BTV NEWS

៩ខែឆ្នាំ២០២៥ នគរបាលខេត្តបាត់ដំបងឃាត់ខ្លួនមនុស្ស ៩២០នាក់ក្នុងករណីគ្រឿងញៀន និងដកហូតបានគ្រឿងញៀនជាង១៧គីឡូក្រាម

នគរបាលខេត្តបាត់ដំបងប្រមូលក្រុមក្មេងទំនើង៨៦នាក់ រកឃើញផ្ទុកសារធាតុញៀន៥១នាក់ អនុវត្តតាមច្បាប់ និងមួយចំនួនបញ្ជូនទៅមណ្ឌលសំចត

សូមចូលរួមគោរពច្បាប់ចរាចរណ៍! ៧ថ្ងៃមុនកាន់បិណ្ឌ គ្រោះថ្នាក់ចរាចរណ៍ ផ្តាច់ជីវិតពលរដ្ឋ ២៤ នាក់ និងរបួសជិត៦០នាក់

មនុស្សចំនួន០៦នាក់ត្រូវបានឃាត់ខ្លួន ក្នុងយុទ្ធនាការចុះត្រួតពិនិត្យឆែកអាវុធជាតិផ្ទុះ និងទប់ស្កាត់រាល់បទល្មើស

សន្តិសុខ និង សង្គម

ប្រមុខ WHO រន្ធត់ចិត្តដោយចាត់ទុកស្ថានភាពតំបន់ហ្កាហ្សាថាជា «ឋាននរក»

ប្រមុខអង្គការសុខភាពពិភពលោក បានអំពាវនាវឱ្យមានបទឈប់បាញ់និង «ដំណោះស្រាយពិតប្រាកដ» ចំពោះជម្លោះអ៊ីស្រាអែល-ប៉ាឡេស្ទីន នៅក្នុងការអង្វរសុំចិត្តដល់ស្ថាប័នគ្រប់គ្រងរបស់ស្ថាប័នសុខភាពពិភពលោក កាលពីថ្ងៃព្រហស្បតិ៍ ជាកន្លែងដែលលោកបាននិយាយថាស្ថានភាពនៅតំបន់ហ្កាហ្សា ជា «ឋាននរក»។អគ្គនាយកអង្គការសុខភាពពិភពលោក លោក Tedros Adhanom Ghebreyesus ដែលធ្លាប់ឆ្លងកាត់សង្រ្គាមកាលពីកុមារភាព និងកូនៗដែលបានលាក់ខ្លួននៅក្នុងលេនដ្ឋានអំឡុងការទម្លាក់គ្រាប់បែកនៅជម្លោះព្រំដែនឆ្នាំ ១៩៩៨ដល់ឆ្នាំ២០០០របស់ប្រទេសអេត្យូពី ជាមួយប្រទេសអេរីទ្រា បានក្លាយជាស្ថានភាពដែលពិពណ៌នាអំពីអារម្មណ៍នៅក្នុងតំបន់ហ៊ុមព័ទ្ធហ្កាហ្សារងការទម្លាក់គ្រាប់បែក ខណៈមានមនុស្សជាង ២៥.០០០នាក់ ត្រូវបានសម្លាប់។លោកបានប្រាប់គណៈកម្មការធិការប្រតិបត្តិរបស់អង្គការសុខភាពពិភពលោក ក្នុងអំឡុងពេលពិភាក្សាអំពីភាពអាសន្នផ្នែកសុខភាពនៅក្នុងតំបន់ហ៊ុមព័ទ្ធហ្កាហ្សាថា លោកគិតថា អ្នកទាំងអស់គ្នាបាននិយាយអំពីដំណោះស្រាយរដ្ឋពីរ ដូច្នេះហើយសង្ឃឹមថា សង្រ្គាមនេះនឹងបញ្ចប់ ហើយឈានទៅរកដំណោះស្រាយពិតប្រាកដ។ តំណាងអ៊ីស្រាអែល លោក Waleed Gadban បាននិយាយថា សហគមន៍អន្តរជាតិ បានជ្រើសរើស «មិនខ្វល់ខ្វាយ« អំពីចំណាប់ថ្នូរ ហើយនិយាយថា «ការសម្រេចចិត្តនេះ បង្ហាញពីភាពគ្មានសីលធម៌ធ្ងន់ធ្ងរ។

អភិបាលខណ្ឌច្បារអំពៅ ដឹកនាំកម្លាំងចុះអនុវត្តច្បាប់ចរាចរណ៍ ត្រួតពិនិត្យគ្រឿងស្រវឹង នៅស្តុបវត្តច្បារអំពៅ

