BTV NEWS

ការធ្វើបច្ចុប្បន្នភាព NFIS ដើម្បីធានាដល់គ្រួសារ និងអាជីវកម្មឱ្យទទួលបានសេវាហិរញ្ញវត្ថុសមស្រប

ការដោះដូរពាណិជ្ជកម្មជាមួយ RCEP មានទឹកប្រាក់សរុបជាង ១១ពាន់លានដុល្លារ កើនជាង ១៨%

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញស្ទើរគ្រប់ប្រភេទមានកំណើនកើនឡើងល្អប្រសើរ

សេដ្ឋកិច្ច និង កសិកម្ម

ព្រលានអន្ដរជាតិថ្មីនៅខេត្ដសៀមរាប សាងសង់សម្រេចបានជាង ៤២ភាគរយ

សៀមរាប៖ រដ្ឋលេខាធិការដ្ឋានអាកាសចរណ៍ស៊ីវិល បញ្ជាក់ថា អាកាសយានដ្ឋានអន្ដរជាតិសៀមរាបអង្គរ សម្រេចការសាងសង់បានចំនួន ៤២ភាគរយ គិតត្រឹមខែកញ្ញានេះ។ឯកឧត្ដម ម៉ៅ ហាវណ្ណាល់ រដ្ឋមន្ដ្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅពីថ្ងៃទី១២ខែកញ្ញា បានដឹកនាំក្រុមការងារធ្វើទស្សនកិច្ចព្រលានយន្ដហោះអន្ដរជាតិថ្មី នៅខេត្ដសៀមរាប ដើម្បីពិនិត្យមើលវឌ្ឍនភាពនៃការសាងសង់។ឯកឧត្ដម ជា អូន រដ្ឋលេខាធិការរដ្ឋានប្រចាំការអាកាសចរណ៍ស៊ីវិល មានប្រសាសន៍ថា ការចុះត្រួតពិនិត្យនេះរួមមាន ឃ្លាំងសាំងយន្ដហោះ ផ្លូវរត់យន្ដហោះ កន្លែងបំពាក់ឧបករណ៍នាំផ្លូវយន្ដហោះចុះចត កន្លែងបំពាក់ឧបករណ៍នាំផ្លូវហោះពីចំងាយ ពិនិត្យមើលកុងត្រូល Tower ដែលមានកំពស់ ១៧៦ម៉ែត្រស្មើរ១៣ជាន់ដើម្បីត្រូវបំពាក់ឧបរណ៍ឱ្យត្រូវស្ដង់ដារអាកាសចរណ៍កម្ពុជាផង និងអន្ដរជាតិផង ព្រមទាំងពិនិត្យមើលកន្លែងបំពាក់រ៉ាដាសម្រាប់មើលយន្ដហោះឆ្លងកាត់ប្រទេសកម្ពុជា ពិនិត្យមើលការសាងសង់សំណង់ និងនៅកន្លែងការដ្ឋានផ្សេងៗទៀត។ឯកឧត្ដម បានបន្ដថា មកដល់ខែកញ្ញាឆ្នាំ២០២២នេះ អាកាសយាន្ដដ្ឋានអន្ដរជាតិសៀមរាបអង្គរ ដែលសាងសង់ថ្មី នៅស្រុកសូទ្រនិគម ខេត្ដសៀមរាប បានសាងសង់សម្រេចបាន ៤២ភាគរយហើយ ក្នុងចំណោមហេដ្ឋារចនាសម្ព័ន្ធនៅក្នុងព្រលានយន្ដហោះសរុប ។ឯកឧត្ដម បន្ដថា នៅដំណាច់ឆ្នាំ២០២២នេះ ក្រុមហ៊ុននឹងសាងសង់សម្រេចឱ្យបានជាង ៧០ភាគរយបន្ថែមទៀត ដើម្បីឱ្យទាន់ហោះហើរ សាកល្បងនៅពាក់កណ្ដាលឆ្នាំ២០២៣។ ការសាងសង់អាកាសយានដ្ឋានអន្តរជាតិថ្មីនៅខេត្តនេះ បានចាប់ពីផ្ដើមបើកការដ្ឋាននៅពាក់កណ្តាលខែមីនា ឆ្នាំ២០២០ ហើយគ្រោងនឹងបញ្ចប់នៅឆ្នាំ២០២៣ គឺមានរយៈពេលសរុប៣៦ខែ បើគិត។អាកាសយានដ្ឋានថ្មីនេះ ស្ថិតក្នុងលំដាប់4E មានផ្លូវរត់ប្រវែង៣,៦០០ម៉ែត្រ ទទឹង ៤៥ម៉ែត្រ មាន ៣៨ចំណតយន្តហោះ និងមានក្រឡាផ្ទៃស្ថានីយ អ្នកដំណើរជាង ៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណ ៧លាននាក់។ អាកាសយានដ្ឋានអន្តរជាតិខ្នាតដ៏ធំមួយនេះដែរ ត្រូវបានស្ថិតក្រោមកិច្ចព្រមព្រៀង គម្រោងវិនិយោគ BOT រយៈពេល ៥៥ឆ្នាំ ក្រោយពេលគម្រោងប្រតិបត្តិការនេះត្រូវបានបញ្ចប់ នឹងត្រូវប្រគល់ជូនរាជរដ្ឋាភិបាលកម្ពុជា៕អត្ថបទ៖ ឈិត សាវី

