BTV NEWS

នៅត្រីមាសទី១ ឆ្នាំនេះកម្ពុជានាំចេញផលិតផលសម្លៀកបំពាក់ ស្បែកជើង និងសម្ភារៈធ្វើដំណើរ មានទឹកប្រាក់ជាង ៣.៨០០ លានដុល្លារ

រដ្ឋសម្រេចលុបបំបាត់កម្រៃស្កែនកុងតឺន័រទាំងស្រុងចាប់ពីខែឧសភាតទៅ ដើម្បីសម្រួលពាណិជ្ជកម្មក្នុងស្រុក

កូនផ្សោតទន្លេមេគង្គទើបកើតថ្មី ១ក្បាលទៀត នាំមកក្តីសង្ឃឹមសម្រាប់ការអភិរក្សនៅដើមឆ្នាំ២០២៦

ធនាគារជាតិ ដាក់ឱ្យប្រើប្រាស់ប្រព័ន្ធវដ្តករសាស្រ្តហិរញ្ញវត្ថុ ដើម្បីបង្កើនការយល់ដឹងដល់ភាគីពាក់ព័ន្ធ

សេដ្ឋកិច្ច និង កសិកម្ម

រាជរដ្ឋាភិបាលកម្ពុជា ដាក់ដំណើរការប្រព័ន្ធទិន្នន័យតភ្ជាប់ទំនាក់ទំនងវិនិយោគិនក្នុងស្រុកនិងបរទេស

ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា សហការជាមួយវេទិកាសេដ្ឋកិច្ចពិភពលោក (World Economic Forum) នៅថ្ងៃទី១២ ខែឧសភា ឆ្នាំ២០២១នេះ បានដាក់ឲ្យដំណើរការនូវប្រព័ន្ធទិន្នន័យ ស្តីពីសន្ធានកម្មខ្សែច្រវាក់ផ្គត់ផ្គង់សំដៅ ផ្តល់កិច្ចសម្រួលវិនិយោគ សម្រាប់អភិវឌ្ឍន៍ចីរភាព ដើម្បីផ្ដល់ព័ត៌មានស្ដីពីប្រតិបត្តិការប្រកបដោយនិរន្តរភាពនៃក្រុមហ៊ុនក្នុងស្រុក និងបម្រើជាវេទិកាដ៏សំខាន់មួយក្នុងការតភ្ជាប់ទំនាក់ទំនងរវាងក្រុមហ៊ុនបរទេស និងក្រុមហ៊ុនក្នុងស្រុក អាចស្វែងរកភាពជាដៃគូណាមួយ ឬការធ្វើការវិនិយោគនៅក្នុងប្រទេសកម្ពុជាបាន។ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានលើកឡើងនៅក្នុងវេទិកាសេដ្ឋកិច្ចពិភពលោក (World Economic Forum) នៃការរៀបចំពិធីដាក់ឱ្យដំណើរការនូវប្រព័ន្ធទិន្នន័យ ស្តីពីសន្ទានកម្មខ្សែច្រវាក់ផ្គត់ផ្គង់សំដៅផ្តល់កិច្ចសម្រួលវិនិយោគ សម្រាប់អភិវឌ្ឍន៍ចីរភាព តាមប្រព័ន្ធវីដេអូ នៅថ្ងៃទី១២ ខែឧសភា ថា ប្រព័ន្ធទិន្នន័យនេះមានសារៈសំខាន់ណាស់ ដើម្បីផ្តល់នូវថ្នាលបច្ចេកវិទ្យាព័ត៌មានសម្រាប់សម្រួលដល់ការធ្វើសន្ទានកម្ម ខ្សែច្រវាក់ផ្គត់ផ្គង់ រវាងអ្នកផ្គត់ផ្គង់ក្នុងស្រុក និងអ្នកវិនិយោគ ដោយផ្តោតលើការផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាព ។ឯកឧត្តមរដ្ឋមន្ត្រីប្រតិភូ បានស្នើសុំឱ្យតួអង្គពាក់ព័ន្ធទាំងអស់ចូលរួមប្រើប្រាស់ប្រព័ន្ធទិន្នន័យនេះឱ្យបានទូលំទូលាយ និងសង្ឃឹមយ៉ាងមុតមាំថា អ្នកវិនិយោគ និងក្រុមហ៊ុនបរទេស នឹងមើលឃើញថា កម្ពុជាកំពុងបង្កើតនូវបរិស្ថានវិនិយោគ ដែលស្វាគមន៍វត្តមានរបស់ពួកគេ ខណៈកម្ពុជាបានខិតខំជំរុញការវិនិយោគ ដែលមានទង្វើធុរកិច្ចប្រកបដោយការទទួលខុសត្រូវ និងមានចីរភាព។លោកបណ្ឌិត ម៉ាធូ ស្តេហ្វិនសុន (Matthew Stephenson) នាយកគោលនយោបាយ និងសហគមន៍នៃនាយកដ្ឋានវិនិយោគ និងពាណិជ្ជកម្មអន្តរជាតិ ថ្លែងថា ក្រុមហ៊ុនបរទេសដែលស្វែងរកការវិនិយោគ អនុលោមតាមគោលការណ៍បរិស្ថាន, សង្គម, និងអភិបាលកិច្ច អាចដាក់ការវិនិយោគនៅកម្ពុជា ជាមួយក្រុមហ៊ុនក្នុងស្រុក ដែលកំពុងប្រតិបត្តិការប្រកបដោយចីរភាព ហើយក្រុមហ៊ុនកម្ពុជាដទៃទៀត អាចបង្វែរការតម្រង់ទិសប្រតិបត្តិការធុរកិច្ចរបស់ខ្លួន ទៅរកការអភិវឌ្ឍប្រកបដោយចីរភាពកាន់តែច្រើនទៀត ដើម្បីទាក់ទាញការធ្វើធុរៈកិច្ច រួមគ្នាជាមួយនឹងក្រុមហ៊ុនបរទេស សំដៅលើកកម្ពស់ការធ្វើសន្ទានកម្មខ្សែច្រវាក់ផ្គត់ផ្គង់តំបន់ និងសកលលោក។ការជ្រើសរើសកម្ពុជា ជាដៃគូពិភាក្សារបស់វេទិកាសេដ្ឋកិច្ចពិភពលោក លើការផ្តល់កិច្ចសម្រួលវិនិយោគសម្រាប់ការអភិវឌ្ឍប្រកបដោយចីរភាព គឺឈរលើមូលដ្ឋានរឹងមាំរបស់កម្ពុជា ដែលមានគោលនយោបាយបើកចំហរដ៏ប្រសើរចំពោះការវិនិយោគ។វេទិកាសេដ្ឋកិច្ចពិភពលោកនិងកម្ពុជា បានធ្វើការរួមគ្នាដើម្បីចែករំលែកនូវរបកគំហើញ និងឧត្តម្មានុវត្តស្តីពីការផ្តល់កិច្ចសម្រួលវិនិយោគ ជាពិសេសដំណើរការនៃការរៀបចំប្រព័ន្ធទិន្នន័យស្តីពីសន្ធានកម្មខ្សែច្រវាក់ផ្គត់ផ្គង់ សំដៅផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាពជាមួយប្រទេសដទៃទៀតក្នុងក្របខណ្ឌអង្គការពាណិជ្ជកម្មពិភពលោក និងក្របខណ្ឌតំបន់ដទៃទៀត។សូមបញ្ជាក់ថា កាលពីឆ្នាំ ២០១៩ ការអនុម័តគម្រោងវិនិយោគដោយ ក្រុមប្រឹក្សាអភិវឌ្ឍន៍កម្ពុជា បានកត់ត្រា ៩,៤០ ពាន់លានដុល្លារអាមេរិកក្នុងចំណោមនោះប្រទេសចិន បានវិនិយោគ ២,៧៥ ពាន់លានដុល្លារអាមេរិក បន្ទាប់មកទីក្រុងហុងកុង ៩១២,៥៥ លានដុល្លារអាមេរិក និងជប៉ុន ២៩៨,៨៤ លានដុល្លារ៕អត្ថបទ ៖ សុន រ៉ាឌី