ចាប់ពីយប់ថ្ងៃទី២៥ ខែមករា ឆ្នាំ ២០២៤នេះតទៅ កម្លាំងនគរបាលរាជធានីភ្នំពេញ បានចាប់ផ្ដើមរឹតបន្តឹងការអនុវត្តច្បាប់ចរាចរណ៍ផ្លូវគោកបន្ថែម ក៏ដូចជាការត្រួតពិនិត្យគ្រឿងស្រវឹង ទៅលើអ្នកបើកបរ ហើយការរឹងបន្តឹង និងការត្រួតពិនិត្យនេះ នឹងត្រូវធ្វើឡើងដោយចល័តទីតាំងថែមទៀត។ជាក់ស្តែងនៅយប់ថ្ងៃទី២៥ ខែមករា ឆ្នាំ២០២៤នេះ គណៈបញ្ជាការឯកភាពខណ្ឌច្បារអំពៅ ដឹកនាំដោយលោក ចេង មុនីរ៉ា អភិបាលខណ្ឌច្បារអំពៅ បានដឹកនាំកម្លាំងសមត្ថកិច្ចចម្រុះ ដាក់គោលដៅអនុវត្តច្បាប់ចរាចរណ៍ ត្រួតពិនិត្យទៅលើអ្នកបើកបរយានយន្ត ដើម្បីពិនិត្យ និងវាស់ជាតិអាល់កុលលើអ្នកបើកបរ ក្នុងគោលបំណងកាត់បន្ថយគ្រោះថ្នាក់ចរាចរណ៍ ដែលកើតចេញពីអ្នកបើកបរផ្ទុកនូវជាតិស្រវឹងលើសកម្រិត។លោក ចេង មុនីរ៉ា បានឱ្យដឹងថា ការចាប់ផ្ដើមរឹតបន្តឹងបន្ថែមនេះបន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា កាលពីថ្ងៃទី២៣ ខែមករា កន្លងទៅនេះ បានណែនាំឲ្យលោកនាយឧត្តមសេនីយ៍ ស ថេត អគ្គស្នងការនគរបាលជាតិ ពង្រឹងឡើងវិញ នូវការត្រួតពិនិត្យគ្រឿងស្រវឹង ខណៈករណីគ្រោះថ្នាក់ចរាចរណ៍បានកើតឡើងច្រើនជាបន្តបន្ទាប់។បើតាមលោក ម៉ៅ សឿត អធិការខណ្ឌច្បារអំពៅ បានឱ្យដឹងថា នាយប់នេះកម្លាំងអធិការដ្ឋានខណ្ឌ មានកម្លាំងចូលរួមអនុវត្តច្បាប់ចរាចរណ៍ និងត្រួតពិនិត្យគ្រឿងស្រវឹងនាយប់នេះមានចំនួន ៤០នាក់ ដោយឡែកកម្លាំងប្រជាការពារខណ្ឌ រួមទាំងមន្ត្រីខណ្ឌចំនួន ២០នាក់ផងដែរ៕ អត្ថបទ៖ លីហេង

មនុស្ស២០នាក់បានស្លាប់ និង១៥០នាក់របួស ក្នុងការវាយប្រហាររបស់អ៊ីស្រាអែល លើកន្លែងពលរដ្ឋតម្រង់ជួរយកអាហារ

ក្រសួងសុខាភិបាលគ្រប់គ្រងដោយក្រុមហាម៉ាសរបស់តំបន់ហ្កាហ្សា បាននិយាយថាការវាយប្រហាររបស់អ៊ីស្រាអែលទៅលើទីក្រុងហ្កាហ្សា បានសម្លាប់ជនជាតិប៉ាឡេស្ទីនចំនួន ២០នាក់ និង ១៥០ នាក់របួស ពេលកំពុងតម្រង់ជួរយកជំនួយស្បៀងអាហារកាលពីថ្ងៃព្រហស្បតិ៍ ទី២៥ខែ មករា ជានូវអ្វីដែល ប៉ាឡេស្ទីនហៅថាជា ឧក្រិដ្ឋកម្មសង្គ្រាម។ យោធាអ៊ីស្រាអែលបាននិយាយថា ខ្លួនកំពុងពិនិត្យមើលរបាយការណ៍នេះ។ គណៈកម្មាធិការតាមដានកងកម្លាំងជាតិ និងឥស្លាម ដែលជាសម្ព័ន្ធនៃក្រុមសកម្មប្រយុទ្ធ និងក្រុមនយោបាយ បាននិយាយថា កងកម្លាំងអ៊ីស្រាអែលបានដាក់គោលដៅលើជនស៊ីវិលដែលកំពុងរង់ចាំជំនួយសង្គ្រោះ។ ក្រុមនេះបាននិយាយនៅក្នុងសេចក្តីថ្លែងការណ៍មួយថា មនុស្សរាប់សិបនាក់បានស្លាប់ និងរងរបួសនៅក្នុង ឧក្រិដ្ឋកម្មសង្រ្គាម និងអំពើប្រល័យពូជសាសន៍។ អ្នកស្រុកបាននិយាយថា នៅភាគខាងត្បូងតំបន់រងការឡោមព័ទ្ធមួយនេះ កងរថក្រោះអ៊ីស្រាអែលបានវាយលុកតំបន់នានាជុំវិញមន្ទីរពេទ្យចំនួនពីរក្នុងទីក្រុង ខាន់យូនីស (Khan Younis) ភាគខាងត្បូងនៃតំបន់ហ្កាហ្សា ដោយបង្ខំឱ្យមនុស្សភៀសខ្លួនចូលទៅក្នុងភាពច្របូកច្របល់យ៉ាងអស់សង្ឃឹមដើម្បីសុវត្ថិភាព។ ទន្ទឹមនឹងនេះ នៅភាគខាងជើង មន្ត្រីអង្គការសុខភាពពិភពលោកបានហៅស្ថានភាពស្បៀងអាហារនេះថា ជាហេតុការណ៍គួរឱ្យរន្ធត់ ហើយបុគ្គលិកមនុស្សធម៌បាននិយាយថា ការចែកចាយជំនួយដ៏កម្រត្រូវបានប្រមូលផ្តុំដោយមនុស្សអស់សង្ឃឹម ដែលអាចមើលឃើញភាពអត់ឃ្លានដោយផ្ទាល់ភ្នែក។ ក្រុមមន្ត្រីសុខាភិបាលហ្កាហ្សាបាននិយាយថា ពលរដ្ឋប៉ាឡេស្ទីយ៉ាងហោចណាស់ ៥០ នាក់បានស្លាប់ ក្នុងរយៈពេល ២៤ ម៉ោងចុងក្រោយនេះនៅក្នុងទីក្រុង Khan Younis ជាទីដែលអ៊ីស្រាអែលបានផ្លាស់ប្តូរប្រតិបត្តិការយោធាពេញបន្ទុកបន្ទាប់ពីបានចាប់ផ្តើមដកកងកម្លាំងចេញពីតំបន់ភាគខាងជើង ដែលខ្លួននិយាយថាឥឡូវនេះបានគ្រប់គ្រងភាគច្រើន៕

