អាមេរិក ហើយលោកក៏បញ្ចប់ការសិក្សាថ្នាក់បរិញ្ញាបត្រជាន់ខ្ពស់​ផ្នែក​សេដ្ឋកិច្ច​នៅ​សាកលវិទ្យាល័យញ៉ូវយ៉ក និងបណ្ឌិតសេដ្ឋកិច្ចនៃសាកលវិទ្យាល័យប្រ៊ីសស្ដូល​នៃ​ចក្រភព​អង់គ្លេស​ផងដែរ។កាលពីថ្ងៃទី២៥ ខែធ្នូ កន្លងទៅលោក សម រង្ស៊ី បានផ្ដល់បទសម្ភាសន៍ជាមួយសារព័ត៌មានបរទេស​ដែល​ផ្សាយជាភាសាខ្មែរដោយបានលើកឡើងថា សញ្ញាបត្រដែលលោក ហ៊ុន ម៉ាណែត ទទួល​បាន​ទាំងពីសាលាបណ្ឌិតយោធា West Point​ និងសាកលវិទ្យាល័យញូវយ៉ក និងសញ្ញាបត្រពីសាកលវិទ្យាល័យប្រ៊ីសស្ដូល នៅចក្រភពអង់គ្លេសគឺជាសញ្ញបត្រប្រភេទ២ ឬសញ្ញាបត្រយោគយល់។បន្ទាប់មកដើម្បីការពារពីភាពត្រឹមត្រូវនៃសញ្ញាបត្រខ្លួន លោក ហ៊ុន ម៉ាណែត បានប្រកាសហៅលោក សម រង្ស៊ី ភ្នាល់គ្នាដាក់«ជីវិតនយោបាយ» ប្រសិនជា សម រង្ស៊ី អាចរកភស្ភុតាងបញ្ជាក់ថាលោកទទួលបានសញ្ញាបត្រប្រភេទ២ ឬសញ្ញាបត្រយោគយល់ដូចដែល សម រង្ស៊ី អះអាងមែន។ ទោះជាយ៉ាងណាក្រោយរង់ចាំពីការភ្នាល់២ថ្ងៃដោយគ្មានការឆ្លើយតប លោក ហ៊ុន ម៉ាណែត បាន​ដាក់បន្ថែមមួយទៀតដោយស្នើឱ្យលោក សម រង្ស៊ី ​ឈប់ធ្វើនយោបាយទៅ ព្រោះលោក សម រង្ស៊ី គ្មានភាពក្លាហានក្នុងការការពារអំណះអំណាងរបស់ខ្លួនដែលបង្ហាញពីភាពមិនមែនជាគំរូដល់ពលរដ្ឋ។កាលពីម្សិលមិញ អ្នកនាំពាក្យស្ថានទូតអាមេរិកប្រចាំកម្ពុជាលោក Chad Roedemeier បាន​ឆ្លើយតបថា បញ្ហាសញ្ញាបត្រលោក ហ៊ុន ម៉ាណែត ត្រូវបានសាលាទាហានអាមេរិក West Point បកស្រាយរួចហើយកាលពីឆ្នាំ២០១៩ ដែលមានន័យថាស្ដង់ដាសញ្ញាបត្ររបស់​សាលាអាមេរិក​មិនមានការបែងចែកស្ដង់ដារកម្រិត២ ឬសញ្ញាបត្រយោគយល់ដូចដែលលោក សម រង្ស៊ី លើកឡើងនោះទេ។ការលេចឡើងបែបនេះ គឺបន្ទាប់ពីសម្ដេចតេជោ ហ៊ុន សែន បានដល់ឯកអគ្គរដ្ឋទូតអាមេរិក​ប្រចាំ​កម្ពុជា​លោក Patrick Murphy ឱ្យជួយបកស្រាយករណីដែលមានការលើកឡើងថា​សញ្ញាបត្រ​ដែល​និស្សិតកម្ពុជាទទួលបានពីអាមេរិកគឺជាសញ្ញាបត្រកម្រិត២ ឬជាសញ្ញាបត្រយោគយល់ ដោយថា​ដើម្បី​ការពារកិត្តិយសការអប់រំនៅក្នុងសហរដ្ឋអាមេរិក៕អត្ថបទបាន ចក់

សម្តេចតេជោ អញ្ជើញចាកចេញ​ទៅកាន់ប្រទេសមីយ៉ាន់ម៉ាហើយ ដើម្បី​សម្របសម្រួល​បញ្ឈប់​ហិង្សា