រោងចក្រស្បែកជើងនៅកំពត គ្រោងពង្រីកខ្លួនទ្វេដង បង្កើតការងារដល់ប្រជាពលរដ្ឋ

កំពត៖ តំណាងក្រុមហ៊ុន ពូចិន (ខេមបូឌា) អ៊ិលធីឌី ស្ថិតនៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត បានបញ្ជាក់ថា ក្រោយពីរាជរដ្ឋាភិបាលគ្រប់គ្រងកូវីដ១៩បានល្អប្រសើរ ក្រុមហ៊ុនបានដាក់ចុះនូវផែកការឆ្នាំ(២០២២-២០២៤)ពង្រីករោងចក្ររបស់ខ្លួនឲ្យធំជាងបច្ចុប្បន្នទ្វេដង ដែលត្រូវការកម្មករនិយោជិតបន្ថែមប្រមាណ១ម៉ឺន៤ពាន់នាក់ ។ តំណាងក្រុមហ៊ុន ពូចិន (ខេមបូឌា) អ៊ិលធីឌី អ្នកស្រី អ៊ិន ស្រីភណ្ឌ បានប្រាប់ឲ្យដឹងថា រោងចក្រពូចិនបានបើកដំណើរការជិត ៦ឆ្នាំហើយ។ បច្ចុប្បន្នក្រុមហ៊ុនមានមានអគារផលិតកម្ម ចំនួន៦អគារ ដែលមានកម្មករនិយោជិតធ្វើការសរុប ៧៩០៩នាក់ ស្រី៦,៦១៦នាក់។ អ្នកស្រីបញ្ជាក់ថា ក្រោយពេលរាជរដ្ឋាភិបាលគ្រប់គ្រងស្ថានភាពកូវីដ១៩ បានប្រសើរ ក្រុមហ៊ុនបានដាក់ចុះនូវផែកការឆ្នាំ(២០២២-២០២៤) ពង្រីករោងចក្របន្ថែមឲ្យធំទ្វេដង ដែលត្រូវការកម្មករនិយោជិតបន្ថែមប្រមាណ១ម៉ឺន៤ពាន់នាក់ ហើយបច្ចុប្បន្នអគារថ្មីបានសាងសង់រួចជាបណ្តើរៗ ហើយគ្រោងនឹងបើកដំណើរការក្នុងពេលឆាប់ៗនេះ ។ កម្មការិនីរោងចក្រពូចិន បានសម្តែងភាពសប្បាយរីករាយ ចំពោះរាជរដ្ឋាភិបាល អាជ្ញាធរខេត្ត ដែលតែងយកចិត្តទុកដាក់ចំពោះប្រជាពលរដ្ឋ ពិសេសតាមរយៈការកៀរគរអ្នកវិនិយោគល្អ ឲ្យមកបើកក្រុមហ៊ុន រោងចក្រនៅតាមមូលដ្ឋាន សម្រាប់ផ្តល់ការងារ និងប្រាក់ចំណូលផ្តត់ផ្គង់ជីវភាពគ្រួសាររបស់ពួកគាត់ ។ប្រធានមន្ទីរការងារ និងបណ្តុះបណ្តាលវិជ្ជាជីវៈ លោក អ៊ឹង ប៉ោហេង បានប្រាប់ឲ្យដឹងថា ក្រុមហ៊ុន ពូចិន (ខេមបូឌា) អ៊ិលធីឌី មានអគារផលិតកម្មចំនួន០៨ អគារ នៅលើផ្ទៃដីប្រមាណជាង៨៣ហិកតា ដែលមានកម្មករនិយោជិត សរុប ៧,៩០៩ នាក់ ស្រី ៦,៦១៦ នាក់ រោងចក្រនេះផលិតស្បែកជើង នាំចេញទៅទ្វីបអឺរ៉ុប និងសហរដ្ឋអារិក។ កន្លងមកក្រុមហ៊ុន បានសហការ និងគោរពច្បាប់ការងារបានល្អ គ្មានការកៀបសង្កត់ ឬកេងប្រវ័ញ្ញលើកម្លាំងពលកម្ម របស់កម្មករនិយោជិតឡើយ៕អត្ថបទ៖អន សារឹម