មន្រ្តីជំនាញ ចុះបង្ក្រាបទីតាំងល្បែងស៊ីសងប្រភេទឡូតូតូចធំ 8888

គណៈកម្មការគ្រប់គ្រងល្បែងពាណិជ្ជកម្មកម្ពុជា សហការជាមួយ កម្លាំងនគរបាលនាយកដ្ឋានប្រឆាំងបទល្មើសល្បែង នៃក្រសួងមហាផ្ទៃ បានចុះឆ្មក់ចុះបង្ក្រាបទីតាំងដែលបើកល្បែងស៊ីសងប្រភេទឡូតូ តូចធំនៅក្នុងមូលដ្ឋានខណ្ឌ ៧មករាចំនួន ០២ទីតាំង និងឃាត់ខ្លួនមនុស្ស ជាង១០នាក់។ប្រតិបត្តិការនេះបានធ្វើឡើងនៅវេលាម៉ោង ៩ព្រឹកថ្ងៃទី ២៥ ខែមករាឆ្នាំ ២០២៤ នៅចំណុចទីតាំង តោះជុំគ្នាការហ្វ នៅតាមបណ្ដោយផ្លូវលេខ២៤២ សង្កាត់បឹងព្រលិត និងមួយទីតាំងទៀតស្ថិតនៅទីតាំងយីហោ ឃ្វីន សាឡន មូលដ្ឋានសង្កាត់មនោរម្យ ខណ្ឌ៧មករា រាជធានីភ្នំពេញ ក្នុងរង្វង់ប្រតិបត្តិការនេះផងដែរដោយមានការដឹកនាំផ្ទាល់ដោយព្រះរាជអាជ្ញារង យស វាសនា នៃអយ្យការអមសាលាដំបូងរាជធានីភ្នំពេញ។តាមប្រភពពីមន្ត្រីជំនាញបានឲ្យដឹងថាក្នុងការចុះប្រតិបត្តិការនេះកម្លាំងជំនាញបានចុះចំនួន០២ ទីតាំង ដោយទីតាំងនីមួយៗបានបើកអាជីវកម្មប្រភេទឡូតូតូចធំ 8888 ក៏ប៉ុន្តែមន្ត្រីជំនាញមិនបានបញ្ជាក់ឲ្យស៊ីជម្រៅនោះទេថាល្បែងស៊ីសង ប្រភេទនេះមានច្បាប់ឬមិនមានច្បាប់អាជីវកម្មនោះឡើយ។ក្នុងការចុះប្រតិបត្តិការនេះ មហាជនមានការងឿឆ្ងល់ផងដែរថាកន្លងមកអាជ្ញាធរបានអះអាងថា ល្បែងស៊ីសងប្រភេទឡូតូតូចធំ 8888 នេះថាមានច្បាប់អាជីវកម្មត្រឹមត្រូវ ដោយមិនឃើញមានការចុះបង្ក្រាបនោះឡើយ។ ស្រាប់តែ ពេលនេះ មន្ត្រីជំនាញនៃគណៈកម្មការគ្រប់គ្រងល្បែងពាណិជ្ជកម្មកម្ពុជា សហការជាមួយ កម្លាំងនគរបាលនាយកដ្ឋានប្រឆាំងបទល្មើសល្បែង នៃក្រសួងមហាផ្ទៃ បានចុះមកបង្ក្រាបចំពោះល្បែងស៊ីសងប្រភេទឡូតូ 8888នេះ។មហាជនបានលើកឡើងបន្តទៀតថាបើល្បែងស៊ីសងប្រភេទឡូតូ 8888នេះខុសច្បាប់មែន។ ដូច្នេះ ទីតាំងល្បែងស៊ីសង់ប្រភេទនេះគឺមានច្រើនទីតាំងរីកដុះដាលពេញទីតាំងហាងកាហ្វេ និងភោជនីយដ្ឋានគ្រប់ទីកន្លែងក្នុងភូមិសាស្ត្ររាជធានីភ្នំពេញ៕ អត្ថបទ៖ កុម្ភៈ