សិប្បករខ្មែរ ជំរុញផ្សព្វផ្សាយផលិតផលផលិតក្នុងស្រុក តាមផ្សារទំនើបទាក់ទាញការគាំទ្រពីអ្នកប្រើប្រាស់

ភ្នំពេញ ៖ ផលិតផលខ្មែរជាច្រើនមុខ រាប់ចាប់ពី បន្លែ, ផ្លែឈើ, ទំនិញវេចខ្ចប់ និងសម្ភារៈសម្រាប់ប្រើប្រាស់ប្រចាំថ្ងៃ កំពុងមានវត្តមាននៅលើទីផ្សារទំនើបៗ ដើម្បីផ្សព្វផ្សាយដល់អ្នកប្រើប្រាស់។ សិប្បករក្នុងស្រុក លើកឡើងថា ផលិតផលក្នុងស្រុក កំពុងទទួលបានការគាំទ្រពីអតិថិជនជាបន្តបន្ទាប់។អតិថិជនក្នុងផ្សារទំនើប បានលើកឡើងនៅក្នុងកិច្ចសម្ភាសន៍ជាមួយអ្នកយកព័ត៌មាន នៅផ្សារទំនើបអ៊ីអនសែនសុខ ២ នៅថ្ងៃទី១២ ខែឧសភា ឆ្នាំ ២០២១ បានលើកឡើងស្រដៀងគ្នាថា ពួកគាត់សង្កេតឃើញផលិតផលខ្មែរ មានដាក់តាំងលក់នៅតាមផ្សារទំនើបជាបណ្តើរៗ ជាពិសេសនៅក្នុងផ្សារទំនើបអឺអននេះជាដើម។ មិនត្រឹមតែបានទិញ ផលិតផលរបស់ខ្មែរ សម្រាប់យកទៅផ្គត់ផ្គង់ការហូបចុក ពួកគាត់លើកឡើងថា នៅពេលបានឃើញផលិត ផលរបស់ខ្មែរមានដាក់លក់នៅតាមផ្សារទំនើបៗ បានន័យថា ផលិតផលខ្មែរមានការផលិតដោយអនុវត្តតាមបច្ចេកទេសនិងអនាម័យយ៉ាងត្រឹមត្រូវ ទើបផលិតផលទាំងនេះអាចជ្រៀតចូលក្នុងទីផ្សារទំនើបបាន ។ជុំវិញនិងការដាក់លក់ផលិតផលខ្មែរ, លោក រ័ត្ន ចន្នី អនុប្រធានផ្សារទំនើបអឺអន សែខសុខ ២ លើកឡើងថា ចំពោះកិច្ចសហការរវាងក្រសួងសេដ្ឋកិច្ច និងហិរញ្ញវត្ថុ ជាមួយផ្សារទំនើបអឺអន ក្នុងការដាក់តាំងលក់ផលិតផលនេះឡើង គឺជាការចូលរួមលើកកម្ពស់ផលិតផលក្នុងស្រុក ឲ្យប្រជាជនមានការទទួលស្គាល់ខ្លាំងជាងមុន, ការលើកទឹកចិត្តដល់អ្នកវិនិយោគ និងប្រជាកសិករ ឲ្យមានការដាំដុះកាន់តែច្រើន និងជាការរួមចំណែករកទីផ្សារជូនពួកគាត់ ដើម្បីជំរុញដល់កសិករផលិតចេញជាផលិតផលសម្រេចមានគុណភាព និងមានទីផ្សារសម្រាប់ការលក់ដូរ ។លោក បន្តថា នៅក្នុងរយៈពេលកន្លងមកនេះ ផលិតផលខ្មែរ ទាំងផលិតផលវិច ខ្ចប់ បន្លែផ្លែឈើ និងមុខទំនិញសម្រាប់ការប្រើប្រាស់ផ្សេងៗ កំពុងមានវត្តមាននៅលើទីផ្សារទំនើបអ៊ីអនជាបណ្តើរៗ។ ទន្ទឹមនេះ លោកបានលើកទឹកចិត្ត អ្នកផលិត កសិករ និងសហគមន៍កសិកម្ម អនុវត្តន៍ការចុះបញ្ជីឲ្យបានត្រឹមត្រូវ នៅតាមក្រសួងស្ថាប័នពាក់ព័ន្ធ ដើម្បីមានឱកាសនាំយកផលិតផលរបស់ខ្លួនចូលផ្សារទំនើប ជាពិសេសការនាំចូលផ្សារទំនើបអ៊ីអនជាដើម។សូមបញ្ជាក់ថា ចំពោះផលិតផលដែលកំពុងមានវត្តមានដាក់តាំងលក់នៅ ក្នុងពិព័រណ៍ផលិតក្នុងស្រុក ក្នុងផ្សារទំនើបអ៊ីអនរួមមាន ៖ ផ្លែស្រកានាគ, ផ្លែត្រសក់ផ្អែមលឿង, ផ្លែត្រសក់សំណាញ់, ត្រសក់ទឹកក្រូច, ស្វាយកែវរមៀត, ផ្លែប័រ, ធុរេន, សាវម៉ាវ, ម្នាស់ទឹកឃ្មុំ, ស្វាយកែវចិន, ត្រកួន, ខាត់ណា, ស្ពៃខ្មៅ, ស្ពៃតឿ, ត្រឡាច, ត្រសក់ជាដើម ។ ចំណែកផលិតវេចខ្ចប់មាន, ទឹកស៊ីអ៊ីវ, ទឹកម្ទេស, ទឹកត្រី, ស្ករត្នោត, ម្រេច, ការហ្វេ, ទឹកឃ្មុំ, មី, អង្ករ, ពង់មាន់, ពង់ទា និងទំនិញវេចខ្ចប់ជាច្រើនទៀត រួមជាមួយផលិតផលសម្រាប់ការប្រើប្រាស់ប្រចាំថ្ងៃជាច្រើនមុខផងដែរ ៕អត្ថបទ៖ សុន រ៉ាឌី