2022/01/07 01:25:37 am        504
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឋានៈជាប្រធានអាស៊ានបានអញ្ជើញចាកចេញពីអាកាសយានដ្ឋានអន្តរជាតិភ្នំពេញហើយ នៅព្រឹកថ្ងៃទី៧ខែមករានេះ ដើម្បីទៅចូលរួមជួយសម្របសម្រួល ផ្សះផ្សាបញ្ឈប់ហិង្សាដែលបាននិងកំពុងកើតមានជារៀងរាល់ថ្ងៃនៅសាធារណរដ្ឋសហភាពមីយ៉ាន់ម៉ា។ដំណើរអញ្ជើញទៅកាន់មីយ៉ាន់ម៉ានេះ គឺតបតាមការអញ្ជើញរបស់ ឯកឧត្តម នាយឧត្តមសេនីយ៍ជាន់ខ្ពស់ មីន អោង ឡាំង ប្រធាន ក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា ។វត្តមានរបស់សម្តេច២ថ្ងៃ ទៅកាន់មីយ៉ាន់ម៉ាពីថ្ងៃទី០៧ ដល់ថ្ងៃទី០៨ ខែមករា អមដំណើរដោយ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមន្ដ្រីជាន់ខ្ពស់នៃរាជរដ្ឋា ភិបាលកម្ពុជាមួយចំនួនទៀត។ក្នុងឱកាសនៃដំណើរទស្សនកិច្ចនៅមីយ៉ាន់ម៉ានេះ សម្តេចតេជោនាយករដ្ឋមន្ត្រីនឹងមាន ជំនួបទ្វេភាគីជាមួយ ឯកឧត្តម នាយឧត្តមសេនីយ៍ជាន់ខ្ពស់ មីន អោង ឡាំង ដើម្បីពិភាក្សា និងផ្លាស់ប្ដូរ ទស្សនៈអំពីកិច្ចសហប្រតិបត្តិការទ្វេភាគី និងពហុភាគី និងការវិវត្តថ្មីៗនៅក្នុងអាស៊ាន។គួរបញ្ជាក់ថា៖ ក្នុងឋានៈជាប្រធានអាស៊ានទៅកាន់មីយ៉ាន់ម៉ានេះ សម្តេចធ្លាប់មាន ប្រសាសន៍​ហើយថា៖ សភាពការណ៍នៅមីយ៉ាន់ម៉ាមិនសាមញ្ញទេ ដូច្នេះសម្តេចត្រូវតែធ្វើដំណើរទៅកាន់​ប្រទេស​មីយ៉ាន់ម៉ា ហើយថ្មីៗនេះ សម្តេចក៏បញ្ជាក់អះអាងថា៖ ការដែលសម្តេចទៅចូលរួមជួយ​សម្របសម្រួល ផ្សះផ្សាមីយ៉ាន់ម៉ានេះ គឺមិនឃ្លាតឆ្ងាយ ​ពីកុងសុងស៊ីស៥ ចំណុច ដែលអាស៊ាន​បានឯកភាពគ្នានៅហ្សាការតាកាលពីខែមេសាឆ្នាំ២០២១នោះទេ ។កុងសុងស៊ីស៥ចំណុចនោះចំណុចទី១គឺការអត់ធ្មត់ បញ្ឈប់ហិង្សា។សម្ដេចបានមានប្រសាសន៍ថា៖ អ្នកវិភាគខ្លះបានលើកឡើងថាតើការទៅមីយ៉ាន់ម៉ានេះ​ជា​ការទៅ​ដើម្បី​ដោះស្រាយបញ្ហាដែលជាពរជ័យ ឬជាបណ្ដាសា ? ហើយខ្លះទៀតថា៖ប្រធាន​អាស៊ាន​មានការ​ដោះស្រាយគ្រប់រឿងទាំងអស់ជំនួសឲ្យប្រមុខរដ្ឋ ប្រមុខរដ្ឋាភិបាលប្រទេសនានាទាំង១០ ។ប៉ុន្តែទោះជាយ៉ាងណាសម្ដេចថា ​សម្ដេចធ្លាប់និយាយហើយថា ​សុំកុំទុក ​ចិត្តលើប្រធានអាស៊ានពេក តែកុំអាល​បន្ទោសប្រធានអាស៊ានអី ​! គឺរង់ចាំមើល សិនទៅ។សម្តេចបន្តថា ៖ការដែលសម្ដេចទៅនេះ អត់ មានឃ្លាតឆ្ងាយពីកុងសង់ស៊ីស៥ចំណុចដែល​បាន​ឯកភាពគ្នា​នៅហ្សាការតា កាលពីខែមេសាឆ្នាំ ២០២១នោះទេ។ប៉ុន្តែសម្ដេចមិនដាក់​លក្ខខណ្ឌ​ទុកជាមុនក្នុងដំណើររបស់សម្ដេចទៅនោះឡើយ ។ការដែលសម្តេចទៅនេះ គឺជាការជជែក​ក្នុង​កុង​សង់ស៊ីស ៥ចំណុចនេះឯង ។សម្ដេចក៏បានចោទសួរទៅប្រជាជនមីយ៉ាន់ម៉ាថា៖ អ៊ីចឹងទេបងប្អូនប្រជាពលរដ្ឋនៅមីយ៉ាន់ម៉ា តើ​អ្នក​ចង់​ឲ្យប្រទេសធ្លាក់ចូលទៅក្នុងសង្គ្រាមស៊ីវិលពិតប្រាកដ ​ឬក៏ចង់ដោះស្រាយ? ការ​ដោះស្រាយ​នេះ​គឺតួនាទីត្រូវបានផ្ដល់មកឱ្យបណ្ដាប្រទេសអាស៊ាន ​ហើយអាស៊ានបាន ឯកភាពគ្នារាប់ទាំង​មីយ៉ាន់ម៉ា​ខ្លួនឯង​ ក៏បានព្រមព្រៀងលើកុងសង់ស៊ីស៥ចំណុចនេះហើយដែរ ប៉ុន្តែ​មិនទាន់​បានអនុវត្ត។ប្រទេសនានានៅក្រៅតំបន់ក៏មានការព្រមព្រៀងក្នុងការផ្ដល់តួនាទីនេះសម្រាប់អាស៊ាន រាប់ទាំង​ការផ្ដល់​ជំនួយ​មនុស្សធម៌ផងដែរ។អ៊ីចឹងទេ ​ការដែលសម្ដេចទៅនេះ គោលបំណងគឺគ្មានប្រយោជន៍​អ្វីទេ ដោយសម្តេចថា​ប្រទេស​កម្ពុជា​តូច​ ជាងប្រទេសមីយ៉ាន់ម៉ាច្រើនដង ​ហើយប្រជាជនតិចជាងមីយ៉ាន់ម៉ាច្រើនដង តែ​យើងចង់​ជួយសម្រួល​ សភាពការណ៍ទាំងឡាយដើម្បីបញ្ឈប់ហិង្សានៅក្នុងប្រទេសមីយ៉ាន់ម៉ា៕អត្ថបទ៖ មុត សុទ្ធ