អគ្គស្នងការដ្ឋាននគរបាលជាតិ បង្កើតប្រព័ន្ធដាក់ពាក្យប្តឹងតាមអនឡាញ លើករណីឆបោកតាមបច្ចេកវិទ្យា

អគ្គស្នងការដ្ឋាននគរបាលជាតិ កំពុងដំណើរការលើប្រព័ន្ធទទួល និងដាក់ពាក្យបណ្តឹងតាមអនឡាញលើករណីឆបោកតាមប្រព័ន្ធបច្ចេកវិទ្យា។ថ្លែងប្រាប់BTV News នៅថ្ងៃទី២៥ ខែមករា ឆ្នាំ២០២៤ លោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ បានឲ្យដឹងថា យោងតាមសេចក្តីសម្រេចរបស់ក្រសួងមហាផ្ទៃ កាលពីចុងខែធ្នូ ឆ្នាំ២០២៣ ដែលរៀបចំឲ្យបង្កើតការទទួលពាក្យបណ្តឹងឆបោកតាមប្រព័ន្ធបច្ចេកវិទ្យា ដោយប្រែក្លាយពីប្រព័ន្ធពាក់កណ្តាលស្វ័យប្រវត្តិមកជាប្រព័ន្ធស្វ័យប្រវត្តិទាំងស្រុង ដើម្បីឲ្យស្របតាមយុទ្ធសាស្រ្តបញ្ចកោណដំណាក់កាលទី១។ លោកឧត្តមសេនីយ៍ឯក បន្ត ការបង្កើតឲ្យមានការទទួលពាក្យបណ្តឹងតាមប្រព័ន្ធអនឡាញនេះ គឺប្រជាពលរដ្ឋគ្រប់ទីកន្លែងមិនថាក្នុងប្រទេស ឬក្រៅប្រទេសអាចដាក់ពាក្យបណ្តឹងបានឲ្យតែករណីទាំងនោះជាបទល្មើសកើតឡើងនៅកម្ពុជា។ លោកឧត្តមសេនីយ៍ឯក បញ្ជាក់ថា គោលដៅនៃការទទួលពាក្យបណ្តឹងតាមប្រព័ន្ធអនឡាញធ្វើឡើងស្របតាមការវិវឌ្ឍន៍បច្ចេកវិទ្យា ដើម្បីសម្រួលដល់ការជួយសង្គ្រោះប្រជាពលរដ្ឋ ហើយមានល្បឿនលឿនដល់ការស្រាវជ្រាវ និងផ្តល់ទំនុកចិត្តជូនប្រជាពលរដ្ឋ ក៏ដូចជាជនរងគ្រោះ។លោកឧត្តមសេនីយ៍ឯក ជា ពៅ អះអាងថា ដើម្បីផ្តល់ប្រសិទ្ធភាពលើការងារខាងលើ ការទទួលពាក្យបណ្តឹងលើអនឡាញនេះត្រូវបានដាក់ចេញនូវបទបញ្ជា និងគោលការណ៍ដល់មន្រ្តីទទួលបន្ទុកយ៉ាងច្បាស់លាស់ ដោយគ្រប់ពេលវេលាដែលមានប្រជាពលរដ្ឋជួបប្រទះបញ្ហាប្រឈមដោយសារបទល្មើសឆបោកនឹងមានមន្រ្តីទទួលហើយចាត់វិធានការទៅតាមនីតិវិធីជូនប្រជាពលរដ្ឋ។លោកឧត្តមសេនីយ៍ឯក ថ្លែងថា បន្ទាប់ពីបង្កើតការទទួលពាក្យបណ្តឹងតាមអនឡាញ អគ្គស្នងការដ្ឋាននគរបាលជាតិ បានគិតគូរពីផែនការបន្ទាប់លើការប្រឆាំងបទល្មើសឆបោកតាមប្រព័ន្ធបច្ចេកវិទ្យាឲ្យស្របទៅតាមសម័យកាល ដោយជំហានបន្ទាប់នឹងរៀបចំឲ្យមានជាភាសាបរទេស គឺភាសាចិន និងភាសាអង់គ្លេសនាពេលឆាប់ៗខាងមុខ។ លោកឧត្តមសេនីយ៍ឯក បន្ថែមថា ការរៀបចំឲ្យមានប្រសិទ្ធភាពលើការងារប្រឆាំងនឹងបទល្មើសឆបោកតាមប្រព័ន្ធបច្ចេកវិទ្យា នឹងបន្តឥតឈប់ឈរប្រសិនសម័យកាលវិវឌ្ឍន៍របស់បច្ចេកវិទ្យាកាន់តែជឿនលឿន ដោយអគ្គស្នងការដ្ឋាននគរបាលបានកំណត់ពង្រឹងថែមទៀតលើធនធានមនុស្ស បច្ចេកវិទ្យា និងសុវត្ថិភាព៕ អត្ថបទ៖ ឧត្ដម