រោងចក្រសហគ្រាសបើកដំណើរការឡើងវិញ ជាបន្តបន្ទាប់ជាមួយនឹងការអនុវត្តវិធានសុខាភិបាល

ភ្នំពេញ ៖ ចំនួនរោងចក្រសហគ្រាសបានបើកដំណើរការឡើងវិញជាបន្តបន្ទាប់ ក្រោយផ្អាកការងារមួយរយៈពេល ដោយសារការរាលដាលនៃជំងឺឆ្លងកូវីដ១៩។ កម្មករ កម្មការិនី និងរោងចក្រសហគ្រាស អះអាងថា នឹងចូលរួមគោរពតាមការណែនាំរបស់រាជរដ្ឋាភិបាល ៣ការពារ និង៣កុំ ដើម្បីប្រឆាំង និងទប់ស្កាត់ការឆ្លងវីរុសកូវីដ១៩។ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃ១៣ ឧសភា ឆ្នាំ២០២១នេះ ក្រុមកម្មករ កម្មការិនីនៅរោងចក្រផលិតស្បែកជើង ដ្រាហ្គន វីនស៊ូ ស្ថិតនៅផ្លូវវេងស្រេង ខណ្ឌមានជ័យ រាជធានីភ្នំពេញ បានរៀបរាប់ទាំងអារម្មណ៍សប្បាយរីករាយ និងសង្ឃឹមថា ការត្រឡប់ចូលធ្វើការវិញនេះ នឹងបន្តជារៀងរហូត ព្រោះថា ការឈប់សម្រាកនៅផ្ទះកន្លងមក ធ្វើឲ្យជួបការលំបាកជាច្រើន ដូចជាគ្មានប្រាក់ចំណូល និងមិនអាចដើរទៅណាបាន ដោយសារការព្រួយបារម្ភពីជំងឺឆ្លងកូវីដ១៩។កម្មករ កម្មការិនីខាងលើ ក៏បានអំពាវនាវទៅដល់ពលរដ្ឋទាំងអស់ ចូលរួមអនុវត្តតាមការណែនាំនូវវិធានការណ៍នានា ដែលរាជរដ្ឋាភិបាលដាក់ចេញ ជាពិសេសនៅពេលចេញក្រៅផ្ទះ គប្បីពាក់ម៉ាស់ លាងដៃឲ្យបានញឹកញាប់ និងរក្សាគម្លាតសង្គម ដើម្បីចៀសវាងពីការកើតមាន និងឆ្លងជំងឺដ៏កាចសាហាវកូវីដ១៩នេះ។លោក ស៊ីរ វុត្តី តំណាងរោងចក្រផលិតស្បែកជើង ដ្រាហ្គន វីងស៊ូ បានលើកឡើងថា ការសម្រេចបើកអាជីវកម្មឡើងវិញនេះ គឺមានការត្រួតពិនិត្យយ៉ាងត្រឹមត្រូវពីអាជ្ញាធរមូលដ្ឋាន និងបាញ់ថ្នាំសម្លាប់មេរោគ ដើម្បីធានាសុវត្ថិភាពដល់កម្មករនិយោជិត និងរោងចក្រទាំងមូលឲ្យមាននិរន្តរភាព ពោលមិនមែនបើក ដើម្បីបិទទៅវិញទេ។សូមបញ្ជាក់ថា រោងចក្រសហគ្រាសស្ថិតក្នុងតំបន់លឿងប៉ុណ្ណោះ ត្រូវបានអនុញ្ញាតឱ្យបើកដំណើរការឡើងវិញ។ ទន្ទឹមនឹងការកែសម្រួលវិធានការរបស់រដ្ឋបាលរាជធានីភ្នំពេញ តំបន់លឿងទុំ និងក្រហម បានរួមតូច ហើយចំនួនរោងចក្រសហគ្រាសបន្តបើកដំណើរការឡើងវិញជាបន្តបន្ទាប់៕អត្ថបទ ៖ ឈិត បូរ៉ាវី

ផ្សារទាំងអស់ក្នុងរាជធានីភ្នំពេញ អាចបន្តរយៈពេលបិទបន្ថែមទៀត ក្រោយថ្ងៃទី១៤ឧសភា

ភ្នំពេញ ៖ លោក មេត មាសភក្ដី អ្នកនាំពាក្យសាលារាជធានីភ្នំពេញ បានបញ្ជាក់ខ្លី នៅព្រឹកនេះថា មកទល់ពេលនេះ ពុំទាន់មានការសម្រេចឱ្យបើកដំណើរការផ្សារជាថ្មីវិញនោះទេ។ គិតមកត្រឹមថ្ងៃទី ១២ខែឧសភាឆ្នាំ ២០២១ នេះ សាលារាជធានីភ្នំពេញ ពុំទាន់មានការសម្រេចក្នុងការបើកដំណើរការផ្សារទូទាំងរាជធានីភ្នំពេញវិញនោះទេ។ នេះជាការបញ្ជាក់របស់ លោក មេត មាសភក្ដី ជាអ្នកនាំពាក្យរបស់សាលារាជធានីភ្នំពេញ នៅព្រឹកនេះ។ លោក បានបន្តថា ផ្សារទាំងអស់អាចបន្តបិទ តែក្នុងរយៈពេលប៉ុន្មានទៀត ក៏មិនទាន់មានការសម្រេចនោះទេ។ ចំពោះលក្ខខណ្ឌ រឺ ការកំណត់ជាវិធានការតឹង រឹងបែបណា ចំពោះការបើកដំណើរការផ្សារជាថ្មី ក៏មិនទាន់មានការបញ្ជាក់ច្បាស់លាស់បន្ថែមនោះទេ។ ការបញ្ជាក់បែបនេះ គឺស្របពេលដែលការសម្រេចកន្លងទៅរបស់រដ្ឋបាលរាជធានីភ្នំពេញ ជុំវិញការផ្អាកដំណើរការផ្សារ គឺបន្តបិទរហូតដល់ថ្ងៃទី ១៤ខែឧសភាឆ្នាំ ២០២១។កំឡុងពេលនៃការផ្អាកផ្សារជាបណ្ដោះអាសន្នមួយរយៈមកនេះ គណៈកម្មការផ្សារនីមួយបានបំពេញសកម្មភាពមួយចំនួន ដើម្បីត្រៀមសម្រាប់ការបើកដំណើរការជាថ្មី បើសិនមានការអនុញ្ញាតពីសាលារាជធានីភ្នំពេញ។ ជាការងារសកម្មភាពរបស់ ផ្សារបឹងកេងកង តាមការលើកឡើងរបស់លោក ឯក និមល ជាប្រធានផ្សារបានបញ្ជាក់ប្រាប់នៅព្រឹកនេះថា គណៈកម្មការផ្សារបានរៀបចំការងារសណ្ដាប់ធ្នាប់ទូទៅជាប្រចាំ និងលើកទឹកចិត្តឱ្យអាជីវករបន្តការពារខ្លួន និងទទួលយកការចាក់វ៉ាក់សាំងកូវីដ-១៩ ដើម្បីសុវត្ថិភាពផងដែរ។សម្រាប់ផ្សារ ច្បារអំពៅវិញ នៅព្រឹកនេះគណៈកម្មការផ្សារកំពុងរៀបចំកន្លែងលក់ឱ្យមានរបៀប និងរៀបចំផ្លូវជុំវិញផ្សារឱ្យមានគម្លាត ដោយទុកទំហំផ្លូវឱ្យបាន ៤ម៉ែត្រ ដោយកន្លងមកផ្លូវជុំវិញផ្សារគឺមានភាពចង្អៀត សល់ទំហំត្រឹមតែប្រមាណ១ម៉ែត្រកន្លះតែប៉ុណ្ណោះ។ លើកពីនេះផ្សារ ក៏បានលាងសម្អាត និងបាញ់ថ្នាំសម្លាប់មេរោគរួចរាល់ផងដែរ។ ក្នុងកំឡុងពេលបន្តបិទនេះ លោកជាប្រធានផ្សារសំណូមពរឱ្យអាជីវករ បន្តការអត់ធ្មត់ និងលើកទឹកចិត្តឱ្យអាជីវករគ្រប់គ្នាទទួលការចាក់វ៉ាក់សាំងឱ្យបានមុនបើកដំណើរការផ្សារជាថ្មី។ផ្អែកតាមសេចក្ដីជូនដំណឹងរបស់សាលារាជធានីភ្នំពេញ កាលពីថ្ងៃទី ៦ឧសភា បង្ហាញថា ផ្សាររដ្ឋក៏ដូចជាផ្សារមិនរៀបរយទាំងអស់ក្នុងរាជធានីភ្នំពេញ គឺត្រូវបន្តផ្អាកជាបណ្ដាអាសន្នចាប់ពីថ្ងៃទី ៨ ខែឧសភាដល់ថ្ងៃទី ១៤ ខែឧសភា ឆ្នាំ២០២១ ដើម្បីប្រយុទ្ធប្រឆាំងនឹងការឆ្លងរាលដាលជំងឺកូវីដ-១៩។ យ៉ាងណាម៉ិញ លោក មេត មាសភក្ដី អ្នកនាំពាក្យសាលារាជធានីភ្នំពេញ បានបញ្ជាក់ខ្លីនៅព្រឹកនេះថា ផ្សារទាំងអស់នៅរាជធានីភ្នំពេញ អាចបន្តរយៈពេលបិទបន្ថែមទៀត តែពុំទាន់មានការកំណត់រយៈពេលច្បាស់លាស់នោះទេ។ ចំពោះលក្ខខណ្ឌ រឺការកំណត់ជាវិធានការតឹងរឹងបែបណា ចំពោះការបើកដំណើរការផ្សារជាថ្មី ក៏ពុំទាន់មានការបញ្ជាក់ច្បាស់លាស់ផងដែរ៕អត្ថបទ ៖ គឹមហុក