អាជ្ញាធរខេត្ដប្រកាសផ្ដល់វ៉ាក់សាំងប្រឆាំងជំងឺកូវីដ១៩ ប្រភេទអាស្ដ្រាហ្សេនីកា “ដូសជម្រុញ”ជូនពលរដ្ឋនៅសៀមរាបនាសប្ដាហ៍ក្រោយ

2022/01/06 03:35:17 pm        584
Facebook Telegram Linkin
សៀមរាប៖ រដ្ឋបាលខេត្ដសៀមរាប បានឱ្យដឹងថា អាជ្ញាធរនឹងធ្វើយុទ្ធការចាក់វ៉ាក់សាំងប្រឆាំងជំងឺកូវីដ១៩ លើកទី៣ “ដូសជម្រុញ” ជូនប្រជាពលរដ្ឋនៅក្នុងខេត្ដនេះនៅសប្ដាហ៍ក្រោយ គឺចាប់ពីថ្ងៃទី ១០ខែមករា ឆ្នាំ២០២២ ខាងមុខនេះ។លោក សុខ ថុល នាយករដ្ឋបាលសាលាខេត្ដសៀមរាប បានឱ្យដឹងនៅថ្ងៃទី៥ខែមករានេះថា ប្រជាពលរដ្ឋដែលទទួលបានវ៉ាក់សាំងប្រឆាំងជំងឺកូវីដ១៩លើកទី៣ ឬហៅថា ដូសជម្រុញនេះ គឺពួកគាត់ដែលមានអាយុ១៨ឆ្នាំ ឡើងទៅ ដែលបានចាក់វ៉ាក់សាំងដូសទី១ និងទី២រួចរាល់​កាល​ខែសីហា​ឆ្នាំ២០២១កន្លងមក ។លោក​បានបញ្ជាក់ថា ​ជាប្រភេទវ៉ាក់សាំង ដែលចាក់ជាដូសជម្រុញនោះ​គឺជាប្រភេទវ៉ាក់សាំង​ប្រភេទ​អស្ដ្រាហ្សេនីកា។ លោក បន្ដថា យុទ្ធនាការវ៉ាក់សាំងដូសជម្រុញនេះ ធ្វើឡើងនៅទូទំាងបណ្ដា​ស្រុកក្រុងទាំង១២​ នៃខេត្ដសៀមរាប ​ពោលធ្វើឡើងថា ទីតាំងដែលបានចាក់វ៉ាក់សាំង​ដូសទី១ និង​ដូសទី២កន្លងមក។លោកបន្ដថា ប្រជាពលរដ្ឋដែលត្រូវបានវ៉ាក់សាំងបង្ការជំងឺកូវីដ១៩ លើកទី៣​មាន​ប្រមាណ​៥០ម៉ឺនាក់ ។លោក បន្ថែមថា ដោយឡែក​ប្រជាពលរដ្ឋ​ដែល​មិន​ទាន់​ចាក់វ៉ាក់​សាំងការពារ​ជំងឺកូវីដ១៩ ទាំងដូសទី១ និងដូសទី២ ​អាចទៅទទួលវ៉ាក់សាំងនៅមន្ទីរពេទ្យបង្អែកខេត្ដសៀមរាប ៕

