BTV NEWS

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់លានដុល្លារកើនឡើង ៤,៣%

ក្នុងត្រីមាសទី១ កម្ពុជានាំចេញសំបកកង់ឡាន និងគ្រឿងបន្លាស់ផ្សេងៗមានទឹកប្រាក់ជាង ៥៨០ លានដុល្លារ

ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈម៉ាស៊ូតបន្តធ្លាក់ចុះ

សេដ្ឋកិច្ច និង កសិកម្ម

រដ្ឋមន្រ្តីពាណិជ្ជកម្ម ដឹកនាំកិច្ចប្រជុំពិសេសថ្នាក់រដ្ឋមន្រ្តីសេដ្ឋកិច្ចអាស៊ាន នៅឥណ្ឌូនេស៊ី

ភ្នំពេញ៖ ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម ក្នុងនាមជាប្រធានកិច្ចប្រជុំរដ្ឋមន្រ្តីសេដ្ឋកិច្ចអាស៊ាន ក្នុងឆ្នាំ២០២២ បានដឹកនាំកិច្ចប្រជុំពិសេសថ្នាក់រដ្ឋមន្រ្តីសេដ្ឋកិច្ចអាស៊ាន (ASEAN ECONOMIC MINISTERS’ SPECIAL MEETING 2022) នៅទីក្រុងបាលី ប្រទេសឥណ្ឌូនេស៊ី មានការចូលរួមពីថ្នាក់រដ្ឋមន្ត្រីសេដ្ឋកិច្ចអាស៊ាន ។នៅក្នុងកិច្ចប្រជុំ កាលពីល្ងាចថ្ងៃទី១៨ ខែឧសភា ឆ្នាំ២០២២ ឯកឧត្តមរដ្ឋមន្រ្តី មានប្រសាសន៍ថា កិច្ចប្រជុំពិសេសនេះ មានគោលបំណងដើម្បីពិភាក្សានិងផ្តោះប្តូរមតិយោបល់រវាងប្រទេសសមាជិកអាស៊ាននីមួយៗ អំពីបញ្ហាតំបន់ និងសាកលថ្មីៗ ដែលកំពុងជះឥទ្ធិពលដោយផ្ទាល់ ឬប្រយោលមកលើតំបន់អាស៊ាន ជាពិសេសក្នុងអំឡុងពេលដែលអាស៊ានកំពុងខិតខំប្រឹងប្រែងស្តារសេដ្ឋកិច្ចឡើងវិញ។កិច្ចប្រជុំនេះ ត្រូវបានប្រព្រឹត្តទៅស្របពេលដែលស្ថានភាពនៃការរីករាលដាលជម្ងឺកូវីដ១៩ បានថមថយចុះ និងមានការលើកលែងការរឹតត្បិតចំពោះការធ្វើដំណើរនៅតាមបណ្តាប្រទេសអាស៊ាន។ឯកឧត្តម បន្ថែមថា កិច្ចប្រជុំបានកត់សម្គាល់ និងពិភាក្សាលើរបៀបវារៈសំខាន់ៗមួយចំនួន រួមមាន៖ ស្ថានភាពសេដ្ឋកិច្ចសកល, បច្ចុប្បន្នភាពនៃការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP), ការត្រៀមរបស់អាស៊ានសម្រាប់សន្និសីទរដ្ឋមន្ត្រីលើកទី១២ នៃអង្គការពាណិជ្ជកម្មពិភពលោក,វិធានការនានាផ្នែកបរិស្ថាន និងបម្រែបម្រួលអាកាសធាតុដែលពាក់ព័ន្ធនឹងវិស័យពាណិជ្ជកម្ម,គំនិតផ្តួចផ្តើមក្នុងទម្រង់ជាគម្រោងអាស៊ាន និងបញ្ហាផ្សេងៗទៀត។ឯកឧត្តមរដ្ឋមន្រ្តី បានបញ្ជាក់ថា ជាការកត់សម្គាល់ សមាជិកអង្គប្រជុំទាំងអស់បានចូលរួមយ៉ាងសកម្មក្នុងការផ្លាស់ប្តូរទស្សនៈ មតិយោបល់ និងការពិភាក្សា ទៅលើរបៀបវារៈនីមួយៗ ដែលធ្វើឱ្យកិច្ចប្រជុំនេះបញ្ចប់ទៅយ៉ាងរលូន និងប្រកបដោយផ្លែផ្កាគួរឱ្យកត់សម្គាល់៕អត្ថបទ៖ ឈិតបូរ៉ាវី

កម្ពុជា-ចិន ពន្លឿនការស្តារសង្គម-សេដ្ឋកិច្ច ក្រោយវិបត្តិកូវីដ ដើម្បីបើកទីផ្សារទូលាយជាងមុន