ទុរេនឆ្នាំនេះនៅតែមានតម្លៃខ្ពស់ ខណៈតម្រូវការទុរេនដាំក្នុងស្រុកកើនឡើង

ភ្នំពេញ ៖ ក្រុមអាជីវករលក់ផ្លែទុរេននៅរាជធានីភ្នំពេញ បានលើកឡើងស្រដៀងគ្នាថា តម្លៃទុរេននៅតែខ្ពស់ប្រហាក់ប្រហែល នឹងតម្លៃឆ្នាំមុន ស្របពេលដែលតម្រូវការទុរេនដាំក្នុងស្រុកក្នុងមួយរដូវៗ កើនឡើង។លោក សួស គន្នី អាជីវករលក់ផ្លែឈើជាច្រើនប្រភេទ នៅតំបន់ភ្នំពេញថ្មី ខណ្ឌសែនសុខ បានប្រាប់ទូរទស្សន៍ព័ត៌មាន ប៊ីធីវីថា តម្លៃទុរេនលក់រាយឆ្នាំនេះ ប្រៀបធៀបនឹងឆ្នាំកន្លងទៅគឺមានតម្លៃប្រហាក់ប្រហែល ទៅតាមប្រភេទផ្លែទុរេនដែលយកពីតំបន់ខុសៗគ្នា។ ទុរេនមកពីខេត្តកំពង់ចាមថ្លៃ ២៨,០០០រៀល ក្នុង១គីឡូ ទុរេនមកពីខេត្តកោះកុង ប្រហែល ៣០,០០០ម៉ឺនរៀល ក្នុង១គីឡូ ដោយឡែក ទុរេនមកពីខេត្តកំពត ថ្លៃ៣៣,០០០រៀល ក្នុង១គីឡូ។ ចំណែកអ្នកស្រី ប៊ុន វ៉ា ដែលបាននាំយកផ្លែទុរេនដោយផ្ទាល់ពីចំការរបស់ខ្លួនផង និងទិញបន្ថែមពីចំការផ្សេងទៀតនៅខេត្តកំពត ដើម្បីយកមកលក់នៅទីក្រុងភ្នំពេញ បានប្រាប់ឱ្យដឹងថា ទុរេនដាំនៅខេត្តកំពត គឺមិនបានធ្លាក់ថ្លៃ ដោយសារពិបាកថែទាំ និងខូចខាតដោយសារកត្តាអាកាសធាតុក្តៅ ដែលផ្តល់ទិន្នផលធ្លាក់ចុះ។ សព្វថ្ងៃ ដំណាំទុរេនត្រូវបានដាំដុះច្រើនជាងគេនៅខេត្តកំពត កំពង់ចាម ត្បូងឃ្មុំ បាត់ដំបង កោះកុង មណ្ឌលគិរី និងខេត្តពោធិ៍សាត់ ។ ចំពោះរសជាតិនៃទុរេនវិញ គឺទុរេនខេត្តកំពត ត្រូវបានគេទទួលស្គាល់ថា ផ្អែមឈ្ងុយ លើទុរេនដែលដាំនៅខេត្តផ្សេងទៀត ឬទុរេននាំចូលពីប្រទេសជិតខាង។ ទោះបីមានចំការទុរេន នៅតាមបណ្តាខេត្តមួយចំនួនក៏ដោយ កម្ពុជានៅតែនាំចូលទុរេនពីប្រទេសជិតខាង មាន វៀតណាម និងថៃ ដើម្បីផ្គត់ផ្គង់ក្នុងស្រុក។ ការនាំចូលទុរេនពីក្រៅប្រទេសនេះ មិនបានទាញតម្លៃទុរេនក្នុងស្រុកធ្លាក់ចុះនោះទេ ដោយសារតម្រូវការទុរេនដាំក្នុងស្រុកកើនឡើង ជាពិសេសទិន្នផលទុរេនដាំក្នុងស្រុកនៅទាបជាតម្រូវការ។គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ និងក្រសួងពាណិជ្ជកម្ម ធ្លាប់បានលើកឡើងពីគម្រោងបង្កើតសមាគមទុរេនខេត្តកំពត និងសិក្សានិងពិនិត្យលទ្ធភាពចុះបញ្ជីម៉ាកទុរេន ដើម្បីជំរុញការដាំទុរេនក្នុងស្រុក មិនត្រឹមតែសម្រាប់ផ្គត់ផ្គង់ក្នុងស្រុកនោះទេ ប៉ុន្តែថែមទាំងសម្រាប់នាំចេញទៅក្រៅប្រទេស៕អត្ថបទ ៖ ឈិត បូរ៉ាវី