ពន្ធដារប្រមូលពន្ធ-អាករ បានជាង ២ ៤៣៩លានដុល្លារអាមេរិក ក្នុងរយៈពេល៨ខែ

ភ្នំពេញ៖ គិតត្រឹមរយៈពេល៨ខែ ឆ្នាំ២០២២ អគ្គនាយកដ្ឋានពន្ធដារ ប្រមូលចំណូលពន្ធអាករគ្រប់ប្រភេទ តាមប្រព័ន្ធគ្រប់គ្រងទិន្នន័យអនឡាញ សម្រេចបានជាង ៩ ៨៧៩ ប៊ីលានរៀល ត្រូវជាង ២ ៤៣៩ លានដុល្លារអាមេរិក ស្មើរប្រមាណ ៨៦,៥១% នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២២។លោក ម៉ុង ឡាមី ប្រធានការិយាល័យគោលនយោបាយសារពើពន្ធ នៃអគ្គនាយកដ្ឋានពន្ធដារ លើកឡើងក្នុងបទបង្ហាញ នៅក្នុងជំនួបពិភាក្សាការងាររវាង លោក សេង ជាសិទ្ធ ប្រធាននាយកដ្ឋាននីតិកម្ម គោលនយោបាយសារពើពន្ធ និងសហប្រតិបត្តិការពន្ធដារអន្តរជាតិ និង លោក Alasdair Scott ប្រធានក្រុមបេសកជន ទទួលបន្ទុកប្រទេសកម្ពុជា នៃប្រតិភូ (IMF Article IV Mission) នៅថ្ងៃទី ១២ ខែ កញ្ញា ឆ្នាំ ២០២២។ការប្រមូលចំណូលមានប្រសិទ្ធភាពនេះ គឺដោយសារវិធានការដែលត្រូវបានកំណត់ក្នុងយុទ្ធសាស្ត្រកៀរគរចំណូល ២០១៩-២០២៣ របស់រាជរដ្ឋាភិបាល រួមមាន៖ ការកែសម្រួលតម្លៃមូលដ្ឋានគិតពន្ធលើអចលនទ្រព្យ និងពន្ធប្រថាប់ត្រា,ការពង្រឹងអនុលោមភាពពន្ធលើដីធ្លីមិនបានប្រើប្រាស់, ការដាក់ឱ្យអនុវត្តពន្ធលើចំណេញមូលធន, ការពង្រឹងការចុះបញ្ជីសហគ្រាស, ការធ្វើទំនើបកម្មប្រព័ន្ធ E-Filing និង E-Payment ជាដើម។ចំណែកការគ្រប់គ្រងប្រមូលចំណូលពន្ធដារសម្រាប់ឆ្នាំ២០២១ អគ្គនាយកដ្ឋានពន្ធដារ ប្រមូលចំណូលសម្រេចបានជាង ១១ ២៦៦ ប៊ីលានរៀល ត្រូវប្រមាណជិត ២ ៧៨២ លានដុល្លារអាមេរិក ស្មើរ ១២៤,២% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២១។ អគ្គនាយកដ្ឋានពន្ធដារ បានរំពឹងថា អាចនឹងសម្រេចបានគ្រប់និងលើសផែនការកំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២។នៅក្នុងបទបង្ហាញនេះ លោក ម៉ុង ឡាមី បានបញ្ជាក់ថា ចំពោះស្ថានភាពនៃការបន្តរក្សាកំណើនចំណូលនេះ អាចសម្រេចបានអាស្រ័យដោយកិច្ចខិតខំប្រឹងប្រែងរបស់អគ្គនាយកដ្ឋានពន្ធដារ ក្នុងការកៀរគរចំណូលពីប្រភពនានា និងបិទខ្ទប់នូវការលេចធ្លាយចំណូលនានា តាមរយៈការពង្រឹងអភិបាលកិច្ចល្អ និងរដ្ឋបាលកិច្ចល្អ ព្រមទាំងការប្រកាន់ខ្ជាប់នូវស្មារតីបុរេសកម្ម ជាពិសេសការរៀបចំអភិវឌ្ឍន៍ និងដាក់ឱ្យប្រើប្រាស់នូវប្រព័ន្ធបច្ចេកវិទ្យាព័ត៌មានជាច្រើន ដើម្បីគាំទ្រ រួមទាំងសេវាគាំទ្រការប្រើប្រាស់ប្រព័ន្ធ និងកម្មវិធីនានា ដើម្បីដោះស្រាយរាល់បញ្ហាប្រឈម ក្នុងការប្រើប្រាស់ប្រព័ន្ធ និងកម្មវិធីនានាជូនអ្នកជាប់ពន្ធ៕ អត្ថបទ៖ សុន រ៉ាឌី

សម្តេចតេជោ ហ៊ុន សែន គាំទ្រការបង្កើតឡើង មូលនិធិអភិវឌ្ឍន៍សេដ្ឋកិច្ចកម្ពុជា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានគាំទ្រការបង្កើតឡើងនូវ មូលនិធិអភិវឌ្ឍន៍សេដ្ឋកិច្ចកម្ពុជា (Cambodia Economic Development Fund) ដែលនឹងចូលរួមចំណែកក្នុងបរិវត្តកម្មឌីជីថល និងការអភិវឌ្ឍបញ្ញាសិប្បនិម្មិត និងបំពាក់នូវជំនាញ និងឧបករណ៍ចាំបាច់ដល់កម្លាំងពលកម្មកម្ពុជា ក្នុងសម័យបដិវត្តន៍ឧស្សាហកម្មទី៤។សម្តេចតេជោ ហ៊ុនសែន លើកឡើងក្នុងពិធីបើកវេទិកាភាពជាដៃគូអ្នកដឹកនាំ និងភាពជាដៃគូអាស៊ាន ឆ្នាំ២០២២ ក្រោមប្រធានបទ “ភាពជាដៃគូសម្រាប់អាស៊ានដែលមានភាពស្អិតរមូត និងឆ្លើយតបរហ័ស” នៅព្រឹកថ្ងៃទី១២ ខែកញ្ញានេះ ។ទន្ទឹមនឹងនេះ សម្តេចតេជោ ហ៊ុន សែន មានប្រសាសន៍ ស្វាគមន៍នូវគំនិតផ្តួចផ្តើម របស់វិទ្យាស្ថានយុទ្ធសាស្រ្តដើម្បីអាស៊ីប៉ាស៊ីហ្វីក និងវិទ្យាស្ថានចក្ខុវិស័យអាស៊ី ក្នុងការបង្កើតឡើងនូវ បង្កើតឡើងនូវ តំបន់សេដ្ឋកិច្ច ឬវិនិយោគបៃតង។សូមបញ្ជាក់ថា វេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ សហការរៀបចំដោយវិទ្យាស្ថានយុទ្ធសាស្ត្រ ដើម្បីអាស៊ី-ប៉ាស៊ីហ្វិក (KSI) វិទ្យាស្ថានចក្ខុវិស័យអាស៊ី (AVI) ក្រុមប្រឹក្សាធុរកិច្ចអាស៊ាន (ASEAN-BAC) និងសភាពាណិជ្ជកម្មកម្ពុជា។វេទិកានេះ ប្រារព្ធធ្វើឡើងក្រោមប្រធានបទ «ភាពជាដៃគូស្អិតរមួត និងការឆ្លើយតបរហ័សរបស់អាស៊ាន» ដោយមានការអញ្ជើញចូលរួមពីឥស្សរជន ថ្នាក់ដឹកនាំស្ថាប័នអ្នករៀបចំខាងលើ ស្ថាប័នធុរកិច្ច ក្រុមហ៊ុន វិនិយោគិន ធនាគារ វិទ្យាស្ថានសិក្សាស្រាវជ្រាវ និងតំណាងអង្គទូតនានា៕ អត្ថបទ៖ វណ្ណៈ