ភ្នំពេញ៖ កម្ពុជា-ចិន នឹងបន្តជំរុញកិច្ចសហការលើគ្រប់វិស័យ ជាពិសេសវិស័យហិរញ្ញវត្ថុ និងពាណិជ្ជកម្ម ក្នុងគោលបំណងពន្លឿនការស្ដារ សកម្មភាពសង្គម-សេដ្ឋកិច្ចឡើងវិញក្រោយវិបត្តិនៃជំងឺកូវីដ-១៩ ដើម្បីបើកឱ្យបានទូលំទូលាយជាងមុន សម្រាប់ទីផ្សារ និងលំហូរពាណិជ្ជកម្មសេរី។ឯកឧត្តម ស៊ាង ថៃ រដ្ឋលេខាធិការក្រសួងពាណិជ្ជកម្ម ថ្លែងលើកឡើងក្នុងពិធីបើកវទិកាធុរកិច្ច និងវិនិយោគកម្ពុជា-ចិន ក្រោមប្រធាន បទ "ការចែករំលែកកាលានុវត្តភាពអភិវឌ្ឍន៍ និងបង្កើតវិបុលភាពតំបន់” នៅថ្ងៃទី១៨ ខែឧសភា ឆ្នាំ២០២២ នេះថា ជុំវិញការធ្វើពាណិជ្ជកម្មរវាងកម្ពុជា និងចិន ក្រោយវិបត្តិនៃជំងឺកូវីដ-១៩ នេះ ភាគីទាំងពីរនឹងបន្តជំរុញកិច្ចសហការ លើគ្រប់វិស័យ ជាពិសេសវិស័យហិរញ្ញវត្ថុ និងពាណិជ្ជកម្ម ក្នុងគោលបំណងពន្លឿនការស្ដារសកម្មភាពសង្គម-សេដ្ឋកិច្ចឡើងវិញ គឺតាមរយៈ ការបើកឱ្យបានទូលំទូលាយជាងមុន នូវទីផ្សារ និងលំហូរពាណិជ្ជកម្មសេរី ក៏ដូចជាសម្រួលដល់លំហូរវិនិយោគ ដើម្បីអនុញ្ញាតឱ្យកម្ពុជាក៏ដូចជាប្រទេសផ្សេងទៀតក្នុងតំបន់ មានលទ្ធភាពអាចជំរុញការនាំចេញផលិតផលសក្តានុពល និងទទួលបានធនធានហិរញ្ញវត្ថុបន្ថែមទៀត។ក្នុងពិធីនេះដែរ, ឯកឧត្តមបណ្ឌិត តាន់ ម៉ូនីវណ្ណ អនុប្រធានសភាពាណិជ្ជកម្មកម្ពុជា ថ្លែងថា ក្រោយវិបត្តិកូវីដ១៩ ចាប់នៅចុងឆ្នាំ២០២១ និងឆ្នាំ២០២២ នេះ ការនាំចេញរបស់កម្ពុជាបានចាប់ផ្តើមកើនឡើងវិញ ជាក់ស្តែងបន្ទាប់ពីរាជរដ្ឋាភិបាលបានចាក់វ៉ាក់សំាង ក្នុងទំាងអ្នកដាំដុះ និងអ្នកប្រមូលទិញ បានចាប់ផ្តើមអាជីវកម្មរបស់ខ្លួនវិញ។សម្រាប់ការនាំចេញ កម្ពុជាគឺជាប្រទេសមួយអាចផលិតសម្រាប់ការនាំចេញបាន ខណៈដែលរាជរដ្ឋាភិបាលបានជម្រុញ លើកកម្ពស់ និងគិតគូរគ្រប់ជ្រុងជ្រោយ ដែលជាឱកាសសម្រាប់វិស័យឯកជនហើយ សម្រាប់បង្កើតសក្តានុពលផលិត និងការនាំជេញរបស់ខ្លួន។សូមបញ្ជាក់ថា៖ ទំហំពាណិជ្ជកម្មសរុបកម្ពុជា-ចិនក្នុងឆ្នាំ ២០២១ សម្រេចបានទំហំទឹកប្រាក់ប្រមាណ ១១ ១៩៤ លានដុល្លារអាមេរិក ក្នុងនោះកម្ពុជានាំចេញទៅប្រទេសចិន បានជាង ១ ៥១០ លានដុល្លារអាមេរិក និងនាំចូលពីប្រទេសចិនមកវិញជាង ៩ ៦៨៤ លានដុល្លារអាមេរិក។បន្ថែមពីនេះទៀត កម្ពុជាបានបន្តធ្វើកិច្ចសហប្រតិបត្តិការជាមួយប្រទេស ចិន លើកិច្ចការជាច្រើនទាក់ទងនឹងពាណិជ្ជកម្មមានដូចជា៖ បានបង្កើតមជ្ឈមណ្ឌលពាណិជ្ជកម្មឯកជនកម្ពុជា ចំនួន ០៩ ទីតាំងនៅតាម ទីក្រុងធំៗមួយចំនួននៃប្រទេសចិន ដើម្បីផ្សព្វផ្សាយពីផលិតផលសក្តានុពលកម្ពុជា ផ្សព្វផ្សាយពីវប្បធម៌ ទេសចរណ៍ និងគោលនយោ បាយពាណិជ្ជកម្ម និងវិនិយោគរបស់កម្ពុជា និងជំរុញការនាំចេញទៅទីផ្សារចិន៕អត្ថបទ៖ សុន រ៉ាឌី

អភិបាលខណ្ឌដូនពេញ៖ កម្លាំងគណៈបញ្ជាការឯកភាព ត្រូវប្រចាំការជាប់ជាប្រចាំ ដើម្បីទទួលសំណូមពរប្រជាពលរដ្ឋមិនថាយប់ ឬថ្ងៃ

ភ្នំពេញ៖ អភិបាលខណ្ឌដូនពេញ បានណែនាំដល់កម្លាំងគណៈបញ្ជាការឯកភាពសង្កាត់ ខណ្ឌ ត្រូវប្រចាំការជាប់ជាប្រចាំ២៤ម៉ោងលើ២៤ម៉ោង នៅទីស្នាក់ ដើម្បីបំរើសេវាសាធារណៈ និងទទួឡសំណូមពររបស់ប្រជាពលរដ្ឋមិនថាយប់ ឬថ្ងៃ។ថ្លែងក្នុងកិច្ចប្រជុំបង្កើតគណៈបញ្ជាការសន្តិសុខអចិន្ត្រៃយ៍ របស់គណៈបញ្ជាការឯកភាពខណ្ឌដូនពេញ នៅសាលាខណ្ឌដូនពេញ នៅព្រឹកថ្ងៃទី១៨ ខែឧសភាឆ្នាំ២០២២ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានណែនាំដល់កម្លាំងគណៈបញ្ជាការឯកភាពណែនាំមន្រ្តីសមត្ថកិច្ច និងអាជ្ញាធរទាំងអស់ឲ្យយកចិត្តទុកដាក់បំរើសេវាសាធារណះ សេវាសន្តិសុខ សេវាផ្សេងៗជាតម្រូវការប្រចាំថ្ងៃរបស់ប្រជាពលរដ្ឋឲ្យបានត្រឹមត្រូវ។លោកអភិបាល បានបន្តទៀតថា ដើម្បីធនាបំរើការងារ បានជោគជ័យ កម្លាំងគណះបញ្ជាការឯកភាពខណ្ឌត្រូវពង្រឹងការងារសន្តិសុខឡើងវិញ ដោយត្រូវដាក់គោលដៅត្រួតពិនិត្យអាវុធជាតិផ្ទុះឡើងវិញទាំងយប់ទាំងថ្ងៃ និងត្រូវបង្កើនមុខសញ្ញាញៀនថ្នាំ ជនពនេចរគ្មានទីជំរកពិតប្រាកដនិងស្រ្តីរកស៊ីផ្លូវភេទជាដើម ក្នុងមូលដ្ឋានដែលបង្កហានិភ័យ ដើម្បីគ្រប់គ្រងជនទាំងនេះមិនឲ្យប្រព្រឹត្តល្មើសទាំងឡាយណាប្រាសចាកគន្លងច្បាប់។ជាចុងក្រោយ លោកបានបញ្ជាក់ថា កម្លាំងសង្កាត់និងប៉ុស្តិ៍ត្រូវយកចិត្តទុកដាក់ពីបញ្ហាសណ្ដាប់ធ្នាប់ ជាពិសេសក្នុងអំឡុងពេលយុទ្ធនាការឃោសនាមិនអនុញ្ញាតឲ្យមានការសង់រោងការ រោងបុណ្យ ឬពិធីផ្សេងៗលើទ្រូងផ្លូវឡើយ ព្រោះអាចប៉ះពាល់ការកកស្ទះផ្លូវរបស់គណបក្សនយោបាយនានា ធ្វើការដង្ហែក្បួនក្នុងមូលដ្ឋានខណ្ឌដូនពេញ៕ អត្ថបទ៖ កុម្ភៈ