ក្រុមហ៊ុន KrisEnergy នឹងនាំចេញប្រេងឆៅទៅកាន់ទីផ្សារអន្តរជាតិ ក្នុងពេលឆាប់ៗ

ភ្នំពេញ ៖ អគ្គនាយកនៃអគ្គនាយកដ្ឋានប្រេងកាត ថ្លែងឲ្យដឹងថា នៅក្នុងពេលឆាប់ៗខាងមុខនេះ ក្រុមហ៊ុនគ្រីសអេនើជី (KrisEnergy) នឹងនាំចេញប្រេងឆៅ ទៅទីផ្សារអន្តរជាតិ ខណៈបច្ចុប្បន្នក្រុមហ៊ុនកំពុងរៀបចំសំណុំបែបបទ ដើម្បីសុំគោលការណ៍នៃការនាំចេញ។ ការនាំចេញប្រេងឆៅនេះ ស្របពេលដែលបរិមាណបូមប្រេងឆៅ របស់ក្រុមហ៊ុនទាបជាងការរំពឹងទុក។ឯកឧត្តម ជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល បានថ្លែងប្រាប់ BTV នៅថ្ងៃទី៧ ខែឧសភា ឆ្នាំ២០២១ នេះថា បច្ចុប្បន្នក្រុមហ៊ុនកំពុងដំណើរការផលិតកម្មបូមប្រេងនៅលើអណ្តូងទាំង៥ កន្លែង ដោយផលិតកម្មប្រចាំថ្ងៃ ក្នុងរង្វង់ ២ពាន់ប៉ារ៉ែលក្នុងមួយថ្ងៃ ។ឯកឧត្តម បានបន្តឲ្យដឹងថា ក្នុងពេលបច្ចុប្បន្ននេះ ក្រុមហ៊ុន KrisEnergy បានកំពុងរៀបចំសំណុំបែបបទ ដើម្បីសុំគោលការណ៍សម្រាប់នាំចេញប្រេងឆៅយកទៅលក់នៅលើទីផ្សារអន្តរជាតិ។ ក្នុងរយៈពេលជាង ៤ ខែ កន្លងមកនេះ ក្រុមហ៊ុនទទួលបានប្រេងឆៅរាប់សែនប៉ារ៉ែល ដែលជាទំហំមួយសមស្របនឹងការនាំចេញ។ចំណែកផែនការបូមប្រេងឆៅទាបជាងបរិមាណរំពឹងទុក របស់ក្រុមហ៊ុន KrisEnergy ឯកឧត្តម ជៀប សួរ បានបញ្ជាក់ឲ្យដឹងថា បច្ចុប្បន្នក្រុមហ៊ុនកំពុងធ្វើការពិចារណា ខណៈដែលក្រុមហ៊ុនកំពុងជួបបញ្ហាថវិកាដើមទុន ជាមួយក្រុមហ៊ុនធំៗ ដែលជាដៃគូរ រួមជាមួយម្ចាស់បំណុលផ្សេងៗទៀត។ ឯកឧត្តម បានបន្តថា ចំពោះកាតព្វកិច្ចក្នុងការអនុវត្តគម្រោងនេះ រាជរដ្ឋាភិបាលនឹងសង្កេតមើលតាមលក្ខខណ្ឌផ្សេងៗ នៅក្នុងកិច្ចព្រមព្រៀងដែលក្រុមហ៊ុនត្រូវបំពេញ ប្រសិនបើក្រុមហ៊ុនមិនបំពេញតាមប្រការណាមួយ កម្ពុជានឹងអនុវត្តតាមលក្ខខណ្ឌនៃកិច្ចព្រមព្រៀង រវាងរាជរដ្ឋាភិបាល និងក្រុមហ៊ុនតែម្តង។សូមបញ្ជាក់ថា កម្ពុជាបានទទួលដំណាក់ប្រេងលើកដំបូងកាលពីចុងខែធ្នូ ឆ្នាំ២០២០ ក្លាយជាប្រទេសបូមប្រេង មួយនៅក្នុងពិភពលោក។ ក្រុមហ៊ុន KrisEnergy មានមូលដ្ឋាននៅប្រទេសសិង្ហបុរី ទទួលបានសិទ្ធសម្បទានវិនិយោគបូមប្រេងឆៅក្នុងប្លុកA ក្នុងដែនសមុទ្រកម្ពុជា។ តាមការគ្រោងទុក ក្រុមហ៊ុនអាចបូមប្រេងឆៅ ចេញពីអណ្តូងទាំង៥អណ្តូង ក្នុងបរិមាណពី ៧ ០០០ ទៅ ៧ ៥០០ បារ៉ែល ក្នុងមួយថ្ងៃ។ការនាំចេញប្រេងឆៅទៅលក់នៅទីផ្សារបរទេសនេះ គឺដោយសារ កម្ពុជា មិនមានរោងចក្រចម្រាញ់ ប្រេងឆៅ ក្នុងស្រុក។ ប៉ុន្តែទោះជាយ៉ាងណា រាជរដ្ឋាភិបាលកម្ពុជា បាននឹងកំពុងជំរុញ និងទាក់ទាញការវិនិយោគលើគម្រោងវិនិយោគរោងចក្រប្រេងឆៅក្នុងស្រុក ដើម្បីចូលរួមចំណែកផ្តល់ចំណូលពន្ធផង និងផ្តល់ការងារធ្វើដល់ប្រជាពលរដ្ឋកម្ពុជា៕អត្ថបទ៖ សុន រ៉ាឌី

កម្ពុជាបាននាំចេញកសិផលជាង២,៨លានតោន ទៅទីផ្សារអន្តរជាតិ ក្នុងរយៈពេល៤ខែ

ភ្នំពេញ ៖ ក្នុងរយៈពេល៤ខែ កម្ពុជា បាននាំចេញផលិតផលកសិកម្ម ក្រៅពីស្រូវអង្ករ ចំនួន ២,៨ លានតោន ទៅកាន់ទីផ្សារអន្តរជាតិ។យោងតាមរបាយការណ៍នាំចេញកសិផល របស់អគ្គនាយកដ្ឋានកសិកម្ម នៃក្រសួងកសិកម្មដោយមិនរាប់ទាំងការនាំចេញស្រូវ និងអង្ករ ប្រមាណ ១,៧លានតោននោះទេ ការនាំចេញផលិតផលកសិកម្ម មានទឹកប្រាក់សរុប ប្រមាណ ១,៥ ពាន់លានដុល្លារ។របាយការណ៍ដដែល បញ្ជាក់ថា ចាប់ពីខែមករា ដល់ខែមេសា ឆ្នាំ២០២១ កម្ពុជាបាននាំចេញកសិផលចំនួន ៥២មុខផ្សេងទៀត ទៅកាន់ទីផ្សារអន្តរជាតិ កើនឡើង ៦៤ភាគរយ ធៀបនឹងរយៈពេលដូចគ្នានៅឆ្នាំ២០២០ ។កសិផលសំខាន់ៗ ដែលកម្ពុជា បាននាំចេញ មានដូចជា ចំណិតដំឡូងមីក្រៀម១,១លានតោន,ដំឡូងមីស្រស់៣០ម៉ឺនតោន, ម្សៅដំឡូងមីជាង១ម៉ឺនតោន,គ្រាប់ស្វាយចន្ទីប្រមាណ៦៩ម៉ឺនតោន,ចេកស្រស់ប្រមាណ១៦ម៉ឺនតោន, ផ្លែស្វាយស្រស់ប្រមាណ១៤ម៉ឺនតោន និងម្រេចប្រមាណ២ពាន់តោន៕អត្ថបទ ៖ វណ្ណៈ

