BTV NEWS

វិស័យកសិកម្មមានកំណើន ១,២% គាំទ្រដោយកំណើនផលដំណាំ និងធនធានជលផល

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

សេដ្ឋកិច្ច និង កសិកម្ម

ប្រជាកសិករនៅស្រុកសេសាន បានងាកដាំដំណាំទុរេនសម្រេចបានជោគជ័យ

ស្ទឹងត្រែង ៖ សមាជិកក្រុមបណ្តុំកសិករនៅស្រុកសេសាន ខេត្តស្ទឹងត្រែង ព្យាយាមដាំដំណាំឈើហូបផ្លែសម្រេចបានជោគជ័យ ធ្វើឱ្យខេត្តស្ទឹងត្រែង មានចំណាត់ថ្នាក់និងកេរ្តិ៍ឈ្មោះថា ជាខេត្តមានផលិតផលទុរេនផ្អែម មិនចាញ់បណ្តាខេត្តនានា នៅក្នុងប្រទេសកម្ពុជាយើងឡើយ ។ក្នុងឱកាសចុះសិក្សាពីភាពជោគជ័យទៅលើការដាំដំណាំឈើហូបផ្លែរបស់កសិករនៅឃុំកំភុន ស្រុកសេសាន ខេត្តស្ទឹងត្រែង កាលពីថ្ងៃទី១៦មិថុនា ម្សិលមិញ លោក សុវណ្ណ ពិសេដ្ឋ អភិបាលស្រុក បានបញ្ជាក់ថា ភាពជោគជ័យនេះ ចាត់ទុកជាសមិទ្ធផលថ្មីមួយទៀតដែលកសិករយើងខិតខំធ្វើបានសម្រេចក្នុងវិស័យកសិកម្ម ព្រោះដំណាំទុរេនខេត្តស្ទឹងត្រែង មិនធ្លាប់មានឡើយ ។លោកបន្តថា ដើម្បីលើកទឹកចិត្តកសិករគំរូ អាជ្ញាធរស្រុកជំរុញឲ្យប្រជាកសិករផ្សេងៗទៀតឱ្យមកសិក្សាយកបច្ចេកទេស ដើម្បីទៅអនុវត្តដាំដុះទទួលផលបានជោគជ័យ ។សម្រាប់លោក ឃិន សុខា ម្ចាស់ចំការទុរេននៅឃុំកំភុន បានគាំទ្រនៅផែនការរបស់អាជ្ញាធរស្រុក ព្រោះបច្ចុប្បន្ន កសិករភាគច្រើន បានផ្លាស់ប្តូរមុខរបស់ខ្លួន ពីការពឹងផ្អែកលើផលអនុផលព្រៃឈើ និងធ្វើនេសាទ មកដាំដំណាំផ្សេងៗពីគ្នា។លោក បន្តថា កត្តាជោគជ័យលើការដាំដំណាំគឺភាពឧស្សាព្យាយាម-ការថែទាំ-និងមានការគាំទ្រពីស្ថាប័នជំនាញ ជួយផ្នែកបច្ចេកទេស ទើបផលដំណាំផលិតបានមានទីផ្សារល្អ (សំឡេង) យើងចង់បានមន្ត្រីជំនាញគាត់ជួយថែមទៀតលើបទពិសោធន៍ ដើម្បីឱ្យទុរេនខេត្តស្ទឹងត្រែង បាននាំចេញចូលទៅខេត្តផ្សេងៗទៀត ជាពិសេសនាំចូលទៅទីក្រុងភ្នំពេញឱ្យច្រើន។លោក ទំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានទទួលយកការស្នើឡើងនេះ ព្រោះនៅចំពោះមុខផែនការរបស់មន្ទីរ នៅពេលដែលប្រជាកសិករផលិតផលបានផលិតផលច្រើនមុខមន្ត្រីជំនាញ និងជំរុញផ្នែកដាំដុះបន្ថែម ហើយរៀបចំឱ្យមានមន្ទីរពិសោធន៍ពិនិត្យគុណភាពទៅតាមបច្ចេកទេសស្របតាមស្ដង់ដារ ។លោក បន្តថា នៅពេលខាងមុខនេះ យើងមានមន្ទីរពិសោធន៍ យើងនឹងពិនិត្យមើលជាតិគីមីអីផ្សេងៗ ជួយពិនិត្យមើលដំណាំរបស់គាត់ ហើយបញ្ជាក់វិញ្ញាបនបត្រដំណាំសុវត្ថិភាពរបស់បងប្អូនប្រជាកសិករនៅខេត្តស្ទឹងត្រែង។សូមបញ្ជាក់ថា នេះជាលើកដំបូងហើយ ដែលខេត្តស្ទឹងត្រែង មានកសិករនៅឃុំកំភុន ស្រុកសេសានដាំដំណាំទុរេន ទទួលបានផ្លែផ្កាល្អ និងនាំយកមកលក់នៅលើទីផ្សារ និងគ្រោងនាំចេញទៅលក់នៅតាមបណ្តាខេត្តនានា និងរាជធានីភ្នំពេញផងដែរ៕អត្ថបទ ៖ មាស ផល្លា

អាជីវករបោះដុំបន្លែជាង៣០ភាគរយប៉ុណ្ណោះបន្តលក់នៅទីតាំងចាស់ក្រោយអាជ្ញាធរបើកផ្សាររដ្ឋឡើងវិញ