រាជរដ្ឋាភិបាល ផ្តល់សហហិរញ្ញប្បទាន ១៥០លានដុល្លារ គាំទ្រការស្តារវិស័យទេសចរណ៍ឡើងវិញ

ភ្នំពេញ៖ កម្ពុជាសម្ពោធដាក់ឱ្យដំណើរការ គម្រោងសហហិរញ្ញប្បទានស្តារវិស័យទេសចរណ៍ ក្នុងកញ្ចប់ថវិកា ១៥០ លានដុល្លារអាម៉េរិក ដែលជាបដិភាគរវាងរាជរដ្ឋាភិបាល និងគ្រឹះស្ថានហិរញ្ញវត្ថុចូលរួមដើម្បីគាំទ្រដំណើរការអាជីវកម្មឡើងវិញ, ការកែលម្អ និងធ្វើទំនើបកម្មសេវាកម្ម, ការពង្រីកខ្លួន និងធ្វើពិពិធកម្មសេវាទេសចរណ៍ ដើម្បីត្រៀមទទួលភ្ញៀវទេសចរ បន្ទាប់ពីវិបត្តិនៃជំងឺកូវីដ-១៩ ថមថយទូទាំងសកលលោក។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការជាតិអភិវឌ្ឍន៍ទេសចរណ៍ ថ្លែងក្នុងពិធីសម្ពោធដាក់ឱ្យដំណើរការ «គម្រោងសហហិរញ្ញប្បទានស្តារវិស័យទេសចរណ៍» នៅថ្ងៃទី ១៧ ខែឧសភា ឆ្នាំ ២០២២នេះថា ខណៈដែលវិបត្តិនៃជំងឺកូវីដ-១៩ កំពុងថមថយ, វិស័យទេសចរណ៍ចាប់ផ្តើមមានសន្ទុះងើបឡើងវិញជាសកល ដោយប្រទេសភាគច្រើនបានបន្ធូរបន្ថយ នូវវិធានការរឹតបន្ដឹង ពាក់ព័ន្ធនឹងជំងឺកូវដ-១៩ និងបានលើកលែង ឬដកចេញនូវលក្ខខណ្ឌតម្រូវជាច្រើន សម្រាប់ការធ្វើដំណើរអន្តរជាតិ ។ ផ្អែកតាមការព្យាករណ៍របស់អង្គការទេសចរណ៍ពិភពលោក វិស័យទេសចរណ៍សកល នឹងត្រលប់ទៅរកគន្លងកំណើន ដូចពេលមុនវិបត្តិនៃជំងឺកូវីដ-១៩ នៅឆ្នាំ២០២៤ ខាងមុខ ។ ក្នុងន័យនេះ, ជាមួយនឹងកិច្ចអន្តរាគមន៍ដ៏សកម្មរបស់រាជរដ្ឋាភិបាល, វិស័យទេសចរណ៍កម្ពុជា ត្រូវបានព្យាករណ៍ថា នឹងមានកំណើន ១៦% ក្នុងឆ្នាំ២០២២, និង២៣% ក្នុងឆ្នាំ២០២៣ ។ឯកឧត្តម ឧបនាយករដ្ឋមន្ត្រី បន្តថា រាជរដ្ឋាភិបាល ចាត់ទុកវិស័យទេសចរណ៍ ជាក្បាលម៉ាស៊ីនកំណើនសេដ្ឋកិច្ចដ៏សំខាន់មួយ ហើយប្ដេជ្ញាគាំទ្រការស្តារ និងអភិវឌ្ឍន៍វិស័យនេះ ឱ្យបានល្អជាងស្ថានភាពមុនវិបត្តិនៃជំងឺកូវីដ-១៩ ទៅទៀត ដើម្បីឱ្យវិស័យនេះ ក្លាយជាសសរស្តម្ភមួយនៃសេដ្ឋកិច្ចជាតិ ដែលនឹងចូលរួមវិភាគទានដ៏សំខាន់ ក្នុងការផ្តល់ការងារ និងប្រាក់ចំណូលដល់ប្រជាពលរដ្ឋ។ដើម្បីសម្រេចគោលដៅនេះ,ការផ្តល់ហិរញ្ញប្បទានដល់សហគ្រាសនៅក្នុងវិស័យទេសចរណ៍ គឺជាវិធានការចាំបាច់ណាស់ ដើម្បីជួយឱ្យសហគ្រាសទាំងនេះអាចស្តារ, ងើប និងពង្រឹងភាពប្រកួតប្រជែងរបស់ខ្លួនឡើងវិញ ព្រមទាំងចូលរួមជាមួយរាជរដ្ឋាភិបាល ក្នុងការកែច្នៃវិស័យទេសចរណ៍ ឱ្យប្រកបដោយភាពទាក់ទាញកាន់តែខ្លាំងជាងមុន និងជាពិសេសប្រែក្លាយកម្ពុជាឱ្យទៅជាទិសដៅទេសចរណ៍ចម្បងមួយនៅក្នុងតំបន់ និងសកលលោក។ថវិកាទាំង ១៥០ លានដុល្លារអាម៉េរិក នៃ «គម្រោងសហហិរញ្ញប្បទានស្តារវិស័យទេសចរណ៍» ដែលនឹងត្រូវដាក់ឱ្យប្រើប្រាស់ក្នុងពេលនេះ គឺផ្តោតសំខាន់សម្រាប់តែវិស័យទេសចរណ៍តែមួយប៉ុណ្ណោះ ដើម្បីពង្រឹងសក្តានុពលនៃវិស័យទេសចរណ៍បន្ថែមទៀត និងចូលរួមសម្រេចចក្ខុវិស័យរបស់រាជរដ្ឋាភិបាលក្នុងការអភិវឌ្ឍវិស័យនេះ៕ អត្ថបទ៖ សុន រ៉ាឌី