ទំហំបរធនក្នុងវិស័យបរធនបាលកិច្ច មានកំណើនកើនឡើងជាបន្តបន្ទាប់

ភ្នំពេញ៖ បរធនបាលកិច្ច នឹងមានទំហំបរធនកើនឡើងក្នុងរង្វង់ប្រមាណជា ៦០០ លានដុល្លារអាមេរិក ក្នុងឆ្នាំ២០២២នេះ ខណៈបច្ចុប្បន្ននិយ័តករបរធនបាលកិច្ច កំពុងពិនិត្យ និងវាយតម្លៃ នៃការចុះបញ្ជីបរធនបាលកិច្ច មានចំនួនប្រមាណជាង ៥០០ សំណើរបន្ថែមទៀត។ ឯកឧត្តម សុខ ដារ៉ា អគ្គនាយកនិយ័តករបរធនបាលកិច្ច នៃសេវាហិរញ្ញវត្ថមិនមែនធនាគារ លើកឡើងនៅក្នុងកម្មវិធីចុះអនុស្សរណៈយោគយល់គ្នា រវាងនិយ័តករបរធនបាលកិច្ច និង CEO Master Club នាចុងសប្តាហ៍កន្លងមកថា មកដល់បច្ចុប្បន្ននិយ័តករបរធនបាលកិច្ច មានរបរធនបាលកិច្ចហិរញ្ញវត្ថុចំនួន ៩ ដែលក្នុងនោះមានទំហំបរធន (គឺទ្រព្យសម្បត្តិ ឬមូលនិធិ) មានប្រមាណជាង ១៦៦ លានដុល្លារអាមេរិក។ឯកឧត្តម បន្តថា បន្ទាប់រាជរដ្ឋាភិបាលចាប់ផ្ដើមនៃការបង្កើតនិយ័តករបរធនបាលកិច្ច នៅពាក់កណ្ដាលឆ្នាំ ២០២១ មកដល់បច្ចុប្បន្ននេះ និយ័តករបរធនបាលកិច្ច ទទួលបានការស្នើបង្កើត និងសុំចុះបញ្ជីរបរធនបាលកិច្ច មានចំនួនប្រមាណជាង ៥០០ សំណើរ ដែលកំពុងស្ថិតនៅក្នុងនីតិវិធីកំពុងវាយតម្លៃ ដែលចំនួន ៥០០ សំណើរនេះ បន្ទាប់ពីវាយតម្លៃនិងអនុម័តជាផ្លូវការ និយ័តករបរធនបាលកិច្ច នឹងមានទំហំបរធនកើនឡើងទ្វេរដងថែមទៀត។បរធនបាលកិច្ច គឺជាទំនាក់ទំនងគតិយុត្តិ ដែលបរធនបាលទាយក ផ្តល់ទ្រព្យសម្បត្តិដល់បរធនបាលក្នុងការមើលថែរក្សា និងប្រើប្រាស់ជាប្រយោជន៍ដល់អត្ថគាហកៈ។អត្ថគាហកៈ គឺជាបុគ្គលដែលអចទទួលផលពីបរធនបាលកិច្ច ចាប់ពីកាលបរិច្ឆេទចូលជាធរមាន នៃបរធនបាលកិច្ច លើកលែងតែមាន។ចំណែកបរធនបាលទាយក គឺជាបុគ្គលដែលបានបង្កើត និងកំណត់លក្ខខណ្ឌនៃបរធនបាលកិច្ច និងផ្តល់ទ្រព្យសម្បត្តិ ឬមូលនិធិដំបូងទៅក្នុងបរធនបាលកិច្ច និងមានសិទ្ធិទទួលព័ត៌មានពាក់ព័ន្ធនឹងការគ្រប់គ្រងបរធនបាលកិច្ច ព្រមទាំងតែងតាំង និងបញ្ឈប់បរធនបាល។រីឯបរធនបាល គឺជាបុគ្គលដែលទទួលសិទ្ធិគ្រប់គ្រង និងចាត់ចែងបរធនពីបរធនបាលទាយក សម្រាប់ជាប្រយោជន៍ដល់អត្ថគាហកៈ ដោយអនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន។សូមបញ្ជាក់ថា នាចុងសប្តាហ៍កន្លងមកនេះ និយ័តករបរធនបាលកិច្ច បានចុះអនុស្សារណៈជាមួយ និង CEO Master Club ដើម្បីពង្រឹកកិច្ចសហប្រតិបត្តិការ ដល់សមាជិកគ្រួសារ CEO Master Club ដែលមានម្ចាស់អាជីវកម្មធុនតូច និងមធ្យមជាច្រើន ឱ្យមានលទ្ធភាព និងសមត្ថភាពសមស្រប ដើម្បីរៀបចំខ្លួនក្នុងការចូលរួមក្នុងវិស័យបរធនបាលកិច្ចនៅកម្ពុជា ៕ អត្ថបទ៖ សុន រ៉ាឌី

