BTV NEWS

ការដោះដូរពាណិជ្ជកម្មជាមួយ RCEP មានទឹកប្រាក់សរុបជាង ១១ពាន់លានដុល្លារ កើនជាង ១៨%

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញស្ទើរគ្រប់ប្រភេទមានកំណើនកើនឡើងល្អប្រសើរ

ត្រីមាសទី១ឆ្នាំនេះ CDC ចុះបញ្ជីគម្រោងវិនិយោគចំនួន ១៤៦ មានទុនប្រមាណ ២,៥ ប៊ីលានដុល្លារ

សេដ្ឋកិច្ច និង កសិកម្ម

ទីផ្សារជ្រូករស់កំពុងងើបឡើងវិញ បន្ទាប់ពីការអន្តរាគមន៍នៃការនាំចេញរបស់ក្រសួងកសិកម្ម

ភ្នំពេញ៖ សមាគមអ្នកចិញ្ចឹមសត្វកម្ពុជា រំពឹងថា តម្លៃជ្រូករស់នឹងងើបឡើងវិញ នៅចុងឆ្នាំនេះ ឬដើមឆ្នាំក្រោយ ខណៈក្រសួងកសិកម្មរុក្ខាប្រមាញ់ និងនេសាទ បានអនុញ្ញាតជាគោលការណ៍ ឱ្យនាំចេញជ្រូករស់ទៅក្រៅប្រទេស។លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា លើកឡើង នៅថ្ងៃទី ៩ ខែ ធ្នូ ឆ្នាំ ២០២២ នេះថា នាពេលកន្លងមក ការផ្គត់ផ្គង់ជ្រូករស់លើទីផ្សារក្នុងស្រុក មានចំនួនច្រើន បានកកស្ទុះ និងស្របពេលមានការនាំចូលសាច់បង្កកមកពីប្រទេសជិតខាង ធ្វើឲ្យតម្លៃជ្រូករស់កាន់តែធ្លាក់ចុះ ដោយមានតម្លៃទាបជាង ៨០០០រៀល ក្នុងមួយគីឡូក្រាម។លោក បន្តថា បច្ចុប្បន្នដោយមានការអន្តរាគមន៍ពីក្រសួងកសិកម្ម រុក្ខាប្រមាញ់ និងនេសាទ សព្វថ្ងៃនេះ កម្ពុជាបានកំពុងធ្វើការនាំចេញជ្រូករស់ទៅប្រទេសវៀតណាម ក្នុងមួយថ្ងៃៗរាប់រយក្បាល ដែលជួយឱ្យតម្លៃជ្រូកក្នុងស្រុកងើបឡើងវិញ ។ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លើកឡើងថា បច្ចុប្បន្នក្រសួងសង្កេតឃើញថា ទីផ្សារជ្រូករស់នៅក្រៅប្រទេសមានតម្លៃខ្ពស់ ក្នុងនោះស្របពេលទីផ្សារចិញ្ចឹមជ្រូកនៅកម្ពុជាមានចំនួនច្រើន ជំរុញឲ្យមានការនាំចេញទៅកាន់ប្រទេសជិតខាង គឺដើម្បីបើកទីផ្សារនេះជួយដល់កសិករ មានទីផ្សារបន្ថែម ។ ឯកឧត្តម បន្តថា រាជរដ្ឋាភិបាលបានគិតគូរណាស់ និងបានជំរុញឲ្យមានការចុះកិច្ចព្រមព្រៀងពាណិជ្ជកម្មសេរីជាមួយប្រទេសចិន និងជាមួយកូរ៉េ ដែលនឹងចូលជាធរមានក្នុងពេលឆាប់ៗ គឺដើម្បីជំរុញដល់ការនាំចេញ ប៉ុន្តែកត្តាទាំងនោះ ត្រូវដោះស្រាយនូវរបាំងបច្ចេកទេស ពោលគឺទាមទារផលិតមានស្តង់ដារខ្ពស់ និងមានតម្លៃប្រកួតប្រជែង ទើបអាចឈានចូលទីផ្សារគេបាន។ក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗនេះ បានសម្រេចអនុញ្ញាតជាគោលការណ៍ឱ្យក្រុមហ៊ុនអង្គរ សុខសែនជ័យ ឯ.ក ប្រមូលទិញសត្វជ្រូករស់តាមបណ្តារាជធានី-ខេត្ត ក្នុងព្រះរាជាណាចក្រកម្ពុជា ចំនួន ២០ម៉ឺនក្បាល ដើម្បីនាំចេញទៅផ្គត់ផ្គង់ទីផ្សារប្រទេសវៀតណាម ថៃ និងប្រទេសចិន សម្រាប់រយៈពេល ៣ខែ ចាប់ពីថ្ងៃទី២១ ខែវិច្ឆិកា ឆ្នាំ២០២២ ដល់ថ្ងៃទី២០ខែកុម្ភៈ ឆ្នាំ២០២៣ ៕អត្ថបទ៖ សុន រ៉ាឌី