ក្រសួងឧស្សាហកម្ម ដាក់ឱ្យប្រើប្រាស់មជ្ឈមណ្ឌលផ្ទុកទិន្នន័យ តម្លៃ១លានដុល្លារ

ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បង្កើតមជ្ឈមណ្ឌលសម្រាប់ផ្ទុកទិន្នន័យជាលើកដំបូង សម្រាប់ការរក្សាឯកសារប្រកបដោយសុវត្ថិភាព និងនិរន្តរភាពនៃឯកសារ និងទុកជាប្រយោជន៍សម្រាប់ការសិក្សាស្រាវជ្រាវ រៀនសូត្រ ការវិភាគទិន្នន័យ និងសម្រាប់អ្នកបន្តវេនក្រោយៗទៀត។ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការនូវ “មជ្ឈមណ្ឌលទិន្នន័យ “(Data Center)” របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១៦ ខែឧសភាឆ្នាំ២០២២នេះថា នេះមជ្ឈមនេះ មានសារៈសំខាន់ណាស់ សម្រាប់ផ្ទុកទិន្នន័យសំខាន់ៗ ពី១០ឆ្នាំ ២០ ឆ្នាំមុន រហូតដល់បច្ចុប្បន្ន និងអនាគត។បើទោះបីសមត្ថភាពមជ្ឈមណ្ឌលទិន្នន័យអាចផ្ទុកឯកសារពីពេលមុន និងទៅមុខទៀត បានរយៈពេល៣ឆ្នាំក៏ដោយ តែយើងអាចពង្រីកសមត្ថភាពរបស់វាជាបន្តបន្ទាប់ទៀត តាមធនធានដែលយើងមាន សម្រាប់ការបញ្ចូលនូវទិន្នន័យថ្មីៗបន្ត។ឯកឧត្ដមកិត្តិសេដ្ឋាបណ្ឌិត បន្ដថា ក្នុងយុគសម័យនៃការរីកចម្រើន ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ការរក្សាផ្ទុកទិន្នន័យផ្សេងៗកាន់តែមានសារៈសំខាន់ ពីព្រោះវាជាទីតាំងប្រមូលផ្តុំឯកសារ ងាយស្រួលស្វែងរកសម្រាប់ម្រូវការសិក្សា ស្រាវជ្រាវ រៀនសូត្រ នឹងក៏ជាមជ្ឈមណ្ឌលរក្សាសុវត្ថិភាពទិន្នន័យរបស់យើងបានជាសង្ងាត់ និងយូរអង្វែងផងដែរ ។ជុំវិញបញ្ហានេះ ឯកឧត្ដមទេសរដ្ឋមន្រ្តី ចម ប្រសិទ្ធ បានណែនាំឲ្យអង្គភាពក្រោមឱវាទទាំងអស់ ចាប់ផ្តើមប្រមែប្រមូលឯកសារផ្លូវការរបស់ខ្លួនដាក់បញ្ចូលក្នុងមជ្ឈមណ្ឌលទិន្នន័យនេះជាបន្ដបន្ទាប់ ដើម្បីរក្សាសុវត្ថភាព និងនិរន្តរភាពនៃឯកសារ និងទុកជាប្រយោជន៍សម្រាប់អ្នកបន្តវេនក្រោយៗទៀត។សូមរំលឹកថា កាលពីថ្ងៃទី ៦ ខែឧសភា ឆ្នាំ២០២២ កន្លងមកនេះ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជើញធ្វើជាអធិបតី និងជាសាក្សីនៃការចុះហត្ថលេខាលើអនុស្សរណៈយោគយល់គ្នា អំពីកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ (STI) និងការវិនិយោគនៃអនាគតកម្ពុជា រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) ជាមួយសភាពាណិជ្ជកម្មអន្តរជាតិនៃកម្ពុជា (IBC) និងជាមួយ Max Syndicate (តំណាងឲ្យ EZE Asia) ដោយមានការហត្ថលេខីនៃពិធីចុះហត្ថលេខា រវាងឯកឧត្ដម ហ៊ុល សៀងហេង អគ្គនាយកនៃអគ្គនាយកដ្ឋាន វិទ្យាសាស្ត្រ បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោក Poul Carey Clements ប្រធានសភាពាណិជ្ជកម្មអន្តរជាតិនៃកម្ពុជា (IBC) ៕អត្ថបទ៖ សុន រ៉ាឌី