សមាគមភ្នាក់ងារដឹកជញ្ជូនទេសចរណ៍ជលយានថា មួយរយៈពេលនេះ មិនសូវមានភ្ញៀវធ្វើដំណើរចុះឡើងតាមកោះទេ

ព្រះសីហនុ៖ «រយៈពេលប៉ុន្មានខែនេះ រហូតមកដល់ថ្ងៃទី១០ ខែកញ្ញា ឆ្នាំ២០២២ គឺជារដូវកាលមិនសូវមានភ្ញៀវធ្វើដំណើរ (Low season) និងម្យ៉ាវិញទៀត ដោយមានការប្រកាសឱ្យប្រុងប្រយ័ត្នពីការប្រែប្រួលអាកាសធាតុផងនោះ ទើបមិនសូវមាន ភ្ញៀវធ្វើដំណើរចុះឡើងទៅមកតាមបណ្ដាកោះ នានា លើផ្ទៃសមុទ្រក្នុងដែនសមុទ្រកម្ពុជា ទេ»។ ចំពោះការធ្វើចរាចរណ៍ដឹកជញ្ជូនភ្ញៀវតាមជលយាន គឺនៅដំណើរការជាធម្មតា តែដោយមានការប្រុងប្រយ័ត្នខ្ពស់ ទោះបីស្ថានភាព ធាតុអាកាសមិនសូវអាប់អួក្ដី គឺខាងសមាគម មានការសហការគ្នាល្អជាមួយសមត្ថកិច្ចពាក់ព័ន្ធ ក្នុងការធ្វើការត្រួតពិនិត្យតាម ដានធាតុអាកាស ដើមទី (នៅដីគោក) និងចុងទី (នៅកោះ) ដោយប្រុងប្រយ័ត្នខ្ពស់ ប្រសិនបើ មានខ្យលរលកធំៗ គឺត្រូវមានការពន្យាជើង ចេញដំណើររង់ចាំដល់ពេលស្ងប់ទើបចេញដំណើរ។ នេះជាកាបញ្ជាក់ឱ្យដឹងពីលោក ម៉ុត ភារី ជំនួយការសមាគមដឹកជញ្ជូន ទេសចរណ៍ជលយានខេត្ដព្រះសីហនុ។ទាក់ទិនទៅនឹងការប្រែប្រួលធាតុអាកាសនេះ លោក ហេង សោភ័ណរិទ្ធ ប្រធានមន្ទីរធនធានទឹក និងឧតុនិយម ខេត្ដព្រះសីហនុ ប្រាប់ឱ្យដឹងថា យោងតាមការផ្សាយរបស់ក្រសួងធនធានទឹក និងឧតុនិយម ចុះថ្ងៃទី៦ ខែកញ្ញា ឆ្នាំ២០២២ ស្ដីពីស្ថានភាពធាតុអាកាស (ថ្ងៃទី៧-១៣ ខែកញ្ញា ឆ្នាំ២០២២) កម្ពុជា ទទួលរងឥទ្ធិពលពីប្រព័ន្ធ សម្ពាធទាប (ITCZ) សម្ពាធទាប និងខ្យល់មូសុងនិរតីបក់ក្នុងល្បឿនពីមធ្យមទៅបង្គួរ។ ស្ថានភាពបែបនេះ នឹងធ្វើឲ្យតំបន់ទំនាបកណ្តាល មានសីតុណ្ហភាពចន្លោះពី ២៣-៣៥ºC នឹងអាចមានភ្លៀងនៅក្នុងកម្រិតពីមធ្យមទៅបង្គួរ ក្នុងនោះតំបន់ខ្លះក៏មានភ្លៀងធ្លាក់ច្រើន ដោយអន្លើលាយ ឡំទៅដោយផ្គរ រន្ទះ និងខ្យល់កន្ត្រាក់។ តំបន់ខ្ពង់រាប មានសីតុណ្ហភាពចន្លោះពី២២-៣៤ºC នឹងអាចមាន ភ្លៀងនៅក្នុងកម្រិតពី មធ្យមទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។ តំបន់មាត់សមុទ្រ មានសីតុណ្ហភាព ចន្លោះពី២២-៣៣°C នឹងអាច មានភ្លៀងនៅក្នុងកម្រិតពីមធ្យមទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។ ដោយឡែកសម្រាប់ប្រជាពលរដ្ឋរស់នៅបណ្តាខេត្តនៅក្នុងភូមិសាស្តជាប់តំបន់ជួរភ្នំទីទំនាប និងជាប់ផ្លូវទឹកសូមបង្កើនការ ប្រយ័ត្នខ្ពស់ចំពោះជំនន់ទឹកភ្លៀង និងនៅលើផ្ទៃសមុទ្រ មានភ្លៀងខ្យល់ ដែលនឹងអាចមានរលកសមុទ្រខ្ពស់៕