ផ្សារទាំងអស់ នៅរាជធានីភ្នំពេញ ត្រូវបន្តបិទដោយពុំទាន់មានការកំណត់បើកវិញនោះទេ

ភ្នំពេញ ៖ រាជធានីភ្នំពេញបានសម្រេចបន្តបិទផ្សារក្នុងរាជធានីភ្នំពេញទាំងអស់ ក្រោយមើលឃើញថា ផ្សារទាំងនោះ ពុំទាន់មានលទ្ធភាព រក្សាសុវត្ថិភាព ការពារការឆ្លងជំងឺកូវីដ-១៩នោះទេ។ នេះជាការបញ្ជាក់របស់ឯកឧត្តម កើត ឆែ អភិបាលរងរាជធានីភ្នំពេញ ក្នុងឱកាសសន្និសីទសារព័ត៌មានផ្សព្វផ្សាយស្ដីពី វិធានការរដ្ឋបាលសម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលជំងឺកូវីដ-១៩។តាមសេចក្ដីជូនដំណឹងកន្លងទៅ របស់រដ្ឋបាលរាជធានីភ្នំពេញ បញ្ជាក់ថា ផ្សារមិនរៀបរយទាំងអស់នៅរាជធានីភ្នំពេញ ត្រូវផ្អាកជាបណ្ដោះអាសន្នចាប់ពីថ្ងៃទី ២៤ ខែមេសា ដល់ថ្ងៃទី ៧ឧសភា។ តែជាក់ស្ដែង គឺផ្សារទាំងអស់ត្រូវតែបន្តបិទទ្វារ ពុំអាចបើកដំណើរការតាមការកំណត់ចាស់នោះទេ។ នេះជាការបញ្ជាក់របស់ឯកឧត្តម កើត ឆែ អភិបាលរងរាជធានីភ្នំពេញ ក្នុងឱកាសសន្និសីទសារព័ត៌មានកាលពីម្សិលម៉ិញនេះ។ឯកឧត្តម កើត ឆែ បានបញ្ជាក់ថា ទីតាំងផ្សារជាកន្លែងប្រឈមក្នុងការចម្លង ហើយមកទល់ពេលនេះគឺពុំទាន់មានការកំណត់ពេលវេលាច្បាស់លាស់ក្នុងការបើកដំណើរការជាថ្មីវិញនោះទេ ព្រោះផ្សារទាំងអស់ពុំទាន់មានលក្ខណៈសុវត្ថិភាពគ្រប់គ្រាន់នោះទេ។ ឯកឧត្តម បន្តថា មុននឹងបើកដំណើរការ ក៏នឹងត្រូវត្រួតពិនិត្យច្បាស់លាស់ផងដែរ។ក្នុងកំឡុងពេលបិទផ្អាកផ្សារជាបណ្ដោះអាសន្ននេះ ក៏សង្កេតឃើញតាមផ្សារនីមួយៗ បានដឹកនាំក្រុមការងាររបស់ខ្លួន ចុះរៀបចំកិច្ចការមួយចំនួន ក៏ដូចជាលាងសម្អាតបរិវេណខាងក្នុង និងជុំវិញផ្សារ។ ចំពោះការលក់ជាត្រីសាច់ បន្លែវិញ បច្ចុប្បន្នក៏មានការលក់ចល័តប្រចាំថ្ងៃរបស់ក្រសួងពាណិជ្ជកម្ម ការលក់ចល័តរបស់ក្រុមហ៊ុនឯកជន ដែលទទួលបានការអនុញ្ញាតត្រឹមត្រូវ។ លើសពីនេះ តាមខណ្ឌមួយចំនួន ក៏បានរៀបចំទីតាំងលក់បណ្ដោះអាសន្ន ដើម្បីជួយសម្រួលដល់ការទិញម្ហូបអាហាររបស់ប្រជាពលរដ្ឋក្នុងមូលដ្ឋាន។ ទីតាំងរៀបចំជាបណ្ដោះអាសន្នដែលទទួលបានការអនុញ្ញាតនេះ គឺឃើញមានការជួយរៀបចំពីអាជ្ញាធរ ក្នុងនោះ សង្កេតឃើញមានការរៀបចំទីតាំងលក់នៅបណ្ដោយផ្លូវ វេងស្រេង ក្នុងខណ្ឌពោធិ៍សែនជ័យ ការរៀបចំលក់នៅទីតាំងក្នុងខណ្ឌច្បារអំពៅជាដើម។ ទីតាំងលក់បណ្ដោះអាសន្នទាំងនេះ គឺរៀបចំឡើងដោយមានការរក្សាគម្លាតពីអាជីវករមួយ ទៅអាជីវករ និងទាមទារឱ្យប្រជាពលរដ្ឋ និងអាជីវករមានការប្រុងប្រយ័ត្នខ្ពស់ដើម្បីចៀសផុតការឆ្លងកើតឡើង។ ប៉ុន្តែក្នុងកំឡុងពេលនេះ អាជីវករដែលធ្លាប់លក់ដូរនៅផ្សារ ដើមគរ និងផ្សារនាគមាស ជាច្រើនបានមកលក់ដូរនៅទីតាំងនៅតាមបណ្ដោយផ្លូវជាតិលេខ២ ត្រង់ចំណុចរង្វង់កួរស្រូវ បង្ករជាភាពរញ៉េរញ៉ៃគ្មានសណ្ដាប់ធ្នាប់ និងបង្ករជាការកកស្ទះចរាចរណ៍ថែមទៀតផង៕អត្ថបទ ៖ គឹមហុក

កម្ពុជានាំចេញស្វាយស្រស់ទៅប្រទេសចិន ជាផ្លូវការណ៍ នៅថ្ងៃនេះ

ភ្នំពេញ ៖ បន្ទាប់ពីចរចា និងរៀបចំតាមស្តង់ដារ អនាម័យ និងភូតគាមអនាម័យ តម្រូវដោយភាគីប្រទេសចិន ចំការស្វាយ និងក្រុមហ៊ុននាំចេញស្វាយស្រស់ បានចាប់ផ្តើមនាំចេញផ្លែស្វាយស្រស់ដោយផ្ទាល់ទៅកាន់ប្រទេសចិន ជាផ្លូវការណ៍នៅថ្ងៃសុក្រនេះ។ក្រុមហ៊ុនក្នុងស្រុក ក្នុងចំណោមក្រុមហ៊ុនដែលទទួលបាន អនុម័តទទួលស្គាល់ជាផ្លូវការនូវបញ្ជីឈ្មោះចម្ការស្វាយចំនួន៣៧ និងរោងចក្រវេចខ្ចប់ចំនួន០៥ ដែលបានចុះបញ្ជីសម្រាប់នាំចេញផ្លែស្វាយស្រស់កម្ពុជា ទៅកាន់ប្រទេសចិនពីអគ្គរដ្ឋបាលគយ នៃសាធារណរដ្ឋប្រជាមានិតចិន បាននាំចេញស្វាយស្រស់ទៅកាន់ទីផ្សារប្រទេសចិន ដោយផ្ទាល់នៅថ្ងៃនេះ។ពិធីនាំចេញស្វាយស្រស់ជាផ្លូវការនេះ ធ្វើឡើងដោយក្រុមហ៊ុន (Shang Da Jian Hui International Agriculture Product and Logistics Co Ltd) ស្ថិតនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ក្រោមវត្ដមានឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ផ្លែស្វាយស្រស់កម្ពុជាគឺជាផ្លែឈើស្រស់ទី២ បន្ទាប់ពីផ្លែចេកស្រស់ ដែលអាចនាំចេញទៅប្រទេសចិនដោយផ្ទាល់។ នេះគឺជាសមិទ្ធផលផ្លែផ្កាថ្មីមួយទៀតដែលប្រ សូត្រចេញពីកិច្ចសហប្រតិបត្តិការដ៏ល្អប្រសើររវាងព្រះរាជាណាចក្រកម្ពុជា និងសាធារណៈរដ្ឋប្រជាមានិតចិន ។ឯកឧត្តម វេង សាខុន មានប្រសាសន៍ថា ក្នុងនាមថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ នៃព្រះរាជាណាចក្រកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះ រដ្ឋាភិបាលនៃសាធារណរដ្ឋប្រជាមានិតចិន ជាពិសេសឯកឧត្តម អគ្គរដ្ឋបាលគយនៃសាធារណរដ្ឋប្រជាមានិតចិន ដែលបានអនុញ្ញាតជាផ្លូវការក្នុងនាំផ្លែស្វាយស្រស់ចេញពីកម្ពុជា ។សូមបញ្ជាក់ជូនថា ក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា បានចាប់ផ្តើមទំនាក់ទំនងចរចាបើកទីផ្សារជាមួយអគ្គរដ្ឋបាលគយនៃសាធារណរដ្ឋប្រជាមានិតចិន តាំងពីដើមឆ្នាំ២០១៨ ហើយរហូតដល់ថ្ងៃទី២៨ ខែឧសភា ឆ្នាំ២០២០ ទើបទទួលបានការឯកភាព និងឈានដល់ការចុះហត្ថលេខា នៅថ្ងៃទី០៩ ខែមិថុនា ឆ្នាំ២០២០ លើពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយស្រស់ពីកម្ពុជា ទៅកាន់ប្រទេសចិន៕អត្ថបទ ៖ ឈិត បូរ៉ាវី