កម្ពុជា សង្ឃឹមទទួលបានប្រព័ន្ធអនុគ្រោះ GSP ពីសហរដ្ឋអាម៉េរិក

ភ្នំពេញ៖ ប្រទេសកម្ពុជា រំពឹងថា នឹងទទួលបានប្រព័ន្ធអនុគ្រោះពន្ធ GSP ពីសហរដ្ឋអាម៉េរិក បន្ទាប់ពីអស់សុពលភាពនៅចុងឆ្នាំ២០២០ ខណៈពេលដែលការនាំចេញរបស់កម្ពុជា ទៅកាន់ទីផ្សារអាមេរិកបន្តកើនឡើង។ឯកឧត្តម ប្រាក់ សាខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានបង្ហាញក្តីសង្ឃឹមនេះ ក្នុងជំនួបជាមួយនឹងលោក អេនតូនី ប្លីងខេន រដ្ឋមន្ត្រីការបរទេសសហរដ្ឋអាម៉េរិក នៅរដ្ឋធានីវ៉ាស៊ីនតោន កាលពីសប្តាហ៍មុន។ប្រព័ន្ធអនុគ្រោះពន្ធទូទៅរបស់សហរដ្ឋអាម៉េរិក ដែលហៅកាត់ជាភាសាអង់គ្លេសថា GSP (Generalized System of Preferences) នៅកម្ពុជាបានផុតសុពលភាពនៅត្រឹមដំណាច់ឆ្នាំ២០២០មក។ ឯកឧត្តម ប្រាក់ សាខុន មានប្រសាសន៍ថា សង្ឃឹមថា ប្រព័ន្ធអនុគ្រោះពន្ធទូទៅ សម្រាប់កម្ពុជា នឹងត្រូវបានបន្តសុពលភាពជាថ្មីឡើងវិញ ដើម្បីគាំទ្របន្ថែមទៀត ដល់ការអភិវឌ្ឍសេដ្ឋកិច្ច និងកម្មករកម្ពុជា នៅក្នុងវិស័យកាត់ដេរ សំលៀកបំពាក់ និងស្បែកជើង ដែលមានភាគច្រើនជាស្ត្រី។សេចក្តីប្រកាសព័ត៌មានរបស់ក្រសួង បានបង្ហាញពីការត្រៀមខ្លួនរបស់អាម៉េរិក ក្នុងការគាំទ្របន្ថែមដល់រដ្ឋាភិបាលកម្ពុជា និងធ្វើការយ៉ាងសកម្មជាមួយកម្ពុជា ដើម្បីបង្កើនកិច្ចសហប្រតិបត្តិការខាងផ្នែកនយោបាយ សន្តិសុខ សេដ្ឋកិច្ច សង្គម និងវប្បធម៌។ក្នុងរយៈពេល ៤ខែដើមឆ្នាំ២០២២ កម្ពុជាសម្រេចទំហំពាណិជ្ជកម្ម ជាមួយសហរដ្ឋអាម៉េរិក បានប្រមាណ ៣ ០២៨លានដុល្លារ។ នេះបើយោងតាមស្ថិតិពាណិជ្ជកម្មទំនិញ ជាមួយប្រទេសសំខាន់ៗ របស់អគ្គនាយកដ្ឋានគយ និងរដ្ឋាករកម្ពុជា។ ទំនិញដែលកម្ពុជានាំទៅអាម៉េរិក មានតម្លៃរហូតដល់ជាង ២ ៩០០ លានដុល្លារ ខណៈទំនិញដែលកម្ពុជានាំចូលពីអាម៉េរិកវិញ មានត្រឹមជាង ១០០លានដុល្លារ៕អត្ថបទ៖ វណ្ណៈ

រដ្ឋមន្រ្តីកសិកម្ម ជំរុញអនុវត្តនីតិវិធីភូតគាមអនាម័យដែលជាគោលការណ៍គ្រឹះ សម្រាប់នាំចេញ

ស្ទឹងត្រែង៖ រដ្ឋមន្រ្តីក្រសួងកសិកម្ម បានលើកចិត្តដល់ក្រុមហ៊ុនចម្ការស្វាយ និងជំរុញអនុវត្តនីតិវិធីភូតគាមអនាម័យដែលជាគោលការណ៍គ្រឹះ សម្រាប់នាំចេញ។ថ្លែងក្នុងឱកាសចុះទៅពិនិត្យចម្ការស្វាយ នៅឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានគាំទ្រ និងលើកទឹកចិត្តដល់ក្រុមហ៊ុនឱ្យបន្តខិតខំលើការងារផលិតកម្មបន្ថែមទៀត ពិសេសការអនុវត្តនីតិវិធីភូតគាមអនាម័យដែលជាគោលការណ៍គ្រឹះ សម្រាប់នាំចេញ បើទោះសកម្មភាពនៃការនាំចេញបាននិងកំពុងតែប្រឈម ហើយនេះមិនមែនតែប្រទេសកម្ពុជាទេ តែជាបញ្ហាសកលដែលមិនអាចចៀសវាងបាន។ឯកឧត្តមរដ្ឋមន្រ្តី បានបញ្ជាក់ថា ក្រុមហ៊ុនក៏ត្រូវសហការជាមួយអគ្គនាយកដ្ឋានកសិកម្ម និងមន្ទីរកសិកម្មខេត្តធ្វើយ៉ាងណាឱ្យកិច្ចដំណើរការនៃការវិនិយោគនេះប្រព្រឹត្តទៅដោយរលូន និងទទួលបានជោគជ័យ។ភាពជោគជ័យនេះ មិនមែនសម្រាប់តែក្រុមហ៊ុនទេ គឺសម្រាប់សេដ្ឋកិច្ចជាតិ និងជាពិសេសប្រជាពលរដ្ឋនៅមូលដ្ឋានផ្ទាល់តាមរយៈការបង្កើតការងារមានការងារមានចំណូល គ្មានចំណាកស្រុកមានជីវភាពល្អប្រសើរទាំងនេះជាក្តីបំណងរបស់រាជរដ្ឋាភិបាល ដែលមានសម្តេចតេជោ ជានាយករដ្ឋមន្ត្រី ដែលតែងតែគាំទ្រ និងលើកទឹកចិត្ត បង្កើតលក្ខខណ្ឌអំណោយផលដល់វិនិយោគិនទាំងក្នុង និងក្រៅប្រទេស។ក្រុមហ៊ុន ហ្គ្រីន ស៊ី អេហ្គ្រីខលជ័រ បានចំណាយថវិកាជិត ៧០ លានដុល្លារ ក្នុងរយៈពេលជាង ៣ ឆ្នាំ ដើម្បីដាំដុះស្វាយ ៦ ប្រភេទ សម្រាប់នាំចេញទៅកាន់ប្រទេសចិន។នាយកចាត់ការទូទៅក្រុមហ៊ុន ហ្គ្រីន ស៊ី អេហ្គ្រីខលជ័រ បាននិយាយថា កម្មវត្ថុនៃផលិតកម្មស្វាយ របស់ក្រុមហ៊ុន គឺសម្រាប់នាំចេញទៅកាន់ប្រទេសចិន ដោយត្រូវឆ្លងកាត់ប្រទេសវៀតណាម ថៃ និងកំពង់ផែក្នុងខេត្តព្រះសីហនុ។ គិតមកទល់បច្ចុប្បន្ន ក្រុមហ៊ុនបានចំណាយថវិកាជិត ៧០ លានដុល្លារហើយ សម្រាប់ការវិនិយោគលើចម្ការស្វាយនេះ ដោយក្រុមហ៊ុនបានដាំដុះលើផ្ទៃដីសរុបចំនួន ១ ២០០ ហិកតា ហើយស្មើនឹង ១២ ភាគរយធៀបនឹងផែនការលើផ្ទៃដីទំហំ ៩ ៧៧២,១១៧៦ ហិកតា។លោក បានលើកឡើងថា បច្ចុប្បន្ន ក្រុមហ៊ុនបាននិងកំពុងរៀបចំមធ្យោបាយដឹកជញ្ជូន និងរួមទាំងទូត្រជាក់ផងដែរ ដើម្បីកាត់បន្ថយថ្លៃដើម។ ដោយឡែកការងារបច្ចេកទេស ក្រុមហ៊ុនបានដាក់ពាក្យចុះបញ្ជីចម្ការស្វាយនៅអគ្គនាយកដ្ឋានកសិកម្ម ហើយទទួលបានកិច្ចសហការល្អមកវិញគឺអគ្គនាយកដ្ឋានបានបញ្ជូនមន្ត្រីជំនាញចុះមកណែនាំអំពីបច្ចេកទេសដាំ ប្រមូលផល វេចខ្ចប់ និងជាពិសេសលក្ខខណ្ឌតម្រូវនៃភូតគាមអនាម័យ»៕ អត្ថបទ៖ វណ្ណៈ