ភ្នំពេញ ៖ អាជ្ញាធរមូលដ្ឋាននៅតំបន់ផ្សារដើមគរ រាជធានីភ្នំពេញ បាននិយាយថា គិតចាប់ពីការអនុញ្ញាតឲ្យបើកដំណើរការលក់ឡើងវិញ ក្រោយពីផ្អាកមួយរយៈពេលដោយសារការរាលដាលឆ្លងជំងឺកូវីដ-១៩ មកដល់ពេលនេះ មានអាជីវករប្រមាណ៣០%ប៉ុណ្ណោះ ដែលបានបើកលក់ឡើងវិញ ខណៈអាជីវករខ្លះបានផ្លាស់ប្តូរទីតាំងលក់។អ្នកស្រី មុំ ណាន អ្នកចែកចាយបន្លែបោះដុំ បានប្រាប់ទូរទស្សន៍ព័ត៌មាន ប៊ីធីវី ថា ការបើកការលក់ដូរឡើងវិញនៅពេលនេះ មិនសូវដាច់ដូចមុននោះទេ តែយ៉ាងណាអ្នកស្រីអាចរកចំណូលបានខ្លះប្រសើរជាងពេលដែលអាជ្ញាធរបិទមិនឲ្យលក់ដោយសារបញ្ហាកូវីដ-១៩។ អ្នកស្រី បញ្ជាក់ថា មកដល់ពេលនេះ នៅមិនទាន់មានអាជីវករច្រើនបើកលក់បន្លែឡើងវិញដូចកាលពីមុនពេលបិទផ្សារនោះឡើយ។ក្រុមអាជីវករផ្សេងទៀត បានលើកឡើងស្រដៀងគ្នាថា ក្នុងអំឡុងបិទខ្ទប់ និងផ្អាកលក់មួយរយៈពេលកន្លងមក ធ្វើឲ្យពួកគាត់បាត់បង់ប្រាក់ចំណូលខ្លះ ហើយក្រោយបានត្រឡប់មកលក់នៅទីតាំងចាស់ឡើងវិញ ក៏មិនសូវដាច់ច្រើនដូចមុននោះដែរ ព្រោះថា ការលក់មិនមែនមានតែមួយកន្លែងនិងផ្តុំគ្នាដូចពីមុនទេ ហើយអ្នកទិញខ្លះក៏បានងាកទៅទិញនៅកន្លែងផ្សេងដែរ ដូចជា នៅរង្វង់មូលគួរស្រូវជាដើម ដែលអាជីវករមួយចំនួនធំបានរើទៅលក់នៅទីនោះជំនួសឲ្យទីតាំងចាស់។ តែយ៉ាងណា ក្រុមអាជីវករសប្បាយចិត្តដែលអាជ្ញាធរបើកឲ្យលក់ឡើងវិញ និងសន្យាគោរពនូវវិធានការអនាម័យ ដើម្បីទប់ស្កាត់កូវីដ-១៩។កាលពីថ្ងៃទី១៥ ខែមិថុនាកន្លងទៅនេះ អាជ្ញាធររាជធានីភ្នំពេញ បានអនុញ្ញាតឲ្យបើកដំណើរការគ្រប់អាជីវកម្ម ការលក់ដូរជាប្រក្រតីឡើងវិញ ក្នុងក្របខ័ណ្ឌផ្សាររដ្ឋទាំងអស់ នៅរាជធានីភ្នំពេញ និងតម្រូវឲ្យអនុវត្តតាមការណែនាំរបស់ក្រសួងសុខាភិបាល ជាពិសេសប្រកាន់ខ្ជាប់ជានិច្ចនូវវិធានការ ៣ការពារ និង៣កុំ របស់ប្រមុខរាជរដ្ឋាភិបាលកម្ពុជា៕អត្ថបទ៖ឈិត បូរ៉ាវី

តម្លៃប្រេងឥន្ធនៈចាប់ពីថ្ងទី១៦ដល់៣០មិថុនា កើនថ្លៃ១០០រៀលទៀត ក្នុង១លីត្រ

ភ្នំពេញ ៖ ក្រសួងពាណិជ្ជកម្ម បានឲ្យដឹងថា តម្លៃលក់រាយប្រេងឥន្ធនៈគិតចាប់ពីថ្ងៃទី១៦ ដល់៣០ ខែមិថុនា ឆ្នាំ២០២១ បានឡើងថ្លៃចំនួន១០០រៀលទៀត ក្នុង១លីត្រ ដោយសារតែតម្លៃប្រេងឆៅនៅលើទីផ្សារអន្តរជាតិកើនឡើងដូចគ្នា។សេចក្តីជូនដំណឹងស្តីពីថ្លៃលក់រាយប្រេងឥន្ធនៈនៅតាមស្ថានីយ ដែលទទួលទូរទស្សន៍ប៊ីធីវី ទទួលបាននៅថ្ងៃទី១៧ ខែមិថុនានេះ បានបញ្ជាក់ថា សម្រាប់ប្រេងសាំងធម្មតាក្នុងរយៈពេល២សប្តាហ៍ទៅមុខទៀត ពោលគឺពីថ្ងៃទី ១៦ ដល់ថ្ងៃទី ៣០ ខែមិថុនា នឹងលក់ចេញក្នុងតម្លៃ ៣ ៩០០រៀល ក្នុង១លីត្រ។ ចំណែកឯប្រេងម៉ាស៊ូតលក់ចេញក្នុងតម្លៃ ៣,៥៥០រៀល ក្នុង១លីត្រ ខណៈដែលពេលកន្លងទៅពោលគឺចន្លោះពីថ្ងៃទី ១ដល់ថ្ងៃទី ១៥ ខែមិថុនា ប្រេងសាំងធម្មតាមានតម្លៃ ៣៨០០ រៀលក្នុងមួយលីត្រ និងប្រេងម៉ាស៊ូតតម្លៃ ៣៤៥០ រៀលក្នុងមួយលីត្រ។ជុំវិញតម្លៃលក់ប្រេងឥន្ធនៈនេះ ក្រសួងពាណិជ្ជកម្ម បានបញ្ជាក់ថា ក្រសួងមិនមែនជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ ពោលគឺក្រសួងគ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្តរជាតិមកគណនាតាមប្រកាសដូចមានក្នុងឯកសារ។សេចក្តីជូនដំណឹងរបស់ក្រសួងពាណិជ្ជកម្ម បានបន្តថា ជាក់ស្តែងនាពេលបច្ចុប្បន្ននេះ តម្លៃប្រេងឆៅនៅលើទីផ្សារអន្តរជាតិ តម្លៃលក់រាយប្រេងឥន្ធនៈក្នុងរយៈពេលដូចគ្នាខាងលើ នឹងត្រូវលក់ ៤ ០៦០ រៀល ក្នុង១លីត្រ សម្រាប់ប្រេងសាំងធម្មតាEA92 និង ៣៧១០ រៀលសម្រាប់ប្រេងម៉ាស៊ូត។ ក៏ប៉ុន្តែដើម្បីជួយសម្រួលដល់ជីវភាពរបស់ប្រជាជន និងដោយមានការរួមចំណែកពីក្រុមហ៊ុនចែកចាយប្រេងនៅកម្ពុជា សម្តេចនាយករដ្ឋមន្ត្រីតេជោ ហ៊ុន សែន បានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន ៤សេនដុល្លារ ឬស្មើនឹង ២០០រៀល ក្នុង១លីត្រទើបតម្លៃចុះមកត្រឹម៣៩០០ រៀលក្នុងមួយលីត សម្រាប់ប្រេងសាំងធម្មតានិងតម្លៃ ៣.៥៥០រៀលក្នុងមួយលីត្រសម្រាប់ប្រេងម៉ាស៊ូត៕អត្ថបទ៖ ឈិត បូរ៉ាវី

សមាគមអ្នកដាំដុះនិងអ្នកកែច្នៃគាំទ្រការបង្កើតសម្ព័ន្ធកសិ-ឧស្សាហកម្ម ដើម្បីលើកស្ទួយផលិតផលក្នុងស្រុក