ការនាំចេញស្រូវទៅវៀតណាម តាមច្រកទ្វេភាគីតន់ហន់ខេត្តកំពត ធ្លាក់ចុះច្រើន

កំពត៖ មន្ត្រីប្រចាំការនៅច្រកទ្វារទ្វេភាគីតន់ហន់ ខេត្តកំពត បានបញ្ជាក់ថា ចាប់តាំងពីមានការផ្ទុះឡើង នៃជំងឺកូវីដ១៩មក ការនាំចេញស្រូវទៅប្រទេសវៀតណាម តាមច្រកតន់ហន់ បានធ្លាក់ចុះជាលំដាប់។ តាមរបាយការណ៍របស់មន្ទីរកសិកម្ម រយៈពេល១១ខែឆ្នាំ២០២២នេះ ស្រូវនាំចេញប្រមាណ ៤ម៉ឺនតោនប៉ុណ្ណោះ ខណៈដែលនៅឆ្នាំ២០២១ ការនាំស្រូវចេញមានចំនួនជាង ១០ម៉ឺនតោន។ នាយប៉ុស្តិ៍នគរបាលច្រកទ្វារទ្វេភាគីតន់ហន់ លោក វរសេនីយ៍ទោ នាក់ សុវណ្ណគិរី ជំនួសមុខឲ្យប្រធានច្រកទ្វារ បានប្រាប់ថា ចាប់ទាំងពីមានការផ្ទុះឡើង នៃជំងឺកូវីដ១៩ សកម្មភាពដោះដូរទំនិញតាមច្រកទ្វារទ្វេភាគីតន់ហន់ មានភាពស្ងប់ស្ងាត់ ពិសេសការនាំចេញស្រូវមានការថមថយច្រើន។ កាលពីមុនកូវីដ១៩ផ្ទុះឡើង រដូវកាលប្រមូលផលនេះ នៅច្រកមានរថយន្តដឹកស្រូវតម្រង់កន្ទុយគ្នា ដើម្បីនាំស្រូវចេញទៅវៀតណាម ប៉ុន្តែឥឡូវស្ងប់ស្ងាត់ ក្នុងមួយថ្ងៃមានរថយន្តដឹកស្រូវចេញជាង ១០គ្រឿងប៉ុណ្ណោះ ។ ប្រធានមន្ទីរកសិកម្ម រុក្ខាប្រមាញ់ និងនេសាទ លោក ចាន់ រិទ្ធ បានប្រាប់ឲ្យដឹងដែរថា តម្លៃស្រូវឆ្នាំនេះថេរល្អ ស្រូវអ៊ីអ៊ែ តម្លៃ៨៧០រៀលក្នុងមួយគីឡូក្រាម ស្រូវធ្ងន់ តម្លៃ១២០០រៀល ក្នុងមួយគីឡូក្រាម ហើយតម្លៃនេះមិនទាបជាងរាល់ឆ្នាំទេ ប៉ុន្តែការនាំចេញស្រូវទៅវៀតណាមតាមច្រកតន់ហន់ធ្លាក់ចុះ។ តាមរបាយការណ៍របស់មន្ទីរ រយៈពេល១១ខែឆ្នាំ២០២២នេះ ការនាំចេញស្រូវទៅវៀតណាម តាមច្រកតន់ហន់បាន ប្រមាណ៤ម៉ឺនតោនប៉ុណ្ណោះ ខណៈដែលឆ្នាំ២០២១ ការនាំចេញស្រូវបានជាង ១០ម៉ឺនតោន។ ឈ្មួញទិញលក់ស្រូវ បានប្រាប់ឲ្យដឹងថា តម្លៃស្រូវមិនសូវប្រែប្រួលនោះទេ ជាធម្មតាតម្លៃស្រូវស្ថិតនៅចន្លោះពី៨០០រៀល ទៅ១២៥០រៀលក្នុងមួយគីឡូក្រាម ទៅតាមប្រភេទស្រូវ។ ការធ្លាក់ចុះនៃការនាំចេញស្រូវទៅវៀតណាម តាមច្រកទ្វារទ្វេភាគីតន់ហន់នេះ បើតាមមន្ត្រីជំនាញបានបញ្ជាក់ថា ដោយសារច្រកនេះ ពិបាកទម្លាក់ស្រូវចុះទូកខាងវៀតណាម ទាមទារឲ្យឈ្មួញត្រូវមានកម្លាំងកម្មករខ្លួនឯង ហើយកន្លងមកឈ្មួញ និងពលរដ្ឋជាច្រើនបានស្នើសុំ ឲ្យរដ្ឋបាលខេត្តជួយសម្របសម្រួលភាគីវៀតណាម ដើម្បីបើកច្រកព្រៃទន្លេ ដែលទីនោះងាយស្រួល និងសំបូរកម្លាំងកម្មករ។ យ៉ាងណាក៏ដោយ ច្រកទ្វារទ្វេភាគីតន់ហន់ នៅតែដើរតួនាទីយ៉ាងសំខាន់ ក្នុងការជួយសម្រួលដល់ជីវភាពរស់នៅរបស់ប្រជាពលរដ្ឋទាំងសង់ ឲ្យប្រសើរឡើង តាមរយៈការដោះដូរទំនិញគ្នា៕អត្ថបទ៖ អន សារឹម

ការចរចាកិច្ចព្រមព្រៀងភាពជាដៃគូសេដ្ឋកិច្ច កម្ពុជា-អេមីរ៉ាតអារ៉ាប់រួមជុំទី២ នឹងធ្វើឡើងនៅខែធ្នូនេះ