កម្ពុជានាំទំនិញទៅអាម៉េរិកបាន ២ ៩០០លានដុល្លារ ក្នុងរយៈពេលបួនខែ

ភ្នំពេញ៖ ក្នុងរយៈពេលបួនខែឆ្នាំ ២០២២នេះ កម្ពុជានាំទៅអាម៉េរិក មានតម្លៃរហូតដល់ជាង ២ ៩០០លានដុល្លារ ខណៈទំនិញដែលកម្ពុជានាំចូលពីអាម៉េរិកវិញ មានត្រឹមជាង ១០០លានដុល្លារ។ នេះបើយោងតាមរបាយការណ៍អគ្គនាយកដ្ឋានពន្ធគយ និងរដ្ឋាករ។ចាប់ពីខែមករាដល់ខែមេសា កម្ពុជានាំទំនិញទៅទីផ្សារអាម៉េរិក សម្រេចបានក្នុងរង្វង់ទឹកប្រាក់ ២ ៩៣២លានដុល្លារ កើនរហូតដល់ ៥៣,៦ភាគរយ បើធៀបនឹងរយៈពេលដូចគ្នា២០២១។ ដោយឡែក ទំនិញដែលកម្ពុជានាំចូលពីអាម៉េរិកវិញ មានតម្លៃត្រឹម ១០៤លានដុល្លារប៉ុណ្ណោះ។ ស្ថិតិពាណិជ្ជកម្មទំនិញជាមួយប្រទេសសំខាន់ៗ របស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ការនាំចេញ-នាំចូលនេះ បានធ្វើឱ្យកម្ពុជា និងអាម៉េរិក សម្រេចទំហំពាណិជ្ជកម្មរួមគ្នា បានដល់ជាង ៣ ០២៨លានដុល្លារ ធ្វើឱ្យអាម៉េរិកក្លាយជាដៃគូពាណិជ្ជកម្មធំ លំដាប់លេខ២ ជាមួយកម្ពុជាបន្ទាប់ពីប្រទេសចិន ដែលមានទំហំជាង ៣ ៩៣០លានដុល្លារ ក្នុងពេល៤ខែមកនេះ។ ផ្អែកតាមរបាយការណ៍ខាងលើនេះ អាម៉េរិកគឺជាទីផ្សារលំដាប់ទី១ របស់កម្ពុជា ខណៈចិននាំចូលទំនិញពីកម្ពុជា មានត្រឹមជាង ៤២៣លានដុល្លារប៉ុណ្ណោះ។ជុំវិញទំនាក់ទំនងពាណិជ្ជកម្មទ្វេភាគីដ៏ល្អប្រសើរនេះ សម្តេច ហ៊ុន សែន ចង់ឃើញវត្តមានវិនិយោគិនអាម៉េរិកកាន់តែច្រើនថែមទៀតនៅកម្ពុជា ខណៈបណ្តាក្រុមហ៊ុនធំៗចំនួនរបស់អាម៉េរិក បានស្វែងយល់ពីសក្តានុពល និងភាពរីកចម្រើននៅកម្ពុជា។ក្រុមហ៊ុនធំៗទាំងនោះសម្លឹងឃើញឱកាសវិនិយោគបន្ថែមលើវិស័យរថយន្ត បច្ចេកវិទ្យា សុខាភិបាល ជាពិសេសវិស័យថាមពល បានមើលឃើញពីតម្រូវការទីផ្សារខ្ពស់នៅកម្ពុជា។ កាលថ្ងៃទី៥ ខែឧសភា ក្រុមប្រឹក្សាធុរកិច្ចអាម៉េរិក-អាស៊ាន ដឹកនាំដោយលោក Michael Michlalk អនុប្រធានជាន់ខ្ពស់នៃនាយកគ្រប់គ្រងប្រចាំតំបន់ នៃក្រុមប្រឹក្សាធុរកិច្ចអាម៉េរិក-អាស៊ាន លោក W.Patrick Murphy ឯកអគ្គរដ្ឋទូតអាម៉េរិកប្រចាំកម្ពុជា និងតំណាងក្រុមហ៊ុនអាម៉េរិកចំនួន១៣ បានជួបជាមួយសម្តេច ហ៊ុន សែន នៅទីក្រុងភ្នំពេញ ដើម្បីស្វែងយល់ពីសក្តានុពល ឱកាសបណ្តាក់វិនិយោគនៅកម្ពុជា៕ អត្ថបទ៖ វណ្ណៈ