ព្រឹទ្ធសភាជាតិអនុម័តសេចក្តីព្រាងច្បាប់ ស្តីពីកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ

2022/01/06 03:25:43 pm        345
Facebook Telegram Linkin
ភ្នំពេញ៖ បន្ទាប់ពីបើកកិច្ចប្រជុំពិនិត្យពិភាក្សា អស់រយៈពេលមួយព្រឹកធំ ព្រឹទ្ធសភាជាតិ បានធ្វើការសម្រេចអនុម័ត នូវសេចក្តីព្រាងច្បាប់ ស្តីពីកិច្ចព្រមព្រៀងពាណិជ្ជកម្មសេរី រវាងកម្ពុជា-កូរ៉េ ដោយព្រឹទ្ធសភាជាតិ បានចាត់ទុកថា នឹងធ្វើឲ្យមានរីកចម្រើននៃវិស័យសេដ្ឋកិច្ច និងបម្រើផលប្រយោជន៍របស់ប្រជាពលរដ្ឋ ។ក្រោយសម័យប្រជុំលើកទី៨ព្រឹទ្ធសភា នីតិកាលទី៤ នៅថ្ងៃទី៦ ខែមករា ឆ្នាំ២០២២ ដឹក នាំប្រជុំ​ដោយ​សម្ដេចវិបុលសេនាភក្តី សាយ ឈុំ ប្រធានព្រឹទ្ធសភាជាតិ ឯកឧត្តម ម៉ម ប៊ុននាង មាន​ប្រសាសន៍ថា ​សេចក្តីព្រាងច្បាប់នេះ បានរៀបចំធ្វើឡើង ដើម្បីសម្រេចបាននូវការធ្វើ​សេរីភាវូបនីយកម្ម​ពាណិជ្ជកម្មរវាងគូភាគី​ ដោយអនុលោមតាមច្បាប់ពាណិជ្ជកម្មអន្តរជាតិ ជំរុញ​ការ​ប្រកួតប្រជែង​រវាងគូភាគី ​ជាពិសេសការប្រកួតប្រជែង ​ដែលពាក់ព័ន្ធនឹងទំនាក់ទំនងសេដ្ឋកិច្ច លើក​កម្ពស់តម្លាភាព ​នៃវិធានការពាណិជ្ជកម្ម ​និងវិនិយោគរបស់គូភាគី តាមរយៈការចែករំលែក​នូវ​ឧត្តមានុវត្តន៍និយ័តកម្ម ។ឯកឧត្តមបន្តថា សេចក្តីព្រាងច្បាប់នេះ នឹងជំរុញនវានុវត្តន៍ ក្នុងវិស័យដែលមាន​ផល​ប្រយោជន៍​ទៅវិញទៅមក​ បង្កើតក្របខ័ណ្ឌសម្រាប់ជំរុញបន្ថែម ​នូវកិច្ចសហប្រតិបត្តិការ សំដៅពង្រីក និង​លើកកម្ពស់សារៈប្រយោជន៍ ​នៃកិច្ចព្រមព្រៀងនេះ ​និងជំរុញការនាំចេញ និងបង្កើនទំហំ​ផលិត​កម្មទំនិញ ​ព្រមទាំងជំរុញកំណើនសេដ្ឋកិច្ចជាតិ និងលើកកម្ពស់ជីវភាពរស់នៅរបស់ប្រជាពលរដ្ឋ ។ឯកឧត្តម ម៉ម ប៊ុននាង បានបន្ថែមថា ​សម័យប្រជុំលើកទី៨នៃព្រឹទ្ធសភានេះ ​ក៏បាន​ធ្វើការ​អនុម័ត ទៅលើ​របៀបវារៈចំនួន ៥ទៀត ​មានពិនិត្យ ​និងឱ្យយោបល់លើសេចក្តីព្រាងច្បាប់ ស្តីពីវិសោធនកម្ម​ច្បាប់ ​ស្តីពីវិធានពាណិជ្ជកម្ម ​និងបញ្ជីពាណិជ្ជកម្ម ​និងពិនិត្យ ​និងឱ្យយោបល់លើសេចក្តីព្រាងច្បាប់ ស្តីពីវិសោធនកម្មច្បាប់​ ស្តីពីសហគ្រាសពាណិជ្ជកម្មជាដើម ៕