អ៊ីស្រាអែល បដិសេធការវាយប្រហារលើជំរំជនភៀសខ្លួនរបស់អង្គការសហប្រជាជាតិនៅតំបន់ហ្កាហ្សា

អង្គការសហប្រជាជាតិ បាននិយាយកាលពីថ្ងៃពុធថា រថក្រោះអ៊ីស្រាអែល បានវាយប្រហារបរិវេណជំរំជនភៀសខ្លួនដ៏ធំរបស់ UN នៅក្នុងតំបន់ហ្កាហ្សា ដែលផ្តល់ជម្រកដល់ប្រជាជនប៉ាឡេស្ទីន ដែលជម្លៀសខ្លួនដោយបណ្តាលឲ្យ «ស្លាប់ និងរបួសជាច្រើន» ប៉ុន្តែអ៊ីស្រាអែល បានបដិសេធថា កងកម្លាំងរបស់ខ្លួន មិនទទួលខុសត្រូវ ហើយបានបញ្ជាក់ថា ប្រហែលជាក្រុមហាម៉ាសជាអ្នកវាយប្រហារទេ។ការវាយប្រហារដែលUN បាននិយាយថា បានត្រូវចំមជ្ឈមណ្ឌលបណ្តុះបណ្តាលវិជ្ជាជីវៈមួយកន្លែងសម្រាប់ជនភៀសខ្លួនចំនួន ៣០.000នាក់ នៅក្នុងទីក្រុងខាន់យូនីស ( Khan Younis) ភាគខាងត្បូងទីក្រុងសំខាន់របស់តំបន់ហ្កាហ្សា បានជំរុញឲ្យមានការថ្កោលទោសយ៉ាងដាច់អហង្ការពីសហរដ្ឋអាមេរិក។អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិសម្រាប់ដែនដីប៉ាឡេស្ទីន លោក ជេម ហ្គោលឌ្រីក (James McGoldrick) បាននិយាយថា៖«ការស្លាប់ និងរបួសជាច្រើន បានកើតឡើង អគារមួយចំនួន ត្រូវបានឆាបឆេះ និងមានសេចក្តីរាយការណ៍អំពីអ្នកស្លាប់។លោក Thomas White នាយកកិច្ចការតំបន់ហ្កាហ្សាសម្រាប់ទីភ្នាក់ងារ UNRWA របស់អង្គការសហប្រជាជាតិ បាននិយាយថា គ្រាប់កាំភ្លើងធំចំនួនពីរគ្រាប់ បានត្រូវចំប្រហារអគារមួយនៃមជ្ឈមណ្ឌលបណ្តុះបណ្តាលនេះ ដែលមានមនុស្សផ្លាស់ទីលំនៅប្រហែល ៨០០នាក់ កំពុងស្នាក់នៅ។ យ៉ាងហោចណាស់មនុស្ស ៩ នាក់ បានស្លាប់ និង ៧៥ នាក់រងរបួស។ ប្រធានទីភ្នាក់ងារ លោក ហ្វីលីព ឡាស់ហ្សារីនី (Philippe Lazzarini) បាននិយាយថា ចំនួនអ្នកស្លាប់ ប្រហែលជាខ្ពស់ជាងនេះ។

UN ស្នើឱ្យក្រុមហ៊ូទី ពិចារណាឡើងវិញនូវបញ្ជាបណ្តេញជនជាតិអាមេរិក និងអង់គ្លេសចេញពីយេម៉ែន