អគ្គនាយកដ្ឋានពន្ធដារប្រមូលពន្ធ-អាករគ្រប់ប្រភេទ សម្រេចបានជាង ១ ៥០១លានដុល្លារ

ភ្នំពេញ៖ រយៈពេល៤ខែ ដើមឆ្នាំ ២០២២ អគ្គនាយកដ្ឋានពន្ធដារ ប្រមូលចំណូលពន្ធអាករគ្រប់ប្រភេទ តាមប្រព័ន្ធគ្រប់គ្រងទិន្នន័យអនឡាញ អនុវត្តបានចំនួនជាង ៦ ០៨២ ប៊ីលានរៀល ត្រូវប្រមាណជាង ១ ៥០១ លានដុល្លារ ដោយសម្រេចបាន ៥៣,២៧% នៃផែនការច្បាប់។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានបង្ហាញតួលេខចំណូលពន្ធនេះ ក្នុងជំនួបជាមួយ ក្រុមបេសកជននៃមូលនិធិរូបិយវត្ថុអន្តរជាតិ (IMF Staff Mission) ដឹកនាំដោយលោក Alasdair Scott ប្រធានក្រុមបេសកកម្ម ទទួលបន្ទុកប្រទេសកម្ពុជា នៅចុងសប្តាហ៍កន្លងមក។ ចំណែកជុំវិញការប្រមូលចំណូល, ឯកឧត្តមប្រតិភូ លើកឡើងថា,ចំពោះលទ្ធផលនៃការគ្រប់គ្រងប្រមូលចំណូលពន្ធ ក្នុងនោះពន្ធលើប្រាក់ចំណូលសម្រាប់ឆ្នាំ ២០២០ គឺជាឥទ្ធិពលនៃសកម្មភាពសេដ្ឋកិច្ច ក្នុងឆ្នាំ២០១៩ ដែលមានសន្ទុះកំណើនខ្លាំង, រហូតដល់ឆ្នាំ ២០២១ អគ្គនាយកដ្ឋានពន្ធដារនៅតែសម្រេចបានជាង ១១ ២៦៦ ប៊ីលានរៀល ត្រូវជិត ២៧៨២ លានដុល្លារ ស្មើប្រមាណជាង ១២៤% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ។ដោយឡែកក្នុងរយៈពេល ៤ ខែ ឆ្នាំ ២០២២ នេះវិញ អគ្គនាយកដ្ឋានពន្ធដារសម្រេចបានជាង ៦ ០៨២ ប៊ីលានរៀល ត្រូវជាង ១ ៥០១ លានដុល្លារ ដោយស្មើរប្រមាណ ៥៣,២៧% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២២ រូចហើយ, ដូច្នេះនៅក្នុងរយៈពេល ១២ខែ ឆ្នាំ២០២២ នេះ អគ្គនាយកដ្ឋានពន្ធដាររំពឹងថា អាចនឹងសម្រេចបានគ្រប់ និងលើសផែនការកំណត់ក្នុងច្បាប់ស្តីពីហិរញ្ញវត្ថុបន្តទៀត។សូមបញ្ជាក់ថា៖ ទាក់ទងការប្រមូលចំណូលនេះ អគ្គនាយកដ្ឋានពន្ធដារ បានដាក់ចេញ និងអនុវត្តតាមប្រព័ន្ធបច្ចេកវិទ្យាព័ត៌មានជាច្រើនរួមមាន៖ ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ (E-Filing និង Tol E-Filing), បង់ប្រាក់ពន្ធតាមអនឡាញ (E-Payment System)ដែលមានលក្ខណៈពេញលេញ ជួយសម្រួល និងផ្តល់លទ្ធភាពឱ្យអ្នកជាប់ពន្ធដាក់លិខិតប្រកាសតាមអនឡាញបានយ៉ាងរលូន, យន្តការ Cross Check ប្រកបដោយប្រសិទ្ធភាពនិងតម្លាភាព, ការបន្តពង្រឹងការផ្សព្វផ្សាយច្បាប់ និងបទប្បញ្ញត្តិស្តីពីពន្ធដារ កំណែទម្រង់និងទំនើបកម្មរដ្ឋបាលសារពើពន្ធនិងពង្រឹងការផ្តល់សេវាជូនអ្នកជាប់ពន្ធ និងបច្ចុប្បន្នអគ្គនាយកដ្ឋានពន្ធដារ បានកំពុងរៀបចំសេចក្តីព្រាងច្បាប់ស្តីពីសារពើពន្ធថ្មី ក្នុងគោលដៅធ្វើឱ្យច្បាប់ស្តីពីសារពើពន្ធថ្មីនេះ កាន់តែមានភាពគ្រប់ជ្រុងជ្រោយ ស៊ីចង្វាក់ប្រទាក់ក្រឡាគ្នា ឆ្លើយតបនឹងស្ថានភាពជាក់ស្តែង នៃសេដ្ឋកិច្ចជាតិ តំបន់ និងពិភពលោក ៕ អត្ថបទ៖ សុន រ៉ាឌី

កសិករថាបន្លែនៅមណ្ឌលគិរីកំពុងត្រូវបានលួចបន្លំឈ្មោះ ខណៈរដូវវស្សាមិនមានបន្លែនាំចេញក្រៅខេត្ត