បណ្ដាញសង្គម

ព័ត៌មានថ្មីៗ

មន្រ្តីលោក Trump៖ ការឈប់លើកលែងពន្ធលើកញ្ចប់ទំនិញតម្លៃទាបរបស់អាមេរិក ជាវិធានការអចិន្ត្រៃយ៍
08/29/2025 08:08 AM
Facebook Telegram Linkin
ក្រុមមេដឹកនាំអឺរ៉ុប ខឹងសម្បារខ្លាំងក្រោយរុស្ស៊ីវាយប្រហារសម្លាប់មនុស្ស២៣នាក់ និងខូចខាតទីស្នាក់ការរបស់សហភាពអឺរ៉ុប
08/29/2025 08:08 AM
Facebook Telegram Linkin
នាយឧត្តមសេនីយ៍ ម៉ឹង សំផន ផ្តល់សម្ភារៈពេទ្យដល់មន្ទីរពេទ្យយោធាសម្តេចតេជោស្រអែមនៅខេត្តព្រះវិហារ
08/29/2025 08:08 AM
Facebook Telegram Linkin
អ្នកការទូត៖ អង់គ្លេស បារាំង និងអាល្លឺម៉ង់ នឹងផ្តួចផ្តើមដំណើរការដាក់ទណ្ឌកម្មរបស់ UN លើអ៊ីរ៉ង់
08/28/2025 08:08 PM
Facebook Telegram Linkin
EU និងអង់គ្លេសកោះអញ្ជើញបេសកជនរុស្ស៊ី ក្រោយអគារបេសកកម្មរងខូចខាត អំឡុងការវាយប្រហារលើក្រុងគីវ
08/28/2025 08:08 PM
Facebook Telegram Linkin
ប្រធានាធិបតីស្វីស ពិភាក្សាអំពីសន្តិភាព និងការកសាងឡើងវិញជាមួយនាយករដ្ឋមន្ត្រីអ៊ុយក្រែន
08/28/2025 08:08 PM
Facebook Telegram Linkin
ឯកអគ្គរដ្ឋទូតអ៊ីរ៉ង់ចាកចេញពីអូស្ត្រាលី ក្នុងពេលមានជម្លោះផ្នែកការទូត ជុំវិញការវាយប្រហារប្រឆាំងជ្វីហ្វ
08/28/2025 07:08 PM
Facebook Telegram Linkin
រុស្ស៊ី បញ្ជាក់ថា «នៅតែចាប់អារម្មណ៍» ចំពោះសន្តិភាព ប៉ុន្តែនឹងបន្តការវាយប្រហារអ៊ុយក្រែន
08/28/2025 07:08 PM
Facebook Telegram Linkin
ផ្លូវជនបទ២គម្រោងក្នុងខេត្តសៀមរាប ស្ថាបនាប្រកបដោយគុណភាព បម្រើដល់ការធ្វើដំណើរ និងការប្រកបអាជីវកម្មផ្សេងៗ
08/28/2025 07:08 PM
Facebook Telegram Linkin
ក្រុមមន្ត្រី៖ ទីក្រុងតូចៗរបស់ប៉ាគីស្ថានចំនួន ២ ប្រឈមនឹងទឹកជំនន់ដ៏មហន្តរាយ ប្រសិនបើទំនប់ទឹកទន្លេបាក់
08/28/2025 06:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.