ភ្នំពេញ ៖ តំណាងសមាគមអ្នកដាំដុះ និងអ្នកកែច្នៃផលិតផលកសិកម្ម បានគាំទ្រការបង្កើតសម្ព័ន្ធកសិ-ឧស្សាហកម្មកម្ពុជា ដើម្បីរួមគ្នាជាប្រព័ន្ធ និងជាកំលាំងប្រមូលផ្តុំ លើកកម្ពស់ផលិតផលក្នុងស្រុក ក្នុងការធានានូវតម្លៃទីផ្សារច្បាស់លាស់ ជាពិសេសជំរុញបង្កើនការដាំដុះ ប្រកបដោយនិរន្តភាព។លោក ម៉ែន សុភ័ក្ត្រ ប្រធានសមាគមអ្នកអភិវឌ្ឍន៍កៅស៊ូកម្ពុជា បានប្រាប់ BTV នៅថ្ងៃទី ១៧ ខែ មិថុនា ឆ្នាំ ២០២១ នេះថា លោកគាំទ្រពេញទំហឹងការបង្កើតសម្ព័ន្ធកសិ-ឧស្សាហកម្មកម្ពុជា, ព្រោះកសិ-ឧស្សាហកម្ម វាជាចំណែកមួយនៃសក្ដានុពលសេដ្ឋកិច្ចប្រទេសកម្ពុជា ដែលត្រូវការគិតគូរឲ្យបានគ្រប់ជ្រុងជ្រោយ។ លោកថា ការបង្កើតឲ្យមានសម្ព័ន្ធកសិ-ឧស្សាហកម្មនេះ គឺជាការរូបរួមគ្នាបង្កើតជាប្រព័ន្ធ នឹងការរួមកំលាំងគ្នាចរចាទីផ្សារ នាំគ្នាផលិតតម្រូវការទីផ្សារ ជាពិសេសជំរុញលើកកម្ពស់ការដាំដុះផលិតផលក្នុងស្រុក ។ចំណែក លោក សុង ខេងលាន នាយកគ្រប់គ្រងសហគ្រាស C.L.S លើកឡើងថា ចំពោះគម្រោងបង្កើតសម្ព័ន្ធកសិ-ឧស្សាហកម្មកម្ពុជា វាជារឿងថ្មីមួយទៀត ក្នុងការចូលរួមលើកកម្ពស់ផលិតផលក្នុងស្រុក ប៉ុន្តែអ្វីៗដែលជួបប្រទះកន្លងមក គឺបញ្ហាការទទួលបានប្រភពព័ត៌មាន ដូច្នេះតាមរយៈនៃការបង្កើតសម្ព័ន្ធកសិ-ឧស្សាហកម្មកម្ពុជា សម្រាប់ជំហានដំបូង លោកចង់ឲ្យសម្ព័ន្ធកសិ-ឧស្សាហកម្មកម្ពុជា បង្កើតនូវប្រភពទិន្នន័យរួមមួយ ដើម្បីទទួលបានព័ត៌មានផ្សេងៗ ជុំវិញការអភិវឌ្ឍន៍វិស័យកសិកម្ម និងកសិ-ឧស្សាហកម្មនេះ។សូមបញ្ជាក់ថា សម្ព័ន្ធកសិ-ឧស្សាហកម្មកម្ពុជា ដែលមានអ្នកឧកញ៉ា លី យ៉ុងផាត់ ជាប្រធាន បាននឹងកំពុងរៀបចំសេចក្តីព្រាង ដើម្បីបង្កើត និងអាចដំណើរការជាផ្លូវការក្នុងពេលឆាប់ៗខាងមុខ ដោយមានការគាំទ្រដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។ សម្ព័ន្ធនេះមានតួនាទីសំខាន ក្នុងការជម្រុញការអភិវឌ្ឍកសិ-ឧស្សាហកម្មកម្ពុជាឲ្យរីកចម្រើន ប្រកបដោយចីរភាព និងនិរន្តរភាព ទូលំទូលាយ គ្របដណ្តប់លើគ្រប់ប្រភេទដំណាំ និងភូមិសាស្ត្រទូទាំងប្រទេស ៕អត្ថបទ៖ សុន រ៉ាឌី,