ភ្នំពេញ៖ឯកឧត្ដម ប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្មកម្ពុជា បានដឹកនាំក្រុមការងារចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម (CAM-UAE CEPA) ចូលរួមកិច្ចប្រជុំចង្អៀតអន្តរក្រសួង តាមប្រព័ន្ធវីដេអូ ដើម្បីគោរពរាយការណ៍ជូន អំពីលទ្ធផលនៃការចរចាកិច្ចព្រមព្រៀង និងស្នើសុំគោលការណ៍សម្រាប់ការចរចាជុំបន្ត។ក្រសួងពាណិជ្ជកម្ម បានឲ្យដឹងថា កិច្ចប្រជុំចង្អៀតអន្តរក្រសួងនេះ បានប្រព្រឹត្តទៅ កាលពីរសៀលថ្ងៃទី៧ ធ្នូ ឆ្នាំ២០២២ក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ។ប្រភពដដែល បានបន្តថា ក្រោយពីបានស្តាប់ការរាយការណ៍របស់ ឯកឧត្តម ប៉ាន សូរស័ក្តិ ជូនឯកឧត្តមអគ្គបណ្ឌិតសភាចារ្យ និងអង្គប្រជុំ អំពីប្រវត្តិសាវតា និងវឌ្ឍនភាពនៃការចរចាកិច្ចព្រមព្រៀងនេះ អង្គប្រជុំក៏បានពិភាក្សាលើសំណូមពរ និងបញ្ហានានារបស់ក្រុមការងារចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម និងបានទទួលអនុសាសន៍ណែនាំនិងសេចក្តីសម្រេច ពីឯកឧត្តមអគ្គបណ្ឌិតសភាចារ្យ លើចំណុចមួយចំនួនពាក់ព័ន្ធនឹងការចរចាលើអត្ថបទកិច្ចព្រមព្រៀង និងការបើកច្រកទីផ្សារពាណិជ្ជកម្មទំនិញ ពាណិជ្ជកម្មសេវា និងពាណិជ្ជកម្មតាមប្រព័ន្ធឌីជីថល សំដៅត្រៀមការចរចាជុំទី២ ដែលគ្រោងប្រព្រឹត្តិទៅ ចាប់ពីថ្ងៃទី១៩ ដល់២១ ខែធ្នូនេះ នៅកម្ពុជា។តាមឯកឧត្តមរដ្ឋមន្រ្តីក្រសួងពាណិជ្ជកម្ម បានបញ្ជាក់ថា សារៈសំខាន់ក្នុងការបន្តធ្វើសមាហរណកម្ម និងសហប្រតិបត្តិការសេដ្ឋកិច្ចរបស់កម្ពុជាទៅក្នុងតំបន់ និងសកលលោក ស្របតាមយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្នុងគោលបំណងបន្តធ្វើពិពិធកម្មទីផ្សារនាំចេញសម្រាប់ផលិតផលកម្ពុជាឱ្យកាន់តែសំបូរបែប និងប្រសើរជាងមុន និងជាពិសេសចូលរួមចំណែកក្នុងការស្តារសេដ្ឋកិច្ចឡើងវិញក្រោយវិបត្តិជំងឺកូវីដ១៩ និងបង្កើតឱកាសការងារកាន់តែច្រើនជូនប្រជាពលរដ្ឋ៕អត្ថបទ៖ ឈិត បូរ៉ាវី

ADBផ្តល់ហិរញ្ញប្បទានដល់កម្ពុជា លើគម្រោងជំរុញវិស័យជលផលសមុទ្រ

ភ្នំពេញ៖ ធនាគារអភិវឌ្ឍន៍អាស៊ី(ADB) បានអនុម័តកញ្ចប់ហិរញ្ញប្បទាន ៧៣លានដុល្លារ ដើម្បីបង្កើនភាពធន់នឹងអាកាសធាតុ និងនិរន្តរភាពនៃជលផល តំបន់ឆ្នេរ និងសមុទ្រក្នុងប្រទេសកម្ពុជា។គម្រោងជលផលតំបន់ឆ្នេរ និងសមុទ្រប្រកបដោយនិរន្តរភាព នឹងត្រូវបានផ្តល់ហិរញ្ញប្បទានជា ប្រាក់កម្ចីចំនួន ៤១ លានដុល្លារពី ADB ជំនួយឥតសំណងចំនួន ២២ លានដុល្លារពីមូលនិធិអភិវឌ្ឍន៍អាស៊ីរបស់ ADB និងប្រាក់កម្ចីចំនួន ១០ លានដុល្លារពីមូលនិធិហេដ្ឋារចនាសម្ព័ន្ធអាស៊ាន ក្រោមកញ្ចប់ជំនួយ ASEAN Catalytic Green Finance Facility (ACGF) ។ ទីភ្នាក់ងារបារាំងដើម្បីអភិវឌ្ឍន៍ (Agence Française de Développement) ក៏នឹងផ្តល់ជាសហហិរញ្ញប្បទានប្រមាណ ២០លានដុល្លារ ដែលនឹងត្រូវគ្រប់គ្រងដោយ ADB ផងដែរ។លោក Alvin Lopez អ្នកឯកទេសជាន់ខ្ពស់ផ្នែកធនធានធម្មជាតិ និងកសិកម្មរបស់ ADB ប្រចាំតំបន់ អាស៊ីអាគ្នេយ៍មានប្រសាសន៍ថា «គម្រោងនេះ គឺជាការវិនិយោគដ៏សំខាន់លើកដំបូងរបស់ ADB លើ វិស័យជលផលសមុទ្រ ហើយក៏ជាជំហានដ៏សំខាន់មួយនៃផែនការសកម្មភាពសម្រាប់មហាសមុទ្រប្រកបដោយផាសុខភាព និងសេដ្ឋកិច្ចពណ៌ខៀវប្រកបដោយនិរន្តរភាព។ អនុវិស័យជលផលគឺជាធាតុផ្សំដ៏សំខាន់នៃសេដ្ឋកិច្ចរបស់ប្រទេសកម្ពុជា ដែលស្មើនឹង ៨% ទៅ ១០% នៃផលទុនជាតិសរុបរបស់ប្រទេស។ ជលផលសមុទ្រមាន ១៣% នៃអនុវិស័យ ជលផលប៉ុន្តែការនេសាទលើសកម្រិត និងហានិភ័យអាកាសធាតុ និងគ្រោះមហន្តរាយបាននាំឱ្យមានការថយចុះយ៉ាងខ្លាំង នៃបរិមាណត្រី ដែលបានជះឥទ្ធិពលដល់សហគមន៍ និងអាជីវកម្មនៅតាមឆ្នេរសមុទ្រ ហើយបណ្តាលឱ្យតម្លៃត្រីកើនឡើង។ គម្រោងនេះនឹងពង្រឹងវិស័យជលផលសមុទ្រក្នុងខេត្តជាប់មាត់ សមុទ្រ ចំនួនបួនរបស់កម្ពុជាគឺ កំពត កែប កោះកុង និង ព្រះសីហនុ ឈានចេញពីការធ្លាក់ចុះយ៉ាងគំហុកនៃ វិស័យជលផល លើកកម្ពស់ការចិញ្ចឹមត្រីសមុទ្រដោយនិរន្តរភាព និងលើកកម្ពស់ទីតាំងប្រមូលទុកផល នេសាទ ដើម្បីកែលម្អសុវត្ថិភាពអាហារសមុទ្រ។ មានការរំពឹងថា នៅក្រោមគម្រោងនេះជលផលក្បែរឆ្នេរ សមុទ្រប្រហែល ៤០% នឹងត្រូវបានបង្កើតឡើងវិញទៅជាសហគ្រាសប្រកបដោយផលិតភាព និង និរន្តរភាព។ គម្រោងនេះ នឹងជំរុញការអភិវឌ្ឍវិស័យឯកជនដោយបើកឱ្យសហគមន៍ឆ្នេរ និងអាជីវកម្មខ្នាតតូច ធ្វើពិពិធកម្មជីវភាពរស់នៅរបស់ពួកគាត់ ទទួលយកកាអនុវត្តប្រកបដោយនិរន្តរភាព និងរីកចម្រើនទៅជា សហគ្រាសរស់រវើក។ វាក៏នឹងគាំទ្រដល់ការពង្រឹងសេដ្ឋកិច្ចរបស់ស្ត្រី តាមរយៈការបង្កើនការចូលរួមរបស់ ស្ត្រីនៅក្នុងសហគ្រាសខ្នាតតូច និងមធ្យម។ ជាទូទៅគម្រោងនេះ នឹងផ្តល់អត្ថប្រយោជន៍ដល់ អង្គការ សហគមន៍នេសាទចំនួន ២៥ និងសមាជិកនៃតំបន់ការពារសហគមន៍ចំនួន ១៥ ដែលមានចំនួនជិត ២0.000គ្រួសារ ក៏ដូចជាសហគមន៍ឆ្នេរសមុទ្រទាំងមូលដែលមានប្រជាជនប្រហែល ២00,000 នាក់៕ អត្ថបទ៖ ដាវណ្ណ