មុនរដូវបុណ្យភ្ជុំបិណ្ឌឆ្នាំនេះ ភ្ញៀវទេសចរណ៍មានការថយចុះនៅក្នុងខេត្តកំពង់ឆ្នាំង

កំពង់ឆ្នាំង៖ បណ្តារមណីយដ្ឋានទាំងអស់ក្នុងខេត្តកំពង់ឆ្នាំង បានបង្ហាញនូវសញ្ញាធ្លាក់ក្នុងរយៈពេលប៉ុន្មានខែចុងក្រោយនេះ ។ មូលហេតុចម្បងនៃការថយចុះ គឺដោយសាររយៈពេលជារដូវវស្សា ដែលមានភ្លៀងធ្លាក់ជោកជាំរំខានដល់ការធ្វើដំណើរកម្សាន្តរបស់ភ្ញៀវទេសចរជាតិ និងអន្តរជាតិ ។អាជីវករលក់ដូរនៅតាមរមណីដ្ឋានមួយចំនួនក្នុងខេត្ត បានឱ្យដឹងថា ក្រោយពីមានជម្ងឺកូវីដ១៩ បានធ្វើអោយមានការប៉ះពាល់មកលើមុខរបរពួកគាត់តាំងពីខែកុម្ភៈ ឆ្នាំ២០២០ រហូតមក។ ក៏ប៉ុន្តែមកដល់ពេលនេះ មានភ្លៀវតិចតួចណាស់ដែលបានមកលេង តាមទីតាំងរមណីយដ្ឋាននានាក្នុងខេត្តកំពង់ឆ្នាំង។ ទាក់ទងនឹងការធ្លាក់ចុះនៃចំនួនភ្ញៀវទេសចរណ៍នេះ គឺបណ្តាលមកពីជម្ងឺកូវីដ១៩នាពេលកន្លងមក ក៏ដូចជារដូវភ្លៀងខ្លាំងបណ្តាលអោយភ្ញៀវទេសចរណ៍មិនអាចធ្វើដំណើរមកលេងបាន។លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង បានឱ្យដឹងថា រមណីយដ្ឋានធម្មជាតិ និងកន្លែងកម្សាន្តនានានៅក្នុងខេត្តកំពង់ឆ្នាំងរួមមាន សួនច្បារសម្ដេចចៅហ្វាវាំង គង់ សំអុល , រមណីយដ្ឋានធម្មជាតិភ្នំរាប់បាត្រ , រមណីយដ្ឋានធម្មជាតិទំនប់ទឹកគង្គា , រមណីយដ្ឋានធម្មជាតិទឹកធ្លាក់ថ្មក្រាល , រមណីយដ្ឋានធម្មជាតិទឹកធ្លាក់ស្រែអំពិល , រមណីយដ្ឋានទំនប់ទឹក២០ឧសភា , រមណីយដ្ឋានទំនប់ទឹកអាចាំង , រមណីយដ្ឋានវត្តព្រះធាតុ , រមណីយដ្ឋានឈ្វាំងសែនជ័យ , សង្ក្រាន្តស្រុកកំពង់លែង , រមណីយដ្ឋានវត្តក្រឡែងកែង និងវត្តទំព័រស្រុកសាមគ្គីមានជ័យ ។ រមណីយដ្ឋានទាំងអស់សុទ្ធតែជារមណីយដ្ឋានធម្មជាតិ ដែលបានទាក់ទាញភ្ញៀវទេសចរជាច្រើនចូលមកកម្សាន្តទាំងរដូវចូលឆ្នាំខ្មែរ ចូលឆ្នាំចិន រដូវបុណ្យភ្ជុំបិណ្ឌជាដើម ។ រមណីយដ្ឋានទាំងនេះ ត្រូវបានដំណើរដោយសហគមន៍ទេសចរណ៍ធម្មជាតិ ដែលមានការយកចិត្តទុកដាក់ការពារ ពីក្រុមសន្តិសុខនៅទីនោះសម្រាប់ភ្ញៀវជាតិ និងអន្តរជាតិចូលមកកម្សាន្ត ។ រយៈពេលប៉ុន្មានខែចុងក្រោយនេះ ចំនួនភ្ញៀវទេសចរណ៍បានថយចុះ ប៉ុន្តែការការធ្លាក់ចុះដោយសាររដូវនេះជារដូវវស្សា មានភ្លៀងធ្លាក់ច្រើនដែលរំខានដល់ដំណើរកម្សាន្តរបស់ភ្ញៀវទេសចរណ៍ ។ ជាក់ស្តែងនៅចុងសប្តាហ៍ទី១នៃខែកញ្ញា ឆ្នាំ២០២២នេះ ចំនួនភ្ញៀវទេសចរណ៍ដែលមកកម្សាន្តនៅរមណីយដ្ឋាននានានៃខេត្តកំពង់ឆ្នាំង មានចំនួន១.៦៧៦នាក់ ក្នុងនោះទេសចរបរទេស១៧នាក់ ។ អភិបាលខេត្តកំពង់ឆ្នាំង ក៏ដូចជាប្រធានមន្ទីរទេសចរណ៍ខេត្តកំពង់ឆ្នាំង បានអំពាវនាវដល់ភ្ញៀវទេសចរណ៍ដែលចូលមកកម្សាន្តនៅក្នុងរមណីយដ្ឋានធម្មជាតិទាំងអស់ក្នុងខេត្តកំពង់ឆ្នាំង សូមចូលរួមថែរក្សាអនាម័យបរិស្ថានឱ្យបានល្អ ៕ អត្ថបទ៖ ហុង វាស្នា