ក្រុមហ៊ុនចុះបញ្ជីតាមប្រព័ន្ធថ្នាលតែមួយ មានទុនវិនិយោគសរុបជាង ២ ៦០០លានដុល្លារ

ភ្នំពេញ ៖ ក្នុងរយៈពេល១ឆ្នាំ ការអនុវត្តចុះបញ្ជីតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរបស់រាជរដ្ឋាភិបាលទទួលបានចំនួនពាក្យស្នើសុំសរុបជិត ៧ ០០០សំណើរ, ក្នុងនោះពាក្យស្នើសុំបានអនុម័តមានជាង ៦ ០០០ សំណើរ ដែលមានទំហំទុនវិនិយោគមានចំនួនជាង ២ ៦០០ លានដុល្លារ។តាមសេចក្តីប្រកាសព័ត៌មាន ស្តីពីខួបគម្រប់ ១ឆ្នាំ នៃការដាក់ឱ្យប្រើប្រាស់ជាផ្លូវការនូវ ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន បានបង្ហាញឲ្យដឹងថា បន្ទាប់ពីរាជរដ្ឋាភិបាលកម្ពុជា បានដាក់ឱ្យប្រើប្រាស់ជាផ្លូវការ នូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន កាលពីថ្ងៃទី១៥ ខែ មិថុនា ឆ្នាំ ២០២០ គិតមកទល់ថ្ងៃនេះ មានរយៈពេល ១ ឆ្នាំ ក្នុងនោះចំពោះលទ្ធផលសម្រេចបាន គឺកម្ពុជាទទួលបានចំនួនពាក្យស្នើសុំសរុបជាង ៦ ៩០០សំណើរ, ចំនួនពាក្យស្នើសុំដែលបានអនុម័តជាង ៦ ០០០ សំណើរ និងចំនួនពាក្យស្នើសុំ ដែលកំពុងត្រួតពិនិត្យមាន ៨១០ សំណើផងដែរ ។ចំពោះក្រុមហ៊ុនដែលទទួលបានចុះបញ្ជីខាងលើ, បើគិតជាភាគរយ អាជីវកម្មដែលបានចុះបញ្ជីតាមវិស័យរួមមាន ៖ អាហរ័ណនីហរ័ណ ទិញលក់ ជួសជុលយានយន្ត និងទោចក្រយានយន្តគ្រប់ប្រភេទ មានជាង ៣៨%, សកម្មភាពអចលនវត្ថុជាង ១០%, កម្មន្តសាលជាង៨%, សកម្មភាពសេវាកម្មស្នាក់នៅ និងអាហារជាង ៨%, សកម្មភាពវិជ្ជាជីវៈ វិទ្យាសាស្ត្រ និងបច្ចេកទេសជាង ៧%, និងវិស័យផ្សេងៗទៀតជាង ២៧% ផងដែរ ។ដោយឡែកទំហំវិនិយោគតាមវិស័យ ក្នុងនោះសម្រាប់ការសាងសង់មានជាង ២៧%, សកម្មភាពអចលនវត្ថុជាង ១៥%, អាហរ័ណនីហរ័ណ ទិញលក់ ជួសជុលយានយន្ត និងទោចក្រយានយន្តគ្រប់ប្រភេទជាង ១៥%, កម្មន្តសាលជិត ១៤%, សកម្មភាពហិរញ្ញវត្ថុ និងធានារ៉ាប់រងជិត ៩%, និងវិស័យផ្សេងទៀតជាង ១៩%។ចំពោះការបម្រុងទុកនាមករណ៍វិញ, នៅក្នុងរយៈពេលនេះ មានចំនួនពាក្យស្នើសុំសរុប ៥ ៦៣៧ សំណើ, ចំនួនពាក្យស្នើសុំដែលបានអនុម័ត ៥ ៦៣៧ សំណើ, ចំនួនពាក្យស្នើសុំដែលកំពុងត្រួតពិនិត្យ ២៧០ សំណើរ និងចំនួនពាក្យស្នើសុំដែលបានបដិសេធ ១ សំណើរផងដែរ ។សូមបញ្ជាក់ថា ចំពោះការរៀបចំប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននេះ គឺជាវិធានការមួយ ក្នុងកញ្ចប់វិធានការកែទម្រង់ដ៏មុតស្រួច ដែលត្រូវបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ នាថ្ងៃទី២៩ ខែមីនា ឆ្នាំ២០១៩ សំដៅលើកស្ទួយភាពប្រកួតប្រជែងរបស់កម្ពុជា និងបង្កើតបរិយាកាសវិនិយោគ ដែលទាក់ទាញ តាមរយៈការកែសម្រួលដំណើរការ និងនីតិវិធីនៃការចុះបញ្ជីអាជីវកម្មនៅកម្ពុជា ដោយប្រើប្រាស់ប្រព័ន្ធបច្ចេកវិទ្យាព័ត៌មាន ដោយបានដាក់ឲ្យប្រើប្រាស់រួមមាន ៖ ក្រសួងពាណិជ្ជកម្ម,អគ្គនាយកដ្ឋានពន្ធដារ, ក្រសួងការងារ និងបណ្តុះបណ្តាលវិជ្ជាជីវៈ, ក្រសួងមហាផ្ទៃ, និងក្រុមប្រឹក្សាអភិវឌ្ឍន៍កម្ពុជា៕ អត្ថបទ៖ សុន រ៉ាឌី

ក្រសួងរ៉ែ និងថាមពល បន្តតាមដានដំណើរការបូមប្រេងឆៅរបស់ក្រុមហ៊ុន KrisEnergy

ភ្នំពេញ ៖ ស្របពេលក្រុមហ៊ុនមេ KrisEnergy នៅប្រទេសសឹង្ហបុរី បានប្រកាសក្ស័យធុន ក្រសួងរ៉ែ និងថាមពល បញ្ជាក់ថា នឹងចាត់វិធានការ និងពិនិត្យមើលលក្ខខណ្ឌផ្សេងៗ ក្នុងកិច្ចព្រមព្រៀងប្រេងកាត រវាងក្រុមហ៊ុន KrisEnergy ជាមួយក្រសួង និងតាមដានអំពីខ្សែសង្វាក់ផលិតកម្ម, ប្រសិនក្រុមហ៊ុនមិនអនុវត្តតាមគោលការណ៍ ឬកិច្ចព្រមព្រៀងណាមួយ ក្រសួងនឹងមានវិធានការទៅលើក្រុមហ៊ុន ។ឯកឧត្តម ជៀប សួរ អ្នកនាំពាក្យ និងជាអគ្គនាយកនៃអគ្គនាយកដ្ឋានប្រេងកាត នៃក្រសួងរ៉ែ និងថាមពល បានឲ្យដឹងនៅថ្ងៃទី១៥ ខែមិថុនាម្សិលមិញនេះថា ពាក់ព័ន្ធនឹងការប្រកាសក្ស័យធុនរបស់ក្រុមហ៊ុនមេ នៅប្រទេសសឹង្ហបុរី ក្នុងនោះក្រុមហ៊ុន KrisEnergy ដែលជាក្រុមហ៊ុនកំពុងអភិវឌ្ឍន៍វិស័យប្រេងកាតនៅកម្ពុជា បានជូនដំណឹងមកក្រសួង អំពីការដាក់ពាក្យបណ្តឹងរបស់ក្រុមហ៊ុនមេទៅកាន់តុលាការ ក្នុងគោលដៅសុំរំលាយក្រុមហ៊ុន ដោយតុលាការគ្រោងនឹងកាត់សេចក្តីនៅថ្ងៃទី ១២ ខែកក្កដាខាងមុខនេះ ។ឯកឧត្តម បន្តថា ចំពោះពាក់ព័ន្ធផលិតកម្មបូមប្រេងរបស់ក្រុមហ៊ុន KrisEnergy នៅក្នុងដំណាក់កាលនេះ បានដំណើរការជាធម្មតា ដោយក្រុមហ៊ុនមិនមានការជូនដំណឹង អំពីការខកខាន ឬផ្អាកដំណើរអ្វីនោះឡើយ, តែទោះបីជាយ៉ាងណា ក្រសួងនឹងមានវិធានការ តាមដាន នឹងពិនិត្យមើលទៅលើលក្ខខណ្ឌផ្សេងៗ ក្នុងកិច្ចព្រមព្រៀងប្រេងកាត រវាងក្រុមហ៊ុន KrisEnergy ជាមួយក្រសួងផងដែរ ក្នុងនោះប្រសិនក្រុមហ៊ុនមិនអនុវត្តតាមគោលការណ៍ណាមួយ ក្រសួងនឹងចេញលិខិតព្រមាន ខណៈក្រុមហ៊ុន បានចុះកិច្ចព្រមព្រៀងរួចរាល់ជាមួយក្រសួង ។ឯកឧត្តម ជៀប សួរ បានលើកឡើងទៀតថា ការប្រកាសក្ស័យធុននេះ គឺវាត្រូវការពេលវេលា តុលាការគេកាត់សេចក្តីថាយ៉ាងណា ទៅយ៉ាងណា? ទល់តែដល់ថ្ងៃទី ១២ ខែកក្កដា ទើបដឹង ចឹងគាត់គ្រាន់តែបានជូនដំណឹងអំពីបញ្ហាហ្នឹង អត់ទាន់កាត់សេចក្តីយ៉ាងម៉េចទេ។ សម្រាប់វិធានការរបស់យើងនៅពេលនេះ គឺយើងពិនិត្យមើលទៅលើលក្ខខណ្ឌផ្សេងៗនៅក្នុងកិច្ចព្រមព្រៀង ធ្វើមិចឲ្យគាត់អនុវត្តឲ្យបានខ្ជាប់ខ្ជួន ប្រសិនមានចំណុចណាគាត់មិនអនុវត្ត យើងរំលឹកគាត់ នឹងចេញលិខិតព្រមានទៅគាត់។សូមបញ្ជាក់ថា ពាក់ព័ន្ធកិច្ចព្រមព្រៀងសម្រាប់ការអភិវឌ្ឍប្រេងនៅប្លុក A រវាងរដ្ឋាភិបាលកម្ពុជា ដែលតំណាងដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ជាមួយក្រុមហ៊ុន KrisEnergy តំណាងដោយលោក Kelvin Tang នាយកប្រតិបត្តិ ក្រុមហ៊ុន KrisEnergy Group និងជាប្រធានក្រុមហ៊ុន KrisEnergy (Cambodia) លើកញ្ចប់ឯកសារកិច្ចព្រមព្រៀងប្រេងកាត ប្លុក A រួមមាន៖ កិច្ចព្រមព្រៀងវិសោធនកម្ម និងការចែងឡើងវិញ នៃកិច្ចព្រមព្រៀងប្រេងកាតប្លុក A ចុះថ្ងៃទី១៨ ខែមីនា ឆ្នាំ២០០២, កិច្ចព្រមព្រៀងប្រេងកាតប្លុក A ក្រោយធ្វើវិសោធនកម្មរួច និងការចែងឡើងវិញ, កិច្ចព្រមព្រៀងប្រគល់ផ្ទៃក្រឡាសងវិញ, វិសោធនកម្មកិច្ចព្រមព្រៀងប្រតិបត្តិការរួមគ្នា, កិច្ចសន្យាប្រគល់សិទ្ធិ និងទទួលយកកាតព្វកិច្ច និងលិខិតអនុញ្ញាតផលិតកម្មលើកទី១ ៕អត្ថបទ៖ សុន រ៉ាឌី