មណ្ឌលគិរី៖ ឈ្មួញខិលខូចកំពុងលួចបន្លំប្រភេទបន្លែនៅក្នុងខេត្តមណ្ឌលគិរី ដោយយកឈ្មោះដាក់លើបន្លែមកពីប្រភពផ្សេងៗ លក់នៅទូទាំងប្រទេស និងគ្រប់រដូវកាល ខណៈកសិករដាំបន្លែក្នុងខេត្តមួយនេះ អះអាងថា នៅរដូវវស្សាបន្លែមណ្ឌលគិរី មិនមាននាំចេញទៅក្រៅខេត្តនោះទេ ។ប្រជាកសិករនៅខេត្តមណ្ឌលគិរីបានប្រាប់ BTV ឲ្យដឹងថា ក្នុងខេត្តមណ្ឌលគិរី មិនសូវមានប្រជាពលរដ្ឋប្រកបរបរដាំបន្លែនោះទេ ហើយប្រភេទបន្លែដែលកសិករដាំភាគច្រើន មានស្ពៃក្ដោប ស្ពៃបូកគោ ឆៃថាវ ការ៉ុត សណ្ដែកគូ ដើមខ្ពឹម ដំឡូជ្វាជាដើម ដែលបន្លែដាំក្នុងខេត្តមានរស់ជាតិឆ្ងាញ់ និងមានតម្លៃខ្ពស់ជាងបន្លែតាមបណ្ដាខេត្តដទៃ ប៉ុន្តែមិនអាចដាំបានគ្រប់ខែនោះទេ ដោយសារខេត្តភូមិភាគឦសាន្តមួយនេះ នៅរដូវវស្សាមានភ្លៀងធ្លាក់ច្រើន ពិបាកក្នុងការដាំបន្លែ ហើយបើដាំបាន ឲ្យផលតិចតួចប៉ុណ្ណោះ ។កសិករបន្តថា ពេលវេលាដាំបាន និងសម្បូរ គឺចាប់ពីខែ១១ ទៅដល់ខែ៣ ហើយពីខែ៤ទៅខែ៩ គ្មានបន្លែគ្រប់ប្រភេទសម្រាប់នាំចេញ ទៅក្រៅខេត្តនោះទេ ប៉ុន្តែបច្ចុប្បន្ន បែរជាមានឈ្មួញមួយចំនួន យកឈ្មោះបន្លែខេត្តមណ្ឌលគិរី ទៅលក់គ្រប់រដូវកាល។ ពួកគាត់ បានចាត់ទុកថា នេះជាការលួចបន្លំ ដែលធ្វើឲ្យខូចឈ្មោះបន្លែខេត្តមណ្ឌលគិរី ហើយសូមអំពាវនាវដល់អ្នកទិញ មានការប្រុងប្រយ័ត្ន ចំពោះការបោកប្រាស់នេះ ។ជាមួយគ្នានេះ កសិករបានបញ្ជាក់ថា ដើម្បីឲ្យខេត្តមណ្ឌលគិរី អាចដាំបន្លែគ្រប់រដូវកាលបាន គឺដាំតាមបច្ចេកទេសក្នុងរោងសំណាញ់ (សំណាញ់ UV) ដែលក្នុងខេត្តទើបមានតិចតួចនៅឡើយ ហើយក៏មិនទាន់អាចដាំផ្គត់ផ្គង់គ្រប់រដូវកាលនៅឡើយដែរ ដោយពួកគេបានស្នើរាជរដ្ឋាភិបាល អង្គការដៃគូ ឬអ្នកជំនាញកសិកម្មផ្សេងៗ ជួយឧបត្ថម្ភគាំទ្រសាងសង់រោងសំណាញ់ដល់ពួកគេ ដើម្បីមានលទ្ធភាពអាចដាំបន្លែគ្រប់រដូវកាល ដូចបណ្ដាខេត្តផ្សេងៗផងដែរ ។លោក ហាន សុភក្តិ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឲ្យដឹងថា ដើម្បីជួយទប់ស្កាត់ នូវការលួចបន្លំនេះ មន្ទីរបានជួយធ្វើស្ទិកឃ័របិទនៅលើបន្លែរបស់កសិករក្នុងខេត្តមណ្ឌលគិរី រួមទាំងកំពុងរៀបចំទីតាំងប្រមូលផ្ដុំ និងមានពិនិត្យគុណភាពបន្លែ មុននាំចេញទៅក្រៅខេត្តផងដែរ។ លោកបញ្ជាក់ថា នៅក្នុងរដូវវស្សានេះ ខេត្តមណ្ឌលគិរី ពិតជាពិបាកក្នុងការដាំបន្លែមែន ហើយក្រសួងកសិកម្មក៏ដូចជាដៃគូផ្សេងៗកំពុងជួយកសិករដាំបន្លែឲ្យបានគ្រប់រដូវកាល។បើតាមប្រភពពីមន្ត្រី នៃមន្ទីរកសិកម្មខេត្តមណ្ឌលគិរីឲ្យបានដឹងថា សម្រាប់ស្ទិកឃ័រដែលមន្ទីរជួយបិទលើបន្លែរបស់កសិករនេះ បិទនៅពេលរដូវមានបន្លែនាំចេញប៉ុណ្ណោះ៕ អត្ថបទ៖ បាន សុខរិទ្ធ

បណ្ដាញសង្គម

ព័ត៌មានថ្មីៗ

កងទ័ព៖ ខ្មាន់កាំភ្លើងធ្វើការវាយប្រហារក្នុងពេលដំណាលគ្នា នៅក្នុង និងក្រៅរដ្ឋធានីរបស់ម៉ាលី

បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់

រដ្ឋមន្ត្រីការបរទេសអ៊ីរ៉ង់ជួបពិភាក្សាជាមួយប្រមុខកងទ័ពប៉ាគីស្ថាន អំពីលទ្ធភាពនៃការចរចាជុំទី២ ជាមួយអាមេរិក

អ៊ីរ៉ង់ប្រហារជីវិតបុរសម្នាក់ ជុំវិញ «បេសកកម្ម» តំណាងឲ្យទីភ្នាក់ងារចារកម្មអ៊ីស្រាអែល

សម្តេចតេជោ ហ៊ុន សែន ណែនាំដល់មន្ត្រីរក្សាសន្តិសុខសណ្តាប់ធ្នាប់សង្គមឲ្យបានល្អ ពិសេសបទល្មើសអនឡាញត្រូវបង្ក្រាបកុំអោយងើបឡើងវិញអោយសោះ

សម្តេចតេជោ ហ៊ុន សែន ណែនាំដល់មន្ត្រីយកចិត្តទុកដាក់គ្រប់គ្រងនិងមើលថែដល់អតីតយុទ្ធជន និងនិវត្តជននៅតាមមូលដ្ឋាន

មនុស្ស ៣នាក់ស្លាប់ អំឡុងការប៉ះទង្គិច នៅភាគឦសានរដ្ឋមានជម្លោះ Manipur របស់ឥណ្ឌា

របាយការណ៍៖ អ៊ីរ៉ង់បញ្ជាក់ថា សមត្ថភាពមីស៊ីលភាគច្រើនមិនត្រូវបានប្រើឡើយ ក្នុងសង្គ្រាមជាមួយអាមេរិក

រដ្ឋមន្ត្រីការបរទេស៖ ទួរគីអាចនឹងពិចារណាតួនាទីដោះមីន នៅច្រកសមុទ្រ Hormuz ក្រោយមានកិច្ចព្រមព្រៀងអ៊ីរ៉ង់-អាមេរិក

អ្នកចរចាអាមេរិក នឹងទៅទីក្រុងអ៊ីស្លាម៉ាបាដ ប៉ុន្តែអ៊ីរ៉ង់ប្រាប់ថា មិនមានការចរចាដោយផ្ទាល់ទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877