កម្ពុជា-កូរ៉េ នឹងចុះហត្ថលេខាលើឥណទានសម្បទាន ក្នុងទំហំទឹកប្រាក់ជាង ១៥០០លានដុល្លារ

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅថ្ងៃទី៩ ខែធ្នូ ឆ្នាំ២០២២ស្អែកនេះ នឹងអញ្ជើញជាអធិបតីនៅក្នុងពិធីចុះហត្ថលេខាស្តីពីការ ផ្ដល់ឥណទានសម្បទាន នៃមូលនិធិសហប្រតិបត្តិការអភិវឌ្ឍសេដ្ឋកិច្ច សម្រាប់ឆ្នាំ២០២២-២០២៦ ដែលមានទំហំទឹកប្រាក់ចំនួន ១៥០០លានដុល្លារអាមេរិក ។យោងតាមសេចក្តីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៨ ខែធ្នូ ឆ្នាំ២០២២ បានឲ្យដឹងថា ការចុះហត្ថលេខានេះ នឹងធ្វើឡើងរវាងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងឯកឧត្តម ប៉ាក ហឹងឃ្យង ឯកអគ្គរដ្ឋទូត នៃសាធារណរដ្ឋកូរ៉េ ប្រចាំនៅកម្ពុជា ។សេចក្តីប្រកាសព័ត៌មាន បានបន្តថា ក្នុងពេលជាមួយគ្នានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី Minnie CHEY ប្រធានមូលនិធិ សម្រាប់កិច្ចសហប្រតិបត្តិការអភិវឌ្ឍសេដ្ឋកិច្ច នៃធនាគារនីហ័រណអាហ័រណកូរ៉េប្រចាំកម្ពុជា ក៏នឹងចុះហត្ថលេខាលើកិច្ចព្រមព្រៀងឥណទានសម្បទាន សម្រាប់គម្រោងចំនួន២ ។ប្រភពបានបន្ថែមថា សម្រាប់គម្រោងចំនួន២នោះ រួមមាន ទី១. គម្រោងពង្រឹងសមត្ថភាពប្រព័ន្ធបណ្ដាញបញ្ជូនអគ្គិនសីនៅខេត្តព្រះសីហនុ ដែលមានទឹកប្រាក់ចំនួន ៧០លានដុល្លារ និងទី២. គម្រោងសាងសង់ស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ-អរិយក្សត្រ) ដែលមានទឹកប្រាក់ចំនួន ២៤៥ ៩០៩ ០០០ដុល្លារអាមេរិក ។គួរបញ្ជាក់ថា ឥណទានសម្បទាន ដែលផ្ដល់ដោយរដ្ឋាភិបាលកូរ៉េនេះ នឹងចូលរួមចំណែកដ៏សំខាន់ ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពន្លឿនការអភិវឌ្ឍសេដ្ឋកិច្ច ព្រមទាំងពង្រឹងបន្ថែមទៀត នូវទំនាក់ទំនងល្អ ដែលមានស្រាប់រវាងប្រជាជាតិទាំងពីរ ៕ អត្ថបទ៖ បាន សុខរិទ្ធិ