កម្ពុជាវាយតម្លៃខ្ពស់ហិរញ្ញប្បទានឥតសំណងរបស់អូស្ត្រាលី លើការអភិវឌ្ឍវិស័យទឹកស្អាតនៅកម្ពុជា

ភ្នំពេញ ៖ ហិរញ្ញប្បទានឥតសំណងរបស់រដ្ឋាភិបាលអូស្ត្រាលី ដែលបានផ្តល់លើការអនុវត្តគម្រោងនៃកម្មវិធី3I បានកំពុងគាំទ្រដល់ការអភិវឌ្ឍវិស័យទឹកស្អាតនៅកម្ពុជា នឹងបានកំពុងពង្រីកវិសាលភាព នៃការទទួលបានទឹកស្អាតតាមបណ្ដាញ របស់ប្រជាពលរដ្ឋទូទាំងប្រទេស ។ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានវាយតម្លៃខ្ពស់ចំពោះការអនុវត្តគម្រោងកម្មវិធី3I របស់ប្រទេសអូស្ត្រាលី ក្នុងនោះ លើវិស័យទឹកស្អាតឃើញថា បានកំពុងគ្របដណ្ដប់ស្ទើរទូទាំងប្រទេស ក្នុងដំណាក់កាលផ្សេងៗគ្នា ហើយគម្រោងនេះ ពិតជាបានរួមចំណែកជាមួយក្រសួង ក៏ដូចជារាជរដ្ឋាភិបាលកម្ពុជា ដែលកំណត់ថា នៅឆ្នាំ២០២៥ នៅតាមទីប្រជុំជន នឹងទទួលទឹកស្អាតប្រើប្រាស់ ១០០% នឹងនៅឆ្នាំ ២០៣០ ទទួលបានទូទាំងប្រទេសតាមគ្រប់មធ្យោបាយ ។ឯកឧត្តមកិត្តិសេដ្ឋាបណ្ឌិត ចម ប្រសិទ្ធ លើកឡើងនៅក្នុង ពិធីទទួលផែនទី តំបន់សេវាទឹកស្អាតពីកម្មវិធី3I របស់អូស្ត្រាលី នៅថ្ងៃទី១៥ ខែមិថុនា ឆ្នាំ ២០២១ ថា ការទទួលបានផែនទីនេះ គឺពិតជាមានសារៈសំខាន់ណាស់ ដើម្បីដឹងពីស្ថានភាព និងដើម្បីតាមដានពីវឌ្ឍនភាពនៃការផ្គត់ផ្គង់ទឹកស្អាត ដោយកម្មវិធីនេះ បានកំពុងពង្រីកវិសាលភាព នៃការទទួលបានទឹកស្អាតតាមបណ្ដាញ របស់ប្រជាពលរដ្ឋទូទាំងប្រទេស ជាពិសេសផែនទី នៃកម្មវិធី 3I គឺជាមូលដ្ឋានការពិនិត្យវាយតម្លៃ កំណត់គោលដៅបន្ថែម ក៏ដូចជា កាដាក់ចេញនូវគោលនយោបាយផ្សេងៗ ។ ជាមួយគ្នានេះ ឯកឧត្ដមកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ ក៏បានស្នើឲ្យប្រទេសអូស្ត្រាលី បន្តការផ្តល់ជំនួយអភិវឌ្ឍ ជំនួយបច្ចេកទេស ការផ្ទេរបច្ចេកវិទ្យា ដូចជាជំនាញការធ្វើបច្ចុប្បន្នភាពលើផែនទីសេវាគ្របដណ្តប់ និងការពិនិត្យលទ្ធភាពផ្តល់ជំនួយបច្ចេកទេសចំពោះការបំពាក់ប្រព័ន្ធ Sensor សម្រាប់ត្រួតពិនិត្យគុណភាពទឹកប្រចាំថ្ងៃផងដែរ ។ឯកឧត្ដម Luke Arnold ឯកអគ្គរដ្ឋទូតរងអូស្ត្រាលី ប្រចាំកម្ពុជា បានបញ្ជាក់ពីជំហររបស់អូស្ត្រាលី ក៏ដូចជាបេសកកម្មរបស់កម្មវិធី 3I ក្នុងការចូលរួមចំណែកការអភិវឌ្ឍ តាមរយៈការវិនិយោគក្នុងវិស័យហេដ្ឋារចនាសម្ព័ន្ធនៅកម្ពុជា ក្នុងនោះបានផ្តោតលើហិរញ្ញប្បទានឥតសំណង សម្រាប់ការអភិវឌ្ឍវិស័យទឹកស្អាត វិស័យអគ្គិសនី ស្តង់ដារផលិតផល និងកសិ-កែច្នៃជាដើម, ក្រៅពីនេះ ប្រទេសអូស្ត្រាលីក៏មានជំនួយអភិវឌ្ឍក្រោមក្របខណ្ឌអាស៊ាន-អូស្ត្រាលី និងក្នុងក្របខណ្ឌមហាអនុតំបន់ទន្លេមេគង្គផងដែរ ៕អត្ថបទ៖ សុន រ៉ាឌី