រំហូរភ្ញៀវទេសចរមកលេងកោះកុង មិនទាន់ស្ទុះងើបនៅឡើយ

កោះកុង ៖ រំហូរចំនួនភ្ញៀវទេសចរ ដែលមានបំណងចង់មកលេងកម្សាន្ត នៅតាមរមណីយដ្ឋានទេសចរក្នុងខេត្តកោះកុង ត្រូវសង្កេតឃើញថា ពុំទាន់ស្ទុះងើបនៅឡើយទេ ទោះបីជារាជរដ្ឋាភិបាលកម្ពុជា សម្រេចឱ្យពលរដ្ឋចរាចរណ៍ធ្វើដំណើរពីខេត្តមួយទៅខេត្តមួយ និងបើកដំណើការតំបន់ទេសចរក៏ដោយ។ជាងកន្លះខែទៅហើយ ដែលសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា សម្រេចបញ្ចប់ការមិនឱ្យធ្វើដំណើរឆ្លងកាត់ខេត្តមួយទៅខេត្តមួយទៀត និងប្រាប់ឱ្យតំបន់រមណីយដ្ឋានទេសចរទូទាំងប្រទេសដំណើរការឡើងវិញ។សម្រាប់វិស័យទេសចរណ៍ នៅក្នុងខេត្តកោះកុង ត្រូវបានមន្រ្តីជំនាញសង្កេតឃើញថា លំហូរភ្ញៀវទេសចរជាតិ និងអន្តរជាតិមិនស្ទុះងើបឡើងនៅឡើយទេ ព្រោះតែអ្នកទេសចរ ប្រតិបត្តិករ និងសេវាករផ្នែកសេវាគ្មានផ្សែងនេះ កំពុងព្រួយបារម្ភអំពីការរីករាកដាលជំងឺកូវីឌ១៩ដដែល។លោក សុខ ចាន់គ្រឹះស្នា ប្រធានមន្ទីរទេសចរណ៍ខេត្តកោះកុង បានឱ្យដឹងនៅរសៀលថ្ងៃទី៥ ខែឧសភា នេះថា ប្រធាននិងប្រជាសហគមន៍តាមតំបន់ទេសចរអេកូទេសចរធម្មជាតិនានា ក្នុងខេត្ត មិនទាន់ហ៊ានបើកទ្វារស្វាគមន៍ភ្ញៀវទេសចរមកពីបណ្តារាជធានី និងខេត្តផ្សេងៗទៀត។ ទោះបីជាលោកបានផ្សព្វផ្សាយជូនដំណឹងពីការសម្រេចរបស់រាជរដ្ឋាភិបាល និងក្រសួងទេសចរណ៍ពីការត្រៀមរៀបចំទទួលភ្ញៀវទេសចររួចរាល់អស់ហើយក៏ដោយ។លោកប្រធានមន្ទីរទេសចរណ៍ខេត្ត អះអាងថា អ្វីដែលសំខាន់នោះ គឺសូម្បីតែពលរដ្ឋរស់នៅក្នុងខេត្តផ្ទាល់ ក៏ត្រូវបានតំបន់ទេសចរមួយចំនួនមិនអនុញ្ញាតឱ្យលេងកម្សាន្តតំបន់រមណីយដ្ឋានផងដែរ។ បច្ចុប្បន្ន ស្ថានភាពភ្ញៀវទេសចរហាក់ស្ងប់ស្ងាត់ ស្ទើរតែ១០០ភាគរយទៅហើយ ពោលគឺមានអ្នកទេសចរក្នុងខេត្តប៉ុណ្ណោះ។មិនខុសពីការលើកឡើងរបស់លោកប្រធានមន្ទីរទេសចរណ៍ខេត្តកោះកុងទេ លោក ធិន សម្បត្តិ មេឃុំតាតៃក្រោម តំណាងប្រជាសហគមន៍តំបន់អេកូទេសចរធម្មជាតិទឹកជ្រោះតាតៃ បានឱ្យដឹងថា ទាំងពលរដ្ឋលក់ដូរចំណីអាហារ និងសេវាករដឹកជញ្ជូនភ្ញៀវទេសចរលេងកម្សាន្តតាមដៃព្រែក សុទ្ធតែបារម្ភពីការរីករាលដាលជំងឺកូវីដ១៩ដដែល។ ដូច្នេះ ពួកគាត់បន្តរង់ចាំតាមដានស្ថានការណ៍ជំងឺកូវីដ១៩ ធូរស្រាល ទើបបើកភ្លើងខៀវផ្តល់សេវាកម្មដូចពេលមុនៗ។គួរកត់សម្គាល់ថា សព្វថ្ងៃនេះ រមណីយដ្ឋានអេកូទេសចរធម្មជាតិទឹកជ្រោះតាតៃ រមណីយដ្ឋានព្រៃកោងកាងពាមក្រសោប ចេតិយឃុនឆាងឃុនផែន និងរមណីយដ្ឋានដ៏ទៃទៀត ស្ថិតនៅបរិយាកាសស្ងាត់ឈឹងគ្មានមនុស្សម្នា មកលេងកម្សាន្ត បើធៀបនឹង២ឆ្នាំមុន មុននឹងមិនញុំាញីដោយជំងឺកូវីដ១៩៕អត្តបទ ៖ ឈឹម មករា

បណ្ដាញសង្គម

ព័ត៌មានថ្មីៗ

ប្រធានជំនួយ UN ធ្វើដំណើរទៅកាន់សូម៉ាលី ខណៈកង្វះខាតស្បៀងអាហារ និងមូលនិធិកាន់តែធ្ងន់ធ្ងរ