World Bank ព្យាករកំណើនសេដ្ឋកិច្ចកម្ពុជាឆ្នាំ២០២២ ក្នុងរង្វង់៤,៨ភាគរយ

ភ្នំពេញ៖ ធនាគារពិភពលោក ( World Bank ) បានព្យាករកំណើនសេដ្ឋកិច្ចកម្ពុជា ក្នុងឆ្នាំ២០២២នេះ ក្នុងរង្វង់ ៤,៨ភាគរយ ដោយគាំទ្រដោយកំណើននៃការនាំចេញ ផលិតផលកាត់ដេរ ស្បែកជើង ផលិតផលធ្វើដំណើរ និងកង់ជាពិសេសកំណើនចំនួនទេសចរអន្តរជាតិចូលទស្សនានៅកម្ពុជា។ក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជា ក្រោមចំណងជើងថា Navigating Global Economic Headwinds ចេញផ្សាយនៅថ្ងៃទី៧ ខែធ្នូនេះ ធនាគារពិភពលោក លើកឡើងថា ការព្យាករកំណើន GDP ពិតប្រាកដរបស់កម្ពុជា ក្នុងរង្វង់ ៤,៨ ភាគរយក្នុងឆ្នាំ ២០២២ ដោយផ្អែកលើការងើបឡើងវិញនៃសេដ្ឋកិច្ចដែលមានលក្ខណៈទូលំទូលាយជាងមុន។ធនាគារពិភពលោក បន្តលើកឡើងថា ការកើនឡើងនៃការនាំចេញ-ជាពិសេសសម្លៀកបំពាក់ ស្បែកជើងទំនិញធ្វើដំណើរ និងការផលិតកង់ ការងើបឡើងវិញនៃឧស្សាហកម្មទេសចរណ៍ និងការវិលត្រលប់មកវិញនៃលំហូរ វិនិយោគដោយផ្ទាល់បរទេស បានជួយទ្រទ្រង់ការងើបឡើងវិញនៃសេដ្ឋកិច្ចនៅឆ្នាំនេះ។ទោះបីជាសេដ្ឋកិច្ចត្រូវបានគេរំពឹងថា នឹងពង្រីកបន្ថែមទៀតនៅឆ្នាំក្រោយ ដែលត្រូវបានគាំទ្រដោយការស្ទុះងើបឡើងវិញនៃការប្រើប្រាស់ក្នុងស្រុក ខណៈដែលអត្រាការងារមានភាពប្រសើរឡើង និងអតិផរណាធ្លាក់ចុះ រួមជាមួយនឹងការចំណាយរបស់រាជរដ្ឋាភិបាលក្នុងអំឡុងពេលបោះឆ្នោត ការព្យាករកំណើនពិតប្រាកដសម្រាប់ឆ្នាំ២០២៣ ត្រូវបានបន្ទាបមកត្រឹម ៥,២ ភាគរយដោយសារតែ ទស្សនវិស័យសកលមិនសូវអំណោយផល។ក្នុងរយៈពេលខ្លី សមតុល្យសារពើពន្ធត្រូវបានព្យាករថា នឹងបន្តធ្វើឱ្យមានលក្ខណៈធម្មតាឡើងវិញ បន្ទាប់ពីកំណើនដ៏រឹងមាំ និងការគ្រប់គ្រងប្រាក់ចំណូលកាន់តែប្រសើរឡើង។របាយការណ៍ ដដែល លើកឡើងថា អតិផរណាត្រូវបានគេរំពឹងថា នឹងធ្លាក់ចុះដល់ ៤,២ ភាគរយ និង៣,៨ ភាគរយនៅឆ្នាំ២០២៣ និ២០២៤ រៀងគ្នា ខណៈភាពក្រីក្រត្រូវបានគេរំពឹងថានឹងធ្លាក់ចុះដោយសារតែការស្តារសេដ្ឋកិច្ចដែលបានព្យាករ និងអតិផរណាកម្រិតមធ្យម៕ អត្ថបទ៖ វណ្ណៈ

កម្ពុជា-កូរ៉េ ចុះអនុស្សរណៈយោគយល់គ្នា លើកិច្ចសហការ និងពង្រឹងវិស័យពន្ធដារ

ភ្នំពេញ៖ អគ្គនាយកដ្ឋានពន្ធដារ និងរដ្ឋបាលសារពើពន្ធនៃសាធារណរដ្ឋកូរ៉េ បានចុះអនុស្សរណៈយោគយល់គ្នា នៃកិច្ចសហប្រតិបត្តិការបន្ថែម លើការអនុវត្តកិច្ចព្រមព្រៀង, ពង្រឹងការផ្លាស់ប្តូរព័ត៌មាន, ការផ្តល់វគ្គបណ្តុះបណ្តាលសម្រាប់មន្ត្រីពន្ធដារ, ការរៀបចំសិក្ខាសាលាជួយឱ្យធុរជនកូរ៉េនៅកម្ពុជា, បង្កើនការយល់ដឹងអំពីកាតព្វកិច្ច និងអនុលោមភាពពន្ធ។ការចុះអនុស្សរណៈយោគយល់គ្នា ធ្វើឡើងនៅក្រោមវត្តមាន របស់ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ និងឯកឧត្តម KIM CHANGKI អគ្គនាយកនៃរដ្ឋបាលសារពើពន្ធនៃសាធារណរដ្ឋកូរ៉េ នៅថ្ងៃទី ៦ ខែ ធ្នូ ឆ្នាំ ២០២២។ការចុះអនុស្សរណៈយោគយល់គ្នា ផ្តោតទៅលើកត្តាសំខាន់ៗពាក់ព័ន្ធវិស័យពន្ធដាររួមមាន៖ កិច្ចសហប្រតិបត្តិការបន្ថែមលើការអនុវត្តកិច្ចព្រមព្រៀង (DTA), ពង្រឹងការផ្លាស់ប្តូរព័ត៌មាន (EoI), ការផ្តល់វគ្គបណ្តុះបណ្តាលសម្រាប់មន្ត្រីពន្ធដារ (GDT) ក្នុងគោលបំណងធ្វើឱ្យប្រសើរឡើង នូវការគ្រប់គ្រងប្រកបដោយប្រសិទ្ធភាព និងសមត្ថភាពនៃការគ្រប់គ្រងពន្ធដារ, ការរៀបចំសិក្ខាសាលាជាប្រចាំ ដោយអគ្គនាយកដ្ឋានពន្ធដារ ដើម្បីជួយឱ្យធុរជនកូរ៉េ ដែលប្រកបធុរកិច្ចនៅកម្ពុជា បង្កើនការយល់ដឹងអំពីកាតព្វកិច្ច និងអនុលោមភាពពន្ធ ដោយក្នុងនោះអគ្គនាយកដ្ឋានពន្ធដារ មានបំណងចង់សិក្សាពីបទពិសោធន៍របស់រដ្ឋបាលសារពើពន្ធនៃសាធារណរដ្ឋកូរ៉េ លើផ្នែកបច្ចេកវិទ្យាព័ត៌មានដូចជា Artificial Intelligence (AI) និង Big Data ជាដើម។ពាក់ព័ន្ធវិស័យពន្ធដារនេះ, កម្ពុជា និងសាធារណរដ្ឋកូរ៉េ បានចុះហត្ថលេខាលើកិច្ចព្រមព្រៀង DTA ដោយជោគជ័យលើចុះហត្ថលេខា ចាប់ផ្តើមពីថ្ងៃទី ២៥ ខែវិច្ឆិកា ឆ្នាំ២០១៩ ដល់ថ្ងៃទី ១ ខែ មករា ឆ្នាំ ២០២២ ។ កិច្ចព្រមព្រៀងទ្វេភាគីនោះ បាននាំមកនូវផលប្រយោជន៍យ៉ាងច្រើនដល់អ្នកជាប់ពន្ធ និងអ្នកវិនិយោគនៃប្រទេសទាំងពីរ បច្ចុប្បន្នក្រុមហ៊ុនកូរ៉េចំនួន ១៩ នៅក្នុងព្រះរាជាណាចក្រកម្ពុជា បានកំពុងទទួលបានអត្ថប្រយោជន៍ពី DTA ហើយលើសពីនេះទៀត មានក្រុមហ៊ុនកូរ៉េជាច្រើន បានបន្តស្នើសុំអត្ថប្រយោជន៍ពី DTA គិតត្រឹមខែ វិច្ឆិកា ឆ្នាំ២០២នេះ សរុបមានចំនួន ៣៦ សំណើរ៕អត្ថបទ៖ សុន រ៉ាឌី