កម្ពុជា ទាក់ទាញវិនិយោគមកពីប្រទេសបារាំង និងស៊ុយអែតមកវិនិយោគនៅកម្ពុជា

ភ្នំពេញ ៖ ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានស្នើឱ្យរដ្ឋាភិបាលប្រទេសបារាំង និងប្រទេសស៊ុយអែត បន្តជំរុញ វិនិយោគិន និងក្រុមហ៊ុនរបស់ខ្លួន មកវិនិយោគនៅកម្ពុជាបន្ថែមទៀត។ក្នុងជំនួបកាលពីថ្ងៃទី១៥ មិថុនា ឆ្នាំ២០២១កន្លងទៅ ជាមួយ លោកជំទាវ Eva NGUYEN BINH ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំកម្ពុជា ឯកឧត្តមរដ្ឋមន្ត្រី ប៉ាន សូរស័ក្ដិ បានបានបង្ហាញពីការត្រៀមខ្លួចរួចជាស្រេច ក្នុងការជួយសម្របសម្រួលដល់ធុរជន និងវិនិយោគិនបារាំង ដែលមានបំណងមកវិនិយោគ និងពង្រីកប្រតិបត្តិការពាណិជ្ជកម្ម ជាពិសេសនៅក្នុងវិស័យសក្ដានុពល រួមមាន ការកែច្នៃចំណីអាហារ ផលិតផលកសិកម្ម និងក្នុងវិស័យទេសចរណ៍ ដែលកត្តាទាំងនេះ នឹងចូលរួមចំណែកទ្រទ្រង់ និងស្តារសេដ្ឋកិច្ចកម្ពុជា នៅក្រោយវិបត្តិកូវីដ-១៩។ជាការឆ្លើយតប លោកជំទាវ Eva NGUYEN BINH មានប្រសាសន៍ថា ថ្វីត្បិតតែទទួលរងផលប៉ះពាល់ពីជំងឺកូវីដ-១៩ បារាំងនៅតែបន្តជាទីផ្សារនាំចេញទំនិញដ៏សំខាន់មួយរបស់កម្ពុជា ។ ទំហំពាណិជ្ជកម្មកម្ពុជា-បារាំង នៅឆ្នាំ២០២០ សម្រេចបានចំនួន ៤៥៦លានដុល្លារ និងគិតត្រឹមខែមេសា ឆ្នាំ២០២១ មានចំនួន១៥៧លានដុល្លារ។នៅក្នុងជំនួបដាច់ដោយឡែកនៅក្នុងថ្ងៃដដែល ជាមួយឯកឧត្តម BJÖRN HÄGGMARK ឯកអគ្គរាជទូតស៊ុយអែតប្រចាំកម្ពុជា ឯកឧត្តមរដ្ឋមន្ត្រី ប៉ាន សូរស័ក្ដិ បានស្នើភាគីស៊ុយអែតជួយសម្របសម្រួល ដើម្បីជំរុញឲ្យក្រុមហ៊ុនគ្រឿងសង្ហារិម ល្បីឈ្មោះ ម៉ាក IKEA និងក្រុមហ៊ុនផលិតរថយន្ត Volvo មកស្វែងរកឱកាសធុរកិច្ច ខណៈដែលការកែច្នៃគ្រឿងសង្ហារិម និងការផលិតគ្រឿងបង្គំ និងបន្លាស់យានយន្តកំពុងមានកំណើនខ្លាំងនៅកម្ពុជា។ឯកឧត្តម ប៉ាន សូរស័ក្តិ បានសំណូមពរឯកឧត្តម ឯកអគ្គរាជទូត ឲ្យជម្រាបជូនថា្នក់ដឹកនាំរដ្ឋាភិបាលស៊ុយអែត និងសហភាពអឺរ៉ុប អំពីកិច្ចខំប្រឹងប្រែងរបស់កម្ពុជាក្នុងខឿនអភិវឌ្ឍន៍ប្រកបដោយនិរន្តរភាព និងសមធម៌ ទាំងក្នុងវិស័យសេដ្ឋកិច្ច សង្គមកិច្ច និងបរិស្ថាន និងបានស្នើឲ្យបន្តជួយសម្របសម្រួលជំរុញធុរជន និងវិនិយោគិនស៊ុយអែតមកស្វែងរកឱកាសវិនិយោគនៅកម្ពុជា ដែលក្រៅពីវិស័យគ្រឿងសង្ហារិម និងផលិតរថយន្ត ក៏នៅមានការកែច្នៃចំណីអាហារ និងផ្លែឈើតំបន់ត្រូពិចផងដែរ។ជាការឆ្លើយតប ឯកឧត្តម ឯកអគ្គរាជទូត បានបញ្ជាក់ថា ស្ថានទូតស៊ុយអែតប្រចាំកម្ពុជាដែលមាននិវេសនដ្ឋាននៅទីក្រុងបាងកក នឹងបន្តកិច្ចសហប្រតិបត្តិការល្អជាមួយក្រសួងពាណិជ្ជកម្ម ក្នុងគោលបំណងលើកកម្ពស់កិច្ចសន្ទនា និងទំនាក់ទំនងពាណិជ្ជកម្មកម្ពុជា-ស៊ុយអែត។ភាគីទាំងពីរក៏បានពិភាក្សា និងផ្លាស់ប្ដូរយោបល់ អំពីការលើកកម្ពស់ប្រព័ន្ធពាណិជ្ជកម្មពហុភាគី ដែលក្នុងនោះ ឯកឧត្តមរដ្ឋមន្ដ្រី បានជម្រាបជូនភាគីជំនួបអំពីគោលជំហររបស់កម្ពុជា ក្នុងការប្រកាន់ខ្ជាប់នូវក្របខណ្ឌពហុភាគីនិយម ក្នុងការដោះស្រាយបញ្ហាក្នុងគ្រប់វិស័យដោយអនុលោមតាមបទដ្ឋានអន្តរជាតិ និងមានការគិតគូរដល់ប្រទេសកំពុងអភិវឌ្ឍន៍ និងអភិវឌ្ឍន៍តិចតួច។សូមបញ្ជាក់ថា ទំហំពាណិជ្ជកម្មកម្ពុជា-ស៊ុយអែត នៅឆ្នាំ២០២០ មានចំនួន ៦៤លានដុល្លារ ខណៈដែលរយៈពេល៥ខែ ឆ្នាំ២០២១នេះ មានចំនួន ២៣លានដុល្លារ៕អត្ថបទ ៖ ឈិត បូរ៉ាវី