អង្គភាពអ្នកនាំពាក្យរាជរដ្ឋាភិបាលបន្តបេសកកម្មតម្រង់ទិសស្ដីពី «ប្រសិទ្ធភាពព័ត៌មាន និងការគ្រប់គ្រងសាធារណមតិ»

រូបិយប័ណ្ណរបស់អ៊ីរ៉ង់ធ្លាក់ដល់កម្រិតទាបបំផុត ខណៈបន្តមានបទឈប់បាញ់ផុយស្រួយជាមួយអាមេរិក

ហេតុការណ៍ដេញចាក់នៅតំបន់ជនជាតិជ្វីហ្វទីក្រុងឡុងដ្រ៍ បណ្តាលឲ្យមនុស្ស ២នាក់ រងរបួស

ចិននឹងហាមឃាត់ការលក់យានដ្រូន នៅទីក្រុងប៉េកាំង ដោយសារក្ដីបារម្ភផ្នែកសន្តិសុខ

ផ្កាថ្មប៉ប្រះទឹក Abrolhos របស់ប្រេស៊ីល ធ្លាក់ចុះ ១៥ភាគរយ ក្នុងរយៈពេលជាង ១៨ឆ្នាំ

រុស្ស៊ី៖ ការចាកចេញពី OPECរបស់អារ៉ាប់រួម នឹងបង្កើនផលិតកម្មសកល ធ្វើឲ្យតម្លៃប្រេងធ្លាក់ចុះនៅពេលអនាគត

សង្រ្គាមនៅអ៊ុយក្រែនបង្កើនការប្រើប្រាស់រថពាសដែកផលិតនៅប្រទេសស៊ុយអែត

រុស្ស៊ី៖ ការផ្គត់ផ្គង់យានដ្រូនអឺរ៉ុបដល់អ៊ុយក្រែន អាចមានផលវិបាកមិនអាចព្យាករបាន

សីតុណ្ហភាពកើនឡើងនៅប្រទេសឥណ្ឌា ជំរុញតម្រូវការកង្ហា និងម៉ាស៊ីនត្រជាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

រាជរដ្ឋាភិបាលកម្ពុជា ដាក់ដំណើរការប្រព័ន្ធទិន្នន័យតភ្ជាប់ទំនាក់ទំនងវិនិយោគិនក្នុងស្រុកនិងបរទេស

សិប្បករខ្មែរ ជំរុញផ្សព្វផ្សាយផលិតផលផលិតក្នុងស្រុក តាមផ្សារទំនើបទាក់ទាញការគាំទ្រពីអ្នកប្រើប្រាស់

រោងចក្រសហគ្រាសបើកដំណើរការឡើងវិញ ជាបន្តបន្ទាប់ជាមួយនឹងការអនុវត្តវិធានសុខាភិបាល

ផ្សារទាំងអស់ក្នុងរាជធានីភ្នំពេញ អាចបន្តរយៈពេលបិទបន្ថែមទៀត ក្រោយថ្ងៃទី១៤ឧសភា

ទុរេនឆ្នាំនេះនៅតែមានតម្លៃខ្ពស់ ខណៈតម្រូវការទុរេនដាំក្នុងស្រុកកើនឡើង

ក្រុមហ៊ុន KrisEnergy នឹងនាំចេញប្រេងឆៅទៅកាន់ទីផ្សារអន្តរជាតិ ក្នុងពេលឆាប់ៗ

កម្ពុជាបាននាំចេញកសិផលជាង២,៨លានតោន ទៅទីផ្សារអន្តរជាតិ ក្នុងរយៈពេល៤ខែ

ផ្សារទាំងអស់ នៅរាជធានីភ្នំពេញ ត្រូវបន្តបិទដោយពុំទាន់មានការកំណត់បើកវិញនោះទេ

កម្ពុជានាំចេញស្វាយស្រស់ទៅប្រទេសចិន ជាផ្លូវការណ៍ នៅថ្ងៃនេះ

រំហូរភ្ញៀវទេសចរមកលេងកោះកុង មិនទាន់ស្ទុះងើបនៅឡើយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

រោងចក្រ​សហគ្រាស​បើក​ដំណើរការ​ឡើងវិញ ​ជា​បន្តបន្ទាប់​ជា​មួយនឹង​ការអនុវត្ត​វិធាន​សុខាភិបាល​

ផ្សារ​ទាំងអស់​ក្នុង​រាជធានី​ភ្នំពេញ ​អាច​បន្ត​រយៈពេល​បិទ​បន្ថែមទៀត​ ក្រោយ​ថ្ងៃទី១៤​ឧសភា​

ទុរេន​ឆ្នាំនេះ​នៅ​តែមាន​តម្លៃ​ខ្ពស់ ​ខណៈ​តម្រូវការ​ទុរេន​ដាំ​ក្នុងស្រុក​កើនឡើង

ក្រុមហ៊ុន KrisEnergy នឹង​នាំចេញ​ប្រេង​ឆៅ​ទៅកាន់​ទីផ្សារ​អន្តរជាតិ​ ក្នុងពេល​ឆាប់ៗ​

កម្ពុជា​បាន​នាំចេញ​កសិផល​ជាង​២,៨​លាន​តោន​ ទៅ​ទីផ្សារ​អន្តរជាតិ ​ក្នុង​រយៈពេល​៤​ខែ​

ផ្សារ​ទាំងអស់​ នៅ​រាជធានី​ភ្នំពេញ​ ត្រូវ​បន្ត​បិទ​ដោយ​ពុំ​ទាន់​មានការ​កំណត់​បើក​វិញ​នោះទេ​

កម្ពុជា​នាំចេញ​ស្វាយ​ស្រស់​ទៅ​ប្រទេស​ចិន​ ជា​ផ្លូវ​ការណ៍​ នៅថ្ងៃនេះ

រំហូរភ្ញៀវទេសចរមកលេងកោះកុង មិនទាន់ស្ទុះងើបនៅឡើយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រោងចក្រសហគ្រាសបើកដំណើរការឡើងវិញ ជាបន្តបន្ទាប់ជាមួយនឹងការអនុវត្តវិធានសុខាភិបាល

ផ្សារទាំងអស់ក្នុងរាជធានីភ្នំពេញ អាចបន្តរយៈពេលបិទបន្ថែមទៀត ក្រោយថ្ងៃទី១៤ឧសភា

ទុរេនឆ្នាំនេះនៅតែមានតម្លៃខ្ពស់ ខណៈតម្រូវការទុរេនដាំក្នុងស្រុកកើនឡើង

ក្រុមហ៊ុន KrisEnergy នឹងនាំចេញប្រេងឆៅទៅកាន់ទីផ្សារអន្តរជាតិ ក្នុងពេលឆាប់ៗ

កម្ពុជាបាននាំចេញកសិផលជាង២,៨លានតោន ទៅទីផ្សារអន្តរជាតិ ក្នុងរយៈពេល៤ខែ

ផ្សារទាំងអស់ នៅរាជធានីភ្នំពេញ ត្រូវបន្តបិទដោយពុំទាន់មានការកំណត់បើកវិញនោះទេ

កម្ពុជានាំចេញស្វាយស្រស់ទៅប្រទេសចិន ជាផ្លូវការណ៍ នៅថ្ងៃនេះ