ADB អនុម័តប្រាក់កម្ចី៥០លានដុល្លា ដើម្បីគាំទ្រដល់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច

ភ្នំពេញ៖ នៅថ្ងៃទី៦ ខែធ្នូ ឆ្នាំ២០២២ ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីផ្អែកលើគោលនយោបាយចំនួន៥០លានដុល្លារ សម្រាប់កម្មវិធីពាណិជ្ជកម្ម និងសមត្ថភាពប្រកួតប្រជែង ដើម្បីគាំទ្រដល់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច និងជំរុញសមត្ថភាពប្រកួតប្រជែងជាសកលរបស់ប្រទេស។ កម្មវិធីនេះនឹងគាំទ្រដល់ការស្តារសេដ្ឋកិច្ចក្រោយកូវីដ១៩ របស់កម្ពុជាតាមរយៈការជួយ ដល់កំណែទម្រង់របស់រាជរដ្ឋាភិបាល ដើម្បីបង្កើនការវិនិយោគ និងបរិយាកាសធុរកិច្ច ជំរុញកំណើនសហគ្រាសខ្នាតតូចនិងមធ្យម (MSMEs) និងកែលម្អគោលនយោបាយពាណិជ្ជកម្ម និងកិច្ចសម្រួលពាណិជ្ជកម្ម។សេដ្ឋវិទូជាន់ខ្ពស់របស់ ADB លោក Sion L. Morton មានប្រសាសន៍ថា «ជំងឺរាតត្បាតកូវីដ១៩ បានជះឥទ្ធិពលយ៉ាងធ្ងន់ធ្ងរដល់វិស័យសំខាន់ៗនៃសេដ្ឋកិច្ចកម្ពុជា ដូចជាវិស័យកាត់ដេរ ផលិតស្បែកជើង និងវាយនភណ្ឌ ក៏ដូចជាវិស័យទេសចរណ៍ និងសំណង់។ កំណែទម្រង់ក្រោមកម្មវិធីនេះនឹងជួយដល់គោលដៅស្តារឡើងវិញក្រោយជំងឺរាតត្បាតរបស់កម្ពុជា ដោយត្រួសត្រាយផ្លូវសម្រាប់អាជីវកម្មរីកចម្រើន និងឈានទៅរកផ្នែកតម្លៃបន្ថែមកាន់តែខ្ពស់ និងសម្របខ្លួនទៅនឹងទិដ្ឋភាពពាណិជ្ជកម្មដែលកំពុងផ្លាស់ប្តូរ»។កម្មវិធីពាណិជ្ជកម្ម និងសមត្ថភាពប្រកួតប្រជែង នឹងជួយកែលម្អបរិយាកាសធុរកិច្ចទាំងមូលសម្រាប់ក្រុមហ៊ុនក្នុងស្រុក និងក្រុមហ៊ុនបរទេស។ ទាក់ទងនឹងអនុកម្មវិធីដំបូងនេះ រាជរដ្ឋាភិបាលបានអនុម័តច្បាប់វិនិយោគថ្មី ដើម្បីផ្តល់កិច្ចការពារផ្លូវច្បាប់សម្រាប់អ្នកវិនិយោគ រួមទាំងអ្នកវិនិយោគនៅក្នុងតំបន់សេដ្ឋកិច្ចពិសេស និងបានធ្វើឱ្យប្រសើរឡើងនូវផតថលអាជីវកម្មតាមអ៊ីនធឺណិត ដើម្បីអាចឱ្យការចេញអាជ្ញាប័ណ្ណអាជីវកម្មឌីជីថលឯកទេសបានទាន់ពេលវេលា។កម្មវិធីនេះគាំទ្រដល់ការអភិវឌ្ឍន៍ និងការធ្វើពិពិធកម្ម MSMEs ធ្វើអោយប្រសើរឡើងនូវលទ្ធភាពទទួលបានហិរញ្ញវត្ថុ និងការបង្កើតទីផ្សារថ្មីសម្រាប់ពួកគេ។ វារួមបញ្ចូលទាំងការសម្រួលនិយមន័យផ្លូវច្បាប់នៃសហគ្រាសធុនតូច និងមធ្យម និងដាក់ចេញកញ្ចប់ជំនួយដែលផ្តល់មូលនិធិដោយរាជរដ្ឋាភិបាលដើម្បីផ្តល់ជំនួយ និងជំនួយបច្ចេកទេសដល់សហគ្រាសធុនតូច និងមធ្យមនៅក្នុងឧស្សាហកម្មអាទិភាពដែលមានការចូលរួមពីស្ត្រីច្រើន។កម្មវិធីនេះក៏នឹងជួយកម្ពុជាធ្វើឱ្យប្រសើរឡើងនូវការអនុវត្តកិច្ចព្រមព្រៀងពាណិជ្ជកម្មក្នុងតំបន់ និងពង្រឹងការងារសម្របសម្រួលពាណិជ្ជកម្ម ដើម្បីផ្តល់ឱកាសកាន់តែច្រើនសម្រាប់ធុរកិច្ចកម្ពុជាក្នុងការនាំចេញទំនិញរបស់ពួកគាត់។ ទាក់ទងនឹងកំណែទម្រង់ ក្រោមអនុកម្មវិធីទី១នេះ រាជរដ្ឋាភិបាលបានបង្កើតគណៈកម្មាធិការជាតិកិច្ចសម្រួលពាណិជ្ជកម្ម និងអនុម័តផែនទីបង្ហាញផ្លូវថ្នាក់ជាតិស្តីពីការសម្រួលពាណិជ្ជកម្ម៕