ក្រុមហ៊ុនជប៉ុន Yamato Green បង្ហាញគម្រោងវិនិយោគលើផលិតផលកសិកម្មនៅកម្ពុជា

ភ្នំពេញ ៖ ក្រុមហ៊ុនជប៉ុន Yamato Green ដែលមានបទពិសោធន៍ខាងវិស័យកសិកម្ម បានបង្ហាញពីគម្រោងវិនិយោគលើផលិតផលកសិកម្ម ដែលមានសក្ដានុពលនៅកម្ពុជា ដើម្បីបង្កើនផលិតភាពផលិតកម្ម និងការនាំចេញទៅក្រៅប្រទេស។ក្រុមហ៊ុនជប៉ុន Yamato Green បានលើកឡើងគម្រោងនេះ ក្នុងជំនួបជាមួយឯកឧត្តម វេង សាខន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១៤ ខែមិថុនា នៅទីស្តីការក្រសួង។ ក្នុងជំនួបនោះ ក្រុមហ៊ុន Yamato Green លើកឡើងពី មានបំណងចងសម្ព័ន្ធភាព និងចុះហត្ថលេខា MOU ជាមួយសម្ព័ន្ធកសិកម្មកម្ពុជា ក្នុងពេលឆាប់ៗខាងមុខ។ សម្ព័ន្ធនេះ មានតួនាទីជំរុញការអភិវឌ្ឍកសិ-ឧស្សាហកម្មកម្ពុជាឲ្យរីកចម្រើន ប្រកបដោយចីរភាព និងនិរន្តរភាព ទូលំទូលាយ គ្របដណ្តប់លើគ្រប់ប្រភេទដំណាំ និងភូមិសាស្ត្រទូទាំងប្រទេស ហើយក្នុងពេលឆាប់ៗ លោកគ្រោងជួបពិភាក្សាជាមួយលោកឧកញ៉ា ដើម្បីរកការរីកចម្រើនក្នុងការជំរុញឲ្យដំណើរការរួមគ្នា។ទន្ទឹមនឹងនេះ ក្រុមហ៊ុន ក៏បានលើកឡើងពី ប្រភេទកសិផលសក្ដានុពល ដូចជា ត្រសក់ផ្អែមជប៉ុន និងផ្លែប៊ឺ (Avokodo) សណ្តែកសៀង និងជីកសិកម្ម ដែលក្រុមហ៊ុនកំពុងសិក្សា និងអនុវត្តដាំសាកល្បងនៅកម្ពុជា។លោកប្រធានក្រុមហ៊ុនជប៉ុន Yamato Green បានលើកឡើងថា ប្រភេទកសិផលទាំងនេះ អំណោយផលសម្រាប់ការដាំដុះនៅកម្ពុជា។ ក្រុមហ៊ុនមានបំណងដាំដុះ សម្រាប់ធ្វើការកែច្នៃ និងវេចខ្ចប់សម្រាប់នាំចេញទៅទីផ្សារប្រទេសជប៉ុន និងប្រទេសដទៃទៀត។លោកនាយកក្រុមហ៊ុន បានជម្រាបជូនទៀតថា ស្ថានភាពជំងឺឆ្លងកូវីដ-១៩ ហាក់មានភាពល្អប្រសើរជាបណ្តើរៗ ព្រមជាមួយគ្នានេះ ក្រុមហ៊ុន Yamato Green នឹងចាប់ ផ្តើមសកម្មភាពរបស់ខ្លួនជាជំហានៗ តាមអ្វីដែលក្រសួងកសិកម្ម រុក្ខាប្រមាញ់ និងនេសាទ និងក្រុមហ៊ុនបានឯកភាពជាមួយគ្នាក្នុងខ្លឹមសារ MOU។ជាការឆ្លើយតប ឯកឧត្តម វេង សាខន បានស្វាគមន៍ និងបង្ហាញពីឆន្ទៈគាំទ្រ ព្រោះជាប្រភេទដំណាំថ្មី បច្ចេកទេសថ្មី និងពេញនិយមសម្រាប់ទីផ្សារជប៉ុន។ មិនតែប៉ុណ្ណោះ ឯកឧត្តមរដ្ឋមន្ត្រី បានស្នើឲ្យក្រុមហ៊ុនសហការជាមួយអគ្គនាយកដ្ឋានកសិកម្មធ្វើការស្រាវជ្រាវតាមបណ្តាខេត្ត។ឯកឧត្តមរដ្ឋមន្ត្រី បានបញ្ជាក់ថា ទោះបីយើងកំពុងប្រឈមបញ្ហាលំបាកយ៉ាងណាក៏ដោយ ក្រសួងតែរក្សាតួនាទី និងភារកិច្ចរបស់ខ្លួនបានយ៉ាងខ្ជាប់ខ្ជួនដើម្បីធានាសន្តិសុខស្បៀង បង្កើនផលិតកម្មកសិកម្ម ក្នុងបរិបទនៃការរីករាយដាលជំងឺឆ្លងកូវីដ-១៩៕អត្ថបទ ៖ វណ្ណ