អង្គការសហប្រជាជាតិ បានស្នើឱ្យអាជ្ញាធរក្រុមហ៊ូទីរបស់ប្រទេសយេម៉ែន ពិចារណាឡើងវិញនូវការសម្រេចចិត្តរបស់ពួកគេ ក្នុងការបណ្តេញជនជាតិអាមេរិក និងអង់គ្លេស ដែលកំពុងធ្វើការឱ្យស្ថាប័នពិភពលោកមួយនេះ នៅក្នុងតំបន់ដែលគ្រប់គ្រងដោយក្រុមហ៊ូទី នៅប្រទេសយេម៉ែន។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បានបញ្ជាក់ថា អង្គការសហប្រជាជាតិ បានទទួលការទំនាក់ទំនងពីក្រុមហ៊ូទី ដែលបានផ្តល់ឱ្យស្ថាប័នពិភពលោកមួយនេះរយៈពេលមួយខែ សម្រាប់ជនជាតិអាមេរិក និងអង់គ្លេសទាំងអស់ ឱ្យចាកចេញពីតំបន់នានាដែលស្ថិតនៅក្រោមការគ្រប់គ្រងរបស់ក្រុមអាជ្ញាធរនេះ។ លោក Dujarric បាននិយាយថា អ្វីដែលចាំបាច់ត្រូវនិយាយគឺថា សំណើ ឬតម្រូវការណាមួយសម្រាប់បុគ្គលិកអង្គការសហប្រជាជាតិក្នុងការឲ្យចាកចេញដោយផ្អែកតែលើសញ្ជាតិរបស់បុគ្គលិកនោះ គឺមិនសមស្របទៅនឹងក្របខ័ណ្ឌច្បាប់ដែលអនុវត្តចំពោះអង្គការសហប្រជាជាតិឡើយ។ ពិតណាស់ វាក៏រារាំងសមត្ថភាពរបស់យើងក្នុងការផ្តល់ការតព្វកិច្ចដើម្បីគាំទ្រប្រជាជនទាំងអស់ក្នុងប្រទេសយេម៉ែន។ ហើយយើងសូមអំពាវនាវដល់អាជ្ញាធរទាំងអស់នៅក្នុងប្រទេសយេម៉ែន ធានាថាបុគ្គលិករបស់យើងអាចបន្តបំពេញមុខងាររបស់ពួកគេក្នុងនាមជាអង្គការសហប្រជាជាតិ។ លោកនិយាយថា បុគ្គលិករបស់អង្គការសហប្រជាជាតិបម្រើដោយមិនលម្អៀង និងបម្រើទង់ជាតិរបស់អង្គការសហប្រជាជាតិ និងគ្មានអ្វីផ្សេងទៀតឡើយ។ អ្នកនាំពាក្យរូបនេះ បានបដិសេធមិននិយាយថាតើមានជនជាតិអាមេរិក និងអង់គ្លេសប៉ុន្មាននាក់ ដែលកំពុងធ្វើការឱ្យអង្គការសហប្រជាជាតិនៅក្នុងតំបន់ដែលគ្រប់គ្រងដោយក្រុមហ៊ូទី នៅប្រទេសយេម៉ែន។ បទបញ្ជារបស់កងជីវពលហ៊ូទី បានកើតឡើងក្នុងពេលមានភាពតានតឹងកើនឡើង រវាងកងកម្លាំងអាមេរិក និងអង់គ្លេស ដែលបោះទីតាំងឈរជើងនៅសមុទ្រក្រហម ហើយក្រុមហ៊ូទី បាននិងកំពុងវាយប្រហារលើ នាវាដែលមានទំនាក់ទំនងជាមួយអ៊ីស្រាអែលនៅក្នុងតំបន់ ចាប់តាំងពីការចាប់ផ្តើមជម្លោះរវាងអ៊ីស្រាអែល និងក្រុមហាម៉ាស កាលពីថ្ងៃទី ៧ ខែតុលា ឆ្នាំ២០២៣ ។

របាយការណ៍៖ ក្រុមហាម៉ាស បើកចំហចំពោះការដោះលែងចំណាប់ថ្នូរ និងការចរចាបទឈប់បាញ់

យោងតាមរបាយការណ៍ប្រព័ន្ធផ្សព្វផ្សាយមួយ អង្គការសកម្មប្រយុទ្ធប៉ាឡេស្ទីនហាម៉ាស បានបង្ហាញខ្លួនឯងបើកចំហក្នុងការពិភាក្សាអំពីការដោះលែងចំណាប់ថ្នូរអ៊ីស្រាអែលមួយចំនួន នៅក្នុងសង្គ្រាមហ្កាហ្សា។សារព័ត៌មាន Wall Street Journal បានរាយការណ៍កាលពីថ្ងៃអង្គារ ដោយដកស្រង់សម្តីមន្ត្រីអេហ្ស៊ីបថា ក្រុមហាម៉ាស បានប្រាប់អ្នកសម្របសម្រួលថា ខ្លួនត្រៀមចរចាអំពីការដោះលែងជនស៊ីវិលស្ត្រី និងកុមារជាថ្នូរនឹងបទឈប់បាញ់ «ដ៏សំខាន់» ។ក្រុមហាម៉ាស បានដោះលែងចំណាប់ថ្នូរ ១០៥នាក់ ក្នុងអំឡុងពេលបទឈប់បាញ់រយៈពេលមួយសប្តាហ៍កាលពីចុងខែវិច្ឆិកាឆ្នាំមុន។ ជាថ្នូរនឹងគ្នានោះ អ៊ីស្រាអែល បានដោះលែងអ្នកទោសប៉ាឡេស្ទីន ២៤០នាក់ ចេញពីពន្ធនាគាររបស់ខ្លួន។ក្រុមហាម៉ាស ធ្លាប់បានភ្ជាប់ការដោះលែងចំណាប់ថ្នូរបន្ថែមទៀត ដើម្បីបញ្ចប់សង្រ្គាម។ យោងតាមប្រភពរដ្ឋាភិបាលអ៊ីស្រាអែល ក្រុមហាម៉ាស នៅតែឃុំខ្លួនមនុស្សប្រហែល ១៣០នាក់ ដែលពួកគេចាប់ពង្រត់ពីអ៊ីស្រាអែល ទៅកាន់តំបន់ហ្កាហ្សា កាលពីថ្ងៃទី៧ ខែតុលា។ងតាមសារព័ត៌មាន Wall Street Journal អ្នកទាំងនោះរួមមានទាហានស្រីអ៊ីស្រាអែល។ រដ្ឋាភិបាលអ៊ីស្រាអែលសន្មតថា ចំណាប់ ១០៥ នាក់ នៅរស់រានមានជីវិត ហើយពួកគេជាច្រើននាក់ ត្រូវបានឃុំខ្លួននៅក្នុងបណ្តាញផ្លូវរូងក្រោមដីរបស់ក្រុមហាម៉ាស។