PATA និងក្រុមហ៊ុនទេសចរណ៍៥ប្រទេស ដើរព្យុះហយាត្រាឡើងភ្នំប្រាសាទព្រះវិហារ ផ្សព្វផ្សាយទេសចរណ៍

ព្រះវិហារ៖ ដោយមានការគាំទ្រពីក្រសួងទេសចរណ៍ ក្រសួងបរិស្ថាន និងក្រសួងវប្បធម៌ និងវិចិត្រសិល្បៈ និងអាជ្ញាធរមូលដ្ឋាន នៅថ្ងៃទី៤ ខែធ្នូ ចុងសប្តាហ៍កន្លងមកនេះ សមាគម PATA ប្រចាំនៅកម្ពុជា សមាគមទេសចរណ៍ប្រទេសថៃ និងក្រុមហ៊ុនទេសចរណ៍ចំនួន៥ប្រទេសទៀត បានរួមគ្នាធ្វើព្យុះហយាត្រាដើម្បីផ្សព្វផ្សាយបេតិកភណ្ឌជាលើកដំបូង ដើរថ្មើរជើងចម្ងាយផ្លូវ៧ គ.ម ឡើងភ្នំទៅកាន់ប្រាសាទព្រះវិហារ។បើតាមលោក ធួន ស៊ីណាន សមាគមទេសចរណ៍អាស៊ីប៉ាស៊ីភិច PATA ប្រចាំនៅកម្ពុជា ថ្លែងថា ការធ្វើព្យុះហយាត្រាក្នុងចំណោមអ្នកចូលរួមជាតិអន្តរជាតិប្រមាណជិត ៣០០នាក់ ដើរថ្មើរជើងឡើងភ្នំទៅកាន់ប្រាង្គប្រាសាទព្រះវិហារនេះ គឺធ្វើឡើងក្នុងគោលបំណងពង្រឹងកិច្ចទំនាក់ទំនងសមាគម និងក្រុមហ៊ុននានាក្នុងវិស័យទេសចរណ៍នៅកម្ពុជា និងមកពីថៃ មីយ៉ាន់ម៉ា ឥណ្ឌូនេស៊ី អេស្ប៉ាញ និងប្រទេសនានាទៀត ដើម្បីផ្សព្វផ្សាយគោលដៅទេសចរណ៍ខេត្តព្រះវិហារ និងការរៀបចំកញ្ចប់ទេសចរណ៍មកទស្សនាខេត្តព្រះវិហារឲ្យមានកំណើនឡើងវិញ។អ្នកចូលរួមដើរឡើងភ្នំប្រាសាទព្រះវិហារនៅក្នុងប្រទេសកម្ពុជា និងមកពីប្រទេសថៃ បានថ្លែងថា នៅក្រោយការរៀបចំព្រឹត្តិការណ៍ព្យុះហយាត្រា ដើម្បីបេតិកភណ្ឌនេះ គឺនឹងរួមគ្នា ខិតខំព្យាយាមផ្សព្វផ្សាយទេសចរជាតិអន្តរជាតិមកទស្សនាប្រាសាទព្រះវិហារ និងប្រាសាទបុរាណនានាទៀតនៅកម្ពុជា។ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ ថ្លែងថា នេះជាលើកដំបូងហើយ ដែលប្រាសាទព្រះវិហារ បានទទួលកម្មវិធីព្យុះហយាត្រា ដើរថ្មើរជើងឡើងទៅកាន់ប្រាសាទព្រះវិហារ ហើយតាមរយៈការព្រឹត្តិការណ៍នេះ នឹងទាញបាននូវអត្ថប្រយោជន៍ជាច្រើន ជាពិសេស ការផ្សព្វផ្សាយគោលដៅទេសចរណ៍ប្រាសាទព្រះវិហារមកទស្សនាកាន់តែច្រើន។លោក គង់ វិបុល ប្រធានមន្ទីរទេសចរណ៍ខេត្តព្រះវិហារ ថ្លែងថា ក្នុងរយៈពេល ១០ខែ ឆ្នាំ២០២២នេះ ខេត្តព្រះវិហារមានភ្ញៀវទេសចរក្នុងស្រុកទៅទស្សនាជិត ៣០ម៉ឺននាក់ ដោយភ្ញៀវអន្តរជាតិមកទស្សនាមានប្រមាណតែ ៦០០០នាក់ប៉ុណ្ណោះ៕អត្ថបទ ស៊ុម សុខជា