ក្រសួងឧស្សាហកម្ម ជំរុញលើកកម្ពស់ផលិតភាពសហគ្រាសធនតូចនិងមធ្យម

ភ្នំពេញ ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អនុវត្តបានជោគជ័យប្រព័ន្ធផលិតកម្ម ហៅកាត់ថា LEAN Manufacturing ដែលជួយលើកកម្ពស់ផលិតភាពសហគ្រាសធនតូចនិងមធ្យម (SME)នៅកម្ពុជា។ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងនៅក្នុងសិក្ខាសាលាផ្សព្វផ្សាយថ្នាក់ជាតិស្តីពី "វដ្ដនៃគុណភាព នវានុវត្តន៍ និងប្រព័ន្ធផលិតកម្ម LEAN ដើម្បីលើកកម្ពស់ផលិតភាព សហគ្រាស ធនតូចនិងមធ្យម (SME) តាមរយៈប្រព័ន្ធ (Zoom Cloud Meeting) នៅថ្ងៃទី ១៤ ខែ មិថុនា ឆ្នាំ២០២១ ថា បើទោះបីមានវិបត្តិសុខភាពសាកលកូវីដ-១៩ យ៉ាងណាក្តី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅតែបន្តស្វះស្វែងរកវិធីសាស្ត្រ ដើម្បីជួយស្តារស្ថានភាពសេដ្ឋកិច្ចរបស់ក្រុមហ៊ុន និងសហគ្រាសធនតូច និងមធ្យមនៅកម្ពុជា ។ ជាក់ស្តែងក្នុងរយៈពេលជាងមួយឆ្នាំមកនេះ មជ្ឈមណ្ឌលផលិតភាពជាតិ សហការជាមួយអង្គការផលិតភាពអាស៊ី (APO) បានសាកល្បងអនុវត្តគម្រោងផ្តោតលើផលិតកម្ម LEAN (LEAN Manufacturing) ទៅលើក្រុមហ៊ុនគំរូចំនួន ៣ តាមរយៈការផ្តល់ការប្រឹក្សាយោបល់ដោយផ្ទាល់ខ្លះ និងពីចម្ងាយតាមប្រព័ន្ធអនឡាញ ដើម្បីវាស់វែងនៃវិធីសាស្ត្រផលិតភាព ក្នុងបរិបទពិភពលោកបច្ចុប្បន្ន ។ឯកឧត្តម ទេសរដ្ឋមន្ត្រី បន្តថា តាមរយៈការរៀនសូត្រពីបទពិសោធន៍ទាំងនេះ ឃើញថា ប្រព័ន្ធផលិតកម្ម LEAN ផ្តោតលើការបង្កើនសកម្មភាពផ្តល់តម្លៃបន្ថែមជូនអតិថិជនរបស់ខ្លួន ហើយកាត់បន្ថយសកម្មភាព នឹងបានផ្តល់តម្លៃបន្ថែមឲ្យបានកាន់តែខ្ពស់ ដែលកន្លងមកសកម្មភាពផ្តល់តម្លៃបន្ថែមនេះ តាមរយៈការអនុវត្តរបស់ក្រុមហ៊ុននានា មានមិនបានដល់ ៣% នោះឡើយ ដែលជាការធ្វើឲ្យក្រុមហ៊នចំណាយរហូតដល់ ៩៧% លើសកម្មភាពដែលពុំបានផ្តល់តម្លៃបន្ថែមជូនអតិថិជន ដែលនេះជាការខាតបង់យ៉ាងច្រើនសម្បើម, បើសហគ្រាសអាចបង្កើនសកម្មភាពផ្តល់តម្លៃបន្ថែមដល់ ៥% ឬដល់ ១០% នោះ សហគ្រាសនឹងអាចទទួលបានជោគជ័យ នឹងក្លាយជាសហគ្រាសឆ្នើមផងដែរ៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ចិនសម្តែងក្ដីបារម្ភយ៉ាងខ្លាំង ចំពោះផែនការរបស់អ៊ីស្រាអែល ក្នុងការគ្រប់គ្រងតំបន់ហ្កាហ្សា

អ្នកជំនាញ៖ ទឹកជំនន់ស្លាប់មនុស្សនៅតំបន់ហិម៉ាឡៃប្រទេសឥណ្ឌា អាចបណ្តាលមកពីការបាក់ផ្ទាំងទឹកកក

កោះតៃវ៉ាន់រាយការណ៍ករណីដំបូងនៃវីរុសឈីកដែលនាំចូលពីការរីករាលដាលនៅប្រទេសចិន

ព្រះសង្ឃខេត្តស្វាយរៀងនាំគ្រឿងឧបភោគផ្ដល់ជូនដល់វីរៈកងទ័ពនិងជនភៀសសឹកឈរជើងទិសខេត្តព្រះវិហារនិងខេត្តឧត្តមានជ័យ

ប្រមុខអង្គការសហប្រជាជាតិនិយាយថា សង្គ្រាមពាណិជ្ជកម្ម ចាំបាច់ត្រូវជៀសវាង

រដ្ឋមន្ត្រីការបរទេសហ្វាំងឡង់៖ សហរដ្ឋអាមេរិកគួរតែដាក់ទណ្ឌកម្មលើរុស្ស៊ី

ក្រុមឧទ្ទាម M23 របស់កុងហ្គោ និយាយថា ខ្លួនពុំទទួលបានការអញ្ជើញឲ្យចូលរួមកិច្ចប្រជុំសន្តិភាពនោះទេ

ពលករធ្វើការនៅប្រទេសថៃ អរគុណរាជរដ្ឋាភិបាល ដែលបានយកចិត្តទុកដាក់លើពួកគាត់ និងជួយអោយមានការងារធ្វើនៅជិតផ្ទះ មិនមានការភិតភ័យ

មន្ត្រីអូម៉ង់ និងប៉ាឡេស្ទីន អំពាវនាវឲ្យមានវិធានការ ដើម្បីបញ្ចប់វិបត្តិហ្កាហ្សា

ភ្លៀងធ្លាក់ខ្លាំងបង្កជាទឹកជំនន់ និងបំណាក់ដីនៅតំបន់ភាគខាងត្បូងប្រទេសជប៉ុន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

ប្រជាកសិករ​នៅ​ស្រុក​សេសា​ន បាន​ងាក​ដាំ​ដំណាំ​ទុរេ​ន​សម្រេចបាន​ជោគជ័យ

តម្លៃ​ប្រេងឥន្ធនៈ​ចាប់ពី​ថ្ង​ទី​១៦​ដល់​៣០មិថុនា កើន​ថ្លៃ​១០០​រៀល​ទៀត ក្នុង​១​លីត្រ​

ក្រុមហ៊ុន​ចុះបញ្ជី​តាម​ប្រព័ន្ធ​ថ្នាល​តែមួយ មាន​ទុន​វិនិយោគ​សរុប​ជាង ២ ៦០០លាន​ដុល្លារ​

ក្រសួង​រ៉ែ និង​ថាមពល បន្ត​តាមដាន​ដំណើរការ​បូម​ប្រេង​ឆៅ​របស់​ក្រុមហ៊ុន KrisEnergy

កម្ពុជាវាយតម្លៃ​ខ្ពស់​ហិរញ្ញប្បទាន​ឥត​សំណង​របស់​អូស្ត្រាលី លើ​ការអភិវឌ្ឍ​វិស័យ​ទឹកស្អាត​នៅ​កម្ពុជា

កម្ពុជា ទាក់ទាញ​វិនិយោគ​មកពី​ប្រទេស​បារាំង និង​ស៊ុយអែត​មក​វិនិយោគ​នៅ​កម្ពុជា

ក្រុមហ៊ុន​ជប៉ុន Yamato Green បង្ហាញ​គម្រោង​វិនិយោគ​លើ​ផលិតផល​កសិកម្ម​​នៅ​កម្ពុជា​

ក្រសួង​ឧស្សាហកម្ម ជំរុញ​លើក​កម្ពស់​ផលិតភាព​សហគ្រាស​ធន​តូច​និង​មធ្យម