មៀនប៉ៃលិន ឬតាង៉ែន ត្រូវបានអនុញ្ញាតឱ្យនាំចេញទៅកាន់ប្រទេសចិនជាផ្លូវការ

ប៉ៃលិន៖ រដ្ឋបាលគយប្រទេសចិន បានអនុម័តបញ្ជីរាយឈ្មោះចម្ការ និងរោងចក្រវេចខ្ចប់ផ្លែឈើក្នុងការនាំចេញទៅកាន់ប្រទេសចិន ខណៈការនាំចេញអាចនឹងធ្វើនៅចុងខែកញ្ញា ឬដើមខែតុលា។មៀនប៉ៃលិន ឬតាង៉ែន ត្រូវបានអនុញ្ញាតឱ្យនាំចេញជាផ្លូវការទៅកាន់ប្រទេសចិន បន្ទាប់ពីរដ្ឋបាលគយប្រទេសចិនអនុម័តបញ្ជីរាយឈ្មោះចម្ការ និងរោងចក្រវេចខ្ចប់ផ្លែឈើក្នុងការនាំចេញទៅកាន់ប្រទេសចិន។ នេះបើយោងតាមសេចក្តីប្រកាសព័ត៌មានរបស់ស្ថានទូតចិនប្រចាំកម្ពុជា នៅថ្ងៃទី០៨ ខែកញ្ញា ឆ្នាំ២០២២។យោងតាមបញ្ជីរាយឈ្មោះចម្ការ និងរោងចក្រវេចខ្ចប់ផ្លែឈើក្នុងការនាំចេញទៅកាន់ប្រទេសចិន ដែលចេញផ្សាយដោយរដ្ឋបាលគយប្រទេសចិន បានឱ្យដឹងថា ក្នុងបញ្ជីរាយឈ្មោះខាងលើបានបន្ថែមឈ្មោះចម្ការ និងរោងចក្រវេចខ្ចប់ផ្លែមៀនកម្ពុជា ដែលត្រូវបានអនុញ្ញាតឱ្យនាំចេញទៅកាន់ប្រទេសចិនហើយ មានន័យថា ដំណាំមៀនកម្ពុជាបានបញ្ចប់នីតិវិធីទាំងស្រុងក្នុងការនាំចេញទៅកាន់ប្រទេសចិន និងអាចនាំចេញទៅទីផ្សារចិនបាន។ស្ថានទូតចិនប្រចាំកម្ពុជា បានបញ្ជាក់បន្ថែមថា ចម្ការផ្លែឈើដែលបានចុះបញ្ជីចំនួន ៧៤កន្លែង និងរោងចក្រវេចខ្ចប់ចំនួន ០៨កន្លែង ត្រូវបានអនុញ្ញាតដោយភាគីចិន ក្នុងការនាំចេញផ្លែមៀនទៅកាន់ប្រទេសចិន។ លើសពីនេះ ចម្ការដំណាំស្វាយចំនួន ៧៥កន្លែង និងរោងចក្រវេចខ្ចប់ដំណាំស្វាយចំនួន ០២កន្លែងផ្សេងទៀត ក៏ត្រូវបានបន្ថែមផងដែរ។ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការនាំចេញផ្លែមៀន ទៅកាន់ប្រទេសចិន អាចនឹងត្រូវធ្វើឡើងនៅចុងខែកញ្ញា ឬដើមខែតុលា។ រហូតមកដល់បច្ចុប្បន្ននេះ កម្ពុជាមានផ្លែឈើធំៗចំនួន០៣ប្រភេទហើយ ដែលអាចនាំចេញទៅកាន់ប្រទេសចិន រួមមាន ដំណាំចេក ស្វាយ និងមៀន។ក្នុងឆ្នាំ២០២១ ដំណាំមៀននៅទូទាំងប្រទេស មានផ្ទៃដីដាំដុះសរុបចំនួន ១២ ៨៣៧ហិចតា ផ្ទៃដីប្រមូលផលមានចំនួន១០ ៥៦៥ហិចតា ដោយទទួលទិន្នផលជាមធ្យមចំនួនជាង ១២តោនក្នុងមួយហិចតា ដែលមានបរិមាណផលិផលសរុបប្រមាណ ១៣១ ៤៩៨តោន៕អត្ថបទ៖ ជា វណ្ណៈ

ក្រសួងការងារ ប្រើប្រាស់ប្រាក់បុរេប្រទានរបស់រដ្ឋ បើកប្រាក់ខែដល់កម្មកររោងចក្រដែលថៅកែរត់ចោល

ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រើប្រាស់ប្រាក់បុរេប្រទាន របស់រដ្ឋាភិបាល លើការបើកប្រាក់ខែដល់កម្មករ កម្មការិនីរោងចក្រ យ៉ៅ ថៃ ស៊ូ ខូអិលធីដី ចំនួនជាង ១០០នាក់ ដែលថៅកែរត់ចោល។ការដោះស្រាយបើកប្រាក់ខែនេះ ត្រូវបានធ្វើឡើង កាលពីរសៀលថ្ងៃទី៧ ខែកញ្ញា ឆ្នាំ២០២២ នៅទីស្តីការក្រសួង ដោយមានការសម្របសម្រួលដោយមន្រ្តីជាន់ខ្ពស់ក្រសួងការងារ និងកម្មករកម្មការិនីរោងចក្រ ខាងលើនេះ ដែលមានទីតាំងស្ថិតនៅភូមិព្រៃស្ពឺ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។មានកម្មករនិយោជិតចំនួនសរុបជាង ១០០នាក់ បានមកបើក និងទទួលប្រាក់បុរេប្រទានរបស់រដ្ឋាភិបាលគ្រប់ចំនួនហើយ ក្នុងនោះនៅសល់ចំនួនតែជាង ១០នាក់ប៉ុណ្ណោះដែលមិនទាន់បានមកទាក់ទងក្រសួង ។ក្រោយទទួលបានប្រាក់ខែក្រោមយន្តការរបស់ក្រសួងការងារ ក្រុមកម្មករកម្មការិនី បានបង្ហាញនូវទឹកមុខសប្បាយរីករាយ និងសម្តែងការអរគុណជូនចំពោះប្រមុខថ្នាក់ដឹកនាំនៃរាជរដ្ឋាភិបាលកម្ពុជា ដោយលើកឡើងថា ក្រៅពីការផ្តល់ជូននូវដំណោះស្រាយហើយ ពួកគាត់ក៏ទទួលបានព័ត៌មានអំពីទីផ្សារការងារ ក៏ដូចជាតម្រូវការកម្លាំងពលកម្មផ្សេងៗទៀតនៅតាមបណ្តារោងចក្រគ្រប់រាជធានីខេត្តពីក្រសួងការងារ។ពាក់ព័ន្ធដំណោះស្រាយបញ្ហាខាងលើនេះ រវាងរដ្ឋាភិបាល និងកម្មករនិយោជិត លោក ឡុង សុផាត ប្រធានសហព័ន្ធសហជីពសំឡេងយុវជនខ្មែរ យល់ឃើញថា ករណីនេះ អាចនឹងជារឿងទម្លាប់មិនល្អសម្រាប់និយោជកខិលខូចមួយចំនួន ដែលបានកំពុងមានគំនិតកេងប្រវ័ញ្ចលើរាជរដ្ឋាភិបាល ជាពិសេសកេងប្រវ័ញ្ចកម្មករនិយោជិត។ លោក បន្តថា នៅពេលកម្មករនិយោជិតមានអតីតភាពច្រើន និយោជកមួយចំនួន អាចមានគំនិតខិលខូចរត់ចោលកម្មករតទៅទៀត ដោយសំអាងថា រាជរដ្ឋាភិបាល ប្រាកដនឹងផ្តល់ប្រាក់បុរេប្រទានជំនួសទៅឲ្យកម្មករ៕ អត្ថបទ៖ ឈិត បូរ៉ាវី