ចំនួនអ្នកស្លាប់ក្នុងការវាយប្រហាររបស់អ៊ីស្រាអែលលើតំបន់ហ្កាហ្សា បានកើនឡើងដល់២៥.៧០០នាក់

ក្រសួងសុខាភិបាលក្នុងតំបន់រងការឡោមព័ទ្ធហ្កាហ្សាបាននិយាយកាលពីថ្ងៃពុធថា ចំនួនពលរដ្ឋប៉ាឡេស្ទីនដែលបានស្លាប់នៅតំបន់ហ្កាហ្សា ក្នុងការវាយប្រហាររបស់អ៊ីស្រាអែលចាប់តាំងពីថ្ងៃទី៧ខែតុលា មក បានកើនឡើងដល់យ៉ាងហោចណាស់២៥.៧០០នាក់ ។ ក្រសួងនេះបាននិយាយនៅក្នុងសេចក្ដីថ្លែងការណ៍មួយថាមនុស្សចំនួន៦៣.៧៤០នាក់បានរងរបួស។ សេចក្ដីថ្លែងការណ៍នេះបាននិយាយថា កងកម្លាំងអ៊ីស្រាអែល បានប្រព្រឹត្តការសម្លាប់រង្គាល២៤ទីតាំងនៅទូទាំងតំបន់ហ្កាហ្សាស្ទ្រីប កាលពី ២៤ម៉ោងមុន ដោយបានសម្លាប់មនុស្ស២១០នាក់ និង៣៨៦នាក់រងរបួស ។ មនុស្សជាច្រើននៅតែជាប់ក្រោមគំនរកម្ទេចថ្មនិងនៅតាមផ្លូវនានា ហើយក្រុមអ្នកសង្រ្គោះមិនអាចទៅដល់។ ពលរដ្ឋហ្កាហ្សាប្រហែល៨៥% បានភៀសខ្លួនចេញពីលំនៅឋាន ខណៈពួកគេប្រឈមនឹងកង្វះស្បៀងអាហារ ហើយប្រព័ន្ធសុខភាពកំពុងដួលរលំ ។ មនុស្សរាប់ម៉ឺននាក់គ្មានទីជម្រក និងរថយន្តដឹកជញ្ជួនជំនួយមិនដល់ពាក់កណ្ដាល ផង កំពុងចូលទៅក្នុងតំបន់ហ្កាហ្សា មុនពេលមានសង្គ្រាមចាប់ផ្ដើម ប្រមុខអង្គការសហប្រជាជាតិ លោក Antonio Guterres បាននិយាយកាលពីថ្ងៃអង្គារសប្ដាហ៍នេះថា ប្រជាជនហ្កាហ្សាមិនត្រឹមតែប្រឈមគ្រោះថ្នាក់នៃការកាប់សម្លាប់ ឬ របួសដោយសារតែការទម្លាក់គ្រាប់បែកឥតឈប់ឈរ ប៉ុណ្ណោះទេ ថែមទាំងជួបប្រទះការកើនឡើងជំងឺឆ្លងទៀតផង ៕

មនុស្ស៣៣នាក់ ត្រូវបានបណ្តេញចេញពីកងកម្លាំងប្រដាប់អាវុធវ៉េណេស៊ុយអេឡា សម្រាប់ផែនការប្រឆាំងរដ្ឋាភិបាល