ទំហំពាណិជ្ជកម្មរវាងកម្ពុជា-ថៃ រំពឹងកើនឡើងជាង ១០ពាន់លានដុល្លារ នៅឆ្នាំក្រោយ

ភ្នំពេញ៖ ប្រធានសមាគមពាណិជ្ជកម្មថៃនៅកម្ពុជា រំពឹងថា ការធ្វើពាណិជ្ជកម្មកម្ពុជា-ថៃ នៅឆ្នាំ២០២៣ នឹងមានទំហំកើនឡើងជាង ១០ពាន់លានដុល្លារ ខ្ពស់ជាងឆ្នាំ ២០២២ ក្នុងរង្វង់ប្រមាណពីរ ១០ ទៅ ១៥% ខណៈប្រតិបត្តិអាជីវកម្ម ពាណិជ្ជកម្មប្រទេសទាំងពីរ បានកំពុងងើបល្អប្រសើរឡើងវិញ។លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃនៅកម្ពុជា លើកឡើងនៅក្នុងថ្ងៃពិធីប្រារព្ធថ្ងៃបុណ្យជាតិ នៃព្រះរាជាណាចក្រថៃ នៅចុងសប្តាហ៍នេះមកថា នៅក្នុងពិធីថ្ងៃបុណ្យជាតិនេះ ក្រៅពីការរំលឹកដល់ព្រះ វិញ្ញាណនៃការយាងសោយទីមង្គត ព្រះមហាក្សត្រ ព្រះចៅ ភូមិបុល អាឌុលយ៉ាដេត ក៏ជាពិធីជួបជុំក្រុមធុរកិច្ច អ្នកធ្វើអាជីវកម្មនៅក្នុងព្រះរាជាណាចក្រកម្ពុជា ដែលជាពេលវេលាមួយយ៉ាងល្អ ដើម្បីពិភាក្សា ពិគ្រោះយោបល់ រវាងគ្នាទៅវិញទៅមក និងការផ្លាស់ប្តូរបទពិសោធន៍ផ្សេងៗ ដើម្បីស្ថាបនាលើចំណុចខ្វះខាត ក្នុងគោលដៅជម្រុញលើការធ្វើពាណិជ្ជកម្មប្រកបដោយជោគជ័យ។លោកស្រី បន្តថា ជុំវិញការធ្វើការធ្វើពាណិជ្ជកម្មនេះ នៅមុនវិបត្តិនៃការរីករាលដាលជំងឺកូវីដ ១៩ ការធ្វើពាណិជ្ជកម្មនៃប្រទេសទាំងពីរ បានបន្តងើបឡើងយ៉ាងល្អ តែបន្ទាប់ពីស្ថានភាពនៃការទប់ស្កាត់ការរីករាលដាលជំងឺកូវីដ ១៩ ដែលរាជរដ្ឋាភិបាលកម្ពុជា បានទប់ស្កាត់យ៉ាងល្អប្រសើរ និងប្រកបដោយទំនុកចិត្តខ្ពស់ បច្ចុប្បន្នវិនិយោគិនថៃបានចូលមកកម្ពុជា ជាបន្តបន្ទាប់ ដើម្បីស្វែងរកទីផ្សារ និងពង្រីកអាជីវកម្មថ្មីៗបន្ថែម។ ចំណែកលំហូរទំនិញ ក៏បានកំពុងប្រតិបត្តិការជាធម្មតាឡើងវិញ។សូមបញ្ជាក់ថា នៅក្នុងរយៈពេល ១០ ខែ ឆ្នាំ ២០២២ នេះ បើតាមទិន្នន័យក្រសួងពាណិជ្ជកម្មថៃ ការធ្វើការធ្វើពាណិជ្ជកម្មកម្ពុជា-ថៃ មានទំហំសរុបជាង ៨ ៥០០ លានដុល្លាសហរដ្ឋអាមេរិក ក្នុងនោះកម្ពុជានាំចេញទៅប្រទេសថៃ មានទំហំជិត ១ ពាន់លានដុល្លារ និងថៃនាំចូលមកវិញ មានចំនួនជាង ៧ ពាន់លានដុល្លារ៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

កម្ពុជា-ចិន ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ

ចៅក្រម ICC បដិសេធសំណើសុំដោះលែងអតីតប្រធានាធិបតីហ្វីលីពីន លោក Duterte

អ៊ីរ៉ង់និយាយថា ការទូតពឹងផ្អែកលើផលប្រយោជន៍ជាតិ ពុំមែនការសម្រេចចិត្តលើការចរចាទេ

អ្នកការទូត បញ្ជាក់ថា អ៊ីរ៉ង់ «នឹងមិនចរចាក្រោមការគំរាមកំហែង» នោះឡើយ

ប្រទេសលីបង់ និងរុស្ស៊ី ចុះហត្ថលេខាលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងពិសេស

លីបង់នឹងស្នើសុំការបន្តបទឈប់បាញ់រយៈពេលមួយខែ ក្នុងជំនួបជាមួយអ៊ីស្រាអែល

អាល្លឺម៉ង់ប្ដេជ្ញាកសាងកងទ័ពខ្លាំងបំផុតរបស់អឺរ៉ុប នៅឆ្នាំ២០៣៩ ដើម្បីរារាំងរុស្ស៊ី

EU អនុម័តប្រាក់កម្ចី ៩០ពាន់លានអឺរ៉ូដល់អ៊ុយក្រែន និងទណ្ឌកម្មថ្មី លើរុស្ស៊ី ក្រោយហុងគ្រីបោះបង់សិទ្ធិវេតូ

ឯកអគ្គរដ្ឋទូតឡាវប្តេជ្ញាចិត្តបន្តពង្រឹង និងពង្រីកទំនាក់ទំនងដ៏ល្អប្រសើររវាងប្រទេសកម្ពុជា និងឡាវ លើគ្រប់វិស័យ

រដ្ឋមន្ត្រីការបរទេសអ៊ីស្រាអែលអំពាវនាវឲ្យលីបង់ធ្វើការជាមួយអ៊ីស្រាអែល ប្រឆាំងនឹងក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877