ជប៉ុនសរសើរាជរដ្ឋាភិបាលកម្ពុជា ផ្តល់ភាពកក់ក្តៅដល់វិនិយោគិនគ្រប់រូប

ភ្នំពេញ៖ ឯកឧត្តមអគ្គរដ្ឋទូត ថ្លែងនូវការកោតសរសើរ ចំពោះក្រសួងស្ថាប័នពាក់ព័ន្ធ បានខិតខំប្រឹងប្រែង ប្រកបដោយស្មារតីទទួលខុសត្រូវខ្ពស់ សម្របសម្រួល និងផ្តល់នូវការឆ្លើយតបចំពោះក្តីកង្វល់របស់វិនិយោគិនជប៉ុន ដែលសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការថែទាំ និងផ្តល់ភាពកក់ក្តៅដល់វិនិយោគិនគ្រប់រូប។ឯកឧត្តម ម៉ាសាហ៊ីរ៉ូ មីខាមី (Masahiro MIKAMI) ឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសជប៉ុនប្រចាំកម្ពុជា នៅក្នុងកិច្ចប្រជុំលើកទី ២៤ នៃគណៈកម្មាធិការចម្រុះកម្ពុជា-ជប៉ុន នៅថ្ងៃទី ៧ ខែកញ្ញា ឆ្នាំ ២០២២ នេះ បានថ្លែងនូវការអបអរសាទរចំពោះការដាក់ឱ្យប្រើប្រាស់នូវច្បាប់វិនិយោគថ្មី និងបានថ្លែងនូវការកោតសរសើរ ចំពោះក្រសួងស្ថាប័នពាក់ព័ន្ធទាំងអស់ ដែលកន្លងមកបានខិតខំប្រឹងប្រែងប្រកបដោយស្មារតីទទួលខុសត្រូវខ្ពស់ ក្នុងការសម្របសម្រួល និងផ្តល់នូវការឆ្លើយតបប្រកបដោយភាពទន់ភ្លន់ ចំពោះក្តីកង្វល់ និងសំណូមពររបស់វិនិយោគិនជប៉ុន ដោយកត្តាទាំងនេះ សបញ្ជាក់ឲ្យឃើញ ពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជាក្នុងការថែទាំ និងផ្តល់ភាពកក់ក្តៅដល់វិនិយោគិនគ្រប់រូប។ ចំណែកប្រធានសមាគមធុរកិច្ចជប៉ុននៅកម្ពុជា (JBAC) ក៏បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានខិតខំប្រឹងប្រែងដោះស្រាយរាល់បញ្ហាប្រឈមនានា ដើម្បីបង្កើតនូវបរិយាកាសវិនិយោគដ៏ល្អប្រសើរលើគ្រប់វិស័យ និងបានថ្លែងនូវការប្ដេជ្ញាចិត្តរបស់វិនិយោគិនជប៉ុន ក្នុងការបន្តវិនិយោគបន្ថែមទៀត ដើម្បីរួមចំណែកស្តារសេដ្ឋកិច្ចកម្ពុជាក្រោយវិបត្តិជំងឺកូវីដ-១៩។ក្នុងជំនួបនេះ,ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា ក.អ.ក បានវាយតម្លៃខ្ពស់ និងកោតសរសើរចំពោះសកម្មភាពវិនិយោគរបស់វិនិយោគិនជប៉ុនទាំងអស់ ដែលជានិច្ចកាលតែងផ្តល់ទំនុកចិត្តខ្ពស់មកលើរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចតេជោ នាយករដ្ឋមន្ត្រី ក្នុងការធានានូវសុខសន្តិភាព ស្ថិរភាពនយោបាយ និងសេដ្ឋកិច្ច ដែលជាកត្តាចាំបាច់ ដើម្បីបង្កើតបរិស្ថានវិនិយោគដែលមានភាពអំណោយផល។សូមជម្រាបថា គិតត្រឹមខែ សីហា ឆ្នាំ ២០២២ នេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគជប៉ុន មានចំនួន ១៤៩គម្រោង ក្នុងទុនវិនិយោគសរុបប្រមាណ ២,៩ ប៊ីលានដុល្លារអាមេរិក៕អត្ថបទ៖ សុន រ៉ាឌី