ក្រសួងការពារជាតិ បាននិយាយកាលពីថ្ងៃពុធថា ទាហាន និងមន្ត្រីជាន់ខ្ពស់រហូតដល់ ៣៣នាក់ ត្រូវបានបណ្តេញចេញពីកងកម្លាំងប្រដាប់អាវុធជាតិបូលីវ៉ា (FANB) របស់ប្រទេសវេណេស៊ុយអេឡា សម្រាប់ផែនការឃុបឃិតប្រឆាំងរដ្ឋាភិបាល។ក្រសួង បាននិយាយនៅក្នុងសេចក្តីថ្លែងការណ៍ថា ពួកគេបានជាប់ពាក់ព័ន្ធនឹងផែនការឃុបឃិត ដោយរៀបចំផែនការសកម្មភាពឧក្រិដ្ឋកម្ម និងភេរវកម្ម ដើម្បីវាយប្រហារប្រព័ន្ធរដ្ឋាភិបាលស្របច្បាប់។ ការដកពួកគេចេញពីឋានៈយោធាគឺស្របតាម «ស្ថានភាព និងក្រមសីលធម៌ ដែលកំណត់លក្ខណៈ សម្បត្តិ របស់កងកម្លាំងប្រដាប់អាវុធជាតិបូលីវ៉ា ចាប់តាំងពីផែនការដែលបានថ្លែងរួចមក លើភាពមិនសក្តិសមនៅក្នុងជួររដ្ឋាភិបាល។ប្រធានាធិបតីវេណេស៊ុយអេឡា លោក Nicolas Maduro បាននិយាយថា អ្នកទាំងឡាយ ដែលត្រូវបានបណ្ដេញចេញមានជាប់ពាក់ព័ន្ធនឹងផែនការឃុបឃិតមួយដើម្បីនាំឲ្យមាន «ការធ្វើឃាតមេដឹកនាំកំពូលរបស់ប្រទេស»។សេចក្តីថ្លែងការណ៍ ដែលបានចុះហត្ថលេខាដោយរដ្ឋមន្ត្រីក្រសួងការពារជាតិ លោក Vladimir Padrino Lopez បានរាយបញ្ជីបុគ្គលិកយោធាមានឋានៈខ្ពស់បំផុត ដែលត្រូវបានបណ្តេញចេញ ។លោក Padrino Lopez បានប្រកាសពីការបណ្តេញចេញដំបូង មនុស្ស ១៨នាក់ កាលពីថ្ងៃអង្គារ មួយថ្ងៃបន្ទាប់ពីការិយាល័យរដ្ឋអាជ្ញាប្រទេសវេណេស៊ុយអេឡា បាននិយាយថា អាជ្ញាធរបានរកឃើញផែនការចំនួន ៥ ដើម្បីបង្កអស្ថិរភាពដល់ប្រទេស រួមទាំងផែនការធ្វើឃាតលោក Maduro ផងដែរ។

បណ្ដាញសង្គម

ព័ត៌មានថ្មីៗ

មន្ត្រីជាន់ខ្ពស់ក្រសួងមហាផ្ទៃណែនាំដល់គណៈអភិបាលខេត្តត្រូវសាមគ្គីឯកភាពផ្ទៃក្នុងដើម្បីប្រសិទ្ធភាពការងារ

ចិនបញ្ជាក់ថា ខ្លួនប្រឆាំងដាច់ណាត់ ចំពោះការបង្ខិតបង្ខំ ខណៈម៉ិកស៊ិកគិតគូរដំឡើងពន្ធលើរថយន្ត

លោក Netanyahu ព្រមានកាតាឲ្យបណ្តេញក្រុមមន្រ្តីហាម៉ាស ពីព្រោះបើពួកគេមិនធ្វើ ពួកយើងនឹងធ្វើវា

សមាជិកសភាបារាំងជំរុញឲ្យមាន «បម្រាមគោចរឌីជីថល» សម្រាប់ក្មេងជំទង់

នាយករដ្ឋមន្រ្តីប៉ូឡូញនិយាយទៅកាន់អ្នកបើកបរយន្តហោះ ក្រោយដែនអាកាសរបស់ខ្លួនត្រូវបានបំពាន

ចក្រភពអង់គ្លេស និងរាជរដ្ឋាភិបាលកម្ពុជា ចុះអនុស្សរណៈជាមួយគ្នាបង្កើតភាពជាដៃគូរយៈពេល៣ឆ្នាំដើម្បីពង្រឹងក្របខណ្ឌបទដ្ឋានគតិយុត្តនៅកម្ពុជា

ឯកឧត្តម ហេង រតនា ជួបពិភាក្សាការងារជាមួយគណៈគ្រប់គ្រងប្រតិបត្តិការអង្គការជំនួយប្រជាជនន័រវេស (NPA) ប្រចាំនៅអូស្លូរ

ប្រមុខការទូតកម្ពុជា និងវៀតណាម ឯកភាពពង្រឹងកិច្ចសហប្រតិបត្តិការលើវិស័យនានា និងជំរុញបន្ថែមលើវិស័យមានសក្តានុពលថ្មីៗ

នាយករដ្ឋមន្រ្តីព័រទុយហ្គាល់ ជួបពិភាក្សាការងារជាមួយសមភាគីជប៉ុន នៅទីក្រុងតូក្យូ

ក្រុមអ្នកស្ម័គ្រចិត្តផ្តល់ជំនួយដល់ជនរងគ្រោះដោយសារទឹកជំនន់នៅរដ្ឋ Punjab ប្រទេសឥណ្ឌា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877